ꨆꨖꨩ ꨆꨔꨬ: ꨝꨪꨘꩍ ꨀꨆꨯꨱꩀ ꨟꨓꨪ ꨌꩌꨛꨩ ꨘꩆ ꨧꨩ ꨀꨳ ꨟꩃ ꨆꩊ ꨙꨪꩍ ꨕꨫ ꨆꨴꨲꩍ ꨀꨳ ꨝꨳꨮꩅ ꨘꩌ ꨂꨣꩀꨗꨫ꩞ ꨌꩌꨛꨩ ꨨꨭꨩ ꨚꩀ ꨗꨈꩉ ꨟꩃ ꨝꨪꨣꩀ ꨓꨮꩊ ꨟꨣꨯꨱꩃ ꨘꩆ: ꨀꨩꨠꨣꨥꨓꨪ꩝ ꨥꨪꨎꨢꨩ꩝ ꨆꨮꨭꨔꨣꨩ ꨧꨯꨱꩃ ꨚꩆꨕꨭꨣꩃꨈꨩ꩞ ꨁꩆꨕꨴꨚꨭꨣꨩ (ꨝꩊ ꨈꨴꨭꩌ ꨆꨓꩊ) ꨘꩆ ꨧꨩ ꨝꩊ ꨕꨫ ꨗꨈꩉ ꨀꨩꨠꨣꨥꨓꨪ꩝ ꨎꩃ ꨝꩊ ꨌꩌꨛꨩ ꨟꩃ ꨔꨭꩆ ꩘꩗꩕ ꨓꨮꩊ ꩙꩘꩒꩞ ꨚꩀ ꨗꨫ ꨟꩃ ꨆꩊ ꨨꨭꨩ ꨈꨕꨪ ꨚꨴꨯꨱꩃ ꨀꨝꨪꩍ ꨤꨪꨝꨪꩀ ꨚꨭꩉ ꨟꨣꨯꨱꩃ ꨀꨩ ꨓꨭꩀ ꨘꩆ꩞ ꨔꨭꩆ ꩙꩘꩒꩝ ꨁꩆꨕꨴꨚꨭꨣꨩ ꨓꨢꩍ꩝ ꨂꨣꩃ ꨌꩌ ꨣꨟꨪꩀ ꨝꩊ ꨟꨰ ꨈꩍ ꨟꨣꨯꨱꩃ꩝ ꨝꩊ ꨝꨪꨣꨭꨥ ꨀꨋꩆ ꨥꨪꨎꨢꨩ ꨙꨪꩍ ꨕꨫ ꨗꨈꩉ ꨥꨪꨎꨢꨩ꩞ ꨆꨔꨬ ꨘꩆ ꨧꨩ ꨟꨗꨶꨪꩋ ꨕꨯꨱꩀ ꨤꨯꩀ ꨕꨫ ꨓꨭꩀ ꨆꨤꨪꩆ ꨘꩆ꩞ ꨙꨯꩌ ꨓꨮꩊ ꨆꨤꨪꩆ ꨌꩌꨛꨩ ꨧꨯꨱꩃ ꨢꨶꨮꩆ ꨔꨭꩆ ꩙꩘꩒꩝ ꨧꨆꨣꨰ ꨢꨶꨮꩆ ꨨꨭꨩ ꨥꩀ ꨢꨮꨭ ꨗꨫ: “ꨚꨓꨯꨱ ꨖꩉ ꨗꨯꨱ ꨀꨓꨯꨱꩃ ꨌꩌꨛꨩ꩝ ꨀꨓꨯꨱꩃ ꨡꨮꩃ꩞ ꨆꨢꨶꨩ ꨕꨨꨵꨮꨭ ꨘꩆ ꨚꨓꨯꨱ ꨚꨙꩉ ꨓꨲꨩ ꨟꨭꩀ ꨧꨯꨱꩃ ꨊꨯꨩ ꨓꨲꨩ ꨆꩆ ꨗꨯꨱ ꨈꨯꨱꩆ ꨓꨚꨩ ꨀꨳ ꨘꩆ ꨟꨪꩆ ꨚꨓꨯꨱ ꨀꨳ ꨘꩆ ꨆꨣꨮꩀ ꨥꨮꩀ ꨛꨯꨮ ꨕꨭꩅ꩞ ꨚꨓꨯꨱ ꨈꨪꨗꨯꨱꩃ꩝ ꨚꨙꩉ ꨋꩀ ꨈꨪꨤꨰ꩝ ꨚꨓꨯꨱ ꨋꩀ ꨚꩆꨣꨯꨱꩃ ꨖꩉ ꨀꨓꨯꨱꩃ꩝ ꨓꩀ ꨡꨯꨮꨟꨫꨔꨯꨮꨩ ꨕꨫ ꨡꨵꩃ ꨆꨤꨪꩆ꩞ ꨌꩌꨛꨩ ꨀꨤꩍ꩝ ꨟꩀ ꨟꨓꩍ ꨎꨝꨶꨮꩊ ꨝꨳꩀ ꨣꨤꨯꨩ꩝ ꨧꨯꨱꩃ ꨆꨟꨬ ꨧꨳꩌ ꨝꨪꨗꨰ ꨧꨯꨱꩃ ꨧꨩ ꨅꩃ ꨈꨴꨭꩀ ꨆꨤꨫꩂ꩞ ꨟꩀ ꨀꨝꨪꩍ ꨝꨳꩀ ꨣꨪꨤꨯ ꨆꨢꨩ ꨝꨪꨗꨴꨪꩀ ꨟꨰ ꨧꩃ꩝ ꨢꩍ ꨆꨭꩅ꩝ ꨓꨮꩊ ꨈꨴꩇ ꨧꨩ ꨔꨭꩆ ꨝꨵꨯꨱꩍ ꨟꨰ ꨧꩃ”꩞ ꨆꨖꨩ ꨆꨔꨬ: ꨝꨪꨘꩍ ꨧꨩ ꨟꩃ ꨆꩊ ꨕꨫ ꨝꩊ ꨁꩆꨕꨴꨚꨭꨣꨩ ꨀꨳ ꨌꩌꨛꨩ ꨆꨵꩀ꩝ ꨨꨭꨩ ꨕꨶ ꨨꨕꨳꨮꩇ ꨚꨧꩃ ꨋꩀ ꨡꨮꩃ ꨕꨫ ꨚꨝꨵꨬ ꨧꨤꨪꩍ ꨀꨦꨪꩅ꩝ ꨅꨩ ꨒꨮꩇ ꨟꨕꨩ ꨟꨪꩆ ꨎꩃ ꨅꨩ ꨒꨮꩇ ꨆꨔꨯꨱꩅ꩞ ꨕꨶ ꨨꨕꨳꨮꩇ ꨚꨧꩃ ꨟꨗꩀ ꨧꨩ ꨀꨗꩀ ꨤꨪꨆꨬ ꨟꨪꩆ꩝ ꨝꨴꨬ ꨀꨋꩆ ꨆꨔꨬ꩝ ꨓꨶꨬ ꨚꨗꨶꨮꩄ ꨙꨯꩌ ꨓꨭꩀ ꨘꩆ ꨘꩆ ꨨꨕꩍ꩞ ꩑꩘ ꨔꨭꩆ ꨨꨕꨬ ꨘꩆ ꨔꨭꩆ ꩙꩗꩙꩝ ꨆꨔꨬ ꩑꩘ ꨔꨭꩆ ꨚꨎꨮꨩ꩝ ꨐꨭꨩ ꨧꨯꨱꩃ ꨀꨟꨰꩀ ꨀꨟꨩ ꨕꨯꨱꩀ ꨕꨫ ꨧꨩ ꨟꨋꨥꨯꩌ ꨝꨳꩀ ꨝꨶꨬ꩞ ꨆꨔꨬ ꨨꨭꨩ ꨀꨋꩆ ꨎꨲ ꨘꩆ ꨧꨩ ꨟꨗꨶꨪꩋ ꨆꨴꩍ ꨨꨕꩍ꩝ ꨐꨭꨩ ꨝꩄ ꨝꨳꩀ ꨧꨠꩉ ꨧꨯꨱꩃ ꨍꨮꩍ ꨕꨶꩍ ꨔꨮꨭ ꨕꨯꩌ ꨆꨖꨩ ꨆꨣꨬ꩞ ꨕꨯꨱꩀ ꨝꨶꨬ ꨅꨩ ꨆꨩ ꨨꨕꨯꩌ ꨟꨪꩆ ꨝꨵꨯꨱꩍ ꨆꨤꨪꩆ ꨨꨶ ꨟꨰ꩞ ꨔꨭꩆ ꨘꩆ꩝ ꨚꨓꨯꨱ ꨌꩌꨛꨩ ꨚꨣꨟꨯꨮꩋꨥꨣꨥꩉꨠꩆ ꨚꨙꩉ ꨎꨝꨶꨮꩊ ꨓꨚꨩ ꨀꨓꨯꨱꩃ ꨀꨳ ꨢꨶꨮꩆ꩝ ꨆꨔꨬ ꨚꨴꨯꨱꩃ ꨕꩌ ꨚꨎꨮꨩ ꨘꩆ ꨨꨝꩉ ꨗꨯꨱ ꨎꨝꨶꨮꩊ꩝ ꨐꨭꨩ ꨓꨟꨩ ꨚꨎꩌ ꨆꨕꨰ ꨚꨳꨮꩍ ꨝꩄ ꨋꩀ ꨎꨝꨶꨮꩊ꩞ ꨓꨆꨪꩀ ꨨꨣꨬ ꨨꨕꨬ꩝ ꨆꨔꨬ ꨤꨪꨆꨮꨭ ꨕꨴꨬ ꨀꨟꨰꩀ ꨀꨟꨩ ꨧꨯꨱꩃ ꨟꨪꩀ ꨥꨩ꩝ ꨐꨭꨩ ꨗꨯꨱ ꨓꨶꨬ ꨧꨯꨱꩃ ꩘ ꨓꨟꩆ ꨎꨝꨶꨮꩊ ꨝꨪꨆꩆ꩞ ꨓꨭꩀ ꨣꨬ ꨆꨔꨬ ꨎꩃ ꨨꨕꨮꩉ ꨥꨮꩀ ꨚꨗꨶꨮꩄ ꨀꨟꨩ ꨙꨯꩌ ꨕꨨꨵꨮꨭ ꨓꨝꨳꩀ ꨗꨯꨱ: “ꨟꨰ ꨈꨤꩄ ꨐꩀ ꨀꨗꩀ!” ꨔꨭꩆ ꩗꩙꩗꩝ ꨈꨪꨤꨰ ꨎꨝꨶꨮꩊ ꨌꩌꨛꨩ ꩑꩒꩐꩐ ꨔꨴꨭꩍ ꨧꨯꨱꩃ ꩘ ꨓꨟꩆ ꨎꨝꨶꨮꩊ ꨗꨯꨱ ꨓꨚꨩ ꨓꨔꨪꩀ ꨚꨳꨮꩍ ꨀꨓꨯꨱꩃ ꨝꩊ ꨀꨳ ꨢꨶꨮꩆ꩞ ꨆꨵꨮꨭ ꨨꨣꨬ ꨓꨚꨩ ꨕꨫ ꨓꨧꨪꩀ꩝ ꨡꨯꩍ ꨓꨈꨪꨗꨭꩌ ꨧꨯꨱꩃ ꨀꨊꨪꩆ ꨟꨕꨩ ꨨꨣꨬ ꨟꨕꨩ ꨚꨴꨯꨱꩃ ꨦꨭꩇ꩝ ꨌꨳꨪꩌ ꨚꨮꩉ ꨝꩀ ꨤꨫꨊꨫꩀ ꨚꨔꨮꨭ ꨨꨭꨩ ꨈꨰꩅ ꨏꩀ ꨧꨪ ꨟꨰ꩞ ꨣꨪꨝꨭꩀ ꨟꨰ꩝ ꨨꨎꩆ ꨦꨭꩇ ꨖꨪꩅ꩝ ꨣꨪꨢꩀ ꨚꨯꨱꩀ ꨈꨵꨯꨱꩃ ꨢꨮꨭ ꨌꨮꩀ꩝ ꨧꩇ ꨟꨗꨶꨪꩋ ꨚꨴꨯꨮꨥ꩝ ꨝꨳꩀ ꨣꨤꨯꨩ ꨈꨪꨤꨰ ꨆꨣꩌ꩞ ꨆꨔꨬ ꨧꨯꨱꩃ ꨣꨤꨯꨩ ꨟꨗꨶꨪꩋ ꨚꩆ ꨆꨎꩇ ꨆꨢꨭꨥ ꨈꨪꨤꨰ꩝ ꨟꨣꩅ ꨀꨝꨪꩍ ꨚꨴꨲꩆ ꨚꨳꨮꩍ ꨆꨵꩍ ꨆꨩ ꨀꨳ ꨝꨩ ꨔꨮꩀ꩞ ꨆꨔꨬ ꨡꨶꩍ ꨆꩉ “ꨛꨯꨮ ꨢꩃ ꨤꨮꩈ꩝ ꨢꨮꨭ ꨨꨝꩉ ꨓꨠꩉ ꨇꨯꨱꩊ ꨆꨵꨯꨱꩃ ꨗꨫ ꨗꨯꨱ?!”꩝ ꨓꨭꩀ ꨘꩆ ꨧꩇ ꨚꨗꨶꨮꩄ ꨀꨟꨩ ꨕꨯꨱꩀ ꨨꨟꨪꩅ ꨕꨤꩌ ꨀꨆꨯꨱꩀ “ꨟꨰ ꨈꨤꩄ ꨐꩀ ꨀꨗꩀ!” ꨨꨕꨬ ꨕꨫ ꨣꨪꨝꨭꩀ꩝ ꨀꨝꨪꩍ ꨎꨝꨶꨮꩊ ꨗꨯꨱ ꨀꨓꨯꨱꩃ ꨀꨓꩍ ꨌꨤꩍ ꨌꨤꨪꩆ꩝ ꨝꨪꨣꨭꨥ ꨘꩆ ꨕꨯꩌ ꨈꨪꨤꨰ ꨓꨢꩍ ꨓꨟꨩ ꨓꨗꩍ꩝ ꨡꨯꩍ ꨝꨳꩀ ꨣꨤꨯꨩ ꨀꨓꨭꨥ ꨟꨗꨶꨪꩋ ꨟꨓꨰ ꨕꨫ ꨓꨆꨰ ꨓꨔꨪꩀ꩝ ꨌꨳꨪꩌ ꨚꨴꨯꨱꩃ ꨧꨯꨱꩃ ꨣꨤꨯꨩ ꨀꨗꩀ ꨕꨯꨱꩀ ꨡꨮꩃ ꨣꨤꨯꨱꨥ꩞ ꨓꨭꩀ ꨘꩆ꩝ ꨔꨰꩀ ꨕꨶꨪꨧꩀ ꨘꩆ ꨚꩀ ꨨꨤꨬ ꨎꩃ ꨡꨯꩍ꩞ ꨓꨭꩀ ꨓꨟꨩ ꨓꨗꩍ ꨢꨶꨮꩆ꩝ ꨎꨝꨶꨮꩊ ꨢꨶꨮꩆ ꨟꩀ ꨆꨔꨬ ꨧꨯꨱꩃ ꨣꨤꨯꨩ ꨎꨝꨶꨮꩊ ꨌꩌꨛꨩ ꨕꨯꨱꩀ ꨨꨕꨳꨮꩇ꩝ ꨝꨩ ꨗꨯꨱ ꨆꨕꨰ ꨆꨣꨮꩀ ꨎꨝꨶꨮꩊ꩞ ꨆꨕꨰ ꨘꩆ ꨇꨪꩀ ꨕꨶꨩ ꨓꨟꩆ ꨎꨝꨶꨮꩊ ꨌꩌꨛꨩ ꨕꨯꨱꩀ ꨨꨕꨳꨮꩇ꩝ ꨔꨬ ꨔꨬ ꨎꩃ ꨤꨪꨈꩍ ꨤꨪꨈꨶꨰ ꨧꨯꨱꩃ ꨤꨪꨚ ꨓꨳꩆ꩞ “ꨤꨪꨧꨬ ꨨꨶꩀ꩝ ꨤꨪꨧꨬ ꨨꨶꩀ꩝ ꨤꨪꨧꨬ ꨨꨶꩀ” ꨧꩇ ꨕꨗꩈ ꨎꨝꨶꨮꩊ ꨌꩌ꩝ ꨕꨶꨩ ꨨꨣꨬ ꨓꨚꨩ ꨚꨎꨮꨩ ꨟꨪꩆ ꨎꨝꨶꨮꩊ ꨌꩌ ꨅꨩ ꨆꨩ ꨡꨮꩃ ꨨꨈꨰꩅ꩝ ꨝꨳꩀ ꨣꨤꨯꨩ ꨟꨗꨶꨪꩋ ꨟꨓꨰ ꨚꨎꨮꨩ꩝ ꨟꨢꩍ ꨢꨮꨭ ꨗꨫ ꨥꨮꩀ ꨘꩆ ꨟꨓꨰ ꨀꨮꩀ ꨀꨝꨪꩍ꩞ ꨓꨮꩊ ꨨꨣꨬ ꨆꨵꨮꨭ꩝ ꨨꨭꨩ ꨀꨓꨯꨱꩃ ꨈꨮꩇ ꨕꨫ ꨎꨝꨶꨮꩊ ꨢꨶꨮꩆ ꨧꨯꨱꩃ ꨌꩌ꩞ ꨓꨮꩊ ꨨꨣꨬ ꨚꩀ꩝ ꨕꨣꩍ ꨨꨯꨱꩀ꩝ ꨣꨤꨯꨩ ꨟꨗꨶꨪꩋ ꨟꨓꨰ ꨆꨢꨶ ꨟꨝꨵꩍ ꨈꨮꩇ꩞ ꨓꨮꩊ ꨨꨣꨬ ꨤꨪꨟꨩ ꨎꨝꨶꨮꩊ ꨢꨶꨮꩆ ꨟꩀ ꨨꨕꨯꩌ ꨣꨪꨓꨭꩍ ꨎꨝꨶꨮꩊ ꨌꩌ ꨓꩀ ꨀꨆꨯꨱꩀ꩞ ꨆꨕꨰ ꨆꨣꨮꩀ ꨎꨝꨶꨮꩊ ꨧꨪ ꨌꨤꩍ ꨚꨎꨮꨩ꩝ ꨡꨯꩍ ꨆꨖꨩ ꨝꨳꩀ ꨆꩆ꩝ ꨘꩆ ꨣꨎꨆꩉ ꨇꨪꩀ ꨆꨕꨰ ꨙꨶꨮꩄ ꨨꨣꩀ ꨗꨯꨱ ꨣꨎꨀꨰꩋ ꨚꨳꨮꩍ ꨓꨐꨫ ꨋꩀ ꨨꨝꩉ ꨕꨫ ꨆꨖꨩ ꨗꨫ꩞ ꨨꨶꨩ ꨤꨲꨩ – ꨝꩊ ꨀꨳ ꨢꨶꨮꩆ ꨤꨶꨪꩄ ꨔꨭꩆ ꩙꩗꩙꩞ ꨚꨓꨯꨱ ꨀꨳ ꨢꨶꨮꩆ ꨓꨭꩀ ꨘꩆ ꨓꨯꩀ ꩖ ꨔꨭꩆ ꨟꨪꩆ꩝ ꨆꨢꨯꨱꩌ ꨚꨓꨯꨱꩌ ꨕꨫ ꨓꨊꨪꩆ ꨚꩆꨣꨯꨱꩃ ꨤꨯꨮꨩ ꨨꩃ꩞ ꨀꨳ ꨢꨶꨮꩆ ꨝꨪꨣꨭꨥ ꨓꨚꨩ ꨣꨪꨝꨭꩀ꩝ ꨆꨢꨩ ꨡꨮꩃ ꨕꨯꨱꩀ ꨝꨳꩀ ꨓꨆꨪꩀ꩝ ꨤꨯꨮꨩ ꨨꩃ ꨨꨭꨩ ꨀꨋꩆ ꨎꨲꨩ ꨘꩆ ꨧꨩ ꨟꨗꨶꨪꩋ ꨧꨘꩀ꩞ ꨓꨭꩀ ꨡꨯꩍ ꨨꨣꩀ ꨟꩃ ꨕꨫ ꨆꨕꨰ ꨆꨣꨮꩀ ꨎꨝꨶꨮꩊ꩝ ꨅꩃ ꨝꨴꨬ ꨈꨯꨱꩆ: “ꨕꨴꨬ ꨅꨩ ꨨꨭꨩ ꨝꨴꩍ ꨡꨮꩃ ꨚꨳꨮꩍ ꨚꨢꨮꩉ ꨆꨩ ꨨꨕꨯꩌ ꨂꨣꩃ ꨟꨝꨵꩍ ꨗꨈꩉ꩝ ꨟꨪꩆ ꨟꨢꩍ ꨕꨴꨬ ꨚꨤꨯꨱ ꨟꨗꨯꨱꩀ ꨐꨭꨩ ꨗꨯꨱ ꨧꩃ ꨢꨮꨩ ꨨꨕꨬ ꨨꨣꨬ ꨐꨭꨩ ꨟꨝꨵꩍ ꨕꨴꨬ ꨥꨮꩀ꩝ ꨆꨢꨶꨩ ꨘꩆ꩝ ꨚꨟꨓꨰ ꨐꨭꨩ ꨀꨝꨪꩍ ꨝꨰꩀ꩝ ꨚꨈꨭꩍ ꨗꨫ ꨋꩀ ꨆꨩ ꨆꨵꨯꨱꩍ ꨈꨴꨭꩀ ꨘꩆ” ꨣꨎꨀꨰꩋ ꨨꨶꨩ ꨤꨲꨩ ꨝꨴꨬ ꨈꨯꨱꩆ ꨆꨩ ꨎꨝꨶꨮꩊ ꨟꨰ ꨆꨕꨰ ꨆꨣꨮꩀ ꨚꨳꨮꩍ ꨋꩀ ꨈꨴꨭꩀ ꨟꨗꨬ ꨕꨣꩍ꩝ ꨟꨪꩆ ꨅꨩ ꨆꨩ ꨗꨯꨱ ꨓꨮꩊ꩝ ꨎꨝꨶꨮꩊ ꨌꩌꨛꨩ ꨛꨩꨡꨵꨯꨱꩃ ꨆꨤꨪꩆ ꨚꨎꨮꨩ꩞ ꨕꨶꨩ ꨓꨟꩆ ꨟꨗꨶꨪꩋ ꨀꨓꨯꨱꩃ ꨌꨤꩍ ꨆꨕꨰ ꨆꨣꨮꩀ꩝ ꨝꨳꩀ ꨣꨤꨯꨩ ꨂꨣꩃ ꨟꨓꨰ꩝ ꨟꨪꩆ ꨆꨢꨶꨩ ꨨꨭꨩ ꨣꨤꨯꨩ ꨟꨗꨶꨪꩋ ꨨꨮꩆ ꨀꨓꩍ ꨘꩆ ꨟꨝꨵꩍ ꨨꨭꨩ ꨆꨕꨰ꩝ ꨟꩀ ꨨꨭꨩ ꨣꨤꨯꨩ ꨈꨴꨮꩇ ꨧꨯꨱꩃ ꨝꨴꩍ ꨡꨮꩃ꩞ ꨨꨟꨪꩅ ꨁꨇꩆ ꨎꨝꨶꨮꩊ ꨢꨶꨮꩆ ꨧꨪ ꨟꨰ꩝ ꨘꩆ ꨧꨠꩉ ꨣꨟꨪꩀ ꨙꨶꨮꩄ ꨗꨯꨱ ꨈꩍ ꨟꨣꨯꨱꩃ꩝ ꨙꨶꨮꩄ ꨅꨩ ꨥꨮꩀ ꨡꨯꨱꩀ ꨟꨯꨱꩃ ꨈꨤꩄ꩝ ꨟꨪꩆ ꨓꨚꨩ ꨧꨩ ꨟꨤꩌ ꨟꨪꩆ ꨎꨝꨶꨮꩊ ꨢꨶꨮꩆ ꨎꩃ ꨚꨈꨶꨬ ꨓꨮꩊ꩞ ꨆꨔꨬ ꨧꨯꨱꩃ ꨆꨵꨮꨭ ꨣꨪꨝꨭꨥ ꨎꨝꨶꨮꩊ ꨌꩌ ꨕꨯꨱꩀ ꨇꨮꩃ ꨆꨎꩇ ꨇꨫꩂ ꨕꨯꨱꩀ ꨨꨕꨬ ꨀꨝꨪꩍ ꨇꨪꩀ ꨎꨤꩆ ꨆꨩ ꨟꨗꨶꨪꩋ ꨝꨪꨆꩆ ꨙꨶꨮꩄ ꨕꨮꩇ꩝ ꨟꨢꩍ ꨎꨝꨶꨮꩊ ꨢꨶꨮꩆ ꨚꨈꨶꨬ ꨓꨮꩊ꩝ ꨘꩆ ꨇꨫꩂ ꨀꨓꨯꨱꩃ ꨈꨤꩄ ꨚꨎꩀ ꨟꨓꨰ꩞ ꨎꨤꩆ ꨟꨗꨶꨪꩋ ꨗꨯꨱ ꨓꨮꩊ ꨧꨩ ꨓꨓꨶ ꨓꨜꨳ ꨎꨪꩍ ꨗꨈꩉ ꨌꩌꨛꨩ꩞ ꨝꨪꨣꨭꨥ ꨓꨚꨩ ꨧꨪ ꨀꨝꨪꩍ꩝ ꨨꨟꨪꩅ ꨓꨗꩍ ꨢꨭꩍ ꨢꨭꩍ꩞ ꨆꨔꨬ ꨚꨨꨟꨪꩅ ꨓꨊꨪ ꨓꨟꨩ ꨓꨗꩍ ꨟꩃ ꨔꨮꨭ ꨘꩆ ꨧꩇ ꨓꨆꨰ ꨙꨶꨮꩄ ꨀꨧꨰꩍ ꨧꨯꨱꩃ ꨓꨟꩆ ꨎꨝꨶꨮꩊ ꨕꨯꨱꩀ ꨚꨈꨶꨬ ꨟꨰ꩞ ꨆꨔꨬ ꨚꨴꨯꨮꨥ ꨓꨈꨯꩀ “ꨢꨶꨮꩆ ꨟꨰ ꨚꨎꨮꨩ”꩝ ꨝꨪꨣꨭꨥ ꨘꩆ ꨎꨤꩆ ꨟꨗꨶꨪꩋ ꨎꩃ ꨓꨚꨩ ꨓꨓꨶ ꨝꨵꨯꨱꩍ꩞ ꨟꩃ ꨀꨓꩍ꩝ ꨨꨟꨪꩅ ꨧꩇ ꨀꨧꨰꩍ꩝ ꨝꨵꨯꨱꩍ ꨡꨯꩍ ꨕꨯꩀ ꨆꨐꨪꩀ ꨘꩆ ꨕꨯꩀ ꨎꨝꨶꨮꩊ ꨢꨶꨮꩆ꩞ ꨟꨗꨶꨪꩋ ꨌꩌ ꨟꨣꩅ ꨀꨝꨪꩍ ꨚꨴꨲꩆ ꨢꩍ ꨓꨓꨶ ꨚꨳꨮꩀ ꨌꨆꩀ ꨎꨝꨶꨮꩊ ꨢꨶꨮꩆ ꨓꨚꨩ꩝ ꨟꨪꩆ ꨓꨓꨶ ꨆꨎꩇ ꨣꨤꨯꨩ ꨅꨩ ꨢꩍ ꨧꨭꨟꨭꨩ꩞ ꨆꨔꨬ ꨧꨯꨱꩃ ꩓꩐꩐꩐ ꨎꨝꨶꨮꩊ ꨌꨳꨪꩇ ꨕꨯꨱꩀ ꨥꨮꩀ ꨈꩍ ꨗꨫ ꨓꨓꨶ ꨚꨳꨮꩍ ꨟꨧꨭꩍ ꨌꨆꩀ ꨎꨝꨶꨮꩊ ꨢꨶꨮꩆ꩝ ꨌꨰꩀ ꨆꨩ ꨟꨗꨶꨪꩋ ꨕꨯꨱꩀ ꨈꩍ ꨕꨯꨮꩍ ꨨꨭꨩ ꨥꩀ ꨓꨭꩀ ꨢꩍ ꨓꨓꨶ ꨘꩆ꩞ ꨎꨝꨶꨮꩊ ꨢꨶꨮꩆ ꨕꨯꨱꩀ ꨕꨯꩌ ꨢꩌ ꨓꨮꩊ ꨓꨓꨶ ꨟꨪꩆ ꨚꨕꨮꩃ꩞ ꨕꨶꨩ ꨓꨟꩆ ꨎꨝꨶꨮꩊ ꨢꨶꨮꩆ ꨌꨭꩀ ꨀꨥ ꨞꨯꩂ ꨆꨐꨪꩀ ꨧꨯꨱꩃ ꨕꨯꩀ ꨆꨐꨪꩀ꩝ ꨆꨵꨮꨭ ꨣꨪꨝꨭꨥ ꨎꨝꨶꨮꩊ ꨌꩌ ꨌꨭꩀ ꨀꨥ ꨡꨯꩂ ꨎꨭꩀ ꨧꨯꨱꩃ ꨕꨯꩀ ꨎꨭꩀ꩞ ꨕꨯꨱꩀ ꨕꨫ ꨊꨯꨱꩀ ꨓꨓꨶ ꨈꨪꨗꨫꩀ꩝ ꨎꨝꨶꨮꩊ ꨟꨇꨮꩀ ꨓꨆꨪꩀ ꨎꩃ ꨢꨮꨭ ꨈꨮꩇ꩞ ꨘꩆ ꨧꨩ ꨝꨳꨯꨮꩉ ꨨꨣꨬ ꨔꨭꩆ ꩙꩗꩙꩝ ꨓꨈꨪꨗꨭꩌ ꨦꨭꩇ ꨚꨌꨮꩃ ꨀꨝꨪꩍ ꨧꨪ ꨨꨎꩆ꩝ ꨈꨴꩀ ꨕꨯꨱꩀ ꨚꨮꩉ ꨊꨯꨱꩀ ꨤꨫꨊꨫꩀ ꨌꩃ ꨢꨯꨱꩃ ꨡꨮꩃ꩝ ꨀꨊꨪꩆ ꨀꨢꨭꩀ ꨤꨪꨀꩆ ꨡꨭꨥ ꨕꨣꩍ꩝ ꨓꨈꨪꨗꨭꩌ ꨎꨭꩀ ꨨꨶꨩ ꨟꨰ ꨣꨤꨯꨩ ꨥꨮꩀ꩝ ꨨꨎꩆ ꨤꨰꩀ ꨓꨴꨭꩆ꩞ ꨝꨪꨣꨭꨥ ꨓꨒꨯꨱꩍ ꨨꨎꩆ ꨤꨰꩀ ꨈꨯꨱꩀ ꨓꨗꩍ꩝ ꨞꩃ ꨢꨶꨮꩆ ꨝꨴꨬ ꨈꨯꨱꩆ ꨀꨓꨯꨱꩃ꩝ ꨎꨝꨶꨮꩊ ꨌꩌ ꨇꨫꩂ ꨀꨓꨯꨱꩃ ꨚꨎꩀ ꨟꨓꨰ꩝ ꨙꨥ ꨕꨶꨩ ꨈꩍ ꨚꨯꨱꩍ ꨈꨮꩇ꩝ ꨝꨮꩉ ꨞꨯꩂ ꨟꨤꨭꩀ ꨓꨟꨩ ꨝꩉ ꨡꨯꩂ꩞ ꨧꩇ ꨙꨥ ꨓꩀ꩝ ꨧꩇ ꨟꨗꨶꨪꩋ ꨚꨴꨯꨮꨥ꩝ ꨕꨣꩍ ꨨꨯꨱꩀ ꨀꨆꨯꨱꩀ ꨎꨴꨭꩍ꩝ ꨣꨭꩇ ꨚꨞꩇ ꨌꨤꩍ ꨣꨯꨱꩃ꩞ ꨆꨔꨬ ꨧꨯꨱꩃ ꨎꨝꨶꨮꩊ ꨌꩌ ꨟꨧꨭꩍ ꨆꨕꨴꩆ ꨕꨴꨬ꩝ ꨆꨢꨶ ꨓꨓꨶ ꨈꨪꨗꨫꩀ ꨘꩆ ꨎꨝꨶꨮꩊ ꨢꨶꨮꩆ ꨣꨤꨯꨩ ꨨꨮꩆ ꨎꩃ ꨅꨩ ꨓꨚꨩ ꨎꨳꨯꨮꩃ꩝ ꨝꨵꨯꨱꩍ ꨧꨩ ꨕꨶꨩ ꨓꨭꩀ ꨀꨓꨯꨱꩃ꩝ ꨞꩃ ꨢꨶꨮꩆ ꨝꨴꨬ ꨈꨯꨱꩆ ꨤꨶꨰ ꨎꨝꨶꨮꩊ ꨈꨤꩄ꩞ ꨝꨪꨣꨯꩀ ꨓꨴꨩ꩝ ꨎꨝꨶꨮꩊ ꨌꨭꩍ ꨡꨴꨮꩌ ꨟꨰ꩝ ꨕꨯꩌ ꨣꨪꨝꨭꨥ ꨎꨝꨶꨮꩊ ꨢꨶꨮꩆ ꨌꨭꩍ ꨡꨴꨮꩌ ꨓꨟꨩ ꨎꨝꨶꨮꩊ ꨌꩌꨛꨩ꩞ ꨓꨟꩆ ꨡꨴꨮꩌ ꨚꨮꩉ ꨢꨮꨭ ꨓꨪꩀ ꨓꨪꩀ ꨆꨓꨯꨱꩅ ꨆꨵꨮꩇ ꨓꨟꨩ ꨎꨝꨶꨮꩊ ꨌꩌ꩝ ꨎꨝꨶꨮꩊ ꨌꩌ ꨒꨮꩇ ꨡꨴꨮꩌ ꨟꨓꨰ ꨕꩀ ꨈꨮꩇ꩞ ꨆꨔꨬ ꨒꨮꩇ ꨡꨴꨮꩌ ꨕꨫ ꨓꨊꨪꩆ꩝ ꨓꨭꩀ ꨥꨪꩊ ꨥꩊ ꨤꨰꩀ ꨓꨴꨭꩆ ꨀꨤ ꨓꨓꨶ꩞ ꨓꨭꩀ ꨕꨯꨱꩀ ꨤꨰꩀ ꨓꨴꨭꩆ꩝ ꨆꨔꨬ ꨡꨯꩍ ꨎꨝꨶꨮꩊ ꨝꨪꨆꩆ ꨕꨯꨱꩀ ꨒꨮꩇ ꨡꨴꨮꩌ꩝ ꨨꨟꨪꩅ ꨧꩇ ꨚꨴꨯꨮꨥ꩝ ꨡꨯꩍ ꨓꨒꨯꨱꩍ ꨨꨎꩆ ꨟꨤꨭꩀ ꨧꨯꨱꩃ ꨓꨒꨯꨱꩍ ꨕꨣꩍ ꨤꨰꩀ ꨓꨴꨭꩆ꩞ ꨆꨖꨩ ꨆꨔꨬ: ꨝꨪꨘꩍ ꨕꨶꨩ ꨝꨪꨣꨭꨥ ꨚꨟꨓꨰ ꨝꨵꨯꨱꩍ ꨎꨝꨶꨮꩊ ꨌꩌ꩝ ꨎꨝꨶꨮꩊ ꨢꨶꨮꩆ ꨚꨈꨶꨬ ꨓꨚꨩ ꨓꨓꨶ꩝ ꨓꨚꨩ ꨓꨮꩊ ꨟꨓꨲꩍ ꨟꨪꩆ ꨓꨓꨶ ꨎꨤꨮꩍ ꨣꨯꨱꩃ꩝ ꨀꨧꨰꩍ ꨎꨝꨶꨮꩊ ꨤꨰꩀ ꨓꨴꨭꩆ ꨀꨤ ꨀꨝꨪꩍ꩞ ꨅꨩ ꨓꨚꨩ ꨨꨭꨩ ꨥꨮꩀ꩝ ꨘꩆ ꨞꩃ ꨤꨶꨰ ꨎꨝꨶꨮꩊ ꨈꨤꩄ꩝ ꨕꨯꩌ ꨚꨵꨭꩍ ꨣꨪꨝꨭꨥ ꨟꨗꨶꨪꩋ ꨌꩌ ꨨꨭꨩ ꨢꨮꨭ ꨘꩆ ꨆꨩ ꨟꩃ ꨆꨵꩍ ꨟꨓꨰ꩝ ꨝꨵꨯꨱꩍ ꨗꨯꨱ ꨥꨮꩀ ꨈꨤꩄ ꨗꨈꩉ꩞ ꨈꨤꩄ ꨓꨮꩊ ꨆꨔꨬ꩝ ꨓꨭꩀ ꨤꨰꩀ ꨓꨴꨭꩆ ꨓꨓꨶ ꨝꨵꨯꨱꩍ ꨀꨳ ꨝꨩ ꨔꨮꩀ꩝ ꨡꨯꩍ ꨓꨓꨶ ꨎꨤꨮꩍ ꨚꨌꩍ ꨎꨳꨮꩂ ꨨꨕꨯꩌ ꨆꨢꨭꨥ ꨕꨯꨱꩀ ꨙꨯꩂ꩞ ꨐꨭꨩ ꨟꨣꩅ ꨀꨝꨪꩍ ꨚꨴꨲꩆ ꨤꨶꨰ ꨓꨈꩉ ꨀꨳ ꨝꨵꨯꨱꩍ ꨚꨥꩀ ꨨꨭꨩ ꨧꨩ ꨆꨢꨭꨥ ꨚꨴꨯꨱꩃ꩝ ꨘꩆ ꨆꨩ ꨟꩃ ꨕꨯꨱꩀ ꨨꨕꨳꨪꩇ꩞ ꨧꨩ ꨝꨪꨣꨯꩀ ꨓꨴꨩ꩝ ꨀꨳ ꨝꨩ ꨆꨢꨭꨥ ꨘꩆ ꨓꨚꨩ ꨈꩍ ꨕꨯꨮꩍ ꨆꨴꨯꨱꩃ꩝ ꨆꨔꨬ ꨓꨈꨯꩀ ꨀꩉ ꨟꨝꨯꨮꩅ ꨧꨯꨱꩃ ꨚꨙꨪꩀ ꨘꩆ ꨓꨊꨶꨬ ꨙꨪꩍ ꨕꨫ ꨀꩉ ꨌꨶꩍ ꨚꨓꨪꩍ꩞ ꨓꨭꩀ ꨀꨳ ꨨꨣꨬ ꨝꨪꨣꨭꨥ ꨓꨴꨭꩆ ꨌꨮꩀ꩝ ꨨꨭꨩ ꨧꨩ ꨅꩃ ꨓꨨꨩ ꨧꨳꩌ ꨓꨳꩆ ꨗꨯꨱ ꨚꨈꩆ꩝ ꨡꨯꩍ ꨟꨗꨶꨪꩋ ꨤꨪꨊꩀ ꨤꨪꨊꨶꨬ ꨕꨫ ꨊꨯꨱꩀ ꨌꨶꩍ ꨘꩆ ꨥꨰꩍ ꨟꨰ ꨓꨐꨫ: ꨀꨗꩀ ꨤꨮꩈ꩝ ꨓꨈꨯꩀ ꨀꨗꩀ ꨤꨮꩈ! ꨆꨔꨬ ꨆꨢꨶꨩ ꨤꨨꨪꩀ ꨕꨣꩍ ꨘꩆ ꨤꨪꨊꩀ ꨤꨪꨊꨶꨬ꩝ ꨡꨯꩍ ꨢꨮꨭ ꨘꩆ ꨅꩃ ꨓꨨꨩ ꨈꨶꨬ ꨐꨭꨩ ꨟꨰ ꨧꩃ ꨅꩃ ꨓꨜꨳ ꨘꩆ ꨚꨳꨮꩍ ꨚꨎꨴꨭ ꨖꨪꩅ ꨤꨪꨆꨩ꩞ ꨓꨭꩀ ꨐꨭꨩ ꨟꨕꨮꩍ ꨓꨈꨯꩀ ꨡꨯꩍ ꨤꨪꨆꨩ ꨕꨫ ꨓꨊꨪꩆ ꨕꨳꨮꩆ ꨈꨤꩄ ꨝꨳꩀ ꨧꨳꩌ꩞ ꨕꨯꨱꩀ ꨤꨪꨚꨩ ꨓꨳꩆ ꨝꨵꨯꨱꩍ ꨡꨯꩍ ꨝꨭꨩ ꨚꩀ ꨀꨘꩀ ꨘꩆ ꨐꨭꨩ ꨨꨶꨪꩄ ꨀꨝꨪꩍ ꨝꨭꨩ꩝ ꨡꨮꩃ ꨝꨵꨯꨱꩍ ꨝꨭꨩ ꨆꨩ ꨟꩃ ꨡꨯꩍ ꨣꨭꩇ ꨚꨞꩇ ꨇꨮꩃ ꨥꨮꩀ꩞ ꨧꨩ ꨝꨪꨣꨯꩀ ꨓꨴꨩ꩝ ꨨꨭꨩ ꨟꨭꩀ ꨓꨨꨩ ꨓꨟꨩ ꨧꩃ꩝ ꨟꨭꩀ ꨀꨳꨮꩀ ꨆꨔꨬ ꨀꨦꨪꩅ ꨝꨵꨯꨱꩍ ꨟꩃ ꨙꨯꩌ: ꨀꨗꩀ ꨟꨕꨮꩍ ꨚꨎꨮꨩ? ꨡꨯꩍ ꨕꨤꩌ ꨣꨭꩇ ꨆꨎꩇ ꨆꨣꨯꨩ ꨨꨤꨬ? ꨅꨩ ꨔꨮꨭ ꨧꩇ ꨢꨶꨮꩆ ꨘꩆ ꨆꨔꨬ ꨅꨩ ꨔꨮꨭ ꨧꨭꨂꩀ ꨈꨤꩄ ꨨꨝꩉ꩝ ꨡꨯꩍ ꨢꨮꨭ ꨘꩆ ꨟꨭꩀ ꨙꨯꩌ ꨈꨤꩄ ꨧꩇ ꨌꩌ: “ꨢꨮꨭ ꨈꨰꩅ ꨀꨗꩀ ꨚꨤꨪꨆꨩ ꨢꨮꨭ ꨗꨫ? ꨆꨔꨬ: ꨕꨨꨵꩀ꩟ ꨕꨨꨵꩀ ꨒꨮꩇ ꨡꨴꨮꩌ꩝ ꨟꨪꩆ ꨨꨝꩉ ꨟꨭꩀ ꨔꨮꨭ ꨧꩇ ꨌꩌ? ꨟꨭꩀ: ꨆꨮꨭ ꨟꨗꨶꨪꩋ ꨌꩌ ꨟꨪꩆ꩝ ꨓꨚꨩ ꨈꩍ ꨗꨫ ꨕꨯꨱꩀ ꨤꨪꨥꨪꩀ ꨚꨎꨮꨩ꩞ ꨡꨯꩍ ꨟꨗꨶꨪꩋ ꨧꨩ ꨀꨳ꩝ ꨆꨔꨬ ꨝꨳꩀ ꨀꨶꨮꩆ꩝ ꨇꨶꨰꨩ ꨧꨯꨱꩃ ꨚꩆ ꨓꨊꨪꩆ ꨟꨭꩀ: ꨙꨶꨩ ꨜꨶꨮꩊ ꨟꨭꩀ ꨣꨤꨯꨩ꩝ ꨧꨪ ꨕꨘꩀ ꨨꨭꨩ ꨟꨭꩀ꩝ ꨘꩆ ꨅꨩ ꨕꨨꨵꩀ ꨟꨓꨰ ꨚꨎꨮꨩ! ꨕꨶꨩ ꨅꩃ ꨟꨭꩀ ꨘꩆ ꨕꨯꨱꩀ ꨕꨫ ꨚꨭꩍ ꨓꨜꨳ ꨆꨴꨯꨱꩃ꩝ ꨕꨨꨵꨮꨭ ꨕꨯꨮꩍ ꨆꨢꨶꨩ ꨟꨗꨶꨪꩋ ꨙꨯꩌ ꨔꨯꨱꩍ ꨤꩄ ꨅꩃ ꨟꨭꩀ ꨋꩀ ꨎꨴꨭ ꨁꨗꨪꨄ ꨘꩆ ꨅꩃ ꨟꨭꩀ ꨨꨝꩉ ꨚꨵꨰꩍ ꨝꨤꨩ ꨙꨶꨮꩄ ꨓꨚꨩ ꨈꩍ ꨗꨫ ꨕꨯꨱꩀ꩞ ꨟꨢꩍ ꨤꩄ ꨕꨯꨱꩀ ꨕꨫ ꨗꨈꩉ ꨂꨣꩃ ꨟꨪꩆ ꨨꨓꨰ ꨓꨳꩆ ꨝꨳꨯꨮꩉ ꨣꨬ ꨎꩃ ꨨꨕꨮꩉ ꨓꨮꩊ ꨚꨤꨬ ꨆꨵꩀ꩝ ꨨꨭꨩ ꨧꨩ ꨆꨟꨮꨭꩆ ꨆꨟꨬ ꨓꨴꨩ ꨕꨯꨱꩀ ꨚꩀ ꨌꩌꨛꨩ꩞ ꨡꨯꩍ ꨟꨗꨶꨪꩋ ꨧꨩ ꨀꨳ ꨈꨯꨱꩀ ꨀꨈꨥ꩝ ꨟꨭꩀ ꨅꩃ ꨕꨯꨱꩃ ꨀꨝꨪꩍ ꨚꨴꨲꩆ꩞ ꨆꨔꨬ ꨕꨯꨱꩀ ꨧꩃ ꨚꨭꩍ ꨘꩆ ꨆꨵꨮꨭ ꨨꨣꨬ꩝ ꨝꨵꨯꨱꩍ ꨇꨮꩃ ꨆꨕꨮꩃ ꨥꨮꩀ꩞ ꨕꨶꨩ ꨅꩃ ꨟꨭꩀ ꨝꨴꨬ ꨝꨴꩍ ꨧꨯꨱꩃ ꨟꨧꨪꩆ ꨚꨳꨮꩍ ꨗꨯꨱ ꨎꨤꩆ ꨟꨰ ꨧꩃ꩞ ꨆꨔꨬ: ꨕꨨꨵꩀ ꨤꨪꨆꨮꨭ ꨕꨴꨬ ꨅꩃ ꨟꨭꩀ! ꨀꨮꩆ ꨚꨴꨯꨱꩃ ꨗꨫ꩝ ꨕꨨꨵꩀ ꨨꨕꨮꩉ ꨓꨮꩊ ꨀꨝꨪꩍ ꨣꩈ! ꨅꩃ: ꨀꨗꩀ ꨗꨯꨱ ꨆꨎꩇ ꨆꨣꨯ ꨝꨰꩀ! ꨅꩃ ꨨꨭꨩ ꨧꨩ ꨈꨴꨭꩀ ꨚꨕꨯꨱꩃ ꨀꨗꩀ꩞ ꨆꨔꨬ: ꨅꩃ ꨟꨭꩀ ꨙꨯꩌ ꨝꨰꩀ꩝ ꨟꨢꩍ ꨌꨤꩍ ꨤꨪꨊꨪꩀ ꨕꨨꨵꩀ ꨎꩃ ꨨꨝꩉ ꨋꩀ ꨆꨩ ꨨꨭꨩ꩞ ꨟꨭꩀ ꨟꩀ ꨓꨝꨳꩀ ꨧꨩ ꨓꨑꨴꩀ ꨡꨯꩂ ꨨꨭꨩ ꨝꨯꨱꩍ ꨝꨪꨊꨭ ꨞꨯꩂ꩝ ꨚꨢꨮꩉ ꨆꨩ ꨆꨔꨬ ꨝꨵꨯꨱꩍ ꨙꨯꩌ: ꨀꨗꩀ ꨕꨶꩍ ꨚꨤꨬ ꨆꩌ꩝ ꨗꨈꩉ ꨀꨩꨠꨣꨥꨓꨪ꩝ ꨕꨫ ꨚꨤꨬ ꨘꩆ ꨨꨭꨩ ꨆꨟꨮꨭꩆ ꨟꨭꩀ ꨀꨋꩆ ꨧꨩ ꨧꨩ꩝ ꨚꨢꨮꩉ ꨓꨑꨴꩀ ꨗꨫ ꨆꨩ ꨐꨭꨩ꩝ ꨙꨯꩌ ꨤꩄ ꨅꩃ ꨟꨭꩀ ꨕꨫ ꨗꨈꩉ ꨀꨓꩍ ꨕꨯꨱꩀ ꨆꨎꩇ ꨆꨣꨯꨩ ꨟꨪꩆ꩞ ꨆꨔꨬ: ꨛꨯꨮ! ꨕꨨꨵꩀ ꨟꨪꩍ ꨋꩀ ꨆꨵꨯꨱꩍ ꨈꨴꨭꩀ ꨗꨫ꩝ ꨟꨪꩍ ꨚꨢꨮꩉ ꨓꨑꨴꩀ ꨆꨩ ꨧꨩ ꨧꨩ! ꨙꨯꩌ ꨝꨵꨯꨱꩍ ꨆꨔꨬ ꨤꨪꨆꨮꨭ ꨕꨴꨬ ꨕꨶꨩ ꨅꩃ ꨟꨭꩀ ꨗꨯꨱ ꨈꨤꩄ ꨚꨤꨬ꩞ ꨆꨵꨮꨭ ꨨꨣꨬ ꨨꨕꨬ꩝ ꨆꨔꨬ ꨓꨚꨩ ꨗꨈꩉ ꨌꩌꨛꨩ꩝ ꨓꨭꩀ ꨗꨯꨱ ꨚꨈꩆ ꨧꨩ ꨆꨴꨯꨱꩃ ꨡꨯꩍ ꨧꨩ ꨆꨟꨬ ꨆꨕꨭꨥ ꨓꨴꨭꩆ ꨀꨳ ꨚꨝꨪꨗꨯꨮꩋ ꨕꨴꨬ꩞ ꨅꨩ ꨦꨗꩃ ꨣꨤꨯꨩ꩝ ꨆꨔꨬ ꨎꩃ ꨆꨕꨭꨥ ꨓꨴꨭꩆ ꨥꨮꩍ ꨐꨭꨩ ꨓꨈꨯꩀ ꨀꩉ꩞ ꨐꨭꨩ ꨕꨯꨱꩀ ꨨꨕꨳꨪꩇ꩝ ꨓꨈꨯꩀ ꨀꩉ ꨝꨵꨯꨱꩍ ꨐꨭꨩ ꨈꨪꨤꨳꨯꨮꩃ ꨆꨔꨬ꩝ ꨙꨩ ꨤꩄ ꨐꨭꨩ ꨈꨪꨗꨯꨱꩃ꩝ ꨆꨔꨬ ꨟꩃ ꨕꩍ ꨚꨢꩍ: “ꨕꨨꨵꩀ ꨔꨮꨭ ꨗꨰ ꨙꨯꩀ ꨟꨓꨰ ꨟꨪꩆ ꨕꨨꨵꩀ ꨡꨯꩍ ꨟꨓꨰ ꨨꨝꩉ ꨕꨯꨱꩃ”꩞ ꨐꨭꨩ ꨈꨪꨤꨳꨯꨮꩃ ꨥꨮꩀ ꨟꨪꩆ ꨅꨩ ꨙꨯꩌ ꨨꨈꨰꩅ꩝ ꨆꨔꨬ ꨚꨶꨮꩄ ꨥꨮꩀ: “ꨗꨰ ꨀꨋꩆ ꨈꨰꩅ? ꨕꨯꨱꩀ ꨕꨣꨩ ꨟꨪꩆ ꨒꨮꩇ ꨨꨈꨰꩅ ꨙꨯꩀ ꨟꨓꨰ?”꩞ ꨆꨟꨬ: ꨕꨨꨵꩀ ꨀꨋꩆ ꨈꨣꨯꨮ꩝ ꨆꨩ ꨗꨫ ꨕꨨꨵꩀ ꨙꨯꩀ ꨟꨓꨰ꩝ ꨟꨪꩆ ꨝꨳꨯꨮꩉ ꨗꨫ ꨦꨗꩃ ꨈꨤꩄ ꨡꨯꩍ ꨕꨴꨬ ꨈꨤꨩ ꨝꨳꩀ꩝ ꨧꨪ ꨕꨘꩀ ꨨꨭꨩ ꨦꨄꨰ꩝ ꨅꨩ ꨘꩆ ꨕꨨꨵꩀ ꨟꨓꨰ ꨚꨎꨮꨩ꩝ ꨖꩉ ꨜꨶꨮꩊ ꨦꨄꨰ ꨝꨳꩀ ꨣꨤꨯꨩ! ꨆꨔꨬ ꨆꨵꨯꨱ ꨝꨵꨯꨱꩍ ꨙꨯꩌ: “ꨕꨫ ꨨꨭꨩ ꨈꨰꩅ ꨅꨩ꩝ ꨡꨯꩍ ꨆꨖꨩ ꨢꨮꨭ ꨘꩆ꩝ ꨕꨯꨱꩃ ꨨꨭꨩ ꨈꨰꩅ ꨕꨨꨵꩀ ꨕꨯꨱꩃ ꨟꨪꩆ”꩞ ꨈꨣꨯꨮ: ꨘꩆ ꨢꨮꨩ꩝ ꨦꨄꨰ ꨓꨶꨬ ꨕꨨꨵꩀ ꨟꨰ ꨚꨤꨬ ꨕꨨꨵꩀ ꨐꩀ! ꨨꨭꨩ ꨦꨄꨰ ꨕꨯꨱꩃ ꨆꨩ ꨕꨨꨵꩀ ꨕꨯꨱꩀ ꨨꨕꨳꨪꩇ꩝ ꨕꨨꨵꩀ ꨨꨝꩉ ꨝꨪꨢꩉ ꨜꨶꨮꩊ ꨆꨩ ꨦꨄꨰ꩞ ꨆꨔꨬ: ꨅꨩ ꨗꨰ꩝ ꨎꨤꩆ ꨗꨯꨱ ꨚꨤꨬ ꨕꨯꨱꩀ ꨀꨓꩍ꩝ ꨕꨨꨵꩀ ꨨꨝꩉ ꨗꨯꨱ ꨂꨣꩀꨗꨫ꩞ ꨈꨣꨯꨮ: ꨦꨄꨰ ꨨꨝꩉ ꨗꨯꨱ ꨧꨯꨱꩃ ꨕꨨꨵꩀ꩝ ꨘꩆ ꨅꨩ ꨕꨨꨵꩀ ꨆꨕꨭꨥ ꨓꨴꨭꩆ ꨀꨳ ꨥꨮꩀ꩝ ꨢꨮꨭ ꨘꩆ ꨦꨄꨰ ꨕꨯꨱꩃ ꨕꨨꨵꩀ ꨎꩃ ꨢꨮꨭ ꨔꨯꨱꩍ꩞ ꨡꨯꩍ ꨈꨣꨯꨮ ꨧꨩ ꨕꨶꨩ ꨢꨮꨭ ꨘꩆ꩝ ꨆꨔꨬ ꨟꩃ ꨌꨳꨪꩇ ꨗꨯꨱ ꨓꨶꨬ꩝ ꨚꨤꨬ ꨈꨣꨯꨮ ꨀꨋꩆ ꨚꨤꨬ ꨆꩃ꩝ ꨧꨩ ꨚꨤꨬ ꨓꨧꨪꩀ ꨕꨯꨱꩀ ꨕꨫ ꨈꩍ ꨝꨪꨣꩀ ꨗꨈꩉ ꨀꨩꨠꨣꨥꨓꨪ꩝ ꨤꨪꨝꨪꩀ ꨆꨴꨲꩍ ꨕꨶꨩ ꨀꨳ ꨢꨶꨮꩆ ꨧꨯꨱꩃ ꨌꩌꨛꨩ꩞ ꨈꨣꨯꨮ ꨔꨭꩆ ꨗꨫ ꩑꩖ ꨔꨭꩆ꩝ ꨨꨭꨩ ꨧꨩ ꨀꨟꨩ ꨟꨕꨩ ꨈꨗꨭꩇ꩝ ꨅꩃ ꨘꩆ ꨀꨋꩆ ꨇꩃ꩝ ꨨꨕꨳꨮꩇ ꨅꩃ ꨟꨓꨰ ꨌꨴꨰꩀ ꨌꨰꩀ ꨥꨮꩀ ꨧꨩ ꨀꨗꩀ ꨆꨟꨬ ꨟꨪꩆ ꨘꩆ ꨅꩃ ꨝꨳꩀ ꨀꨗꨫꩅ ꨐꨭꨩ꩞ ꨈꨣꨯꨮ ꨐꨭꨩ ꨈꨮꩃ ꨣꨤꨯꨩ꩝ ꨐꨭꨩ ꨗꨯꨱ ꨟꨁꨪꩆ ꨤꨶꨪꩄ ꨟꨤꩌ ꨅꨩ ꨆꨩ ꨟꨰ ꨧꩃ ꨘꩆ ꨀꨟꨩ ꨐꨭꨩ ꨀꨓꨯꨱꩃ ꨝꨳꩀ ꨚꨙꨪꩀ꩝ ꨆꨢꨶꨩ ꨘꩆ ꨐꨭꨩ ꨗꨯꨱ ꨚꨝꨪꨗꨯꨮꩋ ꨕꨴꨬ ꨝꨵꨯꨱꩍ ꨈꨯꨱꩀ ꨆꨔꨬ꩞ ꨚꩀ ꨚꨤꨬ ꨆꩃ꩝ ꨀꨟꨩ ꨈꨣꨯꨮ ꨕꨯꨱꩀ ꨕꨮꩃ ꨧꨯꨱꩃ ꨆꨔꨬ ꨝꨳꩀ ꨧꨳꩌ ꨉꨮꩍ꩞ ꨆꨔꨬ ꨘꩆ ꨧꨩ ꨟꨗꨶꨪꩋ ꨓꨚꩀ ꨓꨚꩈ꩝ ꨧꨳꩌ ꨤꨪꨆꨬ ꨇꨮꩃ ꨆꨕꨮꩃ ꨘꩆ ꨈꨣꨯꨮ ꨤꨪꨎꩃ ꨀꨗꨫꩅ꩞ ꨆꨵꨮꩌ ꨘꩆ ꨀꨳ ꨝꨪꨤꩆ ꨨꨕꩍ꩝ ꨕꨶꨩ ꨂꨣꩃ ꨕꨯꨱꩀ ꨓꨜꨳ ꨀꨚꨶꨬ ꨀꨤꨩ ꨜꨭꩆ꩝ ꨈꨣꨯꨮ ꨕꨗꩂ ꨓꨟꨩ ꨆꨔꨬ ꨙꨯꩌ ꨕꩉ: ꨦꨄꨰ ꨐꨭꨩ ꨤꨮꩈ! ꨆꨔꨬ: ꨦꨄꨰ ꨆꨯꨱꨥ! ꨈꨣꨯꨮ: ꨀꨕꨬ ꨀꨗꨫꩅ ꨦꨄꨰ ꨝꨳꩀ ꨣꨪꨤꨯꨩ! ꨆꨔꨬ: ꨦꨄꨰ ꨎꩃ ꨀꨗꨫꩅ ꨀꨕꨬ ꨣꨤꨯꨩ! ꨈꨣꨯꨮ: ꨤꨊꨫꩀ ꨆꨵꨮꩌ ꨗꨫ ꨨꨕꩍ ꨨꨕꨰ꩝ ꨀꨳ ꨝꨪꨤꩆ ꨧꨳꩌ ꨥꨪꩊ꩝ ꨆꨴꨲꩍ ꨜꨭꩆ ꨧꨯꨱꩃ ꨀꨚꨶꨬ ꨗꨫ꩝ ꨕꨴꨬ ꨙꨯꩌ ꨤꩄ ꨀꨗꨫꩅ ꨈꨮꩇ ꨟꨳꨯꨮꩅ ꨟꨳꨯꨮꩅ ꨐꩀ ꨦꨄꨰ! ꨆꨔꨬ: ꨨꨟꨳꨯꨮꩅ ꨒꨮꩇ ꨚꨎꨮꨩ ꨀꨕꨬ꩝ ꨕꨴꨬ ꨀꨗꨫꩅ ꨈꨮꩇ ꨣꨪꨓꨭꩍ ꨔꨭꩆ ꨓꨨꨩ ꨓꨭꩀ ꨘꩆ꩝ ꨕꨫ ꨚꨤꨬ ꨆꩃ ꨨꨭꨩ ꨅꩃ ꨣꨪꨟꨯꨱꩃ ꨟꩀ ꨟꨗꨶꨪꩋ ꨡꨮꩃ ꨣꨤꨯꨱꨥ꩞ ꨨꨣꨬ ꨐꨭꨩ ꨕꨯꨱꩀ ꨕꨫ ꨎꨤꨮꩌ ꨌꨮꩀ ꨈꨵꨰ ꨚꨵꨰꩍ ꨟꨗꨶꨪꩋ ꨀꨠꩊ꩝ ꨆꨵꨮꩌ ꨐꨭꨩ ꨓꨟꨩ ꨥꨪꩊ ꨕꨮꩉ ꨚꨤꨬ꩝ ꨟꨢꩍ ꨡꨯꩍ ꨟꨗꨶꨪꩋ ꨢꨮꨩ ꨝꨵꩀ ꨟꩀ ꨝꨵꨯꨱꩍ ꨌꨈꨯꨱꩃ ꨗꨯꨱ ꨡꨮꩃ ꨣꨤꨯꨱꨥ꩞ ꨔꨬ ꨔꨬ ꨤꨪꨎꩃ ꨀꨔꨭꩉ ꨨꨶꨮꩄ꩝ ꨟꨗꨶꨪꩋ ꨚꨤꨬ ꨗꨫ ꨗꨯꨱ ꨓꨧꨪꩀ ꨟꨪꩆ ꨅꨩ ꨣꨙꨮꩇ ꨌꨮꩀ ꨈꨵꨰ ꨘꩆ ꨅꨩ ꨆꨩ ꨟꩀ ꨣꨪꨟꨯꨱꩃ ꨨꨭꨩ꩞ ꨡꨯꩍ ꨣꨤꨯꨩ ꨟꨗꨶꨪꩋ ꨤꨨꨪꩀ ꨆꨢꨶꨩ ꨅꩃ ꨣꨪꨟꨯꨱꩃ꩝ ꨆꨔꨬ ꨕꨶꨪꨧꩀ ꨣꨤꨯꨩ꩝ ꨘꩆ ꨨꨝꩉ ꨓꨟꨩ ꨈꨵꨰ ꨌꨮꩀ ꨆꨴꨲꩍ ꨆꨵꨮꩌ ꨚꨳꨮꩍ ꨚꨟꨓꨰ ꨣꨪꨟꨯꨱꩃ꩝ ꨈꨣꨯꨮ ꨧꨯꨱꩃ ꨅꩃ ꨇꩃ ꨟꨣꩅ ꨌꨆꩀ ꨐꨭꨩ ꨟꨪꩆ ꨐꨭꨩ ꨧꨩ ꨕꨶꨩ ꨙꨯꩀ ꨗꨯꨱ꩞ ꨆꨖꨩ ꨆꨔꨬ: ꨝꨪꨘꩍ ꨆꨵꨮꨭ ꨆꨔꨬ ꨤꨪꨆꨮꨭ ꨕꨴꨬ ꨈꨣꨯꨮ꩝ ꨅꩃ ꨇꩃ ꨧꨯꨱꩃ ꨝꨶꨮꩊ ꨞꩇ ꨚꨤꨬ ꨆꩃ꩞ ꨐꨭꨩ ꨝꨩ ꨓꨶꨬ ꨙꨥ꩝ ꨡꨴꨮꩌ ꨝꨵꨯꨱꩍ ꨓꨟꨩ ꨌꨮꩀ ꨧꨩ ꨕꨴꨬ꩞ ꨨꨭꨩ ꨣꨤꨯꨩ ꨕꩌ ꨙꨯꩀ ꨗꨯꨱ ꨓꨶꨬ꩝ ꨟꨪꩆ ꨆꨔꨬ ꨅꨩ ꨌꨳꨪꩇ꩝ ꨙꨯꩌ ꨤꩄ ꨗꨯꨱ ꨣꨤꨯꨩ ꨟꨗꨶꨪꩋ ꨐꨭꨩ ꨨꨟꨪꩅ ꨆꩆ ꨟꩀ ꨐꨭꨩ ꨨꨭꨩ꩞ ꨆꨔꨬ ꨢꩌ ꨗꨯꨱ꩝ ꨕꩉ ꨟꨪꩆ ꨆꨎꩇ꩝ ꨒꨮꩇ ꨈꨗꨭꩍ ꨧꨩ ꨎꨝꨶꨮꩊ ꨤꨥꨪꩀ ꨔꨭꩆ꩝ ꨗꨯꨱ ꨚꨈꩆ ꨨꨟꨭꨩ꩝ ꨀꨳ ꨝꨪꨤꩆ ꨨꨕꩍ ꨚꨍꩃ ꨎꨤꩆ ꨗꨯꨱ꩝ ꨓꨮꩊ ꨓꨜꨳ ꨈꨵꨰ꩝ ꨆꨔꨬ ꨙꨪꩀ ꨓꨈꨯꩀ ꨧꨩ ꨜꨭꩆ ꨈꨵꨯꨱꩃ ꨚꨳꨮꩍ ꨈꨵꨮꩃ ꨚꨍꩃ꩞ ꨌꩃ ꨅꩃ ꨣꨪꨟꨯꨱꩃ ꨓꨝꨳꩀ ꨈꨵꨰ ꨘꩆ ꨟꩀ ꨡꨴꨮꩌ ꨌꨭꩍ ꨐꨭꨩ꩝ ꨓꨮꩊ ꨆꨴꨲꩍ ꨆꨵꨮꩌ ꨆꨩ ꨟꩃ ꨡꨯꩍ ꨐꨭꨩ ꨓꨝꨳꩀ꩞ ꨅꨩ ꨕꨴꨮꩍ ꨕꨤꩌ ꨦꨗꩃ ꨆꨔꨬ꩝ ꨗꨫ ꨅꨩ ꨒꨮꩇ ꨧꨩ ꨣꨪꨟꨯꨱꩃ ꨚꨴꨯꨱꩃ ꨇꨮꩃ ꨆꨎꩇ꩝ ꨟꨪꩆ ꨧꨩ ꨣꨪꨟꨯꨱꩃ ꨀꨮꩀ ꨤꨪꨥꩃ꩝ ꨐꨭꨩ ꨕꨯꨱꩀ ꨨꨭꨩ ꨤꨪꨆꨩ ꨕꨫ ꨓꨆꨰ ꨁꨥ ꨤꨪꨆꨭꩀ꩞ ꨣꨪꨟꨯꨱꩃ ꨤꨪꨈꩍ ꨤꨪꨈꨶꨬ ꨢꩌ ꨓꨆꨰ ꨗꨯꨱ꩝ ꨅꨩ ꨦꨗꩃ ꨣꨤꨯꨩ ꨥꨮꩀ꩝ ꨆꨔꨬ ꨌꨭꩍ ꨆꨵꨮꨭ ꨡꨴꨮꩌ ꨚꨕꩀ꩞ ꨧꨩ ꨡꨴꨮꩌ ꨒꨮꩇ ꨓꨯꨱꩀ꩝ ꨐꨭꨩ ꨈꨤꨭꩍ ꨚꨙꨪꩀ ꨝꨵꨯꨱꩍ ꨙꨶꨮꩄ ꨈꨤꩄ ꨓꨟꨩ ꨈꨵꨰ꩞ ꨆꨔꨬ ꨆꨕꨭꨥ ꨓꨴꨭꩆ ꨀꨤꨩ ꨜꨭꩆ ꨚꨈꨶꨬ ꨐꨭꨩ꩝ ꨐꨭꨩ ꨙꨶꨮꩄ ꨤꨨꨪꩀ ꨓꨟꨩ ꨈꨵꨰ ꨟꨪꩆ ꨕꨯꨱꩀ ꨗꩌ ꨕꨣꩍ ꨌꨰꩀ ꨥꨮꩀ ꨔꨶꨰ ꨎꨤꩆ ꨐꨭꨩ ꨙꨶꨮꩄ꩞ ꨨꨭꨩ ꨀꨳ ꨝꨪꨤꩆ ꨚꨍꩃ ꨘꩆ ꨆꨔꨬ ꨔꨮꨭ ꨈꨤꨯꨱꩃ ꨗꨯꨱ ꨓꨶꨬ ꨗꩌ ꨚꨳꨮꩍ ꨕꨶꩍ ꨡꨯꩍ ꨤꨪꨝꨪꩀ ꨐꨭꨩ ꨆꨙꩇ꩞ ꨆꨔꨬ ꨗꨯꨱ ꨓꨶꨬ ꨗꩌ ꨕꨣꩍ꩝ ꨚꨈꩆ ꨈꨵꨰ ꨣꨮꩌ ꨆꨴꨲꩍ ꨌꨮꩀ꩝ ꨧꨩ ꨟꨓꨲꩍ ꨓꨭꩀ ꨓꨴꨩ ꨟꩃ ꨡꨯꩍ ꨤꨪꨝꨪꩀ ꨐꨭꨩ ꨕꨮꩇ꩞ ꨐꨭꨩ ꨕꨯꨱꩀ ꨕꨫ ꨧꨩ ꨤꨪꨝꩃ ꨓꨤꨪ ꨗꨰꩍ꩝ ꨨꨭꨩ ꨀꨳ ꨝꨪꨤꩆ ꨚꨍꩃ ꨘꩆ ꨡꨯꩍ ꨕꨤꩌ ꨤꨪꨝꩃ꩝ ꨡꨯꩍ ꨕꨤꩌ ꨘꩆ ꨅꨩ ꨒꨮꩇ ꨧꨩ ꨕꨴꨬ ꨟꨪꩆ ꨤꨪꨟꨩ ꨕꨴꨬ ꨣꨪꨟꨯꨱꩃ ꨀꨗꩀ ꨓꨴꨩ꩝ ꨕꨯꩌ ꨕꨴꨬ ꨀꨗꩀ ꨀꨦꨪꩅ ꨢꨮꨭ ꨟꨢꨯꨱ꩞ ꨣꨪꨟꨯꨱꩃ ꨀꨟꨰꩀ ꨕꨯꨱꩀ ꨙꨪꩍ ꨓꨜꨳ ꨘꩆ꩝ ꨟꨯꨱꩃ ꨓꨘꩅ ꨡꨯꩍ ꨤꨪꨆꨩ ꨕꨫ ꨓꨆꨰ ꨁꨥ꩝ ꨆꨔꨬ ꨆꨴꨲꩆ ꨡꨯꩍ ꨘꩆ ꨤꨪꨆꨩ ꨆꨢꨶꨩ ꨡꨴꨮꩌ ꨌꨭꩍ꩞ ꨆꨔꨬ ꨦꨗꩃ ꨧꨩ ꨝꨪꨣꨯꩀ ꨟꩃ ꨦꨗꩃ ꨡꨯꩍ ꨆꨖꨩ꩝ ꨆꨢꨶꨩ ꨣꨪꨟꨯꨱꩃ ꨕꨯꨱꩀ ꨣꨯꨱꩃ ꨀꨗꩀ ꨐꨭꨩ꩝ ꨧꨯꨱꩃ ꨟꨗꨶꨪꩋ ꨌꨭꩍ ꨓꨆꨰ ꨐꨭꨩ ꨘꩆ ꨐꨭꨩ ꨚꨙꨪꩀ ꨛꨩꨙꨶ꩝ ꨅꨩ ꨕꨯꨱꩀ ꨚꨴꨲꩆ ꨚꨳꨮꩍ ꨟꩀ ꨕꨯꩌ ꨀꨗꩀ ꨝꨪꨆꩆ ꨕꨤꩌ ꨈꨵꨰ꩝ ꨘꩆ ꨐꨭꨩ ꨨꨝꩉ ꨓꨟꨩ ꨚꨤꨬ ꨚꨳꨮꩍ ꨟꩀ ꨟꨗꨶꨪꩋ꩝ ꨆꨢꨶꨩ ꨟꨗꨶꨪꩋ ꨅꨩ ꨙꨶꨮꩄ ꨧꨠꩉ ꨘꩆ ꨟꩀ ꨡꨶꨮꩆ꩞ ꨟꩃ ꨔꨮꨭ꩝ ꨆꨢꨶꨩ ꨟꨗꨶꨪꩋ ꨁꨗꨪꨄ ꨐꨭꨩ ꨕꨨꨵꨮꨭ ꨟꨪꩆ꩞ ꨙꨩ ꨆꨩ ꨐꨭꨩ ꨙꨯꩀ ꨝꨢꩉ ꨟꨝꨰ ꨟꨗꨶꨪꩋ꩝ ꨨꨰ ꨐꨭꨩ ꨅꨩ ꨨꨭꨩ ꨎꨤꩆ ꨣꨬ ꨥꨮꩀ ꨘꩆ ꨨꨝꩉ ꨡꨮꩃ ꨟꨗꨶꨪꩋ꩞ ꨆꨔꨬ ꨢꩌ ꨕꩉ ꨓꨟꨩ ꨤꨪꨝꩃ꩝ ꨐꨭꨩ ꨈꨤꨭꩍ ꨟꨣꩅ ꨓꨈꨯꩀ꩝ ꨆꨔꨬ ꨚꩆ ꨙꨥ ꨧꨪ ꨓꩀ ꨐꨭꨩ꩝ ꨟꨪꩆ ꨡꨯꩍ ꨕꨶꨪꨧꩀ ꨨꨕꨯꩌ ꨣꨪꨟꨯꨱꩃ ꨀꨗꩀ꩝ ꨟꨢꩍ ꨀꨟꨰꩀ ꨐꨭꨩ ꨟꨓꨰ ꨝꨵꨯꨱꩍ ꨔꨬ ꨣꨯꨱꩃ ꨇꨯꨱꩊ ꨐꨭꨩ ꨥꨮꩀ? ꨅꨩ ꨆꨩ ꨦꨗꩃ ꨣꨤꨯꨩ ꨟꨪꩆ ꨣꨪꨟꨯꨱꩃ ꨀꨟꨰꩀ ꨝꨵꩀ ꨓꨟꨩ ꨆꨔꨬ ꨚꨎꨮꨩ꩝ ꨝꨳꩀ ꨕꨴꩍ꩝ ꨆꨔꨬ ꨟꩀ ꨙꨥ ꨓꩀ ꨕꨫ ꨓꨆꨶꨰ ꨐꨭꨩ꩞ ꨚꨟꨓꨰ ꨣꨪꨟꨯꨱꩃ ꨝꨵꨯꨱꩍ꩝ ꨆꨔꨬ ꨝꨩ ꨀꨆꨯꨱꩀ ꨐꨭꨩ ꨟꨰ ꨈꨤꩄ ꨚꨤꨬ ꨆꩃ꩞ ꨣꨭꩇ ꨆꨔꨬ ꨝꩀ ꨕꨣꩍ꩝ ꨟꨪꩆ ꨝꨶꨮꩊ ꨞꩇ ꨡꨯꩍ ꨀꨆꨯꨱꩀ ꨣꨪꨟꨯꨱꩃ ꨘꩆ ꨝꨳꩀ ꨀꨶꨮꩆ ꨓꨝꨶꨮꩆ꩝ ꨔꨬ ꨤꨪꨎꩃ ꨆꨙꨩ ꨆꨔꨬ꩝ ꨝꨵꨯꨱꩍ ꨝꨴꨬ ꨆꨵꨪꩀ ꨟꩍ ꨎꨳꨯꨮꩆ꩞ ꨕꨯꨱꩀ ꨕꨫ ꨚꨤꨬ ꨆꩃ ꨨꨭꨩ ꨨꨕꨯꩌ ꨝꨪꨤꩆ꩝ ꨆꨔꨬ ꨤꨪꨆꨮꨭ ꨕꨴꨬ ꨅꩃ ꨇꩃ ꨚꨳꨮꩍ ꨗꨯꨱ ꨣꨥꨮꩃ ꨀꨟꨰꩀ ꨀꨟꨩ꩝ ꨆꨔꨬ ꨚꨈꨶꨮꩆ ꨠꨌꨩ ꨟꨰ ꨈꨤꩄ ꨥꨮꩀ ꨚꨳꨮꩍ ꨇꨫꩂ ꨈꨣꨯꨮ꩞ ꨆꨵꨮꩌ ꨕꨨꨵꨮꨭ ꨨꨣꨬ ꨗꨯꨱ꩝ ꨆꨔꨬ ꨧꨯꨱꩃ ꨈꨣꨯꨮ ꨨꨭꨩ ꨚꨶꨮꩄ ꨧꨯꨱꩃ ꨈꨮꩇ ꨧꨩ ꨡꨮꩃ ꨤꨶꨪꩄ꩞ ꨈꨣꨯꨮ: ꨦꨄꨰ ꨟꨰ ꨕꨴꩍ ꨨꨤꨬ? ꨆꨔꨬ: ꨦꨄꨰ ꨟꨰ ꨕꨴꩍ ꨟꨪꩆ ꨀꨕꨬ! ꨈꨣꨯꨮ: ꨀꨕꨬ ꨡꨯꩍ ꨚꨕꨴꨭꩅ ꨣꨤꨯꨩ꩝ ꨔꨮꨭ ꨤꩄ ꨦꨄꨰ ꨈꨯꨱꩀ ꨆꨟꨬ ꨝꨪꨆꩆ꩝ ꨧꨳꩌ ꨝꨪꨗꨰ ꨨꨮꩆ꩝ ꨧꨳꩌ ꨓꨳꩆ ꨨꨮꩆ꩝ ꨋꩀ ꨆꨩ ꨦꨄꨰ ꨥꨮꩉ ꨀꨕꨬ꩞ ꨆꨔꨬ: ꨈꨪꨥꩃ ꨤꨮꩈ! ꨈꨣꨯꨮ: ꨃꩈ! ꨆꨔꨬ: ꨦꨄꨰ ꨀꨗꨫꩅ ꨀꨕꨬ ꨣꨤꨯꨩ꩝ ꨟꨢꩍ ꨀꨗꨫꩅ ꨦꨄꨰ ꨀꨗꨫꩅ ꨧꨩ ꨟꨗꨶꨪꩋ ꨟꨪꩆ꩝ ꨟꨢꩍ ꨨꨭꨩ ꨆꨟꨬ ꨤꨊꨫꩀ ꨓꨶꨬ ꨦꨄꨰ ꨎꩃ ꨅꨩ ꨌꨳꨪꩇ꩝ ꨀꨕꨬ ꨔꨮꨭ ꨨꨤꨬ? ꨈꨣꨯꨮ ꨆꨵꨯꨱ: ꨀꨕꨬ ꨅꨩ ꨔꨮꨭ꩝ ꨟꨢꩍ ꨦꨄꨰ ꨅꨩ ꨇꨪꩀ ꨚꨗꨶꨮꩄ꩝ ꨘꩆ ꨟꨯꨱꩃ ꨀꨕꨬ ꨨꨰ! ꨀꨕꨬ ꨗꨯꨱ ꨈꨴꨮꩇ ꨗꨈꩉ ꨚꨳꨮꩍ ꨕꨶꩍ ꨆꨩ ꨨꨭꨩ ꨦꨄꨰ꩝ ꨦꨄꨰ ꨨꨕꨮꩉ ꨐꩀ! ꨚꨈꨭꩍ ꨚꨈꨯꨮꨩ꩝ ꨆꨔꨬ ꨓꨝꨳꩀ ꨕꨫ ꨚꨤꨬ ꨆꩃ꩝ ꨧꨩ ꨡꨮꩃ ꨗꨫ ꨙꨪꩀ ꨧꨩ ꨕꨴꨬ ꨀꨧꨰꩍ꩞ ꨧꨪ ꨓꨮꩊ ꨈꩍ ꨝꨪꨣꩀ ꨁꩆꨕꨴꨚꨭꨣꨩ꩝ ꨐꨭꨩ ꨥꨰꩍ ꨓꨟꨩ ꨚꨤꨬ ꨆꩌ꩝ ꨚꨳꨮꩍ ꨋꩀ ꨆꨵꨯꨱꩍ ꨈꨴꨭꩀ ꨐꨭꨩ ꨚꨈꨶꨮꩆ ꨧꨯꨱꩃ ꨅꩃ ꨟꨭꩀ ꨕꨫ ꨗꨈꩉ ꨢꨶꨮꩆ꩞ ꨗꨯꨱ ꨓꨮꩊ ꨀꨆꨯꨱꩀ ꨚꨤꨬ꩝ ꨡꨯꩍ ꨧꨩ ꨟꨭꩀ ꨓꨨꨩ ꨕꨯꨱꩀ ꨀꨗꨯꨱꩃ ꨒꨭꩍ꩝ ꨆꨔꨬ ꨓꨐꨫ: ꨥꨩ ꨤꨮꩈ꩝ ꨚꩀ ꨗꨫ ꨨꨭꨩ ꨔꨬ ꨀꨋꩆ ꨧꨩ ꨧꨩ ꨨꨤꨬ? ꨟꨭꩀ ꨦꨗꩃ ꨧꨩ ꨝꨪꨣꨯꩀ ꨝꨵꨯꨱꩍ ꨙꨯꩌ: ꨚꩀ ꨗꨫ ꨨꨭꨩ ꨧꨩ ꨟꨗꨶꨪꩋ ꨟꨪꩆ ꨀꨋꩆ ꨧꨩ ꨧꨩ꩞ ꨆꨔꨬ: ꨥꨩ ꨨꨭꨩ ꨔꨮꨭ ꨧꩃ ꨧꨩ ꨧꨩ ꨚꩀ ꨣꨬ ꨨꨤꨬ? ꨚꨓꨯꨱꨥ ꨎꨤꩆ ꨕꨨꨵꩀ ꨨꨰ! ꨟꨭꩀ: ꨘꩆ ꨢꨮꨩ꩝ ꨀꨗꩀ ꨗꨯꨱ ꨓꨶꨬ ꨥꨩ ꨝꨰꩀ꩞ ꨆꨔꨬ: ꨒꨭꩍ ꨗꨫ ꨌꨰꩀ ꨆꨩ ꨕꨨꨵꩀ ꨀꨗꨯꨱꩃ! ꨟꨭꩀ: ꨙꨶꨩ ꨜꨶꨮꩊ ꨀꨗꩀ! ꨆꨔꨬ ꨗꨯꨱ ꨓꨶꨬ ꨟꨭꩀ ꨓꨟꨩ ꨚꨤꨬ꩝ ꨗꨯꨱ ꨧꨩ ꨕꨟꨭꩀ ꨝꨵꨯꨱꩍ ꨓꨮꩊ ꨧꩃ ꨧꨩ ꨧꨩ꩝ ꨘꩆ ꨧꨩ ꨕꨗꨯꨱꩀ ꨕꨗꨫꩂ ꨨꨤꨭꩀ꩝ ꨀꨘꩀ ꨧꩃ ꨨꨭꨩ ꨕꨶꨩ ꨜꨭꩆ ꨤꨪꨂꨩ ꨝꨳꩀ ꨨꨤꨶꨬ꩝ ꨧꩃ ꨨꨭꨩ ꨚꨈꨩ ꨈꨵꨯꨱꩃ ꨓꨮꩊ ꨓꨕꨩ ꨟꨗꨶꨪꩋ꩞ ꨟꨭꩀ ꨓꨨꨩ ꨚꨴꨯꨱꩃ ꨧꩇ ꨃꨥ: “ꨧꨩ ꨧꨩ ꨤꨮꩈ꩝ ꨨꨭꨩ ꨟꨗꨶꨪꩋ ꨕꨶꩍ ꨀꨗꩀ”꩞ ꨧꨩ ꨧꨩ ꨢꩌ ꨓꨆꨰ ꨓꨝꨳꩀ꩝ ꨧꨩ ꨆꨟꨬ ꨕꨣꨩ ꩑꩗ – ꩑꩘ ꨔꨭꩆ ꨟꨪꩆ꩝ ꨧꨩ ꨧꨩ ꨌꨭꩀ ꨧꨩ ꨝꨵꩍ ꨀꨯꨱ ꨡꨯꩂ ꨞꨯꩂ꩝ ꨆꨟꨬ ꨝꨳꩀ ꨧꨳꩌ ꨝꨪꨗꨰ! ꨧꨩ ꨧꨩ ꨟꨯꨱꩃ ꨟꨭꩀ ꨝꨵꨯꨱꩍ ꨙꨯꩌ꩝ ꨕꨨꨵꩀ ꨅꨩ ꨆꨴꨲꩆ ꨟꨗꨶꨪꩋ ꨗꨫ꩞ ꨟꨭꩀ ꨨꨟꨪꩅ ꨢꨮꨭ ꨘꩆ꩝ ꨤꨪꨐꨰꩈ ꨀꨆꨯꨱꩀ ꨟꨯꨱꩃ ꨆꨔꨬ ꨌꩃ ꨤꩃ ꨢꩍ꩞ ꨆꨔꨬ: ꨒꨮꩇ ꨚꨎꨮꨩ꩝ ꨕꨴꨬ ꨅꨩ ꨆꨩ ꨈꨯꨱꩀ ꨈꨮꩇ ꨧꨩ ꨡꨮꩃ ꨣꨬ꩞ ꨧꨩ ꨧꨩ: ꨟꨪꩆ ꨦꨄꨰ ꨕꨶꩍ ꨕꨨꨵꩀ ꨋꩀ ꨈꨰꩅ? ꨆꨔꨬ: ꨕꨨꨵꩀ ꨘꩆ ꨎꨝꨶꨮꩊ꩝ ꨓꨭꩀ ꨀꨓꨯꨱꩃ ꨀꨳ ꨢꨶꨮꩆ ꨝꨪꨣꨭꨥ ꨝꨵꨯꨱꩍ꩝ ꨨꨭꨩ ꨅꩃ ꨟꨭꩀ ꨗꨰ ꨚꩀ ꨗꨈꩉ ꨢꨶꨮꩆ ꨕꨯꨱꩃ ꨘꩆ ꨆꨵꩍ ꨟꨓꨰ꩞ ꨧꨩ ꨧꨩ: ꨘꩆ ꨣꨬ! ꨕꨨꨵꩀ ꨤꨪꨎꩃ ꨝꨳꩀ ꨨꨕꨮꩉ ꨅꩃ ꨟꨭꩀ꩝ ꨦꨄꨰ ꨓꨟꨩ ꨧꩃ ꨟꨰꩀ꩝ ꨚꨳꨮꩍ ꨀꨇꩆ ꨥꨮꩀ ꨆꨖꨩ꩞ ꨆꨵꨮꩌ ꨘꩆ꩝ ꨆꨵꨮꨭ ꨂꨣꩃ ꨙꨯꩌ ꨧꨯꨱꩃ ꨈꨮꩇ ꨝꨳꩀ ꨣꨤꨯꨩ꩝ ꨧꨩ ꨧꨩ ꨚꨢꩀ ꨆꨔꨬ ꨣꨤꨯꨩ ꨆꨢꨩ ꨡꨮꩃ ꨧꨯꨱꩃ ꨀꨤꩀ ꨟꨐꨭꩌ꩝ ꨆꨔꨬ ꨟꨝꨭꩀ ꨙꨪꩍ꩝ ꨅꨩ ꨆꨩ ꨚꨢꨮꩉ ꨓꨑꨴꩀ ꨆꨩ ꨧꨩ ꨧꨩ꩞ ꨝꨵꨯꨱꩍ ꨆꨴꨲꩍ ꨆꨵꨮꩌ꩝ ꨕꨯꨱꩀ ꨔꨯꨱꩍ ꨨꨭꨩ ꨣꨤꨯꨩ ꨟꨗꨶꨪꩋ ꨚꩆ ꨓꨴꨶꨰꨩ ꨧꨯꨱꩃ ꨈꨴꨮꩇ ꨝꨵꩀ ꨓꨟꨩ ꨧꩃ꩝ ꨟꩀ ꨇꩆ ꨈꩌ ꨀꨆꨯꨱꩀ ꨧꨯꨱꩃ ꨟꩀ ꨓꨤꨬ ꨈꨪꨣꩀ ꨆꨔꨬ ꨝꨩ ꨗꨯꨱ꩞ ꨟꨭꩀ ꨓꨨꨩ ꨅꨩ ꨌꨆꩀ ꨟꨪꩆ ꨕꨯꨱꩀ ꨕꨯꨱꩃ ꨕꨯꩌ ꨟꨗꨶꨪꩋ ꨘꩆ꩝ ꨟꩃ ꨔꨮꨭ꩝ ꨆꨟꨬ ꨕꨣꨩ ꨗꨫ ꨅꨩ ꨒꨮꩇ ꨧꨩ ꨧꨩ꩞ ꩑꩐ ꨔꨭꩆ ꨕꨨꨵꨮꨭ꩝ ꨕꨫ ꨚꨤꨬ ꨆꩌ ꨚꨠꨗꩀ ꨎꨪꩅ ꨚꨴꨯꨱꩃ꩝ ꨝꨳꩀ ꨣꨤꨯꨩ ꨟꨗꨶꨪꩋ ꨟꨓꨰ꩞ ꨂꨣꩃ ꨦꨗꩃ ꨤꩄ ꨆꨢꨶꨩ ꨛꨯꨮ ꨢꩃ ꨚꩍ ꨟꩀ ꨘꩆ ꨚꨤꨳꨯꨮꩃ ꨟꨗꨭꩀ꩝ ꨚꨝꨰꩈ꩝ ꨆꨭꨝꨥ ꨟꨪꩆ ꨅꨩ ꨆꨵꨯꨱꩍ ꨎꨪꩅ꩞ ꨓꨭꩀ ꨘꩆ꩝ ꨟꨋꨥꨯꩌ ꨧꨩ ꨧꨩ ꨝꨪꨣꨭꨥ ꨣꨟꨪꩀ ꨟꨰ ꨚꨤꨬ꩝ ꨓꨯꩀ ꨨꨭꨩ ꨆꨵꨮꨭ ꨂꨣꩃ: ꨕꨶꨩ ꨅꩃ ꨟꨭꩀ ꨧꨯꨱꩃ ꨧꨩ ꨆꨟꨮꨭꩆ ꨀꨦꨪꩅ꩝ ꨕꨨꨵꨮꨭ ꨕꨯꨮꩍ ꨟꨋꨥꨯꩌ ꨗꨫ ꨕꨯꨱꩀ ꨚꩀ ꨚꩆꨕꨭꨣꩃꨈꨩꨩ꩞ ꨨꨭꨩ ꨟꨗꨶꨪꩋ ꨆꨢꨶꨩ ꨤꨟꨭꩀ ꨕꨨꨵꨮꨭ ꨘꩆ ꨙꨯꩌ ꨔꨯꨱꩍ꩝ ꨤꩄ ꨆꨢꨶꨩ ꨅꩃ ꨟꨭꩀ ꨋꩀ ꨎꨴꨭꨩ ꨁꨗꨪꨄ꩝ ꨝꨵꨯꨱꩍ ꨤꨪꨎꩃ ꨋꩀ ꨎꨳꨮꩂ ꨎꨪꩅ꩞ ꨓꨭꩀ ꨀꨆꨯꨱꩀ ꨦꨗꩃ ꨕꨯꨱꩀ ꨥꨪꩀ꩝ ꨘꩆ ꨝꨶꨮꩊ ꨞꩇ ꨚꨎꩊ ꨟꩀ ꨅꩃ ꨟꨭꩀ꩝ ꨟꨪꩆ ꨆꨢꨶꨩ ꨔꨮꨭ ꨕꨨꨵꨮꨭ ꨘꩆ ꨅꩃ ꨟꨭꩀ ꨕꨮꩇ ꨙꨶꨮꩄ ꨓꨚꨩ ꨀꨳ ꨢꨶꨮꩆ ꨝꨵꨯꨱꩍ꩝ ꨓꨭꩀ ꨘꩆ ꨧꨩ ꨧꨩ ꨅꨩ ꨕꨯꨱꩀ ꨚꩀ ꨧꩃ ꨘꩆ ꨓꨤꩍ ꨈꨮꩇ꩞ ꨅꩃ ꨟꨭꩀ ꨦꨗꩃ ꨤꩄ ꨧꨩ ꨧꨩ ꨕꨯꨱꩀ ꨀꨦꨪꩅ ꨟꨪꩆ ꨅꨩ ꨔꨬ ꨇꨫꩂ ꨚꨟꨓꨰ ꨐꨭꨩ ꨘꩆ ꨆꨰꩀ ꨓꨳꩆ ꨆꨵꩀ ꨆꨟꨮꨭꩆ ꨥꨮꩀ ꨆꨢꨶꨩ ꨗꨯꨱ ꨅꨩ ꨧꨭꨟꨭ꩞ ꨟꨢꩍ ꨨꨣꨬ ꨨꨕꨬ ꨟꨰ ꨕꨯꨱꩃ ꨆꨟꨮꨭꩆ ꨨꨕꨬ ꨥꨮꩀ꩞ ꨅꨩ ꨡꨯꩍ ꨅꩃ ꨟꨭꩀ꩝ ꨝꨶꨮꩊ ꨞꩇ ꨤꨪꨎꩃ ꨦꨗꩃ ꨆꨎꩇ ꨥꨮꩀ ꨅꩃ ꨟꨭꩀ ꨘꩆ ꨋꩀ ꨎꨴꨭꨩ꩝ ꨝꨵꨯꨱꩍ ꨓꨭꩍ ꨀꨝꨪꩍ ꨕꨫ ꨀꨆꨯꨱꩀ ꨧꨩ ꨧꨩ꩝ ꨝꨶꨮꩊ ꨟꩀ ꨧꨩ ꨧꨩ꩝ ꨠꨌ ꨌꨭꩍ ꨝꨵꨭꨥ ꨚꨳꨮꩍ ꨚꨤꨳꨯꨮꩃ; ꨟꨪꩆ ꨨꨭꨩ ꨣꨤꨯꨩ ꨟꨗꨶꨪꩋ ꨕꨤꩌ ꨚꨤꨬ ꨌꨆꩀ ꨥꨮꩀ꩝ ꨘꩆ ꨧꨩ ꨧꨩ ꨕꨯꨱꩀ ꨨꨕꨳꨪꩇ꩞ ꨟꩃ ꨨꨣꨬ ꨘꩆ ꨧꨩ ꨧꨩ ꨗꨯꨱ ꨓꨯꨱ ꨅꨩ ꨔꨬ ꨡꨯꩍ ꨥꨮꩀ꩝ ꨎꩃ ꨟꨎꨴꨮꩌ ꨤꩄ ꨎꨪꩅ ꨟꩃ ꨨꨣꨬ ꨘꩆ ꨤꨪꨎꩃ ꨓꨚꨩ꩞ ꨆꨖꨩ ꨆꨔꨬ: ꨝꨪꨘꩍ ꨚꩀ ꨝꨳꩀ ꨎꨪꩅ ꨓꨚꨩ ꨟꨪꩆ ꨝꨶꨮꩊ ꨚꨤꨬ ꨕꨯꨱꩀ ꨇꨪꩀ ꨦꨗꩃ ꨤꩄ ꨅꩃ ꨟꨭꩀ ꨘꩆ ꨋꩀ ꨎꨴꨭꨩ꩝ ꨤꩄ ꨨꨣꨬ ꨨꨕꨬ ꨐꨭꨩ ꨟꨰ ꨥꨮꩀ ꨁꨗꨪꨄ ꨚꨤꨬ꩞ ꨝꨶꨮꩊ ꨞꩇ ꨝꨳꩀ ꨀꨔꨭꩉ ꨕꨫ ꨎꨪꩅ꩝ ꨀꨇꩆ ꨈꨤꩄ ꨕꨯꩌ ꨆꨖꨩ ꨔꨯꨱꩍ ꨔꩉ ꨆꨩ ꨅꩃ ꨟꨭꩀ꩝ ꨤꩄ ꨅꩃ ꨟꨭꩀ ꨈꨪꨗꨴꨮꩍ ꨧꨘꩀ꩞ ꩑꩐ ꨔꨭꩆ ꨓꨚꨩ꩝ ꨆꨖꨩ ꨅꩃ ꨟꨭꩀ ꨤꨪꨎꩃ ꨕꨯꨱꩀ ꨇꨪꩀ ꨀꨇꩆ ꨈꨤꩄ꩝ ꨝꨵꨯꨱꩍ ꨝꨭꩍ ꨧꨣꨩ ꨟꨧꨪꩆ ꨥꨮꩀ ꨆꨩ ꨠꨟꨪꩍ꩝ ꨤꨪꨥꨪꩀ ꨓꨚꨩ꩝ ꨔꨬ ꨔꨬ ꨎꩃ ꨆꨎꩇ ꨦꨗꩃ ꨤꩄ ꨅꩃ ꨟꨭꩀ ꨧꨩ ꨧꨩ ꨘꩆ ꨟꨗꨶꨪꩋ ꨋꩀ ꨎꨴꨭ꩞ ꨟꩃ ꨨꨣꨬ ꨟꨰ ꨚꨤꨬ ꨆꩌ꩝ ꨆꨔꨬ ꨓꨐꨫ ꨧꨩ ꨧꨩ꩝ ꨘꩆ ꨚꨨꨕꩉ ꨟꨭꩀ ꨎꨪꩅ ꨚꨴꨯꨱꩃ ꩑꩐ ꨔꨭꩆ ꨕꨨꨵꨮꨭ꩝ ꨨꨶꨮꩄ ꨙꨩ ꨑꨟꨭꩊ ꨟꨰ ꨝꨪꨢꩉ ꨟꨝꨰ꩝ ꨘꩆ ꨟꨭꩀ ꨆꨨꨴꨳ ꨟꩀ ꨆꨔꨬ ꨚꨳꨮꩍ ꨓꨐꨫ ꨆꨩ ꨌꨤꩍ ꨈꩍ꩞ ꨕꨣꨩ ꨌꨭꩀ ꨀꨯꨱ ꨡꨯꩂ ꨞꨯꩂ ꨘꩆ ꨓꨌꨯꨱꨥ ꨟꨭꩀ ꨘꩆ ꨟꨪꩆ꩞ ꨨꨕꨬ ꨕꨫ ꨚꨟꩀ꩝ ꨟꨗꨶꨪꩋ ꨝꨩ ꨆꨔꨬ ꨗꨯꨱ ꨧꨩ ꨕꨗꨯꨱꩀ ꨀꨦꨪꩅ ꨀꨓꩍ ꨕꨫ ꨚꨤꨬ꩝ ꨈꨪꨣꩀ ꨓꨆꨰ ꨓꨊꨪꩆ ꨆꨔꨬ ꨥꨮꩀ꩝ ꨇꨯꨱꩊ ꨐꨭꨩ ꨤꩄ ꨙꨶꨮꩄ ꨨꨣꩀ ꨗꨯꨱ ꨁꩆꨕꨴꨚꨭꨣ ꨚꨎꨮꨩ꩝ ꨚꨳꨮꩍ ꨔꨮꨭ ꨆꨔꨬ ꨒꨮꩇ ꨎꨝꨶꨮꩊ ꨣꨬ ꨔꨯꨱꩍ꩝ ꨟꨢꩍ ꨔꨮꨭ ꨆꨎꩇ ꨆꨔꨬ ꨘꩆ ꨎꨝꨶꨮꩊ ꨢꨮꨩ ꨚꨤꨯꨱ꩞ ꨆꨴꨲꩍ ꨆꨵꨮꩌ ꨘꩆ꩝ ꨧꩇ ꨆꨳꨯꨮꩇ꩝ ꨀꨊꨪꩆ ꨤꨪꨀꩆ꩝ ꨟꨗꨶꨪꩋ ꨇꨪꩀ ꨡꨯꩍ ꨓꨊꨪꩆ ꨓꨆꨰ ꨆꨔꨬ ꨈꨪꨣꩀ ꨚꨎꨮꨩ ꨘꩆ ꨅꨩ ꨨꨶꨮꩄ ꨤꩄ ꨐꨭꨩ ꨙꨶꨮꩄ꩝ ꨇꨯꨱꩊ ꨐꨭꨩ ꨟꨐꨭꩌ ꨀꨤꩀ ꨟꨝꨭꩀ ꨝꨵꨯꨱꩍ ꨝꨩ ꨈꨮꩇ ꨙꨪꩍ ꨀꨝꨪꩍ꩝ ꨅꨩ ꨔꨮꨭ ꨈꨰꩅ ꨥꨮꩀ꩞ ꨓꨭꩀ ꨘꩆ ꨨꨭꨩ ꨧꨩ ꨆꨟꨬ ꨀꨯꨱ ꨎꨭꩀ꩝ ꨚꩆ ꨓꨯꨱꨥ ꨨꨤꨶꨮꩀ꩝ ꨐꨭꨩ ꨗꨯꨱ ꨚꨈꩆ ꨓꨚꨩ ꨕꨯꩌ ꨟꨗꨶꨪꩋ ꨕꨯꨱꩀ ꨙꨪꩍ ꨔꨴꨫꩂ꩞ ꨆꨔꨬ ꨅꨩ ꨔꨮꨭ ꨨꨭꨩ ꨟꨗꨶꨪꩋ ꨟꨰ꩝ ꨕꨯꨱꩀ ꨙꨪꩍ ꨟꨪꩆ꩞ ꨝꨵꨯꨱꩍ ꨆꨟꨬ ꨗꨯꨱ ꨓꨜꨳ ꨆꨔꨬ꩝ ꨨꨕꩍ ꨓꨯꨱꨥ ꨨꨤꨶꨮꩀ ꨚꨍꩃ ꨓꨟꨩ ꨡꨯꨱꩀ ꨆꨔꨬ꩝ ꨐꨭꨩ ꨚꩍ ꨕꩉ ꨕꨫ ꨣꨭꩇ ꨆꨔꨬ ꨝꨵꨯꨱꩍ ꨙꨯꩌ ꨕꩉ: “ꨦꨄꨰ ꨓꨈꨯꩀ ꨟꨰꩀ꩝ ꨕꨨꨵꩀ ꨟꨰ ꨕꨯꨱꩃ ꨦꨄꨰ” ꨆꨔꨬ ꨡꨵꩀ ꨟꨓꨩ꩝ ꨀꨢꨭꩍ ꨀꨆꨯꨱꩀ ꨤꩄ ꨔꨮꨭ ꨚꨎꨮꨩ꩞ ꨆꨟꨬ ꨟꩀ ꨓꨯꨱꨥ ꨔꨪꩀ ꨓꨤꨬ ꨝꨵꨯꨱꩍ ꨕꨶꨩ ꨂꨣꩃ ꨝꨩ ꨈꨮꩇ ꨙꨶꨮꩄ꩞ ꨆꨟꨬ: ꨕꨨꨵꩀ ꨧꨩ ꨧꨩ ꨆꨯꨱꨥ꩞ ꨆꨔꨬ: ꨘꩆ! ꨗꨰ ꨟꨯꨱꩃ ꨎꨭꩀ ꨅꨩ ꨕꨴꨮꩍ ꨕꨨꨵꩀ ꨦꨗꩃ! ꨧꨩ ꨧꨩ ꨆꨵꨯꨱ ꨝꨵꨯꨱꩍ ꨙꨯꩌ: ꨆꨢꨶꨩ ꨕꨨꨵꩀ ꨝꨡꨭꨩ ꨙꨳꩀ ꨘꩆ ꨎꨭꩀ꩞ ꨝꨳꩀ ꨤꩄ꩝ ꨧꨩ ꨧꨩ ꨕꨯꨱꩀ ꨥꨪꩊ ꨕꨮꩉ ꨚꨤꨬ ꨆꩌ ꨟꨪꩆ꩝ ꨗꨰ ꨕꨯꨱꩀ ꨌꩃ ꨨꨣꨬ ꨅꩃ ꨟꨭꩀ ꨟꨰ ꨚꨓꨯꨱꩌ ꨥꨮꩀ꩞ ꨗꨰ ꨧꨤꨪꩍ ꨀꨋꩆ꩝ ꨕꨯꨱꩀ ꨔꨮꩀ ꨡꨮꩀ ꨗꨫ ꨘꩆ꩝ ꨋꩀ ꨓꨴꩀ ꨣꨡꩍ ꨤꨯꨩ ꨘꩆ ꨆꨤꨪꩀ ꨗꨰ ꨎꨭꩀ꩝ ꨗꨰ ꨅꨩ ꨧꨳꩌ ꨝꨪꨗꨰ ꨟꨪꩆ ꨨꨓꨰ ꨗꨰ ꨨꨌꨪ ꨨꨌꨪꩍ꩞ ꨝꨵꨯꨱꩍ ꨗꨰ ꨚꨴꨯꨱꩃ ꨕꨣꨩ ꨧꨤꨪꩍ ꨡꨯꨱꩀ꩝ ꨅꨩ ꨔꨬ ꨕꨯꨱꩀ ꨆꨴꨲꩆ ꨗꨰ꩝ ꨓꨯꩀ ꨧꨩ ꨕꨴꨬ ꨗꨰ ꨔꨮꨭ ꨟꨪꩆ꩞ ꨝꨵꨯꨱꩍ ꨨꨟꨪꩅ ꨤꩄ ꨨꨭꨩ ꨟꨗꨶꨪꩋ ꨟꨰ ꨕꨶꩍ ꨕꨴꨬ꩝ ꨗꨰ ꨝꨳꩀ ꨀꨶꨮꩆ ꨓꨝꨶꨮꩆ꩞ ꨗꨰ ꨕꨶꩍ ꨗꨯꨱ ꨚꩀ ꨕꨗꨯꨱꩀ ꨆꨣꨮꩀ ꨆꨔꨬ꩝ ꨕꨮꩇ ꨥꨪꩊ ꨕꨮꩉ ꨘꩆ ꨌꩃ ꨝꨑꨶꨮꩉ ꨚꨳꨮꩍ ꨕꨯꨱꩃ ꨆꨔꨬ꩞ ꨓꨮꩊ ꨚꨈꨯꨮꨩ ꨕꨶꨩ ꨂꨣꩃ ꨗꨯꨱ ꨓꨝꨳꩀ ꨀꨓꩍ ꨕꨫ ꨚꨤꨬ ꨆꩌ ꨚꨎꨮꨩ꩝ ꨆꨔꨬ ꨟꩃ ꨙꨯꩌ: ꨗꨫ ꨘꩆ ꨓꨑꨴꩀ ꨅꩃ ꨟꨭꩀ ꨚꨕꨯꨱꩃ ꨕꨨꨵꩀ ꨚꨢꨮꩉ ꨆꨩ ꨗꨰ꩞ ꨧꨩ ꨧꨩ: ꨒꨮꩇ ꨚꨎꨮꨩ! ꨝꨯꨱꩍ ꨝꨪꨊꨭꨩ ꨗꨫ ꨒꨮꩇ ꨝꨯꨱꩍ ꨝꨪꨊꨭꨩ ꨈꩍ ꨈꨮꩇ ꨕꨨꨵꩀ꩞ ꨆꨔꨬ: ꨗꨰ ꨨꨕꨮꩉ ꨅꩃ ꨟꨭꩀ ꨣꨤꨯꨩ ꨒꨮꩇ ꨨꨤꨬ? ꨧꨩ ꨧꨩ: ꨒꨮꩇ ꨚꨎꨮꨩ ꨦꨄꨰ꩝ ꨕꨨꨵꩀ ꨟꨨꨭꨩ ꨟꨋꨥꨯꩌ ꨣꨤꨯꨩ꩝ ꨨꨕꨮꩉ ꨅꩃ ꨟꨭꩀ ꨧꨪ ꨟꨓꨰ! ꨆꨔꨬ ꨚꨓꨯꨱꨥ ꨤꨪꨝꨪꩀ ꨅꩃ ꨟꨭꩀ ꨆꨩ ꨧꨩ ꨧꨩ꩝ ꨝꨵꨯꨱꩍ ꨕꨶꨩ ꨂꨣꩃ ꨤꨪꨆꨮꨭ ꨕꨴꨬ ꨈꨮꩇ꩝ ꨆꨔꨬ ꨗꨯꨱ ꨁꩆꨕꨴꨚꨭꨣꨩ꩝ ꨕꨯꨱꩀ ꨧꨩ ꨧꨩ ꨗꨯꨱ ꨀꨳꨩ ꨢꨶꨮꩆ ꨚꨳꨮꩍ ꨚꨓꨯꨱꩌ ꨈꨤꩄ ꨅꩃ ꨟꨭꩀ꩞ ꨤꨪꨆꨮꨭ ꨕꨴꨬ ꨧꨩ ꨧꨩ ꨝꨪꨣꨭꨥ ꨝꨵꨯꨱꩍ꩝ ꨡꨯꩍ ꨀꨊꨪꩆ ꨀꨢꨭꩀ ꨇꨮꩃ꩝ ꨨꨎꩆ ꨤꨰꩀ ꨌꨤꩍ ꨓꨗꩍ꩝ ꨢꨯꨱꩌ ꨤꩄ ꨣꨪꨝꨭꩀ ꨟꨰ꩝ ꨤꨪꨝꨪꩀ ꨗꨫ ꨝꨮꩊ ꨗꨫ ꨓꨣꨳꨯꨮꩃ ꨨꨭꨩ ꨣꨪꨝꨭꩀ ꨓꨧꨯꨱꨥ꩞ ꨆꨔꨬ ꨝꨔꩍ ꨀꨝꨪꩍ꩝ ꨟꨣꩅ ꨙꨶꨮꩄ ꨗꨯꨱ ꨕꨶꩍ ꨤꨪꨝꨪꩀ ꨆꨙꩇ꩝ ꨓꨜꨳꨩ ꨘꩆ ꨡꨯꩍ ꨧꨩ ꨝꨪꨟꨯꩃ ꨘꩆ ꨤꨪꨆꨮꨭ ꨓꨟꨩ ꨚꨳꨮꩍ ꨆꨙꩇ ꨨꨎꩆ꩞ ꨧꩇ ꨨꨎꩆ ꨤꨰꩀ ꨕꨫ ꨝꨪꨟꨯꩃ ꨛꨯꨮ ꨋꩀ ꨆꨩ ꨆꨔꨬ ꨡꨯꩍ ꨕꨤꩌ ꨓꨳꩆ ꨝꨳꩀ ꨆꨣꨬ꩝ ꨈꨮꩌ ꨝꨶꨬ ꨧꨟꩃ ꨈꨮꩌ ꨚꨕꨴꨶꨰ꩞ ꨐꨭꨩ ꨨꨕꨮꩉ ꨣꨤꨯꨩ꩝ ꨁꩆꨕꨴꨚꨭꨣꨩ ꨚꨤꨬ ꨐꨭꨩ ꨟꨗꩀ꩝ ꨨꨕꨮꩉ ꨀꨟꨩ ꨀꨟꨰꩀ ꨧꨯꨱꩃ ꨧꩃ ꨀꨦꨪꩅ ꨟꨪꩆ ꨝꨶꨬ꩝ ꨨꨕꨮꩉ ꨨꨕꨯꩌ ꨕꨗꨫꩂ ꨕꨮꩃ ꨈꨵꨯꨱꩃ ꨇꨪꩀ ꨚꨤꨬ꩟ ꨧꩇ ꨨꨎꩆ ꨤꨰꩀ꩝ ꨧꩇ ꨀꨊꨪꩆ ꨀꨢꨭꩀ꩝ ꨓꨮꩊ ꨆꨴꨲꩍ ꨆꨵꨮꩌ ꨆꨩ ꨟꩃ ꨚꨕꨮꩍ꩞ ꨓꨮꩊ ꨨꨕꩍ ꨚꨈꨯꨮꨩ꩝ ꨆꨔꨬ ꨟꩃ ꨓꨮꩊ ꨧꩃ꩝ ꨡꨯꩍ ꨀꨟꨩ ꨀꨟꨰꩀ ꨆꨔꨬ ꨝꨳꩀ ꨀꨶꨮꩆ꩞ ꨆꨵꨮꩌ ꨘꩆ ꨟꨋꨥꨯꩌ ꨐꨭꨩ ꨋꩀ ꨡꨮꩃ ꨟꨐꨭꩌ ꨀꨶꨮꩆ ꨨꨣꨬ ꨚꨓꨯꨱꩌ꩝ ꨀꨟꨩ ꨀꨟꨰꩀ ꨀꨕꨬ ꨦꨄꨰ ꨟꨪꩀ ꨥꨩ ꨝꨶꨬ ꨆꨵꨯꨱ ꨥꨪꩊ ꨕꨮꩉ ꨀꨚꨶꨬ ꨚꨙꨥ ꨨꨕꩍ꩝ ꨣꩈ ꨟꨗꨶꨪꩋ ꨤꨪꨎꩃ ꨨꨭꨩ ꨕꨯꩌ ꨥꩀ ꨓꨭꩀ ꨍꨮꩍ ꨨꨓꨰ ꨢꨮꨭ ꨘꩆ! ꨕꨫ ꨘꩆ꩝ ꨆꨔꨬ ꨚꨔꨮꨭ ꨀꨟꨩ ꨀꨟꨰꩀ꩝ ꨤꨪꨆꨮꨭ ꨝꨴꨬ ꨆꨩ ꨐꨭꨩ ꨇꨫꩂ ꨈꨣꨯꨮ꩝ ꨀꨟꨩ ꨀꨟꨰꩀ ꨨꨤꩉ ꨟꨪꩆ꩝ ꨐꨭꨩ ꨀꨶꨮꩆ ꨣꨤꨯꨩ꩝ ꨚꨈꨶꨮꩆ ꨤꩄ ꨇꨫꩂ ꨈꨣꨯꨮ ꨝꨵꨯꨱꩍ꩝ ꨞꨳꩆ ꨣꨟꨪꩀ ꨟꨰ ꨁꩆꨕꨴꨚꨭꨣ ꨚꨳꨮꩍ ꨣꨥꨮꩃ ꨀꨟꨩ ꨀꨟꨰꩀ꩞ ꨅꨩ ꨤꨪꨥꨪꩀ ꨨꨕꨬ꩝ ꨆꨔꨬ ꨧꨯꨱꩃ ꨈꨣꨯꨮ ꨋꩀ ꨙꩌ ꨚꨙꨪꩍ꩝ ꨝꨵꨯꨱꩍ ꨕꨯꨱꩀ ꨧꨯꨱꩃ ꨈꨮꩇ ꨚꩀ ꨚꨤꨬ ꨆꩃ꩞ ꨈꨣꨯꨮ ꨟꨗꩀ ꨧꨩ ꨀꨗꩀ ꨤꨪꨆꨬ꩝ ꨝꨴꨬ ꨀꨋꩆ ꨢꨣꨭꨩ꩞ ꨣꩈ ꨧꩀ ꨅꨩ ꨆꨩ ꨀꨓꩍ ꨨꨕꨯꩌ ꨝꨵꨯꨱꩍ ꨆꨤꨪꩆ ꨟꨰ ꨥꨮꩀ꩞ ꨔꨭꩆ ꩙꩘꩒꩝ ꨤꨯꨮꨩ ꨨꩃ ꨖꩉ ꨀꨓꨯꨱꩃ ꨌꩌꨛꨩ꩝ ꨧꨩ ꨚꨵꨭꩍ ꨓꨟꩆ ꨎꨝꨶꨮꩊ ꨣꨞꨩ ꨓꨝꨳꩀ ꨕꨶꨩ ꨈꩍ ꨓꨧꨪꩀ ꨧꨯꨱꩃ ꨓꨗꩍ ꨀꨓꨯꨱꩃ ꨓꨟꨩ ꨝꩊ ꨌꩌꨛꨩ ꨁꩆꨕꨴꨚꨭꨣꨩ꩞ ꨨꨟꨪꩅ ꨁꨇꩆ ꨘꩆ꩝ ꨚꨓꨯꨱ ꨌꩌꨛꨩ ꨤꨪꨎꩃ ꨝꨴꨬ ꨈꨯꨱꩆ ꨆꨩ ꨎꨝꨶꨮꩊ ꨓꨗꩍ ꨧꨯꨱꩃ ꨎꨝꨶꨮꩊ ꨤꨪꨟꩆ ꨗꨯꨱ ꨈꩍ ꨝꨪꨣꩀ ꨚꨳꨮꩍ ꨌꨆꩀ ꨀꨓꨯꨱꩃ ꨎꨝꨶꨮꩊ ꨢꨶꨮꩆ꩞ ꨆꨔꨬ ꨓꨭꩀ ꨘꩆ ꨋꩀ ꨞꩃ ꨚꨎꨮꨩ꩝ ꨨꨟꨪꩅ ꨆꨤꨪꩆ ꨟꨰ꩝ ꨆꨔꨬ ꨣꨟꨪꩀ ꨆꨩ ꨈꨣꨯꨮ ꨧꨯꨱꩃ ꨢꨣꨭꨩ ꨗꨯꨱ ꨚꨵꨰꩍ ꨝꨤꨩ ꨚꩀ ꨁꩆꨕꨴꨚꨭꨣꨩ꩝ ꨟꨪꩆ ꨅꩃ ꨇꩃ ꨧꨩ ꨕꨶꨩ ꨅꨩ ꨌꨳꨪꩇ ꨗꨯꨱ꩝ ꨈꨣꨯꨮ ꨤꨪꨎꩃ ꨅꨩ ꨌꨳꨪꩇ꩝ ꨐꨭꨩ ꨙꨯꩀ ꨕꨯꨱꩀ ꨥꨮꩀ ꨧꨯꨱꩃ ꨀꨟꨩ꩞ ꨆꨔꨬ ꨙꨯꩌ ꨀꨝꨪꩍ ꨚꨗꨶꨮꩄ ꨤꨪꨎꩃ ꨢꨮꨭ ꨔꨯꨱꩍ꩝ ꨘꩆ ꨚꨕꨯꨱꩃ ꨧꨩ ꨂꨣꩃ ꨣꨙꨮꩇ ꨝꨩ ꨧꨩ ꨕꨴꨬ ꨢꨣꨭꨩ ꨗꨯꨱ ꨚꨵꨰꩍ ꨚꩀ ꨁꩆꨕꨴꨚꨭꨣꨩ ꨟꨪꩆ꩞ ꨙꨯꩌ ꨥꨮꩀ ꨕꨫ ꨤꨯꨮꨩ ꨨꩃ꩝ ꨅꩃ ꨘꩆ ꨧꨩ ꨚꩆꨣꨯꨱꩃ ꨝꨳꩀ ꨈꨵꨯꨱꩃ ꨦꨗꩃ꩝ ꨀꨓꨯꨱꩃ ꨔꨮꨭ ꨨꨕꨯꩌ ꨡꨮꩃ ꨆꨤꨪꩆ ꨚꨎꨮꨩ꩝ ꨅꩃ ꨝꨪꨣꨭꨥ ꨓꨈꨯꩀ ꨋꩀ ꨚꨓꨯꨱ ꨀꨳꨩ ꨢꨶꨮꩆ꩝ ꨤꨪꨎꩃ ꨝꨪꨣꨭꨥ ꨀꨓꨯꨱꩃ ꨡꨮꩃ ꨀꨳꨩ ꨤꨯꨱꨥ꩝ ꨎꨝꨶꨮꩊ ꨢꨶꨮꩆ ꨔꨬ ꨔꨬ ꨤꨪꨎꩃ ꨧꩀ ꨨꨓꨰ ꨆꨎꩇ ꨓꨟꨩ ꨅꩃ꩝ ꨘꩆ ꨢꨥ ꨚꨴꨯꨱꩃ ꨎꨝꨶꨮꩊ ꨢꨶꨮꩆ ꨈꨵꨯꨱꩃ ꨣꨤꨯꨩ꩞ ꨝꨳꨯꨮꩉ ꨨꨣꨬ ꨘꩆ꩝ ꨆꨔꨬ ꨧꨯꨱꩃ ꨤꨪꨟꨩ ꨓꨟꩆ ꨎꨝꨶꨮꩊ ꨗꨯꨱ ꨌꨆꩀ ꨀꨓꨯꨱꩃ ꨢꨶꨮꩆ ꨕꨫ ꨎꨪꩍ ꨗꨈꩉ꩞ ꨎꨝꨶꨮꩊ ꨔꨬ ꨔꨬ ꨤꨪꨎꩃ ꨇꨮꩃ ꨆꨎꩇ ꨨꨓꨰ꩝ ꨙꨯꩀ ꨤꩄ ꨀꨓꨯꨱꩃ ꨧꨘꩀ ꨧꨩ ꨡꨮꩃ ꨗꨫ ꨆꨩ ꨐꨭꨩ ꨨꨶꨮꩄ ꨆꨙꨩ ꨕꨴꨬ ꨅꩍ ꨇꨪꩆ ꨈꨤꩄ ꨥꨮꩀ꩞ ꨎꨝꨶꨮꩊ ꨣꨞꨩ ꨈꨮꩇ ꨆꨴꩀ꩝ ꨌꩃ ꨢꨶꨮꩆ ꨓꨟꨩ ꨒꨮꩇ ꨤꨪꨝꨪꩀ ꨆꨩ ꨟꩃ ꨝꨵꩀ ꨓꨟꨩ ꨀꨓꨯꨱꩃ꩞ ꨎꨝꨶꨮꩊ ꨢꨶꨮꩆ ꨝꨪꨣꨭꨥ ꨓꨚꨩ ꨎꨤꩆ ꨎꨪꩍ ꨟꨪꩆ ꨈꨯꨱꩀ ꨎꨝꨶꨮꩊ ꨌꩌ ꨌꨆꩀ ꨀꨓꨯꨱꩃ; ꨎꨝꨶꨮꩊ꩝ ꨀꨧꨰꩍ꩝ ꨤꨪꨟꩆ ꨕꨤꩌ ꨈꨵꨰ ꨝꨵꩀ ꨓꨝꨳꩀ ꨀꨓꨯꨱꩃ꩝ ꨢꨶꨮꩆ ꨅꨩ ꨀꨓꨯꨱꩃ ꨈꨤꩄ ꨧꨭꨟꨭꨩ ꨘꩆ ꨟꨓꨰ ꨕꩀ ꨈꨮꩇ ꨝꨵꨯꨱꩍ ꨟꨣꩅ ꨙꨶꨮꩄ ꨈꨤꩄ ꨥꨮꩀ꩝ ꨎꨝꨶꨮꩊ ꨌꩌ ꨚꨈꨶꨬ ꨀꨓꨯꨱꩃ ꨓꩀ꩝ ꨚꨈꨶꨬ ꨓꨚꨩ ꨎꨪꩍ ꨗꨈꩉ꩝ ꨟꨪꩆ ꨝꨵꨯꨱꩍ ꨤꨰꩀ ꨓꨟꨩ ꨥꨮꩀ ꨕꨫ ꨤꨪꨝꨪꩀ ꨆꨴꩀ ꨀꨓꨯꨱꩃ ꨤꨯꨮꨩ ꨨꩃ꩞ ꨆꨖꨩ ꨆꨔꨬ: ꨝꨪꨘꩍ ꨓꨤꨶꨪꩄ ꨎꨝꨶꨮꩊ ꨌꩌ ꨤꨰꩀ ꨎꨤꨮꩌ ꨓꨟꨩ ꨕꨫ ꨤꨪꨝꨪꩀ ꨢꨶꨮꩆ ꨆꨴꩀ ꨀꨓꨯꨱꩃ꩝ ꨢꨶꨮꩆ ꨕꨯꨱꩀ ꨕꨫ ꨕꨶꨩ ꨈꩍ ꨡꨶꨮꩆ ꨈꨵꨯꨱꩃ ꨌꨭꩍ ꨓꨝꨳꩀ ꨓꨪꩀ ꨓꨪꩀ ꨡꨴꨮꩌ ꨝꨵꨭꨥ꩝ ꨤꨪꨊꨪꩀ ꨦꨭꩇ ꨟꨪꩆ ꨎꨳꨮꩂ ꨨꨕꩍ ꨨꨆꨶꨮꩆ ꨆꨢꨶꨩ ꨡꨴꨮꩌ ꨡꨮꩃ ꨝꨵꨭꨥ꩞ ꨧꩇ ꨎꨝꨶꨮꩊ ꨚꨴꨯꨮꨥ ꨕꨶꨪꨧꩀ꩝ ꨣꨤꨯꨩ ꨟꨗꨶꨪꩋ ꨀꨚꨶꨬ ꨡꨮꩃ ꨢꨮꨭ ꨆꨢꨮꨭ꩝ ꨢꨶꨮꩆ ꨝꨵꩀ ꨓꨟꨩ ꨀꨓꨯꨱꩃ ꨓꩀ꩝ ꨎꨝꨶꨮꩊ ꨌꩌ ꨀꨤꩍ ꨣꨯꨱꩃ꩝ ꨚꩆꨣꨯꨱꩃ ꨟꨓꨰ ꨤꨨꨪꩀ꩞ ꨙꨯꩌ ꨓꨮꩊ ꨆꨔꨬ꩝ ꨐꨭꨩ ꨧꨯꨱꩃ ꨣꨤꨯꨩ ꨎꨝꨶꨮꩊ ꨆꨕꨴꩆ ꨕꨴꨬ ꨀꨓꨯꨱꩃ ꨚꨮꩍ ꨎꨤꩆ ꨕꨣꩍ ꨆꨩ ꨟꩃ ꨆꨵꩍ ꨓꨝꨳꩀ ꨨꨭꨩ꩝ ꨝꨵꨯꨱꩍ ꨨꨕꨯꩌ ꨎꨝꨶꨮꩊ ꨕꨯꨱꩀ ꨨꨕꨳꨪꩇ ꨙꨶꨮꩄ ꨈꨤꩄ ꨈꩍ ꨟꨣꨯꨱꩃ꩞ ꨨꨕꨬ ꨕꨫ ꨡꨮꩃ ꨀꨓꨯꨱꩃ ꨗꨫ꩝ ꨣꨧꨩ ꨟꨗꨶꨪꩋ ꨟꨓꨰ ꨎꨳꨮꩂ ꨨꨕꨮꩃ; ꨈꨴꨮꩀ꩝ ꨣꨪꨟꨯꨱꩃ꩝ ꨆꨤꨩ ꨓꨝꨳꩀ ꨢꨯꨱꩃ ꨡꨮꩃ ꨣꨤꨯꨱꨥ꩝ ꨔꨰꩀ ꨆꨖꨩ ꨟꨯꨱꩃ ꨝꨳꩀ ꨕꨶꨪꨧꩀ꩞ ꨓꨚꨩ ꨣꨤꨯꨩ ꨨꨣꨬ ꨕꨮꩇ ꨎꨤꨮꩌ ꨈꨵꨰ ꨌꨮꩀ ꨚꨵꨰꩍ ꨢꨶꨮꩆ꩝ ꨆꨔꨬ ꨤꨪꨎꩃ ꨕꨶꩍ ꨨꨭꨩ ꨟꨰ ꨈꨤꩄ ꨚꨤꨬ ꨆꩃ꩝ ꨟꨪꩆ ꨕꨯꨱꩀ ꨀꨓꩍ ꨡꨯꩍ ꨀꨔꩀ ꨎꨭꩀ ꨚꨮꩉ ꨓꨈꨯꩀ ꨕꨫ ꨚꨤꨬ꩞ ꨡꨯꩍ ꨀꨔꨭꩉ ꨘꩆ ꨙꨶꨮꩄ ꨗꨯꨱ ꨟꨯꨱꩃ ꨀꨳꨮꩀ꩞ ꨚꨤꨬ ꨀꨚꨶꨬ ꨡꨮꩃ ꨝꨵꨭꨥ ꨀꨝꨪꩍ꩝ ꨟꨗꨶꨪꩋ ꨟꨓꨰ ꨕꨯꨱꩀ ꨙꨪꩍ ꨈꨴꨮꩇ ꨤꨪꨝꨪꩀ꩞ ꨆꨔꨬ ꨓꨭꩀ ꨘꩆ ꨓꨊꨪꩆ ꨀꨢꨭꩍ꩝ ꨅꨩ ꨦꨗꩃ ꨣꨤꨯꨩ꩝ ꨙꨶꨮꩄ ꨗꨯꨱ ꨚꩀ ꨧꩃ ꨨꨕꨳꨮꩇ ꨐꨭꨩ꩝ ꨟꨪꩆ ꨅꨩ ꨡꨯꩍ ꨧꩃ ꨥꨮꩀ꩝ ꨡꨯꩍ ꨕꨯꨱꩀ ꨨꨝꨭꨥ ꨔꨯꨱꩍ꩞ ꨐꨭꨩ ꨕꨶꩍ ꨥꨮꩀ ꨕꨫ ꨈꨴꨮꩇ ꨚꨤꨬ ꨟꨗꨶꨪꩋ ꨕꨯꨱꩀ ꨨꨕꨳꨪꩇ꩝ ꨟꨪꩆ ꨅꨩ ꨡꨯꩍ ꨔꨬ ꨕꨯꨱꩀ ꨥꨮꩀ꩝ ꨈꨣꨯꨮ ꨅꩃ ꨇꩃ ꨤꨪꨎꩃ ꨅꨩ ꨡꨯꩍ꩞ ꨀꨊꨪꩆ ꨀꨢꨭꩍ ꨤꨪꨀꩆ꩝ ꨡꨭꨥ ꨟꨗꨶꨪꩋ ꨟꨓꨰ꩝ ꨡꨭꨥ ꨇꨳꩀ꩞ ꨆꨔꨬ ꨨꨶꨮꩄ꩝ ꨤꨟꨭꩀ꩝ ꨟꨝꨰ꩞ ꨆꨔꨬ ꨟꨰ ꨈꨤꩄ ꨤꨪꨝꨪꩀ ꨕꨯꩌ ꨎꨝꨶꨮꩊ ꨌꩌ ꨕꨯꨱꩀ ꨆꨙꩇ꩝ ꨓꨜꨳꨩ ꨨꨭꨩ ꨀꨳꨩ ꨌꨴꨯꨱꩍ꩝ ꨀꨳꨩ ꨨꨣꨬ ꨓꨴꨭꩆ ꨌꨮꩀ ꨚꨎꨮꨩ ꨟꨪꩆ ꨆꨔꨬ ꨅꨩ ꨆꨩ ꨡꨮꩃ ꨈꨰꩅ꩝ ꨕꨯꨱꩀ ꨆꨔꨮꩃ ꨆꨡꨮꩃ: “ꨚꨤꨬ ꨣꨗꨮꩌ ꨆꨮꨭ ꨤꨮꩈ꩝ ꨈꨣꨯꨮ ꨀꨗꨫꩅ ꨤꨮꩈ꩝ ꨕꨫ ꨕꨯꨱꩀ ꨈꨰꩅ ꨥꨮꩀ ꨅꩍ?”꩞ ꨀꨳꨩ ꨟꨓꨩ ꨓꨒꨯꨱꩍ꩝ ꨐꨭꨩ ꨨꨕꨮꩉ ꨨꨕꨳꨮꩇ꩝ ꨡꨯꩍ ꨝꨳꩀ ꨚꨙꨪꩀ ꨕꨫ ꨨꨓꨰ ꨟꨪꩆ ꨅꨩ ꨙꨯꩌ ꨈꨰꩅ ꨨꨭꨩ꩞ ꨝꨪꨣꨭꨥ ꨘꩆ ꨕꨯꨱꩀ ꨀꨓꩍ ꨡꨯꩍ ꨈꨰꩅ ꨅꨩ ꨨꨕꩍ ꨚꨮꩉ ꨟꨰ꩝ ꨀꨗꩀ ꨓꨀꨠꩀ꩝ ꨧꩇ ꨀꨳꨩ ꨌꨴꨯꨱꩍ ꨢꨮꨭ ꨕꨯꨱꩀ ꨙꨯꩌ ꨨꨈꨰꩅ ꨕꩉ꩞ ꨆꨔꨬ ꨙꨯꩌ ꨧꨩ ꨕꨴꨬ ꨧꨩ ꨕꨴꩊ: “ꨕꩍ꩝ ꨀꨋꩆ ꨕꨴꨬ꩝ ꨤꨪꨎꩃ ꨚꨈꨮꩇ ꨧꨯꨱꩃ ꨚꨍꨯꩌ ꨙꨩ ꨤꩄ ꨈꨣꨯꨮ ꨅꨩ ꨆꨩ ꨟꨓꨰ”꩞ ꨝꨵꨯꨱꩍ ꨆꨔꨬ ꨆꨵꨯꨱ ꨧꩀ ꨨꨓꨰ꩞ ꨨꨕꨬ ꨕꨫ ꨡꨮꩃ ꨀꨤꩍ ꨔꨭꩆ ꩙꩗꩙꩝ ꨚꨴꨲꩆ ꨌꩌꨛꨩ ꨆꨣꩃ ꨣꨤꨯꨩ꩞ ꨧꨩ ꨡꨮꩃ ꨗꨫ꩝ ꨎꨝꨶꨮꩊ ꨌꩌ ꨚꨕꩀ ꨀꨤꩍ꩝ ꨤꨶꨰ ꨓꨟꨩ ꨎꨤꨮꩌ ꨈꩍ ꨟꨣꨯꨱꩃ꩝ ꨧꨪ ꨓꨮꩊ ꨁꩆꨕꨴꨚꨭꨣꨩ꩞ ꨔꨶꨰ ꨎꨤꩆ ꨚꨈꨶꨬ ꨟꨰ ꨈꩍ ꨟꨣꨯꨱꩃ꩝ ꨝꨶꨮꩊ ꨞꩇ ꨌꩌꨛꨩ ꨌꨆꩀ ꨀꨓꨯꨱꩃ ꨘꩆ ꨎꨝꨶꨮꩊ ꨢꨶꨮꩆ ꨟꨓꨰ ꨣꨤꨯꨩ꩝ ꨤꨯꨮꨩ ꨨꩃ ꨤꨟꨭꩀ ꨘꩆ ꨝꨴꨬ ꨈꨯꨱꩆ ꨌꨭꩍ ꨀꨝꨪꩍ ꨚꨤꨬ ꨌꩌ ꨟꨢꩍ ꨡꨯꩍ꩞ ꨈꩍ ꨝꨪꨣꩀ ꨚꨤꨬ ꨁꩆꨕꨴꨚꨭꨣꨩ ꨨꨭꨩ ꨧꨩ ꨆꨴꨯꨱꩃ ꨀꨋꩆ ꨀꩇꨧꨣꨩ꩝ ꨟꨢꩍ ꨓꨚꨩ ꨨꨭꨩ ꨆꨴꨯꨱꩃ ꨗꨫ ꨢꨮꨩ ꨎꨝꨶꨮꩊ ꨢꨶꨮꩆ ꨓꨟꨩ ꨨꨭꨩ ꨝꩊ ꨌꩌꨛꨩ꩞ ꨣꨎꨀꨰꩋ ꨌꩌꨛꨩ ꨚꨓꨯꨱꩌ ꨨꨭꨩ ꨆꨵꨮꨭ ꨓꨟꩆ ꨎꨝꨶꨮꩊ ꨓꨴꨩ꩝ ꨝꨵꨯꨱꩍ ꨢꩍ ꨓꨓꨶ ꨓꨚꨩ ꨆꨴꨯꨱꩃ ꨀꩇꨧꨣꨩ꩝ ꨋꩀ ꨎꨳꨮꩂ ꨧꨩ ꨎꨤꩆ ꨇꨪꩀ ꨈꩍ ꨟꨣꨯꨱꩃ ꨆꨴꨯꨱꩃ ꨀꩇꨧꨣꨩ꩞ ꨆꨔꨬ ꨤꨪꨎꩃ ꨕꨯꨱꩀ ꨟꨧꨭꩍ ꨕꨫ ꨎꨤꩆ ꨇꨪꩀ ꨗꨫ꩞ ꨎꨝꨶꨮꩊ ꨢꨶꨮꩆ ꨆꨯꨱꩍ ꨜꨭꩆ ꨧꨯꨱꩃ ꨆꨴꨲꩌ ꨋꩀ ꨓꨝꨳꩀ ꨣꨪꨝꨭꨥ ꨈꨪꨤꨰ꩝ ꨣꨤꨯꨩ ꨡꨮꩃ ꨙꨶꨮꩄ ꨈꨪꨤꨰ ꨓꨚꨩ ꨆꨴꨯꨱꩃ ꨟꨪꩆ ꨎꨝꨶꨮꩊ ꨌꩌ ꨌꨆꩀ ꨀꨓꨯꨱꩃ ꨌꨤꩍ ꨣꨰ ꨝꨴꨰ꩞ ꨡꨯꩍ ꨓꨚꨩ ꨆꨴꨯꨱꩃ ꨆꩆ ꨣꨤꨯꨩ꩝ ꨘꩆ ꨎꨝꨶꨮꩊ ꨢꨶꨮꩆ ꨅꩍ ꨓꨚꨩ ꨥꨮꩀ꩝ ꨕꨯꨱꩀ ꨕꨫ ꨘꩆ ꨌꩃ ꨎꨝꨶꨮꩊ ꨈꩍ ꨓꨧꨪꩀ ꨟꨰ ꨚꨓꨯꨱꩌ ꨆꨩ ꨟꩃ ꨀꨓꨯꨱꩃ ꨥꨮꩀ꩞ ꨎꨝꨶꨮꩊ ꨌꩌ ꨔꨮꨭ ꨤꩄ ꨎꨝꨶꨮꩊ ꨓꨧꨪꩀ ꨢꨶꨮꩆ ꨧꨪ ꨟꨰ ꨚꨎꨮꨩ꩝ ꨅꨩ ꨇꨪꩀ ꨢꨮꨭ ꨗꨫ ꨥꨮꩀ ꨨꨭꨩ꩝ ꨘꩆ ꨨꨭꨩ ꨞꩃ ꨚꨶꨮꩄ ꨤꩄ: “ꨎꨤꩆ ꨇꨪꩀ ꨆꨎꩇ ꨀꨝꨪꩍ ꨘꩆ ꨎꨤꩆ ꨀꨓꨯꨱꩃ ꨌꨆꩀ ꨀꨆꨯꨱꩀ꩝ ꨟꨢꩍ ꨕꨴꨬ ꨀꨓꨯꨱꩃ ꨌꨤꩍ ꨨꨭꨩ ꨎꨝꨶꨮꩊ ꨢꨶꨮꩆ ꨈꩍ ꨕꨯꨮꩍ꩝ ꨚꨟꨓꨰ ꨚꨓꨯꨱ ꨐꨭꨩ꩝ ꨢꨮꨩ ꨎꨝꨶꨮꩊ ꨢꨶꨮꩆ ꨕꨫ ꨓꨧꨪꩀ ꨤꨪꨎꩃ ꨌꨤꩍ ꨓꨶꨬ ꨟꨪꩆ”꩞ ꨦꨗꩃ ꨡꨯꩍ ꨒꨮꩇ ꨘꩆ ꨀꨝꨪꩍ ꨞꩃ ꨧꨩ ꨨꨓꨰ ꨋꩀ ꨓꨶꨬ ꨆꨖꨩ ꨗꨫ꩝ ꨝꨵꨯꨱꩍ ꨓꨈꨯꩀ ꨥꩀ ꨓꨭꩀ ꨚꨳꨮꩍ ꨀꨓꨯꨱꩃ꩞ ꨆꨵꨮꩌ ꨨꨎꩆ ꨚꨴꨯꨱꩃ꩝ ꨓꨟꩆ ꨎꨝꨶꨮꩊ ꨌꩌꨛꨩ ꨙꨶꨮꩄ ꨈꨪꨤꨰ ꨓꨚꨩ ꨆꨴꨯꨱꩃ꩝ ꨓꨚꨩ ꨓꨴꨭꩍ ꨝꨵꨯꨱꩍ ꨝꨵꩀ ꨓꨟꨩ ꨆꨕꨰ ꨎꨝꨶꨮꩊ ꨢꨶꨮꩆ꩝ ꨟꨪꩆ ꨅꨩ ꨡꨯꩍ ꨔꨬ ꨕꨯꨱꩀ ꨕꨤꩌ꩝ ꨝꨪꨣꨭꨥ ꨘꩆ ꨎꨝꨶꨮꩊ ꨢꨶꨮꩆ ꨕꨯꨱꩀ ꨕꨫ ꨈꨴꨮꩇ ꨈꩍ ꨤꨶꩀ ꨓꨝꨳꩀ꩞ ꨆꨕꨰ ꨎꨝꨶꨮꩊ ꨌꩌꨛꨩ ꨕꨯꨱꩀ ꨈꩍ ꨟꨣꨯꨱꩃ ꨆꨴꨯꨱꩃ ꨤꨪꨎꩃ ꨝꨪꨣꨭꨥ ꨤꨨꨪꩀ꩞ ꨟꩃ ꨔꨮꨭ꩝ ꨤꨯꨮꨩ ꨨꩃ ꨓꨚꨩ ꨣꨝꨵꨮꩀ ꨕꨤꩌ ꨎꨝꨶꨮꩊ ꨌꩌꨛꨩ꩝ ꨘꩆ ꨔꨮꨭ ꨕꨨꨵꨮꨭ ꨥꩀ ꨓꨭꩀ ꨎꨝꨶꨮꩊ ꨌꩌ ꨓꨚꨩ ꨆꨴꨯꨱꩃ꩞ ꨓꨮꩊ ꨆꨵꨮꩌ꩝ ꨎꨝꨶꨮꩊ ꨢꨶꨮꩆ ꨅꨩ ꨙꨪꩍ꩝ ꨟꨪꩆ ꨓꨈꨯꩀ ꨊꨯꨱꩀ ꨨꨤꨮꨭ ꨆꨴꩀ꩝ ꨌꩃ ꨎꨝꨶꨮꩊ ꨌꩌ ꨓꨚꨩ ꨟꨰ ꨢꨮꨩ ꨀꨓꨯꨱꩃ ꨟꩀ ꨆꨕꨰ ꨎꨝꨶꨮꩊ ꨈꩍ ꨕꨯꨮꩍ ꨆꨴꨯꨱꩃ꩞ ꨧꨩ ꨝꨪꨘꩍ ꨎꨝꨶꨮꩊ ꨓꨴꨩ꩝ ꨕꨯꨱꩀ ꨥꨮꩀ ꨈꩍ ꨗꨫ ꨚꨳꨮꩍ ꨚꨎꩊ ꨟꩀ ꨎꨝꨶꨮꩊ ꨌꩌꨛꨩ ꨓꨚꨩ ꨟꨰ꩞ ꨚꩆꨣꨯꨱꩃ ꨢꨶꨮꩆ ꨉꩀ ꨎꨝꨶꨮꩊ ꨌꩌꨛꨩ ꨚꨙꩉ ꨌꨳꨪꩇ ꨀꨤꩍ ꨟꨰꩀ꩝ ꨘꩆ ꨅꨩ ꨌꨭꩍ ꨡꨴꨮꩌ ꨚꨟꨓꨰ ꨀꨝꨪꩍ꩞ ꨡꨯꩍ ꨢꨮꨭ ꨘꩆ꩝ ꨚꩆꨣꨯꨱꩃ ꨌꩌꨛꨩ ꨝꨴꨬ ꨈꨯꨱꩆ ꨆꨩ ꨎꨝꨶꨮꩊ ꨤꨶꨰ ꨙꨥ ꨌꨳꨪꩇ ꨀꨤꩍ꩞ ꨎꨝꨶꨮꩊ ꨢꨶꨮꩆ ꨟꩀ ꨨꨭꨩ ꨆꨵꨪꩀ ꨎꨝꨶꨮꩊ ꨌꩌ ꨧꨯꨱꩃ ꨝꨳꩀ ꨣꨤꨯꨩ ꨝꨴꩍ ꨧꨯꨱꩃ ꨈꨴꨮꩇ꩞ ꨟꩃ ꨨꨣꨬ ꨘꩆ꩝ ꨨꨎꩆ ꨅꨩ ꨚꨕꨮꩃ ꩔ ꨨꨣꨬ꩝ ꨆꨔꨬ ꨧꨯꨱꩃ ꨣꨤꨯꨩ ꨞꩃ ꨝꨪꨆꩆ ꨚꨈꨪꨣꩀ ꨓꨟꨩ ꨈꨮꩃ ꨀꨘꩀ ꨕꨫ ꨆꨕꨰ꩝ ꨚꨳꨮꩍ ꨚꨈꨭꩍ ꨓꩀ ꨀꨆꨯꨱꩀ ꨃꨥ ꨢꩃ ꨕꨨꨵꨮꨭ ꨓꨭꩀ ꨓꨝꨳꩀ ꨎꨝꨶꨮꩊ꩞ ꨆꨵꨮꩌ ꨘꩆ ꨨꨎꩆ ꨌꨤꩍ ꨤꨪꨊꨪꩀ ꨚꨌꨮꩃ ꨀꨝꨪꩍ ꨅꨩ ꨡꨯꩍ ꨀꨓꩍ꩝ ꨧꨩ ꨡꨮꩃ ꨓꨴꨩ꩝ ꨡꨯꩍ ꨧꨩ ꨆꨟꨬ ꨕꨯꨱꩀ ꨀꨓꩍ ꨟꨰ꩝ ꨔꨶꩀ ꨈꨪꨣꩀ ꨆꨩ ꨆꨔꨬ꩞ ꨆꨟꨬ: ꨦꨄꨰ ꨗꨯꨱ ꨧꨠꩉ ꨗꨯꨱ꩞ ꨆꨔꨬ: ꨧꨩ ꨧꨩ꩝ ꨒꨮꩇ ꨗꨰ ꨨꨤꨬ? ꨧꨩ ꨧꨩ: ꨒꨮꩇ ꨚꨎꨮꨩ꩝ ꨦꨄꨰ ꨗꨯꨱ ꨟꨰꩀ꩞ ꨆꨩ ꨔꨬ: ꨙꨶꨩ ꨜꨶꨮꩊ ꨗꨰ! ꨆꨔꨬ ꨙꨶꨮꩄ ꨓꨟꨩ ꨈꨵꨰ꩝ ꨆꨵꩍ ꨟꨓꨰ꩞ ꨓꨭꩀ ꨗꨯꨱ ꨓꨮꩊ ꨀꨳꨩ ꨢꨶꨮꩆ ꨝꨵꨯꨱꩍ ꨕꨯꨱꩀ ꨕꨫ ꨘꩆ꩝ ꨧꨩ ꨧꨩ ꨎꨳꨮꩂ ꨝꨶꨮꩊ ꨀꨳꨩ ꨢꨶꨮꩆ꩝ ꨘꩆ ꨗꨯꨱ ꨓꨶꨬ ꨓꨗꩀ ꨨꨶꩀ ꨧꨯꨱꩃ ꨏꨪꩀ ꨀꨯꨱ ꨆꨩ ꨎꨝꨶꨮꩊ ꨢꨶꨮꩆ꩞ ꨡꨯꩍ ꨆꨔꨬ ꨚꨈꨪꨣꩀ ꨀꨘꩀ ꨆꨕꨰ꩝ ꨝꨵꨯꨱꩍ ꨡꨯꩍ ꨨꨎꩆ ꨚꨴꨯꨱꩃ ꨚꨌꨮꩃ ꨟꨓꨩ ꨎꨝꨶꨮꩊ ꨇꨪꩀ꩝ ꨘꩆ ꨨꨭꨩ ꨝꨑꨶꨮꩉ ꨔꨶꩀ ꨈꨪꨣꩀ ꨆꨩ ꨆꨔꨬ꩞ ꨆꨔꨬ ꨙꨶꨮꩄ ꨈꨤꩄ ꨁꩆꨕꨴꨚꨭꨣꨩ꩝ ꨠꨧꨭꩍ ꨥꨮꩀ ꨕꨫ ꨘꩆ꩞ ꨨꨕꨬ ꨎꨰ ꨢꩀ ꨕꨫ ꨆꨴꨯꨱꩃ ꨀꩇꨧꨣꨩ꩝ ꨤꨯꨮꨩ ꨨꩃ ꨚꨓꨯꨱꩌ ꨧꨯꨱꩃ ꨎꨝꨶꨮꩊ ꨓꨧꨪꩀ꩝ ꨣꨟꨪꩀ ꨢꩍ ꨕꨗꨫꩂ ꨁꩆꨕꨴꨚꨭꨣꨩ꩞ ꨁꩆꨕꨴꨚꨭꨣꨩ – ꨝꩊ ꨌꩌꨛꨩ – ꨔꨭꩆ ꩙꩘꩒ ꨕꨗꨫꩂ ꨁꩆꨕꨴꨚꨭꨣꨩ ꨈꨮꩌ ꨈꨵꨯꨱꩃ ꨈꨮꩌ ꨆꨎꩇ꩝ ꨎꨝꨶꨮꩊ ꨢꨶꨮꩆ ꨣꨤꨯꨩ ꨡꨮꩃ ꨙꨪꩀ ꨤꨪꨑꩆ ꨓꨈꨯꩀ ꨟꨪꩆ ꨅꩍ ꨨꨭꨩ꩞ ꨎꨝꨶꨮꩊ ꨌꩌ ꨟꩀ ꨡꨴꨮꩌ ꨚꨗꩍ꩝ ꨟꩀ ꨝꨓꨭꨥ ꨚꨴꨯꨱꩃ ꨚꨣꩍ ꨓꨴꨭꩆ꩝ ꨎꨝꨶꨮꩊ ꨢꨶꨮꩆ ꨟꨓꨰ ꨣꨤꨯꨩ꩞ ꨨꨭꨩ ꨧꨩ ꨨꨣꨬ ꨤꨊꨫꩀ ꨨꨕꩍ ꨠꩅ꩝ ꨆꨔꨬ ꨟꨰ ꨧꩃ ꨡꨯꩍ ꨧꨩ ꨆꨟꨬ ꨔꨰꩀ ꨕꨴꨮꩍ ꨈꨣꨯꨮ꩝ ꨐꨭꨩ ꨕꨯꨱꩀ ꨛꨯꨩꩀ ꨢꨣꨭꨩ꩝ ꨀꨗꩀ ꨤꨪꨆꨬ ꨆꨔꨬ꩞ ꨆꨟꨬ ꨤꨪꨐꨰꩈ ꨡꨯꨱꩀ꩝ ꨡꨯꩍ ꨆꨔꨬ ꨝꨵꨯꨱꩍ ꨆꨵꨯꨱ꩝ ꨆꨔꨬ ꨆꨵꨮꩆ ꨖꨮꩆ꩝ ꨒꨮꩇ ꨈꨣꨯꨮ ꨚꨎꨮꨩ? ꨨꨝꩉ ꨗꨫ? ꨌꨰꩀ ꨢꨣꨭꨩ ꨓꨴꨭꩆ꩝ ꨆꨟꨬ ꨙꨶꨮꩄ ꨟꨰ ꨆꨶꨮꩉ ꨆꨔꨬ ꨝꨳꩀ ꨆꨎꩇ꩞ ꨆꨟꨬ: ꨀꨕꨬ ꨨꨕꨮꩉ ꨦꨄꨰ ꨣꨤꨯꨩ! ꨆꨔꨬ: ꨗꨰ꩟ ꨗꨰ ꨘꩆ ꨈꨣꨯꨮ ꨒꨮꩇ ꨨꨤꨬ? ꨆꨟꨬ: ꨒꨮꩇ ꨚꨎꨮꨩ꩝ ꨀꨕꨬ ꨈꨣꨯꨮ ꨆꨯꨱꨥ꩞ ꨆꨔꨬ: ꨛꨯꨮ ꨤꨮꩈ꩝ ꨀꨕꨬ ꨕꨯꨱꩀ ꨨꨕꨳꨪꩇ ꨆꨯꨱꨥ! ꨈꨣꨯꨮ: ꨒꨮꩇ ꨚꨎꨮꨩ꩝ ꨕꨯꨱꩀ ꨨꨕꨳꨮꩇ ꨚꨪpppp ꨆꨯꨱꨥ! ꨀꨕꨬ ꨨꨕꨮꩉ ꨦꨄꨰ ꨧꨯꨱꩃ ꨀꨗꩀ ꨝꨳꩀ ꨣꨤꨯꨩ! ꨆꨔꨬ: ꨅꩍ ꨦꨗꩃ ꨤꩄ ꨨꨭꨩ ꨨꨣꨬ ꨕꨴꨬ ꨈꨯꨱꩀ ꨈꨮꩇ ꨥꨮꩀ ꨢꨮꨭ ꨗꨫ꩝ ꨦꨄꨰ ꨝꨳꩀ ꨀꨶꨮꩆ! ꨈꨣꨯꨮ: ꨀꨕꨬ ꨨꨭꨩ ꨚꨈꨶꨮꩆ ꨤꩄ ꨕꨶꩍ ꨦꨄꨰ ꨈꨴꨮꩇ ꨤꨪꨝꨪꩀ꩝ ꨦꨄꨰ ꨕꨫ ꨨꨕꨮꩉ ꨅꩍ?! ꨆꨔꨬ: ꨨꨭꨩ ꨨꨕꨮꩉ꩝ ꨈꨣꨯꨮ ꨣꨗꨮꩌ ꨤꨮꩈ! ꨈꨣꨯꨮ ꨀꨇꩆ: ꨧꨩ ꨚꨈꨯꨮꨩ ꨡꨯꩍ ꨎꨝꨶꨮꩊ ꨢꨶꨮꩆ ꨓꨟꨩ ꨚꨤꨬ ꨛꨯꨮ ꨝꨵꩍ꩝ ꨝꨶꨮꩊ ꨚꨤꨬ ꨅꨩ ꨨꨶꨮꩄ꩝ ꨚꨎꩊ ꨚꨟꨓꨰ ꨇꨯꨱꩊ ꨐꨭꨩ꩝ ꨟꨪꩆ ꨕꨯꨱꩀ ꨥꨮꩀ ꨕꨯꩌ ꨂꨣꩃ ꨙꨶꨮꩄ ꨆꨵꩍ ꨨꨭꨩ꩞ ꨓꨚꨩ ꨨꨣꨬ ꨐꨭꨩ ꨟꨰ ꨝꨳꩀ ꨣꨤꨯꨩ ꨥꨮꩀ ꨚꨳꨮꩍ ꨝꨪꨢꩉ ꨟꨝꨰ꩝ ꨐꨭꨩ ꨌꨭꩍ ꨀꨝꨪꩍ꩝ ꨚꨟꨓꨰ ꨈꨮꩌ ꨣꨗꨰꩍ ꨈꨮꩌ ꨟꨗꨶꨪꩋ ꨓꨨꨩ꩝ ꨅꩃ ꨇꩃ ꨤꨪꨎꩃ ꨟꨓꨰ ꨕꨫ ꨘꩆ꩞ ꨈꨣꨯꨮ ꨧꨯꨱꩃ ꨟꨗꨶꨪꩋ ꨝꨪꨆꩆ ꨙꨶꨮꩄ ꨆꨵꩍ ꨨꨭꨩ꩝ ꨕꨮꩇ ꨕꨤꩌ ꨌꨮꩀ ꨈꨵꨰ꩝ ꨚꨓꨯꨱꩌ ꨧꨯꨱꩃ ꨎꨝꨶꨮꩊ ꨝꨪꨆꩆ꩝ ꨨꨣꨬ ꨓꨚꨩ ꨨꨣꨬ ꨆꨴꩀ ꨀꨓꨯꨱꩃ ꨎꨝꨶꨮꩊ ꨢꨶꨮꩆ꩞ ꨝꨵꨯꨱꩍ ꨨꨣꨬ ꨨꨕꨬ ꨨꨟꨪꩅ ꨎꨝꨶꨮꩊ ꨢꨶꨮꩆ ꨕꨯꨱꩀ ꨚꨎꩊ ꨁꩆꨕꨴꨚꨭꨣꨩ꩝ ꨧꨯꨱꩃ ꨨꨕꨮꩉ ꨚꨧꩃ ꨀꨗꩀ ꨣꨤꨯꨩ꩞ ꨘꩆ ꨈꨣꨯꨮ ꨧꨯꨱꩃ ꨨꨕꨯꩌ ꨟꨗꨶꨪꩋ ꨝꨪꨆꩆ ꨗꨯꨱ ꨔꨶꨰ ꨎꨤꩆ ꨈꨙꨮꩇ ꨓꨟꨩ ꨁꩆꨕꨴꨚꨭꨣꨩ꩝ ꨈꨮꩌ ꨚꨳꨮꩍ ꨣꨥꨮꩃ ꨚꨧꩃ ꨀꨗꩀ꩝ ꨈꨮꩌ ꨚꨳꨮꩍ ꨠꨧꨭꩍ ꨇꨪꩀ ꨕꨗꨫꩂ ꨁꩆꨕꨴꨚꨭꨣꨩ꩞ ꨙꨯꩌ ꨓꨮꩊ ꨎꨝꨶꨮꩊ ꨢꨶꨮꩆ꩝ ꨣꨤꨯꨩ ꨡꨮꩃ ꨀꨓꨯꨱꩃ ꨟꩀ ꨕꨗꨫꩂ ꨅꩍ ꨨꨭꨩ꩝ ꨘꩆ ꨅꩍ ꨀꨓꨯꨱꩃ ꨥꨮꩀ꩝ ꨚꨮꩃ ꨎꨝꨶꨮꩊ ꨤꨪꨊꨪꨥ ꨕꨗꨫꩂ ꨌꩃ꩝ ꨦꨗꩃ ꨤꩄ ꨟꨢꩍ ꨎꨝꨶꨮꩊ ꨌꩌꨛꨩ ꨀꨝꨪꩍ ꨝꨴꩍ ꨡꨮꩃ꩝ ꨐꨭꨩ ꨓꨝꨳꩀ ꨕꨗꨫꩂ ꨟꨪꩆ꩞ ꨝꨵꨯꨱꩍ ꨤꨪꨎꩃ ꨓꨮꩊ ꨨꨣꨬ ꨘꩆ꩝ ꨈꨴꨭꩌ ꨆꨓꩊ ꨀꨓꨯꨱꩃ ꨕꨗꩈ ꨤꨊꨫꩀ ꨟꨪꩆ ꨅꨩ ꨨꨭꨩ ꨨꨎꩆ꩞ ꨚꨓꨯꨱ ꨌꩌꨛꨩ ꨖꩉ ꨓꨝꨳꩀ ꨀꨓꨯꨱꩃ꩝ ꨕꨨꨵꨮꨭ ꨗꨯꨱ ꨚꨶꨮꩄ ꨥꨮꩀ ꨧꨯꨱꩃ ꨝꨶꨮꩊ ꨞꩇ: “ꨗꨫ ꨗꨈꩉ ꨌꩌ ꨕꨴꨬ꩝ ꨣꨪꨝꨭꨥ ꨔꨭꩆ ꨚꨎꨮꨩ ꨤꨪꨎꩃ ꨢꨮꨭ ꨘꩆ꩝ ꨢꨶꨮꩆ ꨟꨰ ꨟꨝꨵꩍ ꨅꨩ ꨒꨮꩇ ꨀꨕꩅ ꨤꨊꨫꩀ꩞ ꨛꨯꨮ ꨢꩃ꩝ ꨟꨭꩀ ꨆꨬ ꨚꨎꨳꩀ ꨚꨎꨳꨮꩂ ꨆꨩ ꨌꩌꨛꨩ ꨕꨴꨬ꩝ ꨓꨗꩍ ꨌꨮꩀ ꨌꨬ ꨈꨗꨴꨮꩍ ꨚꨤꨰ ꨐꨭꨩ꩞ ꨗꨯꨱ ꨠꨧꨭꩍ ꨓꨶꨬ ꨆꨟꨪ꩝ ꨧꨯꨱꩃ ꨆꨟꨪ ꨝꩍ ꨇꨯꨱꩊ ꨐꨭꨩ ꨓꨝꨳꩀ ꨀꨝꨪꩍ ꨕꨫ ꨗꨈꩉ ꨗꨫ!”