꩑꩞ ꨗꨫ ꨓꨶꨮꩀ ꨓꨶꨬ ꨚꨗꨶꨮꩄ ꨛꨯꨮ ꨈꨴꨭꨩ ꨨꨕꩉ꩝ ꨙꨯꩌ ꨥꨮꩀ ꨆꨩ ꨗꨈꩉ ꨌꩌ꩝ ꨗꨫ ꨎꨮꩍ ꨤꨪꨨꨪꩀ ꨚꨣꩆ꩝꩝ ꩒꩞ ꨟꨮꨢꩍ ꨡꨯꩍ ꨨꨣꨮꩀ ꨔꩆ ꨔꩇ ꨎꨤꩆ꩝ ꨕꨫ ꨌꨮꩀ ꨨꨭꩍ ꨞꨭꩌ ꨚꨣꩆ꩝ ꨓꨝꨵꨯꨱꩍ ꨅꩍ ꨨꨭꨩ ꨔꨬ ꨨꨕꩉ꩝꩝ ꩓꩞ ꨕꨫ ꨚꩃꨕꨣꩃ ꨨꨭꨩ ꨧꨩ ꨜꨭꩆ ꨎꨴꨰ ꨀꨧꩉ꩝ ꨗꨝꨪ ꨃꨥ ꨓꨈꨯꩀ ꨚꩀ ꨧꨶꨮꩉ꩝ ꨤꨪꨨꨪꩀ ꨗꨈꩉ ꨌꩌ ꨁꨓꨩ꩝꩝ ꩔꩞ ꨣꨩ ꨗꨯꨱ ꨓꨴꨭꩍ ꨟꨪꩆ ꨗꨝꨪ ꨨꨭꨩ ꨌꨈꨩ꩝ ꨣꨩ ꨋꩇ ꨆꨮꩉ ꨓꨮꩃ ꨀꨳꨩ꩝ ꨌꨰꩀ ꨕꨤꩌ ꨚꨯꨱꩍ ꨌꨓꨶꨰ꩝꩝ ꩕꩞ ꨨꨝꨳꨮꩆ ꨟꩃ ꨨꨭꨩ ꨆꨵꨮꨭ ꨢꨥꨩ ꨀꨕꨫꩍ ꨚꨰ꩝ ꨓꨮꩊ ꨝꨪꨤꩆ ꨧꨩ ꨚꨵꨭꩍ ꨣꨟꨰ꩝ ꨈꨪꨤꩄ ꨗꨫ ꨥꨮꩀ ꨚꨆꨴꨮꩃ ꨗꨈꩉ꩝꩝ ꩖꩞ ꨧꨩ ꨡꨯꩍ ꨣꨝꨭꩀ ꨈꨴꨲꩌ ꨆꨓꩊ ꨤꨪꩉ ꨟꨮꨆꨵꩌ꩝ ꨛꨯꨮ ꨗꨝꨪ ꨆꨳꨮꩃ ꨚꨣꨮꩌ꩝ ꨧꨶꨮꩉ ꨘꨣꩍ ꨌꨶꩍ ꨤꨪꨈꨩ ꩝꩝ ꩗꩞ ꨕꨫ ꨊꨯꨱꩀ ꨤꨪꨊꨫꩀ ꨨꨭꨩ ꨛꨯꨮ ꨕꨯꨮꨝꨪꨓꨩ꩝ ꨓꨴꨭꩆ ꨀꨗꩀ ꨕꨭꨑꨩ꩝ ꨝꨴꨬ ꨀꨋꩆ ꨟꨮꨘꨯꨧꩀ꩝꩝ ꩘꩞ ꨚꨳꨯꨮꩍ ꨝꨪꨘꨯꨩ ꨕꨯꩌ ꨚꨗꨶꨮꩄ ꨗꨝꨪ ꨧꨣꩀ꩝ ꨀꨕꩅ ꨌꨡꩅ ꨈꨴꨭꩀ ꨋꩇ꩝ ꨚꨣꩆ ꨌꩌ ꨟꩃ ꨕꨨꨵꨮꨭ꩝꩝ ꩙꩞ ꨓꨝꨵꨯꨱꩍ ꨂꨤꨪꩀ ꨚꨠꨤꨭꩀ ꨎꨮꩍ ꨘꩆ꩝ ꨀꨕꩅ ꨤꨪꨥꨪꩀ ꨟꨰ ꨆꨣꨮꩌ꩝ ꨀꨳꨩ ꨐꨭꨩ ꨚꨤꨪꨨꨪꩀ꩝꩝ ꩑꩐꩞ ꨓꨮꩊ ꨣꨩ ꨝꨴꨬ ꨆꨩ ꨚꨣꩆ ꨨꨕꩉ ꨥꨮꩀ꩝ ꨟꩃ ꨕꨮꩍ ꨧꨗꨪ ꨟꨰ ꨣꨩ ꨚꨵꨮꩀ꩝ ꨤꨪꨆꨭꩀ ꨓꨴꨭꩍ ꨅꩍ ꨨꨭꨩ ꨨꨕꩉ꩝꩝ ꩑꩑꩞ ꨟꩃ ꨕꨨꨵꨮꨭ ꨨꨭꨩ ꨛꨯꨮ ꨕꨯꨱꩀ ꨚꨆꨴꨮꩃ꩝ ꨣꨩ ꨚꨣꨞꨩ ꨞꨭꩌ ꨗꨈꩉ꩝ ꨆꨩ ꨂꨤꨪꩀ ꨕꨯꨱꩀ ꨆꨣꨬ꩝꩝ ꩑꩒꩞ ꨜꨭꩆ ꨗꨈꩉ ꨚꩀ ꨨꨣꨮꩀ ꨆꩍ ꨨꨣꨮꩀ ꨗꨫ ꨖꨬ꩝ ꨚꨓꨯꨱ ꨚꨗꨴꨯꨱꩃ ꨘꩆ ꨆꨩ ꨕꨴꨬ꩝ ꨓꨮꩊ ꨟꨮꨤꨪ ꨌꩌ ꨁꨓꨩ꩝꩝ ꩑꩓꩞ ꨆꨢꨶꨩ ꨆꨩ ꨎꨮꩀ ꨟꩃ ꨝꨪꨣꩀ ꨚꩀ ꨤꨯꨱꨥ꩝ ꨚꨴꨯꨱꩃ ꨆꨩ ꨌꩌ ꨝꨣꨭꨥ ꨟꩃ ꨐꨭꨩ꩝ ꨓꨮꩊ ꨟꨧꨭꩍ ꨌꨤꩍ ꨓꨤꨶꨮꩆ꩝꩝ ꩑꩔꩞ ꨆꨢꨶꨩ ꨐꨭꨩ ꨓꨮꩊ ꨚꨆꨵꨯꨱꩍ ꨔꨭꩆ ꨚꨈꨶꨮꩆ꩝ ꨛꨯꨮ ꨗꨫ ꨚꨵꨮꩀ ꨕꨴꨬ ꨨꨕꩉ꩝ ꨘꩆ ꨆꨳꨮꩃ ꨥꨮꩀ ꨚꨆꨴꨮꩃ ꨚꨣꩆ꩝꩝ ꩑꩕꩞ ꨂꨤꨪꩀ ꨚꨙꨳꩀ ꨢꩃ ꨨꨣꨬ ꨢꩃ ꨝꨤꩆ꩝ ꨟꩃ ꨘꩆ ꨧꨗꨪ ꨟꨰ ꨚꨣꩆ꩝ ꨤꨪꨨꨪꩀ ꨓꨴꨭꩍ ꨅꩍ ꨨꨭꨩ ꨈꨪꨗꨭꩍ꩝꩝ ꩑꩖꩞ ꨓꨗꨶꩀ ꨝꨧꨬ ꨣꨩ ꨋꩇ ꨈꨮꩌ ꨓꨝꨮꩃ ꨟꩍ꩝ ꨓꨮꩊ ꨗꨫ ꨔꨭꩆ ꨝꨪꨤꩆ ꨣꨩ ꨚꨮꩍ꩝ ꨘꩆ ꨟꩃ ꨝꨤꨩ ꨝꨪꨧꩆ ꨆꨳꨮꩃ ꨙꨯꩃ꩝꩝ ꩑꩗꩞ ꨓꨮꩊ ꨣꨩ ꨙꨪꩀ ꨕꨮꩃ ꨊꨯꨱꩀ ꨝꩊ ꨚꨓꨪꩍ꩝ ꨓꨆꨰ ꨆꨭꨣꨰ ꨨꨭꨩ ꨀꨝꨪꩍ꩝ ꨟꩃ ꨆꨩ ꨕꨴꨬ ꨆꨳꨮꩃ ꨡꨭꨥ ꨟꨮꨊꨭꨥ꩝꩝ ꩑꩘꩞ ꨓꨗꨴꩀ ꨓꨈꨯꩀ ꨧꨭꨟꨭꨕꨴꩀ ꨅꩍ ꨔꨬ ꨣꨩ ꨔꨮꨭ꩝ ꨘꩆ ꨎꨮꩍ ꨈꨰꩈ ꨝꨪꨓꨭꨥ꩝ ꨙꨯꩃ ꨕꨫ ꨆꨴꨲꩍ ꨨꨤꨭꨥ ꨓꨧꨪꩀ꩝꩝ ꩑꩙꩞ ꨘꩆ ꨟꩃ ꨨꨭꨩ ꨚꨣꩆ ꨎꨳꨯꨮꩃ ꨞꨪꩀ꩝ ꨨꨭꨩ ꨝꨪꨓꨭꨥ ꨕꨫ ꨆꨴꨲꩍ ꨓꨔꨪꩀ꩝ ꨐꨭꨩ ꨓꨘꩅ ꨕꨯꨱꩀ ꨓꨚꩍ꩝꩝ ꩒꩐꩞ ꨓꨘꩅ ꨘꩆ ꨎꨮꩍ ꨝꨓꨭꨥ ꨀꨔꨭꨥꨝꩍ꩝ ꨧꨩ ꨡꨯꩍ ꨆꨳꨮꩃ ꨨꨭꨩ ꨧꨭꨗꨪꩅ ꨈꨪꨗꨴꨮꩍ꩝ ꨕꨯꨱꩀ ꨚꩀ ꨛꨯꨮ ꨕꨯꨮꨝꨪꨝꨴꨬ꩝꩝ ꩒꩑꩞ ꨕꨫ ꨕꨭꩆꨢꨩ ꨕꨯꩌ ꨀꨗꩀ ꨌꩌ ꨕꨴꨬ꩝ ꨨꨟꨪꩅ ꨈꨪꨗꨴꨮꩍ ꨚꩀ ꨨꨤꨬ꩝ ꨤꨪꨎꩃ ꨓꨶꨬ ꨚꨮꩃ ꨓꩀ ꨘꩆ꩝꩝ ꩒꩒꩞ ꨀꨳꨩ ꨂꨣꩃ ꨎꩃ ꨗꩀ ꨀꨕꩌ꩝ ꨣꨩ ꨋꩇ ꨈꨪꨗꨴꨮꩍ ꨓꨈꨯꩀ ꨓꨮꩊ꩝ ꨤꨪꨊꨫꩀ ꨆꨳꨮꩃ ꨟꩀ ꨢꩃ ꨨꨣꨬ꩝꩝ ꩒꩓꩞ ꨕꨫ ꨕꨭꩆꨢꨩ ꨗꨫ ꨈꨪꨗꨴꨮꩍ ꨔꨬ ꨝꨴꨬ꩝ ꨌꨰꩀ ꨕꨨꨵꨮꨭ ꨡꨯꩍ ꨨꨕꨬ꩝ ꨕꨯꩌ ꨈꨪꨗꨴꨮꩍ ꨔꨬ ꨣꨩ ꨋꩇ꩝꩝ ꩒꩔꩞ ꨐꨭꨩ ꨆꨳꨮꩃ ꨟꩀ ꨓꨮꩊ ꨢꩃ ꨀꨕꨫꨓꨳꩀ꩝ ꨈꨪꨗꨴꨮꩍ ꨧꨘꩅ ꨡꨶꩀ ꨕꨫ ꨡꨶꩀ꩝ ꨆꨳꨮꩃ ꨟꩀ ꨈꨪꨗꨭꩍ ꨛꨯꨮ ꨕꨯꨝꨪꨓꨩ꩝꩝ ꩒꩕꩞ ꨔꨬ ꨣꨩ ꨔꨮꨭ ꨝꨵꨯꨱꩍ ꨧꨗꩃ ꨚꨮꩃ ꨆꨩ꩝ ꨓꩊ ꨨꨕꨬ ꨗꨫ ꨀꨳꨩ꩝ ꨨꨤꨬ ꨈꨪꨗꨴꨮꩍ ꨡꨯꩍ ꨆꨳꨮꩃ ꨈꨵꨮꩃ꩝꩝ ꩒꩖꩞ ꨕꨯꩌ ꨈꨪꨗꨴꨮꩍ ꨘꩆ ꨣꨩ ꨝꨴꨬ ꨟꨰ ꨆꨣꨮꩌ꩝ ꨆꨩ ꨕꨯꩌ ꨟꩍ ꨂꨣꨰ ꨆꨳꨮꩃ ꨆꨣꨮꩌ꩝ ꨆꨩ ꨟꨨꨵꨪꨆꨮꩌ ꨆꨳꨮꩃ ꨕꩍ ꨟꨮꨣꨳꩍ꩝꩝ ꩒꩗꩞ ꨤꨪꨆꨮꨭ ꨈꨪꨡꩀ ꨨꨰ ꨕꨫ ꨛꨯꨮ ꨕꨯꨮꨝꨪꨔꨴꨮꩍ꩝ ꨝꨴꨬ ꨝꨪ ꨨꨭꨩ ꨧꨭꨗꨪꩅ ꨈꨪꨗꨴꨮꩍ꩝ ꨓꨴꨭꩆ ꨟꨮꨣꨰ ꨕꨮꩃ ꨚꨆꨴꨮꩃ꩝꩝ ꩒꩘꩞ ꨨꨝꨳꨮꩆ ꨆꨳꨮꩃ ꨨꨭꨩ ꨆꨩ ꨚꨣꩆ ꨀꨗꩀ ꨌꩌ꩝ ꨓꨟꨭꩍ ꨈꨯꩀ ꨢꨮꨭ ꨆꨴꨭꩃ꩝ ꨗꩌ ꨟꩀ ꨛꨯꨮ ꨟꩃ ꨆꩊ꩝꩝ ꩒꩙꩞ ꨤꨪꨆꨮꨭ ꨕꨯꨱꩀ ꨟꨮꨤꨳꨮꩃ ꨆꨗꨩ ꨢꩃ ꨤꨪꨝꩃ꩝ ꨌꨰꩍ ꨝꨯꨱꩃ ꨝꨘꩍ ꨌꨥꩆ꩝ ꨎꨲꨩ ꨚꨶꨪꩋ ꨎꨲꨩ ꨚꨢꩀ꩝꩝ ꩓꩐꩞ ꨓꨮꩊ ꨝꨤꩆ ꨌꨡꨭꩉ ꨆꨓꨯꨮ ꨇꨪꩀ ꨋꩇ꩝ ꨝꨤꨪꩍ ꨌꨆꩇ ꨕꨫ ꨈꨴꨮꩇ꩝ ꨤꨪꨝꨪꩀ ꨚꨝꩍ ꨤꩌꨟꨮꨊꨩ꩝꩝ ꩓꩑꩞ ꨓꨯꨱꩌ ꨔꨭꩆ ꨤꨪꨎꩃ ꨆꨨꨴꨳꨩ ꨝꨩ ꨎꨲꨩ꩝ ꨕꨫ ꨆꨵꨮꨭ ꨚꨝꩍ ꨤꩌꨟꨮꨊꨩ꩝ ꨤꨪꨆꨮꨭ ꨨꨗꨳꨪꩌ ꨆꨩ ꨗꨈꩉ꩝꩝ ꩓꩒꩞ ꨝꨤꩆ ꨚꩀ ꨢꨶꨮꩉ ꨢꩃ ꨝꨠꨯꩃ ꨆꨤꩆ꩝ ꨆꨭꨨꨴꨳꨩ ꨇꨪꩀ ꨋꩇ ꨝꨪ ꨓꨮꩊ꩝ ꨕꨯꩌ ꨀꨕꩅ ꨗꨝꨪ ꨚꨢꨶꨩ꩝꩝ ꩓꩓꩞ ꨨꨤꨭꩆ ꨓꨶꨬ ꨚꨗꨶꨮꩄ ꨟꩃ ꨣꨩ ꨓꨨꨩ꩝ ꨚꨕꨮꩃ ꨕꨤꩌ ꨀꨣꨪꨢꨩ꩝ ꨚꨳꨯꨮꩍ ꨆꨩ ꨣꨰ ꨨꨕꨬ ꨆꨳꨮꩃ ꨈꨵꨮꩃ꩝꩝ ꩓꩔꩞ ꨣꩈ ꨗꨫ ꨧꨭꨗꨪꩅ ꨈꨪꨗꨴꨮꩍ ꨤꨯꨩ ꨧꨮꩃ꩝ ꨛꨯꨮ ꨗꨝꨪ ꨆꨳꨮꩃ ꨚꨣꨮꩌ꩝ ꨚꨀꨝꨪꩍ ꨎꩃ ꨅꩍ ꨔꨮꨭ꩝꩝ ꩓꩕꩞ ꨕꨫ ꨈꨴꨮꩇ ꨀꨳꨩ ꨣꨩ ꨟꨰ ꨔꨴꨥ ꨨꨕꨭꨥ꩝ ꨟꩃ ꨘꩆ ꨧꨗꨪ ꨣꨩ ꨟꨰ ꨣꨝꨭꨥ꩝ ꨅꩍ ꨔꨮꨭ ꨆꨩ ꨔꨬ ꨈꩍ ꨕꨫ ꨔꨬ꩝꩝ ꩓꩖꩞ ꨀꨗꩀ ꨌꩌ ꨋꩇ ꨟꨮꨗꨭꩍ ꨓꨶꨬ ꨨꨕꨬ꩝ ꨡꨯꩍ ꨈꨪꨗꨴꨮꩍ ꨚꩀ ꨨꨤꨬ꩝ ꨎꩃ ꨟꨮꨣꩅ ꨓꨶꨬ ꨆꨌꩍ꩝꩝ ꩓꩗꩞ ꨋꩇ ꨢꨮꨭ ꨘꩆ ꨅꩍ ꨔꨮꨭ ꨧꨗꩃ ꨝꨵꨯꨱꩍ ꨚꨔꨴꨰꩍ꩝ ꨓꩊ ꨨꨕꨬ ꨟꨰ ꨤꨪꨈꨰꩍ꩝ ꨀꨳꨩ ꨔꨬ ꨗꨫ ꨥꨮꩀ ꨆꨩ ꨔꨬ꩝꩝ ꩓꩘꩞ ꨅꩍ ꨨꨭꨩ ꨨꨕꩉ ꨗꩌ ꨟꩀ ꨟꨭꩀ ꨧꨭꨩ ꨆꨬ꩝ ꨌꨰꩀ ꨚꨳꨯꨮꩍ ꨥꨮꩀ ꨆꨩ ꨕꨴꨬ꩝ ꨞꨭꩌ ꨚꨍꨰ ꨓꨗꩍ ꨣꨪꨢꨩ꩝꩝ ꩓꩙꩞ ꨗꩌ ꨟꩀ ꨟꩃ ꨛꨯꨮ ꨁꨗꨩ ꨗꨈꩉ ꨓꨨꨩ꩝ ꨓꨴꨭꩆ ꨚꨣꩀ ꨓꨗꩍ ꨣꨪꨢꨩ꩝ ꨚꨤꨰꩀ ꨆꨤꩌ ꨕꨫ ꨞꨭꩌ ꨗꨈꩉ꩝꩝ ꩔꩐꩞ ꨘꨯꨧꨣꨥꩆ ꨛꨯꨮ ꨀꨤꨶꩍ ꨕꨮꩍ ꨓꨘꩆ꩝ ꨕꨫ ꨚꩃꨕꨣꩃ ꨛꨯꨮ ꨘꨧꨶꨮꩉ꩝ ꨕꨫ ꨝꩊ ꨤꨰ ꨛꨯꨮ ꨧꨓꨪꩀ꩝꩝ ꩔꩑꩞ ꨕꨫ ꨨꨭꩍ ꨛꨯꨮ ꨧꨤꨆꨩ ꨕꨯꨱꩀ ꨇꨪꩀ꩝ ꨆꨙꨩ ꨆꨩ ꨣꨩ ꨚꨤꨪꨨꨪꩀ꩝ ꨨꨎꨳꨯꨮꩃ ꨟꨧꨭꩍ ꨌꨤꩍ ꨌꨤꨶꨮꩆ꩝꩝ ꩔꩒꩞ ꨆꨢꨶꨩ ꨢꨮꨭ ꨘꩆ ꨤꨪꨨꨪꩀ ꨗꨈꩉ ꨞꨩ ꨢꨶꨮꩆ꩝ ꨛꨯꨮ ꨗꨝꨪ ꨨꨭꨩ ꨚꨈꨶꨮꩆ꩝ ꨆꨵꨯꨱꩍ ꨔꨭꩆ ꨟꩃ ꨣꨩ ꨥꨮꩀ꩝꩝ ꩔꩓꩞ ꨓꨮꩊ ꨣꨩ ꨟꨰ ꨈꨵꨮꩃ ꨕꨫ ꨌꩌ ꨨꨚꩀ ꨅꩍ ꨔꨮꨭ꩝ ꨚꨝꨵꨮꩀ ꨝꨪꨙꩃ ꨢꨮꨭ ꨣꨩ ꨔꨴꨭꨥ꩝ ꨅꩍ ꨚꩀ ꨤꨪꨝꨪꩀ ꨆꨳꨮꩃ ꨣꨶꩍ ꨚꨤꨪꩍ꩝꩝ ꩔꩔꩞ ꨨꨤꨬ ꨆꨐꨪꩀ ꨨꨓꨮꩌ ꨟꨮꨣꨳꩍ ꨋꩆ ꨚꨭꨓꨪꩍ꩝ ꨅꩍ ꨡꨯꩍ ꨨꨚꩀ ꨆꨳꨮꩃ ꨆꨩ ꨨꨌꨪꩍ꩝ ꨓꨯꩀ ꨚꨎꨰꩍ ꨚꨩ ꨨꨣꩅ꩝꩝ ꩔꩕꩞ ꨨꨤꨬ ꨕꨯꩌ ꨣꨩ ꨈꨪꨗꩇ ꨋꩆ ꨣꨩ ꨎꩀ꩝ ꨆꨭꨨꨴꨳꨩ ꨗꨫ ꨇꨪꩀ ꨝꨪ ꨓꨘꩅ꩝ ꨕꨯꩌ ꨀꨕꩅ ꨗꨝꨪ ꨚꨢꨶꨩ꩝꩝ ꩔꩖꩞ ꨕꨤꩌ ꨓꨚꨭꩀ ꨧꩀꨆꨣꩈ ꨟꩃ ꨣꨩ ꨓꨨꨩ꩝ ꨌꨰꩀ ꨥꨮꩀ ꨆꨩ ꨌꩌ ꨁꨓꨩ꩝ ꨓꨝꨵꨯꨱꩍ ꨅꩍ ꨇꨪꩀ ꨆꨵꩀ ꨨꨝꩃ꩝꩝ ꩔꩗꩞ ꨕꨤꩌ ꨀꨕꩅ ꨋꩇ ꨝꨪꨔꩉ ꨟꩃ ꨝꨪꨔꩉ꩝ ꨕꨯꩌ ꨎꨗꩀ ꨋꩆ ꨨꨗꨳꨪꩌ꩝ ꨂꨇꨪꩆ ꨚꨆꩊ ꨎꩃ ꨅꩍ ꨔꨮꨭ꩝꩝ ꩔꩘꩞ ꨓꨔꨴꨲꩅ ꨆꨳꨮꩃ ꨆꨚꨶꩀ ꨀꨆꨯꨱꩀ ꨚꨤꨯꨱ ꨝꨪꨓꨭꨥ꩝ ꨅꩍ ꨨꨕꩉ ꨆꨩ ꨆꨴꨭꩃ ꨟꩃ ꨕꨨꨵꨮꨭ꩝ ꨟꩃ ꨟꨭꩀ ꨧꨭꨩ ꨆꨬ ꨕꨴꨬ ꨟꩃ ꨆꩊ꩝꩝ ꩔꩙꩞ ꨧꨩ ꨡꨯꩍ ꨆꨵꩆ ꨋꩇ ꨈꨪꨗꨴꨮꩍ ꨚꨣꨮꩇ ꨤꨪꨝꩃ꩝ ꨎꨳꨯꨮꩃ ꨓꨓꨶꨩ ꨚꨈꩆ ꨎꨤꩆ꩝ ꨕꨫ ꨈꨴꨮꩇ ꨘꨣꩍ ꨠꨣꨓꩀ꩝꩝ ꩕꩐꩞ ꨀꨓꨶꨮꩉ ꨁꨆꩀ ꨕꨫ ꨣꨪꨢꩀ ꨓꨤꩃ ꨓꨝꨳꩀ꩝ ꨓꨢꩍ ꨟꩍ ꨔꨯꨮꩀ ꨚꨣꨳꩀ꩝ ꨕꨴꩀ ꨝꩀ ꨕꨤꩌ ꨗꨈꩉ꩝꩝ ꩕꩑꩞ ꨕꨯꩌ ꨀꨳꨩ ꨂꨣꩃ ꨨꨭꨩ ꨛꨯꨮ ꨕꨮꩃ ꨚꨆꨴꨮꩃ꩝ ꨨꨤꨬ ꨆꨩ ꨀꨳꨩ ꨗꩀ ꨌꩌ꩝ ꨕꨯꩌ ꨓꨶꨬ ꨆꨩ ꨂꨣꩃ ꨚꨙꩉ꩝꩝ ꩕꩒꩞ ꨨꨕꨶꨪꩋ ꨕꨫ ꨨꨈꨰꩅ ꨝꨵꨯꨱꩍ ꨨꨕꩄ ꨌꨴꨪꩍ ꨢꨮꨭ ꨘꩆ꩝ ꨤꨪꨨꨪꩀ ꨗꨫ ꨀꨳꨩ ꨝꨪꨊꨭꩆ ꨓꨤꨮꩌ꩝ ꨕꨫ ꨗꨈꩉ ꨕꨫꩅ ꨝꨪꨢꨩ꩝꩝ ꩕꩓꩞ ꨀꨕꩅ ꨌꨡꩅ ꨗꨝꨪ ꨌꨰꩀ ꨟꩃ ꨣꨩ ꨓꨨꨩ꩝ ꨚꨳꨯꨮꩍ ꨥꨮꩀ ꨆꨩ ꨌꩌ ꨁꨓꨩ꩝ ꨝꨵꨯꨱꩍ ꨓꨝꨵꨮꩀ ꨟꩃ ꨣꨰ ꨕꨨꨵꨮꨭ꩝꩝ ꩕꩔꩞ ꨓꨮꩊ ꨣꨩ ꨟꨰ ꨚꨕꨯꨱꩀ ꨔꨭꩆ ꨝꨪꨤꩆ ꨝꨣꨭꨥ꩝ ꨕꨫ ꨕꨭꨑꨩ ꨗꨫ ꨅꩍ ꨔꨮꨭ꩝ ꨓꨝꨳꩀ ꨕꨫ ꨛꨯꨮ ꨓꨗꩍ ꨣꨪꨢꨩ꩝꩝ ꩕꩕꩞ ꨀꨕꩅ ꨌꨡꩅ ꨔꨭꩆ ꨝꨤꩆ ꨌꩌ ꨁꨓꨩ꩝ ꨆꨴꨭꩃ ꨟꩃ ꨛꨯꨮ ꨕꨯꨮꨝꨪꨓꨩ꩝ ꨌꨰꩀ ꨕꨤꩌ ꨧꩀꨆꨣꨰ꩝꩝ ꩕꩖꩞ ꨚꨶꨮꩄ ꨤꨪꨊꨪꨥ ꨟꨪꩆ ꨅꩍ ꨨꨭꨩ ꨓꨳꩆ ꨓꨖꨰ꩝ ꨆꨵꩀ ꨕꨤꩌ ꨧꩀꨆꨣꨰ꩝ ꨐꨭꨩ ꨚꨶꨮꩄ ꨗꨫ ꨓꨶꨬ ꨨꨓꨰ ꨓꨆꨴꨲꨩ꩝꩝ ꩕꩗꩞ ꨠꨨꨵꨪꨆꨮꩌ ꨤꨰꩀ ꨓꨟꨩ ꨎꨮꨤꨤꨪꨕꨫ꩝ ꨉꨶꨮꩍ ꨕꨫ ꨊꨯꨱꩀ ꨝꨓꨭꨥ ꨓꨤꨪ꩝ ꨓꨝꨵꨯꨱꩍ ꨅꩍ ꨨꨭꨩ ꨔꨬ ꨣꨩ ꨔꨮꨭ꩝꩝ ꩕꩘꩞ ꨂꨣꩀ ꨗꨫ ꨂꨣꩃ ꨕꨯꨱꩀ ꨓꨝꨮꩌ ꨆꨢꨮꨭ꩝ ꨌꩃ ꨌꩀ ꨔꨴꨯꩍ ꨨꨋꨥ꩝ ꨆꨳꨮꩃ ꨚꨯꩀ ꨌꩀ ꨨꨤꨭꨥ ꨈꨪꨠꩆ꩝꩝ ꩕꩙꩞ ꨔꨬ ꨣꨩ ꨔꨮꨭ ꨚꨳꨯꨮꩍ ꨕꨫ ꨓꨳꩆ ꨈꨵꨮꩃ ꨧꨩ ꨆꨴꨲꩆ꩝ ꨕꨤꩌ ꨚꨙꨮꩇ ꨆꨭꨣꨀꨲꩆ꩝ ꨣꨩ ꨚꨡꨭꩀ ꨚꨳꨯꨮꩍ ꨓꩀ ꨘꩆ꩝꩝ ꩖꩐꩞ ꨔꨭꩆ ꨝꨤꩆ ꨂꨣꩃ ꨚꨈꨶꨮꩆ ꨅꩍ ꨆꨩ ꨓꨮꩊ꩝ ꨓꨎꨭꩍ ꨚꨆꩅ ꨕꨮꩍ ꨓꨘꩆ꩝ ꨅꩍ ꨆꨩ ꨨꨭꨩ ꨟꨳꨪꩅ ꨂꨣꩃ ꨟꨮꨣꨰ꩝꩝ ꩖꩑꩞ ꨓꩊ ꨝꨤꩆ ꨧꨩ ꨚꨵꨭꩍ ꨟꩃ ꨣꨩ ꨟꨰ꩝ ꨋꩇ ꨗꨈꩉ ꨥꨮꩀ ꨆꨩ ꨣꨰ꩝ ꨌꩌ ꨕꨫ ꨞꨭꩌ ꨚꨓꨪꩍ ꨕꨴꨬ ꨟꩃ ꨆꩊ꩝꩝ ꩖꩒꩞ ꨨꨝꨳꨮꩆ ꨟꩃ ꨡꨯꩍ ꨛꨯꨮ ꨈꨴꨭꨩ ꨟꨮꨣꨰ ꨁꨇꩆ꩝ ꨓꩊ ꨨꨣꨬ ꨨꨕꨬ ꨚꨣꩆ꩝ ꨚꨓꨯꨱꩌ ꨗꨫ ꨥꨮꩀ ꨚꩀ ꨝꩊ ꨤꨰ꩝꩝ ꩖꩓꩞ ꨆꨴꨭꩃ ꨚꨗꨶꨮꩄ ꨛꨯꨮ ꨈꨴꨭꨩ ꨨꨭꨩ ꨚꨍꨰ꩝ ꨌꨰꩀ ꨕꨤꩌ ꨧꩀꨆꨣꨰ꩝ ꨚꨮꩃ ꨓꨶꨬ ꨚꨗꨶꨮꩄ ꨧꨆꨥꨪ꩝꩝ ꩖꩔꩞ ꨘꩆ ꨟꩃ ꨡꨯꩍ ꨓꨗꩍ ꨓꨟꨭꩍ ꨕꨫ ꨎꩊꨤꨪꨕꨫ꩝ ꨘꩆ ꨆꨩ ꨟꩃ ꨣꨰ ꨗꨫ꩝ ꨧꨪ ꨡꨯꩍ ꨨꨭꨩ ꨚꨓꨴꨪ ꨝꨪꨢꨮꩃ꩝꩝ ꩖꩕꩞ ꨓꨮꩊ ꨘꩆ ꨨꨭꨩ ꨆꨳꨮꩃ ꨓꨯꨱꩌ ꨆꨩ ꨟꩃ ꨀꨶꨮꩆ꩝ ꨓꨝꨵꨯꨱꩍ ꨨꨭꨩ ꨌꩀ ꨎꨳꨯꨮꩃ꩝ ꨨꨕꨯꩌ ꨆꨳꨮꩃ ꨕꨯꨱꩀ ꨔꨴꨯꨱꩃ ꨆꨙꨯꨱꩃ꩝꩝ ꩖꩖꩞ ꨀꨕꨫꩍ ꨂꩅ ꨆꨴꨯꨱꩃ ꨀꨕꨫꩍ ꨕꩀ ꨋꨩ ꨖꨯꨱꩃ꩝ ꨀꨕꨫꩍ ꨚꨭꩉ ꨠꨗꨴꨯꨱꩃ ꨈꩍ ꨕꨗꨯꨱꨥ ꨖꨯꨱꩃ ꨓꨧꨪꩀ꩝꩝ ꩖꩗꩞ ꨕꨫ ꨚꩃꨕꨣꩃ ꨤꨪꨝꨪꩀ ꨘꩆ ꨟꩃ ꨤꨪꨥꨪꩀ꩝ ꨨꨭꨩ ꨆꨣꨮꩌ ꨈꨰꩈ ꨤꨪꨆꨪꩀ꩝ ꨨꨣꨯꨮꩀ ꨀꨙꨪꩀ ꨎꨤꩆ ꨓꨕꩉ꩝꩝ ꩖꩘꩞ ꨓꨮꩊ ꨚꨙꨮꩉ ꨢꩉ ꨝꨪꨗꩆ ꨆꨳꨮꩃ ꨓꨯꨱꩌ ꨕꨫ ꨌꩌ꩝ ꨎꨳꨯꨮꩃ ꨝꨵꨯꨱꩍ ꨓꨕꩉ ꨆꨤꨮꩌ꩝ ꨆꨩ ꨀꨳꨩ ꨗꨫ ꨌꩌ ꨤꨪꨨꨪꩀ ꨤꨪꨥꨪꩀ꩝꩝ ꩖꩙꩞ ꨝꨣꨭꨥ ꨟꩃ ꨨꨭꨩ ꨆꨩ ꨗꨈꩉ ꨞꨩ ꨂꨤꨪꩀ꩝ ꨝꨵꨯꨱꩍ ꨟꩃ ꨎꨯꨮꩀ ꨐꨭꨩ ꨓꩀ ꨆꨴꨰꩀ꩝ ꨆꨯꨮ ꨟꩃ ꨐꨭꨩ ꨨꨶꨮꩄ ꨆꨙꨩ꩝꩝ ꩗꩐꩞ ꨐꨭꨩ ꨟꨰ ꨓꨮꩊ ꨞꨭꩌ ꨚꨣꩆ ꨟꩃ ꨕꨫꨢꨩ꩝ ꨚꨋꩇ ꨀꨧꨩ ꨘꩆ ꨆꨩ꩝ ꨚꨳꨯꨮꩍ ꨆꨩ ꨝꨳꨩ ꨓꨴꨭꩆ ꨠꨗꨬ꩝꩝ ꩗꩑꩞ ꨟꩃ ꨆꩊ ꨕꨨꨵꨮꨭ ꨨꨭꨩ ꨛꨯꨮ ꨕꨯꨮꨝꨪꨝꨴꨬ꩝ ꨕꨫ ꨈꨴꨮꩇ ꨘꨣꩍ ꨀꨳꨩ ꨔꨬ꩝ ꨔꨬ ꨨꨚꩀ ꨕꨯꨱꩀ ꨓꨘꩆ꩝꩝ ꩗꩒꩞ ꨂꨣꩃ ꨚꨣꨞꨩ ꨓꨮꩊ ꨀꨊꨶꨬ ꨀꨥ ꨧꨭꨩ ꨇꩆ꩝ ꨀꨕꩅ ꨀꨳꨩ ꨔꨬ ꨧꨪꨝꩉ꩝ ꨧꨮꩇ ꨙꨯꩌ ꨚꨶꨮꩄ ꨢꨮꨭ ꨘꩆ꩝꩝ ꩗꩓꩞ ꨓꨮꩊ ꨨꨕꨬ ꨤꨪꨨꨪꩀ ꨀꨳꨩ ꨛꨯꨮ ꨌꩌ꩝ ꨕꨫ ꨈꨴꨮꩇ ꨘꨣꩍ ꨎꩃ ꨟꨮꨎꨴꨮꩌ꩝ ꨨꨣꨭꩇ ꨨꨣꩌ ꨈꨴꨮꩇ ꨈꨪꨤꨯꨱꩃ꩝꩝ ꩗꩔꩞ ꨝꨣꨭꨥ ꨟꩃ ꨛꨯꨮ ꨝꨴꨬ ꨎꨪꩆ ꨟꨰ ꨚꨣꨯꨱꩃ꩝ ꨟꩃ ꨘꩆ ꨧꨗꨪ ꨟꨰ ꨆꨩ ꨆꨵꨯꨱꩌ꩝ ꨓꨳꩆ ꨗꨫ ꨕꨴꨬ ꨓꨔꨴꨲꩅ ꨟꨮꨨꨭꨩ꩝꩝ ꩗꩕꩞ ꨨꨓꨰ ꨚꨣꩆ ꨚꨶꨮꩄ ꨕꨤꩌ ꨚꨮꩃ ꨅꩍ ꨨꨭꨩ꩝ ꨚꨯꨱꩍ ꨌꨓꨶꨰ ꨁꨤꨪꨠꨯꨩ꩝ ꨨꨭꨩ ꨕꨙꨮꩇ ꨨꨭꨩ ꨝꨪꨙꩃ꩝꩝ ꩗꩖꩞ ꨚꨮꩃ ꨅꩍ ꨨꨭꨩ ꨨꨕꨮꩋ ꨤꨪꨎꩃ ꨅꩍ ꨓꨤꩃ꩝ ꨛꨯꨮ ꨗꨝꨪ ꨅꩍ ꨝꨴꨬ ꨝꨪꨙꩃ꩝ ꨔꨭꩆ ꨝꨤꩆ ꨕꨴꨬ ꨅꩍ ꨔꨮꨭ꩝꩝ ꩗꩗꩞ ꨁꨤꨪꨟꨯꨩ ꨘꩆ ꨣꨩ ꨝꨴꨬ ꨨꨭꨩ ꨨꨤꨭꨥ꩝ ꨕꨶꩍ ꨓꨗꩍ ꨓꨝꨮꩌ ꨆꨢꨮꨭ꩝ ꨕꨶꩍ ꨝꨪ ꨡꨯꩍ ꨓꨗꩍ ꨟꨆꩍ꩝꩝ ꩗꩘꩞ ꨆꨳꨮꩃ ꨆꨩ ꨔꨮꨭ ꨚꩀ ꨗꨫ ꨛꨯꨮ ꨕꨯꨮꨝꨪꨔꨴꨮꩍ꩝ ꨚꨓꨴꨯꨱꩀ ꨚꨤꨶꩀ ꨆꨩ ꨟꨮꨡꨯꩍ꩝ ꨖꩉ ꨗꨫ ꨜꨶꨮꩊ ꨁꨗꨩ ꨣꨧꨶꨯꨮ ꩝꩝ ꩗꩙꩞ ꨣꨈꨮꩍ ꨓꨔꨴꨲꩀ ꨧꨯꨱꩃ ꨆꨙꨰꩅ ꨋꩆ ꨓꨆꨴꨲꨩ꩝ ꨘꩆ ꨎꨮꩍ ꨀꩉꨆꨓꨯꨮ꩝ ꨕꨯꩌ ꨚꨖꨪ ꨢꩃ ꨀꨚꨶꨬ꩝꩝ ꩘꩐꩞ ꨆꨨꨵꨯꨱꩌ ꨕꨴꨬ ꨓꨔꨴꨲꩅ ꨣꨈꨮꩍ ꨂꨣꩃ ꨚꨓꨶꨬ꩝ ꨓꨆꨴꨲꨩ ꨕꨫ ꨤꨯꩀ ꨆꨳꨮꩃ ꨀꨊꨶꨬ꩝ ꨎꨳꨯꨮꩆ ꨚꨕꨰ ꨝꨩ ꨤꨪꨠꩍ꩝꩝ ꩘꩑꩞ ꨋꩇ ꨧꨪꨝꩉ ꨨꨭꨩ ꨂꨣꩃ ꨟꨯꨱꩃ ꨡꨳꩍ꩝ ꨅꩍ ꨔꨮꨭ ꨆꨩ ꨔꨬ ꨌꨪꩍ ꨨꨕꩍ꩝ ꨨꨰ ꨕꨯꨱꩀ ꨆꨒꩍ ꨕꨫ ꨨꨓꨰ꩝꩝ ꩘꩒꩞ ꨅꩍ ꨔꨮꨭ ꨧꨪ ꨚꨮꩃ ꨕꨯꩌ ꨚꨗꨶꨮꩄ ꨈꨴꨭꨩ ꨚꨍꨰ꩝ ꨚꨙꩃ ꨨꨯꨮꩋ ꨆꨚꨶꩀ ꨀꨚꨶꨬ꩝ ꨥꨮꩀ ꨢꨮꨭ ꨓꨘꨩ ꨕꨨꨵꨮꨭ꩝꩝ ꩘꩓꩞ ꨕꨫ ꨔꨭꩆ ꨗꨧꩀ ꨚꨝꨰꩈ ꨝꨤꩆ ꨆꨵꨮꨭ꩝ ꨨꨤꨭꩆ ꨨꨕꨮꩉ ꨚꨟꨮꨢꨮꨭ꩝ ꨓꨘꨩ ꨣꨆꨭꩆ ꨆꨵꩀ ꨟꩃ ꨆꩊ꩝꩝ ꩘꩔꩞ ꨨꨎꨳꨮꩃ ꨧꨯꨱꩃ ꨟꨓꨰ ꨤꨪꨨꨪꩀ ꨨꨥ ꨆꨭꨣꩃ꩝ ꨕꨫ ꨕꨭꨑꨩ ꨕꨴꨬ ꨂꨣꩃ꩝ ꨅꩍ ꨨꨭꨩ ꨨꨕꩉ ꨆꨩ ꨀꨧꩇ ꨈꨪꨤꨭꨥ꩝꩝ ꩘꩕꩞ ꨝꨣꨭꨥ ꨟꩃ ꨛꨯꨮ ꨗꨝꨪ ꨅꩍ ꨕꨮꩃ ꨤꨪꨆꨮꨭ꩝ ꨤꨶꨰ ꨆꨩ ꨐꨭꨩ ꨔꨴꨭꨥ ꨨꨕꨭꨥ꩝ ꨝꨪ ꨝꩀ ꨎꨗꩀ ꨟꩃ ꨔꨮꨭ ꨆꨩ ꨣꨭꩇ꩝꩝ ꩘꩖꩞ ꨨꨕꩄ ꨢꨮꨭ ꨗꨫ ꨞꩇ ꨚꨣꩆ ꨣꨡꩍ ꨣꨡꨲꩇ꩝ ꨅꩍ ꨨꨭꨩ ꨟꨮꨐꩀ ꨕꨯꨱꩀ ꨕꨫ ꨧꨭꩇ꩝ ꨔꨭꩆ ꨨꨤꨬ ꨆꨮꩄ ꨆꨳꨮꩃ ꨨꨕꩍ꩝꩝ ꩘꩗꩞ ꨣꨡꨪ ꨣꨡꨲꩇ ꨤꨯꨩ ꨢꨮꨭ ꨗꨫ ꨅꩍ ꨔꨴꨶꨰ ꨨꨰ ꨕꨴꩍ꩝ ꨓꩀ ꨆꩊ ꨕꨫ ꨈꨯꨱꩆ ꨀꨤꨶꩍ꩝ ꨈꨵꨮꩃ ꨗꨫ ꨟꨯꨱꩃ ꨥꨮꩀ ꨨꨕꨬ꩞