ꨕꨫ ꨧꨩ ꨚꨤꨬ ꨓꨜꨳ ꨆꨴꨯꨱꩃ꩝ ꨝꨪꨤꩆ ꨘꩆ ꨨꨭꨩ ꨀꨳ ꨧꨶ ꨚꨴꨯꨱꩃ꩝ ꨝꨵꨯꨱꩍ ꨀꨳ ꨧꨶ ꨘꩆ ꨋꩇ ꨓꨝꨳꩀ ꨧꨩ ꨕꨗꨯꨱ ꨝꨳꩀ ꨕꨤꩌ꩞ ꨝꨵꨯꨱꩍ ꨓꨮꩊ ꨧꨩ ꨚꨈꨯꨮꨩ꩝ ꨨꨭꨩ ꨧꨩ ꨝꩆ ꨀꨦꨪꩅ ꨈꨵꨮꩃ ꨤꨪꨟꨯꨱꨥ ꨓꨜꨳ ꨕꨗꨯꨱ ꨘꩆ꩞ ꨨꨭꨩ ꨧꨩ ꨕꨴꨬ ꨤꨪꨟꨯꨱꨥ ꨤꨶꨰ ꨓꨟꨩ ꨕꨤꩌ ꨕꨗꨯꨱ ꨘꩆ ꨅꨩ ꨌꨳꨪꩇ ꨓꨝꨳꩀ꩞ ꨆꨢꨶ ꨢꨮꨭ ꨘꩆ꩝ ꨝꩆ ꨀꨦꨪꩅ ꨨꨝꩉ ꨤꨶꨰ ꨓꨟꨩ ꨚꨳꨮꩍ ꨓꨳꩇ ꨤꨪꨟꨯꨱꨥ ꨘꩆ ꨓꨝꨳꩀ꩝ ꨅꩍ ꨔꨮꨭ ꨢꨮꨭ ꨈꨰꩅ ꨟꨪꩆ ꨝꩆ ꨀꨦꨪꩅ ꨟꨓꨰ ꨡꨵꨭꩂ꩞ ꨝꨳꨯꨮꩉ ꨨꨣꨬ ꨘꩆ꩝ ꨡꨯꩍ ꨆꨤꨪꩀ ꨎꨶꩀ ꨐꨭꨩ ꨕꨯꨱꩀ ꨓꨆꨬ ꨕꨗꨯꨱ꩝ ꨝꨶꨮꩊ ꨞꩇ ꨨꨶ ꨈꨮꩇ ꨟꨰ ꨕꨶꩍ꩞ ꨀꨟ ꨀꨟꨰꩀ ꨐꨭꨩ ꨨꨳ ꨌꨯꨱꩀ ꨝꨳꩀ ꨣꨤꨯꨩ꩞ ꨕꨨꨵꩀ ꨤꨶꨰ ꨆꨎꩇ ꨘꩆ ꨐꨭꩀ ꨕꨤꩌ ꨀꨳ ꨚꨳꨮꩍ ꨕꨶꩍ ꨀꨓꨭꨥ ꨐꨭꨩ꩞ ꨝꨯꨩ ꨆꨆꨮꩍ ꨣꨤꨯꨩ꩝ ꨆꨮꨭ ꨤꨶꨰ ꨗꨯꨱ ꨤꨶꨰ ꨟꨰ ꨨꨟꨳꨯꨮꩅ ꨟꨪꩆ ꨅꨩ ꨡꨯꩍ ꨈꨰꩅ꩞ ꨕꨯꩌ ꨨꨣꨬ ꨨꨕꨬ꩝ ꨟꨗꨶꨪꩋ ꨝꨪꨆꩆ ꨤꨶꨰ ꨓꨴꨭꩆ ꨕꨶꩍ ꨐꨭꨩ ꨥꨮꩀ ꨟꨪꩆ ꨎꩃ ꨅꨩ ꨡꨯꩍ ꨐꨭꨩ꩝ ꨢꨮꨭ ꨨꨝꩉ ꨐꨭꨩ ꨤꨨꨪꩀ ꨀꨝꨪꩍ꩝ ꨟꩃ ꨨꨣꨬ ꨘꩆ ꨗꨯꨱ ꨅꨩ ꨡꨯꩍ ꨐꨭꨩ ꨥꨮꩀ꩞ ꨟꩃ ꨨꨣꨬ ꨘꩆ꩝ ꨟꨤꩌ ꨣꨬ ꨆꨮꨭ ꨎꩃ ꨡꨯꩍ ꨤꨭꩇ꩞ ꨤꨪꨚꨬ ꨟꨪꩆ ꨝꨳꩀ ꨢꨮꨭ ꨟꨕꨮꩍ꩞ ꨕꨤꩌ ꨧꨩ ꨤꨪꨚꨬ꩝ ꨆꨮꨭ ꨚꨈꨶꨬ ꨓꨶꨬ ꨧꨩ ꨣꨗꨰꩍ ꨓꨭꩀ ꨡꨯꩍ ꨓꨭꩀ ꨤꨨꨪꩀ꩞ ꨗꨯꨱ ꨓꨮꩊ ꨕꨗꨯꨱ ꨀꨳ꩝ ꨝꩆ ꨀꨦꨪꩅ ꨢꩌ ꨓꨟꨩ ꨆꨴꨲꩍ ꨕꨗꨯꨱ꩝ ꨆꨮꨭ ꨚꨴꨯꨮꨥ ꨎꨶꨰ ꨓꨟꨩ ꨎꨶꨰ ꨟꨪꩆ ꨐꨭꨩ ꨅꩍ ꨚꨮꩃ꩞ ꨝꨵꨯꨱꩍ ꨨꨭꨩ ꨈꨰꩅ ꨅꨩ ꨕꨤꩌ ꨀꨳ ꨆꨓꨭꩂ ꨐꨭꨩ ꨓꨴꨭꩆ꩝ ꨝꨵꨯꨱꩍ ꨐꨭꨩ ꨆꨣꩌ ꨌꨰꩀ ꨥꨮꩀ ꨕꨣꩍ ꨞꨯꩂ ꨕꨫ ꨀꨳ꩞ ꨚꨈꨭꩍ ꨆꨮꨭ ꨗꨯꨱ ꨓꨮꩊ ꨕꨗꨯꨱ ꨀꨳ ꨥꨮꩀ꩝ ꨡꨯꩍ ꨚꩀ ꨗꨫ ꨨꨭꨩ ꨈꨰꩅ ꨅꨩ ꨆꨣꨬ ꨣꨤꨯꨩ꩝ ꨡꨯꩍ ꨨꨕꨯꩌ ꨜꨭꩆ ꨟꨤꨮꨭ ꨓꨜꨳ ꨕꨗꨯꨱ꩝ ꨐꨭꨩ ꨚꨪꩀ ꨨꨤ ꨢꨮꨭ ꨔꨬ ꨅꨩ ꨣꨥꨮꩀ ꨐꨭꨩ꩞ ꨆꨮꨭ ꨗꨯꨱ ꨥꨪꩊ ꨕꨮꩉ ꨕꨗꨯꨱ꩝ ꨚꨳꨮꩍ ꨕꨶꩍ ꨟꨢꩍ ꨨꨭꨩ ꨨꨎꨬ꩝ ꨟꨪꩆ ꨅꨩ ꨡꨯꩍ ꨈꨰꩅ꩞ ꨝꨵꨯꨱꩍ ꨆꨮꨭ ꨗꨯꨱ ꨧꩃ꩝ ꨨꨣꨬ ꨝꨪꨤꩆ ꨓꨚꨩ꩝ ꨆꨮꨭ ꨎꩃ ꨥꨮꩉ ꨆꨖ ꨘꩆ꩞ ꨆꨵꨮꨭ ꨝꨪꨤꩆ ꨨꨕꨬ꩟ ꨨꨭꨩ ꨥꨮꩀ ꨧꨩ ꨝꩆ ꨀꨦꨪꩅ ꨕꨫ ꨚꨤꨬ ꨝꨪꨆꩆ ꨟꨰ ꨥꩍ ꨁꨆꩆ ꨓꨆꨬ ꨕꨗꨯꨱ꩝ ꨐꨭꨩ ꨅꨩ ꨔꨮꨭ ꨆꨖ ꨚꩀ ꨗꨫ ꨆꨵꨮꨭ ꨝꨪꨤꩆ ꨕꨤꨮꨭ꩞ ꨣꨰ ꨐꨭꨩ ꨘꩆ ꨚꨝꨵꨯꨱꩍ ꨚꨎꨮꨩ꩞ ꨕꨯꨱꩀ ꨥꩍ ꨁꨆꩆ꩝ ꨝꨵꨯꨱꩍ ꨈꨰꩅ ꨅꨩ ꨆꨓꨭꩂ ꨀꨈꩉ ꨥꩍ ꨓꨟꨩ ꨕꨤꩌ ꨕꨗꨯꨱ꩝ ꨦꨗꩃ ꨤꩄ ꨥꩍ ꨨꨭꨩ ꨁꨆꩆ ꨚꨴꨯꨱꩃ꩝ ꨝꩆ ꨀꨦꨪꩅ ꨚꨵꨯꨱꩃ ꨓꨟꨩ ꨕꨤꩌ ꨕꨗꨯꨱ ꨚꨳꨮꩍ ꨟꩀ ꨈꨤꩄ ꨀꨈꩉ ꨥꩍ꩝ ꨝꨵꨯꨱꩍ ꨨꨭꨩ ꨈꨰꩅ ꨅꨩ ꨈꨮꩀ ꨐꨭꨩ ꨓꨟꨩ ꨀꨳ꩝ ꨐꨭꨩ ꨚꨴꨯꨮꨥ ꨕꨶꨪꨧꩀ ꨣꨤꨯꨩ꩝ ꨨꨕꨬ ꨘꩆ ꨡꨯꩍ ꨕꨣꩍ ꨕꨯꨱꩀ ꨙꨯꩂ ꨊꨯꨱꩀ ꨀꨳ ꨟꨪꩆ꩞ ꨓꨮꩊ ꨚꨈꨭꩍ ꨚꨈꨯꨮꨩ ꨆꨩ꩝ ꨝꨶꨮꩊ ꨞꩇ ꨧꨯꨱꩃ ꨎꨝꨶꨮꩊ ꨇꨪꩀ ꨟꩃ ꨟꨰ ꨕꨶꩍ꩝ ꨎꩃ ꨢꨮꨭ ꨡꨮꩃ ꨕꨤꨮꨭ꩝ ꨅꩍ ꨕꨶꩍ ꨡꨯꩍ ꨀꨓꨭꨥ ꨝꩆ ꨀꨦꨪꩅ ꨗꨫ꩞ ꨕꨗꨯꨱ ꨗꨫ ꨚꨨꨶꨮꩄ ꨣꨤꨯꨩ꩝ ꨘꩆ ꨣꨎꨆꩉ ꨚꨕꨮꩃ ꨧꨩ ꨣꨤꨯꨱꩍ ꨕꨫ ꨗꨫ꩝ ꨣꨤꨯꨱꩍ ꨥꩀ: “ꨕꨗꨯꨱ ꨡꨮꩃ ꨣꨤꨯꨱꨥ ꨟꨗꨶꨪꩋ꩝ ꨎꨶꨰ ꨟꨰ ꨓꨮꩊ” ꨆꨖ ꨀꨔꨭꩉ ꨗꨫ ꨋꩀ ꨆꨩ ꨆꨮꨭ ꨦꨗꩃ ꨥꨮꩀ ꨕꨫ ꨝꩆ ꨀꨦꨪꩅ ꨕꨤꨮꨭ꩝ ꨤꨪꨚꨬ ꨘꩆ ꨟꨰ ꨈꨤꩄ ꨥꨮꩀ꩞ ꨕꨤꩌ ꨤꨪꨚꨬ꩝ ꨆꨮꨭ ꨡꨯꩍ ꨆꨮꨭ ꨕꨯꨱꩀ ꨐꨭꩀ ꨎꨤꩌ ꨀꨳ꩝ ꨡꨯꩍ ꨈꨰꩅ ꨅꨩ꩝ ꨔꨰꩀ ꨐꨭꨩ ꨕꨴꨮꩍ ꨟꨗꨶꨪꩋ꩝ ꨆꨤꨪꩀ ꨚꨓꨪꩍ ꨢꨮꨭ ꨝꨪꨀꩉ꩝ ꨡꨭꩀ ꨀꨓꩍ ꨢꨯꩌ ꨕꨶ ꨟꨯꨮꩅ; ꨕꨫ ꨓꨕ ꨐꨭꨩ ꨚꨗꩌ ꨧꨩ ꨝꨪꨓꨭꩀ ꨞꨯꩂ ꨧꨩ ꨚꨵꨭꩍ ꨨꨤ; ꨐꨭꨩ ꨕꨯꨱꩀ ꨈꩀ ꨟꨓ ꨟꨯꨱꩃ ꨆꨮꨭ꩞ ꨟꨕꨮꩍ ꨓꨈꨯꩀ꩝ ꨆꨮꨭ ꨕꨯꨱꩀ ꨨꨕꨮꩉ ꨝꨳꩀ ꨨꨕꩍ ꨤꨪꨚꨬ ꨘꩆ꩝ ꨡꨯꩍ ꨢꨮꨭ ꨨꨗꨕꩉ ꨟꨪꩆ ꨅꨩ ꨒꨮꩇ ꨤꨪꨚꨬ꩞ ꨟꨢꩍ ꨨꨗꨕꩉ ꨟꨪꩆ ꨆꨮꨭ ꨡꨯꩍ ꨐꨭꨩ ꨚꩀ ꨨꨤꨬ? ꨢꨮꨭ ꨨꨝꩉ ꨂꨣꩀ ꨗꨫ ꨥꨮꩉ ꨚꨎꨮꨩ? ꨆꨮꨭ ꨕꨶꩍ ꨕꨫ ꨈꨭꨈꨯꨩ ꨔꨰꩀ ꨝꨪꨓꨭꩀ ꨚꨵꨭꩍ ꨨꨤ꩝ ꨡꨯꩍ ꨧꨩ ꨧꩃ ꨡꨮꩃ ꨟꩀ ꨔꨰꩀ ꨗꨫ ꨋꩇ ꨔꨰꩀ ꨕꨫ ꨝꨡꨮꩃ ꨎꩃ꩝ ꨧꩃ ꨡꨮꩃ ꨗꨫ ꨕꨯꨱꩀ ꨓꨆꨬ ꨆꨴꨯꨱꩃ꩝ ꨒꨮꩇ ꨆꨴꨯꨱꩃ ꨨꨭꨩ ꨕꨘꩆ ꨡꨮꩃ ꨣꨤꨯꨱꨥ ꨝꩆ ꨀꨦꨪꩅ꩞ ꨟꨎꨴꨮꩌ ꨟꨪꩆ ꨤꩄ? ꨨꨰ ꨕꨯꨱꩀ ꨁꨇꩆ ꨈꨰꩅ ꨥꨮꩀ ꨟꨪꩆ ꨕꨴꨬ ꨆꨩ ꨅꨩ ꨔꨮꨭ꩞ ꨆꨮꨭ ꨚꨒꩇ ꨨꨝꩉ ꨗꨯꨱ ꨓꨮꩊ ꨧꩃ ꨡꨮꩃ ꨘꩆ꩝ ꨧꩃ ꨡꨮꩃ ꨕꨯꨱꩀ ꨕꨫ ꨊꨯꨱꩀ ꨨꨤꨮꨭ꩝ ꨀꨓꩍ ꨕꨫ ꨕꨗꨯꨱ ꨟꨓꨰ ꨧꨩ ꨚꨵꨭꩍ ꨈꨰ ꨀꩃꨆ꩞ ꨝꨳꨯꨮꩉ ꨨꨣꨬ ꨘꩆ꩝ ꨀꨳ ꨨꨣꨬ ꨧꨪ ꨓꨴꨭꩆ ꨌꨮꩀ ꨟꨪꩆ ꨕꨯꨱꩀ ꨨꨕꩍ꩝ ꨆꨮꨭ ꨗꨯꨱ ꨥꨮꩀ ꨥꨪꩊ ꨕꨮꩉ ꨕꨗꨯꨱ꩝ ꨡꨯꩍ ꨈꨰꩅ ꨅꨩ ꨢꨮꨭ ꨆꨤꨪꩀ ꨟꨗꨶꨪꩋ ꨕꨯꨱꩀ ꨙꨯꩂ꩝ ꨀꨳꨮꩀ ꨓꨘꩅ ꨥꨮꩀ ꨡꨯꩍ ꨓꨊꨪꩆ ꨟꨗꨶꨪꩋ꩝ ꨓꨊꨪꩆ ꨝꩆ ꨀꨦꨪꩅ꩝ ꨐꨭꨩ ꨡꨮꩃ ꨣꨤꨯꨱꨥ ꨝꩆ ꨀꨦꨪꩅ ꨚꨎꨮꨩ꩝ ꨆꨮꨭ ꨀꨔꨭꩉ ꨙꨯꩀ ꨙꨶꨮꩄ ꨟꨪꩆ ꨡꨯꩍ ꨨꨤ ꨜꨭꩆ ꨟꨤꨮꨭ ꨚꨪꩀ ꨈꨤꩄ꩞ ꨝꨵꨯꨱꩍ ꨆꨮꨭ ꨎꨩꨊꨪꩍ ꨨꨓꨰ ꨥꨮꩀ꩝ ꨀꨕꩉ ꨟꨰ ꨧꩃ꩝ ꨥꨮꩉ ꨀꨝꨪꩍ ꨆꨖ ꨝꨣꨭꨥ ꨡꨯꩍ꩞ ꨚꨈꨭꩍ ꨆꨮꨭ ꨧꨩ ꨕꨴꨬ ꨙꨪꩀ ꨣꨕꨰꩍ ꨗꨯꨱ ꨚꩀ ꨧꩃ ꨡꨮꩃ ꨨꨭꨩ ꨔꨰꩀ ꨚꨵꨭꩍ ꨨꨤ ꨘꩆ꩞ ꨟꨢꩍ ꨗꨯꨱ ꨔꨶꨰ ꨆꨴꨯꨱꩃ ꨀꨓꩍ ꨧꨩ ꨚꨵꨭꩍ ꨈꨰ ꨀꩃꨆ ꨟꨪꩆ꩝ ꨟꨪꩆ ꨗꨯꨱ ꨓꨶꨬ ꨎꨤꩆ ꨀꨓꩍ ꩓꩐ ꨈꨰ ꨀꩃꨆ ꨡꨮꩃ꩞ ꨧꩃ ꨡꨮꩃ ꨘꩆ ꨕꨯꨱꩀ ꨕꨫ ꨆꨴꨲꩍ ꨌꨮꩀ ꨈꨵꨰ꩝ ꨕꨫ ꨖꨯꨱꩃ ꨕꨤꩌ꩝ ꨥꨪꩊ ꨕꨮꩉ ꨨꨭꨩ ꨌꨮꩀ ꨈꨵꨯꨱꩃ ꨚꨎꩊ ꨥꨮꩀ꩞ ꨓꨮꩊ ꨤꨪꨝꨪꩀ꩝ ꨡꨯꩍ ꨧꩃ ꨡꨮꩃ ꨘꩆ ꨝꨳꩀ ꨓꨆꨪꩀ ꨓꨶꨬ꩝ ꨓꨭꩀ ꨆꨮꨭ ꨗꨯꨱ ꨓꨮꩊ ꨡꨯꩍ ꨧꨩ ꨕꨴꨬ ꨆꨮꨭ ꨟꨪꩆ꩞ ꨆꨮꨭ ꨃꨥ ꨧꨩ ꨚꨵꨭꩍ ꨆꨤꨯꨱꩀ ꨡꨳꨮ ꨧꨯꨱꩃ ꨧꨩ ꨎꩌ ꨣꨤꨯꨱꨥ꩝ ꨕꨯꨱꩀ ꨧꨩ ꨕꨟꨭꩀ ꨆꨮꨭ ꨚꨮꩍ ꨚꨗꨶꨮꩄ ꨙꨯꩌ ꨧꨯꨱꩃ ꨛꨯꨮ ꨆꨶꩆ: “ꨅꩃ ꨤꨮꩈ ꨟꨐꨭꩌ ꨡꨳꨮ ꨧꨯꨱꩃ ꨕꨨꨵꩀ ꨗꨫ!”꩞ ꨝꨣꨭꨥ ꨅꩃ ꨅꨩ ꨌꨳꨪꩇ ꨟꨐꨭꩌ꩝ ꨟꨪꩆ ꨧꨩ ꨕꨟꨭꩀ ꨆꨩ ꨟꩃ ꨌꨳꨪꩇ꩝ ꨆꨢꨶ ꨆꨶꩆ ꨎꨶ ꨣꨤꨯꨩ꩞ ꨡꨯꩍ ꨕꨶ ꨂꨣꩃ ꨟꨪꩆ ꨅꩍ ꨡꨯꩍ ꨔꨬ ꨓꨴ꩞ ꨆꨮꨭ: ꨕꨨꨵꩀ ꨡꨯꩍ ꨕꨫ ꨊꨯꨱꩀ ꨝꨮꩃ꩝ ꨆꨶꩆ ꨌꨬ ꨧꨟꩃ ꨣꨤꨯꨩ꩝ ꨘꩆ ꨟꨰ ꨓꨮꩊ ꨗꨫ ꨚꨳꨮꩍ ꨣꨥꨮꩃ꩝ ꨟꨪꩆ ꨡꨯꩍ ꨈꨰꩅ ꨎꨶ ꨣꨤꨯꨩ꩝ ꨅꩍ ꨔꨮꨭ ꨂꨣꩀ ꨗꨫ ꨆꨶꩆ ꨚꨝꨵꨬ ꨧꨤꨪꩍ ꨨꨝꩉ ꨚꨎꨮꨩ ꨌꨬ? ꨅꩃ: ꨕꨤꨮꨭ ꨕꨯꨮꩍ ꨣꨤꨯꨩ ꨓꨶꨬ ꨟꨪꩆ ꨀꨗꩀ꩝ ꨝꨵꨯꨱꩍ ꨀꨳ ꨧꨶ ꨟꨰ꩝ ꨟꩃ ꨘꩆ ꨓꨶꨬ ꨎꩃ ꨓꨆꨪꩀ ꨟꨰ꩝ ꨌꨬ ꨦꨗꩃ ꨤꩄ ꨚꨈꨭꩍ ꨆꨕꨯꨮꩍ ꨆꨣꨮꩀ ꨆꨶꩆ ꨚꨎꨮꨩ꩞ ꨆꨮꨭ”: ꨛꨯꨮ! ꨟꨪꩆ꩝ ꨌꨬ ꨨꨭꨩ ꨔꨮꨭ ꨆꨩꨕꩍ ꨕꨗꨯꨱ ꨡꨮꩃ ꨣꨤꨯꨩ ꨟꨗꨶꨪꩋ ꨨꨤꨬ? ꨛꨯꨮ ꨆꨶꩆ ꨟꩃ ꨍꨮꩍ ꨔꨮꨭ: ꨆꨖ ꨨꨝꩉ ꨌꨬ ꨅꩍ ꨔꨮꨭ ꨆꨮꨭ ꨟꩃ ꨀꨇꩆ ꨥꨮꩀ ꨆꨖ ꨘꩆ ꨆꨩ ꨌꨬ꩝ ꨆꨮꨭ ꨎꩃ ꨙꨯꩌ ꨤꩄ ꨆꨮꨭ ꨟꨰ ꨣꨥꨮꩃ ꨤꨪꨝꨪꩀ ꨗꨫ ꨆꨢꨶ ꨤꨚꨬ ꨡꨯꩍ ꨀꨗꩀ ꨌꨴꨪꩍ ꨨꨭꨩ ꨔꨰꩀ ꨝꨪꨓꨭꩀ ꨚꨵꨭꩍ ꨨꨤ ꨕꨫ ꨓꨕ꩞ ꨌꨬ ꨈꨙꨮꩃ ꨦꨗꩃ ꨈꨰꩅ ꨅꨩ꩝ ꨟꩃ ꨝꨵꨯꨱꩍ ꨚꨔꨮꨭ ꨆꨮꨭ ꨧꨩ ꨈꨴꨭꩀ ꨝꨴꩃ: “ꨀꨗꩀ ꨤꨮꩈ꩝ ꨌꨬ ꨁꨗꨪꨄ ꨟꨗꨶꨪꩋ ꨚꨎꨮꨩ꩝ ꨕꨯꨱꩃ ꨌꨬ ꨨꨰ!” ꨛꨯꨮ ꨆꨶꩆ: ꨝꨳꩀ ꨤꩄ꩝ ꨀꨗꩀ ꨌꨴꨪꩍ ꨘꩆ ꨅꨩ ꨒꨮꩇ ꨕꨯꨱꩀ ꨕꨤꩌ ꨤꨚꨬ꩝ ꨟꨪꩆ ꨨꨗꨕꩉ ꨀꨗꩀ ꨟꨪꩆ꩞ ꨀꨗꩀ ꨡꨯꩍ ꨐꨭꨩ ꨓꨭꩀ ꨀꨗꩀ ꨕꨯꨱꩀ ꨐꨭꩀ ꨎꨤꩌ ꨀꨳ꩝ ꨀꨗꩀ ꨌꨴꨪꩍ ꨗꨫ ꨐꨭꨩ ꨓꨔꨰꩍ ꨀꨆꨯꨱꩀ ꨦꨗꩃ꩝ ꨐꨭꨩ ꨎꨴꩍ ꨨꨗꨕꩉ ꨟꨗꨶꨪꩋ ꨟꨢꩍ ꨐꨭꨩ ꨓꨆꨴꨲ꩞ ꨆꨮꨭ ꨟꩃ ꨆꨵꨮꩆ ꨖꨮꩆ: “ꨌꨬ꩝ ꨨꨝꩉ ꨌꨬ ꨔꨮꨭ ꨣꨤꨯꨩ ꨤꨯꨩ!” ꨛꨯꨮ ꨆꨶꩆ: ꨧꨩ ꨔꨭꩆ ꨕꨤꨮꨭ ꨨꨭꨩ ꨧꨩ ꨝꨯꨱꩍ ꨨꨕꩍ ꨎꨊꨰꩍ ꨕꨯꨱꩀ ꨕꨫ ꨤꨊꨫꩀ ꨤꨰꩀ ꨓꨴꨭꩆ ꨤꨪꨝꨪꩀ ꨌꨬ꩝ ꨕꨤꩌ ꨝꨯꨱꩍ ꨨꨭꨩ ꨀꨗꩀ ꨌꨴꨪꩍ꩝ ꨐꨭꨩ ꨓꨔꨰꩍ ꨀꨆꨯꨱꩀ ꨦꨗꩃ ꨌꨬ꩝ ꨚꨙꩉ ꨌꨬ ꨚꨈꨤꨭꩂ ꨀꨝꨯꨱꩍ ꨘꩆ ꨓꨟꨩ ꨕꨤꩌ ꨕꨗꨯꨱ꩝ ꨝꨵꨯꨱꩍ ꨝꨯꨱꩍ ꨘꩆ ꨣꨤꨰ꩝ ꨀꨗꩀ ꨌꨴꨪꩍ ꨢꨮꨩ ꨕꨯꨱꩀ ꨆꨙꩇ ꨕꨤꩌ ꨕꨗꨯꨱ꩞ ꨐꨭꨩ ꨧꨯꨱꩃ ꨌꨬ ꨚꨔꨮꨭ ꨈꨮꩇ ꨓꨚꨩ ꨦꨗꩃ ꨟꨪꩆ ꨅꩍ ꨙꨯꩌ ꨓꨝꨳꩀ ꨧꩇ꩝ ꨨꨰꩈ ꨧꨯꨱꩃ ꨈꨮꩇ ꨤꩄ꩝ ꨆꨵꨮꨭ ꨝꨪꨤꩆ ꨓꩀ ꨧꨩ ꨕꨴꨬ ꨚꨝꨰꩈ ꨆꨩ ꨐꨭꨩ ꨡꨮꩃ꩝ ꨓꨮꩊ ꨐꨭꨩ ꨝꨴꨬ ꨆꨩ ꨌꨬ ꨟꨕ ꨈꨗꨭꩇ ꨆꨢꨶ ꨓꨔꨰꩍ ꨓꨶꨬ ꨟꨰ ꨚꩀ ꨆꨶꩆ ꨗꨫ꩞ ꨓꨶꨬ ꨝꨳꨯꨮꩉ ꨣꨬ ꨎꩃ ꨟꨢꨯꨱꩌ ꨆꨢ ꨡꨮꩃ ꨝꨪꨊꨪ ꨣꨤꨯꨩ꩝ ꨝꨢꩉ ꨎꨳꨯꨮꩆ ꨚꨴꨯꨱꩃ ꨓꨊꨪꩆ꩝ ꨧꨯꨱꩃ ꨀꨇꩆ ꨥꨮꩀ ꨆꨶꩆ ꨗꨫ ꨆꨩ ꨀꨕꨬ ꨦꨄꨰ ꨟꨪꩀ ꨥ ꨐꨭꨩ꩞ ꨀꨝꨪꩍ ꨆꨢꨶ ꨀꨗꩀ ꨌꨴꨪꩍ ꨓꨔꨰꩍ ꨀꨆꨯꨱꩀ ꨦꨗꩃ ꨟꨪꩆ꩞ ꨟꩃ ꨧꨩ ꨡꨮꩃ ꨀꨳ ꨧꨶ ꨝꨪꨣꨭꨥ ꨝꨵꨯꨱꩍ꩝ ꨀꨳ ꨕꨮꩇ ꨀꨝꨪꩍ ꨆꨶꩆ꩝ ꨀꨗꩀ ꨌꨴꨪꩍ ꨎꩃ ꨓꨶꨬ ꨀꨳ ꨗꨯꨱ ꨓꨮꩊ ꨕꨗꨯꨱ ꨘꩆ꩞ ꨌꨬ ꨔꨮꨭ ꨆꨢꨶ ꨡꨯꩍ ꨜꨭꩆ ꨟꨤꨮꨭ ꨅꩍ ꨚꨪꩀ ꨨꨤ ꨔꨯꨱꩍ ꨔꩉ ꨥꨮꩀ꩞ ꨧꨩ ꨡꨮꩃ ꨀꨗꩀ ꨌꨴꨪꩍ ꨓꨔꨰꩍ ꨀꨆꨯꨱꩀ ꨦꨗꩃ꩝ ꨐꨭꨩ ꨚꨎꩍ ꨧꨩ ꨚꨮꩌ ꨃꨗꨮꨎꨪ ꨜꨭꩆ ꨟꨤꨮꨭ ꨡꨯꩍ ꨨꨭꨩ ꨘꩆ ꨚꨪꩀ ꨨꨤ꩞ ꨟꨯꨱꩃ ꨜꨭꩆ ꨟꨤꨮꨭ ꨕꨯꨱꩀ ꨚꨮꩍ ꨨꨤꨩ꩝ ꨆꨮꨭ ꨙꨯꩌ: ꨌꨬ ꨤꨮꩈ꩝ ꨕꨴꨬ ꨨꨝꩉ ꨌꨆꩀ ꨐꨭꨩ꩝ ꨘꩆ ꨅꨩ ꨐꨭꨩ ꨚꨟꨓꨰ ꨟꨗꨶꨪꩋ ꨥꨮꩀ꩞ ꨌꨬ: ꨀꨗꩀ ꨗꨫ ꨐꨭꨩ ꨀꨇꨪꩆ ꨀꩉ ꨔꩀ꩝ ꨕꨴꨬ ꨨꨝꩉ ꨋꩀ ꨆꨩ ꨀꨳ ꨔꨭ꩝ ꨘꩆ ꨆꨩ ꨟꩃ ꨐꨭꨩ ꨀꨝꨪꩍ ꨚꨴꨲꩆ꩝ ꨝꨵꨯꨱꩍ ꨟꩀ ꨡꨴꨮꩌ ꨌꨭꩍ ꨐꨭꨩ꩞ ꨆꨮꨭ: ꨨꨝꩉ ꨋꩇ ꨆꨩ ꨀꨳ ꨔꨭ ꨟꨢꩍ ꨐꨭꨩ ꨓꨔꨰꩍ ꨀꨆꨯꨱꩀ ꨦꨗꩃ ꨕꨴꨬ? ꨛꨯꨮ ꨆꨶꩆ: ꨎꨶꨰ ꨨꨶꨮꩄ! ꨅꩃ ꨓꨟꨩ ꨕꨤꩌ ꨧꩃ꩝ ꨟꩀ ꨓꨝꨳꩀ ꨧꨩ ꨡꨰꩀ ꨓꨯꨱꨥ꩝ ꨚꨢꨯꨮꩉ ꨆꨩ ꨆꨮꨭ ꨝꨵꨯꨱꩍ ꨙꨯꩌ ꨤꩄ: ꨌꨬ ꨕꨮꩇ ꨗꨯꨱ ꨈꨴꨮꩇ ꨗꨈꩉ꩝ ꨓꨚꨩ ꨣꨤꨯꨩ ꨡꨮꩃ ꨤꨡꩃ꩝ ꨟꩃ ꨕꨶꩍ ꨡꨯꩍ ꨓꨯꨱꨥ ꨗꨫ꩞ ꨓꨯꨱꨥ ꨗꨫ ꨋꩀ ꨕꨫ ꨝꨎꨳꨮꩂ ꨌꨴꨪꩍ꩝ ꨚꨎꩍ ꨓꨝꨳꩀ ꨧꨩ ꨃꨗꨮꨎꨪ ꨧꨯꨱꩍ ꨔꨰꩀ ꨓꨈꩉ ꨈꨤꩄ ꨃꨗꨮꨎꨪ ꨙꨶꨮꩄ ꨓꨝꨳꩀ ꨕꨫ ꨀꨗꩀ ꨌꨴꨪꩍ꩞ ꨟꨢꩍ ꨝꨩ ꨓꨯꨱꨥ ꨗꨫ ꨕꨤꩌ ꨣꨭꩇ꩝ ꨀꨗꩀ ꨕꨯꨮꩍ ꨐꨭꨩ ꨕꨫ ꨓꨔꨰꩍ ꨀꨆꨯꨱꩀ ꨦꨗꩃ ꨕꨴꨬ ꨨꨭꨩ ꨅꨩ꩞ ꨌꨬ ꨋꩀ ꨣꨤꨯꨩ ꨡꨮꩃ ꨚꨎꨮꨩ꩝ ꨓꨭꩀ ꨡꨯꩍ ꨜꨭꩆ ꨟꨤꨮꨭ ꨚꨪꩀ ꨨꨤꨩ꩝ ꨌꨬ ꨕꨯꨱꩀ ꨇꨪꩀ ꨨꨭꨩ ꨀꨆꨯꨱꩀ ꨦꨗꩃ ꨕꨴꨬ꩞ ꨛꨯꨮ ꨆꨶꩆ ꨙꨯꩌ ꨥꨮꩀ: ꨀꨗꩀ ꨘꩆ ꨐꨭꨩ ꨔꨮꨭ ꨌꨬ ꨘꩆ ꨌꨬ ꨋꩀ ꨈꨴꨭꩀ ꨗꨫ ꨕꨫ ꨨꨭꨩ ꨅꨩ꩝ ꨘꩆ ꨚꨕꨯꨱꩃ ꨆꨟꨮꨭꩆ꩞ ꨟꨪꩆ ꨆꨟꨮꨭꩆ ꨨꨕꩉ ꨐꩀ꩝ ꨗꨯꨱ ꨧꨩ ꨕꨴꨬ ꨟꨰꩀ꩝ ꨟꨢꩍ ꨝꨩ ꨓꨶꨬ ꨣꨤꨯꨩ ꨂꨣꩃ ꨨꨗꨴꨯꨱꩀ ꨆꨩ ꨂꨣꩃ ꨧꨯꨱꩃ ꨆꩆ ꨚꨟꨓꨰ ꨐꨭꨩ ꨥꨮꩀ꩝ ꨆꨢꨶ ꨐꨭꨩ ꨓꨔꨰꩍ ꨨꨭꨩ ꨀꨆꨯꨱꩀ ꨦꨗꩃ꩞ ꨆꨮꨭ ꨚꨮꩃ ꨆꨖ꩝ ꨕꨤꨮꨭ ꨓꨝꨳꩀ ꨕꨫ ꨆꨶꩆ꩝ ꨆꨮꨭ ꨓꨐꨫ ꨀꨋꩆ ꨌꨬ꩞ ꨅꩃ: ꨌꨬ ꨋꩆ ꨧꨩ ꨣꨯꨱꩃ ꨆꨮꨭ: ꨛꨯꨮ꩝ ꨧꨤꩌ ꨌꨬ ꨧꨩ ꨣꨯꨱꩃ꩝ ꨕꨨꨵꩀ ꨋꩆ ꨎꨩ ꨥ꩝ ꨟꨢꩍ ꨕꨯꨱꩀ ꨨꨕꨳꨪꩇ꩝ ꨢꨮꨩ ꨟꨰ ꨣꨥꨮꩃ ꨌꨬ ꨥꨮꩀ! ꨝꨳꨯꨮꩉ ꨨꨣꨬ ꨚꨈꨭꩍ꩝ ꨆꨮꨭ ꨣꨟꨪꩀ ꨆꨢ ꨀꨓꨯꨱꩃ꩝ ꨠꩄ ꨆꨓꨭꩂ ꨀꨳ ꨝꩀ ꨟꨐꩀ꩝ ꨓꨯꨱꨥ ꨚꨳꨮꩍ ꨕꨤꩌ ꨀꨯꨱ ꨧꨯꨱꩃ ꨡꨴꨮꩌ ꨝꨪꨣꨭꨥ ꨝꨵꨬ꩞ ꨆꨮꨭ ꨌꨰꩀ ꨓꨆꨚꨭꩂ ꨀꨤ ꨕꨗꨯꨱ꩝ ꨆꨓꨭꩂ ꨀꨳ ꨧꨩ ꨕꨟꨭꩀ ꨟꨪꩆ ꨠꩄ ꨓꨢꩍ꩞ ꨎꨪꩅ ꨟꩀ! ꨀꨝꨪꨤꨯꨮꩍ ꨋꩀ ꨓꨢꩍ ꨓꨆꨚꨭꩂ ꨚꨎꨮꨩ꩝ ꨅꨩ ꨆꨓꨭꩂ ꨀꨳ ꨨꨭꨩ ꨥꨮꩀ꩝ ꨓꨆꨚꨭꩂ ꨤꨶꨰ ꨋꩀ ꨝꨴꨭꩀ꩞ ꨟꨯꨱꩃ ꨀꨳꨮꩀ ꨜꨭꩆ ꨟꨤꨮꨭ꩝ ꨡꨯꩍ ꨐꨭꨩ ꨚꨪꩀ ꨨꨤ ꨈꨤꩄ꩝ ꨀꨝꨪꨤꨯꨮꩍ ꨕꨯꨱꩀ ꨓꨔꨰꩍ ꨦꨗꩃ ꨚꨎꨮꨩ꩞ ꨨꨟꨪꩅ ꨚꨗꨶꨮꩄ ꨕꨤꩌ ꨀꨆꨯꨱꩀ: “ꨟꨰ ꨓꨟꨩ ꨟꨰꩀ꩝ ꨓꨟꨩ ꨟꨗꨬ ꨕꨤꩌ ꨕꨗꨯꨱ ꨗꨫ꩝ ꨚꩀ ꨗꨫ ꨝꨶꨬ ꨤꨯ꩝ ꨠꩅ ꨤꨯ!”꩞ ꨟꨪꩆ ꨨꨭꨩ ꨓꨯꨱꨥ ꨘꩆ ꨆꨮꨭ ꨕꨯꨱꩀ ꨇꨪꩀ ꨦꨗꩃ ꨕꨴꨬ꩝ ꨟꨪꩆ ꨆꨮꨭ ꨟꨋꩀ ꨢꨮꨭ ꨆꨮꨭ ꨒꨮꩇ ꨨꨤꨮꩇ ꨟꨓ꩝ ꨢꩌ ꨓꨆꨰ ꨓꨟꨩ ꨕꨗꨯꨱ꩝ ꨆꨵꩀ ꨡꨴꨮꩌ ꨓꨴꨭꩆ ꨀꨤ ꨨꨤꨭꩀ꩞ ꨧꩇ ꨚꨗꨶꨮꩄ ꨨꨟꨪꩅ ꨥꨮꩀ: “ꨆꨮꨭ ꨟꨰ ꨟꩃ ꨕꨫ ꨁꨥꨣꨯꨚꨩꨩ꩝ ꨈꨪꨤꨰ ꨟꨗꨯꨱꩀ ꨆꨮꨭ ꨓꨢꩍ ꨘꩆ ꨆꨮꨭ ꨆꨙꩇ ꨚꨗꩊ ꨚꩀ ꨗꨫ꩝ ꨆꨢ ꨡꨮꩃ ꨚꩀ ꨗꨫ ꨝꨪꨊꨪ ꨝꨳꩀ! ꨀꨢꨭꩅ ꨓꨟꨩ ꨟꨰ ꨡꨮꩃ ꨧꨯꨱꩃ ꨆꨮꨭ ꨐꩀ”꩞ ꨓꨆꨰ ꨆꨮꨭ ꨝꨪꨣꨭꨥ ꨈꨯꨱꩀ ꨀꨳ꩝ ꨀꨳ ꨨꨮꩇ ꨆꨮꨭ ꨤꨰꩀ ꨓꨭꩀ ꨟꨓꨰ ꨨꨕꨳꨪꩇ꩝ ꨀꨳ ꨝꨪꨣꨭꨥ ꨕꨮꩇ ꨓꨮꩊ ꨆꨰꩃ꩝ ꨕꨤꩌ ꨀꨆꨯꨱꩀ ꨨꨟꨪꩅ ꨧꩇ ꨆꨵꨯꨱ ꨀꨝꨪꨤꨯꨮꩍ꩝ ꨐꨭꨩ ꨤꨶꨰ ꨕꨴꩍ ꨟꨰ꩝ ꨆꨌꨥ ꨓꨆꨰ ꨆꨮꨭ꩝ ꨒꨮꩇ ꨓꨭꩀ ꨘꩆ꩝ ꨆꨮꨭ ꨟꩀ ꨀꨝꨪꩍ ꨚꨴꨲꩆ ꨢꨥ꩝ ꨆꨵꨮꩇ ꨓꨯꨱꨥ ꨈꨵꨭꩅ ꨓꨚꨩ ꨀꨆꨯꨱꩀ ꨐꨭꨩ꩞ ꨐꨭꨩ ꨚꨴꨯꨮꨥ꩝ ꨟꨣꩅ ꨤꨶꨰ ꨥꨮꩀ ꨀꨦꨪꩅ ꨓꨴ ꨟꩃ ꨚꨕꨮꩌ꩞ ꨀꨓꨭꨥ ꨐꨭꨩ ꨣꨤꨰ ꨓꨟꨩ ꨀꨳ꩝ ꨤꨰꩀ ꨓꨴꨭꩆ ꨧꨩ ꨀꨆꨯꨱꩀ ꨟꨗꨶꨪꩋ ꨚꨴꨶꨮꩄ ꨐꨭꨩ ꨅꨩ ꨆꨩ ꨝꨴꨰ ꨀꨝꨪꩍ꩞ ꨚꨟꨓꨰ ꨀꨝꨪꨤꨯꨮꩍ ꨝꨵꨯꨱꩍ꩝ ꨆꨮꨭ ꨀꨶꨮꩆ ꨣꨤꨯꨩ꩝ ꨟꨪꩆ ꨅꩍ ꨔꨮꨭ ꨙꨯꩌ ꨧꨯꨱꩃ ꨔꨬ꩞ ꨆꨤꩌ ꨘꩆ ꨆꨮꨭ ꨙꨪꩀ ꨣꨕꨰꩍ ꨓꨚꨩ ꨈꨵꨰ ꨌꨮꩀ ꨗꨯꨱ ꨚꩀ ꨧꩃ ꨌꨬ ꨧꨩ ꨣꨯꨱꩃ꩞ ꨆꨮꨭ ꨀꨶꨮꩆ ꨙꨯꩌ: “ꨌꨬ ꨤꨮꩈ꩝ ꨕꨨꨵꩀ ꨋꩀ ꨆꨵꨯꨱꩍ ꨈꨴꨭꩀ ꨚꨎꨮꨩ꩝ ꨕꨨꨵꩀ ꨕꨯꨱꩀ ꨨꨕꨳꨪꩇ ꨆꨯꨱꨥ!” ꨧꨩ ꨣꨯꨱꩃ: “ꨝꨳꩀ ꨉꨮꩍ ꨆꨟꨮꨭꩆ ꨤꨮꩈ! ꨆꨟꨮꨭꩆ ꨕꨯꨱꩃ ꨨꨭꨩ ꨝꨳꩀ ꨣꨤꨯꨩ ꨣꨰ ꨚꨎꨮꨩ ꨐꩀ”꩞ ꨟꨤꩌ ꨗꨫ ꨨꨝꩉ ꨟꨐꨭꩌ ꨆꨩ ꨟꨝꨭꩀ ꨅꩍ! ꨝꨵꨯꨱꩍ ꨆꨮꨭ ꨧꨯꨱꩃ ꨌꨬ ꨧꨩ ꨣꨰꩃ ꨟꨐꨭꩌ ꨝꨳꩀ ꨣꨤꨯꨩ ꨡꨳꨮ꩝ ꨟꨝꨭꩀ ꨓꨯꨮꨤꨝꨰꩈ꩝ ꨅꨩ ꨕꨮꩃ ꨆꨎꩇ ꨥꨮꩀ꩝ ꨘꩆ ꨙꨪꩍ ꨕꨫ ꨊꨯꨱꩀ ꨚꨝꩆ ꨟꨐꨭꩌ꩞ ꨕꨤꨮꨭ ꨚꨪꩀ ꨟꨓ ꨙꨪꩍ꩝ ꨆꨮꨭ ꨟꩃ ꨡꨯꩍ꩟ ꨨꨕꨯꩌ ꨜꨭꩆ ꨟꨤꨮꨭ꩝ ꨐꨭꨩ ꨚꨪꩀ ꨨꨤ ꨥꨮꩀ꩞