꩑꩞ ꨗꨪ ꨀꨣꨪꨢ ꨦꨄꨰ ꨋꩇ꩝ ꨚꨗꩍ ꨝꨩ ꨓꨝꨳꩀ꩝ ꨚꨳꨮꩍ ꨆꨩ ꨣꨩ ꨚꨮꩃ꩝꩝ ꩒꩞ ꨠꨢꨭꩅ ꨕꨴꨮꩍ ꨢꨮꨭ ꨗꨪ ꨀꨮꩈ ꨨꨤꨮꩃ꩝ ꨆꨮꨭ ꨋꩇ ꨝꨵꨯꨱꩍ ꨚꨕꨮꩃ꩝ ꨕꨯꩌ ꨀꨢꨠꩆ꩝꩝ ꩓꩞ ꨀꨗꨪꩅ ꨧꨯꨱꩃ ꨣꨘꩌ ꨆꨵꨯꨱꩍ ꨚꨴꨲꩆ꩝ ꨨꨆꨯꨮ ꨨꨭꨩ ꨕꨠꩆ꩝ ꨡꨮꩃ ꨧꨯꨱꩃ ꨀꨊꨶꨬ꩝꩝ ꩔꩞ ꨆꨮꨭ ꨨꨶꨮꩄ ꨆꨙꨩ ꨚꨌꨬ ꨚꨶꨮꩄ ꨧꨶꨬ꩝ ꨆꨵꩀ ꨆꨮꨭ ꨠꨓꨶꨬ꩝ ꨤꨶꨰ ꨚꨌꨤꩍ꩝꩝ ꩕꩞ ꨆꨮꨭ ꨅꨩ ꨆꨵꩀ ꨗꨰ ꨀꩍ꩝ ꨆꨮꨭ ꨨꨶꨮꩄ ꨌꨤꩍ꩝ ꨢꨶ ꨀꨟꨰꩀ ꨀꨠ꩝꩝ ꩖꩞ ꨨꨤꨮꩈ ꨓꨳꩆ ꨆꨮꨭ ꨚꨴꨯꨱꩃ ꨤꨯꨩ ꨆꨩ ꨨꨲꨩ꩝ ꨀꨟꨰꩀ ꨧꨯꨱꩃ ꨀꨟꨩ꩝ ꨆꨮꨭ ꨙꨶ ꨧꨩ ꨈꩍ꩝꩝ ꩗꩞ ꨌꨬ ꨤꨮꩈ ꨆꨮꨭ ꨝꨳꨪ ꨢꨮꨭ ꨗꨪ ꨝꨰꩀ ꨀꩍ꩝ ꨔꨮꩆ ꨕꨴꨬ ꨣꨡꩍ꩝ ꨅꨩ ꨝꨪꩀ ꨚꨢꨮꨭ꩝꩝ ꩘꩞ ꨀꨕꨬ ꨤꨮꩈ ꨀꨟꨰꩀ ꨀꨟ ꨆꨯꨮꨩ ꨔꨮꨭ꩝ ꨆꨮꨭ ꨌꨳꨪꩇ ꨙꨶꨩ ꨟꨤꨭꨥ꩝ ꨈꨮꩇ ꨈꩆ ꨣꨩ ꨆꨵꨯꨱ꩝꩝ ꩙꩞ ꨈꨮꩇ ꨈꩆ ꨣꨩ ꨆꨵꨯꨱ ꨓꨯꩀ ꨨꨓꨰ꩝ ꨆꨮꨭ ꨎꨶꩀ ꨧꨩ ꨓꨆꨰ꩝ ꨓꨟ ꨝꨪꨗꨪ꩝꩝ ꩑꩐꩞ ꨧꩃ ꨧꨶꨮꩉ ꨁꨗꨈꨪꨣꩈ ꨆꨯꨱꩃ ꨕꩊ꩝ ꨆꨎꩃ ꨝꨪ ꨓꨮꩊ꩝ ꨆꨮꨭ ꨌꨰꩀ ꨧꨩ ꨈꩍ꩝꩝ ꩑꩑꩞ ꨧꩃ ꨧꨶꨮꩉ ꨠꨣꨳꩍ ꨧꨳꩌ ꨙꨬ꩝ ꨆꨮꨭ ꨙꨶꨮꩄ ꨓꨶꨬ ꨤꨪꨆꨬ꩝ ꨆꨵꩀ ꨀꨟꨰꩀ ꨀꨟꨩ꩝꩝ ꩑꩒꩞ ꨚꨌꨬ ꨤꨮꩈ ꨟꨢꩍ ꨠꨓꨰ ꨆꨮꨭ ꨗꨪ꩝ ꨨꨲꨩ ꨋꩇ ꨚꨖꨪ꩝ ꨝꨰꩀ ꨨꨰ ꨆꨩ ꨆꨮꨭ꩝꩝ ꩑꩓꩞ ꨟꨢꩍ ꨚꨖꨫ ꨝꩀ ꨆꨵꨮꨭ ꨝꩀ ꨚꨵꨭꩍ꩝ ꨕꨴꨮꩇ ꨀꩉ ꨨꨭꨩ ꨝꨭꩍ꩝ ꨚꨇꩅ ꨆꨩ ꨛꨯꨮ꩝꩝ ꩑꩔꩞ ꨀꨗꨪꩅ ꨧꨯꨱꩃ ꨣꨘꩌ ꨚꨴꨯꨱꩃ ꨤꨯꨩ꩝ ꨤꨪꨆꨮꨭ ꨖꨮꩉ ꨕꨫ ꨛꨯꨮ꩝ ꨓꨯꨱꩌ ꨧꨩ ꨀꨗꨪꩍ꩝꩝ ꩑꩕꩞ ꨆꨨꨵꨯꨱꩌ ꨓꨳꩆ ꨕꨨꨵꩀ ꨆꨵꨯꨱꩍ ꨨꨌꨪꩍ꩝ ꨓꨯꨱꩌ ꨧꨩ ꨀꨗꨪꩍ꩝ ꨆꨵꨯꨱꩃ ꨔꨮꨭ ꨆꨩ ꨛꨯꨮ꩝꩝ ꩑꩖꩞ ꨀꨗꨪꩅ ꨧꨯꨱꩃ ꨣꨘꩌ ꨚꨴꨯꨱꩃ ꨤꨯꨩ꩝ ꨤꨪꨆꨮꨭ ꨖꩉ ꨕꨫ ꨛꨯꨮ꩝ ꨕꨴꨮꩇ ꨅꨩ ꨧꨤꨪꩍ꩝꩝ ꩑꩗꩞ ꨚꨗꨶꨮꩄ ꨙꨯꩌ ꨓꨆꨪꩀ ꨎꨳꨮꩃ ꨣꨤꨯꨩ꩝ ꨁꨗꨩ ꨆꨮꨭ ꨚꨤꨶꨮ꩝ ꨆꨯꨮ ꨙꨯꩌ ꨓꨚꩀ꩝꩝ ꩑꩘꩞ ꨂꨣꩃ ꨙꨯꩌ ꨁꨗꨩ ꨚꨮꩃ ꨝꨳꩀ꩝ ꨁꨗꨩ ꨨꨟꨪꩅ ꨚꩀ꩝ ꨃꨥ ꨟꨰ ꨓꨐꨪ꩝꩝ ꩑꩙꩞ ꨨꨟꨪꩅ ꨕꨫ ꨂꨣꩃ ꨙꨯꩌ ꨢꨮꨭ ꨗꨫ꩝ ꨨꨲꨩ ꨇꩇ ꨕꨫ ꨤꨪꨆꨬ꩝ ꨀꨗꨪꩅ ꨝꨗꨪ꩝꩝ ꩒꩐꩞ ꨨꨝꨳꨮꩆ ꨟꩃ ꨁꨗꨩ ꨡꨯꩍ ꨣꨬ꩝ ꨆꨮꨭ ꨙꨯꩌ ꨧꨯꨱꩃ ꨤꨪꨆꨬ꩝ ꨚꨯꨱꩍ ꨀꨶꩆ ꨕꨨꨵꩀ꩝꩝ ꩒꩑꩞ ꨕꨨꨵꩀ ꨙꨯꩌ ꨁꨗꨩ ꨚꨮꩃ ꨝꨳꩀ꩝ ꨁꨗꨩ ꨅꨩ ꨓꨚꩀ꩝ ꨝꨵꨯꨱꩍ ꨃꨥ ꨓꨐꨪ꩝꩝ ꩒꩒꩞ ꨕꨮꩇ ꨕꨫ ꨁꨗꨩ ꨗꨯꨱ ꨣꨬ꩝ ꨡꨯꩍ ꨢꨮꨭ ꨀꨕꨬ꩝ ꨌꨬ ꨟꨰ ꨀꨇꩆ꩝꩝ ꩒꩓꩞ ꨘꩆ ꨎꨮꩍ ꨆꨮꨭ ꨣꨭꨥ ꨕꨫ ꨓꨳꩆ꩝ ꨈꨴꨭꩀ ꨆꨴꨭꩃ ꨆꨮꨭ ꨞꨳꩆ꩝ ꨥꨮꩉ ꨗꨯꨱ ꨀꨝꨪꩍ꩝꩝ ꩒꩔꩞ ꨓꨟꨩ ꨧꩃ ꨆꨮꨭ ꨝꩍ ꨌꨳꨮꨥ ꨙꨪꩍ꩝ ꨨꨕꩉ ꨆꨩ ꨤꨪꨚꨪꩍ꩝ ꨨꨯꨱꩀ ꨀꨳꨩ ꨟꨓꨩ꩝꩝ ꩒꩕꩞ ꨚꨌꨬ ꨆꨮꨭ ꨌꨳꨪꩇ ꨕꨫ ꨧꨘꩍ ꨅꨩ ꨓꨴꨩ꩝ ꨟꨢꩍ ꨔꨶꩀ ꨢꨥꨩ꩝ ꨅꨩ ꨀꨝꨪꩍ ꨣꨆꩀ꩝꩝ ꩒꩖꩞ ꨚꨔꨯꨩ ꨝꨀꩉ ꨝꨵꨯꨱꩍ ꨚꨓꨯꨱꩀ꩝ ꨡꨭꩅ ꨥꩀ ꨚꨘꩍ꩝ ꨓꨶꨬ ꨀꨣꨪꨢꨩ꩝꩝ ꩒꩗꩞ ꨆꨴꩀ ꨓꨭꩀ ꨁꨗꨩ ꨙꨪꩍ ꨎꨶꨩ꩝ ꨥꨮꩈ ꨎꨭꩀ ꨈꨪꨤ꩝ ꨝꨵꨯꨱꩍ ꨗꨯꨱ ꨣꨪꨥꨮꩃ꩝꩝ ꩒꩘꩞ ꨆꨮꨭ ꨗꨯꨱ ꨡꨯꩍ ꨚꨌꨬ ꨙꨪꩍ ꨎꨶꨩ꩝ ꨨꨯꨱꩀ ꨀꨳꨩ ꨟꨓ꩝ ꨕꨶꨪꩋ ꨕꨫ ꨨꨈꨰꩅ꩝꩝ ꩒꩙꩞ ꨓꨟꨩ ꨓꩊ ꨕꨭꩀ ꨌꨬ ꨙꨪꩍ꩝ ꨆꨮꨭ ꨚꨯꩀ ꨌꨬ ꨀꨤꨪꩍ꩝ ꨝꨵꨯꨱꩍ ꨌꨴꨯꩃ ꨊꨯꨱꩀ ꨜꨩ꩝꩝ ꩓꩐꩞ ꨈꨭꩀ ꨕꨫ ꨀꨆꨯꨱꩀ ꨟꨰ ꨨꨳꨩ꩝ ꨨꨯꨱꩀ ꨀꨳꨩ ꨟꨓꨩ꩝ ꨆꨮꨭ ꨒꨮꩇ ꨚꨌꨬ꩝꩝ ꩓꩑꩞ ꨚꨌꨬ ꨤꨮꩈ ꨆꨮꨭ ꨀꨮꩀ ꨕꨫ ꨤꨪꨧꨬ ꨧꨯꨱꩃ ꨀꨳꨩ꩝ ꨆꨮꨭ ꨀꨮꩀ ꨕꨫ ꨨꨤꨩ꩝ ꨓꨮꩊ ꨝꩀ ꨝꨪꨤꩆ꩝꩝ ꩓꩒꩞ ꨁꨆꩀ ꨓꨳꩆ ꨕꨨꨵꩀ ꨕꨯꨱꩀ ꨌꩃ꩝ ꨣꨭꨥ ꨤꨯꨩ ꨕꨫ ꨓꨳꩆ꩝ ꨌꨬ ꨆꨮꨭ ꨨꨆꨪꩀ꩝꩝ ꩓꩓꩞ ꨧꨩ ꨇꨪ ꨚꨌꨬ ꨆꨮꨭ ꨣꨶꩀ꩝ ꨣꨰꩈ ꨣꨭꩇ ꨕꨨꨵꩀ꩝ ꨢꨯꨱꩌ ꨙꨮꨩ ꨌꨙꨳꨮꩃ꩝꩝ ꩓꩔꩞ ꨈꨶꨮꩆ ꨝꨩ ꨤꨪꨧꨬ ꨟꨰ ꨨꨶꩀ꩝ ꨨꨕꨮꩉ ꨟꨰ ꨓꨔꨶꩀ꩝ ꨔꨴꨰꩈ ꨀꨳꨩ ꨟꨓꨩ꩝꩝ ꩓꩕꩞ ꨥꩃ ꨈꨴꨭꩀ ꨕꨨꨵꩀ ꨕꨯꨱꩀ ꨨꨳꨩ꩝ ꨀꨮꩈ ꨎꨭꩀ ꨈꨪꨤ꩝ ꨅꨩ ꨕꨴꨮꩍ ꨢꨮꨭ ꨂꨣꩃ꩝꩝ ꩓꩖꩞ ꨚꨯꩀ ꨡꨶꨮꩆ ꨆꨩ ꨛꨯꨮ ꨝꨰꩀ ꨣꨬ꩝ ꨚꨡꨶꨮꩆ ꨆꨩ ꨚꨌꨬ꩝ ꨧꨩ ꨎꩌ ꨆꨠꩃ꩝꩝ ꩓꩗꩞ ꨆꨮꨭ ꨚꨯꩀ ꨡꨶꨮꩆ ꨕꨫ ꨈꨴꨮꩇ ꨢꩃ꩝ ꨓꨟꨳꨩ ꨕꨫ ꨡꨤꩃ꩝ ꨧꨩ ꨕꨴꨬ ꨚꨝꨰꩈ꩝꩝ ꩓꩘꩞ ꨅꨩ ꨆꩆ ꨆꨵꨯꨱꩃ ꨋꩇ ꨆꨩ ꨔꨴꨰꩈ꩝ ꨧꨩ ꨕꨴꨬ ꨚꨝꨰꩈ꩝ ꨚꨇꩅ ꨆꨩ ꨛꨯꨮ꩝꩝ ꩓꩙꩞ ꨤꨪꨆꨮꨭ ꨝꨰꩀ ꨆꨎꩇ ꨆꨣꨯꨩ꩝ ꨤꨪꨆꨮꨭ ꨧꨶꩆ ꨕꨫ ꨛꨯꨮ꩝ ꨕꨴꨮꩇ ꨅꨩ ꨕꨟꩆ꩝꩝ ꩔꩐꩞ ꨨꨟꨪꩅ ꨤꩄ ꨌꨬ ꨨꨭꨩ ꨚꨴꨲꩆ꩝ ꨟꩃ ꨓꨳꩆ ꨤꨪꨗꩃ꩝ ꨇꨪꩆ ꨗꨯꨱ ꨣꨪꨥꨮꩃ꩝꩝ ꩔꩑꩞ ꨚꨝꩍ ꨡꨮꩃ ꨁꨗꨩ ꨌꨭꩀ ꨓꨰꩀ꩝ ꨕꨶꨪꩋ ꨕꨫ ꨨꨈꨰꩅ꩝ ꨝꨵꨯꨱꩍ ꨟꨰ ꨧꨩ ꨕꨴꨬ꩝꩝ ꩔꩒꩞ ꨨꨕꨮꩉ ꨆꨴꨭꩃ ꨚꨗꨶꨮꩄ ꨨꨆꨬ꩝ ꨨꨎꨳꨮꩃ ꨟꨰ ꨧꨩ ꨕꨴꨬ꩝ ꨓꨭꩀ ꨆꨴꨲꩍ ꨠꨤꩌ꩝꩝ ꩔꩓꩞ ꨤꨪꨆꨮꨭ ꨕꨴꨬ ꨕꨫ ꨌꨬ ꨗꨯꨱ ꨧꩃ꩝ ꨣꨪꨟꨯꨱꩃ ꨕꨯꨱꩀ ꨚꨈꨴꩃ꩝ ꨕꨫ ꨆꨴꨲꩍ ꨎꨤꩆ꩝꩝ ꩔꩔꩞ ꨕꨨꨵꩀ ꨕꨴéꨥ ꨣꨪꨟꨯꨱꩃ ꨍꨯꨮꩅ ꨗꨯꨱ꩝ ꨨꨙꨯꨱꩍ ꨕꨫ ꨀꨥ꩝ ꨀꨶꩀ ꨀꨳꨩ ꨟꨓꨩ꩝꩝ ꩔꩕꩞ ꨚꨤꨰꩀ ꨆꨵꨯꨱꩆ ꨕꨨꨵꩀ ꨕꨯꨱꩀ ꨨꨳ꩝ ꨣꨪꨟꨯꨱꩃ ꨟꨰ ꨓꨜꨳꨩ꩝ ꨆꨯꨮ ꨡꨯꩍ ꨧꨩ ꨈꨵꨮꩃ꩝꩝ ꩔꩖꩞ ꨘꩆ ꨟꩃ ꨁꨗꨩ ꨚꨮꩍ ꨝꨡꨮꩃ꩝ ꨕꨨꨵꩀ ꨕꨯꨱꩀ ꨈꨙꨮꩃ꩝ ꨝꨵꨯꨱꩍ ꨤꨶꨩ ꨓꨟꨩ꩝꩝ ꩔꩗꩞ ꨗꨯꨱ ꨟꨪꩆ ꨅꨩ ꨆꨩ ꨓꨮꩊ ꨕꨭꩀ꩝ ꨀꨟꨰꩀ ꨀꨟꨩ ꨝꨓꨭꩀ꩝ ꨃꨥ ꨟꨰ ꨓꨐꨪ꩝꩝ ꩔꩘꩞ ꨨꨲꨩ ꨗꨯꨱ ꨓꨯꨱ ꨝꨳꨮꩆ ꨗꨪ꩝ ꨕꨨꨵꩀ ꨀꨗꨰꩍ ꨧꨣꨪ꩝ ꨤꩄ ꨗꨯꨱ ꨠꨀꨪꩀ꩝꩝ ꩔꩙꩞ ꨘꩆ ꨟꩃ ꨧꨗꩃ ꨥꨮꩈ ꨜꨪꩀ꩝ ꨆꨮꨭ ꨀꨶꩍ ꨤꨯꨩ ꨤꨪꨊꨪꩀ꩝ ꨅꩍ ꨕꨶꨬ ꨚꨓꨯꨱꩌ꩝꩝ ꩕꩐꩞ ꨆꨮꨭ ꨀꨶꩍ ꨤꨯꨩ ꨆꨩ ꨧꨯꨱꩌ꩝ ꨐꨭ ꨕꨯꨱꩀ ꨚꨣꨯꨱꩃ꩝ ꨆꨮꨭ ꨕꨫ ꨁꨗꨩ꩝꩝ ꩕꩑꩞ ꨓꨳꩆ ꨆꨮꨭ ꨓꨴꩀ ꨤꨯꨩ ꨆꨩ ꨨꨲꨩ꩝ ꨨꨶꩀ ꨅꨩ ꨓꨟꨩ꩝ ꨙꨪꩍ ꨎꩃ ꨅꨩ ꨥꨮꩉ꩝꩝ ꩕꩒꩞ ꨟꨤꩌ ꨙꨪꩍ ꨧꨩ ꨓꨭꩀ ꨟꨪꩆ ꨥꨮꩉ꩝ ꨕꨯꩌ ꨕꨯꨱꩀ ꨨꨕꨮꩉ꩝ ꨓꨮꩊ ꨎꨭꩀ ꨈꨪꨤ꩝꩝ ꩕꩓꩞ ꨆꨴꩀ ꨓꨭꩀ ꨁꨗꨩ ꨙꨪꩍ ꨎꨶꨩ꩝ ꨆꨮꨭ ꨤꨶꨩ ꨙꨪꩀ ꨚꨈꨩ꩝ ꨟꨰ ꨝꨵꨯꨱꩍ ꨓꨟꨩ꩝꩝ ꩕꩔꩞ ꨚꨝꩍ ꨡꨮꩃ ꨣꨩ ꨇꨪꩀ ꨕꨶꨩ ꨈꩍ꩝ ꨀꨮꩈ ꨎꨭꩀ ꨣꨡꩍ꩝ ꨌꨳꨪꩇ ꨕꨫ ꨟꨓꨰ꩝꩝ ꩕꩕꩞ ꨈꨶꨮꩆ ꨓꨳꩆ ꨦꨄꨰ ꨆꨳꨮꩃ ꨟꨰ꩝ ꨟꨢꩍ ꨤꩄ ꨟꨓꨰ꩝ ꨙꨪꩍ ꨧꨩ ꨤꨭꨝꩃ꩝꩝ ꩕꩖꩞ ꨨꨤꨬ ꨤꨶꨰ ꨆꨮꨭ ꨌꨳꨪꩇ ꨟꨓꨰ꩝ ꨨꨤꨬ ꨆꨩ ꨆꨗꨰ꩝ ꨓꨳꩆ ꨆꨮꨭ ꨅꨩ ꨆꨵꩀ꩞꩝꩝ ꩕꩗꩞ ꨟꨓꨰ ꨗꨰ ꨆꨮꨭ ꨈꨮꩌ ꨓꨒꩀ꩝ ꨟꨢꩍ ꨆꨮꨭ ꨆꨵꩀ꩝ ꨌꩃ ꨛꨯꨮ ꨤꨪꨊꨪꩀ꩝꩝ ꩕꩘꩞ ꨀꨕꨬ ꨤꨮꩈ ꨌꨳꨪꩇ ꨕꨫ ꨁꨗꨩ ꨝꨰꩀ ꨣꨬ꩝ ꨌꨳꨪꩇ ꨕꨫ ꨨꨥꨬ꩝ ꨁꨗꨩ ꨀꨓꨯꨱꩃ꩝꩝ ꩕꩙꩞ ꨤꨟꨩ ꨡꨰꩀ ꨨꨥꨬ ꨎꨯꨱꩍ ꨣꨯꨱꩃ꩝ ꨁꨗꨩ ꨆꨮꨭ ꨀꨓꨯꨱꩃ꩝ ꨈꨪꨣꩀ ꨕꨫ ꨈꨮꩃ꩝꩝ ꩖꩐꩞ ꨈꨪꨣꩀ ꨝꨵꨯꨱꩍ ꨧꨯꨱꩌ ꨙꨶꨮꩄ ꨟꨰ꩝ ꨧꨯꨱꩌ ꨘꩆ ꨕꨰ꩝ ꨝꨵꨯꨱꩍ ꨐꨭꨩ ꨤꨪꨆꨮꨭ꩝꩝ ꩖꩑꩞ ꨋꩇ ꨆꨳꨮꩃ ꨆꨩ ꨆꨮꨭ ꨟꨤꨭꨥ꩝ ꨧꨩ ꨇꨪ ꨕꨨꨵꨮꨭ꩝ ꨆꨮꨭ ꨅꩍ ꨓꨚꩀ꩝꩝ ꩖꩒꩞ ꨌꨘꩀ ꨡꨭꩀ ꨁꨗꨩ ꨆꨮꨭ ꨢꨶꩀ꩝ ꨁꨗꨩ ꨆꨮꨭ ꨈꨣꩀ꩝ ꨕꨫ ꨈꨮꩃ ꨆꨓꨭꩊ꩝꩝ ꩖꩓꩞ ꨨꨙꨯꨱꩍ ꨕꨫ ꨨꨥꨬ ꨟꨰ ꨓꨕꩀ꩝ ꨨꨙꨯꨱꩍ ꨕꨫ ꨨꨣꨰꩀ꩝ ꨁꨆꩀ ꨕꨫ ꨓꨆꨶꨰ꩝꩝ ꩖꩔꩞ ꨁꨆꩀ ꨝꨵꨯꨱꩍ ꨁꨗꨩ ꨅꩍ ꨤꨶꨰ꩝ ꨀꨟꨩ ꨀꨟꨰꩀ ꨚꨓꨮꩈ꩝ ꨆꨮꨭ ꨕꨫ ꨚꨙꨳꩀ꩝꩝ ꩖꩕꩞ ꨀꨧꩍ ꨙꨥ ꨀꨟꨩ ꨗꨯꨱ ꨨꨶꩀ꩝ ꨀꨟ ꨤꩄ ꨇꨪꩂ ꨓꩀ꩝ ꨝꨵꨯꨱꩍ ꨚꨟꨓꨰ꩝꩝ ꩖꩖꩞ ꨘꩆ ꨟꩃ ꨂꨣꩃ ꨙꨶꨮꩄ ꨟꨰ꩝ ꨨꨙꨯꨱꩍ ꨕꨫ ꨈꨰ꩝ ꨝꨵꨯꨱꩍ ꨆꨵꩀ ꨧꨩ ꨈꩍ꩝꩝ ꩖꩗꩞ ꨚꨌꨬ ꨤꨮꩈ ꨇꩌ ꨇꨯꨩ ꨕꨨꨵꩀ ꨤꨯꨩ ꨀꩍ꩝ ꨁꨗꨩ ꨚꨌꨤꩍ꩝ ꨆꨮꨭ ꨕꨫ ꨚꨌꨬ꩝꩝ ꩖꩘꩞ ꨘꩆ ꨎꨮꩍ ꨐꨭ ꨃꨥ ꨈꨴꨮꩇ ꨕꨴꨬ꩝ ꨀꨟꨩ ꨚꨯꨱꩍ ꨣꨬ꩝ ꨤꨮꩍ ꨇꩆ ꨀꨝꨪꩍ꩝꩝ ꩖꩙꩞ ꨀꨕꨬ ꨤꨮꩈ ꨟꨓꨰ ꨕꨫ ꨀꨗꨪꩍ ꨆꨴꨲꩍ ꨙꨪꩍ꩝ ꨨꨤꨬ ꨆꨩ ꨤꨪꨚꨪꩍ꩝ ꨓꨳꩆ ꨆꨮꨭ ꨅꨩ ꨆꨵꩀ꩝꩝ ꩗꩐꩞ ꨟꨓꨰ ꨗꨰ ꨆꨮꨭ ꨈꨮꩌ ꨆꨒꩀ꩝ ꨓꨳꩆ ꨆꨮꨭ ꨅꨩ ꨆꨵꩀ꩝ ꨀꨮꩈ ꨛꨯꨮ ꨤꨪꨊꨪꩀ꩝꩝ ꩗꩑꩞ ꨓꩊ ꨔꨭꩆ ꨨꨓꨰ ꨤꨶꩀ ꨜꨪꩀ꩝ ꨀꨓꨯꨱꩃ ꨥꩉ ꨚꨙꨪꩀ꩝ ꨚꨶꨮꩄ ꨥꩉ ꨟꨤꨭꨥ꩝꩝ ꩗꩒꩞ ꨀꨟꨩ ꨚꨯꨱꩍ ꨆꨗꨰ ꨥꨮꩀ ꨣꨬ꩝ ꨆꨮꨭ ꨗꨯꨱ ꨚꨯꩀ ꨀꨕꨬ꩝ ꨝꨵꨯꨱꩍ ꨚꩆ ꨀꨤꨩ꩝꩝ ꩗꩓꩞ ꨁꨗꨩ ꨚꨯꨱꩍ ꨧꨩ ꨡꨮꩃ ꨀꨲꩆ ꨆꨩ꩝ ꨦꨄꨰ ꨧꨰꩅ ꨚꨈꨩ꩝ ꨝꨵꨯꨱꩍ ꨗꨯꨱ ꨓꨤꨰꩍ꩝꩝ ꩗꩔꩞ ꨓꨤꨰꩍ ꨝꨵꨯꨱꩍ ꨆꨮꨭ ꨝꨴꨬ ꨇꩆ ꨡꨰꩀ꩝ ꨀꨕꨬ ꨙꨶꨮꩄ ꨝꨰꩀ꩝ ꨆꨮꨭ ꨌꨳꨪꩇ ꨀꨤꨩ꩝꩝ ꩗꩕꩞ ꨗꨪ ꨎꨮꩍ ꨟꨓꨰ ꨥꨮꩈ ꨌꨬ꩝ ꨟꨓꨰ ꨕꨫ ꨨꨥꨬ꩝ ꨁꨗꨩ ꨆꨮꨭ ꨀꨓꨯꨱꩃ꩝꩝ ꩗꩖꩞ ꨤꨪꨟ ꨡꨰꩀ ꨨꨥꨬ ꨎꨯꨱꩍ ꨣꨯꨱꩃ꩝ ꨨꨙꨯꨱꩍ ꨈꩉ ꨎꨯꨱꩃ꩝ ꨚꨯꨱꩍ ꨈꩆ ꨀꨆꨯꨱꩀ꩝꩝ ꩗꩗꩞ ꨀꨟꨰꩀ ꨡꨯꩍ ꨢꨮꨭ ꨘꩆ ꨨꨳꨩ ꨌꨯꨱꩀ꩝ ꨣꨚꨮꩀ ꨕꨫ ꨀꨆꨯꨱꩀ꩝ ꨡꨯꩍ ꨕꨯꩌ ꨕꨣꩍ꩝꩝ ꩗꩘꩞ ꨟꨪꩀ ꨥꨩ ꨣꨩ ꨟꨰ ꨕꨯꨱꩃ ꨀꩍ꩝ ꨣꨩ ꨟꨰ ꨕꨯꨱꩃ ꨚꨆꨵꩍ꩝ ꨟꨮꩈ ꨙꨶꨮꩄ ꨓꨝꨳꩀ꩝꩝ ꩗꩙꩞ ꨙꨶꨮꩄ ꨗꨯꨱ ꨓꨐꨪ ꨟꨪꩀ ꨥꨩ꩝ ꨡꨯꩍ ꨞꨣꨴꨪꨢꨩ꩝ ꨆꨮꨭ ꨗꨯꨱ ꨚꩀ ꨨꨤꨬ꩝꩝ ꩘꩐꩞ ꨂꨣꩃ ꨓꨐꨪ ꨆꨂꩀ ꨥꨮꩀ ꨣꨬ꩝ ꨡꨯꩍ ꨕꨯꩌ ꨌꨗꨭꨩ ꨨꨥꨬ꩝ ꨁꨗꨩ ꨐꨭꨩ ꨀꨓꨯꨱꩃ꩝꩝ ꩘꩑꩞ ꨕꨣꩍ ꨔꨴꨰꩈ ꨕꨫ ꨣꨭꩇ ꨤꨯꨩ ꨙꨬ꩝ ꨆꨵꩍ ꨗꩍ ꨅꨩ ꨝꨴꨬ꩝ ꨆꨮꨭ ꨓꨯꨱꩌ ꨚꨌꨬ꩝꩝ ꩘꩒꩞ ꨗꨪ ꨎꨮꩍ ꨌꨗꨭꨩ ꨨꨥꨬ꩝ ꨀꨗꨪꩅ ꨣꨭꩇ ꨚꨌꨬ꩝ ꨣꨰꩈ ꨣꨭꩇ ꨕꨨꨵꩀ꩝꩝ ꩘꩓꩞ ꨂꨣꩃ ꨟꩀ ꨤꨪꨧꨬ ꨟꨰ ꨨꨶꩀ꩝ ꨟꨢꩍ ꨧꨪ ꨀꨆꩀ꩝ ꨢꨯꨱꩌ ꨧꨩ ꨌꨥꩆ꩝꩝ ꩘꩔꩞ ꨥꨮꩉ ꨈꨵꨰ ꨕꨨꨵꩀ ꨥꨮꩈ ꨥꨩ꩝ ꨡꨯꩍ ꨞꨣꨴꨪꨢꨩ꩝ ꨆꨮꨭ ꨥꨮꩀ ꨚꩀ ꨨꨤꨬ꩝꩝ ꩘꩕꩞ ꨡꨯꩍ ꨧꨩ ꨂꨣꩃ ꨆꨟꨬ꩝ ꨅꩍ ꨨꨭꨩ ꨇꩆ ꨀꨥ ꨕꨫ ꨕꨴꨬ꩝ ꨨꨳꨩ ꨗꨯꨱ ꨚꩀ ꨊꨯꨱꩀ꩝꩝ ꩘꩖꩞ ꨗꨯꨱ ꨡꨯꩍ ꨚꨗꨰ ꨕꨯꨱꩀ ꨨꨳꨩ꩝ ꨀꨤꨩ ꨜꨭꩆ ꨨꨣꨩ꩝ ꨓꨓꨮꩈ ꨣꨡꩍ꩝꩝ ꩘꩗꩞ ꨟꩃ ꨆꩊ ꨝꩆ ꨧꨩ ꨆꨀꨪꩂ ꨘꩌ ꨝꨵꩍ꩝ ꨂꨣꩀ ꨗꨪ ꨣꨡꩍ꩝ ꨇꩆ ꨓꨰꩀ ꨕꨫ ꨕꨴꨬ꩝꩝ ꩘꩘꩞ ꨂꨣꩀ ꨗꨪ ꨆꨮꨭ ꨕꨯꨱꩀ ꨟꨓꨶꨬ ꨣꨬ꩝ ꨆꨮꨭ ꨌꨳꨪꩇ ꨡꨮꩃ ꨨꨝꨬ꩝ ꨧꨯꨱꩃ ꨡꨴꨰ ꨟꨓꩍ꩝꩝ ꩘꩙꩞ ꨨꨤꨬ ꨔꩆ ꨕꨨꨵꩀ ꨣꨪꨡꩍ꩝ ꨕꨯꩌ ꨌꨗꨭꨩ ꨧꨯꨱꩃ ꨕꨣꩍ꩝ ꨁꨗꨩ ꨆꨮꨭ ꨀꨓꨯꨱꩃ꩝꩝ ꩙꩐꩞ ꨎꨟꨯꨱꩀ ꨆꨰꩀ ꨆꨮꨭ ꨚꩍ ꨕꨫ ꨣꨯꨱꩃ꩝ ꨨꨕꨮꩉ ꨨꨰ ꨨꨕꨯꩌ꩝ ꨇꩌ ꨇꨯꨩ ꨣꨡꩍ꩝꩝ ꩙꩑꩞ ꨕꨨꨵꩀ ꨝꨳꨪ ꨢꨮꨭ ꨗꨪ ꨝꨰꩀ ꨀꩍ꩝ ꨔꩆ ꨕꨴꨬ ꨣꨪꨡꩍ꩝ ꨕꨯꩌ ꨔꨭꩆ ꨟꩃ ꨗꨪ꩝꩝ ꩙꩒꩞ ꨨꨆꨯꨮ ꨨꨭꨩ ꨆꨮꨭ ꨞꨳꩆ ꨢꨮꨭ ꨗꨪ꩝ ꨟꨢꨭꩅ ꨧꨯꨱꩃ ꨣꨡꨪ꩝ ꨓꨓꨮꩈ ꨧꨩ ꨕꨴꨬ꩝꩝ ꩙꩓꩞ ꨕꨨꨵꩀ ꨝꨳꨪ ꨢꨮꨭ ꨗꨪ ꨝꨰꩀ ꨌꨬ꩝ ꨕꨶꩍ ꨆꨤꨬ ꨨꨝꨬ꩝ ꨡꨮꩃ ꨓꨶꨬ ꨤꨪꨚꨩ꩝꩝ ꩙꩔꩞ ꨆꩊ ꨕꨯꨮꩍ ꨤꨪꨧꨬ ꨡꨯꩃ ꨁꨆꩆ ꨕꨣꨬ꩝ ꨂꨣꩀ ꨗꨪ ꨨꨝꨬ꩝ ꨡꨮꩃ ꨧꨯꨱꩃ ꨧꨣꨩ꩝꩝ ꩙꩕꩞ ꨧꨗꩃ ꨟꨰ ꨕꨫ ꨈꨴꨮꩇ ꨀꨖꨶꨩ꩝ ꨓꨒꨯꨱꩍ ꨀꨳꨩ ꨟꨓꨩ꩝ ꨕꨫ ꨜꨭꩆ ꨨꨝꨬ꩝꩝ ꩙꩖꩞ ꨨꨭꨩ ꨨꨆꨯꨮ ꨞꨳꩆ ꨢꨮꨭ ꨗꨪ ꨥꨮꩈ ꨌꨬ꩝ ꨆꨤꨬ ꨨꨝꨬ꩝ ꨡꨮꩃ ꨓꨶꨬ ꨣꨡꩍ꩝꩝ ꩙꩗꩞ ꨆꨮꨭ ꨡꨶꩍ ꨆꩊ ꨆꨩ ꨥꩀ ꨔꨯꨩ ꨀꩍ꩝ ꨆꨩ ꨔꩆ ꨆꨮꨭ ꨣꨪꨡꩍ꩝ ꨟꨰ ꨕꨯꨱꩀ ꨕꨫ ꨈꨵꨰ꩝꩝ ꩙꩘꩞ ꨨꨆꨯꨮ ꨈꨵꨰ ꨕꨨꨵꩀ ꨨꨭꨩ ꨞꨳꩆ꩝ ꨈꨮꩇ ꨈꩆ ꨂꨣꩃ꩝ ꨔꨭꩉ ꨌꨰꩀ ꨕꨫ ꨆꨮꨭ꩝꩝ ꩙꩙꩞ ꨕꨯꩌ ꨕꨯꨱꩀ ꨧꨗꩃ ꨝꨵꨯꨱꩍ ꨣꨭꨥ꩝ ꨨꨕꨮꩇ ꨧꨩ ꨣꨪꨝꨭꨥ꩝ ꨔꨭꩆ ꨓꨴ ꨅꨩ ꨥꨮꩉ꩝꩝ ꩑꩐꩐꩞ ꨆꨮꨭ ꨡꨶꩍ ꨆꩉ ꨤꨯ ꨆꨩ ꨧꨯꨱꩌ꩝ ꨁꨗꨩ ꨆꨮꨭ ꨈꨗꨯꨱꩃ꩝ ꨝꨵꨯꨱꩍ ꨓꨶꨮꩀ ꨨꨣꩀ꩝꩝ ꩑꩐꩑꩞ ꨤꩃ ꨧꨯꨱꩌ ꨂꨣꩃ ꨚꨮꩃ ꨝꨳꩀ꩝ ꨣꨩ ꨥꩃ ꨠꩀ ꨕꨨꨵꩀ꩝ ꨕꨫ ꨧꩃ ꨚꨌꨬ꩝꩝ ꩑꩐꩒꩞ ꨣꨩ ꨥꩃ ꨠꩀ ꨕꨨꨵꩀ ꨝꨩ ꨟꨰ꩝ ꨁꨗꨩ ꨚꨯꨱꩍ ꨟꨓꨰ꩝ ꨚꨙꩌ ꨀꨟꨴꨰꩀ꩝꩝ ꩑꩐꩓꩞ ꨚꨙꨪꩀ ꨧꨯꨱꩃ ꨓꨨꨭꨩ ꨈꨤꨩ ꨌꨴꨪꩍ꩝ ꨣꨥ ꨎꩃ ꨅꨩ ꨨꨌꨪꩍ꩝ ꨚꨴꨯꨮꨥ ꨃꨥ ꨤꨪꨊꨪꩀ꩝꩝ ꩑꩐꩔꩞ ꨓꨈꨯꩀ ꨕꨮꩃ ꨕꨨꨵꩀ ꨢꩌ ꨗꨯꨱ꩝ ꨓꨊꨪꩆ ꨚꩆ ꨕꨫ ꨀꨥ꩝ ꨀꨶꩀ ꨀꨳꨩ ꨟꨓꨩ꩝꩝ ꩑꩐꩕꩞ ꨁꨗꨩ ꨋꩇ ꨕꨫ ꨕꨨꨵꩀ ꨝꨳꩀ ꨙꩃ꩝ ꨈꨮꩇ ꨈꩆ ꨂꨣꩃ꩝ ꨎꩃ ꨅꨩ ꨀꨗꨪꩅ꩝꩝ ꩑꩐꩖꩞ ꨁꨗꨩ ꨀꨗꨪꩅ ꨕꨫ ꨝꨮꩉ ꨡꨯꩍ ꨡꨯꨱꩀ꩝ ꨀꨓꨯꨱꩃ ꨓꨴꨭꩍ ꨓꨤꨯꨱꩀ꩝ ꨣꨭꩇ ꨆꨮꨭ ꨆꨢꨶꨩ꩝꩝ ꩑꩐꩗꩞ ꨌꩌ ꨧꨯꨱꩃ ꨝꨗꨪ ꨧꨩ ꨀꨳꨩ꩝ ꨦꨄꨰ ꨧꨯꨱꩃ ꨈꨪꨤꨩ꩝ ꨚꨴꨯꨱꩃ ꨀꨗꨪꩅ ꨣꨘꩌ꩝꩝ ꩑꩐꩘꩞ ꨌꩌ ꨧꨯꨱꩃ ꨝꨗꨪ ꨆꨯꨮꨩ ꨆꩆ꩝ ꨟꨭꨩ ꨧꨩ ꨆꨣꩆ꩝ ꨀꨳꨩ ꨧꨩ ꨝꨤꨯꨱꩀ꩝꩝ ꩑꩐꩙꩞ ꨝꨤꨯꨱꩀ ꨤꩆ ꨆꨮꨭ ꨝꨵꨬ ꨕꨫ ꨤꨯꨱꨥ꩝ ꨝꨵꨬ ꨟꨰ ꨣꨪꨌꨯꨱꨥ꩝ ꨌꩌ ꨧꨯꨱꩃ ꨝꨗꨪ꩝꩝ ꩑꩑꩐꩞ ꨆꨮꨭ ꨗꨯꨱ ꨝꨵꨬ ꨝꨪꨀꩉ ꨜꨯꩀ ꨊꨯꨱꩀ꩝ ꨟꩀ ꨡꨭꩅ ꨚꨓꨯꨱꩀ꩝ ꨥꩀ ꨀꨣꨪꨢꨩ꩝꩝ ꩑꩑꩑꩞ ꨟꨓꨰ ꨗꨰ ꨆꨮꨭ ꨌꨭꩍ ꨆꨩ꩝ ꨆꨮꨭ ꨥꩀ ꨀꨣꨪꨢꨩ꩝ ꨚꨳꨮꩍ ꨆꨩ ꨣꨩ ꨈꨵꨮꩃ꩝꩝ ꩑꩑꩒꩞ ꨚꨎꨰꩍ ꨗꨰ ꨚꨎꨰꩍ ꨌꨳꨪꩌ ꨨꨮꩃ꩝ ꨌꨆꩀ ꨌꨳꨪꩌ ꨚꨙꩌ꩝ ꨣꨮꩇ ꨌꨯꨮꩃ ꨨꨈꩉ꩝꩝ ꩑꩑꩓꩞ ꨚꨎꨰꩍ ꨗꨰ ꨚꨎꨰꩍ ꨝꨪ ꨓꨮꩊ꩝ ꨣꨮꩇ ꨌꨮꩃ ꨨꨈꩉ꩝ ꨧꩃ ꨧꨶꨮꩉ ꨚꨓꨰꩍ꩝꩝ ꩑꩑꩔꩞ ꨌꨭꩍ ꨀꨮꩌ ꨚꨗꨰ ꨝꨳꩀ ꨤꨪꨈꨰꩍ꩝ ꨧꩃ ꨧꨶꨮꩉ ꨚꨓꨰꩍ꩝ ꨎꨴꨰ ꨡꨯꩃ ꨆꨮꨭ ꨤꨰꩀ꩝꩝ ꩑꩑꩕꩞ ꨚꨚꩆ ꨝꨯꨱꩃ ꨝꨀꨯꨱꩀ ꨚꨆꨰꩀ꩝ ꨚꨆꨯꩃ ꨟꨰ ꨚꨎꨰꩀ꩝ ꨐꨯꨱꩌ ꨀꨳꨩ ꨠꨣꨳꩀ꩝꩝ ꩑꩑꩖꩞ ꨨꨤꨩ ꨀꨌꩉ ꨌꨈꩀ ꨚꩀ ꨡꨰꩀ꩝ ꨚꨆꨯꨱꩃ ꨟꨰ ꨚꨎꨰꩀ꩝ ꨇꨪꩂ ꨝꨭꩍ ꨤꨪꨟꨯꨱꨥ꩝꩝ ꩑꩑꩗꩞ ꨌꨭꩍ ꨀꨮꩌ ꨀꨟꨰꩀ ꨀꨟꨩ ꨅꨩ ꨤꨯꨱꨥ꩝ ꨌꨆꩀ ꨝꨭꩍ ꨤꨪꨟꨯꨱꨥ꩝ ꨌꨳꨪꩌ ꨨꨮꩃ ꨠꨣꩃ꩝꩝ ꩑꩑꩘꩞ ꨌꨭꩍ ꨀꨮꩌ ꨚꨗꨰ ꨝꨳꩀ ꨙꩃ꩝ ꨝꨧꨰꩍ ꨚꩀ ꨣꨤꩃ꩝ ꨘꩌ ꨕꨴꨬ ꨆꨝꨥ꩝꩝ ꩑꩑꩙꩞ ꨌꨆꨯꨱꩃ ꨝꨯꨱꩃ ꨚꨗꨰ ꨝꨩ ꨗꨯꨱ꩝ ꨕꨨꨵꩀ ꨚꩆ ꨕꨫ ꨀꨥ꩝ ꨀꨶꩀ ꨀꨳꨩ ꨟꨓꨩ꩝꩝ ꩑꩒꩐꩞ ꨌꨭꩍ ꨀꨮꩌ ꨚꨗꨰ ꨆꨮꨭ ꨨꨳꨩ꩝ ꨆꨮꨭ ꨆꨵꩀ ꨀꨣꨪꨢꨩ ꨝꨵꨯꨱꩍ ꨍꨰꩅ ꨓꨟꨩ꩝꩝ ꩑꩒꩑꩞ ꨀꨚꨶꨬ ꨡꨮꩃ ꨀꨝꨪꩍ ꨈꨮꩌ ꨕꨶꨩ꩝ ꨀꨮꩈ ꨞꨣꨴꨪꨢꨩ꩝ ꨓꨳꩆ ꨆꨵꨯꨱꩍ ꨧꨯꨱꩃ ꨈꨮꩇ꩝꩝ ꩑꩒꩒꩞ ꨀꨮꩌ ꨚꨗꨰ ꨝꨵꨯꨱꩍ ꨝꨵꨰ꩝ ꨚꨖꨪ ꨕꨫ ꨈꨵꨰ꩝ ꨘꩌ ꨚꨯꩅ ꨀꨨꩉ꩝꩝ ꩑꩒꩓꩞ ꨓꨮꩊ ꨋꩇ ꨣꨩ ꨃꨥ ꨗꨰ ꨕꨨꨵꨮꨭ꩝ ꨚꨖꨪ ꨝꩀ ꨆꨵꨮꨭ꩝ ꨘꩆ ꨎꨮꩍ ꨕꨫ ꨈꨵꨰ꩝꩝ ꩑꩒꩔꩞ ꨋꩇ ꨝꨵꨯꨱꩍ ꨕꨫ ꨈꨵꨰ ꨟꨰ ꨧꩃ꩝ ꨕꨴꨬ ꨋꩆ ꨂꨣꩃ꩝ ꨟꨰ ꨓꨮꩊ ꨀꨝꨪꩍ꩝꩝ ꩑꩒꩕꩞ ꨟꨰ ꨓꨮꩊ ꨝꨧꨰꩍ ꨝꨩ ꨚꨤꨪꩍ꩝ ꨨꨤꨩ ꨀꨌꩉ ꨚꩀ ꨀꨕꨫꩍ꩝ ꨚꨮꩍ ꨝꨡꨮꩃ ꨚꨨꨩ꩝꩝ ꩑꩒꩖꩞ ꨘꩆ ꨟꩃ ꨝꨧꨰꩍ ꨓꨗꨴꨩ꩝ ꨚꨮꩍ ꨝꨡꨮꩃ ꨚꨨꨩ꩝ ꨝꨵꨯꨱꩍ ꨔꩄ ꨀꨝꨭꨥ꩝꩝ ꩑꩒꩗꩞ ꨌꨭꩍ ꨀꨮꩌ ꨚꨗꨰ ꨝꨵꨯꨱꩍ ꨝꨵꨰ꩝ ꨂꨣꩃ ꨝꨩ ꨎꨳꨯꨮꩆ ꨚꨕꨰ꩝ ꨧꨯꨱꩃ ꨟꩍ ꨚꨣꨳꩀ꩝꩝꩝