ꨓꩀ ꨕꨫ ꨆꩊ ꨘꩆ ꨔꨩ ꨨꨕꨳꨮꩇ ꨔꨩ ꨚꨔꩃ ꨅꩃ ꨟꨭꩀ ꨘꩆ ꨨꨭꨩ ꨔꨩ ꨂꨣꩃ ꨀꨗꩀ ꨆꨭꨟꨬ ꨕꨣꨩ ꨝꨣꨭꨥ ꨚꨴꨯꨱꩃ ꨨꨭꨩ ꨧꨩ ꨚꨵꨭꩍ ꨤꨪꨟꨩ ꨔꨭꩆ ꨎꨳꨮꩃ꩝ ꨝꨵꨯꨱꩍ ꨤꨆꨬ ꨟꨰ ꨚꨶꨮꩄ ꨕꨶꨩ ꨆꨵꨮꨭ ꨡꨮꩃ ꨚꨎꨮ ꨝꨵꨯꨱꩍ ꨅꩃ ꨧꨭꨩ ꨟꨭꩀ ꨘꩆ ꨕꨫ ꨚꨩ ꨆꨳꨮꩃ ꨅꨩ꩝ ꨅꩃ ꨧꨭꨩ ꨟꨭꩀ ꨘꩆ ꨕꨯꨱꩀ ꨌꩃ ꨤꨆꨬ ꨔꨮꨭ ꨀꨇꩉ ꨆꨩ ꨘꩆ ꨟꩃ ꨟꨭꩀ ꨧꨭꨩ ꨅꩃ ꨘꩆ ꨚꨆꨳꨮꩃ ꨀꨗꩀ ꨕꨣꨩ ꨐꨭꨩ꩝ ꨘꩆ ꨟꩃ ꨓꨮꩊ ꨨꨕꨬ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨗꨯꨱ ꨚꨶꨮꩄ ꨀꨗꩀ ꨕꨣꨩ ꨅꩃ ꨧꨭꨩ ꨟꨭꩀ ꨘꩆ ꨆꨩ ꨎꨩ ꨆꨕꨮꩀ꩝ ꨝꨣꨭꨥ ꨟꩃ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨗꨯꨱ ꨓꨝꨯꨱꩃ ꨓꨳꩆ ꨅꩃ ꨧꨭꨩ ꨟꨭꩀ ꨘꩆ꩝ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨗꨯꨱ ꨚꩀ ꨧꩃ ꨅꩃ ꨧꨭꨩ ꨟꨭꩀ ꨘꩆ ꨝꨵꨯꨱꩍ ꨙꨯꩌ ꨧꨯꨱꩃ ꨨꨕꨳꨮꩇ ꨚꨧꩃ ꨟꨭꩀ ꨘꩆ ꨤꩄ ꨕꨨꨵꩀ ꨆꨳꨮꩃ ꨙꨯꩌ ꨧꨯꨱꩃ ꨕꨶꨩ ꨟꨭꩀ ꨚꨣꨭꩈ ꨅꩃ ꨚꨣꨭꩈ ꨟꨪꩆ ꨕꨨꨵꩀ ꨆꨙꨩ ꨣꨤꨯꨩ ꨆꩄ꩝ ꨝꨣꨭꨥ ꨟꩃ ꨕꨶꨩ ꨨꨕꨳꨮꩇ ꨚꨧꩃ ꨟꨭꩀ ꨘꩆ ꨤꩄ ꨕꨶꨩ ꨅꩃ ꨚꨣꨭꩈ ꨟꨭꩀ ꨚꨣꨭꩈ ꨙꨯꩌ ꨝꨰꩀ ꨎꨶꨰ ꨆꨙꨩ ꨎꨶꨰ꩝ ꨝꨵꨯꨱꩍ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨤꩄ ꨥꨮꩀ ꨧꨯꨱꩃ ꨅꩃ ꨟꨭꩀ ꨘꩆ ꨤꩄ ꨠꨢꩍ ꨕꨨꨵꩀ ꨙꨯꩌ ꨓꨝꨰꩅ ꨚꨗꨶꨮꩄ ꨨꨈꨰꩅ ꨘꩆ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨎꨶꨰ ꨠꨓꨲꩍ ꨎꨶꨰ꩝ ꨝꨣꨭꨥ ꨟꩃ ꨅꩃ ꨧꨭꨩ ꨟꨭꩀ ꨘꩆ ꨤꩄ ꨥꨮꩀ ꨤꩄ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨆꨳꨮꩃ ꨙꨯꩌ ꨚꨗꨶꨮꩄ ꨨꨈꨰꩅ ꨝꨵꨯꨱꩍ ꨙꨯꩌ ꨝꨰꩀ ꨎꨶꨰ ꨆꨙꨩ ꨕꨫ ꨕꨶꨩ ꨅꩃ ꨟꨭꩀ ꨕꨨꨵꩀ ꨎꨶꨰ꩝ ꨝꨣꨭꨥ ꨟꩃ ꨕꨶꨩ ꨨꨕꨳꨮꩇ ꨚꨧꩃ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨙꨯꩌ ꨤꩄ ꨕꨨꨵꩀ ꨨꨭꨩ ꨧꨩ ꨂꨣꩃ ꨀꨗꩀ ꨤꨆꨬ ꨕꩌ ꨝꨵꨯꨱꩍ ꨅꩃ ꨚꨣꨭꩈ ꨧꨯꨱꩃ ꨟꨭꩀ ꨚꨣꨭꩈ ꨨꨭꨩ ꨧꨩ ꨂꨣꩃ ꨀꨗꩀ ꨆꨭꨟꨬ ꨕꨣꨩ ꨀꨣꩀ ꨗꨫ ꨝꨴꨬ ꨀꨗꩀ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨧꨯꨱꩃ ꨀꨗꩀ ꨕꨨꨵꩀ ꨣꨯꨱꩃ ꨝꨩ ꨈꨮꩇ ꨐꨭꨩ ꨨꨭꨩ ꨣꨬ꩝ ꨝꨣꨭꨥ ꨟꩃ ꨅꩃ ꨧꨭꨩ ꨟꨭꩀ ꨘꩆ ꨤꩄ ꨕꨨꨵꩀ ꨚꨧꨯꩌ ꨤꩄ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨙꨯꩌ ꨚꨗꨶꨮꩄ ꨨꨈꨰꩅ ꨔꨮꨭ ꨤꩄ ꨙꨯꩌ ꨚꨗꨶꨮꩄ ꨘꩆ꩝ ꨟꨮꨢꩍ ꨢꨮꨭ ꨘꩆ ꨎꨮ ꨨꨭꨩ ꨆꩄ ꨟꨪꩆ꩝ ꨝꨵꨯꨱꩍ ꨅꩃ ꨧꨭꨩ ꨟꨭꩀ ꨘꩆ ꨓꨊꨪ ꨥꨮꩀ ꨤꩄ ꨀꨗꩀ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨨꨭꨩ ꨔꨮꨭ ꨀꨇꩉ ꨣꨬ꩝ ꨘꩆ ꨟꩃ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨤꩄ ꨀꨗꩀ ꨕꨨꨵꩀ ꨔꨮꨭ ꨀꨇꩉ ꨓꨚꨩ ꨕꨫ ꨀꨝꨪꩍ ꨀꨗꩀ ꨂꨣꩃ ꨧꨯꨱꩃ ꨉꨮꩍ ꨓꨚꨩ ꨕꨫ ꨀꨝꨪꩍ ꨂꨣꩃ ꨠꨢꩍ ꨐꨭꨩ ꨋꩇ ꨨꨈꨰꩅ ꨤꨪꨎꩃ ꨎꨳꨮꩃ ꨎꨮ꩝ ꨕꨫ ꨤꨯꩀ ꨆꨗꨪ ꨝꨪꨔꩉ ꨟꩃ ꨝꨪꨔꩉ ꨈꨴꨭꩀ ꨨꨈꨰꩅ ꨤꨪꨎꩃ ꨀꨗꩀ ꨕꨨꨵꩀ ꨋꩇ ꨎꨳꨮꩃ ꨀꨝꨪꩍ꩝ ꨝꨣꨭꨥ ꨟꩃ ꨁꨗꨩ ꨀꨟꨩ ꨟꨈꨰꩅ ꨘꩆ ꨡꨯꩍ ꨁꨗꨩ ꨀꨟꨩ ꨎꨩ ꨆꨕꨮꩀ ꨚꨶꨮꩄ ꨢꨮꨭ ꨘꩆ ꨝꨵꨯꨱꩍ ꨁꨗꨩ ꨀꨟꨩ ꨟꨈꨰꩅ ꨘꩆ ꨤꩄ ꨠꨢꩍ ꨢꨮꨭ ꨘꩆ ꨎꨮ ꨝꨵꨯꨱꩍ ꨕꨨꨵꩀ ꨝꨴꨬ ꨀꨗꩀ ꨕꨨꨵꩀ ꨚꨆꨳꨮꩃ ꨟꨪꩆ꩝ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨥꨮꩀ ꨗꨯꨱ ꨧꩃ ꨝꨵꨯꨱꩍ ꨚꨈꨭꩍ ꨟꩃ ꨚꨈꨯꨮ ꨟꨭꩀ ꨚꨣꨭꩈ ꨧꨯꨱꩃ ꨅꩃ ꨚꨣꨭꩈ ꨚꨙꩉ ꨎꨩ ꨆꨕꨮꩀ ꨟꨰ ꨆꨩ ꨕꨨꨵꩀ ꨀꨳꨮꩀ꩝ ꨝꨣꨭꨥ ꨟꩃ ꨁꨗꨩ ꨀꨟꨩ ꨎꨩ ꨆꨕꨮꩀ ꨥꨮꩀ ꨗꨯꨱ ꨧꩃ ꨝꨵꨯꨱꩍ ꨙꨯꩌ ꨧꨯꨱꩃ ꨎꨩ ꨆꨕꨮꩀ ꨤꩄ ꨨꨣꨬ ꨗꨫ ꨟꨰꩀ ꨗꨯꨱ ꨚꨶꨮꩄ ꨆꨭꨟꨬ ꨆꨩ ꨨꨲꨩ ꨨꨭꨩ ꨚꨎꨮ꩝ ꨚꨈꨭꩍ ꨟꩃ ꨚꨈꨯꨮ ꨝꨵꨯꨱꩍ ꨨꨲꨩ ꨗꨯꨱ ꨆꨩ ꨁꨗꨩ ꨀꨟꨩ ꨠꨈꨰꩅ ꨘꩆ ꨀꨳꨮꩀ꩝ ꨢꩍ ꨡꨯꩍ ꨁꨗꨩ ꨀꨟꨩ ꨟꨈꨰꩅ ꨘꩆ ꨓꨊꨪ ꨤꩄ ꨨꨲꨩ ꨔꨮꨭ ꨀꨇꩉ ꨨꨰ ꨅꨩ꩝ ꨘꩆ ꨨꨲꨩ ꨤꩄ ꨕꨨꨵꩀ ꨔꨮꨭ ꨓꨚꨩ ꨕꨫ ꨂꨣꩃ ꨀꨇꩉ ꨕꨨꨵꩀ ꨧꨯꨱꩃ ꨝꨪꨔꩉ ꨟꩃ ꨈꨴꨭꩀ ꨨꨈꨰꩅ ꨤꨪꨎꩃ ꨕꨨꨵꩀ ꨋꩇ ꨎꨳꨮꩃ ꨀꨝꨪꩍ꩝ ꨕꨨꨵꩀ ꨉꨮꩍ ꨓꨚꨩ ꨕꨫ ꨀꨝꨪꩍ ꨂꨣꩃ꩝ ꨨꨲꨩ ꨙꨯꩌ ꨧꨯꨱꩃ ꨁꨗꨩ ꨀꨟꨩ ꨠꨈꨰꩅ ꨘꩆ ꨢꨮꨭ ꨘꩆ ꨐꨩ꩝ ꨎꨩ ꨆꨕꨮꩀ ꨤꩄ ꨛꨯꨮ꩝ ꨘꩆ ꨟꩃ ꨨꨕꩍ ꨟꩃ ꨚꨈꨯꨮ ꨎꨩ ꨆꨕꨮꩀ ꨗꨯꨱ꩝ ꨝꨣꨭꨥ ꨟꩃ ꨁꨗꨩ ꨀꨟꨩ ꨟꨈꨰꩅ ꨘꩆ ꨓꨊꨪ ꨎꨩ ꨆꨕꨮꩀ꩝ ꨤꩄ ꨀꨗꩀ ꨔꨮꨭ ꨀꨇꩉ ꨣꨬ꩝ ꨝꨵꨯꨱꩍ ꨎꨩ ꨆꨕꨮꩀ ꨤꩄ ꨕꨨꨵꩀ ꨔꨮꨭ ꨓꨚꨩ ꨕꨫ ꨂꨣꩃ ꨝꨪꨔꩉ ꨟꩃ ꨈꨴꨭꩀ ꨨꨈꨰꩅ ꨤꨪꨎꩃ ꨕꨨꨵꩀ ꨋꩇ ꨎꨳꨮꩃ ꨕꨨꨵꩀ ꨉꨮꩍ ꨓꨚꨩ ꨕꨫ ꨂꨣꩃ꩝ ꨧꨩ ꨕꨴꨬ ꨕꨤꩀ ꨗꨫ ꨉꨮꩍ ꨕꨫ ꨨꨭꨩ ꨔꨬ ꨓꨮꩊ ꨅꨩ꩝ ꨡꨯꩍ ꨣꨭꩇ ꨕꨨꨵꩀ ꨢꨮꨭ ꨗꨫ ꨎꨳꨯꩈ ꨣꨤꨯꨩ꩝ ꨎꨩ ꨆꨕꨮꩀ ꨚꨮꩃ ꨆꨖꨩ ꨟꨰꩀ ꨐꨭꨩ ꨚꨓꨯꨱꨥ ꨝꨵꨯꨱꩍ ꨐꨭꨩ ꨙꨯꩌ ꨤꨯꨱꩉ ꨟꨪꩆ ꨐꨭꨩ ꨕꨫ ꨔꨮꨭ ꨀꨇꩉ ꨅꨩ꩝ ꨝꨓꨯꨱꩀ ꨤꨶꨪꩄ ꨤꨯꩀ ꨚꩀ ꨐꨭꨩ ꨝꨵꨯꨱꩍ ꨐꨭꨩ ꨟꨰ ꨙꨯꩌ ꨤꨯꨱꩉ ꨧꨯꨱꩃ ꨁꨗꨩ ꨀꨟꨩ ꨟꨈꨰꩅ ꨘꩆ꩝ ꨝꨣꨭꨥ ꨟꩃ ꨟꨰꩀ ꨟꨈꨰꩅ ꨘꩆ ꨚꨙꩉ ꨎꨩ ꨆꨕꨮꩀ ꨝꨩ ꨟꨈꨰꩅ ꨘꩆ ꨗꨯꨱ ꨓꨳꩇ ꨀꨣꨩ ꨕꨫ ꨚꨕꨰ ꨝꨵꨯꨱꩍ ꨟꨰꩀ ꨟꨈꨰꩅ ꨘꩆ ꨓꨊꨪ ꨎꨩ ꨆꨕꨮꩀ ꨤꩄ ꨀꨗꩀ ꨔꨮꨭ ꨚꨗꩍ ꨣꨬ꩝ ꨘꩆ ꨟꩃ ꨎꨩ ꨆꨕꨮꩀ ꨤꩄ ꨕꨨꨵꩀ ꨔꨮꨭ ꨚꨗꩍ ꨟꨪꩆ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨟꨈꨰꩅ ꨘꩆ ꨤꩄ ꨥꨮꩀ ꨠꨢꩍ ꨢꨮꨭ ꨘꩆ ꨎꨮ ꨨꨗꨩ ꨆꨴꨭꩃ ꨟꩃ ꨚꨧꩃ ꨆꨵꩀ ꨆꨮꨭ ꨌꨰꩀ ꨥꨮꩀ ꨧꨩ ꨡꨰꩀ ꨀꨗꩀ ꨝꨩ ꨗꨯꨱ ꨚꨗꩍ ꨀꨣꨩ ꨘꩆ ꨨꨭꨩ ꨣꨬ꩝ ꨎꨩ ꨆꨕꨮꩀ ꨤꩄ ꨨꨭꨩ ꨟꨪꩆ꩝ ꨘꩆ ꨟꩃ ꨟꨭꩀ ꨟꨰꩀ ꨟꨈꨰꩅ ꨘꩆ ꨟꩀ ꨨꨗꨩ ꨘꩆ ꨝꨴꨬ ꨆꨩ ꨎꨩ ꨆꨕꨮꩀ꩝ ꨝꨣꨭꨥ ꨟꩃ ꨎꨩ ꨆꨕꨮꩀ ꨈꨤꩌ ꨨꨗꨩ ꨘꩆ ꨗꨯꨱ ꨨꨟꨭꨩ ꨧꨯꨱꩃ ꨟꨈꨰꩅ ꨨꨕꨳꨮꩇ ꨐꨭꨩ꩝ ꨐꨭꨩ ꨗꨯꨱ ꨓꨮꩊ ꨨꨟꨭꨩ ꨝꨵꨯꨱꩍ ꨐꨭꨩ ꨡꨯꩍ ꨀꨣꨩ ꨕꨯꨱꩀ ꨡꨮꩃ ꨚꨕꨰ ꨙꩃ ꨚꩀ ꨚꨵꨭꩍ ꨕꨴꨬ꩝ ꨀꨣꨩ ꨘꩆ ꨕꨯꨱꩀ ꨡꨮꩃ ꨚꨕꨰ ꨤꨪꩀ ꨈꨮꩇ ꨕꨤꩌ ꨨꨟꨭꨩ ꨘꩆ꩝ ꨝꨵꨯꨱꩍ ꨎꨩ ꨆꨕꨮꩀ ꨈꨭꩀ ꨨꨗꨩ ꨘꩆ ꨝꨵꨯꨱꩍ ꨐꨭꨩ ꨌꨴꨯꩃ ꨡꨴꩌ ꨝꨵꨯꨱꩍ ꨐꨭꨩ ꨚꨡꨯꨱꩃ ꨨꨗꨩ ꨝꨵꨯꨱꩍ ꨐꨭꨩ ꨕꨫ ꨔꨮꨭ ꨤꨝꨪꩀ ꨆꨳꨮꩃ ꨚꨗꩍ ꨨꨝꩉ ꨅꨩ ꨈꨙꩃ ꨧꨩ ꨠꨓꨲꩍ ꨨꨣꨬ꩝ ꨀꨣꨩ ꨘꩆ ꨡꨮꩃ ꨚꨕꨰ ꨙꩃ ꨧꨪ ꨀꨝꨪꩍ ꨕꨫ ꨨꨟꨭꨩ꩝ ꨝꨣꨭꨥ ꨟꩃ ꨨꨕꨳꨮꩇ ꨐꨭꨩ ꨚꩍ ꨕꨫ ꨚꨙꨰꩍ ꨨꨗꨩ ꨘꩆ ꨝꨣꨭꨥ ꨟꩃ ꨨꨗꨩ ꨘꩆ ꨈꨵꨮꩍ ꨝꨵꨯꨱꩍ ꨚꩉ ꨡꨴꩌ ꨘꩆ ꨗꨯꨱ ꨒꨮꩇ ꨀꨣꨩ ꨘꩆ ꨧꨩ ꨕꨴꨬ꩝ ꨝꨵꨯꨱꩍ ꨐꨭꨩ ꨙꨶꨮꩄ ꨗꨯꨱ ꨟꩀ꩝ ꨘꩆ ꨟꩃ ꨐꨭꨩ ꨥꨮꩀ ꨟꨰ ꨝꨵꨯꨱꩍ ꨐꨭꨩ ꨚꨶꨮꩄ ꨏꩀ ꨆꨩ ꨨꨕꨳꨮꩇ ꨐꨭꨩ ꨤꩄ ꨟꨈꨰꩅ ꨗꨫ ꨝꨳꩀ ꨀꨥꩀ ꨀꨥꩉ ꨎꨮ ꨤꨶꨰ ꨕꨴꨬ ꨚꨗꩍ ꨚꨀꨝꨪꩍ ꨧꨩ ꨕꨚꨶꨮꩊ ꨀꨣꨩ ꨘꩆ ꨝꨵꨯꨱꩍ ꨐꨭꨩ ꨗꨯꨱ ꨚꩍ꩝ ꨡꨴꩌ ꨘꩆ ꨚꨮꩉ ꨗꨯꨱ ꨒꨮꩇ ꨓꨯꩀ ꨧꨩ ꨕꨴꨬ꩝ ꨠꨢꩍ ꨟꩃ ꨆꨣꨗꨪ ꨝꨵꨯꨱꩍ ꨨꨲꨩ ꨎꨶꨰ ꨚꩍ ꨓꨝꨵꨰꩅ ꨚꨙꨰꩍ ꨨꨗꨩ ꨘꩆ ꨎꨶꨰ ꨘꩆ ꨆꨮꨭ ꨚꨗꩍ ꨒꨮꩇ ꨀꨝꨪꩍ ꨧꨩ ꨕꨚꨶꨮꩊ ꨘꩆ ꨠꨓꨰ ꨀꨝꨪꩍ ꨓꨮꩊ ꨨꨕꨬ ꨆꨵꩍ ꨕꨫ ꨡꨮꩃ ꨚꨕꨰ ꨨꨲꨩ ꨎꨮ꩝ ꨠꨢꩍ ꨆꨮꨭ ꨙꨯꩌ ꨔꨯꨱꩍ ꨢꩃ ꨟꩀ ꨆꨮꨭ ꨌꨰꩀ꩝ ꨆꨮꨭ ꨗꨫ ꨓꨝꨵꨯꨱꩍ ꨤꩄ ꨨꨲꨩ ꨕꨫ ꨔꨮꨭ ꨅꨩ ꨟꨪꩆ ꨆꨮꨭ ꨎꨳꨯꩈ ꨣꨤꨯꨩ꩝ ꨎꨩ ꨆꨕꨮꩀ ꨙꨯꩌ ꨧꨯꨱꩃ ꨨꨕꨳꨮꩇ ꨐꨭꨩ ꨢꨮꨭ ꨘꩆ꩝ ꨟꩃ ꨐꨭꨩ ꨙꨯꩌ ꨚꨈꩅ ꨨꨕꨳꨮꩇ ꨐꨭꨩ ꨟꨪꩆ꩝ ꨐꨭꨩ ꨝꨓꨯꨱꩀ ꨕꨫ ꨨꨭꨩ ꨔꨬ ꨓꨮꩊ ꨅꨩ꩝ ꨐꨭꨩ ꨕꨫ ꨔꨮꨭ ꨚꨗꩍ ꨅꨩ꩝ ꨝꨵꨯꨱꩍ ꨐꨭꨩ ꨙꨯꩌ ꨤꨯꨱꩉ ꨧꨯꨱꩃ ꨨꨕꨳꨮꩇ ꨐꨭꨩ ꨓꨯꩀ ꨨꨕꨳꨮꩇ ꨐꨭꨩ ꨠꨢꨯꨱꩌ ꨐꨭꨩ꩝ ꨘꩆ ꨟꩃ ꨨꨕꨳꨮꩇ ꨐꨭꨩ ꨧꨯꨱꩃ ꨐꨭꨩ ꨝꨩ ꨀꨣꨩ ꨘꩆ ꨗꨯꨱ ꨧꩃ ꨝꨵꨯꨱꩍ ꨐꨭꨩ ꨚꨙꩉ ꨨꨕꨳꨮꩇ ꨐꨭꨩ ꨚꨝꨭꨩ ꨝꨣꨭꨥ ꨟꩃ ꨨꨕꨳꨮꩇ ꨐꨭꨩ ꨚꨝꨭꨩ ꨀꨣꨩ ꨘꩆ ꨝꨵꨯꨱꩍ ꨨꨕꨳꨮꩇ ꨐꨭꨩ ꨃꨥ ꨐꨭꨩ ꨟꨰ ꨡꨮꩃ ꨝꨭꨩ ꨘꩆ ꨧꨯꨱꩃ ꨟꨰꩀ ꨀꨟꨩ ꨨꨕꨳꨮꩇ ꨐꨭꨩ ꨝꨵꨯꨱꩍ ꨐꨭꨩ ꨙꨯꩌ ꨤꨯꨱꩉ ꨧꨯꨱꩃ ꨨꨕꨳꨮꩇ ꨐꨭꨩ ꨤꩄ ꨐꨭꨩ ꨕꨫ ꨡꨮꩃ ꨝꨭꨩ ꨅꨩ꩝ ꨝꨭꨩ ꨘꩆ ꨕꨆꨪꩀ ꨤꨯꨩ ꨤꨶꨰ ꨆꨩ ꨟꨰꩀ ꨧꨯꨱꩃ ꨀꨟꨩ ꨨꨕꨳꨮꩇ ꨐꨭꨩ ꨡꨮꩃ ꨝꨰꩀ ꨐꨭꨩ ꨕꨫ ꨡꨮꩃ ꨅꨩ꩝ ꨐꨭꨩ ꨤꩄ ꨐꨭꨩ ꨕꨯꨱꩀ ꨚꩀ ꨧꩃ ꨟꨰꩀ ꨐꨭꨩ ꨨꨣꨬ ꨨꨤꨬ ꨎꩃ ꨐꨭꨩ ꨗꨯꨱ ꨚꨗꩍ ꨀꨣꨩ ꨝꨩ ꨟꨰ ꨚꨝꨭꨩ ꨡꨮꩃ ꨎꨮ꩝ ꨝꨣꨭꨥ ꨟꩃ ꨨꨕꨳꨮꩇ ꨐꨭꨩ ꨧꨯꨱꩃ ꨟꨰꩀ ꨀꨟꨩ ꨨꨕꨳꨮꩇ ꨐꨭꨩ ꨡꨮꩃ ꨝꨭꨩ ꨘꩆ ꨀꨝꨪꩍ꩝ ꨕꨯꨱꩀ ꨆꨙꨯꨱꩃ ꨀꨣꨯꨩ ꨝꨭꨩ ꨕꨫ ꨕꨤꩌ ꨈꨯꨱꩀ ꨆꩃ ꨆꨴꨭꩃ ꨨꨕꨳꨮꩇ ꨐꨭꨩ ꨥꩉ ꨓꨔꩅ꩝ ꨝꨵꨯꨱꩍ ꨨꨕꨳꨮꩇ ꨐꨭꨩ ꨝꨩ ꨈꨯꨱꩀ ꨘꩆ ꨗꨯꨱ ꨥꩀ ꨊꨯꨱꩀ ꨤꨪꨑꨩ ꨕꨤꩌ ꨈꨪꩂ꩝ ꨝꨣꨭꨥ ꨟꩃ ꨓꨮꩊ ꨆꨴꨲꩍ ꨠꨤꩌ ꨐꨭꨩ ꨗꨯꨱ ꨓꨟꨩ ꨕꨤꩌ ꨈꨪꩂ ꨝꨵꨯꨱꩍ ꨐꨭꨩ ꨀꨌꨯꨱꩀ ꨀꨣꨯꨩ ꨝꨭꨩ ꨕꨫ ꨈꨯꨱꩀ ꨘꩆ ꨝꨵꨯꨱꩍ ꨐꨭꨩ ꨤꨳꩍ꩝ ꨝꨵꨯꨱꩍ ꨐꨭꨩ ꨨꨒꩀ ꨑꩌ ꨡꨯꩍ ꨝꨭꨩ ꨘꩆ ꨝꨊꨪ ꨣꨤꨯꨩ꩝ ꨝꨣꨭꨥ ꨟꩃ ꨐꨭꨩ ꨨꨣꨯꨱꩀ ꨀꨆꨯꨱꩀ ꨐꨭꨩ ꨓꨟꨩ ꨕꨤꩌ ꨈꨯꨱꩀ ꨆꩃ ꨘꩆ ꨝꨵꨯꨱꩍ ꨐꨭꨩ ꨤꨳꩍ ꨀꨣꨯꨩ ꨝꨭꨩ ꨘꩆ꩝ ꨝꨣꨭꨥ ꨟꩃ ꨈꨮꩊ ꨀꨆꨯꨱꩀ ꨐꨭꨩ ꨕꨫ ꨕꨤꩌ ꨈꨯꨱꩀ ꨆꩃ ꨘꩆ ꨐꨭꨩ ꨆꨳꨮꩃ ꨔꨶꩀ ꨀꨆꨯꨱꩀ ꨓꨝꨳꩀ ꨥꨮꩀ ꨕꨫ ꨨꨭꨩ ꨓꨴꨩ ꨅꨩ ꨝꨣꨭꨥ ꨟꩃ ꨐꨭꨩ ꨋꩇ ꨟꨮꨋꩇ ꨠꨣꨶꩀ꩝ ꨝꨵꨯꨱꩍ ꨐꨭꨩ ꨙꨪꩍ ꨠꨀꨯꨱꩌ ꨌꨳꨮꨥ ꨝꨵꨯꨱꩍ ꨐꨭꨩ ꨆꨟꨴꨯꨱ ꨝꨣꨭꨥ ꨟꩃ ꨨꨕꨳꨮꩇ ꨐꨭꨩ ꨧꨯꨱꩃ ꨧꨭꨠꨩ ꨐꨭꨩ ꨠꨣꨰ ꨓꨊꨪ ꨤꩄ ꨒꨮꩇ ꨨꨈꨰꩅ ꨝꨵꨯꨱꩍ ꨨꨲꨩ ꨕꨯꨱꩀ ꨆꨟꨴꨯꨱ ꨣꨤꨯꨩ ꨢꨮꨭ ꨘꩆ ꨎꨩ ꨆꨕꨮꩀ꩝ ꨝꨵꨯꨱꩍ ꨎꨩ ꨆꨕꨮꩀ ꨤꩄ ꨧꨭꨠꨩ ꨕꨨꨵꩀ ꨧꨯꨱꩃ ꨨꨕꨳꨮꩇ ꨕꨨꨵꩀ ꨎꨶꨰ ꨎꨶꨰ ꨟꨰ ꨎꨰꩀ ꨕꨨꨵꩀ ꨣꨤꨯꨩ ꨎꨶꨰ ꨠꨓꨰ ꨕꨨꨵꩀ ꨎꨮ꩝ ꨝꨵꨯꨱꩍ ꨟꨈꨰꩅ ꨨꨕꨳꨮꩇ ꨐꨭꨩ ꨝꨵꨮꩀ ꨌꨳꨮꨥ ꨝꨵꨯꨱꩍ ꨆꨳꨮꩃ ꨀꨳꨮꩀ ꨐꨭꨩ ꨕꨫ ꨝꨴꨬ ꨀꨳꨮꩀ ꨅꨩ꩝ ꨐꨭꨩ ꨤꩄ ꨐꨭꨩ ꨕꨯꨱꩀ ꨚꩀ ꨧꩃ ꨟꨰꩀ ꨐꨭꨩ ꨈꨶꨮꩆ ꨐꨭꨩ ꨣꨶꩀ ꨘꩆ ꨟꨰꩀ ꨧꨯꨱꩃ ꨀꨟꨩ ꨐꨭꨩ ꨕꨫ ꨇꨪꩆ ꨟꨰ ꨕꨯꨱꩀ ꨎꨰꩀ ꨐꨭꨩ ꨅꨩ꩝ ꨋꩆ ꨟꨰꩀ ꨧꨯꨱꩃ ꨀꨟꨩ ꨐꨭꨩ ꨟꨰ ꨎꨰꩀ ꨐꨭꨩ ꨘꩆ ꨚꨴꨯꨱꩀ ꨛꨯꨮ ꨧꩃ ꨐꨭꨩ ꨢꨶꨮꩀ ꨕꨫ ꨓꨳꩆ ꨀꨗꨰꩍ ꨐꨭꨩ ꨎꨮ꩝ ꨝꨣꨭꨥ ꨟꩃ ꨨꨕꨳꨮꩇ ꨐꨭꨩ ꨧꨯꨱꩃ ꨧꨭꨠꨩ ꨐꨭꨩ ꨕꨫ ꨇꨪꩆ ꨟꨰ ꨎꨰꩀ ꨐꨭꨩ ꨅꨩ꩝ ꨨꨕꨳꨮꩇ ꨐꨭꨩ ꨧꨯꨱꩃ ꨧꨭꨠꨩ ꨐꨭꨩ ꨗꨯꨱ ꨕꨶꩍ ꨈꨵꨮꩃ ꨀꨟꨳꨮꩃ ꨆꨩ ꨐꨭꨩ ꨕꨯꨱꩀ ꨥꨮꩀ ꨎꨶꨩ ꨧꨩ ꨕꨴꨬ ꨐꨭꨩ ꨘꩆ ꨟꩃ ꨕꨫ ꨆꨟꨴꨯꨱ ꨓꨴꨩ ꨅꨩ꩝ ꨝꨵꨯꨱꩍ ꨐꨭꨩ ꨕꨯꨱꩀ ꨔꨶꩀ ꨀꨆꨯꨱꩀ ꨐꨭꨩ ꨕꨫ ꨈꨯꨱꩀ ꨘꩆ ꨝꨵꨯꨱꩍ ꨐꨭꨩ ꨔꨶꩀ ꨕꨫ ꨨꨭꨩ ꨅꨩ꩝ ꨨꨕꨳꨮꩇ ꨐꨭꨩ ꨧꨯꨱꩃ ꨧꨭꨠꨩ ꨐꨭꨩ ꨝꨩ ꨀꨤꩀ ꨧꨯꨱꩃ ꨨꨤꨩ ꨗꨯꨱ ꨈꨵꨮꩃ ꨕꨫ ꨚꨎꨭꨥ꩝ ꨝꨣꨭꨥ ꨟꩃ ꨢꩃ ꨓꨴꨭꩆ ꨚꨶꨮꩄ ꨕꨫ ꨚꨎꨭꨥ ꨘꩆ ꨤꩄ ꨕꨫ ꨨꨭꨩ ꨔꨬ ꨋꩇ ꨕꨫ ꨐꨭꨩ ꨅꨩ ꨎꨩ ꨆꨕꨮꩀ ꨋꩇ ꨕꨫ ꨣꨭꩇ ꨎꨩ ꨆꨕꨮꩀ ꨥꨮꩀ ꨟꨪꩆ꩝ ꨀꨣꩀ ꨗꨫ ꨗꨯꨱ ꨝꨵꨮꩀ ꨌꨳꨪꨥ ꨘꩆ ꨡꨯꩍ ꨢꩃ ꨈꨯꨱꩀ ꨆꩃ ꨋꩇ ꨎꨮ꩝ ꨝꨣꨭꨥ ꨟꩃ ꨧꨭꨠꨩ ꨧꨯꨱꩃ ꨨꨕꨳꨮꩇ ꨐꨭꨩ ꨥꨮꩀ ꨠꨣꨰ ꨙꨯꩌ ꨧꨯꨱꩃ ꨅꩃ ꨧꨭꨠꨩ ꨐꨭꨩ ꨚꩀ ꨧꩃ ꨝꨣꨭꨥ ꨟꩃ ꨅꩃ ꨧꨭꨠꨩ ꨐꨭꨩ ꨗꨯꨱ ꨝꨵꨮꩀ ꨌꨳꨮꨥ ꨘꩆ ꨓꨈꨯꩀ ꨝꨵꨯꨱꩍ ꨡꨯꩍ ꨎꨩ ꨆꨕꨮꩀ ꨈꩊ ꨀꨆꨯꨱꩀ ꨕꨫ ꨈꨯꨱꩀ ꨆꩃ꩝ ꨝꨣꨭꨥ ꨟꩃ ꨅꩃ ꨧꨭꨠꨩ ꨐꨭꨩ ꨓꨊꨪ ꨐꨭꨩ ꨤꩄ ꨒꨮꩇ ꨨꨈꨰꩅ ꨝꨵꨯꨱꩍ ꨨꨲꨩ ꨈꨮꩊ ꨀꨆꨯꨱꩀ ꨕꨫ ꨈꨯꨱꩀ ꨆꩃ ꨢꨮꨭ ꨗꨫ꩝ ꨝꨣꨭꨥ ꨟꩃ ꨎꨩ ꨆꨕꨮꩀ ꨤꩄ ꨚꨴꨯꨱꩀ ꨛꨯꨮ ꨧꩃ ꨕꨨꨵꩀ ꨝꨩ ꨈꨯꨱꩀ ꨠꨣꨰ ꨓꨴꨶꩀ ꨕꨫ ꨀꨆꨯꨱꩀ ꨕꨨꨵꩀ꩝ ꨝꨣꨭꨥ ꨟꩃ ꨅꩃ ꨘꩆ ꨈꨗꨯꨱꩃ ꨕꨫ ꨐꨭꨩ ꨚꨶꨮꩄ ꨝꨵꨮꩀ ꨚꨶꨮꩄ ꨤꨯꨱꩉ ꨝꨵꨯꨱꩍ ꨅꩃ ꨘꩆ ꨟꩀ ꨈꩉ ꨎꨯꨱꩃ ꨝꨵꨯꨱꩍ ꨅꩃ ꨘꩆ ꨓꨯꨱꩃ ꨐꨭꨩ ꨙꨮ ꨢꩀ ꨙꨮ ꨤꨰꩀ꩝ ꨝꨵꨯꨱꩍ ꨓꨔꨶꩀ ꨈꨯꨱꩀ ꨕꨫ ꨀꨆꨯꨱꩀ ꨎꨩ ꨆꨕꨮꩀ ꨝꨵꨯꨱꩍ ꨎꨩ ꨆꨕꨮꩀ ꨝꨴꨭꩍ ꨙꨶꨮꩄ ꨗꨯꨱ ꨧꩃ ꨟꨰꩀ ꨐꨭꨩ ꨎꨮ꩝ ꨎꨩ ꨆꨕꨮꩀ ꨙꨶꨮꩄ ꨗꨯꨱ ꨧꩃ ꨝꨵꨯꨱꩍ ꨟꨰꩀ ꨧꨯꨱꩃ ꨀꨟꨩ ꨎꨩ ꨆꨕꨮꩀ ꨓꨊꨪ ꨎꨩ ꨆꨕꨮꩀ ꨤꩄ ꨨꨲꨩ ꨟꨰ ꨋꩇ ꨨꨈꨰꩅ ꨎꨩ ꨆꨕꨮꩀ꩝ ꨧꨕꨯꨮꩍ ꨐꨭꨩ ꨅꨩ ꨙꨯꩌ ꨧꨗꨪ ꨐꨭꨩ ꨅꨩ ꨙꨯꩌ ꩝ ꨣꨣꨤꨯꨩ ꨡꨮꩃ ꨟꨰꩀ ꨐꨭꨩ ꨓꨊꨪ ꨣꨤꨯꨩ ꨝꨵꨯꨱꩍ ꨐꨭꨩ ꨤꩄ ꨕꨨꨵꩀ ꨕꨫ ꨆꨳꨮꩃ ꨆꨟꨬ ꨓꨴꨩ ꨅꨩ ꨕꨨꨵꩀ ꨀꨤꩍ ꨧꨪ ꨆꨳꨮꩃ ꨆꨟꨬ ꨣꨤꨯꨩ ꨕꨨꨵꩀ ꨆꨳꨮꩃ ꨆꨟꨬ ꨕꨯꨮꩍ ꨘꩆ ꨎꨮ꩝ ꨟꩃ ꨗꨫ ꨓꨮꩊ ꨨꨕꨬ ꨕꨨꨵꩀ ꨕꨫ ꨆꨳꨮꩃ ꨆꨟꨬ ꨓꨴꨩ ꨅꨩ ꨁꨗꨩ ꨀꨟꨩ ꨆꨭꨟꨬ ꨏꩀ ꨣꨤꨯꨩ꩝ ꨟꨰꩀ ꨧꨯꨱꩃ ꨀꨟꨩ ꨐꨭꨩ ꨚꨙꩉ ꨐꨭꨩ ꨥꨮꩀ ꨗꨯꨱ ꨚꩀ ꨧꩃ ꨨꨕꨳꨮꩇ ꨐꨭꨩ ꨥꨮꩀ ꨙꩃ ꨤꨪꨟꨩ ꨘꩌ ꨘꨝꨮꩃ ꨤꨪꨎꩃ ꨐꨭꨩ ꨅꨩ ꨗꨯꨱ ꨅꨩ ꨣꨬ ꨎꨩ ꨆꨕꨮꩀ ꨤꩄ ꨢꩍ ꨟꨰꩀ ꨧꨯꨱꩃ ꨀꨟꨩ ꨚꨟꨓꨰ ꨕꨨꨵꩀ ꨨꨤꩉ ꨨꨤꨬ ꨥꨮꩀ ꨗꨯꨱ ꨚꩀ ꨧꩃ ꨨꨕꨳꨮꩇ ꨐꨭꨩ ꨥꨮꩀ ꨘꩆ ꨐꨭꨩ ꨕꨫ ꨗꨯꨱ ꨓꨴꨩ ꨅꨩ꩝ ꨕꨯꨱꩀ ꨓꨮꩊ ꨁꨗꨩ ꨀꨟꨩ ꨨꨕꨳꨮꩇ ꨎꨩ ꨆꨕꨮꩀ ꨤꩄ ꨧꨯꨱꩃ ꨨꨕꨳꨮꩇ ꨥꨮꩀ ꨤꩄ ꨀꨣꩀ ꨗꨫ ꨠꨤꨭꨥ ꨟꨰꩀ ꨀꨟꨩ ꨣꨤꨯꨩ ꨀꨗꩀ ꨤꨶꨰ ꨐꨭꨩ ꨝꨰꩀ ꨤꨆꨬ ꨠꨌꨰ ꨟꨪꩆ꩝ ꨝꨣꨭꨥ ꨟꩃ ꨕꨶꨩ ꨨꨕꨳꨮꩇ ꨚꨧꩃ ꨐꨭꨩ ꨆꨵꩀ ꨈꨮꩇ ꨎꨮ꩞