꩑ ꩞ ꨗꨫ ꨚꨘꩍ ꨓꨝꨳꩀ ꨕꨫ ꨕꨤꩌ ꨝꩊ ꨌꨘꩉ ꩝ ꨛꨯꨮ ꨜꨯꨱꩀ ꨀꨚꩆ ꨗꨈꩉ ꩝ ꨚꨓꨶꨬ ꨨꨕꨬ ꨆꨩ ꨙꨶꨮꩈ ꨊꨭꨢꨮꩆ ꩞ ꩒ ꩞ ꨕꨤꩌ ꨗꨈꩉ ꨝꨯꨱꩊ ꨚꨞꩇ ꨡꨯꩆ ꨒꨯꨮꩆ ꩝ ꨦꨗꩃ ꨀꨗꨪꩅ ꨤꩄ ꨆꨩ ꨛꨯꨮ ꩝ ꨕꨯꨱꩀ ꨀꨚꩆ ꨗꨈꩉ ꨌꩌ ꩞ ꩓ ꩞ ꨢꩍ ꨐꨭꨩ ꨟꩀ ꨕꨶꨩ ꨗꨫ ꨛꨯꨮ ꨌꨳꨪꩇ ꨟꨓꨰ ꩝ ꨐꨭꨩ ꨋꩇ ꨨꨣꩀ ꨝꨴꨬ ꨟꨰ ꩝ ꨓꨢꩍ ꨗꨈꩉ ꨣꨯꨱꩃ ꨀꨝꨪꩍ ꩞ ꩔ ꩞ ꨓꨮꩊ ꨔꨭꩆ ꨗꨧꩀ ꨗꨈꨣꩈ ꨝꨤꩆ ꨆꨵꨮꨭ ꩝ ꨨꨣꩀ ꨗꨫ ꨙꨶꨮꩄ ꨟꨰ ꨕꨨꨵꨮꨭ ꩝ ꨐꨭꨩ ꨟꩀ ꨗꨫ ꨜꨯꨱꩀ ꨆꨩ ꨙꨶꨮꩈ ꨊꨶꨯꨮꩆ ꩞ ꩕ ꩞ ꨐꨭꨩ ꨟꩀ ꨨꨭꨩ ꨝꨩ ꨗꨫ ꨗꨯꨱ ꨆꨩ ꨚꨓꨯꨱ ꩝ ꨓꨐꨫ ꨝꨵꨯꨱꩍ ꨐꨭꨩ ꨝꨩ ꨗꨯꨱ ꩝ ꨛꨩꨩꨤꨪꨨꨪꩀ ꨕꨶꨩ ꨂꨣꩃ ꩞ ꩖ ꩞ ꨝꨵꨯꨱꩍ ꨐꨭꨩ ꨝꨴꨬ ꨢꨶꨮꩆ ꨀꨋꩆ ꨎꨩ ꨇꩌ ꨟꨮꨟꨰ ꩝ ꨚꨋꩇ ꨎꨳꨮꩃ ꨤꩃ ꨐꨭꨩ ꨝꨴꨬ ꩝ ꨀꨋꩆ ꨆꨰ-ꨓꨯꨱꩃ-ꨤꨪꩀ-ꨆꨵꨮꩃ ꩞ ꩗ ꩞ ꨐꨭꨩ ꨚꨙꩉ ꨓꩀ ꨆꨢꨮꨭ ꨋꩇ ꨓꨴꨶꨰ ꩝ ꨅꩍ ꨔꨮꨭ ꨆꨳꨮꩃ ꨋꩇ ꨎꨳꨮꩃ ꨨꨗꨶꨮꩈ ꩝ ꨨꨶꨮꩄ ꨕꨫ ꨢꨶꨮꩆ ꨓꩀ ꨀꨆꨯꨱꩀ ꩞ ꩘ ꩞ ꨨꨕꨳꩇ ꨧꨯꨱꩃ ꨀꨗꩀ ꨨꨳꨩ ꨌꨯꨱꩀ ꩝ ꨆꨙꨩ ꨆꨩ ꨢꨶꨮꩆ ꨓꩀ ꨀꨆꨯꨱꩀ ꩝ ꨨꨳꨩ ꨗꨫ ꨃꨥ ꨛꨯꨮ ꨤꨪꨊꨪꩀ ꩞ ꩙ ꩞ ꨐꨭꨩ ꨚꨙꩉ ꨝꨵꨬ ꨣꨤꨪꩆ ꨋꩇ ꨟꨑꩀ ꩝ ꨧꨯꨱꩃ ꨌꩈ ꨟꩀ ꨣꨧꨩ ꨒꨴꨶꩍ ꩝ ꨕꨫ ꨈꨵꨰ ꨨꨭꨩ ꨝꨪꨗꨫ ꨝꨩ ꨣꨰ ꨤꨪꨠꩍ ꩞ ꩑꩐ ꩞ ꨢꩍ ꨅꩍ ꨨꨭꨩ ꨆꨮꨭ ꨓꩀ ꨗꨫ ꨀꨆꨯꨱꩀ ꨨꨲꨩ ꨓꨤꩍ ꩝ ꨝꨩ ꨟꨣꨰ ꨤꨪꨠꩍ ꨝꨫ ꨕꨴꩍ ꩝ ꨆꨮꨭ ꨝꨩ ꨗꨫ ꨗꨯꨱ ꨤꨪꨠꩍ ꨚꨓꨯꨱ ꩞ ꩑꩑ ꩞ ꨀꨘꩀ ꨌꩌ ꨧꨶꩀ ꨢꨥꨩ ꨟꩃ ꨚꨝꩍ ꩝ ꨆꨩ ꨧꨯꨩ ꨗꨫ ꨌꩌ ꨅꨩ ꨚꨓꨶꩍ ꩝ ꨕꨶꨮꩋ ꨗꨫ ꨦꩀ ꨟꩃ ꨔꨭꩆ ꨨꨤꨬ ꩞ ꩑꩒ ꩞ ꨀꨮꩈ ꨌꨬ ꨛꨯꨮ ꨀꨗꨪꩅ ꨌꩌ ꨨꨰ ꩝ ꨌꩌ ꨨꨤꨭꩆ ꨎꨳꨯꨮꩃ ꨣꨈꨵꨰ ꩝ ꨌꨤꩍ ꨌꨤꨶꨮꩆ ꨗꨯꨱ ꨀꨝꨪꩍ ꩞ ꩑꩓ ꩞ ꨓꨭꩀ ꨧꨩ ꨌꨰꩀ ꨗꨫ ꨕꨴꨬ ꨆꨳꨮꩃ ꨙꨪꩍ ꩝ ꨐꨭꨩ ꨀꨓꨯꨱꩃ ꨓꨈꨯꩀ ꨀꨝꨪꩍ ꩝ ꨐꨭꨩ ꨃꨥ ꨓꨚꨩ ꨗꨯꨱ ꨨꨶꨩ ꨀꨨꨯꨱꩀ ꩞ ꩑꩔ ꩞ ꨗꨯꨱ ꨓꨮꩊ ꨦꨰꩅ ꨗꨫ ꨇꨶꨰ ꨀꨚꩆ ꨓꨤꨬ ꩝ ꨓꨊꨪꩆ ꨗꨫ ꨐꨭꨩ ꨓꨌꨬ ꨨꨥꨬ ꩝ ꨐꨭꨩ ꨝꨴꨬ ꨗꨫ ꨦꩇ ꨝꨴꨭꩍ ꨓꨈꨯꩀ ꩞ ꩑꩕ ꩞ ꨨꨶꨩ ꨅꩍ ꨓꨴꨭꩍ ꨎꩃ ꨀꨓꨯꨱꩃ ꨌꩌ ꨣꨬ ꩝ ꨕꨶꨮꩋ ꨗꨫ ꨦꩀ ꨟꩃ ꨙꨮꩈ ꨨꨤꨬ ꩝ ꨗꨫ ꨌꨬ ꨧꨘꩃ ꨚꨳꨯꨮꩍ ꨕꨫ ꨓꨳꩆ ꩞ ꩑꩖ ꩞ ꨀꨘꩀ ꨌꩌ ꨕꨯꩌ ꨕꨫ ꨀꨲꩆ ꨣꨯꨱꩃ ꨓꨳꩆ ꩝ ꨌꨬ ꨧꨘꩃ ꨕꨫ ꨣꨳꨪꩌ ꨚꨆꩉ ꩝ ꨀꨗꨪꩅ ꨀꨘꩀ ꨌꩌ ꨈꨪꨤꨩ ꩞ ꩑꩗ ꩞ ꨨꨟꨳꨪꩅ ꨦꩇ ꨌꨬ ꨗꨫ ꨛꨯꨮ ꨕꨮꩍ ꨕꨫ ꨝꩊ ꨚꨗꨴꩃ ꩝ ꨔꨴꨭꩍ ꨗꨫ ꨔꨴꨲꩍ ꨕꨤꩌ ꨓꨳꩆ ꩝ ꨦꨠꩉ ꨟꩃ ꨗꨯꨱ ꨆꨳꨮꩃ ꨆꨩ ꨓꨴꨭꩍ ꩞ ꩑꩘ ꩞ ꨓꨳꩇ ꨗꨯꨱ ꨀꨳꨮꩀ ꨝꨫ ꨓꨮꩊ ꨕꨶꨩ ꨂꨣꩃ ꩝ ꨢꩍ ꨝꨳꩀ ꨗꨫ ꨕꨮꩍ ꨕꨫ ꨚꨗꨴꩃ ꩝ ꨟꨣꨰ ꨀꨇꩆ ꨥꨮꩀ ꨝꨫ ꨕꨴꩍ ꩞ ꩑꩙ ꩞ ꨈꨡꩀ ꨕꨫ ꨌꨬ ꨗꨯꨱ ꨀꨇꩆ ꨓꨮꩊ ꨛꨯꨮ ꩝ ꨣꨡꨫ ꨣꨡꨲꩇ ꨝꨳꩀ ꨤꨯꨩ ꩝ ꨆꨩ ꨢꨶꨮꩆ ꨚꨙꩉ ꨨꨣꨬ ꨟꨤꩌ ꩞ ꩒꩐ ꩞ ꨟꩃ ꨕꨫ ꨔꨭꩆ ꨗꨧꩀ ꨀꨔꨰꩍ ꨤꨪꩆ ꨗꨫ ꨚꨪꩆ ꩝ ꨌꨴꨭꨩ ꨣꨈꨵꨰ ꨋꩇ ꨆꨤꨪꩆ ꩝ ꨐꨭꨩ ꨟꩀ ꨗꨫ ꨌꩌ ꨓꩀ ꨕꨫ ꨧꨯꨱꩍ ꩞ ꩒꩑ ꩞ ꨡꨯꩍ ꨢꨩ ꨗꩆ ꨕꨤꩌ ꨗꨫ ꨓꨳꩆ ꨨꨶꨮꩄ ꨤꨯꨩ ꩝ ꨧꨘꩃ ꨆꨩ ꨕꨴꨬ ꨅꩍ ꨨꨭꨩ ꨛꨯꨮ ꩝ ꨨꨚꩀ ꨤꨝꨪꩀ ꨆꨳꨮꩃ ꨈꨡꩀ ꩞ ꩒꩒ ꩞ ꨤꨆꨮꨭ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨌꩌ ꨨꨤꨭꩆ ꨏꩀ ꨤꨯꨩ ꩝ ꨤꨪꨨꨪꩀ ꨗꨈꩉ ꨅꩍ ꨨꨭꨩ ꨛꨯꨮ ꩞ ꩒꩓ ꩞ ꨀꨮꩈ ꨌꨬ ꨛꨯꨮ ꨀꨗꨪꩅ ꨌꩌ ꨟꨮꨓꨶꨬ ꨌꩌ ꨈꨪꨤꨩ ꩝ ꨓꨘꩍ ꨨꨟꨭꨩ ꨟꨕꨩ ꩝ ꨎꩃ ꨐꨭꨩ ꨟꩀ ꨀꨝꨪꩍ ꨆꨩ ꨐꨭꨩ ꩞ ꩒꩔ ꩞ ꨐꨭꨩ ꨚꨠꨧꨴꨰꩈ ꨧꨩ ꨣꨓꨭꩍ ꨎꨳꨯꨮꩃ ꨣꨝꨭꨥ ꩝ ꨐꨭꨩ ꨟꩀ ꨨꨟꨭꨩ ꨗꨯꨱ ꨕꨨꨵꨮꨭ ꩝ ꨣꨡꩍ ꨣꨡꨲꩇ ꨌꩌ ꨕꨨꨵꩀ ꩞ ꩒꩕ ꩞ ꨆꨴꨭꩃ ꨎꨳꨩ ꨧꨩ ꨤꨝꨪꩀ ꨧꨩ ꨎꩀ ꩝ ꨐꨭꨩ ꨟꩀ ꨨꨆꩀ ꨧꨩ ꨚꨵꨭꩍ ꨎꩀ ꨥꨮꩀ ꩝ ꨐꨭꨩ ꨚꨯꨱꩍ ꨀꨓꨯꨱꩃ ꨌꩌ ꨕꨨꨵꩀ ꩞ ꩒꩖ ꩞ ꨅꩍ ꨨꨆꩀ ꨐꨭꨩ ꨟꩀ ꨗꨫ ꨕꩆ ꨕꨫ ꨚꨙꨳꩀ ꩝ ꨝꨵꨯꨱꩍ ꨐꨭꨩ ꨟꩀ ꨝꨩ ꨓꨝꨳꩀ ꩝ ꨚꩃ ꨎꨠꩃ ꨐꨭꨩ ꨀꨓꨯꨱꩃ ꨚꨣꨯꨱꩃ ꨚꨣꨰꩍ ꩞ ꩒꩗ ꩞ ꨤꨆꨮꨭ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨨꨳꨮꩇ ꨗꨫ ꨙꩇ ꨝꨳꩀ ꨤꨯꨩ ꩝ ꨧꨪꨝꩉ ꨟꨩ [ꨟꩃ] ꨌꩌ ꨌꨳꨪꩇ ꨟꩃ ꨟꨨꨭꨩ ꩞ ꩒꩘ ꩞ ꨤꨪꨆꨮꨭ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨢꩍ ꨀꨗꨪꩅ ꨌꩌ ꨕꨪꨨꨵꩀ ꩝ ꨚꨳꨯꨮꩍ ꨗꨯꨱꩃ ꨀꨳꨩ ꨆꨩ ꨛꨯꨮ ꩞ ꩒꩙ ꩞ ꨓꨖꨭꨥ ꨀꨢꨭꩍ ꨌꨬ ꨧꨭꨩ ꨛꨯꨮ ꨕꨯꨝꨓꨩ ꩝ ꨋꩇ ꨗꨫ ꨖꩉ ꨆꨩ ꨀꨘꩀ ꨌꩌ ꨈꨪꨤꨩ ꩝ ꨅꩍ ꨚꩀ ꨤꨪꨝꨪꩀ ꨆꨳꨮꩃ ꨈꨡꩀ ꩞ ꩓꩐ ꩞ ꨆꨭꩀ ꨀꨆꨯꨱꩀ ꨓꨚꩀ ꨧꨭꨩ ꨛꨯꨮ ꨔꩅ ꨓꨳꩀ ꩝ ꨛꨯꨮ ꨗꨫ ꨟꩀ ꨕꩆ ꨕꨫ ꨚꨙꨳꩀ ꩝ ꨌꩌ ꨕꨨꨵꩀ ꨎꨮꩃ ꨨꨤꩉ ꩞ ꩓꩑ ꩞ ꨛꨯꨮ ꨢꨶꨮꩆ ꨕꨫ ꨕꨤꩌ ꨗꨈꩉ ꨡꨪꩂ ꨔꨭꩆ ꩝ ꨐꨭꨩ ꨚꨯꨱꩍ ꨀꨓꨯꨱꩃ ꨌꩌ ꨕꨨꨵꩀ ꩝ ꨚꨢꩍ ꨈꨤꩃ ꨝꨩ ꨚꨩ ꨊꨯꨱꩀ ꩞ ꩓꩒ ꩞ ꨐꨭꨩ ꨋꩇ ꨆꨵꨮꨭ ꨗꨫ ꨔꨭꩆ ꨕꨯꨩ ꨨꨳꨩ [ꨕꨯꩌ ꨕꨫ ꨨꨳꨩ] ꩝ ꨆꨧꨯꨱꩅ ꨚꨙꩇ ꨤꨯꨩ ꨕꨫ ꨨꨳꨩ ꩝ ꨤꨯꨮꩃ ꨨꨗꨶꩀ ꨎꩃ ꨅꩍ ꨜꩅ ꩞ ꩓꩓ ꩞ ꨐꨭꨩ ꨜꩅ ꨆꨩ ꨢꨶꨮꩆ ꨐꨭꨩ ꨧꨩ ꨝꨤꩆ ꨧꨩ ꨆꨎꨮꩃ ꩝ ꨎꨳꨯꨮꩆ ꨧꨩ ꨆꨶꩆ ꨡꨮꩃ ꨤꨝꨰꩍ ꩝ ꨆꨩ ꨨꨕꨳꨪꩇ ꨧꨯꨱꩃ ꨀꨘꩀ ꩞ ꩓꩔ ꩞ ꨌꩌ ꨨꨤꨭꩆ ꨨꨕꨳꩇ ꨀꨘꩀ ꨟꩀ ꨎꨗꨪꩂ ꩝ ꨝꨴꩍ ꨅꩍ ꨨꨭꨩ ꨧꨩ ꨚꨊꨪꩆ ꩝ ꨢꨶꨮꩆ ꨚꨙꩉ ꨨꨣꨬ ꨟꨤꩌ ꩞ ꩓꩕ ꩞ ꨆꨗꨩ ꨕꨫ ꨌꨬ ꨗꨯꨱ ꨚꨔꨮꨭ ꨛꨯꨮ ꨨꨰ ꩝ ꨐꨭꨩ ꨤꩄ ꨗꨫ ꨨꨩ ꨌꩌ ꨣꨈꨵꨰ ꩝ ꨚꨓꨯꨱ ꨗꨫ ꨝꨳꨩ ꨨꨲꨩ ꨨꨚꩀ ꩞ ꩓꩖ ꩞ ꨚꨓꨯꨱ ꨢꨶꨮꩆ ꨚꨙꨶꨮꩄ ꨨꨣꩀ ꨟꨰ ꨟꨤꩌ ꩝ ꨐꨭꨩ ꨚꨙꩉ ꨟꩀ ꨌꩌ ꩝ ꨗꨯꨱ ꨟꨧꨭꩍ ꨙꨯꨮꩃ ꨗꨰ ꩞ ꩓꩗ ꩞ ꨀꨘꩀ ꨌꩌ ꨙꨶꨮꩄ ꨌꨤꩍ ꨓꨠꨩ ꨈꨵꨰ ꩝ ꨢꨶꨮꩆ ꨟꩀ ꨀꨘꩀ ꨧꨯꨱꩃ ꨨꨕꨳꨮꩇ ꨝꨩ ꨟꨰ ꩝ ꨐꨭꨩ ꨝꨭꩍ ꨓꨗꨳꩇ ꨧꨯꨱꩃ ꨀꨗꨭꩍ ꩞ ꩓꩘ ꩞ ꨀꨗꨪꩅ ꨨꨕꨳꩇ ꨓꨝꨳꩀ ꨕꨫ ꨈꨵꨰ ꨥꨮꩀ ꨟꨰ ꩝ ꨌꨳꨪꩇ ꨆꨩ ꨢꨶꨮꩆ ꨚꨠꨓꨰ ꩝ ꨓꨯꩀ ꨗꨫ ꨆꨵꩍ ꨨꨕꨳꨮꩇ ꨀꨘꩀ ꩞ ꩓꩙ ꩞ ꨐꨭꨩ ꨟꩀ ꨌꩌ ꨋꩇ ꨗꨫ ꨈꨵꩄ ꨝꨩ ꨗꨯꨱ ꩝ ꨐꨭꨩ ꨚꨙꨶꨮꩄ ꨨꨣꩀ ꨗꨯꨱ ꨆꨩ ꨚꨓꨯꨱ ꩝ ꨚꨚꨙꩉ ꨗꨫ ꨟꩀ ꨌꩌ ꨝꨫ ꨨꨭꨩ ꩞ ꩔꩐ ꩞ ꨚꨓꨯꨱ ꨚꨙꩉ ꨟꩀ ꨗꨫ ꨌꩌ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꩝ ꨢꨶꨮꩆ ꨚꨓꨯꨱꩌ ꨀꨝꨪꩍ ꨝꨩ ꨟꨣꨰ ꩝ ꨗꨫ ꨚꨌꨆꨯꨱꩃ ꨜꨥ ꨗꨯꨱ ꨝꨫ ꨕꨴꩍ ꩞ ꩔꩑ ꩞ ꨐꨭꨩ ꨈꨗꨯꨱꩃ ꨕꨤꩌ ꨗꨫ ꨓꨳꩆ ꨝꨳꩀ ꨤꨯꨩ ꩝ ꨐꨭꨩ ꨆꨶꨰꩅ ꨗꨫ ꨤꩄ ꨟꩀ ꨛꨯꨮ ꩝ ꨝꨩ ꨗꨫ ꨗꨯꨱ ꨤꨪꨠꩍ ꨚꨓꨯꨱ ꩞ ꩔꩒ ꩞ ꨝꨵꨯꨱꩍ ꨢꨶꨯꩆ ꨚꨙꨶꨮꩄ ꨨꨣꩀ ꨥꨮꩀ ꨗꨯꨱ ꩝ ꨐꨭꨩ ꨤꨪꨆꨮꨭ ꨕꨫ ꨚꨓꨯꨱ ꩝ ꨐꨭꨩ ꨆꨳꨮꩃ ꨗꨯꨱ ꨕꨮꩃ ꨟꨧꨭꩍ ꩞ ꩔꩓ ꩞ ꨕꨯꩌ ꨢꨶꨮꩆ ꨤꨊꨪꨥ ꨈꨤꨮꩃ ꨝꨳꩀ ꨁꨣꨮꩋ ꩝ ꨚꨓꨯꨱ ꨗꨫ ꨝꨴꨬ ꨆꨩ ꨐꨭꨩ ꨚꨈꨵꨮꩍ ꩝ ꨆꨵꨮꨭ ꨂꨣꩃ ꨧꨩ ꨎꨤꨩ ꩞ ꩔꩔ ꩞ ꨐꨭꨩ ꨚꨶꨮꩄ ꨢꨮꨭ ꨐꨭꨩ ꨀꨘꩀ ꨕꨯꨝꨭꨓꨩ ꩝ ꨐꨭꨩ ꨚꨶꨮꩄ ꨗꨫ ꨝꨵꨯꨱꩍ ꨅꨩ ꨨꨰ ꨆꨙꨩ ꩝ ꨗꨈꩉ ꨚꨤꨬ ꨐꨭꨩ ꨆꨳꨮꩃ ꨗꨯꨱ ꩞ ꩔꩕ ꩞ ꨤꨆꨮꨭ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨢꨶꨮꩆ ꨨꨣꨮꩍ ꨝꨳꩀ ꨤꨯꨩ ꩝ ꨐꨭꨩ ꨆꨶꨰꩅ ꨚꨣꨯꨱꩃ ꨌꩌ ꨕꨨꨵꩀ ꩞ ꩔꩖ ꩞ ꨕꨫ ꨙꨮꩈ ꨚꨓꨯꨱ ꨎꨳꨩ ꨗꨫ ꨤꨯꨱꩃ ꨨꨭꨩ ꨡꨳꩀ ꩝ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꨐꨭꨩ ꨃꨥ ꨀꨝꨪꩍ ꩝ ꨓꨯꨱꩌ ꨟꨣꨰ ꨐꨭꨩ ꨚꨨꨆꩀ ꨎꨳꨩ ꨟꨎꩀ ꩝ ꨐꨭꨩ ꨣꨪꩀ ꨗꨫ ꨎꨳꨯꨮꩆ ꨆꨵꨮꨭ ꨓꨳꨮꩆ ꩞ ꩔꩗ ꩞ ꨚꨓꨯꨱ ꨚꨙꩉ ꨋꩇ ꨈꨤꨮꩃ ꨟꩃ ꨕꨫ ꨆꩊ ꩝ ꨋꩇ ꨈꨤꨮꩃ ꨨꨓꩀ ꨚꨰ ꨕꨫ ꨈꨴꨮꩇ ꨗꨈꩉ ꩝ ꨝꨩ ꨚꨕꨰ ꨨꨆꩀ ꨀꨝꨪꩍ ꨧꨩ ꨝꨯꨱꩍ ꨈꨤꩃ ꩞ ꩔꩘ ꩞ ꨕꨫ ꨙꨮꩈ ꨚꨓꨯꨱ ꨟꨪꩂ ꨗꨫ ꨟꩃ ꨋꩇ ꨚꨡꨶꩀ ꩝ ꨎꨳꨩ ꨚꨕꨰ ꨎꩃ ꨨꨆꩀ ꩝ ꨐꨭꨩ ꨋꩇ ꨈꨤꩃ ꨈꨴꨮꩇ ꨗꨈꨮꩉ ꩞ ꩔꩙ ꩞ ꨐꨭꨩ ꨚꨡꨶꩀ ꨧꨩ ꨆꨩ ꨡꩆ ꨎꨳꨩ ꨎꨤꨭꩀ ꩝ ꨐꨭꨩ ꨋꩇ ꨕꨫ ꨌꩌ ꨕꨴꨬ ꨚꨧꨴꨭꩀ ꩝ ꨐꨭꨩ ꨟꨯꨱꩀ ꨓꨝꨳꩀ ꨝꨵꨯꨱꩍ ꨐꨭꨩ ꨡꨮꩃ ꩞ ꩕꩐ ꩞ ꨀꨆꨯꨱꩀ ꨌꩌ ꨐꨭꨩ ꨣꨪꩀ ꨎꨳꨯꨮꩆ ꨧꨩ ꨂꨣꩃ ꨧꨩ ꨆꨶꩆ ꨗꨫ ꨆꨵꨮꨭ ꩝ ꨧꨩ ꨂꨣꩃ ꨧꨩ ꨆꨶꩆ ꨤꨪꨠꨩ ꩝ ꨐꨭꨩ ꨚꨙꩉ ꨝꨩ ꨓꨠꨩ ꩝ ꨤꨪꨠꩍ ꨝꨫ ꨓꨮꩊ ꨕꨤꩌ ꨈꨤꩃ ꩞ ꩕꩑ ꩞ ꨢꩍ ꨆꨣꩃ ꨎꨳꨯꨮꩆ ꨨꨗꨴꨪꩂ ꨎꩃ ꨅꨩ ꨚꨮꩃ ꩝ ꨢꨶꨮꩆ ꨀꨓꨯꨱꩃ ꨚꨀꨚꩆ ꩝ ꨚꨙꨮꩉ ꨗꨫ ꨙꨶꨮꩄ ꨕꨶꩍ ꨝꨫ ꨨꨭꨩ ꩞ ꩕꩒ ꩞ ꨆꨭꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨢꨶꨮꩆ ꨗꨫ ꨨꨳꩇ ꨌꩌ ꨤꨯꨩ ꩝ ꨤꨪꨨꨪꩀ ꨀꨝꨪꩍ ꨓꨪꨎꨭꩍ ꨚꨤꨬ ꩞ ꩕꩓ ꩞ ꨢꨶꨮꩆ ꨚꨯꨱꩍ ꨀꨓꨯꨱꩃ ꨋꩇ ꨗꨫ ꨎꨳꨩ ꨅꩍ ꨨꨭꨩ ꩝ ꨆꨵꩀ ꨚꨤꨬ ꨙꨶꨮꩄ ꨓꨠꨩ ꩝ ꨝꨮꩉ ꨕꨤꩌ ꨌꨴꨭꨩ ꨣꨈꨵꨰ ꩞ ꩕꩔ ꩞ ꨝꨵꨯꨱꩍ ꨐꨭꨩ ꨟꩀ ꨆꨰ ꨗꨫ ꨓꨯꨱꩃ ꨝꨩ ꨟꨰ ꩝ ꨝꨯꨱꩊ ꨌꩌ ꨨꨲꨩ ꨕꨮꩇ ꨓꨠꨩ ꨌꨴꨭꨩ ꨣꨈꨵꨰ ꩝ ꨨꨲꨩ ꨌꨳꨪꩇ ꨨꨆꩀ ꨀꨤꨩ ꨆꨩ ꨐꨭꨩ ꩞ ꩕꩕ ꩞ ꨆꨰ ꨓꨯꨱꩃ ꨨꨳꨩ ꨗꨫ ꨔꨮꨭ ꨎꨯꨮꩍ ꨆꨩ ꨕꨴꨬ ꩝ ꨌꩌ ꨗꨫ ꨙꨶꨮꩄ ꨆꨵꩀ ꨚꨤꨬ ꩝ ꨐꨭꨩ ꨟꩀ ꨗꨫ ꨌꩌ ꨚꨠꨧꨴꨰꩈ ꩞ ꩕꩖ ꩞ ꨢꩍ ꨅꩍ ꨌꨳꨪꩇ ꨢꨶꨮꩆ ꨗꨫ ꨕꩆ ꨕꨫ ꨚꨙꨳꩀ ꩝ ꨆꨵꨮꨭ ꨧꨭꨩ ꨣꨬ ꨐꨭꨩ ꨓꨝꨳꩀ ꩝ ꨐꨭꨩ ꨚꨯꨱꩍ ꨀꨓꨯꨱꩃ ꨙꨶꨮꩄ ꨝꨫ ꨕꨴꩍ ꩞ ꩕꩗ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨛꨯꨮ ꨨꨰ ꩝ ꨐꨭꨩ ꨋꩇ ꨕꨫ ꨌꩌ ꨆꨳꨮꩃ ꨆꨩ ꨝꨴꨰ ꩝ ꨌꨤꩍ ꨀꨘꩀ ꨕꨫ ꨁꨘꨩ ꩞ ꩕꩘ ꩞ ꨕꨫ ꨙꨯꨮꩈ ꨚꨓꨯꨱ ꨟꨪꩂ ꨗꨫ ꨟꩃ ꨓꨈꨯꩀ ꨣꨰ ꩝ ꨐꨭꨩ ꨋꩇ ꨨꨣꩀ ꨝꨴꨬ ꨟꨰ ꩝ ꨚꨓꩀ ꨆꨢꨮꨭ ꨧꨯꨱꩃ ꨚꨚꩆ ꨣꨓꨭꩍ ꨣꨝꨭꨥ ꩞ ꩕꩙ ꩞ ꨐꨭꨩ ꨓꩀ ꨝꨵꨯꨱꩍ ꨙꨶꨮꩄ ꨨꨣꩀ ꨟꨰ ꨕꨨꨵꨮꨭ ꩝ ꨐꨭꨩ ꨚꨯꨱꩀ ꨗꨫ ꨟꩀ ꨆꨝꨥ ꨕꨫ ꨢꨮꨭ ꩝ ꨗꨫ ꨆꨵꩀ ꨨꨟꨭꨩ ꨤꨶꨮꩈ ꨝꨤꨭꨥ ꩞ ꩖꩐ ꩞ ꨀꨘꩀ ꨌꩌ ꨡꨮꩃ ꨎꨗꨪꩂ ꨝꨯꨱꩍ ꨆꨢꨮꨭ ꩝ ꨟꨝꨭꩀ ꨨꨥꨪꩂ ꨅꩍ ꨔꨮꨭ ꨆꨩ ꨕꨴꨬ ꩝ ꨝꨵꨯꨱꩍ ꨧꨆꨴꨲꩆ ꨨꨕꨳꨮꩇ ꨀꨘꩀ ꩞ ꩖꩑ ꩞ ꨀꨘꩀ ꨌꩌ ꨨꨤꨭꩆ ꨆꨧꨯꨱꩅ ꨝꨳꩀ ꨤꨯꨩ ꩝ ꨆꨩ ꨢꨶꨮꩆ ꨚꨙꩉ ꨝꨳꩀ ꨇꨯꨩ ꩝ ꨤꨧꨬ ꨅꨩ ꨨꨭꨩ ꨝꨭꩍ ꨕꨫ ꨓꨳꩆ ꩞ ꩖꩒ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨣꨡꨫ ꨣꨡꨲꩇ ꨝꨳꩀ ꨤꨯꨩ ꩝ ꨢꨶꨯꨮꩆ ꨚꨙꩉ ꨨꨣꨬ ꨟꨤꩌ ꩝ ꩖꩓ ꩞ ꨚꨓꨯꨱ ꨢꨶꨯꨮꩆ ꨚꨙꩉ ꨚꨆꨶꨮꩄ ꨣꨝꨯꨱꩃ ꨚꨎꨳꨯꨮꩃ ꨝꨓꨮꨭ ꩝ ꨚꨋꩇ ꨝꨗꩀ ꨨꨟꨭꨩ ꨝꨣꨭꨥ ꩝ ꨐꨭꨩ ꨚꨎꨳꩀ ꨆꨳꨮꩃ ꨆꨕꨴꩍ ꩞ ꩖꩔ ꩞ ꨐꨭꨩ ꨚꨯꨱꩍ ꨀꨘꩀ ꨌꩌ ꨕꨨꨵꩀ ꨤꨯꨩ ꨟꨕꨩ ꩝ ꨝꨭꩍ ꨝꨓꨮꨭ ꨝꩀ ꨎꨤꨩ ꩝ ꨟꨓꨰ ꨆꨝꨥ ꨕꨤꩌ ꨣꨝꨯꨱꩃ ꩞ ꩖꩕ ꩞ ꨢꨶꨮꩆ ꨚꨙꩉ ꨓꩀ ꨆꨢꨮꨭ ꨊꨯꨱꩀ ꨀꨗꨴꨯꨱꩃ ꩝ ꨝꨭꩍ ꨝꨓꨮꨭ ꨕꨫ ꨈꨴꨮꩇ ꨈꨤꨯꨱꩃ ꩝ ꨀꨳꨩ ꨗꨫ ꨙꨶꨮꩄ ꨎꩃ ꨅꩍ ꨆꨵꨯꨱꩍ ꩞ ꩖꩖ ꩞ ꨝꨮꩀ ꨅꩍ ꨆꨵꨯꨱꩍ ꨐꨭꨩ ꨟꩀ ꨗꨫ ꨟꨰ ꨐꨭꨩ ꨀꨓꨯꨱꩃ ꩝ ꨀꨳꨩ ꨗꨫ ꨙꨶꨮꩄ ꨈꨴꨮꩇ ꨈꨤꨯꨱꩃ ꩝ ꨚꨙꩉ ꨗꨫ ꨝꨮꩀ ꨆꨳꨮꩃ ꨆꨩ ꨆꨵꨯꨱꩍ ꩞ ꩖꩗ ꩞ ꨢꨶꨮꩆ ꨟꩀ ꨌꩌ ꨀꨓꨯꨱꩃ ꨚꨣꨯꨱꩃ ꨚꨣꨰꩍ ꩝ ꨋꩇ ꨧꨪꨝꩉ ꨆꨳꨮꩃ ꨤꨈꨰꩍ ꩝ ꨝꨮꩀ ꨗꨫ ꨀꨳꨩ ꨆꨳꩃ ꨨꨭꨩ ꩞ ꩖꩘ ꩞ ꨝꨤꩆ ꨧꨩ ꨈꨴꨲꩌ ꨟꨐꨫ ꨀꨳꨩ ꨟꨰ ꩝ ꨓꨤꩍ ꨝꨗꩀ ꨝꨴꨰ ꨣꨰ ꩝ ꨙꨶꨮꩄ ꨗꨫ ꨎꨳꨯꨮꩃ ꨆꨴꨯꨱꩃ ꨣꨪꨢꨩ ꩞ ꩖꩙ ꩞ ꨆꨵꨮꩆ ꨔꨭꨩ ꨥꩃ ꨗꨫ ꨈꨴꨭꩀ ꨧꨶꩀ ꨢꨥꨩ ꩝ ꨟꩃ ꨚꨈꨯꨮꨩ ꨓꨮꩊ ꨎꨤꨩ ꩝ ꨕꨯꨱꩀ ꨧꨘꩃ ꨕꨯꩌ ꨕꨫ ꨣꨭꨥ ꩞ ꩗꩐ ꩞ ꨀꨘꩀ ꨌꩌ ꨧꨩ ꨚꨤꨬ ꨕꩀ ꨔꨮꨭ ꩝ ꨚꨳꨯꨮꩍ ꨚꨙꩉ ꨜꩀ ꨝꨓꨮꨭ ꩝ ꨕꨫ ꨕꨤꩌ ꨝꨝꩍ ꨣꨝꨯꨱꩃ ꩞ ꩗꩑ ꩞ ꨢꨶꨮꩆ ꨚꨙꩉ ꨜꩀ ꨝꨓꨮꨭ ꨗꩆ ꨆꨩ ꨣꨯꨱꩃ ꩝ ꨧꨩ ꨝꨤꩆ ꨧꨩ ꨆꨙꨯꨱꩌ ꩝ ꨢꨶꨮꩆ ꨚꨙꩉ ꨝꨵꨯꨱꩍ ꨐꨭꨩ ꨀꨓꨯꨱꩃ ꨨꨣꨬ ꨟꨤꩌ ꨕꨯꩌ ꨕꨫ ꨨꨳꨩ ꩞ ꩗꩒ ꩞ ꨈꨴꨲꩌ ꨟꨰ ꨕꨫ ꨝꨤꩆ ꨧꨩ ꨕꨶꨩ ꩝ ꨛꨯꨩꩀ ꨗꨫ ꨦꨮꩇ ꨧꨶꩀ ꨢꨥꨩ ꩝ ꨗꨫ ꨆꨵꩀ ꨨꨟꨭꨩ ꨌꩌ ꨀꨝꨪꩍ ꩞ ꩗꩓ ꩞ ꨢꨶꨮꩆ ꨚꨙꩉ ꨋꩇ ꨝꨗꩀ ꨥꨮꩀ ꨆꨩ ꩝ ꨌꩌ ꨨꨤꨭꩆ ꨀꨮꩀ ꨤꨚꨩ ꩝ ꨝꨴꩍ ꨚꨕꨰ ꨅꨩ ꨨꨭꨩ ꨧꨫ ꨡꨮꩃ ꩞ ꩗꩔ ꩞ ꨓꨭꩀ ꨧꨩ ꨌꩃ ꨐꨭꨩ ꨙꨪꩍ ꨚꨮꩃ ꨎꨶꨩ ꩝ ꨆꨴꨲꩍ ꨟꨤꩌ ꨝꨵꨯꨱꩍ ꨝꨩ ꩝ ꨈꨴꨮꩇ ꨚꨤꨬ ꨕꨮꩇ ꨀꨝꨪꩍ ꩞ ꩗꩕ ꩞ ꨐꨭꨩ ꨥꩃ ꨟꩀ ꨀꨝꨪꩍ ꨈꨴꨮꩇ ꨚꨤꨬ ꩝ ꨌꨯꨱꩀ ꨗꨫ ꨨꨳꨩ ꨤꨆꨬ ꨆꨟꨬ ꩝ ꨆꨵꩀ ꨗꨫ ꨧꩃ ꨕꨮꩇ ꨟꨎꨶꨩ ꩞ ꩗꩖ ꩞ ꨨꨕꨳꨮꩇ ꨀꨘꩀ ꨨꨳꨩ ꨗꨫ ꨌꨯꨱꩀ ꨧꨶꩀ ꨢꨥꨩ ꩝ ꨝꨗꩀ ꨗꨫ ꨆꨴꨭꩃ ꨣꨩ ꨓꨨꨩ ꩝ ꨅꩍ ꨧꨬ ꨣꩃ ꨆꨳꨮꩃ ꨋꩇ ꨎꨳꨯꨮꩃ ꩞ ꩗꩗ ꩞ ꨟꩃ ꨕꨫ ꨙꨮꩈ ꨛꨯꨮ ꨆꨵꩆ ꨗꨫ ꨔꨭꨩ ꨋꩇ ꨅꩍ ꨎꨰ ꩝ ꨚꨎꨭꩌ ꨗꨫ ꨟꩀ ꨌꨴꨭꨩ ꨣꨈꨵꨰ ꩝ ꨌꩌ ꨚꨚꨵꩀ ꨣꨓꨭꩍ ꨣꨝꨭꨥ ꩞ ꩗꩘ ꩞ ꨆꨵꩆ ꨗꨫ ꨔꨭꨩ ꨥꩃ ꨗꨫ ꨈꨴꨭꩀ ꨆꨰꩀ ꨌꨗꨭꨥ ꩝ ꨀꨳꨩ ꨗꨫ ꨦꨶꨩ ꨓꨭꩀ ꨆꨵꨮꨭ ꩝ ꨓꨤꩍ ꨝꨗꩀ ꨔꨮꩀ ꨆꨢꨮꨭ ꨗꨯꨱ ꨀꨝꨪꩍ ꨓꨠꨩ ꨓꨧꨪꩀ ꩞ ꩗꩙ ꩞ ꨆꨵꩆ ꨔꨭꨩ ꨃꨥ ꨗꨫ ꨌꨴꨭꨩ ꨧꨯꨱꩃ ꨣꨈꨵꨰ ꩝ ꨜꩅ ꨦꨣꨩ ꨝꨴꩍ ꨚꨕꨰ ꩝ ꨐꨭꨩ ꨓꨳꩇ ꨓꨈꨯꩀ ꨌꨮꩀ ꨀꨝꨪꩍ ꩞ ꩘꩐ ꩞ ꨟꨕꨩ ꨧꨭꨣꩀ ꨟꩃ ꨚꨓꨯꨱ ꨝꨴꨬ ꨟꨰ ꩝ ꨐꨭꨩ ꨚꨋꩇ ꨀꨨꨯꨱꩀ ꨈꨤꨰ ꩝ ꨐꨭꨩ ꨟꩀ ꨗꨫ ꨌꩌ ꨓꩀ ꨓꨟꨰꩍ ꨕꨫ ꨌꨮꩀ ꨆꨤꨯꨱꩃ ꩞ ꩘꩑ ꩞ ꨓꩀ ꨝꨵꨯꨱꩍ ꨐꨭꨩ ꨟꩀ ꨚꨨꨶꨩ ꨈꩆ ꨆꨴꨯꨱꩃ ꩝ ꨐꨭꨩ ꨟꩀ ꨗꨫ ꨌꩌ ꨝꨵꨯꨱꩍ ꨀꨓꨯꨱꩃ ꩝ ꨧꨪꨝꩉ ꨅꩍ ꨨꨶꨩ ꨓꨴꨭꩆ ꨝꨫ ꨕꨴꩍ ꩞ ꩘꩒ ꩞ ꨨꨶꨩ ꨤꨪꨝꨭꩍ ꨓꨆꨚꨴꩍ ꨚꨴꩍ ꨆꨣꩆ ꨚꨵꨮꩀ ꨤꨪꨆꨭꩀ ꩝ ꨐꨭꨩ ꨚꨯꨱꩍ ꨀꨓꨯꨱꩃ ꨓꨶꨬ ꨆꨕꨭꩀ ꩝ ꨌꩌ ꨨꨤꨭꩆ ꨝꨳꩀ ꨣꨡꩍ ꩞ ꩘꩓ ꩞ ꨢꨶꨮꩆ ꨚꨨꨶꨩ ꨆꨴꨲꩍ ꨨꨣꨬ ꨝꨴꨯꩀ ꨕꨢꨮꩇ ꩝ ꨆꨭꩀ ꨀꨆꨯꨱꩀ ꨝꨵꨯꨱꩍ ꨨꨓꨮꩇ ꩝ ꨆꨩ ꨢꨶꨮꩆ ꨚꨙꨮꩉ ꨚꨴꨯꨮꨥ ꨨꨃꨥ ꩞ ꩘꩔ ꩞ ꨝꨓꨭꩍ ꨓꨊꨪꩆ ꨨꨳꩀ ꨗꨫ ꨦꨮꩇ ꨚꨶꨮꩄ ꨅꨩ ꨓꨴꨭꩍ ꩝ ꨀꨘꩀ ꨌꩌ ꨗꨫ ꨨꨤꨭꩆ ꨕꨗꨭꩍ ꩝ ꨕꨶꨮꩋ ꨗꨫ ꨦꩀ ꨆꨩ ꨢꨶꨮꩆ ꨚꨙꨮꩉ ꩞ ꩘꩕ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨝꨪꨓꨮꩊ ꨛꨯꨮ ꩝ ꨢꨶꨮꩆ ꨚꨙꨮꩉ ꨝꨳꩀ ꨤꨯꨩ ꩝ ꨨꨤꨬ ꨗꨈꩉ ꨌꩌ ꨆꨳꨮꩃ ꨗꨯꨱ ꩞ ꩘꩖ ꩞ ꨚꨓꨯꨱ ꨢꨶꨮꩆ ꨚꨙꨶꨮꩄ ꨨꨣꩀ ꨟꨰ ꨚꨙꨮꩉ ꩝ ꨗꨫ ꨟꩀ ꨌꩌ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꩝ ꨚꨓꨯꨱꩌ ꨗꨫ ꨈꨮꩇ ꨝꨩ ꨟꨰ ꨚꨤꨬ ꨚꨣꨪꩀ ꨚꩀ ꨈꨤꨮꩃ ꩞ ꩘꩗ ꩞ ꨨꨕꨳꩇ ꨀꨘꩀ ꨨꨳꨩ ꨗꨫ ꨌꨯꨱꩀ ꨝꨳꩀ ꨦꨮꩃ ꩝ ꨚꨓꨯꨱꩌ ꨀꨝꨪꩍ ꨚꩀ ꨈꨤꩃ ꩝ ꨐꨭꨩ ꨋꩇ ꨗꨫ ꨟꩀ ꨤꨪꩂ ꨚꨧꨴꩌ ꩞ ꩘꩘ ꩞ ꨢꨶꨮꩆ ꨚꨧꨴꩌ ꨣꨳꨪꩌ ꨗꨫ ꨔꨭꩆ ꨣꨳꨪꩌ ꨝꨭꨤꩆ ꩝ ꨨꨕꨳꩇ ꨀꨘꩀ ꨕꨯꨱꩀ ꨕꨫ ꨧꩃ ꩝ ꨀꨮꩀ ꨤꨚꨩ ꨆꨵꨯꨱꩍ ꨓꨳꩆ ꨅꩍ ꨔꨮꨭ ꨨꨚꩀ ꨆꨳꨮꩃ ꨕꨶꩍ ꨗꨫ ꨡꨮꩃ ꩞ ꩘꩙ ꩞ ꨆꨘꨩ ꨕꨫ ꨛꨯꨮ ꨗꨯꨱ ꨚꨔꨮꨭ ꨝꨵꨯꨱꩍ ꨀꨇꩆ ꩝ ꨐꨭꨩ ꨤꨶꨰ ꨗꨫ ꨌꩌ ꨚꨓꩀ ꨚꨚꩆ ꩝ ꨐꨭꨩ ꨣꨪꩀ ꨗꨫ ꨎꨳꨯꨮꩆ ꨥꨮꩀ ꨧꨩ ꨂꨣꩃ ꨓꨪꨎꨭꩍ ꨆꨶꨮꩆ ꨕꨶꨩ ꨓꨳꩆ ꨓꨳꨮꩆ ꩞ ꩙꩐ ꩞ ꨐꨭꨩ ꨣꨪꩀ ꨕꨫ ꨌꩌ ꨣꨳꨪꩌ ꨗꨫ ꨔꨭꩆ ꨣꨳꨪꩌ ꨝꨤꩆ ꩝ ꨆꨘꨩ ꨕꨫ ꨌꨬ ꨗꨯꨱ ꨀꨇꩆ ꩝ ꨣꨡꩍ ꨣꨡꨲꩇ ꨌꩌ ꨕꨨꨵꩀ ꩞ ꩙꩑ ꩞ ꨢꨶꨮꩆ ꨚꨓꩀ ꨒꨭꩍ ꨗꨫ ꨓꨚꨀꩌ ꨀꨆꨳꩀ ꩝ ꨆꨧꨯꨱꩅ ꨚꨙꩇ ꨌꩌ ꨝꨰꩀ ꩝ ꨗꨫ ꨡꨮꩃ ꨎꨗꨪꩂ ꨧꨯꨱꩃ ꨨꨝꨬ ꩞ ꩙꩒ ꩞ ꨛꨯꨮ ꨗꨫ ꨌꨬ ꨗꨯꨱ ꨀꨳꨮꩇ ꨕꨫ ꨈꨴꨮꩇ ꨗꨈꩉ ꩝ ꨧꩃ ꨗꨫ ꨌꩌ ꨕꨨꨵꩀ ꨗꨫ ꨧꨬ ꩝ ꨅꩍ ꨡꨯꩍ ꨧꨩ ꨝꨯꨱꩍ ꨧꩃ ꨀꨆꨳꩀ ꩞ ꩙꩓ ꩞ ꨗꨈꩉ ꨌꩌ ꨨꨤꨭꩆ ꨆꨔꨯꨱꩅ ꨚꨴꨯꨱꩃ ꨝꨳꩀ ꩝ ꨧꩃ ꨨꨓꩀ ꨟꩃ ꨀꨈꩀ ꩝ ꨨꨤꨭꩍ ꨗꨫ ꨟꨯꨱꩃ ꨡꨯꩍ ꨧꨈꨵꨮꩃ ꩞ ꩙꩔ ꩞ ꨛꨯꨮ ꨧꨯꨱꩃ ꨌꨬ ꨟꨰ ꨚꨗꨴꩃ ꨧꨩ ꨓꨮꩊ ꨚꨣꨪꩀ ꩝ ꨆꨩ ꨈꨝꩀ ꨣꩍ ꨓꨔꨪꩀ ꩝ ꨧꩃ ꨌꩌ ꨕꨨꨵꩀ ꨨꨚꩀ ꩞ ꩙꩕ ꩞ ꨓꨘꩍ ꨧꨳꩌ ꨨꨟꨭꨩ ꨗꨫ ꨖꨯꨱꩃ ꨢꨶꨮꩆ ꨟꩀ ꨆꨩ ꨐꨭꨩ ꩝ ꨕꨯꩌ ꨨꨟꨭꨩ ꨓꨘꩍ ꨨꨟꨭꨩ ꨆꨗꨭꨩ ꩝ ꨎꨥ ꨗꨫ ꨥꨮꩀ ꨆꨩ ꨌꩌ ꨕꨨꨵꩀ ꩞ ꩙꩖ ꩞ ꨢꨶꨮꩆ ꨔꨰꩅ ꨗꨫ ꨐꨭꨩ ꨤꩄ ꨗꨫ ꨐꨭꨩ ꨨꨭꨩ ꨚꨓꨯꨱ ꩝ ꨌꩌ ꨨꨤꨭꩆ ꨝꨳꩀ ꨨꨈꨥ ꩝ ꨛꨯꨮ ꨈꨗꨶꨮꩉ ꨎꨮꩃ ꨅꩍ ꨡꨯꨮꩍ [ꨡꨯꩍ] ꩞ ꩙꩗ ꩞ ꨟꩃ ꨕꨫ ꨆꩊ ꨤꨪꨥꨪꩀ ꨌꩌ ꨕꨨꨵꩀ ꨡꨮꩃ ꨆꨵꨮꩃ ꩝ ꨝꨳꩀ ꨦꨮꩃ ꨚꨓꨯꨱ ꨚꨋꩇ ꨎꨳꨯꨮꩃ ꨈꨤꩃ ꩝ ꨐꨭꨩ ꨟꩀ ꨗꨫ ꨆꨵꨮꩃ ꨎꨥ ꨆꨩ ꨢꨶꨮꩆ ꨗꨫ ꨌꨴꨭꨩ ꨣꨈꨵꨰ ꨐꨭꨩ ꨟꩀ ꨀꨝꨪꩍ ꨕꨫ ꨕꨴꨬ ꩞ ꩙꩘ ꩞ ꨌꩌ ꨕꨨꨵꩀ ꨙꨪꩀ ꨗꨫ ꨌꨮꩀ ꨝꨵꨬ ꨆꨝꨥ ꩝ ꨐꨭꨩ ꨡꨮꩃ ꨎꨳꨯꨮꩆ ꨎꩀ ꨓꨆꨰ ꩝ ꨧꨩ ꨗꨫ ꨕꨴꨬ ꨧꨩ ꨚꨵꨭꩍ ꨆꨶꩆ ꩞ ꩙꩙ ꩞ ꨐꨭꨩ ꨚꨆꨮꩇ ꨀꨘꩀ ꨗꨫ ꨌꩌ ꨕꨫ ꨣꨳꨪꩌ ꨨꨣꨬ ꩝ ꨓꨈꨯꩀ ꨗꨫ ꨌꨮꩀ ꨝꨵꨬ ꨝꨧꨬ ꩝ ꨓꨴꨩ ꨤꨮꨭꨀꨩ ꨎꨮꩃ [ꨎꨳꨯꨮꩃ] ꨅꩍ ꨝꨴꨬ ꩞ ꩑꩐꩐ ꩞ ꨐꨭꨩ ꨚꨆꨮꩇ ꨌꨴꨭꨩ ꨣꨈꨵꨰ ꨊꨯꨱꩀ ꨌꨮꩀ ꩝ ꨨꨲꨩ ꨡꨯꩍ ꨗꨫ ꨌꩌ ꨊꨯꨱꩀ ꨌꨮꩀ ꩝ ꨨꨲꨩ ꨟꩀ ꨝꨫ ꨨꨭꨩ ꨝꨩ ꨆꨩ ꨆꨮꨭ ꩞ ꩑꩐꩑ ꩞ ꨢꨶꨮꩆ ꨐꨭꨩ ꨙꨪꩀ ꨗꨫ ꨌꨮꩀ ꨝꨵꨬ ꨆꨝꨥ ꨣꨓꨭꩍ ꨣꨝꨭꨥ ꩝ ꨆꨵꨯꨱꩍ ꨗꨫ ꨢꨯꨱꩌ ꨐꨭꨩ ꨔꨮꨭ ꩝ ꨚꨶꨮꩄ ꨆꨩ ꨢꨶꨮꩆ ꨧꨩ ꨝꨯꨱꩍ ꨚꨗꨶꨮꩄ ꩞ ꩑꩐꩒ ꩞ ꨢꨶꨮꩆ ꨓꨈꨯꩀ ꨔꨮꨭ ꨗꨫ ꨌꨴꨭꨩ ꨝꨤꨩ ꨝꨧꩆ ꨡꨮꩃ ꩝ ꨕꨫ ꨌꨴꨭꨩ ꨕꨫ ꨣꨳꨪꩌ ꨚꨆꩉ ꩝ ꨚꨝꨵꨬ ꨆꨝꨥ ꨓꨳꩇ ꨆꨩ ꨐꨭꨩ ꩞ ꩑꩐꩓ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨓꨮꩊ ꨛꨯꨮ ꩝ ꨝꨴꩍ ꨚꨕꨰ ꨐꨭꨩ ꨡꨮꩃ ꨤꨯꨩ ꩝ ꨈꨭꨂꩈ ꨗꨫ ꨓꨴꨭꩆ ꨝꨩ ꨆꨩ ꨐꨭꨩ ꩞ ꩑꩐꩔ ꩞ ꨐꨭꨩ ꨋꩇ ꨨꨳꨮꩇ ꨌꩌ ꨗꨫ ꨧꨯꨱꩃ ꨌꨴꨭꨩ ꨝꨳꩀ ꨤꨯꨩ ꩝ ꨐꨭꨩ ꨤꩄ ꨗꨈꩉ ꨅꩍ ꨨꨭꨩ ꨛꨯꨮ ꩝ ꨡꨯꨮꩃ ꨚꨣꨯꨱꩃ ꨡꨮꩃ ꨚꨣꨰꩍ ꩞ ꩑꩐꩕ ꩞ ꨐꨭꨩ ꨋꩇ ꨕꨫ ꨌꨴꨭꨩ ꨚꨝꨵꨬ ꨀꨘꩀ ꨧꨯꨱꩃ ꨨꨕꨳꩇ ꨓꨰꩆꨡꨰꩆ ꩝ ꨐꨭꨩ ꨔꨮꨭ ꨗꨫ ꨎꨳꨩ ꨝꨤꨩ ꨝꨧꩆ ꩝ ꨐꨭꨩ ꨙꨶꨮꩄ ꨓꨠꨩ ꨆꨨꨯꨱꨥ ꨝꨗꨯꨱꨥ ꩞ ꩑꩐꩖ ꩞ ꨧꨩ ꨡꨰꩀ ꨝꨤꨩ ꨧꨩ ꨡꨰꩀ ꨝꨧꩆ ꩝ ꨧꨩ ꨂꨣꩃ ꨨꨤꨭꩆ ꨐꨭꨩ ꨋꩇ ꨧꨩ ꨌꨆꨭꩆ ꩝ ꨌꨴꨭꨩ ꨣꨈꨵꨰ ꨕꨮꩇ ꨀꨝꨪꩍ ꩞ ꩑꩐꩗ ꩞ ꨢꨶꨮꩆ ꨚꨙꨮꩉ ꨔꨮꨭ ꨝꨤꨩ ꨝꨧꩆ ꨨꨶꨩ ꨟꨰ ꩝ ꨣꨡꩍ ꨣꨡꨲꩇ ꨌꨴꨭꨩ ꨣꨈꨵꨰ ꩝ ꨌꨤꩍ ꨌꨤꨶꨮꩆ ꨗꨯꨱ ꨀꨝꨪꩍ ꩞ ꩑꩐꩘ ꩞ ꨆꨵꨮꨭ ꨙꨮꩈ ꨚꨓꨯꨱ ꨗꨫ ꨢꨶꨮꩆ ꨝꨳꩀ ꨡꨭꩊ ꩝ ꨐꨭꨩ ꨟꩀ ꨌꩌ ꨧꨯꨱꩃ ꨌꨴꨭꨩ ꨎꨯꨮꩃ ꨨꨤꨭꩆ ꨆꨵꨯꨱꩍ ꨐꨭꨩ ꩝ ꨤꨪꨠꨩ ꨚꨵꨭꩍ ꨚꩀ ꨔꨭꩆ ꨟꨗꨫ ꩞ ꩑꩐꩙ ꩞ ꨟꩃ ꨕꨪꨨꨵꨮꨭ ꨎꨳꨩ ꨗꨫ ꨤꨯꨱꩃ ꨓꨈꨯꩀ ꨣꨰ ꨎꨳꨯꨮꩃ ꨚꨓꨯꨱ ꩝ ꨐꨭꨩ ꨋꩇ ꨧꨭꨣꩀ ꨝꨴꨬ ꨗꨯꨱ ꩝ ꨕꨫ ꨈꨴꨮꩇ ꨗꨈꩉ ꨎꨳꨯꨮꩃ ꨐꨭꨩ ꨔꨮꨭ ꩞ ꩑꩑꩐ ꩞ ꨝꨵꨯꨱꩍ ꨐꨭꨩ ꨋꩇ ꨆꨰ ꨗꨫ ꨙꨶꨮꩈ ꨈꨗꨶꨮꩉ ꨎꩃ ꨚꨓꩀ ꨆꨢꨮꨭ ꩝ ꨆꨴꨯꨱꩃ ꨉꨲꩃ ꨣꨓꨭꩍ ꨣꨝꨭꨥ ꩝ ꨆꨵꨮꨭ ꨗꨫ ꨔꨭꩆ ꨆꨵꨮꨭ ꨝꨤꩆ ꨚꨋꩇ ꨈꨤꩃ ꨚꨓꨯꨱ ꨢꨶꨮꩆ ꩞ ꩑꩑꩑ ꩞ ꨓꩀ ꨝꨵꨯꨱꩍ ꨐꨭꨩ ꨚꨙꨶꨮꩄ ꨨꨣꩀ ꨟꨰ ꩝ ꨌꩃ ꨐꨭꨩ ꨟꩀ ꨝꨦꨰꩍ ꨋꩆ ꨀꨌꩉ ꩝ ꨚꨗꨳꨪꩇ ꨣꨕꨰꩍ ꨧꨯꨱꩃ ꨆꨭꨝꨥ ꩞ ꩑꩑꩒ ꩞ ꨚꨓꨯꨱ ꨢꨶꨮꩆ ꨚꨙꨮꩉ ꨋꩇ ꨣꨕꨰꩍ ꨆꨵꨮꨭ ꨣꨓꨭꩍ ꨔꨴꨭꩍ ꩝ ꨚꨎꨯꨮꩃ ꨆꨢꨮꨭ ꨚꨩ ꨀꨝꨪꩍ ꩝ ꨚꨩ ꨨꨌꨪꩍ ꨟꨰ ꨟꩃ ꨈꨵꨰ ꩞ ꩑꩑꩓ ꩞ ꨟꨓꨲꩍ ꨎꨤꩆ ꨎꨯꨱꩍ ꨣꨕꨰꩍ ꨟꨓꨰ ꨆꨭꨝꨥ ꩝ ꨐꨭꨩ ꨝꨴꨬ ꨨꨣꩀ ꨥꨮꩀ ꨟꨰ ꩝ ꨐꨭꨩ ꨟꩀ ꨀꨘꩀ ꨌꩌ ꨕꨨꨵꩀ ꩞ ꩑꩑꩔ ꩞ ꨢꨶꨮꩆ ꨚꨎꨭꩌ ꨣꨕꨰꩍ ꨆꨝꨥ ꨕꨯꨱꩀ ꨕꨫ ꨧꩃ ꩝ ꨈꩌ ꨟꨗꨶꨪꩋ ꨈꩌ ꨂꨣꩃ ꩝ ꨤꨝꨰꩍ ꨧꨩ ꨕꨴꨬ ꨅꩃ ꨓꨨꨩ ꩞ ꩑꩑꩕ ꩞ ꨨꨕꨳꨮꩇ ꨀꨘꩀ ꨤꨆꨬ ꨆꨭꨟꨬ ꨌꨯꨱꩀ ꨨꨳꨩ ꩝ ꨕꨤꩌ ꨗꨈꩉ ꨨꨤꨭꩆ ꨟꨎꨶꨩ ꩝ ꨅꩍ ꨨꨚꩀ ꨤꨝꨪꩀ ꨆꨳꨮꩃ ꨚꨢꨮꨭ ꩞ ꩑꩑꩖ ꩞ ꨆꨭꨘꨩ ꨕꨫ ꨌꨬ ꨗꨯꨱ ꨀꨇꩆ ꨝꨵꨯꨱꩍ ꨝꨪꨌꩆ ꩝ ꨀꨘꩀ ꨗꨫ ꨌꩌ ꨨꨤꨭꩆ ꨨꩊ ꩝ ꨟꨯꨱꩃ ꨀꨆꨯꨱꩀ ꨛꨯꨮ ꨟꨣꨰ ꩞ ꩑꩑꩗ ꩞ ꨀꨮꩈ ꨛꨯꨮ ꨌꨬ ꨀꨗꨪꩅ ꨌꩌ ꨨꨰ ꩝ ꨣꨡꩍ ꨣꨡꨲꩇ ꨕꨮꩇ ꨕꨫ ꨈꨵꨰ ꩝ ꨨꨕꨳꩇ ꨀꨘꩀ ꨅꩍ ꨡꨯꩍ ꨟꨓꨩ ꩝ ꩑꩑꩘ ꩞ ꨌꩌ ꨨꨤꨭꩆ ꨅꨩ ꨛꨩꨦꨯꩌ ꨓꨴꨩ ꨆꨩ ꨕꨴꨬ ꩝ ꨧꨩ ꨡꨯꩍ ꨗꨈꩉ ꨧꨯꨱꩃ ꨚꨤꨬ ꩝ ꨦꨭꩀ ꨕꨫ ꨆꩊ ꨢꨶꨩ ꨛꨯꨮ ꩞ ꩑꩑꩙ ꩞ ꨧꨗꨪꩅ ꨈꨪꨗꨴꨮꩍ ꨛꨯꨮ ꨧꨭꨟꨭꨩ ꨕꨯꨝꨓꨩ ꩝ ꨗꨯꨱ ꨚꨔꨮꨭ ꨚꩀ ꨀꨳꨩ ꩝ ꨗꨈꩉ ꨗꨫ ꨌꩌ ꨨꨤꨭꩆ ꨤꨨꨪꩀ ꩞ ꩑꩒꩐ ꩞ ꨛꨯꨮ ꨗꨯꨱ ꨟꩃ ꨚꨭꩉ ꨓꨮꩊ ꨚꨰ ꩝ ꨕꨫ ꨈꨴꨮꩇ ꨗꨫ ꨌꨮꩀ ꨓꨚꨩ ꨈꨵꨰ ꩝ ꨣꨡꩍ ꨣꨡꨲꩇ ꨎꩃ ꨧꨭꨩ ꨌꨬ ꩞ ꩑꩒꩑ ꩞ ꨛꨯꨮ ꨆꨤꨪꨝꩀ ꨟꩃ ꨗꨫ ꨌꨮꩀ ꨓꨮꩀ ꨓꨔꨪꩀ ꩝ ꨛꨯꨮ ꨗꨫ ꨕꨮꩍ ꨕꨫ ꨚꨣꨪꩀ ꩝ ꨌꩌ ꨨꨤꨭꩆ ꨀꨮꩆ ꨓꨝꨶꨮꩆ ꩝ ꩑꩒꩒ ꩞ ꨆꨭꩀ ꨀꨆꨯꨱꩀ ꨨꨳꨩ ꨧꨘꩃ ꨨꨶꨮꩄ ꨕꨫ ꨢꨶꨮꩆ ꩝ ꨡꨯꩍ ꨐꨭꨩ ꨚꨶꨮꩄ ꨣꨶꨮꩆ ꨚꨓꨶꨮꩆ ꩝ ꨆꨙꨩ ꨐꨭꨩ ꨟꩀ ꨌꩌ ꨀꨓꨯꨱꩃ ꩞ ꩑꩒꩓ ꩞ ꨌꩌ ꨨꨤꨭꩆ ꨨꨶꨮꩄ ꨧꨘꩃ ꨈꨴꨮꩇ ꨈꨤꨯꨱꩃ ꩝ ꨆꨙꨩ ꨆꨩ ꨐꨭꨩ ꨟꩀ ꨚꨯꨱꩍ ꨀꨓꨯꨱꩃ ꩝ ꨤꩄ ꨕꨨꨵꩀ ꨓꨚꩀ ꨧꨭꨩ ꨛꨯꨮ ꩞ ꩑꩒꩔ ꩞ ꨛꨯꨮ ꨌꨬ ꨋꩇ ꨗꨫ ꨧꩃ ꨕꨯꨱꩀ ꨆꨣꨬ ꩝ ꨀꨘꩀ ꨗꨫ ꨌꩌ ꨤꨆꨬ ꨆꨟꨬ ꩝ ꨔꩅ ꨝꨪꨢꩀ ꨇꨶꨰ ꨤꨪꨠꩍ ꩞ ꩑꩒꩕ ꩞ ꨛꨯꨮ ꨧꨭꨩ ꨌꨬ ꨎꨶꨰ ꨗꨫ ꨌꩇ ꨀꨘꩀ ꨈꨤꨩ ꩝ ꨛꨯꨮ ꨗꨫ ꨟꨰ ꨧꨩ ꨡꨮꩃ ꨓꨴꨩ ꩝ ꨤꨪꨆꨬ ꨆꨭꨟꨬ ꨎꩃ ꨨꨤꩉ ꩞ ꩑꩒꩖ ꩞ ꨛꨯꨮ ꨓꨳꩇ ꨌꨬ ꨗꨯꨱ ꨣꨡꨫ ꨣꨡꨲꩇ ꨧꨩ ꨕꨴꨬ ꩝ ꨌꩌ ꨨꨤꨬ ꨅꩍ ꨝꨴꨬ ꨤꨧꨬ ꩝ ꨀꨳꨩ ꨐꨭꨩ ꨅꩍ ꨝꨴꨬ ꨟꨐꨭꩌ ꩞ ꩑꩒꩗ ꩞ ꨛꨯꨮ ꨧꨭꨩ ꨌꨬ ꨨꨭꨩ ꨎꨫ ꨗꨫ ꨟꨯꨱꩃ ꨕꨫ ꨨꨓꨰ ꩝ ꨟꨓꨲꩍ ꨗꨫ ꨌꩌ ꨟꨓꨲꩍ ꨣꨈꨵꨰ ꩝ ꨗꨫ ꨌꨬ ꨧꨘꩃ ꨌꨰꩀ ꨕꨫ ꨓꨳꩆ ꩞ ꩑꩒꩘ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨔꩅ ꨓꨳꩀ ꩝ ꨆꨩ ꨀꨘꩀ ꨌꩌ ꨕꨨꨵꩀ ꩝ ꨇꨪꩆ ꨗꨯꨱ ꨨꨚꩀ ꨎꩃ ꨅꩍ ꨓꨴꨭꩍ ꩞ ꩑꩒꩙ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨚꩀ ꨀꨳꨩ ꩝ ꨆꨩ ꨀꨘꩀ ꨌꩌ ꨈꨪꨤꨩ ꩝ ꨢꨶꨮꩆ ꨟꩀ ꨀꨝꨪꩍ ꨋꩇ ꨨꨤꨭꩆ ꩞ ꩑꩓꩐ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨚꩀ ꨀꨳꨩ ꩝ ꨓꨘꩍ ꨚꨓꨯꨱ ꨢꨯꨩ ꨚꨣꨩ ꩝ ꨢꨶꨮꩆ ꨗꨫ ꨓꨳꩇ ꨟꩀ ꨀꨝꨪꩍ ꩞ ꩑꩓꩑ ꩞ ꨓꨘꩍ ꨚꨓꨯꨱ ꨟꩃ ꨗꨫ ꨚꨭꩉ ꨓꨮꩊ ꨚꨰ ꩝ ꨗꨯꨧꨣꨥꩆ ꨗꨫ ꨝꨳꨰ ꩝ ꨧꨯꨱꩃ ꨗꨫ ꨨꨶꨮꩉ ꨕꩉ ꨎꨪꨠꩍ ꩞ ꩑꩓꩒ ꩞ ꨆꨟꨫ ꨨꨤꨭꩆ ꨎꨳꨯꨮꩃ ꨚꨓꨯꨱ ꨀꨚꩆ ꨗꨈꩉ ꩝ ꨀꨤꨶꩍ ꨓꨤꨩ ꨗꨫ ꨚꨓꨮꩊ ꩝ ꨀꨚꩆ ꨓꨊꨪꩆ ꨓꨘꩃ ꨂꨣꩃ ꩞ ꩑꩓꩓ ꩞ ꨃꨥ ꨨꨶꨮꩉ ꨕꩉ ꨎꨪꨠꩍ ꨟꨣꨰ ꨝꨪꨌꩆ ꩝ ꨆꨟꨫ ꨗꨫ ꨎꨳꨯꨮꩃ ꨚꨓꨯꨱ ꨀꨚꩆ ꨗꨈꩉ ꩝ ꨧꨪꨝꩉ ꨗꨫ ꨦꨭꩀ ꨢꨩ ꨗꨫ ꩞ ꩑꩓꩔ ꩞ ꨨꨶꨮꩉ ꨈꨵꨮꩃ ꨕꨤꩌ ꨓꨚꨭꩀ ꨧꨆꨪꨣꨰ ꩝ ꨚꨓꨯꨱ ꨛꨯꨮ ꨝꨳꨩ ꨓꨴꨭꩆ ꨕꨫ ꨣꨰ ꩝ ꨟꨖꨪꩉ ꨣꨪꨢꨩ ꨎꨥ ꨆꨩ ꨧꨬ ꩞ ꩑꩓꩕ ꩞ ꨟꨖꨪꩉ ꨣꨪꨢꨩ ꨀꨤꨶꩍ ꨓꨤꨩ ꨋꩇ ꨚꨡꨳꩍ ꩝ ꨚꨓꨯꨱ ꨗꨫ ꨗꨯꨱ ꨧꨶꨮꩉ ꨟꨆꩍ ꩝ ꨙꨶꨩ ꨀꨕꩅ ꨕꩀ ꨗꨝꨫ ꩞ ꩑꩓꩖ ꩞ ꨨꨶꨮꩉ ꨕꩉ ꨎꨠꩍ ꨓꨶꨬ ꨚꨓꨯꨱ ꩝ ꨗꨯꨧꨣꨥꩆ ꨗꨯꨱ ꩝ ꨟꨓꨶꨬ ꨧꨩ ꨎꨤꩆ ꨓꨯꨱꩌ ꨗꨫ ꨈꨮꩇ ꨚꩀ ꨟꨮꨆꩍ ꩞ ꩑꩓꩗ ꩞ ꨕꨶꨩ ꨂꨣꩃ ꨗꨯꨱ ꨣꨡꨫ ꨧꨯꨱꩃ ꨣꨡꩍ ꩝ ꨒꩇ ꨎꨤꩆ ꨀꨖꨶꨩ ꨀꨓꩍ ꩝ ꨧꨩ ꨝꨭꨤꩆ ꨝꨪꨣꨭꨥ ꨟꩃ ꨓꨴꨭꩍ ꩞ ꩑꩓꩘ ꩞ ꨗꨯꨧꨣꨥꩆ ꨀꨓꩀ ꨗꨫ ꨆꩊ ꨝꨵꨯꨱꩍ ꨓꨖꨭꨥ ꩝ ꨛꨯꨩꩀ ꨓꨊꨪꩆ ꨦꨟꨯꩀ ꨤꨆꨮꨭ ꩝ ꨨꨤꨭꩆ ꨗꨫ ꨓꨯꩀ ꨡꨯꩍ ꨟꨓꨩ ꩞ ꩑꩓꩙ ꩞ ꨚꨓꨯꨱ ꨗꨯꨧꨣꨥꩆ ꨇꨶꨰ ꨕꨫ ꨝꨡꨮꩃ ꨝꨵꨯꨱꩍ ꨨꨳꨩ ꩝ ꨨꨮꩄ ꨗꨫ ꨛꨯꨮ ꨣꨩ ꨟꨕꨩ ꩝ ꨨꨤꨭꩆ ꨟꨣꨰ ꨓꨶꨬ ꨓꨚꩀ ꨔꨰꩅ ꨝꨪꨢꩀ ꨛꨯꨮ ꨗꨝꨫ ꩞ ꩑꩔꩐ ꩞ ꨚꨓꨯꨱ ꨗꨯꨧꨣꨥꩆ ꨛꨯꨩꩀ ꨗꨫ ꨦꨮꩇ ꨓꨚꩍ ꨦꨣꨫ ꩝ ꨤꩄ ꨨꨤꨭꩆ ꨗꨫ ꨁꨗꨳꨰ ꨕꨫ ꨛꨯꨮ ꨗꨝꨫ ꩝ ꨧꨩ ꨝꨯꨱꩍ ꨗꨈꩉ ꨨꨤꨭꩆ ꨌꨳꨮꩇ ꨕꨗꨭꩍ ꩞ ꩑꩔꩑ ꩞ ꨨꨤꨭꩆ ꨦꨭꩀ ꨕꨶꨮꩋ ꨗꨫ ꨦꩀ ꨕꨶꨩ ꨂꨣꩃ ꩝ ꨤꨆꨮꨭ ꨗꨫ ꨚꨮꩍ ꨝꨡꨮꩃ ꨎꩃ ꩝ ꨀꨕꨬ ꨦꨄꨰ ꨨꨤꨭꩆ ꨓꨠꨩ ꩞ ꩑꩔꩒ ꩞ ꨛꨯꨮ ꨃꨥ ꨝꩉ ꨚꨓꨴꨫ ꨕꨤꩌ ꨧꩃ ꩝ ꨓꨝꨳꩀ ꨗꨫ ꨚꨮꩍ ꨝꨡꨮꩃ ꨎꩃ ꩝ ꨆꨩ ꨚꨓꨯꨱ ꨓꨠꨩ ꨟꨣꨰ ꩞ ꩑꩔꩓ ꩞ ꨗꨯꨧꨣꨥꩆ ꨓꨤꨝꩅ ꨝꨵꨯꨱꩍ ꨝꨪꨌꩆ ꩝ ꨛꨯꨮ ꨀꨗꨪꩅ ꨋꩇ ꨖꩉ ꩝ ꨝꨴꨬ ꨨꨤꨭꩆ ꨤꨆꨮꨭ ꨚꨭꨎꨫ ꨚꩀ ꨓꨆꨰ ꨗꨝꨫ ꩞ ꩑꩔꩔ ꩞ ꨛꨯꨮ ꨃꨥ ꨝꩉ ꨚꨓꨴꨫ ꨛꨯꨩꩀ ꨓꨝꨳꩀ ꩝ ꨡꨯꩍ ꨆꨠꩉ ꨕꨴꨮꩍ ꨧꨩ ꨚꩀ ꩝ ꨚꨓꨯꨱ ꨛꨯꨩꩀ ꨙꨶꨩ ꨕꨫ ꨊꨯꨱꩀ ꨀꨆꨯꨱꩀ ꩞ ꩑꩔꩕ ꩞ ꨚꨓꨯꨱ ꨤꨮꩍ ꨓꨴꨭꩆ ꨨꨶꨮꩉ ꨚꨙꨯꩀ ꩝ ꨙꨶꨩ ꨗꨫ ꨈꩌ ꨨꨤꨭꩆ ꨗꨫ ꨦꨭꩀ ꩝ ꨟꨆꨵꩌ ꨝꨭꨤꩌ ꨤꨆꨮꨭ ꨙꨶꨩ ꨊꨯꨱꩀ ꨀꨆꨯꨱꩀ ꩞ ꩑꩔꩖ ꩞ ꨓꨖꨭꨥ ꨧꨗꨪꩅ ꨈꨪꨗꨴꨮꩍ ꨧꨭꨩ ꨛꨯꨮ ꨕꨯꨝꨭꨓꨩ ꩝ ꨧꨳꩌ ꨨꨤꨭꩆ ꨨꨕꩍ ꨟꨓꨩ ꩝ ꨨꨶꨮꩉ ꨗꨫ ꨔꩌꨚꨭꩉꨣꨘꨩ ꩞ ꩑꩔꩗ ꩞ ꨕꨯꨱꩀ ꨓꨘꩆ ꨓꨯꨱꩌ ꨗꨫ ꨔꨭꩆ ꨥꨮꩀ ꨟꨰ ꩝ ꨝꨯꨱꩊ ꨊꨩ ꨞꩇ ꨎꩃ ꨝꨴꨰ ꩝ ꨟꨖꨪꩉ ꨣꨪꨢꨩ ꨎꩃ ꨟꨎꨶꨩ ꩞ ꩑꩔꩘ ꩞ ꨆꨘꨩ ꨕꨫ ꨌꨬ ꨗꨯꨱ ꨚꨔꨮꨭ ꨚꩀ ꨀꨳꨩ ꩝ ꨐꨭꨩ ꨡꨯꩍ ꨢꨩ ꨗꩆ ꨐꨭꨩ ꨅꩍ ꨆꨙꨩ ꩝ ꨆꨳꨮꩃ ꨟꩀ ꨗꨈꩉ ꨌꩌ ꨆꨩ ꨐꨭꨩ ꩞ ꩑꩔꩙ ꩞ ꨛꨯꨮ ꨆꨩ ꨤꨪꨝꩀ ꨓꨪꨎꨭꩍ ꨗꨫ ꨔꨭꩆ ꨕꨫ ꨈꨴꨮꩇ ꨗꨈꩉ ꩝ ꨛꨯꨮ ꨗꨫ ꨙꨪꩍ ꨎꩃ ꨅꩍ ꨥꨮꩉ ꩝ ꨀꨗꨪꩅ ꨀꨘꩀ ꨌꩌ ꨧꨭꨩ ꨌꨴꨭꨩ ꩞ ꩑꩕꩐ ꩞ ꨛꨯꨮ ꨙꨪꩍ ꨧꨩ ꨟꨤꩌ ꨧꨩ ꨓꨭꩀ ꩝ ꨛꨯꨮ ꨓꨈꨯꩀ ꨥꩃ ꨈꨴꨭꩀ ꩝ ꨕꨯꨱꩀ ꨧꨘꩃ ꨕꨤꩌ ꨨꨓꨰ ꩞ ꩑꩕꩑ ꩞ ꨛꨯꨮ ꨗꨯꨱ ꨧꨘꩃ ꨥꨮꩀ ꨆꨳꨮꩃ ꨆꨩ ꨕꨴꩍ ꩝ ꨙꨩ ꨆꨩ ꨀꨘꩀ ꨌꩌ ꨣꨡꩍ ꩝ ꨢꨶꨮꩆ ꨚꨙꨮꩉ ꨓꨶꨬ ꨤꨪꨆꨭꩀ ꩞ ꩑꩕꩒ ꩞ ꨛꨯꨮ ꨧꨭꨩ ꨌꨬ ꨗꨯꨱ ꨌꩌ ꨨꨤꨭꩆ ꨝꨳꩀ ꨆꨮꨭꩀ ꩝ ꨙꨩ ꨐꨭꨩ ꨟꩀ ꨓꨶꨬ ꨤꨪꨆꨭꩀ ꩝ ꨛꨯꨮ ꨗꨫ ꨗꨯꨱ ꨓꨴꨭꩍ ꨚꨤꨬ ꩞ ꩑꩕꩓ ꩞ ꨨꨳꨩ ꨆꨩ ꨛꨯꨮ ꨧꨯꨱꩃ ꨤꨪꨠꨩ ꨂꨣꩃ ꨌꨬ ꩝ ꨣꨡꨫ ꨣꨡꨲꩇ ꨕꨫ ꨈꨴꨮꩇ ꨚꨤꨬ ꩝ ꨤꨧꨬ ꨅꨩ ꨨꨭꨩ ꨝꨭꩍ ꨕꨫ ꨓꨳꩆ ꩞ ꩑꩕꩔ ꩞ ꨛꨯꨮ ꨧꨭꨩ ꨌꨬ ꨣꨡꩍ ꨣꨡꨲꩇ ꨧꨩ ꨎꨤꩆ ꩝ ꨗꨯꨱ ꨧꨩ ꨕꨴꨬ ꨣꨳꨪꩌ ꨚꨆꩉ ꩝ ꨧꨭꨩ ꨕꨳꩇ ꨀꨘꩀ ꨎꩃ ꨅꩍ ꨔꨮꨭ ꩞ ꩑꩕꩕ ꩞ ꨃꩂ ꨆꨩ ꨌꨬ ꨤꩄ ꨆꨳꨮꩃ ꨥꨮꩀ ꨗꨯꨱ ꨚꨤꨬ ꩝ ꨅꩍ ꨨꨭꨩ ꨨꨈꨰꩅ ꨆꨳꨮꩃ ꨝꨴꨬ ꩝ ꨚꨢꨶꨩ ꨚꨗꨶꨮꩄ ꨕꨪꩆ ꨆꨖꨩ ꩞ ꩑꩕꩖ ꩞ ꨕꨫ ꨙꨮꩈ ꨢꨶꨮꩆ ꨗꨫ ꨐꨭꨩ ꨚꨶꨮꩄ ꨦꩀꨓꨪꨎꨰ ꩝ ꨋꩇ ꨨꨟꨭꨩ ꨅꨩ ꨨꨭꨩ ꨚꨕꨰ ꩝ ꨨꨎꩆ ꨀꨊꨪꩆ ꨎꩃ ꨆꨣꩃ ꩞ ꩑꩕꩗ ꩞ ꨀꨘꩀ ꨌꩌ ꨟꨤꩌ ꨨꨣꨬ ꨅꨩ ꨙꨪꩍ ꨕꨫ ꨧꩃ ꩝ ꨨꨶꨮꩄ ꨕꨫ ꨀꨳꨩ ꨆꨵꨯꨱꩍ ꨆꨕꩃ ꩝ ꨟꨓꨰ ꨚꨕꨰ ꨌꩌ ꨀꨝꨪꩍ ꩞ ꩑꩕꩘ ꩞ ꨨꨟꨭꨩ ꨆꨗꨭꨩ ꨓꨶꨬ ꨗꨫ ꨀꨳꨩ ꨎꩃ ꨅꨩ ꨨꨭꨩ ꩝ ꨨꨟꨭꨩ ꨗꨫ ꨖꨯꨱꩃ ꨐꨭꨩ ꨟꩀ ꨆꨩ ꨐꨭꨩ ꩝ ꨀꨳꨩ ꨗꨫ ꨙꨶꨮꩄ ꨀꨝꨪꩍ ꨆꨩ ꨢꨶꨮꩆ ꩞ ꩑꩕꩙ ꩞ ꨕꨫ ꨙꨮꩈ ꨚꨭꨓꨯꨱ ꨎꨩ ꨤꨯꨱꩃ ꨝꨳꩀ ꨟꨪꩆ ꩝ ꨐꨭꨩ ꨝꨴꨬ ꨎꨘꩃ ꨧꨯꨱꩃ ꨡꨪꩂ ꩝ ꨐꨭꨩ ꨔꨬ ꨕꨫ ꨈꨴꨮꩇ ꨗꨈꩉ ꨎꩃ ꨐꨭꨩ ꨔꨮꨭ ꩞ ꩑꩖꩐ ꩞ ꨝꨵꨯꨱꩍ ꨐꨭꨩ ꨜꩆ ꨆꨯꨱꩍ ꨗꨈꩉ ꩝ ꨝꨴꨬ ꨎꩃ ꨧꨩ ꨝꨯꨱꩍ ꨗꨈꩉ ꨌꩌ ꩝ ꨚꨗꨴꩃ ꨈꩌ ꨌꨴꨭꨩ ꨣꨈꨵꨰ ꨚꨴꨯꨱꩍ ꨆꨣꩃ ꩞ ꩑꩖꩑ ꩞ ꨕꨯꨱꩀ ꨕꨫ ꨥꩉ ꨛꨯꨮ ꨧꨩ ꨂꨣꩃ ꨧꨩ ꨝꨭꨤꩆ ꩝ ꨝꨯꨱꩊ ꨊꨩ ꨞꩇ ꨕꨯꨱꩀ ꨕꨫ ꨧꩃ ꩝ ꨕꨭꩍ ꨗꨫ ꨕꩀ ꨎꩃ ꨅꨩ ꨨꨭꨩ ꩞ ꩑꩖꩒ ꩞ ꨚꨭꨓꨯꨱ ꨕꨪꨨꨵꨮꨭ ꨎꨳꨯꨮꩃ ꨅꨩ ꨆꨩ ꨨꨭꨩ ꩝ ꨨꨭꨩ ꨕꨯꩌ ꨐꨭꨩ ꨝꨴꨬ ꨎꨘꩃ ꨛꨯꨮ ꨌꩃ [ꨌꨮꩃ] ꩝ ꨕꨫ ꨈꨴꨮꩇ ꨗꨈꩉ ꨎꩃ ꨐꨭꨩ ꨔꨮꨭ ꩞ ꩑꩖꩓ ꩞ ꨚꨭꨓꨯꨱ ꨜꩆ ꨝꨵꨯꨱꩍ ꨐꨭꨩ ꨃꨥ ꨟꨰ ꩝ ꨐꨭꨩ ꨝꨴꨬ ꨗꨫ ꨔꨮꨭ ꨚꨣꨪꩀ ꨧꨯꨱꩃ ꨚꨎꨰ ꩝ ꨗꨫ ꨌꨴꨭꨩ ꨣꨈꨵꨰ ꨎꩃ ꨀꨝꨪꩍ ꩞ ꩑꩖꩔ ꩞ ꨝꨵꨯꨱꩍ ꨐꨭꨩ ꨝꨴꨬ ꨆꨰ ꨙꨶꨮꩈ ꨜꩆ ꨆꨵꨫ ꩝ ꨔꨶꨯꩀ ꨗꨫ ꨆꨶꩆ ꨈꨗꨶꨮꩉ ꨂꨣꩃ ꨧꨩ ꨚꨤꨬ ꩝ ꨧꨩ ꨂꨣꩃ ꨕꨯꨱꩀ ꨕꨫ ꨥꩉ ꨛꨯꨮ ꨈꨗꨶꨮꩉ ꩞ ꩑꩖꩕ ꩞ ꨔꨭꩀ ꨕꨫ ꨆꩊ ꨟꩃ ꨗꨫ ꨌꨴꨭꨩ ꨧꨩ ꨓꨮꩊ ꨌꩌ ꩝ ꨎꨗꩀ ꨟꩃ ꨚꨦꩃ ꨈꩌ ꩝ ꨕꨭꩍ ꨗꨫ ꨕꩀ ꨎꩃ ꨅꨩ ꨨꨭꨩ ꩞ ꩑꩖꩖ ꩞ ꨆꨭꨘꨩ ꨛꨯꨮ ꨗꨯꨱ ꨚꨔꨮꨭ ꨚꩀ ꨀꨳꨩ ꨌꩌ ꨧꨭꨩ ꨌꨴꨭꨩ ꩝ ꨈꨗꨭꩇ ꨟꨕꨩ ꨟꩃ ꨕꨫ ꨙꨮꩈ ꨛꨯꨮ ꨧꨭꨩ ꨡꨪꩂ ꨛꨯꨮ ꨗꨮꩃ ꩞ ꩑꩖꩗ ꩞ ꨕꨶꨩ ꨛꨯꨮ ꨢꨶꨮꩆ ꨗꨫ ꨝꨴꨬ ꨚꨎꨘꩃ ꩝ ꨋꩇ ꨗꨫ ꨡꨮꩃ ꨝꨳꩀ ꨤꨗꩃ ꩝ ꨝꨯꨱꩊ ꨊꨩ ꨞꩇ ꨦꨭꩀ ꨨꨓꨰ ꩞ ꩑꩖꩘ ꩞ ꨕꨶꨩ ꨛꨯꨮ ꨓꨴꨭꩆ ꨕꨫ ꨣꨰ ꨎꩃ ꨝꨴꨰ ꩝ ꨝꨯꨱꩊ ꨊꨩ ꨞꩇ ꨎꩃ ꨟꨓꨰ ꩝ ꨌꨤꩍ ꨌꨤꨶꨮꩆ ꨚꨩ ꨀꨝꨪꩍ ꩞ ꩑꩖꩙ ꩞ ꨕꨫ ꨙꨮꩈ ꨛꨯꨮ ꨜꨯꨱꩀ ꨢꨶꨮꩆ ꨐꨭꨩ ꨟꩀ ꨌꩌ ꨝꨳꩀ ꩝ ꨢꨶꨮꩆ ꨀꨓꨯꨱꩃ ꨚꨣꨯꨱꩃ ꨚꨣꨰꩍ ꨌꩌ ꨕꨨꨵꩀ ꩝ ꨤꨪꨠꨩ ꨗꨫ ꨚꨵꨭꩍ ꨚꩀ ꨔꨭꩆ ꨟꩃ ꨗꨫ ꩞ ꩑꩗꩐ ꩞ ꨕꨫ ꨙꨮꩈ ꨆꨩ ꨚꨭꨓꨯꨱ ꨧꨩ ꨣꨓꨭꩍ ꨔꨭꩆ ꨟꩃ ꨗꨫ ꩝ ꨌꨴꨭꨩ ꨣꨈꨵꨰ ꨌꩌ ꨝꨗꨫ ꩝ ꨌꨤꩍ ꨌꨤꨶꨮꩆ ꨗꨯꨱ ꨀꨝꨪꩍ ꩞ ꩑꩗꩑ ꩞ ꨓꨖꨭꨥ ꨀꨢꨭꩍ ꨌꨬ ꨧꨭꨩ ꨛꨯꨮ ꨕꨯꨝꨭꨓꨩ ꩝ ꨧꨩ ꨡꨯꩍ ꨗꨈꩉ ꨗꨯꨮꩋꨚꨞꨩ ꩝ ꨗꨫ ꨔꩀ ꨕꨫ ꨆꩊ ꨆꨢꨶꨩ ꨛꨯꨮ ꩞ ꩑꩗꩒ ꩞ ꨕꨫ ꨙꨮꩈ ꨢꨶꨮꩆ ꨚꨋꩇ ꨗꨫ ꨧꨯꨩ ꨈꨴꨮꩇ ꨗꨈꩉ ꩝ ꨝꨩ ꨗꨫ ꨟꨰ ꨆꨩ ꨐꨭꨩ ꨀꨚꩆ ꩝ ꨅꨩ ꨝꨴꨬ ꨤꨝꨰꩍ ꨧꨩ ꨂꨣꩃ ꩞ ꩑꩗꩓ ꩞ ꨤꨪꨠꨩ ꨧꨩ ꨓꨳꩆ ꨎꩃ ꨐꨭꨩ ꨋꩇ ꨧꨯꨩ ꨝꨶꩉ ꩝ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꩝ ꨕꨫ ꨈꨴꨮꩇ ꨚꨤꨬ ꨎꩃ ꨨꨭꨩ ꩞ ꩑꩗꩔ ꩞ ꨢꨶꨮꩆ ꨚꨈꨶꨮꩆ ꨧꨩ ꨝꨭꨤꩆ ꨝꨳꩀ ꨧꩃ ꩝ ꨓꨯꨱꩌ ꨀꨝꨪꩍ ꨚꩀ ꨈꨤꩃ ꩝ ꨕꨫ ꨈꨴꨮꩇ ꨗꨈꩉ ꨆꨩ ꨐꨭꨩ ꨆꨣꨳꨫ ꨆꨣꨳꨩ ꨓꨆꨰ ꨝꨯꨱꩊ ꩞ ꩑꩗꩕ ꩞ ꨆꨭꨘꨩ ꨕꨫ ꨛꨯꨮ ꨗꨯꨱ ꨀꨇꩆ ꨚꨀꨝꨪꩍ ꩝ ꨢꨶꨮꩆ ꨆꨨꨳꨩ ꨓꩍ ꨆꨓꨪꩍ ꩝ ꨐꨭꨩ ꨔꨮꨭ ꨗꨫ ꨎꨳꨯꨮꩆ ꨕꨫ ꨌꩌ ꨢꩇ ꨀꨆꨯꨱꩀ ꩞ ꩑꩗꩖ ꩞ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꨨꨳꨩ ꨌꨯꨱꩀ ꩝ ꨢꨶꨮꩆ ꨐꨭꨩ ꨣꨪꩀ ꨈꨴꨮꩇ ꨀꨆꨯꨱꩀ ꩝ ꨕꨫ ꨣꨳꨪꩌ ꨗꨫ ꨔꨭꩆ ꨣꨳꨪꩌ ꨝꨭꨤꩆ ꩞ ꩑꩗꩗ ꩞ ꨀꨘꩀ ꨌꩌ ꨝꨳꩀ ꨈꨪꨤꨩ ꨌꨰꩀ ꨅꨩ ꨔꨮꨭ ꩝ ꨛꨯꨮ ꨗꨫ ꨟꨰ ꨆꩊ ꨕꨪꨨꨵꨮꨭ ꩝ ꨆꨳꨮꩃ ꨋꩇ ꨗꨫ ꨖꩉ ꨥꨮꩀ ꨆꨩ ꨐꨭꨩ ꩞ ꩑꩗꩘ ꩞ ꨛꨯꨮ ꨧꨭꨩ ꨌꨬ ꨆꨩ ꨆꨝꩀ ꨀꨳꨮꩀ ꨚꨤꨬ ꩝ ꨀꨘꩀ ꨗꨫ ꨌꩌ ꨤꨆꨬ ꨆꨭꨟꨬ ꩝ ꨆꨵꩀ ꨗꨫ ꨧꩃ ꨕꨮꩇ ꨟꨎꨶꨩ ꩞ ꩑꩗꩙ ꩞ ꨀꨘꩀ ꨌꩌ ꨕꨯꨱꩀ ꨆꨙꨯꨱꩃ ꨕꨶꨮꨦꩀ ꩝ ꨛꨯꨮ ꨗꨫ ꨕꩃ ꨕꨫ ꨚꨙꨳꩀ ꩝ ꨛꨯꨮ ꨗꨫ ꨚꨳꨯꨮꩍ ꨕꨤꩌ ꨨꨓꨰ ꩞ ꩑꩘꩐ ꩞ ꨛꨯꨮ ꨧꨘꩃ ꨕꨤꩌ ꨗꨫ ꨓꨳꩆ ꨚꨳꨯꨮꩍ ꨆꨩ ꩝ ꨛꨯꨮ ꨗꨫ ꨟꨰ ꨧꨩ ꨡꨮꩃ ꨓꨴꨩ ꩝ ꨀꨘꩀ ꨗꨫ ꨌꩌ ꨔꨮꨭ ꨆꨩ ꨕꨴꨬ ꩞ ꩑꩘꩑ ꩞ ꨀꨘꩀ ꨌꩌ ꨗꨫ ꨝꨳꩀ ꨓꨴꨭꩍ ꨈꨤꨩ ꩝ ꨀꨤꨶꩍ ꨗꨫ ꨓꨳꩇ ꨣꨩ ꨟꨕꨩ ꩝ ꨟꨰ ꨚꨧꨳꩌ ꨗꨈꩉ ꨁꨓꨩ ꩞ ꩑꩘꩒ ꩞ ꨛꨯꨮ ꨧꨭꨩ ꨌꨬ ꨟꨯꨱꩃ ꨕꨫ ꨊꨯꨱꩀ ꨓꨶꨣꨩ ꩝ ꨛꨯꨮ ꨤꨆꨮꨭ ꨕꨯꨝꨭꨓꨩ ꩝ ꨋꩇ ꨗꨫ ꨖꩉ ꨥꨮꩀ ꨆꨩ ꨌꩌ ꩞ ꩑꩘꩓ ꩞ ꨕꨫ ꨈꨴꨮꩇ ꨗꨈꩉ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꩝ ꨗꨈꩉ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꩝ ꨔꨬ ꨣꨩ ꨔꨮꨭ ꨧꨆꨪꨣꨰ ꩝ ꨟꩀ ꨓꨝꨳꩀ ꨝꨵꨯꨱꩍ ꨚꨘꩍ ꩞ ꩑꩘꩔ ꩞ ꨚꨣꩆ ꨚꨮꩉ ꨤꨶꨪꩄ ꨗꨫ ꨜꨭꩆ ꨓꨮꩊ ꨨꨎꨭꩃ ꩝ ꨕꨫ ꨈꨴꨮꩇ ꨗꨈꩉ ꨎꩃ ꨓꨣꨭꩃ ꩝ ꨔꨬ ꨧꨘꩃ ꨝꨰꩀ ꨝꨫ ꨡꨯꩍ ꩞ ꩑꩘꩕ ꩞ ꨙꨮꩈ ꨗꨫ ꨤꨮꨭꨀꨩ ꨓꨘꩍ ꨚꨤꨩ ꨓꨊꨮꩈ ꩝ ꨕꨴꩀ ꨣꨓꩀ ꨨꨎꩆ ꨀꨊꨪꩆ ꨎꩃ ꨏꩀ ꩝ ꨨꨎꩆ ꨓꨗꨴꩆ ꨎꩃ ꨆꨣꩃ ꩞ ꩑꩘꩖ ꩞ ꨀꨘꩀ ꨌꩌ ꨕꨯꨱꩀ ꨧꨘꩃ ꨝꨵꨯꨱꩍ ꨨꨳꨩ ꩝ ꨤꨆꨮꨭ ꨕꨫ ꨛꨯꨮ ꨕꨯꨝꨓꨩ ꩝ ꨅꩍ ꨡꨯꩍ ꨎꨤꩆ ꨓꨴꨭꩆ ꨟꨣꨰ ꩞ ꩑꩘꩗ ꩞ ꨀꨘꩀ ꨌꩌ ꨕꨯꨱꩀ ꨧꨘꩃ ꨨꨶꨮꩄ ꨤꨯꨩ ꩝ ꨤꩄ ꨗꨈꩉ ꨅꨩ ꨨꨭꨩ ꨛꨯꨮ ꩝ ꨓꨊꨮꩈ ꨣꨪꨓꩀ ꨟꨓꨰ ꨀꨝꨪꩍ ꩞ ꩑꩘꩘ ꩞ ꨗꨈꩉ ꨌꩌ ꨨꨤꨭꩆ ꨗꨫ ꨤꨨꨪꩀ ꩝ ꨈꨗꨶꨮꩉ ꨁꨥ ꨨꨗꨭꩀ ꩝ ꨨꨎꨳꨯꨮꩃ ꨗꨈꩉ ꨚꨴꨯꨱꩃ ꨦꨭꩀ ꩝ ꨀꨤꨶꩍ ꨓꨤꨩ ꨚꨆꨣꩃ ꩞ ꩑꩘꩙ ꩞ ꨝꨤꩆ ꨚꩀ ꨀꨳꨩ ꨗꨫ ꨆꨴꨯꨱꩃ ꨔꨭꨩ ꨌꨙꩃ ꩝ ꨆꨝꨥ ꨟꨗꨶꨪꩋ ꨋꩆ ꨂꨣꩃ ꩝ ꨔꨭꨩ ꨅꨩ ꨨꨭꨩ ꨇꨮꩃ ꨟꨐꨭꩌ ꩞ ꩑꩙꩐ ꩞ ꨗꨈꩉ ꨌꩌ ꨕꩉ ꨗꨫ ꨕꨶꨩ ꨌꨘꩍ ꨆꨴꨯꨱꩃ ꨕꨶꨮꩊ ꩝ ꨨꨎꨳꨯꨮꩃ ꨤꨨꨪꩀ ꨛꨯꨮ ꨈꨗꨶꨮꩉ ꩝ ꨝꨯꨱꩊ ꨊꨩ ꨞꩇ ꨎꩃ ꨆꨣꩃ ꩞ ꩑꩙꩑ ꩞ ꨈꨡꩀ ꨕꨫ ꨛꨯꨮ ꨧꨯꨱꩃ ꨗꨫ ꨌꨬ ꨗꨯꨱ ꨚꨔꨮꨭ ꩝ ꨆꨴꨯꨱꩃ ꨗꨫ ꨌꩌ ꨨꨤꨭꩆ ꨅꩍ ꨨꨭꨩ ꨨꨤꨭꨥ ꩝ ꨛꨯꨮ ꨧꨘꩃ ꨨꨰ ꨆꨩ ꨌꩌ ꩞ ꩑꩙꩒ ꩞ ꨗꨈꩉ ꨌꩌ ꨤꨨꨪꩀ ꨀꨝꨪꩍ ꨈꨗꨶꨮꩉ ꨀꨌꩉ ꩝ ꨆꨵꨰꩀ ꨕꨫ ꨢꨶꨮꩆ ꨧꨩ ꨚꨆꩉ ꩝ ꨤꩄ ꨗꨫ ꨚꨳꨯꨮꩍ ꨡꨮꩃ ꨆꨩ ꨛꨯꨮ ꩞ ꩑꩙꩓ ꩞ ꨢꨶꨮꩆ ꨚꨣꨯꩀ ꨨꨟꨭꨩ ꨦꨣꨩ ꨕꩉ ꨆꨴꨯꨱꩃ ꩝ ꨐꨭꨩ ꨋꩇ ꨕꨫ ꨌꩌ ꨆꨳꨮꩃ ꨆꨣꨯꨱꩃ ꩝ ꨣꨡꩍ ꨣꨡꨲꩇ ꨀꨮꩀ ꨤꨚꨩ ꩞ ꩑꩙꩔ ꩞ ꨀꨕꩅ ꨌꩌ ꨇꨪꩆ ꨝꨪꨆꩆ ꨤꨯꨩ ꨟꨕꨩ ꩝ ꨆꨴꨯꨱꩃ ꨗꨫ ꨅꩍ ꨓꨴꨭꩍ ꨢꨥꨩ ꩝ ꨛꨯꨮ ꨧꨘꩃ ꨕꨤꩌ ꨨꨓꨰ ꩞ ꩑꩙꩕ ꩞ ꨟꩃ ꨆꩊ ꨕꨪꨨꨵꨮꨭ ꨨꨟꨭꨩ ꨦꨣꨩ ꨌꩌ ꨟꨌꨰ ꩝ ꨐꨭꨩ ꨓꨳꩇ ꨓꨈꨯꩀ ꨕꨯꨱꩀ ꨕꨫ ꨈꨵꨰ ꩝ ꨢꨶꨮꩆ ꨟꩀ ꨨꨟꨭꨩ ꨦꨣꨩ ꨆꨩ ꨐꨭꨩ ꩞ ꩑꩙꩖ ꩞ ꨆꨘꨩ ꨕꨫ ꨛꨯꨮ ꨗꨯꨱ ꨚꨔꨮꨭ ꨚꩀ ꨀꨳꨩ ꨌꩌ ꨗꨫ ꨨꨰ ꩝ ꨨꨟꨭꨩ ꨦꨣꨩ ꨢꨶꨮꩆ ꨗꨫ ꨟꩀ ꨀꨝꨪꩍ ꨆꨩ ꨐꨭꨩ ꩞ ꩑꩙꩗ ꩞ ꨙꨮꩈ ꨚꨓꨯꨱ ꨌꩌ ꨟꩀ ꨗꨫ ꨢꨶꨮꩆ ꨚꨇꨪꩀ ꨕꨣꩀ ꩝ ꨢꨶꨮꩆ ꨟꨝꨰ ꨐꨭꨩ ꨋꩇ ꨏꩀ ꩝ ꨐꨭꨩ ꨟꩀ ꨗꨫ ꨌꩌ ꨎꨳꨯꨮꩃ ꨨꨤꨭꩆ ꩞ ꩑꩙꩘ ꩞ ꨟꨢꩍ ꨛꨯꨮ ꨀꨗꨪꩅ ꨚꨣꨪꩀ ꨚꨗꨴꩃ ꨆꨴꨯꨱꩃ ꨚꨎꨰ ꩝ ꨌꨴꨭꨩ ꨣꨈꨵꨰ ꨃꨥ ꨀꨝꨪꩍ ꨓꨯꨱꩌ ꨟꨣꨰ ꩝ ꨗꨫ ꨔꨰꩅ ꨝꨪꨢꩀ ꨛꨯꨮ ꨧꨭꨩ ꨌꨬ ꩞ ꩑꩙꩙ ꩞ ꨛꨯꨮ ꨗꨯꨱ ꨣꨡꨫ ꨣꨡꨲꩇ ꨕꨫ ꨣꨳꨪꩌ ꨔꨭꩆ ꨝꨭꨤꩆ ꩝ ꨧꨩ ꨝꨯꨱꩍ ꨗꨈꩉ ꨗꨯꨧꨣꨥꩆ ꩝ ꨀꨝꨪꩍ ꨤꨪꨎꩃ ꨀꨤꨪꩆ ꨆꨩ ꨛꨯꨮ ꩞ ꩒꩐꩐ ꩞ ꨓꨖꨭꨥ ꨀꨢꨭꩍ ꨛꨯꨮ ꨧꨭꨟꨭꨩ ꨕꨯꨝꨭꨓꨩ ꩝ ꨛꨯꨮ ꨗꨫ ꨕꨯꨱꩀ ꨓꨮꩊ ꨓꨨꨩ ꩝ ꨗꨈꩉ ꨗꨫ ꨌꩌ ꨨꨤꨭꩆ ꨈꨡꩀ ꩞ ꩒꩐꩑ ꩞ ꨏꩀ ꨕꨪꨨꨵꨮꨭ ꨓꨮꩊ ꨨꨕꨬ ꨎꨳꨯꨮꩃ ꨗꨯꨣꨚꨩ ꩝ ꨟꩃ ꨕꨫ ꨆꩊ ꨕꨪꩅ ꨕꨪꨢꨩ ꩝ ꨝꨯꨱꩊ ꨊꨩ ꨞꩇ ꨆꨭꨟꨬ ꨤꨆꨬ ꨀꨶꨮꩆ ꨓꨝꨶꨮꩆ ꩞ ꩒꩐꩒ ꩞ ꨕꨫ ꨈꨴꨮꩇ ꨗꨈꩉ ꨌꩌ ꨝꨗꨫ ꨅꩍ ꨔꨮꨭ ꨧꨩ ꨀꨶꨮꩆ ꩝ ꨓꨮꩊ ꨣꨩ ꨟꨰ ꨨꨕꨬ ꨚꨏꨮꩆ ꩝ ꨨꨭꨩ ꨗꨫ ꨟꨰꩀ ꨢꨮꨭ ꨈꨪꨠꩆ ꩞ ꩝