꩑꩞ ꨈꨵꨮꩃ ꨀꨘꩀ ꨤꨪꨐꨰꩈ ꨤꨪꨆꨭꩀ ꨎꩃ ꨅꩍ ꨨꨭꨩ ꩝ ꨞꨳꩆ ꨕꨴꨮꩇ ꨋꩇ ꨣꨤꨯꨩ ꩝ ꨚꨳꨮꩍ ꨨꨚꩀ ꨇꨪꩆ ꨆꨩ ꨔꨴꨯꨱꩃ ꩞ ꩒꩞ ꨚꨗꨴꩃ ꨆꨴꨯꨱꩃ ꨚꨣꨪꩀ ꨚꨎꨰ ꨨꨤꨬ ꨈꨪꨤꨯꨱꩃ ꩝ ꨆꨳꨯꨮꩌ ꨝꨧꨬ ꨇꨪꩆ ꨆꨩ ꨣꨯꨱꩃ ꩝ ꨆꨌꨶꨮꩄ ꨓꨝꨳꩀ ꨎꨳꨮꩃ ꨕꨣꩍ꩞ ꩓꩞ ꨈꨴꩌ ꨦꨣꨀꩆ ꨕꨶꨪꩋ ꨕꨫ ꨨꨈꨰꩅ ꨝꨵꨯꨱꩍ ꨅꨩ ꨔꩍ ꩝ ꨡꨰ ꨓꨝꨭꩍ ꨕꨫ ꨈꨴꨮꩇ ꨗꨣꩍ ꩝ ꨓꨈꨴꩃ ꨆꨙꨯꨱꩃ ꨚꩀ ꨨꨤꨬ ꩞ ꩔꩞ ꨓꨮꩊ ꨔꨭꩆ ꨗꨔꩀ ꨀꨧꨰꩍ ꨘꩆ ꨣꨩ ꨝꨴꨬ ꩝ ꨀꨚꨶꨬ ꨆꨖꨪꩉ ꨡꨮꩃ ꨚꨤꨬ ꩝ ꨗꨮꨈꩉ ꨍꨰ ꨕꨴꨭꩅ ꨟꨴꨰꨮ ꩞ ꩕꩞ ꨕꨮꩃ ꨕꨫ ꨚꨭꩉ ꨇꨪꩆ ꨡꨮꩃ ꨚꨣꨝꩅ ꨅꨩ ꨆꨩ ꨣꨩ ꨟꨰ ꩝ ꨗꩍ ꨈꨮꩇ ꨝꨵꨯꨱꩍ ꨚꨝꨴꨰ ꩝ ꨟꨮꨐꨭꩌ ꨓꨧꨪꩀ ꨇꨪꩆ ꨆꨩ ꨔꨭꨩ ꩞ ꩖꩞ ꨝꨤꩆ ꨓꨎꨭꩍ ꨤꨮꩃꨆꨩ ꨟꨮꨣꨰ ꨧꨭꨟꨭꨩ ꩝ ꨆꨵꨮꨭ ꨚꨆꩉ ꨟꨮꨣꨰ ꨧꨯꨱꩃ ꨐꨭꨩ ꩝ ꨆꨥꨬ ꨀꨋꩆ ꨞꨭꩌ ꨆꨥꨬ ꩞ ꩗꩞ ꨈꨴꨭꩌ ꨟꨮꨐꨫ ꨆꨵꨮꨭ ꨢꨥꨩ ꨓꨔꨴꨯꩅ ꨕꨫ ꨕꨴꨬ ꩝ ꨚꨴꨰꩅꨓꨪꩀ ꨎꩃ ꨟꨮꨈꨬ ꩝ ꨓꨎꨯꩅ ꨦꨤꨩ ꨎꩃ ꨓꨓꨶꨮꩆ ꩞ ꩘꩞ ꨣꨩ ꨌꨰꩀ ꨓꨚꨮꩃ ꨌꨓꨰꩀ ꨓꨕꨭꩀ ꨤꨶꨰ ꨜꨭꩆ ꩝ ꨆꨰꩂ ꨀꨉꨩ ꨚꨳꨮꩍ ꨓꨘꩆ ꩝ ꨚꨤꨰ ꨚꨎꨰꩍ ꨀꨳꨩ ꨂꨣꩃ ꩞ ꩙꩞ ꨣꨩ ꨌꨰꩀ ꨂꨤꨪꩀ ꨕꨯꨱꩀ ꨛꨩꨇꨪꩀ ꨜꨭꩆ ꨕꨣꩃ ꩝ ꨕꨫ ꨈꨴꨮꩇ ꨓꨚꨳꨯꨮꩆ ꨣꨩ ꨛꨩꨥꩃ ꩝ ꨛꨩꨡꨭꩀ ꨚꨎꨰꩍ ꨘꩆ ꨆꨩ ꨕꨴꨬ ꩞ ꩑꩐꩞ ꨈꨴꨭꩌ ꨟꨮꨐꨫ ꨣꨪꨢꩀ ꨓꨔꨴꨯꩅ ꨆꨢꨭꨥ ꨟꨮꨈꨬ ꩝ ꨦꨄꨰ ꨅꨩ ꨆꨴꨲꩆ ꨆꨩ ꨀꨕꨬ ꩝ ꨟꨪꩀ ꨅꨩ ꨆꨴꨲꩆ ꨤꩄ ꨆꨟꨶꨮꩆ ꩞ ꩑꩑꩞ ꨡꨯꩍ ꨟꨮꨝꨰ ꨧꨯꨱꩃ ꨎꨗꩀ ꨕꨯꩌ ꨕꨫ ꨅꩆ ꩝ ꨖꩉ ꨜꨶꨮꩊ ꨌꨤꩍ ꨌꨤꨶꨮꩆ ꩝ ꨣꨩ ꨟꩀ ꨕꨫ ꨕꨴꨬ ꨗꨯꨱ ꨕꨨꨵꨭꨥ ꩞ ꩑꩒꩞ ꨚꩀ ꨀꨳꨩ ꨘꩆ ꨣꨩ ꨝꨴꨬ ꨟꨮꨣꨰ ꨛꨩꨔꨮꨭ ꩝ ꨛꨩꨙꩇ ꨓꨗꩍ ꨕꩀ ꨝꨓꨭꨥ ꩝ ꨏꩀ ꨨꨚꩀ ꨕꨶꨮꩆ ꨚꨓꨯꨱꩌ ꩞ ꩑꩓꩞ ꨏꩀ ꨕꨨꨵꨭꨥ ꨧꨳꩌ ꨨꨕꨬ ꨘꩆ ꨟꨮꨔꨴꨯꨱꩃ ꩝ ꨟꨮꨐꨭꩌ ꨓꨧꨪꩀ ꨓꨝꨮꩃ ꨧꨯꨱꩃ ꨆꨴꨯꨱꩃ ꩝ ꨅꨩ ꨔꨬ ꨣꨩ ꨟꨰ ꨋꩇ ꨕꨫ ꨕꨴꨬ ꩞ ꩑꩔꩞ ꨀꨕꩅ ꨆꨢꨭꨥ ꨜꨭꩆ ꨨꨚꩀ ꨎꨴꨭꩍ ꨓꨘꩆ ꩝ ꨅꨆꩆ ꨎꨴꨭꩍ ꨚꩀ ꨝꨪꨆꩆ ꩝ ꨕꨴꨬ ꨓꨌꨬ ꨥꨮꩀ ꨆꨩ ꨕꨴꨬ ꩞ ꩑꩕꩞ ꨕꨶꨪꩋꨦꩀ ꨆꨯꨮꨩ ꨚꩇ ꨕꨫ ꨔꨬ ꩝ ꨙꨮꩌ ꨧꨯꨱꩃ ꨈꨮꩇ ꨝꨵꨯꨱꩍ ꨆꨆꨬ ꩝ ꨟꨮꨔꨮꨭ ꨇꨪꩆ ꨙꨶꨮꩄ ꨕꨶꩍ ꨚꨎꨮꩃ ꩞ ꩑꩖꩞ ꨣꨩ ꨝꨴꨬ ꨣꨤꨯꨩ ꨤꩄ ꨓꨆꨪꩀ ꨡꨮꩃ ꨅꩍ ꨓꨮꩊ ꩝ ꨇꨮꩃ ꨨꨕꨯꩌ ꨤꩄ ꨤꨪꨠꩆ ꩝ ꨓꨴꨬ ꨨꨕꨯꩌ ꨤꩄ ꨤꨪꨚꨩ ꩞ ꩑꩗꩞ ꨕꨤꩌ ꨅꨩ ꨕꨴꨮꩍ ꨗꨯꨣꨚꩅ ꨧꨩ ꨆꨢꨩ ꩝ ꨂꨣꩃ ꨝꨪꨨꨭꩍ ꨝꨪꨨꩍ ꨝꨪꨨꨩ ꩝ ꨝꨪꨨꨫ ꨓꨆꨮꩃ ꨨꨭꨩ ꨀꨝꨪꩍ ꩞ ꩑꩘꩞ ꨡꨮꩃ ꨀꨔꩉ ꨀꨁꩀ ꨓꨤꩃ ꨛꨩꨀꨝꨪꩍ ꩝ ꨕꨶꨮꩆ ꨛꨩꨡꨭꩀ ꨙꨩ ꨆꨩ ꨎꨴꨪꩍ ꩝ ꨚꨤꨰ ꨤꨪꨨꨪꩀ ꨕꨫ ꨂꨣꩃ ꩞ ꩑꩙꩞ ꨨꨎꨳꨮꩃ ꨋꩇ ꨕꨫ ꨤꨪꩆ ꨈꨪꨗꨴꨮꩍ ꨛꨩꨝꨪꨙꩃ ꩝ ꨕꨫ ꨈꨴꨮꩇ ꨓꨚꨳꨮꩆ ꨣꨩꨛꨩꨥꩃ ꩝ ꨨꨤꨬ ꨗꨮꨈꩉ ꨕꨴꨬ ꨇꨪꩆ ꨗꨯꨱ ꩞ ꩒꩐꩞ ꨇꨮꩃ ꨕꨫ ꨤꨯꩀ ꨕꨨꨵꨭꨥ ꨤꨪꨟꩆ ꨨꨕꨬ ꨆꨭꨝꨥ ꩝ ꨚꨴꨯꨱꩃ ꨚꨴꨲꩆ ꨇꨮꩃ ꨕꨫ ꨗꨯꨱ ꩝ ꨝꨵꨯꨱꩍ ꨤꨪꨜꨶꨰ ꨧꨩ ꨆꨦꩆ ꩞ ꩒꩑꩞ ꨕꨯꨱꩀ ꨕꨫ ꨤꨯꩀ ꨢꨮꨭ ꨣꨩ ꨗꨯꨱ ꨕꨫ ꨕꨘꩉ ꩝ ꨝꨪꨐꨶꨮꩊ ꨨꨥꨪꩂ ꨟꨰ ꨥꨮꩉ ꩝ ꨆꨒꨭꩃ ꨕꨤꩌ ꨤꨯꨩ ꨣꨅꩃ ꩞ ꩒꩒꩞ ꨈꨴꩌ ꨗꨣꩍ ꨤꨰꩀ ꨆꨣꩌ ꨢꨭꨥ ꨇꨪꩆ ꨙꨯꩃ ꩝ ꨀꨚꨶꨬ ꨋꩍ ꨢꨭꨥ ꨇꨪꩆ ꨞꨯꩂ ꩝ ꨓꨗꨫ ꨣꨩ ꨤꩄ ꨢꨭꨥ ꨓꨗꨫ ꩞ ꩒꩓꩞ ꨀꨲꩆ ꨕꨫ ꨡꨮꩃ ꨡꨴꨰ ꨀꨆꩌ ꨟꨮꨟꩍ ꨓꨤꨫ ꩝ ꨆꨨꨵꨯꨱꩌ ꨟꨮꨢꨯꨱꩌ ꨤꩄ ꨝꨪꨊꨫ ꩝ ꨝꨫ ꨝꩀ ꨎꨗꩀ ꨆꨩ ꨟꩃ ꨒꨮꩇ ꩞ ꩒꩔꩞ ꨆꨴꨭꩃ ꨕꨫ ꨈꨴꨮꩇ ꨣꨰ ꨕꨨꨵꨭꨥ ꨂꨣꩃ ꨚꨕꨮꩇ ꩝ ꨕꨴꨬ ꨈꨪꨗꨯꨱꩃ ꨡꨶꩍ ꨈꨮꩇ ꩝ ꨣꨩ ꨛꨩꨀꨶꨮꩆ ꨨꨗꨳꨪꩌ ꨆꨩ ꨕꨴꨬ ꩞ ꩒꩕꩞ ꨃꨥ ꨛꨩꨕꨯꨱꩃ ꨕꨫ ꨆꨴꨲꩍ ꨟꨮꨤꩌ ꨋꩆ ꨨꨣꨬ ꩝ ꨡꨶꩍ ꨆꩉ ꨤꨯꨩ ꨆꨩ ꨔꨬ ꩝ ꨓꨔꨴꨲꩅ ꨟꨮꨨꨭꨩ ꨤꨯꨩ ꨟꨆꩊ ꩞ ꩒꩖꩞ ꨆꨵꩀ ꨓꨝꨩ ꨅꩆ ꨀꨶꨮꩆ ꨆꨩ ꨡꩀ ꨧꨳꩌ ꨀꨨꩉ ꩝ ꨡꨯꩍ ꨣꨪꨢꩀ ꨌꨯꩍ ꨟꩃ ꨆꩊ ꩝ ꨕꨯꩌ ꨝꨫ ꨝꨳꩀ ꨤꩄ ꨟꨮꨆꨴꨲꨩ ꩞ ꩒꩗꩞ ꨝꨪꨤꩆ ꨧꨩ ꨚꨵꨭꩍ ꨗꨧꩀ ꨀꨧꨰꩍ ꨘꩆ ꨟꩃ ꨨꨭꨩ ꩝ ꨀꨚꨶꨬ ꨓꨳꩍ ꨆꨴꨭꩃ ꨟꩃ ꨌꨴꨭꨩ ꩝ ꨌꨭꩍ ꨎꨗꩀ ꨡꨮꩃ ꨝꨓꨭꨥ ꩞ ꩒꩘꩞ ꨢꩍ ꨝꨳꩀ ꨀꨔꩉ ꨧꨪꨝꩉ ꨅꨩ ꨔꨬ ꨣꨩ ꨔꨮꨭ ꩝ ꨕꨫ ꨈꨴꨮꩇ ꨗꨣꩍ ꨟꨰ ꨛꨩꨢꨭꨥ ꩝ ꨕꨫ ꨦꨆꨣꩈ ꨎꩃ ꨅꩍ ꨨꨭꨩ ꩞ ꩒꩙꩞ ꨣꨩ ꨟꩀ ꨨꨕꩌ ꨛꨩꨙꨪꩀ ꨤꨪꨟꩆ ꨕꨶꩍ ꨟꨮꨈꨴꨭꨩ ꩝ ꨣꨩ ꨟꩀ ꨀꨧꨮꨭ ꨇꨪꩆ ꨆꨩ ꨨꨭꨩ ꩝ ꨛꨩ ꨙꨪꩀ ꨣꨪꨟꨯꨱꩃ ꨕꨶꩍ ꨀꨠꩊ ꩞ ꩓꩐꩞ ꨣꨩ ꨟꩀ ꨓꨆꨭꩍ ꨛꨩꨙꨪꩀ ꨌꨈꨶꨮꩉ ꨕꨶꩍ ꨝꨣꨪꨢꩉ ꩝ ꨣꨩ ꨟꩀ ꨝꨓꨩ ꨋꩇ ꨦꨝꩆ ꩝ ꨆꨩ ꨀꨣꨯꨱꩀ ꨕꨯꨱꩀ ꨝꨙꩃ ꩞ ꩓꩑꩞ ꨕꨤꩌ ꨗꨮꨈꩉ ꨦꨴꨫ ꨝꨗꩈ ꨁꨓꨩ ꨆꨣꩃ ꩝ ꨣꨤꨯꨩ ꨦꨭꩇ ꨎꨰꩀ ꨤꨪꨡꩃ ꩝ ꨣꨤꨯꨩ ꨟꨮꨤꩌ ꨎꨰꩀ ꨨꨕꩍ ꩞ ꩓꩒꩞ ꨎꨭꩀ ꨨꨎꩆ ꨦꨭꩇ ꨤꨪꨊꨪꩀ ꨢꨭꨥ ꨇꨪꩆ ꨕꨴꩍ ꩝ ꨇꨪꩆ ꨤꩌ ꨀꨚꨶꨬ ꨦꩀ ꨘꨣꩍ ꩝ ꨕꨫ ꨚꨴꩃꨕꨣꩃ ꨕꨴꨬ ꨓꩀ ꨗꨫ ꩞ ꩓꩓꩞ ꨕꨗꨭꩍ ꨀꨝꨪꩍ ꨧꨩ ꨟꨋꨩ ꨕꨫ ꨤꨯꩀ ꨆꨗꨫ ꩝ ꨚꨓꨯꨱ ꨆꨭꨢꨭꨥ ꨋꩆ ꨗꨝꨫ ꩝ ꨆꨴꨲꩌ ꨨꨥꨬ ꨨꨤꨩ ꨆꨭꨢꨭꨥ ꩞ ꩓꩔꩞ ꨀꨝꨪꩍ ꨚꨆꩉ ꨎꩃ ꨨꨕꨰ ꨕꨮꩃ ꨛꨩꨔꨮꨭ ꩝ ꨕꨫ ꨤꨯꩀ ꨗꨫ ꨕꨴꨬ ꨅꩍ ꨔꨮꨭ ꩝ ꨔꨬ ꨟꨰ ꨤꩄ ꨧꨯꨱꩃ ꨕꨴꨬ ꩞ ꩓꩕꩞ ꨡꨶꩍ ꨆꩉ ꨨꨕꨶꨪꩋ ꨣꨭꩇ ꨟꨪꩆ ꨤꨪꨆꨬ ꩝ ꨕꨯꨱꩀ ꨈꨪꨙꨮꩃ ꨎꨶꨰ ꨝꨴꨬ ꩝ ꨨꨗꨭꩀ ꨢꨥꨩ ꨂꨣꩃ ꨈꨪꨗꨯꨱꩃ ꩞ ꩓꩖꩞ ꨕꨫ ꨤꨯꩀ ꨗꨫ ꨨꨭꨩ ꨨꨎꩆ ꨨꨭꨩ ꨇꨯꨱꩃ ꩝ ꨨꨭꨩ ꨆꨗꨭꨩ ꨨꨭꨩ ꨖꨯꨱꩃ ꩝ ꨨꨭꨩ ꨚꨙꨳꩀ ꨨꨭꨩ ꨤꨪꨀꩆ ꩞ ꩓꩗꩞ ꨧꨳꩌ ꨕꨨꨵꨭꨥ ꨏꩀ ꨨꨕꨬ ꨕꨯꩌ ꨕꨫ ꨆꩆ ꩝ ꨣꨤꨯꨩ ꨚꨙꨳꩀ ꨓꨆꨪꩀ ꨤꨪꨀꩆ ꩝ ꨣꨤꨯꨩ ꨎꨗꩀ ꨓꨆꨪꩀ ꨨꨗꨳꨪꩌ ꩞ ꩓꩘꩞ ꨨꨟꨪꩅ ꨈꨴꨭꩌ ꨆꨵꨮꨭ ꨢꨥꨩ ꨕꨪꩍ ꨚꨭꩉ ꩝ ꨕꨫ ꨤꨯꩀ ꨆꨗꨫ ꨔꨮꨭ ꨇꨪꩆ ꨀꨶꨮꩆ ꩝ ꨕꨴꨬ ꨂꨣꩃ ꨦꩀ ꨨꨓꨰ ꩞ ꩓꩙꩞ ꨡꨯꩍ ꨣꨩ ꨙꨪꩀ ꨎꨗꩀ ꨚꨓꨪꩍ ꨓꨝꨳꩀ ꨟꨮꨣꨰ ꩝ ꨣꨩ ꨕꨮꩃ ꨕꨫ ꨤꩌꨋꨩ ꨚꨎꨰ꩝ ꨕꨫ ꨞꨭꩌ ꨚꨓꨪꩍ ꨕꨴꨬ ꨓꩀ ꨗꨫ ꩞ ꩔꩐꩞ ꨆꨘꩊ ꨕꨫ ꨓꨳꩆ ꨙꨯꩌ ꨝꨫ ꨝꨳꩀ ꨂꨣꩃ ꨓꨐꨫ ꩝ ꨆꨩ ꨕꨨꨵꨭꨥ ꨟꨰ ꨢꨭꨥ ꨗꨫ ꩝ ꨕꨫ ꨈꨴꨮꩇ ꨗꨣꩍ ꨟꨰ ꨆꨘꩊ ꩞ ꩔꩑꩞ ꨧꨩ ꨡꨮꩃ ꨧꨳꩌ ꨧꨯꨱꩃ ꨏꩀ ꨎꩃ ꨢꨭꨥ ꨘꩆ ꩝ ꨎꨶꨰ ꨚꨍꨯꩌ ꨤꩄ ꨓꨮꩊ ꩝ ꨀꨝꨪꩍ ꨎꨮꩍ ꨣꨩ ꨝꨴꨬ ꨛꨩꨔꨮꨭ ꩞ ꩔꩒꩞ ꨀꨝꨪꩍ ꨜꨭꩆ ꨕꨯꩌ ꨣꨰ ꨎꨗꩀ ꨅꩍ ꨔꨮꨭ ꩝ ꨢꩍ ꨆꨟꨵꩍ ꨚꨶꨮꩄ ꨝꨫ ꨢꨭꨥ ꩝ ꨚꨗꨶꨮꩄ ꨘꩆ ꨝꨪꨣꨭꨥ ꨟꨮꨧꨳꩌ ꩞ ꩔꩓꩞ ꨀꨦꨪꩅ ꨚꨴꨯꨱꩃ ꨤꨪꨆꨬ ꨆꨭꨟꨬ ꨕꨴꨬ ꨂꨣꩃ ꩝ ꨚꨶꨮꩄ ꨧꨪꨝꨮꩉ ꨇꨪꩆ ꨆꨩ ꨧꨳꩌ ꩝ ꨎꨶꨰ ꨝꨪꨤꨬ ꨢꨭꨥ ꨟꩃ ꨆꩊ ꩞ ꩔꩔꩞ ꨕꨯꩌ ꨏꩀ ꨣꨩ ꨆꨯꨱꩍ ꨛꨩꨡꨭꩀ ꨣꨝꨭꨥ ꨀꨥꩆ ꩝ ꨣꨩ ꨛꨩꨥꨰꩅ ꨕꨫ ꨣꨳꨪꩌ ꨚꨆꩉ ꩝ ꨝꨪꨎꩀ ꨈꨪꨤꨩ ꨣꨩ ꨝꨴꨬ ꨛꨩꨔꨮꨭ ꩞ ꩔꩕꩞ ꨆꨨꨵꨯꨱꩌ ꨕꨫ ꨤꨯꩀ ꨕꨭꩆꨢꨩ ꨃꨥ ꨤꨪꨆꨭꨥ ꩝ ꨤꨪꨆꨬ ꨆꨭꨟꨬ ꨤꨪꨎꩃ ꨝꨭꨥ ꩝ ꨓꨭꩀ ꨨꨤꨬ ꨎꩃ ꨅꩍ ꨥꨮꩉ ꩞ ꩔꩖꩞ ꨟꨮꨝꨰ ꨎꨗꩀ ꨆꨯꨮꨩ ꨡꨯꩍ ꨕꨴꨮꩍ ꨓꩀ ꨘꩆ ꩝ ꨧꨩ ꨚꨌꨮꩃ ꨘꩆ ꨟꩃ ꨓꨮꩊ ꩝ ꨨꨎꨳꨮꩃ ꨅꩍ ꨚꨶꨮꩄ ꨚꨴꨯꨱꩃ ꨨꨓꨰ ꩞ ꩔꩗꩞ ꨕꨯꨱꩀ ꨕꨫ ꨤꨯꩀ ꨆꨴꨲꩆ ꨆꨩ ꨤꨯꩀ ꨗꨫ ꨨꨰ ꩝ ꨎꨶꨰ ꨚꨶꨮꩄ ꨓꨶꨬ ꨨꨓꨰ ꩝ ꨚꨈꩇ ꨚꨆꨴꨲꨩ ꨓꨮꩃ ꨓꨝꨮꩃ ꩞ ꩔꩘꩞ ꨎꨶꨰ ꨡꨯꩍ ꨧꨳꩌ ꨀꨨꩉ ꨣꨗꩀ ꨇꨪꩂ ꨡꨮꩃ ꩝ ꨎꨟꨅꨩ ꨓꨳꩆ ꨓꨓꨮꩃ ꩝ ꨕꨤꨯꩀ ꨓꨝꨳꩀ ꨆꩆ ꨇꨪꩆ ꨕꨶꨮꩆ ꩞ ꩔꩙꩞ ꨎꨶꨰ ꨟꨮꨈꨴꨭꨩ ꨓꨦꨮꩇ ꨨꨓꨰ ꨙꨯꩌ ꨆꨜꨶꨮꩉ ꩝ ꨌꨰꩀ ꨕꨫ ꨓꨳꩆ ꨕꨯꩌ ꨝꨫ ꨀꨮꩆ ꩝ ꨅꩍ ꨒꨮꩇ ꨂꨣꩃ ꨓꨮꩊ ꨆꨢꨩ ꩞ ꩕꩐꩞ ꨟꨮꨈꨴꨭꨩ ꨚꨗꨶꨮꩄ ꨔꩅꨓꨳꩀ ꨝꨰꩀ ꨁꨓꨩ ꩝ ꨧꨳꩌ ꨣꨟꨪꩀ ꨏꩀ ꨌꨈꨩ ꩝ ꨚꨌꨮꩃ ꨎꨗꩀ ꨟꩃ ꨀꨘꩀ ꩞ ꩕꩑꩞ ꨢꩃ ꨝꨪꨓꨩ ꨧꨭꨚꨪꩅ ꨧꨭꨠꩅ ꨦꨴꨮꩍ ꨓꨝꨳꩀ ꩝ ꨅꩍ ꨆꨆꨬ ꨤꩄ ꨋꩇ ꩝ ꨎꨗꩀ ꨨꨗꨳꨪꩌ ꨥꨮꩀ ꨆꨩ ꨕꨴꨬ ꩞ ꩕꩒꩞ ꨚꨴꨯꨱꩃ ꨕꨫ ꨤꨯꩀ ꨛꨩꩀ ꨚꨆꩉ ꨥꨮꩈ ꨤꨪꨆꨬ ꩝ ꨋꩇ ꨅꩍ ꨔꩍ ꨈꨮꩌ ꨕꨫ ꨕꨴꨬ ꩝ ꨅꨩ ꨔꨮꨭ ꨆꨩ ꨨꨈꨰꩅ ꨚꩀ ꨚꨆꩉ ꩞ ꩕꩓꩞ ꨛꨯꨮ ꨚꨎꨳꨮꩃ ꨧꨩ ꨣꨔꨭꩀ ꨓꨎꨭꩍ ꨀꨥꩆ ꩝ ꨡꩀ ꨓꨝꨩ ꨟꨔꨮꩌ ꨢꨟꩆ ꩝ ꨕꨯꨮꨝꨪꨓꨩ ꨦꨯꨮꩍ ꨟꨤꨮꩃ ꩞ ꩕꩔꩞ ꨨꨟꨳꨪꩅ ꨕꨗꩈ ꨀꨚꨶꨬ ꨆꨖꨪꩉ ꨦꨴꨯꩀ ꨇꨪꩆ ꨡꨮꩃ ꩝ ꨕꨫ ꨚꨣꨝꩅ ꨇꨪꩆ ꨆꨣꨮꩌ ꩝ ꨕꨫ ꨎꩊꨤꨪꨕꨫ ꨇꨪꩆ ꨨꨆꨯꨱꩍ ꩞ ꩕꩕꩞ ꨕꨫ ꨈꨴꨮꩇ ꨓꨚꨳꨯꨮꩆ ꨣꨩ ꨛꨩꨥꩃ ꨕꨯꨱꩀ ꨝꨵꨯꨱꩍ ꩝ ꨇꨪꩆ ꨔꩄ ꨓꨧꨪꩀ ꨛꨩꨨꨆꨯꨱꩍ ꩝ ꨕꨙꨮꩇ ꨆꨥꨮꩀ ꨧꨩ ꨚꨌꨮꩃ ꩞ ꩕꩖꩞ ꨗꨣꩍ ꨁꨓꨩ ꨕꨆꨪꩀ ꨧꨳꩌ ꨣꨤꨯꨩ ꨨꨝꨮꩃ ꩝ ꨚꨴꨯꨱꩃ ꨀꨆꨯꨱꩀ ꨆꨳꨮꩃ ꨕꨫ ꨡꨮꩃ ꩝ ꨆꨧꩊ ꨆꨤꨪꩀ ꨟꩃ ꨦꩀ ꨨꨓꨰ꩞ ꩕꩗꩞ ꨕꨤꩌ ꨣꨤꨯꨩ ꨎꨗꩀ ꨧꨯꨱꩃ ꨟꨮꨝꨰ ꩝ ꨨꨗꨳꨪꩌ ꨀꨢꨭꩍ ꨎꩃ ꨅꩍ ꨨꨰ ꩝ ꨗꩌ ꨀꨋꩆ ꨤꨪꨎꩃ ꨅꩍ ꨨꨭꨩ ꩞ ꩕꩘꩞ ꨣꨰ ꨕꨴꨬ ꨧꨩ ꨚꨎꨳꨮꩃ ꨣꨬ ꨧꨯꨱꩃ ꨐꨭꨩ ꩝ ꨣꨤꨯꨩ ꨈꨪꨗꨯꨱꩃ ꨚꨶꨮꩄ ꨅꩍ ꨨꨭꨩ ꩝ ꨣꨩ ꨝꨴꨬ ꨎꨗꩀ ꨟꨰ ꨆꨩ ꨕꨴꨬ ꩞ ꩕꩙꩞ ꨨꨎꨳꨮꩃ ꨟꨮꨝꨯꨱꩍ ꨝꨵꨯꨱꩍ ꨤꨪꨝꨶꩍ ꨎꨴꨭꩍ ꨙꨬ ꩝ ꨆꨢꨶꨩ ꨕꨶꨪꩋ ꨟꩃ ꨨꨤꨬ ꩝ ꨚꨳꨮꩍ ꨥꨮꩀ ꨆꨩ ꨁꨓꨩ ꩞ ꩖꩐꩞ ꨆꨴꨭꩃ ꨣꨩ ꨤꩄ ꨓꨧꨪꩀ ꨕꨣꩀ ꨌꨶꩍ ꨤꨪꨈꨩ ꩝ ꨚꨕꨮꩍ ꨓꩀ ꨘꩆ ꨀꨲꩆ ꨆꨩ ꩝ ꨎꨶꨰ ꨝꨪꨤꨬ ꨆꨩ ꨂꨣꩃ ꩞ ꩖꩑꩞ ꨟꩍꨤꨪꨆꩌ ꨤꨰꩀ ꨓꨟꨩ ꨅꩍ ꨦꩀ ꨆꨣꩃ ꩝ ꨙꨯꩂ ꨓꨈꨯꩀ ꨟꨮꨓꨲꩍ ꨆꨣꩌ ꩝ ꨝꨵꨯꨱꩍ ꨅꩍ ꨨꨭꨩ ꨔꨬ ꨣꨩ ꨔꨮꨭ ꩞ ꩖꩒꩞ ꨂꨆꩆ ꨝꨧꨬ ꨨꨝꩆ ꨓꨟꨴꩀ ꨋꩆ ꨝꨓꨭꨥ ꩝ ꨔꩅꨓꨳꩀ ꨀꨧꩉ ꨈꨪꨨꨵꨭꨥ ꩝ ꨟꩃ ꨓꨔꨪꩅ ꨆꩊ ꨟꨮꩅꨣꨰ ꩞ ꩖꩓꩞ ꨕꨯꨱꩀ ꨧꨩ ꨕꨴꨬ ꨧꨩ ꨗꨮꨈꩉ ꨕꨫ ꨆꨴꨲꩍ ꨨꨗꨴꨰ ꩝ ꨕꨫ ꨆꨴꨲꩍ ꨓꨧꨪꩀ ꨌꨶꩍ ꨨꨎꨰ ꩝ ꨨꨤꨬ ꨗꨮꨈꩉ ꨕꨴꨬ ꨧꨩ ꨔꨮꨭ ꩞ ꩖꩔꩞ ꨕꨯꨱꩀ ꨓꨝꨭꩉ ꨇꩆ ꨀꨥ ꨚꨓꨰꩍ ꨤꨪꨂꨥ ꩝ ꨝꨩ ꨀꨤꨪꩆ ꨔꨬ ꨅꩍ ꨔꨮꨭ ꩝ ꨣꨩ ꨛꨩꨡꨭꩀ ꨚꨳꨮꩍ ꨓꩀ ꨘꩆ ꩞ ꩖꩕꩞ ꨣꨩ ꨝꨴꨬ ꨎꨗꩀ ꨛꨩꨣꨞꨩ ꨈꨮꩇ ꨝꨫ ꨓꨮꩊ ꩝ ꨆꨙꨩ ꨕꨴꨬ ꨡꨶꩍ ꨆꩉ ꩝ ꨤꩄ ꨅꩍ ꨡꨯꩍ ꨨꨈꨰꩅ ꨕꨫ ꨆꨮꨭ ꩞ ꩖꩖꩞ ꨧꨩ ꨟꨋꨩ ꨕꨫ ꨤꨯꩀ ꨗꨫ ꨃꨥ ꨤꨪꨆꨭꨥ ꩝ ꨣꨩ ꨛꨩꨀꨶꨮꩆ ꨕꨴꨬ ꨕꨨꨵꨭꨥ ꩝ ꨧꨭꨟꨭꨩ ꨧꨯꨱꩃ ꨓꨳꩆ ꨕꨴꨬ ꨓꨆꨴꨲꨩ ꩞ ꩖꩗꩞ ꨨꨝꨳꨯꨮꩆ ꨕꨴꨬ ꨤꩄ ꨡꨮꩃ ꨔꨴꨭꩀ ꨟꨨꨭꨩ ꩝ ꨝꨫ ꨝꩀ ꨎꨗꩀ ꨇꨪꩆ ꨆꨩ ꨨꨭꨩ ꩝ ꨟꩃ ꨡꨯꩍ ꨂꨣꩃ ꨇꨪꩆ ꨚꨎꨳꨮꩃ ꩞ ꩖꩘꩞ ꨕꨯꨱꩀ ꨕꨫ ꨤꨯꩀ ꨝꨫ ꨤꨪꨈꨰꩍ ꨎꨶꨰ ꨚꨮꩃ ꩝ ꨚꨗꨶꨮꩄ ꨆꨖꨩ ꨥꨰꩈ ꨥꨮꩃ ꩝ ꨓꨳꩆ ꨨꨌꨪꩍ ꨘꩆ ꨟꩃ ꨧꨳꩌ ꩞ ꩖꩙꩞ ꨆꨭꨟꨫ ꨚꨗꩍ ꨕꨫ ꨟꨗꨮꩋ ꨝꨵꨯꨱꩍ ꨀꨇꩆ ꩝ ꨆꨩ ꨧꨩ ꨣꨝꩃ ꨛꨩꩀ ꨚꨆꩉ ꩝ ꨕꨫ ꨕꨤꩌ ꨣꨭꩇ ꨁꨓꨩ ꩞ ꩗꩐꩞ ꨧꨭꨚꨪꩅ ꨧꨭꨠꩅ ꨧꨭꨝꨪꩀ ꨧꨯꨱꩃ ꨢꩃ ꨝꨪꨓꨩ ꩝ ꨀꨲꩃ ꨆꨩ ꨔꩍ ꨦꨄꨰ ꨆꨌꨶꨩ ꩝ ꨀꨲꩃ ꨎꨮꩅ ꨘꩆ ꨀꨕꨬ ꩞ ꩗꩑꩞ ꨧꨩ ꨗꨮꨈꩉ ꨘꩆ ꨓꨝꨳꩀ ꨟꩃ ꨨꨤꨬ ꩝ ꨣꨩ ꨗꩍ ꨓꨝꨳꩀ ꨃꨥ ꨆꨣꨬ ꩝ ꨛꨩꩀ ꨚꨆꩉ ꨞꨭꩌ ꨨꨚꩀ ꩞ ꩗꩒꩞ ꨔꨬ ꨂꨣꩃ ꨇꨪꩀ ꨓꨘꩆ ꨙꨯꩌ ꨝꨫ ꨝꨳꩀ ꩝ ꨀꨚꩆ ꨚꨗꨶꨮꩄ ꨔꩅꨓꨳꩀ ꩝ ꨨꨭꨩ ꨨꨗꨳꨪꩌ ꨟꨪꩆ ꨤꨪꨆꨬ ꩞ ꩗꩓꩞ ꨢꩍ ꨟꨮꨦꩀ ꨛꨩꨧꨭꨟꨭꨩ ꨓꨳꩆ ꨕꨴꨬ ꩝ ꨈꨴꨰꩃ ꨓꨆꨯꨮꨩ ꨨꨭꨩ ꨣꨬ ꩝ ꨆꨧꩊ ꨆꨤꨪꩀ ꨨꨭꨩ ꨝꨪꨤꨩ ꩞ ꩗꩔꩞ ꨘꩆ ꨎꨮꩍ ꨣꨩ ꨤꩄ ꨕꨴꨬ ꨓꨮꩊ ꨆꨢꨩ ꩝ ꨅꩍ ꨔꨬ ꨚꨶꨮꩄ ꨨꨭꨩ ꨓꨴꨩ ꩝ ꨂꨣꩃ ꨚꨵꨰꩍ ꨎꨮꩍ ꨕꨫ ꨕꨴꨬ ꩞ ꩗꩕꩞ ꨟꨮꨝꨰ ꨎꨗꩀ ꨗꨯꨱ ꨨꨚꩀ ꨈꩌ ꨕꨫ ꨕꨴꨬ ꩝ ꨂꨆꩆ ꨟꨮꨣꨰ ꨟꩃ ꨨꨤꨬ ꩝ ꨕꨯꨱꩀ ꨕꨤꩌ ꨣꨭꩇ ꨁꨓꨩ ꩞ ꩗꩖꩞ ꨧꨩ ꨚꨆꩉ ꨉꩀ ꨀꨝꨪꩍ ꨈꨴꨮꩇ ꨀꨳꨩ ꩝ ꨏꩀ ꨨꨕꨯꩌ ꨛꨩꨓꨝꨩ ꩝ ꨈꨪꨗꨯꨱꩃ ꨧꨪꨝꩉ ꨣꨩ ꨛꨩꨧꨳꩌ ꩞ ꩗꩗꩞ ꨎꨶꨰ ꨚꨶꨮꩄ ꨢꨭꨥ ꨂꨣꩃ ꨗꨯꨱ ꨕꨫ ꨊꨯꨱꩀ ꨣꨝꩃ ꩝ ꨟꨮꨝꨭꩀ ꨟꨮꨓꨩ ꨨꨥꨪꩂ ꨨꨥꩃ ꩝ ꨢꨯꨮꩉ ꨓꨊꨪꩆ ꨅꨩ ꨆꨴꨲꩆ ꨨꨚꩀ ꩞ ꩗꩘꩞ ꨚꨴꨯꨱꩃ ꨕꨫ ꨤꨯꩀ ꨗꨫ ꨣꨩ ꨤꩄ ꨢꩃ ꨚꨙꨳꩀ ꩝ ꨀꨊꨪꩆ ꨈꨪꨤꨯꨱꩍ ꨟꨰ ꨟꨌꨶꩀ ꩝ ꨓꨈꨪꨗꩌ ꨧꨭꩇ ꨤꨪꨊꨪꩀ ꩞ ꩗꩙꩞ ꨕꨫ ꨤꨯꩀ ꨗꨫ ꨚꨴꨯꨱꩃ ꨢꨯꨱꩌ ꨀꨳꨩ ꨓꨧꨪꩀ ꩝ ꨣꨩ ꨋꩇ ꨆꨚꩊ ꨝꨵꨯꨱꩍ ꨙꨪꩀ ꩝ ꨓꨆꨯꨮꨩ ꨕꨫ ꨊꨯꨱꩀ ꨕꨤꩍ ꨣꨪꨢꩀ ꩞ ꩘꩐꩞ ꨕꨭꩆꨢꨩ ꨟꨯꨱꩃ ꨓꩀ ꨘꩆ ꨧꨳꩌ ꨧꨯꨱꩃ ꨏꩀ ꩝ ꨟꨮꨦꩀ ꨟꨮꨎꨳꨫ ꨟꩀ ꨆꨵꩀ ꩝ ꨤꨪꨆꨭꨥ ꨨꨗꨳꨪꩌ ꨝꨰꩀ ꨤꨪꨆꨬ ꩞ ꩘꩑꩞ ꨣꨭꩇ ꨁꨓꨩ ꨂꨆꩆ ꨝꨓꨭꨥ ꨋꩆ ꨝꨧꨬ ꩝ ꨂꨣꩃ ꨛꨩꨣꨯꨱꩃ ꨄꨮꩉ ꨣꨬ ꩝ ꨟꨮꨓꨩ ꨡꨯꩍ ꨕꨫ ꨟꨮꨓꨩ ꩞ ꩘꩒꩞ ꨆꨭꨟꨫ ꨦꨣꩀ ꨕꨫ ꨕꨤꩌ ꨀꨩꨣꨪꨢꨩ ꩝ ꨗꨧꩀ ꨚꨝꨰꩈ ꨝꨤꩆ ꨕꨶꨩ ꩝ ꨧꨩ ꨚꨵꨭꩍ ꨝꨊꨭꩆ ꨦꨭꩀ ꨓꨐꨴꨶꩍ ꩞ ꩘꩓꩞ ꨡꨯꩍ ꨣꨩ ꨤꩄ ꨀꨚꨶꨬ ꨆꨖꨪꩉ ꨉꨶꨮꩍ ꨕꨴꩍ ꩝ ꨎꨶꨰ ꨚꨮꩃ ꨝꨵꨯꨱꩍ ꨆꨟꨵꩍ ꩝ ꨂꨣꩃ ꨚꨨꨶꨮꨩ ꨟꨪꩆ ꨤꨪꨆꨬ ꩞ ꩘꩔꩞ ꨡꨶꩍ ꨆꩉ ꨅꩍ ꨆꩆ ꨁꨗꨩ ꨟꩀ ꨛꨩꨝꨵꨬ ꩝ ꨕꨶꨪꩋ ꨚꨝꩍ ꨦꩇ ꨕꨴꨬ ꩝ ꨢꨥꨩ ꨎꨶꨰ ꨔꨶꩀ ꨢꨥꨩ ꩞ ꩘꩕꩞ ꨏꩀ ꨧꨯꨱꩃ ꨧꨳꩌ ꨕꨯꨱꩀ ꨊꨯꨱꩀ ꨕꨯꨮꨝꨓꨩ ꩝ ꨚꨕꨮꩍ ꨓꩀ ꨘꩆ ꨀꨲꩆ ꨆꨩ ꩝ ꨔꨬ ꨤꨪꨆꨭꨥ ꨎꩃ ꨅꩍ ꨨꨭꨩ ꩞ ꩘꩖꩞ ꨀꨝꨪꩍ ꨚꨎꨰꩍ ꨤꨪꨎꩃ ꨢꨭꨥ ꨧꨯꨱꩃ ꨐꨭꨩ ꩝ ꨦꩇ ꨤꨪꨨꨪꩀ ꨎꩃ ꨅꩍ ꨨꨭꨩ ꩝ ꨧꨚꨎꨳꨮꩃ ꨧꨯꨱꩃ ꨁꨓꨩ ꩞ ꩘꩗꩞ ꨟꨮꨧꨪꩆ ꨟꨮꨔꩌ ꨓꨨꨭꨩ ꨓꨨꩃ ꨣꨨꨫ ꨣꨨꨩ ꩝ ꨣꨩ ꨝꨭꩍ ꨀꨚꨶꨬ ꨛꨩꨙꨮꩌ ꨦꨣꨩ ꩝ ꨣꨩ ꨚꨢꩀ ꨨꨗꨳꨪꩌ ꨆꨩ ꨕꨴꨬ ꩞ ꩘꩘꩞ ꨆꨨꨵꨯꨱꩌ ꨕꨫ ꨤꨯꩀ ꨚꨴꨯꨱꩃ ꨨꨓꨰ ꨅꩍ ꨆꨴꨲꩆ ꨆꨩ ꨔꨬ ꩝ ꨣꨩ ꨟꩀ ꨀꨆꨯꨱꩀ ꨋꩇ ꨕꨴꨬ ꩝ ꨣꨩ ꨟꩀ ꨀꨉꨩ ꨋꩇ ꨨꨎꨭꩃ ꩞ ꩘꩙꩞ ꨓꨣꩍ ꨧꨪꨝꩉ ꨧꨩ ꨓꨗꨪꩍ ꨢꨭꨥ ꨆꨴꨭꩃ ꩝ ꨓꨟꨭꩍ ꨟꩃ ꨆꩊ ꨝꨵꨯꨱꩍ ꨎꨳꨮꩃ ꩝ ꨟꨮꨔꨭꩀ ꨨꨓꨰ ꨧꨳꩌ ꨇꨪꩆ ꨕꨯꨱꩀ ꩞ ꩙꩐꩞ ꨘꩆ ꨟꩃ ꨨꨭꨩ ꨤꨪꨗꩃ ꨨꨓꨰ ꨨꨭꨩ ꨡꨯꨱꩀ ꩝ ꨕꨴꨬ ꨂꨣꩃ ꨧꨳꩌ ꨇꨪꩆ ꨕꨯꨱꩀ ꩝ ꨟꨮꨕꨴꨮꩍ ꨓꨔꨪꩅ ꨆꩊ ꨟꨮꨣꨰ ꩞ ꩙꩑꩞ ꨕꨯꨱꩀ ꨕꨫ ꨤꨯꩀ ꨆꨴꨲꩆ ꨆꨩ ꨤꨯꩀ ꨗꨫ ꨨꨰ ꩝ ꨣꨟꨳꨪꩀ ꨚꨳꨮꩍ ꨕꨫ ꨨꨓꨰ ꩝ ꨔꨬ ꨂꨣꩃ ꨈꨪꨗꨯꨱꩃ ꨕꨫ ꨕꨴꨬ ꩞ ꩙꩒꩞ ꨚꨴꨯꨱꩃ ꨕꨫ ꨤꨯꩀ ꨣꨩ ꨤꩄ ꨢꩃ ꨨꨣꨬ ꩝ ꨣꨩ ꨦꩇ ꨨꨓꩌ ꨟꨤꩌ ꨨꨣꨬ ꩝ ꨆꨯꨮꨩ ꨂꨣꩃ ꨔꨮꨭ ꨈꨪꨗꨯꨱꩃ ꩞ ꩙꩓꩞ ꨕꨫ ꨤꨯꩀ ꨗꨫ ꨟꨮꨦꩀ ꨟꨮꨎꨳꨫ ꨍꨰ ꨣꨪꨟꨯꨱꩃ ꩝ ꨣꨩ ꨋꩇ ꨤꨪꨎꨶꩀ ꨕꨫ ꨈꨴꨮꩇ ꨈꨪꨤꨯꨱꩃ ꩝ ꨒꨮꩇ ꨤꨪꨝꨭꩍ ꨗꨮꩋꨚꨞꨩ ꩞ ꩙꩔꩞ ꨕꨫ ꨤꨯꩀ ꨗꨫ ꨟꨯꨱꩃ ꨓꩀ ꨘꩆ ꨕꨭꩆꨢꨩ ꩝ ꨈꨪꨗꨯꨱꩃ ꨨꨕꨯꩌ ꨛꨩꨓꨚꨩ ꩝ ꨝꨪꨤꨬ ꨂꨣꩃ ꨔꨴꨰꩈ ꨕꨫ ꨕꨴꨬ ꩞ ꩙꩕꩞ ꨦꨭꩀ ꨨꨕꨯꩌ ꨣꨩ ꨛꨩꨓꨯꨱꩌ ꨚꨳꨮꩍ ꨆꨩ ꨕꨴꨬ ꩝ ꨣꨰ ꨀꨗꩀ ꨟꩃ ꨣꨩ ꨝꨴꨬ ꩝ ꨙꨶꨩ ꨀꨗꨯꨱꩃ ꨛꨩꨀꨝꨪꩍ ꩞ ꩙꩖꩞ ꨕꨶꨪꩋꨦꩀ ꨕꨯꨱꩀ ꨕꨤꩌ ꨌꨳꨯꨮꨥ ꨙꨪꩍ ꩝ ꨚꨶꨮꩄ ꨤꨪꨈꨰꩍ ꨐꨭꨩ ꨗꨯꨱ ꨀꨝꨪꩍ ꩝ ꨨꨗꨳꨪꩌ ꨟꨮꨣꨰ ꨣꨯꨱꩀ ꨀꨘꩀ ꩞ ꩙꩗꩞ ꨨꨎꨳꨮꩃ ꨣꨩ ꨋꩇ ꨚꨨꨵꩇ ꨕꨫ ꨤꨯꩀ ꨝꨫ ꨝꨳꩀ ꩝ ꨌꨈꨩ ꨀꨖꩉ ꨟꩃ ꨀꨘꩀ ꩝ ꨛꨩꨤꨪꨝꨰꩍ ꨆꨩ ꨀꨗꩀ ꩞ ꩙꩘꩞ ꨔꨬ ꨂꨣꩃ ꨔꨮꨭ ꨦꨗꩃ ꨝꨵꨯꨱꩍ ꨆꨂꩀ ꩝ ꨇꨪꩀ ꨀꨕꩅ ꨟꨓꩀ ꨀꨘꩀ ꩝ ꨡꨯꩍ ꨨꨗꨳꨪꩌ ꨜꨶꨮꩊ ꨨꨕꨬ ꩞ ꩙꩙꩞ ꨣꨭꩇ ꨁꨓꨩ ꨨꨈꨯꨱ ꨚꨓꨶꩍ ꨅꩍ ꨔꨮꨭ ꨆꨩ ꨕꨴꨬ ꩝ ꨨꨝꨳꨯꨮꩆ ꨟꩃ ꨡꨯꩍ ꨚꩀ ꨨꨤꨬ ꩝ ꨟꩃ ꨔꨮꨭ ꨤꩄ ꨧꨪꨝꩉ ꩞ ꩑꩐꩐꩞ ꨆꨵꩀ ꨌꨰꩀ ꨕꨯꩌ ꨚꨗꨶꨮꩄ ꨆꩀ ꨆꩆ ꩝ ꨇꨪꩀ ꨀꨕꩅ ꨈꨪꨡꩀ ꨕꨫ ꨖꩉ ꩝ ꨧꨩ ꨟꨓꩀ ꨂꨣꩃ ꨀꨗꨪꩅ ꩞ ꩑꩐꩑꩞ ꨢꩃ ꨝꨟꨯꩂ ꨢꩃ ꨆꨭꨤꩆ ꨢꩃ ꨧꨭꨗꨪꩅ ꩝ ꨚꨴꨯꨱꩃ ꨨꨓꨰ ꨚꨶꨮꩄ ꨌꨟꨴꨪꩅ ꩝ ꨅꩍ ꨨꨶꨮꩄ ꨕꨫ ꨕꨶꨪꩋ ꨘꩆ ꨨꨢꨭꨥ ꩞ ꩑꩐꩒꩞ ꨅꩍ ꨆꩆ ꨕꨤꩌ ꨧꨩ ꨗꨣꩍ ꨡꨰ ꨤꨪꨆꨭꨥ ꩝ ꨕꨴꨮꩍ ꨣꨩ ꨤꨰꩀ ꨟꨊꨯꨱꩀ ꨆꨢꨭꨥ ꩝ ꨓꨮꩊ ꨓꨗꩍ ꨅꩍ ꨔꨬ ꨨꨤꨯꩂ ꩞ ꩑꩐꩓꩞ ꨕꨫ ꨤꨯꩀ ꨗꨫ ꨣꨤꨯꨩ ꨣꨝꩃ ꨒꨴꨭꩃ ꨣꨅꩃ ꩝ ꨓꨔꨴꩀ ꨓꨴꩀ ꨅꩍ ꨔꨬ ꨓꨚꨯꩂ ꩝ ꨓꨴꨭꩍ ꨀꨖꨶꨩ ꨤꨮꩍ ꨚꨕꨬ ꩞ ꩑꩐꩔꩞ ꨓꨶꨮꩀ ꨓꨝꨳꩀ ꨚꨳꨮꩍ ꨓꨮꩊ ꨣꨰ ꨨꨕꨬ ꩝ ꨓꨝꨮꩌ ꨚꨤꨩ ꨎꨳꨮꩃ ꨣꨬ ꩝ ꨝꨫ ꨔꨮꨭ ꨨꨖꩉ ꨣꨩ ꨓꨨꨩ ꩞ ꩑꩐꩕꩞ ꨟꨮꨢꩍ ꨚꩇ ꨣꨩ ꨟꨮꨓꨶꨬ ꨧꨯꨱꩃ ꨈꨪꨤꨩ ꩝ ꨎꨶꨰ ꨤꨪꨟꨭꩀ ꨎꨶꨰ ꨝꨩ ꩝ ꨈꩀ ꨚꨈꩆ ꨈꨮꩀ ꨆꨓꨮꩀ ꩞ ꩑꩐꩖꩞ ꨘꩆ ꨎꨮꩍ ꨋꩇ ꨕꨫ ꨣꨭꩇ ꨕꨴꨬ ꨥꨮꩀ ꩝ ꨤꨪꨨꨪꩀ ꨜꨶꨮꩊ ꨖꩉ ꨣꨩ ꨚꨵꨮꩀ ꩝ ꨤꨪꨆꨭꩀ ꨕꨤꩌ ꨦꩀꨆꨣꨰ ꩞ ꩑꩐꩗꩞ ꨟꨮꨢꩍ ꨚꨮꩃ ꨙꨯꩌ ꨝꨫ ꨝꨳꩀ ꨓꨳꩆ ꨓꨖꨳꨰ ꩝ ꨨꨎꨳꨮꩃ ꨢꨭꨥ ꨘꩆ ꨆꨩ ꨨꨓꨰ ꩝ ꨕꨫ ꨣꨳꨪꩌ ꨟꨗꩀ ꨅꨩ ꨔꨮꨭ ꨈꨪꨗꨯꨱꩃ ꩞ ꩑꩐꩘꩞ ꨋꩇ ꨖꩉ ꨕꨫ ꨟꨤꨪꨧꨪꩀ ꨙꨩ ꨣꨩ ꨤꨯꨱꩃ ꩝ ꨨꨎꨳꨮꩃ ꨢꨭꨥ ꨘꩆ ꨆꨩ ꨓꨣꨆꨯꨱꩃ ꩝ ꨚꨴꨯꨱꩃ ꨕꨫ ꨚꨯꨩ ꨕꨯꨮꨝꨪꨓꨩ ꩞ ꩑꩐꩙꩞ ꨨꨎꨳꨮꩃ ꨣꨩ ꨋꩇ ꨗꩌ ꨕꨫ ꨊꨯꨱꩀ ꨓꨣꨩ ꩝ ꨛꨩꩀꨀꨆꨳꨮꩃ ꨓꨆꨰ ꨆꨣꨩ ꩝ ꨕꨫ ꨓꨲꩍ ꨎꨳꨮꩃ ꨔꨰꩀ ꨤꨪꨋꩊ ꩞ ꩑꩑꩐꩞ ꨟꩃ ꨨꨭꨩ ꨚꨳꨮꩍ ꨆꨩ ꨤꨯꩀ ꨗꨫ ꨙꨯꨱꩌ ꨆꨘꩊ ꩝ ꨀꨚꨆꩉ ꨣꨳꨪꩌ ꨧꨪꨝꩉ ꩝ ꨈꨴꨮꩇ ꨠꨗꩀ ꨧꨳꩌ ꨟꨮꨓꨶꨥ ꩞ ꩑꩑꩑꩞ ꨋꩇ ꨣꨕꨰꩍ ꨚꨈꨩ ꨀꨥꩉ ꨣꨯꨱꩃ ꨆꨭꨝꨥ ꩝ ꨝꨫ ꨤꨪꨟꩀ ꨇꨮꩃ ꨕꨫ ꨗꨯꨱ ꩝ ꨚꨎꨳꨮꩃ ꨎꨙꨭꩆ ꨧꨯꨱꩃ ꨨꨓꩌ ꩞ ꩑꩑꩒꩞ ꨛꨩꨝꨮꩀ ꨝꨗꨮꩀ ꨛꨩꨆꨶꨮꩄ ꨣꨪꨝꨯꨱꩃ ꨝꨫ ꨕꨤꩌ ꩝ ꨈꩆ ꨀꨉꨩ ꨈꩆ ꨣꩌ ꩝ ꨝꨫ ꨧꨩ ꨚꨴꨲꩆ ꨧꨩ ꨨꨓꨰ ꩞ ꩑꩑꩓꩞ ꨨꨕꨮꩃ ꨨꨎꩆ ꨀꨳꨩ ꨦꨶꨩ ꨤꨰꩀ ꨟꨮꨣꨰ ꩝ ꨤꨪꨀꨶꨩ ꨨꨟꨭꨩ ꨝꨴꩀ ꨚꨕꨰ ꩝ ꨤꨪꨀꨶꨩ ꨓꨗꩍ ꨚꨤꨩ ꨓꨊꨮꩈ ꩞ ꩑꩑꩔꩞ ꨝꨵꨯꨱꩍ ꨚꨤꨩ ꨒꩌ ꨚꨢꨩ ꨓꨴꨯꨱꩃ ꨚꨵꨶꨰ ꩝ ꨟꨮꨢꩍ ꨀꨮꩀ ꨌꩃ ꨍꨶꨰ ꩝ ꨡꨮꩃ ꨚꨵꨶꨰ ꨧꨯꨱꩃ ꨨꨕꩀ ꩞ ꩑꩑꩕꩞ ꨟꨮꨝꨰ ꨎꨗꩀ ꨤꨯꨩ ꨕꨫ ꨓꨳꩆ ꨟꩀ ꨆꨵꩀ ꩝ ꨓꨳꩆ ꨕꨴꨬ ꨎꨶꨰ ꨏꩀ ꩝ ꨝꨳꩀ ꨤꨪꨈꨰꩍ ꨡꨯꩍ ꨧꨩ ꨈꨵꨮꩃ ꩞ ꩑꩑꩖꩞ ꨎꨗꩀ ꨨꨗꨳꨪꩌ ꨔꨬ ꨋꩇ ꨚꨳꨮꩍ ꨓꨝꨮꩃ ꩝ ꨚꨙꨮꩇ ꨏꩀ ꨣꨩ ꨈꨵꨮꩃ ꩝ ꨟꨮꨓꨩ ꨅꨩ ꨡꨯꩍ ꨕꨫ ꨟꨮꨓꨩ ꩞ ꩑꩑꩗꩞ ꨈꨵꨮꩃ ꨕꨫ ꨊꨯꨱꩀ ꨛꨯꨮ ꨤꨪꨊꨪꩀ ꨕꨯꨮꨝꨪꨓꨩ ꩝ ꨓꨴꨭꩆ ꨓꨐꨫ ꨕꨭꩆꨢꨩ ꩝ ꨨꨎꨳꨮꩃ ꨦꨗꩃ ꨝꨵꨯꨱꩍ ꨅꨩ ꨒꨮꩇ ꩞ ꩑꩑꩘꩞ ꨇꨪꩆ ꨆꨩ ꨧꨳꩌ ꨝꨫ ꨤꨪꨈꨰꩍ ꨅꨩ ꨔꨬ ꨚꨆꨮꩇ ꩝ ꨇꨪꩀ ꨖꩉ ꨜꨶꨮꩊ ꨚꨕꨮꩇ ꩝ ꨤꨯꩀ ꨗꨫ ꨕꨯꩌ ꨕꨯꨱꩀ ꨚꨌꨮꩃ ꩞ ꩑꩑꩙꩞ ꨦꩀ ꨨꨓꨰ ꨚꨶꨮꩄ ꨆꨜꨶꨮꩉ ꨇꨮꩃ ꨆꨕꨮꩃ ꩝ ꨛꨩꨝꨭꨩ ꨝꨓꨭꨥ ꨏꨯꨱꩀ ꨡꨮꩃ ꩝ ꨓꨧꨪꩀ ꨟꨮꨐꨭꩌ ꨀꨳꨩ ꨓꨧꨪꩀ ꩞ ꩑꩒꩐꩞ ꨓꨳꩆ ꨚꨍꨯꩌ ꨤꩄ ꨕꨶꨩ ꨝꨯꨱꩍ ꨤꨪꨊꨪꩀ ꩝ ꨨꨎꨳꨮꩃ ꨟꨮꨕꨭꩍ ꨧꨯꨱꩃ ꨨꨆꨪꩀ ꩝ ꨅꨩ ꨆꨴꨲꩆ ꨆꨩ ꨖꩉ ꨜꨶꨮꩊ ꨨꨕꨬ ꩞ ꩑꩒꩑꩞ ꨦꩀ ꨨꨓꨰ ꨕꨫ ꨙꨪꩍ ꨟꨮꨤꩌ ꨨꨕꨰ ꨤꨪꨚꨬ ꩝ ꨟꨮꨕꨮꩍ ꨨꨕꩍ ꨎꨳꨮꩃ ꨨꨣꨬ ꩝ ꨟꨮꨓꨩ ꨡꨯꩍ ꨕꨫ ꨟꨮꨓꨩ ꩞ ꩑꩒꩒꩞ ꨂꨣꩀꨗꨫ ꨔꨮꨭ ꨆꨩ ꨕꨴꨬ ꨕꨶꨪꩋꨦꨩ ꩝ ꨕꨫ ꨤꨶꨪꩄ ꨗꨮꨈꩉ ꨔꨶꩀ ꨢꨥꨩ ꩝ ꨟꨮꨓꨩ ꨝꨫ ꨝꩀ ꨝꨯꨱꩍ ꨟꨮꨓꨩ ꩞ ꩑꩒꩓꩞ ꨓꨔꨪꩅ ꨕꨤꩌ ꨆꨭꨣꨀꨲꩆ ꨟꨮꨓꨲꩍ ꨀꨕꩉꨨꨩ ꩝ ꨣꨩ ꨝꨴꨬ ꨀꨋꩆ ꨕꨶꨪꩋꨦꨩ ꩝ ꨅꨩ ꨡꨯꩍ ꨣꨭꩇ ꨢꨭꨥ ꨤꨪꨟꩆ ꩞ ꩑꩒꩔꩞ ꨟꨮꨢꩍ ꨚꩇ ꨕꨫ ꨈꨵꨰ ꨣꩌ ꨝꨗꩆ ꩝ ꨛꨯꨩꩀ ꨟꨮꨓꨩ ꨈꨵꨮꩃ ꨆꨴꨲꩆ ꩝ ꨕꨶꨪꩋ ꨇꨪꩆ ꨙꨶꨮꩄ ꨙꨪꩀ ꨆꨢꨭꨥ ꩞ ꩑꩒꩕꩞ ꨚꨴꨯꨱꩃ ꨤꨯꨩ ꨕꨫ ꨤꨯꩀ ꨗꨫ ꨔꨬ ꨣꨩ ꨔꨮꨭ ꩝ ꨛꨯꨮ ꨕꨯꨱꩀ ꨊꨯꨱꩀ ꨨꨤꨭꨥ ꩝ ꨟꨮꨓꨩ ꨚꨆꨴꨰꩃ ꨝꨯꨱꩍ ꨟꨮꨓꨩ ꩟