ꨗꨫ ꨓꩇ ꨕꨫ ꨆꩊ ꨘꩆ ꨂꨣꩃ ꨀꨕꨬ ꨘꩆ ꨗꨯꨱ ꨋꩇ ꨀꨚꨭꩍ ꨚꨤꨩ ꨓꨊꨮꩈ ꨕꨫ ꨕꨤꩌ ꨈꨵꨰ ꨝꨣꨭꨥ ꨟꩃ ꨓꨊꨮꩈ ꨘꩆ ꨎꨯꨮꩃ ꨙꨯꨱꨥ ꨆꨩ ꨎꨰꩀ ꨧꨪ ꨓꨨꨩ꩝ ꨝꨣꨭꨥ ꨟꩃ ꨂꨣꩃ ꨀꨕꨬ ꨘꩆ ꨗꨯꨱ ꨋꩇ ꨔꨩ ꨝꨯꨱꩍ ꨓꨯꩃ ꨙꨪꩍ ꨇꨪꩀ ꨀꨚꨭꩍ ꨓꨊꨮꩈ ꨘꩆ꩝ ꨨꨤꨬ ꨂꨣꩃ ꨘꩆ ꨝꨳꩀ ꨇꨮꩃ ꨕꨫ ꨙꨪꩍ꩝ ꨝꨣꨭꨥ ꨧꨪ ꨌꨰꩀ ꨣꨭꩇ ꨓꨴꨭꩆ ꨕꨫ ꨊꨯꨱꩀ ꨌꨳꨮꨥ ꨘꩆ ꨙꨪꩍ ꨋꩇ ꨢꨥ ꨂꨣꩃ ꨟꨓꨰ꩝ ꨝꨣꨭꨥ ꨟꩃ ꨨꨣꨬ ꨘꩆ ꨆꨴꨩ ꨖꨮꩆ ꨗꨯꨱ ꨕꨶꩍ ꨡꨮꩃ ꨝꨯꩍ ꨆꨢꨭꨥ꩝ ꨝꨣꨭꨥ ꨟꩃ ꨆꨴꨩ ꨖꨮꩆ ꨡꨯꩍ ꨀꨚꨭꩍ ꨓꨊꨮꩈ ꨘꩆ ꨝꨳꩀ ꨧꨳꩌ ꨧꨯꨱꩃ ꨡꨯꩍ ꨂꨣꩃ ꨘꩆ ꨕꨯꨱꩀ ꨙꨪꩍ ꨕꨫ ꨊꨯꨱꩀ ꨓꨯꩃ꩝ ꨝꨣꨭꨥ ꨟꩃ ꨆꨴꨩ ꨖꨮꩆ ꨙꨶꨮꩄ ꨗꨯꨱ ꨃꨥ ꨈꨮꩇ ꨐꨭꨩ ꨟꨰ꩝ ꨝꨣꨥ ꨟꩃ ꨆꨴꨩ ꨖꨮꩆ ꨘꩆ ꨐꨭꨩ ꨙꨯꩌ ꨧꨯꨱꩃ ꨈꨮꩇ ꨐꨭꨩ ꨤꩄ ꨕꨨꨵꩀ ꨗꨯꨱ ꨡꨯꩍ ꨂꨣꩃ ꨨꨤꨬ ꨀꨮ ꨚꨤꨩ ꨧꨩ ꨀꨚꨭꩍ ꨓꨊꨮꩈ ꨚꩀ ꨘꩆ ꨝꨵꨯꨱꩍ ꨓꨊꨮꩈ ꨘꩆ ꨓꨨꨩ ꨚꨎꨮ꩝ ꨝꨵꨯꨱꩍ ꨕꨨꨵꩀ ꨡꨯꩍ ꨨꨭꨩ ꨧꨩ ꨂꨣꩃ ꨟꨓꨰ ꨕꨫ ꨊꨯꨱꩀ ꨓꨯꩃ ꨘꩆ ꨟꨪꩆ ꨕꨨꨵꩀ ꨕꨫ ꨔꨮꨭ ꨂꨣꩃ ꨨꨤꨬ ꨟꨓꨰ ꨘꩆ ꨅꨩ꩝ ꨛꨯꨮ ꨓꨊꨮꩈ ꨘꩆ ꨅꨩ ꨔꨥ꩝ ꨨꨰ ꨤꩄ ꨂꨣꩃ ꨚꨣꩅ ꨤꨪꨎꩃ ꨕꨨꨵꩀ ꨅꨩ ꨔꨭꨥ ꨣꨬ꩝ ꨝꨣꨥ ꨟꩃ ꨆꨴꨩ ꨖꨮꩆ ꨝꨩ ꨈꨮꩇ ꨗꨯꨱ ꨧꨪ ꨡꨮꩃ ꨓꨊꨮꩈ ꨘꩆ ꨙꩃ ꨧꨩ ꨕꨚꨶꨮꩊ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨘꩆ ꨗꨯꨱ ꨀꨳꨮꩀ ꨡꨯꩍ ꨝꨳꩀ ꨢꨭꨥ ꨘꩆ꩝ ꨝꨣꨥ ꨟꩃ ꨕꨯꩌ ꨕꨚꨶꨮꩊ ꨆꨴꨩ ꨖꨮꩆ ꨘꩆ ꨝꨳꨪ ꨈꨮꩇ ꨤꩄ ꨀꨣꩀ ꨗꨫ ꨌꨆꨯꩃ ꨂꨣꩃ ꨟꨓꨰ ꨗꨫ ꨝꨩ ꨗꨯꨱ ꨕꩉ ꨆꨩ ꨝꨵꨯꨱꩍ ꨟꨰ ꨥꨮꩀ ꨡꨮꩃ ꨓꨊꨮꩈ ꨗꨫ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨘꩆ ꨤꩄ ꨒꨮꩇ꩝ ꨝꨣꨥ ꨟꩃ ꨕꨯꩌ ꨕꨚꨶꨮꩊ ꨆꨴꨩ ꨖꨮꩆ ꨘꩆ ꨌꨆꨯꩃ ꨂꨣꩃ ꨟꨓꨰ ꨘꩆ ꨝꨩ ꨗꨯꨱ ꨨꨭꨩ ꨠꨓꨲꩍ ꨎꨤꩆ꩝ ꨝꨣꨥ ꨟꩃ ꨆꨴꨩ ꨖꨮꩆ ꨘꩆ ꨝꨳꨪ ꨈꨮꩇ ꨤꩄ ꨀꨣꩀ ꨗꨫ ꨝꨩ ꨂꨣꩃ ꨗꨫ ꨗꨯꨱ ꨕꩉ ꨚꩀ ꨊꨯꨱꩀ ꨌꨮꩀ ꨝꨔꨬ ꨨꨰ ꨌꨮꩀ ꨚꨣꨳꩀ꩝ ꨨꨰ ꨤꩄ ꨌꨮꩀ ꨟꩍ꩝ ꨝꨣꨥ ꨟꩃ ꨕꨯꩌ ꨕꨚꨶꨮꩊ ꨆꨴꨩ ꨖꨮꩆ꩝ ꨘꩆ ꨝꨳꨪ ꨥꨮꩀ ꨤꩄ ꨀꨣꩀ ꨗꨫ ꨝꨩ ꨗꨯꨱ ꨕꩉ ꨚꩀ ꨊꨯꨱꩀ ꨌꨮꩀ ꨟꩍ ꨝꨰꩀ ꨓꨯꩀ ꨧꨳꩌ꩝ ꨝꨣꨥ ꨟꩃ ꨧꨩ ꨕꨚꨶꨮꩊ ꨆꨴꨩ ꨖꨮꩆ ꨘꩆ꩝ ꨌꨆꨯꩃ ꨂꨣꩃ ꨘꩆ ꨝꨩ ꨗꨯꨱ ꨓꨚꩀ ꨌꨮꩀ ꨟꩍ꩝ ꨌꨮꩀ ꨘꩆ ꨕꨫ ꨨꨭꨩ ꨂꨣꩃ ꨨꨤꨬ ꨡꨯꩍ ꨅꨩ ꨝꨣꨥ ꨟꩃ ꨧꨩ ꨕꨚꨶꨮꩊ ꨆꨴꨩ ꨖꨮꩆ ꨘꩆ ꨌꨆꨯꩃ ꨂꨣꩃ ꨘꩆ ꨗꨯꨱ ꨓꩊ ꨌꨮꩀ ꨟꩍ꩝ ꨝꨣꨥ ꨟꩃ ꨧꨩ ꨕꨚꨶꨮꩊ ꨆꨴꨩ ꨖꨮꩆ ꨘꩆ ꨎꩀ ꨈꨮꩇ ꨐꨭꨩ ꨟꨰ ꨣꨤꨯꨩ ꨤꨝꩃ ꨝꨵꨯꨱꩍ ꨕꩉ ꨂꨣꩃ ꨘꩆ꩝ ꨝꨣꨥ ꨟꩃ ꨆꨴꨩ ꨖꨮꩆ ꨣꨤꨯꨩ ꨤꨝꩃ ꨝꨵꨯꨱꩍ꩝ ꨝꨵꨯꨱꩍ ꨆꨴꨩ ꨖꨮꩆ ꨎꩀ ꨈꩇ ꨐꨭꨩ ꨌꨆꨯꩃ ꨂꨣꩃ ꨘꩆ ꨝꨭꩍ ꨕꨤꩌ ꨤꨝꩃ ꨟꨪꩆ ꨐꨭꨩ ꨕꨫ ꨆꨩ ꨕꩉ ꨅꨩ꩝ ꨝꨣꨥ ꨟꩃ ꨆꨴꨩ ꨖꨮꩆ ꨤꩄ ꨤꨚꨩ ꨓꨳꩆ ꨤꨯꨩ ꨗꨯꨱ ꨕꨶꩍ ꨝꨯꨱꩍ ꨆꨢꨮꨭ ꨡꨮꩃ ꨆꨩ ꨝꨵꨯꨱꩍ ꨟꨰ ꨕꩉ꩝ ꨝꨣꨥ ꨟꩃ ꨧꨩ ꨕꨚꨶꨮꩊ ꨆꨴꨩ ꨖꨮꩆ ꨘꩆ ꨗꨯꨱ ꨕꨶꩍ ꨝꨯꨱꩍ ꨆꨢꨮꨭ ꨡꨮꩃ꩝ ꨝꨣꨥ ꨟꩃ ꨂꨣꩃ ꨘꩆ ꨙꨪꩍ ꨕꨤꩌ ꨤꨝꩃ ꨝꨵꨯꨱꩍ ꨠꨕꨮꩍ ꨕꨫ ꨙꨪꩍ ꨓꨈꨯꩀ ꨡꨯꩍ ꨕꨤꩌ ꨤꨝꩃ ꨘꩆ ꨕꨯꩌ ꨟꩍ꩝ ꨝꨣꨥ ꨟꩃ ꨂꨣꩃ ꨘꩆ ꨟꩀ ꨟꩍ ꨘꩆ ꨙꨭꩃ ꨙꩃ ꨧꨩ ꨀꨗꨭꩃ꩝ ꨝꨣꨥ ꨟꩃ ꨂꨣꩃ ꨘꩆ ꨓꨗꨯꨱꩀ ꨟꨓꨩ ꨂꨣꩃ ꨘꩆ ꨙꨪꩍ ꨥꨮꩀ ꨕꨤꩌ ꨤꨝꩃ ꨘꩆ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨘꩆ ꨗꨯꨱ ꨕꨶꩍ ꨝꨯꨱꩍ ꨆꨢꨮꨭ ꨡꨮꩃ ꨓꨴꨬ ꨓꨳꩆ ꨝꨵꨯꨱꩍ꩝ ꨝꨣꨥ ꨟꩃ ꨆꨴꨩ ꨖꨮꩆ ꨘꩆ ꨟꨰ ꨚꩀ ꨤꨝꩃ ꨆꨴꨭꩃ ꨝꨭꩍ ꨂꨣꩃ ꨕꨤꩌ ꨘꩆ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨝꨳꨪ ꨈꨮꩇ ꨤꩄ ꨀꨣꩀ ꨗꨫ꩝ ꨝꨩ ꨂꨣꩃ ꨗꨫ ꨗꨯꨱ ꨆꨵꩀ ꨚꩀ ꨓꨯꩃ ꨥꨮꩀ ꨝꨰꩀ꩝ ꨕꩉ ꨚꩀ ꨗꨫ ꨎꨶꨩ ꨤꨊꨶꨩ ꨤꨯꨩ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨘꩆ ꨚꨮꩃ ꨆꨖꨩ꩝ ꨝꨵꨯꨱꩍ ꨎꩀ ꨈꨮꩇ ꨐꨭꨩ ꨌꨆꨯꩃ ꨂꨣꩃ ꨘꩆ ꨗꨯꨱ ꨌꨰꩀ ꨥꨮꩀ ꨓꨚꩀ ꨓꨯꩃ꩝ ꨝꨣꨥ ꨟꩃ ꨂꨣꩃ ꨘꩆ ꨠꨕꨮꩍ ꨕꨫ ꨙꨪꩍ ꨓꨈꨯꩀ ꨡꨯꩍ ꨕꨤꩌ ꨀꨗꨭꩂ ꨕꨯꩌ ꨟꩍ꩝ ꨘꩆ ꨟꩃ ꨂꨣꩃ ꨘꩆ ꨝꨩ ꨟꩍ ꨗꨯꨱ ꨔꩃ ꨋꩇ ꨔꩃ ꨔꨳꩌ ꨟꩀ ꨟꩍ ꨘꩆ ꨝꨵꨬ ꨨꨟꨭꨩ ꨝꨵꨬ ꨓꨗꩍ ꨀꨚꩍ ꨨꨤꨭꩆ ꨨꨤꩀ꩝ ꨋꩇ ꨟꨕꨩ ꨈꨗꨭꩇ꩝ ꨝꨣꨥ ꨟꩃ ꨂꨣꩃ ꨄꨰ ꨕꨯꨱꩀ ꨓꨚꩀ ꨚꨤꨬ ꨝꨆꩆ ꨝꨵꨯꨱꩍ ꨨꨟꨪꩅ ꨂꨣꩃ ꨡꨰꩀ ꨤꩄ ꨂꨣꩃ ꨀꨕꨬ ꨕꨶꨮꩆ ꨟꩍ ꨣꨤꨯꨩ꩝ ꨝꨣꨥ ꨟꩃ ꨂꨣꩃ ꨄꨰ ꨘꩆ ꨟꨰ ꨓꨊꨪ ꨤꩄ ꨀꨕꨬ ꨗꨯꨱ ꨟꩀ ꨟꩍ ꨚꩀ ꨨꨤꨬ ꨝꨵꨯꨱꩍ ꨣꨤꨯꨩ ꨤꨯꨩ ꨢꨮꨭ ꨗꨫ꩝ ꨝꨣꨥ ꨟꩃ ꨂꨣꩃ ꨀꨕꨬ ꨘꩆ ꨚꨶꨮꩄ ꨓꨚꩀ꩝ ꨤꩄ ꨕꨨꨵꩀ ꨗꨯꨱ ꨚꨤꨩ ꨧꨩ ꨀꨚꨭꩍ ꨓꨊꨮꩈ ꨚꩀ ꨊꨯꨱꩀ ꨌꨮꩀ ꨝꨵꨯꨱꩍ ꨕꨨꨵꩀ ꨗꨯꨱ ꨙꨪꩍ ꨇꨪꩀ ꨓꨊꨮꩈ ꨕꨫ ꨊꨯꨱꩀ ꨓꨯꩃ ꨝꨣꨥ ꨟꩃ ꨆꨴꨩ ꨖꨮꩆ ꨌꨆꨯꩃ ꨕꨨꨵꩀ ꨝꨩ ꨗꨯꨱ ꨕꩉ ꨓꨚꩀ ꨌꨮꩀ ꨟꩍ꩝ ꨆꨴꨩ ꨖꨮꩆ ꨚꨍꨯꩌ ꨤꩄ ꨕꨨꨵꩀ ꨟꨓꨰ꩝ ꨝꨣꨥ ꨟꩃ ꨆꨴꨩ ꨖꨮꩆ ꨣꨤꨯꨩ ꨤꨝꩃ ꨝꨵꨯꨱꩍ ꨝꨭꩍ ꨕꨨꨵꩀ ꨓꨟꨩ ꨕꨤꩌ ꨤꨝꩃ꩝ ꨝꨣꨥ ꨟꩃ ꨕꨨꨵꩀ ꨙꨪꩍ ꨝꨵꨯꨱꩍ ꨟꨮꨕꨮꩍ ꨓꨈꨯꩀ ꨡꨯꩍ ꨕꨯꩌ ꨟꩍ ꨕꨤꩌ ꨤꨝꩃ ꨘꩆ ꨟꩃ ꨕꨨꨵꩀ ꨕꨶꨮꩆ ꨟꩍ ꨝꨵꨯꨱꩍ ꨕꨨꨵꩀ ꨙꨭꩃ ꨧꨩ ꨀꨗꨭꩃ ꨝꨣꨥ ꨟꩃ ꨕꨨꨵꩀ ꨓꨗꨯꨱꩀ ꨟꨓꨩ ꨝꨵꨯꨱꩍ ꨕꨨꨵꩀ ꨙꨪꩍ ꨥꨮꩀ ꨕꨤꩌ ꨤꨝꩃ ꨘꩆ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨌꨆꨯꩃ ꨕꨨꨵꩀ ꨝꨩ ꨗꨯꨱ ꨌꨰꩀ ꨓꨚꩀ ꨀꨚꨭꩍ ꨓꨊꨮꩈ ꨥꨮꩀ꩝ ꨝꨣꨥ ꨟꩃ ꨕꨨꨵꩀ ꨠꨕꨮꩍ ꨕꨫ ꨙꨪꩍ ꨝꨵꨯꨱꩍ ꨕꨨꨵꩀ ꨡꨯꩍ ꨧꨩ ꨀꨗꨭꩃ ꨟꩍ ꨕꨫ ꨆꨁꨪꩂ ꨕꨨꨵꩀ ꨝꨵꨯꨱꩍ ꨕꨨꨵꩀ ꨝꨩ ꨟꩍ ꨟꨰ ꨔꩃ ꨝꨵꨯꨱꩍ ꨕꨨꨵꩀ ꨝꨵꨬ ꨨꨟꨭꨩ ꨝꨵꨬ ꨓꨗꩍ ꨝꨣꨥ ꨟꩃ ꨂꨣꩃ ꨄꨰ ꨓꨊꨪ ꨤꩄ ꨟꩍ ꨕꨯꨱꩀ ꨣꨤꨯꨩ ꨤꨬ ꨚꩀ ꨌꨮꩀ ꨘꩆ꩝ ꨝꨣꨥ ꨟꩃ ꨂꨣꩃ ꨀꨕꨬ ꨙꨯꩌ ꨥꨮꩀ ꨤꩄ ꨟꩍ ꨕꨫ ꨌꨮꩀ ꨘꩆ ꨔꨮꨭ ꨆꨩ ꨨꨕꨯꩌ ꨣꨤꨯꨩ ꨤꨯꨩ ꨝꨣꨥ ꨟꩃ ꨂꨣꩃ ꨄꨰ ꨨꨟꨪꩅ ꨀꨕꨬ ꨙꨯꩌ ꨢꨮꨭ ꨘꩆ ꨝꨣꨥ ꨟꩃ ꨂꨣꩃ ꨄꨰ ꨘꩆ ꨓꨊꨪ ꨤꩄ ꨀꨚꨭꩍ ꨓꨊꨮꩈ ꨀꨕꨬ ꨚꨤꨩ ꨚꩀ ꨨꨤꨬ꩝ ꨝꨣꨥ ꨟꩃ ꨂꨣꩃ ꨀꨕꨬ ꨝꨩ ꨂꨣꩃ ꨄꨰ ꨗꨯꨱ ꨚꨓꨯꨱꨥ꩝ ꨝꨣꨥ ꨟꩃ ꨂꨣꩃ ꨄꨰ ꨘꩆ ꨙꨪꩀ ꨓꨈꨯꩀ ꨗꨯꨱ ꨙꨪꩍ ꨚꩀ ꨊꨯꨱꩀ ꨓꨯꩃ꩝ ꨝꨣꨥ ꨟꩃ ꨂꨣꩃ ꨀꨕꨬ ꨟꨰ ꨔꩃ꩝ ꨝꨣꨥ ꨟꩃ ꨧꨩ ꨕꨚꨶꨮꩊ ꨆꨴꨩ ꨖꨮꩆ ꨗꨯꨱ ꨡꨮꩃ ꨓꨊꨮꩈ ꨝꨣꨥ ꨟꩃ ꨆꨴꨩ ꨖꨮꩆ ꨡꨯꩍ ꨂꨣꩃ ꨘꩆ ꨕꨯꨱꩀ ꨙꨪꩍ ꨚꩀ ꨊꨯꨱꩀ ꨓꨯꩃ꩝ ꨝꨣꨥ ꨟꩃ ꨎꩀ ꨈꨮꩇ ꨙꨪꩀ ꨓꨈꨯꩀ ꨓꨯꩃ ꨗꨯꨱ ꨀꨳꨮꩀ꩝ ꨝꨣꨥ ꨟꩃ ꨆꨴꨩ ꨖꨮꩆ ꨤꩄ ꨂꨣꩃ ꨨꨤꨬ ꨝꨵꨯꨱꩍ ꨟꨰ ꨟꨓꨰ ꨚꩀ ꨗꨫ꩝ ꨆꨨꨵꨯꨱꩌ ꨢꨮꨭ ꨘꩆ ꨕꨯꩌ ꨀꨕꨬ ꨄꨰ ꨕꨴꨬ ꨊꨮꩇ ꨖꩉ ꨝꨵꨯꨱꩍ ꨌꨆꨯꩃ ꨂꨣꩃ ꨟꨓꨰ ꨗꨫ ꨗꨯꨱ ꨕꩉ ꨝꨰꩀ꩝ ꨝꨣꨥ ꨟꩃ ꨂꨣꩃ ꨘꩆ ꨨꨟꨪꩅ ꨆꨴꨩ ꨖꨮꩆ ꨕꨯꨱꩀ ꨝꨳꨪ ꨈꩇ ꨢꨮꨭ ꨘꩆ ꨕꨤꩌ ꨓꨳꩆ ꨀꨶꨮꩆ ꨕꨯꨱꩀ ꨈꨙꨮꩃ ꨖꨪꩅ ꨕꨫ ꨨꨭꨩ ꨚꨶꨮꩄ ꨧꨪꨝꩉ ꨅꨩ꩝ ꨝꨣꨥ ꨟꩃ ꨆꨴꨩ ꨖꨮꩆ ꨌꨆꨯꩃ ꨂꨣꩃ ꨘꩆ ꨤꩄ ꨧꨪ ꨝꨩ ꨗꨯꨱ ꨕꩉ꩝ ꨝꨣꨥ ꨟꩃ ꨌꨆꨯꩃ ꨂꨣꩃ ꨘꩆ ꨗꨯꨱ ꨨꨭꨩ ꨠꨓꨲꩍ ꨌꨮꩀ ꨟꨪꩆ ꨕꨫ ꨆꨩ ꨓꨮꩊ ꨅꨩ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨝꨳꨪ ꨈꨮꩇ ꨤꩄ ꨀꨣꩀ ꨗꨫ ꨧꨪ ꨝꨩ ꨂꨣꩃ ꨟꨓꨰ ꨗꨫ ꨗꨯꨱ ꨕꩉ ꨚꩀ ꨌꨮꩀ ꨟꩍ ꨨꨰ ꨤꩄ ꨝꨩ ꨗꨯꨱ ꨕꩉ ꨚꩀ ꨌꨮꩀ ꨝꨔꨬ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨘꩆ ꨤꩄ ꨕꨫ ꨔꨮꨭ ꨅꨩ꩝ ꨝꨩ ꨗꨯꨱ ꨕꩉ ꨚꩀ ꨨꨤꨬ ꨎꩃ ꨨꨭꨩ ꨣꨬ꩝ ꨝꨣꨥ ꨟꩃ ꨂꨣꩃ ꨋꩇ ꨟꨮꨋꩇ ꨟꨓꨰ ꨘꩆ ꨤꩄ ꨝꨩ ꨕꨨꨵꩀ ꨗꨯꨱ ꨕꩉ ꨓꨚꩀ ꨌꨮꩀ ꨟꩍ ꨝꨰꩀ ꨓꨯꩀ ꨧꨳꩌ꩝ ꨝꨣꨥ ꨟꩃ ꨕꨯꩌ ꨆꨴꨩ ꨖꨮꩆ ꨓꨆꨓꨶꩀ ꨝꨵꨯꨱꩍ ꨐꨭꨩ ꨨꨝꨪꩀ ꨂꨣꩃ ꨘꩆ ꨕꨫ ꨊꨯꨱꩀ ꨝꨓꨭꨥ ꨕꨭꩉ ꨤꩄ ꨂꨣꩃ ꨗꨫ ꨟꨓꨰ ꨚꨎꨮ ꨧꨪꨝꩉ ꨝꨵꨯꨱꩍ ꨙꨯꩌ ꨨꨭꨩ꩝ ꨕꨯꩌ ꨆꨴꨩ ꨖꨮꩆ ꨙꨶꨮꩄ ꨗꨯꨱ ꨀꨝꨪꩍ꩝ ꨨꨤꨬ ꨂꨣꩃ ꨘꩆ ꨎꨯꨱꩍ ꨆꨁꨪꩂ ꨟꨰ ꨔꩃ ꨥꨮꩀ ꨕꨫ ꨨꨭꨩ ꨅꨩ꩞