ꨚꨔꨮꨭ ꨟꨪꩀ ꨥꨩ ꨧꨯꨱꩃ ꨈꨴꨮꨭꩀ ꨢꨭꩅ ! ꨂꨣꩃ ꨌꩌ ꨨꨭꨩ ꨨꨕꨯꩌ ꨁꨗꩌ ꨟꩀ ꨦꩀꨆꨣꨰ ? ꨧꨯꨱꩃ ꨕꨯꩌ ꨁꨗꩌ ꨟꩀ ꨨꨭꨩ ꨕꩀ ꨚꨕꩃ ꨟꩃ ꨔꨭꩆ ꨨꨤꨬ ꨧꨯꨱꩃ ꨨꨭꨩ ꨟꩅ ꨀꩉ ꨢꨮꨭ ꨨꨝꩊ ꨧꨯꨱꩃ ꨂꨣꩃ ꨌꩌ ? ꨆꨖꨩ ꨥꩀ ꨀꨩ ꨤꨗꨫ ꩝ ꨕꨨꨵꩀ ꨤꨪꨆꨮꨭ ꨇꩆ ꨓꩊ ꨟꨪꩀ ꨥꨩ ꨧꨯꨱꩃ ꨈꨴꨮꨭꩀ ꨢꨭꩅ ꨕꨯꩌ ꨁꨗꩌ ꨟꩀ ꨦꨆꨣꨰ ꨕꩀ ꨚꨕꩃ ꨤꨪꨥꨪꩀ ꨣꨰ ꨀꨝꨪꩍ ꨧꨯꨱꩃ ꨕꨯꩌ ꨌꨪꩍ ꨔꨯꨱꩅ ꨝꨪꨊꨭꨩ ꨆꨣꨬ ꨌꨴꨪꩍ ꩝ ꨨꨭꨩ ꨝꨩ ꨓꨟꨮ ꨕꨤꩌ ꨕꨯꩌ ꨁꨗꩌ ꨟꩀ ꨨꨭꨩ ꨔꨰꩀ ꨇꨳꨮꩍ ꨚꨆꩅ ꨗꨈꩉ ꩞ – ꨀꩃꨆꨩ ꨧꨩ: ꨂꨣꩃ ꨌꩌ ꨨꨭꨩ ꨕꨯꩌ ꨁꨗꩌ ꨟꩀ ꨦꩀꨆꨣꨰ ꨨꨤꨬ ? – ꨀꩃꨆꨩ ꨕꨶꨩ: ꨝꨪꨟꨯꩂ ꨛꨯꨮ ꨆꨵꨯꩂ ꨈꨪꨣꨰ ꩝ ꨝꨪꨟꨯꩂ ꨛꨯꨮ ꨣꨯꨟꨮꨩ ꩝ ꨝꨪꨟꨯꩂ ꨛꨯꨮ ꨗꨈꩉ ꨨꨭꨩ ꨟꩅ -ꨀꩉ ꨢꨮꨭ ꨨꨤꨬ ꨧꨯꨱꩃ ꨂꨣꩃ ꨌꩌ ? ꨕꨯꩌ ꨝꨯꨱꩍ ꨝꨪꨟꨯꩂ ꨗꨫ ꨒꨮꨭꩀ ꨕꨯꨱꩀ ꨚꩀ ꨗꨮꨈꩉ ꨇꩆꩍ ꨨꨯꨀꨩ ꨨꨤꨬ ? – ꨀꩃꨆꨩ ꨆꨵꨮꨭ: ꨨꨭꨩ ꨒꨮꨭꩀ ꨂꨣꩃ ꨌꩌ ꨟꨈꨴꨭꨩ ꨝꨴꨭꩀ ꨝꨩ ꨀꨳꨩ ꨓꨟꨩ ꨋꩀ ꨨꨟꨭꨩ ꨟꩃ ꨚꨓꨯꨱ ꨛꨯꨮ ꨆꨵꨯꩂ ꨈꨪꨣꨰ ꨨꨤꨬ ? – ꨀꩃꨆꨩ ꨚꩀ: ꨒꨮꨭꩀ ꨚꨎꨩ ꩝ ꨚꨓꨯꨱ ꨛꨯꨮ ꨆꨵꨯꨱꩃ ꨈꨪꨣꨰ ꨨꨭꨩ ꨝꨭꩍ ꨚꨴꩆ ꨚꨴꨯꨱꩃ ꨕꨤꩌ ꨝꨴꨭꩀ ꨝꨩ ꨀꨳꨩ ꨚꨤꨩ ꨕꨴꩀ ꨨꨟꨭꨩ ꩝ ꨆꨢꨶꨩ ꨕꩃ ꨀꨆꨯꨱꩀ ꨓꨌꨬ ꨚꨕꩃ ꨋꩀ ꨎꨤꩆ ꨆꨴꨯꨱꩃ ꩝ ꨣꨪꨝꨯꨱꩃ ꨝꨩ ꨀꨳꨩ ꨓꨟꨩ ꨕꨯꩌ ꨡꨵꩃ ꨨꨟꨭꨩ ꨔꨭꨤꨪꨈꨭꨩ ꨕꨫ ꨞꨭꩌ ꨓꨗꩍ ꨕꨪꩂ ꩝ ꨋꩀ ꨆꨩ ꨓꨗꩍ ꨨꨘꨩ ꨕꨨꨵꨮꨭ ꨕꨳꩍ ꨎꨮꩃ ꨓꨗꩍ ꨧꨳꩌ ꩞ ꨣꨕꩀ ꨗꨫ ꨨꨭꨩ ꨟꨯꨱꩃ ꨤꩄ ꨗꨯꨱ ꨕꨨꨵꨮꨭ ꨕꨫ ꨝꨪꨗꨮꩍ ꨌꨆꨵꨪꩂ ꨨꨣꨬ ꨨꨕꨬ ꨗꨫ ꩞ ꨧꨯꨱꩃ ꨆꨢꨶꨩ ꨕꨫ ꨗꩆ ꩝ ꨅꩃ ꨨꨭꨩ ꨛꨯꨩꩀ ꨚꨕꩃ ꨀꨋꩆ ꨛꨯꨮ ꩝ ꨌꨰꩀ ꨕꨤꩌ ꨨꨓꨰ ꨀꨗꨪꩅ ꨣꨘꩌ ꨨꨟꨳꨮꩅ ꨨꨟꨳꨮꩅ ꨕꨫ ꨂꨣꩃ ꨌꩌ ꩞ – ꨀꩃꨆꨩ ꨤꨪꨟꨩ: ꨝꨪꨟꨯꩃ ꨛꨯꨮ ꨣꨯꨟꨮ ꨕꨯꨱꩀ ꨚꩀ ꨚꨤꨬ ꨌꩌ ꨔꨯꩆ ꩝ ꨞꨭꩌ ꨜꨳꨮꩀ ꨨꨭꨩ꩝ ꨗꨈꩉ ꨇꩆ ꨨꨯ\ ꨒꨮꨭꩀ ꨨꨤꨬ? – ꨀꩃꨆꨩ ꨘꩌ: ꨒꨮꨭꩀ ꨚꨎꨮꨩ ꩞ ꨀꨢꨭꩅ ꨨꨭꨩ ꨗꨯꨱ ꨓꩊ ꨘꩆ ꨚꨎꨮꨩ ? – ꨀꩃꨆꨩ ꨓꨎꨭꩍ: ꨕꨯꨱꩀ ꨕꨗꨯꨱꩀ ꨋꩀ ꨢꩃ ꨛꨯꨮ ꨆꨟꨬ ꨁꨗꨩ ꨗꨈꩉ ( ꨛꨯꨮ ꨀꨟꨰꩀ ꨗꨈꩉ ) ꨤꩄ ꨧꨩ ꨀꨕꩅ ꨌꨡꩅ ꨋꩀ ꨢꩃ ꨀꨟꨰꩀ ꩞ ꨕꨨꨵꨮꨭ ꨕꨳꨯꨮꩍ ꨂꨣꩃ ꨌꩌ ꨋꩀ ꨢꩃ ꨛꨯꨮ ꨚꩀ ꨝꨪꨟꨯꩂ ꨀꨟꨭꩀ ꨢꨩ ꨓꨴꩃ ꩝ ꨗꨈꩉ ꨇꩆ ꨨꨯꨀꨩ ꩞ ꨆꨢꨶꨩ ꨕꨯꩌ ꨦꨤꨪꩍ ꨝꨪꨣꨮꨭ ꨕꨫ ꨦꩀꨆꨣꨰ ꩝ ꨔꨭꩆ ꨧꨩ ꨣꨪꨝꨮꨭ ꨔꨤꨪꨚꩉ ꨣꨓꨭꩍ ꨤꨪꨟꨩ ꨚꨵꨭꩍ ꨚꩀ ( ꩑꩙꩕꩔) ꩝ ꨂꨣꩃ ꨌꩌ ꨚꩀ ꨚꨤꨬ ꨨꨟꨭꨩ ꨓꩆ ꨣꩆ ꨨꨭꨩ ꨕꨭꩍ ꨀꨟꨭꩀ ꨟꨰ ꨋꩀ ꨢꩃ ꨓꩊ ꨨꨣꨬ ꨗꨫ ꩞ – ꨀꩃꨆꨩ ꨕꨤꨪꨚꩉ: ꨨꨭꨩ ꨔꨮꨭ ꩝ ꨝꨪꨟꨯꩂ ꨛꨯꨮ ꨦꩍ ꨁꨗ ꨚꩀ ꨗꨈꩉ ꨡꨪꩆ ꨔꨶꩆ ꨆꨵꩀ ꨂꨣꩀ ꨗꨫ ꨤꩄ ꨤꩌ ꨙꨯꩂ ꨎꨮꩃ ꨝꨳꩀ ꨇꨳꨮꩍ ꨧꨯꨱꩃ ꨈꨪꨣꨳꨮꩍ ꨣꨪꨤꨯꨩ ꨒꨮꨭꩀ ꨨꨤꨬ ? – ꨀꩃꨆꨩ ꨧꨤꨪꨚꩉ: ꨒꨮꨭꩀ ꨚꨎꨮꨩ ꩞ ꨝꨪꨟꨯꩂ ꨛꨯꨮ ꨦꩍ ꨁꨗꨩ ꨕꨯꨱꩀ ꨁꨃꨥ ꨤꩄ ꨛꨯꨮ ꨦꩍ ꨀꨗꨰꩍ ꨀꨓꨮꨭ ꨝꨪꨟꨯꩂ ꨌꩌ ꨜꨯꨩ ꨨꨰ ꨙꨪꩍ ꨀꨊꨯꨱꩀ ꨡꨯꩆ ꨀꨟꨭꩀ ꨗꨰ ꨕꨫ ꨜꨶꨯꩂ ꨜꨭꨩ ꨔꨭꩈ ꩝ ꨗꨈꩉ ꨤꩌ ꨙꨯꩂ ꨀꨓꩍ ꨕꨫ ꨜꨶꨯꩂ ꨜꩆ ꨔꨳꨮꩅ ꩗ ꨡꨰꩀ ꨎꨤꩆ ꨕꨫ ꨈꩍ ꨃꨦꩆ ꩞ ꨝꨪꨟꨯꩂ ꨀꨆꨯꨱꩀ ꨣꨳꨮꩇ ꨕꩀ ꨚꨕꩃ ꨟꨮꩃ ꨚꨶꩄ ꨀꨝꩇ ꨕꨤꨪꨚꩉ ꨀꨆꨯꨱꩀ ꨀꨝꩇ ꨔꨤꨪꨚꩉ ꨚꨳꩍ ꨕꨭꩍ ꨦꨪꨥꨩ ꩝ ꨨꨕꨬ ꨘꩆ ꨟꨮꩃ ꨚꨡꩀ ꨚꨴꨯꨱꩃ ꨥꨳꨮꩀ ꨕꨫ ꨀꨝꩇ ꨚꨵꨭꩍ ꨤꨪꨟꨩ ꨚꨳꩍ ꨕꨭꩍ ꨛꨯꨮ ꨦꩍ ꨁꨗꨩ꩞ ꨚꨓꨴꨫ ꨛꨯꨮ ꨦꩍ ꨁꨗꨩ ꨨꨭꨩ ꨂꨣꩃ ꨌꩌ ꨛꨯꨩꩀ ꨎꨩ ꨆꨢꨶꨩ ꨨꨭꨩ ꨝꨭꩍ ꨚꨴꨮꩆ ꨚꨓꨯꨩ ꨚꨆꨰ ꨝꨯꨱꩊ ꨞꩇ ꨚꨤꨩ ꨕꨴꩀ ꨧꨯꨱꩃ ꨎꨪꩍ ꨕꨨꨵꩍ ꩞ – ꨀꩃꨆꨩ ꨚꨵꨭꩍ: ꨐꨯꨱꩌ ꨝꨪꨟꨯꩂ ꨗꨫ ꨨꨭꨩ ꨔꨰꩀ ꨝꨪꨊꨭꩀ ꨨꨯꨀꨩ ꨤꨰ ꨧꨩ ꨕꨤꩌ ꨕꨯꩌ ꨔꨰꩀ ꨣꨪꩀ ꨕꨫ ꨌꩌꨛꨩ ꩞ ꨢꨯꨱꩌ ꨤꩄ ꨈꩇ ꨧꨯꨱꩃ ꨦꨪꩅ ꩝ ꨟꨪꩆ ꨨꨭꨩ ꨕꨯꩌ ꨟꨗꩃ ꨆꨴꩍ ꨔꨰꩀ ꨧꨯꨱꩃ ꨌꨪꩍ ꨔꨰꩀ ꨇꨳꨮꩍ ꨕꨫ ꨂꨣꩃ ꨌꩌ ꨟꩃ ꨆꩆ ꨋꩀ ꨎꨩ) ꨝꨴꨭꩀ ꨈꨪꨣꨳꨮꩍ ꩞ ꨐꨯꨱꩌ ꨝꨪꨟꨯꩂ ꨛꨯꨮ ꨦꩍ ꨁꨗꨩ ꨤꩄ ꨧꨩ ꨕꨤꩌ ꨕꨯꩌ ꨆꨭꩌ ꨝꨪꨟꨯꩂ ꨌꩌ ꨕꨯꨱꩀ ꨇꨪꩀ ꨓꨟꨯ_ ꩞ ꨔꨭꩆ ꨧꨩ ꨣꨪꨝꨮꨭ ꨔꨤꨪꨚꩉ ꨣꨓꨭꩍ ꨔꨤꨪꨚꩉ ꨚꨵꨭꩍ ꨧꨩ ꩝ ꨗꩌ ꨟꩀ ꨗꨫ ꨨꨭꨩ ꨝꨳꨮꩅ ꨘꩌ ꨕꩀ ꨓꨟꨩ ꨗꩌ ꨟꩀ ꨨꨭꨩ ꨔꨰꩀ ꨇꨳꨮꩍ ꨚꨆꩅ ꨓꨗꩍ ꨀꨳꨩ ꩞ – ꨀꩃꨆꨩ ꨚꨵꨭꩍ ꨧꨩ: ꨤꨪꨊꨪꨥ ꨕꨯꩌ ꨝꨯꨱꩍ ꨗꩌ ꨟꩀ ꨝꨪꨟꨯꩂ꩝ ꨆꨤꩆ ( ꨕꨗꨯꨱꩀ ꨞꨭꩀ ꨓꨪꩀ)꩝ ꨕꨯꩌ ꨧꩃ ꨂꨣꩃ ꨌꩌ ꨚꩀ ꨇꩆ ꨨꨯ ꨎꨮꩃ ꨕꨯꨱꩀ ꨇꨪꩀ ꨓꨠꨯ_ ꨧꩃ ꨕꨯꨱꩀ ꨟꩃ ꨆꩆ ꨝꨳꩀ ꨇꨳꨮꩍ ꨟꨓꨩ ꩞ – ꨀꩃꨆꨩ ꨚꨵꨭꩍ ꨕꨶꨩ: ꨧꩃ ꨕꨯꨱꩀ ꨟꩃ ꨆꩆ ꨕꨫ ꨂꨣꩃ ꨌꩌ ꨨꨭꨩ ꨒꨮꨭꩀ ꨨꨭꨩ ꨆꨵꨮꨭ ꨢꩃ ꨢꨮꨭ ꨢꨮꨩ ꨧꩃ ꨕꨯꨱꩀ ꨕꨫ ꨂꨣꩃ ꨢꨶꩆ ꨨꨤꨬ ? – ꨀꩃꨆꨩ ꨚꨵꨭꩍ ꨆꨵꨮꨭ: ꨧꩃ ꨕꨯꨱꩀ ꨟꩃ ꨆꩆ ꨕꨫ ꨂꨣꩃ ꨌꩌ ꨟꨕꨩ ꨨꨭꨩ ꨆꨵꨮꨭ ꨢꩃ ꩝ ꨚꨡꨶꩀ ꨓꨟꨩ ꨡꨵꩃ ꨓꨗꩍ ꨧꨯꨱꩃ ꨆꨕꨭꩃ ꨎꨳꨮꩆ ꨕꨫ ꨢꨯꨱꩀ ꨟꨮꨋꨥꨯꩌ ꩝ ꨆꨢꨶꨩ ꨀꩃꨆꨩ ꨆꨵꨮꨭ ꨨꨭꨩ ꨟꨓꩉ ꨀꩆꨆꩆ ꨚꨴꨯꨱꩃ ꨚꨴꩃ ꨕꨤꩌ ꨀꨆꨯꨱꩀ ꨧꩍꨗꩃ ꨕꨫ ꨕꨯꩌ ꨂꨣꩃ ꨌꩌ ꩞ ꨟꨪꩆ ꩝ ꨕꨯꩌ ꨝꨯꨱꩍ ꨧꩃ ꨕꨯꨱꩀ ꨟꩃꨆꩆ ꨞꨳꩆ ꨨꨭꨩ ꨣꨪꨤꨯꨩ ꨢꩃ ( ꨆꨵꨮꨭ ꩝ ꨤꨪꨟꨮꨩ ꨀꨓꨮꨭ ꨓꨎꨭꩍ ꨢꩃ) ꨨꨭꨩ ꨕꩀ ꨓꨶꨬ ꨚꨙꩉ ꨆꨣꨬ ꨕꨫ ꨈꨮꨭꩀ ꨕꨤꩌ ꨡꨵꩃ ꨧꩃ ꩞ ꨀꩃꨆꨩ ꨆꨵꨮꨭ ꨝꨴꨬ ꨔꨮꨭ ꨆꨩ ꨆꨵꨮꨭ ꨤꨯꩅ ꨤꨪꨊꨪꩀ – ꨓꨗꩍ – ꨟꨗꨶꩄ ꨕꨤꩌ ꨓꨣꨩ ꩞