ꨔꨭꩆ ꨕꨶꨩ ꨚꨵꨭꩍ ꨔꨭꩆ꩝ꨎ ꨓꨝꨭꨩ ꨆꨵꩀ ꨚꨤꨬ ꨚꩀ ꨛꨮꨩꨕꨭꨣꩃꨈ ꨚꨳꨮꩍ ꨓꨟꨩ ꨝꨰꨈꨯꩉ꩞ ꨟꨪꩆ ꨝꨩ ꨓꨶꨬ ꨓꨯꩀ ꨧ ꨝꨯꩍ ꨡꨤꨯꨩ ꨤꨪꨚꨪꩍ ꨧꨯꨱꩃ ꨆꨵꨮꨭ ꨣꨪꨓꨭꩍ ꨣꨝꨭꨥ ꨎꨳꨯꨮꩆ ꨀꨟꨰꩀ ꨝꨴꨬ꩞ ꨓꨭꩀ ꨘꩆ꩝ ꨀꨟꨰꩀ ꨙꨯꩌ ꨤꩄ: “ꨅꩍ ꨌꨯꨱꩃ ꨆꨩ ꨀꨗꩀ ꨎꨳꩀ ꨎꨳꨮꩂ ꨟꨪꩆ ꨌꨯꨱꩃ ꨆꨩ ꨀꨗꩀ ꨧꨳꩌ ꨓꨳꩆ ꨟꨪꩆ꩝ ꨀꨟꨰꩀ ꨝꨶꨬ ꨚꨎꨮ”꩞ꨓꨭꩀ ꨘꩆ꩝ ꨎ ꨓꨝꨭꨩ ꨅꩍ ꨦꨗꩂ ꨡꨯꩍ ꨣꨤꨯꨩ꩝ ꨗꨯꨱ ꨓꨮꩊ ꨤꨝꨪꩀ ꨝꨰꨈꨯꩉ ꨆꨩ ꨟꩂ ꨔꨮꨭ꩝ ꨕꨯꨱꩀ ꨕꨫ ꨆꨴꨲꩍ ꨝꨳꩀ ꨣꨤꨯꨩ ꨠꨗꨭꩋ ꨧꨯꨱꩃ ꨣꨕꨰꩍ꩝ ꨎ ꨓꨝꨭꨩ ꨟꩂ ꨔꨮꨭ ꨚꨗꨶꨮꩄ ꨀꨟꨰꩀ ꨢꨮꨭ ꨤꨋꩉ ꨀꨦꨪꩅ ꨕꨤꩌ ꨓꨳꩆ꩞ ꨈꨴꨭꩀ ꨨꨤꨬ ꨎ ꨓꨝꨭꨩ ꨎꩃ ꨋꩇ꩞ ꨛꨯꩀ ꨆꨢꨩ꩝ ꨙꨶꨮꩄ ꨝꩆ꩝ ꨇꨪꩀ ꨣꨕꨰꩍ꩝ ꨦꨪꨚꨮꨩ꩟ ꨈꨴꨭꩀ ꨨꨆꨵꨮ ꨎꩃ ꨚꨳꨮꩍ ꨕꨶꩍ ꨡꨮꩃ ꨓꨚꨩ ꨨꨣꨬ ꨟꨪꩆ꩞ ꨢꨮꨭ ꨣꩈ ꨔꨮꩀ ꨡꨮꩀ ꨎ ꨓꨝꨭꨩ꩞ ꨨꨭꨩ ꨨꨕꨯꩌ ꨨꨣꨬ ꨋꩇ ꨓꨝꨳꩀ ꩑ – ꩒ ꨓꨭꩀ ꨚꨈꨯꨮꨩ꩝ ꨎ ꨓꨝꨭꨩ ꨎꨶꩀ ꨣꨕꨰꩍ ꨔꨶꨰ ꨎꨤꩆ ꨕꨯꨱꩀ ꨀꨦꨪꩅ ꨨꨤꨩ ꨤꨰꩀ ꨟꨪꩆ꩞ ꨐꨭꨩ ꨦꨗꩂ: “ꨕꨴꨬ ꨕꨯꨱꩀ ꨗꨯꨱ ꨓꨯꨱ? ꨨꨕꨬ ꨨꨣꨬ ꨕꨴꨬ ꨕꨯꨱꩀ ꨋꩇ ꨨꨈꨰꩅ ꨕꨫ ꨕꨤꩌ ꨝꩊ ꨅꩍ ꨨꨭꨩ ꨨꨝꨳꨯꨮꩉ ꨙꨪꩍ ꨗꨫ?” ꨧꨩ ꨡꨮꩃ ꨕꨯꨱꩀ ꨗꨯꨱ ꨎꨥ ꨆꨢꨩ꩝ ꨎ ꨓꨝꨭꨩ ꨈꨯꨱꩀ ꨀꨈꨥ ꨒꨶꨮꩊ ꨟꨪꩆ꩞ ꨣꨕꨰꩍ ꨎꨯꨱꩍ ꨝꨵꨯꨱꩍ ꨅꩍ ꨎꨥ ꨆꨢꨩ ꨆꨩ ꨒꨮꩇ ꨓꨭꩀ꩞ ꨐꨭꨩ ꨦꨗꩂ ꨤꩄ ꨛꨯꨮ ꨧꩃ ꨓꨳꩇ ꨈꨴꨭꩀ ꨕꨴꨬ ꨢꨮꨩ꩝ ꨟꨪꩆ ꨛꨯꨮ ꨆꨶꩆ ꨙꨯꩌ ꨀꨦꨪꩅ ꨟꨪꩆ: “ꨨꨭꨩ ꨨꨈꨰꩅ ꨅꨩ꩝ ꨟꨢꩍ ꨕꨴꨬ ꨅꩍ ꨆꨵꩊ ꨤꨶꨰꨩ꩞ ꨝꨰꨈꨯꩉ ꨆꩆ ꨣꨤꨯꨩ꩝ ꨟꨪꩆ ꨐꨭꨩ ꨅꩍ ꨏꩀ ꨕꨫ ꨠꨗꨭꩋ ꨇꨫꩂ ꨚꨕꨮꩃ ꨓꨈꨯꩀ”꩞ ꨚꨗꨶꨮꩄ ꨘꩆ ꨢꨮꨭ ꨚꨳꨮꩍ ꨟꨐꩀ ꨨꨕꩍ ꨕꨤꩌ ꨕꨭꩀ ꨦꨭꩇ꩞ ꨠꨤꩌ ꨘꩆ꩝ ꨎ ꨓꨝꨭꨩ ꨕꨯꨱꩀ ꨕꨫ ꨝꨮꩆ ꨟꨁꨪꩆ ꨢꨩ ꨙꨪꩆ꩝ ꨕꨯꨱꩀ ꨟꨯꨱꩃ ꨣꨕꨰꩍ ꨙꨶꨮꩄ ꨢꨮꨭ ꨀꨳꨩ ꨨꨕꩍ꩞ ꨟꩂ ꨦꨗꩂ ꨡꨯꩍ: ꨝꨰꨈꨯꩉ ꨅꩍ ꨒꨮꩇ ꨤꩄ ꨧꨩ ꨤꨪꨝꨪꩀ ꨚꨳꨮꩍ ꨕꨶꩍ ꨡꨮꩃ ꨓꨚꨩ ꨨꨣꨬ꩝ ꨟꨪꩆ ꨧꨩ ꨤꨪꨝꨪꩀ ꨚꨳꨮꩍ ꨤꨯꨱꩃ ꨤꩄ ꨨꨓꨰꨩ ꨕꨴꨬ ꨨꨭꨩ ꨤꩄ ꨇꨮꩃ ꨆꨕꨮꩃ꩝ ꨨꨭꨩ ꨤꩄ ꨇꨮꩃ ꨀꨆꨯꨱꩀ꩝ ꨨꨭꨩ ꨔꨮꨭ ꨕꨶꩍ ꨎꨤꩆ ꨗꨯꨱ ꨨꨤꨬ ꨔꨯꨱꩍ꩞ ꨦꨗꩂ ꨢꨮꨭ ꨘꩆ꩝ ꨎ ꨓꨝꨭꨩ ꨠꨣꩅ ꨗꨯꨱ ꨝꩄ ꨧꨩ ꨈꨴꨭꩀ꩞ ꨨꨣꨬ ꨋꩇ ꨦꨪꨚꨮꨩ ꨙꨶꨮꩄ ꨗꨯꨱ ꨎꨥ ꨆꨢꨩ꩝ ꨠꨤꩌ ꨕꨯꨱꩀ ꨕꨫ ꨧꩃ ꨕꨶꩍ ꨈꨪꨤꨯꨱꩃ ꨚꨟꩀ ꨜꨯꨩꩆ ꨡꨵꩍ ꨕꨫ ꨆꨩꨤꨪꩇ ꨀꨊꨯꨱꩀ ꨢꨮꨩꨥ ꨓꨭꩇ꩞ ꨨꨭꨩ ꨠꨤꩌ ꨐꨭꨩ ꨟꨕꨮꩍ ꨓꨝꨳꩀ ꩓ ꨓꨭꩀ ꨚꨈꨯꨮꨩ ꨕꨶꩍ ꨚꨟꩍ ꨥꨮꩀ ꨕꨫ ꨨꨕꨯꩌ ꨜꨯꨩꩆ ꨆꨵꩀ ꨐꨭꨩ ꨤꨪꨆꨮꨭ ꨕꨫ ꨨꨕꨯꩌ ꨆꨶꩆ ꨝꨴꨬ ꨆꨢꨩ ꨆꨵꩀ꩞ ꨧꨩ ꨡꨮꩃ ꨕꨤꨮꨭ ꨀꨝꨪꩍ ꨚꨟꩀ ꨥꨮꩀ ꨨꨭꨩ꩝ ꨜꨯꨩꩆ ꨨꨕꩍ ꨥꨮꩀ꩝ ꨐꨭꨩ ꨆꨵꨯꨱ ꨝꨳꩀ ꨝꨶꨬ – ꨢꨮꨭ ꨤꩄ ꨚꨳꨮꩍ ꨝꨡꨮꩃ ꨓꨚꨩ ꨣꩈ ꨥꨆꩆ꩞ ꩓ ꨔꨭꩆ ꨓꨚꨩ꩝ ꨎ ꨓꨝꨭꨩ ꨚꨮꩍ ꨨꨭꨩ ꨧ ꨆꨶꩆ ꨚꨟꩀ ꨜꨯꨩꩆ ꨀꨦꨪꩅ ꨕꨤꩌ ꨈꨪꨤꨯꨱꩃ ꨀꨦꨪꩅ ꨚꩀ ꨈꨯꨱꩀ ꨥꨮꩇ꩞ ꨆꨶꩆ ꨨꨕꨯꩌ ꨟꨯꨮꩅ ꨚꩀ ꨟꨓ ꨟꨪꩆ ꨧꨩ ꨣꩈ ꨀꨦꨪꩅ ꨘꩆ ꨐꨭꨩ ꨥꨮꩀ ꨋꩇ ꨓꨈꨯꩀ ꨨꨭꨩ꩞ ꨤꨪꨥꨪꩀ ꨨꨭꨩ ꨓꨶꨰꨩ ꨓꨐꨪ: “ꨀꨕꨬ ꨋꩇ ꨈꨴꨭꩀ ꨗꨫ ꨤꨪꨥꨪꩀ ꨚꨎꨮ?”꩝ ꨎ ꨓꨝꨭꨩ ꨆꨵꨯꨱ ꨟꨪꩆ ꨙꨯꩌ: “ꨛꨯꨮ꩝ ꨟꩂ ꨨꨣꨬ ꨕꨨꨵꩀ ꨝꨣꨭꨥ ꨔꨮꨭ ꨤꩄ ꨅꩍ ꨔꨬ ꨥꨮꩀ ꨕꨴꨬ ꨓꨚꨩ ꨕꨴꨬ”꩞ ꨝꨰꨈꨯꩉ ꨤꨎꩃ ꨕꨯꨱꩀ ꨣꨯꩆ ꨔꨴꨫꩂ꩝ ꨕꨯꨱꩀ ꨚꨙꨳꩀ꩝ ꨕꨯꨱꩀ ꨆꩆ꩞ ꨟꨪꩆ ꨂꨣꩀ ꨗꨫ꩝ ꨆꨴꨲꩍ ꨣꨤꨯꨩ ꨠꨗꨭꩋ ꨗꨯꨱ ꨟꨰ꩝ ꨎ ꨓꨝꨭꨩ ꨅꩍ ꨒꨮꩇ ꨧꨩ ꨧꨣꩃ ꨔꨮꩀ ꨡꨮꩀ ꨥꨮꩀ ꨅꨩ꩞ ꨐꨭꨩ ꨘꩆ ꨧ ꨝꨪꨗꩍ ꨀꨦꨪꩅ ꨕꨫ ꨟꨕꨪꩆ ꨗꨫ – ꨀꨦꨪꩅ ꨟꨪꩆ꩝ ꨚꨳꨮꩍ ꨔꨮꨭ ꨀꨗꨰꩍ ꨕꨴꨬ꩝ ꨎꩃ ꨈꨴꩇ ꨚꨴꨯꨱꩃ ꨚꨳꨮꩍ ꨕꨮꩃ ꨆꨎꩇ꩞