ꨕꨫ ꨆꩊ ꨊꨶꨮꩆ ꨢꨭ꩝ ꨢꨶꨮꩆ ꨎꩃ ꨙꨯꩌ ꨧꩇ ꨢꨶꨮꩆ ꨞꨳꩆ ꨨꨣꨬ꩝ ꨟꨪꩆ ꨓꨮꩊ ꨥꩀ ꨀꨇꩉ ꨥꩀ ꨀꨇꩉ ꨤꨯꨱꨥ ꨟꨪꩆ꩞ ꨀꨇꩉ ꨗꨯꩌ ꨨꨭꨩ꩝ ꨟꨪꩆ ꨂꨣꩃ ꨅꨩ ꨟꩀ ꨚꨳꨮꩍ ꨥꩀ ꨀꨗꨇꩆ ꨚꨴꨯꨱꩃ꩞ ꨕꨫ ꨓꨔꨶꨪꩀ ꨘꩆ꩝ ꨊꨶꨮꩆ ꨢꨭ ꨟꩀ ꨀꨇꩉ ꨗꨯꩌ ꨚꨳꨮꩍ ꨥꩀ ꨆꨖ ꨆꨪꨥ – ꨧꨩ ꨆꨖ ꨀꨓꩍ꩝ ꨌꨶꩂ ꨆꨙꩍ ꨧꨯꨱꩃ ꨣꨤꨯꨩ ꨚꨓꩅ ꨀꩉꨖꩉ꩞ ꨓꨭꩀ ꨘꩆ꩝ ꨅꩃ ꨅꩍ ꨦꨗꩃ ꨋꩀ ꨆꨩ ꨌꨤꩍ ꨈꩍ ꨤꩄ ꨀꨇꩉ ꨗꨯꩌ ꨨꨰ ꨤꨯꨱꨥ ꨀꨇꩉ ꨣꨬ ꨉꨮꩍ ꨨꨮꩆ꩝ ꨟꨪꩆ ꨕꨶꩍ ꨧꨩ ꨀꨇꩉ ꨚꨳꨮꩍ ꨚꨗꩍ ꨨꨭꨩ ꨀꨝꨪꩍ ꨧꩇ ꨙꨯꩌ꩝ ꨦꨗꩃ ꨧꨯꨱꩃ ꨣꩈ ꨕꨳꨪꩇ ꨟꨗꨶꨪꩋ ꨢꨶꨮꩆ꩞ ꨟꨯꨱꩃ ꨈꨤꩄ ꨈꨴꨭꩀ ꨘꩆ꩝ ꨆꨮꨭ ꨡꨯꩍ ꨨꨭꨩ ꨣꨤꨯꨩ ꨆꨖ ꨕꨴꨮꩍ ꨈꨮꩇ ꨧꨯꨱꩃ ꨀꨇꩉ ꨔꨴꩍ ꨌꩌ ꨂꨣꩀ ꨗꨫ꩞ ꨂꨣꩃ ꨌꩌ ꨕꨯꨱꩀ ꨙꨯꩌ ꨧꩇ ꨌꩌ꩝ ꨦꨗꩃ ꨧꩇ ꨌꩌ꩝ ꨟꨪꩆ ꨓꨮꩊ ꨥꩀ ꨨꨈꨰꩅ ꨀꨓꩍ꩝ ꨕꨤꩌ ꨨꨰ ꨓꨚꩀ ꨕꨴꨬ꩝ ꨕꨴꨬ ꨥꩀ ꨀꨇꩉ ꨢꨶꨮꩆ ꨥꨮꩀ ꨟꨪꩆ꩞ ꨀꨇꩉ ꨌꩌ ꨢꩆ ꨘꩆ꩝ ꨓꨯꩀ ꨕꨯꨱꩀ ꨥꨮꩀ ꨕꨤꩌ ꨀꨕꩅ ꨌꨡꩅ꩝ ꨓꨚꨭꩀ ꨆꨓꨭꩅ ꨨꨰ ꨢꨮꨭ ꨔꨰꩀ ꨨꨯꨱꩌ ꨆꩉ ꨣꨤꨯꨩ ꨨꨮꩆ ꨕꨫ ꨧꨩ ꨀꨇꩉ ꨚꨳꨮꩍ ꨦꨗꩃ ꨧꨯꨱꩃ ꨌꨶꩀ꩞ ꨕꨨꨵꩀ ꨟꩀ ꨧꩇ ꨌꩌ ꨚꨳꨮꩍ ꨥꩀ ꨧꨩ ꨆꨖ ꨀꨓꩍ꩝ ꨅꩍ ꨒꨮꩇ ꨤꩄ ꨚꨳꨮꩍ ꨚꨭꨢꨮꨭ ꨕꨴꨬ ꨧꨯꨱꩃ ꨊꨶꨮꩆ ꨢꨭ꩝ ꨎꩃ ꨅꨩ ꨒꨮꩇ ꨙꨯꩌ ꨤꩄ ꨧꩇ ꨌꩌ ꨒꨮꩇ ꨀꨝꨪꩍ ꨚꨎꨮꨩ꩞ ꨕꨨꨵꩀ ꨓꨆꨴꨲ ꨋꩇ ꨧꨩ ꨈꨴꨭꩀ ꨝꨳꩀ ꨡꨶꨮꩆ ꨟꨪꩆ: ꨟꩀ ꨀꨇꩉ ꨌꩌ ꨚꨳꨮꩍ ꨥꩀ ꨧꨩ ꨆꨖ ꨀꨓꩍ꩝ ꨓꨶꨬ ꨕꨘꩇ꩝ ꨨꨭꨩ ꨥꩀ ꨓꨭꩀ꩝ ꨟꨗꨶꨪꩋ ꨦꨗꩃ ꨚꨕꨴꨶꨰ ꨝꨶꨬ ꨆꨵꨯꨱ꩝ ꨚꨳꨮꩍ ꨟꨯꨱꩃ ꨀꨇꩉ ꨌꩌ ꨋꩇ ꨨꨭꨩ ꨨꨤꨬ? ꨎꩃ ꨢꨮꨭ ꨀꨇꩉ ꨗꨯꩌ ꨟꩃ ꨆꩊ꩝ ꨀꨇꩉ ꨌꩌ ꨅꨩ ꨕꨯꨱꩀ ꨆꨢꨶ ꨐꨭꨩ ꨒꨮꩇ ꨀꨝꨪꩍ꩝ ꨟꨪꩆ ꨐꨭꨩ ꨕꨯꨱꩀ ꨆꨢꨶ ꨕꨴꨬ ꨟꩀ ꨐꨭꨩ ꨥꩀ꩝ ꨥꩀ ꨆꨩ ꨣꨤꨯꨩ꩝ ꨆꨩ ꨞꨳꩆ꩞ ꨓꨭꩀ ꨘꩆ ꨆꨩ꩝ ꨟꨢꩍ ꨡꨯꩍ ꨈꨰꩅ ꨅꨩ ꨆꨩ ꨒꨮꩇ꩝ ꨕꨴꨬ ꨚꨒꨮꩇ ꨐꨭꨩ ꨨꨕꨬ꩞ ꨟꨢꩍ ꨀꨇꩉ ꨌꩌ ꨅꩍ ꨔꨬ ꨥꩀ꩝ ꨒꨮꩇ ꨢꨮꨭ ꨣꨬ ꨎꩃ ꨢꨮꨭ ꨔꨯꨱꩍ ꨟꨪꩆ꩞ ꨕꨨꨵꩀ ꨦꨗꩃ꩝ ꨚꨳꨮꩍ ꨆꨩ ꨀꨇꩉ ꨌꩌ ꨕꨯꨱꩀ ꨨꨟꨳꨯꨮꩅ ꨢꨮꨭ ꨧꨩ ꨧꩇ ꨨꨕꨳꨪꩇ꩝ ꨨꨝꩉ ꨟꩀ ꨐꨭꨩ ꨚꨳꨮꩍ ꨀꨇꩆ ꨆꨖ ꨂꨣꩀ ꨗꨫ꩝ ꨅꩍ ꨒꨮꩇ ꨀꨇꩆ ꨆꨖ ꨟꩃ ꨆꩊ ꨧꨯꨱꩍ ꨅꨩ꩞ ꨊꨶꨮꩆ ꨢꨭ ꨋꩇ ꨈꨴꨭꩀ ꨘꩆ ꨝꨵꨯꨱꩍ ꨆꨩ ꨀꨇꩉ ꨗꨯꩌ꩝ ꨧꩀꨆꨣꨰ ꨨꨭꨩ ꨝꨴꨬ ꨡꨯꩍ ꨈꨴꨭꩀ ꨘꩆ ꨎꨳꨮꩂ ꨨꨝꩉ ꨚꨎꨮꨩ꩞ ꨟꨢꩍ ꨂꨣꩃ ꨌꩌ ꨔꨬ ꨎꩃ ꨚꨶꨮꩄ ꨨꨭꨩ ꨀꨇꩉ ꨌꩌ꩝ ꨢꨮꨭ ꨘꩆ ꨟꨗꨶꨪꩋ ꨟꩃ ꨨꨕꨮꩉ ꨣꨤꨯꨩ ꨚꨗꨶꨮꩄ ꨌꩌ꩝ ꨚꨳꨮꩍ ꨆꨩ ꨚꨗꨶꨮꩄ ꨙꨯꩌ ꨅꨩ ꨤꨨꨪꩀ꩞ ꨗꨫ ꨅꨩ ꨒꨮꩇ ꨆꨖ ꨀꨇꩉ ꨧꨯꨱꩍ ꨅꨩ꩝ ꨟꨪꩆ ꨆꨖ ꨝꨳꩀ ꨕꨴꩍ ꨨꨮꩆ ꨥꨮꩀ: ꨇꨪꩀ ꨣꨟꨪꩀ ꨧꩇ ꨙꨯꩌ ꨌꩌ꩞ ꨓꨶꨬ ꨕꨨꨵꩀ꩝ ꨆꨖ ꨚꨴꨯꨱꩃ ꨀꨝꨪꩍ ꨂꨣꩀ ꨗꨫ ꨆꨩ ꨀꨇꩉ ꨔꨴꩍ ꨘꩆ ꨋꩇ ꨨꨝꩉ ꨆꨩ ꨨꨭꨩ ꨣꨤꨯꨩ ꨟꨗꨶꨪꩋ ꨥꩀ ꨨꨭꨩ꩝ ꨚꨶꨮꩄ ꨨꨭꨩ꩝ ꨝꨵꨯꨱꩍ ꨚꨒꨮꩇ ꨐꨭꨩ ꨨꨕꨬ꩞ ꨓꨭꩀ ꨀꨇꩉ ꨅꩍ ꨡꨯꩍ ꨔꨬ ꨥꩀ꩝ ꨎꨎꨰꩀ ꨣꨤꨯꨩ ꨈꨴꨭꩀ ꨚꨒꨮꩇ ꨋꩇ ꨆꨩ ꨟꨗꨶꨪꩋ ꨝꨪꨆꩆ ꨆꨙ ꨝꩄ꩝ ꨆꨙ ꨥꩀ ꨟꨪꩆ꩞ ꨧꨩ ꨀꨇꩉ ꨅꩍ ꨟꨓꨰ ꨆꨢꨶ ꨐꨭꨩ ꨅꩍ ꨒꨮꩇ꩝ ꨟꨪꩆ ꨟꨓꨰ ꨆꨢꨶ ꨐꨭꨩ ꨅꩍ ꨔꨬ ꨥꩀ꩝ ꨔꨬ ꨝꩄ꩞ ꨌꨰꩀ ꨆꨩ ꨂꨣꩃ ꨥꩀ ꨀꨇꩉ ꨔꨴꩍ ꨓꨶꨬ ꨨꨓꨰ ꨐꨭꨩ ꨟꨰꩀ꩝ ꨟꨢꩍ ꨈꨤꨯꨱꩃ ꨣꨬ ꨉꨮꩍ꩝ ꨕꨴꩍ ꨔꨮꨭ꩝ ꨥꩀ ꨒꨮꩇ ꨦꨗꩃ꩝ ꨈꨤꨯꨱꩃ ꨘꩆ ꨕꨯꨱꩀ ꨥꨮꩀ ꨟꨪꩆ꩞