ꨗꨆꨓꨯꨮꨩ (ꨆꨓꨯꨮꨩ) ꨂꨣꩃ ꨌꩌ: ꨕꨴꨮꩇ ꨧꨭꨗꨪꩅ ꨈꨪꨗꨴꨮꩍ꩝ ꨟꨗꨭꩍ ꨝꩉ ꨧꨯꨱꩃ ꨧꨶꨮꩆ ꨆꨥꨯꩌ ꨝꨶꨮꩊ ꨞꩇ: ꨗꨆꨓꨯꨮꨩ (ꨕꨯꨱꩀ ꨃꨥ ꨘꩆ ꨆꨓꨯꨮꨩ꩝ ꨡꨮꩃ ꨆꨓꨯꨮꨩ) ꨘꩆ ꨙꩌ ꨀꨕꩅ ꨚꨴꨯꨱꩃ ꨀꨝꨪꩍ꩝ ꨧꨭꨗꨪꩅ ꨈꨪꨗꨴꨮꩍ ꨧꨯꨱꩃ ꨆꨣꨬ ꨌꨪꩍ ꨀꨝꨪꩍ ꨕꨤꩌ ꨔꨭꩆ ꨝꨶꨮꩊ ꨞꩇ ꨌꩌ ꨓꨭꨝꩅ ꨝꨴꩍꨟꨪꩆ (ꨀꨨꨳꨮꩉ)꩞ ꨣꨪꩌ ꨔꨭꩆ꩝ ꨓꨟꨩ ꨀꨆꨯꨱꩀ ꨝꨪꨤꩆ ꨓꨎꨭꩍ ꨓꨶꨬ ꨧꨆꨥꨪ ꨌꩌ (ꨞꨳꩆ ꨤꨰꩀ ꨓꨟꨩ ꨗꨶꨮꩄ ꨤꨶꨪꩄ ꨝꨪꨤꩆ ꩙ ꨓꨮꩊ ꨤꨶꨪꩄ ꨝꨪꨤꩆ ꩑꩐ ꨧꨆꨥꨪ ꨀꨳꨩ ꨨꨣꨬ)꩝ ꨆꨥꨯꩌ ꨝꨶꨮꩊ ꨞꩇ ꨂꨣꩃ ꨌꩌ ꨕꨫ ꨕꨯꩌ ꨗꨈꩉ ꨟꨣꨯꨱꩃ ꨓꨗꩍ ꨓꨲꩍ꩝ ꨚꨈꨮꩇ ꨤꩄ ꨤꨪꨝꨪꩀ ꨆꩊ ꨤꨰꩀ ꨕꨫ ꨗꨪꩂ ꨔꨶꨮꩆ – ꨡꨪꩂ ꨔꨶꨮꩆ (ꨟꨗꨪ ꨝꨴꩃ ꨤꨰꩀ ꨕꨫ ꨇꩆ ꨨꨶꨩ ꨧꨯꨱꩃ ꨤꩌ ꨙꨯꩂ)꩝ ꨥꨮꩀ ꨂꩀ ꨕꨟꨭꩀ ꨀꨶꨮꩆ ꨦꨟꩃ ꨟꨰ ꨕꨯꩌ ꨝꨪꨟꨯꩂ ꨟꨆꩊ꩞ ꨗꨫ ꨅꨩ ꨘꩆ ꨓꨯꩀ ꨝꨐꨶꨮꩉ ꨛꨯꨩꩀ ꨨꨕꨮꩉ ꨟꨭꩀꨆꨬ꩝ ꨕꨯꩌ ꨛꨯꨮ ꨚꨓꨯꨱ ꨝꨪꨎꩀ ꨍꨰꨘꨩ ꨚꨟꨎꨳꨮꩃ ꨢꩃ ꨧꨯꨱꩃ ꨕꨯꩌ ꨢꩃ ꨤꨝꩃ꩝ ꨟꨪꩆ ꨕꨯꨱꩀ ꨘꩆ ꨆꩊ ꨤꩀ ꨆꨥꨯꩌ ꨝꨶꨮꩊ ꨞꩇ ꨌꨯꨱꩃ ꨨꨎꩆ ꨀꨊꨪꩆ ꨈꨮꩇ ꨧꨳꩌ꩝ ꨨꨭꨩ ꨨꨤꨪꩌ꩝ ꨣꩈ ꨤꨯꩀ ꨗꨫ ꨧꨳꩌ ꨉꨮꩍ꩝ ꨝꨶꨬ ꨝꨰꩈ꩞ ꨔꨭꩆ ꩒꩐꩑꩗꩝ ꨗꨆꨓꨯꨮꨩ ꨂꨣꩃ ꨌꩌ (ꨗꨪꩂ ꨔꨶꨮꩆ – ꨇꩆ ꨨꨶꨩ) ꨨꨭꨩ ꨔꨴꨭꩍ ꨁꨤꨪꨟꨯꨩ꩝ ꨚꨖꨪꩍ ꨧꨯꨱꩃ ꨣꩍ ꨟꨁꩆ ꨚꨆꨴꨲꩆ ꨘꩆ ꨕꨴꨮꩇ ꨁꨤꨪꨟꨯꨩ ꨝꨪꨆꨧꩀ ꨗꨈꩉ; ꨨꨕꨬ ꨘꩆ ꨙꩌ ꨀꨕꩅ ꨕꨫ ꨕꨯꩌ ꨚꨤꨬ ꨆꨣꨬ ꨎꩃ ꨨꨭꨩ ꨥꩀ ꨆꨴꨲꩆ ꨟꨨꨳꨮꩀ꩝ ꨚꩉꨆꩆ ꨓꩌꨚꩍ ꨝꨳꩀ ꨆꨣꨬ ꨐꨭꨩ ꨕꨤꩌ ꨆꩌꨗꩇ ꨁꨤꨪꨟꨯꨩ ꨚꨣꩆ ꨀꨳꨩ ꨢꨶꨮꩆ꩞ ꨀꨉꨩ ꨧꨯꨱꩃ ꨧꩀꨆꨣꩈ ꨎꨳꨮꩃ ꨓꨝꨳꩀ: ꨆꨓꨯꨮꨩ ꨨꨭꨩ ꨀꨉꨩ ꨕꨤꨮꩌ ꨀꨓꩍ ꨟꩃ ꨕꨘꩇ ꨀꨕꩅ ꨌꩌꨛꨩ ꨟꨆꩊ꩞ ꨚꨗꨶꨮꩄ “ꨆꨓꨯꨮꨩ” ꨨꨭꨩ ꨣꨤꨯꨩ ꨅꩃ ꨟꨈꨴꨭꨩ ꨤꨪꨆꨬ ꨧꨯꨱꩃ “ꨆꨓꨪꩀ” ꨕꨤꩌ ꨁꨤꨪꨟꨯꨩ ꨝꨴꨨꨟꨪꩆ ꨨꨰ “ꨆꩅꨓꨪꨆꨩ” ꨕꨤꩌ ꨦꩇ ꨣꨪꩀ꩝ ꨜꨭꩆ ꨓꨯꩀ ꨋꩇ ꨀꨕꩅ ꨓꨟꨩ ꨝꨪꨤꩆ ꨓꨎꨭꩍ ꨓꨶꨬ ꨧꨆꨥꨪ ꨟꨆꩊ꩞ ꨟꨪꩆ꩝ ꨀꨕꩅ ꨗꨫ ꨨꨭꨩ ꨀꨧꩉ ꨚꨟꨎꨳꨮꩃ ꨇꨮꩃ ꨆꨓꨮꩃ꩝ ꨝꨩ ꨚꨴꨮꩇ ꨟꨗꨭꩍ ꨝꩉ ꨌꩌꨛꨩ ꨀꩍ ꨒꨮꩇ ꨈꨴꨭꩀ ꨓꨶꨮꩀ ꨆꨮꩌ ꨤꨭꩍ ꨟꩃ ꨆꨤꨪꩂ꩞ ꨕꨤꩌ ꨁꨗꨩ ꨤꩃ ꨌꩌ – ꨚꨣꨮꩃ E. Aymonier saong A. Cabaton꩝ ꨆꨓꨯꨮꨩ ꨨꨭꨩ ꨈꨟꨴꨭꨩ ꨘꩆ ꨋꩇ ꨀꨕꩅ ꨓꨟꨩ ꨝꨪꨤꩆ ꨓꨎꨭꩍ ꨧꨆꨥꨪ ꨌꩌ꩝ ꨝꨵꨯꨱꩍ ꨝꨩ ꨀꩉ ꨚꨴꨯꨱꩃ ꨥꨮꩀ ꨘꩆ ꨀꨕꩅ ꨛꨯꨩꩀ ꨨꨕꨮꩉ ꨟꨭꩀꨆꨬ꩝ ꨢꩃ ꨤꨝꩃ ꨧꨯꨱꩃ ꨨꨕꨯꩌ ꨛꨯꨮ ꨚꨓꨯꨱ ꨨꨭꨩ ꨜꨶꨮꩊ ꨢꨯꨱꩌ ꨆꨩ ꨗꨈꩉ ꨨꨭꨩ ꨢꩃ ꨚꨟꨎꨳꨮꩃ꩞ ꨙꩌ ꨀꨕꩅ ꨚꨈꨮꩌ ꨓꨟꨩ ꨧꨯꨱꩃ ꨀꨣꨰ ꨨꨕꨳꨯꨮꩇ ꨀꨚꨭꩍ ꨨꨟꨭꨩ ꨧꨯꨱꩃ ꨀꨕꩅ ꨂꨣꩃ ꨌꩌ꩞ ꨓꨭꩀ ꨓꨗꨭꩅ ꨣꨕꩀ ꨟꨎꨴꨮꩌ ꨧꨯꨱꩃ ꨝꨘꩍ ꨓꨭꩀ ꨨꨕꨬ ꨀꨚꨆꩊ ꨚꨣꨯꨭꩌ꩝ ꨓꨭꩀ ꨆꨥꨯꩌ ꨝꨶꨮꩊ ꨞꩇ ꨢꩌ ꨓꨟꨩ ꨨꨤꨪꩌ ꨧꨯꨱꩍ꩝ ꨨꨭꨩ ꨌꨗꨮꩀ ꨚꨓꨯꨱꩌ꩝ ꨔꨮꨭ ꨜꨶꨮꩊ ꨧꨯꨱꩃ ꨌꨯꨱꩃ ꨆꨩ ꨔꨭꩆ ꨝꨪꨣꨭꨥ꩞ ꨕꨯꩌ ꨢꩃ ꨤꨝꩃ ꨧꨯꨱꩃ ꨚꨓꨯꨱ ꨨꨭꨩ ꨕꨭꩍ ꨃꨥ ꨨꨎꩅ ꨨꨈꨴꨮꩌ ꨢꩃ ꨁꨗꨩ ꨛꨯꨮ ꨁꨗꨩ ꨗꨈꩉ (ꨛꨯꨮ ꨗꨈꩉ – ꨢꩃ ꨁꨗꨩ ꨗꨈꩉ꩝ ꨀꨔꨰꩀ ꨤꨨꩌ꩝ ꨕꨯꨱꩃ ꨇꨪꩀ ꨨꨤꨪꩌ ꨤꨪꨗꩈ ꨧꨯꨱꩃ ꨀꨕꩅ ꨀꨈꨠꨩ)꩝ ꨆꨠꨧꨭꩆ (ꨞꨳꩆ ꨔꨴꨭꩍ ꨀꨔꨰꩀ ꨤꨪꩆꨈꨩ ꨢꨯꨗꨪ ꨨꨰ ꨟꨭꨇꨩꨤꨪꩆꨈꨩ)꩝ ꨧꨯꨱꩃ ꨕꨯꩌ ꨛꨯꨮ ꨚꨓꨯꨱ ꨝꨪꨎꩀ ꨍꨰꨘꨩ ꨢꨮꨭ ꨛꨯꨮ ꨆꨵꨯꩂ ꨈꨣꨰ (ꨨꨭꨩ ꨜꨶꨮꩊ ꨢꨯꨱꩌ ꨓꨶꨬ ꨀꨳꨩ꩝ ꨋꩇ ꨚꨕꨮꩃ ꨧꨯꨱꩃ ꨌꩀ ꨣꨯꩀ ꨗꨈꩉ) ꨧꨯꨱꩃ ꨛꨯꨮ ꨣꨯꨟꨯꨮꨩ꩞ ꨨꨕꨯꩌ ꨛꨯꨮ ꨚꨓꨯꨱ ꨗꨫ ꨨꨭꨩ ꨆꨥꨯꩌ ꨝꨶꨮꩊ ꨞꩇ ꨓꨭꨞꩀ ꨢꨮꨭ ꨢꩃ ꨕꨯꨱꩃ ꨇꨪꩀ꩞ ꨧꨩ ꨝꨶꨰꨌꨓꨰ ꨆꨣꨬ ꨌꨪꩍ ꨘꩆ ꨣꨪꨤꨬꨎꨮꩆꨎꨪꩇ ꨕꨳꨭꩃ ꨣꨈꨵꨰ꩞ ꨓꨶꨬ ꨕꩌꨗꩈ ꨧꨯꨱꩃ ꨀꨕꩅ ꨈꩍ ꨀꨟꨰꩀ꩝ ꨂꨣꩃ ꨌꩌ ꨧꨯꨱꩃ ꨣꨈꨵꨰ ꨢꨮꨭ ꨦꨄꨰ ꨄꨰ ꨀꨕꨬ; ꨣꨈꨵꨰ (ꨀꨕꨬ ꨓꨤꨶꨪꩄ) ꨇꨪꩀ ꨀꨟꨋꩇ ꨇꨪꩀ ꨀꨥ ꨇꩆ ꨛꨯꨮ (ꨇꩆ ꨀꨥ) ꨢꩃ ꨧꨯꨱꩃ ꨚꨓꨯꨱ꩞ ꨆꨢꨶꨩ ꨘꩆ꩝ ꨀꨕꩅ ꨣꨯꨱꩀ ꨀꨥ ꨇꩆ ꨛꨯꨮ ꨟꩃ ꨣꨈꨵꨰ ꨓꨴꨭꩆ ꨚꨤꨬ ꨌꩌ ꨘꩆ ꨢꩌ ꨆꨌꨶꨩ ꨝꨴꩃ꩝ ꨋꩇ ꨡꨯꩍ ꨈꨴꨭꩀ ꨚꨈꨮꩌ ꨆꨥꨯꩌ ꨝꨶꨮꩊ ꨞꩇ ꨚꨣꨶꨬ ꨚꨣꩆ ꨧꨯꨱꩃ ꨀꨧꨩ ꨤꩄ ꨅꨩ ꨨꨭꨩ ꨡꨯꨱꩀ ꨣꨈꨵꨰ ꨢꨮꨩ ꨕꨯꩌ ꨀꨕꩅ ꨚꩀ ꨝꨪꨟꨯꩂ ꨝꨪꩀ ꨋꩇ ꨀꨝꨪꩍ ꨓꨮꩊ꩞ ꨓꨚꨩ ꨣꨤꨯꨩ ꨦꨤꨪꩍ ꨧꩀꨆꨣꩈ ꨌꩌꨛꨩ꩝ ꨈꨴꨭꩀ ꨟꩀ ꨦꨤꨪꩍ ꨁꨤꨪꨟꨯꨩ ꨧꨯꨱꩃ ꨀꨕꩅ ꨆꨤꨪꩂ ꨧꨯꨱꩃ ꨨꨕꨬ ꨗꨫ ꨘꩆ ꨕꨯꩌ ꨞꨩ ꨆꨣꨬ꩝ ꨆꨓꨯꨮꨩ ꨕꨯꨱꩀ ꨨꨭꨩ ꨀꨗꨚꩆ ꨢꨮꨭ ꨧꨩ ꨀꨔꨰꩀ ꨟꨗꨭꩍ ꨝꩉ ꨧꨯꨱꩃ ꨧꨶꨮꩆ ꨁꨤꨪꨟꨯꨩ ꨌꩌ꩞ ꨨꨣꨬ ꨗꨫ꩝ ꨙꩌ ꨀꨕꩅ ꨝꨴꩃ ꨨꨭꨩ ꨚꨔꨴꨮꩌ ꨆꨢꨶꨩ ꨆꨥꨯꩌ ꨝꨶꨮꩊ ꨞꩇ ꨌꩌ ꨝꨴꩍꨟꨪꩆ꩝ ꨚꨓꨯꨱꩌ ꨚꩀ ꨕꨯꩌ ꨝꨪꨟꨯꩂ ꨡꨵꨶꩀ ꨡꨯꩍ ꨢꨮꨭ ꨝꨪꨟꨯꩂ ꨛꨯꨮ ꨆꨵꨯꩂ ꨈꨣꨰ꩝ ꨝꨪꨟꨯꩂ ꨛꨯꨮ ꨣꨯꨟꨯꨮꨩ꩝ ꨟꨖꨪꩉ ꨛꨯꨮ ꨁꨗꨩ ꨗꨈꩉ (ꨇꩆ ꨨꨶꨩ) ꨧꨯꨱꩃ ꨝꨪꨟꨯꩂ ꨛꨯꨮ ꨦꩍ ꨁꨗꨩ (ꨤꩌ ꨙꨯꩂ)꩞ ꨀꩉꨖꩉ ꨢꨥꨩ ꨧꨯꨱꩃ ꨞꩇ ꨚꨣꩆ: ꨆꨓꨯꨮꨩ ꨝꨩ ꨀꩉꨖꩉ ꨝꨭꨩ ꨓꨮꩊ꩞ ꨆꨩ ꨢꨥꨩ꩝ ꨗꨫ ꨘꩆ ꨝꨐꨶꨮꩉ ꨟꨗꨶꨪꩋ ꨤꨰ ꨝꨴꨰ ꨧꨯꨱꩃ ꨢꩃ ꨤꨝꩃ ꨧꨯꨱꩃ ꨟꨭꩀꨆꨬ꩞ ꨂꨣꩃ ꨌꩌ ꨎꨳꨮꩉ ꨤꩄ ꨕꨤꩌ ꨀꨔꨶꨩ ꨈꨪꨗꨴꨮꩍ ꨙꩌ ꨀꨕꩅ꩝ ꨓꨭꩀ ꨚꨡꨯꩍ ꨓꨳꩆ ꨆꨭꨎꨩ꩝ ꨇꨯꨱꩊ ꨐꨭꨩ ꨨꨭꨩ “ꨈꨯꨱꩀ ꨚꨮꩇ” ꨨꨕꨯꩌ ꨂꨣꩃ ꨟꨓꨰ ꨧꨯꨱꩃ ꨕꨯꩌ ꨢꩃ ꨤꨝꩃ꩝ ꨟꩀ ꨨꨭꨩ ꨈꨴꨭꩀ ꨚꨎꨳꨩ ꨚꨎꨳꨮꩃ꩞ ꨀꨕꩅ ꨋꩇ ꨡꨯꩍ ꨕꨘꩀ ꨕꨶꨩ ꨚꨎꨭꩌ ꨁꨗꨩ – ꨁꨟꨩ꩝ ꨤꨪꨊꨫꩀ – ꨓꨔꨪꩀ꩝ ꨢꩃ ꨀꨟꨩ – ꨢꩃ ꨁꨗꨩ꩝ ꨝꨴꨬ ꨡꨯꩍ ꨧꨆꨣꨰ ꨚꨧꨯꨱꩃ ꨆꨥꨯꩌ ꨝꨶꨮꩊ ꨞꩇ꩞ ꨆꨩ ꨞꩇ ꨚꨣꩆ꩝ ꨆꨓꨯꨮꨩ ꨘꩆ ꨝꨐꨶꨮꩉ ꨆꨴꨮꩃ ꨚꨈꨭꩊ ꨚꨓꨯꨱꩌ ꨆꨥꨯꩌ ꨝꨶꨮꩊ ꨞꩇ꩞ ꨈꨴꨮꩇ ꨕꨴꨬ꩝ ꨟꨢꩍ ꨕꨯꨱꩀ ꨀꨓꩍ꩝ ꨎꩃ ꨟꨰ ꨈꨤꩄ ꨚꨤꨬ꩝ ꨓꨊꨪ ꨣꨪꨥꨮꩃ꩝ ꨓꨖꨭꨥ ꨆꨟꨴꨶꨰ ꨈꨮꩇ꩞ ꨙꩌ ꨀꨕꩅ ꨋꩇ ꨓꨝꨳꩀ ꨟꩃ ꨚꩃꨆꩅ ꨝꨪꨟꨯꩂ ꨓꨮꩊ ꨚꩃꨆꩅ ꨚꨤꨬ ꨧꨯꨱꩃ ꨟꨋꨥꨯꩌ꩝ ꨚꨟꨎꨳꨯꨮꩃ ꨐꨭꩀ ꨀꨕꩅ ꨆꨆꩊ꩞ ꨕꨫ ꨚꩃꨆꩅ ꨚꨤꨬ꩝ ꨢꩇ ꨚꨤꨬ ꨕꨭꩍ ꨢꩃ ꨆꨣꨬ ꨚꨈꨮꩌ ꨧꨯꨱꩃ ꨕꨘꩀ ꨕꨗꨮꨩ ꨨꨰ ꨧꩀꨆꨣꩈ ꨚꨤꨬ (ꨧꨪꨕꩍ ꨚꨤꨬ ꨨꨟꨭꨩ ꨌꨴꨯꨱꩀ ꨚꨈꨮꩌ ꨧꨯꨱꩃ ꨕꨗꨯꨱꩀ ꨤꨮꩆ꩝ ꨚꨤꨬ ꨚꨈꨮꩌ ꨧꨯꨱꩃ ꨕꨗꨯꨱꩀ ꨓꨔꨪꩀ …)꩞ ꨕꨫ ꨚꩃꨆꩅ ꨟꨋꨥꨯꩌ꩝ ꨈꨪꨗꨶꨮꩉ ꨧꩃ ꨨꨰ ꨈꨪꨗꨶꨮꩉ ꨈꨮꩇ ꨝꨩ ꨋꩇ ꨃꨥ ꨟꨭꩀꨆꨬ꩝ ꨌꨯꨱꩃ ꨀꨗꩀ ꨓꨌꨯꨱꨥ ꨋꩇ ꨡꨮꩃ ꨎꨳꩀ ꨎꨳꨮꩃ꩞ ꨧꨯꨱꩃ꩝ ꨆꨓꨯꨮꨩ ꨕꨯꨱꩀ ꨘꩆ ꨚꨗꨶꨮꩄ ꨀꨤꨋꨆꩉ ꨝꨳꩀ ꨝꨴꨬ ꨀꨣꨰ ꨨꨕꨳꨯꨮꩇ: ꨨꨎꩆ ꨀꨊꨪꩆ ꨈꨮꩇ ꨧꨳꩌ꩝ ꨨꨭꨩ ꨨꨤꨪꩌ꩝ ꨧꨤꩌ꩝ ꨟꨕꨩ ꨈꨪꨗꨭꩇ꩞ ꨕꨤꩌ ꨓꨭꩀ ꨔꨰꩀ ꨂꨣꩃ ꨌꩌ ꨟꨆꩊ ꨕꨳꨪꩇ ꨚꨙꨳꨮꨩ ꨕꨫ ꨀꨚꨭꩍ ꨨꨟꨭꨩ ꨇꨯꨱꩃ ꨧꨯꨱꩃ ꨕꨗꨯꨱꩀ ꨓꨔꨪꩀ꩝ ꨨꨕꨯꩌ ꨚꨗꨶꨮꩄ ꨀꨤꨋꨆꩉ ꨘꩆ ꨝꨩ ꨀꩉꨖꩉ ꨕꨳꨪꩇ ꨕꨯꨱꩀ꩞ ꨎꨤꩆ ꨚꨡꨯꩍ ꨀꨕꩅ ꨨꨎꩅ: ꨙꩌ ꨀꨕꩅ ꨞꨳꩆ ꨋꩇ ꨓꨮꩊ ꨗꨶꨮꩄ ꩓ ꨨꨣꨬ ꨨꨎꩅ ꨚꩀ ꨕꨯꩌ ꨝꨪꨟꨯꩂ꩝ ꨨꨕꨬ ꨘꩆ ꨥꨮꩀ ꨕꨫ ꨚꨤꨬ ꨧꨯꨱꩃ ꨟꨋꨥꨯꩌ꩞ ꨕꨘꩀ ꨨꨈꨴꨮꩌ ꨕꨶꨩ ꨞꨩ ꨡꨶꨮꩆ ꨡꨯꩍ: ꨞꨩ ꨋꩇ ꨀꨕꩅ (ꨧꨭꨗꨪꩅ ꨈꨪꨗꨴꨮꩍ꩝ ꨚꨴꨯꨱꩃ ꨝꨪꨗꨴꨪꩀ) ꨧꨯꨱꩃ ꨞꨩ ꨙꩌ ꨟꨁꩆ (ꨝꨶꨬ ꨝꨰꩈ꩝ ꨆꨥꨯꩌ ꨝꨶꨮꩊ ꨞꩇ)꩞ ꨞꨩ ꨋꩇ ꨀꨕꩅ ꨚꨕꨯꨱꩀ ꨀꨆꨯꨱꩀ ꨟꩃ ꨋꩇ ꨀꨕꩅ ꨣꨯꨱꩀ ꨇꩆ ꨀꨥ ꨛꨯꨮ ꨢꩃ꩞ ꨗꨫ ꨘꩆ ꨀꨕꩅ ꨚꨮꩍ ꨀꨆꨯꨱꩀ ꨝꨴꩃ꩝ ꨞꨳꩆ ꨚꨣꨤꨯꨩ ꨚꩀ ꨚꨤꨬ ꨨꨟꨭꨩ ꨓꨗꨴꩆ (ꨞꨭꩌ ꨜꨲꩄ ꨨꨭꨩ)꩞ ꨀꨥ ꨇꩆ ꨛꨯꨮ ꨢꩃ ꨁꨗꨩ ꨛꨯꨮ ꨁꨗꨩ ꨗꨈꩉ ꨆꨢꨶꨩ ꨣꨈꨵꨰ ꨝꨩ ꨓꨴꨭꩆ꩝ ꨨꨭꨩ ꨚꨙꨯꩀ ꨓꨶꨬ ꨀꨕꩅ ꨚꨴꨯꨱꩃ ꨝꨪꨗꨴꨪꩀ ꨧꨯꨱꩃ ꨈꨴꨭꩀ ꨨꨭꨩ ꨡꨯꨱꩀ ꨨꨤꨮꨭ ꨎꨗꩃ꩝ ꨆꨥꨯꩌ ꨝꨶꨮꩊ ꨞꩇ ꨧꨯꨱꩃ ꨦꩇ ꨜꨵꨪꩂ ꨕꨘꩇ꩞ ꨗꨯꨱꩀ ꨣꨯꨱꩀ ꨨꨕꨬ ꨘꩆ ꨝꨩ ꨀꨥ ꨇꩆ ꨛꨯꨮ ꨓꨈꨯꩀ ꨕꨯꩌ ꨝꨪꨟꨯꩂ ꨨꨎꩅ꩞ ꨛꨓꨶꨬ ꨘꩆ ꨀꨕꩅ ꨚꨮꩍ ꨝꨪꨡꨮꩃ ꨢꩃ꩞ ꨕꨯꩌ ꨨꨤꨮꨭ ꨎꨗꩃ (ꨆꨖꩉ (ꨀꨨꨳꨯꨮꩉ)꩝ ꨌꨟꨗꨬ꩝ ꨕꨭꩅ …) ꨤꨪꨆꨮꨭ ꨈꨯꨱꩆ ꨢꩃ ꨤꨝꩃ꩝ ꨧꨝꩍ ꨟꩃ ꨨꨮꩃ ꨈꨪꨨꨵꨮꨭ꩝ ꨝꨵꨯꨱꩍ ꨚꨮꩍ ꨝꨪꨡꨮꩃ ꨢꩃ꩞ ꨦꩇ ꨆꨐꨪ (ꨣꨝꩇ)꩝ ꨚꨗꨶꨮꩄ ꨀꨕꨯꨱꩍ ꨓꨆꨮꩃ ꨢꩃ ꨤꨝꩃ ꨕꨗꩈ ꨕꨤꩌ ꨀꩉ ꨔꩀ ꨝꨆꩌ꩞ ꨀꨕꩅ ꨟꨗꨬ ꨢꩃ ꨧꨯꨱꩃ ꨀꨕꩅ ꨀꨊꨶꨬ ꨇꩆ ꨀꨥ ꨢꩃ ꨘꩆ ꨨꨕꨯꩌ ꨀꨕꩅ ꨝꨔꩀ꩞ ꨨꨢꩇ ꨛꨯꨮ ꨢꩃ (ꨨꨰ ꨤꨪꩆꨈꨩꨢꨯꨗꨪ꩝ ꨟꨭꨇꨩꨤꨪꩆꨈꨩ) ꨨꨭꨩ ꨟꨗꨬ ꨨꨈꨬ ꨨꨌꨪ ꨨꨌꨪꩍ꩝ ꨨꨕꨬ ꨘꩆ ꨨꨭꨩ ꨌꨭꩀ ꨇꩆ ꨀꨥ ꨝꨪꨣꨭꨥ – ꨀꨔꨰꩀ ꨈꨴꨭꩀ ꨦꨤꨪꩍ ꨝꨪꨣꨭꨥ꩝ ꨚꨎꨳꨮꩃ ꨥꨮꩀ ꨧꨯꨱꩃ ꨓꨳꩆ ꨆꨭꨎꨩ꩞ ꨚꨓꨰꩀ ꨘꩆ ꨟꨤꨳꨲꩃ ꨢꩃ: ꨤꨪꨠꩍ ꨆꨢꨩ ꨚꨆꩉ (ꨣꨤꨯꨱꨥ ꨚꨝꨰꩈ꩝ ꨟꨗꨭꩀ꩝ ꨤꨪꨧꨬ꩝ ꨀꨳꨩ ꨨꨝꨰ꩝ ꨀꨝꨯꨱꩍ꩝ ꨓꨚꨬ ꨋꩇ ꨟꩃ ꨝꨴꩍ ꨙꨳꨮꩇ꩝ ꨀꨝꨯꨱꩍ ꨆꨢꨮꨭ꩝ ꨀꨤꩀ꩝ ꨨꨤꨩ ꨚꨗꩃ…)꩝ ꨀꨤꩃꨆꩉ ꨧꨯꨱꩃ ꨧꨰꩅ꩞ ꨀꨝꨪꩍ ꨡꨯꩂ ꨀꨕꩅ ꨨꨭꨩ ꨋꩇ ꨆꨢꨶꨩ ꨕꨯꩌ ꨨꨤꨮꨭ ꨎꨗꩃ ꨝꨴꩍꨟꨪꩆ ꨓꨶꨬ ꨒꨮꩇ ꨕꨘꩇ꩝ ꨧꨯꨱꩃ ꨨꨭꨩ ꨡꨯꨱꩀ ꨆꨥꨯꩌ ꨝꨶꨮꩊ ꨞꩇ꩞ ꨜꨵꨪꩂ ꨒꨮꩇ ꨀꨟꨋꩇ ꨦꨶꩆ: ꨦꩇ ꨦꨣꨗꨰ ꨚꨴꨰꩈ ꨚꨴꨥ꩝ ꨝꨣꨗꩃ꩝ ꨈꨪꨗꨮꩃ꩝ ꨌꨯꨮꩃ꩝ ꨈꨴꨯꩂ… ꨚꨟꨎꨳꨯꨮꩃ ꨀꨔꨶꨩ ꨈꨮꩌ ꨝꨆꩌ ꨈꨮꩌ ꨤꨪꩆ ꨓꨚꨪꩆ꩞ ꨞꨩ ꨙꩌ ꨟꨁꩆ ꨝꨪꨣꨭꨥ ꨋꩇ ꨟꩃ ꨕꨯꩌ ꨀꨕꩅ ꨈꨪꨗꨴꨮꩍ ꨀꨝꨪꩍ꩞ ꨤꨪꨊꨪꨥ ꨝꨪꨟꨯꩂ꩝ ꨀꩉ ꨔꩀ ꨎꨳꨮꩃ ꨧꨟꩃ ꨧꨯꨱꩃ ꨕꨯꩌ ꨣꨪꨈꨮꩌ ꨓꨟꨳꨩ ꨕꨘꩇ (ꨢꨮꨭ ꨓꨟꨳꨩ ꨟꨭꩀ ꨚꨎꨮꨭ)꩝ ꨚꨣꩆ ꨀꨕꨯꨱꩍ꩝ ꨈꨴꨭꩀ ꨟꨁꩆ ꨝꨶꨮꩊ ꨚꨣꩆ꩝ ꨚꨡꨯꩍ ꨕꨗꨯꨱꩀ ꨓꨊꨪꩆ ꨋꩇ (ꨤꨮꩆ ꨀꩌ ꨨꨟꨭꨩ ꨌꨴꨯꨱꩀ꩝ ꨟꨐꨪꩌ ꨕꨤꩍ ꨎꨪꩍ)꩝ ꨆꨢꨩ ꨡꨮꩃ ꨧꨯꨱꩃ ꨀꨋꩇ ꨗꨯꨱ ꨟꨰ꩞ ꨝꨶꨮꩊ ꨞꩇ ꨧꨯꨱꩃ ꨓꨶꨰ ꨣꩍ ꨈꨯꨱꩇ ꨓꨥꩉ꩝ ꨚꨟꨎꨳꨯꨮꩃ ꨀꩉ ꨔꩀ ꨙꩌ ꨀꨕꩅ ꨒꨮꩇ ꨎꨳꨮꩃ꩞ ꨨꨕꨬ ꨞꨩ ꨚꩀ ꨝꨪꨟꨯꩂ꩝ ꨙꩌ ꨀꨕꩅ ꨚꨣꨞꨩ ꨟꨰ ꨕꨯꩌ ꨚꨤꨬ ꨧꨯꨱꩃ ꨢꩇ ꨟꨋꨥꨯꩌ꩞ ꨢꩇ ꨟꨋꨥꨯꩌ ꨣꨟꨪꩀ ꨧꨤꨯꨱ ꨃꨥ ꨟꨭꩀꨆꨬ꩝ ꨓꨊꨪ ꨣꨪꨥꨮꩃ ꨈꨮꩇ꩝ ꨚꨟꨎꨳꨯꨮꩃ ꨀꩉ ꨔꩀ ꨧꨟꩃ꩝ ꨚꨈꨮꩌ ꨢꨮꨭ ꨓꨯꨮꩅ ꨢꨶꨮꩆ꩞ ꨓꩌꨚꩍ ꨁꨤꨪꨟꨯꨩ ꨧꨯꨱꩃ ꨧꨶꨮꩆ ꨂꨣꩀꨗꨫ: ꨆꨓꨯꨮꨩ ꨅꨩ ꨘꩆ ꨓꨯꩀ ꨀꨕꩅ ꨀꨈꨠꨩ ꨟꨪꩆ ꨕꨯꨱꩀ ꨘꩆ ꨆꩌꨗꩇ ꨕꨳꨪꩇ ꨡꨵꨶꩀ ꨁꨤꨪꨟꨯꨩ ꨌꩌ: ꨆꩉ ꨝꨪꨟꨯꩂ꩝ ꨜꨵꨪꩂ꩝ ꨓꨟꨳꨩ꩝ ꨇꩆ ꨀꨥ꩝ ꨆꨢꨩ ꨡꨮꩃ꩝ ꨀꨇꩉ ꨥꩀ ꨧꨯꨱꩃ ꨁꨤꨟꨭꨩ ꨝꨶꨮꩊ ꨚꨣꩆ꩞ ꨐꨭꨩ ꨋꩇ ꨡꨯꩍ ꨎꨪꩇ ꨀꨕꩅ “ꨟꨐꨭꩌ ꨀꨳꨩ ꨨꨕꨮꩉ ꨨꨤꨮꨭ”꩝ ꨁꨦꨗꩃ ꨔꨮꨭ ꨜꨶꨮꩊ ꨧꨯꨱꩃ ꨦꨗꩃ ꨇꨪꩀ ꨟꨗꨭꩍ ꨝꩉ ꨆꨴꨲꩍ ꨤꩆ ꨆꨴꩍ ꨂꨣꩀꨗꨫ꩞ ꨨꨕꨯꩌ ꨔꨭꩆ ꨗꨫ꩝ ꨙꩌ ꨀꨕꩅ ꨨꨭꨩ ꨣꨕꩀ ꨟꨕꨩ ꨨꨣꨬ ꨟꨕꨩ ꨚꨴꨯꨱꩃ ꨝꨪꨗꨴꨪꩀ ꨡꨵꨶꩀ꩝ ꨟꨜꨶꨆꩅ ꨇꨪꩀ ꨧꨯꨱꩃ ꨌꩀ ꨣꨯꩀ ꨣꩍ ꨟꨁꩆ ꨁꨤꨪꨟꨯꨩ꩞ ꨕꨯꩌ ꨚꨤꨬ ꨋꩇ ꨚꨕꨮꩃ ꨚꨴꨯꨈꨴꩌ ꨇꨪꩀ ꨧꨯꨱꩃ ꨓꨔꨪꩅ ꨧꨳꩌ ꨓꩌꨚꩍ꩝ ꨣꨕꩀ ꨀꨔꨶꨩ ꨡꨯꩍ꩝ ꨀꨚꨡꨯꩍ꩝ ꨚꨎꨭꩌ ꨚꨆꨌꩍ … ꨚꨎꨯꨱꩃ ꨟꨰ ꨣꨊꨯꨱꩀ ꨓꨶꨰ ꨣꩍ ꨕꨤꩌ ꨧꨯꨱꩃ ꨤꨪꨊꨪꨥ ꨀꨳꨩ꩞ ꨟꨪꩆ꩝ ꨆꨥꨯꩌ ꨝꨶꨮꩊ ꨞꩇ ꨧꨯꨱꩃ ꨣꨎꨆꩉ ꨝꨳꨮꩆ ꨣꨬ ꨎꩃ ꨛꨯꨩꩀ ꨟꨯꨱꩃ ꨇꨪꩀ ꨀꨟꨗꨩ ꨧꨭꨗꨪꩅ ꨈꨪꨗꨴꨮꩍ꩝ ꨚꨵꨰꩍ ꨍꨟꨶꨮꩆ ꨚꨟꨎꨳꨮꩃ ꨓꨴꩀ ꨡꨵꨶꩀ꩝ ꨌꨰꩀ ꨀꨕꩅ ꨕꨯꨱꩀ ꨆꨢꨶꨩ ꨨꨤꨮꨭ ꨎꨗꩃ ꨧꨯꨱꩃ ꨝꨶꨮꩊ ꨞꩇ ꨚꨔꨴꨮꩌ ꨓꨶꨬ ꨕꨘꩇ꩞ ꨙꩌ ꨀꨕꩅ ꨕꨯꨱꩀ ꨚꨎꨭꩌ ꨞꨩ ꨚꨡꨶꩀ ꨈꨴꨭꩀ ꨔꨮꨭ ꨣꨪꨤꨯꨩ ꨧꨯꨱꩃ ꨚꨈꨮꩌ ꨆꨴꨲꩍ ꨕꨯꩌ ꨚꨣꩆ꩞ ꨈꨴꨭꩀ ꨨꨭꨩ ꨡꨯꨱꩀ ꨣꨈꨵꨰ꩝ ꨈꨴꨭꩀ ꨟꨯꨱꩃ ꨓꩊ ꨆꨥꨯꩌ ꨝꨶꨮꩊ ꨞꩇ ꨢꨶꨮꩆ ꨧꨯꨱꩃ ꨕꨯꩌ ꨚꨣꩆ ꨆꨣꨬ ꨋꩇ ꨆꨩ ꨆꨓꨯꨮꨩ ꨎꨳꨮꩃ ꨀꨔꨰꩀ ꨕꨤꩌ ꨣꨪꨤꨯꨩ ꨔꨰꩀ ꨁꨤꨪꨟꨯꨩ ꨀꨳꨩ ꨢꨶꨮꩆ꩞ ꨤꨶꨪꩄ ꨤꩄ: ꨗꨆꨓꨯꨮꨩ ꨘꩆ ꨆꨧꨮꩆ ꨕꨳꨪꩇ ꨡꨵꨶꩀ ꨆꨩ ꨧꨶꨮꩆ ꨓꨆꨵꨮꩌ ꨁꨤꨪꨟꨯꨩ ꨌꩌ – ꨧꨩ ꨞꩇ ꨁꨤꨪꨟꨯꨩ ꨆꩊ ꨓꨗꨴꨩ ꨕꨤꩌ ꨧꩀꨆꨣꩈ ꨌꩌꨛꨩ ꨧꨯꨱꩃ ꨕꨯꨱꩀ ꨥꨮꩀ ꨓꨐꨴꨩ ꨕꨤꩌ ꨀꨣꨰ ꨨꨕꨳꨯꨮꩇ ꨂꨣꩀꨗꨫ꩞ ꨟꩃ ꨨꨕꨯꩌ ꨀꨕꩅ ꨟꨗꨬ ꨣꨚꨝꨶꩀ꩝ ꨀꨊꨶꨬ ꨇꩆ ꨀꨥ ꨢꩃ ꨓꨮꩊ ꨈꨵꨰꩂ꩝ ꨦꩇ ꨧꨣꨗꨰ ꨕꨗꩈ ꨈꩍ ꨨꨕꨯꩌ ꨝꨪꨟꨯꩂ ꨟꨆꩊ꩝ ꨟꩃ ꨚꨗꨶꨮꩄ ꨀꨤꩃꨆꩉ ꨝꨴꨬ ꨨꨤꨪꩌ ꨤꨪꨗꩈ ꨓꨮꩊ ꨔꨭꩀ ꨚꨓꨯꨱꩌ ꨆꨥꨯꩌ ꨝꨶꨮꩊ ꨞꩇ꩝ ꨆꨓꨯꨮꨩ ꨟꨜꨶꨆꩅ ꨧꨆꨣꨰ ꨕꨳꨪꩇ ꨚꨧꨯꨱꩃ ꨧꨯꨱꩃ ꨜꨶꨩ꩝ ꨧꨯꨱꩃ ꨟꨭꩀꨆꨬ ꨧꨯꨱꩃ ꨈꨮꩇ꩞ ꨕꨤꩌ ꨓꨭꩀ ꨔꨰꩀ ꨝꨯꨱꩍ ꨓꨗꩍ ꨎꨳꨮꩃ ꨧꨯꨱꩃ ꨕꨪꩂ ꨎꨳꨮꩃ ꨟꨕꨩ ꨨꨣꨬ ꨟꨕꨩ ꨇꨮꩃ ꨆꨓꨮꩃ꩝ ꨈꨴꨭꩀ ꨇꨪꩀ ꨧꨯꨱꩃ ꨓꨔꨪꩅ ꨧꨳꩌ ꨓꩌꨚꩍ ꨙꩌ ꨀꨕꩅ ꨗꨫ ꨅꨩ ꨘꩆ ꨓꨯꩀ ꨔꩆ ꨞꨩ ꨝꨶꨮꩊ ꨞꩇ ꨌꩌ ꨟꨪꩆ ꨕꨯꨱꩀ ꨘꩆ ꨀꨝꨪꩍ ꨞꩇ ꨚꨣꩆ꩞ ꨢꩇ ꨝꩊ ꨆꨓꨯꨮꨩ ꨔꨮꩀ ꨔꨴꨭꩍ ꨘꩆ ꨧꨩ ꨡꨮꩃ ꨆꨥꨯꩌ ꨝꨶꨮꩊ ꨞꩇ ꨨꨭꨩ ꨚꨟꨈꨬ ꨓꨮꩊ ꨨꨤꨮꨭ꩝ ꨟꨰ ꨓꨳꩆ ꨧꨆꩉ ꨧꨯꨱꩃ ꨟꨰ ꨔꩆ ꨞꨩ ꨇꨳꨮꩀ ꨟꨗꨭꩍ ꨝꩉ ꨌꨰꩀ ꨥꨮꩀ ꨆꨩ ꨣꨰ ꨣꩀ ꨨꨕꨬ꩞ ꨆꨓꨯꨮꨩ ꨅꨩ ꨘꩆ ꨓꨯꩀ ꨙꩌ ꨀꨕꩅ ꨂꨣꩃ ꨌꩌ – ꨕꩍ ꨕꨴꨮꩇ ꨝꨪꨗꨴꨪꩀ ꨞꩇ ꨁꨤꨪꨟꨯꨩ ꨀꨳꨩ ꨢꨶꨮꩆ ꨣꨪꨤꨯꨩ ꨔꨰꩀ꩝ ꨌꨪꩀ ꨧꨯꨱꩃ ꨆꨢꨩ ꨟꨗꨭꩍ ꨝꩉ꩞