ꨨꨕꨬ ꨕꨫ ꨀꨳ ꨓꨴꨪꨥ꩝ ꨁꨮꩆ꩝ ꨊꨫꨭ ꨤꨨꨪꩀ꩞ ꨕꨯꨱꩀ ꨧꨩ ꨕꨴꨬ ꨀꨳ ꨧꨮꨩ – ꨧꨩ ꨀꨳ ꨝꨳꩀ ꨚꨴꨯꨱꩃ꩝ ꨝꨶꨮꩊ ꨞꩇ ꨧꨯꨱꩃ ꨎꨝꨶꨮꩊ ꨣꨤꨯꨩ – ꨢꨮꨭ ꨧꨩ ꨕꨗꨫꩂ ꨚꨓꨰꩀ ꨌꨆꩀ ꨈꨴꨭꩀ ꨀꨳ ꨓꨮꩆ ꨚꨳꨮꩍ ꨚꨓꨯꨱꩌ ꨀꨝꨪꩍ ꨀꨳ꩞ ꨓꨭꩀ ꨘꩆ꩝ ꨓꨮꩆ ꨔꨪ ꨨꨶꩂ ꨕꨯꨱꩀ ꨕꨫ ꨚꨝꨭꩂ ꨆꨢꨯꨱꩌ꩞ ꨆꨩ ꨅꨩ ꨓꨨꨩ꩝ ꨕꨯꨱꩀ ꨚꨴꨯꨱꩃ ꨦꨗꩃ꩝ ꨕꨭꨑꨩ ꨧꨪ ꨓꨮꩊ ꨤꨶꨪꩄ꩞ ꨕꨤꩌ ꨦꨗꩃ ꨅꩃ꩝ ꨕꨯꩌ ꨀꨳ ꨌꩌꨗꨯꨱꩍ ꨢꨮꨭ ꨝꨡꨮꩃ ꨓꨢꩍ ꨎꨶꩀ ꨧꨩ ꨡꨮꩃ ꨓꨴ ꨘꩆ ꨎꨤꨮꩍ꩞ ꨅꩃ ꨦꨗꩃ ꨤꩄ: ꨎꨰ ꨢꩀ ꨅꨩ ꨒꨮꩇ ꨆꨖꨩ ꨨꨭꨩ ꨣꨬ ꨔꨯꨱꩍ꩝ ꨟꨪꩆ ꨆꨖꨩ ꨕꨨꨵꨮꨭ ꨨꨕꨬ ꨨꨭꨩ꩞ ꨤꨪ ꨓꨪꩆ ꨘꩆ ꨠꨗꨶꨪꩋ ꨨꨭꨩ ꨣꨶꩍ꩝ ꨕꨯꨱꩀ ꨕꩌ꩝ ꨇꨮꩃ ꨆꨎꩇ꩝ ꨨꨭꨩ ꨣꨤꨯꨩ ꨜꨶꨮꩊ ꨢꨯꨱꩌ ꨆꨤꨪꩆ꩞ ꨓꨭꩀ ꨚꨓꨯꨱ ꨓꨐꨫ ꨐꨭꨩ: “ꨕꨯꩌ ꨎꨝꨶꨮꩊ ꨌꨰꩀ ꨟꩀ ꨀꨳ ꨧꨮꨩꨩ꩝ ꨤꨪ ꨓꨪꩆ ꨧꨭꨂꩀ ꨝꨳꩀ ꨆꨎꩇ “ꨆꨵꨮꨭ ꨓꨟꩆ ꨘꩆ ꨝꨳꩀ ꨈꨴꩇ ꨚꨎꨮꨩ”꩞ ꨎꩃ ꨓꨭꩀ ꨘꩆ꩝ ꨥꨮꩆ ꨓꨪꩆ ꨧꨩ ꨚꩆꨣꨯꨱꩃ ꨀꨓꨯꨱꩃ ꨆꨤꨪꩆ ꨀꨝꨪꩍ ꨣꩈ꩝ ꨙꨯꩌ ꨧꨩ ꨚꨗꨶꨮꩄ ꨓꨈꩉ ꨥꨮꩀ: “ꨅꨩ ꨨꨭꨩ ꩖꩐ ꨓꨟꩆ ꨎꨝꨶꨮꩊ ꨅꨩ ꨡꨮꩃ ꨨꨭꨩ ꨀꨳ ꨧꨮꨩ”꩞ ꨕꨶ ꨀꩃꨆꨩ ꨕꨶ ꨦꨗꩃ ꨧꨩ ꨈꩍ꩝ ꨢꨥ ꨚꨴꨯꨱꩃ ꨧꨩ ꨚꩆꨣꨯꨱꩃ ꨀꨓꨯꨱꩃ ꨆꨤꨪꩆ ꨡꨮꩃ ꨚꨕꩀ꩞ ꨧꨩ ꨈꩍ ꨓꨴ꩝ ꨓꨗꨫ ꨓꨘꩅ ꨧꨩ ꨟꨗꨶꨪꩋ ꨡꨯꩍ ꨝꨳꩀ ꨣꨤꨯꨩ ꨟꨓꨰ ꨤꨨꨪꩀ ꨕꨫ ꨆꨤꨪꩆ꩞ ꨓꨮꩆ ꨔꨪ ꨨꨶꩂ ꨧꩀ ꨨꨓꨰ ꨓꨟꨩ ꨕꨤꩌ ꨈꨗꨭꩍ ꨧꨯꨱꩃ ꨧꨠꩉ꩝ ꨆꨵꩀ ꨓꨚꨩ ꨚꨗꨶꨮꩄ ꨚꩆꨣꨯꨱꩃ ꨓꨨꨩ꩞ ꨚꨶꨮꩊ ꨎꨳꨯꨮꩃ ꨟꨰ ꨝꨳꩀ ꨕꨴꩍ ꨧꨯꨱꩃ ꨧꨭꨓꨳꩆ꩞ ꨤꨪ ꨓꨪꩆ ꨝꨩ ꨎꨝꨶꨮꩊ ꨓꨟꨩ ꨎꨤꨮꩌ꩝ ꨒꨮꩇ ꨈꨴꨭꩀ ꨌꨓꨶꨰ ꨎꨝꨶꨮꩊ ꨧꨮꨩ꩝ ꨝꨵꨯꨱꩍ ꨎꨝꨶꨮꩊ ꨧꨮꨩ ꨀꨓꨯꨱꩃ ꨓꨟꨩ ꨕꨫ ꨣꨤꨯꨩ ꨈꩍ꩞ ꨎꨝꨶꨮꩊ ꨓꨮꩆ ꨀꨤꩍ ꨀꨝꨪꩍ꩝ ꨚꩆꨣꨯꨱꩃ ꨟꨓꨰ꩝ ꨎꨝꨶꨮꩊ ꨤꨨꨪꩀ꩝ ꨡꨮꩃ ꨀꨓꨯꨱꩃ ꨀꨓꩍ ꨗꨫ ꨣꨯꨱꩃ ꨎꨤꨮꩍ ꨀꨝꨪꩍ꩞ ꨅꨩ ꨒꨮꩇ ꨤꩄ ꨧꨩ ꨡꨮꩃ ꨀꨓꨯꨱꩃ ꨆꨤꨪꩆ ꨀꨤꩍ꩝ ꨟꨪꩆ ꨧꨩ ꨌꨝꩀ ꨚꩀ ꨓꨟꨩ ꨡꨯꩀ ꨟꨓꨩ ꨚꨓꨯꨱ꩝ ꨟꨗꨶꨪꩋ ꨕꨨꨵꨮꨭ ꨘꩆ ꨦꨗꩃ ꨋꩀ ꨈꨰꩅ ꨎꩃ ꨒꨮꩇ ꨀꨝꨪꩍ꩞ ꨨꨕꨬ ꨡꨮꩃ ꨀꨓꨯꨱꩃ ꨘꩆ꩝ ꨣꨎꨀꨰꩋ ꨈꨪꨙꨮꩃ꩝ ꨅꨩ ꨔꨬ ꨇꨫꩂ ꨙꨯꩌ ꨥꨮꩀ ꨓꨮꩊ ꨀꨳ ꨧꨮꨩ꩞ ꨎꩃ ꨓꨭꩀ ꨘꩆ꩝ ꨧꨩ ꨔꨰꩀ ꨆꨖꨩ ꨝꨳꩀ ꨓꨆꨪꩀ ꨡꨯꩍ ꨚꨎꨳꨮꩂ ꨓꨝꨳꩀ꩞ ꨓꨮꩆ ꨔꨪ ꨨꨶꩂ ꨡꨶꩀ ꨓꨆꨰ ꨟꨰ ꨣꨥꨮꩃ ꨥꨮꩆ ꨓꨪꩆ꩞ ꨅꨩ ꨒꨮꩇ ꨌꨰꩀ ꨝꨴꨬ ꨈꨯꨱꩆ꩝ ꨎꩃ ꨅꨩ ꨒꨮꩇ ꨚꨳꨮꩍ ꨡꨶꩍ꩝ ꨟꨪꩆ ꨚꨳꨮꩍ ꨙꨯꩌ ꨨꨕꨯꩌ ꨚꨗꨶꨮꩄ ꨆꨓꨮꩀ: “ꨆꨭꨟꨪ ꨅꨩ ꨚꨮꩃ ꨅꩃ꩝ ꨆꨢꨶ ꨘꩆ ꨀꨤꩍ ꨢꨮꨭ ꨗꨫ”꩝ ꨝꨵꨯꨱꩍ ꨚꨓꨯꨱ ꨙꨯꩌ ꨥꨮꩀ: “ꨈꨴꨭꩀ ꨟꩀ ꨀꨳ ꨧꨮꨩ꩝ ꨆꨭꨟꨪ ꨎꨥ ꨥꨮꩀ ꨆꨩ ꨅꩃ꩝ ꨤꨪꨆꨮꨭ ꨅꩃ ꨇꨪꩀ ꨎꨝꨶꨮꩊ ꨆꨩ ꨆꨭꨟꨪ ꨟꨰꩀ”꩞ ꨘꩆ ꨧꨩ ꨡꨮꩃ ꨝꨳꩀ ꨓꨆꨪꩀ ꨕꨫ ꨆꨢꨯꨱꩌ ꨚꨴꨯꨱꩃ ꨈꨵꨯꨱꩃ: ꨧꨩ ꨚꨓꨯꨱ ꨕꨫ ꨚꨝꨭꩂ꩝ ꨨꨝꩉ ꨝꨪꩀ ꨕꨴꨬ ꨅꨩ ꨒꨮꩇ ꨧꨯꨱꩃ ꨤꨪꨆꨮꨭ ꨟꨗꨶꨪꩋ ꨝꨪꨆꩆ ꨀꨗꨯꨱꩃ ꨚꨶꨮꩊ ꨎꨳꨯꨮꩃ ꨏꩀ ꨆꨢꨶ ꨕꨴꨬ꩞ ꨥꨮꩆ ꨓꨪꩆ ꨆꨭꩀ ꨀꨆꨯꨱꩀ꩝ ꨅꨩ ꨙꨯꩌ ꨓꨮꩊ ꨆꨖꨩ ꨆꨵꩀ꩝ ꨧꨭꨂꩀ ꨧꨩ ꨝꨯꨱꩍ ꨚꨗꨶꨮꩄ ꨟꨪꩆ: “꩖꩐ ꨓꨟꩆ ꨎꨝꨶꨮꩊ ꨆꨩ ꨟꩃ ꨨꨭꨩ”; ꨅꨩ ꨡꨶꩍ ꨈꨰꩅ꩝ ꨅꨩ ꨙꨯꩌ ꨓꨮꩊ ꨤꨪ ꨓꨪꩆ꩝ ꨇꨪꩀ ꨧꨩ ꨀꩃꨆ꩝ ꨇꨪ ꨧꨩ ꨀꨕꩅ ꨀꨓꨯꨱꩃ ꨆꨤꨪꩆ꩞ ꨓꨮꩆ ꨔꨪ ꨨꨶꩂ ꨈꨪꨙꨮꩃ ꨦꨗꩃ ꨝꨳꩀ ꨍꨶꨰ꩝ ꨝꨵꨯꨱꩍ ꨀꨢꨭꩍ ꨀꨆꨯꨱꩀ꩞ ꩖꩐ ꨓꨟꩆ ꨎꨝꨶꨮꩊ ꨧꨯꨱꩃ ꨕꨗꨭꨇꨩ ꨚꨓꨯꨱ ꨚꨤꨯꨱ ꩖꩐ ꨓꨟꩆ ꨎꨝꨶꨮꩊ ꨆꨩ ꨧꨩ ꨂꨣꩃ ꨇꨪꩀ꩝ ꨕꨤꩌ ꨀꨣꨰ ꨝꨪꨣꨭꨥ ꨟꩀ ꨨꨭꨩ ꨕꨯꩌ ꨀꨳ ꨌꩌꨗꨯꨱꩍ꩝ ꨘꩆ ꨧꨩ ꨆꨖꨩ ꨝꨪꨆꩆ ꨥꨮꩀ: ꨆꨖꨩ ꨕꨫ ꨆꨵꨯꨱꩍ ꨨꨓꨰ꩞ ꨥꨮꩆ ꨓꨪꩆ ꨎꩃ ꨔꨮꨭ ꨓꨘꩅ ꨆꨖꨩ ꨘꩆ꩞ ꨆꨢꨶ ꨢꨮꨭ ꨘꩆ꩝ ꨝꨪꨣꨭꨥ ꨓꨝꨳꩀ ꨎꨝꨶꨮꩊ ꨟꨪꩆ꩝ ꨅꩃ ꨙꨣꩇ ꨙꨶꨮꩄ ꨨꨣꩀ ꨗꨯꨱ ꨣꨎꨀꨰꩋ ꨤꨪꨆꨮꨭ ꨝꨴꨬ ꨓꨗꩍ ꨧꨯꨱꩃ ꨝꨴꨬ ꨨꨭꨔꩀ ꨆꨩ ꨀꨗꩀ ꨓꨌꨯꨱꨥ꩞ ꨨꨣꩀ ꨟꨰ ꨨꨟꨳꨯꨮꩅ ꨋꩀ ꨆꨩ ꨣꨤꨯꨩ ꨂꨣꩃ ꨆꨵꨯꨱ ꨅꩃ: ꨚꩆꨣꨯꨱꩃ ꨓꨨꨩ ꨅꨩ ꨆꨩ ꨀꨓꨯꨱꩃ ꨡꨮꩃ ꨟꨪꩆ ꨙꨯꩀ ꨇꨪꩀ ꨆꨢ ꨚꨎꨮꨩ”꩞ ꨟꨪꩆ ꨓꨮꩆ ꨔꨪ ꨨꨶꩂ ꨔꨮꨭ: ꨨꨶꨮꩄ ꨙꨩ ꨟꨗꨶꨪꩋ ꨙꨯꩀ ꨆꨩꨢꨯꩌ꩝ ꨅꨩ ꨨꨶꨮꩄ ꨕꨫ ꨟꨗꨶꨪꩋ ꨙꨯꩀ ꨎꨳꨯꨮꩆ꩞ ꨥꨮꩆ ꨓꨪꩆ ꨟꨣꩅ ꨋꩀ ꨆꨩ ꨚꨓꨯꨱ ꨔꨮꨭ ꨤꩄ ꨕꨴꨬ ꨓꨆꨴꨲꨩ ꨎꨳꨯꨮꩆ ꨆꨢ ꨟꨪꩆ꩝ ꨅꨩ ꨇꨫꩂ ꨟꨝꨵꩍ ꨆꨩꨢꨯꩌ ꨚꨓꨯꨱ꩞ ꨅꩃ ꨚꨮꩃ ꨎꨝꨶꨮꩊ ꨣꨤꨯꨩ ꨨꨣꨬ꩝ ꨅꨩ ꨙꨳꩀ ꨓꨳꩆ ꨀꨓꨯꨱꩃ꩝ ꨅꨩ ꨟꨢꨰꩍ꩝ ꨇꨪꩀ ꨀꨕꩅ ꨎꨝꨶꨮꩊ ꨝꨳꩀ ꨆꨎꩇ꩝ ꨣꨭꩍ ꨚꨴꨲꩆ ꨎꨝꨶꨮꩊ ꨧꨮꨩ ꨨꨣꨬ ꨗꨫ ꨓꨚꨩ ꨨꨣꨬ ꨝꨪꨆꩆ꩞ ꨓꨮꩊ ꨓꨭꩀ ꨓꨝꨳꩀ ꨀꨝꨪꩍ ꨆꨖꨩ ꨀꨓꨯꨱꩃ ꨘꩆ ꨀꨓꨯꨱꩃ ꨡꨮꩃ꩞ ꨝꨵꨯꨱꩍ ꨀꨳ ꨧꨮꨩ ꨎꩃ ꨤꨨꨪꩀ꩞ ꨨꨕꨬ ꨡꨮꩃ ꨀꨓꨯꨱꩃ ꨀꨓꩍ ꨘꩆ꩝ ꨥꨮꩆ ꨓꨪꩆ ꨤꨶꨰ ꨟꨰ ꨧꩃ꩝ ꨅꨩ ꨇꨪꩀ ꨆꨢꨯꨱꩌ ꨚꨴꨯꨱꩃ꩝ ꨅꨩ ꨋꩀ ꨥꨮꩀ ꨕꨫ ꨣꨎꨀꨰꩋ꩞ ꨅꩃ ꨘꩆ ꨨꨕꨯꩌ ꨂꨣꩃ ꨝꨳꩀ ꨓꨆꨪꩀ ꨨꨭꨩ ꨜꨶꨮꩊ ꨢꨯꨱꩌ ꨝꨳꩀ ꨚꨴꨯꨱꩃ ꨕꨤꩌ ꨀꨳ ꨓꨮꩆ: ꨜꨶꨮꩊ ꨢꨯꨱꩌ ꨚꨴꨯꨱꩃ ꨕꨫ ꨀꨝꨪꩍ꩝ ꨚꩆ ꨎꨝꨶꨮꩊ ꨣꨤꨯꨩ ꨀꨝꨪꩍ꩝ ꨟꨪꩆ ꨤꨶꨰ ꨟꨰ ꨚꨤꨬ ꨕꨯꨱꩀ ꨧꨳꩌ꩞ ꨟꨯꨱꩃ ꨈꨤꩄ ꨧꩀꨆꨣꨰ ꨀꨳ ꨓꨮꩆ꩝ ꨟꩃ ꨡꨯꩍ ꨆꨣꨬ ꨝꨳꩀ: ꨕꨨꨵꨮꨭ ꨥꨮꩆ ꨓꨪꩆ꩝ ꨀꨳ ꨓꨮꩆ ꨨꨭꨩ ꨡꩅ ꨇꨮꩈ꩝ ꨚꩆꨣꨯꨱꩃ ꨢꩃ ꨀꨓꨯꨱꩃ ꨣꨩꨓꨭꩍ ꨡꨮꩃ ꨀꨝꨪꩍ ꨣꨩꨓꨭꩍ꩞ ꨟꨪꩆ ꨆꨢꨶ ꨢꨮꨭ ꨘꩆ꩝ ꨈꨗꨭꩍ ꨚꨴꨯꨱꩃ ꨓꨚꨩ ꨚꨓꨯꨱ ꨘꩆ ꨟꨓꨰ ꨕꨫ ꨡꨵꩃ ꨆꨤꨪꩆ꩝ ꨆꨢꨶ ꨈꨯꨱꩆ ꨚꨓꨯꨱ ꨝꨴꨬ꩞ ꨡꩅ ꨇꨮꩈ ꨀꨓꨯꨱꩃ ꨆꨤꨪꩆ ꨉꨮꩍ꩝ ꨟꨪꩆ ꨅꨩ ꨉꨮꩍ ꨕꨫ ꨆꨵꩀ ꨆꩊꨠꩆ꩞ ꨥꨮꩆ ꨓꨪꩆ ꨆꨣꨬ꩝ ꨅꩃ ꨦꨗꩃ ꨡꨯꩍ꩝ ꨎꨰ ꨚꨴꨯꨱꩃ ꨀꨝꨪꩍ ꨅꨩ ꨒꨮꩇ ꨟꩀ ꨨꨭꨩ ꨧꨩ ꨀꨳ꩝ ꨟꨪꩆ ꨨꨝꩉ ꨕꨯꨱꩀ ꨨꨕꨳꨪꩇ ꨓꨭꩀ ꨕꨭꨑꨩ ꨓꨮꩊ ꨤꨶꨪꩄ꩞ ꨟꨢꩍ ꨡꩅ ꨇꨮꩈ ꨘꩆ ꨧꨩ ꨆꨣꨪꩅ ꨨꨤꨶꩀ ꨀꨝꨪꩍ ꨕꨫ ꨀꨳ ꨓꨮꩆ꩝ ꨢꨮꨩ ꨥꨮꩆ ꨓꨪꩆ ꨘꩆ ꨧꨩ ꨟꨗꨶꨪꩋ ꨔꨮꨭ ꨝꨭꩍ ꨆꨣꨪꩅ ꨓꨟꨩ ꨕꨤꩌ ꨨꨣꨭꩌ ꨒꨮꩇ ꨓꨭꩀ꩞