ꨨꨣꨬ ꩑꩔/꩑꩐ (ꨒꨮꩇ ꨨꨣꨬ ꩑/꩗ ꨧꨆꨥꨪ ꨌꩌ)꩝ ꨣꨭꨝꨭꨥ ꨝꨶꨮꩊ ꨞꩇ ꨌꩌ ꨧꨯꨱꩃ ꨓꨶꨰ ꨣꩍ ꨈꨴꨮꩇ ꨗꨈꩉ ꨚꨓꨯꨱꩌ ꨟꨰ ꨤꨪꨝꨪꩀ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ꩝ ꨕꨪꩂ ꨗꨴꩃ – ꨝꨪꨟꨯꩂ ꨌꩌ (ꨗꨪꩂ ꨔꨶꨮꩆ) ꨌꨰꩀ ꨨꨭꨩ ꨡꨯꨱꩀ ꨗꨆꨓꨯꨮꨩ ꨔꨭꩆ ꩒꩐꩒꩓꩞ ꨗꨆꨓꨯꨮꨩ ꨕꨘꩇ ꨨꨭꨩ ꨈꨵꨮꩃ ꨘꩆ ꨙꩌ ꨀꨕꩅ ꨝꨴꩃ ꨀꨝꨪꩍ ꨝꨶꨮꩊ ꨞꩇ ꨌꩌ ꨝꨴꩍꨟꨪꩆ ꨗꨪꩂ ꨔꨶꨮꩆ꩞ ꨙꩌ ꨀꨕꩅ ꨨꨭꨩ ꨣꨕꩀ ꨌꨰꩀ ꨛꨯꨩꩀ ꨨꨕꨮꩉ ꨕꨯꩌ ꨢꩃ ꨤꨝꩃ ꨧꨯꨱꩃ ꨤꨪꨠꩍ ꨆꨢꨩ ꨚꨆꩉ ꨟꨭꩀꨆꨬ ꨧꨯꨱꩃ ꨨꨓꨰ ꨛꨯꨩꩀ ꨎꨩ ꨌꨯꨱꩃ ꨗꨈꩉ ꨈꨪꨙꨮꩃ ꨝꨶꨮꩊ ꨧꨳꩌ꩝ ꨨꨎꩆ ꨀꨊꨪꩆ ꨈꨮꩇ ꨧꨳꩌ꩝ ꨨꨭꨩ ꨨꨤꨪꩌ꩝ ꨚꨴꨲꩆ ꨢꨥꨩ ꨧꨤꩌ꩝ ꨟꨋꨥꨯꩌ ꨓꨟꨮꩃ꩞ ꨙꩌ ꨀꨕꩅ ꨨꨭꨩ ꨚꨣꨤꨯꨩ ꨕꨤꩌ ꩓ ꨨꨣꨬ꩞ ꨨꨣꨬ ꨢꨧꨩ ꨆꨓꨯꨮꨩ ꨚꨕꨯꨱꩀ ꨀꨆꨯꨱꩀ ꨧꨯꨱꩃ ꨀꨕꩅ ꨣꨯꨱꩀ ꨀꨥ ꨇꩆ ꨛꨯꨮ ꨟꩃ ꨚꨤꨬ ꨤꨀꨩ꩝ ꨞꨭꩌ ꨜꨲꩄ ꨨꨩ꩝ ꨞꨭꩌ ꨚꨴꨯꨱꩃ ꨨꩌ ꨔꨶꨮꩆ ꨘꩌ ꨟꨰ ꨚꨤꨬ ꨌꩌ ꨨꨟꨭꨩ ꨓꨗꨴꩆ꩝ ꨞꨭꩌ ꨜꨲꩄ ꨨꨭꨩ꩝ ꨞꨭꩌ ꨚꨴꨯꨱꩃ ꨗꨪꩂ ꨜꨲꩄ꩞ ꨨꨣꨬ ꨢꨩ ꩒ ꨘꩆ ꨨꨣꨬ ꨨꨎꩅ ꨗꨆꨓꨯꨮꨩ ꨚꨣꨤꨯꨩ ꨕꨫ ꨕꨯꩌ ꨝꨪꨟꨯꩂ ꨨꨈꨴꨮꩌ ꨕꨯꩌ ꨀꨕꩅ: ꨀꨕꩅ ꨚꨮꩍ ꨡꨮꩃ ꨝꨪꨟꨯꩂ꩝ ꨀꨕꩅ ꨟꨗꨬ ꨣꨚꨝꨶꩀ ꨢꩃ꩝ ꨀꨕꩅ ꨌꨭꩀ ꨀꨥ ꨆꨩ ꨢꩃ ꨧꨯꨱꩃ ꨞꨩ ꨠꨨꨩ ꨋꩇ ꨀꨕꩅ ꨝꨪꨟꨯꩂ꩞ ꨀꨝꨪꩍ ꨆꨓꨯꨮꨩ ꨚꨤꨬ ꨢꨮꨩ ꨟꨰ ꨞꨩ ꨋꩇ ꨀꨕꩅ ꨢꩇ ꨟꨋꨥꨯꩌ꩞ ꨈꨪꨗꨶꨮꩉ ꨋꩇ ꨀꨕꩅ ꨞꨳꩆ ꨂꨣꩃ ꨚꨴꨯꨱꩃ ꨔꨭꩆ ꨀꨝꨪꩍ ꨕꨤꩌ ꨈꨮꩇ꩝ ꨟꨋꨥꨯꩌ꩝ ꨆꨤꨩ ꨡꨯꨱꩀ ꨈꨮꩌ ꨟꨋꨥꨯꩌ꩝ ꨈꨮꩇ ꨚꨢꩀ ꨟꨭꩀꨆꨬ꩞ ꨀꨝꨪꩍ ꨨꨕꨯꩌ ꨣꨩ ꨆꨥꨯꩌ ꨕꨤꩌ ꨟꨋꨥꨯꩌ ꨀꨝꨪꩍ ꨨꨭꨩ ꨡꨯꨱꩀ ꨓꨮꩊ꩝ ꨓꨚꩀ ꨀꨤꨋꨆꩉ ꨟꨭꩀꨆꨬ ꨚꨎꨳꨩ ꨚꨎꨳꨮꩃ ꨌꨰꩀ ꨨꨭꨩ ꨚꨴꨲꩆ ꨢꨥꨩ ꨟꨌꨰ꩝ ꨋꩇ ꨡꨮꩃ ꨤꨡꩃ꩞ ꨆꨓꨯꨮꨩ ꨤꨪꨎꩃ ꨘꩆ ꨝꨐꨶꨮꩉ ꨚꨓꨯꨱꩌ꩝ ꨚꨈꨮꩌ ꨕꨯꩌ ꨣꨩ ꨆꨥꨯꩌ ꨕꨤꩌ ꨟꨋꨥꨯꩌ꩝ ꨈꨮꩇ꩞ ꨓꨶꨬ ꨥꩀ ꨆꨴꨲꩆ ꨣꨩ ꨥꩀ ꨁꨇꩆ꩝ ꨟꩃ ꨚꨈꨯꨮꨩ ꨡꨯꨮꨩ ꨨꨣꨬ ꩑꩔/꩑꩐꩝ ꨕꨯꩌ ꨎꨤꩆ ꨝꨩ ꨓꨈꨯꩀ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ ꨓꨕꩉ ꨈꨪꨗꨪꩀ ꨝꨶꨮꩊ ꨞꩇ ꨌꩌ꩞ ꨕꨯꩌ ꨛꨯꨮ ꨔꩀ ꨝꨶꨮꩊ ꨞꩇ ꨌꩌ ꨝꨩ ꨗꨯꨱꩀ ꨥꨯꨱꩃ ꨣꨯꨱꩀ ꨀꨥ ꨇꩆ ꨛꨯꨮ ꨚꨓꨯꨱ ꨛꨯꨮ ꨆꨵꨯꨱꩃ ꨈꨣꨰ (ꨛꨯꨮ ꨚꨓꨯꨱ ꨨꨭꨩ ꨢꨯꨱꩌ ꨀꨜꨯꨱꨥ ꨆꨩ ꨝꨶꨮꩊ ꨞꩇ ꨌꩌ) ꨟꩃ ꨚꨤꨬ ꨓꨈꨯꩀ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ ꨧꨯꨱꩃ ꨝꨪꨟꨯꩂ ꨛꨯꨮ ꨣꨯꨟꨯꨮꨩ꩞ ꨨꨭꨕꨬ ꨗꨯꨱꩀ ꨥꨯꨱꩃ ꨘꩆ ꨨꨕꨯꩌ ꨆꨟꨬ ꨌꩌ ꨓꨟꨳꨩ ꨋꩇ ꨀꨕꩅ ꨔꨰꩀ ꨔꨯꨱꩀ꩞ ꨕꨯꩌ ꨆꨢꨩ ꨋꩇ ꨢꩃ ꨨꨎꩅ ꨕꨤꩌ ꨙꩌ ꨀꨕꩅ ꨆꨓꨯꨮꨩ ꨚꩀ ꨝꨪꨟꨯꩂ ꨟꨌꨩ ꨨꨈꨴꨮꩌ: ꩑ ꨝꨝꨯꩉ꩝ ꩓ ꨀꨗꩀ ꨟꨗꨭꩀ ꨌꨰꩀ ꨋꩇ ꨀꨕꩅ ꨧꨝꩍ ꨕꨤꩌ ꨝꨪꨟꨯꩂ꩝ ꩕ ꨧꨤꨯꨱ ꨧꨯꨱꩃ ꨚꨭꨝꨭꨩ ꨧꨯꨱꩃ ꨣꨤꨯꨱꨥ ꨚꨝꨰꩈ꩝ ꩑ ꨧꨤꨯꨱ ꨧꨯꨱꩃ ꨧꨣꨩ ꨤꨪꨋꨩ꩝ ꨥꨮꩀ ꩓ ꨔꨴꨭꩍ ꨓꨚꨬ ꨝꨴꩍ ꨧꨯꨱꩃ ꨀꨝꨯꨱꩍ ꨆꨢꨮꨭ꩞ ꨧꨤꨯꨓꨴꨩ꩝ ꨝꨶꨮꩊ ꨞꩇ ꨕꨯꨱꩀ ꨌꨈꨩ ꨥꨮꩀ ꨀꨤꩀ꩝ ꨀꨝꨯꨱꩍ꩝ ꨙꨳꨮꩇ ꨝꨭꨩ꩝ ꨨꨤꨩ ꨚꨗꩃ… ꨗꨫ ꨘꩆ ꨞꨩ ꨋꩇ ꨀꨕꩅ ꨚꨆꩉ ꨝꨩ ꨓꨈꨯꩀ ꨊꨯꨱꩀ ꨕꨯꩌ ꨝꨪꨟꨯꩂ ꨕꨯꨱꩀ ꨈꩍ ꨓꨆꨰ ꨝꨪꨟꨯꩂ ꨟꨌꨩ ꨘꩆ ꨣꨪꨓꨭꩍ ꨀꨓꨤꨰ ꨆꨣꨬ ꨕꨫ ꨈꨮꩇ ꨆꨢꨶꨩ ꨨꨕꨯꩌ ꨂꨣꩃ ꨨꨭꨩ ꨡꨯꨱꩀ ꨓꨚꩀ ꨌꨈꨩ꩞ ꨓꨶꨬ ꨠꨗꩅ꩝ ꨨꨕꨬ ꨓꨭꩀ ꨕꨯꩌ ꨛꨯꨮ ꨔꩀ ꨋꩇ ꨝꨵꨯꨱꩍ ꨞꨩ ꨈꨴꨭꩀ ꨐꨭꨩ꩝ ꨝꨶꨮꩊ ꨞꩇ ꨌꩌ ꨟꨌꨩ ꨝꨩ ꨨꨕꨯꩌ ꨆꨢꨩ ꨋꩇ ꨢꩃ ꨓꨈꨯꩀ ꨕꨯꩌ ꨝꨪꨟꨯꩂ ꨌꩌ ꨢꨮꨭ ꨛꨯꨮ ꨆꨵꨯꨱꩃ ꨈꨣꨰ꩝ ꨛꨯꨮ ꨁꨗꨩ ꨗꨈꩉ꩝ ꨛꨯꨮ ꨣꨯꨟꨯꨮꨩ ꩞ ꨕꨤꩌ ꨘꩆ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ ꨚꨓꨯꨱꩌ ꨆꨵꨪꩀ ꨝꨶꨮꩊ ꨞꩇ ꨧꨯꨱꩃ ꨓꨶꨰ ꨣꩍ ꨈꨴꨮꩇ ꨗꨈꩉ꩞ ꨝꨶꨮꩊ ꨞꩇ ꨌꩌ ꨚꨣꩃ ꨕꩀ ꨨꨕꨯꩌ ꨆꨢꨩ ꨋꩇ ꨢꩃ ꨌꨰꩀ ꨚꨢꩀ ꨟꨭꩀꨆꨬ꩝ ꨕꨯꩌ ꨛꨯꨮ ꨚꨓꨯꨱ꩝ ꨢꩃ ꨤꨝꩃ … ꨚꩀ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ꩞ ꨨꨕꨯꩌ ꨆꨢꨩ ꨋꩇ ꨢꩃ ꨈꩍ ꨀꨤꨩ ꨝꨪꨟꨯꩂ ꨓꨶꨬ ꨨꨓꨰ ꨢꩇ ꨟꨋꨥꨯꩌ ꨢꨮꨭ ꨤꨪꨧꨬ꩝ ꨣꨗꨮꩃ꩝ ꨀꨝꨯꨱꩍ ꨆꨢꨮꨭ꩝ ꨓꨚꨬ ꨆꨰꨥ… ꨈꩍ ꨓꨆꨰ ꨝꨪꨟꨯꩂ꩝ ꨘꩆ ꨤꨪꨝꨪꩀ ꨕꨯꩌ ꨟꨋꨥꨯꩌ ꨚꨡꨯꩍ ꨓꨳꩆ ꨛꨯꨩꩀ ꨎꨩ ꨧꨯꨱꩃ ꨆꨢꨩ ꨋꩇ ꨢꩃ ꨓꨶꨬ ꨨꨓꨰ ꨨꨈꨴꨮꩌ ꨨꨕꨯꩌ ꨀꨝꨯꨱꩍ ꨆꨢꨮꨭ ꨣꨙꨮꩇ ꨢꨮꨭ ꨓꨝꨭꨥ꩝ ꨌꨯꩌ ꨌꨯꩌ꩝ ꨕꨣꩃ꩝ ꨝꨮꩀ꩝ ꨆꨴꨶꨮꩄ ꨧꨯꨱꩃ ꨓꨆꨪꩀ ꨨꨤꨩ ꨚꨗꩃ꩞ ꨝꨶꨮꩊ ꨞꩇ ꨤꨪꨎꩃ ꨃꨥ ꨧꨯꨱꩃ ꨟꨗꨭꩀ꩝ ꨤꨪꨧꨬ꩝ ꨀꨳꨩ ꨨꨝꨰ꩝ ꨀꨝꨯꨱꩍ꩝ ꨧꨣꨩ꩝ ꨓꨚꨬ ꨆꨰꨥ꩞ ꨕꨯꩌ ꨠꨨꨩ ꨟꨋꨥꨯꩌ ꨨꨰ ꨚꨤꨬ ꨚꨤꨬ ꨞꨳꩆ ꨗꨯꨱ ꨧꨭꨈꨮꩇ꩝ ꨕꨯꨱꩀ ꨚꨣꩃ ꨕꩀ ꨆꨢꨩ ꨋꩇ ꨢꩃ ꨕꨫ ꨤꨪꨝꨪꩀ ꨓꨆꨰ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ꩞ ꨓꨭꩀ ꨥꩀ ꨋꩇ ꨀꨕꩅ ꨟꩃ ꨗꨶꨮꩄ ꩖ꨨ꩑꩑ꩍ꩞ ꨨꨕꨬ ꨓꨭꩀ ꨃꨥ ꨝꨵꨯꨱꩍ꩝ ꨝꨶꨮꩊ ꨞꩇ ꨟꨌꨩ ꨧꨯꨱꩃ ꨟꨋꨥꨯꩌ꩝ ꨧꨴꨯꨱꩀ ꨡꨮꩃ ꨟꨐꨭꩌ ꨨꨘꨌꩉ ꨚꩀ ꨓꨆꨰ ꨝꨪꨟꨯꩂ꩞ ꨈꨴꨭꨩ ꨙꨯꩂ ꨡꨩ꩝ ꨜꨯꨱꩀ ꨛꨯꨮ ꨕꨫ ꨈꨪꨗꨭꩌ ꨝꨳꨪ ꨔꩀ ꨌꩌ ꨝꨴꩍꨟꨪꩆ꩝ ꨈꨴꨭꨩ ꨝꨪꨟꨯꩂ ꨛꨯꨮ ꨆꨵꨯꨱꩃ ꨈꨣꨰ ꨛꨔꨮꨭ: ꨝꨶꨮꩊ ꨞꩇ ꨌꩌ ꨓꨭꨝꩅ ꨝꨴꩍꨟꨪꩆ ꨗꨈꩉ ꨗꨪꩆ ꨔꨶꩆ ꨀꨶꨮꩆ ꨣꨯꨱꩀ ꨗꨆꨓꨯꨮꨩ ꩒꩐꩒꩓ ꨓꨴꨬ ꨧꨪꩉ꩝ ꨝꨶꨬ ꨝꨰꩈ꩝ ꨆꨤꨪ ꨆꨤꨪꩍ꩞ ꨔꨭꩆ ꨟꨗꨪ ꨝꨶꨮꩊ ꨞꩇ ꨋꩇ ꨡꨮꩃ ꨝꨑꩀ ꨘꩆ ꨗꨆꨓꨯꨮꨩ ꨟꨌꨩ ꨚꨣꨤꨯꨩ ꨕꨤꩌ ꨀꩉ ꨔꩀ ꨓꨳꩀ ꨧꨟꩃ ꨡꨵꨶꩀ ꨕꨯꩌ ꨔꨭꩆ ꨕꨨꨵꨮꨭ꩞ ꨗꨆꨓꨯꨮꨩ ꨘꩆ ꨝꨐꨶꨮꩉ ꨌꨰꩀ ꨀꨗꩀ ꨓꨌꨯꨱꨥ ꨥꩀ ꨨꨕꨮꩉ ꨜꨶꨮꩊ ꨟꨭꩀꨆꨬ ꨨꨭꨩ ꨚꨎꨳꨩ ꨚꨎꨳꨮꩃ ꨆꨩ ꨚꨤꨬ ꨚꨤꨩ ꨦꨭꩀ ꨧꨳꩌ꩝ ꨓꨳꩇ ꨝꨤꨩ ꨇꨤꩆ꩞ ꨧꨯꨱꩃ ꨌꨯꨱꩃ ꨆꨩ ꨜꨭꩆ ꨚꨤꨩ꩝ ꨀꨗꩀ ꨀꨣꨯꨱꩃ ꨌꩀ ꨣꨯꩀ꩝ ꨨꨤꨪꩌ ꨧꨳꩌ꩞ ꨟꨗꨶꨪꩋ ꨚꨓꨯꨱꩌ꩝ ꨕꩌ ꨕꨣꨩ ꨎꨳꩀ ꨎꨳꨮꩃ ꨞꩉ ꨆꨎꩇ ꨆꨣꨯꨩ꩞ ꨈꨴꨭꨩ ꨚꨡꨯꩍ ꨓꨳꩆ ꨧꨆꩉ ꨆꨚꨶꨮꩊ꩝ ꨣꨎꨆꩉ ꨧꨯꨱꩃ ꨣꨎꨆꩉ ꨕꨯꩌ ꨚꩃꨆꩅ ꨨꨭꨩ ꨟꨯꨱꩃ ꨓꩊ ꨝꨭꩍ ꨋꩇ ꨧꨪꨓꨮꩌ ꨙꨳꨯꨮꩆ ꨎꨤꩆ ꨧꩃ ꨝꩄ ꨧꩃ ꨓꩌꨘꩀ꩝ ꨦꨘꩀ ꨚꨟꨎꨳꨮꩃ ꨣꨪꨝꨯꨱꩃ ꨕꨭꩍ ꨧꨳꩌ ꨋꩇ ꨓꨝꨳꩀ꩝ ꨚꨓꨈꨯꩀ ꨀꨣꨰ ꨨꨕꨳꨯꨮꩇ ꨗꨈꩉ ꨝꨶꨮꩊ ꨞꩇ ꨌꩌ꩞ ꨗꨆꨓꨯꨮꨩ ꨂꨣꩃ ꨌꩌ ꨗꨪꩂ ꨔꨶꨮꩆ ꨨꨭꨩ ꨣꨎꨆꩉ ꨝꨩ ꨓꨟꨩ ꨡꩇ ꨕꨴꨮꩇ ꨁꨤꨪꨟꨯꨩ ꨝꨪꩀꨧꩀ ꨗꨈꩉ꩞ ꨨꨣꨬ ꩒꩙/꩑꩑/꩒꩐꩒꩒꩝ ꨀꨆꨴꩍ ꨋꩇ ꨤꨮꩆ ꨂꨣꩃ ꨌꩌ ꨨꨭꨩ UNESCO ꨥꩀ ꨀꨋꩆ ꨓꨟꨩ ꨓꨚꨭꩀ ꨀꨋꩆ ꨕꨴꨮꩇ ꨁꨤꨪꨟꨯꨩ ꨝꨪꩀꨧꩀ ꨨꨝꩉ ꨨꨭꨩ ꨇꨪꩀ ꨙꨶꨮꩄ ꨥꨪꩅ ꨚꨟꨎꨳꨯꨮꩃ ꨦꨗꩃ ꨅꩅ ꨟꨗꨯꩅ ꨕꨤꩌ ꨆꨥꨯꩌ ꨝꨶꨮꩊ ꨞꩇ ꨚꨣꩆ ꨌꩌ꩞ ꨕꨤꩌ ꨝꨐꨶꨮꩉ ꨗꨫ꩝ ꨕꨯꩌ ꨧꨩꨁꨦꨗꩃ ꨚꩆ ꨀꨆꨯꨱꩀ ꨗꨈꩉ ꨗꨪꩆ ꨔꨶꩆ ꨟꨰ ꨨꨭꨩ ꨡꨯꨱꩀ ꨚꩀ ꨕꨯꩌ ꨝꨪꨟꨯꩂ ꨧꨯꨱꩃ ꨣꨥꨮꩃ ꨀꨤꨪ ꨌꩆ ꨕꨩ ꨕꨯꩌ ꨆꨈꨪꩀ ꨝꨴꩍꨟꨪꩆ꩝ ꨕꨯꩌ ꨟꨋꨥꨯꩌ ꨝꨶꨮꩊ ꨞꩇ ꨌꩌ ꨡꨵꨶꩀ ꨡꨯꩍ ꨕꨳꨪꩇ ꨚꩀ ꨀꨧꩉ꩞ ꨗꨆꨓꨯꨮꨩ ꨘꩆ ꨙꩌ ꨀꨕꩅ ꨚꨴꨯꨱꩃ ꨀꨝꨪꩍ ꨂꨣꩃ ꨌꩌ ꨝꨴꩍꨟꨪꩆ ꨟꨪꩆ ꨚꨎꨯꨱꩃ ꨟꨰ ꨈꨮꩌ ꨝꨶꨮꩊ ꨞꩇ ꨌꩌ ꨝꨗꨫ꩝ ꨝꨶꨮꩊ ꨞꩇ ꨌꩌ ꨀꨧꨤꩌ (ꨀꨧꨤꩌ ꨨꨎꩅ) ꨧꨯꨱꩃ ꨧꨫ ꨀꨝꨪꩍ ꨈꨴꨮꩇ ꨕꨴꨬ ꨕꨤꩌ ꨆꨥꨯꩌ ꨝꨶꨮꩊ ꨞꩇ ꨨꨭꨩ ꨡꨯꨱꩀ꩞ ꨆꨞꨩ ꨗꨫ ꨟꨕꨩ ꨚꨓꨈꨯꩀ ꨥꨮꩀ ꨟꨢꨭꩅ ꨚꨈꨭꩊ ꨚꨓꨯꨱꩌ ꨆꨴꨲꩍ ꨕꨯꩌ ꨚꨣꩆ꩝ ꨕꨯꩌ ꨀꨈꨠꨩ꩞