꩜ ꨗꨫ ꨕꨤꨭꨆꩊ ꨕꨶ ꨨꨕꨳꨪꩇ ꨚꨧꩃ ꨅꩃ ꨘꩆ ꨧꨯꨱꩃ ꨟꨭꩀ ꨘꩆ ꨝꨳꩀ ꨟꨕ ꨟꩍ ꨚꨣꨳꩀ ꩝ ꨝꨵꨯꨱꩍ ꨕꨶ ꨨꨕꨳꨪꩇ ꨚꨧꩃ ꨅꩃ ꨟꨭꩀ ꨘꩆ ꨛꨩꨎꨳꨮꩃ ꨨꨭ ꨕꨶ ꨂꨣꩃ ꨀꨗꩀ ꨤꨆꨬ ꩞ ꨝꨣꨮꨭ ꨟꩃ ꨕꨶ ꨨꨕꨳꨪꩇ ꨚꨧꩃ ꨅꩃ ꨟꨭꩀ ꨘꩆ ꨟꨓꨰ ꨝꨵꨯꨱꩍ ꨎꨆꨕꨯꨱꩇ ꨀꨕꨬ ꨎꨆꨕꨮꩀ ꨝ ꨅꩃ ꨀꨟ ꨐꨭ ꨗꨯꨱ ꨕꩉ ꩝ ꨝꨵꨯꨱꩍ ꨎ ꨆꨕꨮꩀ ꨄꨰ ꨎꨆꨕꨯꨱꩇ ꨕꨯꨱꩀ ꨥꨮꩀ ꨕꨫ ꨧꩃ ꩝ ꨝꨵꨯꨱꩍ ꨐꨭ ꨟꩀ ꨕꨯꩌ ꨟꩍ ꨚꨣꨳꩀ ꨆꨴꨭꩃ ꨀꨟꨰꩀ ꨀꨟ ꨐꨭ ꨤꨶꨰ ꨥꨮꩀ ꨐꨭ ꨟꩀ ꨚꨕꨮꩇ ꨀꨝꨪꩍ꩞ ꨘꩆ ꨟꩃ ꨀꨕꨬ ꨐꨭ ꨟꨣꨰ ꨟꩃ ꨕꩉ ꨀꨟ ꨝꨵꨯꨱꩍ ꨀꨕꨬ ꨐꨭ ꨓꨐꨫ ꨐꨭ ꨤꩄ ꨟꩍ ꨚꨣꨳꩀ ꨆꨴꨭꩃ ꨀꨟꨰꩀ ꨀꨟ ꨌꨰꩀ ꨥꨮꩀ ꨄꨰ ꨟꩀ ꨚꨳꨮꩍ ꨚꩀ ꨨꨤꨬ ꨝꨵꨯꨱꩍ ꨅꩍ ꨡꨯꩍ ꨅ ꨄꨰ ? ꨝꨣꨮꨭ ꨟꩃ ꨄꨰ ꨐꨭ ꨤꩄ ꨕꨫ ꨔꨮꨭ ꨅ ꨤꨪꨎꩃ ꨀꨕꨬ ꨐꨭ ꨕꨫ ꨤꩄ ꨨꨝꩉ ꨅ ꨆꩄ ꨟꨪꩆ ꩞ ꨘꩆ ꨟꩃ ꨄꨰ ꨐꨭ ꨙꨯꩌ ꨥꨮꩀ ꨧꨯꨱꩃ ꨀꨕꨬ ꨐꨭ ꨤꩄ ꨂꨣꩀ ꨗꨫ ꨀꨟꨰꩀ ꨀꨟ ꨕꨴꨬ ꨟꨓꨰ ꨌꨰꩀ ꨥꨮꩀ ꨆ ꨕꨶ ꨀꨕꨬ ꨦꨄꨰ ꨕꨴꨬ ꨧ ꨝꨯꨱꩍ ꨧꩃ ꨗꨫ ꨎꨮ ꩝ ꨂꨣꩀ ꨗꨫ ꨆꨮꨭ ꨨꨭ ꨨꨕꨳꨪꩇ ꨤꨬ ꩝ ꨨꨲ ꨘꩆ ꨕꨯꨱꩀ ꨣꨗꨰꩍ ꩝ ꨂꨣꩀ ꨗꨫ ꨧꩃ ꨤꨶꨰ ꨆ ꨆꨮꨭ ꨕꨯꨱꩀ꩞ ꨄꨰ ꨐꨭ ꨙꨯꩌ ꨢꨮꨭ ꨘꩆ ꨧꨯꨱꩃ ꨀꨕꨬ ꨐꨭ ꩝ ꨘꩆ ꨟꩃ ꨄꨰ ꨐꨭ ꨝꨴꨬ ꨆ ꨐꨭ ꨧ ꨕꨴꨬ ꨀꨧꨮꨭ ꨧ ꨕꨴꨬ ꨟꨢꨯꨱ ꨧꨯꨱꩃ ꨧ ꨤꨝꨪꩀ ꨨꨟꨭ ꨆꨵꩀ ꨨꨶꨮꩃ ꨓꨴ ꩞ ꨨꨤꨬ ꨆꨭꨝꨥ ꨧꨯꨱꩃ ꨨꨟꨭ ꨧꨳꩌ ꨘꩆ ꨄꨰ ꨐꨭ ꨕꨫ ꨝꨴꨬ ꨆ ꨐꨭ ꨅ ꩝ ꨘꩆ ꨟꩃ ꨀꨕꨬ ꨐꨭ ꨦꨗꩃ ꨗꨯꨱ ꨟꨰ ꨕꨫ ꨨꨭ ꨨꨈꨰꩀ ꨆꨳꨮꩃ ꨤꨀꨶ ꨅ ꩞ ꨝꨣꨮꨭ ꨟꩃ ꨓꨮꩊ ꨝꨤꩆ ꨤꨀꨶ ꨕꨫ ꨨꨭ ꨨꨈꨰꩀ ꨆꨳꨮꩃ ꨤꨀꨶ ꨅ꩝ ꨝꨣꨮꨭ ꨟꩃ ꨐꨭ ꨟꩀ ꨧ ꨕꨴꨬ ꨀꨧꨮꨭ ꨧ ꨕꨴꨬ ꨟꨢꨯꨱ ꨆꨴꨭꩃ ꨄꨰ ꨐꨭ ꨝꨴꨬ ꨆ ꨐꨭ ꨝꨵꨯꨱꩍ ꨐꨭ ꨤꨀꨶ ꩝ ꨘꩆ ꨟꩃ ꨐꨭ ꨀꨓꨯꨱꩃ ꨟꨢꨯꨱ ꨝꨵꨯꨱꩍ ꨟꨢꨯꨱ ꨘꩆ ꨆꨟꨴꨯꨱ ꩝ ꨐꨭ ꨀꨓꨯꨱꩃ ꨀꨧꨮꨭ ꨝꨵꨯꨱꩍ ꨀꨧꨮꨭ ꨘꩆ ꨆꨟꨴꨯꨱ ꩞ ꨝꨣꨮꨭ ꨟꩃ ꨓꨤꨫ ꨕꨯꨱꩀ ꨓꨜꨳ ꨨꨟꨭ ꨘꩆ ꨡꨯꩍ ꨀꨧꨮꨭ ꨧꨯꨱꩃ ꨟꨢꨯꨱ ꨘꩆ ꨆꨟꨴꨯꨱ ꨝꨵꨯꨱꩍ ꨓꨤꨫ ꨘꩆ ꨆꨵꨯꨱ ꨨ ꨚꨝꩍ ꨨꨶꨮꩃ ꩞ ꨝꨣꨮꨭ ꨟꩃ ꨐꨭ ꨟꨯꨱꩃ ꨡꨯꩍ ꨟꩍ ꨕꨫ ꨕꨤꩌ ꨚꨝꩍ ꨓꨤꨫ ꨘꩆ ꩝ ꨝꨣꨮꨭ ꨟꩃ ꨐꨭ ꨤꨶꨰ ꨤꨋꩊ ꨧꨯꨱꩃ ꨀꨧꨮꨭ ꨧꨯꨱꩃ ꨟꨢꨯꨱ ꨓꩀ ꨘꩆ ꨝꨵꨯꨱꩍ ꨐꨭ ꨙꨶꨮꩄ ꨗꨯꨱ ꨕꨶꨯꩆ ꨟꩍ ꨘꩆ ꨝ ꨟꨣꨰ ꨧꩃ ꨝꨵꨯꨱꩍ ꨐꨭ ꨗꨯꨱ ꨃꨥ ꨣꨈꨬ ꨟꨣꨰ ꨋꩇ ꨧꩃ ꩝ ꨝꨵꨯꨱꩍ ꨐꨭ ꨝꨵꨬ ꨨꨟꨭ ꨀꨚꩍ ꨟꨗꨶꨪꩋ ꨝꨵꨬ ꨆꨭꨝꨥ ꨋꩇ ꨈꨗꨭꩇ ꨋꩇ ꨟꨕ ꨨꨮꩆ ꨕꨫ ꨨꨮꩆ ꨡꨶꩀ ꨕꨫ ꨡꨶꩀ ꨓꨚ ꨨꨮꩆ ꨕꨫ ꨨꨮꩆ ꨡꨶꩀ ꨕꨫ ꨡꨶꩀ ꨓꨚ ꨕꨫ ꨄꨰ ꨐꨭ ꩞ ꨝꨣꨮꨭ ꨟꩃ ꨐꨭ ꨝ ꨟꨰ ꨝꨵꨯꨱꩍ ꨐꨭ ꨋꩇ ꨟꨕ ꨋꩇ ꨈꨗꨭꩇ ꨣꨤꨯ ꨣꨤꨯ ꨘꩆ ꨟꩃ ꨄꨰ ꨐꨭ ꨓꨐꨫ ꨐꨭ ꩝ ꨤꩄ ꨀꨕꨬ ꨟꩀ ꨨꨈꨰꩀ ꨝꨵꨬ ꨨꨟꨭ ꨝꨵꨬ ꨆꨭꨝꨥ ꨀꨚꩍ ꨟꨗꨶꨪꩋ ꨂꨣꩃ ꨣꨤꨯ ꨢꨮꨭ ꨘꩆ ꩞ ꨝꨣꨮꨭ ꨟꩃ ꨀꨕꨬ ꨐꨭ ꨤꩄ ꨥꨮꩀ ꨤꩄ ꨓꩀ ꨕꨫ ꨆꩊ ꨘꩆ ꨕꨨꨵꩀ ꨟꩀ ꨀꨧꨮꨭ ꨧꨯꨱꩃ ꨟꨢꨯꨱ ꨆꨴꨭꩃ ꨄꨰ ꨝꨴꨬ ꨆ ꨕꨨꨵꩀ ꨘꩆ ꨝꨵꨯꨱꩍ ꨕꨨꨵꩀ ꨤꨀꨶ ꨝꨵꨯꨱꩍ ꨕꨨꨵꩀ ꨀꨓꨯꨱꩃ ꨟꨢꨯꨱ ꨧꨯꨱꩃ ꨀꨧꨮꨭ ꨘꩆ ꩝ ꨝꨵꨯꨱꩍ ꨟꨢꨯꨱ ꨧꨯꨱꩃ ꨀꨧꨮꨭ ꨘꩆ ꨆꨟꨴꨯꨱ ꩝ ꨝꨣꨮꨭ ꨟꩃ ꨓꨤꨫ ꨘꩆ ꨆꨵꨯꨱ ꨝꨵꨯꨱꩍ ꨓꨤꨫ ꨘꩆ ꨨ ꨚꨝꩍ ꨆꨵꨯꨱ ꨝꨵꨯꨱꩍ ꨕꨨꨵꩀ ꨟꨯꨱꩃ ꨡꨯꩍ ꨟꩍ ꨕꨫ ꨕꨤꩌ ꨚꨝꩍ ꨓꨤꨫ ꨘꩆ ꨝꨵꨯꨱꩍ ꨕꨨꨵꩀ ꨕꨶꨯꩆ ꨝ ꨟꨰ ꩝ ꨝꨵꨯꨱꩍ ꨕꨨꨵꩀ ꨝꨵꨬ ꨨꨟꨭ ꨝꨵꨬ ꨆꨭꨝꨥ ꨀꨚꩍ ꨟꨗꨶꨪꩋ ꨘꩆ ꩞ ꨘꩆ ꨟꩃ ꨄꨰ ꨐꨭ ꨤꩄ ꨨꨝꩉ ꨝꨵꨯꨱꩍ ꨨꨲ ꨅ ꨙꨶꨮꩄ ꨟꨰ ꨃꨥ ꨆꨮꨭ ꨗꨯꨱ ꨕꨶꨯꩆ ꨨꨰ ꨅ ? ꨀꨕꨬ ꨐꨭ ꨤꩄ ꨀꨓꩍ ꨕꨫ ꨧꩃ ꨄꨰ ꨤꨯ ꨕꨨꨵꩀ ꨙꨶꨮꩄ ꨟꨰ ꨃꨥ ꨄꨰ ꨕꨫ ꨧꨭꨟꨭ ꨅ ꩞ ꨝꨣꨮꨭ ꨟꩃ ꨄꨰ ꨐꨭ ꨈꨗꨯꨱꩃ ꨕꨫ ꨀꨕꨬ ꨐꨭ ꩝ ꨝꨵꨯꨱꩍ ꨐꨭ ꨟꩀ ꨟꨢꨯꨱ ꨧꨯꨱꩃ ꨀꨧꨮꨭ ꨕꨫ ꨀꨕꨬ ꨐꨭ ꨥꨮꩀ꩝ ꨝꨵꨯꨱꩍ ꨀꨕꨬ ꨐꨭ ꨨꨳ ꨟꨪꩆ ꨀꨕꨬ ꨐꨭ ꨕꨫ ꨚꨶꨮꩄ ꨨꨝꩉ ꨅ ꩞ ꨘꩆ ꨟꩃ ꨄꨰ ꨐꨭ ꨗꨯꨱ ꨀꨚꩍ ꨣꨕꨰꩍ ꨆꨭꨝꨥ ꨧ ꨚꨵꨭꩍ ꨔꨴꨭꩍ ꨣꨕꨰꩍ ꨝ ꨗꨯꨱ ꨌꨰꩀ ꨚꩀ ꨓꨤꨫ ꨘꩆ꩝ ꨛꨩꨝꨵꨯꨱꩍ ꨌꨈ ꨚꨳꨮꩍ ꨚꨎꨳꨮꩃ ꨟꩍ ꨧꨯꨱꩃ ꨚꨣꨳꩀ ꨕꨫ ꨓꨤꨫ ꨘꩆ ꩞ ꨘꩆ ꨟꩃ ꨄꨰ ꨐꨭ ꨝ ꨀꨧꨮꨭ ꨧꨯꨱꩃ ꨟꨢꨯꨱ ꨗꨯꨱ ꨤꨀꨶ ꩝ ꨛꨯꨩꩀ ꨝ ꨈꨮꩌ ꨨꨕꨳꨪꩇ ꨐꨭ ꨗꨯꨱ ꨨꨝꨪꩀ ꩞ ꨝꨣꨮꨭ ꨟꩃ ꨐꨭ ꨤꨀꨶ ꨝꨵꨯꨱꩍ ꨐꨭ ꨀꨓꨯꨱꩃ ꨀꨧꨮꨭ ꨧꨯꨱꩃ ꨟꨢꨯꨱ ꨝꨵꨯꨱꩍ ꨀꨧꨮꨭ ꨧꨯꨱꩃ ꨟꨢꨯꨱ ꨘꩆ ꨆꨟꨴꨯꨱ꩝ ꨝꨣꨮꨭ ꨟꩃ ꨓꨤꨫ ꨘꩆ ꨆꨵꨯꨱ ꨝꨵꨯꨱꩍ ꨨ ꨚꨝꩍ꩝ ꨝꨣꨮꨭ ꨟꩃ ꨐꨭ ꨟꨯꨱꩃ ꨡꨯꩍ ꨟꩍ ꨕꨤꩌ ꨚꨝꩍ ꨓꨤꨫ ꨘꩆ꩝ ꨝꨵꨯꨱꩍ ꨐꨭ ꨗꨯꨱ ꨟꩀ ꩞ ꨝꨣꨮꨭ ꨟꩃ ꨐꨭ ꨚꨓꨴꨯꨱꨥ ꨓꨊꨪꩆ ꨗꨯꨱ ꨟꩀ ꨟꩍ ꨕꨫ ꨕꨤꩌ ꨚꨝꩍ ꨓꨤꨫ ꨘꩆ ꩝ ꨝꨣꨮꨭ ꨟꩃ ꨓꨤꨫ ꨘꩆ ꨚꨆꨴꨭꩇ ꨚꨝꩍ ꨥꨮꩀ ꨝꨵꨯꨱꩍ ꨈꩊ ꨓꨊꨪꩆ ꨐꨭ ꨕꨫ ꨚꨝꩍ ꨓꨤꨫ ꨘꩆ ꨓꨥꩀ ꨥꨮꩀ ꨕꨯꨱꩀ꩞ ꨐꨭ ꨆꨳꨮꩃ ꨔꨶꩀ ꨓꨊꨪꩆ ꨐꨭ ꨓꨝꨳꩀ ꨥꨮꩀ ꨕꨫ ꨨꨭ ꨓꨴ ꨅ ꩝ ꨝꨣꨮꨭ ꨟꩃ ꨦꨗꩃ ꨗꨯꨱ ꨟꨰ ꨝꨵꨯꨱꩍ ꨐꨭ ꨚꨙꩉ ꨨꨕꨳꨪꩇ ꨐꨭ ꨝ ꨡꨯꨱꩀ ꨟꨰ ꨆ ꨐꨭ ꨌꨭꩌ ꩝ ꨝꨵꨯꨱꩍ ꨐꨭ ꨤꩄ ꨧꨯꨱꩃ ꨨꨕꨳꨪꩇ ꨐꨭ ꨤꩄ ꨟꨢꩍ ꨆꨮꨭ ꨟꨓꨰ ꨟꨪꩆ ꨨꨲ ꨝꨴꨬ ꨡꨯꨱꩀ ꨨꨲ ꨆ ꨆꨮꨭ ꨌꨭꩌ ꨧ ꨨꨦꨪꩅ ꨝꨰꩀ ꩞ ꨝꨣꨮꨭ ꨟꩃ ꨨꨕꨳꨪꩇ ꨐꨭ ꨝꨴꨬ ꨡꨯꨱꩀ ꨆ ꨐꨭ ꨌꨭꩌ ꩝ ꨝꨵꨯꨱꩍ ꨓꨤꨫ ꨘꩆ ꨡꨯꩍ ꨐꨭ ꨌꨭꩌ ꨨꨕꨳꨪꩇ ꨐꨭ ꩝ ꨝꨵꨯꨱꩍ ꨓꨤꨫ ꨘꩆ ꨆꨵꨯꨱ ꩝ ꨝꨣꨮꨭ ꨟꩃ ꨐꨭ ꨨꨙꨯꨱꩍ ꨓꨊꨪꩆ ꨐꨭ ꨓꨝꨳꩀ ꨥꨮꩀ ꨨꨭ ꩞ ꨝꨣꨮꨭ ꨟꩃ ꨐꨭ ꨥꨮꩀ ꨟꨣꨰ ꨧꩃ ꨝꨵꨯꨱꩍ ꨐꨭ ꨀꨓꨯꨱꩃ ꨀꨕꨬ ꨐꨭ ꩝ ꨐꨭ ꨤꩄ ꨀꨕꨬ ꨐꨭ ꨚꨶꨮꩄ ꨚꨈꩄ ꨐꨭ ꩟