ꨓꩀ ꨕꨫ ꨆꩊ ꨘꩆ ꨝꩆ ꨘꩆ ꨀꨤꩍ ꨟꩃ ꨓꨝꨳꩀ ꨕꨫ ꨕꨤꩌ ꨓꨳꩆ ꨀꨟꨰꩀ ꨐꨭꨩ ꨟꨰ ꨎꨮꨩ ꩝ ꨀꨤꩍ ꨚꩀ ꨚꨵꨭꩍ ꨓꨮꩊ ꩝ ꨀꨤꩍ ꨈꨴꨪꩀ ꨕꨫ ꨣꨭꩇ ꨕꨫ ꨀꨔꩍ ꨅꨩ ꨧꨩ ꨔꨭꩆ ꨟꩃ ꨐꨭꨩ ꨗꨯꨱ ꨟꨗꨬ ꨧꨩ ꨡꨮꩃ ꩞ ꨀꨤꩍ ꨕꨫ ꨕꨭꩆꨢꨩ ꨀꨤꨩ ꨤꨊꨪꩀ ꨗꨫ ꨕꨫ ꨨꨭꨩ ꨔꨬ ꨓꨮꩊ ꨅꨩ ꩝ ꨝꨵꨯꨱꩍ ꨨꨝꩉ ꨀꨮꨩ ꨕꨫ ꨨꨣꨬ ꨘꩆ ꨚꨍꨮꩍ ꨕꨫ ꨓꨳꩆ ꨐꨭꨩ ꨝꨵꨯꨱꩍ ꨐꨭꨩ ꨟꩀ ꨀꨟꨴꨩ ꨆꨴꨪꩍ ꨈꨗꨭꩀ ꨥꩍ ꨐꨭꨩ ꨗꨯꨱ ꨝꨵꨬ ꨎꨣꨭꩌ ꨟꨣꨰ ꨡꨮꩀ ꨥꩍ ꨝꨵꨯꨱꩍ ꨐꨭꨩ ꨗꨯꨱ ꨥꩍ ꨁꨆꩆ ꨗꨯꨱ ꨓꨮꩊ ꨀꨳꨩ ꨆꨴꨯꨱꩃ ꨝꨵꨯꨱꩍ ꨐꨭꨩ ꨥꩍ ꩝ ꨐꨭꨩ ꨝꨣꨭꨥ ꨆꨳꨮꩃ ꨆꨵꩀ ꨥꩍ ꨓꨟꨩ ꨀꨳꨩ ꩝ ꨝꨵꨯꨱꩍ ꨀꨆꩆ ꨆꨵꨶꨩ ꨟꨣꨰ ꨌꨡꨯꨱꩍ ꨥꩍ ꨐꨭꨩ ꨝꨵꨯꨱꩍ ꨐꨭꨩ ꨨꨙꨯꨱꩍ ꨥꩍ ꨘꩆ ꨓꨈꨯꩀ ꨨꨭꨩ ꨧꨩ ꨝꨯꨱꩍ ꨀꨆꩆ ꨆꨵꨶꨩ ꨝꨵꨯꨱꩍ ꨐꨭꨩ ꨎꨯꨱꩍ ꨨꨗꨴꨪꩂ ꨝꨵꨯꨱꩍ ꨐꨭꨩ ꨔꨴꨪꩂ ꨀꨆꩆ ꨘꩆ ꨝꨵꨯꨱꩍ ꨐꨭꨩ ꨌꨰꩀ ꨟꩃ ꨤꨪꨆꨭꩀ ꨐꨭꨩ ꩝ ꨝꨵꨯꨱꩍ ꨐꨭꨩ ꨆꨵꩀ ꨥꩍ ꨓꨟꨩ ꨕꨤꩌ ꨀꨳꨩ ꨥꨮꩀ ꨧꨩ ꨡꨮꩃ ꨓꨴꨩ ꨝꨵꨯꨱꩍ ꨐꨭꨩ ꨕꨯꨱꩀ ꨥꩍ ꩝ ꨝꨣꨭꨥ ꨟꩃ ꨀꩀ ꨘꩆ ꨕꨯꨱꩀ ꨚꩀ ꨨꨤꨬ ꨕꨫ ꨔꨮꨭ ꨅꨩ ꨚꨮꩉ ꨟꨣꨰ ꨌꨈꨯꨱꩃ ꨀꨆꩆ ꨐꨭꨩ ꨝꨵꨯꨱꩍ ꨐꨭꨩ ꨆꨳꨮꩃ ꨁꨘꨩ ꨀꩀ ꨘꩆ ꩝ ꨝꨣꨭꨥ ꨟꩃ ꨐꨭꨩ ꨥꩍ ꨥꨮꩍ ꨧꨩ ꨡꨮꩃ ꨓꨴꨩ ꨨꨭꨩ ꨥꨮꩀ ꨧꨩ ꨝꨯꨱꩍ ꨓꨴꨩ ꨤꨪꨎꩃ ꨀꨆꩆ ꨆꨵꨶꨩ ꨣꨬ ꨝꨵꨯꨱꩍ ꨐꨭꨩ ꨎꨯꨱꩍ ꨨꨗꨴꨪꩂ ꨔꨴꨪꩂ ꨀꨆꩆ ꨘꩆ ꨝꨵꨯꨱꩍ ꨐꨭꨩ ꨌꨰꩀ ꨟꩃ ꨀꨘꩀ ꨐꨭꨩ ꩝ ꨝꨵꨯꨱꩍ ꨐꨭꨩ ꨆꨵꩀ ꨥꩍ ꨓꨟꨩ ꨀꨳꨩ ꨝꨵꨯꨱꩍ ꨐꨭꨩ ꨥꩍ ꨥꨮꩀ ꨧꨩ ꨓꨴꨩ ꩝ ꨝꨣꨭꨥ ꨟꩃ ꨀꩀ ꨘꩆ ꨚꨮꩉ ꨟꨣꨰ ꨆꨳꨮꩃ ꨌꨈꨯꨱꩃ ꨥꨮꩀ ꨧꨩ ꨡꨮꩃ ꨓꨴꨩ ꩝ ꨝꨵꨯꨱꩍ ꨐꨭꨩ ꨈꨗꨯꨱꩃ ꨕꨫ ꨀꩀ ꨘꩆ ꨝꨵꨯꨱꩍ ꨐꨭꨩ ꨚꨈꨶꨰ ꨚꨣꩍ ꨀꩀ ꨘꩆ ꩝ ꨝꨣꨭꨥ ꨟꩃ ꨐꨭꨩ ꨚꨈꨶꨰ ꨀꩀ ꨘꩆ ꨗꨯꨱ ꨀꨓꩍ ꨕꨫ ꨓꨚꨳꨮꩆ ꨆꨴꨭꩃ ꨐꨭꨩ ꨥꩍ ꨀꨆꩆ ꨘꩆ ꩝ ꨝꨣꨭꨥ ꨟꩃ ꨀꩀ ꨘꩆ ꨚꨮꩉ ꨥꨮꩀ ꨟꨰ ꨓꨚꩀ ꨆꨴꨭꩃ ꨓꨚꨳꨮꩆ ꨐꨭꨩ ꨥꩍ ꨀꨆꩆ ꨝꨵꨯꨱꩍ ꨀꩀ ꨘꩆ ꨌꨈꨯꨱꩃ ꨀꨆꩆ ꨆꨴꨭꩃ ꨐꨭꨩ ꨌꨰꩀ ꨌꨟꨯꨱꩍ ꨓꨚꨳꨮꩆ ꨝꨵꨯꨱꩍ ꨐꨭꨩ ꨕꨯꨱꩀ ꨥꩍ ꨘꩆ ꩝ ꨝꨣꨭꨥ ꨟꩃ ꨐꨭꨩ ꨈꨗꨯꨱꩃ ꨕꨫ ꨀꩀ ꨘꩆ ꨝꨵꨯꨱꩍ ꨐꨭꨩ ꨥꩍ ꨥꨮꩀ ꨨꨭꨩ ꨧꨩ ꨝꨯꨱꩍ ꨓꨴꨩ ꨝꨵꨯꨱꩍ ꨐꨭꨩ ꨈꩀ ꨚꨝꩍ ꨀꨆꩆ ꨘꩆ ꨝꨵꨯꨱꩍ ꨐꨭꨩ ꨟꨰꩀ ꨕꨫ ꨕꨤꩌ ꨚꨝꩍ ꨀꨆꩆ ꨘꩆ ꩝ ꨝꨵꨯꨱꩍ ꨐꨭꨩ ꨌꨰꩀ ꨚꩀ ꨘꩆ ꨆꨩ ꨀꩀ ꨘꩆ ꨟꨣꨰ ꨌꨈꨯꨱꩃ ꨡꨮꩃ ꨥꨮꩀ ꩝ ꨝꨣꨭꨥ ꨟꩃ ꨀꩀ ꨘꩆ ꨚꨮꩉ ꨟꨣꨰ ꨌꨈꨯꨱꩃ ꨀꨆꩆ ꨘꩆ ꩝ ꨝꨵꨯꨱꩍ ꨐꨭꨩ ꨆꨳꨮꩃ ꨁꨘꨩ ꩝ ꨤꩄ ꨆꨩ ꨐꨯꨱꩍ ꨕꨫ ꨀꨓꨪꩂ ꨀꨟꨰꩀ ꨨꨲꨩ ꨀꩀ ꨎꩀ ꨤꨯꨩ ꨕꨫ ꨌꨈꨯꨱꩃ ꨀꨆꩆ ꨆꨮꨭ ꩝ ꨀꨣꩀ ꨗꨫ ꨨꨲꨩ ꨌꨈꨯꨱꩃ ꨀꨳꨩ ꨟꨰꩀ ꨆꨮꨭ ꨗꨯꨱ ꨚꨔꨰꩈ ꨊꨯꨱꩀ ꨀꨆꨯꨱꩀ ꨨꨲꨩ ꨣꨬ ꩝ ꨨꨕꨯꩌ ꨨꨲꨩ ꨆꨳꨮꩃ ꨎꩀ ꨓꨚꨩ ꨕꨫ ꨆꨮꨭ ꩝ ꨐꨭꨩ ꨆꨳꨮꩃ ꨁꨘꨩ ꨀꩀ ꨘꩆ ꨝꨵꨯꨱꩍ ꨐꨭꨩ ꨕꨯꨱꩀ ꨥꩍ ꨐꨭꨩ ꨎꨮꨩ ꩝ ꨝꨣꨭꨥ ꨟꩃ ꨀꩀ ꨘꩆ ꨌꨈꨯꨱꩃ ꨀꨆꩆ ꨘꩆ ꨚꨮꩉ ꨗꨯꨱ ꨌꨟꨯꨱꩍ ꨓꨚꨳꨮꩆ ꨀꨳꨩ ꨀꨗꩀ ꨚꨓꨯꨱ ꨣꨪꨌꨯꨱꨥ ꨝꨵꨯꨱꩍ ꨓꨝꨵꨰꩅ ꨌꨡꨶꨮꩄ ꨀꩀ ꨘꩆ ꨝꨵꨯꨱꩍ ꨤꨰꩀ ꨀꨆꩆ ꨘꩆ ꨕꨫ ꨓꨚꨳꨮꩆ ꨀꨳꨩ ꨘꩆ ꩝ ꨝꨵꨯꨱꩍ ꨀꩀ ꨘꩆ ꨕꨶꩍ ꨥꨮꩀ ꨕꨫ ꨡꨯꩍ ꨓꨴꨩ ꨅꨩ ꩝ ꨝꨣꨭꨥ ꨟꩃ ꨀꩀ ꨘꩆ ꨚꨮꩉ ꨗꨯꨱ ꨐꨭꨩ ꨎꨮꨩ ꩝ ꨝꨵꨯꨱꩍ ꨆꨵꨮꨭ ꨂꨣꩃ ꨀꨗꩀ ꨚꨓꨯꨱ ꨗꨯꨱ ꨟꨁꨪꩆ ꨝꨵꨯꨱꩍ ꨓꨴꨭꩆ ꨣꨪꨌꨯꨱꨥ ꨕꨫ ꨓꨚꨳꨮꩆ ꨘꩆ ꩝ ꨗꨰ ꨆꨌꨶꨩ ꨗꨯꨱ ꨕꨨꨵꨮꨭ ꨗꨰ ꨓꨲꩍ ꨓꨞꨩ ꨗꨯꨱ ꨆꨴꨲꩍ ꨗꨰ ꨓꨤꨶꨪꩄ ꨗꨯꨱ ꨨꨕꨬ ꨝꨣꨭꨥ ꨟꩃ ꨗꨰ ꨓꨤꨶꨪꩄ ꨕꨶꨯꩆ ꨀꨆꩆ ꨆꨴꨭꩃ ꨀꩀ ꨌꨈꨯꨱꩃ ꨝꨵꨯꨱꩍ ꨤꨰꩀ ꨘꩆ ꩝ ꨝꨵꨯꨱꩍ ꨗꨰ ꨓꨤꨶꨪꩄ ꨝꨩ ꨗꨯꨱ ꨧꩃ ꨝꨵꨯꨱꩍ ꨗꨰ ꨓꨤꨶꨪꩄ ꨀꩌ ꨡꨮꩃ ꩝ ꨝꨣꨭꨥ ꨟꩃ ꨗꨰ ꨓꨤꨶꨪꩄ ꨡꨮꩃ ꨀꨆꩆ ꨘꩆ ꨝꨵꨯꨱꩍ ꨗꨰ ꨓꨤꨶꨪꩄ ꨟꨓꨳꩆ ꩝ ꨝꨣꨭꨥ ꨟꩃ ꨚꨓꨯꨱ ꨧꨘꩃ ꨕꨤꩌ ꨨꨓꨰ ꨤꩄ ꨗꨰ ꨓꨤꨶꨪꩄ ꨘꩆ ꨟꩃ ꨀꨗꨰꩍ ꨙꨮꨩ ꨗꨫ ꨚꨓꨯꨱ ꨕꨫ ꨨꨭꨩ ꨝꨴꨬ ꨗꨯꨱ ꨨꨓꨯꨱ ꨅꨩ ꨝꨵꨯꨱꩍ ꨨꨝꩉ ꨆꩄ ꨀꨣꩀ ꨗꨫ ꨝꨵꨯꨱꩍ ꨟꨓꨳꩆ ꩝ ꨝꨣꨭꨥ ꨟꩃ ꨚꨓꨯꨱ ꨧꨘꩃ ꨗꨯꨱ ꨟꨰ ꨝꨵꨯꨱꩍ ꨚꨓꨯꨱ ꨚꨙꨶꨮꩄ ꨨꨣꩀ ꨗꨯꨱ ꨕꨫ ꨈꨴꨮꩇ ꨗꨈꩉ ꨚꨈꨶꨮꩆ ꨓꨮꩊ ꨕꨫ ꨨꨣꨬ ꨘꩆ ꨕꨫ ꨈꨴꨮꩇ ꨗꨈꩉ ꨕꨯꩌ ꨂꨣꩃ ꨤꨆꨬ ꨀꨦꨪꩅ ꨚꨴꨯꨱꩃ ꨕꩌ ꨕꨣꨩ ꨂꨣꩃ ꨨꨭꨩ ꨨꨕꨳꩇ ꨋꩆ ꨂꨣꩃ ꨕꨯꨱꩀ ꨔꨯꨱꩍ ꩝ ꨓꨮꩊ ꨕꨫ ꨨꨣꨬ ꨘꩆ ꨟꨰ ꨚꨀꨝꨪꩍ ꨚꩀ ꨧꩃ ꨚꨓꨯꨱ ꩝ ꨝꨵꨯꨱꩍ ꨚꨓꨯꨱ ꨚꨙꩉ ꨗꨰ ꨓꨤꨶꨪꩄ ꨌꨪꩍ ꨨꨤꨩ ꨧꨩ ꨓꨐꨴꩀ ꨝꨵꨯꨱꩍ ꨚꨓꨯꨱ ꨋꩇ ꨀꨕꩅ ꨕꨫ ꨓꨐꨴꩀ ꨨꨤꨩ ꨘꩆ ꩝ ꨝꨵꨯꨱꩍ ꨚꨓꨯꨱ ꨃꨥ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨟꨰ ꨘꩆ ꩝ ꨓꨟꨩ ꨟꨣꨰ ꨚꩀ ꨟꨖꨪꩉ ꨚꨓꨯꨱ ꩝ ꨝꨵꨯꨱꩍ ꨚꨓꨯꨱ ꨝꨴꨬ ꨓꨐꨴꩀ ꨨꨤꨩ ꨘꩆ ꨆꨩ ꨗꨰ ꨓꨤꨶꨪꩄ ꩝ ꨝꨵꨯꨱꩍ ꨚꨙꩉ ꨕꨯꩌ ꨝꨯꨱꩊ ꨟꩀ ꨌꨳꨮꨥ ꩝ ꨤꩃ ꨆꨩ ꨕꨯꩌ ꨂꨣꩃ ꨟꨰ ꨘꩆ ꨕꨯꨱꩀ ꩝ ꨝꨵꨯꨱꩍ ꨚꨓꨯꨱ ꨚꨙꩉ ꨕꨯꩌ ꨂꨣꩃ ꨟꨰ ꨘꩆ ꨕꨯꨱꩀ ꨀꨤꨩ ꨚꨣꨓꩃ ꨕꨫ ꨈꨮꩇ ꨣꩍ ꨗꨯꨱ ꩝ ꨝꨵꨯꨱꩍ ꨚꨓꨯꨱ ꨚꨙꩉ ꨗꨰ ꨓꨤꨶꨪꩄ ꨚꨣꩍ ꨓꨐꨴꩀ ꨨꨤꨩ ꨆꨴꨭꩃ ꨗꨰ ꨓꨤꨶꨪꩄ ꨌꨪꩍ ꨘꩆ ꨓꨚꩀ ꨆꨴꨲꩍ ꨕꨚꨶꨮꩊ ꨘꩆ ꩞ ꨝꨣꨭꨥ ꨟꩃ ꨓꨐꨴꩀ ꨨꨤꨩ ꨘꩆ ꨚꨮꩉ ꨗꨯꨱ ꨧꨶꨰꩆ ꨕꨫ ꨂꨣꩃ ꨘꩆ ꨀꨝꨪꩍ ꩝ ꨝꨣꨭꨥ ꨟꩃ ꨚꨓꨯꨱ ꨤꩄ ꨓꨐꨴꩀ ꨨꨤꨩ ꨘꩆ ꨚꨮꩉ ꨗꨯꨱ ꨤꨰꩀ ꨓꨚꩀ ꨀꨘꩀ ꨂꨣꩃ ꨨꨤꨬ ꨝꨵꨯꨱꩍ ꨓꨐꨴꩀ ꨨꨤꨩ ꨓꨟꨩ ꨕꨤꩌ ꨝꨯꨱꩍ ꨝꨤꨯꨱꩅ ꨂꨣꩃ ꨨꨤꨬ ꨘꩆ ꨂꨣꩃ ꨘꩆ ꨚꨦꩃ ꨗꨰ ꨓꨤꨶꨪꩄ ꨎꨮꨩ ꩝ ꨝꨣꨭꨥ ꨟꩃ ꨚꨓꨯꨱ ꨓꨊꨫ ꨤꩄ ꨕꨫ ꨈꨴꨮꩇ ꨗꨈꩉ ꨟꨰ ꨀꨝꨪꩍ ꨓꩀ ꨗꨫ ꨎꨮꨩ ꨨꨰ ꨤꩄ ꨕꨯꨱꩀ ꨟꨪꩆ ꩝ ꨝꨣꨭꨥ ꨟꩃ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨟꨰ ꨘꩆ ꨤꩄ ꨆꨘꨩ ꨖꨭꩊ ꨚꨤꩀ ꨓꨆꨰ ꨟꩍ ꨈꨗꨴꨮꩍ ꨚꨓꨴꨰ ꨟꨰ ꨀꨝꨪꩍ ꨓꩀ ꨗꨫ ꨎꨮꨩ ꨛꨯꨮ ꩝ ꨕꨤꩌ ꨤꨝꨰꩍ ꨥꨮꩀ ꨕꨫ ꨨꨭꨩ ꨟꨰ ꨅꨩ ꨘꩆ ꨧꨩ ꨕꨴꨬ ꨓꨝꨯꨱꩃ ꨀꨤꩍ ꨟꨪꩆ ꩝ ꨝꨵꨯꨱꩍ ꨚꨓꨯꨱ ꨓꨊꨫ ꨤꩄ ꨨꨝꩉ ꨝꨵꨯꨱꩍ ꨐꨭꨩ ꨅꨩ ꨟꨰ ꨅꨩ ꩝ ꨘꩆ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨟꨰ ꨘꩆ ꨙꨯꩌ ꨥꨮꩀ ꨤꩄ ꨝꩆ ꨘꩆ ꨀꨤꩍ ꨤꨯꨩ ꨕꨫ ꨕꨭꩆꨢꨩ ꨗꨫ ꨕꨫ ꨨꨭꨩ ꨧꨬ ꨝꨵꨯꨱꩍ ꨢꨮꨭ ꨐꨭꨩ ꨅꨩ ꨀꨤꩍ ꨈꨴꨪꩀ ꨚꩊ ꨕꨫ ꨣꨭꩇ ꨐꨭꨩ ꨚꩀ ꨚꨵꨭꩍ ꨓꨮꩊ ꩝ ꨓꨯꨱꩌ ꨔꨭꩆ ꨟꩃ ꨐꨭꨩ ꨗꨯꨱ ꨟꨗꨬ ꩝ ꨀꨤꩍ ꨟꩃ ꨓꨝꨳꩀ ꨕꨫ ꨓꨳꩆ ꨟꨰꩀ ꨐꨭꨩ ꨟꨰ ꨎꨮꨩ ꩝ ꨝꨣꨭꨥ ꨟꩃ ꨚꨓꨯꨱ ꨚꨙꩉ ꨚꨗꨴꨯꨱꩃ ꨎꨝꨯꨱꩊ ꨗꨯꨱ ꨕꨀꨩ ꨎꨩ ꨓꨝꨯꨱꩃ ꨀꨤꩍ ꨟꨣꨰ ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨗꨯꨱ ꨕꨀꨩ ꩝ ꨚꨗꨴꨯꨱꩃ ꨎꨝꨯꨱꩊ ꨗꨯꨱ ꨡꨯꩍ ꨐꨭꨩ ꨕꨯꨱꩀ ꨙꨪꩍ ꨚꨘꩃ [< ꨚꨙꩃ] ꨓꨕꨩ ꨊꨯꨱꩀ ꨌꨘꩃ ꩝ ꨝꨵꨯꨱꩍ ꨚꨗꨴꨯꨱꩃ ꨎꨝꨯꨱꩊ ꨗꨯꨱ ꨓꨚꩀ ꨐꨭꨩ ꨗꨯꨱ ꩝ ꨝꨣꨭꨥ ꨟꩃ ꨐꨭꨩ ꨓꨊꨫ ꨚꨗꨴꨯꨱꩃ ꩝ ꨎꨝꨯꨱꩊ ꩝ ꨤꩄ ꨀꨕꨬ ꨦꨄꨰ ꨟꨰ ꨨꨓꨯꨱ ꨢꨗꨫ ꩝ ꨘꩆ ꨟꩃ ꨚꨗꨴꨯꨱꩃ ꨎꨝꨯꨱꩊ ꨙꨯꩌ ꨤꩄ ꨚꨓꨯꨱ ꨓꨳꩇ ꨀꨕꨬ ꨦꨄꨰ ꨕꨨꨵꩀ ꨟꨰ ꨕꨀꨩ ꨄꨰ ꨓꨝꨯꨱꩃ ꨀꨤꩍ ꨗꨯꨱ ꨚꩀ ꨟꨖꨪꩉ ꨚꨓꨯꨱ ꨆꨩ ꨗꨰ ꨓꨤꨶꨪꩄ ꨚꨣꩍ ꨓꨐꨴꩀ ꨨꨤꨩ ꨢꩍ ꨓꨐꨴꩀ ꨨꨤꨩ ꨘꩆ ꨚꨮꩉ ꨟꨰ ꨓꨚꩀ ꨀꨘꩀ ꨄꨰ ꨓꨝꨯꨱꩃ ꨀꨤꩍ ꨘꩆ ꨄꨰ ꨓꨝꨯꨱꩃ ꨀꨤꩍ ꨚꨦꩃ ꨗꨰ ꨓꨤꨶꨪꩄ ꨎꨮꨩ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨤꩄ ꨕꨨꨵꩀ ꨕꨫ ꨗꨯꨱ ꨅꨩ ꨗꨯꨱ ꨋꩇ ꨨꨈꨰꩀ ꨟꨗꨶꨪꩋ ꨢꨮꨭ ꨕꨨꨵꩀ ꩝ ꨕꨨꨵꩀ ꨀꨤꩍ ꨆꨳꨮꩃ ꨗꨯꨱ ꨤꨯꨩ ꩝ ꨀꨕꨬ ꨦꨄꨰ ꨟꨨꨪꩅ ꨣꨬ ꨤꩄ ꨕꨨꨵꩀ ꨔꨮꨭ ꨗꨯꨱ ꨟꨁꨪꩆ ꨚꩀ ꨧꩃ ꨂꨣꩃ ꨟꩃ ꨕꨯꨮꩍ ꨓꨗꨫ ꨟꨰ ꩝ ꨕꨨꨵꩀ ꨨꨶꩀ ꨝꨵꨯꨱꩍ ꨕꨨꨵꩀ ꨙꨪꩍ ꨕꨨꨵꩀ ꨢꨮꨭ ꨗꨫ ꨎꨮꨩ ꨟꩃ ꨕꨯꨮꩍ ꨓꨗꨫ ꨟꨰ ꩝ ꨀꨕꨬ ꨦꨄꨰ ꨥꨮꩀ ꨗꨯꨱ ꨧꩃ ꨝꨰꩀ ꩝ ꨕꨨꨵꩀ ꨤꨈꩍ ꨕꨤꩌ ꨣꨭꩇ ꨕꨨꨵꩀ ꨤꨯꨩ ꩝ ꨕꨨꨵꩀ ꨕꨫ ꨗꨯꨱ ꨅꨩ ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨥꨮꩀ ꨗꨯꨱ ꨧꩃ ꨝꨵꨯꨱꩍ ꨚꨔꨮꨭ ꨧꨯꨱꩃ ꨚꨓꨯꨱ ꨥꨮꩀ ꩝ ꨤꩄ ꨎꨩ ꨝꨯꨱꩃ ꨀꨤꩍ ꨕꨫ ꨟꨰ ꨅꨩ ꨐꨭꨩ ꨤꩄ ꨐꨭꨩ ꨤꨪꨈꩍ ꨕꨫ ꨕꨤꩌ ꨣꨭꩇ ꨐꨭꨩ ꨤꨯꨩ ꨐꨭꨩ ꨕꨫ ꨟꨰ ꨅꨩ ꨐꨭꨩ ꨀꨤꩍ ꨆꨳꨮꩃ ꨟꨰ ꨤꨯꨩ ꩞ ꨝꨣꨭꨥ ꨟꩃ ꨚꨓꨯꨱ ꨚꨙꩉ ꨚꨗꨴꨯꨱꩃ ꨎꨝꨯꨱꩊ ꨟꩀ ꨀꨢꨭꩆ ꨀꨟꨭꩉ ꨗꨯꨱ ꨌꨆꨯꩂ ꨐꨭꨩ ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨟꩀ ꨀꨢꨭꩆ ꨗꨯꨱ ꨌꨆꨯꩂ ꨎꨩ ꨓꨝꨯꨱꩃ ꨀꨤꩍ ꩝ ꨚꨗꨴꨯꨱꩃ ꨎꨝꨯꨱꩊ ꨝꨩ ꨀꨢꨭꩆ ꨗꨯꨱ ꨓꨚꩀ ꨧꩃ ꨐꨭꨩ ꩝ ꨝꨵꨯꨱꩍ ꨐꨭꨩ ꨓꨊꨫ ꨤꩄ ꨀꨕꨬ ꨦꨄꨰ ꨝꨩ ꨀꨢꨭꩆ ꨟꨰ ꨨꨓꨯꨱ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨤꩄ ꨚꨓꨯꨱ ꨚꨙꩉ ꨀꨕꨬ ꨦꨄꨰ ꨕꨨꨵꩀ ꨝꨩ ꨀꨢꨭꩆ ꨗꨫ ꨟꨰ ꨌꨆꨯꩂ ꨄꨰ ꨓꨝꨯꨱꩃ ꨀꨤꩍ ꩝ ꨘꩆ ꨟꩃ ꨎꨩ ꨓꨝꨯꨱꩃ ꨀꨤꩍ ꨙꨯꩌ ꨤꩄ ꨢꩍ ꨀꨕꨬ ꨦꨄꨰ ꨌꨆꨯꩂ ꨕꨨꨵꩀ ꨗꨯꨱ ꨤꨪꨎꩃ ꨕꨨꨵꩀ ꨗꨯꨱ ꨆꩄ ꨟꨪꩆ ꩝ ꨟꩃ ꨀꨕꨬ ꨦꨄꨰ ꨌꨆꨯꩂ ꨕꨨꨵꩀ ꨗꨯꨱ ꨚꨚꨤꨰ ꨈꨵꨰꩍ ꨀꨕꨬ ꨦꨄꨰ ꨟꨪꩆ ꩝ ꨗꨰ ꨓꨤꨶꨪꩄ ꨕꨫ ꨚꨣꩍ ꨓꨐꨴꩀ ꨨꨤꨩ ꨆꨩ ꨕꨨꨵꩀ ꨅꨩ ꩝ ꨝꨣꨭꨥ ꨟꩃ ꨚꨙꩉ ꨐꨭꨩ ꨙꨪꩀ ꨀꨢꨭꩆ ꩝ ꨝꨵꨯꨱꩍ ꨚꨗꨴꨯꨱꩃ ꨎꨝꨯꨱꩊ ꨌꨆꨯꩂ ꨐꨭꨩ ꨝꨩ ꨟꨣꨰ ꨌꨰꩀ ꨕꨫ ꨀꨤꨩ ꨣꨕꨰꩍ ꩝ ꨝꨵꨯꨱꩍ ꨚꨗꨴꨯꨱꩃ ꨎꨝꨯꨱꩊ ꨓꨟꨩ ꨗꨯꨱ ꨚꨔꨮꨭ ꨚꨓꨯꨱ ꩝ ꨝꨣꨭꨥ ꨟꩃ ꨚꨓꨯꨱ ꨚꨙꩉ ꨗꨰ ꨓꨤꨶꨪꩄ ꨟꩀ ꨓꨐꨴꩀ ꨨꨤꨩ ꨚꨣꩍ ꨥꨮꩀ ꨧꨩ ꨡꩃ ꨓꨴꨩ ꨚꨣꩍ ꨈꩆ ꨆꨴꨲꩍ ꨕꨚꨶꨮꩊ ꨂꨣꩃ ꨘꩆ ꨝꨣꨭꨥ ꨟꩃ ꨓꨐꨴꩀ ꨨꨤꨩ ꨚꨮꩉ ꨗꨯꨱ ꨓꨚꩀ ꨀꨘꩀ ꨎꨩ ꨓꨝꨯꨱꩃ ꨀꨤꩍ ꩝ ꨝꨣꨭꨥ ꨟꩃ ꨓꨐꨴꩀ ꨨꨤꨩ ꨘꩆ ꨤꨶꩀ ꨓꨟꨩ ꨕꨤꩌ ꨝꨯꨱꩍ ꨝꨤꨯꨱꩅ ꨎꨩ ꨓꨝꨯꨱꩃ ꨀꨤꩍ ꩝ ꨝꨣꨭꨥ ꨟꩃ ꨚꨓꨯꨱ ꨧꨘꩃ ꨟꨤꨭꨥ ꨕꨫ ꨓꨳꩆ ꨝꨵꨯꨱꩍ ꨚꨓꨯꨱ ꨚꨙꩉ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨝꨩ ꨗꨰ ꨓꨤꨶꨪꩄ ꨧꨯꨱꩃ ꨎꨩ ꨓꨝꨯꨱꩃ ꨀꨤꩍ ꨗꨯꨱ ꨓꩀ ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨝꨩ ꨗꨰ ꨓꨤꨶꨪꩄ ꨧꨯꨱꩃ ꨎꨩ ꨓꨝꨯꨱꩃ ꨀꨤꩍ ꨗꨯꨱ ꨓꩀ ꩝ ꨝꨣꨭꨥ ꨟꩃ ꨀꨝꨪꩍ ꨕꨴꨬ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨡꨯꩍ ꨗꨰ ꨓꨤꨶꨪꩄ ꨧꨳꩌ ꨝꨪꨗꨰ ꨤꨯꨩ ꨕꨫ ꨔꨭꩉ ꨓꨳꩆ ꨆꨳꨮꩃ ꨚꨠꨓꨰ ꨅꨩ ꨝꨣꨭꨥ ꨟꩃ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨟꩀ ꨀꨔꨮꨭ ꨚꨠꨓꨰ ꨆꨩ ꨀꨤꨩ ꨗꨰ ꨓꨤꨶꨪꩄ ꨥꨮꩀ ꨝꨵꨯꨱꩍ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨝꨴꨬ ꨆꨩ ꨗꨰ ꨓꨤꨶꨪꩄ ꨧꨯꨱꩃ ꨎꨩ ꨓꨝꨯꨱꩃ ꨀꨤꩍ ꨧꨩ ꨌꨳꨮꩅ ꨤꨧꨬ ꩝ ꨝꨵꨯꨱꩍ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨚꨙꩉ ꨗꨰ ꨓꨤꨶꨪꩄ ꨧꨯꨱꩃ ꨎꨩ ꨓꨝꨯꨱꩃ ꨀꨤꩍ ꨙꨪꩀ ꨌꨮꩀ ꨓꨚꨩ ꨈꨵꨰ ꨗꨯꨱ ꨐꨭꨩ ꨎꨮꨩ ꩝ ꨝꨵꨯꨱꩍ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨟꩀ ꨕꨣꩍ ꨀꨔꨮꨭ ꨤꨭꩀ ꨕꨫ ꨟꨓꨩ ꨙꨥ ꨝꨵꨯꨱꩍ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨝꨩ ꨙꨥ ꨘꩆ ꨗꨯꨱ ꨆꨩ ꨚꨓꨯꨱ ꨀꨳꨮꩀ ꩝ ꨝꨣꨭꨥ ꨟꩃ ꨚꨓꨯꨱ ꨡꨯꩍ ꨗꩌ ꨕꨣꩍ ꨕꨫ ꨟꨓꨩ ꨙꨥ ꨘꩆ ꨝꨵꨯꨱꩍ ꨚꨓꨯꨱ ꨓꨚꩀ ꨓꨳꩆ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨘꩆ ꩝ ꨝꨣꨭꨥ ꨟꩃ ꨗꨰ ꨓꨤꨶꨪꩄ ꨧꨯꨱꩃ ꨎꨩ ꨓꨝꨯꨱꩃ ꨀꨤꩍ ꨘꩆ ꨗꨯꨱ ꨚꨮꩇ ꨧꨩ ꨜꨭꩆ ꨚꨀꨯꨱꩀ ꨕꨫ ꨆꨴꨲꩍ ꨣꩌ ꨚꨴꨯꨱꩃ ꩝ ꨚꨀꨯꨱꩀ ꨘꩆ ꨟꨝꨯꨱꩍ ꨓꨔꩀ ꨔꨴꨰꩈ ꨜꨭꩆ ꨔꨴꨰꩈ ꨖꩆ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨧꨯꨱꩃ ꨗꨰ ꨓꨤꨶꨪꩄ ꨕꨯꨱꩀ ꨕꨶꨮꩆ ꨝꨯꨱꩍ ꨚꨀꨯꨱꩀ ꨘꩆ ꨡꨮꩃ ꩝ ꨗꨰ ꨓꨤꨶꨪꩄ ꨕꨯꨱꩀ ꨕꨶꨯꨮꩆ ꨚꨀꨯꨱꩀ ꨡꨮꩃ ꩝ ꨨꨤꨬ ꨎꨩ ꨓꨝꨯꨱꩃ ꨀꨤꩍ ꨘꩆ ꨐꨭꨩ ꨕꨯꨱꩀ ꨙꨪꩍ ꨚꨙꩃ ꨓꨕꨩ ꨐꨭꨩ ꨕꨫ ꨀꨤꨩ ꨜꨭꩆ ꨚꨀꨯꨱꩀ ꨘꩆ ꨎꨮꨩ ꩝ ꨚꨀꨯꨱꩀ ꨘꩆ ꨎꨴꨭꩍ ꨓꨯꨱꩌ ꨕꨮꩉ ꨣꨭꩇ ꨐꨭꨩ ꨝꨵꨯꨱꩍ ꨐꨭꨩ ꨕꨫ ꨕꨶꨮꩆ ꨡꨮꩃ ꨅꨩ ꨨꨝꨳꨮꩆ ꨝꨯꨱꩍ ꨚꨀꨯꨱꩀ ꨘꩆ ꨎꨴꨭꩍ ꨓꨟꨩ ꨕꨤꩌ ꨚꨝꩍ ꨐꨭꨩ ꨘꩆ ꨟꩃ ꨐꨭꨩ ꨡꨮꩃ ꩝ ꨝꨣꨭꨥ ꨟꩃ ꨈꨴꨮꩀ ꨓꨀꨢꨭꩍ ꨚꨮꩉ ꨟꨣꨰ ꨡꨮꩃ ꨝꨯꨱꩍ ꨚꨀꨯꨱꩀ ꨘꩆ ꨝꨵꨯꨱꩍ ꨈꨴꨮꩀ ꨘꩆ ꨡꨯꩍ ꨐꨭꨩ ꨙꨪꩍ ꨈꨙꩃ ꨕꨴꨬ ꨈꨙꩃ ꨎꩆ ꩝ ꨝꨣꨭꨥ ꨟꩃ ꨈꨴꨮꩀ ꨘꩆ ꨛꨩꨦꨯꩌ ꨤꩄ ꨟꨗꨶꨪꩋ ꨟꨓꨰ ꩝ ꨝꨵꨯꨱꩍ ꨀꨝꨪꩍ ꨧꨩ ꨕꨚꨶꨮꩊ ꨈꨴꨮꩀ ꨘꩆ ꨝꨳꨰ ꨈꨮꩇ ꨆꨳꨮꩃ ꨡꨮꩃ ꨎꨩ ꨓꨝꨯꨱꩃ ꨀꨤꩍ ꩝ ꨈꨴꨮꩀ ꨘꩆ ꨙꨯꩌ ꨧꨯꨱꩃ ꨈꨮꩇ ꨐꨭꨩ ꨤꩄ ꨤꨶꨰ ꨆꨩ ꨚꨓꨯꨱ ꨐꨭꨩ ꨡꨮꩃ ꨀꨆꨯꨱꩀ ꨕꨯꨱꩀ ꨓꨮꩊ ꨀꨝꨪꩍ ꨕꨯꩌ ꨝꨯꨱꩊ ꨐꨭꨩ ꨘꩆ ꨟꨘꩃ ꨡꨮꩃ ꨨꨓꨰ ꨟꨘꩃ ꨡꨮꩃ ꨚꨴꨶꨮꩄ ꨟꨘꩃ ꨡꨮꩃ ꨜꨩ ꩝ ꨈꨴꨮꩀ ꨘꩆ ꨕꨯꨱꩀ ꨙꨯꩌ ꨧꨯꨱꩃ ꨈꨮꩇ ꨐꨭꨩ ꨢꨮꨭ ꨘꩆ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨘꩆ ꨕꨯꨱꩀ ꨚꨊꨪꩀ ꨓꨊꨫ ꨚꨮꩃ ꨈꨴꨮꩀ ꨘꩆ ꨙꨯꩌ ꩞ ꨝꨣꨭꨥ ꨟꩃ ꨈꨴꨮꩀ ꨘꩆ ꨚꨮꩉ ꨓꨴꨭꩆ ꨟꩃ ꨊꨯꨱꩀ ꨜꨭꩆ ꨚꨀꨯꨱꩀ ꨘꩆ ꨟꨣꨰ ꨆꨳꨮꩃ ꨡꨮꩃ ꨎꨩ ꨓꨝꨯꨱꩃ ꨀꨤꩍ ꩝ ꨝꨵꨯꨱꩍ ꨎꨩ ꨓꨝꨯꨱꩃ ꨀꨤꩍ ꨕꨭꩃ ꨕꨫ ꨝꨤꨭꨥ ꨆꩃ ꨚꨓꨯꨱ ꨈꨴꨮꩀ ꨘꩆ ꨨꨭꨩ ꨝꨵꨯꨱꩍ ꨎꨩ ꨓꨝꨯꨱꩃ ꨀꨤꩍ ꨀꨤꩍ ꨀꨓꨯꨱꩃ ꨈꨴꨮꩀ ꨘꩆ ꨧꨩ ꨟꨓꨰ ꨧꨩ ꨨꨕꨳꩇ ꨝꨣꨭꨥ ꨟꩃ ꨈꨴꨮꩀ ꨘꩆ ꨌꨳꨪꩇ ꨕꨫ ꨨꨭꨩ ꨅꨩ ꨝꨵꨯꨱꩍ ꨚꨓꨯꨱ ꨈꨴꨮꩀ ꨘꩆ ꨡꨰ ꨕꨫ ꨎꨩ ꨓꨝꨯꨱꩃ ꨀꨤꩍ ꨧꨩ ꨝꨯꨱꩍ ꨙꨰꩀ ꨦꩀ ꨓꨪꨎꨰ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨓꨊꨫ ꨚꨓꨯꨱ ꨈꨴꨮꩀ ꨘꩆ ꨤꩄ ꨙꨰꩀ ꨗꨫ ꨀꨊꨶꨬ ꨨꨝꩉ ꨝꨣꨭꨥ ꨟꩃ ꨚꨓꨯꨱ ꨈꨴꨮꩀ ꨘꩆ ꨤꩄ ꨙꨰꩀ ꨗꨫ ꨘꩆ ꨀꨊꨶꨬ ꨝꨪꨔꩉ ꨟꩃ ꨝꨪꨔꩉ ꨆꨳꨮꩃ ꨌꨯꨱꩃ ꨨꨈꨰꩀ ꨤꨪꨎꩃ ꨨꨭꨩ ꨣꨬ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨓꨊꨫ ꨚꨓꨯꨱ ꨈꨴꨮꩀ ꨤꩄ ꨙꨰꩀ ꨗꨫ ꨟꨢꩍ ꨤꨚꨩ ꨓꨳꩆ ꨝꨵꨯꨱꩍ ꨌꨴꩃ ꨆꨳꨮꩃ ꨆꨩ ꨨꨭꨩ ꨤꨔꨬ ꩝ ꨘꩆ ꨌꨴꩃ ꨨꨭꨩ ꨨꨰ ꨅꨩ ꩝ ꨝꨣꨭꨥ ꨟꩃ ꨚꨓꨯꨱ ꨈꨴꨮꩀ ꨤꩄ ꨝꨪꨔꩉ ꨟꩃ ꨕꨤꩌ ꨓꨳꩆ ꨛꨯꨮ ꨆꨳꨮꩃ ꨓꨆꨴꨲꨩ ꨌꨴꩃ ꨨꨈꨰꩀ ꨤꨪꨎꩃ ꨌꨴꩃ ꨨꨭꨩ ꨎꨮꨩ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨚꨙꩉ ꨚꨓꨯꨱ ꨈꨴꨮꩀ ꨌꨴꩃ ꨤꨔꨬ ꨌꨴꩃ ꨀꨳꨩ ꨨꨝꨰ ꨌꨴꩃ ꨙꨳꨮꩇ ꨧꨯꨱꩃ ꨚꨓꨬ ꨆꨩ ꨎꨩ ꨓꨝꨯꨱꩃ ꨀꨤꩍ ꨡꨮꩃ ꩝ ꨘꩆ ꨟꩃ ꨚꨓꨯꨱ ꨈꨴꨮꩀ ꨘꩆ ꨌꨴꩃ ꨨꨭꨩ ꨤꨔꨬ ꨀꨳꨩ ꨨꨝꨰ ꨚꨓꨬ ꨓꨔꩀ ꨙꨳꨮꩇ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨓꨚꩀ ꨓꨳꩆ ꨚꨓꨯꨱ ꨈꨴꨮꩀ ꨘꩆ ꨝꨵꨯꨱꩍ ꨎꨩ ꨓꨝꨯꨱꩃ ꨀꨤꩍ ꨟꩀ ꨙꨰꩀ ꨘꩆ ꨕꨫ ꨚꨓꨯꨱ ꨈꨴꨮꩀ ꩝ ꨝꨵꨯꨱꩍ ꨎꨩ ꨓꨝꨯꨱꩃ ꨀꨤꩍ ꨚꨣꨤꨯꨱ ꨈꨴꨮꩀ ꨘꩆ ꨥꨮꩀ ꩝ ꨘꩆ ꨟꩃ ꨚꨓꨯꨱ ꨈꨴꨮꩀ ꨘꩆ ꨚꨮꩉ ꨗꨯꨱ ꨐꨭꨩ ꨎꨮꨩ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨌꨴꩃ ꨟꨗꨶꨪꩋ ꨂꨣꩃ ꨝꨯꨱꩊ ꨞꩇ ꨨꨤꨭꩆ ꨨꨤꩀ ꩝ ꨐꨭꨩ ꨌꨴꩃ ꨧꨩ ꨝꨯꨱꩍ ꨀꨢꨭꩆ ꨀꨟꨭꩉ ꨆꨩ ꨗꨰ ꨓꨤꨶꨪꩄ ꨙꨪꩀ ꨧꨯꨱꩃ ꨐꨭꨩ ꨌꨴꩃ ꨧꨩ ꨕꨴꨬ ꨀꨧꨰꩍ ꨆꨯꨱꩀ ꨓꨴꨩ ꨘꩆ ꨚꨳꨯꨮꩍ ꨆꨩ ꨐꨭꨩ ꨙꨪꩀ ꩝ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨧꨯꨱꩃ ꨗꨰ ꨓꨤꨶꨪꩄ ꨝꨩ ꨈꨮꩇ ꨐꨭꨩ ꨗꨯꨱ ꨕꨯꨱꩀ ꨚꩀ ꨊꨯꨱꩀ ꨨꨤꨭꨥ ꨆꨴꨯꨱꩃ ꨝꨵꨯꨱꩍ ꨐꨭꨩ ꨌꨴꩃ ꨎꨳꨮꩃ ꨟꨖꨪꩉ ꨎꨳꨮꩃ ꨣꨪꨢꨩ ꨝꨵꨯꨱꩍ ꨐꨭꨩ ꨌꨴꩃ ꨎꨳꨮꩃ ꨟꨗꨶꨪꩋ ꨂꨣꩃ ꨆꨝꨥ ꨤꨪꨟꨯꨱꨥ ꨨꨤꨭꩆ ꨨꨤꩀ ꨝꨯꨱꩊ ꨞꩇ ꨣꨝꨭꨥ ꨣꨝꨭꨥ ꨓꨠꩆ ꨓꨠꩆ ꩞ ꨝꨣꨭꨥ ꨟꩃ ꨎꨩ ꨓꨝꨯꨱꩃ ꨀꨤꩍ ꨝꨩ ꨝꨯꨱꩊ ꨚꨝꨮꩀ ꨆꨴꨯꨱꩃ ꨘꩆ ꨆꨵꨯꨱꩍ ꨀꨳꨩ ꨆꨳꨮꩃ ꨙꨶꨮꩄ ꨓꨴꨭꩆ ꨕꨫ ꨨꨭꨩ ꨓꨴꨩ ꨅꨩ ꩝ ꨝꨣꨭꨥ ꨟꩃ ꨕꨯꩌ ꨝꨯꨱꩊ ꨞꩇ ꨕꨯꨱꩀ ꨚꩀ ꨢꨯꩀ ꨗꨫ ꨕꨫ ꨨꨭꨩ ꨀꨳꨩ ꨆꨳꨮꩃ ꨟꨐꨭꩌ ꨅꨩ ꩝ ꨝꨵꨯꨱꩍ ꨀꨝꨪꩍ ꨕꨴꨬ ꨕꨯꩌ ꨝꨯꨱꩊ ꨗꨯꨱ ꨚꨔꨮꨭ ꨚꨓꨯꨱ ꨤꩄ ꨨꨝꩉ ꨆꩄ ꨕꨶꨩ ꨆꨵꨮꨭ ꨨꨣꨬ ꨟꨗꨫ ꨀꨳꨩ ꨔꨭꨩ ꨆꨵꨯꨱꩍ ꨕꨫ ꨆꨴꨯꨱꩃ ꨢꨮꨭ ꨗꨫ ꨛꨯꨮ ꨈꨗꨴꨮꩍ ꨚꨓꨴꨰ ꩝ ꨝꨣꨭꨥ ꨟꩃ ꨚꨓꨯꨱ ꨓꨳꩇ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨗꨯꨱ ꨀꨳꨮꩀ ꨚꩀ ꨊꨯꨱꩀ ꨨꨤꨭꨥ ꨆꨴꨯꨱꩃ ꩝ ꨘꩆ ꨟꩃ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨓꨈꨯꩀ ꨔꨶꨰ ꨆꨴꨯꨱꩃ ꨗꨯꨱ ꨡꨯꩍ ꨟꨖꨪꩉ ꨣꨪꨢꨩ ꨟꨗꨶꨪꩋ ꨂꨣꩃ ꨝꨯꨱꩊ ꨞꩇ ꨣꨝꨭꨥ ꨣꨝꨭꨥ ꨣꨧꨩ ꨣꨧꨩ ꨧꨯꨱꩃ ꨡꨯꩍ ꨨꨤꨭꨥ ꨕꨯꩀ ꨐꨭꨩ ꨚꨕꩃ ꨕꨫ ꨀꨘꩀ ꨟꨖꨪꩉ ꨘꩆ ꨧꨯꨱꩃ ꨡꨯꩍ ꨀꨇꩉ ꨕꨫ ꨨꨤꨭꨥ ꨕꨯꩀ ꨘꩆ ꨤꩄ ꨚꨓꨯꨱ ꨝꨣꨭꨥ ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨥꨮꩀ ꨟꨣꨰ ꨝꨵꨯꨱꩍ ꨚꨔꨮꨭ ꨧꨯꨱꩃ ꨚꨓꨯꨱ ꨤꩄ ꨕꨯꩌ ꨇꨯꨱꩊ ꨕꨨꨵꩀ ꨔꨶꨰ ꨆꨴꨯꨱꩃ ꨓꨈꨯꩀ ꨗꨯꨱ ꨡꨯꩍ ꨕꨯꩀ ꨚꨕꩃ ꨕꨫ ꨀꨘꩀ ꨟꨖꨪꩉ ꨧꨩ ꨡꨰꩀ ꨧꨯꨱꩃ ꨡꨯꩍ ꨀꨇꩉ ꨕꨫ ꨨꨤꨭꨥ ꨕꨯꩀ ꨘꩆ ꨤꩄ ꨚꨓꨯꨱ ꨝꨣꨭꨥ ꨐꨭꨩ ꨚꨔꨮꨭ ꨀꨝꨪꩍ ꨝꨯꨱꩍ ꨚꨗꨶꨮꩄ ꨧꨯꨱꩃ ꨚꨓꨯꨱ ꨝꨣꨭꨥ ꨟꩃ ꨚꨓꨯꨱ ꨝꨩ ꨝꨯꨱꩊ ꨓꨈꨯꩀ ꨗꨯꨱ ꨆꨳꨮꩃ ꨟꨧꨭꩍ ꨣꨝꨭꨥ ꨣꨝꨭꨥ ꨓꨠꩆ ꨓꨠꩆ ꨗꨯꨱ ꨡꨯꩍ ꨎꨩ ꨓꨝꨯꨱꩃ ꨀꨤꩍ ꨀꨓꨶꨮꩉ ꨕꨯꩀ ꨝꨪꨆꩆ ꨥꨮꩀ ꩝ ꨀꨇꩉ ꨝꨪꨆꩆ ꨥꨮꩀ ꩝ ꨀꨇꩉ ꨕꨫ ꨕꨯꩀ ꨘꩆ ꨤꩄ ꨨꨝꨳꨮꩆ ꨚꨓꨯꨱ ꨆꨵꩀ ꨨꨤꩉ ꨤꨶꨰ ꨗꨈꩉ ꨆꨩ ꨚꨓꨯꨱ ꨝꨣꨭꨥ ꨗꨫ ꨆꨩ ꨘꩆ ꨟꩃ ꨚꨓꨯꨱ ꨝꨣꨭꨥ ꨚꨮꩍ ꨀꨳꨩ ꨓꨴꨭꩆ ꨆꨩ ꨝꨯꨱꩊ ꨞꩇ ꨟꨐꨭꩌ ꩝ ꨝꨣꨭꨥ ꨟꩃ ꨚꨓꨯꨱ ꨀꨠꨩ ꨗꨰ ꨓꨤꨶꨪꩄ ꨡꨯꩍ ꨀꨇꩉ ꨕꨫ ꨕꨯꩀ ꨐꨭꨩ ꨢꨮꨭ ꨘꩆ ꨧꨯꨱꩃ ꨡꨯꩍ ꨝꨯꨱꩊ ꨐꨭꨩ ꨣꨤꨯꨩ ꨕꨫ ꨝꨯꨱꩊ ꨚꨓꨯꨱ ꩝ ꨝꨣꨭꨥ ꨟꩃ ꨚꨓꨯꨱ ꨘꩆ ꨧꨘꩃ ꨗꨯꨱ ꨟꨰ ꨝꨵꨯꨱꩍ ꨚꨓꨯꨱ ꨀꨠꨩ ꨗꨰ ꨓꨤꨶꨪꩄ ꨌꨳꨪꩇ ꨨꨤꩉ ꨀꨤꩍ ꨕꨫ ꨎꨩ ꨓꨝꨯꨱꩃ ꨀꨤꩍ ꨧꨯꨱꩃ ꨗꨰ ꨓꨤꨶꨪꩄ ꨎꨮꨩ ꩞ ꨘꩆ ꨟꩃ ꨎꨩ ꨓꨝꨯꨱꩃ ꨀꨤꩍ ꨧꨯꨱꩃ ꨗꨰ ꨓꨤꨶꨪꩄ ꨤꩍ ꨀꨳꨩ ꨓꨴꨭꩆ ꨆꨩ ꨝꨯꨱꩊ ꨞꩇ ꨤꨀꨶꨩ ꩝ ꨘꩆ ꨟꩃ ꨚꨓꨯꨱ ꨀꨠꨩ ꨗꨰ ꨓꨤꨶꨪꩄ ꨧꨯꨱꩃ ꨀꨝꨪꩍ ꨕꨴꨬ ꨚꨗꨴꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨧꨯꨱꩃ ꨀꨝꨪꩍ ꨕꨴꨬ ꨕꨯꩌ ꨛꨯꨮ ꨈꨗꨶꨮꩉ ꨀꨦꨪꩅ ꨚꨴꨯꨱꩃ ꨕꨤꩌ ꨗꨈꩉ ꩝ ꨕꨯꨱꩀ ꨚꨗꩀꨧꨩ ꨆꨩ ꨗꨰ ꨓꨤꨶꨪꩄ ꨧꨯꨱꩃ ꨎꨩ ꨓꨝꨯꨀꩃ ꨀꨤꩍ ꩝ ꨀꨝꨪꩍ ꨕꨴꨬ ꨕꨯꩌ ꨚꩆ ꨣꨯꨱꩃ ꨁꨥ ꨚꨗꨴꨯꨱꩃ ꨨꨗꨭꩀ ꨕꨯꩌ ꨕꨫ ꨕꨯꨱꩀ ꨟꨢꨯꨱꩌ ꨗꨰ ꨓꨤꨶꨪꩄ ꨤꩄ ꨥꩀ ꨗꨰ ꨓꨤꨶꨪꩄ ꨧꨳꩌ ꨕꨫ ꨨꨭꨩ ꨣꨡꩍ ꨣꨪꨡꨲꩇ ꨓꨴꨩ ꨅꨩ ꩝ ꨘꩆ ꨟꩃ ꨓꨮꩊ ꨨꨕꨬ ꨗꨰ ꨓꨤꨶꨪꩄ ꨧꨯꨱꩃ ꨚꨦꩃ ꨗꨰ ꨓꨤꨶꨪꩄ ꨋꩇ ꨀꨨꩉ ꨝꨵꨯꨱꩍ ꨓꨴꨭꩆ ꨟꨰ ꨣꨥꩃ ꨚꨓꨯꨱ ꨀꨠꨩ ꨥꨮꩀ ꩝ ꨝꨣꨭꨥ ꨟꩃ ꨚꨓꨯꨱ ꨀꨠꨩ ꨗꨰ ꨓꨤꨶꨪꩄ ꨆꨴꨲꩆ ꨗꨰ ꨓꨤꨶꨪꩄ ꩟