ꨆꨵꨮꨭ ꨀꨕꨬ ꨆꨟꨬ ꨀꨧꨪꩅ ꨕꨫ ꨧꨩ ꨚꨤꨯꨱ ꨨꨶꩃ꩝ ꨡꨯꨱꩀ ꨟꨓꨩ ꨕꨯꨱꩀ ꨨꨶꨮꩄ ꨀꨔꨭꩉ꩞ ꨚꩀ ꨀꨘꩀ ꨐꨭꨩ ꨘꩆ ꨧꨩ ꨚꨤꨬ ꨆꨵꩀ ꨓꨢꩍ꩞ ꨀꨓꨭꨥ ꨝꨶꨮꩊ ꨕꨯꨱꩀ ꨙꨪꩍ ꨣꨤꨯꨩ ꨕꨫ ꨕꨶꨩ ꨈꩍ ꨎꨤꩆ ꨚꨴꨯꨱꩃ ꨆꨴꨲꩍ ꨚꨤꨬ꩞ ꨅꨩ ꨡꨯꩍ ꨔꨬ ꨥꨮꩀ ꨕꨯꨱꩀ ꨨꨕꨳꨪꩇ꩞ ꨆꨵꨮꨭ ꨀꨕꨬ ꨆꨟꨬ꩝ ꨆꨵꨮꨭ ꨔꨭꩆ꩝ ꨓꨎꨭꩍ ꨔꨭꩆ꩝ ꨧꨤꨪꨚꩆ ꨔꨭꩆ꩞ ꨅꩍ ꨔꨮꨭ ꨕꨯꩌ ꨀꨕꨬ ꨀꨋꩆ ꨈꨰꩅ꩝ ꨚꩀ ꨨꨤꨬ ꨟꨰ꩞ ꨘꩆ ꨢꨮ꩝ ꨃꨥ ꨇꨯꨱꩊ ꨐꨭꨩ: ꨀꨕꨬ ꨆꨵꨮꨭ꩝ ꨀꨕꨬ ꨓꨎꨭꩍ꩝ ꨀꨕꨬ ꨧꨤꨪꨚꩆ꩞ ꨀꨕꨬ ꨆꨵꨮꨭ ꨀꨦꨪꩅ ꨀꨝꨪꩍ꩝ ꨀꨕꨬ ꨧꨤꨪꨚꩆ ꨚꨴꨯꨱꩃ ꨔꨭꩆ ꨀꨝꨪꩍ꩞ ꨧꨤꨪꨚꩆ: ꨕꨴꨬ ꨗꨯꨱ ꨟꨰꩀ꩝ ꨕꨶꩍ ꨤꨪꨝꨪꩀ ꨚꨳꨮꩍ ꨕꨮꩇ꩞ ꨆꨵꨮꨭ ꨀꨕꨬ ꨚꩆ ꨓꨊꨪꩆ ꨈꨮꩇ ꨓꨟꨩ ꨕꨤꩌ ꨚꨤꨬ꩝ ꨢꩌ ꨓꨚꨩ ꨟꨗꨶꨪꩋ ꨟꨓꨰ꩝ ꨕꨫ ꨣꨭꩇ ꨀꨓꨭꨥ ꨡꨯꩍ ꨝꩀ ꨕꨣꩍ ꨧꨯꨱꩃ ꨗꩌ ꨆꨝꨴꩄ ꨎꨤꨮꩌ꩞ ꨟꨓꨩ ꨕꨯꨱꩀ ꨡꨵꩀ꩝ ꨟꨢꨯꨱꩌ ꨤꩄ ꨓꨭꩀ ꨟꨓꨰ ꨚꨙꨪꩀ ꨚꨙꨶꨩ ꨣꨤꨯꨩ ꨧꨯꨱꩃ ꨨꨶꨮꩄ ꨀꨝꨪꩍ ꨓꨭꩃ ꨓꨳꩆ꩞ ꨆꨖꨩ ꨟꨰ ꨆꨵꨮꩌ ꨕꨨꨵꨮꨭ ꨟꨪꩆ꩝ ꨀꨕꨬ ꨓꨎꨭꩍ ꨕꨯꨱꩀ ꨨꨕꨮꩉ ꨓꨘꩅ꩞ ꨧꩇ ꨜꨵꨪꩂ ꨉꨮꩍ ꨓꨊꨪ ꨕꨫ ꨈꨪꨤꨰ ꨚꨴꨯꨱꩃ ꨆꨴꨲꩍ ꨓꨧꨪꩀ꩞ ꨂꨣꩃ ꨟꨐꨭꩌ ꨡꨳꨮ ꨙꨯꩌ ꨈꨵꨰ ꨝꨶꨬ ꨆꨵꨯꨱ꩞ ꨣꨗꨰꩍ ꨢꨮꨩ ꨙꨶꨮꩄ ꨆꨵꨯꨱ ꨚꨈꨶꨬ ꨈꨮꩇ ꨈꨴꨮꩇ ꨈꨪꨤꨰ꩞ ꨕꨯꨱꩀ ꨔꨯꨱꩍ꩝ ꨧꩇ ꨆꨵꨯꨱ ꨧꨴꨮꩍ ꨧꩇ ꨚꨴꨯꨮꨥ ꨀꨔꨭꩉ ꨨꨶꨮꩄ꩝ ꨨꨭꨩ ꨈꨰꩅ ꨏꩀ ꨕꨯꨱꩀ ꨟꨔꨭꩍ꩞ ꨧꨩ ꨝꨪꨗꨴꨯꩀ ꨟꨪꩆ꩝ ꨀꨟꨰꩀ ꨓꨎꨭꩍ ꨙꨶꨮꩄ ꨟꨰ ꨚꩀ ꨐꨭꨩ꩝ ꨚꨚꨮꩀ ꨟꨓꨩ ꨐꨭꨩ ꨥꨮꩀ꩝ ꨙꨶꨮꩄ ꨝꨩ ꨐꨭꨩ ꨓꨈꨯꩀ ꨕꨫ ꨧꨩ ꨈꨪꨤꨰ ꨕꨯꨱꩃ꩞ ꨟꨗꨶꨪꩋ ꨚꨴꨯꨱꩃ ꨏꨭꩊ ꨈꨪꨤꨰ ꨕꨯꨱꩃ ꨓꨝꨳꩀ ꨓꨧꨪꩀ ꨝꨪꨕꨴꩍ꩞ ꨓꨎꨭꩍ ꨕꨯꨱꩀ ꨨꨕꨮꩉ ꨝꨳꩀ ꨓꨘꩅ ꨚꨗꨶꨮꩄ ꨤꨶꨪꩄ ꨀꨟꨰꩀ ꨙꨯꩌ: “ꨎꨶꨰ ꨀꨳꨮꩀ ꨟꨓꨩ ꨐꨭꨩ꩝ ꨟꨓꨩ ꨆꨤꨩ”꩞ ꨧꩇ ꨚꨴꨯꨮꨥ ꨝꨪꩀ ꨍꨶꨰ ꨝꨪꩀ ꨕꨩꩊ꩝ ꨓꨮꩊ ꨤꨶꨪꩄ ꨅꨩ ꨨꨟꨪꩅ ꨈꨰꩅ ꨥꨮꩀ꩞ ꨧꩇ ꨨꨕꨬ ꨀꨝꨪꩍ ꨕꨯꩌ ꨀꨕꨬ ꨨꨟꨪꩅ ꨘꩆ ꨧꩇ ꨧꨭꨂꩀ ꨆꨤꨩ꩝ ꨆꨆꨮꩍ ꨝꨳꩀ꩝ ꨧꩇ ꨆꨤꨩ ꨕꨫ ꨆꨴꨲꩍ ꨓꨧꨪꩀ꩞ ꨓꨮꩊ ꨨꨕꩍ ꨚꨈꨯꨮꨩ ꨆꨩ ꨟꩃ ꨧꨤꨪꨚꩆ ꨚꨮꩍ ꨇꩆ ꨚꨌꨮꩃ ꨟꨓꨩ ꨓꨝꨳꩀ꩞ ꨡꨯꩍ ꨕꨫ ꨈꨪꨤꨰ ꨕꨯꨱꩃ ꨨꨭꨩ ꨕꨶꨩ ꨂꨣꩃ ꨓꨴꨩ ꨘꩆ ꨆꨵꨮꨭ ꨧꨯꨱꩃ ꨓꨎꨭꩍ꩞ ꨧꨤꨪꨚꩆ ꨔꨶꩀ ꨇꩆ ꨚꨌꨮꩃ ꨟꨓꨩ ꨕꨶꨩ ꨀꨕꨬ ꨓꨝꨳꩀ꩝ ꨝꨵꨯꨱꩍ ꨙꨯꩌ ꨕꨩꩊ: “ꨎꨶꨰ ꨨꨶꨮꩄ꩝ ꨎꨶꨰ ꨨꨶꨮꩄ!”꩞ ꨓꨮꩊ ꨧꨪ ꨦꨭꩇ꩝ ꨈꨪꨤꨰ ꨕꨯꨱꩃ ꨔꨮꩀ ꨓꨟꨩ ꨓꨆꨰ ꨓꨧꨪꩀ꩝ ꨚꩀ ꨀꨘꩀ ꨘꩆ ꨧꨩ ꨚꨤꨬ ꨆꨵꩀ ꨓꨢꩍ꩞ ꨧꨤꨪꨚꩆ: ꨆꨤꨩ ꨟꨰ ꨓꨮꩊ ꨗꨫ ꨚꨎꨮꨩ꩝ ꨕꨴꨬ ꨨꨝꩉ ꨕꨶꩍ ꨤꨪꨝꨪꩀ ꨕꨮꩇ꩞ ꨝꨵꨯꨱꩍ ꨇꨯꨱꩊ ꨐꨭꨩ ꨕꨶꩍ ꨡꨯꩍ ꨧꨩ ꨧꩃ ꨚꨴꨯꨱꩃ ꨚꨳꨮꩍ ꨆꨙꩇ꩞ ꨧꨤꨪꨚꩆ ꨙꨯꩌ ꨧꨯꨱꩃ ꨕꨶꨩ ꨀꨕꨬ: “ꨚꨮꩃ ꨦꨄꨰ ꨙꨯꩌ꩝ ꨚꨳꨮꩍ ꨚꨓꨈꨯꩀ ꨧꩀꨓꨩ ꨕꨴꨬ ꨨꨭꨩ ꨟꨗꨶꨪꩋ ꨕꨯꨱꩀ ꨨꨕꨳꨪꩇ꩝ ꨕꨴꨬ ꨨꨝꩉ ꨚꨣꨞꨩ꩝ ꨧꨩ ꨂꨣꩃ ꨕꨮꩇ ꨧꨩ ꨤꨪꨝꨪꩀ꩞ ꨓꨮꩊ ꨨꨕꩍ ꨚꨈꨯꨮꨩ꩝ ꨟꨢꩍ ꨅꩍ ꨨꨭꨩ ꨈꨰꩅ ꨏꩀ ꨢꨮꨩ ꨆꨤꨩ ꨗꨯꨱ ꨀꨓꩍ ꨚꨎꨮꨩ꩝ ꨕꨴꨬ ꨚꨓꨯꨱꩌ ꨥꨮꩀ ꨕꨫ ꨆꨴꨲꩍ ꨧꩃ꩞ ꨨꨟꨪꩅ ꨢꨮꨭ ꨘꩆ꩝ ꨆꨵꨮꨭ ꨌꨯꨱꩀ ꨨꨳꨩ: “ꨀꨕꨬ ꨨꨶꨮꩄ꩝ ꨀꨕꨬ ꨅꩍ ꨇꨪꩆ ꨕꨯꨱꩀ ꨧꨩ ꨕꨴꨬ” ꨧꨤꨪꨚꩆ: ꨈꨪꨙꨮꩃ꩝ ꨎꨶꨰ ꨨꨳꨩ ꨎꨶꨰ ꨓꨎꨭꩍ: “ꨘꩆ ꨢꨮꨩ ꨕꨨꨵꩀ ꨕꨮꩇ ꨧꨯꨱꩃ ꨀꨕꨬ ꨓꨤꨶꨪꩄ꩝ ꨕꨫ ꨌꨰꩀ ꨐꨭꨩ ꨕꨮꩇ ꨧꨩ ꨕꨴꨬ ꨨꨭꨩ ꨅ” ꨈꨮꩌ ꨙꨯꩌ ꨓꨎꨭꩍ ꨈꨮꩌ ꨚꨤꨶꨮ ꨀꨕꨬ: “ꨈꨪꨙꨮꩃ ꨟꨰꩀ꩝ ꨈꨪꨙꨮꩃ ꨟꨰꩀ” ꨧꨤꨪꨚꩆ: ꨢꨮꨭ ꨘꩆ ꨤꨪꨎꩃ ꨨꨭꨩ꩝ ꨘꩆ ꨢꨮꨩ ꨦꨄꨰ ꨕꨮꩇ ꨧꨩ ꨕꨴꨬ꩝ ꨚꨮꩃ ꨦꨄꨰ ꨆꨆꨬ꩝ ꨎꨶꨰ ꨋꩇ ꨨꨟꨪꩅ ꨧꩇ ꨎꨶꨰ ꨐꩀ! ꨇꨯꨱꩊ ꨐꨭꨩ ꨕꨶꩍ ꨨꨭꨩ ꨧꨩ ꨈꨪꨣꨯꨱꩃ ꨚꨴꨯꨱꩃ꩝ ꨆꨵꨮꨭ ꨧꨯꨱꩃ ꨓꨎꨭꩍ ꨐꨭꩅ ꨕꨤꩌ ꨈꨪꨣꨯꨱꩃ꩝ ꨕꨯꨱꩀ ꨧꨤꨪꨚꩆ ꨙꨪꩀ ꨓꨈꨯꩀ ꨊꨯꨱꩀ ꨈꨪꨣꨯꨱꩃ ꨝꨵꨯꨱꩍ ꨟꩀ ꨌꨳꨯꨮꨥ ꨚꨌꨮꩃ ꨣꨭꩇ ꨥꨮꩀ꩞ ꨕꨫ ꨊꨯꨱꩀ ꨈꨪꨣꨯꨱꩃ ꨘꩆ꩝ ꨐꨭꨩ ꨡꨯꩍ ꨧꨩ ꨡꨰꩀ ꨜꨥ ꨈꨤꨭꩅ꩝ ꨕꨤꩌ ꨕꨯꨱꩀ ꨨꨭꨩ ꨀꨗꩀ ꨜꨥ꩞ ꨐꨭꨩ ꨟꩀ ꨚꨳꨮꩍ꩝ ꨆꨳꨯꨮꩃ ꨀꨊꨶꨬ ꨓꨭꩀ ꨏꩀ ꨟꨰ꩞ ꨧꨩ ꨝꨪꨗꨴꨯꩀ ꨓꨚꨩ ꨟꨪꩆ꩝ ꨧꩇ ꨧꨭꨂꩀ ꨆꨤꨩ ꨕꨗꩈ ꨥꨮꩀ꩝ ꨐꨭꨩ ꨡꨭꨥ ꨟꨗꨶꨪꩋ ꨕꨯꨱꩀ ꨨꨕꨳꨪꩇ ꨘꩆ ꨟꨰ ꨕꨶꩍ꩞ ꨆꨵꨮꨭ ꨨꨳꨩ ꨥꨮꩀ ꨟꨪꩆ ꨠꨣꩅ ꨅꩍ ꨌꨰꩀ ꨓꨝꨳꩀ ꨧꩇ꩝ ꨓꨎꨭꩍ ꨕꨯꨱꩀ ꨚꨌꨮꩃ ꨚꨝꩍ ꨐꨭꨩ꩞ ꨧꩇ ꨆꨤꨩ ꨟꨰ ꨝꨪꩀ ꨎꨰꩀ꩞ ꨐꨭꨩ ꨔꨮꨭ ꨨꨭꨩ ꨟꨗꨶꨪꩋ ꨕꨯꨱꩀ ꨕꨤꩌ ꨈꨪꨣꨯꨱꩃ꩝ ꨐꨭꨩ ꨆꨝꨴꩄ ꨈꨪꨣꨯꨱꩃ꩝ ꨋꩇ ꨧꩇ ꨈꨪꨟꨴꨮꩌ꩞ ꨧꩇ ꨆꨝꨴꩄ꩝ ꨧꩇ ꨈꨪꨟꨴꨮꩌ ꨆꨤꨩ ꨋꩇ ꨆꨩ ꨆꨵꨮꨭ ꨨꨶꨮꩄ ꨀꨔꨭꩉ ꨣꨤꨯꨩ ꨥꨮꩀ꩝ ꨐꨭꨩ ꨨꨳꨩ ꨆꨓꨮꩃ ꨧꩇ ꨝꨵꨯꨱꩍ ꨓꨤꨮꩀ ꨝꨡꨮꩃ ꨈꨪꨣꨯꨱꩃ ꨙꨶꨮꩄ ꨓꨝꨳꩀ꩞ ꨓꨎꨭꩍ ꨟꨪꩍ ꨚꨴꨯꨮꨥ ꨓꨶꨬ: “ꨎꨶꨰ!!!”꩞ ꨟꨓꨩ ꨐꨭꨩ ꨡꨯꩍ ꨟꨓꨩ ꨆꨤꨩ꩝ ꨝꨵꨯꨱꩍ ꨐꨭꨩ ꨎꨤꨮꩍ꩝ ꨡꨯꨱꩀ ꨟꨓꨩ ꨨꨶꨮꩄ ꨅꩍ ꨕꨯꨱꩀ ꨧꨩ ꨓꨒꨯꨱꩍ ꨕꨣꩍ꩞ ꨆꨤꨩ ꨙꨶꨮꩄ ꨓꨝꨳꩀ ꨤꨪꨊꨪꨥ ꨕꨶꩍ ꨆꨵꨮꨭ꩝ ꨧꨩ ꨝꨪꨗꨴꨯꩀ ꨟꨪꩆ ꨨꨟꨪꩅ ꨧꩇ ꨚꨴꨮꨥ ꨆꨵꨮꨭ꩝ ꨧꩇ ꨚꨴꨯꨮꨥ ꨚꨴꨯꨱꩃ ꨨꨶꨮꩄ ꨚꨙꨪꩀ꩞ ꨕꨶꨩ ꨀꨕꨬ ꨟꨓꨰ ꨚꨎꨮ꩞ ꨆꨤꨩ ꨟꨰ ꨈꨤꩄ ꨕꨭꩀ꩝ ꨐꨭꨩ ꨕꨶꩍ ꨔꨮꨭ ꨤꩄ ꨕꨯꨱꩀ ꨟꨗꨶꨪꩋ ꨥꨮꩀ꩞ ꨕꨫ ꨆꨴꨲꩍ ꨆꨵꨮꩌ ꨎꨶꨩ ꨕꨯꨱꩀ ꨔꨯꨱꩍ ꨨꨟꨪꩅ ꨧꩇ ꨜꨥ ꨌꨭꩍ꩝ ꨝꨵꨯꨱꩍ ꨧꩇ ꨜꨥ ꨌꨭꩍ ꨕꨗꩈ ꨥꨮꩀ ꨣꨤꨯꨩ ꨡꨮꩃ ꨓꨴꨩ꩞ ꨀꨝꨪꩍ ꨀꨗꩀ ꨜꨥ ꨚꨎꨮ꩝ ꨆꨤꨩ ꨎꨤꨮꩍ ꨕꨫ ꨆꨴꨲꩍ ꨕꨗꨯꨱ ꨕꨣꩍ ꨐꨭꨩ꩞ ꨧꨤꨪꨚꩆ ꨡꨯꨱꩀ ꨧꨘꩀ ꨟꨰ ꨓꨜꨳꨩ ꨀꨗꩀ ꨆꨤꨩ꩝ ꨆꨤꨩ ꨕꩌ ꨨꨮꩀ ꨚꨎꨮꨩ꩝ ꨡꨯꨱꩀ ꨟꨓꨩ ꨕꨯꨱꩀ ꨢꨮꩃ ꨈꩍ ꨕꨯꨮꩍ꩞ ꨧꨤꨪꨚꩆ ꨗꨯꨱ ꨓꨚꨩ ꨈꩍ ꨕꨯꨮꩍ꩝ ꨀꨳꨮꩀ ꨓꨚꩀ ꨟꨓꨩ ꨆꨤꨩ꩞ ꨟꨓꨩ ꨐꨭꨩ꩝ ꨕꨯꨱꩀ ꨡꨵꩀ ꨚꨴꨯꨱꩃ꩞꩞꩞