ꨟꩃ ꨆꩊ꩝ ꨕꨤꩌ ꨧꨩ ꨚꨤꨬ ꨀꨦꨪꩅ꩝ ꨨꨭꨩ ꨧꨩ ꨝꩆ ꨣꨗꨰꩍ ꨕꨯꨱꩀ ꨧꨯꨱꩃ ꨀꨟꨰꩀ꩞ ꨟꨋꨥꨯꩌ ꨝꨳꩀ ꨆꨔꨯꨱꩅ꩝ ꨓꨮꩊ ꨦꨭꩇ ꨐꨭꨩ ꨨꨭꨩ ꨓꨯꩀ ꨧꨩ ꨝꨯꨱꩍ ꨟꨐꩀ ꨀꨦꨪꩅ ꨌꨰꩀ ꨓꨶꨮꩀ ꨕꩍ꩞ ꨧꨩ ꨥꩉ꩝ ꨝꩆ ꨣꨗꨰꩍ ꨟꨟꨯꨱꩆ: ꨧꩃ ꨕꨴꨬ ꨆꨔꨯꨱꩅ ꨣꨤꨯꨩ꩞ ꨟꨢꩍ ꨨꨭꨩ ꨝꨳꩀ ꨣꨤꨯꨩ ꨟꨐꩀ ꨢꨮꨩ ꨧꨳꩌ ꨔꨮꨭ ꨨꨕꨯꩌ꩞ ꨀꨟꨰꩀ ꨇꨪꩌ ꨆꨵꨯꨱ ꨝꨵꨯꨱꩍ ꨚꨢꨮꩉ ꨐꨭꨩ ꨝꨯꨱꩍ ꨟꨐꩀ ꨧꨯꨱꩃ ꨙꨯꩌ: ꨀꨗꩀ ꨦꨮꩃ ꨝꨩ ꨝꨯꨱꩍ ꨟꨐꩀ ꨗꨫ ꨓꨚꨩ ꨧꩃ ꨥꨩ ꨧꨴꨯꨱꩀ꩞ ꨧꩃ ꨥꨩ ꨝꨪꨣꨭꨥ ꨤꨪꨨꨪꩀ ꨙꨳꨯꨮꩆ꩞ ꨝꩆ ꨣꨗꨰꩍ ꨀꨋꩇ ꨓꨶꨬ꩞ ꨓꨭꩀ ꨝꨯꨱꩍ ꨟꨐꩀ ꨌꨰꩀ ꨕꨫ ꨆꨴꨲꩍ ꨧꩃ ꨦꨭꩇ꩝ ꨔꨬ ꨎꩃ ꨀꨚꨆꩉ꩞ ꨔꨶꨰ ꨎꨤꩆ ꨟꨰ꩝ ꨐꨭꨩ ꨓꨊꨪ ꨀꨟꨰꩀ: ꨀꨟꨰꩀ ꨤꨮꩈ꩝ ꨕꨴꨬ ꨝꨴꨬ ꨂꨣꩃ ꨆꨣꨬ ꨀꨐꨪꩌ ꨨꨕꨩ꩞ ꨧꩃ ꨕꨴꨬ ꨨꨭꨩ ꨦꨭꩇ ꨡꨵꨶꩀ ꨨꨤꨬ? ꨀꨟꨰꩀ ꨕꩉ ꨧꨭꨂꩀ: ꨅꨩ꩞ ꨧꨩ ꨕꨤꩍ ꨀꨚꨶꨬ ꨓꨶꨮꩀ ꨨꨕꩍ ꨣꨪꨓꨭꩍ ꨕꨤꩍ ꨀꨚꨶꨬ ꨚꨆꩆ ꨟꨪꩆ ꨅꨩ ꨤꨨꨪꩀ ꨈꨰꩅ꩞ ꨟꩃ ꨨꨣꨬ ꨘꩆ꩝ ꨝꩆ ꨣꨗꨰꩍ ꨈꨟꨴꨭꨩ ꨤꩄ ꨧꨳꩌ ꨓꨳꩆ ꨤꨪꨎꩃ ꨕꨴꨮꩍ ꨨꨕꩍ꩞ ꨓꨭꩀ ꨕꨴꨬ ꨗꩍ ꨣꨞꨩ ꨧꨯꨱꩃ ꨂꨣꩃ ꨚꨆꩆ꩝ ꨕꨴꨬ ꨅꨩ ꨤꨪꨨꨪꩀ ꨨꨈꨰꩅ꩞ ꨚꨈꨤꩄ꩝ ꨣꩈ ꨤꨯꩀ ꨗꨫ ꨎꨳꨮꩃ ꨚꨙꨯꨱ ꨡꨴꨯꨱꨥ ꨧꨯꨱꩃ ꨈꨴꨮꩇ ꨕꨴꨬ ꨎꩃ ꨝꨶꨬ ꨝꨰꩈ ꨣꨤꨯꨩ ꨥꨮꩀ꩞ ꨣꨤꨯꨩ ꨔꨭꩆ ꨨꨕꨬ꩝ ꨐꨭꨩ ꨕꨯꨱꩀ ꨨꨕꨮꩉ ꨆꨖꨩ ꨝꩄ ꨘꩆ꩝ ꨐꨭꨩ ꨟꨣꩅ ꨝꨩ “ꨨꨕꨩ ” ꨆꨩ ꨨꨕꨯꩌ ꨂꨣꩃ ꨥꨪꩊ ꨕꨮꩉ꩞