ꨟꨢꩍ ꨙꨯꩌ ꨓꨮꩊ ꨟꨕꨩ ꨈꨪꨗꨭꩇ꩝ ꨕꨨꨵꩀ ꨧꨗꩃ ꨤꩄ ꨕꨴꨬ ꨟꨕꨩ ꨡꨵꨶꩀ ꨓꨚꨩ ꨚꨓꨯꨱ ꨟꩃ ꨆꩊ ꨚꨎꨮꨩ ꩞ ꨚꨓꨯꨱ ꨟꩃ ꨆꩊ ꨅꩍ ꨨꨭꨩ ꨣꨪꨕꨰꩍ ꨙꨶꨮꩄ ꨕꨴꩍ ꨕꨴꨮꩍ ꨕꨴꨬ ꩞ ꨚꨓꨯꨱ ꨟꩃ ꨆꩊ ꨅꨩ ꨨꨭꨩ ꨆꨢꨩ ꨡꨮꩃ ꨝꨪꨊꨪ ꨢꨮꨭ ꨕꨴꨬ ꩞ ꨚꨓꨯꨱ ꨟꩃ ꨆꩊ ꨟꨢꩍ ꨒꨮꩇ ꨣꨶꩀ ꨢꨮꨩ ꨌꨳꨪꩇ ꨟꨓꨰ꩝ ꨅꨩ ꨨꨭꨩ ꨎꨴꨭꨩ ꨚꨆꨴꨮꩃ ꨚꨀꨝꨪꩍ ꨣꨶꩀ꩞ ꨚꨓꨯꨱ ꨟꩃ ꨆꩊ ꨟꨢꩍ ꨓꨆꨴꨲꨩ ꨚꨶꨮꩄ ꨓꨚꨭꩀ꩝ ꨨꨝꩉ ꨗꨯꨱ ꨕꨶꩍ꩞ ꨕꨴꨬ ꨂꨣꩀ ꨗꨫ ꨓꨚꨭꩀ ꨀꨝꨪꩍ ꨕꨭꨑꨩ ꨕꨯꨱꩀ ꨕꨤꩌ ꨜꨯꩆ꩝ ꨨꨭꨩ ꨀꨁ꩝ ꨈꨭꨈꨯꨩ ꨕꨫ ꨝꨮꩃ ꨓꨴꨩ ꨥꨮꩀ꩝ ꨙꨯꩀ ꨔꨮꨭ ꨨꨈꨰꩅ ꨤꨪꨎꩃ ꨔꨮꨭ ꨓꨘꩅ ꨟꨢꩍ ꨌꨳꨪꩇ ꨆꨵꩀ ꨥꩀ ꨓꨭꩀ ꨝꩄ꩞ ꨂꨣꩀ ꨗꨫ ꨨꨭꨩ ꨙꨳꨮꩆ ꨓꨴꨩ꩝ ꨘꩆ ꨝꨩ ꨨꨭꨩ ꨓꨪꩀ ꨓꨪꩀ ꨆꨢꨩ ꨝꨪꨆꩆ ꨚꨓꨯꨱ ꨟꩃ ꨆꩊ ꨅꩍ ꨨꨭꨩ꩞ ꨚꨈꨮꩇ ꨤꩄ: ꨓꨕꨫꩀ ꨠꩄ꩝ ꨓꨪꨥꨪ꩝ ꨈꨪꨣꨯꨱꩃ ꨤꨪꨀꩆ… ꨟꨪꩆ ꨚꨓꨯꨱ ꨟꩃ ꨆꩊ ꨨꨭꨩ ꨧꨩ ꨝꨯꨱꩍ ꨡꨵꨶꩀ ꨓꨚꨩ ꨣꨤꨯꨩ ꨠꨗꨶꨪꩋ ꨂꨣꩀ ꨗꨫ꩝ ꨚꨓꨯꨱ ꨇꨪꩆ ꨧꨗꩃ꩝ ꨧꨗꩃ ꨓꨚꩀ꩝ ꨧꨗꩃ ꨡꨯꩍ꩝ ꨧꨗꩃ ꨎꨤꨮꩌ꩝ ꨧꨗꩃ ꨀꨓꩍ… ꨓꨶꨬ ꨕꨨꨵꩀ ꨧꨗꩃ꩝ ꨣꨪꨡꩍ ꨕꨫ ꨀꨝꨪꩍ ꨅꨩ ꨒꨮꩇ ꨣꨪꨡꩍ ꨆꨢꨩ ꨕꨴꨮꩇ꩝ ꨟꨪꩆ ꨣꨪꨡꩍ ꨀꨆꨯꨱꩀ ꨧꨗꩃ꩞ ꨟꨕꨩ ꨢꨮꨭ ꨣꨬ꩝ ꨈꨪꨗꨭꩇ ꨢꨮꨭ ꨣꨬ꩝ ꨨꨭꨩ ꨀꨋꩆ ꨎꨲꨩ ꨢꨮꨭ ꨣꨬ꩝ ꨟꨢꩍ ꨅꩍ ꨇꨪꩆ ꨧꨗꩃ ꨓꨚꩀ꩝ ꨅꨩ ꨇꨪꩆ ꨧꨗꩃ ꨎꨤꨮꩌ꩝ ꨕꨯꨱꩀ ꨀꨝꨪꩍ ꨤꨯꩀ ꨨꨶꨮꩄ ꨆꨙꨩ ꨕꨫ ꨆꨢꨯꨱꩌ꩝ ꨤꨪꨎꩃ ꨢꨮꨭ ꨤꨪꨟꨯꨱꨥ ꨌꨭꩀ ꨟꩍ ꨟꨪꩆ꩞ ꨆꨔꨯꨱꩅ ꨣꨡꩍ ꨀꨝꨪꩍ ꨅꩍ ꨒꨮꩇ ꨆꨔꨯꨱꩅ ꨎꨳꨯꨮꩆ ꨚꨕꨰ꩝ ꨟꨪꩆ ꨆꨔꨯꨱꩅ ꨀꨆꨯꨱꩀ ꨧꨗꩃ꩞ ꨙꨯꩌ ꨓꨮꩊ ꨗꨫ ꨆꨩ ꨟꩃ ꨡꨯꩍ꩝ ꨚꨓꨯꨱ ꨟꩃ ꨆꩊ ꨟꨕꨩ ꨈꨪꨗꨭꩇ ꨣꨤꨯꨩ ꨙꨬ꩞ ꨅꨩ ꨒꨮꩇ ꨟꨕꨩ ꨈꨪꨗꨭꩇ ꨆꨢꨩ ꨕꨴꨮꩇ꩝ ꨟꨪꩆ ꨟꨕꨩ ꨈꨪꨗꨭꩇ ꨀꨆꨯꨱꩀ ꨧꨗꩃ꩝ ꨚꨓꨯꨱ ꨇꨪꩆ ꨧꨗꩃ꩞