꩞ ꨚꨓꨯꨱ ꨙꨪꩀ ꨤꨪꨟꩆ ꨚꨴꨯꨱꩃ꩝ ꨣꨪꨓꨭꩍ ꨤꨪꨟꩆ ꨧꨯꨱꩃ ꨕꨶꨩ ꨓꨟꩆ ꨎꨝꨶꨮꩊ ꨌꩌꨛꨩ ꨗꨯꨱ ꨓꨚꩀ ꨆꨕꨰ ꨎꨝꨶꨮꩊ ꨢꨶꨮꩆ ꨚꨕꨴꩀ ꨀꨓꨯꨱꩃ꩞ ꨤꨪꨟꩆ ꨚꨴꨯꨱꩃ ꨈꨵꨯꨱꩃ ꨝꨪꨤ ꨀꨓꩍ ꨧꨯꨱꩃ ꨨꨤꨶꨮꩀ꩝ ꨅꩃ ꨤꨪꨟꩆ ꨣꨬ ꨤꨪꨎꩃ ꨨꨭꨩ ꨌꨭꩀ ꨀꨯꨱ ꨝꨧꨬ꩝ ꨡꨴꨮꩌ ꨚꨗꩍ ꨅꨩ ꨈꨵꨭꩅ꩞ ꨎꨝꨶꨮꩊ ꨢꨶꨮꩆ ꨝꨵꩀ ꨓꨝꨳꩀ ꨀꨓꨯꨱꩃ꩝ ꨝꨵꨯꨱꩍ ꨅꩃ ꨤꨪꨟꩆ ꨈꨗꨭꩍ ꨓꨚꨴꩍ ꨀꨝꨪꩍ꩞ ꨎꨝꨶꨮꩊ ꨌꩌ ꨠꨧꨭꩍ ꨆꨕꨴꩆ ꨕꨴꨬ꩝ ꨎꨝꨶꨮꩊ ꨢꨶꨮꩆ ꨅꨩ ꨀꨓꨯꨱꩃ ꨈꨤꩄ ꨘꩆ ꨙꨶꨮꩄ ꨓꨟꨩ ꨆꨕꨰ ꨇꨪꩀ꩞ ꨎꨝꨶꨮꩊ ꨌꩌ ꨅꨩ ꨇꨪꩆ ꨚꨈꨶꨬ ꨓꨟꨩ ꨆꨕꨰ ꨙꨩ ꨤꩄ ꨐꨭꨩ ꨕꨯꨱꩀ ꨆꨴꩀ ꨀꨓꨯꨱꩃ꩝ ꨘꩆ ꨤꨶꨰ ꨎꨝꨶꨮꩊ ꨈꨤꩄ ꨓꨟꨩ ꨕꨗꨫꩂ꩞ ꨣꨤꨯꨩ ꨡꨮꩃ ꨀꨓꨯꨱꩃ ꨓꨴꨩ꩝ ꨎꨝꨶꨮꩊ ꨌꩌꨛꨩ ꨠꨧꨭꩍ ꨡꨮꩃ ꨥꨮꩀ ꨀꨝꨪꩍ꩝ ꨢꨥꨩ ꨚꨴꨯꨱꩃ ꨎꨝꨶꨮꩊ ꨌꩌ ꨓꨈꨯꩀ ꨈꨵꨯꨱꩃ꩝ ꨓꨯꩀ ꨌꩃ ꨨꨣꨬ ꨀꨓꨯꨱꩃ ꨓꨟꨩ ꨟꩀ ꨆꨕꨰ ꨎꨝꨶꨮꩊ ꨢꨶꨮꩆ꩞ ꨨꨣꨬ ꨘꩆ ꨨꨭꨩ ꨙꨳꩀ꩝ ꨎꨝꨶꨮꩊ ꨌꩌꨛꨩ ꨢꨥꨩ ꨚꨴꨯꨱꩃ ꨈꨵꨯꨱꩃ ꨢꨮꨭ ꨤꨊꨫꩀ꩝ ꨧꨩ ꨡꨮꩃ ꨗꨫ ꨀꨓꨯꨱꩃ ꨓꨟꨩ ꨟꩀ ꨆꨕꨰ꩞ ꨓꨈꨯꩀ!!! ꨧꩇ ꨕꨗꩈ ꨤꨪꨟꩆ꩝ ꨧꩇ ꨆꨕꨰꩅ ꨨꨈꩉ ꨆꨤꨪꩆ꩝ ꨧꩇ ꨟꨗꨶꨪꩋ ꨙꨶꨮꩄ ꨓꨈꨯꩀ꩝ ꨓꨮꩊ ꨓꨮꩊ ꨎꨝꨶꨮꩊ ꨀꨯꨱ ꨡꨯꩂ ꨙꨶꨮꩄ ꨓꨟꨩ ꨆꨕꨰ ꨢꨶꨮꩆ꩝ ꨤꨪꨟꩆ ꨗꨯꨱ ꨕꨨꨵꨮꨭ꩝ ꨎꨝꨶꨮꩊ ꨙꨶꨮꩄ ꨨꨕꨬ꩞ ꨕꨫ ꨧꨯꨱꩍ꩝ ꨣꨪꨓꨭꩍ ꨤꨪꨟꩆ ꨓꨆꨓꨶꩀ ꨝꨵꨯꨱꩍ ꨈꨤꩄ ꨀꨆꨯꨱꩀ ꨎꨶꩀ ꨎꨝꨶꨮꩊ ꨌꩌ꩝ ꨚꨓꨯꨱ ꨤꨰꩀ ꨕꨫ ꨤꨪꨟꩆ ꨚꨤꨪꨆꨩ ꨓꨴꩀ꩞ ꨎꨝꨶꨮꩊ ꨢꨶꨮꩆ ꨝꨵꩀ ꨓꨈꨯꩀ ꨀꨓꨯꨱꩃ ꨓꩀ꩝ ꨓꩀ ꨚꨓꨯꨱ ꨟꨓꨰ꩞ ꨎꨝꨶꨮꩊ ꨌꩌ ꨀꨤꩍ꩝ ꨙꨶꨮꩄ ꨓꨟꨩ ꨕꨗꨫꩂ ꨟꨣꩅ ꨇꨪꩀ꩞ ꨣꨤꨯꨩ ꨡꨮꩃ ꨀꨓꨯꨱꩃ ꨟꩀ ꨕꨗꨫꩂ ꨅꨩ ꨨꨭꨩ꩝ ꨤꨯꨮꨩ ꨨꩃ ꨓꨣꨭꩂ ꨓꨆꨴꨮꩃ ꨢꨮꨭ ꨆꨝꨶꩀ꩝ ꨨꨶꨮꩄ ꨙꨩ ꨎꨝꨶꨮꩊ ꨌꩌ ꨀꨓꨯꨱꩃ ꨓꨟꨩ ꨆꨕꨰ ꨢꨮꨩ ꨀꨓꨯꨱꩃ ꨅꩍ ꨈꨤꩄ꩞ ꨨꨭꨩ ꨟꨗꨶꨪꩋ ꨨꨕꩌ ꨆꨖꨩ ꨤꩄ ꨎꨝꨶꨮꩊ ꨌꩌ ꨇꨮꩃ ꨆꨢꨶꨩ ꨤꨪꨟꩆ꩝ ꨟꨪꩆ ꨤꨪꨟꩆ ꨨꨶꨮꩄ ꨕꨫ ꨓꨆꨭꩍ꩞ ꨘꩆ ꨤꨯꨮꨩ ꨨꩃ ꨚꨙꩉ ꨎꨝꨶꨮꩊ ꨗꨯꨱ ꨕꨶꩍ ꨟꩀ ꨓꨆꨭꩍ ꨟꨰ ꨆꨩ ꨣꨤꨯꨩ꩝ ꨓꨭꩀ ꨎꨝꨶꨮꩊ ꨌꩌ ꨙꨶꨮꩄ ꨓꨟꨩ ꨆꨕꨰ꩝ ꨅꩃ ꨝꨴꨬ ꨈꨯꨱꩆ ꨚꨤꨯꨱ ꨓꨆꨭꩍ ꨓꨝꨳꩀ꩝ ꨝꨵꨯꨱꩍ ꨤꨪꨟꩆ ꨡꨯꩍ ꨓꨆꨭꩍ ꨘꩆ ꨓꨆꨓꨶꩀ ꨈꨤꩄ ꨀꨆꨯꨱꩀ ꨎꨶꩀ ꨎꨝꨶꨮꩊ ꨌꩌꨛꨩ ꨥꨮꩀ꩞ ꨎꨝꨶꨮꩊ ꨢꨶꨮꩆ ꨨꨭꨩ ꨝꨑꨶꨮꩉ ꨙꨶꨮꩄ ꨓꨈꨯꩀ ꨓꩀ ꨀꨓꨯꨱꩃ꩞ ꨀꨤꩍ ꨧꨩ ꨡꨮꩃ ꨗꨫ ꨓꨴꨩ꩝ ꨎꨝꨶꨮꩊ ꨌꩌ ꨅꨩ ꨕꨯꨱꩀ ꨚꨴꨲꩆ꩝ ꨨꨣꨬ ꨎꨝꨶꨮꩊ ꨢꨶꨮꩆ ꨟꩀ ꨨꨭꨩ ꨕꨗꨫꩂ ꨧꨪ ꨓꨮꩊ ꨚꨎꨮꨩ꩞ ꨣꨎꨀꨰꩋ ꨧꨯꨱꩃ ꨝꨶꨮꩊ ꨤꨶꨰ ꨗꨯꨱ ꨔꨶꨰ ꨎꨤꩆ ꨈꨙꨮꩇ꩝ ꨗꨯꨱ ꨚꩀ ꨗꨈꩉ ꨥꨪꨎꨢꨩ ꨚꨳꨮꩍ ꨣꨕꩀ ꨀꨓꨯꨱꩃ ꨥꨮꩀ꩝ ꨈꨣꨯꨮ ꨧꨯꨱꩃ ꨢꨣꨭꨩ ꨤꨪꨎꩃ ꨗꨯꨱ ꨓꨶꨬ ꨟꨪꩆ ꨆꨔꨬ ꨅꩍ ꨗꨯꨱ꩞ ꨈꨣꨯꨮ ꨨꨳꨩ: ꨦꨄꨰ ꨗꨯꨱ ꨓꨶꨬ ꨀꨕꨬ ꨟꨰꩀ꩝ ꨗꨯꨱ ꨓꨶꨬ ꨀꨕꨬ ꨟꨰꩀ! ꨆꨔꨬ: ꨦꨄꨰ ꨘꩆ ꨞꩃ꩝ ꨅꨩ ꨗꨯꨱ ꨨꨭꨩ ꨈꨣꨯꨮ ꨨꨳꨩ ꨌꨯꨱꩀ: ꨗꨯꨱ ꨓꨶꨬ ꨀꨕꨬ ꨟꨰꩀ! ꨆꨔꨬ: ꨈꨣꨯꨮ ꨤꨮꩈ! ꨚꨤꨬ ꨗꨫ ꨚꨤꨬ ꨦꨄꨰ ꨟꨗꩀ꩝ ꨦꨄꨰ ꨨꨝꩉ ꨕꨯꨱꩀ ꨇꨪꩀ꩞ ꨈꨣꨯꨮ ꨤꨮꩈ! ꨨꨕꨬ ꨨꨣꨬ ꨙꨯꩌ ꨧꨯꨱꩃ ꨀꨗꩀ ꨤꩄ ꨀꨟꨩ ꨐꨭꨩ ꨘꩆ ꨝꨪꨎꩀ ꨍꨰꨘꨩ! ꨙꨯꩌ ꨝꨵꨯꨱꩍ ꨚꨵꨮꩀ ꨤꨪꨆꨭꩀ ꨗꨯꨱ꩞ ꨈꨣꨯꨮ ꨨꨳꨩ ꨟꨯꨱꩃ ꨓꨶꨬ꩝ ꨈꨣꨯꨮ ꨓꨆꨪꩀ ꨨꨳꨩ ꨟꨪꩆ ꨧꨩ ꨡꨮꩃ ꨗꨫ ꨨꨳꨩ ꨝꨳꩀ ꨝꨪꨊꨪ꩞ ꨆꨔꨬ ꨝꨪꨣꨭꨥ ꨚꨵꨮꩀ ꨡꨯꨱꩀ꩝ ꨝꨵꨯꨱꩍ ꨤꨪꨎꩃ ꨓꨒꨯꨱꩍ ꨀꨳꨩ ꨟꨓꨩ꩝ ꨐꨭꨩ ꨔꨮꨭ ꨤꩄ ꨅꨩ ꨕꨯꨱꩀ ꨥꨮꩀ ꨧꨩ ꨡꨮꩃ ꨓꨴꨩ ꨡꨯꩍ ꨨꨕꨳꨮꩇ ꨀꨗꩀ꩞ ꨀꨟꨰꩀ ꨀꨟꨩ ꨆꨔꨬ ꨓꨴꨩ꩝ ꨤꨪꨎꩃ ꨅꨩ ꨌꨳꨪꩇ ꨗꨯꨱ ꨆꨢꨶꨩ ꨓꨨꨩ ꨚꨎꨮꨩ꩞ ꨨꨣꨬ ꨘꩆ ꨨꨎꩆ ꨝꨳꩀ ꨚꨴꨯꨱꩃ꩝ ꨎꨝꨶꨮꩊ ꨢꨶꨮꩆ ꨀꨓꨯꨱꩃ ꨟꩀ ꨕꨗꨫꩂ ꨁꩆꨕꨴꨚꨭꨣꨩ꩝ ꨇꨯꨱꩊ ꨐꨭꨩ ꨟꩀ ꨈꨮꩃ ꨆꨢꨮꨭ ꨚꨴꨯꨱꩃ ꨈꨗꨭꩍ ꨢꩍ ꨝꨡꨮꩃ ꨕꨗꨫꩂ꩞ ꨆꨔꨬ ꨧꨯꨱꩃ ꨣꨪꨝꨭꨥ ꨎꨝꨶꨮꩊ ꨓꨴꨩ ꨕꨯꨱꩀ ꨌꩃ ꨤꨪꨆꨭꩀ ꨝꨡꨮꩃ꩞ ꨈꨣꨮꩌ꩟ ꨈꨣꨮꩌ꩟ ꨈꨣꨮꩌ꩟ ꨧꩇ ꨆꨢꨮꨭ ꨈꨗꨭꩍ ꨝꨡꨮꩃ ꨟꨕꨩ ꨀꨓꨯꨱꩃ ꨟꨕꨩ ꨕꨗꩈ ꨥꨮꩀ꩝ ꨝꨡꨮꩃ ꨎꩃ ꨧꨪ ꨎꨤꨮꩍ꩝ ꨨꨎꩆ ꨟꨕꨩ ꨤꨰꩀ ꨟꨕꨩ ꨓꨴꩀ ꨥꨮꩀ꩝ ꨈꨴꨭꩌ ꨆꨓꩊ ꨕꨗꩈ ꨤꨊꨫꩀ꩝ ꨓꨈꨗꨭꩌ ꨎꨭꩀ ꨚꨌꨮꩃ ꨀꨝꨪꩍ ꨟꨯꨱꩃ ꨢꨮꨭ ꨟꨤꩌ꩝ ꨈꨣꨮꩌ꩟ ꨝꨡꨮꩃ ꨎꨤꨮꩍ꩝ ꨎꨝꨶꨮꩊ ꨢꨶꨮꩆ ꨙꨶꨮꩄ ꨓꨟꨩ꩝ ꨎꨝꨶꨮꩊ ꨌꩌ ꨤꨪꨎꩃ ꨝꨵꩀ ꨓꨈꨯꩀ ꨝꨡꨮꩃ ꨟꨧꨭꩍ꩝ ꨙꨥ ꨌꨣꨪꩅ ꨕꨶꨩ ꨈꩍ ꨓꩀ ꨈꨮꩇ꩝ ꨝꨮꩉ ꨡꨯꩂ ꨟꨤꨭꩀ ꨝꨮꩉ ꨞꨯꩂ꩝ ꨕꨣꩍ ꨟꨤꨭꩀ ꨨꨎꩆ꩞ ꨎꨝꨶꨮꩊ ꨌꩌ ꨟꨧꨭꩍ ꨅꨩ ꨨꨶꨮꩄ ꨟꨓꨰ꩝ ꨎꨝꨶꨮꩊ ꨢꨶꨮꩆ ꨅꨩ ꨓꨚꨩ ꨓꨴꨭꩍ ꨘꩆ ꨤꨶꨰ ꨈꨤꩄ꩞ ꨧꨩ ꨝꨪꨣꨯꩀ ꨟꨪꩆ꩝ ꨐꨭꨩ ꨓꨳꩇ ꨤꨪꨟꩆ ꨙꨶꨮꩄ ꨓꨟꨩ ꨝꨡꨮꩃ꩝ ꨤꨪꨟꩆ ꨎꨶꩀ꩝ ꨎꨝꨶꨮꩊ ꨌꩌ ꨌꨤꩍ ꨣꨯꨱꩃ꩝ ꨎꨝꨶꨮꩊ ꨢꨶꨮꩆ ꨙꨶꨮꩄ ꨓꨈꨯꩀ ꨀꨓꨯꨱꩃ ꨓꩀ꩝ ꨓꩀ ꨒꨮꩇ ꨆꨔꨬ꩞ ꨐꨭꨩ ꨎꨤꨮꩍ ꨓꨟꨩ ꨀꨳꨩ ꨈꨵꨭꩍ꩝ ꨅꨩ ꨡꨯꩍ ꨚꨙꨪꩀ꩝ ꨟꨪꩆ ꨡꨯꩍ ꨧꨪ ꨗꨯꨱ ꨓꨮꩊ ꨤꨪꨝꨪꩀ ꨦꨭꩀ ꨧꨳꩌ꩝ ꨟꨓꨩ ꨆꨔꨬ ꨚꨪꩀ ꨈꨤꩄ꩞ ꨟꩀ ꨨꨭꨩ ꨁꩆꨕꨴꨚꨭꨣꨩ꩝ ꨎꨝꨶꨮꩊ ꨢꨶꨮꩆ ꨌꨭꩍ ꨀꨝꨪꩍ ꨧꩃ꩝ ꨟꨝꨵꩍ ꨀꨝꨪꩍ ꨆꨢꨩ꩝ ꨢꩍ ꨕꨗꨫꩂ꩝ ꨎꨰꩆ ꨆꨭꩅ꩝ ꨨꩀ ꨧꨆꨣꩈ꩞ ꨁꨇꩆ ꨁꩆꨕꨴꨚꨭꨣꨩ ꨤꨨꨪꩀ ꨟꨰ ꨓꨮꩊ ꨈꨣꨯꨮ꩞ ꨗꨰ ꨅꨩ ꨙꨯꩌ ꨈꨰꩅ꩝ ꨤꨪꨎꩃ ꨅꨩ ꨨꨳꨩ꩝ ꨟꨪꩆ ꨆꨶꨮꩉ ꨢꨣꨭꨩ ꨚꨶꨮꩄ ꨈꨰꩅ ꨅꨩ ꨕꩉ ꨓꨟꨩ ꨓꨊꨪ꩞ ꨈꩍ ꨟꨣꨯꨱꩃ ꨌꩌꨛꨩ꩝ ꨆꨵꨮꨭ ꨗꨈꩉ ꨥꨪꨎꨢꨩ꩝ ꨆꨮꨭꨔꨣꨩ ꨧꨯꨱꩃ ꨚꩆꨕꨭꨣꩃꨈꨩ ꨚꨓꨯꨱꩌ ꨥꨮꩀ ꨚꨳꨮꩍ ꨣꨕꩀ ꨀꨓꨯꨱꩃ ꨈꨤꩄ ꨎꨝꨶꨮꩊ ꨢꨶꨮꩆ꩞ ꨚꨓꨯꨱꩌ ꨨꨭꨩ ꨧꨩ ꨚꨵꨭꩍ ꨓꨟꩆ ꨎꨝꨶꨮꩊ꩝ ꨣꨟꨪꩀ ꨓꨝꨳꩀ ꨈꩍ ꨝꨪꨣꩀ ꨚꨳꨮꩍ ꨟꩀ ꨈꨤꩄ ꨝꩊ ꨁꩆꨕꨴꨚꨭꨣꨩ꩞