ꨓꩀ ꨕꨫ ꨆꩊ ꨘꩆ ꨟꨭꨩ ꨆꨎꨯꨱꩃ ꨧꨯꨱꩃ ꨟꨭꨩ ꨨꨤꨮꩀ ꨕꨶꨩ ꨂꨣꩃ ꨘꩆ ꨧꨩ ꨂꨣꩃ ꨀꨗꩀ ꨎꨳꨯꨮꩃ ꨧꨩ ꨂꨣꩃ ꨀꨗꩀ ꨣꨯꨱꩃ ꨟꨭꨩ ꨨꨤꨮꩀ ꨘꩆ ꨀꨗꩀ ꨎꨳꨯꨮꩃ ꨟꨭꨩ ꨆꨎꨯꨱꩃ ꨘꩆ ꨀꨗꩀ ꨣꨯꨱꩃ꩝ ꨕꨶꨩ ꨂꨣꩃ ꨘꩆ ꨙꨮ ꨈꨮꩇ ꨕꨫ ꨔꨮꨭ ꨆꨩ ꨂꨣꩃ ꨨꨤꨬ ꨄꨰ ꨂꨣꩃ ꨨꨤꨬ ꨀꨕꨬ ꨅꨩ꩝ ꨧꨩ ꨘꨧꩀ ꨧꨯꨱꩃ ꨈꨮꩇ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨘꩆ ꨝꨶꨬ ꨕꨫ ꨨꨓꨰ ꨡꨯꩍ ꨕꨶꨩ ꨂꨣꩃ ꨘꩆ ꨙꨮ ꨈꨮꩇ ꨕꨫ ꨔꨮꨭ ꨆꨩ ꨂꨣꩃ ꨨꨤꨬ ꨎꨳꨯꨮꩃ ꨄꨰ ꨂꨣꩃ ꨨꨤꨬ ꨎꨳꨯꨮꩃ ꨀꨕꨬ ꨅꨩ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨘꩆ ꨚꨙꩉ ꨟꨭꨩ ꨨꨤꨮꩀ ꨃꨥ ꨟꨭꨩ ꨆꨎꨯꨱꩃ ꨃꨥ ꨄꨰ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨙꨯꩌ ꨥꨮꩀ ꨧꨯꨱꩃ ꨟꨭꩀ ꨟꨰꩀ ꨐꨭꨩ ꨥꨮꩀ꩝ ꨤꩄ ꨟꨭꨩ ꨆꨎꨯꨱꩃ ꨙꨮ ꨐꨭꨩ ꨐꨭꨩ ꨤꨪꨎꩃ ꨙꨮ ꨟꨭꨩ ꨆꨎꨯꨱꩃ ꨀꨣꩀ ꨗꨫ ꨟꨰꩀ ꨐꨭꨩ ꨆꨳꨮꩃ ꨋꩇ ꨨꨝꩉ ꨕꨫ ꨐꨭꨩ ꨝꨵꨯꨱꩍ ꨐꨭꨩ ꨌꨳꨪꩇ ꨎꨮ ꨨꨤꨬ ꨃꨥ ꨟꨭꨩ ꨆꨎꨯꨱꩃ ꨃꨥ ꨄꨰ ꨘꩆ ꨐꨭꨩ ꨕꨫ ꨃꨥ ꨅꨩ꩝ ꨝꨣꨭꨥ ꨟꩃ ꨟꨰꩀ ꨐꨭꨩ ꨚꨙꩉ ꨟꨭꨩ ꨆꨎꨯꨱꩃ ꨃꨥ ꨟꨭꨩ ꨨꨤꨮꩀ ꨃꨥ ꨄꨰ ꨥꨮꩀ ꨤꨪꨎꩃ ꨟꨭꨩ ꨆꨎꨯꨱꩃ ꨌꨳꨮꩇ ꨃꨥ ꨄꨰ ꨣꨬ꩝ ꨝꨣꨭꨥ ꨟꩃ ꨧꨩ ꨨꨣꨬ ꨟꨭꨩ ꨆꨎꨯꨱꩃ ꨃꨥ ꨟꨭꨩ ꨨꨤꨮꩀ ꨃꨥ ꨄꨰ ꨧꨩ ꨨꨣꨬ ꨟꨭꨩ ꨆꨎꨯꨱꩃ ꨃꨥ ꨟꨭꨩ ꨨꨤꨮꩀ ꨃꨥ ꨠꨈꨰꩄ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨙꨯꩌ ꨥꨮꩀ ꨧꨯꨱꩃ ꨟꨰꩀ ꨐꨭꨩ ꨥꨮꩀ ꨤꩄ ꨠꨢꩍ ꨟꨭꨩ ꨆꨎꨯꨱꩃ ꨃꨥ ꨐꨭꨩ ꨃꨥ ꨠꨈꨰꩄ ꨝꨪꨓꨴꨭꩍ ꨃꨥ ꨐꨭꨩ ꨝꨵꨯꨱꩍ ꨃꨥ ꨠꨈꨰꩄ ꨠꨢꩍ ꨆꨳꨮꩃ ꨃꨥ ꨐꨭꨩ ꨃꨥ ꨄꨰ ꨝꨪꨓꨴꨭꩍ ꨃꨥ ꨄꨰ ꨌꨮ ꨀꨣꩀ ꨗꨫ ꨧꨩ ꨨꨣꨬ ꨃꨥ ꨄꨰ ꨧꨩ ꨨꨣꨬ ꨃꨥ ꨠꨈꨰꩄ꩝ ꨐꨭꨩ ꨠꨤꨭꨥ ꨕꨫ ꨈꨮꩇ ꨓꨐꨴꨯꨱ ꨐꨭꨩ ꨣꨤꨯꨩ꩝ ꨝꨣꨭꨥ ꨟꩃ ꨟꨰꩀ ꨐꨭꨩ ꨟꩀ ꨌꨗꨰꩍ ꨝꨴꨬ ꨆꨩ ꨠꨩ ꨨꨤꨮꩀ ꨧꨯꨱꩃ ꨟꨭꨩ ꨆꨎꨯꨱꩃ ꨗꨯꨱ ꨢꨮꨭ ꨘꨢꩍ ꨟꨭꨩ ꨆꨎꨯꨱꩃ ꨢꨮꨭ ꨀꨆꨩꩆ ꨣꨤꨯꨩ ꨕꨫ ꨟꨭꨩ ꨨꨤꨮꩀ ꨘꩆ ꨟꨭꨩ ꨆꨎꨯꨱꩃ ꨎꨳꨯꨮꩃ ꨄꨰ꩝ ꨠꨢꩍ ꨟꨭꨩ ꨨꨤꨮꩀ ꨢꨮꨭ ꨀꨆꨩꩆ ꨣꨤꨯꨩ ꨕꨫ ꨟꨭꨩ ꨆꨎꨯꨱꩃ ꨘꩆ ꨟꨭꨩ ꨨꨤꨮꩀ ꨎꨳꨯꨮꩃ ꨄꨰ꩝ ꨘꩆ ꨕꨶꨩ ꨂꨣꩃ ꨐꨭꨩ ꨝꨩ ꨈꨮꩇ ꨗꨯꨱ ꨟꩀ ꨀꨆꨩꩆ ꨐꨭꨩ ꨗꨯꨱ ꨡꨯꩍ ꨧꨩ ꨝꨯꨱꩍ ꨕꨗꨯꨱ ꨝꨳꩀ ꨚꨴꨯꨱꩃ ꨀꨆꨩꩆ ꨝꨳꩀ ꨣꨤꨯꨩ ꨕꨤꩌ ꨕꨗꨯꨱ ꨘꩆ ꨀꨆꨩꩆ ꨨꨈꨰꩀ ꨤꨪꨎꩃ ꨨꨭꨩ ꨣꨬ꩝ ꨕꨫ ꨣꨪꩌ ꨟꨓꨩ ꨀꨆꨩꩆ ꨕꨤꩌ ꨕꨗꨯꨱ ꨘꩆ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨓꨴꨭꩆ ꨐꨭꩀ ꨀꨳꨩ ꨘꩆ ꨝꨵꨯꨱꩍ ꨣꨚꨮꩀ ꨀꨆꨩꩆ ꨨꨤꨬ ꨟꨭꨩ ꨨꨤꨮꩀ ꨀꨤꩍ ꨆꨳꨮꩃ ꨐꨭꩀ ꨀꨳꨩ ꨣꨚꨮꩀ ꨀꨆꨩꩆ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨣꨚꨮꩀ ꨀꨆꨩꩆ ꨘꩆ ꨨꨭꨩ ꨙꩃ ꨧꨩ ꨚꨵꨭꩍ ꨆꨵꨮꨭ ꨝꨯꨱꩍ ꨀꨆꨩꩆ꩝ ꨘꩆ ꨟꩃ ꨟꨭꨩ ꨨꨤꨮꩀ ꨓꨴꨭꩆ ꨐꨭꩀ ꨀꨳꨩ ꨘꩆ ꨝꨵꨯꨱꩍ ꨣꨚꨮꩀ ꨀꨆꨩꩆ꩝ ꨟꨭꨩ ꨆꨎꨯꨱꩃ ꨣꨚꨮꩀ ꨀꨆꨩꩆ ꨙꩃ ꨧꨩ ꨟꨓꩍ ꨌꨗꨰꩍ꩝ ꨟꨭꨩ ꨨꨤꨮꩀ ꨣꨚꨮꩀ ꨓꨯꩀ ꨧꨩ ꨚꨵꨭꩍ ꨝꨯꨱꩍ ꨀꨆꨩꩆ ꨆꨴꨶꩀ꩝ ꨘꩆ ꨟꩃ ꨟꨭꨩ ꨆꨎꨯꨱꩃ ꨣꨚꨮꩀ ꨀꨆꨩꩆ ꨝꨵꨯꨱꩍ ꨟꨭꨩ ꨆꨎꨯꨱꩃ ꨌꨰꩀ ꨌꨗꨰꩍ ꨀꨆꨩꩆ ꨓꩀ ꨕꨗꨯꨱ ꨘꩆ ꨝꨵꨯꨱꩍ ꨟꨭꨩ ꨆꨎꨯꨱꩃ ꨗꨯꨱ ꨕꨯꨱꩀ ꨚꨕꨬ ꨈꨵꨰꩍ ꨚꩀ ꨊꨯꨱꩀ ꨔꨭꨩ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨕꨯꨱꩀ ꨣꨚꨮꩀ ꨀꨆꨩꩆ ꨕꨤꩌ ꨕꨗꨯꨱ ꨘꩆ ꨓꨜꨳꨩ ꨌꨗꨰꩍ ꨀꨆꨩꩆ ꨟꨭꨩ ꨆꨎꨯꨱꩃ꩝ ꨝꨵꨯꨱꩍ ꨟꨭꨩ ꨨꨤꨮꩀ ꨣꨚꨮꩀ ꨗꨯꨱ ꨣꨚꨮꩀ ꨟꨰ ꨝꨵꨯꨱꩍ ꨟꨭꨩ ꨨꨤꨮꩀ ꨆꨵꨰꩀ ꨀꨆꨩꩆ ꨟꨭꨩ ꨆꨎꨯꨱꩃ꩝ ꨤꨰꩀ ꨕꨫ ꨟꨭꨩ ꨨꨤꨮꩀ ꨣꨤꨯꨩ ꨀꨆꨩꩆ ꨟꨭꨩ ꨆꨎꨯꨱꩃ ꨕꨆꨪꩀ ꨀꨆꨩꩆ ꨥꨮꩀ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨟꨰ ꨓꨊꨪ ꨟꨭꨩ ꨨꨤꨮꩀ ꨤꩄ ꨔꨬ ꨟꩀ ꨀꨆꨩꩆ ꨕꨫ ꨌꨗꨰꩍ ꨀꨝꨪꩍ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨆꨟꨵꩍ ꨤꩄ ꨐꨭꨩ ꨕꨫ ꨨꨭꨩ ꨟꩀ ꨅꨩ꩝ ꨤꨪꨎꩃ ꨟꨭꨩ ꨆꨎꨯꨱꩃ ꨕꨫ ꨤꩄ ꨨꨝꩉ ꨅꨩ ꨣꨬ꩝ ꨟꩃ ꨟꨭꨩ ꨆꨎꨯꨱꩃ ꨔꨮꨭ ꨟꨪꩆ ꨆꨩ ꨟꨭꨩ ꨨꨤꨮꩀ ꨆꨵꨰꩀ ꨀꨆꨩꩆ ꨐꨭꨩ꩝ ꨝꨣꨭꨥ ꨟꨭꨩ ꨆꨎꨯꨱꩃ ꨕꨯꨱꩀ ꨧꨗꩃ ꨡꨶꩍ ꨆꩉ ꨧꨩ ꨕꨴꨬ ꨐꨭꨩ ꨢꩍ ꨗꨯꨱ ꨧꩃ ꨝꨵꨯꨱꩍ ꨨꨶꨮꩄ ꨕꨫ ꨟꨰꩀ ꨣꨯꨱꩃ ꨐꨭꨩ ꨀꨓꨯꨱꩃ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨓꨴꨭꩆ ꨣꨚꨮꩀ ꨀꨆꨩꩆ ꨥꨮꩀ ꨨꨭꨩ ꨧꨩ ꨝꨯꨱꩍ ꨀꨆꨩꩆ ꨌꨣꨯꨱꩀ ꨆꨵꨮꨭ ꨝꨯꨱꩍ ꨀꨆꨩꩆ ꨌꨆꨵꨰꩀ꩝ ꨨꨤꨬ ꨟꨭꨩ ꨨꨤꨮꩀ ꨘꩆ ꨐꨭꨩ ꨗꨯꨱ ꨧꩃ ꨕꨤꨮꨭ ꨐꨭꨩ ꨎꨮ꩝ ꨘꩆ ꨟꩃ ꨟꨭꨩ ꨆꨎꨯꨱꩃ ꨗꨯꨱ ꨧꩃ ꨨꨕꨬ꩝ ꨝꨵꨯꨱꩍ ꨟꨭꨩ ꨆꨎꨯꨱꩃ ꨝꨩ ꨧꨩ ꨝꨯꨱꩍ ꨀꨆꨩꩆ ꨌꨣꨯꨱꩀ ꨗꨯꨱ ꨆꨣꨭꩃ ꨕꨤꩌ ꨝꨊꨭꩆ ꨚꨳꨯꨮꩍ ꨣꨯꨱꩃ ꨋꩇ ꨀꨕꨬ ꨧꨩ ꨓꨳꩆ꩝ ꨨꨤꨬ ꨆꨵꨮꨭ ꨝꨯꨱꩍ ꨀꨆꨩꩆ ꨓꨆꨵꨰꩀ ꨓꨴꨩ ꨘꩆ ꨐꨭꨩ ꨝꨩ ꨗꨯꨱ ꨧꩃ ꨟꨭꨩ ꨆꨎꨯꨱꩃ ꨧꨗꩃ ꨤꩄ ꨀꨆꨩꩆ ꨌꨣꨯꨱꩀ ꨘꩆ ꨐꨭꨩ ꨟꩀ ꨓꨯꩀ ꨧꨩ ꨝꨯꨱꩍ ꨠꨓꨶꨬ ꨕꨴꨮꩍ ꨐꨭꨩ ꨝꨣꨭꨥ ꨟꩃ ꨐꨭꨩ ꨣꨯꨱꩃ ꨚꨳꨯꨮꩍ ꨋꩇ ꨀꨕꨬ꩝ ꨨꨤꨬ ꨆꨵꨮꨭ ꨝꨯꨱꩍ ꨀꨆꨩꩆ ꨌꨆꨵꨰꩀ ꨘꩆ ꨕꨫ ꨨꨭꨩ ꨠꨓꨶꨬ ꨕꨴꨮꩍ ꨐꨭꨩ ꨅꨩ ꨝꨣꨭꨥ ꨟꩃ ꨐꨭꨩ ꨝꨩ ꨗꨯꨱ ꨆꨩ ꨟꨰꩀ ꨣꨯꨱꩃ ꨐꨭꨩ꩝ ꨝꨣꨭꨥ ꨟꩃ ꨟꨰꩀ ꨣꨯꨱꩃ ꨐꨭꨩ ꨡꨯꩍ ꨐꨭꨩ ꨟꩀ ꨀꨆꨩꩆ ꨕꨆꨪꩀ ꨝꨵꨯꨱꩍ ꨟꨰꩀ ꨣꨯꨱꩃ ꨐꨭꨩ ꨚꨙꩉ ꨐꨭꨩ ꨃꨥ ꨟꨭꨩ ꨨꨤꨮꩀ ꨃꨥ ꨄꨰ ꨤꨪꨎꩃ ꨐꨭꨩ ꨌꨳꨪꩇ ꨃꨥ ꨄꨰ ꨣꨬ꩝ ꨨꨤꨬ ꨀꨇꩆ ꨤꩄ ꨟꨭꨩ ꨨꨤꨮꩀ ꨆꨵꨰꩀ ꨀꨆꨩꩆ ꨐꨭꨩ ꨘꩆ ꨐꨭꨩ ꨕꨫ ꨀꨇꩆ ꨧꨯꨱꩃ ꨟꨰꩀ ꨣꨯꨱꩃ ꨐꨭꨩ ꨅꨩ꩝ ꨝꨣꨭꨥ ꨟꩃ ꨟꨰꩀ ꨐꨭꨩ ꨚꨙꩉ ꨗꨯꨱ ꨈꨵꨮꩃ ꨚꨝꨰꩈ ꨟꨰꩀ ꨐꨭꨩ ꨝꨣꨭꨥ ꨝꨵꨬ꩝ ꨈꨶꨮꩆ ꨐꨭꨩ ꨚꨮꩍ ꨚꨝꨰꩈ ꨗꨯꨱ ꨈꨵꨮꩃ ꨐꨭꨩ ꨓꨳꩇ ꨗꨯꨱ ꨈꩆ ꨝꨊꨭꩆ ꨆꨴꨭꩃ ꨐꨭꨩ ꨣꨯꨱꩃ ꨀꨆꨩꩆ ꨘꩆ ꨝꨵꨯꨱꩍ ꨣꨥꨮꩃ ꨀꨆꨩꩆ ꨘꩆ ꨝꨵꨯꨱꩍ ꨐꨭꨩ ꨤꩄ ꨀꨮ ꨌꨣꨯꨱꩀ ꨄꨰ ꨟꨰ ꨣꨥꨮꩃ ꨨꨲꨩ ꨝꨳꩀ ꨎꨮ ꨄꨰ ꨟꩀ ꨨꨲꨩ ꨝꨵꨯꨱꩍ ꨄꨰ ꨡꨯꩍ ꨨꨲꨩ ꨓꨯꩀ ꨧꨩ ꨕꨴꨬ ꨠꨓꨶꨬ ꨕꨴꨮꩍ ꨣꨭꩇ ꨄꨰ ꨣꨤꨯꨩ꩝ ꨝꨣꨭꨥ ꨟꩃ ꨄꨰ ꨀꨗꨪꩅ ꨣꨭꩇ ꨄꨰ ꨝꨵꨯꨱꩍ ꨄꨰ ꨡꨯꩍ ꨨꨲꨩ ꨠꨓꨶꨬ ꨕꨴꨮꩍ ꨄꨰ ꨝꨵꨯꨱꩍ ꨄꨰ ꨀꨗꨪꩅ ꨓꨮꩊ ꨨꨲꨩ꩝ ꨀꨣꩀ ꨗꨫ ꨄꨰ ꨣꨯꨱꩃ ꨨꨩ ꨋꩇ ꨀꨕꨬ ꨧꨩ ꨓꨳꩆ ꨧꨯꨱꩃ ꨄꨰ꩝ ꨐꨭꨩ ꨙꨯꩌ ꨧꨯꨱꩃ ꨀꨆꨩꩆ ꨌꨣꨯꨱꩀ ꨘꩆ ꨢꨮꨭ ꨘꩆ ꨝꨵꨯꨱꩍ ꨐꨭꨩ ꨓꨳꩇ ꨚꨝꨰꩈ ꨗꨯꨱ ꨈꨵꨮꩃ ꨎꨤꨩ ꨝꨵꨯꨱꩍ ꨐꨭꨩ ꨓꨳꩇ ꨚꨝꨰꩈ ꨥꨮꩀ ꨟꨰ ꨧꩃ ꨝꨵꨯꨱꩍ ꨆꨣꨮꩀ ꨚꨝꨰꩈ ꨘꩆ꩝ ꨝꨵꨯꨱꩍ ꨐꨭꨩ ꨓꨯꨱꩍ ꨤꨔꨬ ꨝꨩ ꨗꨯꨱ ꨨꨶꩀ ꨓꨯꨱꩌ ꨀꨆꨩꩆ ꨘꩆ ꨝꨵꨯꨱꩍ ꨐꨭꨩ ꨨꨶꩀ꩝ ꨐꨭꨩ ꨝꨩ ꨤꨪꨔꨬ ꨗꨯꨱ ꨓꨯꨱꩌ ꨀꨆꨩꩆ ꨌꨣꨯꨱꩀ ꨘꩆ ꨝꨵꨯꨱꩍ ꨐꨭꨩ ꨤꩄ ꨀꨮ ꨌꨣꨯꨱꩀ ꨟꨰ ꨨꨶꩀ ꨤꨪꨔꨬ ꨨꨯꨱꩀ ꨤꨪꨔꨬ ꨎꨴꨭꩍ ꨄꨰ ꨝꨵꨯꨱꩍ ꨟꨭꨩ ꨆꨎꨯꨱꩃ ꨟꩀ ꨤꨪꨔꨬ ꨆꨵꩀ ꨓꨟꨩ ꨕꨤꩌ ꨝꨊꨭꩆ ꨘꩆ ꨆꨩ ꨀꨆꨩꩆ ꨌꨣꨯꨱꩀ ꨘꩆ ꨡꨮꩃ꩝ ꨝꨵꨯꩍ ꨟꨭꨩ ꨆꨎꨯꨱꩃ ꨨꨶꩀ ꨓꩀ ꨝꨊꨭꩆ ꨘꩆ ꨓꨯꨱꩌ ꨀꨆꨩꩆ ꨘꩆ ꨐꨭꨩ ꨨꨶꩀ ꨝꨵꨯꨱꩍ ꨓꩀ ꨝꨊꨭꩆ ꨘꩆ ꨟꩃ ꨐꨭꨩ ꨥꨮꩀ ꨟꨰ ꨧꩃ꩝ ꨕꩀ ꨨꨣꨬ ꨕꩀ ꨐꨭꨩ ꨝꨩ ꨤꨪꨔꨬ ꨗꨯꨱ ꨨꨶꩀ ꨓꨯꨱꩌ ꨀꨆꨩꩆ ꨘꩆ꩝ ꨓꨮꩊ ꨨꨣꨬ ꨨꨕꨬ ꨐꨭꨩ ꨝꨩ ꨤꨔꨬ ꨗꨯꨱ ꨨꨶꩀ ꨓꨯꨱꩌ ꨀꨆꨩꩆ ꨘꩆ ꨝꨵꨯꨱꩍ ꨐꨭꨩ ꨃꨥ ꨀꨆꨩꩆ ꨨꨶꩀ ꨝꨵꨯꨱꩍ ꨀꨆꨩꩆ ꨌꨣꨯꨱꩀ ꨘꩆ ꨣꨙꩇ ꨧꨯꨱꩃ ꨐꨭꨩ ꨝꨵꨯꨱꩍ ꨀꨆꨩꩆ ꨌꨣꨯꨱꩀ ꨘꩆ ꨟꨨꨪꩅ ꨐꨭꨩ ꨃꨥ ꨨꨶꩀ ꨝꨵꨯꨱꩍ ꨀꨆꨩꩆ ꨘꩆ ꨧꨰꩅ ꨟꨰ ꨨꨶꩀ ꨓꨯꨱꩌ ꨐꨭꨩ ꨙꩃ ꨧꨩ ꨝꨤꩆ ꨕꨯꩌ ꨕꨫ ꨗꨯꨱ ꨨꨶꩀ ꨓꨯꨱꩌ ꨀꨆꨩꩆ ꨘꩆ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨡꨯꩍ ꨐꨭꨩ ꨝꨩ ꨤꨪꨔꨬ ꨗꨯꨱ ꨝꨵꨯꨱꩍ ꨟꨭꨩ ꨨꨤꨮꩀ ꨓꨶꨬ ꨗꨯꨱ ꨆꨴꩀ ꨀꨳꨮꩀ ꨡꨯꩍ ꨟꨭꨩ ꨆꨎꨯꨱꩃ ꨕꨯꨱꩀ ꨨꨶꩀ ꨝꨵꨯꨱꩍ ꨟꨭꨩ ꨆꨎꨯꨱꩃ ꨃꨥ ꨀꨆꨩꩆ ꨘꩆ ꨓꨈꨯꩀ ꨟꨰ ꨝꨵꨯꨱꩍ ꨕꨯꨱꩀ ꨨꨶꩀ ꨧꨯꨱꩃ ꨐꨭꨩ꩝ ꨘꩆ ꨟꩃ ꨟꨭꨩ ꨨꨤꨮꩀ ꨥꨮꩀ ꨗꨯꨱ ꨧꩃ꩝ ꨓꨮꩊ ꨨꨣꨬ ꨨꨕꨬ ꨟꨭꨩ ꨆꨎꨯꨱꩃ ꨗꨯꨱ ꨈꨵꨮꩃ ꨚꨝꨰꩈ ꨓꨴꨭꩍ ꨝꨵꨯꨱꩍ ꨚꨝꨰꩈ ꨘꩆ ꨡꨮꩃ ꨆꨚꩍ ꨂꨣꩃ ꨝꨵꨯꨱꩍ ꨟꨭꨩ ꨆꨎꨯꨱꩃ ꨕꨯꨱꩀ ꨎꩊ ꨤꨆꨮꨭ ꨚꨝꨰꩈ ꨕꨫ ꨂꨣꩃ ꨕꨫ ꨨꨭꨩ ꨆꨳꨮꩃ ꨗꨯꨱ ꨣꨥꨮꩃ ꨀꨆꨩꩆ ꨘꩆ ꨅꨩ꩝ ꨝꨵꨯꨱꩍ ꨟꨭꨩ ꨨꨤꨮꩀ ꨕꨯꨱꩀ ꨕꨫ ꨧꩃ ꨝꨵꨯꨱꩍ ꨟꨭꨩ ꨨꨤꨮꩀ ꨝꨩ ꨤꨪꨔꨬ ꨗꨯꨱ ꨨꨶꩀ ꨓꨯꨱꩌ ꨀꨆꨩꩆ ꨘꩆ ꨚꩀ ꨝꨊꨭꩆ ꨀꨳꨩ ꨘꩆ ꨝꨵꨯꨱꩍ ꨟꨭꨩ ꨨꨤꨮꩀ ꨃꨥ ꨀꨆꨩꩆ ꨘꩆ ꨓꨈꨯꩀ ꨟꨰ ꨨꨶꩀ ꨝꨵꨯꨱꩍ ꨀꨆꨩꩆ ꨘꩆ ꨟꨨꨪꩅ ꨟꨭꨩ ꨨꨤꨮꩀ ꨃꨥ ꨨꨶꩀ ꨀꨆꨩꩆ ꨘꩆ ꨚꨧꨯꩌ ꨤꩄ ꨟꨭꨩ ꨆꨎꨯꨱꩃ ꨃꨥ ꨐꨭꨩ ꨨꨶꩀ ꨝꨵꨯꨱꩍ ꨧꨰꩅ ꨓꨈꨯꩀ ꨟꨰ ꨆꨳꨮꩃ ꨨꨶꩀ ꨝꨵꨯꨱꩍ ꨟꨭꨩ ꨨꨤꨮꩀ ꨚꩍ ꨟꩀ ꨀꨆꨩꩆ ꨘꩆ ꨝꨩ ꨗꨯꨱ ꨧꩃ ꨝꨵꨯꨱꩍ ꨟꨭꨩ ꨨꨤꨮꩀ ꨆꨯꨱꩍ ꨀꨆꨩꩆ ꨘꩆ ꨕꨶꨩ ꨀꨥꨰꩅ ꨝꨵꨯꨱꩍ ꨟꨭꨩ ꨨꨤꨮꩀ ꨨꨓꨭꩀ ꨠꨔꩌ ꨝꨵꨯꨱꩍ ꨠꨩ ꨨꨤꨮꩀ ꨨꨶꩀ ꨡꨮꩃ ꨀꨆꨩꩆ ꨘꩆ ꨀꨝꨪꩍ꩝ ꨟꨭꨩ ꨨꨤꨮꩀ ꨡꨮꩃ ꨀꨆꨩꩆ ꨘꩆ ꨝꨵꨯꨱꩍ ꨕꨫ ꨨꨭꨩ ꨝꨴꨬ ꨆꨩ ꨟꨰꩀ ꨐꨭꨩ ꨧꨯꨱꩃ ꨟꨭꨩ ꨆꨎꨯꨱꩃ ꨔꨮꨭ ꨅꨩ꩝ ꨝꨣꨭꨥ ꨟꩃ ꨨꨣꨬ ꨨꨕꨬ ꨝꨵꨯꨱꩍ ꨟꨭꨩ ꨆꨎꨯꨱꩃ ꨝꨩ ꨤꨔꨬ ꨗꨯꨱ ꨚꩀ ꨝꨊꨭꩆ ꨀꨳꨩ ꨘꩆ ꨝꨵꨯꨱꩍ ꨟꨭꨩ ꨆꨎꨯꨱꩃ ꨃꨥ ꨀꨆꨩꩆ ꨘꩆ ꨨꨶꩀ ꨝꨵꨯꨱꩍ ꨕꨫ ꨡꨯꩍ ꨀꨆꨩꩆ ꨘꩆ ꨧꨰꩅ ꨓꨈꨯꩀ ꨟꨰ ꨨꨶꩀ ꨧꨯꨱꩃ ꨠꨩ ꨆꨎꨯꨱꩃ ꨅꨩ ꨝꨵꨯꨱꩍ ꨟꨭꨩ ꨆꨎꨯꨱꩃ ꨓꨴꨭꩆ ꨣꨚꨮꩀ ꨕꨤꩌ ꨝꨊꨭꩆ ꨘꩆ ꨀꨳꨮꩀ ꨕꨫ ꨡꨯꩍ ꨀꨆꨩꩆ ꨘꩆ ꨅꨩ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨨꨳꨩ ꨡꨶꩍ ꨆꩉ ꨧꨗꩃ ꨤꩄ ꨆꨩ ꨐꨭꨩ ꨕꨫ ꨨꨭꨩ ꨈꨮꩇ ꨕꨫ ꨨꨭꨩ ꨝꨭꨓꨳꩆ ꨅꨩ ꨐꨭꨩ ꨣꨯꨱꩃ ꨀꨆꨩꩆ ꨘꩆ ꨚꨳꨯꨮꩍ ꨋꩇ ꨀꨕꨬ ꨐꨭꨩ ꨝꨵꨯꨱꩍ ꨀꨣꩀ ꨗꨫ ꨕꨫ ꨔꨮꨭ ꨤꨝꨪꩀ ꨆꨩ ꨔꨬ ꨝꨵꨯꨱꩍ ꨔꨭꩉ ꨓꨳꩆ ꨆꨳꨮꩃ ꨟꨰ ꨆꨵꨰꩀ ꨀꨆꨩꩆ ꨐꨭꨩ꩝ ꨕꨫ ꨕꩀ ꨡꨮꩃ ꨕꨫ ꨣꨪꩌ ꨨꨣꨬ ꨐꨭꨩ ꨕꨯꩊ ꨓꨳꩆ ꨕꨫ ꨀꨆꨩꩆ ꨘꩆ ꨝꨵꨯꨱꩍ ꨀꨣꩀ ꨗꨫ ꨂꨣꩃ ꨆꨤꨰꩀ ꨀꨆꨩꩆ ꨐꨭꨩ꩝ ꨐꨭꨩ ꨕꨯꨱꩀ ꨠꨓꨶꨬ ꨕꨯꨱꩀ ꨠꨎꨶꨩ ꨠꨤꩌ ꨨꨤꨬ ꨎꩃ ꨐꨭꨩ ꨨꨳꨩ꩝ ꨨꨣꨬ ꨨꨤꨬ ꨤꨪꨎꩃ ꨐꨭꨩ ꨨꨳꨩ꩝ ꨝꨣꨭꨥ ꨟꩃ ꨕꨫ ꨠꨤꩌ ꨘꩆ ꨝꨵꨯꨱꩍ ꨐꨭꨩ ꨙꨪꩍ ꨤꨪꨚꨬ ꨡꨯꩍ ꨀꨆꨩꩆ ꨘꩆ ꨟꨰ ꨀꨇꩆ ꨧꨯꨱꩃ ꨐꨭꨩ ꨤꩄ ꨀꨮꩈ ꨄꨰ ꨆꨎꨯꨱꩃ ꨄꨰ ꨎꨶꨰ ꨕꨯꨱꩀ ꨨꨳꨩ ꨣꨤꨯꨩ ꨎꨶꨰ ꨄꨰ ꨨꨤꨬ ꨕꨨꨵꩀ ꨂꨣꩃ ꨀꨋꩆ ꨄꨰ ꨨꨤꨮꩀ ꨡꨮꩃ ꨕꨨꨵꩀ ꨕꨫ ꨨꨣꨬ ꨄꨰ ꨗꨯꨱ ꨈꨵꨮꩃ ꨚꨝꨰꩈ ꨘꩆ ꨝꨵꨯꨱꩍ ꨂꨣꩃ ꨀꨋꩆ ꨄꨰ ꨨꨤꨮꩀ ꨘꩆ ꨝꨩ ꨤꨔꨬ ꨟꨰ ꨝꨵꨯꨱꩍ ꨐꨭꨩ ꨃꨥ ꨕꨨꨵꩀ ꨨꨶꩀ ꨝꨵꨯꨱꩍ ꨕꨨꨵꩀ ꨚꨧꨯꩌ ꨤꩄ ꨄꨰ ꨝꨵꨯꨱꩍ ꨕꨨꨵꩀ ꨧꨰꩅ ꨓꨈꨯꩀ ꨆꨳꨮꩃ ꨨꨶꩀ ꨝꨵꨯꨱꩍ ꨐꨭꨩ ꨚꩍ ꨟꩀ ꨕꨨꨵꩀ ꨝꨩ ꨗꨯꨱ ꨧꩃ ꨝꨵꨯꨱꩍ ꨐꨭꨩ ꨨꨓꨭꩀ ꨠꨔꩌ ꨝꨵꨯꨱꩍ ꨐꨭꨩ ꨡꨮꩃ꩝ ꨨꨤꨬ ꨓꨤꩃ ꨕꨨꨵꩀ ꨘꩆ ꨐꨭꨩ ꨝꨭꩍ ꨕꨤꩌ ꨓꨯꨱꩀ ꨆꨴꨲꩌ ꨝꨵꨯꨱꩍ ꨐꨭꨩ ꨝꨩ ꨗꨯꨱ ꨕꩉ ꨓꨜꨳꨩ ꨎꨮꩀ ꨀꨳꨩ ꨠꨢꩍ ꨄꨰ ꨀꨗꨪꩅ ꨕꨨꨵꩀ ꨣꨤꨯꨩ ꨎꨮ ꨝꨵꨯꨱꩍ ꨄꨰ ꨟꩀ ꨓꨤꩃ ꨕꨨꨵꩀ ꨝꨵꨯꨱꩍ ꨄꨰ ꨝꨭꩍ ꨕꨤꩌ ꨝꨤꨯꨱꩀ ꨤꨮꨭ ꨝꨵꨯꨱꩍ ꨄꨰ ꨝꨩ ꨗꨯꨱ ꨕꩉ ꨕꨫ ꨆꨴꨲꩍ ꨎꨤꩆ ꨚꨯꨱꩍ ꨆꨗꨶꩄ ꨚꨳꨯꨮꩍ ꨆꨩ ꨄꨰ ꨗꨯꨱ ꨈꨵꨮꩃ ꨚꨝꨰꩈ ꨝꨵꨯꨱꩍ ꨆꨩ ꨕꨨꨵꩀ ꨟꨯꨱꩃ ꨀꨆꨯꨱꩀ ꨄꨰ ꨨꨰ꩝ ꨠꨢꩍ ꨄꨰ ꨎꨯꨱꩃ ꨤꨪꨎꩃ ꨢꨮꨭ ꨘꩆ ꨆꩄ ꨟꨪꩆ꩝ ꨨꨣꨬ ꨨꨤꨬ ꨓꨭꩀ ꨨꨤꨬ ꨗꨯꨱ ꨟꨰ ꨣꨥꨮꩃ ꨕꨨꨵꩀ ꨨꨰ ꨀꨆꨩꩆ ꨘꩆ ꨙꨯꩌ ꨧꨯꨱꩃ ꨟꨭꨩ ꨆꨎꨯꨱꩃ ꨈꩌ ꨙꨯꩌ ꨈꩌ ꨨꨳꨩ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨠꨕꨮꩍ ꨕꨫ ꨙꨪꩍ ꨟꨰ ꨝꨵꨯꨱꩍ ꨟꨭꨩ ꨆꨎꨯꨱꩃ ꨨꨳꨩ ꨧꨩ ꨕꨴꨬ ꨟꨭꨩ ꨆꨎꨯꨱꩃ ꨕꨤꩌ ꨌꨳꨮꨥ ꨙꨪꩍ ꨆꨴꨲꩍ ꨠꨤꩌ꩝ ꨝꨣꨭꨥ ꨟꩃ ꨨꨕꩍ ꨟꩃ ꨚꨈꨯꨮ ꨝꨵꨯꨱꩍ ꨟꨭꨩ ꨆꨎꨯꨱꩃ ꨗꨯꨱ ꨆꨤꨬ ꨌꨟꨯꨱꩍ ꨎꨮꩀ ꨀꨳꨩ ꨘꩆ ꨝꨵꨯꨱꩍ ꨡꨯꩍ ꨓꨯꨱꩀ ꨆꨴꨲꩌ ꨘꩆ ꨝꨵꨯꨱꩍ ꨟꨭꨩ ꨆꨎꨯꨱꩃ ꨓꨭꩍ ꨓꨯꨱꩀ ꨆꨴꨲꩌ ꨘꩆ ꨡꨯꩍ ꨓꨤꩃ ꨀꨆꨩꩆ ꨘꩆ ꨝꨵꨯꨱꩍ ꨟꨭꨩ ꨆꨎꨯꨱꩃ ꨨꨳꨩ ꨝꨵꨯꨱꩍ ꨟꨭꨩ ꨆꨎꨯꨱꩃ ꨟꩀ ꨓꨤꩃ ꨀꨆꨩꩆ ꨘꩆ ꨝꨭꩍ ꨕꨤꩌ ꨝꨤꨯꨱꩀ ꨝꨵꨯꨱꩍ ꨟꨭꨩ ꨆꨎꨯꨱꩃ ꨝꨩ ꨗꨯꨱ ꨕꩉ ꨕꨫ ꨆꨴꨲꩍ ꨎꨤꩆ ꨚꨯꨱꩍ ꨆꨗꨶꩄ ꨝꨵꨯꨱꩍ ꨟꨭꨩ ꨆꨎꨯꨱꩃ ꨤꩄ ꨀꨮꩈ ꨀꨕꨬ ꨆꨨꨵꨯꨱꩌ ꨀꨕꨬ ꨚꨤꨚꨬ ꨄꨰ꩝ ꨀꨣꩀ ꨗꨫ ꨄꨰ ꨝꨩ ꨓꨤꩃ ꨨꨲꨩ ꨟꨰ ꨕꩉ ꨚꩀ ꨗꨫ ꨚꨳꨯꨮꩍ ꨆꨩ ꨄꨰ ꨟꨰ ꨈꨵꨮꩃ ꨚꨝꨰꩈ ꨝꨵꨯꨱꩍ ꨆꨩ ꨄꨰ ꨗꨯꨱ ꨟꨰ ꨣꨥꨮꩃ ꨓꨯꩀ ꨕꨯꩊ ꨓꨳꩆ ꨄꨰ ꨆꨨꨵꨯꨱꩌ ꨄꨰ ꨠꨓꨶꨬ ꨠꨖꩉ ꨣꨤꨯꨩ ꨀꨕꨬ꩝ ꨟꨰꩀ ꨅꨩ ꨨꨭꨩ ꨀꨟꨩ ꨅꨩ ꨨꨭꨩ ꨄꨰ ꨝꨳꩀ ꨏꩀ ꨥꩀ ꨎꨮ ꨀꨕꨬ꩝ ꨠꨢꩍ ꨀꨕꨬ ꨦꨄꨰ ꨧꨩ ꨓꨳꩆ ꨤꨪꨎꩃ ꨅꨩ ꨨꨭꨩ꩝ ꨨꨤꨬ ꨟꨰꩀ ꨣꨯꨱꩃ ꨘꩆ ꨨꨕꨯꩌ ꨡꨮꩃ ꨝꨵꨯꨱꩍ ꨐꨭꨩ ꨆꨳꨮꩃ ꨀꨗꨪꩅ ꨕꨴꨬ ꨣꨤꨯꨩ꩝ ꨟꨭꨩ ꨆꨎꨯꨱꩃ ꨙꨯꩌ ꨧꨯꨱꩃ ꨓꨤꩃ ꨀꨆꨩꩆ ꨢꨮꨭ ꨘꩆ꩝ ꨟꩃ ꨀꨳꨩ ꨟꨓꨩ ꨠꨩ ꨆꨎꨯꨱꩃ ꨨꨯꨱꩀ ꨚꨴꨭꩍ ꨚꨴꨭꩍ ꨗꨯꨱ ꨎꨮ꩝ ꨝꨵꨯꨱꩍ ꨟꨭꨩ ꨆꨎꨯꨱꩃ ꨥꨮꩀ ꨟꨰ ꨧꩃ ꨐꨭꨩ ꨎꨮ꩝ ꨓꨮꩊ ꨨꨕꩍ ꨟꩃ ꨚꨈꨯꨮ ꨟꨭꨩ ꨆꨎꨯꨱꩃ ꨚꨮꩍ ꨚꨝꨰꩈ ꨗꨯꨱ ꨈꨵꨮꩃ ꨝꨵꨯꨱꩍ ꨟꨭꨩ ꨆꨎꨯꨱꩃ ꨗꨯꨱ ꨣꨥꨮꩃ ꨓꨤꩃ ꨀꨆꨩꩆ ꨘꩆ ꨝꨵꨯꨱꩍ ꨡꨯꩍ ꨓꨇꨯꨱꩀ ꨟꩍ ꨧꨩ ꨈꩍ ꨌꨟꨯꨱꩍ ꨆꨴꨭꩃ ꨠꨩ ꨆꨎꨯꨱꩃ ꨕꩉ ꨀꨆꨩꩆ ꨘꩆ ꨧꨩ ꨈꩍ ꨓꨴꨩ ꨀꩀ ꨌꨈꨯꨱꩃ ꨝꨩ ꨗꨯꨱ ꨚꨤꨰꩀ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨚꨓꨯꨱ ꨕꨶꨮꩆ꩝ ꨕꨯꨱꩀ ꨧꨩ ꨈꩍ ꨓꨴꨩ ꨘꩆ ꨠꨩ ꨆꨎꨯꨱꩃ ꨕꨶꨯꩆ꩝ ꨓꨤꩃ ꨀꨆꨩꩆ ꨆꨴꨭꩃ ꨟꨭꨩ ꨆꨎꨯꨱꩃ ꨕꩉ ꨘꩆ ꨢꨶꨮ ꨕꨴꨬ ꨝꨵꨯꨱꩍ ꨎꨳꨯꨮꩃ ꨓꨇꨯꨱꩀ ꨟꩍ ꨘꩆ꩝ ꨟꨭꨩ ꨆꨎꨯꨱꩃ ꨝꨩ ꨓꨇꨯꨱꩀ ꨘꩆ ꨗꨯꨱ ꨚꨕꨮꩇ ꨝꨵꨯꨱꩍ ꨟꨭꨩ ꨆꨎꨯꨱꩃ ꨓꨳꩇ ꨚꨝꨰꩈ ꨗꨯꨱ ꨧꩃ꩝ ꨝꨣꨭꨥ ꨟꩃ ꨕꨯꨱꩀ ꨢꨯꨱꩌ ꨕꨶꨩ ꨆꨵꨮꨭ ꨨꨣꨬ ꨟꨨꨪꩅ ꨚꨓꨯꨱ ꨚꨙꨶꨮꩄ ꨨꨣꩀ ꨗꨯꨱ ꨕꨫ ꨈꨴꨮꩇ ꨚꨤꨬ ꨕꨫ ꨈꨴꨮꩇ ꨗꨈꩉ ꨤꩄ ꨀꨗꩀ ꨕꨣꨩ ꨧꨬ ꨀꨧꨪꩅ ꨋꩆ ꨚꨴꨯꨱꩃ ꨝꨩ ꨈꨮꩇ ꨗꨯꨱ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨎꨶꩀ ꨓꨇꨯꨱꩀ ꨓꨇꨯꨱꩀ ꨆꨴꨭꩃ ꨀꩀ ꨌꨈꨯꨱꩃ ꨝꨵꨯꨱꩍ ꨚꨤꨰꩀ ꨕꨫ ꨠꨖꨪꩉ ꨚꨓꨯꨱ ꨝꨵꨯꨱꩍ ꨚꨓꨯꨱ ꨕꨶꩆ ꨘꩆ꩝ ꨠꨢꩍ ꨔꨬ ꨎꨶꩀ ꨓꨇꨯꨱꩀ ꨘꩆ ꨡꨳꩍ ꨧꨯꨱꩃ ꨓꨆꨰ ꨐꨭꨩ ꨤꨪꨘꩃ ꨎꨶꨰ ꨤꨪꨘꩃ ꨓꨕꨭꨩ ꨎꨶꨰ ꨓꨕꨭꨩ ꨈꩇ ꨧꨯꨱꩃ ꨓꨆꨰ ꨐꨭꨩ ꨘꩆ ꨚꨓꨯꨱ ꨋꩇ ꨨꨕꨳꨮꩇ꩝ ꨝꨣꨭꨥ ꨟꩃ ꨕꨫ ꨈꨴꨮꩇ ꨚꨤꨬ ꨕꨫ ꨈꨴꨮꩇ ꨗꨈꩉ ꨕꨯꩌ ꨂꨣꩃ ꨨꨤꨬ ꨨꨭꨩ ꨀꨗꩀ ꨕꨣꨩ ꨚꨙꩉ ꨀꨗꩀ ꨕꨣꨩ ꨐꨭꨩ ꨟꨰ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨎꨶꩀ ꨓꨇꨯꨱꩀ ꨚꨓꨯꨱ ꨕꨶꨯꩆ ꨘꩆ꩝ ꨣꨝꨭꨥ ꨣꨝꨭꨥ ꨓꨟꩆ ꨓꨟꩆ ꨚꩀ ꨠꨖꨪꩉ ꨚꨓꨯꨱ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨧꨯꨱꩃ ꨟꨭꨩ ꨆꨎꨯꨱꩃ ꨤꨆꨮꨭ ꨕꨴꨬ ꨕꨫ ꨟꨰꩀ ꨐꨭꨩ ꨝꨵꨯꨱꩍ ꨆꨳꨮꩃ ꨗꨯꨱ ꨎꨶꩀ ꨓꨇꨯꨱꩀ ꨆꨴꨭꩃ ꨚꨓꨯꨱ ꨕꨯꨭꩆ ꨘꩆ ꨝꨣꨭꨥ ꨟꩃ ꨟꨭꩀ ꨟꨰꩀ ꨐꨭꨩ ꨚꨙꩉ ꨟꨭꨩ ꨨꨤꨮꩀ ꨗꨯꨱ ꨕꨨꨵꨮꨭ ꨨꨤꨬ ꨟꨭꨩ ꨆꨎꨯꨱꩃ ꨘꩆ ꨐꨭꨩ ꨕꨫ ꨝꨴꨬ ꨗꨯꨱ ꨅꨩ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨧꨗꩃ ꨕꨴꨶꨰ ꨕꨫ ꨓꨳꩆ ꨝꨵꨯꨱꩍ ꨟꨭꨩ ꨆꨎꨯꨱꩃ ꨨꨯꨱꩀ ꨀꨳꨩ ꨟꨓꨩ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨣꨯꨱꩃ ꨟꨭꨩ ꨆꨎꨯꨱꩃ ꨟꨯꨱꩃ ꨡꨯꩍ ꨟꨭꨩ ꨆꨎꨯꨱꩃ ꨨꨯꨱꩀ ꨀꨳꨩ ꨟꨓꨩ ꨝꨵꨯꨱꩍ ꨐꨭꨩ ꨟꩀ ꨧꨩ ꨚꨯꨱꩀ ꨆꨝꨶꩀ ꨓꨣꨭꩃ ꨝꨴꨬ ꨆꨩ ꨟꨭꨩ ꨆꨎꨯꨱꩃ ꨚꨆꨵꩍ ꨆꨝꨶꩀ ꨘꩆ ꨚꨀꨝꨪꩍ ꨆꨩ ꨝꨵꨯꨱꩍ ꨗꨯꨱ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨎꨶꩀ ꨓꨇꨯꨱꩀ ꨘꩆ ꨧꨯꨱꩃ ꨂꨣꩃ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨚꨆꨵꩍ ꨆꨝꨶꩀ ꨘꩆ ꨕꨫ ꨨꨭꨩ ꨅꨩ ꨕꨯꩌ ꨕꨫ ꨕꨯꨱꩀ ꨨꨳꨩ꩝ ꨝꨣꨭꨥ ꨟꩃ ꨛꨯꨮ ꨕꨯꨮꨝꨪꨓꨩ ꨡꨯꩍ ꨟꨭꨩ ꨆꨎꨯꨱꩃ ꨨꨳꨩ ꨡꨶꩍ ꨆꩉ ꨝꨵꨯꨱꩍ ꨛꨯꨮ ꨕꨯꨮꨝꨪꨓꨩ ꨝꨴꨬ ꨨꨕꩌ ꨣꨶꨰ ꨓꨟꨩ ꨕꨤꩌ ꨆꨝꨶꩀ ꨘꩆ ꨝꨵꨯꨱꩍ ꨨꨕꩌ ꨘꩆ ꨣꨶꨰ ꨝꩀ ꨕꨤꩌ ꨚꨯꨱꩀ ꨆꨝꨶꩀ ꨘꩆ ꨝꨵꨯꨱꩍ ꨓꨤꩃ ꨆꨝꨶꩀ ꨘꩆ ꨀꨝꨪꩍ ꨝꨵꨯꨱꩍ ꨟꨭꨩ ꨆꨎꨯꨱꩃ ꨝꨩ ꨆꨝꨶꩀ ꨘꩆ ꨗꨯꨱ ꨝꨴꨬ ꨆꨩ ꨟꨰꩀ ꨣꨯꨱꩃ ꨐꨭꨩ꩝ ꨝꨵꨯꨱꩍ ꨟꨭꩀ ꨟꨰꩀ ꨣꨯꨱꩃ ꨐꨭꨩ ꨟꩀ ꨧꨩ ꨤꨀꨪ ꨤꨪꨊꨩ ꨧꨩ ꨤꨀꨪ ꨓꨊꨬ ꨓꨭꩍ ꨚꨠꨤꨭꩀ ꨈꨮꩇ ꨝꨵꨯꨱꩍ ꨟꨭꩀ ꨘꩆ ꨚꨙꩉ ꨠꨩ ꨆꨎꨯꨱꩃ ꨓꨭꩍ ꨓꨝꨳꩀ ꨕꨫ ꨌꨊꨶꨩ ꨝꨵꨯꨱꩍ ꨚꨤꨪꩍ ꨤꨪꨊꨩ ꨘꩆ ꨌꨰꩀ ꨆꨣꨬ ꨚꨤꨪꩍ ꨓꨊꨰ ꨘꩆ ꨌꨰꩀ ꨆꨣꨬ ꨚꨤꨪꩍ ꨚꨝꨵꨯꨱꩍ ꨆꨩ ꨘꩆ ꨟꩃ ꨟꨭꩀ ꨟꨰꩀ ꨣꨯꨱꩃ ꨐꨭꨩ ꨝꨴꨬ ꨆꨩ ꨐꨭꨩ ꨗꨯꨱ ꨧꨯꨱꩃ ꨂꨣꩃ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨧꨩ ꨈꩍ ꨨꨳꨩ ꨧꨩ ꨈꩍ ꨚꨤꨪꩍ ꨤꨪꨋꨩ ꨧꨯꨱꩃ ꨓꨊꨰ ꨘꩆ꩝ ꨝꨣꨭꨥ ꨟꩃ ꨛꨯꨮ ꨕꨯꨮꨝꨪꨓꨩ ꨟꨯꨱꩃ ꨡꨯꩍ ꨟꨭꨩ ꨆꨎꨯꨱꩃ ꨨꨳꨩ ꨡꨶꩍ ꨆꩉ ꨝꨵꨯꨱꩍ ꨛꨯꨮ ꨕꨯꨮꨝꨪꨓꨩ ꨝꨴꨬ ꨌꨳꨪꩌ ꨝꨣꨪꩌ ꨕꨫ ꨈꨵꨰ ꨧꨯꨱꩃ ꨟꨭꨩ ꨨꨕꩌ ꨀꨕꨳꨮꩃ ꨤꨪꨚꩆ ꨆꨓꨪꩅ ꨆꨭꨤꩇ ꨟꨰ ꨨꨕꨰ ꨕꨶꨯꩆ ꨨꨕꨰ ꨚꨤꨪꩍ ꨧꨯꨱꩃ ꨟꨭꨩ ꨆꨎꨯꨱꩃ꩝ ꨚꨤꨪꩍ ꨀꨝꨪꩍ ꨧꨩ ꨤꨀꨪ ꨤꨪꨋꨩ ꨧꨯꨱꩃ ꨓꨊꨰ ꨘꩆ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨣꨯꨱꩃ ꨟꨭꨩ ꨆꨎꨯꨱꩃ ꨝꨴꨬ ꨆꨩ ꨟꨭꨩ ꨆꨎꨯꨱꩃ ꨗꨯꨱ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨆꨳꨮꩃ ꨎꨶꩀ ꨓꨇꨯꨱꩀ ꨚꨓꨯꨱ ꨕꨶꨯꩆ ꨘꩆ ꨧꨯꨱꩃ ꨂꨣꩃ꩝꩝꩝ ꨘꩆ ꨟꩃ ꨟꨭꨩ ꨆꨎꨯꨱꩃ ꨌꨪꩍ ꨨꨤꨩ ꨙꨭꩃ ꨕꨫ ꨓꨐꨴꩀ ꨝꨵꨯꨱꩍ ꨟꨭꨩ ꨆꨎꨯꨱꩃ ꨠꨀꨯꨱꩌ ꨧꨩ ꨝꨵꩍ ꨇꩆ ꨤꨭꩍ ꨓꨝꨳꩀ ꨗꨯꨱ ꨠꨓꨶꨬ ꨟꨮꨖꩉ ꨗꨯꨱ ꨎꨶꨩ ꨧꨩ ꨕꨴꨬ ꨟꨭꨩ ꨆꨎꨯꨱꩃ ꨗꨯꨱ ꨤꨰꩀ ꨨꨕꨬ ꨕꨫ ꨂꨣꩃ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨗꨯꨱ ꨓꨚꩀ ꨓꨇꨯꨱꩀ ꨆꨴꨭꩃ ꨐꨭꨩ ꨕꨶꨯꩆ ꨘꩆ ꨝꨵꨯꨱꩍ ꨐꨭꨩ ꨚꨕꨮꩇ ꨘꩆ ꨝꨵꨯꨱꩍ ꨐꨭꨩ ꨟꩀ ꨓꨇꨯꨱꩀ ꨟꩍ ꨘꩆ ꨝꨵꨯꨱꩍ ꨐꨭꨩ ꨙꨭꩃ ꨕꨫ ꨕꨤꩌ ꨇꩆ ꨤꨭꩍ ꨐꨭꨩ ꨝꨵꨯꨱꩍ ꨐꨭꨩ ꨗꨯꨱ ꨧꨩ ꨕꨴꨬ ꨧꨩ ꨎꩆ ꨐꨭꨩ ꨎꨮ꩝ ꨧꨩ ꨈꩍ ꨗꨯꨱ ꨧꨩ ꨈꩍ ꨐꨭꨩ ꨧꨗꩃ ꨝꨵꨯꨱꩍ ꨐꨭꨩ ꨨꨳꨩ꩝ ꨐꨭꨩ ꨧꨗꩃ ꨤꩄ ꨂꨣꩃ ꨗꨯꨱ ꨨꨭꨩ ꨚꨗꨯꨱꩀ ꨨꨭꨩ ꨕꨚꨶꨮꩊ꩝ ꨨꨤꨬ ꨥꩀ ꨐꨭꨩ ꨨꨝꩉ ꨆꩄ ꨝꨵꨯꨱꩍ ꨠꨓꨶꨬ ꨠꨖꩉ ꨣꨤꨯꨩ ꨢꨩ ꨘꩆ꩝ ꨝꨣꨭꨥ ꨟꩃ ꨐꨭꨩ ꨗꨯꨱ ꨓꨮꩊ ꨠꨖꨪꩉ ꨚꨓꨯꨱ ꨝꨵꨯꨱꩍ ꨐꨭꨩ ꨕꨫ ꨇꨪꩆ ꨗꨯꨱ ꨎꨶꩀ ꨓꨇꨯꨱꩀ ꨘꩆ ꨧꨯꨱꩃ ꨂꨣꩃ ꨅꨩ꩝ ꨐꨭꨩ ꨕꨯꩌ ꨕꨫ ꨕꨯꨱꩀ ꨆꨭꩆ ꨆꨙꩇ ꨚꩀ ꨤꨪꨊꨪꨥ ꨠꨖꨪꩉ ꨎꨮ꩝ ꨨꨤꨬ ꨕꨯꩌ ꨂꨣꩃ ꨈꨗꨭꩇ ꨠꨕꨩ ꨨꨭꨩ ꨟꨰꩀ ꨨꨭꨩ ꨀꨟꨩ ꨘꩆ ꨕꨯꨱꩀ ꨚꩀ ꨕꨤꩌ ꨠꨖꨪꩉ ꨝꨵꨯꨱꩍ ꨠꨝꨵꩍ ꨈꨮꩇ ꨨꨣꨯꨱꩀ ꨓꨆꨰ ꨓꨟꨩ ꨓꨇꨯꨱꩀ ꨚꨓꨯꨱ ꨕꨶꨯꩆ ꨘꩆ꩝ ꨝꨣꨭꨥ ꨟꩃ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨕꨯꨱꩀ ꨕꨤꩌ ꨠꨖꨪꩉ ꨘꩆ ꨨꨣꨯꨱꩀ ꨓꨆꨰ ꨓꨟꨩ ꨓꨇꨯꨱꩀ ꨘꩆ ꨕꨫ ꨡꨳꩍ ꨅꨩ꩝ ꨝꨣꨭꨥ ꨟꩃ ꨚꨓꨯꨱ ꨓꨊꨪ ꨤꩄ ꨀꨝꨪꩍ ꨕꨴꨬ ꨎꨶꩀ ꨓꨇꨯꨱꩀ ꨘꩆ ꨡꨳꩍ ꨣꨬ꩝ ꨝꨣꨭꨥ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨘꩆ ꨤꩄ ꨎꨶꩀ ꨀꨳꨮꩀ ꨕꨫ ꨡꨳꩍ ꨅꨩ꩝ ꨝꨵꨯꨱꩍ ꨚꨓꨯꨱ ꨓꨊꨪ ꨤꩄ ꨎꨶꩀ ꨀꨝꨪꩍ ꨕꨴꨬ ꨚꨎꨮ꩝ ꨝꨣꨭꨥ ꨟꩃ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨘꩆ ꨤꩄ ꨕꨯꨱꩀ ꨧꨩ ꨕꨴꨬ ꨟꨭꨩ ꨆꨎꨯꨱꩃ ꨓꨴꨩ ꨐꨭꨩ ꨕꨯꨱꩀ ꨚꩀ ꨤꨪꨊꨪꨥ꩝ ꨝꨣꨭꨥ ꨟꩃ ꨚꨓꨯꨱ ꨤꩄ ꨃꨥ ꨐꨭꨩ ꨓꨟꨩ ꨟꨰ ꨎꨶꩀ ꨀꨳꨮꩀ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨝꨩ ꨟꨭꨩ ꨆꨎꨯꨱꩃ ꨓꨟꨩ ꨠꨖꨪꩉ ꨎꨶꩀ ꨓꨇꨯꨱꩀ ꨘꩆ꩝ ꨝꨣꨭꨥ ꨟꩃ ꨟꨭꨩ ꨆꨎꨯꨱꩃ ꨓꨟꨩ ꨕꨤꩌ ꨠꨖꨪꩉ ꨝꨵꨯꨱꩍ ꨟꨭꨩ ꨆꨎꨯꨱꩃ ꨎꨶꩀ ꨓꨇꨯꨱꩀ ꨘꩆ ꨡꨳꩍ ꨧꨯꨱꩃ ꨓꨆꨰ ꨟꨭꨩ ꨆꨎꨯꨱꩃ꩝ ꨝꨣꨭꨥ ꨟꩃ ꨚꨓꨯꨱ ꨚꨙꩉ ꨚꨗꨴꨯꨱꩃ ꨎꨝꨯꨱꩊ ꨝꨩ ꨆꨗꨰ ꨎꨯꨱꩃ ꨗꨯꨱ ꨣꨪꨌꨯꨱꨥ ꨝꨵꨯꨱꩍ ꨝꨩ ꨟꨰ ꨓꨟꨩ ꨠꨖꨪꩉ ꨆꨩ ꨚꨓꨯꨱ ꨋꩇ ꨨꨕꨳꨮꩇ꩝ ꨘꩆ ꨟꩃ ꨓꨮꩊ ꨆꨴꨲꩍ ꨠꨤꩌ ꨚꨓꨯꨱ ꨓꨊꨪ ꨗꨰ ꨎꨯꨱꩃ ꨤꩄ ꨨꨲꨩ ꨨꨭꨩ ꨟꨰꩀ ꨀꨟꨩ ꨣꨬ꩝ ꨝꨵꨯꨱꩍ ꨗꨰ ꨎꨯꨱꩃ ꨙꨯꩌ ꨤꩄ ꨕꨨꨵꩀ ꨟꨰꩀ ꨀꨟꨩ ꨕꨨꨵꩀ ꨟꨓꨰ ꨟꩃ ꨕꨨꨵꩀ ꨕꨯꨱꩀ ꨀꨦꨪꩅ ꨝꨣꨭꨥ ꨔꨴꩌ ꨗꨯꨱ ꨕꨯꩍ꩝ ꨨꨤꨬ ꨟꨰꩀ ꨕꨨꨵꩀ ꨘꩆ ꨕꨨꨵꩀ ꨡꨯꩍ ꨧꨪ ꨟꨯꨱꩃ ꨨꨤꨬ ꨀꨟꨩ ꨕꨨꨵꩀ ꨘꩆ ꨕꨨꨵꩀ ꨨꨭꨩ ꨟꨯꨱꩃ ꨡꨯꩍ ꨝꩀ ꨟꨓꨩ ꨅꨩ꩝ ꨕꨨꨵꩀ ꨕꨯꨱꩀ ꨀꨦꨪꩅ ꨤꨯꨩ꩝ ꨨꨤꨬ ꨀꨣꩀ ꨗꨫ ꨕꨨꨵꩀ ꨕꨯꨱꩀ ꨧꨯꨱꩃ ꨟꨰꩀ ꨣꨯꨱꩃ ꨟꨪꩆ꩝ ꨝꨣꨭꨥ ꨟꩃ ꨚꨓꨯꨱ ꨕꨯꨱꩀ ꨀꨚꩆ ꨓꨇꨯꨱꩀ ꨆꨴꨭꩃ ꨚꨓꨯꨱ ꨕꨶꨯꩆ ꨘꩆ ꨝꨵꨯꨱꩍ ꨚꨓꨯꨱ ꨕꨯꨱꩀ ꨟꨯꨱꩃ꩝ ꨝꨵꨯꨱꩍ ꨚꨓꨯꨱ ꨤꩄ ꨨꨭꨩ ꨓꨇꨯꨱꩀ ꨨꨤꨬ ꨧꨩ ꨈꩍ ꨓꨴꨩ ꨝꨪꨕꨴꨮꩍ ꨓꨇꨯꨱꩀ ꨗꨫ ꨨꨰ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨤꩄ ꨓꨇꨯꨱꩀ ꨕꨨꨵꩀ ꨕꨶꨯꩆ ꨧꨩ ꨈꩍ ꨝꨳꩀ ꨕꨴꨮꩍ ꨓꨇꨯꨱꩀ ꨛꨯꨮ ꨕꨶꨯꩆ ꨎꨮ꩝ ꨝꨣꨭꨥ ꨟꩃ ꨚꨓꨯꨱ ꨚꨙꩉ ꨗꨰ ꨆꨎꨯꨱꩃ ꨟꩀ ꨓꨇꨯꨱꩀ ꨆꨴꨭꩃ ꨗꨰ ꨆꨎꨯꨱꩃ ꨕꨶꨯꩆ ꨘꩆ ꨝꨴꨬ ꨆꨩ ꨚꨓꨯꨱ ꨀꨳꨮꩀ ꨝꨣꨭꨥ ꨟꩃ ꨗꨰ ꨎꨯꨱꩃ ꨟꩀ ꨓꨇꨯꨱꩀ ꨘꩆ ꨝꨩ ꨟꨰ ꨆꨩ ꨚꨓꨯꨱ ꨀꨳꨮꩀ꩝ ꨝꨣꨭꨥ ꨟꩃ ꨚꨓꨯꨱ ꨟꩀ ꨓꨇꨯꨱꩀ ꨗꨰ ꨆꨎꨯꨱꩃ ꨕꨶꨯꩆ ꨘꩆ ꨧꨯꨱꩃ ꨓꨇꨯꨱꩀ ꨚꨓꨯꨱ ꨕꨶꨯꩆ ꨝꨵꨯꨱꩍ ꨚꨈꩇ ꨧꨯꨱꩃ ꨈꨮꩇ ꨝꨵꨯꨱꩍ ꨚꨓꨯꨱ ꨀꨳꨮꩀ ꨡꨯꩍ ꨕꨶꨩ ꨈꩍ ꨓꨇꨯꨱꩀ ꨘꩆ ꨙꨮ ꨈꨮꩇ꩝ ꨝꨣꨭꨥ ꨟꩃ ꨚꨓꨯꨱ ꨙꨯꩌ ꨤꩄ ꨝꨳꩀ ꨥꩀ ꨨꨲꨩ ꨆꨳꨮꩃ ꨎꨳꨯꨮꩃ ꨨꨕꨳꨮꩇ ꨆꨮꨭ ꨎꨮ ꨟꨭꨩ ꨆꨎꨯꨱꩃ꩝ ꨘꩆ ꨟꩃ ꨀꨝꨪꩍ ꨕꨴꨬ ꨕꨯꩌ ꨂꨣꩃ ꨆꨭꨟꨬ ꨕꨣꨩ ꨕꨫ ꨈꨴꨮꩇ ꨗꨈꩉ ꨐꨭꨩ ꨨꨣꨯꨱꩀ ꨓꨆꨰ ꨐꨭꨩ ꨓꨟꨩ ꨓꨇꨯꨱꩀ ꨘꩆ ꨕꨫ ꨡꨳꩍ ꨅꨩ ꨝꨵꨯꨱꩍ ꨐꨭꨩ ꨝꨩ ꨈꨮꩇ ꨐꨭꨩ ꨥꨮꩀ ꨟꨰ ꨧꩃ ꨎꨮ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨥꨮꩀ ꨟꨰ ꨧꩃ ꨝꨵꨯꨱꩍ ꨐꨭꨩ ꨙꨯꩌ ꨧꨯꨱꩃ ꨟꨰꩀ ꨐꨭꨩ ꨤꩄ ꨕꨫ ꨈꨴꨮꩇ ꨚꨤꨬ ꨕꨫ ꨈꨴꨮꩇ ꨗꨈꩉ ꨠꨗꨶꨪꩋ ꨎꨶꩀ ꨨꨣꨮꩀ ꨟꨓꨰ ꨎꨶꩀ ꨈꨵꨰ ꨙꩃ ꨤꨝꨭꩍ ꨣꨝꨭꨥ ꨣꨝꨭꨥ ꨓꨟꩆ ꨓꨟꩆ ꨧꨳꩌ ꨝꨪꨗꨰ ꨢꨮꨭ ꨢꩃ ꨝꨤꩆ ꨚꨭꨣꨟꨪ ꨧꨩ ꨆꨵꩌ ꨓꨧꨮꨭ ꨝꨳꩀ ꨤꩄ ꨥꨪꩊ ꨥꨪꩊ ꨢꨮꨭ ꨣꨩ ꨚꨝꨶꩀ꩝ ꨝꨵꨯꨱꩍ ꨨꨣꨯꨱꩀ ꨓꨆꨰ ꨓꨟꨩ ꨓꨇꨯꨱꩀ ꨘꩆ ꨕꨫ ꨡꨳꩍ ꨅꨩ꩝ ꨝꨵꨯꨱꩍ ꨟꨭꨩ ꨆꨎꨯꨱꩃ ꨗꨯꨱ ꨨꨕꨬ ꨟꨪꩆ ꨝꨵꨯꨱꩍ ꨠꨩ ꨆꨎꨯꨱꩃ ꨨꨣꨯꨱꩀ ꨓꨆꨰ ꨓꨟꨩ ꨡꨳꩍ ꨧꨯꨱꩃ ꨓꨇꨯꨱꩀ ꨘꩆ꩝ ꨀꨣꩀ ꨗꨫ ꨟꨭꨩ ꨆꨎꨯꨱꩃ ꨎꨳꨮꩃ ꨨꨕꨳꨮꩇ ꨚꨓꨯꨱ ꨝꨵꨯꨱꩍ ꨎꨮ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨟꨭꨩ ꨨꨤꨮꩀ ꨏꩀ ꨨꨓꨰ ꨤꩄ ꨀꨗꩀ ꨎꨳꨮꩃ ꨐꨭꨩ ꨕꨫ ꨨꨭꨩ ꨧꨪ ꨆꨳꨮꩃ ꨚꨓꨯꨱ ꨅꨩ꩝ ꨝꨵꨯꨱꩍ ꨀꨗꩀ ꨣꨯꨱꩃ ꨐꨭꨩ ꨧꨪ ꨆꨳꨮꩃ ꨚꨓꨯꨱ꩝ ꨝꨣꨭꨥ ꨟꩃ ꨟꨭꩀ ꨟꨰꩀ ꨟꨭꨩ ꨨꨤꨮꩀ ꨗꨯꨱ ꨙꨯꩌ ꨚꨈꩅ ꨚꨓꨯꨱ ꨝꨵꨯꨱꩍ ꨆꨳꨮꩃ ꨤꨪꨆꨮꨭ ꨗꨰ ꨎꨯꨱꩃ ꨝꨩ ꨟꨰ ꨧꩃ ꨝꨵꨯꨱꩍ ꨆꨳꨮꩃ ꨚꨟꨓꨰ ꨗꨰ ꨎꨯꨱꩃ ꨟꨭꩀ ꨘꩆ ꨗꨯꨱ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨚꨓꨯꨱ ꨓꨊꨪ ꨟꨭꩀ ꨟꨰ ꨨꨓꨯꨱ꩝ ꨝꨵꨯꨱꩍ ꨟꨭꩀ ꨘꩆ ꨙꨯꩌ ꨚꨈꩅ ꨚꨓꨯꨱ ꨤꩄ ꨆꨘꨩ ꨖꨭꩊ ꨚꨤꩀ ꨓꨆꨰ ꨟꩍ ꨛꨯꨮ ꨈꨗꨴꨮꩍ ꨚꨓꨴꨰ ꨕꨨꨵꩀ ꨟꨰ ꨚꨶꨮꩄ ꨧꨯꨱꩃ ꨛꨯꨮ ꨈꨗꨴꨮꩍ ꨚꨓꨴꨰ ꨤꨆꨮꨭ ꨛꨯꨮ ꨝꨴꨬ ꨆꨗꨰ ꨎꨯꨱꩃ ꨗꨯꨱ ꨧꩃ ꨕꨨꨵꩀ ꨕꨶꨩ ꨆꨵꨮꨭ ꨨꨣꨬ ꨟꨪꩆ꩝ ꨝꨵꨯꨱꩍ ꨕꨨꨵꩀ ꨝꨩ ꨆꨗꨰ ꨎꨯꨱꩃ ꨥꨮꩀ ꨟꨰ ꨆꨩ ꨛꨯꨮ ꨎꨮ꩝ ꨆꨨꨵꨯꨱꩌ ꨕꨨꨵꩀ ꨓꨟꨩ ꨧꩃ ꨝꨣꨭꨥ ꨝꨣꩃ ꨝꨵꨯꨱꩍ ꨅꨩ ꨨꨭꨩ ꨓꨯꨱꩌ ꨀꨗꩀ ꨣꨯꨱꩃ ꨅꨩ ꨤꨪꨎꩃ ꨕꨨꨵꩀ ꨕꨴꨶꨰ ꨣꨤꨯꨩ ꨟꨪꩆ ꨆꩄ ꨟꨪꩆ ꨛꨯꨮ꩝ ꨝꨣꨭꨥ ꨟꩃ ꨚꨓꨯꨱ ꨤꩄ ꨨꨰꩈ ꨠꨢꩍ ꨟꨭꩀ ꨆꨳꨮꩃ ꨝꨩ ꨟꨭꨩ ꨆꨎꨯꨱꩃ ꨗꨯꨱ ꨧꩃ ꨎꨮ ꨝꨵꨯꨱꩍ ꨟꨭꩀ ꨝꨩ ꨗꨯꨱ ꨝꨰꩀ ꨨꨕꨯꩌ ꨨꨣꨬ ꨓꨴꨩ ꨝꨵꨯꨱꩍ ꨟꨭꩀ ꨆꨳꨮꩃ ꨝꨩ ꨥꨮꩀ ꨟꨰ ꨤꨪꨎꩃ ꨨꨭꨩ ꨟꨪꩆ꩝ ꨝꨣꨭꨥ ꨟꩃ ꨚꨓꨯꨱ ꨚꨙꩉ ꨗꨰ ꨆꨎꨯꨱꩃ ꨟꩀ ꨇꩆ ꨀꨥ ꨧꨳꩌ ꨀꨊꨶꨬ ꨝꨵꨯꨱꩍ ꨗꨯꨱ ꨧꨯꨱꩃ ꨟꨭꩀ ꨟꨰꩀ ꨣꨯꨱꩃ ꨘꩆ ꨝꨵꨯꨱꩍ ꨗꨯꨱ ꨧꩃ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨟꩀ ꨇꩆ ꨀꨥ ꨧꨳꩌ ꨀꨊꨶꨬ ꨝꨵꨯꨱꩍ ꨗꨯꨱ ꨧꩃ ꨧꨯꨱꩃ ꨟꨰꩀ ꨣꨯꨱꩃ ꨐꨭꨩ꩝ ꨝꨣꨭꨥ ꨟꩃ ꨗꨯꨱ ꨓꨮꩊ ꨧꩃ ꨝꨵꨯꨱꩍ ꨕꨫ ꨠꨤꩌ ꨘꩆ ꨟꨭꩀ ꨟꨰꩀ ꨣꨯꨱꩃ ꨗꨰ ꨆꨎꨯꨱꩃ ꨧꨯꨱꩃ ꨟꨭꨩ ꨨꨤꨮꩀ ꨓꨯꨱꩍ ꨤꨪꨔꨬ ꨨꨶꩀ ꨚꩀ ꨕꨤꩌ ꨧꩃ ꨨꨤꨬ ꨗꨰ ꨆꨎꨯꨱꩃ ꨕꨯꨱꩀ ꨚꩀ ꨤꨪꨊꨪꨥ꩝ ꨆꨵꨯꨱꩍ ꨢꨯꨱꩌ ꨟꨭꨩ ꨨꨤꨮꩀ ꨧꨯꨱꩃ ꨟꨰꩀ ꨟꨭꨩ ꨨꨤꨮꩀ ꨝꨵꨯꨱꩍ ꨃꨥ ꨗꨰ ꨆꨎꨯꨱꩃ ꨨꨶꩀ ꨓꨯꩀ ꨢꨯꨱꩌ ꨧꨩ ꨚꨝꩍ ꨅꨩ꩝ ꨕꨶꨩ ꨀꨗꩀ ꨟꨰꩀ ꨐꨭꨩ ꨕꨯꨱꩀ ꨨꨶꩀ ꨚꩀ ꨕꨤꩌ ꨧꩃ ꨝꨵꨯꨱꩍ ꨐꨭꨩ ꨆꨣꨮꩀ ꨚꨝꩍ ꨡꨮꩃ ꨥꨮꩀ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨧꨗꩃ ꨕꨴꨶꨰ ꨤꩄ ꨠꨢꩍ ꨟꨰꩀ ꨎꨳꨮꩃ ꨐꨭꨩ ꨨꨕꨯꩌ ꨡꨮꩃ ꨝꨵꨯꨱꩍ ꨗꨯꨱ ꨏꩀ ꨨꨓꨰ ꨕꨫ ꨐꨭꨩ ꨆꨳꨮꩃ ꨚꨓꨯꨱ꩝ ꨧꨩ ꨡꨮꩃ ꨀꨗꩀ ꨣꨯꨱꩃ ꨕꨫ ꨒꨮꩇ ꨣꨤꨯꨱꨥ ꨕꨣꩍ ꨂꨣꩃ ꨅꨩ꩝ ꨕꨫ ꨠꨤꩌ ꨘꩆ ꨗꨰ ꨆꨎꨯꨱꩃ ꨙꨪꩍ ꨀꨳꨮꩀ ꨟꨪꩆ ꨢꩍ ꨌꨳꨮꨥ ꨤꨪꨎꩃ ꨐꨭꨩ ꨅꨩ ꨝꨴꨬ ꨙꨪꩍ ꨕꨫ ꨓꨴꨲꨩ ꨟꨪꩆ꩝ ꨓꨮꩊ ꨨꨕꩍ ꨟꩃ ꨚꨈꨯꨮ ꨘꩆ ꨕꨶꨩ ꨀꨗꩀ ꨟꨰꩀ ꨟꨭꨩ ꨨꨤꨮꩀ ꨌꨯꨱꩃ ꨝꨙꨪ ꨝꨪꨗꨳꨪ ꨝꨵꨯꨱꩍ ꨆꨳꨮꩃ ꨚꨈꩅ ꨗꨰ ꨎꨯꨱꩃ꩝ ꨘꩆ ꨟꩃ ꨟꨭꨩ ꨨꨤꨮꩀ ꨎꩀ ꨗꨰ ꨎꨯꨱꩃ ꨚꨰꩀ ꨤꨪꨂꨩ꩝ ꨝꨣꨭꨥ ꨟꩃ ꨗꨯꨱ ꨚꨰꩀ ꨤꨪꨂꨩ ꨝꨵꨯꨱꩍ ꨟꨭꨩ ꨨꨤꨮꩀ ꨚꨈꩅ ꨗꨰ ꨆꨎꨯꨱꩃ ꨙꨪꩀ ꨤꨪꨂꨩ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨙꨪꩀ ꨤꨪꨂꨩ ꨝꨵꨯꨱꩍ ꨟꨭꨩ ꨨꨤꨮꩀ ꨕꨯꨱꩀ ꨕꨫ ꨀꨤꨩ ꨝꨵꨯꨱꩍ ꨟꨭꨩ ꨨꨤꨮꩀ ꨟꩀ ꨀꨟꨴꨩ ꨆꨯꨱꩍ ꨤꨪꨂꨩ ꨘꩆ ꨎꨯꨱꩍ ꨤꨪꨂꨩ ꨘꩆ ꨝꨵꨯꨱꩍ ꨎꨤꨮꩍ ꨤꨪꨂꨩ ꨘꩆ ꨓꨴꨭꩆ ꨝꨵꨯꨱꩍ ꨗꨰ ꨎꨯꨱꩃ ꨈꨥꨰ ꨕꨫ ꨤꨪꨂꨩ ꨝꨪꨆꩆ ꨥꨮꩀ ꨨꨭꨩ ꨝꨵꨯꨱꩍ ꨗꨰ ꨆꨎꨯꨱꩃ ꨤꩄ ꨟꨭꨩ ꨨꨤꨮꩀ ꨨꨮꩈ ꨨꨲꨩ ꨋꩇ ꨨꨈꨰꩀ ꨢꨮꨭ ꨘꩆ ꨨꨲꨩ ꨔꨭꩉ ꨨꨓꨰ ꨆꨳꨮꩃ ꨚꨈꩅ ꨆꨮꨭ ꨣꨤꨯꨩ ꨢꨮꨭ ꨘꩆ꩝ ꨝꨵꨯꨱꩍ ꨟꨭꨩ ꨨꨤꨮꩀ ꨝꨩ ꨀꨟꨴꨩ ꨗꨯꨱ ꨆꨯꨱꩍ ꨜꨭꩆ ꨤꨪꨂꨩ ꨗꨰ ꨆꨎꨯꨱꩃ ꨈꨥꨰ ꨥꨮꩀ ꨨꨭꨩ ꨘꩆ꩝ ꨝꨵꨯꨱꩍ ꨗꨰ ꨆꨎꨯꨱꩃ ꨨꨳꨩ ꨤꩄ ꨟꨭꨩ ꨨꨤꨮꩀ ꨨꨮꩈ ꨝꨳꩀ ꨓꨳꩆ ꨨꨲꨩ ꨆꨶꨮꩄ ꨆꨳꨮꩃ ꨋꩇ ꨆꨳꨮꩃ ꨆꨩ ꨆꨮꨭ ꨟꨓꨰ ꨎꨮ꩝ ꨆꨮꨭ ꨠꨓꨶꨬ ꨟꨰꩀ ꨅꨩ ꨨꨭꨩ ꨀꨟꨩ ꨅꨩ ꨨꨭꨩ ꨝꨵꨯꨱꩍ ꨟꨰꩀ ꨨꨲꨩ ꨣꨯꨱꩃ ꨆꨮꨭ ꨢꨮꨭ ꨀꨗꩀ꩝ ꨝꨵꨯꨱꩍ ꨀꨣꩀ ꨗꨫ ꨨꨲꨩ ꨧꨯꨱꩃ ꨟꨰꩀ ꨨꨲꨩ ꨔꨭꩉ ꨓꨳꩆ ꨆꨳꨮꩃ ꨋꩇ ꨕꨫ ꨆꨮꨭ ꨌꨰꩀ ꨆꨯꨱꨥ꩝ ꨟꨭꨩ ꨨꨤꨮꩀ ꨆꨯꨱꩍ ꨤꨪꨂꨩ ꨘꩆ ꨠꨎꨰꩀ ꨆꨳꨮꩃ ꨆꨵꨰꩍ ꨝꨵꨯꨱꩍ ꨗꨰ ꨆꨎꨯꨱꩃ ꨃꨥ ꨤꩄ ꨧꨯꨱꩃ ꨟꨭꨩ ꨨꨤꨮꩀ ꨤꩄ ꨟꨭꨩ ꨨꨤꨮꩀ ꨨꨮꩈ ꨨꨲꨩ ꨥꨮꩀ ꨗꨯꨱ ꨧꩃ ꨤꩄ ꨧꨯꨱꩃ ꨟꨰꩀ ꨨꨲꨩ ꨝꨩ ꨨꨲꨩ ꨗꨯꨱ ꨆꨳꨮꩃ ꨚꨧꩃ ꨆꨮꨭ ꨝꨰꩀ ꨆꨮꨭ ꨔꨮꨭ ꨟꨪꩆ ꨆꨩ ꨨꨲꨩ꩝ ꨗꨰ ꨆꨎꨯꨱꩃ ꨚꨶꨮꩄ ꨢꨮꨭ ꨘꩆ ꨝꨵꨯꨱꩍ ꨗꨰ ꨆꨎꨯꨱꩃ ꨡꨯꩍ ꨜꨭꩆ ꨤꨪꨂꨩ ꨘꩆ ꨙꨳꨮ ꨆꨳꨮꩃ ꨤꨪꨝꨭꩍ ꨝꨵꨯꨱꩍ ꨗꨰ ꨆꨎꨯꨱꩃ ꨆꨕꨭꨥ ꨓꨴꨭꩆ ꨓꨟꨩ ꨕꨤꩌ ꨕꨗꨯꨱ ꨓꨜꨳꨩ ꨤꨪꨂꨩ ꨘꩆ ꨝꨵꨯꨱꩍ ꨗꨰ ꨆꨎꨯꨱꩃ ꨢꨶꨮ ꨕꨴꨬ ꨎꨳꨮꩃ ꨆꨭꨣꨩ ꨟꩍ ꨝꨵꨯꨱꩍ ꨗꨰ ꨆꨎꨯꨱꩃ ꨕꨯꨱꩀ ꨕꨤꩌ ꨕꨗꨯꨱ ꨘꩆ ꨎꨮ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨥꨮꩀ ꨗꨯꨱ ꨧꩃ ꨝꨵꨯꨱꩍ ꨐꨭꨩ ꨙꨯꩌ ꨧꨯꨱꩃ ꨟꨰꩀ ꨐꨭꨩ ꨤꩄ ꨐꨭꨩ ꨚꨈꩅ ꨗꨰ ꨆꨎꨯꨱꩃ ꨙꨪꩀ ꨤꨪꨂꨩ ꨝꨵꨯꨱꩍ ꨐꨭꨩ ꨆꨯꨱꩍ ꨜꨭꩆ ꨤꨪꨂꨩ ꨘꩆ ꨎꨤꨮꩍ ꨜꨭꩆ ꨤꨪꨂꨩ ꨘꩆ ꨝꨵꨯꨱꩍ ꨤꨰꩀ ꨗꨰ ꨆꨎꨯꨱꩃ ꨓꨟꨩ ꨕꨗꨯꨱ ꨝꨵꨯꨱꩍ ꨟꨓꨰ ꨖꨪꩅ ꨚꨎꨮ꩝ ꨝꨣꨭꨥ ꨟꩃ ꨕꨶꨩ ꨀꨗꩀ ꨟꨰꩀ ꨟꨭꨩ ꨨꨤꨮꩀ ꨀꨶꨮꩆ ꨓꨝꨶꨮꩆ ꨝꨵꨯꨱꩍ ꨐꨭꨩ ꨝꨩ ꨀꨗꩀ ꨎꨳꨮꩃ ꨐꨭꨩ ꨗꨯꨱ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨟꨭꩀ ꨟꨰꩀ ꨟꨭꨩ ꨨꨤꨮꩀ ꨓꨟꨩ ꨠꨖꨪꩉ ꨗꨯꨱ ꨚꨔꨮꨭ ꨚꨓꨯꨱ ꨤꩄ ꨆꨘꨩ ꨖꨭꩊ ꨚꨤꩀ ꨓꨆꨰ ꨟꩍ ꨛꨯꨮ ꨈꨗꨴꨮꩍ ꨚꨓꨴꨰ ꨗꨰ ꨆꨎꨯꨱꩃ ꨕꨮꩇ ꨕꨫ ꨕꨨꨵꩀ ꨗꨯꨱ ꨖꨪꩅ ꨚꨎꨮ ꨕꨨꨵꩀ ꨕꨶꩍ ꨕꨫ ꨡꨯꩍ ꨅꨩ ꨀꨣꩀ ꨗꨫ ꨕꨨꨵꩀ ꨋꩇ ꨨꨝꩉ ꨕꨫ ꨎꨳꨮꩃ ꨅꨩ ꨝꨵꨯꨱꩍ ꨕꨨꨵꩀ ꨝꨩ ꨀꨗꩀ ꨎꨳꨮꩃ ꨕꨨꨵꩀ ꨟꨭꨩ ꨨꨤꨮꩀ ꨗꨫ ꨟꨰ ꨆꨩ ꨛꨯꨮ ꨆꨳꨮꩃ ꨎꨮ꩝ ꨝꨣꨭꨥ ꨟꩃ ꨚꨓꨯꨱ ꨤꩄ ꨨꨰꩈ ꨢꩍ ꨟꨭꩀ ꨝꨩ ꨀꨗꩀ ꨟꨭꩀ ꨟꨰ ꨆꨩ ꨀꨤꨩ ꨟꨭꨩ ꨆꨎꨯꨱꩃ ꨎꩃ ꨨꨭꨩ ꨆꩄ ꨟꨪꩆ꩝ ꨝꨣꨭꨥ ꨟꩃ ꨟꨭꩀ ꨘꩆ ꨥꨮꩀ ꨗꨯꨱ ꨧꩃ ꨨꨤꨬ ꨟꨭꨩ ꨨꨤꨮꩀ ꨘꩆ ꨕꨯꨱꩀ ꨥꨮꩀ ꨚꩀ ꨠꨖꨪꩉ ꨚꨓꨯꨱ ꨝꨵꨯꨱꩍ ꨋꩇ ꨨꨕꨳꨮꩇ ꨚꨓꨯꨱ ꨆꨩ ꨀꨤꨩ ꨗꨰ ꨆꨎꨯꨱꩃ꩝ ꨝꨣꨭꨥ ꨟꩃ ꨚꨓꨯꨱ ꨚꨕꨴꨭꩅ ꨚꨕꨴꨶꨰ ꨕꨤꩌ ꨓꨳꩆ ꨝꨵꨯꨱꩍ ꨚꨨꨂꩍ ꨚꨨꨀꨰꩆ ꨗꨰ ꨆꨎꨯꨱꩃ ꨝꨵꨯꨱꩍ ꨚꨓꨯꨱ ꨕꨯꨱꩀ ꨕꨫ ꨔꨭꩀ ꨅꨩ꩝ ꨝꨣꨭꨥ ꨟꩃ ꨚꨓꨯꨱ ꨃꨥ ꨚꨗꨴꨯꨱꩃ ꨎꨝꨯꨱꩊ ꨝꨩ ꨚꨓꨯꨱ ꨗꨯꨱ ꨀꨠꩊ ꨣꨧꨩ ꨀꨠꩊ ꨒꨴꨶꩍ ꨟꨁꩆ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨝꨩ ꨚꨓꨯꨱ ꨗꨯꨱ ꨀꨠꩊ ꨗꨯꨱ ꨓꨮꩊ ꨌꨟꨯꨱꩍ ꨕꨗꨯꨱ ꨗꨰ ꨆꨎꨯꨱꩃ ꨆꨕꨭꨥ ꨓꨴꨭꩆ ꨕꨫ ꨊꨯꨱꩀ ꨜꨭꩆ ꨤꨪꨂꨩ ꨘꩆ ꨝꨵꨯꨱꩍ ꨗꨰ ꨆꨎꨯꨱꩃ ꨢꨶꨮ ꨕꨴꨬ ꨎꨳꨮꩃ ꨆꨭꨣꨩ ꨟꩍ ꨘꩆ꩝ ꨝꨵꨯꨱꩍ ꨚꨓꨯꨱ ꨚꨕꨴꨭꩅ ꨚꨕꨴꨶꨰ ꨨꨂꩍ ꨨꨀꨰꩆ ꨕꨤꩌ ꨨꨓꨰ ꨕꨫ ꨔꨮꨭ ꨤꨝꨪꩀ ꨆꨳꨮꩃ ꨋꩇ ꨨꨝꩉ ꨅꨩ꩝ ꨝꨣꨭꨥ ꨟꩃ ꨚꨓꨯꨱ ꨉꩀ ꨚꨗꨴꨯꨱꩃ ꨎꨝꨯꨱꩊ ꨥꨮꩀ ꨕꨯꨱꩀ ꨚꨕꨬ ꨈꨵꨰꩍ ꨚꩀ ꨕꨗꨯꨱ ꨘꩆ꩝ ꨝꨵꨯꨱꩍ ꨚꨓꨯꨱ ꨚꨙꩉ ꨚꨗꨴꨯꨱꩃ ꨎꨝꨯꨱꩊ ꨓꨴꨭꩆ ꨣꨚꨮꩀ ꨕꨤꩌ ꨕꨗꨯꨱ ꨘꩆ ꨀꨳꨮꩀ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨓꨴꨭꩆ ꨣꨚꨮꩀ ꨡꨯꩍ ꨧꨩ ꨝꨯꩍ ꨆꨭꨣꨩ ꨟꩍ꩝ ꨝꨣꨭꨥ ꨟꩃ ꨚꨓꨯꨱ ꨘꩆ ꨆꨶꨮꩉ ꨆꨭꨣꨩ ꨟꩍ ꨘꩆ ꨕꨫ ꨓꨕꨩ ꨝꨵꨯꨱꩍ ꨚꨯꩀ ꨟꨰ ꨧꩃ ꨥꨮꩀ ꨎꨮ꩝ ꨕꨫ ꨎꨳꨮꩃ ꨗꨯꨱ ꨀꨠꩊ ꨓꨴꨩ ꨅꨩ꩝ ꨚꨓꨯꨱ ꨝꨩ ꨆꨭꨣꨩ ꨘꩆ ꨗꨯꨱ ꨌꨰꩀ ꨕꨤꩌ ꨓꨝꩃ ꨟꩍ ꨝꨵꨯꨱꩍ ꨚꨓꨯꨱ ꨣꨯꨱꩃ ꨝꨣꨭꨥ ꨟꩃ ꨚꨓꨯꨱ ꨗꨯꨱ ꨟꨁꩆ ꨓꨴꨭꩍ ꨝꨵꨯꨱꩍ ꨟꨭꨩ ꨨꨤꨮꩀ ꨟꩀ ꨆꨭꨣꨩ ꨟꩍ ꨘꩆ ꨓꨯꨱꩍ ꨨꨘꨩ ꨡꨮꩃ ꨝꨵꨯꨱꩍ ꨐꨭꨩ ꨝꨩ ꨝꨯꨱꩃ ꨆꨭꨣꨩ ꨘꩆ ꨗꨯꨱ ꨆꨵꩀ ꨚꩀ ꨤꨪꨆꨭꩀ ꨧꩃ ꨝꨵꨯꨱꩍ ꨝꨯꨱꩃ ꨆꨭꨣꨩ ꨘꩆ ꨓꨟꨭꩍ ꨓꨈꨯꩀ ꨎꨳꨮꩃ ꨣꨪꨝꨭꩃ꩝ ꨝꨣꨭꨥ ꨟꩃ ꨚꨓꨯꨱ ꨥꨮꩀ ꨟꨰ ꨧꩃ ꨝꨵꨯꨱꩍ ꨚꨓꨯꨱ ꨣꨥꨮꩃ ꨆꨭꨣꨩ ꨘꩆ ꨀꨳꨮꩀ ꨡꨯꩍ ꨤꨨꨪꩀ ꨖꨪꩅ꩝ ꨝꨣꨭꨥ ꨟꩃ ꨚꨓꨯꨱ ꨓꨊꨪ ꨟꨭꨩ ꨨꨤꨮꩀ ꨤꩄ ꨡꨯꩍ ꨆꨭꨣꨩ ꨟꩍ ꨘꩆ ꨣꨬ꩝ ꨟꨭꨩ ꨨꨤꨮꩀ ꨤꩄ ꨕꨫ ꨝꨯꩍ ꨅꨩ꩝ ꨝꨣꨭꨥ ꨟꩃ ꨚꨓꨯꨱ ꨆꨳꨮꩃ ꨃꨥ ꨈꨗꨶꨮꩉ ꨨꨶꨮꩉ ꨟꨰ ꨈꨵꨮꩃ꩝ ꨝꨣꨭꨥ ꨟꩃ ꨗꨰ ꨨꨤꨮꩀ ꨀꨇꩆ ꨓꨚꩀ ꨤꩄ ꨐꨭꨩ ꨠꨓꨳꩆ ꨝꨵꨯꨱꩍ ꨐꨭꨩ ꨟꨨꨭꨩ ꨕꨫ ꨣꨤꨯꨱꨥ ꨆꨭꨣꨩ ꨣꨤꨯꨩ ꨝꨵꨯꨱꩍ ꨐꨭꨩ ꨟꩀ ꨋꩇ ꨣꨤꨯꨱꨥ ꨡꨮꩃ꩝ ꨤꨪꨎꩃ ꨚꨓꨯꨱ ꨕꨫ ꨚꨶꨮꩄ ꨨꨝꩉ ꨅꨩ ꨣꨬ꩝ ꨝꨣꨭꨥ ꨟꩃ ꨕꨯꨱꩀ ꨕꨶꨩ ꨆꨵꨮꨭ ꨨꨣꨬ ꨝꨵꨯꨱꩍ ꨚꨓꨯꨱ ꨗꨯꨱ ꨟꨁꩆ ꨚꩀ ꨤꨪꨆꨭꩀ ꨧꩃ ꨝꨵꨯꨱꩍ ꨡꨯꩍ ꨣꨪꨝꨭꩃ ꨓꨟꨭꩍ ꨌꨶꨪꩄ ꨓꨈꨯꩀ ꨝꨵꨯꨱꩍ ꨚꨓꨯꨱ ꨀꨶꨮꩆ ꨓꨝꨶꨮꩆ ꨕꨤꩌ ꨨꨓꨰ ꨗꨯꨱ ꨟꨰ ꨣꨥꨮꩀ ꨣꨪꨝꨭꩃ ꨘꩆ ꨝꨵꨯꨱꩍ ꨚꨓꨯꨱ ꨣꨯꨱꩃ ꨣꨪꨝꨭꩃ ꨘꩆ ꨚꨳꨯꨮꩍ ꨟꨁꩆ꩝ ꨤꨪꨎꩃ ꨚꨓꨯꨱ ꨗꨯꨱ ꨟꨁꩆ ꨓꨴꨭꩍ ꨝꨵꨯꨱꩍ ꨟꨭꨩ ꨨꨤꨮꩀ ꨎꨯꨱꩍ ꨣꨪꨝꨭꩃ ꨘꩆ ꨨꨝꨰ ꨡꨮꩃ ꨣꨬ꩝ ꨘꩆ ꨟꩃ ꨚꨓꨯꨱ ꨥꨮꩀ ꨟꨰ ꨟꩃ ꨟꨁꩆ ꨝꨵꨯꨱꩍ ꨚꨓꨯꨱ ꨗꨯꨱ ꨣꨥꨮꩃ ꨣꨪꨝꨭꩃ ꨘꩆ ꨡꨯꩍ ꨤꨪꨨꨪꩀ ꨖꨪꩅ ꨝꨣꨭꨥ ꨟꩃ ꨚꨓꨯꨱ ꨓꨊꨪ ꨟꨭꨩ ꨨꨤꨮꩀ ꨝꨵꨯꨱꩍ ꨟꨭꨩ ꨨꨤꨮꩀ ꨚꨶꨮꩄ ꨚꨈꩅ ꨚꨓꨯꨱ ꨣꨬ ꨤꩄ ꨐꨭꨩ ꨠꨓꨳꩆ ꨝꨵꨯꨱꩍ ꨐꨭꨩ ꨟꨨꨭꨩ ꨕꨫ ꨤꨝꨭꩃ ꨝꨵꨯꨱꩍ ꨨꨝꨰ ꨡꨮꩃ꩝ ꨤꨪꨎꩃ ꨚꨓꨯꨱ ꨕꨫ ꨤꩄ ꨨꨝꩉ ꨅꨩ ꨣꨬ꩝ ꨟꩃ ꨟꨭꨩ ꨨꨤꨮꩀ ꨕꨫ ꨠꨓꨳꩆ ꨅꨩ꩝ ꨐꨭꨩ ꨙꨯꩌ ꨚꨈꩅ ꨚꨓꨯꨱ ꨟꨪꩆ꩝ ꨚꨓꨯꨱ ꨕꨫ ꨨꨭꨩ ꨙꨪꩍ ꨕꨯꨱꩀ ꨧꨯꨱꩃ ꨐꨭꨩ ꨅꨩ꩝ ꨘꩆ ꨟꩃ ꨆꨙꨭꩍ ꨣꨪꨝꨭꩃ ꨘꩆ ꨢꨶꨮ ꨕꨴꨬ ꨎꨳꨮꩃ ꨌꨳꨪꩌ ꨡꨰꩅ ꨚꨮꩉ ꨟꨰ ꨙꩌ ꨕꨫ ꨠꨖꨪꩉ ꨚꨓꨯꨱ ꨝꨵꨯꨱꩍ ꨠꨐꨪ꩝ ꨝꨣꨭꨥ ꨟꩃ ꨚꨓꨯꨱ ꨟꨨꨪꩅ ꨡꨰꩅ ꨘꩆ ꨠꨐꨪ ꨝꨵꨯꨱꩍ ꨚꨓꨯꨱ ꨚꨕꨴꨭꩅ ꨚꨕꨴꨶꨰ ꨕꨤꩌ ꨨꨓꨰ ꨝꨵꨯꨱꩍ ꨚꨓꨯꨱ ꨀꨓꩀ ꨆꩊ ꨤꩄ ꨠꨢꩍ ꨝꨳꩀ ꨨꨲꨩ ꨟꨭꨩ ꨆꨎꨯꨱꩃ ꨝꨵꨯꨱꩍ ꨚꨮꩉ ꨟꨰ ꨝꨵꨯꨱꩍ ꨙꩌ ꨕꨫ ꨚꨤꩀ ꨓꨊꨪꩆ ꨆꨮꨭ꩝ ꨝꨣꨭꨥ ꨟꩃ ꨌꨳꨪꩌ ꨡꨰꩅ ꨘꩆ ꨚꨮꩉ ꨟꨰ ꨙꩌ ꨕꨫ ꨚꨤꩀ ꨓꨊꨪꩆ ꨚꨓꨯꨱ꩝ ꨝꨣꨭꨥ ꨟꩃ ꨚꨓꨯꨱ ꨟꩀ ꨌꨳꨪꩌ ꨡꨰꩅ ꨘꩆ ꨣꨯꨱꩃ꩝ ꨕꨯꨱꩀ ꨕꨶꨩ ꨆꨵꨮꨭ ꨨꨣꨬ ꨝꨵꨯꨱꩍ ꨚꨓꨯꨱ ꨗꨯꨱ ꨟꨁꩆ ꨓꨴꨭꩍ ꨟꨭꨩ ꨨꨤꨮꩀ ꨕꨯꨱꩀ ꨕꨫ ꨧꩃ ꨝꨵꨯꨱꩍ ꨐꨭꨩ ꨟꩀ ꨌꨳꨪꩌ ꨡꨰꩅ ꨘꩆ ꨀꩌ ꨡꨮꩃ꩝ ꨨꨤꨬ ꨝꨤꨭꨥ ꨌꨳꨪꩌ ꨡꨰꩅ ꨘꩆ ꨟꨭꨩ ꨨꨤꨮꩀ ꨝꨩ ꨗꨯꨱ ꨆꨵꩀ ꨚꩀ ꨎꨤꩆ ꨣꨪꨢꨩ ꨚꨴꨯꨱꩃ ꨀꨓꩍ ꨕꨫ ꨠꨖꨪꩉ ꨚꨓꨯꨱ꩝ ꨝꨵꨯꨱꩍ ꨝꨤꨭꨥ ꨡꨰꩅ ꨘꩆ ꨓꨟꨭꩍ ꨎꨳꨮꩃ ꨟꨆꨳꨩ ꨝꨣꨭꨥ ꨟꩃ ꨚꨓꨯꨱ ꨗꨯꨱ ꨟꨁꩆ ꨝꨵꨯꨱꩍ ꨥꨮꩀ ꨟꨰ ꨚꩀ ꨠꨖꨪꩉ ꨝꨵꨯꨱꩍ ꨕꨫ ꨡꨯꩍ ꨌꨳꨪꩌ ꨡꨰꩅ ꨘꩆ ꨅꨩ ꨝꨵꨯꨱꩍ ꨚꨓꨯꨱ ꨓꨊꨪ ꨟꨭꨩ ꨨꨤꨮꩀ ꨤꩄ ꨡꨯꩍ ꨌꨳꨪꩌ ꨡꨰꩅ ꨣꨬ꩝ ꨟꨭꨩ ꨨꨤꨮꩀ ꨤꩄ ꨌꨳꨪꩌ ꨡꨰꩅ ꨘꩆ ꨚꨮꩉ ꨟꨰ ꨤꨰꩀ ꨓꨟꨩ ꨈꨵꩍ ꨀꨳꨩ ꨨꨝꨰ ꨝꨵꨯꨱꩍ ꨟꨓꨰ ꨖꨪꩅ ꨝꨵꨯꨱꩍ ꨕꨨꨵꩀ ꨟꩀ ꨌꨰꩀ ꨚꩀ ꨘꩆ ꨝꨵꨯꨱꩍ ꨀꨔꨮꨭ ꨌꨈꨯꨱꩃ ꨖꨪꩅ ꨚꨎꨮ꩝ ꨤꨪꨎꩃ ꨚꨓꨯꨱ ꨕꨫ ꨚꨶꨮꩄ ꨨꨝꩉ ꨅꨩ ꨣꨬ꩝ ꨝꨣꨭꨥ ꨟꩃ ꨚꨓꨯꨱ ꨕꨯꩌ ꨕꨫ ꨕꨯꨱꩀ ꨨꨂꩍ ꨨꨀꨰꩆ ꨌꨳꨪꩌ ꨡꨰꩅ ꨘꩆ ꨎꨮ꩝ ꨘꩆ ꨟꩃ ꨝꨤꨭꨥ ꨌꨳꨪꩌ ꨡꨰꩅ ꨆꨴꨭꩃ ꨟꨭꨩ ꨨꨤꨮꩀ ꨝꨩ ꨗꨯꨱ ꨓꨭꩍ ꨚꩀ ꨎꨤꩆ ꨣꨪꨢꨩ ꨘꩆ ꨓꨟꨭꩍ ꨎꨳꨮꩃ ꨜꨭꩆ ꨟꨆꨳꨩ ꨚꨴꨯꨱꩃ ꨝꨵꨯꨱꩍ ꨟꨆꨳꨩ ꨘꩆ ꨟꨝꨯꨱꩍ ꨓꨭꩀ ꨧꨩ ꨝꨯꨱꩍ꩝ ꨘꩆ ꨟꩃ ꨝꨯꨱꩍ ꨟꨆꨳꨩ ꨓꨔꩀ ꨡꨭꨥ ꨝꨊꨪ ꨕꨫ ꨔꨮꨭ ꨤꨝꨪꩀ ꨆꨳꨮꩃ ꨚꨈꩇ ꨅꨩ꩝ ꨧꨬ ꨗꨯꨱ ꨈꩆ ꨜꨭꩆ ꨟꨆꨳꨩ ꨤꨪꨎꩃ ꨀꨋꩀ ꨓꨈꨯꩀ ꨟꨯꨱꩃ ꨎꨮ꩝ ꨝꨵꨯꨱꩍ ꨕꨫ ꨡꨯꩍ ꨝꨯꨱꩍ ꨟꨆꨳꨩ ꨘꩆ ꨅꨩ꩝ ꨝꨣꨭꨥ ꨟꩃ ꨧꨩ ꨂꨣꩃ ꨟꨭꩀ ꨢꨶꨮꩆ ꨓꨨꨩ ꨀꨗꨯꨱꩃ ꨓꨚꨬ ꨣꨌꩌ ꨗꨯꨱ ꨚꨝꨵꨬ ꨈꩆ ꨜꨭꩆ ꨟꨆꨳꨩ ꨘꩆ ꨝꨣꨭꨥ ꨟꩃ ꨡꨭꨥ ꨝꨯꨱꩍ ꨟꨆꨳꨩ ꨓꨔꩀ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨀꨋꩀ ꨓꨈꨯꩀ ꨊꨯꨱꩀ ꨜꨭꩆ ꨟꨆꨳꨩ ꨘꩆ ꨡꨯꩍ ꨝꨯꨱꩍ ꨟꨆꨳꨩ ꨘꩆ ꨓꨔꩀ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨤꩄ ꨨꨭꨩ ꨝꨯꨱꩍ ꨟꨆꨳꨩ ꨘꩆ ꨆꨩ ꨕꨴꨬ ꨡꨮꩃ ꨀꨳꨮꩀ ꨨꨰ ꨧꨳꩌ ꨣꨤꨯꨩ ꨢꨩ ꨘꩆ꩝ ꨝꨣꨭꨥ ꨟꩃ ꨝꨯꨱꩍ ꨟꨆꨳꨩ ꨘꩆ ꨎꨴꨭꩍ ꨓꨴꨭꩆ ꨕꨫ ꨜꨭꩆ ꨟꨰ ꨝꨵꨯꨱꩍ ꨟꨭꩀ ꨢꨶꨮꩆ ꨘꩆ ꨕꨶꨯꩆ ꨝꨭꩍ ꨕꨤꩌ ꨤꨀꨪ ꨝꨵꨯꨱꩍ ꨀꨗꨯꨱꩃ ꨝꨩ ꨗꨯꨱ ꨧꩃ꩝ ꨝꨵꨯꨱꩍ ꨟꨭꩀ ꨕꨫ ꨡꨮꩃ ꨝꨯꨱꩍ ꨟꨆꨳꨩ ꨘꩆ ꨅꨩ꩝ ꨟꨭꩀ ꨢꨶꨮꩆ ꨘꩆ ꨝꨩ ꨝꨯꨱꩍ ꨟꨆꨳꨩ ꨘꩆ ꨗꨯꨱ ꨚꨳꨯꨮꩍ ꨕꨤꩌ ꨇꩃ ꨝꨴꩍ꩝ ꨟꨭꩀ ꨢꨶꨮꩆ ꨘꩆ ꨗꨯꨱ ꨚꨝꨵꨬ ꨓꨚꨬ ꨣꨌꩌ ꨓꨴꨭꩍ ꨤꨶꨰ ꨧꩃ ꨕꨯꨱꩀ ꨎꨶꨩ ꨟꨪꩆ꩝ ꨟꨭꩀ ꨢꨶꨮꩆ ꨘꩆ ꨕꨫ ꨨꨭꨩ ꨀꨗꩀ ꨓꨌꨯꨱꨥ ꨅꨩ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨕꨯꨱꩀ ꨕꨤꩌ ꨝꨯꨱꩍ ꨟꨆꨳꨩ ꨘꩆ ꨓꨝꨳꩀ ꨟꨰ ꨌꨴꩃ ꨤꨪꨔꨬ ꨀꨳꨩ ꨨꨤꨩ ꨚꨘꩃ ꨀꨨꩉ ꨠꨘꩃ ꨣꨪꩌ ꨟꨓꨩ ꨌꨰꩀ ꨕꨤꩌ ꨧꩃ ꨟꨭꩀ ꨢꨶꨮꩆ ꨘꩆ ꨝꨵꨯꨱꩍ ꨗꨰ ꨆꨎꨯꨱꩃ ꨤꨶꩀ ꨓꨟꨩ ꨕꨯꨱꩀ ꨕꨤꩌ ꨝꨯꨱꩍ ꨟꨆꨳꨩ ꨥꨮꩀ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨟꨰ ꨟꩃ ꨚꨝꨵꨬ ꨓꨚꨬ ꨣꨌꩌ ꨝꨵꨯꨱꩍ ꨟꨭꩀ ꨢꨶꨮꩆ ꨘꩆ ꨡꨯꩍ ꨤꨧꨬ ꨝꨭꩍ ꨕꨫ ꨧꨤꨥ ꨌꨰꩀ ꨚꩀ ꨘꩆ ꨧꨯꨱꩃ ꨀꨨꩉ ꨝꨭꩍ ꨕꨫ ꨌꨡꩍ ꨌꨰꩀ ꨚꩀ ꨘꩆ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨤꩄ ꨂꨣꩃ ꨨꨤꨬ ꨝꨩ ꨤꨪꨔꨬ ꨧꨯꨱꩃ ꨀꨨꩉ ꨟꨰ ꨚꨳꨯꨮꩍ ꨆꨩ ꨆꨮꨭ ꨢꨮꨭ ꨗꨫ꩝ ꨨꨰ ꨤꩄ ꨂꨣꩃ ꨋꩇ ꨁꨗꨪꨄ ꨕꨫ ꨆꨮꨭ ꨙꨩ ꨢꨮꨭ ꨗꨫ꩝ ꨘꩆ ꨟꩃ ꨢꨶꨮꩆ ꨀꨓꩀ ꨆꩊ ꨝꨵꨯꨱꩍ ꨟꨭꩀ ꨢꨶꨮꩆ ꨘꩆ ꨨꨶꩀ ꨤꨪꨔꨬ ꨡꨮꩃ ꨀꨨꩉ ꨘꩆ ꨝꨵꨯꨱꩍ ꨕꨫ ꨡꨯꩍ ꨨꨝꩉ ꨅꨩ꩝ ꨝꨣꨭꨥ ꨟꩃ ꨕꨶꨩ ꨆꨵꨮꨭ ꨨꨣꨬ ꨤꨪꨎꩃ ꨢꨮꨭ ꨘꩆ ꨎꨮ ꨋꩆ ꨟꨭꩀ ꨘꩆ ꨗꨯꨱ ꨚꨝꨵꨬ ꨓꨚꨬ ꨣꨌꩌ ꨝꨵꨯꨱꩍ ꨥꨮꩀ ꨟꨰ ꨧꩃ ꨎꩃ ꨡꨯꩍ ꨤꨪꨧꨬ ꨝꨭꩍ ꨌꨰꩀ ꨚꨡꨳꩍ ꨀꨨꩉ ꨝꨭꩍ ꨌꨰꩀ ꨚꨡꨳꩍ꩝ ꨝꨣꨭꨥ ꨟꩃ ꨨꨣꨬ ꨨꨕꨬ ꨟꨭꩀ ꨢꨶꨮꩆ ꨘꩆ ꨆꨴꩀ ꨀꨳꨮꩀ ꨡꨯꩍ ꨧꨩ ꨂꨣꩃ ꨆꨭꨟꨬ ꨕꨣꨩ ꨝꨳꩀ ꨧꨳꩌ ꨝꨪꨗꨰ ꨕꨯꨱꩀ ꨝꨭꩍ ꨤꨪꨔꨬ ꨧꨯꨱꩃ ꨝꨭꩍ ꨀꨨꩉ ꨚꨳꨯꨮꩍ ꨆꨩ ꨟꨭꩀ ꨘꩆ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨙꨶꨮꩄ ꨟꨰ ꨀꨚꩆ ꨕꨫ ꨓꨊꨪꩆ ꨗꨰ ꨆꨎꨯꨱꩃ ꨝꨵꨯꨱꩍ ꨗꨰ ꨆꨎꨯꨱꩃ ꨆꨵꨯꨱ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨓꨊꨪ ꨤꩄ ꨌꨯꨱꨥ ꨨꨰ ꨧꨬ ꨝꨭꩍ ꨤꨪꨔꨬ ꨧꨯꨱꩃ ꨀꨨꩉ ꨆꨩ ꨟꨭꩀ ꨟꩃ ꨕꨴꨮꩍ ꨓꨗꨪ ꨟꨰ꩝ ꨘꩆ ꨟꩃ ꨗꨰ ꨆꨎꨯꨱꩃ ꨤꩄ ꨕꨨꨵꩀ ꨟꨪꩆ꩝ ꨟꨭꩀ ꨢꨶꨮꩆ ꨘꩆ ꨓꨊꨪ ꨤꩄ ꨌꨯꨱꨥ ꨕꨯꨱꩀ ꨚꩀ ꨨꨤꨬ ꨝꨵꨯꨱꩍ ꨌꨯꨱꨥ ꨟꨰ ꨝꨭꩍ ꨤꨪꨔꨬ ꨧꨯꨱꩃ ꨀꨨꩉ ꨚꨳꨯꨮꩍ ꨆꨩ ꨟꨭꩀ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨤꩄ ꨕꨨꨵꩀ ꨕꨯꨱꩀ ꨕꨤꩌ ꨝꨯꨱꩍ ꨟꨆꨳꨩ ꨟꨭꩀ ꨕꨶꨯꩆ ꨝꨩ ꨟꨰ ꨝꨵꨯꨱꩍ ꨟꨭꩀ ꨌꨰꩀ ꨕꨤꩌ ꨇꩃ ꨝꨴꩍ ꨘꩆ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨓꨟꨩ ꨧꩃ ꨗꨯꨱ ꨀꨳꨮꩀ ꨝꨯꨱꩍ ꨟꨆꨳꨩ ꨘꩆ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨡꨯꩍ ꨝꨯꨱꩍ ꨟꨆꨳꨩ ꨘꩆ ꨕꨯꨱꩀ ꨕꨯꩌ ꨆꨙꨯꨱꩍ ꨔꨯꨱꩍ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨔꨮꨭ ꨤꩄ ꨆꨩ ꨗꨰ ꨆꨎꨯꨱꩃ ꨘꩆ ꨝꨳꩀ ꨂꨣꩃ ꨈꨗꨴꩍ ꨝꨵꨯꨱꩍ ꨓꨝꨳꩀ ꨕꨫ ꨝꨯꨱꩍ ꨟꨆꨳꨩ꩝ ꨘꩆ ꨟꩃ ꨗꨰ ꨆꨎꨯꨱꩃ ꨚꨙꩉ ꨟꨭꩀ ꨢꨶꨮꩆ ꨘꩆ ꨗꨯꨱ ꨕꨀꨩ ꨚꨓꨯꨱ꩝ ꨗꨰ ꨆꨎꨯꨱꩃ ꨤꩄ ꨧꨯꨱꩃ ꨟꨭꩀ ꨢꨶꨮꩆ ꨘꩆ ꨤꩄ ꨢꩍ ꨟꨭꩀ ꨗꨯꨱ ꨕꨀꨩ ꨚꨓꨯꨱ ꨝꨵꨯꨱꩍ ꨚꨓꨯꨱ ꨓꨊꨪ ꨟꨭꩀ ꨤꩄ ꨧꩃ ꨟꨭꩀ ꨋꩇ ꨡꨮꩃ ꨨꨀꨰꩆ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨤꩄ ꨧꩃ ꨟꨭꩀ ꨏꩀ ꨣꨤꨯꨩ ꨢꨮꨭ ꨗꨫ ꨝꨵꨯꨱꩍ ꨧꨪꩅ ꨓꨴꨩ ꨚꨓꨯꨱ ꨟꨰ ꨝꨵꨯꨱꩍ ꨚꨓꨯꨱ ꨕꨯꨱꩀ ꨨꨝꩉ ꨆꩄ ꨆꨳꨮꩃ ꨎꨳꨮꩃ꩝ ꨘꩆ ꨟꩃ ꨗꨰ ꨆꨎꨯꨱꩃ ꨤꩄ ꨥꨮꩀ ꨤꩄ ꨟꨭꩀ ꨗꨯꨱ ꨝꨰꩀ ꨟꨭꩀ ꨥꨮꩀ ꨟꨰ ꨥꨮꩀ ꨘꩆ ꨡꨯꩍ ꨧꩃ ꨧꨳꩌ ꨥꨮꩀ ꨎꨮ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨗꨯꨱ ꨕꨀꨩ ꨚꨓꨯꨱ꩝ ꨟꨭꩀ ꨢꨶꨮꩆ ꨘꩆ ꨗꨯꨱ ꨓꨮꩊ ꨧꩃ ꨚꨓꨯꨱ ꨝꨵꨯꨱꩍ ꨀꨔꨮꨭ ꨈꨴꨯꨱꩍ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꩊ ꨃꨥ ꨓꨊꨪ ꨤꩄ ꨔꨬ ꨟꨰ ꨓꨭꩀ ꨝꨳꨮꩆ ꨗꨫ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨤꩄ ꨕꨨꨵꩀ ꨟꨪꩆ ꨛꨯꨮ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨤꩄ ꨟꨭꩀ ꨟꨰ ꨨꨓꨯꨱ꩝ ꨟꨭꩀ ꨢꨶꨮꩆ ꨘꩆ ꨤꩄ ꨕꨨꨵꩀ ꨟꨰ ꨕꨀꨩ ꨚꨓꨯꨱ ꨗꨯꨱ ꨡꨮꩃ ꨨꨀꨰꩆ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨗꨯꨱ ꨚꨔꨮꨭ ꨚꨓꨯꨱ꩝ ꨝꨣꨭꨥ ꨟꩃ ꨚꨓꨯꨱ ꨃꨥ ꨚꨗꨴꨯꨱꩃ ꨎꨝꨯꨱꩊ ꨟꩀ ꨀꨢꨭꩆ ꨝꨩ ꨟꨰ ꨝꨵꨯꨱꩍ ꨌꨆꨯꩃ ꨚꨓꨯꨱ ꨗꨯꨱ ꨡꨮꩃ ꨨꨀꨰꩆ ꨚꩀ ꨧꩃ ꨟꨭꩀ ꨢꨶꨮꩆ ꨘꩆ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨌꨆꨯꩃ ꨚꨓꨯꨱ ꨓꨝꨳꩀ ꨕꨫ ꨠꨖꨪꩉ ꨗꨯꨱ ꨡꨯꩍ ꨓꨭꩊ ꨤꩃ ꨟꩃ ꨚꨝꩍ ꨡꨮꩃ ꨠꨖꨪꩉ ꨚꨓꨯꨱ ꨗꨯꨱ ꨓꨮꩊ ꨧꩃ ꨟꨭꩀ ꨢꨶꨮꩆ ꨘꩆ꩝ ꨝꨣꨭꨥ ꨟꩃ ꨚꨓꨯꨱ ꨙꨪꩀ ꨀꨢꨭꩆ ꨗꨯꨱ ꨓꨮꩊ ꨚꨝꩍ ꨡꨮꩃ ꨎꩃ ꨟꨭꩀ ꨢꨶꨮꩆ ꨘꩆ ꨝꨣꨭꨥ ꨟꩃ ꨚꨓꨯꨱ ꨡꨯꩍ ꨀꨨꩉ ꨠꨘꩃ ꨂꨣꩃ ꨕꨯꨱꩀ ꨕꩀ ꨝꩀ ꨧꩃ ꨝꩀ ꨕꨗꨯꨱꩀ ꨟꨭꩀ ꨢꨶꨮꩆ ꨘꩆ꩝ ꨟꨭꩀ ꨢꨶꨮꩆ ꨘꩆ ꨡꨯꩍ ꨧꩃ ꨐꨭꨩ ꨧꨳꩌ ꨨꨮꨭ ꨣꨤꨯꨩ ꨝꨵꨯꨱꩍ ꨓꨆꨓꨶꩀ ꨥꨮꩀ ꨀꨨꩉ ꨠꨘꩃ ꨧꩃ ꨕꨗꨯꨱꩀ ꨀꨝꨪꩍ ꨟꩃ ꨗꨰ ꨆꨎꨯꨱꩃ ꨌꨴꩃ ꨎꨮ꩝ ꨝꨣꨭꨥ ꨟꩃ ꨚꨓꨯꨱ ꨗꨯꨱ ꨓꨮꩊ ꨝꨵꨯꨱꩍ ꨚꨓꨯꨱ ꨚꨤꨰꩀ ꨆꨵꨯꨱꩆ ꨕꨯꨱꩀ ꨕꨤꩌ ꨧꩃ ꨟꨭꩀ ꨢꨶꨮꩆ ꨘꩆ꩝ ꨝꨵꨯꨱꩍ ꨗꨰ ꨆꨎꨯꨱꩃ ꨚꨙꩉ ꨟꨭꩀ ꨢꨶꨮꩆ ꨘꩆ ꨚꨯꩀ ꨧꨩ ꨌꨡꩍ ꨀꨨꩉ ꨗꨰ ꨆꨎꨯꨱꩃ ꨋꩇ ꨘꩆ ꨗꨯꨱ ꨆꨩ ꨚꨓꨯꨱ ꨡꨮꩃ꩝ ꨝꨣꨭꨥ ꨟꩃ ꨚꨓꨯꨱ ꨡꨮꩃ ꨀꨨꩉ ꨘꩆ ꨝꨵꨯꨱꩍ ꨚꨓꨯꨱ ꨟꨯꨱꩃ ꨡꨯꩍ ꨀꨨꩉ ꨘꩆ ꨕꨴꨮꩍ ꨀꨨꩉ ꨗꨰ ꨆꨎꨯꨱꩃ ꨋꩇ ꨣꨤꨯꨩ ꨝꨣꨭꨥ ꨟꩃ ꨚꨓꨯꨱ ꨚꨕꨴꨭꩅ ꨚꨕꨴꨶꨰ ꨕꨤꩌ ꨨꨓꨰ ꨝꨵꨯꨱꩍ ꨚꨓꨯꨱ ꨕꨫ ꨎꨳꨮꩃ ꨡꨮꩃ ꨀꨨꩉ ꨘꩆ ꨅꨩ꩝ ꨝꨵꨯꨱꩍ ꨚꨓꨯꨱ ꨓꨊꨪ ꨟꨭꩀ ꨢꨶꨮꩆ ꨘꩆ ꨤꩄ ꨔꨬ ꨋꩇ ꨀꨨꩉ ꨗꨫ ꨟꨭꩀ꩝ ꨝꨣꨭꨥ ꨟꩃ ꨟꨭꩀ ꨢꨶꨮꩆ ꨘꩆ ꨤꩄ ꨕꨫ ꨔꨮꨭ ꨅꨩ ꨂꨣꩃ ꨣꨤꨯꨩ ꨕꨫ ꨔꨮꨭ ꨤꨝꨪꩀ ꨆꨩ ꨔꨬ ꨋꩇ ꨀꨨꩉ ꨗꨫ ꨅꨩ꩝ ꨝꨣꨭꨥ ꨟꩃ ꨚꨓꨯꨱ ꨡꨮꩃ ꨨꨤꨩ ꨕꨫ ꨌꨡꩍ ꨟꨭꩀ ꨢꨶꨮꩆ ꨘꩆ ꨝꨵꨯꨱꩍ ꨚꨓꨯꨱ ꨡꨯꩍ ꨨꨤꨩ ꨌꨪꩍ ꨘꩆ ꨝꨳꩀ ꨕꨴꨮꩍ ꨨꨤꨩ ꨌꨪꩍ ꨗꨰ ꨆꨎꨯꨱꩃ ꨌꨪꩍ ꨣꨤꨯꨩ ꨝꨣꨭꨥ ꨟꩃ ꨚꨓꨯꨱ ꨔꨶꩀ ꨢꨥꨩ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨟꨨꨪꩅ ꨚꨓꨯꨱ ꨔꨶꩀ ꨢꨥꨩ ꨝꨵꨯꨱꩍ ꨗꨰ ꨆꨎꨯꨱꩃ ꨔꨶꩀ ꨢꨥꨩ꩝ ꨝꨣꨭꨥ ꨟꩃ ꨚꨓꨯꨱ ꨟꨨꨪꩅ ꨗꨰ ꨆꨎꨯꨱꩃ ꨔꨶꩀ ꨢꨥꨩ ꨝꨵꨯꨱꩍ ꨚꨓꨯꨱ ꨓꨟꨩ ꨕꨤꩌ ꨧꩃ ꨟꨭꩀ ꨢꨶꨮꩆ ꨘꩆ ꨗꨯꨱ ꨀꨳꨮꩀ ꨡꨯꩍ ꨗꨰ ꨆꨎꨯꨱꩃ ꨝꨵꨯꨱꩍ ꨚꨓꨯꨱ ꨆꨶꨮꩉ ꨕꨫ ꨓꨆꨰ ꨗꨰ ꨆꨎꨯꨱꩃ ꨝꨵꨯꨱꩍ ꨚꨓꨯꨱ ꨨꨳꨩ꩝ ꨚꨓꨯꨱ ꨧꨗꩃ ꨀꨗꨪꩅ ꨤꩄ ꨆꨩ ꨗꨰ ꨆꨎꨯꨱꩃ ꨘꩆ ꨂꨣꩃ ꨠꨓꨶꨬ꩝ ꨢꩍ ꨗꨰ ꨆꨎꨯꨱꩃ ꨤꨪꨎꩃ ꨨꨳꨩ ꨣꨬ꩝ ꨝꨣꨭꨥ ꨟꩃ ꨚꨓꨯꨱ ꨟꩀ ꨟꩍ ꨚꨴꨳꩀ ꨓꨤꩀ ꨀꨮꩆ ꨊꨰ ꨟꨭꩀ ꨢꨶꨮꩆ ꨘꩆ ꨝꨵꨯꨱꩍ ꨚꨓꨯꨱ ꨝꨩ ꨗꨰ ꨆꨎꨯꨱꩃ ꨟꨰ ꨚꩀ ꨠꨖꨪꩉ ꨧꨯꨱꩃ ꨚꨓꨯꨱ ꨚꨓꨯꨱ ꨝꨩ ꨗꨰ ꨆꨎꨯꨱꩃ ꨟꨰ ꨓꩊ ꨠꨖꨪꩉ ꨝꨵꨯꨱꩍ ꨟꨭꨩ ꨨꨤꨮꩀ ꨟꨯꨱꩃ ꨡꨯꩍ ꨗꨰ ꨆꨎꨯꨱꩃ ꨟꨭꨩ ꨨꨤꨮꩀ ꨚꨵꨮꩃ ꨆꨕꨮꩃ ꨚꨵꩃ ꨆꨕꩃ ꨝꨵꨯꨱꩍ ꨟꨭꨩ ꨨꨤꨮꩀ ꨋꩇ ꨓꨊꨪ ꨤꩄ ꨨꨲꨩ ꨝꨣꨭꨥ ꨟꨰ ꨟꨭꨩ ꨆꨎꨯꨱꩃ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨤꩄ ꨨꨰꩈ꩝ ꨝꨵꨯꨱꩍ ꨟꨭꨩ ꨨꨤꨮꩀ ꨤꩄ ꨆꨮꨭ ꨟꨪꩆ ꨝꨵꨯꨱꩍ ꨟꨰ ꨋꩇ ꨨꨕꨳꨮꩇ ꨚꨓꨯꨱ ꨆꨩ ꨀꨤꨩ ꨨꨲꨩ ꨠꨢꩍ ꨂꨣꩃ ꨡꨳꩍ ꨧꨯꨱꩃ ꨐꨭꨩ ꨌꨳꨪꩇ ꨆꩄ꩝ ꨝꨣꨭꨥ ꨟꩃ ꨕꨫ ꨠꨤꩌ ꨘꩆ ꨗꨰ ꨆꨎꨯꨱꩃ ꨀꨇꩆ ꨥꨮꩀ ꨀꨝꨪꩍ ꨧꨯꨱꩃ ꨚꨓꨯꨱ ꨕꨯꩌ ꨆꨴꨭꩃ ꨟꨰꩀ ꨣꨯꨱꩃ ꨐꨭꨩ ꨋꩇ ꨨꨝꩉ ꨕꨫ ꨐꨭꨩ ꨧꨯꨱꩃ ꨟꨭꨩ ꨨꨤꨮꩀ ꨚꨈꩅ ꨐꨭꨩ ꨙꨪꩀ ꨤꨪꨂꨩ ꨝꨵꨯꨱꩍ ꨟꨭꨩ ꨨꨤꨮꩀ ꨆꨯꨱꩍ ꨤꨪꨂꨩ ꨘꩆ ꨆꨵꨰꩍ ꨝꨵꨯꨱꩍ ꨤꨰꩀ ꨐꨭꨩ ꨓꨴꨭꩆ ꨓꨟꨩ ꨕꨤꩌ ꨕꨗꨯꨱ ꨝꨵꨯꨱꩍ ꨐꨭꨩ ꨢꨶꨮ ꨕꨴꨬ ꨎꨳꨮꩃ ꨆꨭꨣꨩ ꨟꩍ ꨨꨰ ꨤꩄ ꨠꨕꨩ ꨚꨗꨶꨮꩄ ꨨꨈꨰꩀ ꨤꨪꨎꩃ ꨗꨰ ꨆꨎꨯꨱꩃ ꨀꨇꩆ ꨀꨝꨪꩍ ꨧꨯꨱꩃ ꨚꨓꨯꨱ꩝ ꨝꨣꨭꨥ ꨟꩃ ꨨꨣꨬ ꨨꨕꨬ ꨟꨭꨩ ꨨꨤꨮꩀ ꨟꨰ ꨟꨁꩆ ꨓꨯꨱꩌ ꨗꨰ ꨆꨎꨯꨱꩃ ꨝꨵꨯꨱꩍ ꨟꨭꨩ ꨨꨤꨮꩀ ꨓꨊꨪ ꨗꨰ ꨆꨎꨯꨱꩃ ꨤꩄ ꨗꨰ ꨆꨎꨯꨱꩃ ꨋꩇ ꨨꨝꩉ ꨝꨵꨯꨱꩍ ꨚꨓꨪꩍ ꨣꨤꨯꨩ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨙꨯꩌ ꨚꨆꨴꨲꨩ ꨤꩄ ꨐꨭꨩ ꨚꨙꨳꩀ ꨀꨳꨩ ꨝꩀ ꨧꨩ ꨚꨤꩍ ꨝꨵꨯꨱꩍ ꨀꨳꨩ ꨘꩆ ꨕꨯꨱꩀ ꨆꨴꨲꩍ ꨎꨭꨩ ꨝꨵꨯꨱꩍ ꨐꨭꨩ ꨆꨵꩀ ꨕꨴꨬ ꨐꨭꨩ ꨓꨟꨩ ꨕꨤꩌ ꨨꨎꨳꨮꩃ ꨧꨯꨱꩃ ꨐꨭꨩ ꨚꨓꨪꩍ꩝ ꨝꨣꨭꨥ ꨟꩃ ꨟꨭꨩ ꨨꨤꨮꩀ ꨡꨵꩍ ꨝꨵꨯꨱꩍ ꨐꨭꨩ ꨚꨙꨳꩀ ꨀꨳꨩ ꨧꨩ ꨚꨤꩍ ꨝꨵꨯꨱꩍ ꨀꨳꨩ ꨘꩆ ꨆꨴꨲꩍ ꨎꨭꨩ ꨝꨵꨯꨱꩍ ꨐꨭꨩ ꨆꨵꩀ ꨕꨴꨬ ꨓꨟꨩ ꨝꨵꨯꨱꩍ ꨀꨳꨩ ꨘꩆ ꨆꨵꨶꨩ ꨟꨓꨰ ꨖꨪꩅ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨚꨙꩉ ꨚꨗꨴꨯꨱꩃ ꨎꨝꨯꨱꩊ ꨔꨴꨯꨱꩃ ꨟꨭꨩ ꨨꨤꨮꩀ ꨓꨈꨯꩀ ꨝꨵꨯꨱꩍ ꨓꨌꨯꨱꩍ ꨚꨣꨯꨱꩃ ꨚꨣꨰꩍ ꨝꨵꨯꨱꩍ ꨌꨴꨯꨱꩀ ꨟꨔꨪꩆ ꨝꨵꨯꨱꩍ ꨗꨰ ꨆꨎꨯꨱꩃ ꨚꨙꩉ ꨚꨗꨴꨯꨱꩃ ꨎꨝꨯꨱꩊ ꨌꨆꨯꩃ ꨝꨆꨶꩃ ꨟꨔꨪꩆ ꨘꩆ ꨗꨯꨱ ꨆꨩ ꨟꨭꩀ ꨟꨰꩀ ꨣꨯꨱꩃ ꨗꨰ ꨆꨎꨯꨱꩃ ꨝꨵꨯꨱꩍ ꨗꨰ ꨆꨎꨯꨱꩃ ꨆꨆꨬ ꨧꨯꨱꩃ ꨚꨗꨴꨯꨱꩃ ꨎꨝꨯꨱꩊ ꨤꩄ ꨢꩍ ꨡꨯꩍ ꨟꨭꩀ ꨟꨰꩀ ꨣꨯꨱꩃ ꨐꨭꨩ ꨓꨊꨪ ꨤꩄ ꨟꨔꨪꩆ ꨨꨈꨰꩀ꩝ ꨘꩆ ꨤꩄ ꨟꨔꨪꩆ ꨀꨆꨩꩆ ꨟꨭꨩ ꨨꨤꨮꩀ ꨚꨙꩉ ꨀꨕꨬ ꨦꨄꨰ ꨌꨆꨯꩃ ꨗꨯꨱ ꨣꨥꨮꩃ ꨟꨭꩀ ꨘꩆ꩝ ꨝꨵꨯꨱꩍ ꨤꩄ ꨟꨭꨩ ꨨꨤꨮꩀ ꨆꨆꨬ ꨤꩄ ꨚꨙꩉ ꨟꨰ ꨣꨥꨮꩃ ꨐꨭꨩ ꨨꨰ꩝ ꨝꨣꨭꨥ ꨟꩃ ꨚꨗꨴꨯꨱꩃ ꨎꨝꨯꨱꩊ ꨌꨆꨯꩃ ꨟꨔꨪꩆ ꨘꩆ ꨗꨯꨱ ꨝꨵꨯꨱꩍ ꨚꨗꨴꨯꨱꩃ ꨎꨝꨯꨱꩊ ꨤꩄ ꨧꨯꨱꩃ ꨟꨭꩀ ꨘꩆ ꨢꨮꨭ ꨚꨗꨶꨮꩄ ꨗꨰ ꨆꨎꨯꨱꩃ ꨆꨆꨬ꩝ ꨝꨣꨭꨥ ꨟꩃ ꨟꨭꩀ ꨘꩆ ꨟꨰ ꨣꨥꨮꩃ ꨀꨗꩀ ꨟꨭꩀ ꨘꩆ ꨟꨭꨩ ꨨꨤꨮꩀ ꨟꨭꩀ ꨘꩆ ꨗꨯꨱ ꨓꨮꩊ ꨠꨖꨪꩉ ꨚꨓꨯꨱ ꨝꨵꨯꨱꩍ ꨟꨭꩀ ꨘꩆ ꨓꨟꨩ ꨕꨤꩌ ꨠꨖꨪꩉ ꨗꨯꨱ ꨡꨯꩍ ꨗꨰ ꨆꨎꨯꨱꩃ ꨝꨵꨯꨱꩍ ꨟꨭꩀ ꨘꩆ ꨚꨵꩃ ꨟꨓꨩ ꨟꨭꩀ ꨘꩆ ꨚꨧꨯꩌ ꨤꩄ ꨟꨭꨩ ꨨꨤꨮꩀ ꨝꨤꨯꨱꩍ ꨟꨭꩀ ꨘꩆ ꨤꩄ ꨀꨗꩀ ꨆꨆꨬ ꨚꨙꩉ ꨟꨰꩀ ꨟꨰ ꨣꨥꨮꩃ ꨀꨗꩀ ꨝꨳꩀ ꨣꨬ꩝ ꨝꨣꨭꨥ ꨟꩃ ꨗꨰ ꨆꨎꨯꨱꩃ ꨤꩄ ꨔꨯꨱꩍ ꨟꨪꩆ꩝ ꨝꨣꨭꨥ ꨟꩃ ꨟꨭꩀ ꨘꩆ ꨆꨴꨲꩆ ꨓꨘꩅ ꨕꨫ ꨒꨮꩇ ꨟꨭꨩ ꨨꨤꨮꩀ ꨅꨩ ꨗꨰ ꨆꨎꨯꨱꩃ ꨟꨪꩆ꩝ ꨝꨵꨯꨱꩍ ꨟꨭꩀ ꨘꩆ ꨠꨤꨭꨥ ꨕꨫ ꨗꨰ ꨆꨎꨯꨱꩃ ꨝꨣꨭꨥ ꨟꩃ ꨟꨭꩀ ꨘꩆ ꨥꨮꩀ ꨗꨯꨱ ꨧꩃ ꨥꨮꩀ ꨎꨮ꩝ ꨟꨭꩀ ꨘꩆ ꨡꨮꩃ ꨟꨔꨪꩆ ꨘꩆ ꨠꨎꨰꩀ ꨆꨳꨮꩃ ꨀꨝꨪꩍ ꨝꨵꨯꨱꩍ ꨟꨭꩀ ꨘꩆ ꨡꨯꩍ ꨀꨠꨯꩃ ꨓꨊꨪꩆ ꨧꨯꨱꩃ ꨡꨯꩍ ꨆꨣꩍ꩝ ꨘꩆ ꨟꩃ ꨟꨭꩀ ꨘꩆ ꨆꨴꨲꩆ ꨀꨠꨯꩃ ꨓꨊꨪꩆ ꨧꨯꨱꩃ ꨆꨣꩍ ꨟꨭꨩ ꨨꨤꨮꩀ ꨟꨭꩀ ꨘꩆ ꨨꨳꨩ ꨟꨭꩀ ꨘꩆ ꨔꨮꨭ ꨆꨩ ꨀꨗꩀ ꨐꨭꨩ ꨟꨭꨩ ꨨꨤꨮꩀ ꨘꩆ ꨟꨓꨰ ꨨꨤꨬ ꨙꨰ ꨗꨰ ꨆꨎꨯꨱꩃ ꨘꩆ ꨈꨗꨴꨮꩍ ꨎꨳꨯꨮꩃ ꨨꨕꨳꨮꩇ ꨥꨮꩀ꩞