ꨚꨎꨰꩍ ꨚꨓꨰꩀ ꨟꩃ ꨆꩊ꩝ ꨨꨭꨩ ꨧꨩ ꨂꨣꩃ ꨝꨶꨮꩊ ꨤꨪꨀꨶꨩ ꨆꨔꨯꨱꩅ꩝ ꨓꨯꩀ ꨕꨯꨱꩀ ꨥꨮꩀ ꨧꨩ ꨚꨎꨰꩍ ꨚꨓꨰꩀ ꨆꨢꨶꨩ ꨧꨩ ꨡꨮꩃ ꨨꨓꨶꨩ ꨝꨳꩀ ꨍꨶꨰ꩞ ꨔꨬ ꨤꨪꨎꩃ ꨚꨓꨯꨱꨥ ꨅꩃ ꨚꨳꨮꩍ ꨚꨎꨰꩍ ꨥꨮꩀ ꨌꨰꩀ ꨔꨭꩆ ꨨꨕꨬ ꨚꨤꨩ꩝ ꨆꨢꨶꨩ ꨟꨢꩍ ꨤꨪꨨꨪꩀ ꨚꨎꨰꩍ ꨘꩆ ꨢꨮꨩ ꨟꨋꨥꨯꩌ ꨅꩃ ꨀꨮꩀ꩞ ꨊꨯꨱꩀ ꨎꨤꩆ ꨟꨰ ꨧꩃ꩝ ꨅꩃ ꨈꨯꨱꩀ ꨧꨩ ꨟꨭꩀ ꨓꨨꨩ ꨕꨯꨱꩀ ꨤꨚꨩ ꨧꨯꨱꩃ ꨘꨜꨶꨪ꩞ ꨟꨭꩀ ꨙꨯꩌ ꨤꩄ ꨣꨤꨯꨩ ꨨꨣꨬ ꨚꨎꨮꨩ ꨓꨪꨆꨩ ꨨꨭꨩ ꨡꨮꩃ ꨈꨰꩅ꩞ ꨂꨣꩃ ꨝꨶꨮꩊ ꨤꨪꨀꨶꨩ ꨟꨯꨱꩃ ꨚꨎꨰꩍ ꨕꨤꩌ ꨓꨊꨪꩆ ꨝꨵꨯꨱꩍ ꨈꨪꨙꨮꩃ ꨝꨩ ꨗꨯꨱ ꨓꨗꩍ ꨎꨳꨮꩃ ꨧꨩ ꨎꨤꨭꩀ ꨀꨝꨭꨩ ꨀꨦꨪꩅ ꨌꨰꩀ ꨆꨩ ꨟꨭꩀ ꨓꨨꨩ ꨡꨮꩃ꩞ ꨨꨣꨬ ꨨꨕꨬ꩝ ꨅꩃ ꨓꨝꨳꩀ ꨨꨟꨭꨩ ꨕꨯꨱꩀ ꨕꨶꨩ ꨚꨤꩀ ꨓꨊꨪꩆ ꨧꨯꨱꩍ꩞ ꨅꩃ ꨓꨯꩀ ꨔꨮꨭ ꨚꨈꩍ ꨨꨣꨮꩍ꩝ ꨓꨠꩉ ꨀꩉ ꨝꨵꨯꨱꩍ ꨌꩃ ꨟꨢꩍ ꨨꨭꨩ ꨨꨈꨰꩅ ꨧꨳꩌ ꨕꩉ ꨟꨰ꩞ ꨨꨕꨯꩌ ꨨꨣꨬ ꨥꨮꩀ꩝ ꨓꨐꨴꨥ ꨔꨮꨭ ꨆꨖꨩ꩞ ꨇꨯꨱꩊ ꨐꨭꨩ ꨕꨴꨭꩅ ꨕꨴꨶꨰ ꨆꨢꨶꨩ ꨡꨯꩍ ꨅꩃ ꨧꨳꩌ ꨓꨳꩆ꩝ ꨘꩆ ꨎꩀ ꨈꨮꩇ ꨝꨩ ꨟꨰ ꨓꨆꨪꩀ ꨚꨎꨰꩍ꩝ ꨨꨭꨩ ꨂꨣꩃ ꨝꨴꨬ ꨆꨚꩊ ꨚꨕꨰ꩝ ꨨꨭꨩ ꨂꨣꩃ ꨝꨴꨬ ꨨꨕꨯꩌ ꨀꨧꩉ ꨓꨊꨮꩈ꩝ ꨨꨭꨩ ꨂꨣꩃ ꨝꨴꨬ ꨓꨆꨪꩀ ꨣꨪꨓꩀ꩞ ꨨꨤꨪꩌ ꨔꨭꩆ ꨘꩆ ꨟꨰ ꨕꨮꩆ꩞ ꨀꨚꨭꩍ ꨅꩃ ꨝꨶꨮꩊ ꨤꨪꨀꨶꨩ ꨧꨳꩌ ꨡꨵꨶꩀ ꨥꨮꩀ꩞ ꨤꨶꨪꩄ ꨝꩊ꩝ ꨅꩃ ꨚꨓꨯꨱꩌ ꨨꨭꨩ ꨚꨕꨰ ꨝꨴꩍ ꨣꨤꨯꨩ ꨡꨵꨶꩀ ꨕꨫ ꨨꨕꨯꩌ ꨔꨭꩆ ꨕꨨꨵꨮꨭ꩞ ꨅꩃ ꨇꨪꩌ ꨆꨵꨯꨱ ꨝꨵꨯꨱꩍ ꨙꨯꩌ ꨧꨯꨱꩃ ꨕꨯꩌ ꨀꨗꩀ: “ꨆꨴꨭꩃ ꨝꨪꨗꨴꨪꩀ ꨀꨝꨪꩍ ꨅꨩ ꨒꨮꩇ ꨚꨎꨰꩍ ꨚꨓꨰꩀ꩝ ꨟꨪꩆ ꨓꨳꩆ ꨧꨳꩌ ꨋꩇ ꨎꨳꨮꩃ ꨚꨍꨯꩌ ꨕꨤꩌ ꨨꨓꨰ ꨟꨗꨶꨪꩋ”꩞