꩑꩞ ꨗꨫ ꨨꨮꩄ ꨀꨗꩀ ꨣꨩ ꨧꨳꩌ꩝ ꨟꨰ ꨚꨮꩃ ꨝꨯꨱꩍ ꨆꨭꨖꨩ ꨕꨯꩌ ꨕꨤꩌ ꨧꩇ ꨗꨫ꩝꩝ ꩒꩞ ꨍꨰꩂ ꨆꨍꨰꩂ ꨞꩇ ꨚꨣꨪ ꨓꨡꩃ ꨨꨓꨰ꩝ ꨎꨶꨰ ꨤꩌ ꨠꨤꨰ꩝ ꨓꨶꨬ ꨕꨶꩍ ꨎꨤꩆ꩝꩝ ꩓꩞ ꨣꨘꩌ ꨜꨶꩊ ꨌꨤꩍ ꨕꨫ ꨞꩇ꩝ ꨣꨘꩌ ꨕꨴꩇ ꨤꨮꩇ ꨤꨯꨩ ꨟꨩ ꨆꨑꩍ ꨆꨒꩍ꩝꩝ ꩔꩞ ꨋꩇ ꨝꨵꨮꩀ ꨌꨤꩍ ꨞꨤꨳꩀ꩝ ꨢꩍ ꨕꨴꨬ ꨓꨭꨚꩀ꩝ ꨟꨳꩀ ꨥꨩ ꨣꨘꩌ꩝꩝ ꩕꩞ ꨆꨓꨶꩍ ꨕꨴꨬ ꨟꩃ ꨝꨑꨯꩉ꩝ ꨣꨘꩌ ꨀꨗꩀ꩝ ꨋꩇ ꨜꨶꩊ ꨝꨪ ꨤꨯꨩ꩝꩝ ꩖꩞ ꨝꨓꨯꨱꩀ ꨕꨗꨯꨱꩀ ꨀꨤꩍ꩝ ꨢꩍ ꨆꨳꨮꩃ ꨆꨴꩍ꩝ ꨘꩆ ꨕꨗꨯꨱꩀ ꨓꨣꨳꨮꩃ꩝꩝ ꩗꩞ ꨢꩍ ꨆꨳꨮꩃ ꨆꨩ ꨚꨴꨯꨱꩃ ꨋꩇ ꨚꨀꨗꨰꩍ꩝ ꨆꨳꨮꩃ ꨆꨩ ꨤꨪꨈꨰꩍ ꨋꩇ ꨓꨶꨬ ꨎꨤꩆ꩝꩝ ꩘꩞ ꨨꨭꨆꨭꩌ ꨕꨶꨩ ꨧꨯꨱꩃ ꨀꨕꩅ꩝ ꨀꨚꩆ ꨝꨪ ꨆꨎꩇ꩝ ꨎꨤꩆ ꨁꨓꨩ꩝꩝ ꩙꩞ ꨚꨚꨴꨯꨱꩃ ꨕꨴꨬ ꨝꨵꨯꨱꩍ ꨠꨧꩀ꩝ ꨤꨰꩀ ꨕꨫ ꨘꨣꩀ꩝ ꨰꩍ ꨕꨴꨬ ꨨꨕꨬ꩝꩝ ꩑꩐꩞ ꨔꨶꩉ ꨧꨯꨱꩃ ꨘꨣꩀ ꨕꨫ ꨤꨯꩀ ꨗꨫ ꨣꨬ꩝ ꨢꩍ ꨔꨮꨭ ꨆꨩ ꨕꨴꨬ꩝ ꨚꨵꨰꩍ ꨝꨪ ꨀꨓꩍ꩝꩝ ꩑꩑꩞ ꨚꨵꨰꩍ ꨕꨫ ꨘꨣꩀ ꨨꨭꨩ ꨜꨶꨮꩊ꩝ ꨚꨵꨰꩍ ꨕꨫ ꨕꨚꨶꨮꩊ꩝ ꨂꨣꩃ ꨚꨓꨯꨱꩀ꩝꩝ ꩑꩒꩞ ꨨꨓꨰ ꨈꨵꩃ ꨈꨭꩀ ꨝꨣꨩ꩝ ꨎꨶꨰ ꨚꨯꩀ ꨟꨓꨩ꩝ ꨈꨵꩃ ꨞꨩ ꨝꨘꩆ꩝꩝ ꩑꩓꩞ ꨚꨈꨩ ꨧꨳꩌ ꨤꨡꨪꩉ ꨨꨣꨰꩀ꩝ ꨆꨟꨬ ꨧꨳꩌ ꨔꨰꩀ꩝ ꨤꨡꨪꩉ ꨤꨪꨆꨬ꩝꩝ ꩑꩔꩞ ꨝꨭꨊꨭꨩ ꨓꨴꨯꨱꩀ ꨧꨯꨱꩃ ꨓꨕꩀ꩝ ꨠꨣꨳꩍ ꨞꨯꩃ ꨓꨆꨵꩇ꩝ ꨜꨶꩊ ꨅꩍ ꨟꨕꨩ꩝꩝ ꩑꩕꩞ ꨧꨪ ꨕꨴꨮꩍ ꨕꨯꩌ ꨧꨳꩌ ꨤꨪꨆꨬ꩝ ꨀꨗꨰꩍ ꨤꨯꨱꩃ ꨕꨴꨬ꩝ ꨝꨵꨯꨱꩍ ꨐꨭꨩ ꨝꨓꨯꨱꩀ꩝꩝ ꩑꩖꩞ ꨟꨆꨴꨩ ꨇꩆ ꨧꨭꨩ ꨯꨱ ꨗꨫ ꨓꨶꨬ ꨚꨞꨩ꩝ ꨟꨆꨴꨩ ꨘꩌ ꨁꨓꨩ꩝ ꨢꨶꨩ ꨔꨮꨭ ꨧꨭꨗꨭꨥ꩝꩝ ꩑꩗꩞ ꨠꨤꨮꨭ ꨕꨫ ꨈꨴꨭꨩ ꨝꨵꨯꨱꩍ ꨕꨴꨬ ꨝꨓꨯꨱꩀ꩝ ꨣꨘꩌ ꨆꨩ ꨕꨗꨯꨱꩀ꩝ ꨕꨴꨬ ꨨꨭꨩ ꨓꨇꨪꩆ꩝꩝ ꩑꩘꩞ ꨣꨘꩌ ꨆꨩ ꨕꨴꩇ ꨤꨯꨩ ꨥꨮꩉ ꨠꨤꨮꨭ꩝ ꨣꨘꩌ ꨆꨩ ꨓꨘꩃ꩝ ꨆꨴꩍ ꨕꨫ ꨝꨪꨗꨰ꩝꩝ ꩑꩙꩞ ꨎꨳꨮꩃ ꨕꨫ ꨆꨭꨟꨬ ꨤꨶꨪꩄ ꨜꨶꩊ꩝ ꨨꨆꨯꨮ ꨡꨯꩍ ꨀꨈꨶꩊ꩝ ꨓꨴꨬ ꨕꨴꨮꩍ ꨤꨪꨧꨬ꩝꩝ ꩒꩐꩞ ꨆꨧꨯꨱꩅ ꨈꨵꨰꩍ ꨈꨵꩉ ꨁꨓꨩ꩝ ꨢꩍ ꨕꨴꨬ ꨆꨢꨩ꩝ ꨕꨭꩍ ꨕꨫꩆ ꨣꨟꨪꩀ꩝꩝ ꩒꩑꩞ ꨈꨪꨤꨩ ꨕꨴꨬ ꨤꨯꨩ ꨎꨗꨪꩍ꩝ ꨚꨴꨯꨱꩃ ꨕꨫ ꨀꨝꨪꩍ꩝ ꨗꨫ ꨆꨵꨮꨭ ꨚꨆꩉ꩝ ꨧꨩ ꨟꩃ ꨤꨭꩀ꩝ ꨕꨶꨩ ꨟꩃ ꨆꨭꨟꨬ꩝ ꨆꨵꨮꨭ ꨘꩆ ꨆꨭꨣꨬ꩝ ꨆꨭꨖꨩ ꨠꨧꩀ꩝꩝ ꩒꩒꩞ ꨚꩀ ꨝꨯꨱꩍ ꨚꨗꨶꨮꩄ ꨚꨶꨮꩄ ꨝꨪ ꨓꨚꩀ꩝ ꨠꨢꨰ ꨤꨯꨩ ꨡꨶꩀ꩝ ꨥꨮꩉ ꨡꨮꩉ ꨨꨓꨰ꩝꩝ ꩒꩓꩞ ꨢꩍ ꨣꨩ ꨠꨢꨯꨱꩌ ꨎꨶꨰ ꨀꨶꨮꩆ꩝ ꨚꨶꨮꩄ ꨆꨵꨯꨱ ꨓꨓꨶꩆ꩝ ꨘꩆ ꨎꨮꩍ ꨝꨓꨯꨱꩀ꩝꩝ ꩒꩔꩞ ꨕꨫꨟꩆ ꨕꨴꩇ ꨤꨯꨩ ꨥꩉ ꨟꨓꨰ꩝ ꨆꨭꨟꨬ ꨧꨳꩌ ꨝꨪꨗꨰ꩝ ꨤꨯꨩ ꨕꨴꨬ ꨚꨧꩃ꩝꩝ ꩒꩕꩞ ꨣꨘꩌ ꨎꨶꨰ ꨥꩉ ꨟꨓꨰ꩝ ꨎꨶꨰ ꨚꨳꨯꨮꩍ ꨨꨓꨰ꩝ ꨕꨫ ꨞꨩ ꨝꨪꨘꩆ꩝꩝ ꩒꩖꩞ ꨆꨒꩍ ꨧꨰꩀ ꨧꨯꨱꩃ ꨀꨊꨶꨬ꩝ ꨨꨓꨰ ꨧꨯꨱꩃ ꨌꨡꨶꨬ꩝ ꨚꨶꨮꩄ ꨎꨶꨰ ꨌꨤꩍ꩝꩝ ꩒꩗꩞ ꨧꨭꨤꨭꨩ ꨁꨗꨩ ꨣꨘꩌ꩝ ꨋꩇ ꨝꨴꨭꩀ ꨓꨆꨵꩌ꩝ ꨁꨗꨩ ꨀꨟꨯꨱꩍ꩝꩝ ꩒꩘꩞ ꨠꨈꨴꨭꨩ ꨓꨳꨩ ꨓꨴꨰꩀ ꨝꨊꨭꨩ꩝ ꨨꨕꨯꩌ ꨁꨤꨤꨭꨟꨭꨩ꩝ ꨕꨴꨬ ꨈꨵꨰꩍ ꨓꨆꨵꩌ꩝꩝ ꩒꩙꩞ ꨟꨮꨈꨴꨭꨩ ꨈꨭꩆ ꨧꨯꨱꩃ ꨆꨝꩊ꩝ ꨆꨤꨪꩆ ꨝꨵꨯꨱꩍ ꨎꩊ꩝ ꨟꩃ ꨣꨩ ꨟꨮꨢꨯꨱꩌ꩝꩝ ꩓꩐꩞ ꨟꨁꩆ ꨌꨆꨓꨭꩊ ꨌꨭꩍ ꨜꨯꨱ꩝ ꨟꨮꨈꨴꨭꨩ ꨓꨴꩍ ꨎꩊ꩝ ꨀꨗꩀ ꨣꨩ ꨧꨳꩌ꩝꩝ ꩓꩑꩞ ꨠꨢꩍ ꨙꨪꩍ ꨟꨕꨩ ꨈꨶꩆ ꨡꨳꩍ꩝ ꨎꨶꨰ ꨙꨪꩍ ꨆꨒꩍ꩝ ꨓꨶꨬ ꨝꨯꨱꩀ ꨎꨗꩃ꩝꩝ ꩓꩒꩞ ꨤꨯꨱꩉ ꨝꨵꨯꨱꩍ ꨠꨧꩀ ꨢꨰꩍ ꨕꨴꨬ꩝ ꨝꨙꩃ ꨟꨭꩀ ꨆꨬ꩝ ꨆꨴꨭꩃ ꨝꨯꨱꩊ ꨎꨗꩃ꩝꩝ ꩓꩓꩞ ꨚꨕꨮꩃ ꨧꩃ ꨚꨮꩃ ꨚꨈꨩ꩝ ꨢꩍ ꨙꨪꩍ ꨎꨤꨩ꩝ ꨙꨬ ꨈꨵꨮꩍ ꨧꨘꩀ꩝꩝ ꩓꩔꩞ ꨆꨭꨢꨮꨭ ꨟꨮꨝꨯꨱꩍ ꨀꨤꩍ ꨨꨤꨩ꩝ ꨧꩃ ꨤꨯꨩ ꨕꨣꨩ꩝ ꨀꨤꩍ ꨕꨗꨪꩂ꩝꩝ ꩓꩕꩞ ꨆꨧꨯꨱꩅ ꨈꨵꨰꩍ ꨈꨵꩉ ꨁꨓꨩ꩝ ꨢꩍ ꨕꨴꨬ ꨆꨢꨩ꩝ ꨕꨭꩍ ꨕꨫꩆ ꨣꨭꨟꨳꩀ꩝꩝ ꩓꩖꩞ ꨤꨪꨟꩆ ꨚꨴꨯꨱꩃ ꨚꩀ ꨓꨆꨰ꩝ ꨚꨢꩅ ꨕꨴꨬ ꨨꨰ꩝ ꨓꨔꨴꩀ ꨤꨝꨭꩍ꩝꩝ ꩓꩗꩞ ꨚꨶꨮꩄ ꨝꨵꨯꨱꩍ ꨧꨗꩃ ꨨꨕꨬ꩝ ꨈꨤꩄ ꨀꨳꨩꩍ ꨕꨴꨬ꩝ ꨟꩃ ꨔꨮꨭ ꨆꨩ ꨧꨭꩀ꩝꩝ ꩓꩘꩞ ꨧꨗꩃ ꨝꨵꨯꨱꩍ ꨚꨶꨮꩄ ꨨꨕꨬ꩝ ꨔꨰꩀ ꨘꩆ ꨆꨣꨬ꩝ ꨀꨗꩀ ꨣꨩ ꨧꨳꩌ꩝꩝ ꩓꩙꩞ ꨨꨕꩍ ꨓꨳꩆ ꨓꨤꩃ ꨀꨳꨩ ꨡꨯꨱꩀ꩝ ꨟꨆꨴꨩ ꨕꨗꨯꨱꩀ꩝ ꨢꨶꨩ ꨝꨯꨱꩍ ꨚꨗꨶꨮꩄ꩝꩝ ꩔꩐꩞ ꨝꨓꨯꨱꩀ ꨤꨯꨱꩉ ꨝꨵꨯꨱꩍ ꨠꨧꩀ꩝ ꨢꩍ ꨆꨳꨮꩃ ꨆꨩ ꨎꩀ꩝ ꨧꨴꩌ ꨧꨳꩌ ꨨꨓꨰ꩝꩝ ꩔꩑꩞ ꨎꩀ ꨧꨯꨱꩃ ꨈꨪꨤꨩ ꨤꨯꨩ ꨘꨯꩀ꩝ ꨣꨘꩌ ꨧꨯꨱꩃ ꨀꨟꨯꨱꩍ꩝ ꨓꨶꨬ ꨣꨚꨎꩆ꩝꩝ ꩔꩒꩞ ꨧꨳꩌ ꨏꩀ ꨟꨕꨩ ꨐꨭꨩ ꨡꨳꩍ꩝ ꨨꨈꨥ ꨧꨯꨱꩃ ꨝꨭꨓꨶꩍ꩝ ꨓꨶꨬ ꨖꩉ ꨁꨓꨩ꩝꩝ ꩔꩓꩞ ꨆꨭꨖꨩ ꨆꨒꩍ ꨢꨮꨭ ꨗꨫ꩝ ꨆꨴꨲꩆ ꨝꨰꩀ ꨝꨪ ꨨꨭꨩ꩝ ꨎꨶꨰ ꨠꨤꨭꩀ꩝꩝ ꩔꩔꩞ ꨨꨕꩉ ꨙꨯꩌ ꨎꨳꨮꩃ ꨕꨗꨯꨱꩀ꩝ ꨨꨓꨰ ꨎꨳꨮꩃ ꨧꨯꨱꩀ꩝ ꨚꨶꨮꩄ ꨌꨰꩈ ꨣꨞꨰꩈ꩝꩝ ꩔꩕꩞ ꨟꨓꨩ ꨢꨮꨭ ꨌꨣꨟꨪꩆ꩝ ꨓꨑꨩ ꨝꨩ ꨆꨳꨮꩃ꩝ ꨚꨮꩃ ꨯꨱꩉ ꨆꨖꨯꨱꩉ꩝꩝ ꩔꩖꩞ ꨀꨤꩍ ꨕꨫ ꨐꨶꩈ ꨣꨘꩌ ꨓꨴꩍ ꨕꩃ꩝ ꨌꨡꨶꨬ ꨧꨯꨱꩃ ꨆꩃ꩝ ꨎꨳꨮꩃ ꨦꨣꨗꨰ꩝꩝ ꩔꩗꩞ ꨆꨖꨩ ꨗꨫ ꨝꨳꩀ ꨆꨒꩍ꩝ ꨣꨘꩌ ꨝꨵꨯꨱꩍ꩝ ꨕꨴꨬ ꨤꨰꩀ ꨕꨫꩆ꩝꩝ ꩔꩘꩞ ꨂꨆꩆ ꨧꨬ ꨚꨶꨮꩄ ꨚꨍꨮꩃ꩝ ꨓꨝꨵꨯꨱꩍ ꨤꨰꩀ ꨕꨫꩆ꩝ ꨎꨶꨰ ꨀꨰꩍ ꨗꨫ ꨓꨴꨩ꩝꩝ ꩔꩙꩞ ꨆꨧꨯꨱꩅ ꨌꨳꩇ ꨕꨫ ꨣꨡꩍ꩝ ꨢꨮꨭ ꨈꨰꩈ ꨝꨌꩍ꩝ ꨕꨭꩍ ꨕꨫꩆ ꨝꨆꩊ꩝꩝ ꩕꩐꩞ ꨓꨟꨰꩍ ꨎꨯꨱꩍ ꨀꨨꨯꨱꩀ ꨝꨭꨌꩍ꩝ ꨟꨰ ꨟꩃ ꨟꨆꩍ꩝ ꨓꨴꨭꩍ ꨓꨮꩊ ꨗꨈꩉ꩝꩝ ꩕꩑꩞ ꨀꨨꨯꨱꩀ ꨚꨴꨯꨱꩃ ꨓꨤꨬ ꨆꨣꩃ ꨔꨴꩇ ꨈꩇ꩝ ꨈꨵꩃ ꨤꩄ ꨆꨎꩇ꩝ ꨓꨮꩊ ꨝꨵꨯꨱꩍ ꨆꨣꩌ꩝꩝ ꩕꩒꩞ ꨌꨓꨬ ꨌꨕꩉ ꨢꨶꨩ ꨈꩉ꩝ ꨓꨶꩍ ꨅꩍ ꨟꨮꨝꩉ꩝ ꨢꨶꨩ ꨖꩉ ꨀꨟꨩ꩝꩝ ꩕꩓꩞ ꨈꨭꨡꩀ ꨕꨫ ꨎꩀ ꨓꨴꨭꩍ ꨈꩍ꩝ ꨈꨭꨡꩀ ꨕꨫ ꨓꨶꩍ꩝ ꨨꨭꨩ ꨓꨶꨬ ꨝꨐꨶꨮꩉ꩝꩝ ꩕꩔꩞ ꨆꨵꩀ ꨜꨭꩆ ꨈꨡꩀ ꨕꨶꩍ ꨖꩆ꩝ ꨆꨵꩀ ꨈꩇ ꨚꨓꨳꩆ꩝ ꨓꨶꨬ ꨣꨩ ꨚꨣꩅ꩝꩝ ꩕꩕꩞ ꨠꨤꨭꩀ ꨟꩍ ꨎꨳꨮꩃ ꨚꨣꨳꩀ꩝ ꨆꨒꩍ ꨗꨫ ꨝꨳꩀ꩝ ꨓꨶꨬ ꨣꨚꨎꩆ꩝꩝ ꩕꩖꩞ ꨨꨈꨰꩅ ꨈꨵꨯꨱꩃ ꨕꨫ ꨀꨝꨪꩍ꩝ ꨨꨓꨰ ꨨꨌꨪꩍ꩝ ꨘꩆ ꨎꨮꩍ ꨐꨭꨩ ꨈꨵꨯꨱꩃ꩝꩝ ꩕꩗꩞ ꨨꨈꨰꩅ ꨝꨳꨮꩉ ꨕꨫ ꨀꨝꨪꩍ꩝ ꨟꨮꨧꩀ ꨝꨵꨮꩀ ꨌꨴꨪꩍ꩝ ꨝꨳꨮꩉ ꨕꨫ ꨂꨣꩃ꩝꩝ ꩕꩘꩞ ꨠꨤꨭꩀ ꨧꨳꩌ ꨎꨳꨮꩃ ꨆꨑꩍ꩝ ꨨꨤꨬ éꨥ ꨀꨤꩍ꩝ ꨘꩆ ꨝꨯꨱꩍ ꨚꨗꨶꨮꩄ꩝꩝ ꩕꩙꩞ ꨆꨒꩍ ꨡꨳꩍ ꨧꨯꨱꩃ ꨀꨟꨯꨱꩍ꩝ ꨨꨤꨬ ꨀꨳꨩ ꨨꨆꨯꨱꩍ ꨤꨯꨩ ꨟꩃ ꨚꨙꨳꩀ꩝꩝ ꩖꩐꩞ ꨆꨢꨮꨭ ꨟꨮꨝꨯꨱꩍ ꨀꨤꩍ ꨨꨤꨩ꩝ ꨧꩃ ꨤꨯꨩ ꨕꨣꨩ꩝ ꨀꨤꩍ ꨕꨗꨪꩂ꩝꩝ ꩖꩑꩞ ꨆꨢꨮꨭ ꨚꨴꨯꨱꩃ ꨆꨴꨲꩍ ꨓꨗꨴꩆ꩝ ꨀꨊꨪꩆ ꨨꨚꨭꩍ ꨇꩃ ꨨꨆꨪꩀ ꨂꨉꨩ꩝꩝ ꩖꩒꩞ ꨎꨳꨮꩃ ꨚꨴꨯꨱꩃ ꨟꨕꨩ ꨈꨮꩇ ꨨꨰ꩝ ꨎꨶꨰ ꨝꨭꩍ ꨨꨓꨰ꩝ ꨕꨫ ꨝꨯꨱꩀ ꨎꨗꩃ꩝꩝ ꩖꩓꩞ ꨠꨢꨰ ꨈꨮꩇ ꨎꨶꨰ ꨚꨍꨮꩃ꩝ ꨓꨗꩍ ꨓꨈꨙꨳꨮꩃ꩝ ꨎꨶꨰ ꨚꨯꨱꩀ ꨣꨕꨰꩍ꩝꩝ ꩖꩔꩞ ꨚꨓꨯꨱꩀ ꨈꨰꩈ ꨈꨵꩃ ꨓꨚꨳꩆ꩝ ꨢꩍ ꨨꩃ ꨎꨤꨮꩃ꩝ ꨕꨴꨬ ꨙꨯꨱꩍ ꨆꨖꨭꩆ꩝꩝ ꩖꩕꩞ ꨚꨕꨮꩃ ꨧꩃ ꨈꨵꩃ ꨚꨤꨬ꩝ ꨢꩍ ꨓꨯꩀ ꨆꨩ ꨆꨭꨟꨬ꩝ ꨈꨵꩃ ꨓꨶꨬ ꨚꨎꨰꩍ꩝꩝ ꩖꩖꩞ ꨈꨗꨯꨱꩃ ꨟꨰ ꨤꨨꨪꩀ ꨎꩀ꩝ ꨟꨪꩆ ꨆꨢꨶꨩ ꨔꨮꨭ꩝ ꨆꨳꨮꩃ ꨤꨨꨪꩀ ꨠꨤꨮꨭ꩝꩝ ꩖꩗꩞ ꨝꨓꨭꨥ ꨓꨤꨪ ꨓꨴꩀ ꨝꨳꩀ꩝ ꨨꨓꨰ ꨓꨴꩀ ꨡꨶꩀ꩝ ꨝꨓꨭꨥ ꨨꨐꨶꩊ꩝꩝ ꩖꩘꩞ ꨨꨓꨰ ꨝꨓꨯꨱꩀ ꨗꨫ ꨝꨳꩀ ꨨꨐꨶꩊ꩝ ꨕꨤꩌ ꨧꨩ ꨕꨚꨶꩊ꩝ ꨨꨭꨩ ꨧꨩ ꨂꨣꩃ꩝꩝ ꩖꩙꩞ ꨀꨟꨯꨱꩍ ꨎꨶꨰ ꨥꨮꩉ ꨣꨘꩌ꩝ ꨨꨕꨮꩉ ꨟꨰ ꨕꨤꩌ꩝ ꨆꨴꨮꩍ ꨕꨴꨬ ꨈꨗꨯꨱꩃ꩝꩝ ꩗꩐꩞ ꨣꨘꩌ ꨆꨩ ꨠꨢꨰ ꨤꨯꨩ ꨀꨗꩀ꩝ ꨌꨀꨯꨱꩍ ꨌꨋꩀ꩝ ꨤꨯꨩ ꨥꨮꩉ ꨧꨭꨗꨭꨥ꩝꩝ ꩗꩑꩞ ꨤꨪꨨꨪꩀ ꨎꩀ ꨆꨢꨶꨩ ꨀꨤꩍ꩝ ꨧꨳꩌ ꨎꨳꨮꩃ ꨆꨒꩍ꩝ ꨢꨶꨩ ꨀꩄ ꨨꨓꨰ꩝꩝ ꩗꩒꩞ ꨌꨴꨮꩃ ꨕꨫ ꨨꨓꨰ ꨝꨵꨯꨱꩍ ꨚꨶꨮꩄ꩝ ꨓꨑꨩ ꨔꨮꨭ ꨨꨶꨮꩄ꩝ ꨓꨶꨬ ꨝꨩ ꨧꩃ ꨠꨢꨰ꩝꩝ ꩗꩓꩞ ꨟꨁꩆ ꨥꨮꩉ ꨕꨴꩇ ꨎꨶꨰ ꨚꨤꨰ꩝ ꨎꨶꨰ ꨚꨳꨯꨮꩍ ꨕꨫ ꨞꨩ ꨘꩆ꩝꩝ ꩗꩔꩞ ꨨꨭꨩ ꨕꨴꩇ ꨤꨗꩃ ꨨꨓꨰ꩝ ꨕꨟꩆ ꨕꨴꩇ ꨨꨰ꩝ ꨕꨴꨬ ꨆꨵꩍ ꨕꨫ ꨈꨵꨰꩍ꩝꩝ ꩗꩕꩞ ꨣꨘꩌ ꨆꨩ ꨧꨭꨗꨭꨥ ꨕꨴꨮꩍ ꨟꩍ꩝ ꨆꨎꩇ ꨀꨈꨭꨠꩍ꩝ ꨓꨶꨬ ꨣꨚꨎꩆ꩝꩝ ꩗꩖꩞ ꨡꨯꩍ ꨚꨴꨯꨱꩃ ꨁꨓꨩ ꨎꨶꨰ ꨚꨵꨰꩍ꩝ ꨢꩍ ꨡꨯꩍ ꨀꨗꨰꩍ꩝ ꨎꨶꨰ ꨤꩌꨟꨤꨰ꩝꩝ ꩗꩗꩞ ꨓꨟꨮꩃ ꨤꨪꨠꩆ ꨢꨶꨩ ꨥꨯꨱꩃ꩝ ꨓꨟꨮꩃ ꨚꨗꨴꨯꨱꩃ ꨓꨶꨬ ꨌꨪꩂ ꨨꨈꩉ꩝ ꨓꨶꩍ ꨅꩍ ꨟꨮꨝꩉ ꨨꨭꨩ ꨓꨶꨬ ꨝꨪꨐꨶꨮꩉ꩝꩝ ꩗꩘꩞ ꨢꩍ ꨨꨭꨩ ꨁꨓꨩ ꨎꨶꨰ ꨀꨶꨮꩆ꩝ ꨣꨭꨈꨪ ꨝꨳꩀ ꨟꨪꩆ꩝ ꨎꨶꨰ ꨤꩌꨟꨤꨰ꩝꩝ ꩗꩙꩞ ꨆꨭꨢꨮꨭ ꨟꨓꨰ ꨎꨳꨮꩃ ꨐꨭꩍ꩝ ꨠꨘꨯꨧꩀ ꨤꨪꨝꨭꩍ꩝ ꨎꨶꨰ ꨤꩌꨟꨤꨰ꩝꩝ ꩘꩐꩞ ꨂꨆꨮꩆ ꨡꨶꨮꩆ ꨣꨡꩍ ꨧꨪꨆꨧꨩ꩝ ꨎꨶꨰ ꨧꨶꩀ ꨢꨥꨩ꩝ ꨨꨶꨩ ꨧꩇ ꨚꨤꨰ꩝꩝ ꩘꩑꩞ ꨢꩍ ꨆꩆ ꨝꨤꨩ ꨓꩊ ꨟꨰ꩝ ꨕꨴꨬ ꨨꨭꨩ ꨨꨓꨰ꩝ ꨧꩀ ꨧꨯꩌ ꨧꨗꩃ꩝꩝ ꩘꩒꩞ ꨎꨤꩆ ꨥꨰꩈ ꨁꨓꨩ ꨎꨶꨰ ꨚꨵꨰꩍ꩝ ꨎꨤꩆ ꨆꩅ ꨓꨭꨚꩀ꩝ ꨤꨯꨩ ꨟꨩ ꨆꨭꨙꩍ꩝꩝ ꩘꩓꩞ ꨀꨧꨮꨭ ꨏꩀ ꨆꨳꨯꨮꩌ ꨤꨧꨬ꩝ ꨢꩍ ꨓꨯꩀ ꨆꨭꨟꨬ꩝ ꨎꨶꨰ ꨣꨶꩍ ꨝꨪꨗꨰ꩝꩝ ꩘꩔꩞ ꨌꨯꨱꨌꨪ ꨆꨭꨤꨪ ꨧꨭꩀ ꨣꨬ꩝ ꨌꨤꩃ ꨖꨰ ꨙꨬ꩝ ꨕꨴꩇ ꨅꩍ ꨈꨗꨯꨱꩃ꩝꩝ ꩘꩕꩞ ꨢꩍ ꨎꩀ ꨀꨤꩍ ꨕꨫ ꨞꨳꩆ꩝ ꨧꨗꩃ ꨡꨯꩍ ꨕꨫ ꨓꨳꩆ꩝ ꨞꨳꩆ ꨘꩆ ꨀꨤꩍ꩝꩝ ꩘꩖꩞ ꨢꩍ ꨋꩇ ꨨꨭꨠꨩ ꨆꨭꨓꨭꨥ ꨝꨤꩆ꩝ ꨢꩍ ꨟꩀ ꨁꨆꩆ꩝ ꨆꨭꨓꨭꨥ ꨣꩍ ꨆꨴꨯꨱꩃ꩝꩝ ꩘꩗꩞ ꨢꩍ ꨋꩇ ꨨꨭꨠꨩ ꨎꨶꨰ ꨆꨵꩀ ꨀꨚꨭꩍ꩝ ꨀꨆꩅ ꨎꩀ ꨓꨴꨭꩍ꩝ ꨗꨯꨱ ꨟꨩ ꨝꨭꨗꨪ꩝꩝ ꩘꩘꩞ ꨠꨓꨶꨬ ꨎꨶꨰ ꨆꩀ ꨨꨤꨩ꩝ ꨕꨴꩇ ꨟꨩ ꨢꨥꨩ꩝ ꨎꨶꨰ ꨝꨩ ꨚꨝꨵꨬ꩝꩝ ꩘꩙꩞ ꨀꨤꩍ ꨝꨵꨯꨱꩍ ꨀꩄ ꨨꨓꨰ꩝ ꨎꨶꨰ ꨤꩌꨟꨤꨰ꩝ ꨆꨎꨮꩍ ꨁꨓꨩ꩝꩝ ꩙꩐꩞ ꨆꨂꩀ ꨝꨵꨯꨱꩍ ꨕꨟꩆ ꨔꨮꨭ ꨀꨲꩆ꩝ ꨓꨣꨳꨮꩃ ꨕꨫ ꨧꨗꩃ꩝ ꨎꨳꨮꩃ ꨡꨶꨮꩆ ꨨꨕꨬ꩝꩝ ꩙꩑꩞ ꨨꨕꨬ ꨓꨊꨪꩆ ꨝꨵꨯꨱꩍ ꨆꨳꨮꩃ ꨓꨪꨆꨩ꩝ ꨡꨯꩍ ꨕꨫ ꨟꨓꨩ꩝ ꨟꩃ ꨔꨭꩀ ꨨꨓꨰ꩝꩝ ꩙꩒꩞ ꨀꨲꩆ ꨕꨫ ꨎꨘꩀ ꨨꨭꨩ ꨧꨳꩌ꩝ ꨆꨯꨮ ꨡꨯꩍ ꨣꨎꩌ꩝ ꨚꨵꨶꨪ ꨕꨯꨱꩀ ꨤꨪꨥꨪꩀ꩝꩝ ꩙꩓꩞ ꨣꨘꩌ ꨆꨩ ꨀꨗꩀ ꨚꨳꨯꨮꩍ ꨜꨶꩊ ꨆꨩ ꨐꨭꨩ꩝ ꨣꨘꩌ ꨆꨩ ꨨꨭꨠꨩ꩝ ꨣꨟꨪꩀ ꨚꨎꨰꩍ꩝꩝ ꩙꩔꩞ ꨖꨯꨱꩃ ꨨꨵꨶꩀ ꨆꨢꨶꨩ ꨝꨓꨭꨥ꩝ ꨆꨴꩍ ꨕꨫ ꨧꨭꨗꨭꨥ꩝ ꨢꨶꨩ ꨕꨴꨬ ꨟꨮꨈꨴꨭꨩ꩝꩝ ꩙꩕꩞ ꨨꨈꨰꩅ ꨡꨭꨥ ꨨꨮꩇ ꨠꨗꨮꨭ꩝ ꨡꨶꩀ ꨕꨫ ꨈꨭꨨꨵꨮꨭ꩝ ꨌꨭꩌ ꨅꩍ ꨝꨪꨊꨬ꩝꩝ ꩙꩖꩞ ꨀꨋꩆ ꨧꨰꩌ ꨝꨵꨯꨱꩍ ꨓꨭꨚꩀ꩝ ꨟꨆꨴꨩ ꨨꨯꨮꩇ ꨝꨳꩀ꩝ ꨓꨴꨭꩍ ꨕꨫ ꨈꨨꨵꨮꨭ꩝꩝ ꩙꩗꩞ ꨧꨳꩌ ꨝꨗꨰ ꨟꨪꩆ ꨧꨳꩌ ꨚꨝꨮꩃ꩝ ꨅꩍ ꨨꨭꨩ ꨇꨪꩂ ꨡꨮꩃ꩝ ꨟꨪꩆ ꨚꨙꨶꩄ ꨤꨪꨈꨰꩍ꩝꩝ ꩙꩘꩞ ꨎꨶꨰ ꨤꩄ ꨆꨩ ꨂꨣꩃ ꨧꨭꩀ ꨕꨴꨬ ꨔꨯꨱꩍ꩝ ꨕꨴꨬ ꨌꨩ ꨟꨆꨯꨱꩍ꩝ ꨝꨵꨯꨱꩍ ꨀꩄ ꨨꨓꨰ꩝꩝ ꩙꩙꩞ ꨆꨴꩆ ꨣꨚꨎꩆ ꨕꨴꨬ ꨨꨰ ꨝꨪ ꨝꨳꩀ꩝ ꨝꨵꨮꩀ ꨧꨯꨱꩃ ꨓꨭꨚꩀ꩝ ꨎꨶꨰ ꨀꩄ ꨨꨓꨰ꩝꩝ ꩑꩐꩐꩞ ꨈꨗꨯꨱꩃ ꨎꨶꨰ ꨕꨶꩍ ꨠꨢꨰ꩝ ꨎꨶꨰ ꨚꨳꨯꨮꩍ ꨨꨓꨰ꩝ ꨕꨫ ꨨꨭꨤꨭꩆ꩝꩝ ꩑꩐꩑꩞ ꨛꨯꨮ ꨧꩃ ꨝꨳꨮꩉ ꨕꨫ ꨂꨣꩃ꩝ ꨎꨶꨰ ꨇꨯꨱ ꨐꨰꩅ꩝꩝ ꩑꩐꩒꩞ ꨆꨭꨧꨯꨱꩅ ꨋꩇ ꨟꩃ ꨆꨢꨩ꩝ ꨓꨶꩍ ꨅꩍ ꨟꨕꨩ꩝ ꨓꨮꩀ ꨕꨴꨬ ꨚꨚꨴꨯꨱꩃ꩝꩝ ꩑꩐꩓꩞ ꨈꨪꨤꨩ ꨗꨫ ꨆꨒꩍ ꨝꨳꩀ ꨚꨮꩃ꩝ ꨓꨮꩀ ꨕꨴꨬ ꨚꨚꨴꨯꨱꩃ꩝ ꨝꨵꨯꨱꩍ ꨨꨭꨩ ꨓꨇꨪꩆ꩝꩝ ꩑꩐꩔꩞ ꨈꨗꨯꨱꩃ ꨎꨶꨰ ꨕꨴꨬ ꨠꨢꨰ꩝ ꨢꩍ ꨕꨭꩍ ꨚꨓꨯꨱ꩝ ꨕꨭꩍ ꨝꨪ ꨓꨭꨚꩀ꩝꩝ ꩑꩐꩕꩞ ꨆꨖꨩ ꨗꨫ ꨝꨳꩀ ꨤꨈꨰꩍ꩝ ꨁꨓꨩ ꨔꨮꨭ ꨇꨪꩆ ꨚꨵꨰꩍ꩝ ꨆꨵꩍ ꨕꨫ ꨕꨗꨭꩍ ꨕꨭꩍ ꨓꨮꩇ꩝꩝ ꩑꩐꩖꩞ ꨚꨵꨰꩍ ꨕꨫ ꨆꨧꨯꨱꩅ ꨧꨪꩀꨧꨩ꩝ ꨚꨵꨰꩍ ꨕꨫ ꨣꨝꨩ꩝ ꨝꨤꨬ ꨆꨒꩍ꩝꩝ ꩑꩐꩗꩞ ꨚꨤꨰꩍ ꨕꨫ ꨂꨇꨪꩆ ꨗꨫ ꨎꨶꨰ ꨠꨧꨯꨱ꩝ ꨚꨵꨰꩍ ꨕꨫ ꨣꨩ ꨆꨵꨯꨱ꩝ ꨇꨪꩀ ꨣꨚꨎꩆ꩝꩝ ꩑꩐꩘꩞ ꨣꨟꨪꩀ ꨕꨴꩇ ꨧꨯꨱꩃ ꨚꨗꨶꨮꩄ꩝ ꨁꨓꨩ ꨔꨮꨭ ꨨꨶꩄ꩝ ꨚꨵꨰꩍ ꨕꨫ ꨣꨩ ꨆꨵꨯꨱ꩝꩝ ꩑꩐꩙꩞ ꨣꨟꨪꩀ ꨣꨭꩇ ꨧꨯꨱꩃ ꨨꨓꨰ꩝ ꨚꨗꨶꨮꩄ ꨎꨶꨰ ꨠꨢꨰ꩝ ꨤꨯꨱꩉ ꨝꨵꨯꨱꩍ ꨠꨧꩀ꩝꩝ ꩑꩑꩐꩞ ꨢꩍ ꨧꨭꩀ ꨁꨓꨩ ꨆꨳꨮꩃ ꨚꨵꨰꩍ꩝ ꨕꨶꩍ ꨈꨴꨭꨩ ꨨꨭꨌꨪꩍ꩝ ꨒꨮꩇ ꨧꨯꨱꩃ ꨨꨆꨭꩌ꩞