꩑꩞ ꨦꨮꩇ ꨦꩍ ꨧꨆꨬ ꨓꨝꨳꩀ ꨕꨫ ꨝꩉ ꨂꨤꨩ꩝ ꨎꨯꨱꩍ ꨢꨮꨭ ꨎꨩ ꨕꨶꨩ꩝ ꨎꨳꨮꩃ ꨡꨶꨮꩆ ꨧꨩ ꨝꨯꨱꩍ꩝꩝ ꩒꩞ ꨨꨮꩄ ꨛꨯꨮ ꨧꨗꨰ ꨎꨳꨮꩃ ꨌꨴꨯꨱꩍ꩝ ꨎꨳꨮꩃ ꨡꨶꨮꩆ ꨧꨩ ꨝꨯꨱꩍ꩝ ꨣꨰ ꨈꩌ ꨈꨪꨡꩀ꩝꩝ ꩓꩞ ꨨꨮꩄ ꨛꨯꨮ ꨧꨗꨰ ꨕꨯꨱꩀ ꨢꨶꩀ꩝ ꨤꨪꨆꨮꨭ ꨧꨩ ꨆꨚꨶꩀ꩝ ꨣꨰ ꨔꨯꨱꩀ ꨀꨚꨳꨮꩃ꩝꩝ ꩔꩞ ꨣꨰ ꨓꨯꩀ ꨚꨌꨬ ꨣꨰ ꨓꨯꩀ꩝ ꨆꨮꨭ ꨕꩀ ꨝꨩ ꨓꨈꨯꩀ꩝ ꨙꨪꩀ ꨀꩉ ꨨꨟꨭꨩ꩝꩝ ꩕꩞ ꨠꨢꩍ ꨧꨗꨰ ꨀꨗꨪꩅ ꨝꨩ ꨟꨰ꩝ ꨆꨮꨭ ꨕꩀ ꨝꨩ ꨓꨆꨰ꩝ ꨎꨶꩀ ꨀꩉ ꨨꨟꨭꨩ꩝꩝ ꩖꩞ ꨆꨕꨭꩃ ꨏꨮꩃ ꨝꨯꨱꩍ ꨀꨔꨰꩍ꩝ ꨎꨶꨰ ꨋꩇ ꨚꨈꨵꨰꩍ ꨅꩍ ꨨꨳꨮꩆ ꨆꨩ ꨕꨴꨬ꩝꩝ ꩗꩞ ꨆꨕꨭꩃ ꨏꨮꩃ ꨝꨯꨱꩍ ꨣꨪꨝꨰ꩝ ꨎꨶꨰ ꨋꩇ ꨚꨤꨰ꩝ ꨅꩍ ꨨꨭꨩ ꨆꨩ ꨕꨴꨬ꩝꩝ ꩘꩞ ꨤꨪꨟꩆ ꨓꨮꩊ ꨚꨤꨬ ꨢꩃ ꨟꨭꨥ꩝ ꨚꨌꨬ ꨋꩇ ꨕꨫ ꨆꨮꨭ꩝ ꨥꨮꩉ ꨧꩃ ꨁꨗꨩ꩝꩝ ꩙꩞ ꨇꨪꩀ ꨧꩃ ꨝꨰꩀ ꨁꨗꨩ ꨧꨯꨱꩃ ꨀꨕꨬ꩝ ꨆꨮꨭ ꨓꨶꨬ ꨦꩍ ꨧꨆꨬ꩝ ꨗꨯꨱ ꨞꨭꩌ ꨆꨘꩉ꩝꩝ ꩑꩐꩞ ꨤꨪꨟꩆ ꨓꨮꩊ ꨚꨤꨬ ꨀꨳꨩ ꨣꨭꨩ꩝ ꨕꨨꨵꩀ ꨓꨶꨬ ꨅꩍ ꨧꨭꨟꨭꨩ꩝ ꨌꨬ ꨆꨵꩀ ꨀꨓꩍ꩝꩝ ꩑꩑꩞ ꨇꩆ ꨨꨵꨭꩍ ꨧꨩ ꨝꨵꩍ ꨕꨶꨩ ꨝꨵꩍ꩝ ꨔꨭꨩ ꨝꨵꨯꨱꩍ ꨚꨔꩍ꩝ ꨀꨶꩀ ꨀꨳꨩ ꨠꨓꨩ꩝꩝ ꩑꩒꩞ ꨝꨪꨗꨰ ꨢꨮꨭ ꨣꨩ ꨚꨝꨶꩀ꩝ ꨣꨭꩇ ꨢꨮꨭ ꨕꨨꨵꩀ꩝ ꨌꨬ ꨅꩍ ꨤꨪꨐꨰꩈ꩝꩝ ꩑꩓꩞ ꨆꨍꨰꩈ ꨚꨶꨮꩄ ꨧꨗꩃ ꨥꨮꩀ ꨌꨬ꩝ ꨕꨨꨵꩀ ꨆꨵꩀ ꨀꨕꨬ꩝ ꨓꨶꨬ ꨟꨰ ꨢꨮꨭ ꨗꨫ꩝꩝ ꩑꩔꩞ ꨤꨪꨟꩆ ꨓꨮꩊ ꨝꨪꨓꨭꨥ ꨤꨪꨋꩊ꩝ ꨕꨨꨵꩀ ꨓꨶꨬ ꨓꨮꩊ꩝ ꨧꨭꨟꨭꨩ ꨕꨫ ꨣꨈꨯꨱꩀ꩝꩝ ꩑꩕꩞ ꨤꨪꨟꩆ ꨓꨮꩊ ꨚꨤꨬ ꨆꨣꩃ꩝ ꨚꨕꨬ ꨕꨮꩍ ꨌꩃ꩝ ꨆꨮꨭ ꨨꨰ ꨚꨌꨬ꩝꩝ ꩑꩖꩞ ꨤꨪꨟꩆ ꨓꨮꩊ ꨝꨪꨓꨭꨥ ꨕꨮꩃ ꨨꨶꨮꩊ꩝ ꨓꨤꨮꩍ ꨔꩆ ꨀꨮꩆ꩝ ꨥꨮꩀ ꨨꨰ ꨚꨌꨬ꩝꩝ ꩑꩗꩞ ꨤꨪꨟꩆ ꨓꨮꩊ ꨚꨤꨬ ꨕꨮꩃ ꨕꨶꨩ꩝ ꨆꨴꨭꩃ ꨣꨩ ꨓꨨꨩ꩝ ꨘꩆ ꨨꨭꨩ ꨨꨆꨬ꩝꩝ ꩑꩘꩞ ꨨꨕꨳꨪꩇ ꨧꨯꨱꩃ ꨚꨔꩃ ꨘꩆ ꨣꨬ꩝ ꨙꨯꩌ ꨝꨵꨯꨱꩍ ꨆꨭꨆꨬ꩝ ꨆꨩ ꨆꨴꨭꩃ ꨢꨮꨭ ꨗꨫ꩝꩝ ꩑꩙꩞ ꨤꨪꨟꩆ ꨓꨮꩊ ꨚꨝꩍ ꨡꨴꨰꩅ ꨞꨪꩀ꩝ ꨕꨨꨵꩀ ꨓꨶꨬ ꨙꨪꩀ꩝ ꨧꨭꨟꨭꨩ ꨆꨴꨯꨱꩃ ꨨꨎꨮꩌ꩝꩝ ꩒꩐꩞ ꨌꩃ ꨆꨮꨭ ꨨꨰ ꨀꨮꩈ ꨚꨌꨬ꩝ ꨕꨨꨵꩀ ꨆꨳꨮꩃ ꨠꨗꨬ꩝ ꨚꨓꨤꨮꩍ ꨧꨭꨀꨮꩆ꩝꩝ ꩒꩑꩞ ꨤꨪꨟꩆ ꨓꨮꩊ ꨚꨤꨬ ꨨꨟꨭꨩ ꨣꨆꨴꨯꨱꩅ꩝ ꨠꨟꨯꨱꩆ ꨡꨴꨰꩅ ꨡꨴꨯꨱꩅ꩝ ꨓꨶꨬ ꨦꩍ ꨧꨆꨬ꩝꩝ ꩒꩒꩞ ꨤꨪꨟꩆ ꨓꨮꩊ ꨌꨴꨯꨱꩍ ꨆꨥꩆ꩝ ꨤꨪꨚꨩ ꨆꨵꨯꨱꩍ ꨓꨳꩆ꩝ ꨓꨶꨬ ꨦꩍ ꨧꨆꨬ꩝꩝ ꩒꩓꩞ ꨠꨐꨪꩌ ꨝꩆ ꨝꨪ ꨕꨴꩍ ꨝꨩ ꨟꨰ꩝ ꨝꨩ ꨣꨰ ꨆꨩ ꨰ꩝ ꨆꨳꨮꩃ ꨚꨣꨤꨯꨱ꩝꩝ ꩒꩔꩞ ꨤꨪꨟꩆ ꨓꨮꩊ ꨥꩉ ꨆꨭꨝꨥ꩝ ꨓꨊꨪꩆ ꨔꨯꨱꨥ ꨕꨫ ꨀꨥ꩝ ꨀꨶꩀ ꨀꨳꨩ ꨠꨓꨩ꩝꩝ ꩒꩕꩞ ꨀꨥ ꨎꨭꩀ ꨀꨝꩆ ꨆꨝꩈ꩝ ꨆꨮꨭ ꨓꨶꨬ ꨌꨬ ꨠꨣꨰ꩝ ꨨꨝꨮꩉ ꨆꨯꨮꩄ ꨢꨮꨭ ꨗꨫ꩝꩝ ꩒꩖꩞ ꨈꨪꨗꨯꨱꩃ ꨎꩃ ꨧꨗꩃ ꨥꨮꩀ ꨨꨰ꩝ ꨀꨕꨬ ꨆꨵꩀ ꨧꨀꨰ꩝ ꨓꨶꨬ ꨟꨰ ꨚꨌꨬ꩝꩝ ꩒꩗꩞ ꨕꨨꨵꩀ ꨝꨳꩀ ꨧꨩ ꨓꨳꩆ ꨆꨭꨟꨬ꩝ ꨀꨮꩈ ꨛꨯꨮ ꨚꨌꨬ꩝ ꨀꨔꩉ ꨚꨓꨯꨱ꩝꩝ ꩒꩘꩞ ꨢꨮꨭ ꨗꨫ ꨨꨝꨮꩉ ꨆꨳꨮꩃ ꨋꩇ꩝ ꨣꨪꨡꩍ ꨔꩆ ꨕꨨꨵꩀ꩝ ꨅꨩ ꨔꨬ ꨣꨩ ꨓꨮꩊ꩝꩝ ꩒꩙꩞ ꨓꨰꩀ ꨀꨥ ꨓꨔꨶꩀ ꨎꨪꩍ ꨇꩆ꩝ ꨠꨩ ꨗꨫ ꨤꨰꩀ ꨘꩆ꩝ ꨡꨮꩃ ꨀꨳꨩ ꨠꨓꨩ꩝꩝ ꩓꩐꩞ ꨌꨯꨱꩀ ꨨꨳꨩ ꨆꨮꨭ ꨚꩍ ꨓꨕꨩ꩝ ꨕꨫ ꨣꨳꨪꩌ ꨀꨖꨶꨩ꩝ ꨣꨪꨡꩍ ꨣꨪꨡꨭꩇ꩝꩝ ꩓꩑꩞ ꨓꨶꨬ ꨚꨌꨬ ꨚꨈꨯꨮꨩ ꨓꨮꩊ ꨧꨭꩇ꩝ ꨣꨭꨥ ꨣꨰꩈ ꨣꨭꩇ꩝ ꨚꨌꨬ ꨅꩍ ꨤꨪꨐꨰꩈ꩝꩝ ꩓꩒꩞ ꨅꨩ ꨆꨮꩆ ꨝꨵꨯꨱꩍ ꨣꨭꨥ ꨆꨩ ꨔꨴꨰꩈ꩝ ꨨꨝꨮꩉ ꨅꩍ ꨤꨪꨐꨰꩈ꩝ ꨕꨶꨪꩋꨧꩀ ꨀꨕꨬ꩝꩝ ꩓꩓꩞ ꨀꨗꨪꩅ ꨆꨮꨭ ꨨꨰ ꨚꨌꨬ꩝ ꨕꨨꨵꩀ ꨆꨵꩀ ꨀꨕꨬ꩝ ꨓꨶꨬ ꨟꨰ ꨢꨮꨭ ꨗꨫ꩝꩝ ꩓꩔꩞ ꨕꨨꨵꩀ ꨓꨶꨬ ꨢꨮꨭ ꨗꨫ ꨢꨶꨩ ꨔꨬ꩝ ꨆꨭꨢꨶꨩ ꨛꨯꨮ ꨚꨌꨬ꩝ ꨎꨮꩍ ꨧꨯꨱꩃ ꨕꨨꨵꩀ꩝꩝ ꩓꩕꩞ ꨀꨗꨪꩅ ꨀꨕꨬ ꨨꨰ ꨠꨒꨮꩇ꩝ ꨕꨨꨵꩀ ꨆꨵꩀ ꨈꨮꩇ꩝ ꨓꨶꨬ ꨛꨯꨮ ꨚꨌꨬ꩝꩝ ꩓꩖꩞ ꨕꨨꨵꩀ ꨆꨵꩀ ꨁꨗꨩ ꨆꨵꩀ ꨀꨕꨬ꩝ ꨨꨝꨮꩉ ꨧꩍ ꨧꨆꨬ꩝ ꨓꨳꩆ ꨅꩍ ꨀꨗꨪꩅ꩝꩝ ꩓꩗꩞ ꨓꨤꨰꩍ ꨀꨗꨯꨱꩃ ꨟꩀ ꨌꨳꨮꨥ ꨣꨗꨭꨥ꩝ ꨤꩃ ꨚꨩ ꨝꨣꨭꨥ꩝ ꨧꨳꩌ ꨆꨩ ꨣꨩ ꨕꨯꨱꩀ꩝꩝ ꩓꩘꩞ ꨗꨯꨱ ꨚꨯꩀ ꨚꨡꩍ ꨝꨩ ꨣꨰ꩝ ꨝꨪꨊꨭꨩ ꨁꨗꨈꨪꨣꩈ꩝ ꨆꨳꨮꩃ ꨝꨭꩍ ꨨꨤꨩ꩝꩝ ꩓꩙꩞ ꨓꨔꨮꩇ ꨠꨣꨳꩍ ꨝꨊꨭꨩ ꨆꨮꨭ ꨝꨩ꩝ ꨚꨳꨯꨮꩍ ꨈꩌ ꨨꨤꨩ꩝ ꨚꨢꩀ ꨣꨩ ꨧꨳꩌ꩝꩝ ꩔꩐꩞ ꨏꨯꨱꨥ ꨇꨶꨰ ꨝꨪ ꨙꩇ ꨧꨭꨤꩌ꩝ ꨆꨭꨙꨩ ꨣꨩ ꨝꨩ ꨓꨳꩆ꩝ ꨤꩄ ꨚꨴꨯꨱꩃ ꨨꨓꨰ꩝꩝ ꩔꩑꩞ ꨡꨮꩃ ꨝꨰꩀ ꨨꨤꨩ ꨚꨯꩀ ꨟꨰ꩝ ꨀꨕꨬ ꨚꨢꩀ ꨧꨀꨰ꩝ ꨛꨯꨮ ꨦꩍ ꨧꨆꨬ꩝꩝ ꩔꩒꩞ ꨚꨕꨮꩍ ꨤꨶꨰ ꨓꨘꩆ ꨆꨩ ꨟꨬ꩝ ꨝꨣꨭꨥ ꨡꨮꩃ ꨣꨬ꩝ ꨟꩃ ꨝꩊ ꨨꨤꨩ꩝꩝ ꩔꩓꩞ ꨠꨢꩍ ꨌꨬ ꨅꩍ ꨡꨮꩃ ꨓꨴꨩ꩝ ꨚꨢꨯꨮꩉ ꨥꨮꩀ ꨆꨩ꩝ ꨂꨣꩃ ꨚꨌꨬ꩝꩝ ꩔꩔꩞ ꨕꨴꨮꩍ ꨗꨫ ꨧꨪꨝꨮꩉ ꨧꨪ ꨋꩇ꩝ ꨚꨌꨬ ꨆꨵꩀ ꨕꨨꨵꩀ꩝ ꨎꨮꩍ ꨙꨩ ꨢꨮꨭ ꨗꨫ꩝꩝ ꩔꩕꩞ ꨕꨨꨵꩀ ꨓꨶꨬ ꨝꨳꩀ ꨣꨡꨪ꩝ ꨓꨯꨱꩌ ꨔꨭꩆ ꨠꨗꨪ꩝ ꨌꨬ ꨅꩍ ꨤꨪꨐꨰꩈ꩝꩝ ꩔꩖꩞ ꨀꨮꩈ ꨌꨬ ꨀꨗꨪꩅ ꨥꨮꩀ ꨨꨰ꩝ ꨡꨭꩀ ꨆꨵꨯꨱꩍ ꨕꨫ ꨈꨵꨰ꩝ ꨀꨥ ꨓꨰꩀ ꨕꨫ ꨕꨴꨬ꩝꩝ ꩔꩗꩞ ꨧꨩ ꨆꩊ ꨗꨫ ꨕꨨꨵꩀ ꨧꨯꨱꩃ ꨌꨬ꩝ ꨣꨪꨡꩍ ꨤꨯꨩ ꨙꨬ꩝ ꨓꨯꨱꩌ ꨔꨭꩆ ꨠꨗꨪ꩝꩝ ꩔꩘꩞ ꨕꨨꨵꩀ ꨟꩃ ꨣꨗꨰꩍ ꨙꨮꨩ ꨗꨫ꩝ ꨔꨭꩆ ꨗꨫ ꨎꨮꨩ꩝ ꨝꨪꨙꨭꩂ ꨓꨆꨰ꩝꩝ ꩔꩙꩞ ꨒꨮꩇ ꨧꨯꨱꩃ ꨤꨪꨜꨶꨰ ꨕꨫ ꨕꨴꨬ꩝ ꨓꨶꨬ ꨦꩍ ꨧꨆꨬ꩝ ꨨꨝꨳꨯꨮꩆ ꨠꨣꨰ꩝꩝ ꩕꩐꩞ ꨚꨓꨶꩍ ꨡꨯꩍ ꨨꨭꨩ ꨗꩌ ꨓꨆꨰ꩝ ꨨꨌꨶꩀ ꨓꨶꨬ ꨠꨣꨰ꩝ ꨓꨯꨱꩌ ꨦꩍ ꨧꨆꨬ꩝꩝ ꩕꩑꩞ ꨚꨕꨬ ꨀꨤꨩ ꨨꨤꨶꨬ ꨙꨯꩌ ꨨꨳꨩ꩝ ꨣꨚꨮꩀ ꨓꨮꩊ ꨓꨕꨩ꩝ ꨝꨴꨮꩇ ꨎꨭꩌ ꨕꨣꩍ꩝꩝ ꩕꩒꩞ ꨆꨮꨭ ꨚꨯꩀ ꨕꨴꨬ ꨨꨓꩀ ꨕꨮꩇ ꨕꨮꩃ꩝ ꨆꨳꨮꩃ ꨆꨩ ꨨꨝꩉ꩝ ꨆꨯꨮꩄ ꨓꨳꩆ ꨚꨓꨶꨬ꩝꩝ ꩕꩓꩞ ꨍꨰ ꨆꨮꨭ ꨚꨓꨶꨬ ꨍꨰ ꨨꨕꨶꨪꩋ꩝ ꨧꨕꩀ ꨆꨮꨭ ꨣꨶꨪꩋ꩝ ꨌꨰꩀ ꨆꨩ ꨂꨣꩃ꩝꩝ ꩕꩔꩞ ꨎꨨꨰꩆ ꨟꩀ ꨤꨪꨟꩆ ꨝꨭꩍ ꨉꩊ꩝ ꨆꨮꨭ ꨙꨪꩀ ꨗꨯꨱ ꨆꨘꩉ꩝ ꨆꨳꨮꩃ ꨠꨤꨳꨮꩃ ꨆꨗꨩ꩝꩝ ꩕꩕꩞ ꨤꨪꨟꩆ ꨓꨮꩊ ꨌꨴꨯꨱꩍ ꨟꨨꨪꩀ꩝ ꨤꨪꨟꩆ ꨅꩍ ꨙꨪꩀ꩝ ꨓꨴꨭꩆ ꨗꨯꨱ ꨂꨤꨩ꩝꩝ ꩕꩖꩞ ꨤꨪꨟꩆ ꨓꨮꩊ ꨚꨤꨬ ꨧꨣꨰꩍ ꩝ ꨚꨕꨬ ꨝꩀ ꨈꨵꨰꩍ꩝ ꨕꩀ ꨝꨪꩍ ꨧꨭꨀꨮꩆ꩝꩝ ꩕꩗꩞ ꨤꨪꨟꩆ ꨓꨮꩊ ꨚꨤꨬ ꨆꨴꨯꨱꩃ ꨆꨭꨣꩃ꩝ ꨚꨕꨬ ꨕꨯꨱꩀ ꨌꩃ꩝ ꨣꨩ ꨈꨵꩆ ꨟꨰ ꨨꨕꨬ꩝꩝ ꩕꩘꩞ ꨤꨪꨟꩆ ꨓꨮꩊ ꨡꨵꩃ ꨨꨤꨭꩍ꩝ ꨓꨈꨯꩀ ꨈꨵꨮꩃ ꨡꨯꩍ꩝ ꨡꨵꩃ ꨧꩉ ꨟꩃ ꨀꨘꩀ꩝꩝ ꩕꩙꩞ ꨤꨪꨟꩆ ꨓꨮꩊ ꨚꨤꨬ ꨌꨆꩀ꩝ ꨠꨓꨩ ꨀꨮꩉ ꨓꨝꨳꩀ꩝ ꨍꨰ ꨀꨳꨩ ꨨꨎꩆ꩝꩝ ꩖꩐꩞ ꨤꨪꨟꩆ ꨓꨮꩊ ꨨꨟꨭꨩ ꨝꨣꨭꨥ꩝ ꨚꨕꨬ ꨌꩃ ꨆꨮꨭ꩝ ꨨꨰ ꨦꩍ ꨧꨆꨬ꩝꩝ ꩖꩑꩞ ꨤꨪꨟꩆ ꨓꨮꩊ ꨆꨤꩃ ꨀꨓꩍ꩝ ꨓꨆꨰ ꨢꩌ ꨕꨴꩍ꩝ ꨓꨶꨬ ꨦꩍ ꨧꨆꨬ꩝꩝ ꩖꩒꩞ ꨤꨪꨟꩆ ꨓꨮꩊ ꨞꨭꩌ ꨌꨥꨰꩅ꩝ ꨓꨆꨰ ꨕꨰꩅ ꨥꨰꩅ꩝ ꨓꨶꨬ ꨦꩍ ꨧꨆꨬ꩝꩝ ꩖꩓꩞ ꨤꨪꨟꩆ ꨓꨮꩊ ꨞꨭꩌ ꨚꨣꨪꩀ꩝ ꨆꨮꨭ ꨓꨶꨬ ꨜꨭꩆ ꨜꨪꩀ꩝ ꨟꨰ ꨡꨯꩍ ꨧꨈꨵꨮꩃ꩝꩝ ꩖꩔꩞ ꨤꨪꨟꩆ ꨓꨮꩊ ꨖꨯꨱꩃ ꨚꨘꩆ꩝ ꨤꨪꨚꨩ ꨆꨵꨯꨱꩍ ꨓꨳꩆ꩝ ꨕꩀ ꨥꨮꩉ ꨧꨭꨀꨮꩆ꩝꩝ ꩖꩕꩞ ꨤꨪꨆꨮꨭ ꨚꨕꨮꩍ ꨤꨪꨟꩆ ꨌꩃ ꨆꨩ꩝ ꨕꨨꨵꩀ ꨓꨳꩆ ꨤꨪꨚꨩ꩝ ꨨꨶꩀ ꨧꨩ ꨚꨝꩍ꩝꩝ ꩖꩖꩞ ꨧꨆꨬ ꨨꨶꩀ ꨧꨆꨬ ꨡꨮꩃ ꨀꨋꩆ꩝ ꨕꨨꨵꩀ ꨡꨮꩃ ꨚꨚꩆ꩝ ꨚꨴꨲꩆ ꨓꨶꨬ ꨚꨌꨬ꩝꩝ ꩖꩗꩞ ꨧꨆꨬ ꨨꨶꩀ ꨕꨨꨵꩀ ꨓꨳꩇ ꨣꨶꨰ꩝ ꨕꨨꨵꩀ ꨈꨵꨮꩃ ꨌꨡꨶꨰ꩝ ꨌꨬ ꨝꨳꩀ ꨤꨪꨚꨪꩍ꩝꩝ ꩖꩘꩞ ꨤꨪꨟꩆ ꨓꨮꩊ ꨚꨤꨬ ꨌꨆꨭꩆ꩝ ꨂꨣꩃ ꨉꨮꩍ ꨡꨭꩊ꩝ ꨧꨩ ꨕꨴꨬ ꨎꨩ ꨧꩆ ꨥꨩ꩝꩝ ꩖꩙꩞ ꨂꨣꩃ ꨤꨪꨀꨶꨩ ꨐꨭꨩ ꨋꩇ ꨣꨪꨓꩀ꩝ ꨣꨭꩇ ꨐꨭꨩ ꨏꩀ꩝ ꨚꨓꩀ ꨐꨭꨩ ꨧꨳꩌ꩝꩝ ꩗꩐꩞ ꨤꨪꨟꩆ ꨓꨮꩊ ꨚꨤꨬ ꨀꨳꨩ ꨡꨵꩃ꩝ ꨓꨔꨶꨮꩄ ꨎꨪꩍ ꨨꨤꩃ꩝ ꨀꨶꩀ ꨀꨳꨩ ꨠꨓꨩ꩝꩝ ꩗꩑꩞ ꨤꨪꨟꩆ ꨓꨮꩊ ꨚꨤꨬ ꨚꨓꨴꨩ꩝ ꨚꨤꨬ ꨏꩀ ꨀꨳꨩ꩝ ꨀꨳꨩ ꨎꨳꨮꩃ ꨀꨔꩉ꩝꩝ ꩗꩒꩞ ꨤꨪꨟꩆ ꨓꨮꩊ ꨚꨤꨬ ꨀꨳꨩ ꨚꨝꨯꨱꨥ꩝ ꨓꨆꨰ ꨣꨰꩈ ꨣꨯꨱꨥ꩝ ꨓꨶꨬ ꨦꩍ ꨧꨆꨬ꩝꩝ ꩗꩓꩞ ꨤꨪꨟꩆ ꨓꨮꩊ ꨚꨤꨬ ꨚꨎꨰ꩝ ꨤꨪꨈꩍ ꨓꨆꨰ꩝ ꨓꨶꨬ ꨦꩍ ꨧꨆꨬ꩝꩝ ꩗꩔꩞ ꨤꨪꨟꩆ ꨓꨮꩊ ꨚꨤꨬ ꨚꨕꩃ ꨧꨣꨩ꩝ ꨆꨮꨭ ꨓꨶꨬ ꨤꨶꨪꩄ ꨀꨖꨶꨩ꩝ ꨆꨩ ꨌꨬ ꨅꩍ ꨤꨪꨐꨰꩈ꩝꩝ ꩗꩕꩞ ꨤꨪꨟꩆ ꨓꨮꩊ ꨚꨤꨬ ꨌꨴꨯꨱꩍ ꨆꨭꨣꩃ꩝ ꨚꨕꨬ ꨕꨯꨱꩀ ꨌꩃ꩝ ꨣꨩ ꨈꨵꩉ ꨟꨰ ꨨꨕꨬ꩝꩝ ꩗꩖꩞ ꨤꨪꨟꩆ ꨓꨮꩊ ꨚꨤꨬ ꨚꨚꨵꨯꩌ꩝ ꨨꨕꨬ ꨕꨯꨱꩀ ꨙꨯꩌ꩝ ꨀꨤꨩ ꨜꨭꩆ ꨆꨔꩀ꩝꩝ ꩗꩗꩞ ꨙꨯꩌ ꨨꨰ ꨧꨯꨱꩃ ꨕꨨꨵꩀ꩝ ꨀꨤꨩ ꨨꨤꨶꨰ ꨆꨔꩀ꩝ ꨧꨳꩌ ꨓꨴꨭꩍ ꨀꨊꨪꩆ꩝꩝ ꩗꩘꩞ ꨀꨤꨩ ꨨꨤꨶꨰ ꨆꨔꩀ ꨓꨔꨶꨮꩉ꩝ ꨓꨤꨮꩍ ꨔꩆ ꨀꨮꩆ꩝ ꨥꨮꩀ ꨨꨰ ꨚꨌꨬ꩝꩝ ꩗꩙꩞ ꨤꨪꨟꩆ ꨓꨮꩊ ꨚꨤꨬ ꨠꨗꨭꨥ ꨝꨳꨩ꩝ ꨚꨤꨰꩀ ꨆꨵꨯꨱꩆ ꨆꨮꨭ ꨨꨳꨩ꩝ ꨣꨪꨡꩍ ꨣꨪꨡꨲꩇ꩝꩝ ꩘꩐꩞ ꨤꨪꨟꩆ ꨓꨮꩊ ꨝꨪꨓꨭꨥ ꨌꨊꨶꨩ꩝ ꨨꨕꨬ ꨝꨴꩍ ꨝꨩ꩝ ꨨꨗꨭꩀ ꨧꩍ ꨧꨆꨬ꩝꩝ ꩘꩑꩞ ꨤꨪꨟꩆ ꨓꨮꩊ ꨌꨣꨥ ꨌꨴꨯꨱꩍ ꨞꨯꨱꨥ꩝ ꨆꨗꨰ ꨗꨯꨱ ꨤꨯꨱꨥ꩝ ꨚꨌꨬ ꨗꨯꨱ ꨚꨌꩌ꩝꩝ ꩘꩒꩞ ꨤꨪꨟꩆ ꨓꨮꩊ ꨚꨤꨬ ꨀꨳꨩ ꨆꩌ꩝ ꨚꨕꨬ ꨕꨯꨱꩀ ꨓꩀ ꨘꩆ꩝ ꨆꨩ ꨥꨮꩈ ꨚꨌꨬ꩝꩝ ꩘꩓꩞ ꨤꨪꨟꩆ ꨓꨮꩊ ꨚꨤꨬ ꨈꨶꨮꩆ ꨈꨯꨱꩀ꩝ ꨓꨗꩀ ꨆꨵꨮꨭ ꨓꨯꨱꩀ꩝ ꨨꨗꨭꩀ ꨦꩍ ꨧꨆꨬ꩝꩝ ꩘꩔꩞ ꨤꨪꨟꩆ ꨓꨮꩊ ꨚꨤꨬ ꨈꨶꨮꩆ ꨈꨪꩃ꩝ ꨓꨗꩀ ꨆꨵꨮꨭ ꨙꨪꩃ꩝ ꨨꨗꨭꩀ ꨦꩍ ꨧꨆꨬ꩝꩝ ꩘꩕꩞ ꨎꨨꨰꩆ ꨟꩀ ꨨꨤꨯꨱꩃ ꨏꨯꨱꩀ ꨀꨳꨩ꩝ ꨡꨯꩍ ꨀꨳꨩ ꨕꨊꨰꩍ ꨎꨶꨰ ꨏꨯꨱꩀ꩝꩝ ꩘꩖꩞ ꨓꨈꨯꩀ ꨓꨴꨭꩍ ꨚꩀ ꨊꨯꨱꩀ꩝ ꨏꨯꨱꩀ ꨀꨳꨩ ꨚꨆꨮꩆ꩝꩝ ꩘꩗꩞ ꨏꨯꨱꩀ ꨀꨳꨩ ꨚꨆꨮꩆ ꨝꨩ ꨣꨰ ꨨꨤꨮꩃ꩝ ꨓꨗꩀ ꨈꨯꨱꩀ ꨆꨮꩃ꩝ ꨨꨗꨭꩀ ꨦꩍ ꨧꨆꨬ꩝꩝ ꩘꩘꩞ ꨎꨨꨰꩆ ꨟꩀ ꨀꨚꨶꨬ ꨝꨩ ꨟꨰ ꨆꨩ ꨆꨮꨭ꩝ ꨓꨗꩀ ꨈꨯꨱꩀ ꨝꨣꨭꨥ꩝ ꨨꨗꨭꩀ ꨧꩍ ꨧꨆꨬ꩝꩝ ꩘꩙꩞ ꨆꨌꨯꨱꨥ ꨕꨫ ꨈꨯꨱꩀ ꨌꨴꨯꨱꩀ ꨝꨴꩍ꩝ ꨓꨗꩀ ꨝꨰꩀ ꨝꨪꨕꨴꩍ꩝ ꨤꨪꨆꨬ ꨤꨪꨚꨩ꩝꩝ ꩙꩐꩞ ꨣꨥ ꨝꨴꩍ ꨆꨵꨮꨭ ꨚꩀ ꨡꨮꩃ ꨡꨳꩀ꩝ ꨓꨗꩀ ꨎꨶꨰ ꨝꨴꨬ ꨇꩀ꩝ ꨋꩇ ꨝꨪ ꨧꨟꨮꩊ꩝꩝ ꩙꩑꩞ ꨎꨤꨭꩀ ꨡꨪꩅ ꨧꨤꨯꨱ ꨨꨝꩆ꩝ ꨚꨯꩀ ꨗꨯꨱ ꨝꨪ ꨓꨮꩊ꩝ ꨓꨳꩆ ꨢꨮꨭ ꨣꨩ ꨓꨴꨬ꩝꩝ ꩙꩒꩞ ꨧꨆꨬ ꨨꨶꩀ ꨡꨮꩃ ꨁꨆꩆ ꨕꨣꨬ꩝ ꨕꨨꨵꩀ ꨀꨮꩈ ꨚꨌꨬ꩝ ꨡꨮꩃ ꨀꨳꨩ ꨠꨓꨩ꩝꩝ ꩙꩓꩞ ꨕꨨꨵꩀ ꨨꨶꩀ ꨓꨶꨬ ꨤꨪꨚꨩ꩝ ꨙꨩ ꨗꨯꨱ ꨀꨖꨶꨩ꩝ ꨀꨝꨪꩍ ꨚꨴꨲꩆ ꨤꨪꨜꨶꨰ꩝꩝ ꩙꩔꩞ ꨕꨨꨵꩀ ꨆꨵꩀ ꨁꨗꨩ ꨓꨶꨬ ꨌꨬ꩝ ꨝꨵꨯꨱꩍ ꨦꩍ ꨧꨆꨬ꩝ ꨆꨵꩀ ꨆꨮꨭ ꨢꨮꨭ ꨗꨫ꩝꩝ ꩙꩕꩞ ꨌꨬ ꨗꨯꨱ ꨎꨤꩆ ꨨꨤꨬ꩝ ꨕꨮꩇ ꨕꨫ ꨀꨕꨬ꩝ ꨗꨯꨱ ꨕꨯꨱꩀ ꨨꨚꩀ꩝꩝ ꩙꩖꩞ ꨨꨮꩄ ꨰ ꨈꨪꨤꩌ ꨨꨤꨩ ꨣꨚꨶꨮꩆ꩝ ꨚꨮꩇ ꨔꩆ ꨀꨮꩆ꩝ ꨆꨮꨭ ꨗꨯꨱ ꨨꨚꩀ꩝꩝ ꩙꩗꩞ ꨨꨮꩄ ꨗꨰ ꨆꨭꨟꨬ ꨙꨶꨩ ꨀꨳꨩ꩝ ꨡꨯꩍ ꨧꨭꨞꨣꨴꨪꨢꨩ꩝ ꨆꨮꨭ ꨗꨯꨱ ꨓꨮꩊ꩝꩝ ꩙꩘꩞ ꨧꨩ ꨡꨯꩍ ꨕꨴꨬ ꨟꩃ ꨨꨤꨮꩃ꩝ ꨝꨤꨭꨥ ꨆꩃ ꨥꨮꩃ꩝ ꨘꩆ ꨦꩍ ꨧꨆꨬ꩝꩝ ꩙꩙꩞ ꨀꨥ ꨎꨭꩀ ꨀꨥ ꨨꨎꨥ꩝ ꨚꨮꩇ ꨧꨆꨬ ꨆꨮꨭ ꨗꨯꨱ꩝ ꨘꩆ ꨎꨮꩍ ꨕꨫ ꨆꨮꨭ꩝꩝ ꩑꩐꩐꩞ ꨟꨰ ꨝꨰꩀ ꨆꨩ ꨰ ꨚꨓꨯꨱꨥ꩝ ꨎꨤꩆ ꨓꨴꨭꩍ ꨎꨎꨴꨯꨱꨥ꩝ ꨈꩍ ꨨꨣꨬ ꨓꨈꨯꩀ꩝꩝ ꩑꩐꩑꩞ ꨧꨩ ꨡꨯꩍ ꨧꩃ ꨓꨶꩀ ꨆꨎꨯꨱꨥ꩝ ꨤꨰꩀ ꨟꨮꩊ ꨤꨯꨱꨥ꩝ ꨧꩃ ꨦꩍ ꨧꨆꨬ꩝꩝ ꩑꩐꩒꩞ ꨧꨆꨬ ꨙꨪꩍ ꨚꨈꨪꨙꨮꩃ꩝ ꨕꨨꨵꩀ ꨕꨶꩍ ꨚꨮꩃ꩝ ꨦꨮꩇ ꨦꩍ ꨧꨆꨬ꩝꩝ ꩑꩐꩓꩞ ꨧꨩ ꨡꨯꩍ ꨧꩃ ꨤꨰꩀ ꨆꨎꨰ꩝ ꨤꨰꩀ ꨟꨮꩊ ꨨꨓꨰ꩝ ꨧꩃ ꨦꩍ ꨧꨆꨬ꩝꩝ ꩑꩐꩔꩞ ꨓꨊꨪ ꨨꨮꩄ ꨣꨩ ꨈꨪꨗꩇ ꨛꨯꨮ ꨧꩃ꩝ ꨨꨤꨶꨬ ꨝꨡꨮꩃ ꨎꩃ꩝ ꨤꨪꨆꨮꨭ ꨚꨕꨬ꩝꩝ ꩑꩐꩕꩞ ꨝꨳꩀ ꨎꨮꩍ ꨨꨤꨶꨬ ꨝꨡꨮꩃ ꨎꩃ꩝ ꨆꨭꨨꨵꨯꨱꩌ ꨨꨭꨩ ꨧꩃ꩝ ꨝꨴꨬ ꨣꨩ ꨚꨕꨬ꩝꩝ ꩑꩐꩖꩞ ꨨꨮꩄ ꨛꨯꨮ ꨧꨗꨰ ꨚꨤꨬ ꨨꨤꨬ꩝ ꨓꨶꨬ ꨦꩍ ꨧꨆꨬ꩝ ꨥꩉ ꨈꨵꨰ ꨎꨤꩆ꩝꩝ ꩑꩐꩗꩞ ꨂꨧꩀ ꨟꩃ ꨣꨩ ꨀꨇꨩꩆ ꨌꨰꩀ ꨰ꩝ ꨕꨨꨵꩀ ꨚꩀ ꨚꨎꨰ꩝ ꨓꨶꨬ ꨧꩍ ꨧꨆꨬ꩝꩝ ꩑꩐꩗꩞ ꨂꨧꩀ ꨟꩃ ꨣꨩ ꨀꨇꨩꩆ ꨌꨰꩀ ꨄꨰ꩝ ꨕꨨꨵꩀ ꨚꩀ ꨚꨎꨰ꩝ ꨓꨶꨬ ꨧꩍ ꨧꨆꨬ꩝꩝ ꩑꩐꩘꩞ ꨕꨀꨩ ꨛꨯꨮ ꨧꨗꨰ ꨣꨰ ꨕꨯꨱꩀ꩝ ꨤꩃ ꨌꨳꨮꨥ ꨣꨙꨯꨱꩇ꩝ ꨆꨵꨮꨭ ꨓꨮꩊ ꨓꨗꨪ꩝꩝ ꩑꩐꩙꩞ ꨓꨭꩍ ꨀꨳꨩ ꨝꨪ ꨕꨴꩍ ꨝꨩ ꨣꨰ꩝ ꨕꨀꨩ ꨣꨥ ꨓꨆꨰ꩝ ꨣꨩ ꨧꨳꩌ ꨓꨟꨩ꩝꩝ ꩑꩑꩐꩞ ꨗꨯꨱ ꨠꩀ ꨌꨡꩍ ꨝꨩ ꨟꨰ꩝ ꨝꨪꨊꨭꨩ ꨁꨗꨈꨪꨣꩈ꩝ ꨚꨢꩀ ꨣꨩ ꨧꨳꩌ꩝꩝ ꩑꩑꩑꩞ ꨗꨯꨱ ꨟꩀ ꨓꨔꨮꩇ ꨆꨩ ꨆꨮꨭ꩝ ꨨꨮꩇ ꨝꨯꨱꩍ ꨕꨟꨭꨥ꩝ ꨆꨳꨮꩃ ꨝꨭꩍ ꨨꨤꨩ꩝꩝ ꩑꩑꩒꩞ ꨆꨭꨨꨵꨯꨱꩌ ꨤꩄ ꨣꨩ ꨟꨰ ꨕꨫ ꨀꨖꨶꨩ꩝ ꨟꩀ ꨝꨭꩍ ꨨꨤꨩ꩝ ꨚꨢꩀ ꨣꨩ ꨡꨮꩃ꩝꩝ ꩑꩑꩓꩞ ꨗꨯꨱ ꨟꩀ ꨈꨯꨱꩀ ꨓꨗꩀ ꨚꨢꩀ꩝ ꨣꨩ ꨧꨳꩌ ꨨꨶꩀ꩝ ꨟꨰ ꨟꩃ ꨤꨪꨚꨩ꩝꩝ ꩑꩑꩔꩞ ꨀꨮꩈ ꨛꨯꨮ ꨧꨗꨰ ꨨꨶꩀ ꨢꨯꨱꩌ꩝ ꨆꨭꨨꨵꨯꨱꩌ ꨟꨰ ꨓꨯꨱꩌ꩝ ꨈꨮꩇ ꨕꨫ ꨀꨖꨶꨩ꩝꩝ ꩑꩑꩕꩞ ꨀꨮꩈ ꨗꨰ ꨅꩍ ꨔꨮꨭ ꨀꨋꩆ꩝ ꨚꨈꩀ ꨚꨈꩉ꩝ ꨃꨥ ꨛꨯꨮ ꨧꨗꨰ꩝꩝ ꩑꩑꩖꩞ ꨕꨨꨵꩀ ꨗꨫ ꨕꨶꨩ ꨧꨩ ꨓꨳꩆ꩝ ꨢꨮꨭ ꨢꩃ ꨝꨤꩆ꩝ ꨢꩃ ꨚꨭꨣꨪꨟꨪ꩝꩝ ꩑꩑꩗꩞ ꨕꨨꨵꩀ ꨗꨫ ꨗꨰ ꨟꩍ ꨣꩅ꩝ ꨓꨶꩀ ꨌꩌ ꨆꩅ꩝ ꨀꨔꩉ ꨚꨓꨯꨱ꩝꩝ ꩑꩑꩘꩞ ꨕꨨꨵꩀ ꨎꨮꩍ ꨅꨩ ꨔꨮꨭ ꨀꨋꩆ꩝ ꨚꨈꩀ ꨚꨈꩉ꩝ ꨃꨥ ꨦꩍ ꨧꨆꨬ꩝꩝ ꩑꩑꩙꩞ ꨀꨋꩆ ꨆꨮꨭ ꨧꩍ ꨧꨆꨬ꩝ ꨕꨯꨱꩀ ꨕꨫ ꨚꨤꨬ꩝ ꨨꨭꩍ ꨝꩉ ꨌꨗꨮꩉ꩝꩝ ꩑꩒꩐꩞ ꨎꨨꨰꩆ ꨟꩀ ꨤꨪꨟꩆ ꨝꨭꩍ ꨉꨮꩆ꩝ ꨆꨮꨭ ꨙꨪꩀ ꨗꨯꨱ ꨆꨘꩊ꩝ ꨠꨤꨳꨮꩃ ꨆꨗꨩ꩝꩝ ꩑꩒꩑꩞ ꨤꨪꨟꩆ ꨓꨮꩊ ꨚꨤꨬ ꨨꨟꨭꨩ ꨝꩉ꩝ ꨓꨔꨶꨮꩄ ꨎꨪꩍ ꨇꩆ꩝ ꨓꨶꨬ ꨦꩍ ꨧꨆꨬ꩝ ꩑꩒꩒꩞ ꨤꨪꨟꩆ ꨓꨮꩊ ꨤꨪꨗꩍ ꨨꨟꨭꨩ ꨣꨪꨟꨯꨱꩃ꩝ ꨈꨪꨡꩀ ꨕꨫ ꨥꨯꨱꩃ꩝ ꨓꨶꨬ ꨦꩍ ꨧꨆꨬ꩝꩝ ꩑꩒꩓꩞ ꨤꨪꨟꩆ ꨓꨮꩊ ꨚꨤꨬ ꨎꨯꨱꨥ ꨤꨰ꩝ ꨕꨨꨵꩀ ꨓꨶꨬ ꨠꨣꨰ꩝ ꨓꨯꨱꩌ ꨦꩍ ꨧꨆꨬ꩝꩝ ꩑꩒꩔꩞ ꨤꨪꨟꩆ ꨓꨮꩊ ꨚꨤꨬ ꨎꨯꨱꨥ ꨆꨭꩆ꩝ ꨨꨕꨶꨪꩋꨧꩀ ꨨꨤꨭꩆ꩝ ꨓꨶꨬ ꨧꩍ ꨧꨆꨬ꩝꩝ ꩑꩒꩕꩞ ꨧꨆꨬ ꨎꩃ ꨎꨗꩃ ꨀꨳꨩ ꨣꨭꨩ꩝ ꨧꨆꨬ ꨆꨳꨮꩃ ꨨꨭꨩ꩝ ꨀꨕꨬ ꨧꨀꨰ꩝꩝ ꩑꩒꩖꩞ ꨧꨆꨬ ꨋꩇ ꨕꨫ ꨆꨮꨭ ꨣꨪꨡꩍ꩝ ꨕꨶꨩ ꨔꨭꩆ ꨌꨤꩍ꩝ ꨥꨮꩉ ꨧꩃ ꨁꨗꨩ꩝꩝ ꩑꩒꩗꩞ ꨧꨆꨬ ꨙꨪꩀ ꨤꨪꨟꩆ ꨓꨴꨭꩆ ꨗꨯꨱ꩝ ꨕꨨꨵꩀ ꨔꨯꨱꨥ ꨕꨫ ꨀꨥ꩝ ꨌꨬ ꨅꩍ ꨀꨗꨪꩅ꩝꩝ ꩑꩒꩘꩞ ꨤꨪꨟꩆ ꨓꨮꩊ ꨓꨆꨰ ꨓꨔꨪꩀ꩝ ꨣꨪꨢꩀ ꨚꨯꩀ ꨝꨪꨤꨪꩀ꩝ ꨚꨯꨱꩍ ꨦꩍ ꨧꨆꨬ꩝꩝ ꩑꩒꩙꩞ ꨠꨢꨯꨱꩌ ꨆꨩ ꨣꨪꨢꩀ ꨘꩆ ꨣꨬ꩝ ꨚꨯꨱꩍ ꨦꩍ ꨧꨆꨬ꩝ ꨠꨓꨰ ꨓꨘꩆ꩝꩝ ꩑꩓꩐꩞ ꨆꨮꨭ ꨌꨯꨱꩀ ꨨꨳꨩ ꨆꨮꨭ ꨚꩍ ꨓꨕꨩ ꨣꨶꨪꩄ ꨡꨭꩀ꩝ ꨠꨓꨰ ꨜꨭꩆ ꨜꨪꩀ꩝ ꨡꨶꩍ ꨆꩉ ꨚꨎꩆ꩝꩝ ꩑꩓꩑꩞ ꨁꨗꨩ ꨤꨮꩈ ꨛꨯꨮ ꨁꨗꨩ꩝ ꨆꨮꨭ ꨓꨶꨬ ꨟꨰ ꨢꨮꨭ ꨗꨫ꩝ ꨝꨵꨯꨱꩍ ꨅꩍ ꨚꨓꨶꩍ꩝꩝ ꩑꩓꩒꩞ ꨆꨯꨮꨩ ꨧꨯꨩ ꨢꨮꨭ ꨗꨫ ꨆꨯꨮꩄ ꨀꩍ꩝ ꨔꨮꨭ ꨤꩄ ꨌꨤꩍ꩝ ꨌꨰꩀ ꨕꨫ ꨎꨤꩆ꩝꩝ ꩑꩓꩓꩞ ꨧꨆꨬ ꨋꩇ ꨨꨓꨰ ꨋꩇ ꨓꨳꩆ꩝ ꨠꨓꨰ ꨕꨫ ꨎꨤꩆ꩝ ꨀꨮꩈ ꨛꨯꨮ ꨤꨪꨊꨫꩀ꩝꩝