(꩑-꩕) ꩜ ꨗꨫ ꨕꨨꨵꨮꨭ ꨆꩊ ꨧꨫ ꨚꨗꩍ ꨕꨫ ꨀꨣꨪꨢ ꩝ ꨚꨤꨬ ꨧꨭꨟꨮꩆ ꨓꨚꨣ ꨚꨴꨯꨱꩃ ꨤꨪꨝꨰꩍ ꨦꨰꩍ ꨕꨫ ꨦꨰꩍ ꩞ ꨚꨓꨯꨱ ꨆꨭꨣꨠ ꨝꨦꨚ ꨧꨭꨗꨪꩅ ꨈꨪꨗꨴꨮꩍ ꩝ ꨚꨋꩇ ꨖꨮꩉ ꨕꨯꨮꨝꨪꨦꨴꨮꩍ ꨚꨨꨵꩇ ꨆ ꨝꨶꨯꩊ ꨕꨫ ꨈꨴꨮꩇ ꨗꨮꨈꩉ ꩞ ꨧ ꨜꨭꩆ ꨆꨭꨢꨮꨭ ꨝꨤꨪꨋ ꨕꨫ ꨆꨴꨲꩍ ꨓꨗꨴꩆ ꩝ ꨧꨳꩌ ꨜꨭꩆ ꨧꨳꩌ ꨖꩆ ꨝꨪꨊꨭ ꨟꨮꨝꨯꨱꩍ ꨅꩍ ꨟꨮꨕ ꩞ ꨝꨪꨟꨮꩃ ꨆꨭꨝꨟꨫ ꨧꨫ ꨝꨪꨌꩆ ꨕꨴꨲꩀꨦ ꩝ ꨨꨮꩄ ꨀꨝꨪꩍ ꨇꨯꨱꩊ ꨁꨓ ꩝ ꨧꨪꨝꨮꩉ ꨟꩃ ꨧꨳꩌ ꨓꨮꩊ ꨨꨕꨬ ꩞ ꨆ ꨛꨯꨮ ꨁꨓ ꨗꨫ ꨅꩍ ꨨꨭ ꨀꨗꩀ ꨤꨪꨆꨬ ꩝ ꨚꨆꨴꨮꩃ ꨗꨮꨈꩉ ꨧꨯꨱꩃ ꨚꨤꨬ ꩝ ꨝꨶꨯꩊ ꨧꨭꨞꩇ ꨔꨭꩀ ꨨꨓꨰ ꩞ (꩖-꩑꩐) ꨚꨓꨯꨱ ꨝꨪꨙꩃ ꨚꨗꨴꨯꨱꩃ ꨎꨝꨶꨯꩊ ꨍꨪꩆ ꨝꨳꨰ ꩝ ꨃꨥ ꨨꨶꨮꩉ ꨣꨎꨴꨮꩃ ꨟꨮꨣꨰ ꩝ ꨓꨐꨫ ꨆ ꨅ ꨨꨭ ꨀꨗꩀ ꩞ ꨨꨶꨮꩉ ꨚꨙꩉ ꨚꨓꨯꨱ ꨗꨯꨱ ꨕꨫ ꨆꨴꨲꩍ ꨓꨧꨪꩀ ꩝ ꨕꨯꨛꨩꨝꨴꨬ ꨧꨭꨗꨪꩅ ꨈꨪꨗꨴꨮꩍ ꩝ ꨧꨭꨗꨭꨥ ꨝꨪꨗꨪꩀ ꨀꨝꨪꩍ ꨟꨮꨣꨰ ꩞ ꨝꨭꩍ ꨕꨫ ꨓꨮꩊ ꨟꩍ ꨝꨪꨊꨭ ꨁꨗꨈꨪꨣꩈ ꩝ ꨗꨯꨣꨚꩅ ꨦꨗꩃ ꨕꨫ ꨨꨓꨰ ꩝ ꨆꨳꨮꩃ ꨥꨮꩀ ꨓꨟ ꨣꨎꨀꨬ ꩞ ꨤꨪꨇꩍ ꨎꨈ ꨝꨫ ꨝꩀ ꨛꨩꩀ ꨚꨵꨭꩍ ꨨꨣꨬ ꩝ ꨀꨶꨮꩆ ꨆ ꨕꨯꨦꨴꨮꩍ ꨝꨴꨬ ꨁꨣꨯꨮꩋ ꨝꨪꨎꩀ-ꨍꨰꨘ ꩞ ꨕꨯꩌ ꨘꩆ ꨐꨭ ꨝꨴꨬ ꨀꨋꩆ ꨁꨗꨴ ꨚꨓꨴ ꩝ ꨁꨣꨯꨮꩋ ꨦꨗꨫ ꨝꨮꩃꨦ ꨕꨫ ꨈꨴꨮꩇ ꨗꨮꨈꩉ ꨎꩃ ꨐꨭ ꨔꨮꨭ ꩞ (꩑꩑-꩑꩕) ꨧ ꨗꨮꨈꩉ ꨐꨭ ꨝ ꨟꩍ ꨚꨓꨰꩍ ꨤꨪꨂꨥ ꩝ ꨧ ꨗꨮꨈꩉ ꨓꨴ ꨔꨮꨭ ꨚꨓꨳ ꨀꨟꨴꩀ ꨟꩍ ꨝꨪꨊꨭ ꩞ ꨚꨓꨯꨱ ꨝꨪꨙꩃ ꨝꨣꨭꨥ ꨟꩃ ꨐꨭ ꨝ ꨓꨟ ꩝ ꨤꨪꨠꩍ ꨗꨯꨣꨚꩅ ꨀꨶꨮꩆ ꨆ ꨨꨭ ꨀꨗꩀ ꨤꨪꨆꨬ ꨦꨯꨮꩍ ꨕꨫ ꨦꨯꨮꩍ ꩞ ꨚꨓꨳ ꨁꨆꩆ ꨕꨯꨱꩀ ꨕꨤꩌ ꨌꨥꩆ ꨟꩍ ꩝ ꨔꨮꨭ ꨢꨯꨱꩌ ꨧꨭꨗꨪꩅ ꨈꨪꨗꨴꨮꩍ ꨁꨆꩆ ꨝꨪꨌꩆ ꨚꨶꨮꩄ ꨆꨵꨯꨱ ꩞ ꨧ ꨗꨮꨈꩉ ꨐꨭ ꨚꨓꨳ ꨇꩆ ꨧꨭ ꨀꨥ ꩝ ꨝ ꨓꨟ ꨤꨪꨠꩍ ꨚꨓꨯꨱ ꨀꨶꨮꩆ ꨆ ꨨꨭ ꨁꨗꨴ ꨚꨓꨴ ꩞ ꨕꨤꩌ ꨗꨮꨈꩉ ꨚꨤꨬ ꨧꨭꨟꨮꩆ ꨓꨚꨣ ꩝ ꨟꩍ ꨚꨣꨳꩀ ꨕꨫ ꨣꨳꨪꩌ ꨟꨮꨓ ꨀꨝꨪꩍ ꨟꩃ ꨝ ꨣꨰ ꨀꨤꨪꩆ ꩞ (꩑꩖-꩒꩐) ꨕꨯꩌ ꨘꩆ ꨁꨆꩆ ꨟꩍ ꨧꨫ ꨝꨪꨌꩆ ꩝ ꨢꨮꨭ ꨣ ꨙꨭꩃ ꨀꨟꨴꨰꩀ ꨕꨫ ꨇꩆ ꩝ ꨓꨔꨶꩀ ꨓꨊꨪꩆ ꨨꨯꨱꩀ ꨀꨝꨪꩍ ꩞ ꨁꨗꨴ ꨚꨓꨴ ꨇꩆ ꨧꨭ ꨀꨥ ꨟꩃ ꨟꩍ ꩝ ꨐꨭ ꨚꨎꩀ ꨕꨫ ꨊꨯꨱꩀ ꨟꨮꨢꨯꨣꩍ꩝ ꨁꨣꨯꨮꩋ ꨝꨪꨎꩀ-ꨍꨰꨘ ꩞ ꨀꨟꨴꩀ ꨟꩍ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩝ ꨚꨓꨯꨱ ꨆꨭꨣꨠ ꨝꨦꨛꨩ ꩝ ꨓꨝꨳꩀ ꨝꨪꨙꩃ ꨆꨳꨮꩃ ꨛꨩꨟꨁꨪꩆ ꩞ ꨕꨯꩌ ꨘꩆ ꨀꨟꨴꩀ ꨟꩍ ꨝ ꨚꨮꩉ ꩝ ꨗꨯꨱ ꨤꨰꩀ ꨕꨤꩌ ꨗꨮꨈꩉ ꨚꨓꨯꨱ ꨣꨪꨎꨩ ꨦꩍ ꨦꨶꩆ ꩞ ꨕꨤꩌ ꨔꨶꨮꩆ ꨟꨭꩀ ꨣꨗꨰꩀ ꨝꨣꨪꨢꨯꨮꩆ ꩝ ꨐꨭ ꨕꨶꨯꩆ ꨣꨯꨱꩃ ꨀꨶꨮꩆ ꨓꨝꨶꨮꩆ ꩝ ꨤꩄ ꨀꨗꩀ ꨕꨯꨮꨝꨪꨓ ꩞ (꩒꩑-꩒꩕) ꨕꨯꩌ ꨘꩆ ꨐꨭ ꨓꨐꨫ ꨁꨗꨴ ꨚꨓꨴ ꩝ ꨌꨬ ꨀꨗꩀ ꨕꨯꨝꨪꨓ ꩝ ꨨꨚꩀ ꨤꨪꨝꨪꩀ ꨚꨤꨬ ꨗꨮꨈꩉ ꩞ ꨝꨪꨣꨭꨥ ꨟꩃ ꨁꨗꨴ ꨚꨓꨴ ꨧꨫ ꨝꨪꨌꩆ ꩝ ꨕꨫ ꨆꩊ ꨀꨟꨴꩀ ꨝ ꨚꨮꩉ ꩝ ꨟꩃ ꨧꨭꨟꨮꩆ ꨓꨚꨣ ꩞ ꨆꨮꨭ ꨗꨫ ꨀꨗꩀ ꨚꨓꨯꨱ ꨆꨭꨣꨠ ꨝꨦꨛꨩ ꩝ ꨕꨯꨱꩀ ꨧꨯꨱꩃ ꨟꨭꩀ ꨣꨯꨱꩃ ꨝ ꩝ ꨌꨤꩍ ꨕꨫ ꨁꨗ ꨋꩆ ꨀꨟ ꩞ ꨝꨵꨯꨱꩍ ꨓꨶꨬ ꨟꨭꩀ ꨗꨯꨱ ꨛꨩꨝꨵꨬ ꨝꨪꨊꨭ ꩝ ꨝꨤꨪꨕꨥ ꨟꨮꩆꨓꨴꨫ ꩝ ꨤꨪꨆꨭꨥ ꨆꨳꨮꩃ ꨣꨯꨱꩃ ꨎꨳꨮꩃ ꨀꨗꩀ ꩞ ꨟꨮꨢꩍ ꨆꨭꨔꨯꨱꩅ ꨆꨮꨭ ꨝꨴꨬ ꨆꨢꨆꩉ ꨆ ꨟꨭꩀ ꩝ ꨀꨮꩀ ꨤꨪꨚ ꨎꨶꨰ ꨆꨂꩀ ꩝ ꨆꨮꨭ ꨀꨗꨪꩅ ꨁꨗꨴ ꨚꨓꨴ ꩞ (꩒꩖-꩓꩐) ꨆꨭꨨꨵꨯꨱꩌ ꨀꨗꩀ ꨚꨓꨯꨱ ꨆꨭꨣꨠ ꨝꨦꨛꨩ ꩝ ꨕꨯꨱꩀ ꨧꨯꨱꩃ ꨟꨭꩀ ꨣꨯꨱꩃ ꨝ ꩝ ꨙ ꨟꨭꩀ ꨨꩊꨥꩊ ꩞ ꨕꨯꩌ ꨘꩆ ꨟꨮꨕ ꨚꨓꨯꨱ ꨗꨯꨱ ꨀꨠꩊ ꩝ ꨕꨮꩇ ꨡꨯꩍ ꨕꨫ ꨎꨤꩆ ꨀꨗꩀ ꨁꨗ ꨒꨴꨶꩍ ꨟꩍ ꩞ ꨝꨵꨯꨱꩍ ꨚꨓꨯꨱ ꨚꨙꨪꩀ ꨆꨔꨭꩉ ꨆꨳꨮꩃ ꨚꨗꩍ ꩝ ꨒꨮꩇ ꨀꨗꩀ ꨒꨴꨶꩍ ꨟꩍ ꩝ ꨤꨪꨝꨭꩍ ꨓꨘꩆ ꨝꨵꨯꨱꩍ ꨟꨮꨓꨰ ꩞ ꨕꨯꩌ ꨘꩆ ꨚꨓꨯꨱ ꨈꨪꨤꩄ ꨥꨮꩀ ꨟꨮꨣꨰ ꩝ ꨟꩃ ꨦꨗꩃ ꨕꨤꩌ ꨨꨓꨰ ꩝ ꨕꨟꩆ ꨀꨗꩀ ꨒꨴꨶꩍ ꨟꩍ ꩞ ꨚꨓꨯꨱ ꨝꨪꨙꩃ ꨚꨗꨴꨯꨱꩃ ꨎꨝꨶꨯꩊ ꨓꨯꨱꩌ ꨀꨝꨪꩍ ꩝ ꨁꨇꩆ ꨙꨯꩌ ꨆ ꨚꨗꩍ ꨓꩀ ꨕꨫ ꨝꨯꨮꩊ ꨗꨯꨱ ꨀꨠꩊ꩞ (꩓꩑-꩓꩕) ꨆꨮꨭ ꨗꨫ ꨎꨳꨮꩃ ꨗꨯꨣꨚꩅ ꨚꨆꨴꨮꩃ ꨗꨮꨈꩉ ꩝ ꨓꨮꩊ ꨂꨚꩀ ꨣꨚꨎꩆ ꩝ ꨀꨗꩀ ꨓꨌꨯꨱꨥ ꨅꩍ ꨟꨮꨕ ꩞ ꨦꨴꨫ ꨚꨤꨳꨮꩃ ꨧꨭꨎꩃ ꨗꨣꩍ ꨆꨭꨨꨴꨳꨫ ꨆꨭꨨꨴꨳ ꩝ ꨍꨪꩆꨝꨳꨰ ꨆ ꨁꨓ꩝ ꨆꨟꨫ ꨆꨂꩀ ꨕꨤꩌ ꨨꨓꨰ ꩞ ꨕꨶꩍ ꨎꨴꨭ ꨝꨫ ꨨꨭ ꨀꨗꩀ ꨝ ꨟꨮꨣꨰ ꩝ ꨝꨤꨪꨕꨥ ꨟꨮꩆꨓꨴꨫ ꨐꨭ ꨝꨳꨰ꩝ ꨓꨐꨫ ꨈꨴꨮꩇ ꨈꨴꩌ ꨚꨣꨫ ꩞ ꨨꨟꨳꨪꩅ ꨚꨗꨶꨮꩄ ꨕꨫ ꨝꨪꨟꨮꩃ ꨆꨭꨝꨪꨟꨫ ꩝ ꨨꨆꨯꨮ ꨟꨮꨕ ꨎꨴꨭꨩ ꨓꨗꨫ ꩝ ꨚꩀ ꨝꨪꨟꨯꩂ ꨦꨮꩅꨓꨪꩀ ꩞ ꨟꨮꨢꩍ ꨆꨳꨮꩃ ꨗꨯꨱ ꨦꨗꩃ ꨆꨭꨙ ꨅꩍ ꨔꨮꨭ ꨤꨪꨝꨪꩀ ꩝ ꨈꩆ ꨌꨮꩀ ꨓꨚ ꨓꨧꨪꩀ ꩝ ꨔꨬ ꨂꨣꩃ ꨗꨯꨱ ꨧꨫ ꨓꨮꩊ ꩞ (꩓꩖-꩔꩐) ꨝꨤꨪꨕꨥ ꨟꨮꩆꨓꨴꨫ ꨟꨮꨣꨰ ꨝꨪꨌꩆ ꩝ ꨛꨩꨔꨮꨭ ꨀꨝꨪꩍ ꨚꨗꨶꨮꩄ ꨢꨮꨭ ꨘꩆ, ꨚꨓꨯꨱ ꨈꨪꨗꨯꨱꩃ ꨆꨳꨮꩃ ꨛꨩꨟꨮꨓꨰ ꩞ ꨝꨤꨪꨕꨥ ꨟꨮꩆꨓꨴꨫ ꨓꨝꨳꩀ ꨟꨮꨣꨰ ꩝ ꨁꨗꨴ ꨚꨓꨴ ꨘꩆ ꨆꨳꨮꩃ ꨝꨳꨰ ꩝ ꨝꨪꨌꩆ ꨤꩄ ꨐꨭ ꨆꨳꨮꩃ ꨗꨯꨱ ꩞ ꨚꨓꨯꨱ ꨣꨶꩍ ꨇꩆ ꨧꨭ ꨀꨥ ꨧꨳꩌ ꨟꨮꨓꨶꨥ ꩝ ꨆꨭꨨꨵꨯꨱꩌ ꨀꨗꩀ ꨤꩄ ꨆꨳꨮꩃ ꨗꨯꨱ ꩝ ꨀꨟ ꨀꨤꨪꩆ ꨝ ꨀꨊꨶꨬ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨓꨝꨳꩀ ꨟꨮꨣꨰ ꩝ ꨕꨯꩌ ꨦꨗꩃ ꨕꨤꩌ ꨨꨓꨰ ꩝ ꨟꨮꨣꩅ ꨐꨭ ꨆꨳꨮꩃ ꨗꨯꨱ ꩞ ꨟꨭꩀ ꨣꨗꨰꩀ ꨝꨣꨪꨢꨯꨮꩆ ꨚꨣꨤꨯꨱ ꩝ ꨀꨗꨪꩅ ꨓꨌꨯꨱꨥ ꨤꩄ ꨆꨳꨮꩃ ꨗꨯꨱ ꩝ ꨣꨪꨡꨪ ꨣꨪꨡꨲꩇ ꨤꨯ ꨧ ꨕꨴꨬ ꩞ (꩔꩑-꩔꩕) ꨁꨗꨴ ꨚꨓꨴ ꨧꨫ ꨓꨆꨯꨮ ꨓꨴꨭꩍ ꨚꨤꨬ ꩝ ꨣꨪꨟꨯꨱꩃ ꨌꨈꨭꨥ ꨚꨯꨮꩇ ꨟꨮꨣꨰ ꩝ ꨤꨪꨟꩆ ꨧꨯꨱꩃ ꨆꨴꨭꩀ ꨣꨪꨧ ꩞ ꨆꨆꨭꩍ ꨕꨀ ꨨꨮꩄ ꨛꨯꨮ ꨁꨗꨴ ꨚꨓꨴ ꩝ ꨁꨣꨯꨮꩋ ꨦꨗꨫ ꨝꨮꩃꨦ ꩝ ꨀꨗꩀ ꨚꨓꨯꨱ ꨛꨩꨚꨴꨯꨱꩃ ꨗꨮꨈꩉ ꩞ ꨨꨟꨪꩅ ꨦꩇ ꨓꨈꨭꨣꨮꩅ ꨃꨥ ꨝꨪꨌꩆ ꩝ ꨕꨫ ꨆꩊ ꨀꨟꨴꩀ ꨝ ꨚꨮꩉ ꩝ ꨁꨗ ꨀꨟ ꨛꨯꨮ ꨧꨭꨀꨶꨮꩆ ꩞ ꨓꨟ ꨕꨤꩌ ꨧꩃ ꨟꨮꨈꨪꩀ ꨋꩇ ꨖꩉ ꩝ ꨆꨭꨨꨴꨳꨫ ꨆꨭꨨꨴꨳ ꨚꨤꨬ ꨗꨮꨈꩉ ꩝ ꨕꨮꩇ ꨝꨪꨟꨮꩃ ꨆꨭꨝꨪꨟꨫ ꩞ ꨟꩃ ꨆꩊ ꨕꨨꨵꩀ ꨓꨶꨬ ꨛꨯꨮ ꨟꨰ ꨦꨗꨫ ꩝ ꨓꨮꩊ ꨂꨣꩀ ꨟꩃ ꨣꨧꨫ ꩝ ꨟꨮꨓꨰ ꨀꨝꨪꩍ ꨢꨮꨭ ꨝꨪꨗꨯꨮꩋ ꩞ (꩔꩖-꩕꩐) ꨗꨟꨮꩋ ꨧꨭꨆꩉ ꨚꩀ ꨧꨭꨗꨪꩅ ꨕꨯꨮꨝꨪꨦꨴꨮꩍ ꩝ ꨧ ꨟꨮꨓ ꨝꨴꨬ ꨡꨯꩍ ꩝ ꨧꨭꨀꨶꨮꩆ ꨆ ꨛꨯꨮ ꨁꨗꨴ ꨚꨓꨴ ꩞ ꨇꨯꨱꩊ ꨕꨨꨵꩀ ꨟꨮꨓꨰ ꨕꨫ ꨣꩀ ꨇꨪꩀ ꨈꨨ ꩝ ꨕꨫ ꨊꨯꨱꩀ ꨌꨮꩀ ꨀꨙꨮꩊ ꨢꨧ ꩝ ꨆꨆꨬ ꨕꨫ ꨌꨬ ꨚꨵꨰꩍ ꨝꨫ ꨓꨴꨭꩍ ꩞ ꨁꨗꨴ ꨚꨓꨴ ꨧꨫ ꨓꨆꨯꨮ ꨎꨴꨮꩃ ꨡꨯꩍ ꩝ ꨣꩀ ꨓꨴꨭꩆ ꨟꨮꨣꨰ ꨟꨮꨓꨲꩍ ꨌꨮꩀ ꨐꨭ ꨃꨥ ꨁꨗꨴ ꨚꨓꨴ ꩞ ꨨꨮꩄ ꨀꨯꨱꩃ ꨀꨗꩀ ꨣꨗꨰꩍ ꨣ ꨟꨮꨕ ꩝ ꨆꨮꨭ ꨝꨴꨬ ꨚꨕꩀ ꨤꩀꨆꨭꨣꨝ ꩝ ꨆ ꨨꨲ ꨓꨗꨫ ꨝꨰꩀ ꨆ ꨦꩍ ꩞ ꨗꨟꨮꩋ ꨧꨭꨆꩊ ꨚꩀ ꨧꨭꨗꨪꩅ ꨕꨯꨮꨝꨪꨦꨴꨮꩍ ꩝ ꨐꨭ ꨛꨩꨟꨮꨓꨰ ꨣꩀ ꨝꨵꨯꨱꩍ ꩝ ꨝꨳꩀ ꨢꨯꨱꩌ ꨧꨩ ꨆꨦꨮꩆ ꩞ (꩕꩑-꩕꩕) ꨤꨰꩀ ꨓꨴꨭꩆ ꨧꨭꨟꨭ ꨎꨤꨮꩍ ꨌꨮꩀ ꨧꨭ ꨌꨮꩉ ꩝ ꨣꨪꨟꨯꨱꩃ ꨌꨈꨭꨥ ꨀꨶꨮꩆ ꨓꨝꨶꨮꩆ ꩝ ꨤꨪꨟꩆ ꨧꨯꨱꩃ ꨆꨴꨭꩀ ꨣꨪꨧ ꩞ ꨁꨗꨴ ꨚꨓꨴ ꨓꨟ ꨎꨴꨮꩃ ꨕꨤꩌ ꨈꨪꨨ ꩝ ꨟꩍ ꨚꨣꨳꩀ ꨤꨯ ꨟꨮꨕ ꩝ ꨕꨫ ꨣꨳꨪꩌ ꨚꨆꩉ ꨝꨶꨪꩋꨦꨘ ꩞ ꨕꨫ ꨊꨯꨱꩀ ꨌꨮꩀ ꨘꩆ ꨧ ꨜꨭꩆ ꨆꨭꨣꨠ ꩝ ꨧꨳꩌ ꨖꩆ ꨟꨮꨝꨯꨱꩍ ꨝꨪꨊꨭ ꩝ ꨈꨵꨯꨱꩃ ꨟꨮꨓꨲꩍ ꨀꨕꨮꩉꨨ ꩞ ꨐꨭ ꨗꨯꨱ ꨓꨮꩊ ꨆꨭꨝꨪꨟꨫ ꨃꨥ ꨕꨀ ꩝ ꨨꨮꩄ ꨛꨯꨮ ꨁꨗꨴ ꨚꨓꨴ ꩝ ꨚꨈꩉ ꨕꨨꨵꩀ ꨧꨳꩌ ꨆꨳꨮꩃ ꨡꨮꩃ ꩞ ꨡꨮꩃ ꨀꨧꩉ ꨆꨵꩀ ꨓꨟꨭꩍ ꨝꨵꨯꨱꩍ ꨎꨳꨮꩃ ꩝ ꨀꨗꩀ ꨓꨌꨯꨱꨥ ꨡꨶꩀ ꨕꨫ ꨆꨴꨭꩃ ꩝ ꨓꨖꨭꨥ ꨧꨭꨗꨪꩅ ꨕꨯꨮꨝꨪꨦꨴꨮꩍ ꩞ (꩕꩖-꩖꩐) ꨁꨗꨴ ꨚꨓꨴ ꨧꨫ ꨓꨆꨯꨮ ꨗꨯꨱ ꨓꨴꨭꩍ ꩝ ꨕꨮꩇ ꨡꨯꩍ ꨀꨟꨴꩀ ꨟꩍ ꩝ ꨓꨳꨯꨱꩃ ꨝꨪꨢꨯꨮꩆ ꨆꨟꨮꩃ ꨟꨴꨰ ꩞ ꨌꨈꨶꨮꩉ ꨝꨪꨊꨭ ꨌꨳꨪꩌ ꨚꨝꩍ ꨣꩌ ꨓꨊꨰ ꩝ ꨌꨣꨥ ꨨꨕꩃ ꨀꨝꨪꩍ ꨟꨮꨣꨰ ꩝ ꨔꩅ ꨚꨢꩀ ꨁꨗꨴ ꨚꨓꨴ ꩞ ꨗꨯꨱ ꨡꨯꩍ ꨧ ꨜꨭꩆ ꨝꨪꨊꨭ ꨢꨯꨣꨪꨆ ꩝ ꨘꩅꨓꨪꩀ ꨚꨶꨪꩋꨦꨚ ꩝ ꨓꨝꨮꩃ ꨟꩍ ꨃꨥ ꨕꨀ ꩞ ꨨꨮꩄ ꨛꨯꨮ ꨧꨭꨗꨪꩅ ꨈꨪꨗꨴꨮꩍ ꨁꨗꨴ ꨚꨓꨴ ꩝ ꨚꨰꩀ ꨕꨨꨵꩀ ꨝꨵꨯꨱꩍ ꨝ ꩝ ꨚꨵꩍ ꨕꨫ ꨆꨳꨮꩃ ꨧ ꨀꨦꨪꩅ ꩞ ꨧ ꨜꨭꩆ ꨎꨴꨰ ꨕꨮꩃ ꨕꨫ ꨆꨴꨲꩍ ꨚꨣꨝꩅ ꩝ ꨕꨫ ꨌꨮꩀ ꨙꨮꩉ-ꨎꨰ-ꨢꨯꨮꩅ ꩝ ꨁꨗꨴ ꨚꨓꨴ ꨚꨕꨬ ꨓꨘꩆ ꩞ (꩖꩑-꩖꩕) ꨐꨭ ꨎꨴꨮꩃ ꨓꨚꩀ ꨨꨣꨬ ꨓꨈꨯꩀ ꨡꨯꩍ ꨝꨶꨯꩊ ꩝ ꨣꨪꨝꨭꨥ ꨓꨟꩆ ꨣꨤꨯ ꨣꨎꩆ ꩝ ꨣꨪꨝꩇ ꨀꨣꨯꨦꩍ ꨟꨮꨣꨰ ꩞ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨆꨯꩅ ꨍꨰ ꩝ ꨍꨰꩅ ꨟꩍ ꨝꨪꨊꨭ ꨚꨤꨰ꩝ ꨛꨩꨨꨤꨶꨬ ꨤꩍ ꨆꨥꩍ ꩞ ꨣꨪꨝꩇ ꨟꨣꨫ ꨆꨯꨱꩃ ꨚꨟꨴꨮ ꨕꨶ ꨈꩍ ꩝ ꨛꨩꩀ ꨚꨵꨭꩍ ꨕꨯꩀ ꨟꨮꨣꨳꩍ ꩝ ꨐꨭ ꨚꨎꩀ ꨕꨫ ꨊꨯꨱꩀ ꨧꨪꩂ ꨟꩍ ꩞ ꨎꨴꨮꩃ ꨓꨚꩀ ꨨꨣꨬ ꨓꨈꨯꩀ ꨘꩅꨓꨔꨪꩍ ꩝ ꨝꨶꨯꩊ ꨧꨭ ꨞꩇ ꨧꨭꨟꨮꩆ ꨈꨪꨤꨯꨮꩍ ꩝ ꨣꨪꨝꨭꨥ ꨓꨟꩆ ꨤꩀꨦ ꩞ ꨀꨗꩀ ꨚꨓꨯꨱ ꨁꨪꩆ ꨧꨭꨟꨮꩆ ꨤꨯꨈ ꩝ ꨕꨤꩌ ꨗꨮꨈꩉ ꨐꨭ ꨨꨓꨶ ꩝ ꨟꨮꨣꨰ ꨆꨳꨮꩃ ꨕꨶꩍ ꨗꨮꨈꩉ ꨝꨪꨆꩆ ꩞ (꩖꩖-꩗꩐) ꨐꨭ ꨙꨪꩀ ꨕꨫ ꨊꨯꨱꩀ ꨀꨣꨯꨱꩃ ꨀꨧꨰꩍ ꨆꨯꨱꩀ ꨚꨮꩉ ꩝ ꨣꨪꨝꩇ ꨀꨣꨯꨦꩀ ꨝꨪꨌꩆ ꩝ ꨓꨐꨫ ꨨꨚꩀ ꨈꩍ ꨆꨳꨮꩃ ꨗꨯꨱ ꩞ ꨕꨯꩌ ꨘꩆ ꨧꨭꨟꨮꩆ ꨎꨤꨯꨮ ꨐꨭ ꨎꩀ ꨟꨮꨧꨯꨱ ꩝ ꨆ ꨕꨶ ꨟꩃ ꨀꨗꩀ ꨚꨓꨯꨱ ꩝ ꨕꨯꨱꩀ ꨟꨮꨧꨭꩍ ꨈꨮꩇ ꨓꨘꩆ ꩞ ꨐꨭ ꨚꨝꨪꨗꨯꨮꩋ ꨝꨶꨯꩊ ꨧꨭ ꨞꩇ ꨤꨯ ꨣꨎꩆ ꩝ ꨁꨗꨴ ꨚꨓꨴ ꨗꨯꨱ ꨓꨮꩊ ꩝ ꨓꨐꨫ ꨨꨈꨰꩅ ꨦꨴꨮꩍ ꨈꨪꨙꨫ ꩞ ꨨꨮꩄ ꨅꩃ ꨧ ꨝꨯꨱꩍ ꨀꨆꨯꨱꩀ ꨟꨮꨣꨰ ꨓꨗꨫ ꩝ ꨨꨲ ꨎꨶꨰ ꨚꨈꩆ ꨈꨪꨙꨫ ꩝ ꨆꨮꨭ ꨟꨮꨧꨭꩍ ꨟꨴꨮꩀ ꨗꨮꨈꩉ ꩞ ꨁꨗꨴ ꨚꨓꨴ ꨐꨭ ꨈꨪꨗꨯꨱꩃ ꨝꨵꨯꨱꩍ ꨝꨪꨌꩆ ꩝ ꨧꨭꨟꨮꩆ ꨎꨤꨯꨮ ꨚꨶꨮꩄ ꨢꨮꨭ ꨘꩆ ꩝ ꨤꨪꨆꨮꨭ ꨕꨫ ꨄꨰ ꨎꨶꨰ ꨟꨮꨧꨭꩍ ꩞ (꩗꩑-꩗꩕) ꨧꨭꨟꨮꩆ ꨎꨤꨯꨮ ꨛꨩꨙꨪꩀ ꨆꨔꨭꩉ ꨝꨵꨯꨱꩍ ꨚꨗꩍ ꩝ ꨁꨗꨴ ꨚꨓꨴ ꨧꨭꨗꨪꩅ ꨈꨪꨗꨴꨮꩍ ꩝ ꨅꩍ ꨟꨮꨕ ꨨꨶꨮꩄ ꨆꨭꨙ ꩞ ꨙꨰꩍ ꨀꨚꨶꨬ ꨈꨵꨯꨱꩃ ꨟꨮꨓꨲꩍ ꨀꨕꩉꨨ ꩝ ꨐꨭ ꨟꩀ ꨚꨕꩀ ꨤꩀꨆꨭꨣꨝ ꩝ ꨛꨩꨟꨮꨓꨰ ꨧꨭꨟꨮꩆ ꨎꨤꨯꨮ ꩞ ꨝꨶꨯꩊ ꨞꩇ ꨣꨪꨝꨭꨥ ꨓꨟꩆ ꨙꨶꨮꩄ ꨀꨝꨪꩍ ꩝ ꨧꨫ ꨟꨮꨢꨯꨱꩌ ꨧꨭꨗꨪꩅ ꨈꨪꨗꨴꨮꩍ ꩝ ꨁꨣꨮꩋ ꨝꨪꨎꩀꨍꨰꨘ ꩞ ꨣꨪꨝꩇ ꨣꨯꨦꩍ ꨆꨭꨆꨭꩍ ꨝꨵꨯꨱꩍ ꨕꨀ ꩝ ꨐꨭ ꨝꨪꨌꩆ ꨤꩄ ꨝ ꩝ ꨝꨫ ꨓꨮꩊ ꨀꨟ ꨟꩃ ꨝꩀ ꨨꨓꨰ ꩞ ꨚꨓꨯꨱ ꨣꨎ ꨦꩍ ꨦꨶꩆ ꨓꨳꩇ ꨟꨮꨣꨰ ꩝ ꨁꨗꨴ ꨚꨓꨴ ꨦꩀꨓꨎꨰ ꩝ ꨕꨀ ꨝꨫ ꨓꨮꩊ ꨟꨮꨖꨪꩉ ꨣꨪꨢ ꩞ (꩗꩖-꩘꩐) ꨕꨤꩌ ꨓꨳꩆ ꨚꨓꨯꨱ ꨣꨘꩌ ꨁꨗꨴ ꨚꨓꨴ ꩝ ꨁꨣꨮꩋ ꨝꨪꨎꩀꨍꨰꨘ꩝ ꨀꨟ ꨚꨓꨯꩀ ꨀꨗꩀ ꨆ ꨦꩍ ꩞ ꨆꨭꨨꨴꨳꨫ ꨆꨭꨨꨴꨳ ꨦꨴꨫ ꨚꨤꨳꨮꩃ ꨧꨭꨎꩃ ꨗꨣꩍ ꩝ ꨀꨋꩆ ꨣꨝꩇ ꨣꨯꨦꩍ ꩝ ꨝꨳꨰ ꨚꨗꩍ ꨣꨎꨀꨬ ꩞ ꨚꨓꨯꨱ ꨚꨣꨶꩍ ꨨꨕꨯꩌ ꨂꨣꩃ ꨦꩀꨓꨴꨬ ꩝ ꨛꨩꩀ ꨚꨵꨭꩍ ꨟꩃ ꨧꨳꩌ ꨤꨪꨆꨬ ꩝ ꨔꩅ ꨚꨢꩀ ꨁꨗꨴ ꨚꨓꨴ ꩞ ꨧꨯꨱꩃ ꨚꨣꨶꩍ ꨨꨕꨯꩌ ꨂꨣꩃ ꨆꨢ ꨆꨢ ꩝ ꨛꨩꩀ ꨚꨵꨭꩍ ꨟꩃ ꨕꨣ ꩝ ꨔꩅ ꨚꨢꩀ ꨓꨶꨯꩆ ꨚꨓꨴꨫ ꩞ ꨝꨪꨗꨣ ꨀꨶꩀ ꨣꨪꨝꩇ ꨢꨭꩀ ꨟꨮꨣꨫ ꩝ ꨀꨕꨯꨱꩍ ꨚꨟꨴꨳꨮ ꨓꨶꨯꩆ ꨚꨓꨴꨫ ꩝ ꨕꨫ ꨊꨯꨱꩀ ꨆꨌꩀ ꨟꨮꨤꨪꨈꨰ ꩞ (꩘꩑-꩘꩕) ꨤꨪꨇꩍ ꨌꨈ ꨆꨯꨱꩃ ꨁꨗꨴ ꨚꨓꨴ ꨟꨮꨣꨰ ꩝ ꨡꨮꩃ ꨟꨮꨐꨭꩌ ꨦꩀꨓꨎꨰ ꩝ ꨧ ꨣꨪꨓꨭꩍ ꨨꨣꨬ ꨟꨮꨤꩌ ꩞ ꨁꨗꨴ ꨚꨓꨴ ꨧꨯꨱꩃ ꨚꨓꨴꨫ ꨎꩌꨎꩌ꩝ ꨣꩅꨘ ꨕꨥꨫ ꨁꨤꩌ ꩝ ꨝꨪꨣꨭꨥ ꨟꩃ ꨎꨳꨮꩃ ꨧꨭꨞꩉꨣꨪꨢ ꩞ ꨚꨓꨯꨱ ꨝꨪꨙꩃ ꨚꨗꨴꨯꨱꩃ ꨎꨝꨶꨯꩊ ꨆꨭꨨꨴꨳꨫ ꨆꨭꨨꨴꨳ ꩝ ꨟꩍ ꨚꨣꨳꩀ ꨕꨫ ꨣꨳꨪꩌ ꨟꨮꨓ ꩝ ꨀꨤꨪꩆ ꨀꨗꩀ ꨧꨯꨱꩃ ꨟꨮꨓꨭꨥ ꩞ ꨤꨪꨥꨪꩀ ꨨꨣꨬ ꨧꨴꨶꨰ ꨟꨮꨤꩌ ꨕꨨꨵꩀ ꨆꨳꨮꩃ ꨗꨯꨱ ꩝ ꨆꨭꨗ ꨕꨴꨬ ꨕꨫ ꨚꨓꨯꨱ ꩝ ꨝꨵꨯꨱꩍ ꨝꨪꨌꩆ ꨚꨗꨶꨮꩄ ꨆꨭꨖ ꩞ ꨓꨶꨯꩆ ꨚꨓꨴꨫ ꨧꨭꨀꨮꩆ ꨛꨯꨮ ꨁꨗꨴ ꨚꨓꨴ ꩝ ꨣꨝꩇ ꨀꨣꨯꨦꩍ ꨆꨳꨮꩃ ꨝ꩝ ꨚꨣꨤꨯꨱ ꨟꨮꨓꨲꩍ ꨎꨤꩆ ꩞ (꩘꩖-꩙꩐) ꨁꨗꨴ ꨚꨓꨴ ꨧꨫ ꨓꨆꨯꨮ ꨕꨫ ꨣꩍ ꨗꨮꨈꩉ ꩝ ꨎꨴꨮꩃ ꨝꨪꨙꩃ ꨡꨯꩍ ꨕꨪꩊ ꨓꨈꨪꨣꩀ ꨃꨥ ꨝꨪꨌꩆ ꩞ ꨇꨯꨱꩊ ꨕꨨꨵꩀ ꨕꨶꩍ ꨛꨯꨮ ꨕꨫ ꨤꨶꨪꩄ ꨗꨮꨈꩉ ꩝ ꨓꨮꩊ ꨂꨚꩀ ꨟꩃ ꨣꨚꨎꩆ ꩝ ꨟꨮꨓꨰ ꨕꨫ ꨟꨭꩀ ꨆꨜꨶꨣꨫ ꩞ ꨧ ꨜꨭꩆ ꨆꨭꨢꨮꨭ ꨕꨮꩃ ꨕꨫ ꨆꨴꨲꩍ ꨎꨤꨕꨫ ꩝ ꨁꨗꨴ ꨚꨓꨴ ꨧꨫ ꨓꨆꨯꨮ ꩝ ꨚꨕꨮꩍ ꨚꨕꨬ ꨓꩀ ꨂꨤ ꩞ ꨆꨜꨶꨣꨫ ꨓꨈꨯꩀ ꨕꨫ ꨕꨪꩊ ꨧꨭꨟꨮꩆꨘ ꩝ ꨟꨮꨣꨰ ꨆꨳꨮꩃ ꨡꨮꩃ ꨁꨗꨴ ꨚꨓꨴ ꩝ ꨝꨪꨣꨭꨥ ꨟꩃ ꨐꨭ ꨆꨳꨮꩃ ꨛꨩꨟꨮꨓꨰ ꩞ ꨝꨪꨣꨭꨥ ꨟꩃ ꨟꨭꩀ ꨆꨜꨶꨣꨫ ꨡꨰ ꩝ ꨧ ꨝꨯꨱꩍ ꨣꨙꨰꩀ ꨦꩀꨓꨎꨰ ꩝ ꨤꨪꨠꩍ ꨆ ꨛꨯꨮ ꨁꨗꨴ ꨚꨓꨴ ꩞ (꩙꩑-꩙꩕) ꨣꨙꨰꩀ ꨂꨤꨩ ꨧꩆꨎꨫ ꨆꨥꨘ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨟꨮꨕ ꩝ ꨣꨳꨪꩌ ꨚꨆꩉ ꨝꨶꨪꩋꨦꨘ ꩞ ꨁꨗꨴ ꨚꨓꨴ ꨓꨟ ꨕꨤꩌ ꨎꨤꨕꨫ ꩝ ꨓꨮꩊ ꨧꩃ ꨆꨜꨶꨣꨫ ꩝ ꨚꨢꩀ ꨕꨪꨕꩆ ꨟꨮꨗꩃ ꨀꨨꩉ ꩞ ꨝꨵꨯꨱꩍ ꨟꩃ ꨟꨭꩀ ꨆꨜꨶꨣꨫ ꨀꨇꩆ ꩝ ꨟꨮꨢꩍ ꨧꨫ ꨗꨯꨱ ꨕꨫ ꨎꨤꩆ ꩝ ꨤꨪꨆꨮꨭ ꨓꨈꨮꩉ ꨝ ꨧꨯꨱꩃ ꨕꨴꨬ ꩞ ꨓꨮꩊ ꨨꨣꨬ ꨦꨭꩀ ꨚꨓꨴꨫ ꨓꨴꨭꩆ ꨟꨮꨗꨬ ꩝ ꨕꨫ ꨀꨳ ꨓꨝꨮꩃ ꨧꨳꩌ ꨙꨬ ꩝ ꨧꨭ ꨘꩌ ꨕꨪꨢꨮꩃ ꨓꨯꨱꩌ ꨕꩉ ꩞ ꨁꨗꨴ ꨚꨓꨴ ꨢꨶꨯ ꨟꩀ ꨆꨢ ꨆꩉ꩝ ꨢꨶꨯ ꨕꨴꨬ ꨎꨳꨮꩃ ꨁꨆꩆ ꩝ ꨓꨟ ꨕꨤꩌ ꨀꨳ ꨓꨝꨮꩃ ꩞ (꩙꩖-꩑꩐꩐) ꨣꨭꩇ ꨚꨓꨴꨫ ꨦꨰꩍ ꨕꨫ ꨦꨰꩍ ꨡꨯꩍ ꨧꨫ ꨈꨵꨮꩃ ꩝ ꨨꨮꩄ ꨧꨭ ꨘꩌ ꨂꨣꩃ ꨕꨪꨢꨮꩃ ꩝ ꨟꨮꨗꨬ ꨝꨫ ꨕꨴꩍ ꨁꨓ ꨆꨳꨮꩃ ꨗꨯꨱ ꩞ ꨈꨵꨮꩃ ꨡꨯꩍ ꨤꨪꨨꨪꩀ ꨀꨝꩆ ꨇꩆ ꨧꨭ ꨀꨥ ꩝ ꨓꨳꩇ ꨧꨭ ꨣꨕꨪꨢꨮꩃ ꨗꨯꨱ ꩝ ꨕꨶꩍ ꨝꨫ ꨡꨯꩍ ꨝ ꨆ ꨆꨮꨭ ꩞ ꨨꨮꩄ ꨛꨯꨮ ꨕꨯꨱꩀ ꨀꨤ ꨨꨤꨶꨬ ꨆꨭꨢꨮꨭ ꩝ ꨛꨯꨮ ꨟꩀ ꨣꨬ ꨅ ꨔꨮꨭ ꩝ ꨤꨪꨨꨪꩀ ꨆꨢ ꨆꩉ ꨚꨓꨴꨫ ꩞ ꨝꨳꩀ ꨎꨮꩍ ꨨꨤꨭꩆ ꨟꨮꨣꨰ ꨕꨯꨱꩀ ꨓꨗꨫ ꩝ ꨨꨤꨬ ꨆꨢ ꨆꩉ ꨚꨓꨴꨫ ꩝ ꨨꨤꨭꩆ ꨆꨯꨮ ꨡꨯꩍ ꨧꨫ ꨈꨵꨮꩃ ꩞ ꨁꨗꨴ ꨚꨓꨴ ꨀꨇꩆ ꨥꨮꩀ ꨧꨯꨱꩃ ꨣꨕꨪꨢꨮꩃ ꩝ ꨐꨭ ꨤꩄ ꨚꨓꨴꨫ ꨦꨯꨮꩍ ꨟꨮꨤꩃ ꩝ ꨝꨪꨣꨭꨥ ꨟꩃ ꨐꨭ ꨤꨶꨮ ꨝꨋꩊ ꩞ (꩑꩐꩑-꩑꩐꩕) ꨝꨪꨣꨭꨥ ꨟꩃ ꨣꨕꨪꨢꨮꩃ ꨗꨯꨱ ꨀꨇꩆ ꩝ ꨓꨶꨮꩆ ꨚꨓꨴꨫ ꨚꨣꨯꨱꩅ ꨕꨫ ꨓꨳꩆ ꩝ ꨐꨭ ꨦꩇ ꨨꨓꨮꩌ ꨁꨗꨴ ꨚꨓꨴ ꩞ ꨚꨓꨴꨫ ꨚꨙꨮꩉ ꨗꨯꨱ ꨥꨮꩀ ꨧ ꨡꨮꩃ ꨓꨴ ꩝ ꨛꨩꨔꨮꨭ ꨣꨬ ꨚꨗꨶꨮꩄ ꨆꨭꨖ ꩝ ꨝꨪꨣꨭꨥ ꨟꩃ ꨓꨶꨮꩆ ꨚꨓꨴꨫ ꨟꨮꨣꨰ ꩞ ꨨꨮꩄ ꨛꨯꨮ ꨧꨳꩌ ꨤꨪꨆꨬ ꨦꩀꨓꨎꨰ ꩝ ꨕꨶꨯꩆ ꨆꨢꨆꩉ ꨆꨗꨰ ꩝ ꨝꨴꨬ ꨆ ꨨꨤꨭꩆ ꨤꨪꨆꨮꨭ ꨕꨫ ꨌꨬ ꩞ ꨟꨮꨕ ꨨꨤꨭꩆ ꨡꨯꩍ ꨝꨪꨢꨯꨮꩆ ꨚꨮꩉ ꨟꨮꨣꨰ ꩝ ꨌꨈꨯꨱꩃ ꨆꨢ ꨆꩉ ꨆꨗꨰ ꩝ ꨛꨩꨤꨰꩀ ꨕꨫ ꨊꨯꨱꩀ ꨧꨪꩂ ꨆꨓ ꩞ ꨨꨤꨭꩆ ꨕꨶꨯꩆ ꨝꨳꩀ ꨨꨤꨭꩆ ꨧꨫ ꨓꨆ ꩝ ꨛꨩꩀ ꨓꨈꨮꩉ ꨘꩆ ꨓꨴ ꩝ ꨆ ꨨꨤꨭꩆ ꨤꨪꨆꨮꨭ ꨕꨫ ꨗꨰ ꩞ (꩑꩐꩖-꩑꩑꩐) ꨨꨮꩄ ꨛꨯꨮ ꨧꨳꩌ ꨤꨪꨆꨬ ꨦꩀꨓꨎꨰ ꩝ ꨚꨮꩃ ꨚꨗꨶꨮꩄ ꨨꨤꨭꩆ ꨨꨰ ꩝ ꨝꨴꨬ ꨆ ꨨꨤꨭꩆ ꨝꨰꩀ ꨧꨭ ꨦꩍ ꩞ ꨗꨯꨱ ꨣꨶꩍ ꨆꨢ ꨆꩉ ꨝꨰꩀ ꨝꨫ ꨕꨴꩍ ꩝ ꨁꨗꨴ ꨚꨓꨴ ꨚꨙꨮꩉ ꨓꨚꩍ ꨦꨣꨫ ꨓꨘꩆ ꨟꩃ ꨐꨭ ꨚꨮꩃ ꩞ ꨟꨮꨓꨰ ꨦꨄꨰ ꨧꨭꨝꨪꩀ ꨧꨯꨱꩃ ꨘꩌ ꨣꨕꨪꨢꨮꩃ ꩝ ꨁꨗꨴ ꨚꨓꨴ ꨅꩍ ꨚꨮꩃ ꩝ ꨚꨙꨮꩉ ꨝꨭꨥ ꨀꨋꩆ ꨀꨟ ꩞ ꨟꨮꨓꨰ ꨓꨗꩃ ꨄꨰ ꨣꨎ ꨕꨯꨮꨥ ꩝ ꨤꨯꨮꨤ ꨣꨥꩆꨘ꩝ ꨧꨭꨝꨪꩀ ꨧꨯꨱꩃ ꨛꨯꨮ ꨀꨟ ꨧꨭ ꨦꩍ ꩞ ꨐꨭ ꨚꨓꨯꨱꨥ ꨧꨭ ꨣꨕꨪꨢꨮꩃ ꨗꨯꨱ ꨣꨶꩍ ꩝ ꨆꨢ ꨆꩉ ꨡꨯꩍ ꨎꨮꩍ ꩝ ꨝ ꨟꨴꨰꨮ ꨆ ꨓꨶꨮꩆ ꨚꨓꨴꨫ ꩞ (꩑꩑꩑-꩑꩑꩕) ꨕꨯꩌ ꨘꩆ ꨐꨭ ꨡꨯꩍ ꨆꨭꨜꨶꨣꨫ ꩝ ꨟꨮꨣꨰ ꨤꩄ ꨧꨯꨱꩃ ꨚꨓꨴꨫ ꩝ ꨧꨪꨝꨮꩉ ꨕꨯꨱꩀ ꨀꩄ ꨨꨓꨰ ꩞ ꨕꨀ ꨁꨗꨴ ꨚꨓꨴ ꨓꨈꨯꩀ ꨟꨮꨤꨪꨈꨰ ꩝ ꨧ ꨝꨯꨱꩍ ꨌꨥꩆ ꨟꩍ ꨂꨣꨰ ꩝ ꨝ ꨀꨕꨬ ꨚꨮꩉ ꨝꨫ ꨓꨴꨭꩍ ꩞ ꨁꨗꨴ ꨚꨓꨴ ꨧꨫ ꨓꨆꨯꨮ ꨗꨯꨱ ꨓꨴꨭꩍ ꩝ ꨎꨴꨮꩃ ꨛꨩꩀ ꨂꨤꨩ ꨓꨗꩍ ꩝ ꨢꨯꨱꩌ ꨙꨮ ꨝꨯꨱꩍ ꨌꨆꨮꩆ ꩞ ꨆꨴꨭꩃ ꨚꨗꨶꨮꩄ ꨓꨶꨮꩆ ꨚꨓꨴꨫ ꨆꨆꨬ ꨓꨈꨮꩉ ꩝ ꨝ ꨚꨮꩉ ꨟꨮꨓꨲꩍ ꨎꨤꩆ ꩝ ꨚꨙꨮꩉ ꨛꨩꨤꨰꩀ ꨁꨗꨴ ꨚꨓꨴ ꩞ ꨕꨯꩌ ꨘꩆ ꨟꩃ ꨣꨎ ꨕꨯꨮꨥ ꩝ ꨤꨯꨮꨤ ꨣꨥꩆꨘ ꩝ ꨕꨫ ꨣꩍ ꨎꨤꩆ ꨓꨟ ꨓꨝꨳꩀ ꩞ (꩑꩑꩖-꩑꩒꩐) ꨣꨭꩇ ꨤꨪꨟꩆ ꨕꨶ ꨕꨴꨬ ꨕꨮꩃ ꨌꨆꩀ ꩝ ꨁꨗꨈꨪꨣꩈ ꨂꨤ ꨟꨮꨌꨶꩀ ꩝ ꨣꨪꨟꨯꨱꩃ ꨌꨈꨭꨥ ꨟꨮꨣꨆꨰꩀ ꩞ ꨨꨕꨯꩌ ꨨꨤ ꨝꨶꨯꩅ ꨆꨨꨳꩀ ꨕꨴꨭꩍ ꨤꨰꩀ ꩝ ꨝꨪꨣꨭꨥ ꨣꨪꨟꨯꨱꩃ ꨌꨈꨯꨱꩃ ꨆꨰꩀ ꩝ ꨝꨪꨣꨭꨥ ꨤꨪꨟꩆ ꨤꨪꨟꩆ ꨝꨪꨗꨭꩍ ꩞ ꨐꨭ ꨚꨍꨯꩌ ꨕꨤꩌ ꨨꨓꨰ ꨧꨪꨝꨮꩉ ꨟꩃ ꨓꨴꨭꩍ ꩝ ꨁꨗꨴ ꨚꨓꨴ ꨧꨭꨗꨪꩅ ꨈꨪꨗꨴꨮꩍ ꩝ ꨝꨪꨣꨭꨥ ꨟꩃ ꨆꨴꨲꩆ ꨝꨪꨗꨓꨮꩃ ꩞ ꨐꨭ ꨟꩀ ꨙꨥ ꨓꨴꨰꩀ ꨓꨤꨬ ꨘꩆ ꨦꨮꩃ ꩝ ꨓꨶꨮꩆ ꨚꨓꨴꨫ ꨡꨯꩍ ꨧꨫ ꨈꨵꨮꩃ ꩝ ꨈꨪꨗꨴꨮꩍ ꨡꨯꩍ ꨕꨫ ꨟꨮꨓ ꩞ ꨣꨭꩇ ꨤꨪꨟꩆ ꨕꨶ ꨕꨴꨬ ꨤꨪꨝꨭꩍ ꨓꨜꨳ ꩝ ꨁꨗꨈꨪꨣꩈ ꨕꨶ ꨓꨴ꩝ ꨣꨪꨟꨯꨱꩃ ꨌꨈꨭꨥ ꨎꩃ ꨤꨪꨝꨭꩍ ꩞ (꩑꩒꩑-꩑꩒꩕) ꨁꨗꨴ ꨚꨓꨴ ꨧꨫ ꨓꨆꨯꨮ ꨗꨯꨱ ꨓꨴꨭꩍ ꩝ ꨓꨶꨮꩆ ꨚꨓꨴꨫ ꨎꨴꨮꩃ ꨡꨯꩍ ꩝ ꨐꨭ ꨓꨳꩇ ꨣꨕꨪꨢꨮꩃ ꨟꨮꨣꨰ ꩞ ꨓꨚꨯꩂ ꨁꩆꨓꩆ ꨧꨯꨱꩃ ꨝꨓ ꨟꩍ ꨟꨮꨣꨰ ꩝ ꨁꨗꨴ ꨚꨓꨴ ꨦꩀꨓꨎꨰ ꩝ ꨟꨮꨗꨬ ꨕꨤꩌ ꨀꨳ ꨓꨝꨮꩃ ꩞ ꨝꨤꨪꨋ ꨌꩍꨢ ꨧꨳꩌ ꨟꨮꨤꨮꩃ ꩝ ꨟꩍꨤꨪꨆꨮꩌ ꨛꨩꩀ ꨀꨆꨳꨮꩃ꩝ ꨕꨫ ꨌꨶꩍ ꨟꩃ ꨟꩍ ꨂꨣꩈ ꩞ ꨚꨤ ꨝꨪꨊꨭ ꨕꨮꩉ ꨓꨝꨮꩃ ꨕꨫ ꨣꨳꨪꩌ ꨚꨆꩉ ꩝ ꨔꨴꨯꩍ ꨡꨭꨥ ꨟꨮꨗꨭꨥ ꨟꨮꨗꩃ ꩝ ꨢꨯꨣꨪꨆ ꨚꨮꩅꨓꨤꨪ ꩞ ꨚꨶꨪꩋ ꨈꨨꨯꨮ ꨗꨫ ꨧꨯꨱꩃ ꨁꨗ ꨆꨭꨣꨦꨫ ꩝ ꨝꨪꨊꨭ ꨧ ꨈꨮꩆꨗꨓꨤꨫ꩝ ꨓꨟꨮꨣꨮꩃ ꨧꨭ ꨝꨰꨣꨨꨫ꩞ (꩑꩒꩖-꩑꩓꩐) ꨕꨯꩌ ꨘꩆ ꨁꨗꨴ ꨚꨓꨴ ꨧꨫ ꨓꨆꨯꨮ ꩝ ꨓꨈꨯꩀ ꨗꨯꨱ ꨚꩀ ꨚꨓꨴꨫ ꩝ ꨃꨥ ꨚꨎꨳꨯꩂ ꨋꩇ ꨧ ꨓꨳꩆ ꩞ ꨝꨵꨯꨱꩍ ꨟꩃ ꨁꨗꨴ ꨚꨓꨴ ꨧꨫ ꨀꨇꩆ ꩝ ꨣꨪꨡꨫ ꨣꨪꨡꨲꩇ ꨕꨫ ꨤꨶꨪꩄ ꨎꨤꩆ ꩝ ꨆ ꨟꩃ ꨓꨴꨭꩍ ꨓꨮꩊ ꨗꨫ ꩞ ꨚꨶꨪꩋ ꨈꨨꨯꨮ ꨗꨫ ꨧꨯꨱꩃ ꨁꨗ ꨆꨭꨣꨦꨫ ꩝ ꨋꩆ ꨟꨮꨤꨪꨈꨰ ꨚꨓꨴꨫ ꩝ ꨁꨗꨴ ꨚꨓꨴ ꨚꨕꨬ ꨓꨘꩆ ꩞ ꨧ ꨜꨭꩆ ꨆꨭꨢꨮꨭ ꨧꨳꩌ ꨓꨟꨭꩍ ꨕꨤꩌ ꨔꨶꨯꩆ ꩝ ꨕꨫ ꨣꨳꨪꩌ ꨚꨆꩉ ꨤꨯ ꨣꨎꨮꩆ ꩝ ꨟꨮꨝꨯꨱꩍ ꨟꩃ ꨟꩍ ꨝꨪꨊꨭ ꩞ ꨆꨭꨣꨠ ꨤꨪꨂ ꨚꨗꩃ ꨚꨀꨯꨱꩀ ꨆꨤꨮꩌ ꩝ ꨝꨵꨯꨱꩍ ꨛꨩꨋꩇ ꨌꨳꨪꩌ ꨙꨮꩌ ꩝ ꨕꨫ ꨈꨴꨮꩇ ꨀꨆꨳꨮꩃ ꨖꩆ ꨆꨭꨢꨮꨭ ꩞ (꩑꩓꩑-꩑꩓꩕) ꨓꨳꨯꨱꩃ ꨝꨪꨢꨯꨮꩆ ꨌꨈꨶꨮꩉ ꨝꨪꨊꨭ ꨧꨯꨱꩃ ꨓꨥꨥ ꩝ ꨕꨯꨱꩀ ꨝꨪꨌꩆ ꨚꨶꨮꩄ ꨆꨵꨯꨱ ꩝ ꨀꨇꩆ ꨆ ꨣꨭꩇ ꨁꨗꨴ ꨚꨓꨴ ꩞ ꨧꨳꩌ ꨤꨪꨆꨬ ꨁꨣꨯꨮꩋ ꨝꨪꨎꩀꨍꨰꨘ ꩝ ꨀꨗꩀ ꨚꨓꨯꨱ ꨝꨮꩃꨦ ꩝ ꨦꨘꩀ ꨈꨪꨗꨴꨮꩍ ꨛꨩꨚꨴꨯꨱꩃ ꨗꨮꨈꩉ ꩞ ꨁꨗꨴ ꨚꨓꨴ ꨚꨕꨬ ꨓꨘꩆ ꨕꩀ ꨥꨮꩊ ꩝ ꨝꨶꨪꩋꨦꨘ ꨤꨰꩀ ꨀꨊꨪꩆ ꩝ ꨨꨤꨩ ꨆꨭꨢꨮꨭ ꨘꩆ ꨟꨮꨐꨫ ꩞ ꨧꨳꩌ ꨆꨳꨮꩃ ꨚꨮꩃ ꨧꨭꨟꨭ ꨧꨯꨱꩃ ꨦꩇ ꨣꨝꩇ ꨟꨮꨣꨫ ꩝ ꨡꨯꩍ ꨀꨟꨴꩀ ꨓꨶꨮꩆ ꨚꨓꨴꨫ ꨓꨝꨳꩀ ꨟꨮꨣꨰ ꨕꨯꨱꩀ ꨟꨮꨁꨪꩆ ꩞ ꨕꨫ ꨊꨯꨱꩀ ꨨꨤꨭꨥ ꨟꩍ ꨝꨪꨊꨭ ꨣꨳꨪꩌ ꨧꨭ ꨝꨮꩉ ꩝ ꨐꨭ ꨒꩍ ꨝꨯꨮꩊ ꨕꨫ ꨀꨳ ꨟꨮꨥꩆ ꩝ ꨓꨓꩍ ꨕꨫ ꨕꨴꨬ ꨁꨗꨴ ꨚꨓꨴ ꩞ (꩑꩓꩖-꩑꩔꩐) ꨐꨭ ꨓꨈꨯꩀ ꨗꨯꨱ ꨥꨮꩀ ꨧ ꨡꨮꩃ ꨓꨴ ꩝ ꨚꩀ ꨚꨓꨴꨫ ꨧꨭꨤꨮꩉꨘ ꨌꩍꨢ ꨧꨫ ꨝꨪꨌꩆ ꩞ ꨕꨯꩌ ꨘꩆ ꨓꨶꨮꩆ ꨚꨓꨴꨫ ꨝꨴꨬ ꨓꨈꨮꩉ ꩝ ꨛꨩꩀ ꨂꨣꩃ ꨓꨝꨳꩀ ꨚꩀ ꨘꩆ ꩝ ꨎꨝꩅ ꨦꨭꨤꩌ ꨁꨗꨴ ꨚꨓꨴ ꩞ ꨆꨴꨭꩃ ꨓꨈꨮꩉ ꨟꩃ ꨚꨓꨯꨱ ꨝꨴꨬ ꨝ ꩝ ꨣꨘꩌ ꨛꨯꨮ ꨁꨗꨴ ꨚꨓꨴ ꩝ ꨝꨴꨬ ꨆ ꨦꩍ ꨟꩃ ꨝꩀ ꨨꨓꨰ ꩞ ꨡꨯꩍ ꨎꨗꩃ ꨓꨳꩇ ꨌꨆꩀ ꨒꨴꨶꩍ ꨟꨮꨣꨰ ꩝ ꨎꨴꨮꩃ ꨝꨪꨙꩃ ꨕꨫ ꨟꨮꨤꨪꨈꨰ ꩝ ꨘꩆ ꨟꩃ ꨡꨯꩍ ꨁꨗꨴ ꨚꨓꨴ ꩞ ꨐꨭ ꨗꨯꨱ ꨛꨩꨔꨮꨭ ꨣꨎ ꨕꨯꨥ ꩝ ꨤꨯꨮꨤ ꨥꨮꩆꨘ ꩝ ꨈꨪꨗꨯꨱꩃ ꨟꨮꨣꨰ ꨆꨳꨮꩃ ꨎꩀ ꨟꨮꨧꨭꩍ ꩞ (꩑꩔꩑-꩑꩔꩕) ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨆꨯꩅ ꨣꨪꨓꨭꩍ ꩝ ꨁꨗꨴ ꨚꨓꨴ ꨧꨭꨗꨪꩅ ꨈꨪꨗꨴꨮꩍ ꩝ ꨛꨩꩀ ꨓꨈꨮꩉ ꨓꨝꨳꩀ ꨟꨮꨣꨰ ꩞ ꨨꨤꨭꨥ ꨝꨪꨤꩃ ꨓꨴꨭꩍ ꨕꨫ ꨊꨯꨱꩀ ꨟꨮꨤꨪꨈꨰ ꩝ ꨁꨗꨴ ꨚꨓꨴ ꨦꩀꨓꨪꨎꨰ ꩝ ꨐꨭ ꨛꨩꨝꨪꨗꨯꨮꩋ ꨤꨯ ꨣꨎꩆ ꩞ ꨨꨕꨯꩌ ꨝꨶꨯꩊ ꨣꨪꨎ ꨕꨯꨥ ꨃꨥ ꨝꨪꨌꩆ ꩝ ꨨꨮꩄ ꨛꨩꩀ ꨂꨣꩃ ꨓꨈꨮꩉ ꩝ ꨨꨤꨬ ꨆꨭꨖ ꨕꨴꨬ ꨟꨮꨧꨭꩍ ꩞ ꨁꨗꨴ ꨚꨓꨴ ꨓꨴꨭꩆ ꨎꨴꨮꩃ ꨝꨵꨯꨱꩍ ꨚꨗꩍ ꩝ ꨀꨗꩀ ꨚꨓꨯꨱ ꨗꨫ ꨟꨮꨧꨭꩍ ꩝ ꨕꨫ ꨚꨕꩃ ꨎꨰ ꨢꨯꨮꩅ ꩞ ꨕꨶ ꨂꨣꩃ ꨧꨭꨗꨪꩅ ꨈꨪꨗꨴꨮꩍ ꨁꨣꨯꨮꩋ ꨝꨪꨎꩀ ꩝ ꨝꨪꨙꨫ ꨝꨪꨗꨳꨰ ꨧꨪꨝꨮꩉ ꨟꩃ ꨋꩇ ꩝ ꨆꨳꨮꩃ ꨆ ꨀꨤꩍ ꨁꨗꨴ ꨚꨓꨴ ꩞ (꩑꩔꩖-꩑꩕꩐) ꨓꩀ ꨕꨫ ꨆꩊ ꨓꨈꨯꩀ ꨟꨮꨣꨰ ꨟꩃ ꨀꨤ ꩝ ꨨꨟꨪꩅ ꨚꨗꨶꨮꩄ ꨋꩆ ꨆꨭꨖ ꩝ ꨐꨭ ꨗꨯꨱ ꨛꨩꨔꨮꨭ ꨗꨯꨣꨚꩅ ꩞ ꨚꩀ ꨚꨓꨯꨱ ꨣꨪꨎ ꨈꨪꨨꨭꩉ ꨣꨯꨚꨭꨦꩍ ꩝ ꨛꨩꨓꨯꨱꩌ ꨝꨶꨯꩊ ꨆꨳꨮꩃ ꨟꨮꨧꨭꩍ ꩝ ꨚꨎꨭꩌ ꨕꨤꩌ ꨎꩊꨤꨪꨕꨪ ꩞ ꨝꨪꨣꨭꨥ ꨟꩃ ꨨꨟꨪꩅ ꨓꨮꩊ ꨟꨭꩀ ꨆꨭꨜꨶꨣꨫ ꩝ ꨨꨮ ꩄ ꨧꨭꨦꩍ ꨕꨯꨱꩀ ꨓꨗꨫ ꩝ ꨆꨮꨭ ꨗꨯꨱ ꨛꨩꨔꨮꨭ ꨗꨯꨣꨚꩅ ꩞ ꨂꨣꩃ ꨘꩆ ꨚꨤꨬ ꨧꨭꨟꨮꩆ ꨓꨚꨣ ꩝ ꨀꨋꩆ ꨝꨳꩀ ꨁꨗꨴ ꨚꨓꨴ ꩝ ꨧꨭꨝꨪꩀ ꨧꨯꨱꩃ ꨛꨩꩀ ꨂꨣꩃ ꨓꨈꨮꩉ ꩞ ꨛꨯꨮ ꨘꩆ ꨧꨭꨗꨪꩅ ꨈꨪꨗꨴꨮꩍ ꨤꨯ ꨣꨎꩆ ꩝ ꨎꨶꨰ ꨟꨮꨧꨭꩍ ꨚꨤꨰ ꨝꨶꨯꩊ ꩝ ꨂꨣꩃ ꨝꨪꨎꩀꨍꨰꨘ ꩞ (꩑꩕꩑-꩑꩕꩕) ꨟꨮꨢꩍ ꨢꨮꨭ ꨘꩆ ꨆꨮꨭ ꨗꨯꨱ ꨚꩀ ꨊꨯꨱꩀ ꨀꨕꨮꩉꨨ ꩝ ꨉꩀ ꨣꨪꨎꨩ ꨕꨯꨥ ꩝ ꨚꨕꨮꩍ ꨓꨘꩆ ꨎꨶꨰ ꨟꨮꨧꨭꩍ ꩞ ꨕꨯꩌ ꨘꩆ ꨚꨓꨯꨱ ꨓꨝꨳꩀ ꨗꨯꨱ ꨓꨴꨭꩍ ꩝ ꨛꨯꨩꩀ ꨟꨮꨓ ꨈꨵꨮꩃ ꨡꨯꩍ ꩝ ꨣꨝꩇ ꨀꨣꨯꨧꨭꨦꩍ ꨟꨮꨣꨰ ꩞ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨆꨯꩅ ꨍꨰ ꩝ ꨍꨰꩅ ꨟꩍ ꨝꨪꨊꨭ ꨚꨤꨰ ꩝ ꨛꨩꨨꨤꨶꨬ ꨤꩍ ꨆꨥꩍ ꩞ ꨣꨪꨝꩇ ꨟꨮꨣꨫ ꨆꨯꨱꩃ ꨆꨟꨴꨳꨮ ꨕꨶ ꨈꩍ ꩝ ꨛꨩꩀ ꨚꨵꨭꩍ ꨕꨯꩀ ꨟꨮꨣꨳꩍ ꩝ ꨟꨮꨣꨰ ꨆꨳꨮꩃ ꨕꨯꨱꩃ ꨁꨗꨴ ꨚꨓꨴ ꩞ ꨕꨯꩌ ꨘꩆ ꨟꩃ ꨣꨎ ꨕꨯꨥ ꩝ ꨚꨮꩉ ꨚꩀ ꨊꨯꨱꩀ ꨀꨕꨮꩉꨨ ꩝ ꨐꨭ ꨢꨶꨯ ꨕꨴꨬ ꨎꨳꨮꩃ ꨦꨥꩍ ꩞ (꩑꩕꩖-꩑꩖꩐) ꨕꨤꩌ ꨨꨓꨰ ꨆꨳꨮꩃ ꨟꨮꨧꨭꩍ ꨝꨫ ꨀꨤꩍ ꩝ ꨚꨓꨯꨱ ꨕꨤꨯ ꨓꨈꨮꩉ ꨦꩍ ꩝ ꨃꨥ ꨟꨮꨣꨰ ꨝꨵꨯꨱꩍ ꨝꨪꨌꩆ ꩞ ꨟꨪꩀ ꨉꩀ ꨨꨮꩄ ꨕꨶ ꨂꨣꩃ ꨆꨟꨶꨮꩆ ꩝ ꨎꨶꨰ ꨟꨮꨧꨭꩍ ꨈꨮꩇ ꨢꨮꨭ ꨘꩆ ꩝ ꨁꨗꨴ ꨚꨓꨴ ꨐꨭ ꨓꨚꩀ ꩞ ꨚꨓꨯꨱ ꨝꨪꨌꩆ ꨆꨵꨮꨭ ꨂꨣꩃ ꨔꩅ ꨓꨳꩀ ꩝ ꨚꨗꨶꨮꩄ ꨆꨭꨖ ꨧꨳꩌ ꨝꨰꩀ ꩝ ꨚꨳꨮꩍ ꨣꨘꩌ ꨎꨳꨮꩃ ꨧ ꨓꨳꩆ ꩞ ꨕꨯꩌ ꨘꩆ ꨣꨝꩇ ꨀꨣꨯꨧꨭꨦꩍ ꨀꨇꩆ ꩝ ꨨꨎꨪꩇ ꨝꨪꩀ ꨆꨢꨆꩉ ꩝ ꨝ ꨆ ꨁꨗꨴ ꨚꨓꨴ ꩞ ꨚꨓꨯꨱ ꨝꨪꨙꩃ ꨍꨪꩆ ꨝꨳꨰ ꨚꨗꨶꨮꩄ ꨆꨭꨖ ꩝ ꨟꩀ ꨣꨪꨎ ꨕꨯꨮꨥ ꩝ ꨛꨩꨤꨪꨇꩍ ꨧꨯꨱꩃ ꨚꨓꨴꨫ ꩞ (꩑꩖꩑-꩑꩖꩕) ꨁꨗꨴ ꨚꨓꨴ ꨍꨪꩆ ꨝꨳꨰ ꨚꩀ ꨊꨯꨱꩀ ꨈꨨ ꩝ ꨋꩆ ꨟꨮꨤꨪꨈꨰ ꨚꨓꨴꨫ ꩝ ꨀꨝꨪꩍ ꨎꩃ ꨟꩃ ꨚꨗꩍ ꩞ ꨛꨩꨋꩇ ꨈꨮꩃ ꨁꨗ ꨆꨦꨶꩆ ꨤꨰ ꨟꩍ ꩝ ꨕꨗꨪꩂ ꨓꨯꨱꩌ ꨕꨮꩉ ꨆꨣꨮꩍ ꩝ ꨔꩇ ꨤꨪꨆꨮꩌ ꨌꩍꨢ ꩞ ꨚꨓꨯꨱ ꨚꨣꨶꩍ ꨨꨕꨯꩌ ꨂꨣꩃ ꨆꨢ ꨆꨢ ꩝ ꨚꨙꨮꩉ ꨓꨚꨯꩂ ꨝꨫ ꨓꨮꩊ ꨀꨤ ꩝ ꨓꨓꩍ ꨟꩃ ꨟꩍꨤꨪꨆꨮꩌ ꩞ ꨤꨪꨇꩍ ꨎꨈ ꨧ ꨣꨪꨓꨭꩍ ꨨꨣꨬ ꨟꨮꨤꩌ ꩝ ꨕꨯꨮꨥ ꨟꨗꨯ ꨧꨫ ꨟꨮꨢꨯꨱꩌ ꩝ ꨁꨗꨴ ꨚꨓꨴ ꨝꨳꩀ ꨓꨚꩀ ꩞ ꨚꨓꨯꨱ ꨚꨣꨶꩍ ꨆꨢ ꨆꩉ ꨟꩍ ꨚꨣꨳꩀ ꩝ ꨤꨪꨟꩆ ꨎꨗꩀ ꨀꨧꨰꩍ ꨎꨗꩀ ꩝ ꨀꨤꨪꩆ ꨀꨗꩀ ꨧꨯꨱꩃ ꨟꨮꨓꨭꨥ ꩞ (꩑꩖꩖-꩑꩗꩐) ꨦꨴꨫ ꨚꨤꨳꨮꩃ ꨧꨭꨎꩃ ꨗꨣꩍ ꨆꨯꨱꩃ ꨚꨓꨯꨱ ꩝ ꨤꨪꨥꨪꩀ ꨨꨣꨬ ꨟꨮꨤꩌ ꨆꨳꨮꩃ ꨗꨯꨱ ꩝ ꨓꨟ ꨕꨤꩌ ꨣꨎꨀꨬ ꩞ ꨣꨝꩇ ꨣꨯꨧꨭꨦꩍ ꨆꨳꨮꩃ ꨥꨮꩀ ꨗꨯꨱ ꨚꨤꨬ ꩝ ꨁꨗꨴ ꨚꨓꨴ ꨧꨫ ꨆꨆꨬ ꩝ ꨤꨪꨥꨪꩀ ꨧ ꨓꨳꩆ ꨥꨮꩀ ꨟꨮꨣꨰ ꩞ ꨕꨯꨱꩀ ꨓꩀ ꨘꩆ ꨓꨯꨱꩌ ꨕꨶ ꨀꨕꨬ ꨦꨄꨰ ꩝ ꨁꨗꨴ ꨚꨓꨴ ꨍꨪꩆ ꨝꨳꨰ ꩝ ꨗꨯꨱ ꨀꨠꩊ ꨚꨓꨳꩇ ꨟꨮꨁꨪꩆ ꩞ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨆꨯꩅ ꨍꨰ ꩝ ꨓꨟꨭꩊ ꨤꨪꨈꨰꩍ ꨤꨰꩀ ꨟꨮꨣꨰ ꩝ ꨁꨗꨴ ꨚꨓꨴ ꨕꨮꩍ ꨚꨕꨬ ꩞ ꨝꨶꨪꩋꨦꨗ ꨤꨰꩀ ꨀꨊꨪꩆ ꨤꨪꨀꩆ ꨕꨫ ꨕꨴꨬ ꩝ ꨁꨗꨴ ꨚꨓꨴ ꨧꨳꩌ ꨤꨪꨆꨬ ꩝ ꨝꨪꨣꨭꨥ ꨟꩃ ꨀꨶꨮꩊ ꨓꨗꨯꨱꩀ ꨟꨮꨓ ꩞ (꩑꩗꩑-꩑꩗꩕) ꨟꨮꨕ ꨚꨓꨯꨱ ꨁꩆ ꨧꨭꨟꨮꩆ ꨤꨯꨈ ꩝ ꨐꨭ ꨓꨶꨬ ꨕꨶꩍ ꨁꨗꨴ ꨚꨓꨴ ꩝ ꨕꨫ ꨈꨴꨮꩇ ꨗꨮꨈꩉ ꨎꩃ ꨅ ꨡꨯꩍ ꩞ ꨐꨭ ꨆꨳꨮꩃ ꨟꩀ ꨀꨤ ꨀꨗꩀ ꨧꨭꨟꨮꩆ ꨎꨤꨯꨮꩍ ꩝ ꨁꨗꨴ ꨚꨓꨴ ꨧꨭꨗꨪꩅ ꨈꨪꨗꨴꨮꩍ ꩝ ꨐꨭ ꨚꨮꩉ ꨟꨮꨓꨲꩍ ꨀꨕꨮꩉꨨ ꩞ ꨝꨵꨯꨱꩍ ꨚꨓꨯꨱ ꨁꩆ ꨧꨭꨟꨮꩆ ꨤꨯꨈ ꩝ ꨐꨭ ꨆꨴꨲꩆ ꨝꨪꨎꨪꩇ ꨁꨗꨴ ꨚꨓꨴ ꩝ ꨝꨪꨣꨭꨥ ꨐꨭ ꨟꩀ ꨝ ꨚꨮꩉ ꩞ ꨆꨴꨲꩍ ꨙꨪꩍ ꨁꨗꨴ ꨚꨓꨴ ꨟꨮꨕꨮꩍ ꨨꨕꨮꩉ ꩝ ꨐꨭ ꨝꨪꨗꨯꨮꩋ ꨟꨮꨓꨰ ꨓꨘꩆ ꩝ ꨝꨪꨣꨭꨥ ꨟꩃ ꨤꨰꩀ ꨓꨮꩊ ꨀꨤ ꩞ ꨓꨚ ꨕꨫ ꨕꨪꩊ ꨀꨳ ꨤꨪꨟꩆ ꨃꨥ ꨕꨀ ꩝ ꨟꨮꨗꨬ ꨕꨫ ꨕꨪꩊ ꨀꨳ ꨓꨝ ꩝ ꨨꨕꩃ ꨁꨆꩆ ꨕꨀ ꨛꨩꨡꨮꩃ ꩞ (꩑꩗꩖-꩑꩘꩐) ꨓꨚ ꨕꨫ ꨕꨪꩊ ꨀꨳ ꨟꨮꨧꨪꩆ ꨘꩆ ꨦꨮꩃ ꩝ ꨆꨴꩃ ꨀꨟꨴꨯꨱꨥ ꨨꨕꩃ ꨀꨣꨳꨮꩃ ꩝ ꨕꨀ ꨁꨗꨴ ꨚꨓꨴ ꨛꨩꨡꨮꩃ ꩞ ꨛꨯꨩꩀ ꨨꨯꨮꩋ ꨗꨟꨯꨮꩋ ꨧꨭꨆꩊ ꨕꨯꨮꨝꨪꨦꨴꨮꩍ ꩝ ꨕꨫ ꨣꨳꨪꩌ ꨚꨆꩉ ꨤꨯ ꨎꨮꩍ ꩝ ꨀꨝꨪꩍ ꨟꨮꨗꩀ ꨡꨯꩍ ꨧ ꨈꨵꨮꩃ ꩞ ꨕꨯꩌ ꨓꨤꩃ ꨧꨯꨱꩃ ꨆꨙꨭꩍ ꨆꨵꩀ ꨨꨝꩃ ꩝ ꨀꨗꩀ ꨓꨌꨯꨱꨥ ꨡꨵꨶꩀ ꨕꨫ ꨆꨴꨭꩃ ꩝ ꨓꨖꨭꨥ ꨧꨭꨗꨪꩅ ꨕꨯꨮꨝꨪꨓ ꩞ ꨦꨆꨤꩅ ꨧꨯꨱꩃ ꨝꨪꨊꨭ ꨌꩌꨛꨩ ꩝ ꨓꨗꨭꩃ ꨚꨓꨪꩍ ꨃꨥ ꨕꨀ ꩝ ꨝꨪꨊꨭ ꨟꨮꨤꨪꩍ ꨆꨣꩃ ꨟꨮꨣꨰ ꩞ ꨁꨗꨴ ꨚꨓꨴ ꨚꨰꩀ ꨝ ꨦꩀꨓꨎꨰ ꩝ ꨌꨮꩀ ꨝꨪꨧꨬ ꨝꨪꨙꩃ ꨟꨮꨣꨰ ꩝ ꨐꨭ ꨟꨮꨐꨫ ꨀꨶꨮꩆ ꨓꨝꨶꨮꩆ ꩞ (꩑꩘꩑-꩑꩘꩕) ꨓꨴꨭꩍ ꨕꨫ ꨘꩆ ꨝꨪꨣꨭꨥ ꨟꩃ ꨡꨯꩍ ꨌꨮꩀ ꨨꨝꩆ ꩝ ꨀꨟꨴꩀ ꨌꨳꨪꩌ ꨁꨆꩀꨓꨶꨮꩉ ꩝ ꨀꨝꨪꩍ ꨟꨮꨣꨰ ꨔꩅ ꨚꨢꩀ ꩞ ꨗꨯꨱ ꨥꨮꩀ ꨝꨪꨣꨭꨥ ꨟꩃ ꨡꨯꩍ ꨌꨮꩀ ꨚꨣꨳꩀ ꩝ ꨌꨈꨶꨮꩉ ꨝꨪꨊꨭ ꨧꨯꨱꩃ ꨀꨟꨴꩀ ꩝ ꨓꨳꨯꨱꩃ ꨝꨪꨢꨯꨮꩆ ꨟꨮꨢꨯꨣꩍ ꩞ ꨁꨗꨴ ꨚꨓꨴ ꨧꨫ ꨓꨆꨯꨮ ꨗꨯꨱ ꨓꨴꨭꩍ ꩝ ꨎꨴꨮꩃ ꨝꨪꨙꩃ ꨕꨫ ꨌꨮꩀ ꨟꩍ ꩝ ꨘꩅꨓꨔꨪꩍ ꨧꨳꩌ ꨆꨳꨮꩃ ꨈꨵꨮꩃ ꩞ ꨓꨮꩊ ꨌꨮꩀ ꨟꩍꨤꨪꨆꨮꩌ ꨧꨳꩌ ꨟꨮꨤꨮꩃ ꩝ ꨓꨗꨴꨳꩀ ꨨꨕꩍ ꨡꨯꩍ ꨧ ꨈꨵꨮꩃ ꩝ ꨁꨗꨴ ꨚꨓꨴ ꨗꨯꨱ ꨅ ꨓꨴꨭꩍ ꩞ ꨢꩅꨓꨴꩀ ꨝꨪꨣꨭꨥ ꨟꩃ ꨐꨭ ꨎꨴꨮꩃ ꨡꨯꩍ ꩝ ꨌꨮꩀ ꨀꨚꨶꨬ ꨀꩅ ꨆꨳꨮꩃ ꨉꨶꨮꩍ ꩝ ꨈꨵꨯꨱꩃ ꨟꨮꨓꨲꩍ ꨀꨕꨮꩉꨨ ꩞ (꩑꩘꩖-꩑꩙꩐) ꨛꨩꩀ ꨓꨈꨮꩉ ꨓꨝꨳꩀ ꨓꨚꨯꩂ ꨁꨗꨴ ꨚꨓꨴ ꩝ ꨐꨭ ꨝ ꨚꨮꩉ ꨈꨮꩆ ꨂꨤ꩝ ꨀꨚꨶꨬ ꨤꨰꩀ ꨓꨴꨭꩆ ꨓꨗꨫ ꩞ ꨚꩀ ꨓꨧꨪꩀ ꨚꨝꩍ ꨈꨪꨨꨭꩉ ꨦꩅ ꨦꨆꨫ ꩝ ꨕꨫ ꨣꩍ ꨓꨆꨰ ꨎꩊꨤꨪꨕꨪ ꩝ ꨁꨗꨴ ꨚꨓꨴ ꨎꨴꨮꩃ ꨡꨯꩍ ꩞ ꨀꨨꨯꨱꩀ ꨀꨗꩀ ꨚꨓꨯꨱ ꨆꨣꩃ ꨧ ꨣꨪꨓꨭꩍ ꩝ ꨐꨭ ꨓꨶꩀ ꨆꨚꨳꩍ ꨟꩃ ꨟꩍ ꩝ ꨟꨮꨁꨪꩆ ꨕꨫ ꨆꨴꨲꩍ ꨀꨳ ꨓꨧꨪꩀ ꩞ ꨣꨙꨰꩅ ꨂꨤ ꨆ ꨧꩊꨎꨪ ꨆꨥꩆꨘ ꩝ ꨐꨭꨩ ꨌꨰꩀ ꨕꨤꩌ ꨓꨧꨪꩀ ꨤꨪꨈ ꩝ ꨣꨪꨝꨭꩀ ꨓꨔꨯꨱꨥ ꨨꨎꩆ ꨀꨊꨪꩆ ꩞ ꨁꨗꨴ ꨚꨓꨴ ꨆꨳꨮꩃ ꨤꨯꨱꩃ ꨈꨪꨗꨴꨮꩍ ꨐꨭ ꨟꨮꨁꨪꩆ ꩝ ꨕꨯꩌ ꨀꨨꨯꨱꩀ ꨆꨣꨮꩌ ꨕꨫ ꨕꨪꩊ ꩝ ꨝꨪꨗꨯꨮꩋ ꨓꨟ ꨧꨭꨟꨭꩅꨕꨴꩀ ꩞ (꩑꩙꩑-꩑꩙꩕) ꨝꨵꨯꨱꩍ ꨕꨫ ꨘꩆ ꨟꩃ ꨐꨭ ꨢꩅꨓꨴꩀ ꩝ ꨓꨟꨩ ꨕꨤꩌ ꨓꨧꨪꩀ ꨕꨣꩀ ꩝ ꨀꨥ ꨧꨭ ꨇꩆ ꨟꩃ ꨟꩍ ꩞ ꨓꨯꨱꩌ ꨀꨗꩀ ꨚꨓꨯꨱ ꨆꨣꩃ ꨧ ꨣꨪꨓꨭꩍ ꩝ ꨟꨮꨤꨳꨮꩃ ꨆꨗ ꨝꨵꨯꨱꩍ ꨆꨆꨭꩍ ꩝ ꨎꨝꩅ ꨦꨭꨤꩌ ꨁꨗꨴ ꨚꨓꨴ ꩞ ꨐꨭ ꨕꨯꨱꩀ ꨕꨫ ꨊꨯꨱꩀ ꨌꨗꩃ ꨟꩃ ꨟꩍ ꨝꨪꨊꨭ ꩝ ꨛꨩꨔꩇ ꨦꨆꨤꩅ ꨟꨮꨆꨴꨲ ꩝ ꨚꨕꨬ ꨀꨤ ꨎꨴꨰ ꨟꩍ ꩞ ꨐꨭ ꨚꨍꨯꩌ ꨤꩄ ꨀꨗꩀ ꨕꨯꨮꨝꨪꨦꨴꨮꩍ ꩝ ꨁꨗꨴ ꨚꨓꨴ ꨧꨭꨗꨪꩅ ꨈꨪꨗꨴꨮꩍ ꩝ ꨓꨈꨯꩀ ꨟꨮꨣꨰ ꨓꨴꨭꩍ ꨚꩀ ꨊꨯꨱꩀ ꩞ ꨧ ꨂꨣꩃ ꨀꨗꩀ ꨚꨓꨯꨱ ꨘꩆ ꨐꨭ ꨕꨯꨱꩀ ꩝ ꨚꨳꨮꩍ ꨆꨙꨯꨱꩃ ꨧ ꨝꨯꨱꩍ ꨀꨨꨯꨱꩀ ꩝ ꨛꨩꨙꨶꨯꩄ ꨛꨩꨈꩆ ꨋꩆ ꨕꨤꨶꨮꩆ ꩞ (꩑꩙꩖-꩒꩐꩐) ꨕꨯꩌ ꨘꩆ ꨁꨗꨴ ꨚꨓꨴ ꨧꨫ ꨝꨪꨌꩆ ꩝ ꨨꨮꩄ ꨧ ꨓꨳꩆ ꨕꨯꨱꩀ ꨓꨘꩆ ꩝ ꨨꨤꨬ ꨆꨭꨖ ꨕꨭꩍ ꨨꨓꨰ ꩞ ꨝꨪꨣꨭꨥ ꨟꩃ ꨀꨗꩀ ꨚꨓꨯꨱ ꨓꨈꨯꩀ ꨟꨮꨣꨰ ꩝ ꨁꨗꨴ ꨚꨓꨴ ꨦꩀꨓꨪꨎꨰ ꩝ ꨓꨐꨫ ꨨꨈꨰꩅ ꨦꨴꨮꩍ ꨆꨭꨖ ꩞ ꨀꨗꩀ ꨚꨓꨯꨱ ꨓꨐꨫ ꨚꩀ ꨁꨗꨴ ꨚꨓꨴ ꩝ ꨗꨮꨟꨯꨮꩋ ꨧꨭꨆꩉ ꨝꨵꨯꨱꩍ ꨐꨭ ꨨꨳ ꩝ ꨛꨩꨡꨵꨯꨱꩃ ꨀꨨꨯꨱꩀ ꨕꨫ ꨎꩊꨤꨪꨕꨫ ꩞ ꨛꨩꨧꨴꨮꩌ ꨈꨪꨗꨮꩃ ꨀꨶꩀ ꨣꨪꨝꩇ ꨢꨭꩀ ꨟꨮꨣꨫ ꩝ ꨧꨭꨝꨪꩀ ꨧꨯꨱꩃ ꨌꩌꨚꨫ ꩝ ꨛꨩꨆꨌꩍ ꨀꨨꨯꨱꩀ ꨟꨮꨁꨪꩆ ꩞ ꨕꨯꩌ ꨘꩆ ꨀꨗꩀ ꨚꨓꨯꨱ ꨃꨥ ꨝꨪꨌꩆ ꩝ ꨁꨗꨴ ꨚꨓꨴ ꨋꩇ ꨖꩉ ꩝ ꨕꨀ ꨝꨫ ꨓꨮꩊ ꨕꨤꩌ ꨀꨨꨯꨱꩀ ꩞ (꩒꩐꩑ ꩒꩐꩕) ꨤꩃ ꨓꨭꩊ ꨦꨆꨤꩅ ꨕꨀ ꨕꨯꨱꩀ ꩝ ꨀꨗꩀ ꨚꨓꨯꨱ ꨆꨳꨮꩃ ꨛꨯꨩꩀ ꩝ ꨀꨨꩉ ꨟꨮꨗꩃ ꨟꨮꨣꨰ ꨚꨢꩀ ꩞ ꨕꨤꩌ ꨨꨓꨰ ꨆꨳꨮꩃ ꨣꨘꩌ ꨈꨮꩇ ꨝꨳꩀ ꩝ ꨚꨗꨶꨮꩄ ꨆꨭꨖ ꨔꩅ ꨓꨳꩀ ꩝ ꨣꨘꩌ ꨚꨳꨮꩍ ꨋꩇ ꨧ ꨓꨳꩆ ꩞ ꨕꨯꩌ ꨘꩆ ꨝꨪꨣꨭꨥ ꨟꩃ ꨨꨟꨪꩅ ꨕꨫ ꨣ ꨀꨇꩆ ꩝ ꨤꩄ ꨚꩀ ꨕꨤꩌ ꨗꨮꨈꩉ ꩝ ꨚꨓꨯꨱ ꨨꨭ ꨀꨗꩀ ꨆꨟꨬ ꩞ ꨚꨓꨴꨫ ꨘꩆ ꨧꨳꩌ ꨝꨪꨗꨰ ꨌꨴꨪꩍ ꨙꨬ ꩝ ꨝꨪꨣꨭꨥ ꨟꩃ ꨨꨟꨪꩅ ꨓꨮꩊ ꨚꨤꨬ ꩝ ꨈꨭꨣꨕꩆ ꨀꨆꨯꨮꩋ ꨟꨮꨣꨰ ꩞ ꨣꨎ ꨝꨤꨪꨋ ꨦꩍ ꨦꨗꩃ ꨕꨤꩌ ꨨꨓꨰ ꩝ ꨈꨭꨣꨕꩆ ꨀꨆꨯꨮꩋ ꨟꨮꨣꨰ ꩝ ꨆꨳꨮꩃ ꨚꨶꨮꩄ ꨀꨗꩀ ꨞꨯꨕꨮꩉꨨ ꩞ (꩒꩐꩖-꩒꩑꩐) ꨚꨓꨯꨱ ꨆꨳꨮꩃ ꨨꨰꩈ ꨝꨵꨯꨱꩍ ꨛꨩꨆꨵꨯꨱꩍ ꨚꨗꨶꨮꩄ ꨆꨭꨖ ꩝ ꨆ ꨓꨶꨮꩆ ꨚꨓꨴꨫ ꨦꨭꨤꨗꨘ ꩝ ꨌꩍꨢ ꨣꨳꨪꩌ ꨀ ꨣꨳꨪꩌ ꩞ ꨈꨭꨣꨕꩆ ꨈꨪꨤꩅ ꨀꨗꩀ ꨚꨓꨯꨱ ꨝꨪꨆꩆ ꨟꨮꨣꨰ ꩝ ꨡꨯꩍ ꨚꨓꨴꨫ ꨧꨳꩌ ꨝꨪꨗꨰ ꩝ ꨁꨤꨮꩃ ꨝꨟꨫ ꨁꨤꨮꩃ ꨓꨔꨪꩍ ꩞ ꨐꨭ ꨓꨟꨩ ꨚꨶꨮꩄ ꨀꨗꩀ ꨞꨯꨚꨓꨪꩍ ꩝ ꨛꨩꨆꨵꨯꨱꩍ ꨚꨗꨶꨮꩄ ꨆꨭꨖ ꨀꨝꨪꩍ ꩝ ꨕꨶ ꨂꨣꩃ ꨕꨯꨱꩀ ꨓꨘꩆ ꩞ ꨓꨮꩊ ꨚꨓꨴꨫ ꨚꨴꨯꨱꩃ ꨕꨣ ꨔꨮꨭ ꨀꩉ ꩝ ꨕꨶ ꨂꨣꩃ ꨓꨟ ꨟꨮꨖꨪꩉ ꨚꨮꩃ ꨈꨯꨱꩆ ꨚꨓꨯꨱ ꨛꨩꨓꨯꩀ ꩞ ꨚꨓꨯꨱ ꨝꨤꨪꨋ ꨦꩍ ꨦꨗꩃ ꨝꨵꨯꨱꩍ ꨆꨂꩀ ꩝ ꨚꨗꨶꨮꩄ ꨆꨭꨖ ꨕꨴꨬ ꨍꨭꩀ ꩝ ꨝꨪꨌꩆ ꨧꨯꨱꩃ ꨕꨶ ꨀꨗꩀ ꨚꨓꨯꨱ ꩞ (꩒꩑꩑-꩒꩑꩕) ꨝꨵꨯꨱꩍ ꨚꨙꨮꩉ ꨝ ꨚꨓꨴꨫ ꨘꩆ ꨗꨯꨱ ꩝ ꨌꨰꩀ ꨕꨫ ꨌꨮꩀ ꨚꨮꩉꨣꨪꨤꨯꨱ ꩝ ꨋꩆ ꨚꨝꩍ ꨣꩌ ꨕꨯꨮꨥ ꩞ ꨕꨶ ꨂꨣꩃ ꨀꨗꩀ ꨚꨓꨯꨱ ꨠꩆ ꨆꨕꨶ ꩝ ꨆꨳꨮꩃ ꨟꩀ ꨚꨓꨴꨫ ꨦꨭꨤꩆꨘ ꩝ ꨟꨮꨣꨳꩀ ꨈꩇ ꨆꨳꨮꩃ ꨆ ꨨꨭ ꩞ ꨓꨶꨮꩆ ꨚꨓꨴꨫ ꨢꨶꨯ ꨕꨴꨬ ꨎꨳꨮꩃ ꨝꨪꨊꨭ ꩝ ꨝꨵꨯꨱꩍ ꨐꨭ ꨙꨶꨮꩄ ꨓꨟ ꩝ ꨕꨯꨱꩀ ꨕꨤꩌ ꨚꨵꨶꨰ ꨚꨣꨮꩃ ꩞ ꨈꨭꨣꨕꩆ ꨁꨆꨯꨮꩋ ꨈꨭꨣꨕꩆ ꨆꨤꩅ ꨘꩆ ꨦꨮꩃ ꩝ ꨐꨭ ꨢꨶꨯ ꨕꨴꨬ ꨝꨵꨯꨱꩍ ꨎꨳꨮꩃ ꩝ ꨁꨗꨈꨪꨣꨰ ꨓꨳꩇ ꨛꨩꨟꩀ ꩞ ꨕꨯꩌ ꨘꩆ ꨓꨶꨮꩆ ꨚꨓꨴꨫ ꨙꨶꨮꩄ ꨓꨝꨳꩀ ꩝ ꨝꨵꨯꨱꩍ ꨓꨟꨩ ꨆꨣꨮꩀ ꨈꨣꨶꩀ ꩝ ꨕꨯꨱꩀ ꨂꨤ ꨓꨗꩍ ꨣꨪꨢ ꩞ (꩒꩑꩖-꩒꩒꩐) ꨕꨶ ꨂꨣꩃ ꨀꨗꩀ ꨚꨓꨯꨱ ꨠꩆ ꨆꨕꨶ ꩝ ꨐꨭꨩ ꨢꨶꨯꨩ ꨕꨴꨬ ꨎꨳꨮꩃ ꨈꨨ ꩝ ꨆꨳꨮꩃ ꨟꩀ ꨚꨓꨴꨫ ꨘꩆ ꨝꨫ ꨨꨭ ꩞ ꨚꨓꨯꨱ ꨆꨂꩀ ꨃꨥ ꨨꨶꨮꩉ ꨟꨰ ꨓꨐꨫ ꩝ ꨔꨬ ꨧꨫ ꨇꨪꩆ ꨝꨪꨌꩆ ꨁꨗ ꩝ ꨛꨩꨆꨵꨯꨱꩍ ꨈꨪꨙꨫ ꨋꩆ ꨆꨭꨖ ꩞ ꨨꨶꨮꩉ ꨈꨵꨮꩃ ꨕꨤꩌ ꨓꨚꨭꩀ ꨤꩄ ꨟꨮꨕ ꩝ ꨂꨣꩃ ꨝꨪꨎꩀꨍꨰꨘ ꩝ ꨓꨝꨵꨯꨱꩍ ꨟꨮꨣꨰ ꨓꨮꩊ ꨗꨫ ꩞ ꨛꨯꨮ ꨘꩆ ꨝꨪꨌꩆ ꨁꨗ ꨛꨩꨆꨵꨯꨱꩍ ꨈꨪꨙꨫ ꩝ ꨛꨩꨋꩇ ꨨꨣꩀ ꨚꨳꨮꩍ ꨕꨫ ꨚꨚꩆ ꨀꨋꩆ ꨗꩌ ꨚꨓꨯꨱ ꩞ ꨝꨵꨯꨱꩍ ꨚꨙꨮꩉ ꨝ ꨨꨣꩀ ꨘꩆ ꨗꨯꨱ ꩝ ꨌꨰꩀ ꨚꩀ ꨌꨮꩀ ꨚꨮꩉꨣꨪꨤꨯꨱ ꩝ ꨋꩆ ꨚꨝꩍ ꨣꩌ ꨕꨯꨮꨥ ꩞ (꩒꩒꩑-꩒꩒꩕) ꨝꨵꨯꨱꩍ ꨝꨶꨯꩊ ꨝ ꨨꨣꩀ ꨘꩆ ꨗꨯꨱ ꩝ ꨌꨰꩀ ꨓꩀ ꨘꩆ ꨆ ꨚꨓꨯꨱ ꩝ ꨀꨝꨪꩍ ꨨꨗꨭꩀ ꨚꨴꨲꩆ ꨢꨥ ꩞ ꨚꨗꨴꨯꨱꩃ ꨎꨝꨶꨯꩊ ꨞꩇ ꨚꨤꨬ ꨆꨭꨨꨴꨳꨫ ꨆꨭꨨꨴꨳ ꩝ ꨕꨤꩌ ꨟꨮꨖꨪꩉ ꨧ ꨕꨴꨬ ꨛꨯꨮ ꨝꨳ ꩝ ꨧꨭꨂꩍ ꨧꨭꨀꨶꨮꩆ ꨀꨗꨪꩅ ꨀꨘꩊ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨧꨫ ꨝꨪꨌꩆ ꩝ ꨨꨮꩄ ꨧ ꨓꨳꩆ ꨕꨯꨱꩀ ꨓꨘꩆ ꩝ ꨨꨤꨭꩆ ꨤꨪꨆꨮꨭ ꨕꨴꨬ ꨆꨳꨮꩃ ꨗꨯꨱ ꩞ ꨁꨗꨴ ꨚꨓꨴ ꨢꩅꨓꨴꩀ ꨓꨮꩊ ꨚꨤꨯꨱ ꩝ ꨓꨶꨬ ꨨꨣꩀ ꨚꨗꨶꨮꩄ ꨚꨓꨯꨱ ꩝ ꨆꨭꨢꨶ ꨈꨪꨙꨫ ꨋꩆ ꨆꨭꨖ ꩞ ꨓꨶꨮꩆ ꨚꨓꨴꨫ ꨟꨮꨣꨰ ꨓꨯꨱꩌ ꨁꨗꨴ ꨚꨓꨴ ꩝ ꨀꨗꩀ ꨚꨓꨯꨱ ꨠꩆ ꨆꨕꨶ ꩝ ꨛꨩꨙꨪꩀ ꨆꨧꨭꩉ ꨧꨫ ꨚꨗꩍ ꩞ (꩒꩒꩖-꩒꩓꩐) ꨎꩀ ꨈꨮꩇ ꨕꨶ ꨂꨣꩃ ꨕꨴꨬ ꨟꨮꨧꨭꩍ ꩝ ꨁꨗꨴ ꨚꨓꨴ ꨧꨭꨗꨪꩅ ꨈꨪꨗꨴꨮꩍ ꩝ ꨓꨐꨫ ꨨꨈꨰꩅ ꨦꨴꨮꩍ ꨆꨭꨖ ꩞ ꨀꨗꩀ ꨚꨓꨯꨱ ꨟꨮꨣꨰ ꨚꩀ ꨁꨗꨴ ꨚꨓꨴ ꩝ ꨤꩃ ꨀꨝꨪꩍ ꨚꨗꨶꨮꩄ ꨆꨭꨖ ꩝ ꨝꨪꨣꨭꨥ ꨎꩀ ꨈꨮꩇ ꨟꨮꨣꨰ ꩞ ꨛꨩꩀ ꨓꨈꨮꩉ ꨤꨯꨈ ꨦꩀꨓꨎꨰ ꩝ ꨛꨩꨋꩇ ꨓꨝꨮꩃ ꨟꩍ ꨂꨣꨰ ꩝ ꨆ ꨁꨗꨴ ꨚꨓꨴ ꨨꨨꨵꨭꩍ ꨝꨪꨊꨭꩀ ꩞ ꨝꨵꨯꨱꩍ ꨚꨙꨮꩉ ꨈꨭꨣꨕꩆ ꨓꨴꨭꩆ ꨟꩀ ꩝ ꨝ ꨓꨈꨯꩀ ꨓꨴꨭꩍ ꨚꩀ ꨊꨯꨱꩀ ꩝ ꨀꨝꨪꩍ ꨎꩃ ꨡꨯꩍ ꨧꨫ ꨈꨵꨮꩃ ꩞ ꨚꨓꨴꨫ ꨦꨭꨤꩆꨘ ꨌꩍꨢ ꨦꨴꨫ ꨝꨪꨢꨮꩃ ꩝ ꨣꨭꩇ ꨚꨓꨴꨫ ꨦꨯꨮꩍ ꨟꨮꨤꨮꩃ ꩝ ꨁꨗꨴ ꨚꨓꨴ ꨝꨴꨬ ꨀꨋꩆ ꩞ (꩒꩓꩑-꩒꩓꩕) ꨕꨯꩌ ꨘꩆ ꨀꨗꩀ ꨚꨓꨯꨱ ꨧꨫ ꨝꨪꨌꩆ ꩝ ꨁꨗꨴ ꨚꨓꨴ ꨋꩇ ꨖꨮꩉ ꩝ ꨧꨫ ꨗꨯꨱ ꨛꨩꨔꨮꨭ ꨛꨯꨮ ꨝꨳ ꩞ ꨕꨯꩌ ꨘꩆ ꨚꨗꨴꨯꨱꩃ ꨎꨝꨶꨯꩊ ꨗꨯꨱ ꨕꨀ ꩝ ꨝ ꨝꨪꨓꨮꩊ ꨟꨮꨖꨪꩉ ꨣꨪꨢ ꩝ ꨚꨓꨯꨱ ꨛꨯꨮ ꨝꨳ ꨀꨶꨮꩆ ꨓꨝꨶꨯꩆ ꩞ ꨋꩇ ꨀꨨꩉ ꨟꨮꨗꩃ ꨚꨢꩀ ꨤꨯ ꨣꨎꩆ ꩝ ꨨꨕꨯꩌ ꨝꨶꨯꩊ ꨕꨤꩌ ꨗꨮꨈꩉ ꩝ ꨀꨝꨪꩍ ꨟꨮꨢꨯꨱꩌ ꨁꨗꨴ ꨚꨓꨴ ꩞ ꨧꨭꨗꨪꩅ ꨈꨪꨗꨴꨮꩍ ꨧꨭꨟꨭ ꨧꨯꨱꩃ ꨛꨯꨮ ꨕꨯꨮꨝꨪꨓ ꩝ ꨝꨪꨊꨭꩀ ꨚꨓꨴꨫ ꨦꨭꨤꩆꨘ ꩝ ꨐꨭ ꨟꩀ ꨝ ꨓꨈꨯꩀ ꨟꨮꨣꨰ ꩝ ꨚꨗꨴꨯꨱꩃ ꨎꨝꨶꨯꩊ ꨀꨶꨮꩆ ꨌꨴꨪꩍ ꨕꨤꩌ ꨨꨓꨰ ꩝ ꨆ ꨕꨶ ꨂꨣꩃ ꨀꨕꨬ ꨦꨄꨰ ꩝ ꨚꨓꨴꨫ ꨗꨯꨱ ꨚꩀ ꨛꨯꨮ ꨝꨳ ꩞ (꩒꩓꩖-꩒꩔꩐) ꨁꨗꨴ ꨚꨓꨴ ꨍꨪꩆ ꨝꨳꨰ ꨆꨭꨨꨴꨳꨫ ꨆꨭꨨꨴꨳ ꩝ ꨆ ꨚꨓꨴꨫ ꨦꨭꨤꩆꨘ ꩝ ꨌꩍꨢ ꨣꨳꨪꩌ ꨀ ꨣꨳꨪꩌ ꩞ ꨀꨠꩊ ꨚꨓꨳꩇ ꨤꨪꨇꩍ ꨎꨈ ꨡꨮꩃ ꨟꨮꨐꨭꩌ ꩝ ꨆꨭꨨꨵꨯꨱꩌ ꨤꨪꨈꨰꩍ ꨨꨣꨬ ꨟꨮꨤꩌ ꩝ ꨈꨭꨣꨕꩆ ꨁꨆꨯꨮꩋ ꨧꨯꨱꩃ ꨚꨓꨴꨫ ꩞ ꨝꨪꨘꨓꨮꩃ ꨀꨶꩀ ꨣꨝꩇ ꨢꨭꩀ ꨟꨮꨣꨫ ꩝ ꨀꨕꨯꨱꩍ ꨆꨟꨴꨳꨮ ꨓꨶꨮꩆ ꨚꨓꨴꨫ ꩝ ꨕꨫ ꨊꨯꨱꩀ ꨆꨌꩀ ꨟꨮꨤꨪꨈꨰ ꩞ ꨁꨗꨴ ꨚꨓꨴ ꨆꨳꨮꩃ ꨡꨮꩃ ꨟꨮꨐꨭꩌ ꨧ ꨡꨮꩃ ꨓꨴ ꩝ ꨆ ꨚꨓꨴꨫ ꨦꨭꨤꩆꨘ ꩝ ꨌꩍꨢ ꨦꨴꨫ ꨝꨪꨢꨮꩃ ꩞ ꨈꨭꨣꨕꩆ ꨆꨤꩅ ꨧꨯꨱꩃ ꨚꨓꨴꨫ ꨘꩆ ꨦꨮꩃ ꩝ ꨡꨮꩃ ꨟꨮꨐꨭꩌ ꨝꨵꨯꨱꩍ ꨎꨳꨮꩃ ꩝ ꨧꨭꨞꩉꨣꨪꨢ ꨟꩃ ꨔꨭꩀ ꨨꨓꨰ ꩞ (꩒꩔꩑-꩒꩔꩕) ꨛꨩꩀ ꨂꨣꩃ ꨀꨗꩀ ꨟꨮꨓꨭꨥ ꨀꨝꨪꩍ ꨟꨮꨣꨰ ꩝ ꨎꨝꩅ ꨦꨭꨤꩌ ꨝꨵꨯꨱꩍ ꨚꨝꨴꨰ ꩝ ꨝꨳ ꨛꨯꨮ ꨀꨶꨮꩆ ꨓꨝꨶꨮꩆ ꩞ ꨋꩇ ꨀꨨꩉ ꨟꨮꨗꩃ ꨚꨢꩀ ꨤꨯ ꨣꨎꩆ ꩝ ꨚꨓꨯꨱ ꨛꨯꨮ ꨝꨳ ꨧꨫ ꨝꨪꨌꩆ ꩝ ꨆꨳꨮꩃ ꨀꨤꨪꩆ ꨁꨗꨴ ꨚꨓꨴ ꩞ ꨕꨤꩌ ꨗꨮꨈꩉ ꨧ ꨝꨯꨱꩍ ꨆꨕꨭꩃ ꨝꨯꨱꩀꨌ ꩝ ꨟꨮꨢꩍ ꨨꨓꨰ ꨅꩃ ꨤꨪꨚ ꩝ ꨀꨨꩉ ꨟꨮꨗꩃ ꨀꨝꨪꩍ ꨓꨘꩆ ꩞ ꨆꨭꨨꨵꨯꨱꩌ ꨀꨯꨱꩃ ꨧꨭꨗꨪꩅ ꨈꨪꨗꨴꨮꩍ ꨤꨯ ꨣꨎꩆ ꩝ ꨕꨤꩌ ꨧ ꨝꨪꨘꩍ ꨗꨮꨈꩉ ꩝ ꨕꩀ ꨓꨔꩆ ꨛꨯꨩꩀ ꨝꨴꨬ ꩞ ꨣꨶꩍ ꨇꩆ ꨧꨯꨱꩃ ꨧꨭꨀꨥ ꨦꨯꨮꩍ ꨙꨬ ꩝ ꨆꨕꨭꩃ ꨧꨯꨱꩃ ꨆꨵꨯꨱꩃ ꨁꨗ ꨝꨴꨬ ꩝ ꨀꨤꨪꩆ ꨛꨯꨮ ꨁꨗꨴ ꨚꨓꨴ ꩞ (꩒꩔꩖-꩒꩕꩐) ꨕꨯꩌ ꨘꩆ ꨝꨪꨣꨭꨥ ꨟꩃ ꨐꨭ ꨓꨯꩀ ꨝ ꩝ ꨆꨆꨬ ꨀꨝꨪꩍ ꨚꨗꨶꨮꩄ ꨆꨭꨖ ꩝ ꨧꨯꨱꩃ ꨕꨶ ꨂꨣꩃ ꨀꨗꩀ ꨚꨓꨯꨱ ꩞ ꨝꨳ ꨛꨯꨮ ꨓꨝꨳꩀ ꨝꨪꨙꩃ ꨆꨳꨮꩃ ꨚꨣꨤꨯꨱ ꩝ ꨕꨶ ꨂꨣꩃ ꨀꨗꩀ ꨚꨓꨯꨱ ꩝ ꨎꨝꩅ ꨦꨭꨤꩌ ꨁꨗꨴ ꨚꨓꨴ ꩞ ꨗꨯꨱ ꨓꨮꩊ ꨝꨪꨣꨭꨥ ꨟꩃ ꨐꨭ ꨡꨯꩍ ꨈꨨ ꩝ ꨧꨩ ꨕꨴꨬ ꨂꨤ ꨟꨮꩆ ꨤꨪꨕꨳ ꩝ ꨇꨪꩀ ꨈꨪꨤꨮꩃ ꨕꨯꨱꩀ ꨓꨘꩆ ꩞ ꨚꨴꨯꨱꩃ ꨣꨭꩇ ꨢꨯꨱꩌ ꨧꨭꨟꨭ ꨌꨮꩀ ꨧꨭ ꨌꨮꩉ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨣꨎꩆ ꩝ ꨐꨭ ꨆꨳꨮꩃ ꨡꨮꩃ ꨁꨗꨴ ꨚꨓꨴ ꩞ ꨐꨭ ꨨ ꨚꨝꩍ ꨓꨮꩊ ꨂꨤ ꨓꨗꩍ ꨣꨪꨢ ꩝ ꨆꩃ ꨀꨊꨯꨱꩀ ꨚꩀ ꨀꨕꨮꩉꨨ ꩝ ꨝꨪꨣꨭꨥ ꨟꩃ ꨐꨭ ꨛꨩꨟꨮꨓꨰ ꩞ (꩒꩕꩑-꩒꩕꩕) ꨐꨭ ꨝꨵꩍ ꨀꨆꨯꨱꩀ ꨟꩀ ꨟꨮꨙꨰꩀ ꨦꩀꨓꨎꨰ ꩝ ꨝꨵꨯꨱꩍ ꨟꩃ ꨐꨭ ꨝ ꨟꨮꨣꨰ ꩝ ꨓꨟ ꨗꨫ ꨎꨴꨮꩃ ꨕꨤꩌ ꨈꨨ ꩞ ꨆꨢ ꨆꩉ ꨟꩍ ꨚꨣꨳꩀ ꨤꨯ ꨟꨮꨕ ꩝ ꨕꨫ ꨣꨳꨪꩌ ꨚꨆꩉ ꨕꨤꩌ ꨈꨪꨨ ꩝ ꨝꨪꨣꨭꨥ ꨟꩃ ꨐꨭ ꨓꨝꨳꩀ ꨟꨮꨣꨰ ꩞ ꨓꨜꨳꨩ ꨈꨪꨤꨮꩃ ꨘꩆ ꨧꨩ ꨝꨯꨱꩍ ꨟꨮꨤꨪꨈꨰ ꩝ ꨕꨯꨮꨝꨪꨓ ꨓꨴꨭꩆ ꨟꨮꨣꨰ ꩝ ꨀꨳ ꨓꨝꨮꩃ ꨍꨰ ꨟꩍ ꨚꨣꨳꩀ ꩞ ꨥꩉ ꨀꨧꨰꩍ ꨟꩃ ꨝꨪꨧꨬ ꨇꩉ ꨨꨕꩍ ꩝ ꨝꨡꨮꩃ ꨎꩃ ꨕꨶ ꨈꩍ꩝ ꨟꩍꨤꨪꨆꨮꩌ ꨧꨭ ꨚꨮꩉꨟꨮꨓ ꩞ ꨁꨗꨴ ꨚꨓꨴ ꨎꨴꨮꩃ ꨚꩀ ꨊꨯꨱꩀ ꨀꨕꨮꩉꨨ ꩝ ꨡꨯꩍ ꨀꨧꨰꩍ ꨕꨯꨮꨝꨪꨓ ꩝ ꨚꨮꩉ ꨓꨴꨭꩆ ꨟꨮꨣꨰ ꨚꩀ ꨧꨶꨮꩉ ꩞ (꩒꩕꩖-꩒꩖꩐) ꨕꨨꨵꩀ ꨀꨧꨰꩍ ꨨꨰꨊꨫ ꨈꨭꨣꨕꩆ ꩝ ꨕꨯꨮꨝꨪꨓꨩ ꨧꨫ ꨚꨙꨮꩉ ꩝ ꨝꨴꨬ ꨆ ꨛꨯꨮ ꨁꨗꨴ ꨚꨓꨴ ꩞ ꨀꨲꩆ ꨟꩍ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩝ ꨧꨯꨱꩃ ꨆꨟꨮꩆ ꨟꩍ ꨝꨪꨊꨭ ꩝ ꨐꨭ ꨕꨯꨱꩀ ꨚꩀ ꨊꨯꨱꩀ ꨟꨮꨤꨪꨈꨰ ꩞ ꨁꨗꨴ ꨚꨓꨴ ꨟꩀ ꨝ ꨓꨴꨭꩆ ꨟꨮꨣꨰ ꩝ ꨕꨯꨮꨚꨝꨴꨬ ꨦꩀꨓꨎꨰ ꩝ ꨓꨖꨭꨥ ꨧꨭꨗꨪꩅ ꨕꨯꨮꨝꨪꨓ ꩞ ꨐꨭ ꨀꨇꩆ ꨆ ꨐꨭ ꨛꨩꨟꨮꨓꨰ ꨂꨤ ꩝ ꨀꨧꨰꩍ ꨚꨍꨰ ꨚꨗꨶꨮꩄ ꨆꨭꨖ ꩝ ꨚꨙꨮꩉ ꨐꨭ ꨟꩀ ꨣꨙꨰꩅ ꨣꨕꨳ ꩞ ꨕꨤꩌ ꨚꨚꩆ ꨧ ꨕꨴꨬ ꨂꨤ ꨟꨮꩆ ꨣꨕꨳ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨟꨮꨕ ꩝ ꨝꨪꨔꨮꩉ ꨟꩃ ꨦꨶꩆ ꨂꨣꩃ ꨓꨘꩆ ꩞ (꩒꩖꩑-꩒꩖꩕) ꨕꨯꩌ ꨘꩆ ꨝꨪꨣꨭꨥ ꨟꩃ ꨨꨟꨪꩅ ꨕꨫ ꨣ ꨀꨇꩆ ꩝ ꨙꨯꩌ ꨚꩀ ꨕꨤꩌ ꨗꨮꨈꩉ ꩝ ꨚꨝꩍ ꨣꩌ ꨙꨮꩉ ꨢꨧ ꩞ ꨟꨮꨕ ꨚꨓꨯꨱ ꨝꨶꨪꩋꨦꨚ ꨚꨮꩆꨤꨪꨕꨳ ꩝ ꨝꨶꨯꩊ ꨧꨭꨞꩇ ꨟꩃ ꨆꨴ ꨨꨶ ꩝ ꨀꨗꩀ ꨧ ꨤꨪꨆꨬ ꨆꨭꨟꨬ ꩞ ꨔꨮꨭ ꨢꨯꨱꩌ ꨧꨭꨗꨪꩅ ꨨꨗꨳꨪꩌ ꨕꨯꨮꨚꨝꨴꨬ ꩝ ꨛꨩꨎꨳꨮꩃ ꨗꨮꨈꩉ ꨌꨴꨪꩍ ꨙꨬ ꩝ ꨟꩃ ꨤꨪꨥꨪꩀ ꨟꩃ ꨆꩊ ꨟꨮꨣꨰ ꩞ ꨕꨯꩌ ꨘꩆ ꨚꨓꨯꨱ ꨝꨪꨙꩃ ꨍꨪꩆ ꨝꨳꨰ ꩝ ꨚꨙꨮꩉ ꨋꩇ ꨟꨮꨤꨪꨈꨰ ꩝ ꨝ ꨗꨯꨱ ꨤꨪꨠꩍ ꨚꨓꨴꨫ ꩞ ꨚꩀ ꨚꨕꩃ ꨁꩆꨓ ꨝꨤꨨꨫ ꩝ ꨚꨈ ꨝꨪꨧꨬ ꨆꨭꨣꨦꨫ ꩝ ꨝꨡꨮꩃ ꨟꩃ ꨟꩍ ꨚꨣꨳꩀ ꩞ (꩒꩖꩖-꩒꩗꩐) ꨚꨈ ꨕꨤꩌ ꨁꨗ ꨆꨦꨶꩆ ꨤꨰ ꨟꩍ ꩝ ꨝꨵꨯꨱꩍ ꨛꨩꨋꩇ ꨕꨪꩊ ꨕꨫ ꨆꨴꨲꩍ ꩝ ꨓꨝꨮꩃ ꨟꩃ ꨟꩍ ꨚꨣꨳꩀ ꩞ ꨚꨤ ꨝꨪꨊꨭ ꨕꨫ ꨣꨳꨪꩌ ꨚꨆꩉ ꨕꨶ ꨈꩍ꩝ ꨚꨣꩇ ꨣꨪꨝꩃ ꨟꩃ ꨇꩉ ꨨꨕꩍ ꩝ ꨕꨫ ꨌꨶꩍ ꨟꩃ ꨟꩍ ꨂꨣꩈ ꩞ ꨨꨕꨯꩌ ꨣꨙꨰꩍ ꨟꩍꨤꨪꨆꩌ ꨚꨓꨪꩍ ꨧꨯꨱꩃ ꨚꨕꨰ ꩝ ꨝꨶꨪꩋꨦꨘ ꨤꨰꩀ ꨟꨮꨣꨰ ꩝ ꨣꨪꨢꩀ ꨓꨔꨴꨯꩀ ꨌꨯꩍ ꨓꨝꨳꩀ ꩞ ꨧ ꨓꨮꩊ ꨕꨤꩌ ꨚꨈ ꨟꩃ ꨟꩍ ꨚꨣꨳꩀ ꩝ ꨁꨥ ꨨꨗꨭꩀ ꨕꨶ ꨈꩍ ꩝ ꨚꨤ ꨝꨪꨊꨭ ꨕꨫ ꨣꨳꨪꩌ ꨚꨆꩉ ꩞ ꨝꨵꨯꨱꩍ ꨘꩆ ꨋꩇ ꨕꨪꩊ ꨀꨳ ꨓꨝ꩝ ꨕꨯꩌ ꨣꨙꨰꩍ ꨧꨭ ꨚꨮꩉꨟꨮꨓ ꩝ ꨚꨣꩇ ꨣꨪꨝꩃ ꨟꩃ ꨇꩉ ꨚꨓꨪꩍ ꩞ (꩒꩗꩑-꩒꩗꩕) ꨧ ꨓꨮꩊ ꨕꨤꩌ ꨚꨈ ꨟꩃ ꨆꨣꨮꩍ ꨌꨮꩉꨟꨪꩊ ꩝ ꨀꨳ ꨢꨟꩆ ꨕꨫ ꨆꨴꨲꩍ ꨕꨪꩊ ꩝ ꨚꨣꩇ ꨣꨪꨝꩃ ꨟꩃ ꨇꩉ ꨟꨮꨣꨳꩍ ꩞ ꨛꨩꨋꩇ ꨈꨮꩃ ꨁꨗ ꨆꨦꨶꩆ ꨤꨰ ꨟꩍ ꩝ ꨓꨎꨭꩍ ꨚꨆꩅ ꨦꨰꩍ ꨕꨫ ꨦꨰꩍ ꩝ ꨈꨵꨯꨱꩃ ꨟꨮꨓꨲꩍ ꨀꨕꨮꩉꨨ ꩞ ꨟꩃ ꨊꨯꨱꩀ ꨚꨝꨭꩃ ꨨꨓꩀ ꨟꩃ ꨟꩍ ꨨꨤ ꩝ ꨤꨪꨆꨮꩌ ꨁꩆꨓꩆ ꨧꨭ ꨚꨮꩉꨟꨮꨓ ꩝ ꨕꨗꨪꩂ ꨟꩃ ꨇꩉ ꨨꨕꩍ ꩞ ꨀꨤ ꨤꨪꨑꩆ ꨟꨮꨓ ꨙꨥ ꨕꨶ ꨈꩍ ꩝ ꨀꨗꩀ ꨤꨪꨑꩆ ꨟꩃ ꨟꩍ ꨚꨣꨳꩀ ꩝ ꨔꨬ ꨧꨫ ꨇꨪꩆ ꨟꨮꨣꨰ ꨓꨗꨫ ꩝ ꨔꨴꩇ ꨈꩇ ꨝꨵꨯꨱꩍ ꨚꨙꨮꩉ ꨝ ꨚꨓꨴꨫ ꩝ ꨝꨪꨘꨓꨟꨮꩃ ꨣꨪꨝꩇ ꨟꨮꨣꨫ꩝ ꨚꨟꨴꨮ ꨕꨫ ꨤꨶꨪꩄ ꨎꨤꩆ ꨟꨮꨣꨰ ꩞ (꩒꩗꩖-꩒꩘꩐) ꨕꨀ ꨚꨓꨴꨫ ꨓꨈꨯꩀ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨓꨳꨯꨱꩃ ꨝꨪꨢꨯꨮꩆ ꨆꨟꨮꩃ ꨟꨮꨣꨰ ꩝ ꨌꨣꨥ ꨨꨕꩃ ꨀꨝꨪꩍ ꨓꨘꩆ ꩞ ꨝꨪꨢꨯꨮꩆ ꨆꨆꨭꩍ ꨓꨶꨮꩆ ꨚꨓꨴꨫ ꨧꨫ ꨝꨪꨌꩆ ꩝ ꨆꨗ ꨕꨴꨬ ꨆꨳꨮꩃ ꨗꨯꨱ ꨟꨮꨁꨪꩆ ꩝ ꨕꨫ ꨣꩍ ꨆꨳꨮꩃ ꨈꨵꨮꩃ ꨈꨴꨮꩇ ꨚꨤꨬ ꩞ ꨧ ꨂꨣꩃ ꨀꨗꩀ ꨚꨓꨯꨱ ꨧꨳꩌ ꨤꨪꨆꨬ ꩝ ꨚꨮꩉ ꨓꨟ ꨣꨎꨀꨬ ꩝ ꨙꨯꩌ ꨓꨘꩆ ꨝꨵꨯꨱꩍ ꨐꨭ ꨓꨴꨭꩆ ꩞ ꨣꨭꩇ ꨚꨓꨴꨫ ꨦꨰꩍ ꨕꨫ ꨦꨰꩍ ꨤꨯ ꨣꨎꩆ ꩝ ꨚꨮꩃ ꨚꨗꨶꨮꩄ ꨆꨭꨖ ꨝꨪꨢꨯꨮꩆ ꩝ ꨝꨪꨣꨭꨥ ꨟꩃ ꨙꨶꨯꩄ ꨓꨶꨬ ꨟꨮꨣꨰ ꩞ ꨀꨗꩀ ꨚꨓꨯꨱ ꨓꨈꨯꩀ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨐꨭ ꨡꨯꩍ ꨚꨓꨴꨫ ꨧꨳꩌ ꨝꨪꨗꨰ ꩝ ꨝꨪꨣꨭꨥ ꨟꩃ ꨤꨰꩀ ꨓꨮꩊ ꨂꨤ ꩞ (꩒꩘꩑-꩒꩘꩕) ꨈꩉ ꨤꨪꨑꩆ ꨟꨮꨓ ꨙꨥ ꨓꩀ ꨢ ꨕꨶ ꩝ ꨕꨯꩌ ꨟꨮꨁꨪꩆ ꨚꨮꩃ ꨆꨭꨖ ꩝ ꨝꨪꨢꨯꨮꩆ ꨟꨮꨓꨰ ꨕꨴꨬ ꨓꨗꨫ ꩞ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨧꨫ ꨓꨆꨯꨮ ꩝ ꨚꨗꩀꨦ ꨆ ꨣꨭꩇ ꨚꨓꨴꨫ ꩝ ꨝꨪꨣꨭꨥ ꨟꩃ ꨎꩀ ꨈꨮꩇ ꨟꨮꨣꨰ ꩞ ꨀꨗꩀ ꨚꨓꨯꨱ ꨓꨈꨯꩀ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨤꨰꩀ ꨓꨴꨭꩆ ꨝꨵꨯꨱꩍ ꨟꨮꨓꨰ ꩝ ꨀꨝꨪꩍ ꨎꩃ ꨓꨯꨱꩌ ꨓꩀ ꨘꩆ ꩞ ꨁꨗꨴ ꨚꨓꨴ ꨎꩀ ꨕꨫ ꨨꨰꨊꨫ ꨈꨭꨣꨪꨕꩆ ꩝ ꨧꨭꨝꨪꩀ ꨚꩀ ꨣꨎꨈꩉ ꩝ ꨐꨭ ꨎꨴꨮꩃ ꨕꨫ ꨟꨮꨤꨪꨈꨰ ꨚꨓꨴꨫ ꩞ ꨚꩀ ꨚꨕꩃ ꨁꩆꨓ ꨝꨣꨪꨨꨫ ꩝ ꨨꨕꩍ ꨢꨧ ꨚꨭꨣꨟꨫ ꩝ ꨁꨗꨴ ꨚꨓꨴ ꨓꨟ ꨟꨮꨁꨪꩆ ꩞ (꩒꩘꩖-꩒꩙꩐) ꨐꨭ ꨡꨯꩍ ꨣꨪꨢꩀ ꨌꨯꩍ ꨓꨔꨴꨯꩀ ꨕꨫ ꨕꨪꩊ ꩝ ꨝꨶꨪꩋꨦꨗ ꨤꨰꩀ ꨀꨊꨪꩆ ꩝ ꨧꨭꨟꨭ ꨧꨯꨱꩃ ꨦꩇ ꨣꨝꩇ ꨟꨮꨣꨫ ꩞ ꨁꨗꨴ ꨚꨓꨴ ꨓꨚ ꨣꨪꨝꩃ ꨧꨫ ꨓꨆꨯꨮ ꩝ ꨓꨈꨯꩀ ꨗꨯꨱ ꨓꨯꨱꩌ ꨚꨓꨴꨫ ꩝ ꨐꨭ ꨃꨥ ꨚꨎꨳꨯꩂ ꨋꩇ ꨧ ꨓꨳꩆ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨧꨫ ꨀꨇꩆ ꩝ ꨣꨪꨡꨫ ꨣꨪꨡꨲꩇ ꨕꨫ ꨤꨶꨪꩄ ꨎꨤꩆ ꩝ ꨆ ꨈꨯꨱꩆ ꨚꨓꨯꨱ ꨓꨳꩇ ꨟꨮꨣꨰ ꩞ ꨚꨓꨴꨫ ꨟꨮꨢꨯꨱꩌ ꨁꨗꨴ ꨚꨓꨴ ꨕꨤꩌ ꨨꨓꨰ ꩝ ꨧꨳꩌ ꨤꨪꨆꨬ ꨦꩀꨓꨎꨰ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨣꨎꩆ ꨣꨎꩆ ꩞ ꨝꨵꨯꨱꩍ ꨚꨓꨴꨫ ꨌꨮꩆꨠ ꨈꨣꨮꩅ ꨝꨪꨌꩆ ꩝ ꨧꨫ ꨀꨇꩆ ꨙꨯꩌ ꨓꨘꩆ ꩝ ꨀꨝꨪꩍ ꨧꨯꨱꩃ ꨛꨯꨮ ꨁꨗꨴ ꨚꨓꨴ ꩞ (꩒꩙꩑-꩒꩙꩕) ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨣꨪꨎ ꨕꨯꨥ ꩝ ꨕꨯꩌ ꨟꨮꨁꨪꩆ ꨚꨮꩃ ꨆꨭꨖ ꩝ ꨆꨭꨢꨶ ꨌꨟꨴꨪꩅ ꨚꨴꨯꨱꩃ ꨨꨓꨰ ꩞ ꨝꨵꨯꨱꩍ ꨛꨯꨮ ꨁꨗꨴ ꨚꨓꨴ ꨓꨴꨭꩆ ꨟꨮꨣꨰ ꩝ ꨟꩀ ꨣꨙꨰꩀ ꨦꩀꨓꨎꨰ ꩝ ꨐꨭ ꨛꨩꨨꨕꨳꨪꩇ ꨓꨈꨯꩀ ꨀꨝꨪꩍ ꩞ ꨀꨗꩀ ꨚꨓꨯꨱ ꨧꨫ ꨟꨮꨢꨯꨱꩌ ꨧꨭꨗꨪꩅ ꨈꨪꨗꨴꨮꩍ ꩝ ꨧꨳꩌ ꨤꨪꨆꨬ ꨦꨰꩍ ꨕꨫ ꨦꨰꩍ ꩝ ꨟꨮꨕ ꨎꩀ ꨝꨪꨙꨫ ꨝꨪꨗꨳꨰ ꩞ ꨝꨵꨯꨱꩍ ꨕꨀ ꨀꨗꩀ ꨚꨓꨯꨱ ꨓꨈꨯꩀ ꨟꨮꨤꨪꨈꨰ ꩝ ꨓꨶꨮꩆ ꨚꨓꨴꨫ ꨗꨫ ꨆꨳꨮꩃ ꨝꨳꨰ ꩝ ꨓꨳꩇ ꨝꨪꨢꨯꨮꩆ ꨗꨯꨱ ꨛꨩꨔꨮꨭ ꩞ ꨝ ꨀꨝꨪꩍ ꨚꨗꨶꨮꩄ ꨆꨭꨖ ꨚꩀ ꨚꨓꨯꨱ ꩝ ꨕꨀ ꨁꨗꨴ ꨚꨓꨴ ꨗꨯꨱ ꩝ ꨓꨟ ꨕꨤꩌ ꨟꨮꨖꨪꩉ ꨣꨪꨢ ꩞ (꩒꩙꩖-꩓꩐꩐) ꨤꩃ ꨓꨭꩊ ꨦꨆꨤꩅ ꨌꩍꨢ ꩝ ꨧꨭ ꨝꨰꨤꨪꨕꨭ ꨆꨥꩆꨘ꩝ ꨛꨩꨔꩇ ꨕꨤꩌ ꨣꨎꨀꨬ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨐꨭ ꨟꨮꨣꨰ ꩝ ꨚꨓꨯꨱ ꨣꨘꩌ ꨕꨤꩌ ꨨꨓꨰ ꩝ ꨆꨳꨮꩃ ꨡꨮꩃ ꨟꨮꨐꨭꩌ ꨀꨶꨮꩆ ꨓꨝꨶꨮꩆ ꩞ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨓꨯꨱꩌ ꨓꨘꩆ ꩝ ꨀꨨꩉ ꨟꨮꨗꩃ ꨤꨯ ꨣꨎꩆ ꩝ ꨛꨯꨩꩀ ꨟꨮꨣꨰ ꨝ ꨚꨢꩀ ꩞ ꨛꨩꨤꨮꩇ ꨨꨤ ꨝꨭꩍ ꨕꨫ ꨓꨮꩊ ꨛꨯꨩꩀ ꨓꨝꨳꩀ ꩝ ꨝꨪꨊꨭ ꨚꨘꩆ ꨔꩅ ꨓꨳꩀ ꩝ ꨚꨓꨯꨱ ꨣꨘꩌ ꨁꨗꨴ ꨚꨓꨴ ꩞ ꨟꨮꨢꨭꩅ ꨈꨮꩇ ꨟꩃ ꨕꨪꨘꩊ ꨚꨮꩆꨤꨪꨕꨳ ꩝ ꨕꨤꩌ ꨨꨓꨰ ꨁꨗꨴ ꨚꨓꨴ ꩝ ꨆꨳꨮꩃ ꨗꨯꨱ ꨛꨩꨔꨮꨭ ꨗꨯꨣꨚꩅ ꩞ (꩓꩐꩑-꩓꩐꩕) ꨆꨳꨮꩃ ꨚꨶꨮꩄ ꨚꨓꨴꨫ ꨆ ꨣꨝꩇ ꨣꨯꨦꩍ ꩝ ꨛꨩꨆꨵꨯꨱꩍ ꨚꨗꨶꨮꩄ ꨆꨭꨖ ꨀꨝꨪꩍ ꩝ ꨆꨳꨮꩃ ꨡꨮꩃ ꨟꨮꨐꨭꩌ ꨀꨶꨮꩆ ꨓꨝꨶꨮꩆ ꩞ ꨕꨯꩌ ꨘꩆ ꨝꨪꨣꨭꨥ ꨟꩃ ꨨꨟꨪꩅ ꨕꨫ ꨣ ꨀꨇꩆ ꩝ ꨙꨯꩌ ꨆ ꨚꩀ ꨕꨤꩌ ꨗꨮꨈꩉ ꩝ ꨀꨗꩀ ꨚꨓꨯꨱ ꨧꨳꩌ ꨝꨪꨗꨰ ꩞ ꨚꨓꨴꨫ ꨘꩆ ꨐꨭ ꨕꨯꨱꩀ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨕꨫ ꨣꩍ ꨎꨤꩆ ꨗꨯꨱ ꨟꨮꨣꨰ ꩝ ꨀꨝꨪꩍ ꨎꩃ ꨡꨯꩍ ꨧ ꨈꨵꨮꩃ ꩞ ꨟꨮꨕ ꨀꨟꨴꩀ ꨟꩍ ꨚꨮꩉ ꨗꨯꨱ ꨦꨮꩃ ꩝ ꨚꩀ ꨚꨓꨴꨫ ꨧꨳꩌ ꨟꨮꨤꨮꩃ ꩝ ꨀꨇꩆ ꨆ ꨣꨭꩇ ꨁꨗꨴ ꨚꨓꨴ ꩞ ꨧꨳꩌ ꨤꨪꨆꨬ ꨁꨣꨯꨮꩋ ꨝꨪꨎꩀꨍꨰꨘ ꩝ ꨚꨤꨬ ꨧꨭꨟꨮꩆ ꨓꨚꨣ꩝ ꨕꨨꨵꩀ ꨝ ꨚꨮꩉ ꨟꨮꨣꨰ ꩞ (꩓꩐꩖-꩓꩑꩐) ꨓꨶꨮꩆ ꨚꨓꨴꨫ ꨧꨭꨂꩍ ꨧꨭꨀꨶꨮꩆ ꨕꨤꩌ ꨨꨓꨰ ꩝ ꨐꨭ ꨃꨥ ꨣꨈꨬ ꨉꨮꩍ ꨟꨮꨣꨰ ꩝ ꨆ ꨆꨮꨭ ꨆꨳꨮꩃ ꨚꨙꨮꩉ ꨚꨓꨳ ꩞ ꨛꨩꨋꩇ ꨣꨭꩇ ꨆꨳꨮꩃ ꨝꨫ ꨕꨴꨮꩍ ꨁꨗꨴ ꨚꨓꨴ ꩝ ꨚꨓꨮꩃ ꨟꩍ ꨧ ꨚꨵꨭꩍ ꨀꨳ ꩝ ꨆ ꨆꨮꨭ ꨆꨳꨮꩃ ꨀꨤꨪꩆ ꨤꨪꨆꨬ ꩞ ꨀꨗꩀ ꨚꨓꨯꨱ ꨟꨮꨣꨰ ꨀꨝꨪꩍ ꨈꨴꨮꩇ ꨕꨴꨬ ꩝ ꨚꨓꨴꨫ ꨈꨵꨮꩃ ꨡꨯꩍ ꨆꨭꨣꨬ ꩝ ꨅꩍ ꨕꨴꨮꩍ ꨣꨭꩇ ꨐꨭ ꨚꨓꨳ ꩞ ꨚꩀ ꨚꨤꨬ ꨚꨝꩍ ꨣꩌ ꨙꩉ ꨢꨧ ꩝ ꨝꨪꨣꨭꨥ ꨟꩃ ꨡꨯꩍ ꨁꨗꨴ ꨚꨓꨴ ꩝ ꨆꨭꨗ ꨕꨴꨬ ꨕꨫ ꨚꨓꨯꨱ ꩞ ꨤꨪꨥꨪꩀ ꨨꨣꨬ ꨧꨴꨶꨰ ꨟꨮꨤꩌ ꨕꨨꨵꩀ ꨆꨳꨮꩃ ꨗꨯꨱ ꩝ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꩝ ꨎꨝꩅ ꨦꨭꨤꩌ ꨁꨗꨴ ꨚꨓꨴ ꩞ (꩓꩑꩑-꩓꩑꩕) ꨕꨯꩌ ꨘꩆ ꨝꨪꨣꨭꨥ ꨟꩃ ꨝꨪꨗꨮꩉ ꨧꨭꨚꨮꩆꨤꨪꨕꨳ ꩝ ꨐꨭ ꨝ ꨝꨶꨯꩊ ꨟꩃ ꨆꨴ ꨨꨶ ꩝ ꨐꨭ ꨚꨣꨤꨯꨱ ꨟꨮꨓꨲꩍ ꨎꨤꩆ ꩞ ꨁꨗꨴ ꨚꨓꨴ ꨙꨪꩀ ꨨꨰꨊꨫ ꨈꨭꨣꨕꩆ ꩝ ꨟꨮꨣꨰ ꨕꨫ ꨣꩍ ꨟꨮꨣꨩ ꨤꨮꩆ ꩝ ꨓꨶꨮꩆ ꨚꨓꨴꨫ ꨡꨯꩍ ꨧ ꨈꨵꨮꩃ ꩞ ꨁꨗꨴ ꨚꨓꨴ ꨗꨯꨱ ꨟꨮꨗꨬ ꨕꨫ ꨀꨳ ꨓꨝꨮꩃ ꩝ ꨓꨶꨮꩆ ꨚꨓꨴꨫ ꨕꨮꩃ ꨈꨵꨮꩃ ꩝ ꨐꨭ ꨓꨳꩇ ꨟꩃ ꨨꨵꨮꩇ ꨕ ꨨꨵꨮꩇ ꨟꨮꨣꨰ ꩞ ꨓꨳꩇ ꨚꨝꨰꩈ ꨣꨪꨝꨭꨥ ꨓꨟꩆ ꨆꨯꩅ ꨍꨰ ꩝ ꨐꨭ ꨈꨪꨗꨯꨱꩃ ꨕꨤꩌ ꨨꨓꨰ ꩝ ꨗꨫ ꨆ ꨁꨗꨴ ꨚꨓꨴ ꨟꨮꨗꨬ ꩞ ꨐꨭ ꨈꨵꨮꩃ ꨕꨫ ꨡꨯꨱꩀ ꨡꨯꩍ ꨅꩃ ꨘꩆ ꨆꨣꨬ ꩝ ꨣꨙꨰꩀ ꨟꨭꩀ ꨆꨜꨶꨣꨫ ꨝꨴꨬ ꩝ ꨐꨭ ꨌꨰꩀ ꨕꨤꩌ ꨀꨳ ꨓꨝꨮꩃ ꩞ (꩓꩑꩖-꩓꩒꩐) ꨤꨯꨱꩃ ꨈꨪꨗꨴꨮꩍ ꨐꨭ ꨆ ꨅꩃ ꨘꩆ ꨈꨵꨮꩃ ꩝ ꨛꨩꨔꨭ ꨀꨳ ꨕꨫ ꨓꨝꨮꩃ ꩝ ꨟꩃ ꨨꨵꨮꩇ ꨕ ꨨꨵꨮꩇ ꨨꨶꨮꩄ ꨆꨭꨙ ꩞ ꨀꨌꨯꨱꨥ ꨚꨝꨰꩈ ꨟꨮꨣꨰ ꨚꩀ ꨁꨗꨴ ꨚꨓꨴ ꩝ ꨨꨮꩄ ꨛꨯꨮ ꨣꨟꨮꨕ ꩝ ꨎꨝꩅ ꨦꨭꨤꩌ ꨝꨵꨯꨱꩍ ꨝꨪꨌꩆ ꩞ ꨝꨪꨣꨭꨥ ꨟꩃ ꨁꨗꨴ ꨚꨓꨴ ꨋꩇ ꨖꩉ ꩝ ꨐꨭ ꨟꩀ ꨣꨙꨰꩅ ꨓꨈꨯꩀ ꨓꨘꩆ ꩝ ꨝꨪꨣꨭꨥ ꨟꩃ ꨀꨳ ꨝꩀ ꨓꨝꨮꩃ ꩞ ꨚꨓꨴꨫ ꨝꨪꨙꩃ ꨕꨫ ꨟꨮꨤꨪꨈꨰ ꨝꨵꨯꨱꩍ ꨧ ꨈꨵꨮꩃ ꩝ ꨝꨵꨯꨱꩍ ꨟꩃ ꨓꨳꩇ ꨧꨭ ꨣꨕꨪꨢꨮꩃ ꩝ ꨗꨯꨱ ꨓꨐꨫ ꨚꨗꨶꨮꩄ ꨆꨭꨖ ꩞ ꨨꨮꩄ ꨀꨯꨱꩃ ꨀꨌꨯꨱꨥ ꨚꨝꨰꩈ ꨞꨯꨕꨮꩉꨨ ꩝ ꨔꨬ ꨂꨣꩃ ꨘꩆ ꨟꨮꨕ ꩝ ꨀꨥ ꨧꨭ ꨇꩆ ꨟꩃ ꨟꩍ ꩞ (꩓꩒꩑-꩓꩒꩕) ꨆꨮꨭ ꨡꨯꩍ ꨣꨭꩇ ꨚꨞꩇ ꨘꩅꨓꨔꨪꩍ ꩝ ꨧꨳꩌ ꨤꨪꨆꨬ ꨌꨴꨪꩍ ꨕꨫ ꨌꨴꨪꩍ ꩝ ꨀꨇꩆ ꨓꨚꩀ ꨆ ꨆꨮꨭ ꨆꨳꨮꩃ ꨚꨮꩃ ꩞ ꨟꩃ ꨨꨵꨮꩇ ꨕ ꨨꨵꨮꩇ ꨐꨭ ꨝꨪꨌꩆ ꨧꨯꨱꩃ ꨣꨕꨪꨢꨮꩃ ꩝ ꨐꨭ ꨤꩄ ꨓꨌꨯꨱꨥ ꨐꨭ ꨚꨎꨳꨮꩃ ꩝ ꨧꨭ ꨣꨕꨪꨢꨮꩃ ꨥꨮꩀ ꨟꨮꨣꨰ ꩞ ꨗꨯꨱ ꨀꨇꩆ ꨚꩀ ꨚꨓꨴꨫ ꨧꨳꩌ ꨝꨪꨗꨰ ꩝ ꨚꨣꨶꩍ ꨣꨎꩀ ꨝꨪꨙꨫ ꨝꨪꨗꨳꨰ ꩝ ꨨꨭ ꨧ ꨕꨴꨬ ꨕꩌ ꨓꨆ ꩞ ꨚꨓꨴꨫ ꨓꨳꩇ ꨗꨯꨱ ꨓꨐꨫ ꨧ ꨡꨮꩃ ꨓꨴ ꩝ ꨨꨮꩄ ꨀꨯꨱꩃ ꨣꨓꨨ ꩝ ꨕꨯꨱꩀ ꨀꨌꨯꨱꨥ ꨚꨝꨰꩈ ꨚꨓꨯꨱ ꩞ ꨀꨇꩆ ꨓꨚꩀ ꨆ ꨂꨣꩃ ꨘꩆ ꨆ ꨆꨮꨭ ꨆꨳꨮꩃ ꨗꨯꨱ ꩝ ꨓꨮꩊ ꨆꨮꨭ ꨦꩇ ꨚꨝꨰꩈ ꨚꨓꨯꨱ ꩝ ꨟꨮꨓꨰ ꨀꨝꨪꩍ ꨤꩀꨦ ꩞ (꩓꩒꩖-꩓꩓꩐) ꨕꨯꩌ ꨘꩆ ꨟꩃ ꨨꨵꨮꩇ ꨕ ꨨꨵꨮꩇ ꨨꨶꨮꩄ ꨆꨭꨙ ꩝ ꨨꨟꨪꩅ ꨓꨮꩊ ꨁꨗꨴ ꨚꨓꨴ ꩝ ꨝꨪꨣꨭꨥ ꨟꩃ ꨐꨭ ꨇꨪꩌ ꨆꨵꨯꨱ ꩞ ꨟꩃ ꨨꨵꨮꩇ ꨕ ꨨꨵꨮꩇ ꨀꨇꩆ ꨀꨝꨪꩍ ꨚꨗꨶꨮꩄ ꨆꨭꨖ ꩝ ꨀꨋꩆ ꨛꨯꨮ ꨁꨗꨴ ꨚꨓꨴ ꩝ ꨚꨴꨯꨱꩃ ꨦꨘꩀ ꨦꩀꨓꨎꨰ ꩞ ꨕꨯꩌ ꨘꩆ ꨟꩃ ꨂꨣꩃ ꨥꨮꩀ ꨟꨮꨣꨰ ꩝ ꨚꩀ ꨚꨓꨴꨫ ꨧꨳꩌ ꨝꨪꨗꨰ ꩝ ꨀꨇꩆ ꨤꩄ ꨁꨗꨴ ꨚꨓꨴ ꩞ ꨀꨟꨴꩀ ꨟꩍ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩝ ꨆꨭꨨꨵꨯꨱꩌ ꨀꨟꨴꩀ ꨁꨗꨴ ꨚꨓꨴ ꩝ ꨚꨓꨴꨫ ꨚꨙꨮꩉ ꨝ ꨆ ꨐꨭ ꩞ ꨛꨩꨤꨮꩇ ꨨꨤ ꨝꨭꩍ ꨕꨫ ꨓꨮꩊ ꨟꩍ ꨝꨪꨊꨭ ꩝ ꨀꨟꨴꩀ ꨟꩍ ꨧꨫ ꨓꨆꨯꨮ ꩝ ꨛꨯꨮ ꨧꨭꨀꨮꨮꩆ ꨚꨤꨬ ꨗꨮꨈꩉ ꩞ (꩓꩓꩑-꩓꩓꩕) ꨣꨪꨡꨫ ꨣꨪꨡꨲꩇ ꨟꩃ ꨆꩊ ꨕꨨꨵꩀ ꨝ ꨚꨮꩉ ꩝ ꨁꨗꨴ ꨚꨓꨴ ꨗꨫ ꨨꨕꩉ ꩝ ꨨꨳ ꨧꨭꨀꨶꨮꩆ ꨁꨗ ꨀꨟ ꩞ ꨕꨯꩌ ꨘꩆ ꨣꨕꨪꨢꨮꩃ ꨧꨫ ꨓꨐꨫ ꩝ ꨟꨮꨢꩍ ꨨꨓꨰ ꨛꨯꨮ ꨓꨆꨴꨲ ꩝ ꨝꨴꨬ ꨀꨟꨴꩀ ꨕꨯꨱꩀ ꨓꨘꩆ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨧꨫ ꨝꨪꨌꩆ ꩝ ꨕꨫ ꨆꩊ ꨀꨟꨴꩀ ꨝ ꨚꨮꩉ ꩝ ꨟꩃ ꨚꨤꨬ ꨗꨮꨈꩉ ꨟꨮꨣꨰ ꩞ ꨗꨯꨱ ꨀꨇꩆ ꨓꨮꩊ ꨚꨓꨴꨫ ꨧꨳꩌ ꨝꨪꨗꨰ ꩝ ꨀꨶꨮꩆ ꨓꨝꨶꨯꩆ ꨝꩀ ꨨꨓꨰ ꩝ ꨐꨭ ꨓꨳꩇ ꨝꨪꨢꨯꨮꩆ ꨗꨯꨱ ꨕꨀ ꩞ ꨓꨚꨯꩂ ꨆꨵꨯꨱꩃ ꨟꩍ ꨝꨪꨊꨭ ꨝ ꨤꨪꨠꩍ ꩝ ꨆꨩ ꨛꨯꨮ ꨁꨗꨴ ꨚꨓꨴ ꨧꨕꩍ ꩝ ꨚꨓꨴꨫ ꨓꨳꩇ ꨝ ꨟꨮꨣꨰ ꩞ (꩓꩓꩖-꩓꩔꩐) ꨁꨗꨴ ꨚꨓꨴ ꨧꨳꩌ ꨤꨪꨆꨬ ꨦꩀꨓꨎꨰ ꩝ ꨐꨭ ꨃꨥ ꨀꨧꨰꩍ ꨐꨭ ꨟꨮꨣꨰ ꩝ ꨆꨳꨮꩃ ꨗꨯꨱ ꨟꨮꨁꨪꩆ ꨚꩀ ꨚꨓꨴꨫ ꩞ ꨐꨭ ꨚꨮꩉ ꨓꨈꨯꩀ ꨓꨶꨬ ꨊꨯꨱꩀ ꨚꨝꨭꩃ ꨈꨪꨨ ꩝ ꨛꨩꨤꨰꩀ ꨕꨫ ꨆꨴꨲꩍ ꨀꨗꨪꩍ ꨚꨓꨴꨫ ꩝ ꨕꨤꩌ ꨓꨪꨣꩈ ꨆꨤꨪꨟꨭ ꩞ ꨡꨭꨥ ꨨꨮꩇ ꨟꨮꨗꨭꨥ ꨟꨮꨗꩃ ꨦꨯꨮꩍ ꨤꨯ ꩝ ꨧꨳꩌ ꨤꨪꨆꨬ ꨣꨭꩇ ꨧꨭꨟꨭ ꩝ ꨨꨕꩍ ꨢꨧ ꨚꨭꨣꨪꨟꨫ ꩞ ꨁꨗꨴ ꨚꨓꨴ ꨓꨝꨳꩀ ꨟꨮꨣꨰ ꨕꨤꩌ ꨈꨪꨨ ꩝ ꨕꨯꨱꩀ ꨕꨫ ꨊꨯꨱꩀ ꨓꨭꩊ ꨚꨓꨴꨫ ꩝ ꨝꨵꨯꨱꩍ ꨝꨪꨌꩆ ꨚꨗꨶꨮꩄ ꨆꨭꨖ ꩞ ꨝꨵꨯꨱꩍ ꨚꨓꨴꨫ ꨟꨮꩆ ꨕꨣ ꨈꨪꨣꩀꨘ ꩝ ꨋꩇ ꨀꨨꩉ ꨕꨫ ꨣꨳꨪꩌ ꨟꨮꨓ ꩝ ꨛꨯꨩꩀ ꨝ ꨟꨮꨣꨰ ꨚꨢꩀ ꩞ (꩓꩔꩑-꩓꩔꩕) ꨚꨓꨯꨱ ꨈꨪꨨꨭꩉ ꨨꨪꨢꨶꨭꩋ ꨝꨴꨬ ꨝꨶꨯꩊ ꩝ ꨁꨪꨥ ꨨꨗꨭꩀ ꨀꨝꨪꩍ ꨓꨘꩆ ꩝ ꨝ ꨇꨪꩀ ꨀꨤꨩ ꨟꨮꨤꨪꨈꨰ ꩞ ꨁꨗꨴ ꨚꨓꨴ ꨃꨥ ꨀꨟꨴꩀ ꨟꩍ ꨟꨮꨣꨰ ꩝ ꨙꨯꩌ ꨆꨵꨯꨱ ꨦꩀꨓꨎꨰ ꩝ ꨝꨪꨣꨭꨥ ꨟꩃ ꨨꨟꨪꩅ ꨓꨮꩊ ꨂꨤ ꩞ ꨝꨶꨯꩊ ꨓꨈꨯꩀ ꨗꨯꨱ ꨇꨪꩀ ꨁꨗꨴ ꨚꨓꨴ ꩝ ꨟꨮꨣꨰ ꨝꨪꨌꩆ ꨚꨗꨶꨮꩄ ꨆꨭꨖ ꩝ ꨗꨯꨱ ꨛꨩꨔꨮꨭ ꨗꨯꨣꨚꩅ ꩞ ꨆꨴꨲꩍ ꨟꨮꨤꩌ ꨘꩆ ꨅꩍ ꨨꨭ ꨔꨬ ꨧꨫ ꨔꨮꨭ ꩝ ꨗꨯꨣꨚꩅ ꨈꨪꨗꨯꨱꩃ ꨢꨮꨭ ꩝ ꨟꨮꨣꨆꨰꩀ ꨈꨴꨭꩌ ꨆꨓꩊ ꩞ ꨝꨵꨯꨱꩍ ꨃꨥ ꨚꨗꨴꨯꨱꩃ ꨎꨝꨶꨯꩊ ꨟꨮꨣꨰ ꨀꨇꩆ ꩝ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꩝ ꨚꨙꨮꩉ ꨟꩀ ꨁꨗꨴ ꨚꨓꨴ ꩞ (꩓꩔꩖-꩓꩕꩐) ꨕꨯꩌ ꨘꩆ ꨓꨶꨮꩆ ꨚꨓꨴꨫ ꨨꨶꨮꩄ ꨆꨭꨙ ꩝ ꨧꨭꨗꨪꩅ ꨈꨪꨗꨴꨮꩍ ꨁꨗꨴ ꨚꨓꨴ ꩝ ꨚꩀ ꨓꨈꨮꩉ ꨓꨝꨳꩀ ꨟꨮꨣꨰ ꩞ ꨦꨘꩀ ꨈꨪꨗꨴꨮꩍ ꨁꨗꨴ ꨚꨓꨴ ꨦꩀꨓꨎꨰ ꩝ ꨚꩀ ꨆꨓꨫ ꨝꨶꨯꩊ ꨟꨮꨣꨰ ꩝ ꨀꨝꨪꩍ ꨓꨝꨳꩀ ꨧꨯꨱꩃ ꨓꨈꨮꩉ ꩞ ꨐꨭ ꨛꨩꨟꨮꨓꨰ ꨝꨶꨯꩊ ꨚꨓꨯꨱ ꨣꨤꨯ ꨣꨎꩆ ꩝ ꨅꩍ ꨦꨗꩍ ꨧꨯꨱꩃ ꨓꨈꨮꩉ ꩝ ꨀꨤꩍ ꨀꨝꨪꩍ ꨥꨮꩀ ꨟꨮꨣꨰ ꩞ ꨗꨯꨣꨚꩅ ꨚꨙꨮꩉ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꩝ ꨓꨶꩀ ꨆꨚꨳꩍ ꨝꨵꨯꨱꩍ ꨗꨯꨱ ꩝ ꨝ ꨝꨶꨯꩊ ꨧ ꨆꨝꨶꨯꨮꩅ ꩞ ꨚꩀ ꨚꨕꩃ ꨁꩆꨓ ꨎꨰ ꨢꨯꨮꩅ ꩝ ꨚꩆ ꨌꨠꩀ ꨨꨗꨴꩀ ꨌꨣꨪꩅ ꩝ ꨝꨶꨯꩊ ꨟꨮꨣꨰ ꨆꨳꨮꩃ ꨟꨮꨧꨭꩍ ꩞ (꩓꩕꩑-꩓꩕꩕) ꨁꨗꨴ ꨚꨓꨴ ꨧꨳꩌ ꨤꨪꨆꨬ ꨦꨯꨮꩍ ꨕꨫ ꨦꨯꨮꩍ ꩝ ꨨꨤꨭꨥ ꨝꨪꨤꩃ ꨧꨭꨗꨪꩅ ꨈꨪꨗꨴꨮꩍ ꩝ ꨓꨝꨳꩀ ꨟꨮꨣꨰ ꨅꩍ ꨔꨬ ꨆꨳꨮꩃ ꨡꨯꩍ ꩞ ꨐꨭ ꨛꨩꨟꨮꨓꨰ ꨀꨗꩀ ꨚꨓꨯꨱ ꨛꨩꩀ ꨚꨵꨭꩍ ꩝ ꨝꨵꨯꨱꩍ ꨐꨭ ꨝ ꨗꨯꨱ ꨚꨳꨮꩍ ꩝ ꨚꨕꨮꩇ ꨕꨤꩌ ꨈꨪꨤꨮꩃ ꨚꨓꨯꨱ ꩞ ꨨꨕꨯꩌ ꨝꨶꨯꩊ ꨀꨤꩍ ꨀꨝꨪꩍ ꨥꨮꩀ ꨗꨯꨱ ꩝ ꨘꩆ ꨆ ꨟꩃ ꨚꨓꨯꨱ ꩝ ꨓꨳꩇ ꨈꨭꨣꨕꩆ ꨓꨔꨴꨪꩀ ꨟꨮꨣꨰ ꩞ ꨆꨭꨟꨶꨮꩆ ꨚꨓꨯꨱ ꨧ ꨂꨣꩃ ꨦꩀꨓꨎꨰ ꩝ ꨨꨤꨭꨥ ꨝꨪꨤꩃ ꨧ ꨨꨓꨰ ꩝ ꨈꨭꨣꨕꩆ ꨓꨔꨴꨪꩀ ꨧꨭꨗꨪꩅ ꨈꨪꨗꨴꨮꩍ ꩞ ꨝꨩ ꨝꨶꨯꩊ ꨚꩆ ꨌꨠꩀ ꨦꨯꨮꩍ ꨕꨫ ꨦꨯꨮꩍ ꩝ ꨐꨭ ꨙꨪꩀ ꨕꨫ ꨊꨯꨱꩀ ꨀꨣꨯꨱꩃ ꨀꨧꨰꩍ ꩝ ꨟꨮꨣꨰ ꨃꨥ ꨁꨗꨴ ꨚꨓꨴ ꩞ (꩓꩕꩖-꩓꩖꩐) ꨨꨮꩄ ꨀꨯꨱꩃ ꨀꨗꩀ ꨣꨗꨰꩍ ꨣꨟꨮꨕ ꩝ ꨓꨴꨭꩆ ꨟꨮꨣꨰ ꨚꩀ ꨂꨤ ꩝ ꨗꨫ ꨆ ꨆꨮꨭ ꨆꨳꨮꩃ ꨛꨩꨟꨮꨓꨰ ꩞ ꨓꨶꨮꩆ ꨚꨓꨴꨫ ꨨꨶꨮꩄ ꨆꨭꨙ ꨕꨤꩌ ꨨꨓꨰ ꩝ ꨐꨭ ꨔꨮꨭ ꨤꩄ ꨆ ꨦꨄꨰ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨣꨎꩆ ꩞ ꨁꨗꨴ ꨚꨓꨴ ꨙꨪꩀ ꨨꨰꨊꨫ ꨈꨭꨣꨕꩆ ꩝ ꨧꨭꨝꨪꩀ ꨧꨯꨱꩃ ꨛꨩꩀ ꨂꨣꩃ ꨓꨈꨮꩉ ꩝ ꨐꨭ ꨆꨯꨱꩃ ꨓꨴꨭꩆ ꨓꨮꩊ ꨂꨤ ꩞ ꨐꨭ ꨛꨩꨓꨴꨭꩆ ꨈꨴꨭꩌ ꨆꨓꩊ ꨌꨆꨤ ꩝ ꨧꨭꨗꨪꩅ ꨈꨪꨗꨴꨮꩍ ꨁꨗꨴ ꨚꨓꨴ ꩝ ꨣꨪꨝꨭꩀ ꨓꨔꨯꨱꨥ ꨨꨎꩆ ꨀꨊꨪꩆ ꩞ ꨐꨭ ꨛꨩꨝꨪꨗꨯꨮꩋ ꨈꨭꨣꨕꩆ ꨓꨔꨴꨪꩀ ꨧ ꨆꨦꨮꩆ ꩝ ꨝꨵꨯꨱꩍ ꨐꨭ ꨝꨴꨬ ꨆ ꨛꨩꩀ ꨓꨈꨮꩉ ꩝ ꨚꨕꨮꩇ ꨕꨫ ꨧꩃ ꨀꨌꨯꨱꨥ ꨚꨝꨰꩈ ꩞ (꩓꩖꩑ ꩓꩖꩕) ꨝꨵꨯꨱꩍ ꨚꨆꨴꩇ ꨨꨎꩆ ꨀꨊꨪꩆ ꨕꨫ ꨤꨪꩊ ꨣꨤ ꩝ ꨓꨈꨯꩀ ꨗꨯꨱ ꨚꩀ ꨊꨯꨱꩀ ꨈꨪꨨ ꩝ ꨓꨶꨮꩆ ꨚꨓꨴꨫ ꨟꨮꨦꩀ ꨨꨓꨰ ꩞ ꨕꨯꩌ ꨘꩆ ꨀꨤꩍ ꨤꨪꨈꩍ ꨝꨶꨯꩊ ꨟꨮꨣꨰ ꩝ ꨚꨓꨯꨱ ꨈꨪꨗꨯꨱꩃ ꨕꨤꩌ ꨨꨓꨰ ꩝ ꨚꨎꨭꩌ ꨝꨶꨯꩊ ꨆꨳꨮꩃ ꨟꨮꨧꨭꩍ ꩞ ꨚꨓꨯꨱ ꨚꨙꨮꩉ ꨚꨗꨴꨯꨱꩃ ꨎꨝꨶꨯꩊ ꨝꨮꩀ ꨝꨳꨭꩍ ꩝ ꨛꨩꨋꩇ ꨧ ꨝꨯꨱꩍ ꨤꨭꨥ ꨕꨫ ꨆꨴꨲꩍ ꩝ ꨚꨓꨯꨱ ꨝꨪꨙꩃ ꨓꨝꨳꩀ ꨟꨮꨣꨰ꩞ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨟꨮꨤꨳꨮꩃ ꨆꨗ ꩝ ꨀꨥ ꨧꨭ ꨇꩆ ꨝꨵꨯꨱꩍ ꨀꨊꨶꨬ ꩝ ꨓꨶꩀ ꨆꨚꨳꩍ ꨟꩃ ꨟꩍ ꩞ ꨎꨴꨮꩃ ꨓꨚꩀ ꨨꨣꨬ ꨓꨈꨯꩀ ꨘꩅꨓꨔꨪꩍ ꩝ ꨀꨗꩀ ꨚꨓꨯꨱ ꨧꨭꨗꨪꩅ ꨈꨪꨗꨴꨮꩍ ꩝ ꨀꨋꩆ ꨎꨘꩉ ꨚꩆꨤꨪꨕꨳ ꩞ (꩓꩖꩖-꩓꩗꩐) ꨐꨭ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨟꩃ ꨆꨴ ꨨꨶ ꩝ ꨟꨮꨣꨰ ꨕꨯꨱꩃ ꨁꨗꨴ ꨚꨓꨴ ꩝ ꨛꨩꨨꨤꨶꨬ ꨟꩃ ꨟꩍ ꩞ ꨧ ꨚꨗꨯꨱꩀ ꨀꨗꩀ ꨚꨓꨯꨱ ꨛꩀ ꨚꨵꨭꩍ ꩝ ꨝ ꨝꨶꨯꩊ ꨣꨪꨝꨭꨥ ꨣꨪꨓꨭꩍ ꩝ ꨆꨯꩅ ꨓꨟꩆ ꨤꩀꨦ ꩞ ꨐꨭ ꨟꨮꨣꨰ ꨣꨘꩌ ꨛꨯꨮ ꨁꨗꨴ ꨚꨓꨴ ꩝ ꨆꨍꨰꩅ ꨟꩍ ꨧ ꨚꨵꨭꩍ ꨀꨳ ꩝ ꨛꨩꨨꨤꨶꨬ ꨤꩍ ꨆꨥꩍ ꩞ ꨈꨭꨣꨪꨕꩆ ꨁꨆꨯꨮꩋ ꨆꨤꩅ ꨦꨰꩍ ꨕꨫ ꨦꨰꩍ ꩝ ꨐꨭ ꨙꨪꩀ ꨕꨫ ꨊꨯꨱꩀ ꨀꨣꨯꨱꩃ ꨀꨧꨰꩍ ꩝ ꨀꨗꩀ ꨚꨓꨯꨱ ꨗꨮꨈꩉ ꨀꨓꩍ ꩞ ꨝ ꨝꨶꨯꩊ ꨁꨪꨥ ꨨꨗꨭꩀ ꨤꩍ ꨆꨥꩍ ꩝ ꨍꨰꩅ ꨟꩍ ꨝꨪꨊꨭ ꨓꨓꩍ ꩝ ꨛꨩꨨꨤꨶꨬ ꨀꨕꨬ ꨦꨄꨰ ꩞ (꩓꩗꩑-꩓꩗꩕) ꨧ ꨚꨗꨯꨱꩀ ꨀꨗꩀ ꨚꨓꨯꨱ ꨓꨴ ꨟꨮꨣꨰ ꩝ ꨐꨭ ꨝ ꨝꨶꨯꩊ ꨆꨯꩅ ꨍꨰ ꩝ ꨀꨗꩀ ꨚꨓꨯꨱ ꨧ ꨣꨪꨓꨭꩍ ꩞ ꨀꨥ ꨧꨭ ꨇꩆ ꨓꨶꩀ ꨆꨚꨳꩍ ꨟꩃ ꨟꩍ ꩝ ꨟꨮꨣꨰ ꨆꨳꨮꩃ ꨕꨯꨱꩃ ꨟꨮꨧꨭꩍ ꩝ ꨣꨘꩌ ꨚꨯ ꨁꨗꨴ ꨚꨓꨴ ꩞ ꨧ ꨂꨣꩃ ꨀꨗꩀ ꨚꨓꨯꨱ ꨀꨕꨮꩉꨨ ꩝ ꨀꨋꩆ ꨣꨎ ꨕꨯꨮꨥ ꩝ ꨐꨭ ꨚꨎꩀ ꨕꨫ ꨊꨯꨱꩀ ꨁꨗꨈꨪꨣꨰ ꩞ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨆꨯꩅ ꨍꨰ ꩝ ꨐꨭ ꨣꨘꩌ ꨕꨤꩌ ꨨꨓꨰ ꩝ ꨀꨶꨮꩆ ꨕꨫ ꨛꨯꨮ ꨁꨗꨴ ꨚꨓꨴ ꩞ ꨛꨩꨨꨤꨶꨬ ꨍꨰꩅ ꨟꩍ ꨧ ꨚꨵꨭꩍ ꨀꨳ ꩝ ꨣꨟꨯꨮ ꨣꨟꨰ ꨧꨭ ꨚꨮꩉꨟꨮꨓ ꩝ ꨆꨤꩍ ꨟꩃ ꨟꩍꨤꨪꨆꨮꩌ ꩞ (꩓꩗꩖-꩓꩘꩐) ꨐꨭ ꨚꨮꩉ ꨗꨯꨱ ꨨꨣꨬ ꨅ ꨚꩀ ꨔꨮꨭ ꨟꨮꨤꩌ ꩝ ꨐꨭ ꨓꨟ ꨓꨮꩊ ꨟꨮꨖꨪꩉ ꩝ ꨗꨮꨈꩉ ꨚꨓꨯꨱ ꨟꨮꨧꨭꩍ ꨀꨤꩍ ꩞ ꨀꨗꩀ ꨚꨓꨯꨱ ꨀꨋꩆ ꨣꨝꩇ ꨣꨯꨦꨭꨦꩍ ꩝ ꨐꨭ ꨙꨪꩀ ꨕꨫ ꨊꨯꨱꩀ ꨧꨪꩂ ꨟꩍ ꩝ ꨐꨭ ꨚꨮꩉ ꨚꩀ ꨊꨯꨱꩀ ꨀꨕꨮꩉꨨ ꩞ ꨐꨭ ꨟꨮꨣꨰ ꨣꨘꩌ ꨛꨯꨮ ꨁꨗꨴ ꨚꨓꨴ ꩝ ꨍꨰꩅ ꨟꩍ ꨧ ꨚꨵꨭꩍ ꨀꨳ ꩝ ꨣꨪꨝꩇ ꨟꨮꨣꨫ ꨚꨟꨴꨮ ꨟꨮꨣꨰ ꩞ ꨛꨩꩀ ꨚꨵꨭꩍ ꨕꨯꩀ ꨟꨮꨣꨳꩍ ꨦꩀꨓꨎꨰ ꩝ ꨐꨭ ꨎꨴꨮꩃ ꨕꨫ ꨊꨯꨱꩀ ꨟꨮꨤꨪꨈꨰ ꩝ ꨕꨯꩌ ꨟꨮꨁꨪꩆ ꨓꨆꨰ ꨟꨮꨧꨭꩍ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨈꨵꨮꩃ ꨡꨯꩍ ꩝ ꨐꨭ ꨓꨴꨭꩆ ꨟꨮꨣꨰ ꨣꨯꨱꩀ ꨀꨝꨪꩍ ꩝ ꨀꨗꩀ ꨚꨓꨯꨱ ꨦꩀꨓꨎꨰ ꩞ (꩓꩘꩑-꩓꩘꩕) ꨝꨵꨯꨱꩍ ꨕꨀ ꨓꨈꨯꩀ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨀꨶꨮꩆ ꨓꨝꨶꨯꩆ ꨝꩀ ꨨꨓꨰ ꩝ ꨀꨝꨪꩍ ꨧ ꨓꨳꩆ ꨓꨯꨱꩌ ꨓꨘꩆ ꩞ ꨋꩇ ꨀꨨꩉ ꨟꨮꨗꩃ ꨚꨢꩀ ꨤꨯ ꨣꨎꩆ ꩝ ꨚꨓꨯꨱ ꨝꨪꨙꩃ ꨡꨯꩍ ꨝꨶꨯꩊ ꩝ ꨚꨙꨮꩉ ꨓꨟ ꨟꨮꨖꨪꩉ ꨣꨪꨢ ꩞ ꨕꨯꩌ ꨘꩆ ꨟꩃ ꨣꨎ ꨕꨯꨥ ꩝ ꨝꨪꨌꩆ ꨧꨯꨱꩃ ꨁꨗꨴ ꨚꨓꨴ ꩝ ꨗꨯꨱ ꨟꨮꨤꨳꨮꩃ ꨆꨗ ꨗꨯꨣꨚꩅ ꩞ ꨕꨶ ꨂꨣꩃ ꨧꨯꨱꩃ ꨣꨝꩇ ꨣꨯꨦꨭꨦꩍ ꩝ ꨛꨩꨔꨮꨭ ꨚꨗꨶꨮꩄ ꨆꨭꨖ ꨀꨝꨪꩍ ꩝ ꨝꨵꨯꨱꩍ ꨚꨓꨯꨱ ꨧꨫ ꨝꨪꨌꩆ ꩞ ꨚꨓꨯꨱ ꨓꨐꨫ ꨁꨗꨴ ꨚꨓꨴ ꨚꩀ ꨗꨮꨈꩉ ꩝ ꨣꨝꩇ ꨀꨣꨯꨦꨭꨦꩍ ꨝꨪꨌꩆ ꩝ ꨚꨤꨬ ꨧꨭꨟꨮꩆ ꨓꨚꨣ ꩞ (꩓꩘꩖-꩓꩙꩐) ꨐꨭ ꨀꨗꩀ ꨚꨓꨯꨱ ꨆꨭꨣꨠ ꨝꨦꨚ ꩝ ꨐꨭ ꨀꨋꩆ ꨁꨗꨴ ꨚꨓꨴ ꩝ ꨨꨓꨰ ꨓꨳꩆ ꨐꨭ ꨓꨚꩀ ꩞ ꨝꨵꨯꨱꩍ ꨕꨫ ꨘꩆ ꨚꨓꨯꨱ ꨟꨮꨢꨯꨱꩌ ꨔꩅ ꨓꨳꩀ ꩝ ꨁꨗꨴ ꨚꨓꨴ ꨁꨣꨯꨮꩋ ꨝꨪꨎꩀ ꩝ ꨕꨀ ꨝꨫ ꨓꨮꩊ ꨟꨮꨖꨪꩉ ꨣꨢ ꩞ ꨕꨯꩌ ꨘꩆ ꨟꩃ ꨣꨪꨎ ꨕꨯꨮꨥ ꩝ ꨟꨮꨣꨰ ꨚꩀ ꨁꨗꨴ ꨚꨓꨴ ꩝ ꨀꨇꩆ ꨀꨝꨪꩍ ꨚꨗꨶꨮꩄ ꨚꨓꨯꨱ ꩞ ꨈꨭꨣꨪꨕꩆ ꨁꨆꨯꨮꩋ ꨘꩆ ꨐꨭ ꨗꨯꨱ ꩝ ꨓꨮꩊ ꨝꨪꨣꨭꨥ ꨟꩃ ꨚꨓꨯꨱ ꩝ ꨓꨳꩇ ꨚꨗꨴꨯꨱꩃ ꨗꨯꨱ ꨕꨀ ꩞ ꨁꨗꨴ ꨚꨓꨴ ꨗꨯꨱ ꨓꨮꩊ ꨟꨮꨖꨪꩉ ꨣꨪꨢ ꩝ ꨚꨓꨯꨱ ꨚꨙꨮꩉ ꨆꨭꨨꨴꨳꨫ ꨆꨭꨨꨴꨳ ꩝ ꨆꨳꨮꩃ ꨚꨗꩍ ꨟꨮꨤꨪꨈꨰ ꩞ (꩓꩙꩑-꩓꩙꩕) ꨋꩇ ꨈꨮꩃ ꨟꩃ ꨟꩍ ꨝꨪꨊꨭ ꨁꨗꨈꨪꨣꩈ ꩝ ꨨꨓꩀ ꨚꨝꨭꩃ ꨟꩍ ꨂꨣꩈ ꩝ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩞ ꨀꨠꩊ ꨚꨓꨳꩇ ꨡꨮꩃ ꨟꨮꨐꨭꩌ ꨤꨪꨇꩍ ꨌꨈ ꩝ ꨆꨯꨱꩃ ꨚꨟꨴꨮ ꨁꨗꨴ ꨚꨓꨴ ꩝ ꨣꨪꨝꩇ ꨟꨮꨣꨫ ꨚꨟꨴꨮ ꨟꨮꨣꨰ ꩞ ꨝꨵꨯꨱꩍ ꨕꨀ ꨓꨈꨯꩀ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨧꨯꨱꩃ ꨚꨓꨴꨫ ꨧꨳꩌ ꨝꨪꨗꨰ ꩝ ꨝꨪꨣꨭꨥ ꨟꩃ ꨎꨳꨯꨮꩃ ꨧꨭꨞꨮꩉꨣꨪꨢ ꩞ ꨚꨓꨯꨱ ꨝꨪꨙꩃ ꨍꨪꩆ ꨝꨳꨰ ꨆꨭꨨꨴꨳꨫ ꨆꨭꨨꨴꨳ ꩝ ꨟꩍ ꨚꨣꨳꩀ ꨎꩃ ꨝ ꩝ ꨀꨤꨪꩆ ꨀꨗꩀ ꨧꨯꨱꩃ ꨟꨮꨓꨭꨥ ꩞ ꨚꨓꨯꨱ ꨚꨣꨶꩍ ꨟꩍ ꨚꨣꨳꩀ ꨚꨓꨰꩍ ꨤꨪꨂꨥ ꩝ ꨀꨤꨪꩆ ꨀꨝꨪꩍ ꨀꨗꩀ ꨚꨓꨯꨱ ꩝ ꨟꨮꨣꨰ ꨧꨯꨱꩃ ꨁꨗꨴ ꨚꨓꨴ ꩞ (꩓꩙꩖-꩔꩐꩐) ꨝꨶꨯꩊ ꨞꩇ ꨕꨤꩌ ꨗꨮꨈꩉ ꨝꨮꩃꨦ ꩝ ꨟꨮꨢꨯꨱꩌ ꨛꨯꨮ ꨁꨗꨴ ꨚꨓꨴ ꩝ ꨚꨴꨯꨱꩃ ꨦꨘꩀ ꨦꩀꨓꨎꨰ ꩞ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨟꨮꨧꨭꩍ ꨟꨮꨓꨰ ꩝ ꨐꨭ ꨟꩀ ꨣꨙꨰꩅ ꨦꩀꨓꨎꨰ ꩝ ꨛꨩꨨꨕꨳꨪꩇ ꨓꨈꨯꩀ ꨀꨝꨪꩍ ꩞ ꨀꨗꩀ ꨚꨓꨯꨱ ꨧꨫ ꨟꨮꨢꨯꨱꩌ ꨧꨭꨗꨪꩅ ꨈꨪꨗꨴꨮꩍ ꩝ ꨧꨳꩌ ꨤꨪꨆꨬ ꨦꨰꩍ ꨕꨫ ꨦꨰꩍ ꩝ ꨝꨪꨙꨫ ꨝꨪꨗꨳꨰ ꨤꨯ ꨣꨎꩆ ꩞ ꨝꨪꨣꨭꨥ ꨟꩃ ꨨꨟꨪꩅ ꨓꨮꩊ ꨧꨭꨟꨮꩆ ꨓꩆꨚꨣꩆ ꩝ ꨈꨪ ꨣꩅ ꨁꨆꨯꨮꩋ ꨚꨴꨯꨱꩃ ꨙꨮ ꩝ ꨣꨭꩇ ꨧꨭꨟꨭ ꨤꨪꩉꨣꨕꨯꨮ ꩞ ꨕꨤꩌ ꨈꨪꨨ ꨘꩆ ꨚꨴꨯꨱꩃ ꨤꨯ ꨌꨴꨪꩍ ꩝ ꨕꨪꨕꩆ ꨆꨢ ꨆꩉ ꨀꨝꨪꩍ ꩝ ꨕꨫ ꨣꨳꨪꩌ ꨚꨆꩉ ꨕꨤꩌ ꨈꨪꨤꨮꩃ ꩞ (꩔꩐꩑-꩔꩐꩕) ꨓꨮꩊ ꨢꩃ ꨀꨕꨪꨓꨳꩀ ꨝꨪꨙꩃ ꨆꨳꨮꩃ ꨈꨵꨮꩃ ꩝ ꨓꨝꨳꩀ ꨟꨮꨣꨰ ꨕꨶꩍ ꨡꨮꩃ ꩝ ꨝꨶꨯꩊ ꨣꨪꨎ ꨓꨈꨮꩆ ꨦꩍ ꩞ ꨕꨯꩌ ꨝꨶꨯꩊ ꨐꨭ ꨡꨮꩃ ꨀꨝꨪꩍ ꨢꨮꨭ ꨣ ꨎꩍ ꩝ ꨤꨪꨝꨰꩍ ꨕꨫ ꨡꨮꩃ ꨙꨶꨯꩄ ꨌꨤꩍ ꩝ ꨟꨮꨣꨰ ꨛꨩꨔꨮꨭ ꨞꨯꨕꨮꩉꨨ ꩞ ꨚꨓꨯꨱ ꨝꨪꨙꩃ ꨍꨪꩆ ꨝꨳꨰ ꨆꨭꨨꨴꨳꨫ ꨆꨭꨨꨴꨳ ꩝ ꨦꨴꨫ ꨚꨤꨳꨮꩃ ꨆ ꨁꨓ ꩝ ꨧꨭ ꨟꨮꩆꨓꨴꨫ ꨐꨭ ꨝꨪꨌꩆ ꩞ ꨚꨗꨶꨮꩄ ꨚꨓꨯꨱ ꨗꨫ ꨚꨙꨮꩉ ꨝꨴꨬ ꨈꨯꨱꩆ ꩝ ꨨꨤꨭꨥ ꨝꨪꨤꩃ ꨝ ꨝꨶꨯꩊ ꩝ ꨓꨳꩇ ꨟꩀ ꨈꨭꨣꨮꩅ ꨁꨆꨯꨮꩋ ꩞ ꨓꨮꩊ ꨈꨪꨨ ꨡꨮꩃ ꨀꨝꨪꩍ ꨢꨮꨭ ꨝꨪꨗꨯꨮꩋ ꩝ ꨤꨪꨝꨰꩍ ꨕꨫ ꨡꨮꩃ ꨕꨮꩇ ꨕꨫ ꨈꨭꨣꨮꩅ ꨁꨆꨯꨮꩋ ꩝ ꨟꩃ ꨛꨩꨔꨮꨭ ꨚꨕꨪꩅ ꨝꨪꨗꨰ ꩞ (꩔꩐꩖-꩔꩑꩐) ꨛꨩꨧꨴꨮꩌ ꨈꨪꨗꨮꩃ ꨃꨥ ꨨꨶꨮꩉ ꨎꨴꨮꩃ ꨟꨮꨣꨰ ꩝ ꨋꩇ ꨖꩉ ꨝꨪꨙꨫ ꨝꨪꨗꨳꨰ ꩝ ꨆꨳꨮꩃ ꨆ ꨧꨳꩌ ꨗꨮꨈꩉ ꨁꨓ ꩞ ꨨꨶꨮꩉ ꨈꨵꨮꩃ ꨕꨫ ꨦꩀꨆꨣꩈ ꨐꨭ ꨟꨮꨕ ꩝ ꨀꨋꩆ ꨛꨯꨮ ꨁꨗꨴ ꨚꨓꨴ꩝ ꨓꨝꨵꨯꨱꩍ ꨟꨮꨣꨰ ꨧꨳꩌ ꨗꨮꨈꩉ ꩞ ꨚꨓꨯꨱ ꨓꨳꩇ ꨈꨭꨣꨮꩅ ꨁꨆꨯꨮꩋ ꨙꩉ ꨎꨤꩆ ꩝ ꨕꨶ ꨂꨣꩃ ꨗꨯꨱ ꨝꨫ ꨓꨮꩊ ꩝ ꨕꨤꩌ ꨟꨮꨖꨪꩉ ꨗꨯꨣꨚꩅ ꩞ ꨘꨟꨯꨮꩋ ꨧꨭꨆꩊ ꨤꨪꨆꨮꨭ ꨕꨀ ꨁꨗꨴ ꨚꨓꨴ ꩝ ꨀꨇꩆ ꨀꨝꨪꩍ ꨚꨗꨶꨮꩄ ꨆꨭꨖ ꩝ ꨕꨨꨵꨮꨭ ꨚꨗꨴꨯꨱꩃ ꨈꨯꨱꩆ ꨚꨓꨯꨱ ꩞ ꨣꨪꨎ ꨈꨭꨨꨭꩉ ꨨꨪꨢꨶꨭꩋ ꨝꨴꨬ ꨟꨮꨓꨶꨥ ꩝ ꨆꨭꨨꨵꨯꨱꩌ ꨀꨗꩀ ꨤꩄ ꨆꨳꨮꩃ ꨗꨯꨱ ꩝ ꨚꨓꨯꨱ ꨚꨙꨮꩉ ꨆꨭꨨꨴꨳꨫ ꨆꨭꨨꨴꨳ ꩞ (꩔꩑꩑-꩔꩑꩕) ꨆꨢ ꨆꩉ ꨟꩍ ꨚꨣꨳꩀ ꨝꨴꨬ ꨝ ꩝ ꨚꨓꨯꨱ ꨓꨐꨫ ꨁꨗꨴ ꨚꨓꨴ ꩝ ꨝꨴꨬ ꨨꨕꨳꨪꩇ ꨗꨯꨱ ꨧꨭ ꨦꩍ ꩞ ꨀꨝꨪꩍ ꨕꨴꨬ ꨀꨗꩀ ꨚꨓꨯꨱ ꨗꨯꨱ ꨎꨮꩍ ꩝ ꨚꨓꨯꨱ ꨓꨤ ꨓꨈꨮꩉ ꨦꩍ ꩝ ꨐꨭ ꨋꩇ ꨨꨤꨭꨥ ꨕꨯꨱꩀ ꨚꨌꨮꩃ ꩞ ꨕꨯꩌ ꨘꩆ ꨝꨵꨯꨱꩍ ꨚꨓꨯꨱ ꨓꨝꨳꩀ ꨝꨪꨙꩃ ꩝ ꨛꨯꨩꩀ ꨟꨮꨓ ꨈꨵꨮꩃ ꨀꨇꩆ ꩝ ꨧꨯꨱꩃ ꨈꨴꨮꩇ ꨀꨗꩀ ꨚꨓꨯꨱ ꨟꨮꨣꨰ ꩞ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨆꨯꩅ ꨍꨰ ꩝ ꨚꨓꨯꨱ ꨀꨶꨮꩆ ꨝꩀ ꨨꨓꨰ ꩝ ꨀꨝꨪꩍ ꨟꨮꨣꨰ ꨓꨯꨱꩌ ꨓꨘꩆ ꩞ ꨁꨗꨴ ꨚꨓꨴ ꨙꨪꩀ ꨨꨰꨊꨫ ꨈꨭꨣꨕꩆ ꩝ ꨧꨯꨱꩃ ꨛꨩꩀ ꨂꨣꩃ ꨓꨈꨮꩉ ꩝ ꨁꨪꨥ ꨨꨗꨭꩀ ꨤꩍ ꨆꨥꩍ ꩞ (꩔꩑꩖-꩔꩒꩐) ꨣꨪꨝꩇ ꨟꨮꨣꨫ ꨆꨯꨱꩃ ꨚꨟꨴꨳꨮ ꨕꨶ ꨈꩍ ꩝ ꨆꨍꨰꩅ ꨟꩍ ꨝꨪꨊꨭ ꨚꨤꨰ ꩝ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩞ ꨛꨩꩀ ꨚꨵꨭꩍ ꨛꨩꨨꨤꨶꨬ ꨁꨗꨴ ꨚꨓꨴ ꩝ ꨟꩃ ꨨꨵꨮꩇ ꨕ ꨨꨵꨮꩇ ꨐꨭ ꨓꨨ ꩝ ꨨꨓꨰ ꨣꨘꩌ ꨆꨳꨮꩃ ꨗꨯꨱ ꨧꨯꨱꩃ ꨛꨯꨮ ꩞ ꨕꨫ ꨈꨴꨮꩇ ꨗꨮꨈꩉ ꨎꩃ ꨆꨳꨮꩃ ꨓꨶꨬ ꨡꨮꩃ ꨀꨣꨯ ꩝ ꨝꨴꨬ ꨆꨢ ꨆꩉ ꨆ ꨐꨭ ꩝ ꨡꨮꩃ ꨀꨊꨶꨬ ꨝꨮꩃꨦ ꩞ ꨆꨍꨰꩅ ꨓꨎꨭ ꨈꩆ ꨚꨣꨳꩀ ꨚꨴꨯꨱꩃ ꨚꨞ ꩝ ꨨꨗꨳꨪꩌ ꨆ ꨛꨯꨮ ꨁꨗꨴ ꨚꨓꨴ ꩝ ꨀꨊꨶꨬ ꨆꨣꨬ ꨕꨫ ꨂꨣꩃ ꩞ ꨝꨪꨣꨭꨥ ꨟꩃ ꨁꨗꨴ ꨚꨓꨴ ꨟꨮꨣꨰ ꨝꨪꨙꩃ ꩝ ꨚꨓꨯꨱ ꨟꨮꨣꨰ ꨕꨮꩃ ꨌꩃ ꩝ ꨕꨀ ꨝꨫ ꨓꨮꩊ ꨟꨮꨖꨪꩉ ꨣꨪꨢ ꩞ (꩔꩒꩑-꩔꩒꩕) ꨤꩃ ꨓꨭꩊ ꨦꨆꨤꩅ ꨚꨮꩉꨤꨪꨕꨳ ꩝ ꨧꨭ ꨝꨰꨤꨪꨕꨭ ꨆꨥꩆꨘ ꩝ ꨚꨔꩇ ꨝꨫ ꨓꨮꩊ ꨤꩆ ꨝꨡꨮꩃ ꩞ ꨕꨯꩌ ꨘꩆ ꨝꨵꨯꨱꩍ ꨚꨓꨯꨱ ꨓꨝꨳꩀ ꨝꨪꨙꩃ ꩝ ꨃꨥ ꨀꨝꨪꩍ ꨈꨪꨗꨶꨯꩉ ꨂꨣꩃ ꩝ ꨝꨵꨯꨱꩍ ꨚꨙꨮꩉ ꨆꨭꨨꨴꨳꨫ ꨆꨭꨨꨴꨳ ꩞ ꨡꨮꩃ ꨟꨮꨐꨭꩌ ꨝꨵꨯꨱꩍ ꨚꨢꩀ ꨁꨗꨴ ꨚꨓꨴ ꩝ ꨀꨟ ꨓꨳꩇ ꨗꨯꨱ ꨕꨀ ꩝ ꨀꨗꩀ ꨟꨮꨣꨰ ꨝꨫ ꨧꨳꩌ ꨗꨮꨈꩉ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨗꨯꨱ ꨓꨮꩊ ꩝ ꨨꨮꩄ ꨧ ꨓꨳꩆ ꨕꨯꨱꩀ ꨓꨘꩆ꩝ ꨚꨙꨮꩉ ꨚꨗꩍ ꨟꨮꨤꨪꨈꨰ ꩞ ꨝꨮꩀ ꨝꨳꨭꩍ ꨈꩆ ꨎꨤꩆ ꨗꨯꨱ ꨟꨮꨣꨰ ꩝ ꨁꨗꨴ ꨚꨓꨴ ꨦꩀꨓꨎꨰ ꩝ ꨁꨣꨯꨮꩋ ꨝꨪꨎꩀꨍꨰꨪꨘ ꩞ (꩔꩒꩖-꩔꩓꩐) ꨣꨝꩇ ꨣꨯꨦꩍ ꨝꨪꨙꨮꩉ ꨚꨮꩉꨤꨪꨕꨳ ꩝ ꨧꨯꨱꩃ ꨣꨪꨎ ꨕꨯꨥ ꩝ ꨈꨭꨣꨪꨕꩆ ꨓꨧꨴꨪꩀ ꨆꨳꨮꩃ ꨗꨯꨱ ꩞ ꨁꨗꨴ ꨚꨓꨴ ꨝ ꨀꨝꨪꩍ ꨀꨗꩀ ꨚꨓꨯꨱ ꩝ ꨕꨤꩌ ꨨꨓꨰ ꨟꨮꨣꩅ ꨆꨳꨮꩃ ꨗꨯꨱ ꩝ ꨕꨯꨱꩀ ꨚꩀ ꨚꨝꩍ ꨈꨪꨨ ꩞ ꨁꨗꨴ ꨚꨓꨴ ꨘꨟꨯꨮꩋ ꨧꨭꨆꩊ ꨕꨯꨮꨝꨪꨓ ꩝ ꨝꨵꨯꨱꩍ ꨓꨟ ꨕꨤꩌ ꨈꨪꨨ ꩝ ꨈꨪꨣꩀ ꨁꨆꨯꨮꩋ ꨙꨪꩍ ꨥꨮꩉ ꩞ ꨐꨭ ꨃꨥ ꨓꨈꨯꩀ ꨛꨩꨟꨮꨓꨰ ꨝꨪꨗꨯꨮꩋ ꨓꨘꩆ ꩝ ꨎꨗꩈ ꨢꨧ ꨈꨴꨭꩌ ꨆꨓꩊ ꩝ ꨧꨭꨟꨭ ꨎꨤꨮꩍ ꨤꨪꩉꨣꨕꨯꨮ ꩞ ꨁꨗꨴ ꨚꨓꨴ ꨓꨟ ꨝꨵꨯꨱꩍ ꨧꨫ ꨓꨆꨯꨮ ꩝ ꨕꨤꩌ ꨈꨪꨤꨮꩃ ꨞꨯꨕꨮꩉꨨ ꩝ ꨕꨫ ꨣꨳꨪꩌ ꨚꨆꩉ ꨡꨯꩍ ꨧ ꨈꨵꨮꩃ ꩞ (꩔꩓꩑-꩔꩓꩕) ꨆꨢ ꨆꩉ ꨟꩍ ꨚꨣꨳꩀ ꨦꨯꨮꩍ ꨟꨮꨤꨮꩃ ꩝ ꨕꨫ ꨣꨳꨪꩌ ꨚꨆꩉ ꨤꨯ ꨦꨮꩃ ꩝ ꨝꨪꨣꨭꨥ ꨟꩃ ꨐꨭ ꨓꨝꨳꩀ ꨟꨮꨣꨰ ꩞ ꨓꨜꨳ ꨈꨪꨤꨮꩃ ꨘꩆ ꨧ ꨝꨯꨱꩍ ꨟꨮꨤꨪꨈꨰ ꩝ ꨋꩆ ꨓꨝꨮꩃ ꨟꩍ ꨂꨣꩈ ꩝ ꨟꩍꨤꨪꨆꨮꩌ ꨚꩀ ꨀꨆꨳꨮꩃ ꩞ ꨚꨤ ꨝꨪꨊꨭ ꨕꨮꩉ ꨓꨝꨮꩃ ꨕꨫ ꨣꨳꨪꩌ ꨚꨆꩉ ꩝ ꨒꨮꩉ ꨡꨭꨥ ꨟꨮꨗꨭꨥ ꨟꨮꨗꩃ ꩝ ꨁꨗꨴ ꨚꨓꨴ ꨓꨴꨭꩆ ꨟꨮꨗꨬ ꩞ ꨐꨭꩀ ꨀꨳ ꨘꩅꨓꨔꨪꩍ ꨤꨪꨀꩆ ꨕꨫ ꨕꨴꨬ ꩝ ꨁꨗꨴ ꨚꨓꨴ ꨧꨳꩌ ꨤꨪꨆꨬ ꩝ ꨝꨪꨣꨭꨥ ꨟꩃ ꨤꨰꩀ ꨓꨮꩊ ꨂꨤ ꩞ ꨓꨯꨱꩌ ꨚꨓꨯꨱ ꨓꨤꨮꩃꨋ ꨚꨶꨪꩋꨦꨚ ꩝ ꨐꨭ ꨆꨴꨲꩆ ꨝꨫ ꨎꨪꩇ ꨁꨗꨴ ꨚꨓꨴ ꩝ ꨟꩃ ꨗꨮꨈꩉ ꨀꨗꩀ ꨟꨮꨣꨰ ꩞ (꩔꩓꩖-꩔꩔꩐) ꨁꨗꨴ ꨚꨓꨴ ꨧꨫ ꨝꨪꨌꩆ ꨚꨕꨪꩅ ꨝꨪꨗꨰ ꩝ ꨀꨇꩆ ꨙꨯꩌ ꨆ ꨟꨮꨓꨰ ꩝ ꨈꨭꨣꩀ ꨁꨆꨯꨮꩋ ꨕꨤꩌ ꨈꨪꨨ ꩞ ꨕꨯꩌ ꨘꩆ ꨚꨓꨯꨱ ꨟꨮꨢꨯꨱꩌ ꨁꨗꨴ ꨚꨓꨴ ꩝ ꨝꨵꨯꨱꩍ ꨚꨍꨰ ꨚꨗꨶꨮꩄ ꨆꨭꨖ ꩝ ꨛꨩꨟꩀ ꨚꨚꩆ ꨕꨤꩌ ꨈꨪꨨ ꩞ ꨦꨶꩆ ꨚꨓꨯꨱ ꨣꩌ ꨕꨪꨝꨭꩅ ꨘꩆ ꨆꨢꨶ ꩝ ꨚꨓꨯꨱ ꨚꨓꨯꨱꨥ ꨁꨗꨴ ꨚꨓꨴ ꩝ ꨚꨙꨮꩉ ꨟꩀ ꨝ ꨝꨫ ꨨꨭ ꩞ ꨧ ꨡꨰꩀ ꨆꨔꨭꩉ ꨟꩍ ꨀꨟ ꨝꨴꨬ ꨆ ꩝ ꨁꨗꨴ ꨚꨓꨴ ꨓꨯꩀ ꨝ ꩝ ꨓꨈꨯꩀ ꨓꨶꨬ ꨊꨯꨱꩀ ꨓꨝꨮꩃ ꩞ ꨧꨭꨗꨪꩅ ꨈꨪꨗꨴꨮꩍ ꨀꨗꩀ ꨀꨟ ꨡꨯꩍ ꨧ ꨈꨵꨮꩃ ꩝ ꨓꨐꨫ ꨁꨗꨴ ꨚꨓꨴ ꨦꨮꩃ ꩝ ꨀꨇꩆ ꨆ ꨗꨯꨱ ꨚꩀ ꨂꨤ ꩞ (꩔꩔꩑-꩔꩔꩕) ꨓꨯꨱꩌ ꨚꨓꨯꨱ ꨚꨶꨪꩋꨦꨚ ꨓꨤꨮꩃꨋ ꩝ ꨧꨫ ꨟꨮꨢꨯꨱꩌ ꨁꨗꨴ ꨚꨓꨴ ꩝ ꨦꨘꩀ ꨈꨪꨗꨴꨮꩍ ꨦꩀꨓꨎꨰ ꩞ ꨕꨤꩌ ꨗꨮꨈꩉ ꨀꨶꨮꩆ ꨓꨝꨶꨯꩆ ꨝꩀ ꨨꨓꨰ ꩝ ꨀꨇꩆ ꨀꨝꨪꩍ ꨕꨴꨬ ꨟꨮꨣꨰ꩝ ꨓꨟ ꨆꨳꨮꩃ ꨎꨴꨮꩃ ꨕꨤꩌ ꨈꨪꨨ ꩞ ꨟꩍ ꨂꨣꨭꩃ ꨟꩍ ꨂꨣꩈ ꨧꨭ ꨚꨮꩉꨟꨮꨓ ꩝ ꨧꨭ ꨝꨰꨤꨪꨕꨭ ꨆꨥꩆꨘ ꩝ ꨕꨫ ꨣꨳꨪꩌ ꨚꨆꩉ ꨤꨯ ꨣꨎꩆ ꩞ ꨨꨚꩊ ꨌꨠꩀ ꨨꨗꨴꩀ ꨌꨣꨪꩅ ꨧꨭ ꨈꨰꨣꨪꨝꨫ ꩝ ꨕꨪꨕꩆ ꨆꨢ ꨆꩉ ꨗꨫ ꩝ ꨀꨝꨪꩍ ꨐꨭ ꨟꩀ ꨝ ꨟꨮꨣꨰ ꩞ ꨗꨯꨱ ꨈꨵꨮꩃ ꨣꨭꩇ ꨈꨭꨣꩅ ꨁꨆꨯꨮꩋ ꨟꨮꨓꨰ ꩝ ꨓꨮꩊ ꨟꨮꨖꨪꩉ ꨚꨓꨯꨱ ꨐꨭ ꨝꨳꨰ ꩝ ꨧ ꨝꨯꨱꩍ ꨗꨮꨈꩉ ꨀꨟ ꨀꨤꨪꩆ ꩞ (꩔꩔꩖-꩔꩕꩐) ꨕꨤꩌ ꨨꨓꨰ ꨁꨗꨴ ꨚꨓꨴ ꨅꩍ ꨇꨪꩆ ꩝ ꨚꨓꨯꨱ ꨟꩀ ꨀꨗꩀ ꨀꨤꨪꩆ ꩝ ꨚꨓꨯꩀ ꨆ ꨁꨗꨴ ꨚꨓꨴ ꩞ ꨎꩌꨎꨫ ꨝꨵꨯꨱꩍ ꨛꨩꨆꨵꨯꨱꩍ ꨚꨗꨶꨮꩄ ꨆꨭꨖ ꩝ ꨧꨯꨱꩃ ꨣꨪꨎ ꨕꨯꨥ ꩝ ꨈꨴꨮꩇ ꨀꨗꩀ ꨚꨓꨯꨱ ꨟꨮꨣꨰ ꩞ ꨇꨯꨱꩊ ꨁꨓ ꨀꨝꨪꩍ ꨕꨴꨬ ꨍꨪꩆ ꨝꨳꨰ ꩝ ꨝꨵꨯꨱꩍ ꨝ ꨋꩇ ꨟꨮꨤꨪꨈꨰ ꩝ ꨕꨫ ꨣꨳꨪꩌ ꨚꨆꨰꩅ ꨘꩅꨓꨔꨪꩍ ꩞ ꨋꩇ ꨈꨮꩃ ꨣꨭꩇ ꨁꨗꨈꨪꨣꩈ ꨚꨓꨪꩍ ꩝ ꨓꨎꨭꩍ ꨚꨆꨰꩅ ꨦꨰꩍ ꨕꨫ ꨦꨰꩍ ꩝ ꨈꨵꨯꨱꩃ ꨟꨮꨓꨲꩍ ꨀꨕꨮꩉꨨ ꩞ ꨨꨓꩀ ꨚꨝꨭꩃ ꨟꩃ ꨟꩍ ꨧ ꨚꨵꨭꩍ ꨀꨳ ꩝ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩝ ꨕꨗꨪꩂ ꨨꨕꨯꩌ ꨆꨣꨮꩍ ꨨꨕꩍ ꩞ (꩔꩕꩑-꩔꩕꩕) ꨔꩇ ꨕꨤꩌ ꨦꨆꨤꩅ ꨟꩍ ꨟꨮꨣꨳꩍ ꩝ ꨁꩆꨓꩆ ꨧꨭ ꨝꨰꨤꨪꨕꨭ ꨓꨓꩍ ꩝ ꨕꨤꩌ ꨓꨪꨣꨰ ꨧꨫ ꨚꨕꨬ ꩞ ꨇꨯꨱꩊ ꨧ ꨓꨳꩆ ꨦꨯꨮꩍ ꨕꨫ ꨦꨯꨮꩍ ꨧꨳꩌ ꨙꨬ ꩝ ꨀꨠꩊ ꨚꨓꨳꩇ ꨤꨪꨈꨰꩍ ꨨꨣꨬ ꩝ ꨆꨳꨮꩃ ꨡꨮꩃ ꨟꨮꨐꨭꩌ ꨤꨪꨇꩍ ꨌꨈ ꩞ ꨓꨶꨮꩆ ꨚꨓꨴꨫ ꨧꨭꨝꨪꩀ ꨧꨯꨱꩃ ꨛꨯꨮ ꨁꨗꨴ ꨚꨓꨴ ꩝ ꨌꨮꩆꨕꨴ ꨠꩆꨘ ꩝ ꨦꨴꨫ ꨝꨪꨤꨮꩆ ꨧꨳꩌ ꨝꨪꨗꨰ ꩞ ꨈꨵꨮꩃ ꨓꨗꨴꩀ ꨨꨕꩍ ꨕꨫ ꨊꨯꨱꩀ ꨟꨮꨤꨪꨈꨰ ꩝ ꨣꨈꨮꩌ ꨈꨪꨗꨮꩃ ꨣꨟꨯꨮ ꨣꨟꨰ ꩝ ꨣꨪꨝꩇ ꨟꨮꨣꨫ ꨝꨪꨘ ꨓꨟꨮꩃ ꩞ ꨟꨮꨢꨯꨣꨫ ꨝꨪꨢꨯꨮꩆ ꨓꨟꨳ ꨧꨳꩌ ꨆꨳꨮꩃ ꨈꨵꨮꩃ ꩝ ꨓꨗꨴꩀ ꨨꨕꩍ ꨦꨯꨮꩍ ꨟꨮꨤꨮꩃ ꩝ ꨕꨤꩌ ꨚꨤꨬ ꨢꩃ ꨀꨠꩆ ꩞ (꩔꩕꩖-꩔꩖꩐) ꨚꨓꨯꨱ ꨝꨪꨙꩃ ꨃꨥ ꨀꨝꨪꩍ ꨈꨪꨗꨶꨯꩉ ꨂꨣꩃ ꩝ ꨚꨣꨶꩍ ꨆꨢ ꨆꩉ ꨝꨫ ꨧꨳꩌ ꩝ ꨀꨤꨪꩆ ꨀꨗꩀ ꨧꨯꨱꩃ ꨟꨮꨓꨭꨥ ꩞ ꨚꨣꨶꩍ ꨇꩆ ꨧꨯꨱꩃ ꨧꨭ ꨀꨥ ꨚꨓꨰꩍ ꨤꨪꨂꨥ ꩝ ꨀꨤꨪꩆ ꨀꨝꨪꩍ ꨀꨗꩀ ꨚꨓꨯꨱ ꩝ ꨟꨮꨣꨰ ꨧꨯꨱꩃ ꨛꨯꨮ ꨁꨗꨴ ꨚꨓꨴ ꩞ ꨚꨓꨯꨱ ꨟꨮꨢꨯꨱꩌ ꨧꨭꨗꨪꩅ ꨈꨪꨗꨴꨮꩍ ꨤꨯ ꨟꨮꨕ ꩝ ꨕꨤꩌ ꨗꨮꨈꩉ ꨕꨯꩌ ꨕꨫ ꨨꨳ ꩝ ꨟꩃ ꨤꨪꨥꨪꩀ ꨔꨭꩀ ꨨꨓꨰ ꩞ ꨀꨝꨪꩍ ꨕꨴꨬ ꨀꨗꩀ ꨚꨓꨯꨱ ꨍꨪꩆ ꨝꨳꨰ ꩝ ꨆꨭꨨꨵꨯꨱꩌ ꨤꨪꨥꨪꩀ ꨁꨓ ꨟꨮꨣꨰ ꩝ ꨆꨭꨗ ꨆꨳꨮꩃ ꨥꨮꩀ ꨗꨯꨱ ꨗꨮꨈꩉ ꩞ ꨓꨮꩊ ꨚꨓꨯꨱ ꨚꨝꩍ ꨣꩌ ꨃꨥ ꨝꨪꨌꩆ ꩝ ꨣꩀ ꨆꨮꨭ ꨕꨯꨱꩀ ꨇꨪꩀ ꨎꨤꩆ ꩝ ꨕꨫ ꨊꨯꨱꩀ ꨌꨮꩀ ꨙꨮꩉ ꨆꨬꨤ ꩞ (꩔꩖꩑-꩔꩖꩕) ꨐꨭ ꨝꨪꨗꨯꨮꩋ ꨧꨯꨱꩃ ꨂꨤ ꨟꨮꩆ ꨤꨪꨕꨳ ꩝ ꨈꨪꨣꩀ ꨁꨆꨯꨮꩋ ꨕꨤꩌ ꨈꨪꨨ ꩝ ꨁꨗꨴ ꨚꨓꨴ ꨐꨭ ꨛꨩꨟꨮꨓꨰ ꩞ ꨐꨭ ꨟꩀ ꨀꨝꨪꩍ ꨆꨢ ꨆꩉ ꨓꨶꨬ ꨨꨓꨰ ꩝ ꨨꨤꨭꨥ ꨝꨪꨤꩃ ꨦꩀꨓꨎꨰ ꩝ ꨐꨭ ꨓꨳꩇ ꨛꨩꨟꩀ ꨁꨗꨴ ꨚꨣ ꩞ ꨨꨤꨭꨥ ꨝꨪꨤꩃ ꨗꨯꨱ ꨅ ꨚꩀ ꨨꨶꨮꩄ ꨆꨭꨙ ꩝ ꨓꨟ ꨓꨮꩊ ꨁꨗꨴ ꨚꨓꨴ ꩝ ꨓꨐꨫ ꨨꨚꩀ ꨈꩍ ꨟꨮꨣꨰ ꩞ ꨝ ꨨꨣꩀ ꨓꨮꩊ ꨀꨘꩀ ꨚꨕꨪꩅ ꨝꨪꨗꨰ ꩝ ꨈꨯꨱꩆ ꨚꨓꨯꨱ ꨓꨳꩇ ꨟꨮꨣꨰ ꩝ ꨚꨙꨮꩉ ꨟꩀ ꨁꨗꨴ ꨚꨓꨴ ꩞ ꨕꨯꩌ ꨘꩆ ꨟꩃ ꨣꨪꨎ ꨕꨯꨥ ꩝ ꨈꨪꨗꨯꨱꩃ ꨝꨪꨌꩆ ꨚꨗꨶꨮꩄ ꨆꨭꨖ ꩝ ꨁꨗꨴ ꨚꨓꨴ ꨇꨪꩌ ꨆꨵꨯꨱ ꩞ (꩔꩖꩖-꩔꩗꩐) ꨘꩆ ꨟꩃ ꨚꩀ ꨓꨈꨮꩉ ꨓꨝꨳꩀ ꨗꨯꨱ ꩝ ꨐꨭ ꨢꨶꨯꩀ ꨓꨆꨶꨰ ꨓꨈꨮꩉ ꨚꨓꨯꨱ ꩝ ꨎꩃ ꨚꨝꩍ ꨣꩌ ꨕꨪꨝꨭꩅ ꩞ ꨁꨗꨴ ꨚꨓꨴ ꨈꨪꨗꨯꨱꩃ ꨢꨯꨱꩌ ꨧ ꨀꨦꨪꩅ ꩝ ꨨꨤꨭꨥ ꨝꨪꨤꩃ ꨣꨤꨯ ꨧꨭꨗꨪꩅ ꩝ ꨐꨭ ꨋꩇ ꨝꨫ ꨧꨭꨟꨭ ꨓꨶꨬ ꨨꨓꨰ ꩞ ꨚꩀ ꨓꨈꨮꩉ ꨨꨤꨭꨥ ꨝꨪꨤꩃ ꨥꨮꩀ ꨟꨮꨣꨰ ꩝ ꨐꨭ ꨢꨶꨯꩀ ꨕꨶ ꨆꨙꨶꨮꩊ ꨓꨆꨰ ꩝ ꨛꨩꨚꨵꨮꩀ ꨡꨯꨱꩀ ꨓꨯꨱꩌ ꨤꨪꨆꨭꩀ ꩞ ꨚꨓꨯꨱ ꨚꨝꩍ ꨣꩌ ꨕꨪꨝꨭꩅ ꨦꨗꩃ ꨆꨂꩀ ꩝ ꨚꨗꨶꨯꩄ ꨆꨭꨖ ꨕꨴꨬ ꨍꨭꩀ ꩝ ꨐꨭ ꨢꨶꨯꩀ ꨓꨆꨶꨰ ꨚꩀ ꨓꨈꨮꩉ ꩞ ꨕꨯꩌ ꨘꩆ ꨟꩃ ꨚꨓꨯꨱ ꨧꨫ ꨝꨪꨌꩆ ꩝ ꨃꨥ ꨀꨝꨪꩍ ꨚꨗꨴꨯꨱꩃ ꨎꨝꨶꨯꩊ ꩝ ꨟꨮꨣꨰ ꨓꨗꨫ ꨆ ꨆꨮꨭ ꨆꨳꨮꩃ ꨝꨳꨰ ꩞ (꩔꩗꩑-꩔꩗꩕) ꨛꨩꨝꨮꩀ ꨝꨳꨭꩍ ꨝꨵꨯꨱꩍ ꨋꩇ ꨟꨮꨤꨪꨈꨰ ꩝ ꨕꨫ ꨣꩍ ꨎꨤꩆ ꨗꨯꨱ ꨟꨮꨣꨰ ꩝ ꨚꨨ ꨝꨫ ꨓꨮꩊ ꨕꨤꩌ ꨗꨮꨈꩉ ꩞ ꨚꩀ ꨗꨮꨈꩉ ꨚꨤꨬ ꨧꨭꨟꨮꩆ ꨓꩆꨝꨪꨣꩆ ꩝ ꨁꨗꨴ ꨚꨓꨴ ꨗꨫ ꨚꨙꨮꩉ ꩝ ꨣꨟꨫ ꨣꨟꨪꩀ ꨝꨳꨰ ꨆꨳꨮꩃ ꨗꨯꨱ ꩞ ꨝꨵꨯꨱꩍ ꨕꨫ ꨘꩆ ꨆꨗ ꨕꨴꨬ ꨕꨫ ꨚꨓꨯꨱ ꩝ ꨆꨭꨨꨵꨯꨱꩌ ꨁꨗꨴ ꨚꨓꨴ ꨆꨳꨮꩃ ꨗꨯꨱ ꩝ ꨀꨟ ꨚꨙꩉ ꨆꨭꨨꨴꨳꨫ ꨆꨭꨨꨴꨳ ꩞ ꨝꨶꨪꩋꨦꨗ ꨟꩍ ꨚꨣꨳꩀ ꨝꨴꨬ ꨝ ꩝ ꨚꨓꨯꨱ ꨓꨐꨫ ꨁꨗꨴ ꨚꨓꨴ ꩝ ꨝꨴꨬ ꨨꨕꨳꨪꩇ ꨗꨯꨱ ꨧꨭ ꨦꩍ ꩞ ꨚꨳꨯꨮꩍ ꨆꨵꨯꨱꩃ ꨕꨫ ꨆꨁꨪꩂ ꨝꨵꨯꨱꩍ ꨚꨵꩍ ꩝ ꨚꨓꨯꨱ ꨓꨤ ꨓꨈꨮꩉ ꨦꩍ ꩝ ꨓꨝꨳꩀ ꨝꨪꨙꩃ ꨆꨳꨮꩃ ꨛꨩꨣꨤꨯꨱ ꩞ (꩔꩗꩖-꩔꩘꩐) ꨕꨯꩌ ꨘꩆ ꨀꨝꨪꩍ ꨕꨴꨬ ꨀꨗꩀ ꨚꨓꨯꨱ ꩝ ꨐꨭ ꨙꨪꩀ ꨀꨧꨰꩍ ꨝꨵꨯꨱꩍ ꨗꨯꨱ ꩝ ꨧꨭꨝꨪꩀ ꨧꨯꨱꩃ ꨛꨯꨮ ꨁꨗꨴ ꨚꨓꨴ ꩞ ꨛꨩꨨꨤꨶꨬ ꨆꨍꨰꩅ ꨟꩍ ꨧ ꨚꨵꨭꩍ ꨀꨳ ꩝ ꨛꨩꨚꨰꩀ ꨝꨪꨊꨭ ꨕꨫ ꨣꨳꨪꩌ ꨟꨮꨓ ꩝ ꨚꨔꨪꩅ ꨕꨫ ꨤꨯꩀ ꨆ ꨣ ꨈꨵꨮꩃ ꩞ ꨣꨪꨝꩇ ꨟꨮꨣꨫ ꨆꨯꨱꩃ ꨚꨟꨴꨳꨮ ꨣꨈꨮꩌ ꨈꨗꨮꩃ ꩝ ꨕꨫ ꨤꨶꨪꩄ ꨎꨤꩆ ꨧꨳꩌ ꨆꨳꨮꩃ ꨚꨮꩃ ꩝ ꨚꨎꨳꩀ ꨈꨮꩇ ꨆꨳꨮꩃ ꨟꨮꨧꨭꩍ ꩞ ꨚꨓꨯꨱ ꨝꨪꨙꩃ ꨕꨫ ꨊꨯꨱꩀ ꨨꨤꨭꨥ ꨈꨵꨮꩃ ꨡꨯꩍ ꩝ ꨐꨭ ꨝ ꨝꨶꨯꩊ ꨓꨈꨯꩀ ꨟꨮꨧꨭꩍ ꩝ ꨣꨪꨝꨭꨥ ꨓꨟꩆ ꨤꩀꨦ ꩞ ꨧ ꨓꨮꩊ ꨕꨨꨵꨭꨥ ꨝꨶꨯꩊ ꨝꨪꨘꩊ ꨚꩆꨤꨪꨕꨳ ꩝ ꨧ ꨣꨪꨝꨭꨥ ꨟꩃ ꨆꨴ ꨨꨶ ꩝ ꨕꨮꩃ ꨟꨮꨧꨭꩍ ꨅꩍ ꨦꨗꩍ ꩞ (꩔꩘꩑-꩔꩘꩕) ꨝꨵꨯꨱꩍ ꨕꨫ ꨘꩆ ꨟꩃ ꨣꨝꩇ ꨀꨣꨯꨦꩍ ꩝ ꨐꨭ ꨕꨮꩃ ꨟꨮꨧꨭꩍ ꨟꩃ ꨀꨤꩍ ꩝ ꨀꨝꨪꩍ ꨟꨮꨣꨰ ꨓꨯꨱꩌ ꨓꨘꩆ ꩞ ꨐꨭ ꨛꨩꨟꨮꨓꨰ ꨝꨶꨯꩊ ꨚꨓꨯꨱ ꨤꨯ ꨣꨎꩆ ꩝ ꨀꨤꩍ ꨙꨶꨯꩄ ꨓꨟ ꨗꨮꨈꩉ ꩝ ꨝꨪꨣꨭꨥ ꨟꩃ ꨓꨮꩊ ꨁꨗꨴ ꨚꨓꨴ ꩞ ꨀꨤꩍ ꨚꨓꨯꨱ ꨙꨶꨯꩄ ꨓꨟ ꨟꨮꨖꨪꩉ ꨣꨪꨢ ꩝ ꨝꨪꨣꨭꨥ ꨟꩃ ꨛꨯꨮ ꨁꨗꨴ ꨚꨓꨴ ꩝ ꨐꨭ ꨕꨯꨱꩀ ꨓꨘꩆ ꨝꨵꨯꨱꩍ ꨚꨕꨬ ꩞ ꨕꨫ ꨆꨴꨲꩍ ꨓꨗꨴꩆ ꨚꨴꨯꨱꩃ ꨧꨳꩌ ꨙꨬ ꩝ ꨀꨗꩀ ꨚꨓꨯꨱ ꨀꨝꨪꩍ ꨕꨴꨬ ꩝ ꨆꨳꨮꩃ ꨡꨮꩃ ꨟꨮꨐꨭꩌ ꨦꩀꨓꨪꨎꨰ ꩞ ꨁꨗꨴ ꨚꨓꨴ ꨃꨥ ꨈꨭꨣꩅ ꨁꨆꨯꨮꩋ ꨟꨮꨣꨰ ꩝ ꨓꨳꩇ ꨗꨯꨱ ꨚꩀ ꨊꨯꨱꩀ ꨟꨮꨤꨪꨈꨰ ꩝ ꨛꨩꨟꩀ ꨚꨚꩆ ꨕꨯꨱꩀ ꨓꨘꩆ ꩞ (꩔꩘꩖-꩔꩙꩐) ꨝꨵꨯꨱꩍ ꨕꨫ ꨘꩆ ꨈꨭꨣꩅ ꨁꨆꨯꨮꩋ ꨝ ꨚꨮꩉ ꩝ ꨧ ꨝꨪꨗꨴꨯꩀ ꨝꨪꨣꨭꨥ ꨟꩃ ꨓꨮꩊ ꩝ ꨛꨩꨤꨰꩀ ꨕꨫ ꨀꨘꩀ ꨁꨗꨴ ꨚꨓꨴ ꩞ ꨆꨍꨰꩅꨌꨴꨬ ꨓꨤꨮꩃꨋ ꨝꨶꨪꩋꨦꨚ ꩝ ꨝꨴꨬ ꨆ ꨛꨯꨮ ꨁꨗꨴ ꨚꨓꨴ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨣꨎꩆ ꩞ ꨟꩀ ꨁꨆꩀ ꨕꨫ ꨚꨚꩆ ꨝ ꨚꨮꩉ ꩝ ꨈꨭꨣꩅ ꨁꨆꨯꨮꩋ ꨗꨯꨱ ꨓꨮꩊ ꩝ ꨛꨩꨤꨰꩀ ꨕꨫ ꨀꨘꩀ ꨤꩆ ꨌꨡꩃ ꩞ ꨚꨓꨯꨱ ꨚꨝꩍ ꨣꩌ ꨕꨪꨝꨭꩅ ꨓꨝꨳꩀ ꨝꨪꨙꩃ ꩝ ꨛꨯꨩꩀ ꨟꨮꨓ ꨈꨵꨮꩃ ꨀꨇꩆ ꩝ ꨓꨓꨮꩀ ꨢ ꨦꨣꨪꨝꩃ ꨀꨗꩃ ꩞ ꨨꨶꨮꩄ ꨆꨭꨙ ꨅ ꨔꨮꨭ ꨤꩄ ꨆ ꨦꨶꩆ ꨕꨴꨬ ꩝ ꨣ ꨟꩀ ꨚꨚꩆ ꨚꨳꨮꩍ ꨆꨭꨣꨬ ꩝ ꨁꨗꨴ ꨚꨓꨴ ꨐꨭ ꨟꩀ ꨚꨚꩆ ꩞ (꩔꩙꩑-꩔꩙꩕) ꨕꨯꩌ ꨘꩆ ꨈꨭꨣꩅ ꨁꨆꨯꨮꩋ ꨃꨥ ꨝꨪꨌꩆ ꩝ ꨨꨮꩄ ꨧ ꨓꨳꩆ ꨕꨯꨱꩀ ꨓꨘꩆ ꩝ ꨧꨪꨝꨮꩉ ꨅꩍ ꨔꨮꨭ ꨨꨶꨮꩄ ꨆꨭꨙ ꩞ ꨧꨭꨗꨪꩅ ꨈꨪꨗꨴꨮꩍ ꨧꨭꨟꨭ ꨧꨯꨱꩃ ꨛꨯꨮ ꨕꨯꨮꨝꨪꨓ ꩝ ꨚꨤꨬ ꨧꨭꨟꨮꩆ ꨓꨚꨣ ꩝ ꨀꨗꩀ ꨚꨓꨯꨱ ꨚꨴꨯꨱꩃ ꨗꨮꨈꩉ ꩞ ꨕꨯꩌ ꨘꩆ ꨝꨪꨣꨭꨥ ꨟꩃ ꨚꨓꨯꨱ ꨚꨙꨮꩉ ꩝ ꨘꩌ ꨂꨣꩃ ꨚꨗꨴꨯꨱꩃ ꨎꨝꨶꨯꩊ ꩝ ꨆꨯꨱꩃ ꨚꨓꨯꨱ ꨓꨝꨳꩀ ꨟꨮꨣꨰ ꩞ ꨓꨴꨭꩍ ꨕꨫ ꨝꨳꨭꩍ ꨘꩆ ꨚꨓꨯꨱ ꨗꨯꨱ ꨓꨚꩀ ꩝ ꨚꨗꨶꨮꩄ ꨆꨭꨖ ꨔꩅ ꨓꨳꩀ ꩝ ꨦꨗꩃ ꨕꨫ ꨨꨓꨰ ꨨꨶꨮꩄ ꨆꨭꨙ ꩞ ꨕꨯꩌ ꨘꩆ ꨝꨪꨣꨭꨥ ꨟꩃ ꨛꨯꨮ ꨁꨗꨴ ꨚꨓꨴ ꩝ ꨐꨭ ꨟꩀ ꨚꨚꩆ ꨝꨴꨬ ꨆ꩝ ꨚꨓꨯꨱ ꨆ ꨟꩃ ꨦꩀ ꨨꨓꨰ ꩞ (꩔꩙꩖-꩕꩐꩐) ꨆꨭꨨꨵꨯꨱꩌ ꨀꨗꩀ ꨆꨳꨮꩃ ꨗꨯꨱ ꨝꨪꨟꨫ ꨎꨴꨭꨩ ꨧꨭꨝꨪꩀ ꩝ ꨚꩀ ꨊꨯꨱꩀ ꨝꨪꨟꨯꩂ ꨦꩅꨓꨪꩀ ꩝ ꨧꨳꩌ ꨟꨮꨆꨴꨲ ꨦꨰꩍ ꨕꨫ ꨦꨰꩍ ꩞ ꨈꨴꨮꩇ ꨕꨴꨬ ꨀꨗꩀ ꨚꨓꨯꨱ ꨛꨩꨣꨤꨯꨱ ꩝ ꨁꨗꨴ ꨚꨓꨴ ꨐꨭ ꨆꨳꨮꩃ ꨗꨯꨱ ꩝ ꨧ ꨓꨳꩆ ꨥꨮꩀ ꨎꨶꨰ ꨝꨪꨖ ꩞ ꨣꨪꨎ ꨕꨯꨥ ꨤꨯꨮꨤ ꨣꨥꩆꨘ ꩝ ꨆꨆꨬ ꨀꨝꨪꩍ ꨚꨗꨶꨮꩄ ꨆꨭꨖ ꩝ ꨓꨆꨯꨮ ꨕꨫ ꨟꨮꩆ ꨓꩆꨚꨣꨮꩆ ꩞ ꨁꨗꨴ ꨚꨓꨴ ꨧꨫ ꨓꨆꨯꨮ ꨗꨯꨱ ꨓꨮꩊ ꩝ ꨓꨗꩍ ꨚꨭꨓꨪꩍ ꨧꨭꨟꨭ ꨀꨇꩆ ꩝ ꨧꨭꨠꩄ ꨡꨭꨥ ꨟꨮꨗꨭꨥ ꨟꨮꨗꩃ ꩞ ꨁꨗꨴ ꨚꨓꨴ ꨚꨕꨮꩍ ꨓꨘꩆ ꨝꨵꨯꨱꩍ ꨓꨖꨭꨥ ꩝ ꨗꨟꨮꩋ ꨧꨭꨆꩊ ꨝꨵꨯꨱꩍ ꨤꨪꨆꨮꨭ ꩝ ꨟꨮꨤꨳꨮꩃ ꨆꨭꨗ ꨝꨴꨬ ꨝꨫ ꨡꨯꩍ ꩞ (꩕꩐꩑-꩕꩐꩕) ꨀꨔꩀ ꨓꨈꨯꩀ ꨨꨓꨮꩌ ꨆꨐꨪꩀ ꨋꩆ ꨟꨮꨣꨳꩍ ꩝ ꨓꨮꩊ ꨆꨣꨮꩌ ꨀꨔꩀ ꨚꨭꨓꨪꩍ ꩝ ꨡꨯꩍ ꨝꨪꨟꨯꩂ ꨟꩍ ꨝꨪꨊꨭ ꩞ ꨚꨓꨯꨱ ꨝꨪꨟꨯꩂ ꨦꩅꨓꨪꩀ ꨃꨥ ꨓꨐꨫ ꩝ ꨨꨈꨰꩅ ꨟꨮꨣꨰ ꨦꨴꨮꩍ ꨈꨙꨫ ꩝ ꨧꨭ ꨦꩍ ꨝꨪꨌꩆ ꨝꨫ ꨔꨮꨭ ꨢꨮꨭ ꨨꨤꨬ ꩞ ꨁꨗꨴ ꨚꨓꨴ ꨧꨫ ꨀꨇꩆ ꨚꨕꨪꩅ ꨝꨪꨗꨰ ꩝ ꨆ ꨈꨯꨱꩆ ꨚꨓꨯꨱ ꨓꨳꩇ ꨟꨮꨣꨰ ꩝ ꨕꨶꩍ ꨎꨴꨭ ꨝꨫ ꨨꨭ ꨀꨗꩀ ꩞ ꨛꨯꨩꩀ ꨀꨨꩉ ꨧꨯꨱꩃ ꨨꨤ ꨧꨳꩌ ꨚꨢꩀ ꩝ ꨁꨗꨴ ꨚꨓꨴ ꨦꨯꨮꩍ ꨡꨶꩀ ꩝ ꨧ ꨆꩊ ꨕꨤꩌ ꨣꨎꨀꨬ ꩞ ꨚꨓꨯꨱ ꨝꨪꨟꨯꩂ ꨦꩅꨓꨪꩀ ꨃꨥ ꨆꨆꨬ ꩝ ꨁꨗꨴ ꨚꨓꨴ ꨧꨳꩌ ꨤꨪꨆꨬ ꩝ ꨐꨭ ꨚꨮꩉ ꨓꨈꨯꩀ ꨓꨯꨱꩌ ꨀꨟ ꩞ (꩕꩐꩖-꩕꩑꩐) ꨎꨴꨭ ꨘꩆ ꨚꨤ ꨚꩀ ꨊꨯꨱꩀ ꨀꨕꨮꩉꨨ ꩝ ꨕꨫ ꨣꨳꨪꩌ ꨚꨆꩉ ꨎꩃ ꨟꨮꨕ ꩝ ꨕꨤꩌ ꨟꨮꨖꨪꩉ ꨦꩀꨓꨎꨰ ꩞ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨘꩆ ꨆꨳꨮꩃ ꨓꨶꨬ ꩝ ꨧ ꨠꨗꨯꨮꩋ ꨟꨮꨣꩅ ꨓꨳꩆ ꩝ ꨁꨗꨴ ꨚꨓꨴ ꨇꨪꩌ ꨆꨵꨯꨱ ꩞ ꨓꨮꩊ ꨨꨣꨬ ꨧ ꨚꨵꨭꩍ ꨝꨪꨊꨭꩆ ꨦꨭꩀ ꨓꨒꨴꨶꩍ ꩝ ꨧꨫ ꨓꨆꨯꨮ ꨗꨯꨱ ꨓꨴꨭꩍ ꩝ ꨓꨈꨯꩀ ꨚꩀ ꨊꨯꨱꩀ ꨣꨎꨀꨬ ꩞ ꨛꨩꩀ ꨚꨵꨭꩍ ꨀꨗꩀ ꨚꨓꨯꨱ ꨚꨮꩉ ꨨꨕꨬ ꩝ ꨁꨗꨴ ꨚꨓꨴ ꨧꨳꩌ ꨤꨪꨆꨬ ꩝ ꨛꨩꨓꨴꨭꩆ ꨣꨪꨝꨭꩀ ꨨꨎꩆ ꨀꨊꨪꩆ ꩞ ꨈꨴꨭꩌ ꨆꨓꩊ ꨨꨎꩆ ꨎꨤꨮꩍ ꨌꨮꩀ ꨧꨭ ꨌꩉ ꩝ ꨨꨎꩆ ꨎꨴꩍ ꨤꨰꩀ ꨓꨴꨭꩆ ꩝ ꨚꨮꩉ ꨓꨈꨯꩀ ꨗꨯꨱ ꨅ ꨓꨴꨭꩍ ꩞ (꩕꩑꩑-꩕꩑꩕) ꨁꨗꨴ ꨚꨓꨴ ꨚꨮꩉ ꨓꨈꨯꩀ ꨗꨯꨱ ꨓꨴꨭꩍ ꩝ ꨐꨭ ꨆꨆꨬ ꨕꨫ ꨀꨧꨰꩍ ꩝ ꨕꨯꨱꩀ ꨇꨪꩀ ꨀꨳ ꨓꨝꨮꩃ ꩞ ꨁꨗꨴ ꨚꨓꨴ ꨗꨯꨱ ꨓꨯꨱꩌ ꨞꨯꨚꨢꨮꩃ ꩝ ꨓꨟ ꨟꨮꨖꨪꩉ ꨝꨵꨯꨱꩍ ꨈꨵꨮꩃ ꩝ ꨕꨫ ꨤꨯꩀ ꨆꨗꨫ ꨕꩀ ꨕꨴꨮꩍ ꩞ ꨝꨵꨯꨱꩍ ꨚꨆꨴꩇ ꨨꨎꩆ ꨀꨊꨪꩆ ꨇꨯꨱꩃ ꨀꨝꨪꩍ ꩝ ꨀꨗꩀ ꨚꨓꨯꨱ ꨛꨩꩀ ꨚꨵꨭꩍ ꩝ ꨐꨭ ꨚꨮꩉ ꨓꨈꨯꩀ ꨓꨶꨬ ꨨꨕꨬ ꩞ ꨗꨯꨱ ꨓꨮꩊ ꨀꨳ ꨓꨝꨮꩃ ꨧꨳꩌ ꨙꨬ ꩝ ꨀꨧꨰꩍ ꨤꨪꨟꩆ ꨧꨳꩌ ꨤꨪꨆꨬ ꩝ ꨐꨭ ꨓꨳꩇ ꨌꨆꩀ ꨙꨶꨯꩄ ꨀꨝꨪꩍ ꩞ ꨐꨭ ꨢꨶꨯ ꨕꨴꨬ ꨎꨳꨮꩃ ꨁꨗꨈꨪꨣꩈ ꨚꨓꨪꩍ ꩝ ꨀꨗꩀ ꨚꨓꨯꨱ ꨛꨩꩀ ꨚꨵꨭꩍ ꩝ ꨐꨭ ꨨꨶꨮꩄ ꨆꨭꨙ ꨤꨯ ꨣꨎꩆ ꩞ (꩕꩑꩖-꩕꩒꩐) ꨐꨭ ꨙꨶꨯꩄ ꨓꨈꨯꩀ ꨚꩀ ꨊꨯꨱꩀ ꨀꨕꨮꩉꨨ ꩝ ꨡꨯꩍ ꨌꨴꨪꩍ ꨕꨫ ꨣꨳꨪꩌ ꨟꨮꨓ ꩝ ꨁꨗꨴ ꨚꨓꨴ ꨇꨪꩌ ꨆꨵꨯꨱ ꩞ ꨚꨓꨯꨱ ꨝꨪꨌꩆ ꨇꨯꨱꩊ ꨧꨭ ꨦꩍ ꨝꨳꩀ ꨅꩍ ꨔꨮꨭ ꩝ ꨁꨗꨴ ꨚꨓꨴ ꨣꨘꩌ ꨣꨪꨝꨭꨥ ꩝ ꨧꨭꨗꨪꩅ ꨈꨪꨗꨴꨮꩍ ꨤꨯ ꨟꨮꨕ ꩞ ꨐꨭ ꨀꨗꩀ ꨚꨓꨯꨱ ꨆꨭꨣꨠ ꨝꨦꨚ ꩝ ꨚꨤꨬ ꨧꨭꨟꨮꩆ ꨓꨚꨣꨩ꩝ ꨚꨴꨯꨱꩃ ꨗꨮꨈꩉ ꨦꨰꩍ ꨕꨫ ꨦꨰꩍ ꩞ ꨕꨯꩌ ꨘꩆ ꨀꨗꩀ ꨚꨓꨯꨱ ꨛꨩꩀ ꨚꨵꨭꩍ ꩝ ꨎꨝꩅ ꨦꨭꨤꩌ ꨝꨵꨯꨱꩍ ꨆꨭꨆꨭꩍ ꩝ ꨓꨖꨭꨥ ꨆ ꨛꨯꨮ ꨁꨗꨴ ꨚꨓꨴ ꩞ ꨚꨓꨯꨱ ꨝꨪꨙꩃ ꨆꨳꨮꩃ ꨚꨰꩀ ꨝꨪꨊꨭ ꨝꨴꨬ ꨆ ꩝ ꨁꨗꨴ ꨚꨓꨴ ꨓꨯꩀ ꨝ꩝ ꨝꨭꩍ ꨕꨫ ꨆꨵꨯꨱꩃ ꨟꩍ ꨟꨮꨣꨳꩍ ꩞ (꩕꩒꩑-꩕꩒꩕) ꨎꨴꨭ ꨘꩆ ꨓꨴ ꨨꨭ ꨀꨗꩀ ꨧꨳꩌ ꨧꨭ ꨦꩍ ꩝ ꨁꨗꨴ ꨚꨓꨴ ꨧꨫ ꨆꨭꨆꨭꩍ ꩝ ꨓꨖꨭꨥ ꨧꨭꨗꨪꩅ ꨞꨯꨕꨮꩉꨨ ꩞ ꨝꨵꨯꨱꩍ ꨤꨪꨆꨮꨭ ꨆꨗ ꨀꨢꨭꩍ ꨆ ꨀꨟ ꨓꨨ ꩝ ꨧꨭꨝꨪꩀ ꨧꨯꨱꩃ ꨢꩃ ꨁꨗ ꩝ ꨚꨓꨯꨱ ꨝꨴꨬ ꨆꨵꨮꨭ ꨣꨪꨓꨭꩍ ꩞ ꨁꨗꨴ ꨚꨓꨴ ꨓꨎꨭꩍ ꨣꨪꨓꨭꩍ ꨔꨭꩆ ꨀꨢꨭꩍ ꩝ ꨤꨪꨆꨬ ꨆꨭꨟꨬ ꨧꨯꨱꩃ ꨀꨝꨪꩍ ꩝ ꨧ ꨂꨣꩃ ꨧ ꨣꨪꨓꨭꩍ ꩞ ꨆꨗ ꨕꨴꨬ ꨝꨵꨯꨱꩍ ꨆꨳꨮꩃ ꨥꨮꩀ ꨗꨯꨱ ꨚꨤꨬ ꩝ ꨚꨓꨯꨱ ꨨꨤꩉ ꨌꨴꨪꩍ ꨙꨬ ꩝ ꨁꨗꨴ ꨚꨓꨴ ꨀꨶꨮꩆ ꨓꨝꨶꨯꩆ ꩞ ꨙꨪꩀ ꨕꨫ ꨊꨯꨱꩀ ꨨꨰꨊꨫ ꨈꨭꨣꨪꨕꩆ ꩝ ꨐꨭ ꨚꨮꩉ ꨥꨮꩀ ꨧ ꨆꨦꨮꩆ ꩝ ꨓꨮꩊ ꨗꨮꨈꩉ ꨦꩍ ꨦꨶꩆ ꩞ (꩕꩒꩖-꩕꩓꩐) ꨓꨮꩊ ꨔꨶꨯꩆ ꨟꨭꩀ ꨣꨙꨰꩀ ꨝꨢꨯꨮꩆ ꩝ ꨙꨶꨯꩄ ꨣꨯꨱꩀ ꨀꨶꨮꩆ ꨓꨝꨶꨯꩆ ꩝ ꨆ ꨓꨌꨯꨱꨥ ꨟꨮꨣꨰ ꨓꨯꨱꩌ ꩞ ꨝꨤꨪꨕꨥ ꨠꩆꨓꨴꨫ ꨕꩀ ꨚꨍꨯꩌ ꩝ ꨆꨂꩀ ꨕꨫ ꨓꨳꩆ ꨆ ꨨꨕꨯꩌ ꩝ ꨀꨗꩀ ꨗꨯꨱ ꨕꨯꨱꩀ ꨧꨴꨶꨰ ꩞ ꨓꨤꩀ ꨡꨯꩍ ꨁꨗꨴ ꨚꨓꨴ ꨐꨭ ꨟꨮꨣꨰ ꩝ ꨀꨶꨮꩆ ꨓꨝꨶꨯꩆ ꨝꩀ ꨨꨓꨰ ꩝ ꨓꨟ ꨛꨩꨔꨮꨭ ꨗꨯꨣꨚ ꩞ ꨚꨓꨯꨱ ꨓꨳꩇ ꨚꨗꨴꨯꨱꩃ ꨎꨝꨶꨯꩊ ꨗꨯꨱ ꨕꨀ ꩝ ꨛꨯꨮ ꨀꨗꩀ ꨁꨗꨴ ꨚꨓꨴ ꩝ ꨓꨟ ꨝꨫ ꨓꨮꩊ ꨕꨤꩌ ꨟꨮꨖꨪꩉ ꩞ ꨁꨗꨴ ꨚꨓꨴ ꨆꨆꨭꩍ ꨚꨓꨯꨱ ꨝꨵꨯꨱꩍ ꨝꨪꨌꩆ ꩝ ꨆꨵꨯꨱꩃ ꨓꨆꨯꨮ ꨕꨫ ꨈꨴꨮꩇ ꨗꨮꨈꩉ ꩝ ꨣꨪꨡꨫ ꨣꨪꨡꨲꩇ ꨅ ꨔꨬ ꨓꨚ ꩞ (꩕꩓꩑-꩕꩓꩕) ꨆꨵꨯꨱꩃ ꨆꨗ ꨤꨪꨠꩍ ꨎꨴꨭ ꨆ ꨞꨯꨕꨮꩉꨨ ꩝ ꨗꨯꨣꨚꩅ ꨧꨯꨱꩃ ꨛꨯꨮ ꨝꨳ ꩝ ꨕꨤꩌ ꨟꨮꨖꨪꩉ ꨀꨶꨮꩆ ꨓꨝꨶꨮꩆ ꩞ ꨕꨯꩌ ꨘꩆ ꨚꨓꨯꨱ ꨛꨯꨮ ꨝꨳ ꨧꨫ ꨝꨪꨌꩆ ꩝ ꨓꨯꨱꩌ ꨀꨝꨪꩍ ꨚꨗꨴꨯꨱꩃ ꨎꨝꨶꨯꩊ ꩝ ꨦꨴꨫ ꨚꨤꨳꨮꩃ ꨔꩅ ꨚꨢꩀ ꩞ ꨟꨮꨢꩍ ꨛꨯꨮ ꨝꨴꨬ ꨨꨭ ꨀꨗꩀ ꨆꨭꨟꨬ ꩝ ꨆꨮꨭ ꨗꨫ ꨀꨲꩃ ꨝꨴꨬ ꩝ ꨛꨩꨓꨯꩀ ꨆ ꨁꨗꨴ ꨚꨓꨴ ꩞ ꨀꨠꩊ ꨚꨓꨳꩇ ꨡꨮꩃ ꨟꨮꨐꨭꩌ ꨤꨪꨇꩍ ꨌꨈ ꩝ ꨚꨭꨣꨟꨫ ꨦꨭꩀ ꨛꨯꨮ ꨝꨳ ꩝ ꨟꨮꨆꩆ ꨎꨴꨭ ꨦꩀꨓꨎꨰ ꩞ ꨓꨯꨱꩌ ꨔꨭꩆ ꨝꨳ ꨨꨭ ꨀꨗꩀ ꨆꨭꨟꨬ ꩝ ꨚꨓꨴꨫ ꨚꨴꨯꨱꩃ ꨧꨳꩌ ꨙꨬ ꩝ ꨁꨗꨴ ꨚꨓꨴ ꨚꨮꩃ ꨈꨯꨱꩆ ꩞ (꩕꩓꩖-꩕꩔꩐) ꨚꨓꨯꨱ ꨚꨙꨮꩉ ꨁꨗꨴ ꨚꨓꨴ ꨤꨯꨱꩃ ꨈꨪꨗꨴꨮꩍ ꩝ ꨆꨌꩍ ꨀꨨꨯꨱꩀ ꨧꨯꨱꩃ ꨀꨧꨰꩍ ꩝ ꨧꨭꨝꨪꩀ ꨧꨯꨱꩃ ꨨꨤꨭꨥ ꨝꨪꨤꩃ ꩞ ꨧꨯꨱꩃ ꨀꨗꩀ ꨚꨓꨯꨱ ꨛꨩꩀ ꨚꨵꨭꩍ ꨂꨣꩃ ꩝ ꨟꨮꨁꨪꩆ ꨕꨫ ꨀꨘꩀ ꨞꨯꨚꨢꨮꩃ ꩝ ꨕꨤꩌ ꨨꨓꨰ ꨎꨶꨰ ꨆꨭꨙ ꩞ ꨨꨤꨭꨥ ꨝꨪꨤꩃ ꨀꨗꩀ ꨚꨓꨯꨱ ꨈꨪꨗꨯꨱꩃ ꨢꨧ ꩝ ꨐꨭ ꨛꨩꨝꨪꨗꨯꨮꩋ ꨁꨗꨴ ꨚꨓꨴ ꩝ ꨓꨎꨭꩍ ꨡꨮꩃ ꨁꨣꨯꨮꩋ ꨗꨪꨦ ꩞ ꨓꨶꨮꩆ ꨚꨓꨴꨫ ꨓꩆ ꨕꨣ ꨣꩅꨘ ꩝ ꨐꨭ ꨛꨩꨨꨕꨳꨪꩇ ꨁꨗꨴ ꨚꨓꨴ꩝ ꨧꨳꩌ ꨤꨪꨆꨬ ꨦꨰꩍ ꨕꨫ ꨦꨰꩍ ꩞ ꨆꨵꨮꨭ ꨂꨣꩃ ꨚꨓꨴꨫ ꨨꨕꨳꨪꩇ ꨈꨪꨗꨯꨱꩃ ꨕꨫ ꨓꨳꩆ ꩝ ꨓꨳꩇ ꨓꨈꨮꩉ ꨗꨯꨱ ꨀꨇꩆ ꩝ ꨕꨫ ꨗꨮꨈꩉ ꨀꨗꩀ ꨚꨓꨯꨱ ꩞ (꩕꩔꩑-꩕꩔꩕) ꨕꨫ ꨈꨴꨮꩇ ꨗꨮꨈꩉ ꨀꨗꩀ ꨚꨓꨯꨱ ꨋꩇ ꨧ ꨓꨳꩆ ꩝ ꨙꨪꩀ ꨀꨨꨯꨱꩀ ꨝꨣꨪꨢꩉ ꩝ ꨟꨮꨗꩃ ꨓꨆꨯꨮ ꨚꨮꩉ ꨟꩃ ꨊꨯꨱꩀ ꩞ ꨝ ꨝꨶꨯꩊ ꨣꨪꨝꨭꨥ ꨓꨟꩆ ꨢꩅꨓꨴꩀ ꩝ ꨀꨨꨯꨱꩀ ꨟꨮꨣꨰ ꨕꩊ ꨣꨆꩀ ꩝ ꨕꨫ ꨤꩌꨟꨮꨊꨩ ꨚꨓꨯꨱ ꩞ ꨕꨤꩌ ꨟꨮꨋ ꨙꨪꩀ ꨆꨚꩆ ꨓꨴꨭꩆ ꨗꨯꨱ ꩝ ꨓꨐꨫ ꨈꨴꨮꩇ ꨀꨗꩀ ꨚꨓꨯꨱ ꩝ ꨐꨭ ꨟꨰ ꨣꨪꨥꨮꩃ ꨁꨗꨴ ꨚꨓꨴ ꩞ ꨝꨶꨯꩊ ꨟꩃ ꨊꨯꨱꩀ ꨇꨪꩀ ꨝꨳꨭꩍ ꨣꨯꨱꩀ ꨕꨀ ꩝ ꨎꩃ ꨣꨘꩌ ꨧ ꨆꨭꨖ ꩝ ꨆꨳꨮꩃ ꨗꨯꨱ ꨛꨩꨔꨮꨭ ꨗꨯꨣꨚ ꩞ ꨓꨟ ꨇꨶꨰ ꨓꨯꨱꩌ ꨅꩃ ꨟꨮꨋ ꨓꨨ ꩝ ꨛꨩꨨꨤꩉ ꨚꨗꨶꨮꩄ ꨆꨭꨖ ꩝ ꨚꨓꨯꨱ ꨨꨶꨮꩄ ꨤꨯ ꨣꨎꩆ ꩞ (꩕꩔꩖-꩕꩕꩐) ꨁꨗꨴ ꨚꨓꨴ ꨚꨗꩍ ꨎꨳꨮꩃ ꨟꨮꨖꨪꩉ ꨈꨪꨤꨮꩃ ꩝ ꨕꨀ ꨧ ꨓꨳꩆ ꨀꨝꨪꩍ ꨓꨘꩆ ꩝ ꨡꨮꩃ ꨟꨮꨐꨭꩌ ꨦꩀꨓꨎꨰ ꩞ ꨚꨓꨯꨱ ꨝꨪꨙꩃ ꨚꨗꨴꨯꨱꩃ ꨎꨝꨶꨯꩊ ꨍꨪꩆ ꨝꨳꨰ ꩝ ꨆꨮꨭ ꨆꨂꩀ ꨕꨤꩌ ꨨꨓꨰ ꩝ ꨆ ꨍꨭꩀ ꨚꨗꨶꨮꩄ ꨋꩆ ꨆꨭꨖ ꩞ ꨕꨀ ꨀꨗꩀ ꨚꨓꨯꨱ ꨧꨯꨱꩃ ꨁꨗꨴ ꨚꨓꨴ ꩝ ꨓꨟ ꨝꨫ ꨓꨮꩊ ꨟꨮꨖꨪꩉ ꨣꨪꨢ ꩝ ꨚꨓꨯꨱ ꨝꨪꨌꩆ ꨝꨵꨯꨱꩍ ꨓꨖꨭꨥ ꩞ ꨚꨔꩇ ꨕꨤꩌ ꨟꩍ ꨚꨣꨳꩀ ꨚꨓꨰꩍ ꨤꨪꨂꨥ ꩝ ꨁꩆꨓꩆ ꨌꩍꨢ ꨕꨫ ꨤꨭꨥ ꩝ ꨀꨗꩀ ꨚꨓꨯꨱ ꨕꨯꨱꩀ ꨚꩀ ꨊꨯꨱꩀ ꩞ ꨛꨯꨩꩀ ꨀꨨꩉ ꨧꨯꨱꩃ ꨨꨤ ꨣꨰ ꨚꨢꩀ ꩝ ꨚꨓꨯꨱ ꨝꨪꨌꩆ ꨔꩅ ꨓꨳꩀ ꩝ ꨚꨗꨶꨮꩄ ꨆꨭꨖ ꨧꨯꨱꩃ ꨕꨯꨥ ꩞ (꩕꩕꩑-꩕꩕꩕) ꨤꨪꨆꨮꨭ ꨋꩇ ꨖꩉ ꨆ ꨀꨟ ꨓꨨ ꩝ ꨍꨭꩀ ꨚꨗꨶꨮꩄ ꨋꩆ ꨆꨭꨖ ꩝ ꨣꨪꨝꩇ ꨀꨣꨯꨦꩍ ꨐꨭ ꨔꨮꨭ ꩞ ꨚꨓꨯꨱ ꨟꨮꨢꨯꨱꩌ ꨁꨗꨴ ꨚꨓꨴ ꨘꩌ ꨣꨪꨝꨭꨥ ꩝ ꨧꨭꨗꨪꩅ ꨈꨪꨗꨴꨮꩍ ꨅ ꨝꨪꩀ ꨛꨩꨢꨮꨭ ꩝ ꨁꨣꨯꨮꩋ ꨝꨪꨎꩀꨍꨰꨘ ꩞ ꨚꨓꨯꨱ ꨝꨪꨙꩃ ꨚꨗꨴꨯꨱꩃ ꨎꨝꨶꨯꩊ ꨆꨭꨨꨴꨳꨫ ꨆꨭꨨꨴꨳ ꩝ ꨀꨠꩊ ꨚꨓꨳꩇ ꨤꨪꨇꩍ ꨎꨈ ꩝ ꨧꨯꨱꩃ ꨛꨩꨋꩇ ꨟꨮꨤꨪꨈꨰ ꩞ ꨧ ꨚꨵꨭꩍ ꨚꨆꨰꩅ ꨨꨓꩀ ꨚꨝꨭꩃ ꨟꩍ ꨂꨣꩈ ꩝ ꨓꨓꩍ ꨁꩆꨓꩆ ꨋꩆ ꨧꨭꨝꨰ ꩝ ꨁꨤꨮꩃ ꨝꨪꨟꨫ ꨁꨤꨮꩃ ꨓꨔꨪꩍ ꩞ ꨛꨩꨋꩇ ꨤꨪꨑꩆ ꨙꨪꩀ ꨓꨈꨯꩀ ꨟꩃ ꨟꩍ ꩝ ꨣꨭꩇ ꨚꨓꨴꨫ ꨦꨰꩍ ꨕꨫ ꨦꨰꩍ ꩝ ꨛꨩꨓꨯꩀ ꨆ ꨁꨗꨴ ꨚꨓꨴ ꩞ (꩕꩕꩖-꩕꩖꩐) ꨀꨋꩆ ꨚꨓꨴꨫ ꨓꩆ ꨕꨣ ꨣꩅꨘ ꩝ ꨡꨮꩃ ꨟꨮꨐꨭꩌ ꨤꨪꨇꩍ ꨌꨈ ꩝ ꨝꨶꨯꩊ ꨧꨭꨞꩇ ꨔꩅ ꨚꨢꩀ ꩞ ꨟꨮꨤꨳꨮꩃ ꨆꨗ ꨧ ꨚꨵꨭꩍ ꨨꨣꨬ ꨟꨮꨤꨪꨞꩀ ꩝ ꨗꨯꨣꨚꩅ ꨀꨤꨪꩆ ꨟꩍ ꨚꨣꨳꩀ ꩝ ꨚꨓꨰꩍ ꨤꨪꨂꨥ ꨤꨯ ꨣꨎꩆ ꩞ ꨨꨕꨯꩌ ꨧ ꨓꨳꩆ ꨈꨴꨮꩇ ꨗꨮꨈꩉ ꨓꨯꨱꩌ ꨓꨘꩆ ꩝ ꨚꨓꨯꨱ ꨣꨪꨎ ꨦꩍ ꨦꨶꩆ ꩝ ꨟꨮꨢꨯꨱꩌ ꨛꨯꨮ ꨁꨗꨴ ꨚꨓꨴ ꩞ ꨛꨯꨩꩀ ꨨꨯꨮꩋ ꨗꨟꨯꨮꩋ ꨧꨭꨆꩊ ꨞꨯꨕꨮꩉꨨ ꩝ ꨆꨳꨮꩃ ꨗꨯꨱ ꨣꨪꨥꨮꩃ ꨁꨗ ꨓꨨ ꩝ ꨚꩀ ꨧꨭꨟꨮꩆ ꨓꨚꨣ ꩞ ꨚꨓꨯꨱ ꨛꨩꨋꩇ ꨀꨨꨯꨱꩀ ꨝꨣꨪꨢꩉ ꨤꨯ ꨟꨮꨕ ꩝ ꨓꨮꩃ ꨟꩍ ꨧ ꨚꨵꨭꩍ ꨀꨳ ꩝ ꨕꨫ ꨣꨳꨪꩌ ꨚꨆꩉ ꨘꩅꨓꨔꨪꩍ ꩞ (꩕꩖꩑ – ꩕꩖꩕) ꨈꨴꨮꩇ ꨕꨴꨬ ꨀꨗꩀ ꨚꨓꨯꨱ ꨙꨪꩀ ꨀꨝꨪꩍ ꩝ ꨣꨪꨎ ꨕꨯꨥ ꨧꨫ ꨚꨗꩍ ꩝ ꨧ ꨝꨯꨱꩍ ꨚꨚꩆ ꨟꩍ ꨟꨮꨆꨴꨲ ꩞ ꨛꨩꩀ ꨂꨣꩃ ꨚꨓꨴꨫ ꨨꨕꨳꨪꩇ ꨁꨗꨴ ꨚꨓꨴ ꩝ ꨙꨪꩀ ꨧ ꨝꨯꨱꩍ ꨀꨨꨯꨱꩀ ꨝꨪꨊꨭ ꩝ ꨣꨪꨝꩇ ꨟꨮꨣꨫ ꨚꨟꨴꨳꨮ ꨟꨮꨣꨰ ꩞ ꨗꨯꨱ ꨓꨮꩊ ꨗꨮꨈꩉ ꨧꨭꨟꨮꩆ ꨓꨚꨣ ꩝ ꨚꨓꨯꨱ ꨆꨭꨣꨠ ꨝꨦꨚ ꩝ ꨈꨴꨮꩇ ꨗꨮꨈꩉ ꨀꨶꨮꩆ ꨓꨝꨶꨮꩆ ꩞ ꨆ ꨀꨗꩀ ꨧꨯꨱꩃ ꨟꨮꨓꨭꨥ ꨓꨯꨱꩌ ꨓꨘꩆ ꩝ ꨕꨀ ꨀꨝꨪꩍ ꨈꨴꨮꩇ ꨆꨭꨟꨶꨯꩆ ꩝ ꨟꨮꨣꨰ ꨧꨭꨝꨪꩀ ꨧꨯꨱꩃ ꨀꨗꩀ ꩞ ꨕꨀ ꨓꨟ ꨟꨮꨖꨪꩉ ꨣꨪꨢ ꨝꨵꨯꨱꩍ ꨚꨢꩀ ꩝ ꨀꨨꩉ ꨟꨮꨗꩃ ꨤꨯ ꨝꨳꩀ ꩝ ꨚꨓꨯꨱ ꨛꨯꨮ ꨝꨳ ꨧꨫ ꨓꨐꨫ ꩞ (꩕꩖꩖ – ꩕꩗꩐) ꨀꨟꨴꩀ ꨟꩍ ꨓꨓꩍ ꨁꩆꨓꩆ ꨧꨭ ꨚꨮꩉꨟꨮꨓ ꩝ ꨐꨭ ꨝ ꨚꨮꩉ ꨁꨗꨴ ꨚꨓꨴ ꩝ ꨗꨯꨱ ꨕꨫ ꨈꨴꨮꩇ ꨚꨤꨬ ꨗꨮꨈꩉ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨧꨫ ꨝꨪꨌꩆ ꩝ ꨕꨫ ꨆꩊ ꨀꨟꨴꩀ ꨝ ꨚꨮꩉ ꩝ ꨣꨪꨡꨫ ꨣꨪꨡꨲꩇ ꨅꩍ ꨔꨬ ꨓꨆ ꩞ ꨛꨩꨔꨮꨭ ꨢꨯꨱꩌ ꨧꨭꨗꨪꩅ ꨨꨗꨳꨪꩌ ꨕꨯꨮꨝꨪꨓ ꩝ ꨧꨴꨮꩍ ꨎꨳꨮꩃ ꨁꨗꨴ ꨚꨓꨴ ꩝ ꨓꨆꨯꨮ ꨛꨩꩀ ꨚꨵꨭꩍ ꨗꨮꨈꩉ ꩞ ꨤꨪꨝꨪꩀ ꨓꨮꩊ ꨀꨗꨪꩅ ꨣꨘꩌ ꨋꩇ ꨧ ꨓꨳꩆ ꩝ ꨡꨮꩃ ꨀꨊꨶꨬ ꨕꨫ ꨣꨳꨪꩌ ꨚꨆꩉ ꩝ ꨧꨭꨟꨭ ꨧꨯꨱꩃ ꨢꩃ ꨁꨗ ꩞ ꨕꨯꨮꨝꨪꨧꨴꨮꩍ ꨝꨴꨬ ꨧꨭꨗꨪꩅ ꨤꨯ ꨟꨮꨕ ꩝ ꨧꨭꨗꨪꩅ ꨈꨪꨗꨴꨮꩍ ꨚꨴꨯꨱꩃ ꨚꨞ ꩝ ꨕꨫ ꨣꨳꨪꩌ ꨚꨆꩉ ꨨꨭ ꨀꨝꨪꩍ ꩞ (꩕꩗꩑ – ꩕꩗꩕) ꨈꨴꨮꩇ ꨚꨤꨬ ꨦꨴꨫ ꨚꨤꨳꨮꩃ ꨧꨭꨎꩃ ꨗꨮꨣꩍ ꩝ ꨝꨶꨯꩊ ꨧꨭꨞꩇ ꨚꨮꩃ ꨀꨝꨪꩍ ꩝ ꨕꨤꩌ ꨗꨮꨈꩉ ꨀꨶꨮꩆ ꨓꨝꨶꨯꩆ ꩞ ꨕꨯꩌ ꨘꩆ ꨚꨓꨯꨱ ꨚꨙꨮꩉ ꨋꩇ ꨟꨮꨖꨪꩉ ꩝ ꨕꨀ ꨀꨝꨪꩍ ꨈꨴꨮꩇ ꨆꨭꨟꨶꨯꩆ ꩝ ꨟꨮꨗꩃ ꨀꨨꩉ ꨔꨯꨮꩅ ꨚꨢꩀ ꩞ ꨀꨠꩊ ꨚꨓꨳꩇ ꨡꨮꩃ ꨟꨮꨐꨭꩌ ꨓꨯꨱꩌ ꨔꨭꩆ ꩝ ꨁꨣꨯꨮꩋ ꨦꨗꨫ ꨕꨤꩌ ꨗꨮꨈꩉ ꩝ ꨤꨪꨆꨬ ꨆꨭꨟꨬ ꨔꨭꩀ ꨨꨓꨰ ꩞ ꨕꨯꩌ ꨘꩆ ꨟꩃ ꨁꨗꨴ ꨚꨓꨴ ꨆꨳꨮꩃ ꨝꨳꨰ ꩝ ꨀꨝꨪꩍ ꨀꨗꩀ ꨚꨓꨯꨱ ꨟꨰ ꩝ ꨚꨗꩍ ꨀꨆꨢꨮꩅ ꨝ ꨤꨪꨠꩍ ꩞ ꨚꨓꨯꨱ ꨛꨯꨮ ꨝꨳ ꨚꨗꨴꨯꨱꩃ ꨎꨝꨶꨯꩊ ꨈꨴꨮꩇ ꨕꨴꨬ ꩝ ꨁꨗꨴ ꨚꨓꨴ ꨧꨭꨗꨪꩅ ꨤꨯ ꨙꨬ ꩝ ꨚꨓꨯꨱ ꨛꨯꨮ ꨝꨳꨩ ꨧꨫ ꨀꨤꨪꩆ ꩞ (꩕꩗꩖ – ꩕꩘꩐) ꨈꨴꨮꩇ ꨕꨴꨬ ꨀꨗꩀ ꨚꨓꨯꨱ ꨅꩍ ꨇꨪꩆ ꩝ ꨚꨓꨯꨱ ꨟꩀ ꨟꩍ ꨀꨤꨪꩆ ꩝ ꨧꨭꨝꨪꩀ ꨧꨯꨱꩃ ꨈꨯꨱꩆ ꨝ ꨧꨭꨝꨪꩀ ꩞ ꨕꨯꩌ ꨘꩆ ꨁꨗꨴ ꨚꨓꨴ ꨛꨩꨣꨤꨯꨱ ꩝ ꨧꨭꨝꨪꩀ ꨧꨯꨱꩃ ꨝꨶꨯꩊ ꨧꨭ ꨞꩇ ꨗꨯꨱ ꩝ ꨧ ꨓꨳꩆ ꨥꨮꩀ ꨎꨶꨰ ꨝꨪꨖ ꩞ ꨓꨮꩊ ꨀꨝꨪꩍ ꨣꨧꨫ ꨚꨎꩆ ꨀꨟ ꨓꨨ ꩝ ꨚꨗꨴꨯꨱꩃ ꨎꨝꨶꨯꩊ ꨆꨭꨨꨴꨳꨫ ꨆꨭꨨꨴꨳ ꩝ ꨛꨯꨩꩀ ꨓꨈꨯꩀ ꨎꨳꨮꩃ ꨚꨓꨯꨱ ꩞ ꨔꨭꩀ ꨧꨳꩌ ꨕꨤꩌ ꨗꨮꨈꩉ ꨀꨶꨮꩆ ꨆꨵꨯꨱ ꩝ ꨁꨗꨴ ꨚꨓꨴ ꨎꨳꨮꩃ ꨚꨓꨯꨱ ꩝ ꨚꨆꨴꨮꩃ ꨗꨮꨈꩉ ꨧꨳꩌ ꨤꨪꨥꨪꩀ ꩞ ꨚꨤꨬ ꨗꨮꨈꩉ ꨚꨗꨴꨯꨱꩃ ꨎꨝꨶꨯꩊ ꨍꨪꩆ ꨝꨳꨰ ꩝ ꨛꨯꨩꩀ ꨧ ꨂꨣꩃ ꨚꨓꨴꨫ ꨦꨄꨰ ꩝ ꨎꨳꨮꩃ ꨛꨯꨮ ꨝꨳ ꨚꨆꨴꨮꩃ ꨗꨮꨈꩉ ꩞ (꩕꩘꩑) ꨛꨩꨔꨮꨭ ꨧꨭꨗꨪꩅ ꨕꨯꨮꨝꨪꨓ ꨦꨯꨮꩍ ꨟꨮꨤꨮꩃ ꩝ ꨨꨕꨳꨪꩇ ꨚꨧꩃ ꨀꨚꩆ ꩝ ꨓꨟꩆ ꨔꨭꩆ ꨧꨳꩌ ꨨꨣꨮꩍ ꩟