꩑ ꩞ ꨗꨰ ꨟꨰ ꨟꩃ ꨟꨆꩍ ꩝ ꨝꨵꨯꨱꩍ ꨓꨆꨰ ꨗꨰ ꨕꨮꩍ ꩝ ꨨꨣꨮꩀ ꨆꩍ ꨨꨣꨮꩀ ꨖꨬ ꩞ ꩒ ꩞ ꨗꨰ ꨗꨯꨱ ꨓꨮꩊ ꨚꨎꨰ ꩝ ꨟꩃ ꨤꩌꨊꨩ ꨚꨎꨰ ꩝ ꨗꨰ ꨎꨯꨱꩍ ꨀꨆꨯꨱꩀ ꨦꨮꩃ ꩞ ꩓ ꩞ ꨕꨣꩀ ꨕꨪꩍ ꨚꨭꩉ ꨥꩃ ꨓꨮꩊ ꩝ ꨣꨪꨢꩀ ꨨꩉ ꨨꩉ ꩝ ꨈꨪꨤꨰ ꨗꨰ ꨣꨢꨮꩌ ꨔꨳꨪꩇ ꩞ ꩔ ꩞ ꨥꨮꩈ ꨈꨪꨤꨰ ꨤꨢꩉ ꨣꨢꨮꩌ ꨔꨳꨪꩇ ꩝ ꨈꨪꨤꨰ ꨢꨮꨭ ꨆꨤꨮꩇ ꩝ ꨆꨴꨲꩍ ꨚꨭꨧꩀ ꨎꨤꨪꨕꨫ ꩞ ꩕ ꩞ ꨆꨯꨱꩃ ꨝꨩ ꨗꨰ ꨟꨤꨮꩃ ꨝꨪꨟꨫ ꩝ ꨗꨯꨱ ꨤꨪꨨꨪꩀ ꨕꨫ ꩝ ꨟꨓꨩ ꨌꨮꩀ ꨧꨭꨌꩉ ꩞ ꩖ ꩞ ꨥꨮꩈ ꨀꨳꨩ ꨓꨘꩍ ꨤꨨꨮꩌ ꨤꨨꨮꩌ ꩝ ꨟꩃ ꨝꩊ ꨌꨘꩉ ꩝ ꨥꨮꩀ ꨗꨯꨱ ꨨꨣꨮꩀ ꨆꩍ ꩞ ꩗ ꩞ ꨓꨗꨴꩆ ꨣꨪꨢꨩ ꨈꨵꨰ ꨈꨵꨯꨱꩃ ꨣꨥꩍ ꩝ ꨔꨮꩆ ꨀꨳꨩ ꨣꨡꩍ ꩝ ꨆꨯꨮꨩ ꨓꨥꩀ ꨓꨆꨰ ꨗꨰ ꩞ ꩘ ꩞ ꨕꨪꩍ ꨚꨭꩉ ꨧꨩ ꨝꨪꨊꨭꩀ ꨕꨴꨶꨰ ꩝ ꨥꩃ ꨈꨴꨭꩀ ꨕꨫ ꨓꨆꨰ ꩝ ꨕꨣꩀ ꨟꨎꨶꨩ ꩞ ꩙ ꩞ ꨤꨢꩉ ꨗꨰ ꨅꨩ ꨡꨯꩍ ꨓꨴꨩ ꩝ ꨌꨯꨱꩀ ꨀꨳꨩ ꨟꨓꨩ ꩝ ꨆꨮꨭ ꨝꨴꨰ ꨨꨚꨶꩀ ꩞ ꩑꩐ ꩞ ꨝꨳꨮꩉ ꨨꨣꨬ ꨓꨴꨭꩆ ꨚꨙꨳꩀ ꨆꨵꩀ ꩝ ꨡꨵꨯꨮꩃ ꨡꨵꨯꨮꩃ ꨝꨪꨊꨭꩀ ꨔꨰꩀ ꩝ ꨔꨭꨩ ꨤꨢꨮꨭ ꩞ ꩑꩑ ꩞ ꨌꨳꨪꩌ ꨟꨐꨫ ꨦꩇ ꨀꨮꨭꨥ ꨖꨭꨥ ꩝ ꨌꨳꨪꩌ ꨥꨮꩀ ꨚꨮꩉ ꨗꨯꨱ ꩝ ꨈꨪꨙꩃ ꨤꨊꨶꨬ ꨧꨩ ꨤꨪꨊꨪꩀ ꩞ ꩑꩒ ꩞ ꨀꨳꨩ ꨝꨪꨤꩆ ꨓꨴꨭꩆ ꨓꨚꨯꨮꩆ ꨓꨧꨪꩀ ꩝ ꨟꨓꨩ ꨡꨵꩀ ꨚꨪꩀ ꩝ ꨆꨮꨭ ꨥꨮꩀ ꨟꨰ ꨧꩃ ꩞ ꩑꩓ ꩞ ꨀꨧꨰꩍ ꨕꨴꨭꩇ ꨓꨆꨰ ꨕꨮꩃ ꨌꩃ ꩝ ꨟꨗꨶꨪꩋ ꨓꨴꩀ ꨓꨳꩆ ꩝ ꨀꨧꨰꩍ ꨆꨯꨮꨩ ꨒꨶꨮꩊ ꨒꩄ ꩞ ꩑꩔ ꩞ ꨀꨧꨰꩍ ꨕꨶꨩ ꨢꩌ ꨀꨧꨰꩍ ꨕꩄ ꩝ ꨚꨜꨭꩉ ꨅꨩ ꨤꩄ ꩝ ꨓꨇꨯꨱꩀ ꨅꨩ ꨝꨪꨌꩆ ꩞ ꩑꩕ ꩞ ꨕꨯꩌ ꨗꨯꨱ ꨕꨯꩌ ꨕꨭꩃ ꨕꨮꩃ ꩝ ꨕꨯꩌ ꨕꨯꨱꩀ ꨚꨮꩃ ꩝ ꨤꨪꨖꨶꨮꩆ ꨦꨮꩇ ꨣꨪꨢꩀ ꩞ ꩑꩖ ꩞ ꨣꩌ ꨈꨵꨰ ꨚꨌꨮꩃ ꨟꩃ ꨀꨘꩀ ꩝ ꨟꨯꨱꩃ ꨈꨪꨤꩄ ꨥꨮꩀ ꩝ ꨨꨤꨬ ꨡꨯꩍ ꨧꨈꨵꨮꩃ ꩞ ꩑꩗ ꩞ ꨀꨧꨰꩍ ꨗꨯꨱ ꨓꨮꩊ ꨝꨪꨌꩌ ꩝ ꨓꨆꨰ ꨕꨥꨫ ꨕꨥꨮꩊ ꩝ ꨀꨧꨰꩍ ꨗꨯꨱ ꨅꨩ ꨓꨴꨭꩍ ꩞ ꩑꩘ ꩞ ꨗꨫ ꨞꨭꩌꨟꨫ ꨕꨴꨬ ꨓꨤꨶꨪꩄ ꩝ ꨓꨚꨮꩃ ꨀꨉꨩ ꨓꨝꨶꨪꩄ ꩝ ꨈꨵꨰ ꨌꨮꩀ ꨔꨭꨩ ꨤꨢꨮꨭ ꩞ ꩑꩙ ꩞ ꨌꨳꨪꩌ ꨤꨮꩈ ꨨꨲꨩ ꨡꨯꩍ ꨗꨰ ꨆꨮꨭ ꩝ ꨛꨯꨩꩀ ꨢꩌ ꨗꨯꨱ ꩝ ꨝꨪꨤꨰ ꨗꨰ ꨤꨪꨓꨫ ꨤꨪꨓꨰꩍ ꩞ ꩒꩐ ꩞ ꨈꨪꨗꨭꩌ ꨤꨮꩈ ꨨꨲꨩ ꨡꨯꩍ ꨗꨰ ꨆꨮꨭ ꩝ ꨟꨓꨩ ꨗꨰ ꨍꨰ ꩝ ꨎꨪꩍ ꨀꨳꨩ ꨌꨴꨯꨱꩍ ꨎꨊꨰꩍ ꩞ ꩒꩑ ꩞ ꨢꩃ ꨝꨪꨤꩆ ꨤꨮꩈ ꨨꨩ ꨡꨯꩍ ꨗꨰ ꨆꨮꨭ ꩝ ꨡꨭꩀ ꨗꨰ ꨨꨊꨭꨥ ꩝ ꨨꨠꩄ ꨚꨮꩉ ꨚꩀ ꨕꨪꩍ ꩞ ꩒꩒ ꩞ ꨀꨧꨰꩍ ꨗꨯꨱ ꨓꨮꩊ ꨚꨤꨬ ꨌꨣꨰꩍ ꩝ ꨛꨯꨩꩀ ꨦꨮꩇ ꨨꨰꩍ ꩝ ꨀꨧꨰꩍ ꨎꨯꨱꩍ ꨀꨆꨯꨱꩀ ꨚꨜꨭꩉ ꩞ ꩒꩓ ꩞ ꨝꨪꨟꨯꩂ ꨛꨯꨮ ꨕꩌ ꨧꨭꨂꩍ ꨧꨭꨀꨶꨮꩆ ꩝ ꨛꨯꨮ ꨥꨮꩀ ꨟꩃ ꨧꨶꨮꩉ ꩝ ꨗꩌ ꨀꨋꩆ ꨛꨯꨮ ꨕꨯꨱꩀ ꩞ ꩒꩔ ꩞ ꨓꨚꨶꨮꩉ ꨀꨕꨳꨮꩉ ꨟꨐꨫ ꨎꨳꨮꩃ ꨞꨯꨱꩀ ꩝ ꨨꨤꨩ ꨧꨯꨱꩃ ꨦꨮꩇ ꨥꨯꩀ ꩝ ꨕꨫ ꨆꨴꨲꩍ ꨟꨤꩌ ꨚꨴꨯꨱꩃ ꩞ ꩒꩕ ꩞ ꨧꨪꨝꨮꩉ ꨆꨗꨰ ꨝꨩ ꨆꨤꨪꩆ ꩝ ꨝꨶꨮꩊ ꨄꨰ ꨆꨣꩃ ꩝ ꨚꨣꩆ ꨄꨰ ꨣꨡꩍ ꩞ ꩒꩖ ꩞ ꨚꨌꨬ ꨡꨶꩍ ꨆꩉ ꨎꨶꨰ ꨀꩍ ꩝ ꨕꨨꨵꩀ ꨟꩃ ꨟꨆꩍ ꩝ ꨚꨕꨮꩃ ꨀꨦꨭꨤꩌ ꩞ ꩒꩗ ꩞ ꨢꩍ ꨄꨰ ꨈꨮꩇ ꨓꨥꩀ ꨓꨳꩆ ꩝ ꨚꨕꨮꩃ ꨀꨦꨭꨤꩌ ꩝ ꨆꨤꨩ ꨀꨕꨬ ꨈꨮꩇ ꩞ ꩒꩘ ꩞ ꨟꨢꨭꩅ ꨄꨰ ꨤꨮꩈ ꨓꨯꩀ ꨓꨮꩇ ꩝ ꨄꨰ ꨥꨮꩉ ꨈꨮꩇ ꩝ ꨚꨓꨳꩆ ꨓꨶꨬ ꨟꨮꩈ ꩞ ꩒꩙ ꩞ ꨟꩃ ꨨꨣꨮꩀ ꨆꩍ ꨨꨣꨮꩀ ꨖꨬ ꩝ ꨖꨶꨩ ꨀꨓꩍ ꨤꨪꨖꨶꨰ ꩝ ꨓꨗꩍ ꨣꨪꨢꨩ ꨤꨪꨥꩃ ꨤꨪꨥꨰꩍ ꩞ ꩓꩐ ꩞ ꨄꨰ ꨓꨶꨬ ꨝꩀ ꨕꨴꨶꨰ ꨝꩀ ꨈꨵꨰꩍ ꩝ ꨨꨆꨯꨮꨩ ꨓꨆꨰ ꨀꨧꨰꩍ ꩝ ꨨꨆꨯꨮꨩ ꨣꨮꩌ ꨣꨪꨢꨩ ꩞ ꩓꩑ ꩞ ꨔꩆ ꨄꨰ ꨟꨓꨴꩀ ꨕꨶꨩ ꨝꨪꨣꨩ ꩝ ꨝꨪꨣꨩ ꨆꨩ ꨀꨳꨩ ꩝ ꨝꨪꨣꨩ ꨓꨴꨩ ꨆꨩ ꨟꨢꨭꩅ ꩞ ꩓꩒ ꩞ ꨥꨮꩉ ꨀꨳꨩ ꨓꨳꩆ ꨄꨰ ꨟꨕꨴꨭꩅ ꩝ ꨧꨶꨃꩆ ꨟꨢꨭꩅ ꩝ ꨔꩆ ꨄꨰ ꨟꨎꨮꩊ ꩞ ꩓꩓ ꩞ ꨀꨧꨰꩍ ꨓꨮꩊ ꨚꨤꨬ ꨀꨳꨩ ꨒꩉ ꩝ ꨥꨮꩀ ꨚꨤꨬ ꨤꨡꩉ ꩝ ꨀꨧꨰꩍ ꨗꨯꨱ ꨅꨩ ꨀꨔꩍ ꩞ ꩓꩔ ꩞ ꨣꨪꨝꨯꨱꩃ ꨔꨭꨩ ꨎꨤꩆ ꨕꨶꨩ ꨈꩍ ꩝ ꨣꨭꨧꨩ ꨙꨶꨯꩄ ꨌꨤꩍ ꩝ ꨕꨮꩍ ꨓꨲꩍ ꨡꨵꩃ ꨆꨦꨩ ꩞ ꩓꩕ ꩞ ꨝꨪꨊꨭꩆ ꨀꨓꩍ ꨔꨬ ꨙꨶꨩ ꨀꨳꨩ ꩝ ꨔꨰꩀ ꨔꨯꨱꩀ ꨝꨩ ꩝ ꨝꨤꨰ ꨢꨭꨥ ꨜꨭꩆ ꨜꨪꩀ ꩞ ꩓꩖ ꩞ ꨀꨧꨰꩍ ꨓꨮꩊ ꨚꨤꨬ ꨚꨣꨪꩀ ꩝ ꨚꨎꨳꨮꩃ ꨆꨮꨭ ꨙꨪꩀ ꩝ ꨓꨚꨩ ꨌꨮꩀ ꨓꨚꨩ ꨆꨴꨯꨱꩃ ꩞ ꩓꩗ ꩞ ꨀꨧꨰꩍ ꨕꨮꩍ ꨚꨤꨬ ꨝꩊ ꨌꨯꨱꩃ ꩝ ꨀꨗꩀ ꨌꨳꨪꩌ ꨓꨳꨯꨱꩃ ꩝ ꨟꨐꨫ ꨢꨮꩃ ꨟꨖꨪꩉ ꨓꨢꩍ ꩞ ꩓꩘ ꩞ ꨝꩊ ꨨꨤꨪꩌ ꨣꨡꨭꩃ ꨨꨣꨮꩀ ꨆꨣꩍ ꩝ ꨕꨮꩃ ꨀꨧꨰꩍ ꨕꨶꩍ ꩝ ꨓꨤꨫ ꨙꩇ ꨌꩃ ꨔꨬ ꩞ ꩓꩙ ꩞ ꨎꨴꨮꩃ ꨡꨯꩍ ꨚꨝꨭꩃ ꨛꨯꨮ ꨗꨰ ꩝ ꨓꨳꩆ ꨆꨮꨭ ꨓꨖꨳꨰ ꩝ ꨈꨪꨤꩄ ꨌꨯꨱꩃ ꨗꨯꨱ ꨓꨚꩍ ꩞ ꩔꩐ ꩞ ꨦꨗꩃ ꨆꨩ ꨔꨯꨩ ꨕꨴꨬ ꨣꨡꩍ ꩝ ꨌꨯꨱꩃ ꨗꨯꨱ ꨓꨚꩍ ꩝ ꨚꨔꨯꨱꩍ ꨣꨭꩇ ꨤꨗꩃ ꨨꨓꨰ ꩞ ꩔꩑ ꩞ ꨕꩀ ꨢꨮꨭ ꨝꨯꨱꩍ ꨌꨣꨟꨰ ꩝ ꨎꨴꨭꩍ ꨟꩃ ꨊꨯꨱꩀ ꨟꨰ ꩝ ꨅꨩ ꨔꨮꨭ ꨆꨩ ꨣꨭꩇ ꩞ ꩔꩒ ꩞ ꨕꩀ ꨢꨮꨭ ꨌꨳꨪꩌ ꨝꨣꨓꨯꩅ ꩝ ꨚꨈꨯꨮꨩ ꨙꨮꩌ ꨕꨫ ꨝꨯꩅ ꩝ ꨆꨵꨮꩌ ꨙꨮꩌ ꨕꨫ ꨎꨴꨰ ꩞ ꩔꩓ ꩞ ꨕꩀ ꨢꨮꨭ ꨨꨤꨩ ꨚꩍ ꨎꨰ ꩝ ꨔꩇ ꨀꨤꨩ ꨓꨆꨰ ꩝ ꨟꨮꩈ ꨎꨶꩀ ꨟꨕꨴꨶꨰ ꩞ ꩔꩔ ꩞ ꨕꩀ ꨢꨮꨭ ꨔꨴꨯꨱꩍ ꨀꨗꨴꨮꩃ ꨓꨊꨮꩈ ꩝ ꨕꩀ ꨢꨮꨭ ꨝꨪꨊꨭꨩ ꨣꨝꨰ ꩝ ꨕꩀ ꨢꨮꨭ ꨓꨕꨭꩀ ꨨꨣꨩ ꩞ ꩔꩕ ꩞ ꨅꨩ ꨆꩆ ꨚꨙꨪꩀ ꨋꩆ ꨚꨙꨶꨩ ꩝ ꨅꨩ ꨆꩆ ꨟꨓꨲꩍ ꨖꨶꨩ ꩝ ꨚꨕꨮꩃ ꨆꨯꨱꩀ ꨟꨯꨱꩃ ꨆꨗꨰ ꩞ ꩔꩖ ꩞ ꨅꨩ ꨆꩆ ꨟꨓꨲꩍ ꨗꨶꨮꩄ ꨕꨭꩍ ꨨꨓꨰ ꩝ ꨕꨶꩍ ꨆꨴꨲꩆ ꨗꩌ ꨓꨆꨰ ꩝ ꨣꨢꨮꩌ ꨨꨚꩀ ꨅꨩ ꨔꨮꨭ ꩞ ꩔꩗ ꩞ ꨕꨶꩍ ꨚꨮꩃ ꨦꩇ ꨔꨬ ꨙꨯꩌ ꨆꨵꨯꨱ ꩝ ꨕꨴꨮꩍ ꨦꨮꩇ ꨆꨗꨰ ꨆꨮꨭ ꩝ ꨕꨤꩌ ꨟꨖꨪꩉ ꨆꩊ ꨕꨯꨮꩍ ꩞ ꩔꩘ ꩞ ꨗꨫ ꨟꨖꨪꩉ ꨕꨴꨬ ꨓꨢꩍ ꨀꨝꨪꩍ ꩝ ꨆꨶꨮꩀ ꨈꨨꨩ ꨚꨣꨯꨱꩃ ꨚꨣꨰꩍ ꩝ ꨨꨤꨬ ꨔꩇ ꨣꨩ ꨢꨥ ꩞ ꩔꩙ ꩞ ꨗꨫ ꨗꩌ ꨟꩀ ꨅꨩ ꨔꨬ ꨣꨩ ꨝꨭꨥ ꩝ ꨔꩇ ꨎꨳꨯꨩ ꨚꨓꨭꨥ ꨆꨢꨭꨥ ꩝ ꨓꨕꨮꩉ ꨤꨪꩆ ꨆꨴꨭꩃ ꨆꨴꨲꩄ ꩞ ꩕꩐ ꩞ ꨨꨎꩆ ꨓꨴꨭꩆ ꨀꨳꨩ ꨝꨪꨐꩀ ꨐꩄ ꩝ ꨚꨤꨮꩌ ꨆꨴꨭꩃ ꨆꨴꨲꩄ ꩝ ꨚꨤꨮꩌ ꨗꩌ ꨀꨋꩆ ꩞ ꩕꩑ ꩞ ꨨꨤꨬ ꨧꨭꨗꨪꩅ ꨈꨪꨗꨴꨮꩍ ꨦꩍ ꨝꨪꩆ ꩝ ꨗꨯꨱ ꨕꨙꨮꩇ ꨓꩃ ꩝ ꨗꨈꨮꩉ ꨆꨨꨯꨱꨥ ꨚꨕꨮꩇ ꨣꨭꩇ ꩞ ꩕꩒ ꩞ ꨝꨪꨟꨯꩂ ꨛꨯꨮ ꨣꨯꨟꨯꨮꨩ ꨤꨪꨊꨪꩀ ꨦꨭꩇ ꩝ ꨨꨢꩇ ꨝꨳꨩ ꨂꩅ ꩝ ꨀꨆꨯꨱꩀ ꨨꨓꨮꩇ ꨓꨗꩍ ꨣꨪꨢꨩ ꩞ ꩕꩓ ꩞ ꨨꨤꨩ ꨆꨴꨰꩀ ꨟꨮꨕꨴꨶꨰ ꨆꨩ ꨀꨳꨩ ꩝ ꨨꨤꨪꩌ ꨓꨔꨰꩈ ꨅꨩ ꨟꨕꨩ ꩝ ꨚꨙꨳꩀ ꨚꨴꨰꩀ ꨅꩍ ꨤꨨꨮꩌ ꩞ ꩕꩔ ꩞ ꨀꨧꨰꩍ ꨗꨯꨱ ꨓꨮꩊ ꨕꨗꨯꨱ ꨚꨗꨴꩃ ꩝ ꨕꨮꩍ ꨓꨆꨰ ꨕꨯꨱꩀ ꨥꩃ ꩝ ꨈꨴꨭꩀ ꨟꨎꨶꨩ ꩞ ꩕꩕ ꩞ ꨎꨮꩍ ꨟꨭꩀ ꨌꨆꨵꨪꩂ ꨅꩃ ꨚꨧꨩ ꩝ ꨕꨯꩌ ꨟꩀ ꨙꨭꩃ ꨝꨩ ꩝ ꨕꨯꩌ ꨞꩇ ꨆꨢꨩ ꨚꨚꨴꨯꨱꩃ ꩞ ꩕꩖ ꩞ ꨎꨮꩍ ꨟꨢꨭꩅ ꨄꨰ ꨕꨯꩌ ꨌꨯꨱꩃ ꩝ ꨕꨯꩌ ꨆꨗꨰ ꨕꨯꨱꩃ ꩝ ꨚꨡꨶꩀ ꨂꨢꨟꩆ ꩝ ꩕꩗ ꩞ ꨌꨙꨳꨮꩃ ꨤꨪꨓꨫ ꨤꨪꨓꨰꩍ ꨗꨫ ꨧꨩ ꨆꨴꨲꩆ ꩝ ꨄꨰ ꨚꩆ ꨕꨟꩆ ꩝ ꨕꨯꩌ ꨨꨗꨭꩀ ꨢꨥꨩ ꩞ ꩕꩘ ꩞ ꨆꨙꨶꨮꩊ ꨆꨗꨰ ꨚꨓꨪꩍ ꨗꨫ ꨟꨭꨤꨩ ꩝ ꨄꨰ ꨓꨚꨯꩂ ꨝꨩ ꩝ ꨅꨩ ꨝꩀ ꨆꨙꨯꩌ ꩞ ꩕꩙ ꩞ ꨗꨟꨮꩋ ꨧꨭꨆꩉ ꨀꨤꨶꩍ ꨕꨶꨬ ꨚꨓꨯꨱꩌ ꩝ ꨈꨮꩌ ꨓꨶꨬ ꨔꨴꨯꨱꩃ ꨕꨯꨱꩃ ꩝ ꨕꨯꩌ ꨞꩇ ꨟꨣꨫ ꩞ ꩖꩐ ꩞ ꨥꨮꩈ ꨚꨌꨬ ꨟꨓꨴꩀ ꨆꨩ ꨞꨭꩌꨟꨫ ꩝ ꨚꨌꨬ ꨥꨮꩉ ꨗꨝꨫ ꩝ ꨕꨯꩌ ꨕꨰ ꨚꨓꨪꩍ ꩞ ꩖꩑ ꩞ ꨚꨌꨬ ꨥꨮꩉ ꨧꨭꨗꨭꨥ ꨎꨰ ꨌꨴꨪꩍ ꩝ ꨕꨨꨵꩀ ꨚꨕꨊꨪꩍ ꩝ ꨅꩍ ꨚꨮꩃ ꨚꨌꨬ ꩞ ꩖꩒ ꩞ ꨕꨯꩌ ꨗꩆ ꨆꨮꨭ ꨆꨶꨮꩉ ꨣꨭꩇ ꨗꨰ ꩝ ꨝꨵꨯꨱꩍ ꨆꨮꨭ ꨙꨯꩌ ꨝꨳꨰ ꩝ ꨝꨵꨯꨱꩍ ꨆꨮꨭ ꨗꨰꩍ ꨦꨣꨫ ꩞ ꩖꩓ ꩞ ꨝꨵꨯꨱꩍ ꨆꨮꨭ ꨚꨶꨮꩄ ꨝꨵꨯꨱꩍ ꨆꨮꨭ ꨓꨐꨫ ꩝ ꨦꨮꩇ ꨆꨮꨭ ꨨꨴꨫ ꩝ ꨕꨴꨶꨰ ꨍꨰ ꨦꨮꩇ ꨥꨯꩀ ꩞ ꩖꩔ ꩞ ꨆꨗꨰ ꨧꨩ ꨣꨎꨮꩃ ꨕꨊꨪꩍ ꨀꨆꨯꨱꩀ ꩝ ꨦꨮꩇ ꨆꨗꨰ ꨅꨩ ꨛꨯꨩꩀ ꩝ ꨟꨓꨩ ꨆꨗꨰ ꨅꨩ ꨆꨴꨲꩆ ꩞ ꩖꩕ ꩞ ꨝꨵꨯꨱꩍ ꨆꨗꨰ ꨈꨪꨤꩄ ꨀꨆꨯꨱꩀ ꨤꨪꨟꩆ ꩝ ꨤꨪꨟꩆ ꨚꨴꨯꨱꩃ ꨚꨴꨲꩆ ꩝ ꨤꨪꨟꩆ ꨓꨟꨩ ꨚꨤꨬ ꨌꨯꩍ ꩞ ꩖꩖ ꩞ ꨈꨵꨮꩃ ꨆꨵꨯꨱꩃ ꨟꨮꩈ ꨅꨩ ꨡꨯꩍ ꩝ ꨌꨶꩍ ꨉꨭꩉ ꨚꨓꨭꩍ ꩝ ꨗꩌ ꨓꨆꨰ ꨟꨮꩈ ꨣꨢꨮꩌ ꩞ ꩖꩗ ꩞ ꨤꨪꨟꩆ ꨟꩃ ꨗꨈꨮꩉ ꨀꨳꨩ ꨓꨴꩃ ꩝ ꨗꨯꨱ ꨝꨔꨪꨗꩃ ꩝ ꨤꨪꨟꩆ ꨓꨟꨩ ꨝꩊ ꨨꨭꩍ ꩝ ꩖꩘ ꩞ ꨀꨟꨰꩀ ꨀꨟꨩ ꨆꨮꨭ ꨉꩀ ꨕꨴꨲꩍ ꩝ ꨤꨪꨆꨬ ꨀꨧꩉ ꨟꩍ ꩝ ꨆꨯꨮꨩ ꨣꨡꩍ ꨔꩆ ꨤꨪꨆꨬ ꩞ ꩖꩙ ꩞ ꨆꨮꨭ ꨅꨩ ꨚꨮꩃ ꨀꨟꨰꩀ ꨆꨆꨬ ꩝ ꨆꨮꨭ ꨥꨮꩀ ꨓꨶꨬ ꨟꨮꩈ ꩝ ꨕꨫ ꨈꨴꨮꩇ ꨎꨤꩆ ꩞ ꩗꩐ ꩞ ꨕꨤꩌ ꨗꨈꨮꩉ ꨛꩃꨕꨣꩃ ꨆꨣꨯꨮꩃ ꨆꨣꩃ ꩝ ꨝꨪꨗꨫ ꨧꨭꨩ ꨌꩌ ꩝ ꨕꨯꩌ ꨔꨭꩆ ꨓꨤꩍ ꩞ ꩗꩑ ꩞ ꨤꨪꨟꩆ ꨆꨗꨰ ꨕꨮꩃ ꨧꨩ ꨈꩍ ꩝ ꨀꨧꨰꩍ ꨆꨮꨭ ꨧꨩ ꨈꩍ ꩝ ꨀꨳꨩ ꨓꨗꩍ ꨤꨪꩆ ꨓꨚꨪꩆ ꩞ ꩗꩒ ꩞ ꨎꨈꨭꩀ ꨝꨩ ꨝꨶꨯꩊ ꨚꨡꨵꨯꨱꩃ ꨆꨤꨪꩆ ꩝ ꨌꩌ ꨓꨈꨯꩀ ꨟꨕꨴꨯꨮꩆ ꩝ ꨝꨗꨫ ꨓꨟꨩ ꨌꨣꨰꩍ ꩞ ꩗꩓ ꩞ ꨕꨣꩍ ꨦꨶꨩ ꨐꨯꨱꩌ ꨆꨯꨮꩃ ꨀꨧꨰꩍ ꩝ ꨤꨪꨟꩆ ꨝꩀ ꨈꨵꨰꩍ ꩝ ꨕꩄ ꨊꨯꨱꩀ ꨨꨤꨭꨥ ꨚꨣꩆ ꩞ ꩗꩔ ꩞ ꨥꨮꩈ ꨆꨗꨰ ꨥꨮꩀ ꨝꨪꨌꩆ ꩝ ꨔꨴꨯꨱꩃ ꨕꨯꨱꩃ ꨚꨣꩆ ꩝ ꨦꨄꨰ ꨓꨤꨩ ꨓꨤꩍ ꩞ ꩗꩕ ꩞ ꨟꨢꨭꩅ ꨦꨄꨰ ꨨꨤꩉ ꨌꨳꨪꩇ ꨀꨤꩍ ꩝ ꨝꨶꨯꩊ ꨕꨴꨬ ꨣꨡꩍ ꩝ ꨥꨮꩈ ꨆꨗꨰ ꨨꨤꨮꩃ ꩞ ꩗꩖ ꩞ ꨕꨯꩌ ꨗꩆ ꨨꨕꨮꩉ ꨟꩃ ꨆꨴꨭꩃ ꩝ ꨆꨗꨰ ꨟꨰ ꨟꩃ ꨧꨶꨮꩉ ꩝ ꨆꨗꨰ ꨟꨰ ꨟꩃ ꨟꨆꩍ ꩞ ꩗꩗ ꩞ ꨆꨗꨰ ꨟꨰ ꨓꨮꩊ ꨨꨣꨮꩀ ꨆꩍ ꩝ ꨝꨪꨗꨰ ꨧꨳꩌ ꨨꨣꨮꩍ ꩝ ꨦꨄꨰ ꨂꨣꨘꩌ ꩞ ꩗꩘ ꩞ ꨦꨄꨰ ꨕꨯꩌ ꨔꨭꩀ ꨕꨤꩌ ꨓꨳꩆ ꩝ ꨛꨯꨮ ꨌꨴꨯꨱꩀ ꨦꨶꩆ ꩝ ꨝꨶꨯꩊ ꨚꨣꩆ ꨣꩀ ꨣꨯꩀ ꩞ ꩗꩙ ꩞ ꨆꨗꨰ ꨖꨪꨖꨭꨥ ꨟꩃ ꨡꨭꩀ ꩝ ꨟꨤꨮꩃ ꨝꨪꨟꨫ ꨟꩃ ꨡꨯꨱꩀ ꩝ ꨎꩀ ꨉꨮꩍ ꨟꩃ ꨟꨓꨩ ꩞ ꩘꩐ ꩞ ꨔꨰꩀ ꨤꨪꨚꨬ ꨟꩃ ꨕꨫ ꨨꨳꨩ ꩝ ꨟꨕꨮꩍ ꨎꨮꩍ ꨕꨤꩌ ꨀꨳꨩ ꩝ ꨓꨊꨪꩆ ꨄꨰ ꨓꨚꨯꩂ ꨣꨯꨱꩀ ꩞ ꩘꩑ ꩞ ꨆꨯꨱꩃ ꨗꨰ ꨓꨮꩊ ꨊꨯꨱꩀ ꨞꨯꨱꩀ ꩝ ꨟꨓꨩ ꨆꨗꨰ ꨛꨯꨩꩀ ꩝ ꨈꨵꨮꩃ ꨤꨶꨪꩄ ꨝꩃꨦꨩ ꩞ ꩘꩒ ꩞ ꨈꨵꨮꩃ ꨓꨈꨯꩀ ꨣꨮꩌ ꨣꨪꨢꨩ ꩝ ꨈꨪꨤꩄ ꨈꨵꨮꩃ ꨓꨚꨩ ꩝ ꨕꨣꩀ ꨚꨴꨯꨱꩃ ꨤꨪꨥꩍ ꩞ ꩘꩓ ꩞ ꨕꨨꨵꩀ ꨟꨰ ꨟꩃ ꨟꨆꩍ ꩝ ꨗꨝꨫ ꨚꨝꨴꨬ ꨚꨆꨵꩍ ꩝ ꨕꨶꨪꩋ ꨚꨣꩆ ꨟꨓꨶꨬ ꩞ ꩘꩔ ꩞ ꨤꨪꨟꩆ ꨓꨮꩊ ꨦꨴꨫ ꨝꨗꩈ ꩝ ꨀꨧꨰꩍ ꨆꨮꨭ ꨓꨶꨬ ꩝ ꨆꨯꨱꩃ ꨆꨗꨰ ꨗꨯꨱ ꨙꨶꨮꩄ ꩞ ꩘꩕ ꩞ ꨟꩃ ꨓꨧꨪꩀ ꨣꨪꨢꨩ ꨀꨊꨪꩆ ꨨꨠꩄ ꩝ ꨤꨰ ꨧꨯꨱꩃ ꨨꨠꩄ ꩝ ꨌꨘꩀ ꨡꨭꩀ ꨆꨗꨰ ꨨꨊꨭꨥ ꩞ ꩘꩖ ꩞ ꨤꨪꨟꩆ ꨓꨮꩊ ꨝꩊ ꨨꨊꨭꨥ ꩝ ꨝꩊ ꨧꨳꩌ ꨟꨓꨶꨥ ꩝ ꨟꨔꨴꨭꩌ ꨓꨡꩃ ꨌꩉ ꨌꨮꩀ ꩞ ꩘꩗ ꩞ ꨝꨪꨟꨯꩂ ꨆꨤꩆ ꨛꨯꨮ ꨈꨵꨯꨱꩃ ꨨꨣꨮꩍ ꩝ ꨁꨘꨈꨪꨣꨰ ꨟꩍ ꩝ ꨁꨘꨈꨪꨣꨭꩅ ꨆꨦꨶꩆ ꩞ ꩘꩘ ꩞ ꨚꨕꨰ ꨓꨔꩀ ꨝꨴꨯꩂ ꨡꨵꩃ ꨓꨗꨴꩆ ꩝ ꨈꨵꨯꨱꩃ ꨣꨮꩌ ꨝꨪꨗꩆ ꩝ ꨆꨢꨭꨥ ꨨꨤꨶꨮꩃ ꨌꨮꩀ ꩞ ꩘꩙ ꩞ ꨆꨴꨯꨱꩃ ꨣꨪꨢꨩ ꨚꨕꨮꩃ ꨀꨳꨩ ꨝꨗꨮꩀ ꩝ ꨚꨝꩍ ꨤꩌꨊꨩ ꨟꨇꨮꩀ ꩝ ꨁꨆꩆ ꨨꨕꩃ ꨣꨧꨩ ꨣꨧꨩ ꩞ ꩙꩐ ꩞ ꨣꨘꩌ ꨤꨯꨩ ꨟꨮꩈ ꨝꩃꨦꨩ ꩝ ꨣꨘꩌ ꨝꨶꨯꩊ ꨈꨓꨩ ꩝ ꨢꨮꨭ ꨣꨘꩌ ꨣꨩ ꨟꨆꩍ ꩞ ꩙꩑ ꩞ ꨨꨮꩄ ꨛꨯꨮ ꨆꨗꨰ ꨕꨮꩃ ꨕꨶꩍ ꩝ ꨆꨗꨰ ꨈꨵꨮꩃ ꨚꨣꨶꩍ ꩝ ꨣꨩ ꨨꨤꨭꩍ ꨁꨤꨪꨟꨯꨩ ꩞ ꩙꩒ ꩞ ꨋꩆ ꨆꨗꨰ ꨧꨶꨃꩆ ꨝꨳꨩ ꨛꨯꨮ ꩝ ꨧꨶꨃꩆ ꨗꨈꨮꩉ ꩝ ꨞꨯꨩ ꨚꨓꨪꩍ ꨆꨗꨰ ꨟꨣꨰ ꩞ ꩙꩓ ꩞ ꨝꨵꨯꨱꩍ ꨟꨓꨩ ꨟꨮꩈ ꨈꨵꨮꩃ ꨚꨨꨶꨰ ꩝ ꨤꨪꨟꩆ ꨓꨮꩊ ꨝꩊ ꨀꨊꨶꨬ ꩝ ꨟꨓꨩ ꨟꨮꩈ ꨅꨩ ꨈꨵꨮꩍ ꩞ ꩙꩔ ꩞ ꨤꨪꨟꩆ ꨓꨮꩊ ꨝꩊ ꨤꨰ ꨝꩊ ꨨꨭꩍ ꩝ ꨝꩊ ꨈꨵꨮꩍ ꨈꨪꨗꨭꩍ ꩝ ꨞꩇ ꨁꨤꨪꨟꨯꨩ ꩞ ꩙꩕ ꩞ ꨝꩊ ꨙꨶꨩ ꨕꨗꨭꩍ ꨇꩀ ꨝꨪꨤꨯꨩ ꩝ ꨦꨘꩀ ꨈꨪꨗꨴꨮꩍ ꨣꨤꨯꨩ ꩝ ꨨꨤꨬ ꨎꩃ ꨅꨩ ꨡꨯꩍ ꩞ ꩙꩖ ꩞ ꨓꨧꨪꩀ ꨕꨪꩍ ꨚꨭꩉ ꨣꨪꨢꩀ ꨌꨯꨱꩍ ꩝ ꨤꨪꨟꩆ ꨆꨗꨰ ꨕꨮꩍ ꩝ ꨚꨤꨰꩀ ꨗꩌ ꨆꨴꨭꩃ ꩞ ꩙꩗ ꩞ ꨥꨮꩈ ꨣꨩ ꨟꨆꩍ ꨎꨶꨰ ꨦꨗꩃ ꩝ ꨝꨶꨯꩊ ꨕꨴꨬ ꨆꨣꩃ ꩝ ꨢꩃ ꨕꨴꨬ ꨈꨪꨤꩄ ꨚꨡꨵꨶꩀ ꩞ ꩙꩘ ꩞ ꨕꨶꨪꩋꨦꩀ ꨨꨰ ꨆꨩ ꨔꩆ ꨕꨨꨵꩀ ꩝ ꨟꨮꩈ ꨎꨶꨰ ꨚꨋꩇ ꩝ ꨓꨥꩀ ꨎꨮꩍ ꨦꨶꩆ ꨤꨪꨆꨬ ꩞ ꩙꩙ ꩞ ꨕꨯꩌ ꨗꩆ ꨟꨢꨭꩅ ꨆꨵꨯꨱꩍ ꨨꨓꨰ ꩝ ꨈꨪꨗꨯꨱꩃ ꨕꨫ ꨆꨗꨰ ꩝ ꨝꨪꨤꨬ ꨝꨊꨭꩀ ꩞ ꩑꩐꩐ ꩞ ꨧꨯꨱꩃ ꨆꨮꨭ ꨐꨭꨩ ꨚꨵꨮꩀ ꨤꨪꨆꨭꩀ ꩝ ꨐꨭꨩ ꨚꨤꨪꨟꨭꩀ ꩝ ꨅꩍ ꨝꨪꩀ ꨧꨈꨵꨮꩃ ꩞ ꩑꩐꩑ ꩞ ꨕꨯꩌ ꨗꩆ ꨆꨗꨰ ꨔꨴꩍ ꨢꨮꩃ ꩝ ꨋꩇ ꨡꨯꨱꩀ ꨈꨪꨗꨮꩌ ꩝ ꨈꨪꨙꨫ ꨝꨪꨖꨩ ꨅꩍ ꨧꨭꨤꨭꨩ ꩞ ꩑꩐꩒ ꩞ ꨥꨮꩉ ꨈꨵꨰ ꨆꨵꨯꨱꩃ ꨨꨣꨮꩍ ꨥꨮꩈ ꨛꨯꨮ ꩝ ꨔꩆ ꨕꨯꨱꩀ ꨆꨴꨲꩍ ꨖꨶꨩ ꩝ ꨓꨴꨭꩆ ꨓꨈꨯꩀ ꨅꨩ ꨔꨴꨯꨱꩃ ꩞ ꩑꩐꩓ ꩞ ꨕꨗꨭꩍ ꨟꩃ ꨨꨤꨬ ꨙꨶꨩ ꨗꨯꨱꩃ ꩝ ꨇꨪꩂ ꨋꩇ ꨝꨫ ꨧꨳꩌ ꩝ ꨇꨪꩂ ꨚꨤꨪꨈꨰꩍ ꩞ ꩑꩐꩔ ꩞ ꨎꨙꨭꩆ ꨕꨰ ꨚꨢꨮꩃ ꨀꨆꨯꨱꩀ ꨀꨧꨰꩍ ꩝ ꨤꨪꨟꩆ ꨆꨗꨰ ꨥꨰꩍ ꩝ ꨥꨮꩀ ꨀꨕꨪꩍ ꨚꨰ ꩞ ꩑꩐꩕ ꩞ ꨎꨙꨭꩆ ꨕꨰ ꨚꨢꨮꩃ ꨈꩍ ꨚꨰ ꩝ ꨤꨪꨟꩆ ꨆꨗꨰ ꨥꨰ ꩝ ꨈꨘꩍ ꨀꨳꨩ ꨣꨪꨢꩀ ꩞ ꩑꩐꩖ ꩞ ꨀꨧꨰꩍ ꨚꨜꨭꩉ ꨓꨮꩊ ꨓꨆꨰ ꨕꨣꩀ ꩝ ꨤꨪꨟꩆ ꨆꨗꨰ ꨆꨵꩀ ꩝ ꨙꨶꨮꩄ ꨓꨟꨩ ꨀꨳꨩ ꨓꨴꩃ ꩞ ꩑꩐꩗ ꩞ ꨗꨈꨮꩉ ꨀꨳꨩ ꨓꨴꩃ ꨡꨵꩃ ꨟꨌꨥ ꩝ ꨓꨝꨮꨭ ꨨꨮꨭ ꨨꨮꨭ ꩝ ꨓꨚꨳꨯꨮꩆ ꨗꩅꨓꨔꨪꩍ ꩞ ꩑꩐꩘ ꩞ ꨕꨣꩀ ꨕꨪꩍ ꨚꨭꩉ ꨣꨢꩀ ꨝꨪꨤꨪꩀ ꩝ ꨡꨯꩆ ꨚꨤꨯꨱ ꨆꨵꩀ ꩝ ꨝꨪꨊꨭꩀ ꨔꨰꩀ ꨓꨴꨭꩆ ꨀꨳꨩ ꩞ ꩑꩐꩙ ꩞ ꨣꨮꩌ ꨤꨪꨂꨩ ꨝꨯꨱꩍ ꨣꨧꨩ ꨣꨧꨩ ꩝ ꨝꨪꨟꨯꩂ ꨛꨯꨮ ꨁꨘꨩ ꩝ ꨤꨪꨂꨩ ꨥꩃ ꨕꨮꩉ ꨕꨪꩍ ꩞ ꩑꩑꩐ ꩞ ꨀꨧꨰꩍ ꨧꨩ ꨢꩌ ꨀꨧꨰꩍ ꨨꨰꩍ ꩝ ꨚꨜꨭꩉ ꨅꩍ ꨕꩀ ꨈꨵꨰꩍ ꩝ ꨓꨇꨯꨱꩀ ꨅꨩ ꨕꩀ ꨤꨪꨜꨶꨰ ꩞ ꩑꩑꩑ ꩞ ꨚꨕꨬ ꨕꨮꩃ ꨀꨧꨰꩍ ꨌꩃ ꨔꨴꨶꨰ ꩝ ꨤꨪꨟꩆ ꨆꨗꨰ ꨔꨶꨰ ꩝ ꨣꩍ ꨓꨆꨰ ꨓꨧꨪꩀ ꩞ ꩑꩑꩒ ꩞ ꨔꨭꩆ ꨝꨪꨤꩆ ꨕꨯꩌ ꨟꨯꨱꩃ ꨤꨪꨥꨪꩀ ꩝ ꨧꨶꨃꩆ ꨣꨯꨱꩃ ꨜꨪꩀ ꩝ ꨀꨗꨪꩅ ꨔꨭꨩ ꨤꨩ ꩞ ꩑꩑꩓ ꩞ ꨈꨵꨮꩃ ꨓꨚꨶꨮꩉ ꨀꨆꨯꨱꩀ ꨚꨮꩉ ꨓꨚꨩ ꩝ ꨌꨯꨱꩃ ꨓꨶꨬ ꨚꨢꨶꨩ ꩝ ꨧꨩ ꨝꨵꩍ ꨨꨣꩀ ꩞ ꩑꩑꩔ ꩞ ꨈꨵꨮꩃ ꨝꨳꨮꩉ ꨨꨣꨬ ꨀꩉ ꨔꩀ ꩝ ꨙꨩ ꨝꨪꨊꨭꩀ ꨔꨰꩀ ꩝ ꨆꨗꨰ ꨆꨵꩀ ꨟꨣꨰ ꩞ ꩑꩑꩕ ꩞ ꨧꨶꨃꩆ ꨣꨪꨝꨭꨥ ꨨꨣꨬ ꨅꨩ ꨤꨨꨰ ꩝ ꨧꨶꨃꩆ ꨢꩌ ꨓꨆꨰ ꩝ ꨧꨶꨃꩆ ꨀꨣꩀ ꨡꨭꩀ ꩞ ꩑꩑꩖ ꩞ ꨧꨶꨃꩆ ꨀꨥ ꨊꨶꨬ ꨧꨶꨃꩆ ꨨꨣꨭꩌ ꨓꨇꨯꨱꩀ ꩝ ꨟꨓꨩ ꨈꨵꨮꩃ ꨤꨪꨐꨰꩈ ꩝ ꨆꨚꨭꨩ ꨇꨪꩌ ꨌꨯꨱꩍ ꩞ ꩑꩑꩗ ꩞ ꨄꨰ ꨗꨯꨱ ꨣꩍ ꨝꩍ ꩝ ꨨꨓꨰ ꨅꩍ ꨕꩀ ꩝ ꨤꨪꨕꨶꨮꩊ ꨧꨶꨃꩆ ꩞ ꩑꩑꩘ ꩞ ꨀꨣꨩ ꨡꨮꩃ ꨊꨯꨱꩀ ꨣꨚꨶꨮꩆ ꩝ ꨓꨆꨰ ꨆꨗꨰ ꨒꨶꨮꩊ ꩝ ꨕꨫ ꨤꨝꨭꩀ ꨨꨣꨮꩀ ꩞ ꩑꩑꩙ ꩞ ꨀꨕꨯꨱꩍ ꨊꨯꨱꩀ ꨜꨭꩆ ꨌꨳꨪꩌ ꨉꨮꩍ ꩝ ꨢꨮꨭ ꨢꨥꨩ ꨗꨰ ꨎꨮꩍ ꩝ ꨦꨮꩇ ꨗꨰ ꨨꨣꨫ ꩞ ꩑꩒꩐ ꩞ ꨀꨧꨰꩍ ꨓꨶꨬ ꨓꨮꩊ ꨝꩊ ꨣꨪꨢꨩ ꩝ ꨕꨶꨪꩋꨦꩀ ꨛꨯꨮ ꨝꨳꨩ ꩝ ꨗꨫ ꨎꨮꩍ ꨟꨪꩍ ꨄꨰ ꩞ ꩑꩒꩑ ꩞ ꨛꨯꨮ ꨗꨯꨱ ꨨꨚꩀ ꨅꨩ ꨟꨰ ꩝ ꨗꨈꨮꩉ ꨢꨶꨮꩆ ꨀꨓꩍ ꨖꨶꨰ ꩝ ꨀꨓꨭꨥ ꨛꨯꨮ ꨚꨢꨶꨩ ꨥꨮꩀ ꩞ ꩑꩒꩒ ꩞ ꨣꨪꨢꩀ ꨆꨴꨯꨱꩃ ꨚꨯꨱꩍ ꨛꨯꨮ ꨔꨮꩀ ꨝꨮꩀ ꩝ ꨆꩊ ꨚꨮꩇ ꨝꨮꩇ ꩝ ꨓꨗꩍ ꨀꨳꨩ ꨝꨪꨆꩆ ꩞ ꩑꩒꩓ ꩞ ꨗꨯꨱ ꨓꩍ ꨚꨤꨬ ꨆꨣꨬ ꨀꨋꩆ ꩝ ꨨꨤꨬ ꨛꨯꨮ ꨕꨫ ꨆꩊ ꩝ ꨔꨮꨭ ꨢꨯꨱꩌ ꨓꨳꩆ ꨔꩅ ꩞ ꩑꩒꩔ ꩞ ꨃꩊꨕꩀ ꨟꨓꨩ ꨆꨵꨯꨱꩃ ꨨꨚꨶꩀ ꩝ ꨈꨘꩍ ꨛꨯꨮ ꨦꩍ ꩝ ꨈꨘꩍ ꨟꨪꩍ ꨄꨰ ꩞ ꩑꩒꩕ ꩞ ꨈꨘꩍ ꨓꨴꨩ ꨌꨯꨱꩀ ꨆꨩ ꨗꨰ ꩝ ꨟꨢꨭꩅ ꨆꨵꨯꨱꩍ ꨨꨓꨰ ꩝ ꨟꨢꨭꩅ ꨌꨴꨮꩃ ꨀꩆꨋꩀ ꩞ ꩑꩒꩖ ꩞ ꨥꨮꩈ ꨟꨮꩈ ꨎꨶꨰ ꨌꨴꨮꩃ ꨀꩆꨋꩀ ꩝ ꨓꨳꩆ ꨄꨰ ꨚꨓꨴꩀ ꩝ ꨞꩇ ꨄꨰ ꨆꨣꩃ ꩞ ꩑꩒꩗ ꩞ ꨨꨎꨳꨮꩃ ꨆꨯꨮꨣꨯꨮꨩ ꨆꩀꨘꩆ ꩝ ꨨꨎꨳꨮꩃ ꨃꨥ ꨌꩌ ꨓꨗꨴꩆ ꩝ ꨨꨎꨳꨮꩃ ꨀꨓꨭꨥ ꨌꩌ ꨌꨮꩀ ꩞ ꩑꩒꩘ ꩞ ꨨꨎꨳꨮꩃ ꨚꨋꩆ ꨌꩌ ꨈꨯꩀ ꩝ ꨨꨎꨳꨮꩃ ꨎꨥꨩ ꨝꨗꨫ ꨣꨤꨯꨱꩍ ꩝ ꨚꨌꨤꩍ ꨞꨭꩌꨟꨫ ꩞ ꩑꩒꩙ ꩞ ꨟꨎꨶꨩ ꨧꨩ ꨕꨴꨬ ꨝꨳꨮꩉ ꨨꨣꨬ ꨗꨫ ꩝ ꨢꨮꩃ ꨕꨴꨬ ꨌꨳꨪꩌ ꨚꨴꨯꨱꩀ ꨟꨐꨫ ꩝ ꨣꨮꩌ ꨣꨤꨯꩂ ꨀꨔꨭꩉ ꨣꩇ ꨦꩇ ꩞ ꩑꩓꩐ ꩞ ꨥꨮꩉ ꨈꨵꨰ ꨨꨤꨬ ꨗꨯꨱ ꨚꨮꩇ ꩝ ꨔꩆ ꨄꨰ ꨣꨡꨲꩇ ꩝ ꨝꨶꨯꩊ ꨞꩇ ꨤꨪꨥꩃ ꩞ ꩑꩓꩑ ꩞ ꨈꨵꨮꩃ ꨡꨯꩆ ꨨꨤꨩ ꨝꨪꨟꨯꩂ ꨢꩃ ꩝ ꨚꨙꨳꩀ ꨝꨪꨤꩆ ꨞꩃ ꩝ ꨜꨭꩆ ꨈꨵꨰ ꨔꨭꨩ ꨎꨴꨭꩍ ꩞ ꩑꩓꩒ ꩞ ꨔꩆ ꨆꨮꨭ ꨢꩃ ꨨꨤꨬ ꨡꨯꩍ ꩝ ꨧꨩ ꨝꨯꨱꩍ ꨚꨭꩍ ꩝ ꨓꨎꨭꩍ ꨈꨪꨤꨯꨱꩃ ꩞ ꩑꩓꩓ ꩞ ꨌꨯꨱꩀ ꨈꨴꨮꩇ ꨎꨤꩆ ꨈꨴꨮꩇ ꨖꨶꨮꩆ ꩝ ꨓꨳꩆ ꨆꨵꨯꨱꩃ ꨨꨤꩉ ꩝ ꨓꨊꨪꩆ ꨆꨵꨯꨱꩃ ꨆꨆꨭꩍ ꩞ ꩑꩓꩔ ꩞ ꨓꨶꨬ ꨣꨪꨝꨯꨱꩃ ꨓꨴꨭꩆ ꨌꨮꩀ ꨨꨭꩍ ꩝ ꨇꨪꩀ ꨈꨵꨰ ꨌꨮꩀ ꨨꨭꩍ ꩝ ꨣꨪꨟꨯꨱꩃ ꨢꩃ ꨚꨆꨴꩆ ꩞ ꩑꩓꩕ ꩞ ꨈꨪꨗꨴꨮꩍ ꨣꨭꩇ ꨆꨗꨰ ꨆꨝꩉ ꩝ ꨆꨮꨭ ꨗꨯꨱ ꨨꨤꩉ ꩝ ꨧꨯꨱꩃ ꨛꨯꨮ ꨤꨪꨊꨪꩀ ꩞ ꩑꩓꩖ ꩞ ꨀꨧꨰꩍ ꨝꨩ ꨓꨮꩊ ꨓꨆꨰ ꨓꨧꨪꩀ ꩝ ꨣꨪꨢꩀ ꨛꨯꨩꩀ ꨝꨪꨤꨪꩀ ꩝ ꨈꨮꩌ ꨝꨪꨊꨭꩀ ꨨꨣꩆ ꩞ ꩑꩓꩗ ꩞ ꨣꨪꨢꩀ ꨚꨯꨱꩍ ꨝꨯꨱꩍ ꨀꨳꨩ ꨚꨮꩉ ꩝ ꨀꨧꩉ ꨀꨳꨩ ꨤꨪꨠꩆ ꩝ ꨕꨴꨮꩍ ꨆꨆꨶꨮꩉ ꨝꨮꩉ ꩞ ꩑꩓꩘ ꩞ ꨣꨪꨢꩀ ꨚꨯꨱꩍ ꨝꨯꨱꩍ ꨀꨳꨩ ꨨꨎꩆ ꩝ ꨀꨧꩉ ꨀꨳꨩ ꨤꨪꨠꩆ ꩝ ꨕꨴꨮꩍ ꨀꨳꨩ ꨟꨓꨩ ꩞ ꩑꩓꩙ ꩞ ꨣꨪꨢꩀ ꨌꨯꨱꩍ ꨕꨴꨮꩍ ꨀꨳꨩ ꨦꨶꨩ ꩝ ꨕꨗꩈ ꨟꩃ ꨕꨫ ꨨꨳꨩ ꩝ ꨣꨪꨝꨭꨥ ꨔꨭꩆ ꨦꨮꩇ ꨣꨪꨢꩀ ꩞ ꩑꩔꩐ ꩞ ꨀꨧꨰꩍ ꨣꨰꩈ ꨣꩍ ꨓꨆꨰ ꨕꨣꩀ ꩝ ꨀꨳꨩ ꨨꨣꨬ ꨆꨵꩀ ꩝ ꨚꨙꨳꩀ ꨓꨴꨭꩆ ꨚꨤꨬ ꩞ ꩑꩔꩑ ꩞ ꨂꩉ ꨖꨭꩉ ꨔꩀ ꨝꨳꨮꩉ ꨨꨣꨬ ꩝ ꨌꨯꨱꩉ ꨌꨶꩍ ꨎꨥꨬ ꩝ ꨕꨭꩃ ꨢꩌ ꨀꨧꨰꩍ ꩞ ꩑꩔꩒ ꩞ ꨧꨶꨃꩆ ꨝꩀ ꨎꨗꩀ ꨝꩀ ꨈꨵꨰꩍ ꩝ ꨢꩌ ꨀꨧꨰꩍ ꨥꨰꩍ ꩝ ꨓꨈꨯꩀ ꨡꨵꩃ ꨆꨧꩉ ꩞ ꩑꩔꩓ ꩞ ꨤꨪꨟꩆ ꨈꨪꨤꩄ ꨗꨯꨱ ꨝꩊ ꨨꨯꨮꨩ ꩝ ꨀꨧꨰꩍ ꨣꨯꨱꨥ ꨣꨰꩈ ꩝ ꨧꨩ ꨓꨆꨰ ꨓꨶꨬ ꨎꨶꩀ ꩞ ꩑꩔꩔ ꨨꨤꨫ ꨨꨤꨮꩃ ꨟꨮꩈ ꨔꨰꩀ ꨨꨢꨶꩀ ꩝ ꨦꨄꨰ ꨆꨶꨮꩉ ꨝꩀ ꩝ ꨥꩃ ꨓꨊꨪꩆ ꨣꨘꩌ ꩞ ꩑꩔꩕ ꨡꨭꩀ ꨖꨳꨰ ꨨꨠꩄ ꨨꨊꨭꨥ ꨧꨳꩌ ꩝ ꨦꨄꨰ ꨣꩇ ꨣꨎꩌ ꩝ ꨨꨤꨯꩂ ꨝꩀ ꨔꨴꨭꩀ ꩞ ꩑꩔꩖ ꨟꨓꨩ ꨟꨮꩈ ꨝꨪꨊꨭꩆ ꨀꨳꨩ ꨔꨴꨯꩍ ꩝ ꨀꨧꩉ ꨁꩆꨓꩆ ꨎꨴꨭꩍ ꩝ ꨆꨴꨲꩍ ꨥꩃ ꨌꨘꩉ ꩞ ꩑꩔꩗ ꨦꨶꩆ ꨄꨰ ꨤꨰꩀ ꨓꨟꨩ ꨝꨵꨯꨱꩍ ꨡꨵꨭꩃ ꩝ ꨅꨩ ꨔꨬ ꨣꨩ ꨕꨭꩃ ꩝ ꨅꨩ ꨔꨬ ꨣꨩ ꨥꨮꩍ ꩞ ꩑꩔꩘ ꨚꨓꨯꨱ ꨛꨯꨮ ꨨꨤꨬ ꨨꨣꨮꩀ ꨆꩍ ꩝ ꨙꨶꨩ ꨗꨯꨱ ꨤꨪꨠꩍ ꩝ ꨓꨯꩀ ꨆꨟꨬ ꨢꨶꨮꩆ ꩞ ꩑꩔꩙ ꨟꨢꨭꩅ ꨨꨤꨬ ꨟꨢꨭꩅ ꨆꨵꨯꨱꩍ ꨚꨴꨲꩆ ꩝ ꨨꨆꨯꨮꨩ ꨔꨮꨭ ꨕꨟꩆ ꩝ ꨈꨴꨮꩇ ꨕꨪꩅ ꨝꨪꨢꨩ ꩞ ꩑꩕꩐ ꨟꨢꨭꩅ ꨨꨤꨬ ꨟꨢꨭꩅ ꨙꨭꩃ ꨝꨩ ꩝ ꨟꨢꨭꩅ ꨅꩍ ꨆꨭꨨꨴꨳꨩ ꩝ ꨣꩈ ꨨꨕꨬ ꨚꨙꨪꩀ ꩞ ꩑꩕꩑ ꨟꨢꨭꩅ ꨓꨕꨮꩉ ꨨꨓꨰ ꨓꨝꨵꨮꩀ ꨜꨪꩀ ꩝ ꨟꨢꨭꩅ ꨓꨶꨬ ꨓꨟꨩ ꨚꨣꨪꩀ ꩝ ꨟꨢꨭꩅ ꨥꨮꩀ ꨀꨳꨩ ꨓꨴꩃ ꩞ ꩑꩕꩒ ꩞ ꨟꨢꨭꩅ ꨓꨈꨯꩀ ꨈꨵꨰ ꨆꨵꨯꨱꩍ ꨦꨶꩆ ꩝ ꨟꨢꨭꩅ ꨚꨘꩍ ꨗꩌ ꨋꩆ ꩝ ꨦꩀꨆꨣꨰ ꨧꨣꩀ ꩞ ꩑꩕꩓ ꩞ ꨟꨢꨭꩅ ꨗꨫ ꨚꨢꨮꨭ ꨢꨭꩅ ꨆꨵꩀ ꩝ ꨟꨢꨭꩅ ꨚꨡꩀ ꩝ ꨋꩆ ꨢꨭꩅ ꨚꨓꨝꨩ ꩞ ꩑꩕꩔ ꩞ ꨆꨴꨭꩃ ꨆꨴꨲꩄ ꨟꩃ ꨕꨫ ꨨꨳꨩ ꩝ ꨆꨮꨭ ꨌꨰꩀ ꨕꨫ ꨓꨆꨰ ꨀꨤꨩ ꩝ ꨆꨮꨭ ꨅꨩ ꨚꨨꨤꨭꩍ ꩞ ꩑꩕꩕ ꩞ ꨕꨯꩌ ꨗꩆ ꨟꨮꩈ ꨗꨯꨱ ꨟꨆꩍ ꩝ ꨟꨢꨭꩅ ꨄꨰ ꨌꨤꩍ ꩝ ꨓꨚꨳꨮꩆ ꨨꨤꨬ ꨅꨩ ꨔꨮꨭ ꩞ ꩑꩕꩖ ꩞ ꨓꨶꨮꩉ ꨊꨯꨱꩀ ꨈꨵꨯꨱꩃ ꨜꨭꩆ ꨆꨢꨮꨭ ꩝ ꨕꨮꩍ ꨊꨯꨱꩀ ꨣꨯꨱꩃ ꨆꨝꨥ ꩝ ꨕꩄ ꨆꨴꨲꩍ ꨆꨴꨯꨱꩃ ꨀꨳꨩ ꩞ ꩑꩕꩗ ꨓꨶꨬ ꨓꨆꨰ ꨕꨯꩌ ꨓꨚꨶꨮꩉ ꨀꨣꨩ ꩝ ꨔꨴꨭꨥ ꨧꨯꨱꩃ ꨆꨳꩀ ꨈꨨꨩ ꩝ ꨟꨤꨭꩀ ꨧꨯꨱꩃ ꨨꨤꨩ ꨚꩍ ꩞ ꩑꩕꩘ ꩞ ꨔꨮꩀ ꨙꨯꩂ ꨓꨗꨯꩂ ꨔꨮꩀ ꨣꩍ ꩝ ꨔꨮꩀ ꨗꨯꨱ ꨈꨘꩍ ꩝ ꨨꨓꨰ ꨆꨭꨤꨪꨕꨯꩂ ꩞ ꩑꩕꩙ ꩞ ꨣꨪꨢꩀ ꨚꨯꨱꩍ ꨓꨢꩍ ꨙꩃ ꨣꩃ ꩝ ꨟꨗꩃ ꨓꨟꨩ ꨚꨝꩍ ꨁꨆꩆ ꩝ ꨟꨗꩃ ꨆꨣꨮꩌ ꨓꨴꨭꩆ ꨓꨧꨪꩀ ꩞ ꩑꩖꩐ ꩞ ꨆꨮꨭ ꨢꨮꨭ ꨂꨣꩃ ꨤꨪꨨꨪꩀ ꨜꨪꩀ ꩝ ꨀꨝꨪꩍ ꨓꨟꨩ ꨧꩃ ꨟꨈꨪꩀ ꩝ ꨈꨪꨤꩄ ꨕꨭꩍ ꨝꨪꨟꨯꩂ ꨢꩃ ꩞ ꩑꩖꩑ ꩞ ꨓꨗꩍ ꨣꨪꨢꨩ ꨆꨮꨭ ꨛꩃꨕꨣꩃ ꩝ ꨌꨤꩍ ꨈꨴꨮꩇ ꨎꨤꩆ ꨖꨶꨮꩆ ꩝ ꨝꨯꨱꩊ ꨞꩇ ꨂꨣꨘꩌ ꩞ ꩑꩖꩒ ꩞ ꨆꨮꨭ ꨕꨯꨱꩀ ꨨꨈꨰꩅ ꨕꨤꩌ ꨓꨊꨪꩆ ꩝ ꨢꨯꨱꩌ ꨧꨩ ꨕꨴꨬ ꨌꨳꨪꩌ ꩝ ꨚꨮꩉ ꨓꨟꨩ ꨤꨥꩍ ꩞