ꨟꨗꨯꨱꩀ ꨆꨭ ꨧꨩ ꨣꨪꨝꨭꨥ ꨈꨪꨤꨰ ꨆꨢꨶ ꨓꨶ ꨙꨯꨩ ꨋꩇ ꨛꨯꨮ ꨈꨪꨗꨶꨮꩉ. ꨈꨪꨤꨰ ꨝꨳꩀ ꨚꨴꨯꨱꩃ꩝ ꨧꨩ ꨔꨴꨭꩍ ꨝꨩ ꨧꨩ ꨣꨪꨓꨭꩍ ꨟꨗꨶꨪꩋ ꨧꨯꨱꩃ ꨇꩆ ꨀꨥ ꨧꨯꨱꩃ ꨆꨢ ꨝꨪꨆꩆ ꨚꨳꨮꩍ ꨀꨝꨪꩍ ꨧꨩ ꨔꨭꩆ꩞ ꨨꨯꨩꩅ ꨓꨮꩅ ꨤꨪꩅ ꨓꨳꩇ ꨕꨯꩌ ꨟꨗꨶꨪꩋ ꨢꨮꨭ ꨆꨮꨭ ꨧꨯꨱꩃ ꨢꩆ ꨧꨯꨱ ꨗꨯꨱ ꨚꩀ ꨗꨈꩉ ꨀꨓꩍ꩞ ꨟꨗꨯꨱꩀ ꨆꨮꨭ ꨨꨝꩉ ꨚꨟꨓꨰ ꨟꨗꨶꨪꩋ ꨚꩀ ꨘꩆ꩝ ꨟꨢꩍ ꨅꩍ ꨔꨮꨭ ꨈꨮꩇ꩞ꨆꨮꨭ ꨔꨮꨭ ꨟꨗꨶꨪꩋ ꨤꨯꨱꨥ ꨅꩍ ꨓꨆꨴꨲ ꨗꨯꨱ ꨢꨮꨭ ꨗꨫ꩝ ꨆꨢꨶ ꨂꨣꩃ ꨈꨮꩀ ꨆꨓꨮꩀ ꨘꩆ ꨗꨯꨱ ꨟꨪꩆ꩞ ꨚꨈꨯꨮꨩ ꨟꨗꨭꩀ ꨆꨐꨯꨱꩀ꩝ ꨆꨮꨭ ꨟꨕꨮꩍ ꨓꨈꨯꩀ꩝ ꨟꨓ ꨕꨯꨱꩀ ꨥꨮꩃ ꨈꨴꨭꩀ꩞ ꨚꩀ ꨀꨘꩀ ꨇꨯꨱꩊ ꨆꨮꨭ ꨘꩆ ꨓꨗꩍ ꨌꩌꨛꨩ꩟ ꨨꨣꨬ ꩓꩐ ꨝꨪꨤꩆ ꩑꩒ ꨔꨭꩆ ꩑꩒꩘꩒꩝ ꨈꨪꨤꨰ ꨟꨯꨱꩃ ꨤꨯꨱꨥ ꨗꨯꨱ ꨓꨮꩊ ꨗꨈꩉ ꨥꨪꨎꨢ ꨌꩌꨛꨩ꩞ ꨧꨩ ꨣꨝꨭꨥ ꨈꨪꨤꨰ ꨨꨝꩉ ꨙꨶꨮꩄ ꨓꨚꨩ ꨚꨝꩍ ꨓꨔꨪꩀ꩝ ꨚꨳꨮꩍ ꨓꨟꨩ ꨧꨩ ꨕꨘꩇ ꨚꨴꨯꨱꩃ ꨀꨋꩆ ꨌꨴꨪ ꨥꨪꨘꨢ꩞ꨈꩍ ꨌꨮꩀ꩝ ꨚꨙꨳꩀ ꨝꨣꨭꨥ ꨡꨵꨶꩀ ꨓꨝꨳꩀ꩞ ꨕꨯꨱꩀ ꨔꨯꨱꩍ꩝ ꨕꨫ ꨀꨊꨯꨱꩀ ꨤꨫꨊꨫꩀ ꨨꨭꨩ ꨣꨤꨯꨩ ꨝꨓꨮꨭ ꨚꨴꨯꨱꩃ ꨚꨵꨯꨱꩃ ꨟꨰ ꨚꩀ ꨟꨗꨯꨱꩀ ꨆꨮꨭ꩞ꨝꨓꨭꨥ ꨤꨰꩀ ꨓꨴꨭꩆ ꨓꨔꨪꩀ ꨨꨟꨪꩅ ꨞꨭꩌ ꨞꨭꩌ꩝ ꨨꨭꨩ ꨨꨕꨯꩌ ꨈꨪꨤꨰ ꨝꨓꨭꨥ ꨆꨩꨆꨵꨮ ꨓꨟꨩ ꨘꩆ ꨆꨣꩌ꩝ ꨨꨭꨩ ꨣꨤꨯꨩ ꨂꨣꩃ ꨟꨓꨰ ꨡꨵꨭꩂ꩞ ꨤꨪꨎꩃ ꨨꨭꨩ ꨟꨗꨶꨪꩋ ꨝꨓꨭꨥ ꨤꨰꩀ ꨒꨮꩇ ꨝꨵꨯꨱꩍ ꨣꨭꩇ ꨞꩇ ꨌꨤꩍ ꨀꨝꨪꩍ ꨅꩍ ꨕꨯꨱꩀ ꨈꨰꩅ꩞ꨕꨫ ꨚꨝꩍ ꨓꨔꨫꩀ ꨘꩆ ꨨꨭꨩ ꨣꨤꨯꨩ ꨜꨥ ꨌꨭꩀ ꨝꨓꨭꨥ ꨌꩌꨛꨩ꩞ ꨎꨝꨶꨮꩊ ꨌꩌꨛꨩ ꨕꨯꨱꩀ ꨕꨫ ꨘꩆ ꨌꨭꩀ ꨓꨝꨳꩀ ꨣꨤꨯꨩ ꨝꨓꨭꨥ ꨙꨶꨮꩄ ꨟꨰ ꨚꩀ ꨟꨗꨯꨱꩀ ꨆꨮꨭ꩞ ꨓꨭꩀ ꨘꩆ꩝ ꨟꨗꨯꨱꩀ ꨆꨮꨭ ꨚꨓꨯꨱꩌ ꨈꨮꩇ ꨝꨵꨯꨱꩍ ꨝꨩ ꨈꨮꩇ ꨗꨯꨱ ꨤꨪꨝꨪꩀ ꨨꨭꨩ ꨜꨥ ꨌꨭꩀ ꨝꨓꨭꨥ꩝ ꨈꨪꨤꨰ ꨓꨟꨩ ꨈꨯꨱꩀ ꨓꨗꩍ ꨟꨗꨯꨱꩀ ꨆꨮꨭ ꨙꨶꨮꩄ ꨓꨝꨳꩀ ꨗꨯꨱ ꨚꩀ ꨎꨝꨶꨮꩊ ꨌꩌ꩞ ꨓꨭꩀ ꨟꨗꨯꨱꩀ ꨆꨮꨭ ꨗꨯꨱ ꨧꨪ ꨓꨮꩊ ꨎꨝꨶꨮꩊ ꨌꩌ꩝ ꨟꨗꨯꨱꩀ ꨆꨵꩀ ꨙꨶꨮꩄ ꨌꨰꩀ ꨥꨮꩀ ꨜꨥ ꨌꨭꩀ ꨝꨓꨭꨥ꩞ ꨟꨗꨯꨱꩀ ꨆꨮꨭ ꨅꨩ ꨚꨈꨶꨬ ꨓꨶꨬ ꨨꨶꨮꩄ ꨙ ꨐꨭꨩ ꨆꨴꩍ ꨀꨓꨯꨱꩃ꩞꩝ꨝꨵꨯꨱꩍ ꨧꨩ ꨡꨮꩃ ꨀꨓꨯꨱꩃ ꨆꨤꨪꩆ ꨗꨫ꩝ ꨟꨗꨯꨱꩀ ꨆꨮꨭ ꨨꨭꨩ ꨧꨩ ꩑꩒ ꨈꨪꨤꨰ ꨆꨣꩌ꩝ ꩑꩐꩐꩐ ꨂꨣꩃ ꨟꨓꨰ ꨤꨨꨪꩀ꩞ ꨆꨮꨭ ꨧꨯꨱꩃ ꨢꩆ ꨧꨯꨱ ꨕꨯꨱꩀ ꨨꨭꨩ ꨨꨕꨳꨪꩇ꩝ ꨟꨪꩆ ꨨꨣꨬ ꨝꨪꨤꩆ ꨟꨰ ꨕꨯꨱꩀ ꨨꨭꨩ ꨣꨤꨯꨩ ꨈꨴꨭꩀ ꨆꩆ ꨥꨮꩀ꩞ ꨓꨟꨩ ꨕꨤꩌ ꨕꨘ ꨝꨵꨯꨱꩍ꩝ ꨟꨗꨯꨱꩀ ꨙꨶꨮꩄ ꨈꨪꨤꨰ ꨗꨯꨱ ꨈꩍ ꨀꨳ ꨨꨣꨬ ꨓꨈꨯꩀ꩝ ꨝꨵꨯꨱꩍ ꨤꨰꩀ ꨆꨕꨰ ꨕꨫ ꨤꨪꨝꨪꩀ ꨘꩆ꩞ ꨓꨚꨩ ꨕꨶ ꨨꨣꨬ ꨓꨴ꩝ ꨟꩃ ꨝꨩ ꨝꨵꨯꨱꩍ ꨆꨢ ꨧꨯꨱꩃ ꨎꨝꨶꨮꩊ ꨓꨈꨯꩀ ꨓꨗꩍ꩞ ꨤꨪꨝꨪꩀ ꨠꨘꩀ ꨆꨮꨭ ꨕꨯꨱꩀ ꨨꨭꨩ ꨧꨩ ꨌꨯꨱꩉ ꨌꨶꩍ ꨚꨓꨪꩍ ꨝꨳꩀ ꨚꨴꨯꨱꩃ꩞ ꨟꨯꨱꩃ ꨈꩍ ꨌꨮꩀ ꨡꨯꩍ ꨎꨝꨶꨮꩊ ꨌꩌ꩝ ꨟꨯꨱꩃ ꨈꨤꩄ ꨈꩍ ꨓꨔꨪꩀ ꨡꨯꩍ ꨀꨳ ꨧꨯꨱꩍ ꨟꨪꩆ꩞ ꨆꨮꨭ ꨓꨐꨫ ꨢꩃ ꨧꨯꨱ꩝ ꨨꨭꨩ ꨓꨭꩀ ꨨꨤꨬ ꨚꨓꨯꨱ ꨌꩌꨛꨩ ꨌꨳꨪꩇ ꨤꩍ ꨤꨬ? ꨆꨩ ꨕꨴꨬ ꨨꨭꨩ ꨗꨯꨱ ꨧꩃ! ꨢꩃ ꨧꨯꨱ ꨀꨳꨮꩀ ꨕꨫ ꨈꩍ ꨌꨮꩀ꩝ ꨤꨪꨝꨪꩀ ꨎꨝꨶꨮꩊ ꨌꩌ ꨕꨯꨱꩀ ꨝꨵꨯꨱꩍ ꨙꨯꩌ: ꨇꨯꨱꩊ ꨕꨴꨬ ꨔꨬ ꨎꩃ ꨓꨆꨴꨲ ꨢꨮꨭ ꨘꩆ꩝ ꨟꨪꩆ ꨢꨶꨮꩆ ꨚꨩ ꨤꨮꩈ꩝ ꨂꨣꩃ ꨌꩌ ꨅꩍ ꨨꨝꨳꨯꨮꩉ ꨨꨤꨬ ꨌꨳꨪꩇ ꨚꨤꨯꨱ ꨓꨗꩍ ꨐꨭꨩ ꨆꨩ ꨕꨴꨬ꩝ ꨓꨗꩍ ꨐꨭꨩ ꨟꨗꩀ ꨓꨝꨳꩀ ꨚꨴꨯꨱꩃ ꨓꨈꨯꩀ꩝ ꨓꨗꩍ ꨟꨭꩀ ꨆꨬ ꨐꨭꨩ ꨌꨰꩀ ꨥꨮꩀ꩞ ꨝꨵꨯꨱꩍ ꨨꨕꨬ ꨗꨫ꩝ ꨙꨶꨮꩄ ꨙꨮ ꨎꩃ ꨀꨓꨯꨱꩃ ꨈꨮꩇ꩝ ꨌꨯꨱꩃ ꨨꨝꩉ ꨆꨩ ꨆꨮꨭ ꨧꨯꨱꩃ ꨨꨲꨩ ꨨꨭꨩ ꨕꨯꨱꩀ ꨨꨕꨳꨪꩇ ꨘꩆ ꨀꨶꨮꩆ ꨚꨎꨮꨩ꩞ ꨨꨣꨬ ꨘꩆ꩝ ꨆꨥꨯꩌ ꨆꨮꨭ ꨗꨯꨱ ꨓꨶꨬ ꨛꨯꨮ ꨕꨭꩅ ꨚꨳꨮꩍ ꨗꨯꨱ ꨓꨚꨩ ꨙꨯꩌ ꨧꨯꨱꩃ ꨚꨓꨯꨱ ꨌꩌ꩞ ꨧꨩ ꨡꨮꩃ ꨗꨫ ꩝ꨝꨮꩃ ꨕꨤꨪꨚꩆ ꨚꨎꨮꨩ꩝ ꨠꨢꩍ ꨚꨓꨯꨱ ꨌꩌ ꨅꨩ ꨌꨳꨪꩇ ꨤꩍ ꨢꨮꨩ ꨨꨝꩉ ꨀꨓꨯꨱꩃ ꨈꨮꩇ꩞ ꨙꨪꩀ ꨈꨪꨤꨰ ꨔꨶꨰ ꨆꨴꨯꨱꩃ ꨟꨯꨱꩃ ꨕꨶ ꨈꩍ ꨡꨯꩍ ꨚꨕꨰ ꨕꨯꨱꩀ ꨔꨴꨯꨱꩍ꩞ ꨂꨣꩃ ꨌꩌ ꨕꨯꨱꩀ ꨟꩀ ꨁꨆꩆ꩝ ꨋꩇ ꨚꨟꨭꨩ ꨢꨮꨭ ꨞꨳꩆ ꨨꨣꨬ꩞ ꨟꨗꨶꨪꩋ ꨚꩀ ꨗꨫ ꨌꨭꩀ ꨓꨣꨜ ꨟꨪꩆ ꨅꩍ ꨌꨭꩀ ꨀꨯꨱ꩝ ꨗꨯꨱ ꨤꨰꩈ ꨔꨯꨱꩍ꩝ ꨤꨪꨆꨬ ꨨꨰꨩ ꨆꨟꨬ ꨤꨎꩃ ꨢꨮꨭ ꨘꩆ꩞ ꨈꨯꨱꩀ ꨂꨣꩃ ꨟꨰ ꨆꨤꨪꩀ ꨚꨓꨪꩍ꩝ ꨈꨯꨱꩀ ꨂꨣꩃ ꨟꨰ ꨆꨤꨪꩀ ꨎꨭꩀ꩞ ꨡꨯꩍ ꨟꨗꨯꨱꩀ ꨆꨮꨭ ꨇꨯꨱꩊ ꨐꨭꨩ ꨅꩍ ꨨꨶꨮꩄ ꨆꨢꨶ ꨣꨙꨮꩇ ꨚꨎꨮꨩ꩞ ꨗꨯꨱ ꨥꨮꩀ ꨡꨯꩍ ꨧꨩ ꨝꩊ ꨀꨋꩆ ꨝꩊ ꨌꨴꨪ ꨝꨗꨯꨩꩈ꩞ ꨝꩊ ꨗꨫ ꨋꩇ ꨟꩃ ꨕꨫ ꨆꨢꨮꨭ꩝ ꨈꩍ ꨝꨪꨣꩀ ꨕꨗꩂ ꨓꨟꨩ ꨕꨫ ꨆꨴꨯꨱꩃ꩝ ꨕꨫ ꨊꨯꨱꩀ ꨝꩊ ꨡꨯꩍ ꨨꨕꨯꩌ ꨎꨝꨶꨮꩊ ꨌꩌꨛꨩ ꨕꨯꨱꩀ ꨇꨪꩀ꩞ ꨇꨯꨱꩊ ꨐꨭꨩ ꨌꨭꩀ ꨀꨯꨱ ꨎꨭꩀ ꨗꨯꨱ ꨤꨰꩈ ꨔꨯꨱꩍ꩝ ꨓꨊꨪꩆ ꨀꨚꩆ ꨙꨯꨱ꩞ ꨎꩃ ꨨꨭꨩ ꨣꨤꨯꨩ ꨂꨣꩃ ꨀꨚꩆ ꨨꨗ ꨡꨴꨮꩌ ꨤꨭꩀ ꨎꨴꨭ꩞ ꨆꨪꩀ ꨥꨮꩀ ꨢꨮꨩ ꨌꨭꩀ ꨀꨯꨱ ꨇꨪꩀ ꨣꨭꩇ꩝ ꨟꨢꨯꨱꩌ ꨤꩄ ꨂꨣꩃ ꨀꨚꩆ ꨀꨆꨯꨱꩀ꩞ ꨟꨗꨯꨱꩀ ꨐꨭꨩ ꨆꨣꨬ ꨕꨫ ꨟꨗꨯꨱꩀ ꨆꨮꨭ ꨧꨩ ꨀꨝꨯꨱꩍ ꨗꨫ꩝ ꨟꨗꨯꨱꩀ ꨐꨭꨩ ꨔꨬ ꨤꨎꩃ ꨗꨯꨱ ꨓꨆꨰ ꨔꨯꨱꩍ꩝ ꨕꨯꨱꩀ ꨟꨗꨯꨱꩀ ꨆꨮꨭ ꨔꨬ ꨤꨎꩃ ꨗꨯꨱ ꨓꨇꨯꨱꩀ꩞ ꨀꨤ ꨕꨫ ꨝꩊ꩝ ꨤꨪꨥꨪꩀ ꨤꨪꨥꨪꩀ ꨡꨯꩍ ꨨꨕꨯꩌ ꨕꨴꨬ ꨤꨪꨟꩆ ꨝꨳꩀ ꨚꨴꨯꨱꩃ꩝ ꨘꩆ ꨤꨪꨟꩆ ꨀꨓꨯꨱꩃ ꨆꨤꨪꩆ ꨌꩌꨛꨩ꩞ ꨓꨮꩊ ꨧꨪ ꨦꨭꩇ ꨝꨵꨯꨱꩍ ꨤꨎꩃ ꨓꨮꩊ ꨠꨖꨪꩉ ꨚꨓꨯꨱ ꨌꩌꨛꨩ ꨕꨯꨱꩀ꩞ ꨠꨖꨪꩉ ꨣꨪꨢ ꨕꨯꨱꩀ ꨈꩍ ꨀꨳ ꨨꨣꨬ ꨓꨟꨩ꩝ ꨀꨓꩍ ꨕꨫ ꨝꩊ ꨌꨴꨪ ꨝꨗꨯꨩꩈ ꨧꨩ ꨚꨵꨭꩍ ꨘꩌ ꨡꨰꩀ꩞ ꨨꨭꨩ ꨣꨤꨯꨩ ꨎꨝꨶꨮꩊ ꨌꩌ ꨕꨯꨱꩀ ꨌꩃ ꨟꨗꨯꨱꩀ ꨆꨮꨭ꩝ ꨡꨯꩍ ꨈꨪꨤꨰ ꨛꨯꨮ ꨕꨭꩅ ꨟꨯꨱꩃ ꨤꨯꨱꨥ ꨘꩆ ꨥꨮꩀ ꨓꨊꨪꩆ ꨚꨙꩉ ꨓꨟꨩ ꨟꨰꩀ꩞ ꨓꨟꨩ ꨓꨗꩍ ꨨꨭꨩ ꨧꨩ ꨣꨎꨩꨆꨩꩆ ꨌꩌꨛꨩ ꨧꨯꨱꩃ ꨧꨩ ꨣꨪꨓꨭꩍ ꨎꨝꨶꨮꩊ ꨀꨶꨮꩆ ꨣꨯꨱꩀ꩞ ꨇꨯꨱꩊ ꨐꨭꨩ ꨨꨭꨩ ꨝꨩ ꨟꨰ ꨣꨤꨯꨩ ꨕꨴꨬ ꨀꨧꨰꩍ ꨆꨩ ꨟꨗꨯꨱꩀ ꨆꨮꨭ꩝ ꨀꨧꨰꩍ ꨀꨦꨪꩅ ꨟꨪꩆ ꨙꨶꨮꩄ ꨝꨳꩀ ꨧꨠꩉ꩞ ꨧꨩ ꨝꨪꨟꨭꩀ ꨟꨪꩆ ꨗꨯꨱ ꨓꨮꩊ ꨧꩃ ꨚꨓꨯꨱ ꨚꨎꨮꨩ꩞ ꨝꨵꨯꨱꩍ ꨇꨯꨱꩊ ꨆꨮꨭ ꨚꨢꨶ ꨨꨣꩀ ꨟꩃ ꨕꨫ ꨛꨯꨮ ꨈꨪꨗꨶꨮꩉ ꨓꨶ ꨙꨯꨩ꩝ ꨚꨢꨶ ꨓꨈꨯꩀ ꨆꨩ ꨚꨓꨯꨱ꩞ ꨂꨣꩃ ꨌꩌ ꨝꨩ ꨇꨯꨱꩊ ꨆꨮꨭ ꨗꨯꨱ ꨚꩀ ꨧꩃ ꨓꨶꨬ ꨚꨕꨬ꩝ ꨙꨯꩌ ꨤꩄ ꨟꨢꩍ ꨚꨈꨭꩍ ꨨꨭꨩ ꨨꨈꨰꩅ꩝ ꨢꨮꨩ ꨙꨯꩌ ꨈꨤꩄ ꨆꨩ ꨟꨗꨯꨱꩀ ꨆꨮꨭ ꨔꨮꨭ꩞ ꨠꨤꩌ ꨘꩆ ꨀꨳ ꨝꨪꨤꩆ ꨨꨕꩍ꩝ ꨟꨗꨯꨱꩀ ꨨꨭꨩ ꨚꨓꨯꨱ ꨌꩌꨛꨩ ꨚꨢꩀ ꨀꨤꩀ ꨟꨐꨭꩌ ꨧꨯꨱꩃ ꨝꨳꩀ ꨣꨤꨯꨩ ꨣꨤꨯꨱꨥ ꨚꨝꨰꩈ꩝ ꨣꨤꨯꨱꨥ ꨆꨩꨝꨭꨥ ꨧꨯꨱꩃ ꨀꨝꨯꨱꩍ ꨜꨭꩆ ꨝꨪꨊꨪ꩞ ꨟꨗꨯꨱꩀ ꨟꩀ ꨈꨰ ꨒꨭꩀ ꨆꨵꨮꩇ ꨓꨟꨩ ꨕꨤꩌ ꨈꨯꨱꩀ ꨀꨤꩀ꩝ ꨓꨶꨬ ꨀꨕꩅ ꨂꨣꩃ ꨌꩌꨛꨩ꩞ ꨀꨤꩀ ꨐꨭꨩ ꨓꨝ ꨢꨮꨭ ꨀꨳ ꨟꨪꩆ ꨝꨪꨊꨪ꩝ ꨟꨐꨭꩌ ꨓꨮꩊ ꨆꨴꨲꩍ ꨟꨤꩌ ꨆꨩ ꨟꩃ ꨟꨝꨭꩀ꩞ ꨟꨝꨭꩀ ꨝꨵꨯꨱꩍ ꨆꨮꨭ ꨨꨕꨮꩉ ꨓꨮꩀ ꨧꩃ꩝ ꨕꨮꩉ ꨓꨮꩊ ꨚꨢꨯꨩ꩝ ꨅꩍ ꨔꨮꨭ ꨂꨣꩀ ꨗꨫ ꨆꨟꨬ ꨨꨝꩉ ꨚꨎꨮꨩ꩞ ꨆꨮꨭ ꨨꨕꨮꩉ ꨓꨮꩊ ꨀꨟ ꨀꨟꨰꩀ꩝ ꨨꨕꨮꩉ ꨓꨮꩊ ꨚꨤꨬ ꨆꨮꨭ ꨨꨭꨩ ꨟꨁꩆ ꨓꨭꩀ ꨕꨯꨱꩀ ꨣꨗꨰꩍ꩞ ꨝꨵꨯꨱꩍ ꨀꨳ ꨟꨓ ꨆꨮꨭ ꨨꨯꨱꩀ ꨓꨝꨳꩀ꩞ ꨟꨯꨱꩃ ꨥꨪꩊ ꨕꨮꩉ ꨡꨯꩀ ꨣꨤꨯꨩ ꨎꨝꨶꨮꩊ ꨝꨪꨆꩆ ꨐꨭꨩ ꨤꨎꩃ ꨨꨳ꩝ ꨐꨭꨩ ꨤꨎꩃ ꨨꨕꨮꩉ ꨧꩃ ꨢꨮꨭ ꨆꨮꨭ꩞ ꨆꨮꨭ ꨗꨯꨱ ꨕꨶꩍ ꨢꩃ ꨧꨯꨱ꩝ ꨝꨵꨯꨱꩍ ꨡꨯꩍ ꨐꨭꨩ ꨕꨯꨱꩀ ꨧꨩ ꨕꨴꨬ ꨧꨩ ꨕꨴꩊ ꨓꨆꨮ ꨈꨯꨱꩀ ꨀꨤꩀ꩝ ꨓꨊꨪꩆ ꨐꨭꨩ ꨚꩆ ꨣꨤꨯꨱꨥ ꨕꨯꨱꩀ ꨟꨐꨭꩌ ꨀꨤꩀ ꨕꨯꨱꩀ ꨡꨮꩃ꩞ ꨢꩃ ꨧꨯꨱ ꨡꨯꩍ ꨆꨮꨭ ꨨꨳ ꨝꨵꨯꨱꩍ ꨐꨭꨩ ꨆꨵꨯꨱ ꨝꨵꨯꨱꩍ ꨙꨯꩌ: ꨢꨶꨮꩆ ꨚ ꨟꨰ ꨚꩀ ꨗꨫ꩝ ꨟꨐꨭꩌ ꨟꨰꩀ꩝ ꨟꨐꨭꩌ ꨆꨩ ꨥꨮꩉ ꨀꨝꨪꩍ꩝ ꨆꨮꨭ ꨟꩍ ꨈꨰ ꨒꨭꩀ ꨟꨐꨭꩌ꩝ ꨟꨐꨭꩌ ꨥꨮꩀ ꨝꨵꨯꨱꩍ ꨆꨮꨭ ꨙꨪꩍ ꨥꨮꩉ ꨓꨭꩀ ꨨꨤꨬ ꨤꨎꩃ ꨅꩍ ꨔꨮꨭ꩞ ꨚꨈꨭꩍ ꨚꨈꨯꨮꨩ ꨆꨮꨭ ꨕꨯꨱꩀ ꨟꨝꨭꩀ ꨟꨪꩆ꩝ ꨝꨵꨯꨱꩍ ꨡꨯꩍ ꨣꨎꨩꨆꨩꩊ ꨟꨰ ꨚꨔꨮꨭ ꨤꩄ: ꨟꨗꨯꨱꩀ ꨨꨲ ꨗꨯꨱ ꨧꩃ ꨕꨴꩍ ꨟꨰꩀ꩝ ꨚꨓꨯꨱ ꨅꨩ ꨓꨆꨴꨲ ꨙꨯꩌ ꨈꨰꩅ ꨥꨮꩀ ꨧꨯꨱꩃ ꨟꨗꨯꨱꩀ ꨨꨲ꩝ ꨗꨯꨱ ꨧꨠꩉ ꨗꨯꨱ! ꨛꨯꨮ ꨕꨭꩅ ꨟꩀ ꨨꨣꩀ ꨝꨵꨯꨱꩍ ꨝꨩ ꨟꨗꨯꨱꩀ ꨆꨮꨭ ꨗꨯꨱ ꨓꨝꨳꩀ ꨀꨓꩍ ꨕꨫ ꨠꨖꨪꩉ ꨚꨓꨯꨱ꩞ ꨨꨣꩀ ꨓꨶ ꨙꨯꨩ ꨚꨢꨶ ꨆꨩ ꨚꨓꨯꨱ ꨁꩆꨕꨴꨥꨟꩆ ꩕꩝ ꨚꨶꨮꩄ ꨢꨮꨭ ꨗꨫ: ꨕꨨꨵꩀ ꨀꨗꨫꩅ ꨞꨭꩌ ꨞꩇ ꨗꨈꩉ ꨦꨄꨰ ꨆꨩ꩝ ꨘꩆ ꨧꨩ ꨝꨪꨤꩆ ꨗꨫ ꨅꩍ ꨀꨓꨯꨱꩃ꩞ ꨠꨢꩍ ꨇꨯꨱꩊ ꨕꨨꨵꩀ ꨀꨓꨯꨱꩃ ꨓꨟꨩ꩝ ꨦꨄꨰ ꨦꨗꩃ ꨤꩄ ꨀꨓꨯꨱꩃ ꨈꨤꩄ ꨨꨤꨬ? ꨟꩃ ꨆꩊ꩝ ꨙꨓꨲꨩ ꨘꩆ ꨧꨩ ꨀꨳ ꨝꨳꩀ ꨚꨴꨯꨱꩃ꩝ ꨚꨓꨯꨱ ꨀꨳ ꨘꩆ ꨌꨮꩀ ꨌꨮꩃ꩝ ꨚꨟꨓꨰ ꨈꨯꨱꩆ ꨟꨯꨱꩃ ꨤꨯꨱꨥ꩝ ꨘꩆ ꨎꨝꨶꨮꩊ ꨕꨨꨵꩀ ꨀꨓꨯꨱꩃ ꨓꨟꨩ ꨚꨟꨓꨰ ꨀꨝꨪꩍ꩝ ꨀꨇ ꨟꨕ ꨅꩍ ꨚꨤꨯꨱ꩞ ꨀꨳ ꨆꨪꩌ ꨓꨴ꩝ ꨀꨓꨯꨱꩃ ꨧꨯꨱꩃ ꨟꨗꨯꨱꩀ ꨕꨨꨵꩀ ꩒꩓ ꨔꨭꩆ ꨝꨵꨯꨱꩍ ꨚꨓꨰꩀ ꨤꨎꩃ ꨌꨳꨪꩇ ꨤꩍ꩞ ꨝꩊ ꨃꩆ ꨆꨪꩆ ꨌꨭꩍ ꨆꨵꨮꨭ ꨝꨪꨤꩆ ꨟꩃ ꨡꨮꩃ ꨀꨝꨪꩍ꩞ ꨣꨆꨪ ꨗꨫ ꨀꨳ ꨓꨯꨱꩃ ꨓꨴ ꨤꨎꩃ ꨤꨨꨪꩀ ꨚꨎꨮꨩ꩞ ꨇꩆ ꨈꨤꩄ ꨆꨖ ꨘꩆ ꨆꨩ ꨦꨄꨰ ꨡꨯꩍ꩝ ꨀꨕꩅ ꨤꨫꨊꨫꩀ ꨘꩆ ꨌꨰꩀ ꨥꨮꩀ ꨆꨩ ꨟꨯꨱꩃ ꨤꨯꨱꨥ ꨚꨎꨮꨩ꩞ ꨢꨮꨭ ꨨꨝꩉ꩝ ꨦꨄꨰ ꨕꨯꨱꩀ ꨌꩃ ꨨꨈꨰꩅ ꨝꨯꨩ ꨅꩍ ꨌꨳꨪꩇ ꨗꨯꨱ ꨓꨶꨬ ꨀꨳ ꨤꨫꨊꨫꩀ ꨅꨩ? ꨈꩍ ꨤꨬ ꨨꨭꨩ꩝ ꨈꩍ ꨤꨬ ꨤꨨꨪꩀ꩝ ꨨꨕꩍ ꨣꨤꨯꨩ ꨚꨎꨮꨩ꩝ ꨠꨢꩍ ꨦꨄꨰ ꨧꨩ ꨂꨣꩃ ꨚꨓꨯꨱ ꨔꨮꨭ ꨀꨗꨫꩅ ꨞꨭꩌ ꨞꩇ ꨢꨮꨭ ꨀꨗꩀ꩝ ꨨꨝꩉ ꨌꨰꩀ ꨆꨩ ꨀꨗꩀ ꨕꨴꨬ ꨕꨣꩍ ꨨꨯꨱꩀ ꨀꨆꨯꨱꩀ ꨎꨴꨭꩍ꩞ ꨤꨪꨆꨮꨭ ꨦꨄꨰ ꨦꨗꩃ ꨈꨤꩄ ꨆꨩ ꨓꨗꨫ ꨓꨘꩅ ꨗꨯꨱ꩞ ꨗꨈꩉ ꨥꨪꨎꨢ ꨌꩌꨛꨩ꩝ ꨨꨣꨬ ꩑꩑ ꨝꨪꨤꩆ ꩒ ꨔꨭꩆ ꩑꩒꩘꩓꩞ ꨟꨗꨯꨱꩀ ꨆꨮꨭ ꨗꨯꨱ ꨈꨤꩄ ꨕꨘ cri viꨘꨢ꩝ ꨟꨤꩌ ꨘꩆ ꨀꨊꨪꩆ ꨚꨴꨯꨱꩃ꩝ ꨀꨳ ꨚꨯꨱꩍ ꨈꨵꨯꨱꩃ ꨋꩇ ꨣꨤꨯꨩ ꨈꨪꨤꨰ ꨓꨢꩍ ꨓꨆꨑꨫꩂ꩞ ꨓꨮꩊ ꨚꨈꨯꨮꨩ꩝ ꨤꨫꨊꨫꩀ ꨨꨕꩍ ꨥꨮꩀ꩝ ꨂꨣꩃ ꨚꩆ ꨆꨯꨱꩀ ꨆꨥꨯꩌ ꨚꨓꨯꨱꩌ ꨟꨗꨯꨱꩀ ꨆꨮꨭ ꨈꨤꩄ ꨚꨳꨮꩍ ꨚꨔꨮꨭ: ꨊꨯꨱꩀ ꨝꨴꨬ ꨔꨮꨭ ꨤꩄ ꨇꨯꨱꩊ ꨕꨴꨬ ꨧꨪ ꨨꨝꩉ ꨗꨯꨱ ꨓꩃ ꨚꨎꨮꨩ꩝ ꨢꨮꨭ ꨘꩆ ꨨꨝꩉ ꨣꨟꨪ ꨣꨟꨪꩀ ꨆꨩ ꨈꨴꨭꩀ ꨧꨪ ꨟꨰ꩝ ꨕꨫ ꨊꨯꨱꩀ ꨡꨵꩃ ꨆꨤꨪꩆ ꨎꨶꨰ ꨀꨗꨫꩅ ꨣꨗꨮꩌ ꨎꨶꨰ꩝ ꨀꨕꨬ ꨦꨄꨰ ꨨꨝꩉ ꨚꨟꨓꨰ ꨚꨳꨮꩍ ꨆꨵꩀ ꨕꨴꨬ ꨟꨓꨰ꩞ ꨓꨭꩀ ꨟꩀ ꨨꨭꨩ ꨕꨗꨫꩂ ꨐꨭꨩ ꨡꨯꩍ ꨔꨬ ꨤꨎꩃ ꨨꨝꩉ ꨚꨟꨓꨰ꩝ ꨆꨟꨬ ꨣꨗꨰꩍ ꨓꨌꨯꨱꩍ ꨀꨝꨪꩍ꩝ ꨢꨮꨭ ꨘꩆ ꨚꨳꨮꩍ ꨆꨩ ꨟꨗꨶꨪꩋ ꨆꩆ ꨡꨯꩍ ꨨꨶꨮꩄ ꨝꨵꨯꨱꩍ ꨆꨵꩀ ꨀꨓꨯꨱꩃ꩝ ꨧꨯꨱꩃ ꨆꨩ ꨕꨴꨬ ꨓꨆꨪꩀ ꨟꨓꨰ ꨥꨮꩀ꩞ ꨠꨢꩍ ꨡꨯꩍ ꨈꨰꩅ ꨓꨆꨪꩀ ꨎꨳꨯꨮꩆ ꨢꨮꨩ ꨀꨕꨬ ꨦꨄꨰ ꨟꩀ ꨟꨰꩀ꩝ ꨟꨪꩆ ꨆꨢ ꨚꨴmg ꨎꨳꨯꨮꩆ ꨢꨮꨩ ꨚꨈ ꨈꨤꩄ꩝ ꨗꨫ ꨘꩆ ꨈꨯꨱꩆ꩝ ꨀꨕꨬ ꨦꨄꨰ ꨨꨝꩉ ꨋꩇ ꨓꨶꨬ꩝ ꨟꨢꩍ ꨅꩍ ꨋꩇ ꨢꨮꨩ ꨌꨳꨪꩇ ꨟꨓꨰ꩞ ꨀꨳꨮꩀ ꨝꨵꨯꨱꩍ ꨨꨣꩀ ꨚꨓꨯꨱ ꨌꩌꨛꨩ ꨚꨢꨶ꩝ ꨓꨶ ꨙꨯꨩ ꨟꨯꨱꩃ ꨨꨣꩀ ꨘꩆ ꨢꨮꨭ ꨨꨣꩀ ꨃꨥ ꨀꨓꨯꨱꩃ꩝ ꨘꩆ ꨝꨴꨬ ꨈꨯꨱꩆ ꨆꨩ ꨎꨝꨶꨮꩊ ꨣꨟꨪ ꨣꨟꨪꩀ꩝ ꨇꨯꨱꩊ ꨆꨮꨭ ꨟꨕ ꨀꨓꨯꨱꩃ ꨓꨟꨩ ꨝꩊ Cri ꨝꨩnoy ꨚꨈꨭꩍ ꨚꨕꨯꨮꩍ ꨗꨫ꩞ ꨗꨫ ꨨꨣꩀ ꨚꨓꨯꨱ ꨌꩌꨛꨩ ꨁꩆꨕꨴꨥꩉꨟꩆ ꩕ ꨚꨢꨶ ꨆꨩ ꨓꨶ ꨙꨯꨩ: ꨔꨮꨭ ꨤꩄ ꨦꨄꨰ ꨘꩆ ꨣꨗꨮꩌ ꨞꨭꩌ ꨞꩇ ꨆꨟꨪ ꨘꩆ ꨅꨩ ꨓꨆꨴꨲ ꨀꨓꨯꨱꩃ꩝ ꨆꨟꨪ ꨝꨳꩀ ꨍꨮꩍ ꨝꨶꨬ꩞ ꨆꨩꨟꨪꩆ ꨗꨫ ꨘꩆ ꨝꨳꩀ ꨓꨨ ꨚꨎꨮꨩ꩝ ꨓꨭꩀ ꨣꨬ ꨤꨎꩃ ꨌꨯꨱꩃ ꨆꨩ ꨞꨭꩌ ꨞꩇ ꨕꨴꨬ ꨨꨭꨩ ꨧꨳꩌ ꨟꨆꨴꨲ ꨝꨶꨬ ꨝꨰꩈ꩞ ꨅꩍ ꨓꨆꨴꨲ ꨇꨯꨱꩊ ꨐꨭꨩ ꨕꨣꩍ ꨨꨯꨱꩀ ꨀꨆꨯꨱꩀ ꨎꨴꨭꩍ꩞ ꨆꨟꨪ ꨤꨪꨥꨪꩀ ꨚꨎꨮꨩ ꨧꨩ ꨨꨓꨰ ꨝꨳꩀ ꨓꨶꨬ ꨀꨳ ꨤꨫꨊꨫꩀ꩝ ꨅꩍ ꨔꨮꨭ ꨨꨈꨰꩅ ꨀꨗꩀ ꨤꨪꨊꨪꩀ ꨚꨙꩉ ꨎꨩꨝꨭꩀ ꨟꨰ ꨓꨝꨳꩀ ꨤꨪꨝꨪꩀ ꨗꨫ꩞ ꨆꨟꨪ ꨗꨫ ꨚꨓꨯꨱ ꨝꨳꩀ꩝ ꨟꨪꩆ ꨨꨭꨩ ꨣꨤꨯꨩ ꨈꨴꨭꩀ ꨕꨤꩌ ꨀꨳ ꨅꩍ ꨋꩇ ꨓꨶꨬ ꨆꨟꨪ ꨨꨭꨩ꩝ ꨨꨭꨩ ꨣꨤꨯꨩ ꨅꩃ ꨥꨮꩀ꩝ ꨨꨰꩈ ꨆꨩ ꨟꩃ ꨨꨭꨩ꩝ ꨆꨟꨪ ꨚꨤꨶ ꨐꨭꨩ ꨣꨤꨯꨩ ꨡꨮꩃ ꨚꨎꨮꨩ ꨤꨎꩃ ꨢꨮꨭ ꨔꨯꨱꩍ꩞ ꨌꨯꨱꩃ ꨆꨩ ꨦꨄꨰ ꨔꨶꩀ ꨎꨝꨶꨮꩊ ꨟꨰꩀ꩝ ꨔꨭꩆ ꨨꨕꨬ ꨗꨫ꩝ ꨆꨟꨪ ꨗꨯꨱ ꨓꨚꨩ ꨀꨳ ꨆꨴꨲꩍ ꨚꨳꨮꩍ ꨓꨤꨝꩅ ꨕꨫ ꨀꨗꩀ ꨤꨫꨊꨫꩀ꩞ ꨠꨢꩍ ꨦꨄꨰ ꨨꨶꨮꩄ ꨙ ꨀꨗꩀ ꨤꨫꨊꨫꩀ ꨟꩀ ꨈꨵꩄ꩝ ꨘꩆ ꨅꩍ ꨇꨫꩂ ꨤꨶꨰ ꨎꨝꨶꨮꩊ꩝ ꨢꨮꨩ ꨕꨴꨬ ꨨꨝꩉ ꨀꨓꨯꨱꩃ ꨈꨮꩇ ꨧꨩ ꨡꨮꩃ꩞ ꨌꨯꨱꩃ ꨆꨩ ꨦꨄꨰ ꨦꨗꩃ ꨥꨮꩀ꩞ ꨀꨝꨪꩍ ꨨꨣꩀ꩞ ꨆꨴꨲꩍ ꨆꨤꩌ꩝ ꨟꨗꨯꨱꩀ ꨆꨮꨭ ꨈꨯꨱꩆ ꨓꨈꨯꩀ ꨈꨪꨤꨰ ꨗꨯꨱ ꨓꨚꨩ ꨕꨘ ꨌꨴꨪꨥꨪꨘꨢꨩ꩝ ꨧꨩ ꨡꨮꩃ ꨗꨫ꩝ ꨟꨗꨯꨱꩀ ꨨꨝꨮꩉ ꨀꨓꨯꨱꩃ ꨟꩀ ꨨꨭꨩ ꨝꩊ ꨌꨴꨪ ꨝꨗꨯꨩꩈ ꨌꩌꨛꨩ꩞ ꨎꨝꨶꨮꩊ ꨣꨞ ꨓꨝꨳꩀ ꨆꨵꨮꨭ ꨆꨥꨯꩌ꩝ ꨧꨩ ꨆꨥꨯꩌ ꨀꨓꨯꨱꩃ ꨕꨫ ꨈꩍ ꨀꨳ ꨨꨣꨬ ꨓꨈꨯꩀ꩝ ꨧꨩ ꨆꨥꨯꩌ ꨝꨪꨆꩆ ꨢꨮꨩ ꨀꨓꨯꨱꩃ ꨕꨫ ꨈꩍ ꨝꨪꨣꩀ꩞ ꨆꨥꨯꩌ ꨟꨗꨯꨱꩀ ꨆꨢꨶ ꨓꨶ ꨙꨯꨩ ꨝꨩ ꨀꨆꨯꨱꩀ ꨀꨓꨯꨱꩃ ꨕꨫ ꨈꩍ ꨟꨣꨯꨱꩃ ꨕꨗꨫꩂ꩞ ꨗꨈꩉ ꨥꨪꨎꨢ ꨌꩌꨛꨩ꩝ ꨨꨣꨬ ꩑꩓ ꨝꨪꨤꩆ ꩒ ꨔꨭꩆ ꩑꩒꩘꩓꩞ ꨝꩊ ꨌꨴꨪ ꨝꨗꨯꨩꩈ ꨘꩆ ꨧꨩ ꨕꨗꨫꩂ ꨕꨯꨱꩀ ꨕꨫ ꨈꩍ ꨀꨳ ꨨꨣꨬ ꨓꨟꨩ ꨕꨗꨯꨱ ꨌꨴꨪꨥꨪꨘꨢꨩ꩞ ꨤꨝꨪꩀ ꨘꩆ ꨨꨭꨩ ꨧꨩ ꨚꨵꨭꩍ ꨣꨪꨝꨭꨥ ꨎꨝꨶꨮꩊ ꨌꩌꨛꨩ ꨕꨯꨱꩀ ꨇꨪꩀ ꨨꨣꨬ ꨟꨤꩌ꩝ ꨟꨢꩍ ꨓꨆꨴꨲ ꨟꩀ ꨨꨭꨩ ꨕꨗꨫꩂ ꨥꨪꨎꨢ ꨝꩊ ꨌꩌꨛꨩ꩝ ꨨꨝꩉ ꨟꩀ ꨨꨭꨩ ꨝꩊ ꨌꨴꨪ ꨝꨗꨯꨩꩈ ꨆꨩ꩞ ꨕꨯꨱꩀ ꨕꨫ ꨈꨪꨤꨰ꩝ ꨨꨓꨰ ꨆꨮꨭ ꨨꨶꨮꩄ ꨆꨖ꩞ ꨀꨦꨪꩅ ꨓꨴ ꨟꨪꩆ ꨝꨵꨯꨱꩍ ꨅꨩ ꨔꨮꨭ ꨈꨰꩅ ꨟꨰ꩝ ꨔꨮꨭ ꨤꨰ ꨙ ꨕꨴꨬ ꨟꨓꨰ꩝ ꨟꨓꨰ ꨝꨵꨯꨱꩍ ꨨꨝꩉ ꨥꨮꩀ꩞ ꨗꨯꨱ ꨓꨮꩊ ꨆꨴꨲꩍ ꨕꨗꨯꨱ ꨡꨯꩍ ꨤꨟ ꨘꩌ ꨕꨴꨬ ꨆꨯꨱꩀ ꨚꨮꩉ ꨕꨫ ꨤꨊꨫꩀ꩞ ꨀꨳ ꨝꨪꨤꩆ ꨝꨳꩀ ꨨꨕꩍ꩝ ꨀꨳꨮꩀ ꨗꨯꨱ ꨈꩍ ꨌꨮꩀ ꨡꨯꩍ ꨀꨚꨶꨬ ꨎꨝꨶꨮꩊ ꨌꩌꨛꨩ ꨕꨯꨱꩀ ꨌꨭꩍ꩞ ꨈꨪꨤꨰ ꨟꨗꨯꨱꩀ ꨆꨮꨭ ꨅꩍ ꨌꨭꩍ ꨀꨚꨶꨬ ꨆꨢꨶ ꨨꨶꨮꩄ ꨙꨩ ꨎꨝꨶꨮꩊ ꨌꩌꨛꨩ ꨡꨯꩍ꩞ ꨟꨪꩆ ꨨꨭꨩ ꨀꨳ ꨝꨪꨤꩆ ꨨꨕꩍ ꨘꩆ ꨗꨯꨱ ꨓꨶꨬ ꨈꨮꩇ ꨨꨭꨩ꩞ ꨕꨯꨱꩀ ꨕꨯꩌ ꨚꨵꨭꩍ ꨟꨯꨮꩅ ꨓꨴ ꨟꨪꩆ ꨓꨟꨩ ꨓꨗꩍ ꨚꨎꨮꨩ꩝ ꨡꨯꩍ ꨕꨫ ꨘꩆ ꨀꨚꨶꨬ ꨡꨮꩃ ꨝꨵꨭꨥ ꨧꨯꨱꩃ ꨕꨯꩌ ꨚꨵꨭꩍ ꨎꨝꨶꨮꩊ ꨌꩌꨛꨩ ꨕꨯꨱꩀ ꨇꨪꩀ꩞ ꨇꨯꨱꩊ ꨐꨭꨩ ꨡꨯꩍ ꨟꨗꨯꨱꩀ ꨆꨮꨭ ꨚꨎꨮꨩ꩝ ꨝꨵꨯꨱꩍ ꨚꨕꨮꩌ ꨀꨚꨶꨬ ꨀꨢꨭꩀ ꨆꨕꨰꩅ ꨚꨔꨮꨭ꩞ ꨝꨵꨯꨱꩍ ꨣꨤꨯꨩ ꨆꨕꨰꩅ ꨝꨪꨆꩆ ꨥꨮꩀ꩝ ꨀꨢꨭꩍ ꨓꨈꨯꩀ ꨝꩀ ꨤꨫꨊꨫꩀ꩞ ꨕꨶ ꨆꨥꨯꩌ ꨕꨯꨮꩍ ꨀꨓꨯꨱꩃ ꨓꨟꨩ ꨚꨎꨮꨩ ꨘꩆ ꨓꨭ ꨙꨯꨩ ꨚꨙꩉ ꨟꨗꨯꨱꩀ ꨆꨮꨭ ꨙꨶꨮꩄ ꨓꨟꨩ ꨓꨗꩍ ꨕꨴꩍ ꨗꨯꨱ꩞ ꨕꨫ ꨀꨤ ꨀꨳ ꨝꨪꨤꩆ ꨨꨕꩍ꩝ ꨕꨯꩌ ꨣꨪꨝꨭꨥ ꨎꨝꨶꨮꩊ ꨟꨯꨱꩃ ꨚꩀ ꨕꨗꨫꩂ ꨝꨯꨩ ꨙꨶꨮꩄ ꨓꨟꨩ꩞ ꨕꨯꨱꩀ ꨕꨤꩌ ꨕꨗꨫꩂ꩝ ꨎꨝꨶꨮꩊ ꨌꩌꨛꨩ ꨌꨭꩀ ꨓꨝꨳꩀ ꨣꨤꨯꨩ ꨀꨝꨯꨱꩍ ꨀꨚꨶꨬ ꨡꨮꩃ ꨝꨵꨭꨥ ꨨꨕꩍ ꨢꨮꨭ ꨀꨳ ꨨꨣꨬ꩞ ꨎꨝꨶꨮꩊ ꨌꩌ ꨕꨯꨱꩀ ꨊꨯꨱꩀ ꨘꩆ ꨟꩀ ꨨꨗ ꨌꨭꩀ ꨡꨴꨮꩌ ꨓꨟꨩ ꨟꨗꨯꨱꩀ ꨆꨮꨭ꩞ ꨟꨗꨯꨱꩀ ꨆꨮꨭ ꨌꨭꩀ ꨝꨴꨮꩌ ꨡꨮꩃ ꨝꨵꨭꨥ ꨈꨤꩄ ꨥꨮꩀ꩞ ꨝꨵꨯꨱꩍ ꨨꨕꨬ ꨕꨫ ꨘꩆ꩝ ꨕꨗꨫꩂ ꨆꨢꨮꨭ ꨀꨚꨶꨬ ꨡꨮꩃ ꨚꨴꨯꨱꩃ ꨣꨤꨯꨩ꩞ ꨀꨔꩀ ꨚꨮꩉ ꨈꨵꨯꨱꩃ ꨊꨯꨱꩀ ꨕꨫ ꨤꨫꨊꨫꩀ꩞ ꨕꨫ ꨚꨕꩌ ꨚꨭꩄ ꨨꨭꨩ ꨅꨩ ꨘꩆ ꨎꨝꨶꨮꩊ ꨌꩌꨛꨩ ꨙꨶꨮꩄ ꨓꨝꨳꩀ ꨚꩀ ꨟꨗꨯꨱꩀ ꨆꨮꨭ꩞ ꨇꨯꨱꩊ ꨐꨭꨩ ꨨꨭꨩ ꨝꨳꩀ ꨣꨤꨯꨩ ꨠꨗꨶꨪꩋ ꨧꨯꨱꩃ ꨤꨪꨟꩆ꩞ ꨀꨓꨯꨱꩃ ꨈꨮꩇ ꨧꨩ ꨕꨟꨭꩀ ꨓꨴ ꨝꨵꨯꨱꩍ ꨎꨝꨶꨮꩊ ꨌꩌ ꨆꨵꩀ ꨙꨶꨮꩄ꩝ ꨟꨗꨯꨱꩀ ꨆꨮꨭ ꨝꨩ ꨈꨮꩇ ꨓꨟꨩ ꨝꨡꨮꩃ ꨕꨗꨫꩂ꩞ ꨓꨟꨩ ꨕꨤꩌ ꨘꩆ ꨟꨗꨯꨱꩀ ꨆꨮꨭ ꨌꨭꩀ ꨀꨝꨪꩍ꩝ ꨕꨶ ꨆꨥꨯꩌ ꨝꨪꨆꩆ ꨎꩃ ꨙꨶꨮꩄ ꨓꨟꨩ ꨚꨎꨮꨩ꩞ ꨡꨯꩍ ꨀꨓꨯꨱꩃ ꨈꨤꩄ ꨅꨩ ꨘꩆ ꨎꨝꨶꨮꩊ ꨌꩌ ꨙꨶꨮꩄ ꨤꨨꨪꩀ ꨀꨝꨪꩍ꩞ ꨤꨶꨪꩄ ꨕꨫ ꨘꩆ꩝ ꨟꨗꨯꨱꩀ ꨆꨮꨭ ꨟꩀ ꨨꨭꨩ ꨝꩊ ꨍꨴꨫ ꨝꨩꨗꨯꩈ꩞ ꨕꨤꩌ ꨝꩊ ꨡꨯꩍ ꨧꨩ ꨣꨩꨓꨭꩍ ꨜꨥ ꨌꨭꩀ ꨝꨪꨓꨭꨥ꩞ ꨆꨮꨭ ꨧꨯꨱꩃ ꨢꩃ ꨧꨯꨱ ꨗꨯꨱ ꨕꨶꩍ ꨕꨫ ꨕꨤꩌ ꨝꩊ꩝ ꨗꨯꨱ ꨈꩍ ꨀꨳ ꨨꨣꨬ ꨓꨟꨩ ꨡꨯꩍ ꨧꨩ ꨝꨪꨠꨯꩂ ꨌꩌꨛꨩ꩞ ꨕꨤꩌ ꨘꩆ ꨨꨭꨩ ꨆꨵꨮꨭ ꨂꨣꩃ ꨌꨭꩀ ꨀꨥ ꨡꨯꩂ ꨕꨯꨱꩀ ꨇꨪꩀ꩞ ꨢꩃ ꨧꨯꨱ ꨔꨴꨯꨱꩀ ꨙꨯꨱ ꨓꨝꨳꩀ ꨗꨯꨱ ꨓꨌꨯꨱꩍ ꨐꨭꨩ ꨟꨓꨰ ꨀꨝꨪꩍ꩝ ꨕꨣꩍ ꨨꨯꨱꩀ ꨢꨮꨭ ꨀꨳ꩞ ꨢꩃ ꨧꨯꨱ ꨟꩀ ꨟꩍ ꨕꨫ ꨣꨭꩇ ꨐꨭꨩ ꨝꨵꨯꨱꩍ ꨝꨴꨬ ꨆꨩ ꨆꨮꨭ ꨧꨩ ꨝꨯꨱꩍ ꨆꨯꨱꩃ ꨟꩍ꩝ ꨝꨵꨯꨱꩍ ꨐꨭꨩ ꨆꨵꩀ ꨗꨯꨱ꩞ ꨆꨮꨭ ꨟꨯꨱꩃ ꨝꨪꨠꨯꩂ꩝ ꨟꨯꨱꩃ ꨨꨕꨯꩌ ꨂꨣꩃ ꨟꨓꨰ꩝ ꨟꨓ ꨐꨭꨩ ꨕꨯꨱꩀ ꨡꨵꩀ꩝ ꨆꨮꨭ ꨦꨗꩃ ꨤꩄ ꨨꨝꩉ ꨚꨟꨓꨰ ꨈꨮꩇ ꨢꨮꨭ ꨗꨫ꩝ ꨆꨮꨭ ꨅꩍ ꨓꨆꨴꨲ꩝ ꨆꨮꨭ ꨓꨆꨴꨲ ꨓꨝꨳꩀ ꨕꨫ ꨗꨫ ꨟꨪꩆ꩞ ꨝꩊ ꨍꨴꨫ ꨝꨩꨗꨯꩈ꩝ ꨗꨈꩉ ꨥꨪꨎꨢ ꨌꩌꨛꨩ꩝ ꨨꨣꨬ ꩑꩖ ꨝꨪꨤꩆ ꨕꨶ ꨔꨭꩆ ꩑꩒꩘꩓꩞ ꨀꨚꨶꨬ ꨕꨯꨱꩀ ꨡꨮꩃ ꨝꨵꨭꨥ꩝ ꨧꨩ ꨚꨤꨬ ꨚꨝꩍ ꨓꨔꨪꩀ ꨝꨳꩀ ꨟꨕ ꨈꨗꨭꩇ ꨟꨪꩆ ꨅꩍ ꨕꨯꨱꩀ ꨨꨈꨰꩅ꩞ ꨟꨗꨶꨪꩋ ꨟꨓꨰ ꨕꨯꨱꩀ ꨈꨴꨮꩇ ꨤꨪꨝꨪꩀ꩝ ꨕꨣꩍ ꨕꨯꨱꩀ ꨡꨭꨥ꩞ ꨓꨚꨩ ꨨꨣꨬ ꨟꨪꩆ꩝ ꨟꨗꨯꨱꩀ ꨆꨮꨭ ꨨꨭꨩ ꨈꨯꨱꩆ ꨗꨯꨱ ꨀꨓꨯꨱꩃ ꨟꩀ ꨕꨗꨫꩂ ꨥꨪꨎꨢ꩞ ꨓꨭ ꨙꨯꨩ ꨥꩀ ꨧꨩ ꨨꨣꩀ ꨚꨢꨶ ꨆꨩ ꨎꨝꨶꨮꩊ꩝ ꨚꨶꨮꩄ ꨢꨮꨭ ꨗꨫ: ꨧꨩ ꨡꨮꩃ ꨀꨓꨯꨱꩃ ꨗꨫ꩝ ꨎꨝꨶꨮꩊ ꨕꨴꨬ ꨓꨆꨪꩀ ꨟꨪꩆ ꨀꨓꨯꨱꩃ ꨡꨮꩃ ꨚꨎꨮꨩ꩝ ꨠꨗꨶꨪꩋ ꨌꩌ ꨌꨮꩀ ꨣꨤꨯꨩ꩝ ꨅꩍ ꨝꩀ ꨝꩉ ꨟꨪꩆ ꨓꨆꨴꨲ ꨀꨓꨯꨱꩃ꩝ ꨢꨮꨭ ꨤꩄ ꨟꩀ ꨀꨝꨯꨱꩍ ꨝꨯꨩ ꨀꨓꨯꨱꩃ ꨝꨪꨓꨭꨥ꩞ ꨂꨣꩀ ꨗꨫ ꨇꨯꨱꩊ ꨐꨭꨩ ꨌꨤꩍ ꨌꨤꨪꩆ ꨚꨎꨮꨩ꩝ ꨙꨯꩌ ꨤꩄ ꨆꨩ ꨡꨯꩍ ꨕꨣꩍ ꨅꨩ ꨘꩆ ꨅꩍ ꨆꨩ ꨨꨯꨱꩀ ꨀꨳ ꨟꨓ꩞ ꨂꨣꩀ ꨗꨫ꩝ ꨇꨯꨱꩊ ꨐꨭꨩ ꨕꨯꨱꩀ ꨨꨶꨮꩄ꩝ ꨙꨶꨮꩄ ꨗꨯꨱ ꨕꨮꩇ ꨚꩀ ꨕꨗꨫꩂ ꨥꨪꨎꨢ꩞ ꨟꨪꩆ꩝ ꨚꨴꨲꩆ ꨢꨥ ꨐꨭꨩ ꨋꩇ ꨨꨝꩉ ꨎꩃ ꨢꨮꨭ ꨔꨯꨱꩍ꩞ ꨟꨗꨶꨪꩋ ꨟꩃ ꨆꩊ ꨙꨯꩌ ꨤꩄ “ꨀꨓꨯꨱꩃ ꨆꨤꨪꩆ ꨀꨓꨯꨱꩃ ꨆꨩ ꨕꨴꩍ”꩝ ꨟꨢꩍ ꨂꨣꩀ ꨗꨫ ꨐꨭꨩ ꨕꨯꨱꩀ ꨆꨵꨮꩆ dhen꩝ ꨘꩆ ꨕꨴꨬ ꨨꨝꩉ ꨚꨈꨶꨬ ꨀꨓꨯꨱꩃ ꨐꨭꨩ ꨥꨮꩀ꩞ ꨚꨈꨭꩍ ꨚꨈꨯꨮꨩ ꨗꨫ꩝ ꨣꨟꨪ ꨣꨟꨪꩀ ꨗꨯꨱ ꨀꨓꨯꨱꩃ ꨟꨰꩀ꩞ ꨎꨝꨶꨮꩊ ꨨꨕꨯꩌ ꨚꨵꨭꩍ ꨣꨪꨝꨭꨥ ꨟꨗꨶꨪꩋ꩝ ꨕꩀ ꨈꨮꩇ ꨗꨯꨱ ꨕꨫ ꨀꨤꨩ ꨨꨎꩆ꩝ ꨧꨩ ꨎꨤꩆ ꨟꨗꨶꨪꩋ ꨀꨓꩍ ꨓꨝꨳꩀ ꨤꨫꨊꨫꩀ꩞ ꨇꨯꨱꩊ ꨐꨭꨩ ꨕꨯꨱꩀ ꨗꨯꨱ ꨕꨯꨱꩀ ꨀꨕꨯꨱꩍ ꨨꨟꨪꩅ ꨧꩇ ꨚꨴꨯꨱꩃ ꨣꨤꨯꨩ꩝ ꨧꨯꨱꩃ ꨧꩇ ꨨꨎꩆ꩝ ꨧꩇ ꨌꨆꨤ ꨓꨴ꩝ ꨟꨯꨱꩃ ꨢꨮꨭ ꨤꨫꨊꨫꩀ ꨓꨔꨪꩀ ꨀꨕꨯꨱꩍ ꨧꨯꨱꩃ ꨟꨗꨶꨪꩋ꩞ ꨕꨴꨬ ꨗꨯꨱ꩟ ꨚꨳꨮꩍ ꨚꨓꨯꨱꩌ ꨕꨭꨑ ꨕꨴꨬ ꨗꨯꨱ꩟ ꨅꩍ ꨔꨬ ꨚꨆꩀ ꨕꨴꨬ ꨨꨭꨩ ꨕꨴꨬ ꨗꨯꨱ꩟ ꨟꨢꩍ ꨟꨓꨰ ꨤꨎꩃ ꨨꨭꨩ ꨆꨵꨯꨱꩍ ꨀꨕꩅ ꨤꨫꨊꨫꩀ꩝ ꨙꨶ ꨜꨶꨮꩊ ꨚꨓꨯꨱ ꨕꨴꨬ꩞ ꨟꨗꨯꨱꩀ ꨆꨮꨭ ꨗꨯꨱ ꨓꨮꩊ ꨈꩍ ꨀꨳ ꨨꨣꨬ ꨓꨈꨯꩀ ꨕꨗꨫꩂ ꨥꨪꨎꨢ꩝ ꨓꨭꩀ ꨘꩆ ꨚꨓꨯꨱ ꨌꩌꨛꨩ ꨚꨙꩉ ꨛꨯꨮ ꨕꨭꩅ ꨓꨝꨳꩀ꩝ ꨤꨪꨆꨮꨭ ꨌꨳꨪꩇ ꨤꩍ꩞ ꨟꨪꩆ ꨓꨭ ꨙꨯꨩ ꨓꨳꩇ ꨛꨯꨮ ꨕꨭꩅ ꨗꨯꨱ ꨧꩃ꩝ ꨚꨙꩉ ꨤꩄ꩝ ꨨꨝꩉ ꨚꨓꨯꨱ ꨓꨝꨳꩀ ꨤꨪꨆꨮꨭ ꨆꨩ ꨟꩃ ꨙꨯꩌ꩞ ꨓꨚꨩ ꨨꨣꨬ ꨅꩍ ꨡꨯꩍ ꨔꨬ ꨓꨝꨳꩀ ꨙꨯꩌ ꨥꨮꩀ ꨅꨩ꩝ ꨘꩆ ꨓꨶ ꨙꨯꨩ ꨝꨴꨬ ꨈꨯꨱꩆ ꨀꨓꨯꨱꩃ ꨓꨟꨩ꩞ ꨟꨪꩆ ꨡꨯꩍ ꨕꨗꨫꩂ ꨥꨪꨎꨢ ꨂꨣꩀ ꨗꨫ ꨆꨵꩀ ꨔꨯꨱꩍ ꨚꨎꨮꨩ ꨅꩍ ꨡꨯꩍ ꨂꨣꩃ ꨤꨬ ꨥꨮꩀ ꨅꨩ꩞ ꨝꨵꨯꨱꩍ ꨟꩀ ꨨꨭꨩ ꨕꨗꨫꩂ꩝ ꨟꨗꨯꨱꩀ ꨆꨮꨭ ꨗꨯꨱ ꨓꨝꨳꩀ ꨤꨪꨊꨪꨥ ꨤꨰꩀ ꨆꨕꨰ ꨕꨯꨱꩀ ꨥꨮꩀ꩞ ꨕꨶ ꨨꨣꨬ ꨨꨕꨬ꩝ ꨛꨯꨮ ꨕꨭꩅ ꨌꩌꨛꨩ ꨟꨰ ꨥꨮꩀ꩝ ꨂꨣꩀ ꨗꨫ ꨘꩆ ꨌꨬ ꨚꨓꨯꨱ ꨋꩆ ꨞꨕꨴꨕꨯꨮꨥ꩞ ꨝꩊ ꨥꨪꨎꨢ ꨂꨣꩀ ꨗꨫ ꨆꨵꩀ ꨔꨯꨱꩍ ꨅꩍ ꨕꨯꨱꩀ ꨧꨩ ꨂꨣꩃ ꨤꨬ꩝ ꨆꨢ ꨨꨤꨬ ꨚꨴꨯꨱꩃ ꨎꨳꨯꨮꩆ꩝ ꨇꨯꨱꩊ ꨐꨭꨩ ꨝꨩ ꨗꨯꨱ ꨀꨝꨪꩍ ꨚꨎꨮꨩ꩝ ꨟꨢꩍ ꨅꩍ ꨝꨩ ꨨꨭꨩ꩝ ꨌꨭꩍ ꨀꨝꨪꩍ꩝ ꨘꩆ ꨅꨩ ꨟꩀ ꨈꨰꩅ ꨨꨭꨩ ꨕꨫ ꨕꨗꨫꩂ ꨗꨫ꩞ ꨟꨗꨯꨱꩀ ꨆꨮꨭ ꨨꨭꨩ ꨈꨯꨱꩆ ꨗꨯꨱ ꨓꨝꨳꩀ ꨥꨪꩊ ꨕꨮꩉ ꨕꨗꨫꩂ ꨚꨳꨮꩍ ꨕꨶꩍ ꨟꩀ ꨟꨗꨶꨪꩋ ꨕꨯꨱꩀ ꨥꨮꩀ꩞ ꨟꨪꩆ ꨟꨗꨶꨪꩋ ꨆꨵꩀ ꨗꨯꨱ ꨀꨝꨪꩍ ꨚꨎꨮꨩ ꨘꩆ ꨟꩀ ꨨꨭꨩ ꨧꨩ ꨣꨩꨓꨭꩍ ꨂꨣꩃ ꨟꨪꩆ꩞ ꨨꨣꨬ ꨘꩆ꩝ ꨟꨗꨯꨱꩀ ꨆꨮꨭ ꨓꨟꨩ ꨕꨤꩌ ꨧꨩ ꨚꨤꨬ ꨚꨳꨮꩍ ꨟꩀ ꨟꨗꨶꨪꩋ꩝ ꨟꨪꩆ ꨅꩍ ꨨꨭꨩ ꨔꨬ ꨕꨯꨱꩀ ꨥꨮꩀ꩞ ꨝꨵꨯꨱꩍ ꨠꨨꨭ ꨀꨳ ꨣꨤꨯꨩ ꨘꩆ ꨆꨮꨭ ꨗꨯꨱ ꨕꨶꩍ ꨆꨶꩆ ꨀꨳ ꨟꨐꨭꩌ꩞ ꨚꨮꩍ ꨨꨓꨭꩀ ꨓꨝꨳꩀ ꨟꨪꩆ ꨕꨤꩌ ꨘꩆ ꨅꨩ ꨒꨮꩇ ꨀꨳ꩝ ꨟꨪꩆ ꨡꨯꩍ ꨧꨩ ꨂꨣꩃ ꨆꨟꨬ ꨕꨣ꩞ ꨡꨯꨱꩀ ꨐꨭꨩ ꨢꨮꨭ ꨣꨗꨰꩍ꩝ ꨟꨓ ꨚꨴꨯꨱꩃ꩞ ꨐꨭꨩ ꨈꩀ ꨟꨓ ꨟꨯꨱꩃ ꨆꨮꨭ꩝ ꨤꨪꨆꨮꨭ ꨤꩄ꩝ ꨎꨶꨰ ꨟꩀ ꨐꨭꨩ ꨎꨶꨰ꩞ ꨓꨭꩀ ꨘꩆ ꨨꨭꨩ ꨧꨩ ꨂꨣꩃ ꨝꨪꨆꩆ ꨃꨥ ꨆꨮꨭ꩝ ꨥꨮꩈ ꨢꨶꨮꩆ ꨚ ꨗꨯꨱ ꨅꨩ꩝ ꨨꨭꨩ ꨝꨪꨗꨰ ꨧꨳꩌ ꨝꨪꨗꨰ ꨕꨤꩌ ꨘꩆ ꨝꨯꨩ ꨟꨯꨱꩃ ꨟꨳꨯꨮꩅ ꨗꨯꨱ꩞ ꨆꨮꨭ ꨙꨯꩌ: ꨅꨩ꩝ ꨅꩍ ꨡꨯꩍ ꨀꨳ ꨅꨩ꩝ ꨝꨵꨯꨱꩍ ꨆꨮꨭ ꨈꩌ ꨨꨓꨪꩀ ꨈꨤꩄ꩞ ꨝꨵꨯꨱꩍ ꨟꨗꨯꨱꩀ ꨆꨮꨭ ꨗꨯꨱ ꨀꨓꩍ ꨕꨫ ꨚꨤꨬ ꨘꩆ꩝ ꨕꨤꩌ ꨓꨳꩆ ꨆꨮꨭ ꨝꨶꨬ ꨝꨰꩈ ꨦꨗꩃ ꨤꩄ ꨆꨮꨭ ꨕꨯꨱꩃ ꨨꨭꨩ ꨧꨩ ꨂꨣꩃ ꨟꨗꨶꨪꩋ꩞ ꨤꨪꨊꨪꨥ ꨕꨗꨫꩂ ꨥꨪꨎꨢ ꨌꩌꨛꨩ꩝ ꨨꨣꨬ ꩒꩗ ꨝꨪꨤꩆ ꨕꨶ ꨔꨭꩆ ꩑꩒꩘꩓꩞ ꨞꨕꨴꨕꨯꨮꨥ ꨟꨰ ꨥꨮꩀ꩝ ꨧꨩ ꨡꨮꩃ ꨗꨫ ꨐꨭꨩ ꨤꨪꨆꨮꨭ ꨓꨭ ꨙꨯꨩ ꨝꨴꨬ ꨎꨝꨶꨮꩊ ꨆꨩ ꨐꨭꨩ ꨗꨯꨱ ꨟꩀ ꨚꨓꨯꨱ ꨆꨢꨶ ꨚꨓꨯꨱ ꨘꩆ ꨙꨯꩀ ꨚꨟꨓꨰ ꨐꨭꨩ꩞ ꨓꨶ ꨙꨯꨩ ꨝꨳꩀ ꨍꨮꩍ ꨝꨶꨬ꩝ ꨚꨙꩉ ꨤꩌ ꨓꨲ ꨓꩃ ꨝꨩ ꨎꨝꨶꨮꩊ ꨗꨯꨱ ꨓꨶꨬ ꨞꨕꨴꨕꨯꨮꨥ꩞ ꨝꨵꨯꨱꩍ ꨗꨯꨱ ꨓꨮꩊ ꨌꨮꩀ ꨈꨵꨯꨱꩃ꩝ ꨞꨕꨴꨕꨯꨮꨥ ꨙꨯꩌ ꨤꩄ ꨌꨰꩀ ꨧꨩ ꨕꨴꨬ ꨐꨭꨩ ꨓꨟꨩ ꨟꨰꩀ꩝ ꨝꨵꨯꨱꩍ ꨐꨭꨩ ꨓꨟꨩ ꨌꨮꩀ ꨗꨯꨱ ꨤꨨꨪꩀ ꨅꨩ ꨟꨰ ꨈꨤꩄ ꨥꨮꩀ꩞ ꨌꩃ ꨟꨳꨯꨮꩅ ꨅꩍ ꨡꨯꩍ ꨞꨕꨴꨕꨯꨮꨥ ꨟꨰ꩝ ꨓꨭ ꨙꨯꨩ ꨟꩃ ꨔꨮꨭ ꨐꨭꨩ ꨚꨈꩅ ꨕꨴꨬ ꨚꨎꨮꨩ꩞ ꨝꨵꨯꨱꩍ ꨨꨣꨬ ꨨꨕꨬ ꨓꨶ ꨙꨯꨩ ꨚꨙꩅ ꨓꨴꨲꩂ ꨊꨭꩂ ꨝꨩ ꨎꨝꨶꨮꩊ ꨀꨓꨯꨱꩃ ꨓꨟꨩ ꨎꨭꨓꨮꩃ ꨌꩌꨛꨩ ꨕꨯꨱꩀ ꨕꨤꩌ ꨌꨮꩀ꩞ ꨌꨮꩀ ꨀꨳ ꨨꨭꨩ꩝ ꨗꨈꩉ ꨥꨪꨎꨢ ꨌꩌꨛꨩ꩝ ꩑꩖ ꩝ ꩓ ꩝ ꩑꩒꩘꩓꩞ ꨟꨗꨯꨱꩀ ꨆꨮꨭ ꨗꨯꨱ ꨓꨶꨬ ꨀꨤ ꨖꨯꨱꩃ ꨓꨟꨩ ꨌꨮꩀ꩝ ꨈꨵꨰ ꨟꨔꨴꨭꩌ ꨟꩅꨨꨴꨰꩈ꩝ ꨨꨭꨩ ꨨꨕꨯꩌ ꨜꨭꩆ ꨝꨳꩀ ꨚꨴꨯꨱꩃ ꨐꨭꨩ ꨚꨌꨮꩃ ꨀꨝꨪꩍ ꨀꨳ ꨨꨣꨬ꩝ ꨎꨤꩆ ꨝꨳꩀ ꨆꩆ ꨗꨯꨱ꩞ ꨢꩃ ꨧꨯꨱ ꨙꨯꩌ ꨧꨯꨱꩃ ꨆꨮꨭ: ꨧꨩ ꨡꨮꩃ ꨗꨫ ꨆꨆꨮꩍ ꨣꨤꨯꨩ ꨆꨮꨭ ꨡꨯꩍ ꨈꨰꩅ ꨅꨩ ꨅꩍ ꨒꨮꩇ꩝ ꨆꨮꨭ: ꨎꨶꨰ ꨦꨗꩃ ꨣꨤꨯꨩ ꨎꨶꨰ ꨐꨭꨩ: ꨨꨲ ꨕꨯꨱꩀ ꨨꨕꩉ ꨕꨯꩌ ꨂꨣꩃ ꨆꨮꨭ ꨚꨟꨓꨰ ꨤꨬ? ꨟꩃ ꨨꨣꨬ ꨘꩆ ꨗꨯꨱ꩝ ꨆꨤꨮꩌ ꨨꨤꨬ ꨆꨮꨭ ꨤꨎꩃ ꨙꨪꩍ ꨤꨚꨬ ꨡꨯꩍ ꨐꨭꨩ ꨘꩆ ꨙꨪꩍ ꨅꨩ ꨨꨭꨩ꩞ ꨠꨤꩌ ꨆꨝꨴꨶꨰ ꨆꨮꨭ ꨡꨯꩍ ꨐꨭꨩ ꨥꨮꩀ꩝ ꨐꨭꨩ ꨌꨭꩀ ꨀꨥ ꨡꨯꩂ ꨝꩀ ꨕꨣꩍ꩝ ꨓꨊꨪꩆ ꨐꨭꨩ ꨚꩆ ꨀꨆꨯꨱꩀ꩝ ꨀꨆꨯꨱꩀ ꨘꩆ ꨟꨯꨱꩃ ꨚꩀ ꨆꨮꨭ꩝ ꨈꨮꩌ ꨟꨯꨱꩃ ꨈꨮꩌ ꨆꨵꨯꨱ꩝ ꨝꨵꨯꨱꩍ꩝ ꨝꨵꨭꩍ ꨕꨣꩍ ꨕꨫ ꨡꨯꨱꩀ ꨆꨮꨭ꩞ ꨆꨮꨭ: ꨚꨮꩃ ꨢꩃ ꨀꨇꩆ ꨈꨤꩄ ꨤꨚꨬ ꨘꩆ ꨆꨮꨭ ꨨꨶꨮꩄ ꨝꨳꩀ꩝ ꨠꨢꩍ ꨎꨝꨶꨮꩊ ꨌꩌꨛꨩ ꨆꨴꩍ ꨀꨓꨯꨱꩃ ꨂꨣꩀ ꨗꨫ ꨢꨮꨩ ꨇꨯꨱꩊ ꨆꨮꨭ ꨟꨓꨰ ꨟꨪꩆ! ꨟꨕ ꨓꨟꨩ ꨌꨮꩀ ꨟꨕ ꨡꨯꩍ ꨣꨤꨯꨩ ꨀꨗꩀ꩝ ꨡꨯꩍ ꨣꨪꨟꨯꨱꩃ꩝ ꨤꨪꨟꩆ꩝ ꨆꨭꨝꨭꨥ꩝ ꨌꨳꨪꩌ꩝ ꨆꨴꨩ꩞ ꨟꨗꨯꨱꩀ ꨐꨭꨩ ꨡꨯꩍ ꨟꨗꨶꨪꩋ ꨘꩆ ꨙꨶꨮꩄ ꨤꨨꨪꩀ ꨀꨝꨪꩍ꩞ ꨓꨮꩊ ꨀꨳ ꨨꨣꨬ ꨓꨈꨯꩀ ꨆꨴꨲꩍ꩝ ꨟꨗꨯꨱꩀ ꨆꨮꨭ ꨗꨯꨱ ꨓꨮꩊ ꨣꨅꩆ ꨚꨴꨯꨱꩃ꩝ ꨕꨶ ꨈꩍ ꨨꨭꨩ ꨌꨮꩀ ꨝꨳꩀ ꨈꨵꨯꨱꩃ꩞ ꨤꨪꨥꨪꩀ ꨤꨪꨥꨪꩀ ꨡꨯꩍ ꨌꨴꨯꨱꩀ ꨨꨭꨩ ꨀꨳ ꨠꩅ ꨙꨶꨮꩄ ꨕꨫ ꨚꨝꨭꩂ ꨓꨴꨭꩆ꩞ ꨓꨮꩊ ꨟꨤꩌ ꨦꨭꩇ ꨝꨵꨯꨱꩍ ꨨꨟꨪꩅ ꨧꩇ ꨤꨪꨟꩆ꩝ ꨆꨓꨮꩃ ꨣꨤꨯꨩ꩝ ꨅꩍ ꨔꨮꨭ ꨤꩄ ꨤꨪꨟꩆ ꨌꨮꩀ ꨨꨰ ꨤꨪꨟꩆ ꨎꨝꨶꨮꩊ ꨌꩌꨛꨩ ꨗꨫ꩞ ꨧꩇ ꨘꩆ ꨟꨕ ꨨꨣꨬ ꨟꨕ ꨆꨓꨮꩃ ꨥꨮꩀ꩝ ꨝꨵꨯꨱꩍ ꨓꨗꩍ ꨢꨭꩍ ꨢꨭꩍ꩝ ꨧꨩ ꨣꨪꨝꨭꨥ ꨀꨗꩀ ꨤꨪꨟꩆ ꨎꨰꩍ ꨈꨮꩇ ꨙꨶꨮꩄ ꨚꩀ ꨟꨗꨯꨱꩀ ꨆꨮꨭ꩞ ꨡꨯꩍ ꨅꩍ ꨔꩈ ꨙꨪꩀ ꨐꨭꨩ ꨅꨩ꩝ ꨐꨭꨩ ꨙꨶꨮꩄ ꨓꨮꩊ ꨤꨬ ꨐꨭꨩ ꨈꨗꨭꩍ ꨓꨚꨴꩍ ꨓꨮꩊ ꨘꩆ ꨕꨫ ꨨꨭꨩ ꨈꨰꩅ ꨚꨆꩍ ꨐꨭꨩ ꨨꨭꨩ ꨅꨩ꩞ ꨟꨗꨯꨱꩀ ꨆꨮꨭ ꨙꨶꨮꩄ ꨓꨚꨴꩍ ꨓꨚꨴꨪꩂ ꨀꨝꨪꩍ꩝ ꨝꨵꨯꨱꩍ ꨤꨪꨆꨭꩀ ꨨꨭꨩ ꨧꨩ ꨕꨴꨬ ꨤꨪꨟꩆ ꨈꨗꨭꩍ ꨆꨮꨭ ꨓꨚꨴꩍ ꨓꨈꨯꩀ ꨕꨫ ꨜꨭꩆ꩝ ꨓꨭꩀ ꨘꩆ ꨓꨆꨰ ꨓꨊꨪꩆ ꨆꨮꨭ ꨅꩍ ꨥꨮꩀ ꨨꨭꨩ꩝ ꨡꨯꩍ ꨕꨶ ꨈꩍ ꨌꨮꩀ ꨎꨝꨶꨮꩊ ꨌꩌꨛꨩ ꨚꨣꩍ ꨝꨪꨣꨭꨥ꩝ ꨚꨣꩍ ꨆꨢꨮꨭ ꨓꨴꨭꩆ ꨆꨓꨮꩀ ꨟꨗꨯꨱꩀ ꨆꨮꨭ꩞ ꨝꨵꨯꨱꩍ ꨇꨯꨱꩊ ꨐꨭꨩ ꨕꨯꨱꩀ ꨕꨭ ꨈꩍ ꨆꨕꨭꨥ ꨓꨟꨩ ꨀꨓꨯꨱꩃ꩞ ꨓꨭꩀ ꨘꩆ ꨆꨮꨭ ꨈꨵꨰꩍ ꨣꨤꨯꨩ ꨝꨵꨯꨱꩍ ꨆꨮꨭ ꨚꨪꩀ ꨟꨓ ꨙꨪꩍ ꨥꨮꩉ꩞ ꨆꨮꨭ ꨙꨪꩍ ꨤꨚꨬ ꨡꨯꩍ ꨀꨝꨪꨤꨮꩍ꩝ ꨆꨆꨮꨭ ꨓꨊꨪꩆ ꨐꨭꨩ ꨝꨁꨪꩂ ꨓꨟꨩ ꨀꨆꨯꨱꩀ ꨆꨮꨭ꩝ ꨝꨵꨯꨱꩍ ꨆꨓꨮꩀ ꨆꨮꨭ ꨓꨴꨭꩆ ꨀꨳ꩝ ꨆꨮꨭ ꨟꨣꩅ ꨥꨮꩀ ꨓꨈꨯꩀ ꨟꨪꩆ ꨅꨩ ꨨꨭꨩ꩝ ꨝꨵꨯꨱꩍ ꨨꨕꩍ ꨟꨓ ꨓꨝꨳꩀ ꨟꩃ ꨔꨮꨭ ꨨꨭꨩ ꨟꨗꨶꨪꩋ ꨔꩄ ꨀꨳ ꨕꨫ ꨆꨮꨭ꩞ ꨝꩆ ꨘꩆ ꨀꨆꨯꨱꩀ ꨆꨤꨭ ꨆꨤꨪꩀ ꨎꨭꩀ꩝ ꨐꨭꨩ ꨟꨯꨱꩃ ꨚꩀ ꨆꨮꨭ ꨝꨵꨯꨱꩍ ꨙꨯꩌ: ꨟꨕꨮꩍ ꨚꨎꨮꨩ? ꨆꨩ ꨗꨫ ꨛꨯꨩꩀ ꨓꨴꨭꩆ ꨈꨵꨰꩍ ꨝꨳꩀ! ꨗꨯꨱ ꨓꨚꨩ ꨈꩍ ꨕꨯꨮꩍ꩞ ꨓꨭꩀ ꨘꩆ ꨆꨩ ꨟꩃ ꨡꨯꩍ ꨕꨯꩌ ꨣꨪꨝꨭꨥ ꨎꨝꨶꨮꩊ ꨟꨯꨱꩃ ꨤꨯꨱꨥ ꨝꨪꨆꩆ ꨕꨯꨱꩀ ꨚꩀ ꨘꩆ꩞ ꨝꨵꨯꨱꩍ ꨡꨯꩍ ꨎꨝꨶꨮꩊ ꨌꩌꨛꨩ ꨕꨯꨱꩀ ꨚꩆ ꨓꨴꨶꨰ꩝ ꨟꩃ ꨔꨮꨭ ꨐꨭꨩ ꨟꩀ ꨕꨴꨬ ꨚꨎꨮꨩ꩞ ꨅꩍ ꨡꨯꩍ ꨢꩃ ꨧꨯꨱ ꨕꨯꨱꩀ ꨚꩀ ꨨꨤꨬ꩝ ꨔꨮꨭ ꨤꩄ ꨐꨭꨩ ꨟꨓꨰ ꨨꨰ ꨨꨕꨳꨪꩇ? ꨟꨪꩆ ꨟꩃ ꨨꨣꨬ ꨘꩆ ꨅꩍ ꨈꨯꨱꩀ ꨐꨭꨩ ꨥꨮꩀ꩞ ꨎꨭꨓꨮꩃ ꨎꨝꨶꨮꩊ ꨌꩌꨛꨩ ꨕꨫ ꨌꨮꩀ ꨀꨳ ꨨꨭꨩ꩝ ꩑꩗ ꩝ ꩓ ꩝ ꩑꩒꩘꩓꩞ ꨚꩀ ꨀꨘꩀ ꨆꨮꨭ ꨘꩆ ꨧꨩ ꨕꨗꨫꩂ ꨆꨢꨮꨭ ꨝꨪꨆꩆ ꨥꨮꩀ꩝ ꨕꨗꨫꩂ ꨗꨫ ꨈꨵꨯꨱꩃ ꨢꨮꨭ ꨜꨭꩆ ꨓꨨ꩝ ꨥꨪꩊ ꨕꨮꩉ ꨨꨭꨩ ꨣꨝꨯꨱꩃ ꨕꨤꩌ꩝ ꨀꨤ ꨣꨝꨯꨱꩃ ꨨꨭꨩ ꨈꨰ ꨨꨤꨶꨮꩀ꩞ ꨇꨯꨱꩊ ꨐꨭꨩ ꨣꨞ ꨟꨗꨯꨱꩀ ꨆꨮꨭ ꨓꨝꨳꩀ ꨣꨤꨯꨩ ꨆꨥꨯꩌ ꨀꨦꨪꩅ꩝ ꨝꨩ ꨗꨯꨱ ꨣꨤꨯꨩ ꨤꨪꨝꨪꩀ ꨚꨳꨮꩍ ꨋꩀ꩞ ꨆꨥꨯꩌ ꨆꨮꨭ ꨨꨭꨩ ꨕꨶ ꨚꨵꨭꩍ ꨂꨣꩃ ꨗꨯꨱ ꨚꩀ ꨓꨗꩍ ꨌꨮꩀ ꨚꨳꨮꩍ ꨚꨤ ꨓꨊꨮꩈ꩞ ꨕꨶ ꨝꨪꨤꩆ ꨨꨕꨬ ꨕꨫ ꨌꨮꩀ ꨀꨳ ꨨꨭꨩ꩝ ꩕ ꩝ ꩑꩒꩘꩓꩞ ꨨꨣꨬ ꨟꨗꨯꨱꩀ ꨆꨮꨭ ꨋꩀ꩝ ꨟꨤꩌ ꨟꨗꨯꨱꩀ ꨆꨮꨭ ꨝꩄ ꨧꩇ ꨌꩌ꩞ ꨆꨢꨶ ꨆꨮꨭ ꨕꩍ ꨈꨗꨭꩍ ꨘꩆ ꨝꩄ ꨝꨳꩀ ꨕꨴꩍ꩞ ꨂꨣꩃ ꨇꨪꩀ ꨡꨯꩍ ꨢꨮꨭ ꨘꩆ ꨘꩆ ꨃꨥ ꨆꨮꨭ ꨈꨤꩄ ꨙꨯꩌ: ꨢꨶꨮꩆ ꨚ꩝ ꨨꨲ ꨝꩄ ꨧꩇ ꨝꨳꩀ ꨕꨴꩍ꩝ ꨉꨮꩍ ꨣꨤꨯꨩ꩝ ꨘꩆ ꨆꨩꩈ ꨎꨥ ꨆꨩ ꨨꨲ ꨧꨩ ꨝꨴꨭꩀ꩞ ꨆꨮꨭ ꨡꨯꩍ ꨨꨲ ꨧꨩꨟꨪ ꨧꨠꩉ ꨘꩆ ꨚꨙꩉ ꨨꨲ ꨗꨯꨱ ꨚꨝꨵꨬ ꨓꨊꨮꩈ ꨕꨫ ꨚꨤꨬ ꨕꨗꨫꩂ꩞ ꨚꨈꨭꩍ ꨗꨫ ꨗꨯꨱ ꨧꨯꨱꩃ ꨆꨮꨭ ꨐ! ꨝꨯꨩ ꨆꨮꨭ ꨙꨯꩌ ꨔꨯꨱꩃ ꨨꨲ ꨧꨩ ꨝꨯꨱꩍ ꨓꨴ꩝ ꨎꨶꨰ ꨆꨵꩀ ꨙꨶꨮꩄ ꨕꨮꩇ꩝ ꨂꨣꩃ ꨟꩀ ꨨꨭꨩ ꨂꨣꩃ ꨚꨟꨓꨰ ꨨꨲ꩞ ꨟꩃ ꨕꨫ ꨨꨣꨬ ꨘꩆ ꨆꨮꨭ ꨅꩍ ꨋꩇ ꨓꨴꩀ ꨥꨮꩀ ꨅꨩ꩞ ꨨꨣꨬ ꨓꨚꨩ ꨨꨣꨬ ꨆꨮꨭ ꨚꨎꨳꨮꩂ ꨓꨊꨮꩈ ꨓꨟꨩ ꨕꨗꨫꩂ ꨚꨝꨵꨬ꩞ ꨆꨮꨭ ꨚꨝꨵꨬ ꨙꨶꨮꩄ ꨣꨤꨯꨩ ꨘꩆ ꨣ ꨇꨪꩀ ꨝꨳꩀ ꨍꨮꩍ ꨝꨶꨬ꩞ ꨝꨳꩀ ꨣꨤꨯꨩ ꨟꨗꨶꨪꩋ ꨟꨰ ꨕꨫ ꨗꨫ ꨚꨓꨯꨱꩌ ꨈꨮꩇ꩝ ꨨꨭꨩ ꨂꨣꩃ ꨕꨫ ꨗꨈꩉ ꨆꨮꨭꨔꨣ꩝ ꨚꩆꨕꨭꨣꩃꨈꨩ꩝ ꨨꨭꨩ ꨟꨗꨶꨪꩋ ꨌꨮꩀ꩝ ꨟꨗꨶꨪꩋ ꨓꨔꨪꩀ ꨕꨯꨱꩀ ꨧꨯꨱꩃ ꨈꨮꩇ ꨙꨯꩌ ꨧꨩ ꨧꩇ ꨌꩌꨛꨩ꩝ ꨎꩃ ꨨꨭꨩ ꨢꨶꨮꩆ ꨧꨯꨱꩃ ꨎꨥ ꨟꨰ ꨚꨓꨯꨱꩌ ꨚꨳꨮꩍ ꨀꨓꨯꨱꩃ ꨎꨝꨶꨮꩊ ꨟꨯꨱꩃ ꨤꨯꨱꨥ꩝ ꨆꨮꨭ ꨤꨎꩃ ꨡꨯꩍ ꨣꨤꨯꨩ ꨂꨣꩃ ꨤꨯꨱꨥ ꨙꨶꨮꩄ ꨓꨝꨳꩀ ꨗꨫ ꨓꨴ ꨥꨮꩀ꩞ ꨕꨫ ꨀꨓꩍ꩝ ꨨꨟꨪꩅ ꨧꩇ ꨈꨪꨗꨮꩃ ꨧꨯꨱꩃ ꨧꩇ ꨆꨕꨰꩅ ꨟꩃ ꨔꨮꨭ ꨚꨓꨴ ꨌꩌꨛꨩ ꨕꨯꨱꩀ ꨟꨰ꩞ ꨡꨯꩍ ꨚꨓꨴ ꨔꨮ ꨎꩃ ꨨꨝꩉ ꨕꨮꩃ ꨓꨚꩀ꩝ ꨛꨯꨩꩀ ꨓꨊꨪꩆ꩝ ꨆꨭꩀ ꨀꨆꨯꨱꩀ꩞ ꨚꨓꨴ ꨙꨪꩀ ꨕꨫ ꨤꨪꨟꩆ꩝ ꨗꨯꨱ ꨓꨶꨬ ꨨꨭꨩ ꨧꨩ ꨣꨪꨝꨭꨥ ꨎꨝꨶꨮꩊ꩝ ꨚꨓꨴ ꨍꨴꨫ ꨨꨣꨪꨎꨪꩅ ꨘꩆ ꨀꨗꩀ ꨆꨌꨶ ꨚꨓꨯꨱ꩞ ꨚꨓꨴ ꨔꨮꨭ ꨦꨗꩃ ꨀꨓꩍ꩝ ꨝꨳꩀ ꨎꨁꨯꨩꩈ꩝ ꨘꩆ ꨈꨴꨭ ꨚꨍꨰ ꨎꨝꨶꨮꩊ ꨌꩌꨛꨩ ꨂꨣꩀ ꨗꨫ꩞ ꨆꨤꨮꩌ ꨘꩆ ꨚꨝꨵꨬ ꨓꨊꨮꩈ ꨝꨵꨯꨱꩍ ꨆꨮꨭ ꨣꨟꨪ ꨣꨟꨪꩀ ꨗꨯꨱ ꨧꩃ꩝ ꨟꨪꩆ ꨨꨟꨪꩅ ꨧꩇ ꨀꨕꨯꨱꩍ ꨕꨫ ꨀꨓꩍ꩞ ꨧꩇ ꨧꨩ ꨂꨣꩃ ꨆꨟꨬ ꨚꨮꩃ ꨝꨳꩀ ꨚꨕꨴꨶꨰ꩝ ꨧꩇ ꨀꨕꨯꨱꩍ ꨢꨮꨭ ꨗꨫ: ꨨꨝꩉ ꨦꨄꨰ ꨗꨯꨱ ꨅꩍ ꨙꨯꩌ ꨧꨩ ꨝꨯꨱꩍ ꨚꨳꨮꩍ ꨆꨩ ꨀꨕꨬ ꨕꨯꨱꩀ ꨌꩃ ꨤꨶꨪꩄ ꨨꨣꨬ ꨕꨫ ꨕꨤꩌ ꨈꨵꨰ ꨌꨮꩀ ꨟꨗꨶꨪꩋ ꨕꨯꨱꩀ ꨚꩀ ꨨꨤꨬ? ꨌꨰꩀ ꨆꨩ ꨀꨕꨬ ꨕꨯꨱꩀ ꨌꩃ ꨨꨟꨳꨯꨮꩅ ꨌꩌꨛꨩ ꨗꨈꩉ ꨤꨮꩈ ꨂꨣꩀ ꨗꨫ ꨚꨙꨪꩀ ꨛꨩꨙꨶ ꨤꩄ ꨔꨮꨭ ꨨꨣꨬ ꨨꨕꨬ ꨕꨴꨬ ꨨꨭꨩ ꨥꨮꩀ ꨚꨓꨯꨱꩌ꩞ ꨚꨮꩃ ꨚꨕꨴꨶꨰ ꨣꨤꨯꨩ꩝ ꨢꨮꨭ ꨤꩄ ꨨꨕꨳꨮꩇ ꨕꨯꨱꩀ ꨌꩃ ꨚꨧꩃ ꨀꨓꨯꨱꩃ ꨆꨤꨪꩆ ꨅꨩ ꨆꨩ ꨟꨰ꩞ ꨆꨮꨭ ꨗꨯꨱ ꨚꩀ ꨘꩆ ꨚꨳꨮꩍ ꨀꨳꨮꩀ꩝ ꨟꨯꨱꩃ ꨔꨬ ꨀꨕꨯꨱꩍ ꨝꨯꨩ ꨉꨮꩍ ꨣꨤꨯꨩ꩞ ꨕꨯꨱꩀ ꨕꨫ ꨕꨤꩌ ꨆꨴꨲꩍ ꨣꨤꨯꨩ ꨂꨣꩃ ꨡꨯꩍ ꨧꨩ ꨅꩃ ꨓꨨ ꨕꨯꨱꩀ ꨚꩆ ꨣꨝꩇ꩞ ꨕꨯꨱꩀ ꨆꨆꨬ ꨅꩃ ꨨꨭꨩ ꨧꨩ ꨂꨣꩃ ꨆꨟꨬ ꨧꨳꩌ ꨝꨪꨗꨰ꩝ ꨢꨯꨱꩌ ꨤꩄ ꨆꨮꨭ ꨡꨯꩍ ꨐꨭꨩ ꨚꩀ ꨨꨤꨬ ꨅꨩ ꨚꨎꨮꨩ꩞ ꨓꨭꩀ ꨘꩆ ꨆꨮꨭ ꨝꨶꨬ ꨣꨤꨯꨩ꩝ ꨒꨮꩇ ꨐꨭꨩ ꨚꨎꨮꨩ꩝ ꨆꨟꨬ ꨕꨯꨱꩀ ꨕꨫ ꨕꨤꩌ ꨚꨆꨭꩆ꩞ ꨓꨭꩀ ꨘꩆ ꨆꨮꨭ ꨅꩍ ꨓꨆꨴꨲ ꨗꨯꨱ ꨧꩃ꩞ ꨓꨮꩊ ꨦꨭꩇ ꨟꩃ ꨆꨮꨭ ꨗꨯꨱ ꨓꨮꩊ ꨆꨟꨬ ꨚꨳꨮꩍ ꨙꨯꩌ: ꨆꨟꨬ ꨤꨮꩈ! ꨐꨭꨩ ꨥꨮꩀ ꨡꨯꨱꩀ ꨟꨯꨱꩃ ꨆꨮꨭ꩝ ꨒꨮꩇ ꨐꨭꨩ ꨚꨎꨮꨩ꩝ ꨟꨓ ꨚꨴꨯꨱꩃ꩝ ꨡꨯꨱꩀ ꨢꨮꨭ ꨣꨗꨰꩍ꩞ ꨐꨭꨩ ꨙꨯꩌ: ꨨꨭꨩ ꨈꨰꩅ ꨦꨄꨰ? ꨆꨮꨭ: ꨆꨟꨬ ꨕꨫ ꨨꨭꨩ ꨨꨕꨮꩉ ꨆꨮꨭ ꨅꩍ? ꨐꨭꨩ: ꨦꨄꨰ ꨘꩆ ꨔꨬ? ꨆꨮꨭ: ꨕꨴꨬ ꨈꨯꨱꩀ ꨈꨮꩇ ꨚꨎꨮꨩ꩝ ꨆꨟꨬ ꨕꨯꨱꩀ ꨕꨫ ꨕꨤꩌ ꨚꨆꨭꩆ ꨆꨮꨭ ꨡꨯꩍ ꨟꨪꩆ ꨅꨩ ꨟꩀ꩞ ꨐꨭꨩ: ꨀ ꨨꨕꩉ ꨚꨎꨮꨩ꩝ ꨢꨮꨭ ꨨꨈꨰꩅ ꨦꨄꨰ ꨕꨯꨱꩀ ꨙꨪ? ꨆꨮꨭ ꨙꨯꩌ ꨂꨣꩀ ꨗꨫ ꨆꨮꨭ ꨕꨯꨱꩀ ꨚꨝꨵꨬ ꨓꨊꨮꩈ ꨚꩀ ꨗꨫ꩞ ꨝꨵꨯꨱꩍ ꨅꩃ ꨓꨨ ꨓꨝꨳꩀ ꨡꨯꩍ ꨆꨮꨭ ꨅꩃ ꨓꨨ ꨓꨐꨫ: ꨔꨬ ꨘꩆ ꨀꨗꩀ? ꨆꨟꨬ: ꨝꩆ ꨚꨤꨯꨱ ꨆꨩ ꨕꨨꨵꩍ ꨨꨪꩆ꩝ ꨅꩃ ꨤꨮꩈ꩞ ꨅꩃ: ꨀꨗꩀ ꨋꩆ ꨈꨰꩅ? ꨆꨮꨭ: ꨕꨨꨵꩀ ꨋꩆ ꨢꨶꨮꩆ ꨚ꩝ ꨕꨯꨱꩀ ꨕꨶ ꨀꨗꩀ ꨅꩃ ꨋꩆ ꨨꨈꨰꩅ? ꨅꩃ: ꨆꨮꨭ ꨋꩆ ꨥ ꨆꨩ꩝ ꨗꨫ ꨘꩆ ꨆꨠꨶꨮꩆ ꨆꨟꨬ ꨆꨮꨭ ꨋꩆ ꨀꨳ ꨓꨴꩃ꩞ ꨆꨮꨭ ꨟꩃ ꨓꨐꨫ: ꨅꩃ ꨤꨮꩈ ꨕꨯꨱꩃ ꨕꨨꨵꩀ ꨧꨩ ꨈꨴꨭꩀ ꨨꨭꨩ ꨨꨤꨬ? ꨅꩃ: ꨙꨯꩌ ꨟꨰꩀ! ꨆꨮꨭ: ꨝꨳꨯꨮꩉ ꨗꨫ ꨦꨭꩇ ꨚꨎꨮꨩ꩝ ꨕꨨꨵꩀ ꨓꨝꨳꩀ ꨕꨗꨫꩂ ꨗꨫ ꨅꨩ ꨨꨭꨩ꩝ ꨘꩆ ꨝꨴꨬ ꨆꨩ ꨕꨨꨵꩀ ꨙꨪꩍ ꨥꨮꩀ ꨧꨩ ꨟꨤꩌ꩞ ꨀꨳ ꨓꨴꩃ: ꨅꩍ ꨨꨭꨩ꩝ ꨟꨢꩍ ꨒꨮꩇ ꨨꨈꨰꩅ ꨨꨝꩉ! ꨅꩃ: ꨎꨶꨰ ꨙꨯꩌ ꨢꨮꨭ ꨘꩆ꩝ ꨕꨤꨮꨭ ꨕꨯꨮꩍ ꨐꨭꨩ ꨕꨯꨱꩃ ꨀꨗꩀ ꨆꨩ ꨟꩃ ꨀꨗꩀ ꨕꨯꨱꩀ ꨎꩀ ꨗꨫ꩞ ꨝꨵꨯꨱꩍ ꨅꩃ ꨙꨯꩌ ꨧꨯꨱꩃ ꨆꨮꨭ: ꨨꨭꨩ ꨟꨪꩆ꩝ ꨟꨤꩌ ꨗꨫ ꨓꨚꨩ ꨧꩃ ꨆꨮꨭ ꨕꨯꨱꩀ꩞ ꨝꨵꨯꨱꩍ ꨆꨮꨭ ꨗꨭꨕ ꨜꨶꨮꩊ ꨕꨶ ꨂꨣꩃ꩞ ꨇꨯꨱꩊ ꨆꨮꨭ ꨗꨯꨱ ꨓꨮꩊ ꨧꩃ ꨓꨢꩍ꩝ ꨤꨪꨗꨫꩀ ꨕꨶ ꨅꩃ ꨆꨠꨶꨮꩆ ꨕꨯꨱꩀ꩞ ꨨꨣꨬ ꨓꨚꨩ ꨨꨣꨬ ꨕꨶ ꨂꨣꩃ ꨗꨯꨱ ꨀꨕꨯꨱꩍ ꨀꨓꨯꨱꩃ ꨣꨝꩇ ꨟꨢꩍ ꨔꨬ ꨝꨴꨬ ꨨꨈꨰꩅ ꨢꨮꨩ ꨟꩀ꩝ ꨟꨪꩆ ꨎꩃ ꨈꨴꨮꩇ ꨡꨮꩃ ꨓꨚꨩ ꨨꨣꨬ꩞ ꨟꨤꩌ ꨘꩆ ꨆꨮꨭ ꨧꨯꨱꩃ ꨅꩃ ꨙꨪꩍ ꨤꨪꨊꨪꨥ ꨕꨯꨱꩀ ꨆꨟꨬ ꨙꨪꩍ ꨕꨤꩌ ꨧꩃ꩝ ꨤꨫꨊꨫꩀ ꨤꨪꨀꩆ ꨣꨤꨯꨩ ꨘꩆ ꨆꨮꨭ ꨙꨪꩍ ꨅꩍ ꨨꨭꨩ꩝ ꨝꨵꨯꨱꩍ ꨡꨯꩍ ꨆꨟꨬ ꨚꨮꩍ ꨟꨐꩀ ꨟꨕꨮꩍ ꨓꨈꨯꩀ꩝ ꨡꨯꩍ ꨆꨮꨭ ꨕꨯꨱꩀ ꨟꨕꨮꩍ ꨘꩆ ꨓꨐꨫ꩞ ꨀꨳ ꨓꨴꩃ: ꨦꨄꨰ ꨕꨯꨱꩀ ꨟꨕꨮꩍ ꨟꨪꩆ? ꨆꨮꨭ: ꨨꨰ꩝ ꨆꨣꨬ ꨧꩃ ꨘꩆ ꨦꨄꨰ ꨙꨪꩍ ꨅꨩ ꨨꨭꨩ꩞ ꨡꨯꩍ ꨢꨮꨭ ꨘꩆ ꨆꨟꨬ ꨎꩃ ꨕꨯꨱꩀ ꨆꨆꨬ ꨝꨵꨯꨱꩍ ꨟꨯꨱꩃ ꨝꨓꨭꩀ ꨙꨯꩌ ꨈꨵꨰ ꨧꨯꨱꩃ ꨈꨮꩇ꩞ ꨀꨳ ꨓꨴꩃ: ꨤꨪꨆꨮꨭ ꨃꩌꨚꨭꩆ ꨦꨄꨰ ꨐꩀ ꨕꨨꨵꩀ ꨆꨆꨮꩍ ꨝꨳꩀ꩝ ꨦꨄꨰ ꨚꨕꨯꨱꩃ ꨝꨯꨩ ꨕꨨꨵꩀ ꨅꩍ ꨌꨳꨪꩇ꩞ ꨕꨨꨵꩀ ꨦꨗꩃ ꨈꨤꩄ ꨚꨎꨮꨩ꩝ ꨟꨢꩍ ꨓꨭꩀ ꨘꩆ ꨦꨄꨰ ꨅꨩ ꨆꨵꩀ ꨓꨚꨩ ꨘꩆ ꨕꨨꨵꩀ ꨝꨵꨯꨱꩍ ꨚꨎꨮꨩ! ꨆꨮꨭ: ꨅꩍ ꨨꨈꨰꩅ ꨅꨩ꩝ ꨆꨟꨬ ꨎꨶꨰ ꨙꨯꩌ ꨢꨮꨭ ꨘꩆ꩞ ꨀꨳ ꨓꨴꩃ: ꨎꨶꨰ ꨃꨥ ꨕꨨꨵꩀ ꨆꨟꨬ꩝ ꨕꨨꨵꩀ ꨧꨩ ꨚꨵꨭꩍ ꨓꨎꨭꩍ ꨔꨭꩆ ꨟꨪꩆ꩝ ꨃꨥ ꨕꨨꨵꩀ ꨀꨕꨬ ꨟꨰꩀ! ꨆꨮꨭ: ꨨꨰ ꨀꨕꨬ! ꨡꨯꩍ ꨀꨕꨬ ꨀꨕꨯꨱꩍ ꨉꨮꩍ ꨝꨳꩀ! ꨀꨳ ꨓꨴꩃ: ꨝꨳꩀ ꨨꨤꨬ ꨦꨄꨰ? ꨕꨨꨵꩀ ꨓꨆꨴꨲ ꨀꨕꨯꨱꩍ ꨟꩃ ꨀꨦꨪꩅ ꨆꨩ ꨟꨰ꩝ ꨢꩍ ꨗꨯꨱ ꨨꨓꨯꨱ ꨎꨶ ꨕꨨꨵꩀ ꨀꨕꨯꨱꩍ ꨟꨳꨯꨮꩅ ꨕꨯꨱꩀ꩞ ꨡꨯꩍ ꨦꨄꨰ ꨙꨯꩌ ꨧꩇ ꨌꩌ ꨉꨮꩍ ꨝꨳꩀ꩝ ꨔꨬ ꨚꨓꨯꨱꨥ ꨦꨄꨰ ꨤꨬ? ꨆꨮꨭ: ꨛꨯꨮ ꨧꩃ ꨦꨄꨰ꩝ ꨚꩀ ꨗꨫ ꨔꨬ ꨎꩃ ꨨꨝꩉ ꨝꩄ ꨧꩇ ꨌꩌ꩝ ꨚꨳꨮꩍ ꨨꨕꨬ ꨨꨣꨬ ꨕꨯꨱꩀ ꨧꨯꨱꩃ ꨝꨶꨮꩊ ꨞꩇ꩞ ꨀꨕꨬ ꨤꨮꩈ꩝ ꨆꨖ ꨀꨕꨯꨱꩍ ꨝꨳꨯꨮꩉ ꨨꨣꨬ ꨗꨫ ꨝꨯꨩ ꨈꨰꩅ ꨚꨕꨴꨶꨰ ꨣꨤꨯꨩ? ꨀꨕꨬ ꨕꨯꨱꩀ ꨨꨕꨮꩉ ꨔꨬ? ꨀꨳ ꨓꨴꩃ: ꨡꨯꩍ ꨣꨤꨯꨩ ꨨꨕꨳꨮꩇ ꨤꨨꨪꩀ ꨚꨧꩃ ꨘꩆ ꨅꩃ ꨕꨨꨵꩀ ꨥꩀ ꨓꨝꨪꩀ ꨆꨖ ꨗꨫ꩝ ꨅꩃ ꨕꨨꨵꩀ ꨦꨗꩃ ꨔꨮꨭ ꨆꨩ ꨟꨗꨶꨪꩋ ꨘꩆ ꨥꩀ ꨝꨳꩀ ꨉꨮꩍ꩞ ꨕꨯꨱꩀ ꨕꨨꨵꩀ ꨕꨯꨱꩀ ꨀꨦꨪꩅ ꨣꨤꨯꨩ ꨅꩍ ꨨꨭꨩ ꨔꨬ ꨚꨳꨮꩍ ꨨꨕꩉ꩞ ꨙꨯꩌ ꨈꨵꨰ ꨧꨩ ꨕꨟꨭꩀ ꨝꨵꨯꨱꩍ ꨆꨟꨬ ꨕꨮꩃ ꨓꨈꨯꩀ꩞ ꨀꨳ ꨓꨴꩃ: ꨦꨄꨰ ꨤꨮꩈ ꨕꨨꨵꩀ ꨘꩇ ꨐ! ꨄ ꨙꨪꩍ ꨟꨰꩀ꩝ ꨚꩀ ꨗꨫ ꨝꩃ ꨈꨭꩍ ꨞꨭꩅ ꨣꨤꨯꨩ ꨤꨯ꩞ ꨆꨮꨭ: ꨅꨪꩀ꩝ ꨀꨕꨬ ꨗꨯꨱ ꨓꨯꨱ? ꨀꨳ ꨓꨴꩃ ꨟꨤꨮꨭ ꨝꨯꨩ ꨙꨯꩌ: ꨕꨨꨵꩀ ꨟꨣꩅ ꨟꩃ ꨗꨫ ꨆꨩ ꨟꨰ꩝ ꨕꨨꨵꩀ ꨨꨝꩉ ꨗꨯꨱ ꨀꨦꨪꩅ꩞ ꨆꨮꨭ: ꨅꨪꩀ꩝ ꨦꨄꨰ ꨆꨆꨮꩍ ꨝꨳꩀ! ꨦꨄꨰ ꨙꨪꩍ ꨐ! ꨆꨮꨭ ꨚꨪꩀ ꨟꨓ ꨟꨪꩆ ꨅꩍ ꨙꨪꩍ꩝ ꨌꩃ ꨀꨳ ꨓꨴꩃ ꨓꨟꨩ ꨧꩃ ꨆꨩ ꨟꩃ ꨙꨪꩍ ꨥꨮꩉ꩞ ꨓꨮꩊ ꨚꨈꨯꨮꨩ ꨆꨮꨭ ꨤꨪꨆꨮꨭ ꨕꨴꨬ ꨕꨶ ꨅꩃ ꨆꨟꨮꨭꩆ ꨝꨵꨯꨱꩍ ꨏꨭꩊ ꨣꨕꨰꩍ ꨟꨰ ꨧꩃ꩞ ꨣ ꨇꨪꩀ ꨡꨯꩍ ꨆꨮꨭ ꨝꨵꨯꨱꩍ ꨓꨐꨫ: ꨈꨰꩅ ꨗꨯꨱ ꨕꨮꩇ ꨅꨩ? ꨕꨯꨱꩀ ꨟꨰ ꨥꨮꩀ? ꨆꨮꨭ ꨟꩃ ꨙꨯꩌ ꨆꨮꨭ ꨨꨭꨩ ꨀꨗꨫꩅ ꨣꨗꨮꩌ ꨧꨩ ꨂꨣꩃ ꨆꨟꨬ ꨘꩆ ꨕꨶꩍ ꨈꨤꨯꨱꩃ ꨋꩀ ꨆꨴꨲꩆ ꨧꨯꨱꩃ ꨐꨭꨩ꩞ ꨣ ꨇꨪꩀ ꨟꩃ ꨆꨵꨯꨱ ꨝꨵꨯꨱꩍ ꨆꨵꩀ ꨓꨚꨩ꩝ ꨟꨪꩆ ꨚꨙꩉ ꨡꨮꩃ ꨨꨕꨬ ꨨꨝꩉ ꨟꨰ ꨧꩃ ꨒꨮꩇ ꨓꨭꩀ꩞ ꨨꨭꨩ ꨢꨮꨭ ꨘꩆ ꨘꩆ ꨆꨩꩈ ꨙꨶ ꨜꨶꨮꩊ ꨂꨣꩃ ꨇꨪꩀ꩞ ꨨꨕꨯꩌ ꨨꨣꨬ ꨨꨕꨬ꩝ ꨨꨣꨬ ꨣꨬ ꨆꨮꨭ ꨎꩃ ꨈꨯꨱꩀ ꨀꨳ ꨓꨴꩃ꩝ ꨨꨭꨩ ꨨꨣꨬ ꨆꨮꨭ ꨕꨶꩍ ꨓꨶꨬ ꨆꨩ ꨕꨶ ꨅꩃ ꨆꨟꨮꨭꩆ꩝ ꨨꨭꨩ ꨨꨣꨬ ꨆꨮꨭ ꨓꨚꨩ ꨋꩀ ꨈꨤꩄ ꨧꩃ ꨝꨵꨯꨱꩍ ꨕꨯꨱꩀ ꨥꨮꩀ ꨨꨶꩀ꩝ ꨕꨶ ꨅꩃ ꨤꨟꨭꩆ ꨀꨗꨫꩅ ꨆꨮꨭ ꨣꨤꨯꨩ꩞ ꨆꨮꨭ ꨟꨕ ꨨꨣꨬ ꨟꨕ ꨀꨗꨫꩅ ꨀꨳ ꨓꨴꩃ ꨥꨮꩀ꩝ ꨟꨤꩌ ꨨꨤꨬ ꨎꩃ ꨨꨕꨮꩉ꩞ ꨓꨮꩊ ꨧꨩ ꨨꨣꨬ ꨣ ꨇꨪꩀ ꨚꨔꨮꨭ: ꨀꨝꨪꩍ ꨀꨕꨬ ꨦꨄꨰ꩝ ꨨꨝꩉ ꨚꨎꨳꨮꩂ ꨆꨢ ꨡꨮꩃ ꨗꨯꨱ ꨀꨓꨯꨱꩃ ꨆꨤꨪꩆ ꨧꨩ ꨡꨮꩃ ꨗꨫ꩞ ꨅꩍ ꨕꨯꨱꩀ ꨥꩀ ꨓꨭꩀ꩝ ꨝꨳꨯꨮꩉ ꨨꨣꨬ ꨘꩆ ꨆꨮꨭ ꨗꨯꨱ ꨚꩀ ꨧꩃ ꨀꨳ ꨓꨴꩃ꩞ ꨀꨳ ꨓꨴꩃ: ꨦꨄꨰ ꨢꨶꨮꩆ ꨚ ꨟꨰ ꨟꨁꩆ ꨨꨪꩆ! ꨆꨮꨭ: ꨀꨳ ꨓꨴꩃ ꨤꨮꩈ! ꨦꨄꨰ ꨧꨪ ꨗꨯꨱ ꨚꨎꨮꨩ ꨀꨳ ꨓꨴꩃ: ꨦꨄꨰ ꨗꨯꨱ ꨨꨓꨯꨱ? ꨆꨮꨭ: ꨆꨤꨪꩆ ꨧꨪ ꨟꨰ꩝ ꨦꨄꨰ ꨨꨝꩉ ꨗꨯꨱ꩞ ꨀꨳ ꨓꨴꩃ: ꨘꩆ ꨤꨬ꩟ ꨆꨮꨭ: ꨨꨭꨩ ꨆꨢ ꨗꨫ꩝ ꨦꨄꨰ ꨀꨤꨪꩆ ꨆꨩ ꨀꨕꨬ ꨆꨮꨭ ꨚꨢꨮꩉ ꨆꨩ ꨀꨳ ꨓꨴꩃ ꨧꨩ ꨝꨵꩍ ꨀꨥ꩝ ꨆꨟꨬ ꨝꨶꨬ ꨣꨤꨯꨩ꩞ ꨀꨳ ꨓꨴꩃ: ꨙꨶ ꨜꨶꨮꩊ ꨦꨄꨰ ꨢꨶꨮꩆ ꨚ! ꨡꨮꩃ ꨕꨤꨮꨭ ꨀꨝꨪꩍ ꨨꨭꨩ ꨟꨗꨶꨪꩋ ꨝꨴꨬ ꨆꨩ ꨕꨨꨵꩀ ꨀꨥ꩝ ꨕꨨꨵꩀ ꨝꨶꨬ ꨣꨤꨯꨩ꩞ ꨡꨯꩍ ꨆꨟꨬ ꨝꨶꨬ ꨢꨮꨭ ꨘꩆ ꨆꨮꨭ ꨎꩃ ꨍꨮꩍ ꨝꨶꨬ ꨝꨳꩀ! ꨆꨮꨭ: ꨦꨄꨰ ꨗꨯꨱ ꨚꨎꨮꨩ꩝ ꨤꨪꨆꨮꨭ ꨕꨴꨬ ꨀꨳ ꨓꨴꩃ! ꨀꨳ ꨓꨴꩃ: ꨦꨄꨰ! ꨟꨰ ꨈꨤꩄ ꨐ꩝ ꨕꨨꨵꩀ ꨕꨯꨱꩀ ꨌꩃ ꨆꨮꨭ ꨅꩍ ꨙꨯꩌ ꨈꨰꩅ꩝ ꨆꨵꨯꨱ ꨟꨪꩆ ꨝꨵꨯꨱꩍ ꨢꩌ ꨗꨯꨱ꩞ ꨧꨩ ꨡꨮꩃ ꨗꨫ꩝ ꨌꩌꨛꨩ ꨇꨫꩂ ꨀꨓꨯꨱꩃ ꨟꨯꨱꩃ ꨤꨯꨱꨥ ꨧꨩ ꨡꨮꩃ ꨚꨴꨯꨱꩃ꩞ ꨚꨓꨴ ꨨꨣꨪꨎꨪꩅ ꨘꩆ ꨚꩆ ꨀꨆꨯꨱꩀ ꨧꨩ ꨡꨮꩃ ꨗꨫ꩞ ꨚꨓꨴ ꨚꨢꨶ ꨧꨩ ꨨꨣꩀ ꨆꨩ ꨎꨝꨶꨮꩊ꩝ ꨚꨶꨮꩄ ꨢꨮꨭ ꨗꨫ: ꨚꨤꨬ ꨗꨈꩉ ꨕꨯꨱꩀ ꨝꨶꨬ꩝ ꨕꨯꨱꩀ ꨔꨰꩍ ꨟꨗꨶꨪꩋ ꨟꨯꨱꩃ ꨤꨯꨱꨥ ꨨꨶ ꨟꨰ꩝ ꨌꨭꩍ ꨕꨗꨫꩂ꩝ ꨚꨟꨓꨰ ꨟꨗꨶꨪꩋ꩝ ꨈꨰꩅ ꨏꩀ ꨐꨭꨩ ꨎꩃ ꨋꩀ꩝ ꨔꨬ ꨎꩃ ꨔꨮꨭ꩞ ꨟꨪꩆ ꨌꩌꨛꨩ ꨕꨴꨬ ꨅꩍ ꨌꨳꨪꩇ ꨤꩍ꩝ ꨀꨓꨯꨱꩃ ꨆꨩ ꨐꨭꨩ ꨙꨶꨮꩄ ꨈꨤꩄ ꨍꨴꨫ ꨥꨪꨘꨢ꩞ ꨂꨣꩀ ꨗꨫ ꨕꨴꨬ ꨨꨝꩉ ꨀꨓꨯꨱꩃ ꨐꨭꨩ ꨧꨩ ꨡꨮꩃ ꨚꨴꨯꨱꩃ꩞ ꨟꨢꩍ ꨀꨓꨯꨱꩃ ꨡꨮꩃ꩝ ꨓꨳꩇ ꨐꨭꨩ ꨓꨝꨳꩀ ꨕꨫ ꨗꨈꩉ ꨕꨴꨬ꩞ ꨀꨕꨬ ꨦꨄꨰ ꨤꨮꩈ! ꨀꨓꨯꨱꩃ ꨆꨩ ꨕꨴꨬ꩝ ꨀꨓꨯꨱꩃ ꨆꨩ ꨀꨗꩀ ꨆꨟꨮꨭꩆ꩝ ꨀꨓꨯꨱꩃ ꨆꨩ ꨌꩌꨛꨩ ꨕꨯꨱꩀ ꨨꨟꨳꨯꨮꩅ ꨨꨟꨳꨯꨮꩅ꩞ ꨛꨯꨮ ꨢꩃ ꨧꨯꨱꩃ ꨛꨯꨮ ꨗꨈꩉ ꨗꨯꨱ ꨓꨶꨬ ꨚꨎꨳꩀ ꨚꨎꨳꨮꩂ ꨆꨩ ꨀꨕꨬ ꨦꨄꨰ! ꨝꩊ ꨍꨴꨫ ꨝꨩꨗꨯꩈ ꨌꩌꨛꨩ꩝ ꩑꩔ ꩝ ꩓ ꩝ ꩑꩒꩘꩓꩞ ꩕꩐ ꨣꨪꨝꨭꨥ ꨎꨝꨶꨮꩊ ꨌꩌꨛꨩ ꨕꨯꨱꩀ ꨕꨫ ꨌꨮꩀ ꨓꨴꨭꩆ ꨀꨓꨯꨱꩃ ꨎꨝꨶꨮꩊ ꨟꨯꨱꩃ ꨤꨯꨱꨥ ꨕꨫ ꨝꩊ ꨍꨴꨫ ꨝꨩꨗꨯꩈ꩞ ꨟꨗꨶꨪꩋ ꨕꨶ ꨈꩍ ꨣꨤꨯꨩ ꨤꨯ ꨚꨌꨮꩃ ꨀꨝꨪꩍ ꨓꨗꩍ꩝ ꨎꨝꨶꨮꩊ ꨟꨯꨱꩃ ꨤꨯꨱꨥ ꨆꨵꨪꩀ ꨆꨵꩀ ꨗꨯꨱ ꨚꩀ ꨎꨝꨶꨮꩊ ꨌꩌ꩝ ꨕꨶ ꨈꩍ ꨕꨯꨱꩀ ꨀꨓꩍ ꨈꨮꩇ ꨀꨦꨪꩅ ꨟꨪꩆ꩞ ꨛꨯꨮ ꨈꨗꨶꨮꩉ ꨌꩌꨛꨩ ꨙꨯꩌ: ꨆꨩ ꨌꩌꨛꨩ꩟ ꩕꩐ ꨣꨪꨝꨭꨥ ꨟꨗꨶꨪꩋ ꨙꨯꩌ ꨈꨤꩄ: ꨆꨩ ꨌꩌꨛꨩ꩟ ꨚꨴꨯꨱꩃ ꨧꩇ ꨢꨮꨭ ꨌꨆꨤ ꨋꩀ ꨆꨩ ꨎꨝꨶꨮꩊ ꨟꨯꨱꩃ ꨤꨯꨱꨥ ꨨꨶꨮꩄ ꨆꨖ꩞ ꨛꨯꨮ ꨈꨗꨶꨮꩉ ꨙꨯꩌ ꨥꨮꩀ: ꨆꨩ ꨌꩌꨛꨩ꩟ ꨧꨩ ꨡꨮꩃ ꨓꨴ ꩕꩐ ꨣꨪꨝꨭꨥ ꨟꨗꨶꨪꩋ ꨅꨩꨩ ꨚꨝꩍ ꨚꨴꨯꨱꩃ ꨨꨮꩆ ꨕꨨꨵꨮꨭ: ꨆꨩ ꨌꩌꨛꨩ꩟꩟ ꨝꨵꨯꨱꩍ ꨙꨶꨮꩄ ꨓꨈꨯꩀ ꨀꨓꨯꨱꩃ꩝ ꨢꨮꨭ ꨀꨳ ꨚꨯꨱꩍ ꨈꨵꨯꨱꩃ ꨨꨶ ꨀꨝꨪꩍ ꨟꨢꩍ ꨨꨭꨩ ꨨꨈꨰꩅ ꨚꨆꩀ ꨐꨭꨩ꩞ ꨟꨪꩆ ꨧꨩ ꨡꨮꩃ ꨗꨫ ꨌꩌꨛꨩ ꨀꨓꨯꨱꩃ ꨅꩍ ꨡꨮꩃ꩞ ꨚꨓꨴ ꨨꨣꨪꨎꨪꩅ ꨝꨴꨬ ꨈꨯꨱꩆ ꨆꨩ ꨎꨝꨶꨮꩊ ꨙꨶꨮꩄ ꨈꨤꩄ ꨌꨮꩀ꩝ ꨎꨝꨶꨮꩊ ꨟꨯꨱꩃ ꨤꨯꨱꨥ ꨟꨓꨰ ꨣꨤꨯꨩ ꨘꩆ ꨌꨭꩍ ꨝꩊ ꨍꨴꨫ ꨝꨩꨗꨯꩈ꩞ ꨙꨪꩀ ꨈꨪꨤꨰ ꨗꨯꨱ ꨈꩍ ꨝꨪꨣꩀ꩝ ꨗꨯꨱ ꨚꩀ ꨗꨈꩉ ꨁꩆꨕꨴꨚꨭꨣ꩞ ꨨꨣꨬ ꨘꩆ ꨨꨎꩆ ꨓꨔꨰꩈ ꨤꨶꨪꩄ ꨨꨣꨬ꩞ ꨤꨊꨫꩀ ꨦꨭꩇ ꨖꨪꩅ꩝ ꨀꨊꨪꩆ ꨢꨭꩍ ꨤꨪꨀꩆ ꨣꨤꨯꨩ꩝ ꨧꨩ ꨕꨴꨬ ꨆꨮꨭ ꨗꨯꨱ ꨓꨚꨩ ꨤꨝꩃ ꨓꨟꨩ ꨕꨗꨫꩂ ꨆꨢꨮꨭ꩞ ꨨꨝꩉ ꨨꨣꨬ ꨗꨫ ꨅꩍ ꨡꨯꩍ ꨔꨬ ꨥꨪꩊ ꨕꨮꩉ꩝ ꨎꨝꨶꨮꩊ ꨝꨶꨮꩊ ꨞꩇ ꨗꨯꨱ ꨨꨓꨯꨱ ꨀꨝꨪꩍ? ꨝꨵꨯꨱꩍ ꨆꨮꨭ ꨨꨟꨪꩅ ꨧꩇ ꨨꨳ ꨌꨯꨱꩀ ꨣꨤꨯꨩ ꨤꨯ ꨟꨪꩆ ꨅꩍ ꨡꨯꩍ ꨔꨮ꩞ ꨆꨮꨭ ꨕꨯꨱꩀ ꨗꨯꨱ꩝ ꨀꨊꨪꩆ ꨕꨯꨱꩀ ꨀꨢꨭꩀ꩝ ꨨꨎꩆ ꨕꨯꨱꩀ ꨤꨰꩀ꩞ ꨀꨳ ꨓꨴꩃ ꨀꨕꨬ ꨕꨯꨱꩀ ꨚꩀ ꨨꨤꨬ? ꨨꨟꨪꩅ ꨧꩇ ꨀꨕꨯꨱꩍ ꨕꨫ ꨀꨓꩍ꩝ ꨒꨮꩇ ꨆꨟꨬ ꨚꨎꨮꨩ꩞ ꨆꨮꨭ ꨗꨯꨱ ꨚꩀ ꨧꩃ ꨀꨳ ꨓꨴꩃ꩝ ꨡꨯꩍ ꨚꩀ ꨀꨘꩀ ꨟꨓ꩝ ꨝꨵꨯꨱꩍ ꨆꨵꨯꨱ꩞ ꨀꨳ ꨓꨴꩃ ꨕꨯꨱꩀ ꨌꨭꩀ ꨀꨥ ꨆꨮꨭ ꨝꨴꨬ꩝ ꨕꨯꨱꩀ ꨕꨴꨬ ꨕꨴꩊ ꨀꨕꨯꨱꩍ ꨚꩀ ꨘꩀ ꨧꩃ꩝ ꨕꨫ ꨟꨓ ꨀꨕꨬ꩝ ꨡꨯꩍ꩝ ꨀꨳ ꨟꨓ ꨤꨰꩀ ꨓꨴꨭꩆ꩟ ꨨꨝꩉ ꨦꨄꨰ ꨗꨯꨱ ꨅꩍ ꨙꨯꩌ ꨧꨩ ꨝꨯꨱꩍ ꨌꨰꩀ ꨀꨕꨬ ꨕꨯꨱꩀ ꨌꩃ ꨤꨶꨪꩄ ꨨꨣꨬ ꨕꨫ ꨈꨵꨰ ꨌꨮꩀ ꨦꨄꨰ ꨕꨯꨱꩀ ꨚꩀ ꨨꨤꨬ? ꨚꨳꨮꩍ ꨀꨕꨬ ꨕꨯꨱꩀ ꨌꩃ ꨨꨟꨳꨯꨮꩅ ꨌꩌꨛꨩ ꨗꨈꩉ ꨤꨮꩈ ꨂꨣꩀ ꨗꨫ ꨚꨙꨪꩀ ꨛꨩꨙꨶ ꨅꩍ ꨔꨮꨭ ꨨꨝꨳꨯꨮꩉ ꨕꨴꨬ ꨨꨭꨩ ꨥꨮꩀ ꨚꨓꨯꨱꩌ꩞ ꨓꨮꩊ ꨔꨭꩆ ꩑꩒꩘꩕꩝ ꨎꨝꨶꨮꩊ ꨟꨯꨱꩃ ꨤꨯꨱꨥ ꨓꨝꨳꩀ ꨀꨝꨪꩍ ꨕꨫ ꨗꨈꩉ ꨌꩌꨛꨩ꩟