ꨅꩍ ꨤꩄ ꨨꨭꨩ ꨞꨳꩆ ꨁꨤꨪꨠꨯ ꨆꨣꨬ ꨆꨴꨪꩍ꩝ ꨂꨣꩃ ꨌꩌ ꨚꩀ ꨗꨈꩉ ꨗꨫꩆ ꨔꨶꩆ ꨆꨵꩀ – ꨇꨩꩆ ꨨꨯꨱ ꨎꩃ ꨨꨭꨩ ꨞꨳꩆ ꨡꩃ ꨟꨑꨭꩌ ꨟꨞꩀ꩝ ꨆꨣꨬ ꩞ ꨀꨤꨗꨫ ꨨꨵꩀ ꨤꨪꨆꨮꨭ ꨇꩆ ꨆꨩ ꨕꨯꩌ ꨎꨗꨫꩍ ꨆꨢꨩ ꨡꩃ ꨝꨪꨊꨪ꩝ ꨈꨪꩆꨣꨪꩀ ꨨꨭꨩ ꨀꨋꨶꨰ ꨢꨯꨱꩀ ꨨꨣꨬ ꨕꨤꩌ ꨥꩉ ꨡꩃ꩝ ꨨꨣꨬ ꨋꩀ ꨀꨕꩅ꩝ ꨣꨪꨎꨩ ꨕꨫ ꨂꨣꩃ ꨌꩌ ꨓꨶꩈ ꨎꨗꨫꩍ ꨓꨐꨫ ꨧꨯꨱꩃ ꨌꨤꨬ ꨀꨤ ꨗꨫ: – ꨀꩃꨆꨩ ꨧꨩ/ ꨡꩃ ꨟꨐꨭꩌ ꨕꨫ ꨂꨣꩃ ꨌꩌ ꨨꨭꨩ ꨣꨪꨤꨯꨩ ꨆꨢꨩ ꨡꩃ ꨝꨪꨊꨪ ꨢꨮꨩ ꨕꨯꩌ ꨚꨣꩆ ꨆꨣꨬ ꨨꨤꨬ ꨀꨢꨭꩅ? ꨟꨕꨩ ꨇꩆ ꨀꨋꩆ ꨆꨩ ꨇꨯꨱꩊ ꨕꨨꨵꩀ ꨔꨮꨭ ꨥꨮꩀ ꨨꨭ ꨤꨬ ? – ꨀꩃꨆꨩ ꨕꨶ/ ꨛꨯꨮ ꨨꨭꨩ꩞ ꨕꨯꩌ ꨆꨢ ꨡꩃ ꨟꩃꨆꨩꩆ ꨕꨫ ꨂꨣꩃ ꨌꩌ ꨇꨯꨱꩊ ꨕꨨꨵꩀ ꨨꨭꨩ ꨝꨳꩀ ꨣꨪꨤꨯꨩ ꨆꨢꨩ ꨡꩃ ꨝꨪꨊꨪ꩝ ꨂꨣꩀ ꨗꨫ ꨟꨫꩀꨥꨩ ꨕꨴꨬ ꨎꨮꩃ ꨕꨯꨱꩀ ꨋꩀ ꨚꨳꩍ ꨚꨠꨳꩀ ꨂꨣꩃ ꨓꨶꨰ ꨣꨘꩌ ꨟꨰ ꨧꩃ ꨟꨁꩆ – ꨀꩃꨆꨩ ꨆꨵꨮꨭ/ ꨕꩃ ꨕꨨꨵꨮꨭ ꨤꩄ ꨀꨳꨩ ꨝꨰ ꨓꨚꨭꩂ꩞ ꨆꨢꨩ ꨡꩃ ꨗꨫ ꨋꩀ ꨡꨶꩆ ꨧꨯꨱꩃ ꨆꨢꨩ ꨊꩀ ꨎꨮꩃ ꨕꨶꩍ ꨡꨶꩆ꩝ ꨨꨭꨩ ꨕꨯꩌ ꨎꨗꨫꩍ ꨒꩌ ꨢꨮꨩ: ꨒꩌ ꨨꨣꨭꩌ꩝ ꨒꩌ ꨤꩃ꩝ ꨒꩌ ꨑꨮꩅ ꨝꨯꨱꩍ ꨝꨫꩈꨮꩆ꩝ ꨓꨊꨳꨮꩈ ꨤꨯꨱꨥ꩝ ꨁꨆꩆ ꨢꨩ꩝ ꨀꨳꨩꨟꨪꩆꨋꨲꩄ…ꨟꨪꩆ ꨝꨳꩀ ꨝꨪꨊꨪ ꨧꨯꨱꩃ ꨤꨫꨘꨩꩈꨐꩍ ! – ꨀꩃꨆꨩ ꨚꩀ/ ꨕꨨꨵꩀ ꨎꩃ ꨡꨯꩍ ꨂꨣꩃ ꨌꩌ ꨝꨳꩀ ꨌꨴꨮꩍ ꨡꩃ ꨣꨪꨤꨯꨱꨥ ꨚꨝꨮꨓꨭꩀ ꨈꩌ ꨧꨯꨱꩃ ꨒꩌ ꨇꨳꨮꩌ ꨓꨭꩅ ꨀꨳꨩ ꨟꨦꨪꩆ ꨁꨆꩆ ꨋꨲꩄ – ꨀꩃꨆꨩ ꨤꨪꨟꨲꨩ/ ꨨꨭꨩ ꨔꨮꨭ꩝ ꨒꩌ ꨉꨳꨮꩌ ꨋꩀ ꨟꩃ ꨎꨗꨫꩍ ꨜꨭꩆ ꨚꨓꨬ ꨟꨕꨩ ꨧꨯꨱꩃ ꨒꩌ ꨆꨕꨭꩀ ꨤꨶꩀ ꨑꨮꨭꩀ ꨤꨬ ? – ꨀꩃꨆꨩ ꨘꩌ/ ꨑꨮꨭꩀ ꨚꨎꨮꨩ ꨀꨢꨭꩅ – ꨀꩃꨆꨩ ꨓꨎꨭꩍ/ ꨣꨪꨤꨯꨱꨥ ꨚꨝꨮ ꨎꨲꩃ ꨟꨕꨩ ꨋꩀ ꨀꨳꨩ ꨝꨰ ꨧꨯꨱꩃ ꨨꨤꨩ ꨟꨪꩆ ꨟꨕꨩ꩝ ꨝꨴꩍ ꨨꨘꨩ꩝ ꨂꨣꩃ ꨌꩌ ꨕꨨꨵꩀ ꨙꨯꩌ ꨤꩄ “ ꨀꨳꨩ ꨓꨗꨭꩅ ꨚꨝꨮ” ꨝꨳꩀ ꨝꨪꨊꨪ꩞ ꨆꨢꨩ ꨡꩃ ꨗꨫ ꨟꩃꨆꨩꩆ ꨓꨯꩀ ꨋꩀ ꨕꨤꩌ ꨕꨯꩌ ꨨꨣꨬ ꨋꩀ ꨢꩃ꩝ ꨋꩀ ꨀꨕꩅ꩞ ꨆꨢꨶꨩ ꨤꩄ ꨀꨳꨩ ꨓꨗꨭꩅ ꨝꨪꨊꨪ ꨢꨮꨭ ꨘꩆ ꨢꨮꨩ ꨨꨣꨬ ꨗꨫ ꨑꨮꨭꩀ ꨤꩄ ꨓꨶꨰ ꨣꨘꩌ ꨛꨯꨮ ꨧꩃ ꨟꩃ ꨋꩀ ꨚꨢꩀ ꨆꨩ ꨓꨶꨰ ꨕꨩꨟꨭꨩꨄ ꨡꩃ꩞ – ꨀꩃꨆꨩ ꨕꨩꨤꨫꨚꩉ/ ꨤꨪꨊꨪꨥ ꨣꨪꨤꨯꨱꨥ ꨚꨝꨮ ꨓꨝꨳꩀ꩝ ꨤꩄ ꨟꨗꨭꩀ ꨎꩃ ꨤꩄ ꨀꨗꨲꩀ ꨀꨔꨭꩉ ꨨꨭꨩ ꨟꨪꩀꨥꨩ ꨚꨙꩉ ꨣꨪꨤꨯ ꨕꨤꩌ ꨕꨯꩌ ꨆꨢꨩ ꨡꩃ ꨚꨳꩍ ꨋꩀ ꨢꩃ ꨧꨯꨱꩃ ꨋꩀ ꨡꩃ ꨢꨯꨱꩀ ꨨꨣꨬ꩞ ꨣꨪꨤꨯꨱꨥ ꨟꨗꨭꩀ ꨟꨫꩀꨥꨩ ꨟꨕꨩ ꨓꨭꩀ꩝ ꨟꨗꩀ ꨤꨫꨧꨬ ꩝ ꨋꩀ ꨀꨳꨩ ꨘꩃ ꨟꨗꨭꩀ…ꨀꨳꨩ ꨘꩃ ꨟꨗꨭꩀ ꨞꨳꩆ ꨋꩀ ꨟꩃ ꨒꩌ ꨤꩃ ꨧꨯꨱꩃ ꨜꨭꩆ ꨚꨵꩃ꩞ – ꨀꩃꨆꨩ ꨧꨤꨪꨚꩉ/ ꨣꨪꨤꨯꨱꨥ ꨤꨪꨟꨯꨱꨥ꩝ ꨣꨪꨤꨯꨱꨥ ꨆꨭ ꨝꨯꨱꨦꨯꨱ ꨧꨯꨱꩃ ꨚꨵꩃ꩝ ꨨꨤꨩ ꨤꨋꨬ ꨈꨵꨰ ꨤꩄ ꨆꨢꨩ ꨡꩃ ꨀꨝꨪꩍ ꨤꨫꨦꨬ ꨚꨓꨶꩈ ꨥꨮꩀ ꨕꨫ ꨂꨣꩃ ꨌꩌ ꨇꨯꨱꩊ ꨕꨨꨵꩀ ꨑꨮꩍ – ꨀꩃꨆꨩ ꨚꨵꨭꩍ / ꨕꨯꩌ ꨆꨢꨩ ꨡꩃ ꨝꨪꨊꨪ ꨥꨮꩀ ꨑꨮꨭꩀ ꨇꩆ ꨓꩊ ꨘꩆ ꨤꩄ ꨓꨆꨭꩍ ꨨꨟꨭꨩ ꨧꨯꨱ ꨔꨭꨩ – ꨀꩃꨆꨩ ꨚꨵꨭꩍ ꨧꨩ/ ꨓꨟꨲꨩ ꨝꨪꨤꩆ ꨨꨎꩆ ꨀꨓꨮꨭ ꨝꨪꨤꩆ ꨢꨶꩀ ꨚꨕꨰ ꨤꩄ ꨂꨣꩃ ꨆꨭꨟꨬ ꨚꨴꨯꨱꩃ ꨔꨭꩆ ꨌꩌ ꨟꨕꨩ ꨗꨯꨱ ꨛꨯꨩꩀ ꨢꨭꩀ ꨁꨆꩆ ꨓꨯꨱꩃ ꨟꨰ ꨇꨯꨱ ꨀꨓꨮꨭ ꨚꨙꩌ ꨟꨧꨪꩆ ꨝꨳꩀ ꨝꨪꨊꨪ꩞ ꨔꨬ ꨔꨬ ꨎꩃ ꨓꨆꨴꨲꨩ ꨡꩃ꩞ – ꨀꩃꨆꨩ ꨚꨵꨭꩍ ꨕꨶꨩ/ ꨁꨆꩆ ꨓꨯꨱꩃ ꨇꨯꨱ ꨑꨮꨭꩀ ꨡꩃ ꨈꩌ ꨧꨯꨱꩃ ꨕꨯꩌ ꨎꨗꨫꩍ ꨒꩌ ꨢꨮꨩ: ꨆꨕꨭꩀ ꨎꨳꨯꨮꩇ꩝ ꨆꨕꨭꩀ ꨚ-ꨅꩀ꩝ ꨆꨕꨭꩀ ꨝꨪꨀꩉ꩝ ꨆꨕꨭꩀ ꨗꨭꩃ꩝ ꨝꨯꨱꩍ ꨆꨴꨯꨱꩃ ꨔꨰꩀ…ꨡꩃ ꨈꩌ ꨧꨯꨱꩃ ꨤꨪꨧꨬ ꨚ-ꨙꨳꩀ ꨝꨳꩀ ꨝꨪꨊꨪ꩞ – ꨀꩃꨆꨩ ꨚꨵꨭꩍ ꨆꨵꨮꨭ/ ꨕꨤꩌ ꨕꨯꩌ ꨨꨣꨬ ꨣꨪꨎꨩ꩝ ꨨꨣꨬ ꨡꩃ ꨆꨓꨮ꩝ ꨙꩌ ꨤꨪꨇꩍ꩝ ꨙꩌ ꨌꨭꩍ …ꨂꨣꩃ ꨌꩌ ꨝꨳꩆ ꨋꩀ ꨀꨨꩉ ꨧꨆꨢꨩ ꨚꨳꩍ ꨋꩀ ꨢꩃ ꨧꨯꨱꩃ ꨚꨢꩀ ꨓꨶꨰ ꨕꨟꨶꩈ꩞ ꨀꨝꨪꩍ ꨕꨫ ꨐꨭꨩ ꨘꩆ ꨤꩄ꩝ ꨀꨨꩉ ꨓꨯꩀ ꨀꨊꨶꩈ ꨚꨳꩍ ꨚꨢꩀ ꨕꨯꩌ ꨂꨣꩃ ꨓꨶꨰ ꨣꨘꩌ꩝ ꨂꨣꩃ ꨨꨤꨮꨭ ꨎꨗꨲꩃ ꩝ ꨂꨣꩃ ꨚꨴꨯꨱꩃ ꨔꨭꩆ꩝ ꨂꨣꨗꨰꩍ ꨓꨆꨪꩀ ꨨꨭꨩ ꨧꨪ ꨡꩃ . – ꨀꩃꨆꨩ ꨚꨵꨭꩍ ꨚꩀ / ꨧꨩ ꨎꨗꨫꩍ ꨀꨨꩉ ꨕꨗꨲꩈ ꨀꨋꩆ ꨆꨣꨬ ꨕꨫ ꨂꨣꩃ ꨌꩌ ꨘꩆ ꨀꨨꩉ ꨈꨪꨣꨯꨱꩃ ꨤꨢꨩ꩞ ꨕꨯꩌ ꨂꨣꩃ ꨆꨭꨟꨬ ꨌꩌ ꨗꨰꩍ ꨎꨯꨱꩈꨇꨮꩍ ꨓꨊꨪꩆ ꨡꨮꩀ ꨓꨚꨭꩂ ꨙꨯꨮꩇ꩝ ꨧꨣꨕꩃ꩝ ꨝꨯꨱꩍ ꨧꨯꨱꩃ ꨓꨚꨰ ꨀꨤꩀ ꩞ ꨨꨕꨬ ꨘꩆ ꩝ ꨡꨮꩀ ꨀꨨꩉ ꨎꩃꨔꨯꨱꩅ ꨝꨪꨊꨭ ꨀꨆꨯꨱꩀ ꨤꨢꨩ ꨓꨶꩈ ꨀꨆꨯꨱꩀ ꨧꩍꨗꩃ ꨕꨫ ꨆꨣꨬ ꨕꨴꨬ꩞ ꨕꨯꩌ ꨂꨣꩃ ꨘꩆ ꨣꨳꩀ ꨟꨐꨲꩀ ꨆꨩ ꨚꨙꨳꩀ ꩝ ꨚꨤꨯꨱ ꨀꨨꩉ ꨟꨲꩃ ꨤꨫꨟꨲꨩ ꨓꩊ ꨘꩌ ꨟꨫꨗꨫꩅ ꨤꩄ ꨨꨭꨩ ꨕꨯꩌ ꨝꨯꨱꩍ ꨀꨨꩉ ꨈꨪ ꨣꨯꨱꩃꨤꨢꨩ ꨣꨌꩌ꩝ ꨚꨨꨮ ꨝꨪꨊꨪ꩞ ꨀꨨꩉ ꨤꨪꨟꨲꩆ ꨕꨫ ꨧꨣꨕꩃ꩝ ꨤꨫꨟꨲꩀ ꨕꨫ ꨀꨝꨯꨱꩍ ꨧꨯꨱꩃ ꨚꨨꨮ ꨕꨫ ꨤꨢꨩ꩞ ꨀꨨꩉ ꨗꨫ ꨨꨭꨩ ꨡꨯꩍ ꨕꨫ ꨕꨯꩌ ꨀꨕꩅ ꨋꩀ ꨢꩃ ꨕꨫ ꨂꨣꩃ ꨌꩌ꩝ ꨋꩀ ꨎꩃ ꨧꨩ ꨌꨘꩍ ꨁꨤꨪꨠꨯ ꨈꨵꨯꨱ ꨀꨆꨯꨱꩀ ꨕꨫ ꨝꨯꩊ ꨞꩇ꩞ – ꨀꩃꨆꨩ ꨚꨵꨭꩍ ꨤꨫꨟꨲꨩ / ꨎꨗꨫꩍ ꨚꨳꩍ ꨋꩀ ꨕꨯꩌ ꨆꨢꨩ ꨡꩃ ꨝꨵꨯꨱꩍ ꨀꨢꨭꩅ ꨇꩆ ꨨꨭꨩ ꨆꩆ ꨧꨪ ꨕꨶꩍ ꨨꨤꨬ ꨅꩍ? – ꨀꩃꨆꨩ ꨚꨵꨭꩍ ꨘꩌ / ꨡꨶꩆ ꨟꨪꩆ ꨀꨢꨭꩅ – ꨀꩃꨆꨩ ꨚꨵꨭꩍ ꨓꨎꨭꩍ / ꨙꨶ ꨆꨣꨭꩆ ( ꨖꩆ ꨜꨶꩆ ) ꨀꨢꨭꩅ ꨇꩆ ꨝꨴꨬ ꨔꨮꨭ