@ ꨎꨩ ꨖꩉ ꨛꨯꨮ꩝ ꨂꨣꩃ ꨆꨢꨩ ꨕꨫ ꨗꨈꩉ ꨚꨗꨴꩃ꩝ ꨞꨭꩌ ꨝꨯꨱꩍ ꨕꨘꨩ꩝ ꨚꨗꨶꨮꩄ ꨀꩉ ꨝꨪꨊꨭꨩ – ꨆꨴꨩ ꩑꩙꩖꩘ @ ꨚꨗꨶꨮꩄ ꨚꨯꩀ ꨚꨢꨶꨩ ꨕꨨꨵꩀ ꨂꨣꩃ ꨆꨢꨩ ꨕꨫ ꨗꨈꩉ ꨚꨴꨋꨕꨣꩃ ꨞꨭꩌ ꨝꨯꨱꩍ ꨕꨘꨩ꩝ ꨚꨢꨶꨩ ꨆꨩ ꨅꩃ ꨚꨣꨮꩃ ꨕꨯꨱꩀ ꨕꨫ ꨧꩃ ꨓꨚꩍ ꨞꨭꩌ ꨓꨮꩆ ꨓꨰ ꨗꨈꩉ ꨚꨗꨴꩃ ꨧꨩ ꨓꨚꨭꩀ ꨀꨇꩉ ꨚꨓꨯꨱꨥ ꨀꨕꩅ꩝ ꨗꨫ ꨤꨪꨆꨮꨭ ꨅꩃ ꨝꨪꨤꨭꩍ ꨝꨪꨊꨭꩀ ꨓꨝꨳꩀ ꨝꨪ ꨣꨤꨯꨩ ꨓꨚꨭꩀ ꨝꨴꨬ ꨆꨩ ꨕꨯꩌ ꨣꨗꨰꩍ ꨨꨕꩌ ꨕꨯꨱꩀ ꨕꨫ ꨧꩃ ꨝꩄ ꨀꨇꩉ ꨆꨩ ꨈꨴꨭꨩ ꨚꨓꨯꨱꨥ ꨧꨰꩍ ꨠꨈꨴꨭꨩ ꨝꨪ ꨝꨳꩀ ꨨꨕꨬ ꨎꨳꨯꨮꩃ ꨀꨗꩀ ꨣꨩ ꨧꨳꩌ ꨎꨳꨮ꩝꩝꩝ ꨎꨩ ꨖꩉ ꨛꨯꨮ @ ꨚꨗꨶꨮꩄ ꨀꨇꩆ ꨈꨵꨮꩃ ꨡꨯꩍ ꨕꨯꩌ ꨀꨇꩉ ꨓꨚꨭꩀ ꨀꨳꨩ ꨌꩌ ꨌꨰꩀ ꨥꨮꩀ ꨕꨯꨱꩀ ꨕꨮꩃ ꨓꨶꨬ ꨎꨤꩆ ꨖꩉ ꨜꨶꩊ ꨧꨳꩌ ꨨꨣꨮꩍ ꨝꨵꨯꨱꩍ ꨀꨗꩀ ꨀꨕꩌ ꨤꨯꩀ ꨗꨫ ꨅꩍ ꨧꩃꨆ ꨓꨣꨳꨮꩃ ꨆꨳꨮꩃ ꨕꨶꩍ ꨠꨈꨴꨭꨩ ꨅꨩ꩝ ꨝꨪꨣꨭꨥ ꨟꩃ ꨣꨤꨯꨩ ꨎꨗꩀ ꨓꨆꨪꩀ ꨨꨗꨳꨪꩌ꩝ ꨣꨤꨯꨩ ꨏꩀ ꨓꨆꨪꩀ ꨧꨳꩌ꩝ ꨧꨮꩃ ꨥꩀ ꨓꨚꨭꩀ ꨀꨇꩉ ꨚꨓꨯꨱꨥ ꨀꨕꩅ ꨗꨫ ꨚꨨꨮꩍ ꨆꨩ ꨀꨗꩀ ꨀꨕꩌ ꨆꨳꨮꩃ ꨆꨩ ꨤꨪꨈꨰꩍ ꨟꨆꨴꨲꨩ ꨣꨭꩇ ꨕꨴꨬ ꨘꩆ ꨠꨈꨴꨭꨩ ꨚꨗꨶꨮꩄ ꨀꩉ ꨝꨪꨊꨭꨩ ꨗꨫ ꨨꨣꨬ ꨨꨕꨬ ꨖꩉ ꨜꨶꩊ ꨠꨓꨶꨥ ꨓꨡꩃ ꨈꨪꨤꩄ ꨥꨮꩀ ꨆꨩ ꨣꨯꨧꩀ ꨎꨳꨮ꩝꩝꩝ @ ꩑꩞ ꨚꨗꨶꨮꩄ ꨟꩃ ꨣꨩ ꨓꨨꨩ ꨀꨇꩆ꩝ ꨆꨩ ꨝꨵꨯꨱꩍ ꨆꨭꨨꨴꨳꨩ ꨧꨗꩃ ꨓꨶꨮꩀ ꨠꨈꨴꨭꨩ꩝꩝ ꩒꩞ ꨆꨟꨶꨮꩆ ꨤꨪꨆꨬ ꨆꨳꨮꩃ ꨨꨭꨩ꩝ ꨟꨢꩍ ꨆꨳꨮꩃ ꨠꨈꨴꨭꨩ ꨧꨳꩌ ꨓꨮꩊ ꨨꨕꨬ꩝꩝ ꩓꩞ ꨠꨈꨴꨭꨩ ꨀꨕꩅ ꨗꨫ ꨣꨬ꩝ ꨇꨪꩀ ꨚꨳꨯꨮꩍ ꨨꨕꨬ ꨧꨳꩌ ꨧꨯꨱꩃ ꨟꨆꨴꨲꨩ꩝꩝ ꩔꩞ ꨀꨕꩅ ꨕꨯꨱꩀ ꨣꨗꨰꩍ ꨈꨪꨤꨩ꩝ ꨠꨈꨴꨭꨩ ꨗꨫ ꨆꨩ ꨟꩃ ꨔꨮꨭ ꨀꨕꩅ꩝꩝ ꩕꩞ ꨨꨮꩄ ꨀꨯꨱꩃ ꨀꨗꩀ ꨣꨩ ꨧꨳꩌ꩝ ꨚꨮꩃ ꨓꨶꨬ ꨎꨤꩆ ꨟꨮꨈꨴꨭꨩ ꨝꨪ ꨝꨳꩀ꩝꩝ ꩖꩞ ꨣꨘꩌ ꨜꨶꩊ ꨁꨗꨩ ꨕꨫ ꨔꩇ꩝ ꨣꨲꨘꩌ ꨔꨴꨮꩇ ꨈꩇ ꨆꨵꩍ ꨕꨫ ꨆꨒꩍ꩝꩝ ꩗꩞ ꨋꩇ ꨝꨵꨮꩀ ꨨꨕꨬ ꨅꩍ ꨆꨵꩍ꩝ ꨟꨢꩍ ꨆꨳꨮꩃ ꨆꨴꩍ ꨕꨯꨱꩀ ꨓꨶꨬ ꨓꨚꩀ꩝꩝ ꩘꩞ ꨈꨴꨭꩀ ꨕꨯꨱꩀ ꨕꨫ ꨤꨯꩀ ꨆꩆ ꨝꨳꩀ꩝ ꨆꨳꨮꩃ ꨆꨩ ꨓꨚꩀ ꨤꨯꨩ ꨣꨩ ꨀꨗꨪꩅ꩝꩝ ꩙꩞ ꨣꨘꩌ ꨓꨶꩍ ꨀꨮꩈ ꨠꩈ꩝ ꨣꨘꩌ ꨀꨗꩀ ꨋꩇ ꨜꨶꩊ ꨝꨪ ꨣꨤꨯꨩ꩝꩝ ꩑꩐꩞ ꨕꨗꨯꨱꩀ ꨕꨯꨱꩀ ꨕꨫ ꨀꨤꩍ꩝ ꨟꨢꩍ ꨆꨳꨮꩃ ꨆꨴꩍ ꨨꨓꨰ ꨝꨪ ꨓꨣꨳꨮꩃ꩝꩝ ꩑꩑꩞ ꨟꨢꩍ ꨆꨳꨮꩃ ꨆꨩ ꨚꨴꨯꨱꩃ ꨋꩇ ꨠꨗꨰꩍ꩝ ꨆꨳꨮꩃ ꨆꨩ ꨤꨪꨈꨰꩍ ꨋꩇ ꨇꨪꩀ ꨎꨤꩆ꩝꩝ ꩑꩒꩞ ꨆꨴꨲꩆ ꨗꨫ ꨧꨯꨱꩃ ꨀꨕꩅ꩝ ꨆꨴꨲꩆ ꨝꨪ ꨆꨎꩇ ꨎꨤꩆ ꨁꨓꨩ꩝꩝ ꩑꩓꩞ ꨚꨚꨴꨯꨱꩃ ꨕꨴꨬ ꨋꩇ ꨝꨵꨯꨱꩍ ꨋꩇ꩝ ꨠꨧꩀ ꨤꨰꩀ ꨘꨗꨴꩅ ꨀꨰꩍ ꨀꨯꨱꩍ ꨨꨕꨬ꩝꩝ ꩑꩔꩞ ꨜꨶꩊ ꨧꨯꨱꩃ ꨘꨗꨴꩅ ꨤꨯꩀ ꨗꨫ꩝ ꨟꨢꩍ ꨔꨮꨭ ꨆꨩ ꨕꨴꨬ ꨚꨵꨰꩍ ꨝꨪ ꨀꨓꩍ꩝꩝ ꩑꩕꩞ ꨚꨵꨰꩍ ꨕꨫ ꨘꨗꨴꩅ ꨨꨭꨩ ꨜꨶꩊ꩝ ꨚꨵꨰꩍ ꨕꨫ ꨚꨚꨶꨮꩆ ꨂꨣꩃ ꨠꨧꩀ꩝꩝ ꩑꩖꩞ ꨨꨓꨰ ꨈꨵꨮꩃ ꨈꨭꩀ ꨝꨪꨣꨩ꩝ ꨎꨶꨰ ꨚꨯꩀ ꨟꨓꨩ ꨈꨵꨮꩃ ꨞꩇ ꨨꨣꨭꩀ꩝꩝ ꩑꩗꩞ ꨚꨈꨩ ꨧꨳꩌ ꨤꨡꨪꩉ ꨨꨣꨰꩀ꩝ ꨆꨩ ꨆꨭꨟꨬ ꨧꨳꩌ ꨔꨰꩀ ꨤꨡꨪꩉ ꨤꨤꨬ꩝꩝ ꩑꩘꩞ ꨝꨪꨊꨭꨩ ꨓꨴꨯꨱꩀ ꨧꨯꨱꩃ ꨆꨕꩀ꩝ ꨟꨢꩍ ꨞꨯꩃ ꨟꩀ ꨤꩇ ꨠꩈ ꨅꩍ ꨟꨕꨩ꩝꩝ ꩑꩙꩞ ꨧꨕꩍ ꨨꨕꨯꩌ ꨧꨳꩌ ꨤꨪꨆꨬ꩝ ꨣꨗꨰꩍ ꨢꨮꨭ ꨕꨴꨬ ꨝꨵꨯꨱꩍ ꨟꨰ ꨚꨓꨯꨱꩀ꩝꩝ ꩒꩐꩞ ꨟꨆꨴꨲꨩ ꨣꨭꩇ ꨐꨭꨩ ꨃꨥ ꨤꨪꨆꨬ꩝ ꨧꨳꩌ ꨧꨯꨱꩃ ꨠꨓꨶꨥ ꨢꨶꨩ ꨉꨮꩍ ꨕꨫ ꨕꨯꨱꩀ꩝꩝ ꩒꩑꩞ ꨠꨤꨭꨥ ꨕꨫ ꨠꨈꨴꨭꨩ ꨚꨓꨯꨱꩀ꩝ ꨣꨘꩌ ꨆꨩ ꨕꨗꨯꨱꩀ ꨕꨴꨬ ꨧꨳꩌ ꨓꨋꩆ꩝꩝ ꩒꩒꩞ ꨣꨘꩌ ꨕꨴꨮꩇ ꨥꩉ ꨠꨤꨭꨥ꩝ ꨣꨘꩌ ꨣꨤꨯꨩ ꨧꨭꨗꨭꨥ ꨆꨵꩍ ꨕꨫ ꨓꨋꩆ꩝꩝ ꩒꩓꩞ ꨎꨳꨮꩃ ꨕꨫ ꨟꨁꩆ ꨤꨶꨪꩄ ꨜꨶꩊ꩝ ꨨꨆꨯꨮ ꨨꨭꨩ ꨆꨳꨮꩃ ꨀꨶꨮꩆ ꨓꨴꨬ ꨢꨮꨭ ꨣꨩ ꨨꨶꩀ꩝꩝ ꩒꩔꩞ ꨆꨔꨯꨱꩅ ꨈꨵꨰꩍ ꨈꨵꩉ ꨁꨓꨩ꩝ ꨆꨳꨮꩃ ꨆꨩ ꨟꨕꨩ ꨕꨶꩍ ꨕꨶꨮꩆ ꨣꨟꨪꩀ꩝꩝ ꩒꩕꩞ ꨈꨪꨤꨩ ꨕꨴꨬ ꨆꨢꨶꨩ ꨅꩍ ꨨꨌꨪꩍ꩝ ꨚꨴꨯꨱꩃ ꨕꨫ ꨀꨝꨪꩍ ꨘꩆ ꨆꨵꨮꨭ ꨚꨆꩉ꩝꩝ ꩒꩖꩞ ꨟꨢꩍ ꨕꨯꨱꩀ ꨒꨮꩇ ꨎꨤꩆ꩝ ꨇꨪꩀ ꨆꨵꨮꨭ ꨚꨆꩉ ꨘꩆ ꨝꨪ ꨆꨎꩇ꩝꩝ ꩒꩗꩞ ꨘꩆ ꨎꨮꩍ ꨀꨤꩍ꩝ ꨕꨶꨩ ꨘꩆ ꨠꨧꩀ꩝ ꨆꨵꨮꨭ ꨘꩆ ꨆꨨꨴꩃ꩝꩝ ꩒꩘꩞ ꨇꨪꩀ ꨙꨯꩌ ꨝꨪ ꨓꨚꩀ꩝ ꨎꨶꨰ ꨣꨘꩌ ꨨꨣꩌ ꨥꩉ ꨥꩉ ꨨꨓꨰ꩝꩝ ꩒꩙꩞ ꨡꨯꩍ ꨂꨣꩃ ꨠꨢꨯꨱꩌ ꨎꨶꨰ ꨀꨶꨮꩆ꩝ ꨚꨶꩄ ꨆꨵꨯꨱ ꨓꨓꨶꨮꩆ ꨘꩆ ꨎꨮꩍ ꨈꨪꨤꨩ꩝꩝ ꩓꩐꩞ ꨀꨗꨪꩅ ꨤꨯꨩ ꨓꨔꨴꨲꩅ ꨕꨫ ꨨꨓꨰ꩝ ꨆꨭꨟꨬ ꨧꨳꩌ ꨝꨪꨗꨰ ꨣꨤꨯꨩ ꨕꨴꨬ ꨚꨧꩃ꩝꩝ ꩓꩑꩞ ꨣꨘꩌ ꨎꨮꩍ ꨇꨪꩀ ꨝꨪ ꨝꨳꩀ꩝ ꨎꨶꨰ ꨝꨴꨬ ꨨꨓꨰ ꨆꨩ ꨆꨭꨣꨬ ꨆꨭꨖꨩ꩝꩝ ꩓꩒꩞ ꨆꨒꩍ ꨔꨰꩀ ꨧꨯꨱꩃ ꨀꨊꨶꨬ꩝ ꨨꨓꨰ ꨧꨯꨱꩃ ꨌꨡꨶꨰ ꨚꨶꨮꩄ ꨎꨶꨰ ꨘꨣꩍ꩝꩝ ꩓꩓꩞ ꨧꨭꨤꨭꨩ ꨁꨗꨩ ꨣꨘꩌ꩝ ꨋꩇ ꨈꨴꨭꩀ ꨓꨆꨵꩌ ꨁꨗꨩ ꨣꨟꨭꩀ꩝꩝ ꩓꩔꩞ ꨠꨈꨴꨭꨩ ꨓꨳꩀ ꨓꨴꨰꩀ ꨝꨪꨊꨭꨩ꩝ ꨚꨗꨶꨮꩄ ꨅꩍ ꨨꨭꨩ ꨕꨴꨬ ꨈꨵꨰꩍ ꨓꨆꨵꩌ꩝꩝ ꩓꩕꩞ ꨠꨈꨴꨭꨩ ꨕꨯꩌ ꨚꨗꨶꨮꩄ ꨨꩊ ꨥꩊ꩝ ꨟꨢꩍ ꨨꨭꨩ ꨣꨎꩊ ꨟꩃ ꨣꨩ ꨠꨢꨯꨱꩌ꩝꩝ ꩓꩖꩞ ꨟꨁꩆ ꨎꨮꩍ ꨨꨓꨰ ꨔꨮꨭ ꨤꨯꨱꨥ꩝ ꨠꨈꨴꨭꨩ ꨆꨳꨮꩃ ꨆꨩ ꨨꨭꨩ ꨀꨗꩀ ꨣꨩ ꨧꨳꩌ꩝꩝ ꩓꩗꩞ ꨟꨢꩍ ꨙꨪꩍ ꨎꨶꨰ ꨎꨤꨩ꩝ ꨙꨪꩍ ꨔꨮꨭ ꨆꨭꨨꨴꨳꨩ ꨓꨈꨯꩀ ꨚꨈꨯꨮ꩝꩝ ꩓꩘꩞ ꨎꨶꨰ ꨚꨶꨮꩄ ꨠꨧꩀ ꨢꨰꩍ ꨕꨴꨬ꩝ ꨆꨜꨶꩊ ꨤꨯꨩ ꨙꨬ ꨎꩃ ꨎꨶꨰ ꨠꨈꨴꨭꨩ꩝꩝ ꩓꩙꩞ ꨚꨕꨮꩃ ꨧꩃ ꨈꨵꨮꩃ ꨚꨈꨩ꩝ ꨟꨢꩍ ꨙꨪꩍ ꨎꨤꨩ ꨤꨯꨩ ꨈꨵꨮꩍ ꨧꨘꩀ꩝꩝ ꩔꩐꩞ ꨆꨭꨢꨮꨭ ꨤꨯꨩ ꨠꨝꨯꨱꩍ ꨀꨤꩍ꩝ ꨕꨯꩌ ꨆꨯꨮ ꨆꨭꨠꩍ ꨧꩃ ꨅꩍ ꨚꨈꨩ꩝꩝ ꩔꩑꩞ ꨤꨪꨠꩆ ꨚꩀ ꨈꩍ ꨓꨆꨰ꩝ ꨚꨢꨯꨮꩇ ꨕꨴꨬ ꨨꨰ ꨓꨔꨴꩀ ꨤꨪꨝꨭꩍ꩝꩝ ꩔꩒꩞ ꨚꨶꨮꩄ ꨗꨯꨱ ꨧꨗꩃ ꨨꨕꨬ꩝ ꨈꨪꨤꩄ ꨰꩍ ꨆꨩ ꨕꨴꨬ ꨟꩃ ꨔꨮꨭ ꨆꨩ ꨧꨭꩀ꩝꩝ ꩔꩓꩞ ꨚꨶꨮꩄ ꨝꨵꨯꨱꩍ ꨧꨗꩃ ꨨꨕꨬ꩝ ꨓꨝꨵꨰꩅ ꨧꩇ ꨕꨴꨬ ꨆꨩ ꨂꨣꩃ ꨈꨗꨯꨱꩃ꩝꩝ ꩔꩔꩞ ꨧꨗꩃ ꨗꨯꨱ ꨚꨶꨮꩄ ꨨꨕꨬ꩝ ꨔꨰꩀ ꨘꩆ ꨆꨣꨬ ꨀꨗꩀ ꨣꨩ ꨧꨳꩌ꩝꩝ ꩔꩕꩞ ꨀꨕꩍ ꨓꨳꩆ ꨓꨤꩃ ꨀꨳꨩ ꨡꨯꨱꩀ꩝ ꨟꨆꨴꨲꨩ ꨕꨗꨯꨱꩀ ꨆꨢꨶꨩ ꨝꨯꨱꩍ ꨚꨗꨶꨮꩄ꩝꩝ ꩔꩖꩞ ꨚꨓꨯꨱꩀ ꨆꨵꨯꨱ ꨧꨯꨱꩃ ꨠꨧꩀ꩝ ꨟꨢꩍ ꨆꨳꨮꩃ ꨆꨩ ꨎꩀ ꨧꨴꩌ ꨧꨳꩌ ꨨꨓꨰ꩝꩝ ꩔꩗꩞ ꨎꩀ ꨧꨯꨱꩃ ꨈꨪꨤꨩ ꨤꨯꨩ ꨨꨗꨯꨱꩍ꩝ ꨣꨘꩌ ꨧꨯꨱꩃ ꨆꨚꨴꨯꨱꩍ ꨓꨶꨬ ꨣꨚꨎꩆ꩝꩝ ꩔꩘꩞ ꨧꨳꩌ ꨏꩀ ꨆꨭꨢꨶꨩ ꨕꨴꨬ ꨕꨶꩍ꩝ ꨟꨆꨴꨲꨩ ꨧꨯꨱꩃ ꨚꨓꨶꩍ ꨢꨶꨩ ꨖꩉ ꨁꨗꨩ꩝꩝ ꩔꩙꩞ ꨈꨴꨭꩀ ꨕꨯꨱꩀ ꨆꨒꩍ ꨢꨮꨭ ꨘꩆ꩝ ꨆꨴꨲꩆ ꨌꨰꩀ ꨝꨪ ꨨꨭꨩ ꨎꨶꨰ ꨝꨴꨬ ꨠꨤꨭꩀ꩝꩝ ꩕꩐꩞ ꨨꨕꨮꩃ ꨧꨯꨱꩃ ꨎꨳꨮꩃ ꨕꨗꨯꨱꩀ꩝ ꨨꨓꨰ ꨉꨮꩍ ꨕꨫ ꨕꨯꨱꩀ ꨣꨤꨯꨩ ꨀꨗꨪꩅ꩝꩝ ꩕꩑꩞ ꨟꨓꨩ ꨢꨮꨭ ꨌꨣꨪꨟꨪꩆ꩝ ꨓꨊꨪ ꨆꨳꨮꩃ ꨚꨮꩃ ꨆꨩ ꨀꨧꨭꨞꩇ꩝꩝ ꩕꩒꩞ ꨣꨘꩌ ꨓꨴꨭꩍ ꨎꨳꨮꩃ ꨌꨡꨶꨰ꩝ ꨀꨤꩍ ꨕꨫ ꨇꨶꨰ ꨎꨳꨮꩃ ꨧꨣꨪꨗꨰ꩝꩝ ꩕꩓꩞ ꨆꨭꨖꨩ ꨗꨫ ꨝꨳꩀ ꨆꨒꩍ꩝ ꨣꨘꩌ ꨝꨵꨯꨱꩍ ꨡꨶꩍ ꨕꨴꨬ ꨥꨮꩀ ꨆꨩ ꨕꨴꨬ꩝꩝ ꩕꩔꩞ ꨆꨔꨯꨱꩅ ꨝꨵꨯꨱꩍ ꨌꨳꨪꩇ ꨣꨪꨡꩍ꩝ ꨢꨮꨭ ꨨꨈꨰ ꨝꨪꨘꩍ ꨨꨕꨭꩍ ꨨꨈꨰꩅ ꨨꨆꩀ꩝꩝ ꩕꩕꩞ ꨆꨟꨰꩍ ꨚꨯꨱꩍ ꨀꨨꨯꨱꩀ ꨝꨌꩍ꩝ ꨟꨰ ꨟꩃ ꨟꨮꨆꩍ ꨓꨴꨭꩍ ꨓꨮꩊ ꨗꨈꩉ꩝꩝ ꩕꩖꩞ ꨀꨨꨯꨱꩀ ꨚꨴꨯꨱꩃ ꨤꨢꩉ ꨔꨴꩇ ꨈꩇ꩝ ꨈꨵꨮꩃ ꨤꩄ ꨆꨎꩇ ꨓꨝꨵꨯꨱꩍ ꨆꨣꩌ꩝꩝ ꩕꩗꩞ ꨌꨓꨬ ꨓꨝꨵꨮꩀ ꨢꨶꨩ ꨈꩆ꩝ ꨀꨗꩀ ꨅꩍ ꨠꨖꩉ ꨢꨶꨩ ꨀꨟꨰꩀ ꨀꨟꨩ꩝꩝ ꩕꩘꩞ ꨈꨪꨡꩀ ꨕꨫ ꨣꨩ ꨎꩀ ꨓꨴꨭꩍ ꨈꨭꩍ꩝ ꨈꨪꨡꩀ ꨕꨫ ꨝꨪꨓꨶꩍ ꨢꨶꨩ ꨖꩉ ꨁꨗꨩ꩝꩝ ꩕꩙꩞ ꨆꨵꩀ ꨜꨭꩆ ꨆꨳꨮꩃ ꨔꨶꨰ ꨕꨶꩍ ꨔꩆ꩝ ꨆꨵꩀ ꨈꨮꩇ ꨚꨓꨳꩆ ꨓꨶꨬ ꨣꨩ ꨚꨣꩅ꩝꩝ ꩖꩐꩞ ꨆꨵꩀ ꨈꨮꩇ ꨣꨘꩌ ꨂꨣꩃ꩝ ꨓꨝꨳꩀ ꨝꨡꨮꩃ ꨎꩃ ꨂꨣꩃ ꨆꨵꨯꨱ ꨝꨪꨤꨬ꩝꩝ ꩖꩑꩞ ꨠꨤꨭꩀ ꨟꩍ ꨎꨳꨮꩃ ꨝꨪꨔꨬ꩝ ꨆꨵꩀ ꨣꨭꩇ ꨕꨴꨬ ꨝꨵꨯꨱꩍ ꨤꩄ ꨤꨪꨈꨰꩍ꩝꩝ ꩖꩒꩞ ꨨꨈꨰꩅ ꨈꨵꨯꨱꩃ ꨕꨫ ꨀꨝꨪꩍ꩝ ꨨꨓꨰ ꨕꨴꨬ ꨨꨌꨪꩍ ꨘꩆ ꨎꨮꩍ ꨣꨩ ꨈꨵꨯꨱꩃ꩝꩝ ꩖꩓꩞ ꨨꨈꨰꩅ ꨨꨝꨳꨮꩉ ꨕꨫ ꨀꨝꨪꩍ꩝ ꨠꨧꩀ ꨝꨵꨮꩀ ꨓꨴꨪꩍ ꨎꨮꩍ ꨨꨝꨳꨮꩉ ꨕꨫ ꨂꨣꩃ꩝꩝ ꩖꩔꩞ ꨨꨈꨰꩅ ꨧꨳꩌ ꨕꨫ ꨀꨝꨪꩍ꩝ ꨨꨓꨰ ꨕꨴꨬ ꨨꨌꨪꩍ ꨘꩆ ꨎꨮꩍ ꨣꨩ ꨧꨳꩌ꩝꩝ ꩖꩕꩞ ꨨꨈꨰꩅ ꨏꩀ ꨕꨫ ꨀꨝꨪꩍ꩝ ꨨꨓꨰ ꨅꩍ ꨨꨌꨪꩍ ꨘꩆ ꨎꨮꩍ ꨣꨩ ꨏꩀ꩝꩝ ꩖꩖꩞ ꨠꨧꩀ ꨧꨳꩌ ꨎꨳꨮꩃ ꨆꨒꩍ꩝ ꨎꩀ ꨎꨳꨮꩃ ꨀꨓꩍ ꨢꨶꨩ ꨝꨯꨱꩍ ꨚꨗꨶꨮꩄ꩝꩝ ꩖꩗꩞ ꨆꨒꩍ ꨈꨵꨮꩃ ꨕꨫ ꨌꨚꨴꨯꨱꩍ꩝ ꨠꨗꨶꨪꩋ ꨌꨠꨆꨯꨱꩍ ꨣꨤꨯꨩ ꨚꨙꨳꩀ꩝꩝ ꩖꩘꩞ ꨆꨭꨢꨮꨭ ꨚꨴꨯꨱꩃ ꨕꨫ ꨆꨴꨲꩍ ꨓꨗꨴꨮꩆ꩝ ꨀꨊꨪꩆ ꨀꨚꩍ ꨇꨮꩃ ꨚꨓꨭꩍ ꨨꨆꨵꨪꩀ ꨀꨉꨩ꩝꩝ ꩖꩙꩞ ꨎꨳꨮꩃ ꨚꨴꨯꨱꩃ ꨧꨗꩃ ꨥꨮꩀ ꨨꨰ꩝ ꨎꨶꨰ ꨕꨭꩍ ꨨꨓꨰ ꨕꨫ ꨞꩇ ꨝꨪꨗꨪ꩝꩝ ꩗꩐꩞ ꨟꨢꩍ ꨣꨘꩌ ꨎꨶꨰ ꨝꨪ ꨜꨶꨮꩊ꩝ ꨓꨗꩍ ꨓꨙꨳꨮꩃ ꨎꨶꨰ ꨚꨯꨱꩀ ꨣꨕꨰꩍ꩝꩝ ꩗꩑꩞ ꨚꨓꨯꨱꩀ ꨈꨰꩈ ꨈꨵꨮꩃ ꨕꨫ ꨓꨚꨳꨮꩆ꩝ ꨡꨯꩍ ꨨꩃ ꨓꨙꨳꨮꩃ ꨕꨴꨬ ꨎꨮꩍ ꨚꨙꨶꨮꩆ꩝꩝ ꩗꩒꩞ ꨚꨕꨮꩃ ꨧꩃ ꨈꨵꨮꩃ ꨕꨫ ꨚꨤꨬ꩝ ꨟꨢꩍ ꨕꨶꩍ ꨆꨭꨟꨬ ꨈꨵꨮꩃ ꨓꨶꨬ ꨚꨎꨰꩍ꩝꩝ ꩗꩓꩞ ꨟꨢꩍ ꨤꩄ ꨤꨪꨨꨪꩀ ꨡꨳꩍ ꨟꨪꩆ꩝ ꨤꨪꨎꩃ ꨨꨭꨩ ꨜꨶꨮꩊ ꨚꨳꨯꨮꩍ ꨓꨮꩊ ꨨꨕꨬ꩝꩝ ꩗꩔꩞ ꨚꨓꨭꨥ ꨧꨯꨱꩃ ꨓꨤꨪ ꨓꨴꩀ ꨝꨳꩀ꩝ ꨨꨓꨰ ꨓꨶꩀ ꨡꨶꩀ ꨝꨪꨓꨭꨥ ꨎꨳꨮꩃ ꨨꨒꨶꨮꩊ꩝꩝ ꩗꩕꩞ ꨨꨓꨰ ꨕꨴꨬ ꨚꨓꨯꨱꩀ ꨧꨯꨱꩃ ꨨꨒꨶꨮꩊ꩝ ꨕꨤꩌ ꨧꨩ ꨓꨚꨶꨮꩉ ꨨꨭꨩ ꨧꨩ ꨂꨣꩃ꩝꩝ ꩗꩖꩞ ꨚꨙꨳꩀ ꨎꨳꨮꩃ ꨥꩉ ꨠꨤꨭꨥ꩝ ꨆꨘꩊ ꨨꨕꩉ ꨨꨰ ꨆꨴꨭꩃ ꨕꨴꨬ ꨈꨪꨗꨯꨱꩃ꩝꩝ ꩗꩗꩞ ꨈꨪꨗꨯꨱꩃ ꨙꨯꩌ ꨓꨝꨳꩀ ꨥꩉ꩝ ꨚꨙꨳꩀ ꨟꨰ ꨚꨙꨮꩇ ꨤꨪꨨꨪꩀ ꨕꨗꨯꨱꩀ꩝꩝ ꩗꩘꩞ ꨤꨪꨨꨪꩀ ꨎꩀ ꨆꨢꨶꨩ ꨕꨴꨬ ꨀꨤꩍ꩝ ꨧꨳꩌ ꨎꨳꨮꩃ ꨆꨒꩍ ꨢꨶꨩ ꨝꨴꨭꩀ ꨨꨓꨰ꩝꩝ ꩗꩙꩞ ꨧꨗꩃ ꨕꨫ ꨨꨓꨰ ꨝꨵꨯꨱꩍ ꨨꨶꨮꩄ꩝ ꨓꨊꨪ ꨔꨮꨭ ꨚꨶꨮꩄ ꨓꨶꨬ ꨚꨠꨢꨯꩀ꩝꩝ ꩘꩐꩞ ꨋꩇ ꨡꨮꩃ ꨀꨊꨶꨬ ꨔꨮꨭ ꨇꨪꩀ꩝ ꨟꨢꩍ ꨕꨴꨮꩇ ꨤꨪꨨꨪꩀ ꨕꨶꩍ ꨕꨶꨮꩆ ꨣꨟꨪꩀ꩝꩝ ꩘꩑꩞ ꨨꨭꨩ ꨕꨴꨮꩇ ꨤꨪꨗꩃ ꨨꨓꨰ ꨕꨴꨬ꩝ ꨎꨠꩆ ꨕꨴꨮꩇ ꨨꨰ ꨕꨴꨬ ꨆꨵꩍ ꨕꨫ ꨈꨵꨰꩍ꩝꩝ ꩘꩒꩞ ꨣꨘꩌ ꨧꨭꨗꨭꨥ ꨎꨳꨮꩃ ꨟꩍ꩝ ꨣꨘꩌ ꨆꨩ ꨧꨗꩍ ꨂꨣꨚꨎꩆ꩝꩝ ꩘꩓꩞ ꨡꨯꩍ ꨚꨴꨯꨱꩃ ꨁꨓꨩ ꨎꨶꨰ ꨚꨵꨰꩍ꩝ ꨟꨢꩍ ꨡꨯꩍ ꨣꨗꨰꩍ ꨕꨴꨬ ꨎꨶꨰ ꨠꨧꩀ꩝꩝ ꩘꩔꩞ ꨈꨴꨭꩀ ꨕꨯꨱꩀ ꨧꨗꩃ ꨨꨶꩄ ꨨꨰ꩝ ꨎꨶꨰ ꨋꩇ ꨨꨓꨰ ꨤꨯꨩ ꨕꨴꨬ ꨈꨪꨗꨯꨱꩃ꩝꩝ ꩘꩕꩞ ꨟꨢꩍ ꨡꨯꩍ ꨣꨩ ꨨꨶꨮꩄ ꨎꨶꨰ ꨀꨶꨮꩆ꩝ ꨁꨓꨩ ꨋꩇ ꨜꨶꩊ ꨎꨶꨰ ꨋꩇ ꨆꨒꩍ꩝꩝ ꩘꩖꩞ ꨆꨭꨢꨮꨭ ꨟꨓꨰ ꨎꨳꨮꩃ ꨒꨭꩍ꩝ ꨠꨘꨧꩀ ꨤꨪꨝꨭꩍ ꨕꨴꨬ ꨎꨯꨮꩍ ꨆꨗꩃ꩝꩝ ꩘꩗꩞ ꨡꨯꩍ ꨕꨴꨮꩍ ꨕꨫ ꨤꨯꩀ ꨢꨮꨭ ꨘꩆ꩝ ꨕꨯꨱꩀ ꨆꨳꨮꩃ ꨧꨪꨝꩉ ꨆꨩ ꨎꨶꨰ ꨚꨤꨰ꩝꩝ ꩘꩘꩞ ꨎꨮꩍ ꨆꩆ ꨝꨪꨤꨩ ꨘꩆ ꨟꨰ꩝ ꨣꨩ ꨝꨴꨬ ꨨꨓꨰ ꨚꨳꨯꨮꩍ ꨙꨯꩌ ꨧꨗꩃ꩝꩝ ꩘꩙꩞ ꨟꨕꨩ ꨕꨯꨱꩀ ꨝꨪ ꨓꨚꩀ꩝ ꨟꩍ ꨧꨯꨱꩃ ꨚꨣꨳꩀ ꨝꨩ ꨕꨴꨬ ꨓꨝꨵꨮꩀ꩝꩝ ꩙꩐꩞ ꨎꨤꩆ ꨥꨰꩈ ꨁꨓꨩ ꨎꨮꩍ ꨚꨵꨰꩍ꩝ ꨚꨓꩀ ꨧꨯꨱꩃ ꨤꨪꨈꨰꩍ ꨣꨤꨯꨩ ꨆꨙꩍ꩝꩝ ꩙꩑꩞ ꨀꨔꨮꨭ ꨏꩀ ꨆꨳꨮꩌ ꨤꨪꨔꨬ꩝ ꨟꨢꩍ ꨕꨶꩍ ꨆꨭꨟꨬ ꨎꨶꨰ ꨣꨶꩍ ꨝꨪꨗꨰ꩝꩝ ꩙꩒꩞ ꨌꨥꨌꨪ ꨆꨤꨪꩍ ꨧꩀ ꨣꨬ꩝ ꨌꨤꩃ ꨆꨭꨖꨩ ꨙꨬ ꨕꨴꨮꩇ ꨅꩍ ꨆꨙꨯꨱꩃ꩝꩝ ꩙꩓꩞ ꨎꩀ ꨕꨴꨬ ꨆꨢꨶꨩ ꨧꨳꩌ ꨓꨳꩆ꩝ ꨧꨗꩃ ꨡꨯꩍ ꨎꨤꩆ ꨎꨮꩍ ꨅꩍ ꨓꨝꨵꨰꩅ꩝꩝ ꩙꩔꩞ ꨟꨢꩍ ꨕꨴꨬ ꨧꨮꩍ ꨋꩇ ꨨꨟꨭꨩ꩝ ꨓꨳꩆ ꨔꨮꨭ ꨆꨴꨲꨩ ꨎꨶꨰ ꨆꨵꩀ ꨀꨚꨭꩍ꩝꩝ ꩙꩕꩞ ꨟꨢꩍ ꨋꩇ ꨨꨟꨭꨩ ꨓꨴꨭꩍ ꨨꨈꨭꩍ꩝ ꨨꨓꨰ ꨕꨴꨬ ꨧꨮꩍ ꨝꨵꨯꨱꩍ ꨗꨯꨱ ꨝꨪꨗꨪ꩝꩝ ꩙꩖꩞ ꨆꨔꨯꨱꩅ ꨎꨶꨰ ꨨꨆꩀ ꨨꨤꨩ꩝ ꨕꨴꨮꩇ ꨟꨮꨕꨶꨩ ꨎꨶꨰ ꨝꨩ ꨚꨝꨵꨬ꩝꩝ ꩙꩗꩞ ꨆꨔꨯꨱꩅ ꨝꨵꨯꨱꩍ ꨀꩄ ꨨꨓꨰ꩝ ꨧꨗꩃ ꨥꨮꩀ ꨨꨰ ꨟꩃ ꨨꨭꨩ ꨨꨕꨬ꩝꩝ ꩙꩘꩞ ꨆꨔꨯꨱꩅ ꨝꨵꨯꨱꩍ ꨚꨙꨳꩀ ꨨꨓꨰ꩝ ꨆꨔꨯꨱꩅ ꨘꩆ ꨟꨰ ꨈꩌ ꨥꨮꩀ ꨧꨯꨱꩃ ꨕꨴꨬ꩝꩝ ꩙꩙꩞ ꨆꨔꨯꨱꩅ ꨔꨮꨭ ꨧꨗꩃ ꨆꨵꩍ ꨣꨬ꩝ ꨅꩍ ꨈꩌ ꨕꨫ ꨕꨴꨬ ꨢꨶꨩ ꨔꨮꨭ ꨆꨨꨴꨳꨩ꩝꩝ ꩑꩐꩐꩞ ꨎꩀ ꨕꨴꨬ ꨧꨗꩃ ꨌꨈꨩ꩝ ꨢꨶꩀ ꨋꩆ ꨤꨪꨀꨶꨩ ꨋꩇ ꨆꨳꨮꩃ ꨕꨴꩍ꩝꩝ ꩑꩐꩑꩞ ꨨꨓꨰ ꨕꨴꨬ ꨆꨨꨴꨳꨩ ꨝꨪ ꨆꨴꩍ꩝ ꨟꨢꩍ ꨀꨨꩉ ꨌꨡꩍ ꨤꨪꨎꩃ ꨅꩍ ꨈꨗꨪꩀ꩝꩝ ꩑꩐꩒꩞ ꨅꩍ ꨓꨮꩊ ꨓꨋꩆ ꨆꨯꨮ ꨡꨯꩍ꩝ ꨕꨫ ꨟꨓꨩ ꨟꩃ ꨧꩀ ꨨꨓꨰ꩝꩝ ꩑꩐꩓꩞ ꨀꨲꩆ ꨕꨫ ꨎꨗꩀ ꨨꨭꨩ ꨧꨳꩌ꩝ ꨨꨆꨯꨮ ꨨꨭꨩ ꨣꨎꩌ ꨚꨵꨶꨪ ꨕꨯꨱꩀ ꨤꨪꨥꨪꩀ꩝꩝ ꩑꩐꩔꩞ ꨀꨗꨪꩅ ꨀꨗꩀ ꨋꩇ ꨜꨶꩊ꩝ ꨆꨩ ꨐꨭꨩ ꨣꨘꩌ ꨨꨭꨟꨭꨩ ꨣꨟꨪꩀ ꨚꨎꨰꩍ꩝꩝ ꩑꩐꩕꩞ ꨎꨯꨱꩃ ꨨꨤꨶꩀ ꨆꨢꨶꨩ ꨝꨓꨭꨥ꩝ ꨆꨴꩍ ꨕꨫ ꨧꨭꨗꨭꨥ ꨢꨶꨩ ꨕꨴꨬ ꨠꨈꨴꨭꨩ꩝꩝ ꩑꩐꩖꩞ ꨨꨈꨰꩅ ꨡꨭꨥ ꨨꨮꩇ ꨨꨊꨭꨥ꩝ ꨡꨶꩀ ꨕꨫ ꨈꨪꨨꨵꨮꨭ ꨌꨪꨭꩌ ꨅꩍ ꨝꨪꨋꩉ꩝꩝ ꩑꩐꩗꩞ ꨀꨋꩆ ꨧꨳꩌ ꨝꨵꨯꨱꩍ ꨓꨚꩀ꩝ ꨟꨆꨴꨲꨩ ꨨꨮꩇ ꨡꨶꩀ ꨢꨮꨭ ꨣꨭꩇ ꨈꨪꨨꨵꨮꨭ꩝꩝ ꩑꩐꩘꩞ ꨇꨪꩀ ꨣꨚꨎꩆ ꨝꨪ ꨝꨳꩀ꩝ ꨕꨯꨱꩀ ꨝꨪ ꨓꨚꩀ ꨣꨩ ꨅꨩ ꨟꨮꨝꨰ꩝꩝ ꩑꩐꩙꩞ ꨈꨪꨗꨯꨱꩃ ꨎꨶꨰ ꨟꨮꨢꨰ꩝ ꨚꨳꨯꨮꩍ ꨕꨫ ꨨꨓꨰ ꨕꩉ ꨝꨪ ꨙꨮꩇ꩝꩝ ꩑꩑꩐꩞ ꨈꨪꨗꨯꨱꩃ ꨎꨮꩍ ꨠꨔꨯꨱ꩝ ꨝꨩ ꨣꨩ ꨆꨵꨯꨱ ꨎꨶꨰ ꨝꨴꨬ ꨣꨩ ꨔꨮꨭ꩝꩝ ꩑꩑꩑꩞ ꨟꨢꩍ ꨕꨴꨬ ꨝꨴꨬ ꨣꨩ ꨔꨮꨭ꩝ ꨨꨕꨬ ꨋꩇ ꨢꨮꨭ ꨕꨴꨬ ꨝꨩ ꨈꨪꨗꨯꨱꩃ꩝꩝ ꩑꩑꩒꩞ ꨀꨋꩆ ꨣꨩ ꨠꨝꨰ ꨕꨫ ꨈꨮꩇ꩝ ꨨꨓꨰ ꨅꩍ ꨒꨮꩇ ꨕꨴꨮꩍ ꨢꨮꨭ ꨆꨡꨶꨮꩆ꩝꩝ ꩑꩑꩓꩞ ꨇꨪꩀ ꨣꨚꨎꩆ ꨕꨴꨬ ꨨꨰ꩝ ꨆꨙꨩ ꨐꨭꨩ ꨟꨰ ꨕꨶꩍ ꨙꨯꩌ ꨝꨪ ꨏꩀ꩝꩝ ꩑꩑꩔꩞ ꨚꨵꨰꩍ ꨕꨫ ꨎꨗꩀ ꨨꨭꨩ ꨧꨳꩌ꩝ ꨕꨯꨱꩀ ꨇꨪꩀ ꨎꨤꩆ ꨝꨵꨯꨱꩍ ꨀꨚꩆ ꨀꨕꩅ꩝꩝ ꩑꩑꩕꩞ ꨚꨵꨰꩍ ꨕꨫ ꨘꨗꨴꩀ ꨝꨪ ꨝꨳꩀ꩝ ꨕꨯꨱꩀ ꨓꨶꨬ ꨓꨚꩀ ꨨꨗꨳꨪꩌ ꨨꨭꨩ ꨨꨕꨬ꩝꩝ ꩑꩑꩖꩞ ꨣꨟꨪꩀ ꨀꨕꩅ ꨧꨯꨱꩃ ꨚꨶꨮꩄ꩝ ꨣꨟꨪꩀ ꨝꨯꨱꩍ ꨚꨗꨶꨮꩄ ꨆꨵꩍ ꨕꨫ ꨣꨩ ꨆꨵꨯꨱ꩝꩝ ꩑꩑꩗꩞ ꨇꨪꩀ ꨧꨪꨝꩉ ꨟꩃ ꨨꨭꨩ꩝ ꨨꨗꨳꨪꩌ ꨚꨣꨤꨯꨩ ꨚꨳꨯꨮꩍ ꨆꨩ ꨀꨗꩀ꩝꩝ ꩑꩑꩘꩞ ꨀꨗꩀ ꨚꨮꩃ ꨀꨟꨰꩀ ꨚꨓꨯꨱꨥ꩝ ꨚꨳꨯꨮꩍ ꨆꨩ ꨓꨌꨯꨱꨥ ꨇꨪꩀ ꨝꨪ ꨆꨎꩇ꩝꩝ ꩑꩑꩙꩞ ꨟꨢꩍ ꨤꩄ ꨨꨓꨰ ꨠꨧꩀ꩝ ꨎꨴꨲꩍ ꨥꨮꩀ ꨚꨈꩇ ꨕꨯꨱꩀ ꨧꨯꨱꩃ ꨂꨣꩃ꩝꩝ ꩑꩒꩐꩞ ꨈꨴꨭꩀ ꨕꨫ ꨤꨯꩀ ꨅꩍ ꨧꨳꩌ꩝ ꨧꨗꩃ ꨆꨩ ꨎꨤꩆ ꨖꩉ ꨟꩀ ꨨꨕꨬ꩝꩝ ꩑꩒꩑꩞ ꨨꨣꨮꩍ ꨧꨯꨱꩃ ꨧꨘꩀ ꨤꨯꨩ ꨙꨬ꩝ ꨚꨳꨯꨮꩍ ꨓꨮꩊ ꨨꨕꨬ ꨟꩃ ꨣꨩ ꨧꨩ ꨔꨮꨭ꩝꩝ ꩑꩒꩒꩞ ꨂꨣꩀ ꨗꨫ ꨟꨮꨢꨯꨱꩌ ꨤꨯꨩ ꨣꨬ꩝ ꨖꨶꨩ ꨓꨮꩊ ꨨꨕꨬ ꨜꨶꨮꩊ ꨅꩍ ꨈꨪꨤꩄ꩝꩝ ꩑꩒꩓꩞ ꨨꨭꨩ ꨜꨶꨮꩊ ꨟꩃ ꨚꨳꨯꨮꩍ ꨕꨴꩇ ꨔꨴꨯꨱꩃ꩝ ꨘꩆ ꨟꩃ ꨆꨙꨯꨱꩃ ꨓꨮꩊ ꨙꨮꩈ ꨨꨕꨬ꩝꩝ ꩑꩒꩔꩞ ꨎꩀ ꨧꨯꨱꩃ ꨠꨧꩀ ꨘꩆ ꨣꨬ꩝ ꨕꨴꨮꩇ ꨛꨯꨮ ꨝꨴꨬ ꨚꨳꨯꨮꩍ ꨆꨩ ꨂꨣꩃ꩝꩝ ꩑꩒꩕꩞ ꨕꨫ ꨆꩊ ꨡꨯꩍ ꨗꨈꩉ ꨧꨳꩌ꩝ ꨓꨮꩊ ꨔꨭꩆ ꨝꨤꩆ ꨕꨴꨮꩇ ꨗꨯꨱ ꨓꨆꨵꨯꨱꩆ꩝꩝ ꩑꩒꩖꩞ ꨧꨳꩌ ꨏꩀ ꨤꨪꨊꨫꩀ ꨎꩃ ꨝꨴꨬ꩝ ꨟꨰ ꨨꨭꨩ ꨨꨕꨬ ꨤꨪꨈꨰꩍ ꨕꨫ ꨓꨭꩀ꩝꩝ ꩑꩒꩗꩞ ꨟꨢꩍ ꨤꩄ ꨤꨪꨊꨫꩀ ꨝꨴꨬ ꨧꨭꩀ꩝ ꨆꨢꨶꨩ ꨨꨭꨩ ꨓꨭꩀ ꨨꨣꨬ ꨕꨴꨬ ꨓꨝꨳꩀ꩝꩝ ꩑꩒꩘꩞ ꨝꨳꩀ ꨎꨮꩍ ꨤꨪꨈꨰꩍ ꨢꨮꨭ ꨘꩆ꩝ ꨟꨢꩍ ꨨꨭꨩ ꨖꩉ ꨚꨳꨯꨮꩍ ꨕꨯꨱꩀ ꨤꨪꨥꨪꩀ꩝꩝ ꩑꩒꩙꩞ ꨤꨪꨊꨫꩀ ꨝꨴꨬ ꨆꨩ ꨕꨴꨬ ꨅꩍ ꨔꨮꨭ꩝ ꨔꨮꨭ ꨇꨪꩀ ꨗꨫ ꨢꨮꨭ ꨚꨳꨯꨮꩍ ꨆꨩ ꨂꨣꩃ꩝꩝ ꩑꩓꩐꩞ ꨔꨬ ꨔꨮꨭ ꨓꨆꨴꨲꨩ ꨕꨴꨮꩍ ꨓꨳꩆ꩝ ꨟꨢꩍ ꨨꨭꨩ ꨨꨤꩉ ꨆꨯꨮ ꨔꨬ ꨚꨆꨮꩇ꩝꩝ ꩑꩓꩑꩞ ꨈꨪꨗꩇ ꨣꨭꩇ ꨆꨢꨶꨩ ꨆꨭꨣꨬ꩝ ꨚꨮꩃ ꨝꨰꩀ ꨕꨴꨬ ꨜꨶꩊ ꨧꨯꨱꩃ ꨓꨚꩀ꩝꩝꩝ @ ꨀꨝꨪꩍ