ꨌꩌ ꨤꩄ ꨧꨩ ꨕꨤꩌ ꨤꨪꨟꨩ ꨚꨵꨭꩍ ꨚꩀ ꨚꨣꩆ ꨀꨕꨬ ꨦꨄꨰ ꨨꨭꨩ ꨞꨳꩆ ꨁꨤꨪꨟꨯꨩ ꨝꨳꩀ ꨟꨞꩀ꩞ ꨕꨯꩌ ꨂꨣꩃ ꨘꩆ ꨕꨯꨱꩀ ꨚꨓꨶꨬ ꨕꨯꩌ ꨗꨈꩉ ꨆꨴꨲꩍ ꨧꨯꨱꩃ ꨈꩍ ꨀꨈꨴꨪꩍ ꨕꨫ ꨝꨳꨮꩅ ꨘꩌ꩝ ꨂꨣꩀ ꨗꨫ ꨨꨭꨩ ꨚ ꨣꨞꨩ ꨎꩃ ꨕꨶꨩ ꨌꨘꩍ꩝ ꨟꨗꩂ ꨕꨯꨱꩀ ꨚꩀ ꨕꨯꩌ ꨗꨈꩉ ꨡꨪꩆ ꨔꨶꩆ꩝ ꨗꨫꩆ ꨔꨶꩆ ꨆꨵꩀ ( ꨂꨣꩀ ꨗꨫ ꨤꩄ ꨇꩆ ꨨꨶꨩ ꨧꨯꨱꩃ ꨤꩌ ꨙꨯꩂ) ꨓꨶꨬ ꨀꨈꨠꨩ ꨀꨨꨳꨮꩉ꩝ ꨝꨪꨘꩍ ꨕꨯꨱꩀ ꨥꨮꩀ ꨚꩀ ꨕꨯꩌ ꨗꨈꩉ ꨢꨮꨩ ꨓꩈ ꨗꨫꩆ꩝ ꨙꨯꩂ ꨗꨰ ꨧꨯꨱꩃ ꨀꩆ ꨢꩃ ꨓꨶꨬ ꨀꨈꨠꨩ ꨁꨧꨵꩌ꩞ ꨗꨯꨱ ꨓꩊ ꨕꨯꩌ ꨚꨤꨬ ꨌꩌ ꨕꨫ ꨕꨯꩌ ꨨꨣꨬ ꨣꨪꨎꨩ ꨣꨯꨢꨩ|: ꨆꨓꨮ꩝ ꨣꨟꨥꩆ꩝ ꨣꨠꨙꩆ ꩟ꨂꨣꩃ ꨓꨶꨬ ꨟꨕꨩ ꨚꨍꨴꨫꩍ ꨓꨶꨬ ꨆꨢꨶꨩ ꨝꨴꨭꩀ ꨇꨪꩍ ꨟꨓꨩ ꨆꨣꨬ ꨌꨴꨪꩍ ꨟꩃ ꨕꨯꩌ ꨝꨵꩍ ꨇꩆ ꨀꨥ ( ꨀꨊꨶꨬ ꨌꨭꩀ) ꨟꩃ ꨆꩆ ꩞ ꨆꨖꨩ ꨥꩀ ꨀꨤꨩ ꨗꨫ ꩝ ꨕꨨꨵꩀ ꨇꩆ ꨆꨩ ꨇꩆ ꨀꨥ ( ꨀꨊꨶꨬ ꨌꨭꩀ) ꨟꩃ ꨆꩆ ꨕꨫ ꨂꨣꩃ ꨌꩌ ꨓꨶꨬ ꨀꨈꨠꨩ ꨀꨨꨳꨮꩉ ꨚꩀ ꨗꨈꩉ ꨇꩆ ꨨꨶꨩ꩞ ꨅꩍ ꨨꨕꩍ ꨡꨵꩅ ꨢꨮꨩ ꨕꨯꩌ ꨝꨵꩍ ꨇꩆ ꨀꨥ ( ꨀꨊꨶꨬ ꨌꨭꩀ ) ꨟꩃꨆꩆ ꨕꨫ ꨤꨪꨟꨩ ꨚꨵꨭꩍ ꨚꩀ ꨀꨕꨬ ꨦꨄꨰ ꨚꨣꩆ ꨆꨣꨬ ꩝ ꨇꩆ ꨀꨥ ꨚꨣꩆ ꨌꩌ ꨝꨩ ꨟꨰ ꨝꨴꨭꩀ ꨈꨪꨙꨶꩀ ( ꨔꨪꩉ) ꩝ ꨔꨰꩀ ꨔꨯꨱꩀ ꨧꨯꨱꩃ ꨝꨳꩀ ꨉꨮꩍ ꨟꨓꨩ ꩞ ꨀꨝꨪꩍ ꨕꨫ ꨐꨭꨩ ꨘꩆ ꨤꩄ ꩝ ꨝꨴꨭꩀ ꨆꨣꨬ ꨌꨴꨪꩍ ꨕꨫ ꨇꩆ ꨀꨥ ꨚꨣꩆ ꨎꨲꩃ ꨨꨭꨩ ꨂꨣꩃ ꨌꩌ ꨚꨣꨞꨩ ꨎꨤꩃ ( ꨌꨡꨰꩍ) ꨕꨤꩌ ꨞꩇ ꨝꨪꨗꨫ ꨟꩃ ꨕꨨꨵꨮꨭ ꨖꨳꩍ ꨟꨰ ꨗꨫ ꩝ ꨘꩆ ꨤꩄ : ꨂꨣꩃ ꨨꨤꨮꨭ ꨎꨗꩃ ꩝ ꨂꨣꩃ ꨤꨪꨆꨬ ꨧꨯꨱꩃ ꨂꨣꩃ ꨆꨭꨟꨬ ꨎꨮꩃ ꨨꨭꨩ ꨇꩆ ꨀꨥ ꨆꨣꨬ ꨕꨫ ꨈꨮꨭꩀ ꩞ ꨇꩆ ꨀꨥ ꨂꨣꩃ ꨨꨤꨮꨭ ꨎꨗꩃ ꨨꨭꨩ ꨡꨯꩍ ꨣꨪꨤꨯꨩ ꨤꩄ ꨝꩉ ꨡꨯꩆ (ꨆꨯꨱꩀ) ꩞ ꨀꨊꨯꨱꩀ ꨆꨯꨱꩀ ꨨꨭꨩ ꨓꨶꩀ ꨦꨯꨃꩀ ( ꨓꨑꩀ) ꨨꨭꨩ ꨙꨶꩄ ꨟꨴꨰ ꨎꨪꩍ ꨕꨨꨵꩍ ꨧꨯꨱꩃ ꨝꩀ ꨆꨕꨭꩃ ꨚꨳꩍ ꨚꨣꨞꨩ ꨚꨆꩅ ꨋꩀ ꨝꨴꨭꩀ ꩞ ꨂꨣꩃ ꨤꨪꨆꨬ ꨎꨲꩃ ꨢꨮꨭ ꨘꩆ ꩝ ꨇꩆ ꨀꨥ ꨝꨳꩀ ꨓꨆꨪꩀ ꨝꨪꨊꨭꨩ ꨤꨩ ꨣꨪꨤꨯꨩ ꨕꨭꩀ ꨧꨯꨱꩃ ꨂꨣꩃ ꨆꨭꨟꨬ ꩝ ꨢꨯꨱꩀ ꨨꨣꨬ ꨕꨯꩌ ꨂꨣꩃ ꨘꩆ ꨒꨮꨭꩀ ꨌꨭꩀ ꨨꨝꩊ ꨎꨲꩃ ꨨꨭꨩ ꨈꨴꨳꨮꩍ ꨢꨮꨭ ꨂꨣꩃ ꨢꨶꨮꩆ ꩝ ꨕꨯꩌ ꨨꨣꨬ ꨆꨣꨬ ꨚꨴꨯꨱꩃ ꨟꨕꨩ ꨤꩄ ꨀꨥ ꨧꨳꨮꨩ ꨥꨪꩆ ꩝ ꨓꨜꨩ ꨓꩈ ꨎꨲꩃ ꨢꨮꨭ ꨆꨩꨆꨪ ꩞ ꨟꨪꩆ ꨕꨫ ꨕꨯꩌ ꨨꨣꨬ ꨣꨪꨎꨩ ꨣꨯꨢꨩ ꨤꩄ ꨂꨣꩃ ꨤꨪꨆꨬ ꨝꨳꩀ ꨀꨳꨮꩀ ꨚꨴꨯꨱꩃ ꨝꨴꨭꩀ ꨚꨪꨤꨪꩍ ꨣꨶꩍ ꨇꩆ ꨀꨥ ꨕꨫ ꨚꨣꩆ ꨕꨴꨬ ꩞ ꨂꨣꩃ ꨘꩆ ꨒꨮꨭꩀ ꨌꨭꩀ ꨀꨥ ꨌꩌ ꨀꨤꨩ ꨓꨆꨰ ꨆꩀ ꨇꩆ ꨚꨵꩍ ꨟꨐꨪꩌ ꩞ ꨇꩆ ꨚꨵꩍ ꨨꨭꨩ ꨋꩀ ꨎꨲꩃ ꨧꨩ ( ꨔꨩ) ꨝꨵꩍ ꨇꩆ ꨝꨰ ꨀꨓꩍ ꩝ ꨕꨶꨩ ꨈꩍ ꨓꨚꨰꩃ ꨨꨭꨩ ꨟꨐꨪꩌ ꨎꨪꩍ ꨕꨨꨵꩍ ꨧꨯꨱꩃ ꨝꨪꨊꨭꨩ ꨤꨩ ꨟꨮꩃꨆꩆ ꨚꨝꩀ ꨓꨟ ꨆꨁꨪꩂ ꨚꨤꨯꨱ ꨓꩍ ꨓꨴꨭꩆ ꨓꩊ ꨆꨭꩀ ꨓꨆꨰ ꩞ ꨇꩆ ꨀꨥ ꨂꨣꩃ ꨤꨪꨆꨬ ꨨꨭꨩ ꨝꩉ ꨡꨯꩆ ( ꨆꨯꨱꩀ) ꨤꩄ ꨣꨪꨤꨯꨩ ꨀꨝꨪꩍ ꩞ ꨂꨣꩃ ꨌꩌ ꨓꨆꨴꨲꨩ ꨕꨯꩌ ꨚꨆꩇ ꨇꩆ ꨀꨥ ꨣꨪꨤꨯꨩ ꨝꩉ ꩝ ꨂꨣꩃ ꨤꨪꨆꨬ ꨤꩄ ꨓꨯꩀ ꨝꩉ ꨡꨯꩆ ( ꨆꨯꨱꩀ) ꨟꨪꩆ ꨂꨣꩃ ꨆꨭꨟꨬ ꨒꨮꨭꩀ ꨤꩄ ꨇꩆ ꨀꨥ ꨝꨪꨊꨭꨩ ꨟꩃ ꨝꩉ : ꨨꨪꨎꨯꨱꨥ ꨞꨯꩆ ꨆꨐꨪꩀ ꨓꩊ ꨕꨯꩌ ꨝꩉ ꨨꨝꨮꨭ … ꨇꩆ ꨀꨥ ꨕꨫ ꨂꨣꩃ ꨌꩌ ꨕꨨꨵꨮꨭ ꨖꨳꩍ ꨋꩀ ꨟꩃ ꨇꩆ ꨝꨰ ꨚꨓꨰꩍ ꨤꨫ ꨂꨥ ꩝ ꨚꨮꩍ ꨓꨝꨳꩀ ꨟꨮꩃ ꨝꨴꨭꩀ ( ꨕꨗꨯꨱꩀ) ꨌꨣꨰ ( ꨟꩃꨆꩆ) ꨕꨫ ꨚꨣꩆ ꨗꨫ ꩞ ꨟꨪꩆ ꩝ ꨂꨣꩀ ꨗꨫ ꨂꨣꩃ ꨚꨙꩉ ꨣꨪꨤꨯꨩ ꨇꩆ ꨝꨰ ꨕꨭꩀ ꨧꨯꨱꩃ ꨕꨨꨵꨮꨭ ꨖꨳꩍ ꨚꨳꩍ ꨨꨭꨩ ꨣꨪꨤꨯꨩ ꨝꩉ ꨎꨲꩃ ꨢꨮꨭ ꨔꨴꩇ ꨈꩇ ꨧꨯꨱꩃ ꨆꨕꨭꩃ ꨎꨳꨮꩆ ꨕꨫ ꨢꨯꨱꩀ ꨂꨣꩃ ꩞ ꨟꨪꩆ ꩝ ꨢꨯꨱꩌ ꨤꩄ ꨇꩆ ꨝꨰ ꨨꨈꨰꩅ ꨤꩄ ꨂꨣꩃ ꨌꩌ ꨓꨭꩀ ꨨꨤꨬ ꨎꨲꩃ ꨌꨰꩀ ꨝꨴꨭꩀ ꨓꨗꨫ ꨓꨘꩅ ꨓꨈꨯꩀ ꨀꨊꨯꨱꩀ ꨀꨝꨪꩍ ꩞ ꨇꩆ ꨀꨥ ꨟꩃꨆꩆ ( ꨌꨣꨰ) ꨕꨫ ꨂꨣꩃ ꨆꨭꨟꨬ ꨌꩌ ꨤꩄ ꨕꨯꩌ ꨝꨵꩍ ꨀꨥ ꨀꨓꩍ ( ꨀꨥ ꨓꨧꨰꩈ ꩝ ꨀꨥ ꨖꨰ) ꨣꨪꨤꨯꨩ ꨝꩉ ꩞ ꨘꩆ ꨤꩄ ꨕꨯꩌ ꨝꨵꩍ ꨀꨥ ꨛꨯꨩꩀ ꨓꨈꨯꩀ ꨝꨴꨭꩀ ꨔꨪꩉ ꩝ ꨔꨰꩀ ꨔꨯꨱꩀ ꨕꨫ ꨂꨣꩃ ꨆꨭꨟꨬ ꩞ ꨕꨯꩌ ꨂꨣꩃ ꨗꨫ ꨟꨯꨱꩃ ꨀꨥ ꨀꨖꨰ ꨤꩄ ꨧꨩ ꨆꨢꨩ ꨈꨪꨣꨳꨮꩍ ꨕꨫ ꨂꨣꩃ ꨆꨭꨟꨬ ꩝ ꨧꨯꨱꩃ ꨒꨮꨭꩀ ꨌꨭꩀ ꨕꨤꩌ ꨕꨯꩌ ꨨꨣꨬ ꨣꨪꨎꨩ ꨣꨯꨢꨩ ꨚꨴꨯꨱꩃ ꨕꨫ ꨚꨣꩆ ꨕꨴꨬ ꨎꨲꩃ ꨢꨮꨭ ꨨꨣꨬ ꨡꩃ ꨙꩌ ꨟꨐꨭꩌ ( ꨤꨪꨇꩍ) ꩝ ꨡꩃ ꨀꨨꩉ … ꨀꨥ ꨀꨖꨰ ꨕꨫ ꨂꨣꩃ ꨆꨭꨟꨬ ꨌꩌ ꨨꨭꨩ: ꨀꨥ ꨓꨏꨰꩈ ꩝ ꨇꩆ ꩝ ꨓꨤꨬ ꨚꨝꩀ ꨧꨩ ꨈꩍ ꩝ ꨓꨤꨬ ꨆꨩ ꨁꩂ ꩝ ꨆꨑꩀ ꨟꨩ ꨅꩌ ꨧꨯꨱꩃ ꨅꩍ ꨨꨭꨩ ꨥꩊ ꨕꨯꩌ ꨎꨗꨪꩍ ꨐꨭꩀ ꨌꨭꩀ ꨡꨵꩅ ꨡꨵꩅ ꩞ ꨀꨥ ꨀꨖꨰ ꨅꩍ ꨨꨭꨩ ꨏꨪꩀ ꨤꩍ ꨝꨵꨯꨱꩍ ꨏꨪꩀ ꨔꨪꩉ ꩞ ꨀꨥ ꨨꨭꨩ ꨌꨭꩀ ꨟꩃ ꨝꨭꩍ ꨕꨶꨩ ꨓꨊꨪꩆ ꨕꨨꨵꨮꨭ ꨟꩃ ꨤꨯꨱꩀ ꨀꨆꨯꨱꩀ ꨓꨟꨩ ꨝꨵꨯꨱꩍ ꨆꨓꨭꩃ ꨣꨭꩇ ꨓꨴꨭꩆ ꨓꩊ ꨤꨪ ꨂꩀ ꩞ ꨓꨆꨯꩈ ꨀꨥ ꨨꨭꨩ ꨆꨆꩀ ꨕꨤꩌ ꨓꨶꨬ ꨔꨰꩀ ꨅꨥꩆ ꩞ ꨌꨘꩍ ꨓꨆꨰ ꨀꨥ ꨒꨮꨭꩀ ꨏꨪꩀ ꨨꨝꩊ ꨆꨩ ꨈꩇ ꨚꨳꩍ ꨢꨯꨱꩀ ꨢꩌ ꨗꨯꨱ ꨕꨫ ꨂꨣꩃ ꨆꨭꨟꨬ ꨟꨯꨱꩃ ꨨꨭꨩ ꨐꨭꩆ ꨐꩄ ꨧꨯꨱꩃ ꨉꨮꩍ ꨀꨝꨪꩍ ꩞ ꨓꨤꨬ ꨆꨝꩀ ꨆꨩ ꨁꩂ ꨟꨐꨪꩌ ꨓꨭꩀ ꨨꨤꨬ ꨎꨲꩃ ꨗꨯꩀ ꨉꨮꩍ ꨆꨩ ꨇꩆ ꨀꨥ ꨌꩌ ꩞ ꨓꨤꨬ ꨆꨩ ꨁꩂ ꨨꨭꨩ ꨟꨐꨪꩌ ꨣꨪꨤꨯꨩ ꨝꨪꨊꨭꨩ ꨤꨩ ꨉꨮꩍ ꩝ ꨨꨭꨩ ꨟꨐꨪꩌ ꨟꩃ ꨓꨊꨪꩆ ꨕꨫ ꨕꨯꩌ ꨣꨟꨐꨪꩌ ꨕꨫ ꨚꨤꨬ ꨎꨪꩍ ꨕꨨꨵꩍ ꨌꨆꨵꨰꩃ ꩞ ꨕꨤꩌ ꨡꩃ ꨊꨶꨬ ꨢꨯꨱꩀ ꨨꨣꨬ ꨞꨳꩆ ꨤꩄ ꨂꨣꩃ ꨌꩌ ꨓꨯꩀ ꨌꨭꩀ ꨀꨥ ꨇꩆ ꨝꨰ ꨧꨯꨱꩃ ꨇꩉ ꨨꨭꨩ ꨏꨪꩀ ꨝꨵꨯꨱꩍ ꨚꨝꨵꨬ ꨕꨫ ꨡꨵꩃ ꨕꨣꩀ ꩞ ꨟꨕꨩ ꨡꨯꩍ ꩝ ꨁꨤꨪꨟꨯꨩ ꨌꩌ ꨚꨩ ꨍꨴꨮꩍ ꨓꨶꨰ ꨕꨟꨶꨰ ꨀꨓꩍ ꨎꨰꩀ ꨨꨤꨬ ꨗꩆ ꨎꨮꩃ ꨆꨢꨶꨩ ꨕꨯꩌ ꨎꨗꨪꩍ ꨉꨮꩍ ꨕꨫ ꨝꨵꩍ ꨀꨥ ꨀꨖꨰ ꨚꨡꨶꩀ ꨚꨈꩌ ꨧꨯꨱꩃ ꨀꨗꩀ ꨟꨗꨶꩄ ꨕꨯꨱꩀ ꨕꩃ ꨓꨚꩀ ꩝ ꨉꨳꨮꩍ ꨉꩃ ꨧꨯꨱꩃ ꨕꨯꩌ ꨂꨣꩃ ꨆꨭꨟꨬ ꨕꨣꨩ ꨧꨳꩌ ꨝꨪꨗꨰ ꩞