ꨀꨥ ꨎꨭꩀ ꨀꨥ ꨎꨥ ꨌꨘꩀ ꨡꨭꩀ ꨚꨴꨯꨱꩃ ꨌꨘꩀ ꨡꨭꩀ ꨀꨦꨪꩅ ꨓꨟꨩ ꨨꨟꨭꨩ ꨤꨔꨪꩅ ꨓꨝꨳꩀ ꨙꨯꨱꩃ ꨗꨰ ꨣꨡꩍ ꨤꨯꨩ ꨦꨄꨰ ꨕꨶꨪꩋ ꨤꨯꨩ ꨟꨪꩀ ꨔꨬ ꨤꨨꨪꩀ ꨔꨬ ꨨꨭꨩ ꨀꨥ ꨔꨭꨩ ꨀꨥ ꨓꨔꩍ ꨌꨘꩀ ꨡꨭꩀ ꨓꨤꨮꩍ ꨕꨫ ꨀꨣꨯꨱꩃ ꨀꨗꩀ ꨌꩌ ꩞ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨗꨫ꩝ ꨟꨢꩍ ꨌꨰꩀ ꨓꨟꨩ ꨓꨭꩀ ꨔꨰꩀ ꨌꩌꨛꨩ ꨕꨫ ꨝꨘꩍ ꨓꨭꩀ ꨤꨶꨪꩄ ꨧꨯꨱꩃ ꨆꨥꨯꩌ ꨝꨶꨮꩊ ꨞꩇ ꨌꩌ ꨢꩌ ꨓꨚꨩ ꨀꨆꨯꨱꩀ ꨂꨧꨭꨠꩆ ꩑꩙꩝ ꨓꨶꨬ ꨕꨨꨵꩀ ꨘꩆ ꨧꨩ ꨝꨳꨮꩉ ꨝꨳꩀ ꨨꨰ ꨕꨆꨵꩆ꩞ ꨐꨭꨩ ꨅꨩ ꨕꨴꨮꩍ ꨧꨩ ꨝꨳꨮꩉ ꨡꨶꩍ ꨆꩉ ꨚꨴꩆ ꨓꨯꩀ꩝ ꨟꨪꩆ ꨨꨭꨩ ꨇꨪꩀ ꨚꨳꨮꩍ ꨕꨤꩌ ꨔꨰꩀ ꨤꨪꨊꨪꨥ ꨆꨖꨩ ꨣꨗꨰꩍ ꨀꨕꨯꨱꩍ ꨨꨗꨕꩉ ꨕꨚꨶꨮꩊ ꨆꨩ ꨈꨴꨭꩀ ꨌꨤꨶꨮꩆ꩝ ꨚꨙꨶꨮꩆ ꨧꨯꨱꩃ ꨝꨴꨰ ꨧꨩ ꨆꨥꨯꩌ ꨝꨶꨮꩊ ꨞꩇ꩞ ꨕꨨꨵꩀ ꨟꨌꨩ ꨚꨶꨮꩄ ꨐꨭꨩ ꨓꨶꨬ ꨕꩀ ꨓꨮꩊ꩝ ꨟꨪꩆ ꨥꩀ ꨟꩃ ꨀꨣꨩꩀ ꨢꨮꨭ ꨈꨗꨮꩇ ꨂꨣꩃ ꨀꨓꩊ ꨝꨵꨯꨱꩍ ꨀꨇꩆ ꨥꨮꩀ꩞ ꨝꨳꨮꩉ ꨚꨕꨯꨱꩀ ꨀꨆꨯꨱꩀ ꨟꩃ ꨨꨕꨯꩌ ꨓꨶꩀ ꨝꨳꩀ ꨂꨣꨰ ꨞꨳꩆ: ꨀꨥ ꨎꨭꩀ ꨀꨥ ꨎꨥ꩝ ꨝꨵꨯꨱꩍ ꨌꨘꩀ ꨡꨭꩀ ꨚꨴꨯꨱꩃ ꨌꨘꩀ ꨡꨭꩀ ꨀꨦꨪꩅ꩞ ꨕꨶꨩ ꨝꨘꩍ ꨥꩀ ꨀꨆꨯꨱꩀ ꨓꨪꨆꨩ ꨤꩄ ꨓꨮꩊ ꨆꨤꨫꩆ꩝ ꨚꨓꨯꨱ ꨝꨳꨩ ꨨꨰ ꨗꨈꩉ꩞ ꨐꨭꨩ ꨓꨯꩀ ꨝꨴꨬ ꨡꨯꩍ ꨟꨗꨶꨪꩋ: ꨀꨓꨞꨩ꩝ ꨡꨭꩀ꩝ ꨓꨨꨩ ꨟꨕꨩ꩝ ꨚꨴꨯꨱꩃ ꨀꨦꨪꩅ꩞ ꨝꨴꩃ ꨥꨮꩀ ꨢꨭꨥ ꨀꨥ ꨎꨭꩀ – ꨀꨥ ꨨꨎꨥ ꨧꨯꨱꩃ ꨌꨘꩀ ꨡꨭꩀ ꨚꨴꨯꨱꩃ – ꨌꨘꩀ ꨡꨭꩀ ꨀꨦꨪꩅ ꨨꨭꨩ ꨕꨘꩀ ꨚꨏꨭꩌ ꨕꨶꨩ ꨝꨳꩀ ꨕꨴꨮꩍ ꨆꨖꨩ ꨣꨗꨰꩍ ꨀꨕꨯꨱꩍ꩝ ꨟꨪꩆ ꨕꨨꨵꩀ ꨦꨗꩃ ꨇꨯꨱꩊ ꨐꨭꨩ ꨅꨩ ꨓꨯꩀ ꨨꨭꨩ ꨆꨓꨶꨮꩊ ꨚꨟꨎꨳꨯꨮꩃ ꨌꩃꨥꩍ꩞ ꨇꨯꨱꩊ ꨐꨭꨩ ꨣꨰꩍ ꨧꨩ ꨕꨚꨶꨮꩊ꩝ ꨧꨩ ꨆꨥꨯꩌ ꨝꨶꨮꩊ ꨞꩇ ꨨꨈꨴꨮꩌ ꨣꨤꨯꨩ ꨕꨴꨬ ꨆꨣꨬ ꨕꨫ ꨈꨮꩇ꩞ ꨅꨩ ꨒꨮꩇ ꨧꨩ ꨂꨣꩃ ꨌꩌ ꨕꨯꨱꩀ ꨀꨇꩆ ꨆꨖꨩ꩝ ꨟꨪꩆ ꨂꨣꩃ ꨗꨫ꩝ ꨂꨣꩃ ꨕꨯꨮꩍ꩝ ꨓꨨꨩ ꨟꨕꨩ꩝ ꨚꨴꨯꨱꩃ ꨀꨦꨪꩅ꩝ ꨈꨮꩌ ꨧꨩ ꨗꨯꨱꩀ ꨂꨣꩃ꩞ ꨨꨘꨌꩉ ꨟꩃ ꨀꨆꨯꨱꩀ ꨆꨖꨩ ꨀꨕꨯꨱꩍ ꨨꨭꨩ ꨚꨟꨎꨳꨯꨮꩃ ꨈꨗꨮꩍ ꨧꨩ ꨆꨥꨯꩌ ꨝꨶꨮꩊ ꨞꩇ ꨕꨯꨱꩀ ꨌꨳꨪꩇ ꨝꨪꨤꨪꩀ ꨓꨟꨩ ꨧꨩ ꨀꨈꨥ ꨦꨤꨪꩍ ꨧꨭꨈꨮꩇ꩞ ꨝꨘꩍ ꨥꩀ ꨝꨴꩃ ꨀꨝꨪꩍ ꨕꨫ ꨈꩍ ꨧꩀꨆꨣꩈ ꨘꩆ ꨓꨟꨩ ꨨꨟꨭꨩ ꨤꨔꨪꩅ ꨓꨝꨳꩀ ꨙꨯꨱꩃ ꨗꨰ꩞ ꨗꨫ꩝ ꨓꨶꨬ ꨕꨨꨵꩀ꩝ ꨘꩆ ꨝꨘꩍ ꨥꩀ ꨆꨮꩇ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨓꨟꨩ ꨀꨔꨶꨩ ꨧꩀꨆꨣꩈ ꨝꨳꩀ꩞ ꨟꨢꩍ ꨗꨫ ꨘꩆ ꨧꨩ ꨨꨗꨕꩉ ꨨꨭꨩ ꨎꨳꨮꩃ ꨓꨝꨳꩀ ꨕꨤꩌ ꨨꨰ ꨨꨕꨬ ꨘꩀꨧꩅꨓꨴꩀ ꨤꨶꨪꩄ ꨌꩌꨛꨩ꩝ ꨢꨮꨩ ꨆꨆꨭꩅ ꨗꨫ ꨝꨳꩀ ꨨꨭꨩ ꨀꩉꨖꩉ꩞ ꨗꨈꩉ ꨗꨴꩃ – ꨚꨣꨪꩀ – ꨤꨪꨔꨪꩅ ꨆꩊ ꨘꩆ ꨀꨔꨶꨩ ꨒꩀ ꨐꨭꩌ ꨝꨴꩃ ꨞꨩ ꨓꨗꩍ ꨣꨪꨢꨩ ꨌꩌꨛꨩ ꨕꨯꨱꩀ ꨥꨮꩀ ꨈꩍ ꨟꨣꨯꨱꩃ꩝ ꨚꨈꨮꩇ ꨤꩄ ꨘꩀꨧꩅꨓꨴꩀ ꨚꩃꨕꨭꨣꩃꨈꨩ ꨕꨯꨱꩀ ꨎꨳꨮꩃ ꨀꨤꨩ ꨣꨤꨯꨩ ꨚꩃꨆꩅ ꨣꨎꨩ ꨆꨣꨬ ꨕꨫ ꨈꨮꩇ ꨨꨕꨬ ꨀꨈꨥ ꨦꨤꨪꩍ ꩑꩖꩙꩓꩞ ꨟꨪꩆ ꨓꨚꨩ ꨀꨆꨯꨱꩀ ꨂꨧꨭꨠꩆ ꩑꩙꩝ ꨕꨘꩀ ꨚꨯꨤꨪꨓꨪꩀ ꨆꨵꩀ ꨟꨕꨩ ꨨꨣꨬ ꨟꨕꨩ ꨚꨣꨕꩌ ꨆꨵꩀ꩝ ꨧꨯꨱꩃ ꨨꨕꨬ ꨕꨯꩌ ꨓꨎꨯꩅ ꨓꨓꨶꨮꩉ ꨚꨴꨯꨱꩃ꩝ ꨝꨴꩃ ꨀꨝꨪꩍ ꨘꩆ ꨎꨤꩆ ꨚꨓꨟꨩ ꨝꨓꨴꨭꩍ ꨀꨆꨯꨱꩀ ꨚꨵꨭꩍ ꨔꨭꩆ ꩑꩘꩓꩐꩝ ꨂꨣꩃ ꨌꩌ ꨅꨩ ꨕꨯꨱꩀ ꨕꨳꨪꩇ ꨕꨤꩌ ꨧꨩ ꨀꨝꨯꨱꩍ ꨝꨎꨳꨮꩃ ꨚꨯꨤꨪꨓꨪꩀ ꨌꩌꨛꨩ ꨢꨮꨭ ꨕꨨꨵꨮꨭ꩞ ꨕꨤꩌ ꨓꨭꩀ ꨔꨰꩀ ꨘꩆ꩝ ꨝꨘꩍ ꨥꩀ “ꨓꨟꨩ ꨤꨪꨔꨪꩅ – ꨓꨝꨳꩀ ꨙꨯꨱꩃ ꨗꨰ” ꨚꨮꩃ ꨅꨩ ꨕꨴꨮꩍ ꨤꩃ ꨔꨰꩀ ꨧꨩ ꨀꨖꨶꨩ ꨞꨳꩆ꩞ ꨐꨭꨩ ꨕꨴꨮꩍ ꨧꨩ ꨀꨆꨭꩍ ꨚꨙꨶꨮꩆ꩞ ꨤꨪꨔꨪꩅ ꨘꩆ ꨀꨗꨪꩍ ꨗꨯꨱ ꨈꩆ꩝ ꨕꨢꩃ꩝ ꨨꨰ ꨀꨗꨪꩍ ꨚꨓꨯꨱꩌ; ꨙꨯꨱꩃ ꨗꨰ ꨙꨪꩍ ꨀꨓꩍ ꨡꨵꨶꩀ ꨈꩍ ꨟꨣꨯꨱꩃ꩞ ꨓꨭꩀ ꨧꨩ ꨝꨳꨮꩉ ꨝꨶꨮꩊ ꨚꨣꩆ ꨚꨈꨮꩌ ꨕꨶꨩ ꨆꨆꨭꩅ ꨗꨫ ꨥꨮꩀ ꨧꨯꨱꩃ ꨈꨮꩇ꩝ ꨐꨭꨩ ꨨꨭꨩ ꨝꨴꨬ ꨡꨯꩍ ꨗꩌ ꨕꨮꩉ ꨈꨴꨭꩀ ꨂꨣꩃ ꨌꩌ ꨎꨴꨭꩍ ꨖꨪꩅ ꨞꨭꩌ ꨚꨤꨬ ꨆꨵꩀ ꨧꨯꨱꩃ ꨚꨝꨴꨰ ꨓꨟꨩ ꨨꨕꨯꩌ ꨗꨈꩉ ꨆꨣꨬ꩞ ꨆꨞꨩ ꨝꨴꩃ ꨘꩆ ꨕꨨꨵꩀ ꨟꨌꨩ ꨅꨩ ꨚꨤꨰꩀ ꨚꨤꨮꩌ ꨓꨯꩀ ꨟꩃ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨤꩄ ꨗꨫ ꨘꩆ ꨧꨩ ꨚꨕꨮꩃ ꨈꩌ ꨆꨓꨮꩀ ꨚꨙꨶꨮꩆ ꨝꨶꨮꩊ ꨓꨘꩅ ꨣꨬ ꨅꨩ꩞ ꨆꨳꨮꩃ ꨚꨤꨰꩀ ꨚꨤꨮꩌ ꨢꨮꨭ ꨘꩆ ꨨꨝꩉ ꨚꨈꨮꩇ ꨥꨮꩀ ꨧꨯꨱꩃ ꨨꨤꨮꨭ ꨧꩀꨆꨣꩈ꩝ ꨆꨖꨩ ꨚꨤꨬ ꨧꨯꨱꩃ ꨚꨗꨶꨮꩄ ꨌꨰꩀ ꨥꨮꩀ ꨢꩇ ꨆꨥꨯꩌ ꨝꨶꨮꩊ ꨞꩇ꩞ ꨟꨪꩆ ꨀꨳꨮꩀ ꨀꨝꨪꩍ ꨡꨯꩂ ꨆꨖꨩ ꨀꨕꨯꨱꩍ꩝ ꨈꨗꨮꩇ ꨚꨶꨮꩄ “ꨗꨯꨱꩀ ꨂꨣꩃ ꨌꩌ ꨨꨝꩉ ꨚꨙꨶꨮꩆ ꨕꨤꩌ ꨓꨔꨶꨪꩀ ꨣꨡꩍ ꨣꨡꨲꩇ” ꨘꩆ ꨝꨳꩀ ꨇꨮꩃ꩞ ꨨꨕꨬ ꨆꨆꨭꩅ ꨝꨪꨣꨭꨥ ꨟꩃ ꨘꩆ ꨧꨭꨧꩍ: ꨣꨡꩍ ꨤꨯꨩ ꨦꨄꨰ ꨕꨶꨪꩋ ꨤꨯꨩ ꨟꨪꩀ꩞ ꨕꨗꨯꨱꩍ ꨕꨙꩌ ꨝꨳꨮꩉ ꨝꨳꩀ ꨨꨰ ꨕꨆꨵꩆ: ꨀꨓꨞꨩ → ꨡꨭꩀ → ꨓꨈꨯꩀ ꨎꨤꩆ → ꨆꨆꨭꩅ → ꨣꨡꩍ ꨚꨙꨪꩀ꩞ ꨘꩆ ꨝꨳꨮꩉ ꨅꨩ ꨙꨯꩌ “ꨇꨯꨱꩊ ꨕꨨꨵꩀ ꨣꨡꩍ” ꨕꨨꨵꨮꨭ꩞ ꨐꨭꨩ ꨌꨰꩀ ꨂꨣꩃ ꨚꨮꩃ ꨡꨯꩍ ꨗꨯꨱꩀ ꨂꨣꩃ꩝ ꨡꨯꩍ ꨇꨯꨱꩊ ꨐꨭꨩ ꨓꨈꨯꩀ ꨎꨤꩆ꩝ ꨝꨵꨯꨱꩍ ꨝꨪꨣꨭꨥ ꨨꨯꨱꩀ ꨓꨝꨳꩀ: ꨣꨡꩍ ꨤꨯꨩ ꨦꨄꨰ ꨕꨶꨪꩋ ꨤꨯꨩ ꨟꨪꩀ꩞꩞ ꨗꨫ ꨘꩆ ꨈꨗꨮꩇ ꨀꨇꩆ ꨝꨳꩀ ꨝꨶꨮꩊ ꨚꨣꩆ꩞ ꨅꨩ ꨙꨯꩌ ꨧꨝꨯꨱꩇ ꨣꨤꨯꨩ꩞ ꨈꨴꨭꩀ ꨣꨡꩍ ꨣꨡꨲꩇ ꨙꨪꩍ ꨕꨤꩌ ꨚꨕꨮꩃ ꨀꨖꨶꨩ ꨎꨤꩆ꩞ ꨧꨯꨱꩃ ꨈꨗꨮꩇ ꨃꨥ ꨦꨄꨰ – ꨥꨩ ꨤꨪꨎꩃ ꨝꨳꩀ ꨝꨴꩃ꩞ ꨐꨭꨩ ꨥꨮꩀ ꨝꨴꨬ ꨡꨯꩍ ꨗꨫ ꨅꨩ ꨒꨮꩇ ꨆꨖꨩ ꨏꩀ ꨧꨩ ꨚꨴꩆ꩞ ꨂꨣꩃ ꨀꨕꨯꨱꩍ ꨕꨯꨱꩀ ꨃꨥ ꨨꨕꨯꩌ ꨣꨩ ꨆꨥꨯꩌ ꨚꨆꩆ ꨕꨤꩌ ꨆꨥꨯꩌ ꨝꨶꨮꩊ ꨞꩇ: ꨦꨄꨰ ꨣꨡꩍ꩝ ꨥꨩ ꨕꨶꨪꩋꨦꩀ꩞ ꨀꨝꨪꩍ ꨆꨥꨯꩌ ꨝꨶꨮꩊ ꨞꩇ ꨟꨯꨱꩃ ꨈꨮꩇ ꨕꨤꩌ ꨔꨰꩀ ꨣꨡꩍ ꨣꨡꨲꩇ꩞ ꨝꨘꩍ ꨥꩀ “ꨔꨬ ꨤꨨꨪꩀ ꨔꨬ ꨨꨭꨩ” ꨘꩆ ꨝꨘꩍ ꨥꩀ ꨓꨴꩀ ꨀꨝꨪꩍ ꨝꨳꨮꩉ꩞ ꨗꨫ ꨘꩆ ꨧꨩ ꨝꨘꩍ ꨥꩀ ꨒꩀ ꨐꨭꩌ ꨚꨗꨰ ꨚꨗꨰꩂ꩞ ꨅꨩ ꨒꨮꩇ “ꨨꨭꨩ ꨟꨗꨶꨪꩋ ꨟꨓꨰ”꩝ ꨟꨪꩆ “ꨔꨬ ꨤꨨꨪꩀ ꨔꨬ ꨨꨭꨩ”꩞ ꨕꨘꩀ ꨗꨫ ꨚꨟꨎꨳꨯꨮꩃ ꨈꨗꨮꩍ ꨣꨞꨩ ꨓꨝꨳꩀ꩞ ꨂꨣꩃ “ꨤꨪꨨꨪꩀ” ꨨꨭꨩ ꨈꨟꨴꨭꨩ ꨕꨫ ꨣꨤꨯꨩ ꨓꨮꩊ: ꨨꨭꨩ ꨟꨗꨶꨪꩋ ꨟꨓꨰ ꨊꨯꨱꩀ ꨎꨤꩆ꩝ ꨨꨭꨩ ꨟꨗꨶꨪꩋ ꨟꨓꨰ ꨆꨢꨶꨩ ꨆꨤꨫꩆ꩝ ꨇꨤꩆ ꨨꨰ ꨤꨚꨩ ꨣꨡꩍ꩝ ꨨꨭꨩ ꨂꨣꩃ ꨤꨨꨪꩀ꩝ ꨨꨭꨩ ꨂꨣꩃ ꨕꨯꨱꩀ ꨥꨮꩀ꩝ ꨨꨭꨩ ꨂꨣꩃ ꨌꨳꨪꩇ ꨗꩍ ꨖꨪꩅ ꨆꨥꨯꩌ ꨝꨶꨮꩊ ꨞꩇ꩝ ꨧꨯꨱꩃ ꨚꨴꨯꨱꩃ ꨥꨮꩀ ꨓꨴꨩ꩝ ꨨꨭꨩ ꨨꨕꨯꩌ ꨂꨣꩃ ꨤꨨꨪꩀ ꨖꨪꩅ ꨕꨫ ꨤꨯꩀ ꨆꨵꩀ ꨇꨯꨱꩊ ꨐꨭꨩ ꨆꩊ ꨕꨯꨱꩀ ꨕꨫ ꨘꩆ꩞ ꨌꨰꩀ ꨓꨟꨩ ꨘꩀꨧꩅꨓꨴꩀ ꨤꨶꨪꩄ ꨌꩌꨛꨩ꩝ ꨝꨘꩍ ꨥꩀ ꨗꨫ ꨕꨯꨱꩀ ꨨꨭꨩ ꨝꨩ ꨧꨩ ꨓꨮꩊ ꨀꩉ ꨚꨴꨯꨱꩃ ꨡꨵꨶꩀ ꨚꨴꩆ꩞ ꨓꨭꩀ ꨧꨩ ꨗꨈꩉ꩝ ꨧꨩ ꨕꨘꩀ ꨚꨯꨤꨪꨓꨪꩀ ꨧꨯꨱꩃ ꨧꨩ ꨤꨯꩀ ꨞꩇ ꨚꨣꩆ ꨝꨴꨰ꩝ ꨢꨮꨩ “ꨔꨬ ꨤꨨꨪꩀ ꨔꨬ ꨨꨭꨩ” ꨅꨩ ꨘꩆ ꨓꨯꩀ ꨕꩀ ꨢꩇ ꨂꨣꩃ ꨕꨳꨪꩇ ꨧꨯꨱꩃ ꨟꨗꨶꨪꩋ ꨟꨓꨰ꩞ ꨐꨭꨩ ꨘꩆ ꨈꨗꨮꩍ ꨧꨩ ꨣꨰ ꨣꩀ ꨟꨯꨱꩃ ꨥꨮꩀ ꨧꨯꨱꩃ ꨡꨯꩍ ꨌꩌꨗꨭꩌ ꨅꨩ ꨕꨯꨱꩀ ꨓꨮꩊ꩝ ꨚꨤꨬ ꨚꨤꨩ ꨅꨩ ꨕꨯꨱꩀ ꨢꨮꨭ ꨕꨨꨵꨮꨭ꩝ ꨨꨭꨩ ꨂꨣꩃ ꨗꨯꨱ ꨟꨪꩆ ꨅꨩ ꨟꨰ ꨈꨤꩄ꩞ ꨈꩌ ꨟꨰ ꨘꩆ “ꨥ ꨔꨭꨩ ꨀꨥ ꨓꨔꩍ”꩝ ꨧꨩ ꨝꨵꩍ ꨔꨰꩀ ꨡꨶꨮꩆ ꨟꨪꩆ ꨟꨕꨥꩊ꩞ ꨕꨨꨵꩀ ꨤꩄ ꨝꨘꩍ ꨥꩀ ꨗꨫ ꨝꨴꩃ ꨥꨮꩀ ꨧꨳꩌ ꨆꨢꨶꨩ ꨐꨭꨩ ꨅꨩ ꨨꨝꩉ ꨤꩃ ꨢꩍ꩞ ꨀꨥ ꨓꨔꩍ ꨘꩆ ꨨꨎꩆ꩝ ꨤꨶꨰ ꨆꨴꨯꨱꩃ꩝ ꨀꨳꨩ ꨟꨓꨩ꩝ ꨀꨖꨶꨩ ꨎꨤꩆ ꨀꨓꩍ ꨅꨩ ꨨꨭꨩ ꨓꨮꩃ꩞ ꨀꨥ ꨔꨭꨩ ꨘꩆ ꨨꨕꨯꩌ ꨂꨣꩃ ꨓꨪꨆꨩ ꨒꨯꨱꩀ꩝ ꨨꨭꨩ ꨔꨭꨩ ꨥꨮꩀ꩝ ꨨꨰ ꨈꨴꨭꩀ ꨓꨝꨵꩀ ꨆꨴꨲꩍ ꨨꨕꨯꩌ ꨓꨔꨶꨪꩀ ꨆꨣꨬ ꨕꨫ ꨈꨮꩇ ꨕꨤꩌ ꨗꨯꨱꩀ ꨂꨣꩃ꩞ ꨟꨪꩆ ꨓꨭꩀ ꨌꨰꩀ ꨓꨆꨪ ꨝꨘꩍ ꨥꩀ ꨕꨨꨵꨮꨭ – ꨔꨬ ꨨꨭꨩ꩝ ꨔꨬ ꨤꨨꨪꩀ ꨝꨵꨯꨱꩍ ꨀꨥ ꨓꨔꩍ꩝ ꨀꨥ ꨔꨭꨩ – ꨐꨭꨩ ꨎꩆ ꨓꨝꨳꩀ ꨧꨩ ꨈꨴꨭꩀ ꨆꨣꨬ ꨓꨈꩉ ꨤꨪꨀꩆ꩞ ꨟꨗꨶꨪꩋ ꨌꨳꨪꩇ ꨣꨞꨩ ꨎꨳꨮꩃ ꨨꨭꨩ – ꨤꨪꨨꨪꩀ꩝ ꨓꨔꩍ – ꨔꨭꨩ꩞ ꨨꨕꨯꩌ ꨢꨭꨥ ꨓꨈꨮꩉ ꨗꨫ ꨋꩇ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨕꨴꨮꩍ ꨢꨮꨭ ꨨꨕꨯꩌ ꨀꨥꩆ ꨗꩌ ꨕꨮꩉ ꨌꨤꩍ ꨧꨩ ꨈꨴꨭꩀ ꨌꨤꨶꨮꩆ ꨚꨴꨯꨱꩃ꩞ ꨧꨯꨱꩃ ꨨꨰ ꨕꨆꨵꩆ ꨘꩆ ꨝꨳꨮꩉ ꨓꨤꩇ ꨝꨵꩍ ꨔꨰꩀ ꨀꨥ ꨕꨫ ꨤꨶꨪꩄ꩞ ꨀꨆꨯꨱꩀ ꨆꨖꨩ ꨘꩆ ꨀꨥ ꨎꨭꩀ꩝ ꨀꨥ ꨨꨎꨥ꩞ ꨨꨕꨬ ꨀꨖꨶꨩ ꨎꨤꩆ ꨧꨭꨧꩍ꩝ ꨐꨭꨩ ꨎꨳꨮꩃ ꨀꨥ ꨓꨔꩍ꩝ ꨀꨥ ꨔꨭꨩ꩞ ꨟꨗꨶꨪꩋ ꨚꨕꨯꨱꩀ ꨀꨆꨯꨱꩀ ꨟꩃ ꨝꨮꩉ ꨧꨯꨱꩃ ꨆꨣꨬ꩝ ꨟꨪꩆ ꨀꨈꨥ ꨦꨤꨪꩍ ꨧꩀꨆꨣꩈ ꨨꨭꨩ ꨚꨆꨣꨬ ꨈꨗꨮꩇ ꨟꨯꨱꩃ ꨇꨯꨱꩊ ꨐꨭꨩ: ꨂꨗꨪ ꨆꨞꨩ ꨟꨇꨮꩀ ꨅꨩ ꨕꨯꨱꩀ ꨘꩆ ꨟꨢꩍ ꨤꩄ ꨝꨮꩉ ꨨꨈꨰꩅ꩝ ꨟꨪꩆ ꨨꨭꨩ ꨓꨚꨩ ꨔꨴꨭꩍ ꨨꨈꨰꩅ ꨚꨎꨮꨩ꩞ ꨝꨘꩍ ꨥꩀ “ꨌꨘꩀ ꨡꨭꩀ ꨓꨤꨮꩍ” ꨘꩆ ꨧꨩ ꨀꨔꨰꩀ ꨝꨳꩀ ꨇꨮꩃ꩞ ꨟꨢꩍ ꨌꨘꩀ ꨡꨭꩀ ꨒꨮꩇ ꨘꩆ ꨝꨵꩍ ꨔꨰꩀ ꨌꨘꩀ ꨡꨭꩀ ꨓꨶꨬ ꨈꨗꨮꩇ ꨈꨟꨴꨭꨩ ꨢꨭꩅ꩝ ꨢꨮꨩ ꨗꨫ ꨙꨩ ꨘꩆ ꨧꨩ ꨕꨤꩌ ꨨꨕꨯꩌ ꨝꨘꩍ ꨥꩀ ꨝꨴꩃ ꨀꨝꨪꩍ꩞ ꨕꨫ ꨀꨆꨯꨱꩀ ꨆꨖꨩ: ꨌꨘꩀ ꨡꨭꩀ ꨚꨴꨯꨱꩃ꩝ ꨌꨘꩀ ꨡꨭꩀ ꨀꨦꨪꩅ – ꨡꨭꩀ ꨕꨯꨱꩀ ꨨꨭꨩ ꨌꨘꩀ ꨥꨮꩀ꩞ ꨓꨮꩊ ꨤꨶꨪꩄ: ꨌꨘꩀ ꨡꨭꩀ ꨓꨤꨮꩍ꩞ ꨆꨩ ꨕꨘꩀ ꨀꨣꨪꨢꨩ꩝ ꨗꨫ ꨢꨮꨭ ꨌꨴꩃ ꨧꨩ ꨕꨮꩉ: ꨌꨘꩀ ꨡꨭꩀ → ꨀꨖꨶꨩ ꨎꨤꩆ → ꨣꨡꩍ ꨚꨙꨪꩀ → ꨂꨣꩃ ꨤꨪꨨꨪꩀ → ꨡꨭꩀ ꨓꨤꨮꩍ꩞ ꨕꨨꨵꩀ ꨡꨯꩍ ꨝꨳꩀ ꨆꩆ ꨅꨩ ꨚꨶꨮꩄ ꨝꨵꩍ ꨔꨰꩀ ꨗꨫ ꨢꨮꨭ ꨧꨩ ꨈꨴꨭꩀ ꨚꨯꨱꩀ ꨓꨝꨳꩀ ꨎꨘꩇ ꨆꨵꩀ꩞ ꨌꨘꩀ ꨡꨭꩀ ꨘꩆ ꨝꨵꩍ ꨨꨭꨩ ꨚꨓꨯꨱꩌ꩝ ꨁꨆꩀ꩝ ꨚꨳꨮꩍ ꨥꨮꩀ꩞ ꨓꨤꨮꩍ ꨘꩆ ꨚꨯꨱꩀ ꨓꨝꨳꩀ꩞ ꨟꨢꩍ ꨤꩄ ꨗꨫ ꨘꩆ ꨓꨯꩀ ꨧꨩ ꨆꨣꨳꩀ ꨞꨳꩆ ꨕꨤꩌ ꨀꨣꨰ ꨨꨕꨳꨯꨮꩇ꩝ ꨌꨰꩀ ꨕꨤꩌ ꨀꨝꨪꩍ ꨡꨯꩂ ꨆꨖꨩ ꨀꨕꨯꨱꩍ꩝ ꨐꨭꨩ ꨨꨭꨩ ꨝꨩ ꨚꨴꨲꩆ ꨚꨟꨕꨮꩍ ꨝꨳꩀ ꨚꨴꨯꨱꩃ: ꨧꨩ ꨆꨥꨯꩌ ꨝꨶꨮꩊ ꨞꩇ ꨆꩊ ꨨꨭꨩ ꨚꨈꨮꩌ ꨟꨗꨪ ꨌꨳꨪꩇ ꨚꨯꨱꩀ ꨧꨯꨱꩃ ꨚꨝꨴꨰ꩞ ꨔꨬ ꨎꩃ ꨔꨮꨭ꩝ ꨗꨫ ꨘꩆ ꨈꨗꨮꩇ ꨚꨶꨮꩄ ꨀꨔꨰꩀ꩝ ꨝꨪꩀ ꨚꨤꨰꩀ ꨚꨤꨮꩌ ꨂꨣꩃ ꨌꨶꩀ ꨓꨟꨣꨮꩇ ꨆꨳꨮꩃ ꨀꨊꨶꨬ “ꨌꨘꩀ ꨡꨭꩀ” ꨢꨮꨭ ꨧꨩ ꨚꨗꨶꨮꩄ ꨕꨮꩇ ꨚꨯꨤꨪꨓꨪꩀ꩞ ꨆꨖꨩ ꨣꨗꨰꩍ ꨀꨕꨯꨱꩍ ꨞꨳꩆ ꨟꨆꩊ ꨡꨵꨶꩀ ꨣꨤꨯꨩ ꨚꨈꨮꩇ ꨧꨯꨱꩃ ꨈꨗꨮꩇ ꨤꩃ ꨢꩍ ꨇꨯꨱꩊ ꨁꨓꨩ꩝ ꨧꨯꨱꩃ ꨀꨔꨰꩀ ꨨꨭꨩ ꨂꨣꩃ ꨣꩈ ꨨꨕꨬ ꨀꨓꩀꨆꩆ ꨥꨮꩀ꩞ ꨟꨪꩆ ꨆꨢꨶꨩ ꨒꨮꩇ ꨘꩆ ꨐꨭꨩ ꨟꨕꨩ ꨍꨮꩍ: ꨝꨵꩍ ꨔꨰꩀ ꨚꨆꩉ ꨀꨦꨪꩅ ꨨꨭꨩ ꨎꨳꨮꩃ ꨀꨗꨪꩍ ꨗꩌ ꨕꨮꩉ ꨧꩀꨆꨣꩈ ꨕꨯꨱꩀ꩞ ꨝꨘꩍ ꨥꩀ ꨤꨶꨪꩄ ꨘꩆ ꨀꨗꩀ ꨆꨳꨯꨮꩉ: ꨕꨫ ꨀꨣꨯꨱꩃ ꨀꨗꩀ ꨌꩌ꩞ ꨟꨢꩍ ꨝꨳꨮꩉ ꨦꨤꨪꩍ ꨗꨫ ꨓꨜꨳꨩ ꨀꩉ꩝ ꨀꨝꨪꩍ ꨡꨯꩂ ꨝꨳꨮꩉ ꨢꨮꨭ ꨨꨭꨩ ꨓꨝꨵꨮꩀ ꨓꨈꩉ ꨕꨫ ꨝꨘꩍ ꨥꩀ ꨤꨶꨪꩄ꩞ ꨕꨴꨬ ꨝꨪꨣꨭꨥ ꨈꨟꨴꨭꨩ ꨤꩄ ꨨꨕꨯꩌ ꨝꨵꩍ ꨔꨰꩀ ꨕꨨꨵꨮꨭ ꨕꨯꨮꩍ – ꨀꨥ꩝ ꨡꨭꩀ꩝ ꨀꨖꨶꨩ ꨎꨤꩆ꩝ ꨤꨪꨔꨪꩅ꩝ ꨙꨯꨱꩃ ꨗꨰ꩝ ꨧꨭꨧꩍ꩝ ꨂꨣꩃ ꨨꨭꨩ ꨂꨣꩃ ꨤꨪꨨꨪꩀ – ꨎꩃ ꨅꨩ ꨒꨮꩇ ꨨꨕꨯꩌ ꨝꨵꩍ ꨔꨰꩀ ꨌꨤꩍ ꨌꨤꨶꨮꩆ꩞ ꨀꨝꨪꩍ ꨕꨯꨱꩀ ꨌꨰꩀ ꨕꨫ ꨀꨣꨯꨱꩃ ꨀꨗꩀ ꨝꨶꨮꩊ ꨌꩌ꩞ ꨗꨫ ꨘꩆ ꨝꨵꩍ ꨔꨰꩀ ꨝꨳꩀ ꨇꨮꩃ꩞ ꨅꨩ ꨒꨮꩇ ꨊꨯꨱꩀ ꨝꨪꨣꨩ ꨧꨩ ꨛꨯꨮ ꨚꨓꨯꨱ꩝ ꨅꨩ ꨒꨮꩇ ꨊꨯꨱꩀ ꨝꨪꨣꨩ ꨧꨩ ꨞꩃ꩝ ꨅꨩ ꨒꨮꩇ ꨧꩀꨆꨣꩈ ꨨꨕꨯꩌ ꨂꨣꩃ ꨕꨤꩌ ꨧꩀꨆꨣꨰ꩝ ꨟꨪꩆ ꨀꨣꨯꨱꩃ ꨝꨶꨮꩊ꩞ ꨀꨣꨯꨱꩃ ꨘꩆ ꨀꨗꨪꩍ ꨀꨗꨯꨱꩃ꩞ ꨟꨢꩍ ꨚꨶꨮꩄ ꨀꨝꨪꩍ ꨝꨳꨮꩉ ꨓꨶꨬ ꨈꨗꨮꩇ ꨗꨫ꩝ ꨐꨭꨩ ꨨꨭꨩ ꨙꨯꩌ: ꨧꩀꨆꨣꩈ ꨨꨭꨩ ꨅꨩ ꨓꨯꩀ ꨨꨗꨯꨱꩍ ꨕꨤꩌ ꨆꨝꨰꩌ ꨨꨰ ꨊꨯꨱꩀ ꨡꨵꩃ ꨟꨧꨭꩍ꩞ ꨧꩀꨆꨣꩈ ꨨꨭꨩ ꨝꨩ ꨗꨯꨱ ꨊꨯꨱꩀ ꨀꨣꨯꨱꩃ ꨨꨕꨯꩌ ꨂꨣꩃ ꨌꩌ ꨞꨳꩆ꩞ ꨇꨯꨱꩊ ꨐꨭꨩ ꨝꨩ ꨀꨓꨞꨩ꩝ ꨡꨭꩀ ꨓꨊꨪ꩝ ꨟꨋꨥꨯꩌ꩝ ꨆꨢꨩ ꨎꨤꩆ꩝ ꨗꩌ ꨕꨮꩉ꩝ ꨂꨣꩃ ꨕꨳꨪꩇ꩝ ꨧꨯꨱꩃ ꨈꨮꩌ ꨈꨴꨭꩀ ꨤꨪꨨꨪꩀ꩞ ꨓꨶꨬ ꨕꨨꨵꩀ꩝ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨗꨫ ꨨꨭꨩ ꨈꨟꨴꨭꨩ ꨢꨮꨭ “ꨧꩀꨆꨣꩈ ꨟꩃ ꨈꩍ ꨀꨤꨩ”꩞ ꨗꨫ ꨘꩆ ꨆꨞꨩ ꨕꨨꨵꩀ ꨡꨯꩍ ꨝꨴꩃ ꨥꨮꩀ ꨀꨝꨪꩍ꩞ ꨧꩀꨆꨣꩈ ꨤꨶꨪꩄ ꨌꩌꨛꨩ ꨇꨯꨱꩊ ꨕꨴꨬ ꨞꨳꩆ ꨚꨶꨮꩄ ꨘꩆ ꨧꩀꨆꨣꩈ ꨚꨓꨯꨱ ꨝꨳꨩ ꨊꨳꨮꩆ꩝ ꨂꨣꨰ ꨊꨳꨮꩆ꩝ ꨣꨎꨆꩉ꩝ ꨡꨮꩃ ꨕꨮꩃ ꨓꨈꨯꩀ꩝ ꨚꨓꨟꨩ꩝ ꨆꨤꨫꩆ꩝ ꨕꨯꩌ ꨨꨣꩀ ꨚꨎꨭꩌ ꨝꨳꨪ ꨧꨯꨱꩃ ꨨꨕꩅ꩞ ꨟꨪꩆ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨗꨫ꩝ ꨟꨢꩍ ꨝꨳꩀ ꨇꨪꩀ ꨚꨳꨮꩍ ꨗꩌ ꨕꨮꩉ ꨟꩃ ꨘꩀꨧꩅꨓꨴꩀ ꨘꩆ ꨨꨰ ꨨꨗꨕꩉ ꨨꨕꨯꩌ ꨓꨎꨯꩅ ꨓꨓꨶꨮꩉ ꨚꨚꨯꨱꩍ ꨓꨮꩊ ꨐꨭꨩ꩝ ꨅꨩ ꨨꨕꨮꩉ ꨧꩀꨆꨣꩈ ꨢꨮꨭ ꨀꨋꩆ ꨚꨓꨯꨱ ꨧꨯꨱꩃ ꨘꩀꨧꩅꨓꨴꩀ꩞ ꨐꨭꨩ ꨨꨕꨮꩉ ꨢꨮꨭ ꨀꨥ ꨎꨭꩀ ꨀꨥ ꨨꨎꨥ꩝ ꨌꨘꩀ ꨡꨭꩀ ꨚꨴꨯꨱꩃ ꨌꨘꩀ ꨡꨭꩀ ꨀꨦꨪꩅ꩝ ꨤꨪꨔꨪꩅ ꨙꨯꨱꩃ ꨗꨰ꩝ ꨣꨡꩍ ꨣꨤꨯꨩ ꨕꨶꨪꩋ ꨣꨤꨯꨩ꩝ ꨔꨬ ꨨꨭꨩ ꨔꨬ ꨤꨪꨨꨪꩀ꩝ ꨀꨥ ꨓꨔꩍ ꨀꨥ ꨔꨭꨩ꩝ ꨌꨘꩀ ꨡꨭꩀ ꨓꨤꨮꩍ꩝ ꨕꨫ ꨀꨣꨯꨱꩃ ꨀꨗꩀ ꨝꨶꨮꩊ ꨌꩌ꩞ ꨘꩆ ꨈꨗꨮꩇ ꨗꩌ ꨕꨮꩉ ꨝꨶꨮꩊ ꨚꨣꩆ ꨇꨪꩀ ꨚꨳꨮꩍ ꨧꩀꨆꨣꩈ: ꨅꨩ ꨒꨮꩇ ꨀꨝꨪꩍ ꨤꩄ ꨇꨪꩀ ꨓꨆꨴꨭꩃ “ꨚꨆꩉ”꩝ ꨟꨪꩆ ꨇꨪꩀ ꨈꨗꨮꩍ ꨟꨗꨶꨪꩋ ꨨꨭꨩ ꨕꨳꨪꩇ ꨔꨴꨭꩍ ꨚꨆꩉ ꨘꩆ꩞ ꨟꨢꩍ ꨨꨝꩉ ꨆꨌꨥ ꨥꨮꩀ ꨝꨳꨮꩉ ꨆꨖꨩ ꨣꨗꨰꩍ ꨀꨕꨯꨱꩍ ꨕꨤꩌ ꨧꨩ ꨝꨘꩍ ꨥꩀ꩝ ꨕꨨꨵꩀ ꨟꨌꨩ ꨈꨟꨴꨭꨩ ꨐꨭꨩ ꨢꨮꨭ ꨗꨫ: ꨗꨫ ꨘꩆ ꨗꩌ ꨕꨮꩉ ꨝꨶꨮꩊ ꨚꨣꩆ ꨆꨩ ꨧꨩ ꨆꩊ ꨂꨣꩃ ꨌꩌ ꨨꨝꩉ ꨎꨴꨭꩍ ꨖꨪꩅ ꨞꨭꩌ ꨚꨤꨬ ꨆꨵꩀ꩝ ꨗꨯꨱ ꨈꩆ ꨤꨪꨔꨪꩅ ꨓꨚꩀ ꨙꨯꨱꩃ ꨗꨰ ꨕꨤꩌ ꨔꨰꩀ ꨌꨤꨶꨮꩆ꩝ ꨣꨡꩍ ꨣꨡꨲꩇ꩝ ꨨꨭꨩ ꨂꨣꩃ ꨨꨭꨩ ꨂꨣꩃ ꨤꨪꨨꨪꩀ; ꨝꨵꨯꨱꩍ ꨚꨓꨰꩀ꩝ ꨀꨝꨪꩍ ꨡꨯꩂ ꨓꨴꩀ ꨀꨈꨥ ꨦꨤꨪꩍ ꨧꩀꨆꨣꩈ ꨘꩆ ꨚꨌꨰꩀ ꨕꨫ ꨀꨣꨯꨱꩃ ꨨꨕꨯꩌ ꨟꨗꨶꨪꩋ ꨌꩌ ꨞꨳꩆ꩞ ꨧꨯꨱꩃ ꨝꨵꩍ ꨔꨰꩀ ꨕꨨꨵꩀ ꨡꨯꩍ ꨚꨙꨪꩀ ꨀꨝꨪꩍ ꨅꨩ ꨒꨮꩇ “ꨂꨣꩃ ꨨꨭꨩ ꨂꨣꩃ ꨤꨪꨨꨪꩀ”꩝ ꨟꨪꩆ ꨕꨘꩀ ꨟꩃ ꨌꨘꩀ ꨡꨭꩀ ꨚꨴꨯꨱꩃ꩝ ꨌꨘꩀ ꨡꨭꩀ ꨀꨦꨪꩅ ꨓꨮꩊ ꨌꨘꩀ ꨡꨭꩀ ꨓꨤꨮꩍ꩞ ꨆꨢꨶꨩ ꨟꨢꩍ ꨚꨶꨮꩄ ꨕꨤꩌ ꨨꨕꨩ ꨘꩀꨧꩅꨓꨴꩀ ꨤꨶꨪꩄ ꨌꩌꨛꨩ꩝ ꨐꨭꨩ ꨢꨮꨭ ꨚꨟꨕꨮꩍ ꨓꨈꨯꩀ ꨝꨵꩍ ꨔꨰꩀ ꨧꨩ ꨆꩊ ꨨꨭꨩ ꨌꨘꩀ ꨥꨮꩀ꩝ ꨚꨈꨮꩌ ꨥꨮꩀ꩝ ꨇꨪꩀ ꨎꨳꨮꩃ ꨧꨩ ꨆꨥꨯꩌ ꨝꨶꨮꩊ ꨞꩇ – ꨝꨵꨯꨱꩍ ꨌꨳꨪꩇ ꨓꨤꨮꩍ ꨓꨝꨳꩀ ꨆꨢꨶꨩ ꨧꩀꨆꨣꩈ꩞