ꨔꨬ ꨎꩃ ꨨꨭꨩ ꨗꨲꩌ ꨆꨴꨭꩃ ꨟꩃ ꨧꨪꩅ ꨕꨫ ꨕꨴꨬ꩞ ꨨꨭꨩ ꨂꨣꩃ ꨟꩃ ꨕꨯꨱꩀ ꨧꨪꩅ ꨨꨭꨩ ꨆꩀ ꨆꨎꩇ ꨧꨯꨱꩃ ꨗꨲꩌ ꨆꨴꨭꩃ꩝ ꨟꨕꨩ ꨤꩄ ꨕꨯꩌ ꨀꨗꨲꩀ ꨗꨰꩍ ꨞꨭꩌ ꨚꨤꨬ꩞ ꨀꨗꨲꩀ ꨗꨰꩍ ꨞꨭꩌ ꨌꨮꩀ ꨨꨭꨩ ꨗꨲꩌ ꨆꨴꨭꩃ ꨕꨫ ꨞꨭꩌ ꨌꨮꩀ꩝ ꨀꨗꨲꩀ ꨗꨰꩍ ꨞꨭꩌ ꨓꨧꨪꩀ꩝ ꨓꨗꨣꨩꩆ ꨨꨭꨩ ꨕꨯꩌ ꨗꨲꩌ ꨆꨴꨭꩃ ꨆꨣꨬ ꨕꨫ ꨞꨭꩌ ꨚꨤꨬ ꨕꨴꨬ꩞ ꨕꨨꨵꩀ ꨚꨓꨶꩍ ꨎꨟꨯꨱ ꨟꨗꨲꩀ ꨓꨝꨳꩀ ꨕꨫ ꨕꨶ ꨞꨭꩌ: ꨓꨧꨪꩀ ꨧꨯꨱꩃ ꨞꨭꩌ ꨓꨗꨣꨩꩆ꩝ ꨟꨪꩆ ꨆꩀ ꨆꨎꩇ ꨣꨪꨤꨯ ꨀꨝꨪꩍ ꨤꩄ ꨞꨭꩌ ꨓꨗꨣꨩꩆ꩝ ꨟꨫꩀꨥꨩ ꨤꨶꩄ ꨔꨭꩆ ꨆꩀ ꨆꨎꩇ ꨧꨯꨱꩃ ꨜꨭꩆ ꨚꨕꨰ꩝ ꨢꨮꨭ ꨘꩆ ꨢꨮꨩ ꩝ ꨌꨰꩀ ꨕꨤꩌ ꨨꨓꨰ ꨕꨤꩌ ꨀꨝꨪꩍ ꨕꨪ ꨕꨨꨵꩀ ꨟꨲꩃ ꨧꨪꩅ ꨓꩊ ꨚꨴꨯꨱꩃ ꨤꩄ ꨚꨨꨮꨩ ꨚꨕꨰ꩝ ꨕꨯꩌ ꨝꨪꨤꩆ ꨢꨶꩀ ꨆꨶꩀ꩞ ꨆꨖꨩ ꨥꩀ ꨨꨣꨬ ꨗꨫ ꨝꨯ ꨕꨨꨵꩀ ꨌꨯꨱꩃ ꨇꩆ ꨘꩆ ꨤꩄ ꨨꨕꩉ ꨥꨮꩀ ꨆꨩ ꨝꨪꨤꩆ ꨢꨶꩀ ꨔꨭꩆ ꩑꩙꩙꩐ ꨚꩀ ꨚꨤꨬ ꨕꨨꨵꩀ – ꨨꨟꨭꨩ ꨓꩆꨗꨴꩆ꩞ ꨕꨨꨵꩀ ꨂꨟꨭꩉ ꨔꨭꩆ ꨗꨫ ꨎꩃ ꨓꨚꨩ ꩔꩐ ꩝ ꨟꨪꩆ ꨕꨯꩌ ꨗꨲꩌ ꨆꨴꨭꩃ ꨟꨲꩃ ꨕꨯꨱꩀ ꨧꨪꩅ ꨆꩀ ꨆꨎꩇ ꨧꨯꨱꩃ ꨡꨵꩃ ꨚꨟꨭꨩ ꨚꨤꨬ ꨓꨭꩀ ꨨꨤꨬ ꨎꨲꩃꨕꨯꨱꩀ ꨕꨤꩌ ꨨꨓꨰ꩞ ꨢꨮꨭ ꨘꩆ ꨢꨮꨩ꩝ ꨑꨮꨭ ꩀꨓꩊ ꨝꨪꨤꩆ ꨢꨶꩀ ꨚꨕꨰ꩝ ꨨꨓꨰ ꨕꨨꨵꩀ ꨈꨪꨤꩄ ꨨꨕꩉ ꨥꨮꩀ꩞ ꨀꨝꨪꩍ ꨕꨫ ꨐꨭꨩ ꨘꩆ ꨤꩄ꩝ ꨝꨪꨤꩆ ꨚꨕꨰ ꨔꨭꩆ ꨗꨫ꩝ ꨟꨫꩀꨥꨩ ꨚꨤꨬ ꨌꩌ ꨕꨨꨵꩀ ꨚꨟꨭꨩ ꨓꩆꨗꨴꩆ ꨎꩃ ꨢꨮꨭ ꨝꨯꩊ ꨞꩇꨌꩌ ꨗꨈꩉ ꨗꨫꩆ ꨔꨶꩆ ꨆꨵꩀ ( ꨂꨣꩀ ꨗꨫ ꨤꩄ ꨇꨩꩆꨨꨯꨱ) ꨨꨭꨩ ꨟꨯꨱꩃ ꨤꩄ ꨞꨭꩌ ꨚꨤꨩ ꨧꨕꨰ ꨚꨴꨯꨱꩃ ꨀꨝꨪꩍ ꨨꨭꨩ ꨗꨯꨱ ꨓꨚꨩ ꨕꨯꩌ ꨡꩃ ꨨꨎꨩꩆ ꨚꨴꨯꨱꩃ꩝ ꨋꩀ ꨤꨪꨨꨪꩀ ꨢꨯꨱꩀ ꨣꨝꨮꨭ ꨨꨩ ꨚꨕꨰ꩞ ꨕꨯꩌ ꨁꨗꨲꩌ ꨨꨎꨭꩀ ꨕꨫ ꨀꨊꨯꨱꩀ ꨟꨓꨩ ꨝꨵꩃ ꨓꨈꨯꩀ ꨀꨳꨩ ꨡꨯꨱꩀ ꨈꨵꨰꩍ ꨈꩆ ꨕꨫ ꨕꨯꩌ ꨂꨣꩃ ꨋꩀ ꨨꨟꨭꨩꨚꨤꨬ ꨕꨨꨵꩀ ꨆꨢꨶꨩ ꨨꨕꨯꩌ ꨟꨤꩌ ꨤꨪꨨꨪꩀ ꨙꨪꩍ꩝ ꨧꨨꨟꨲꩃ꩞ ꨚꨧꩃ ꨡꨯꩍ ꨨꨓꨰ ꨚꨙꨪꩀ ꨨꨣꨯꨱ ꨕꨫ ꨂꨣꩃ ꨋꩀ ꨨꨟꨭꨩꨓꨚꩀ ꨓꨚꨯꨮ ꨚꨤꨬ ꨕꨨꨵꩀ꩝ ꨕꨯꩌ ꨗꨲꩌ ꨆꨴꨭꩃ ꨟꨲꩃ ꨧꨪꩅ ꨈꨪꨤꩄ ꨓꨯꨱꩌ ꨟꨰ ꨣꨪꨤꨯ ꨥꨮꩀ꩞ ꨕꨨꨵꩀ ꨚꨴꨯꨱꩃ ꨓꨈꨯꩀ ꨅꩍ ꨑꨮꨭꩀ ꨕꨤꩌ ꨟꨊꨥꨯꩌ ꨋꩀ ꨨꨟꨭꨩ꩝ ꨀꨟꨰꩀ ꨀꨟꨲ ꨎꨲꩃ ꨋꩀ ꨈꨴꨭ ꨚꨓꨯꨱ ꨀꨝꨪꩍ꩞ ꨕꨨꨵꩀ ꨕꨯꨱꩀ ꨨꨕꩉ꩝ ꨟꨲꩃ ꨘꩆ꩝ ( ꨔꨭꩆ ꨧ ꨣꨪꨝꨮꨭ ꨧꨤꨪꨚꩉ ꨣꨩꨓꨭꩍ ꨧꨤꨪꨚꩉ ꨚꨵꨭꩍ ꨕꨶꨩ꩝ ꨧ ꨣꨪꨝꨮꨭ ꨧꨤꨪꨚꩉ ꨣꨩꨓꨭꩍ ꨧꨤꨪꨚꩉ ꨚꨵꨭꩍ ꨆꨵꨮꨭ ) ꨈꨰꩅ ꨘꩆ꩝ ꨓꨭꩀ ꨕꨨꨵꩀ ꨕꨯꨱꩀ ꨝꩄ ꨓꩆ ꨝꩄ ꨆꨵꨮꨭ) ꨕꨯꨱꩀ ꨚꨎꨭꩌ ꨝꨴꨭꩀ꩝ ꨕꨯꨱꩀ ꨧꨣꩀ ꨚꨣꨞꨩ ꨨꨟꨭꨩ ꨓꨗꨲꩍ ꨞꨭꩌ ꨚꨤꨬ꩝ ꨢꨮꨭ ꨘꩆ ꨢꨮꨩ꩝ ꨟꨊꨥꨯꩌ ꨕꨨꨵꩀ ꨎꨲꩃ ꨨꨭꨩ ꨆꩉꨎꨩ ꨝꨴꨬ ꨤꨝꨰꩍ ꩒ ꨧꨯꨱ ꨓꨗꨲꩍ ꨨꨟꨭꨩ ꨚꨳꩍ ꨋꩀ꩞ ꨨꨕꨬ ꨕꨯꩌ ꨓꨭꩀꨥꩀ ꨚꨓꨯꨱ ꨀꨊꨯꨱꩀ ꨧꩃ ꨝꩄ꩝ ꨀꨟꨰꩀ ꨀꨟꨲꨩ ꨈꨪꨤꩄ ꨟꨰ ꨧꩃꨆꨩ ꨝꨴꨭꩀ ꨨꨟꨭꨩ ꨓꨗꨲꩍ꩞ ꨣꩍ ꨓꨚꨩ ꨓꩊ ꨝꨪꨤꩆ ꨢꨶꩀ꩝ ꨆꨢꨶꨩ ꨨꨟꨭꨩ ꨟꨊꨥꨯꩌ ꨕꨨꨵꩀ ꨙꨪꩍ ꨕꨤꩌ ꨕꨭꩀ ꨧꨯꨱꩃ ꨕꨯꩌ ꨨꨟꨭꨩ ꨟꨊꨥꨯꩌ ꨆꨣꨬ ꨢꨮꨭ ꨘꩆ ꨢꨮꨩ ꨑꨮꨭꩀ ꨌꩃ ꨂꨣꩃ ꨢꨶꩀ ꨝꨵꨯꨱꩍ꩝ ꨨꨭꨩ ꨎꨤꩆ ꨆꨩ ꨣꨪꨕꨰꩍ ꨤꨫꨟꨯꨱ ꨚꨎꨲꩃ ꨚꨕꨰ ꨓꨝꨳꩀ ꨟꨲꩃ ꨓꩊ ꨧꩃ ꨕꨴꨬ꩞ ꨨꨭꨩ ꨓꨭꩀꨥꩀ ꨢꨶꩀ ꨅꩍ ꨧꨭꨟꨭ꩝ ꨑꨮꨭꩀ ꨙꨪꩍ ꨥꨮꩀ ꨧꨩ ꨟꨤꩌꨕꨫ ꨡꨵꩃ ꨨꨟꨭꨩ ꨟꨲꩃ ꨓꩊ ꨡꩃ ꨕꨴꨬ꩞ ꨓꨭꩀꨥꩀ ꨘꩆ꩝ ꨝꨴꨭꩀ ꨢꨶꩀ ꨚꨕꨰ ꨅꩍ ꨤꨈꨰꩍ ꨝꨪꨣꨮꨭ ꨢꨮꨭ ꨂꨣꩀ ꨗꨫ꩝ ꨅꩍ ꨆꨩ ꨨꨭꨩ ꨠꩄ ꨢꨶꩀ ꨆꨶꩄ ꨚꨕꨰ꩝ ꨎꨲꩃ ꨕꨯꨱꩀ ꨟꨲꩀ ꨀꨗꨲꩀ ꨟꨗꨶꩄ ꨧꨯꨱꩃ ꨠꩄ ꨀꨊꨭꩈ ꨣꨪꨤꨯ ꨤꩄ ꨡꨰꩀ ꨥꩃ꩞ ꨆꨭꨨꨴꨳꨩ ꨣꩍ ꨧꨩ ꨧꨯꨱ ꨚꨕꨰ ꨑꨮꨭꩀ ꨀꨊꨭꩈ ꨟꨲꩃ ꨤꨫꨟꨲꨩ ꨓꩊ ꨚꨵꨭꩍ ꨂꨣꩃ ꨟꨲꩃ ꨢꨶꩀ ꨕꨴꩍ ꨧꨩꨠꨩl ꨨꨭꨩ꩝ ꨢꨶꩀ ꨝꨵꨯꨱꩍ ꨆꩀ ꨚꨯꨱꩀ ꨥꨮꩀ ꨎꨲꩃ ꨚꨯꨱꩀ꩝ ꨚꩍ ꨣꨪꨕꨰꩍ ꨤꨫꨟꨯꨱ꩝ ꨆꨭꨩꨝꨯꨱ ꨚꨎꩃ ꨚꨯꨱꩀ ꨚꨕꨰ ꨓꨝꨳꩀ ꨡꨵꩃ ꨚꨴꨯꨱꩃ ꨚꨳꩍ ꨠꩄ ꨚꨯꨱꩍ ꨟꨲꩀ ꨀꨧꩉ꩞ ꨅꩍ ꨤꩄ ꨨꨭꨩ ꨝꨴꨭꩀ ꨢꨶꩀ ꨈꨯꨱꩀ ꨆꩆ ꨆꨙꩍ꩝ ꨝꨴꨭꩀ ꨕꨶꩍ ꨠꩄ ꨚꨯꨱꩍ ꨚꨕꨰ ꨎꨮꩃ ꨈꨯꨱꩀ ꨣꨪꨤꨯ ꨆꩆ ꨆꨙꩍ ꨆꨢꨶ ꨕꨤꩌ ꨚꨤꨬ ꨓꨭꩀꨥꩀ ꨘꩆ ꨅꩍ ꨆꨩ ꨨꨭꨩ ꨣꨪꨤꨯ꩝ ꨓꨯꩀ ꨕꨶ ꨓꩊ ꨆꨵꨮꨭ ꨧꨴꨭꩍ ꨘꩆ ꨢꨮꨩ ꨑꨮꨭꩀ ꨌꩃ ꨈꨮꨭꩀ ꨝꨳꩀ ꨤꨪꨥꨪꩀ꩞ ꨨꨭꨩ ꨓꨭꩀ꩝ ꨧꩃ ꨕꨨꨵꩀ ꨢꨶꩀ ꨟꨤꩌ ꨧꨭꩇ ꨅꩍ ꨚꩍ ꨨꨭꨩ ꨠꩄ ꨚꨯꨱꩍ ꨚꨕꨰ ꨑꨮꨭꩀ ꨙꨪꩍ ꨥꨮꩀ ꨤꨫꨊꨫꨂ ꨡꨵꩃ ꨨꨟꨭꨩ ꨧꨩ ꨟꨤꩌ ꨌꩃ ꨓꩊ ꨚꨈꨰꨮ ꨨꨕꩍ ꨟꨲꩃ ꨨꨭꨩ ꨠꩄ ꨚꨯꨱꩍ ꨚꨕꨰ ꨧꨯꨱꩃ ꨚꨎꨲꩃ ꨚꨕꨰ ꨟꨰ ꨧꩃ ꨚꨡꨭꨩ꩞ ꨟꨪꩆ ꨕꨤꩌ ꨝꨴꨭꩀ ꨆꩆ ꨆꨙꩍ ꨈꨪꨤꩄ ꨨꨭꨩ ꨕꨯꩌ ꨆꨖꨩ ꨇꨮꩍꨘꩆ ꨤꩄ ꨅꩍ ꨆꨣꨬ ꨧꩃ ꨕꨨꨵꩀ꩝ ꨕꨯꨱꩀ ꨕꨯꩌ ꨧꩃ ꨓꨴꨩ ꨎꨲꩃ ꨅꩍ ꨁꨃꨥ ꨨꨭꨩ ꨠꩄ ꨚꨯꨱꩍ ꨚꨕꨰ ꨢꨮꨭ ꨘꩆ ꨢꨮꨩ ꨎꨲꩃ ꨙꨪꩍ ꨥꨮꩀ ꨡꨵꩃ ꨌꩃ ꨓꩊ ꨡꩃ ꨕꨴꨬ꩞ ꨢꨮꨭ ꨘꩆ ꨤꩄ ꨨꨭꨩ ꨥꨮꩀ ꨧꨩ ꨧꩃ ꨕꨴꨮꩍ ꨢꨮꨭ ꨧꩃ ꨕꨴꨬ꩞ ꨓꨭꩀꨥꩀꨘꩆ ꨎꨲꩃ ꨌꨯꨱꩃ ꨟꨁꩆ ꨝꨶꩈ ꨓꨭꩀ ꨘꩆ ꨕꨨꨵꩀ ꨝꩄ ꨓꩆ ꨆꨵꨮꨭ꩝ ꨎꨰꩀ ꨕꨤꨪꨚꩉ ꨔꨭꩆ ꨨꨈꨰꩅ ꨘꩆ꩝ ꨡꨯꩍ ꨣꨪꨤꨯ ꨟꨊꨥꩌ ꨂꨣꩃ ꨝꨶꩈ ꨎꨲꩃ ꨤꨪꨆꨮꨭ ꨀꨟꨲꨩ ꨙꨪꩍ ꨥꨮꩀ ꨧꨯꨱꩃ ꨕꨯꩌ ꨂꨣꩃ ꨕꨤꩌ ꨧꩃ꩞ ꨟꨪꩆ꩝ ꨀꨟꨲꨩ ꨕꨨꨵꩀ ꨙꨯꩌ ꨤꩄ: ꨟꨤꩌ ꨧꨭꩇ ꨀꨳꨩ ꨓꨆꨶꨩꩆ꩝ ꨀꨊꨪꩆ꩝ ꨀꨗꨲꩀ ꨗꨰꩍ ꨙꨪꩍ ꨕꨫ ꨤꨪꨊꨪꨥ ꨅꩍ ꨧꨳꩌ꩝ ꨈꩌ ꨤꩄ ꨀꨗꨲꩀ ꨆꨭꨟꨬ ꨥꨮꩀ ꨘꩆ ꨢꨮꨩ ꨅꩍ ꨝꨴꨬ ꨆꨩ ꨕꨨꨵꩀ ꨙꨪꩍ ꨈꨪꨤꩄ꩝ ꨟꨪꩆ ꨎꨲꩃ ꨨꨭꨩ ꨧꨗꨲꩃ ꨝꨴꨬ ꨆꨩ ꨕꨨꨵꩀ ꨕꨯꨱꩀ ꨟꨁꩆ ꨓꩊ ꨧꨤꨪꨚꩉ ꨓꨭꩀ ꨟꨤꩌ ꨝꨵꨯꨱꩍ ꨃꨥ ꨦꨄꨰ ꨚꨎꨲꩃ ꨕꨨꨵꩀ ꨗꨯꨱ ꨧꩃ ꨙꨪꩍ꩞ ꨨꨕꨬ ꨓꨭꩀ ꨀꨟꨲꨩ ꨝꨴꨬ ꨈꨯꨱꩆ꩝ ꨕꨨꨵꩀ ꨙꨶꩄꨕꨴꩍ ꨧꨠꩊl ꨗꨯꨱ ꨧꩃ ꨡꩃ ꨨꨶꩀ ꨝꨵꨯꨱꩍ ꨝꨵꨰ ꨓꨭꩈ ꨀꨟꨲꨩ ꨧꨯꨱꩃ ꨕꨯꩌ ꨦꨄꨰ ꨤꨪꨆꨬ ꨓꨝꨳꩀ ꨡꨵꩃ ꨨꨟꨭꨩ ꨙꨪꩍ ꨟꨁꩆ꩞ ꨕꨫ ꨗꨫ꩝ ꨢꨯꨱꩀ ꨧꩃ ꨨꨭꨩ ꨝꨴꨬ ꨧꨩ ꨝꨯꨱꩍ ꨡꨵꩃ ꨚꨴꨯꨱꩃ ꨚꨳꩍ ꨌꨰꩀ ꨚꨯꨱꩀ ꨚꨕꨰ꩝ ꨨꨕꨬ ꨘꩆ꩝ ꨧꩃ ꨕꨨꨵꩀ ꨎꨲꩃ ꨢꨮꨭ ꨧꩃ ꨎꨳꩀ ꨓꨞꨳ ꨨꨕꩀ ꨚꨯꨱꩀ ꨚꨕꨰ ꨎꨲꩃ ꨓꨤꨬ ꨓꨚꩀ ꨟꨲꩃ ꨤꨫꨟꨲꨩ ꨣꨓꨭꩍ ꨓꩊ ꨓꨎꨭꩍ ꨣꨓꨭꩍ ꨧꨮꩆꨓꨪꨟꨮꩅ ꨝꨵꨯꨱꩍ ꨤꩃ ꨌꨯꨮꨥ ꨓꨈꨯꩀ ꨚꨯꨱꩀ ꨚꨕꨰ ꨙꨪꩍ ꨓꨈꨯꩀ꩞ ꨕꨯꩌ ꨈꨮꨭꩀ ꨧꨗꨲꩃ ꨐꨲꩍ꩝ ꨟꨤꩌ ꨀꨳ ꨝꨪꨤꩆ ꨚꨯꨩꨟꨫ ꨀꨊꨪꩆ ꨠꩅ ꨝꨵꨯꨱꩍ ꨙꨪꩍ ꨤꨪꨊꨪꨥ ꨡꨵꩃ ꨟꨯꨱꩃ꩝ ꨀꨊꨪꩆ ꨠꩅ ꨈꩌ ꨧꨯꨱꩃ ꨡꩃ ꨆꨰꨥꨣꨓꩀꨤꨯꨱꨥꨚꨨꨮꨝꨪꨊꨪꨙꨯꩌ ꨝꨳꨰ ꩝ ꨟꨐꨭꩌ ꨀꨳ ꨓꨳꨮ ꨤꩄ ꨧꨳꩌ ꨇꨮꩍ ꨢꨮꨭ ꨨꨤꨬ ꨚꨎꨮ ꨑꨲꩍ? ꨙꨯꩌ ꨆꨩ ꨆꨰꨥ ꨣꨓꩀ ꨤꨯꨱꨥ ꨝꨵꨯꨱꩍ ꨀꨳ ꨚꨝꩍ ꨕꨫ ꨕꨨꨵꩀ ꨙꨶꩄ ꨓꨝꨳꩀ ꨚꨎꨮꨩ꩞ ꨟꨲꩃ ꨘꩆ꩝ ꨅꩍ ꨨꨭꨩ ꨔꨮꨭ ꨋꩀ ꨨꨝꩉl ꨝꨯꨩ ꨕꨯꩌ ꨀꨟꨰꩀ꩝ ꨀꨟꨭꩀ ꨌꩌ ꨕꨴꨬ ꨋꩀ ꨆꨰꨥ ꨣꨓꩀ ꨤꨯꨱꨥ ꨝꨳꩀ ꨝꨪꨊꨪ꩞ ꨓꩊ ꨂꨣꩀ ꨗꨫ꩝ ꨙꨯꩌ ꨓꨝꨳꩀ ꨕꨨꨵꩀ ꨎꨲꩃ ꨕꨯꨱꩀ ꨡꨯꩍ ꨠꨨꨭ꩞ ꨆꨰꨥ ꨨꨭꨩ ꨆꨵꨮꨭ ꨓꩊ: ꨓꩊ ꨀꨤꨩ ꨤꩄ ꨝꨯꨱꩍ ꨌꩌ ( ꨓꨛꨩꩈ) ꨟꨓꩍ꩝ ꨨꨕꨬ ꨘꩆ ꨓꨭꩍ ꨧꨩ ꨓꩊ ꨀꨳ ꨧꨣꨕꩃ ꨣꩀ ꨆꨩ ꨆꨰꨥ ꨗꨯꨱ ꨝꨵꨯꨱꩍ ꨚꨴꨰ ꨣꨓꩀ ꨤꨯꨱꨥ ꨧꨘꨩ꩝ ꨆꨵꨯꨱꩅ ꨆꨙꨭꩍ ꨝꨵꨯꨱꩍ ꨓꨈꨯꩀ ꨀꨳꨩ ꨧꨣꨕꩃ꩝ ꨝꨵꨯꨱꩍ ꨕꨫ ꨘꩆ ꨝꨭꩍ ꨓꨈꨯꩀ ꨧꨩ ꨓꩊ ꨝꨯꨱꩍ ꨚꨌꩌ ꨟꨓꩍ ꨓꨈꨯꩀ ꨥꨮꩀꨤꩄ ꨎꨲꩃ ꨝꨯꨱꩍ ꨆꨰꨥ꩞ ꨟꨯꨱꩃ ꨡꨯꩍ ꨡꨶꩆ ꨢꨮꨭ ꨘꩆ ꨟꨪꩆ ꨝꨳꩀ ꨝꨪꨊꨪ꩝ ꨆꨰꨥ ꨑꩊ꩝ ꨣꨌꩌ ꨟꨲꩃ ꨝꨯꨱꩍ ꨚꨌꩌ ꨧꨯꨱꩃ ꨚꨨꨯꨮ ꨟꨲꩃ ꨣꨓꩀ ꨤꨯꨱꨥ꩝ ꨡꩃ ꨓꨟꨲꨩ ꨝꨳꩀ ꨝꨪꨊꨪ꩞ ꨟꨲꩃ ꨓꨭꩀ ꨘꩆ꩝ ꨧꨩ ꨆꩇ ꨆꨰꨥ ꨢꨮꨭ ꨘꩆ ꨤꩄ ꨧꨤꨪꩍ ꨨꨭꨩ ꨧꨩ ꨚꨯꩅ ꨚꨕꨰ ꨀꨧꩉ꩝ ꨟꨢꩍ ꨅꩍ ꨨꨭꨩ ꨚꨕꨰ ꨀꨧꩉ ꨤꩄ ꨧꨤꨪꩍ ꨨꨭꨩ ꨆꨵꨮꨭ ꨓꩊ ꨚꩀ ꨚꨯꨱꩀꨕꨰ꩞ ꨆꨢꨩ ꨡꩃ ꨘꩆ ꨋꩀ ꨆꨩ ꨕꨨꨵꩀ ꨚꨌꨴꨮꩍ ꨡꩃ ꨓꩊ ꨂꨣꩀ ꨗꨫ꩞ ꨢꨯꨱꩀ ꨡꩃ ꨓꩊ ꨝꨪꨤꩆ ꨢꨶꩀ꩝ ꨑꨮꨭꩀ ꨡꨯꩍ ꨔꨬ ꨙꨶꨩ ꨚꨯꩅ ꨤꩄ ꨕꨨꨵꩀ ꨨꨕꩉ ꨓꩊ ꨕꨯꩌ ꨀꨟꨭꩀ꩝ ꨀꨟꨰꩀ ꨚꨝꨵꨬ ꨆꨰꨥ ꨣꨓꩀ ꨤꨯꨱꨥ꩞ ꨂꨣꩀ ꨗꨫ ꨤꩄ ꨅꩍ ꨡꨯꩍ ꨂꨣꩃ ꨚꨝꨵꨬ ꨥꨮꩀ ꨈꨪꨤꩄ ꨥꨮꩀ ꨝꨯꨱꩍ ꨆꨖꨩ ꨚꨤꨩ ꨚꨕꨰ꩝ ꨚꨓꨭꩈ ꨗꨯꩀ ꨚꨯꨱꩍ ꨚꨕꨰ ꨤꩄ ꨗꨯꩀ ꨚꨎꨲꩃ ꨚꨕꨰ ꨟꨰ ꨧꩃ ꨝꨡꨭ꩞ ꨤꨝꨰꩍ ꩒ ꨧꨯꨱ ꨚꨕꨰ꩝ ꨤꩄ ꨧꩃ ꨕꨨꨵꩀ ꨎꨲꩃ ꨚꨓꨯꨱꩌ ꨟꨲꩀ ꨨꨭꨩ ꨚꨵꨭꩍ ꨓꩊ ꨕꨶꨩ ꨚꨵꨭꩍ ꨡꨯꨱꨚꨕꨰ ꨔꩅ꩝ ꨝꨵꨯꨱꩍ ꨝꨩ ꨗꨯꨱ ꨓꨭꩍ ꨓꨴꨭꩆ ꨤꨉꨪꨥ ꨡꨵꩃ ꨝꨡꨭ꩞ ꨓꩊ ꨓꨭꩀ ꨎꨤꨩ ꨚꨙꨳꩀ ꨓꨈꨯꩀ ꨤꩄ ꨚꨣꨞꨩ ꨈꨮꨭꩀ ꨓꨝꨳꩀ ꨤꨪꨀꨶꨩ ꨆꨩ ꨕꨴꩍ ꨔꨭꨩ꩝ ꨢꨮꨭ ꨘꩆ ꨆꨩ ꨓꩊ ꨆꨵꨮꨭ꩝ ꨚꩀ ꨡꩃ ꨓꩊ ꨥꩉ ꨝꨳꨮꩉ ꨨꨣꨬ ꨓꨭꩀ ꨚꨕꨰ ꨔꨭꨩ ꨟꨲꩃ ꨆꨶꩄ ꨓꨟꨲꨩ ꨡꨯꨱ ꨌꨰꩀ ꨝꨵꨯꨱꩍ꩞ ꨓꩊ ꨓꨭꩀꨥꩀꨆꩀ ꨎꨲꨩ ꨆꨩ ꨨꨯꩇ ꨓꩀ ꨦꨩ ꨟꨲꩃ ꨝꨩ ꨓꨝꨳꩀ ꨆꩀ꩝ ꨨꨕꨬ ꨓꨭꩀ ꨆꨭꨨꨴꨳ ꨝꨵꨯꨱꩍ ꨝꨵꨰ꩝ ꨗꨯꩀ ꨚꨕꨰ ꨝꨯꨩ ꨧꩃ ꨕꨨꨵꩀ ꨑꨮꨭꩀ ꨆꩀ ꨎꨲꨩ ꨤꩄ ꨤꨫꨟꨲꨩ ꨎꩀ ꨢꨯꨱꩌ ꨎꨰꩀ ꨚꩀ ꨓꩊ ꨤꨫꨟꨲꨩ ꨥꨯꨱ꩞ ꨕꨯꩌ ꨡꨯꨱ ꨚꨕꨰ ꨕꨯꨱꩀ ꨥꨮꩀ ꨧꩃ ꨕꨨꨵꩀ ꨝꨩ ꨗꨯꨱ ꨚꨝꨵꨬ ꨓꨆꨪꩀ ꨚꨳꩍ ꨆꨭꨨꨴꨳ ꨎꨫꩆ ꨆꨩ ꨤꨫꨟꨲꨩ ꨀꨕꨬ ꨦꨄꨰ ꨕꨨꨵꩀ ꨗꨯꨱ ꨝꩄ꩝ ꨕꨯꨱꩀ ꨥꨮꩀ ꨤꨫꨟꨲꨩ ꨡꨯꨱꨚꨳꩍ ꨝꨩ ꨗꨯꨱ ꨧꨴꨰ ꨟꨲꩀꨝꨴꩍ ꨌꨰꩀ ꨡꩃ ꨆꨩ ꨓꩊ ꨝꨪꨤꩆ ꨢꨶꩀ ꨨꨕꨬ꩞ ꨠꩀꨘꨩ ꨨꨝꩊl ꨢꨯꨱꩀ ꨧꩃ ꨑꨮꨭ ꩀꨆꩀ ꨎꨲꨩ ꨚꨕꨰ ꨆꨩ ꨨꨯꩇ ꨓꩀ ꨨꨩ꩝ ꨆꨢꨶ ꨓꨭꩀꨥꩀ ꨘꩆ ꨕꨯꨱꩀ ꨡꩃ ꨇꨯꨱꩆ ꨆꨢꨶꨩ ꨨꨯꩇ ꨓꩀ ꨨꨩ ꨚꨣꨞꨩ ( ꨕꨤꩌ ꨘꩆ ꨨꨭꨩ ꨆꩀ ꨎꨲꨩ ꨕꨯꩌ ꨗꨯꩀ ꨎꨳꨮꩆꨨꨭꨩ ꨧꨤꨪꩍ ꨓꨚꨩ ꨚꨕꨰ ꨀꨝꨪꩍ ꨢꨮꨭ ꨢꨮꨩ: ꨎꨳꨮꩆ ꨚꨣꨞꨩ ꨀꨳꨩꨓꨶꩈ꩝ ꨇꩀ ꨕꨴꩀ꩝ ꨠꩄ ꨚꨯꨱꩍ ꨚꨕꨰ…) ꨢꨯꨱꩀ ꨀꨣꨰ꩝ ꨢꨯꨱꩀ ꨝꨴꨭꩀ ꨋꩀ ꨓꨭꩀ ꨨꨤꨬ ꨎꨲꩃ ꨨꨭꨩ ꨆꨖꨩ ꨚꨕꨴꨭꩅ ꨚꨕꨴꨯꩈ ꨧꨯꨱꩃ ꨆꨖꨩ ꨝꨭꩈ ꨆꨣꨬ ꨕꨫ ꨈꨮꨭꩀ꩞ ꨟꨲꩃ ꨟꨪꩀꨥꨩ ꨚꨤꨩ ꨚꨕꨰ ꨕꨫ ꨚꨤꨬ ꨚꨤꨩ ꨈꨪꨤꩄ ꨛꨯꨩꩀ ꨎꨩ ꨣꨪꨤꨯ ꨢꨯꨱꩀ ꨀꨧꩉ꩞ ꨝꨪꨤꩆ ꨨꨤꨬ ꨤꨪꨊꨪꩀ ꨤꨈꨰꩍ ꨤꩄ ꨟꨪꩀꨥꨩ ꨝꨭꩈ꩝ ꨨꨭꨩ ꨧꨪꨥꩃ꩝ ꨝꨪꨤꩆ ꨨꨤꨬ ꨤꨪꨊꨪꩀ ꨏꩀ ꨤꩄ ꨟꨪꩀꨥꨩ ꨤꨪꨨꨪꩀ ꨚꨡꨶꩀ ꨚꨈꩌ ꨧꨯꨱꩃ ꨨꨓꨰ ꨧꩍꨗꨲꩃ꩝ ꨕꨯꩌ ꨟꨊꨥꨯꩌ ꨙꨪꩍ ꨅꩍ ꨥꩉ ꨆꨢꨶꨩ ꨕꨯꩌ ꨗꨯꩀ ꨧꨴꨰꩈ ꨀꨘꩀ ꨟꨓꨩ: ꨨꨤꨬ ꨤꩄ ꨎꨳꨮꩆ ꨆꩀ ꨝꩄ ꨆꨩ ꨀꨗꨲꩀ꩝ ꨎꨳꨮꩆ ꨡꩃ ꨨꨶꩀ ꨢꨯꨱꩀ ꨨꨣꨬ꩝ ꨎꨳꨮꩆ ꨆꩀ ꨆꨩ ꨀꨳꨩ ꨀꨊꨶꩈ꩝ ꨎꨳꨮꩆ ꨟꨐꨲꩀ ꨓꨴꨶꩄ꩝ ꨎꨳꨮꩆ ꨓꨴꨭꩍ ꨙꩌ꩝ ꨋꩀ ꨢꩃ…ꨀꨝꨪꩍ ꨟꨯꨱꩃ ꨓꨟꨲꨩ ꨕꨫ ꨕꨯꩌ ꨧꨯꨱ꩝ ꨨꨩ ꨚꨕꨰ꩞ ꨧꩃ ꨨꨤꨬ ꨋꩀ ꨓꨆꨪꩀ ꨚꨕꨰ ꨤꩄ ꨧꩍꨗꨲꩃꨓꨆꨪꩀ꩝ ꨋꩀ ꨣꨪꨤꨯ ꨧꩍꨗꨲꩃ ꨣꨪꨤꨯ꩞ ꨚꨈꩇ ꨢꨮꨩ꩝ ꨝꨪꨤꩆ ꨢꨶꩀ ꨟꨗꨫꩀ ꨔꨭꩆ ꩒꩐꩒꩕ ꨗꨫ꩝ ꨎꨰꩀ ꨟꨓꨲꩍ ꨝꨪꨤꩆ ꨤꩄ ꨨꨎꩆ꩝ ꨀꨳꨩ ꨚꨴꨯꨱꩃ ꨕꨮꨭꩀ ꨎꨰꩀ ꨧꨪ ꨀꨝꨪꩍ ꨡꨵꩃ ꨚꨟꨭꨩ꩝ ꨟꨗꨲꩃ ꨓꨗꨲꩍ ꨚꨕꨰ ꨙꨪꩍ ꨎꨰꩀ ꨀꨤꨩ ꨝꨳꩀ ꨆꩆ ꨆꨙꩍ ꨆꨩ ꨠꩄ ꨢꨶꩀ ꨓꨟꨲꨩ꩝ ꨟꨗꨲꩃ ꨨꨟꨭꨩ ꨤꩄ ꨚꨕꨰ ꨅꩍ ꨨꨭꨩ ꨀꨧꩉ꩝ ꨀꨓꨮꨭ ꨀꨧꩉ ꨚꨰꩈ ꨀꨝꨪꩍ…ꨟꨪꩀꨥꨩ ꨓꨝꨳꩀ ꨚꨟꨭꨩ꩝ ꨟꨯꨱꩃ ꨡꨵꩃ ꨨꨟꨭꨩ ꨕꨴꨬ ꨓꨯꩀ ꨔꨮꨭ ꨆꨙꨪꩀ ꨕꨤꩍ꩞ ꨢꨮꨭ ꨘꩆ ꨚꨎꨮꨩ꩝ ꨢꨯꨱꩌ ꨚꨕꨰ ꨎꨲꩃ ꨅꩍ ꨨꨭꨩ ꨈꨵꨯꨱꩃ꩝ ꨆꩆ ꨆꨙꩍ ꨆꨓꨮꩀ ꨓꨈꨯꩀ ꨈꨮꨭꩀ꩞ ꨀꨘꩀ ꨕꨯꩌ ꨆꩆ ꨆꨙꩍ ꨕꨫ ꨤꨪꨊꨪꩀ ꨓꨧꨪꩀ꩝ ꨢꨯꨱꩌ ꨆꨯꨱꩌ ꨚꨈꩌ ꨓꨶꩈ ꨕꨯꩌ ꨝꨴꨭꩀ ꨙꨶꨩ ꨗꨯꨱꩃ ꨕꨫ ꨣꨰ ꨕꨳꨯꨮꩀꨢꨯꨱꩀ ꨨꨣꨬ꩝ ꨟꨗꨲꩃ ꨧꩃ ꨕꨫ ꨚꨤꨬ ꨕꨨꨵꩀ ꨟꨲꩃ ꨆꨵꩀ ꨝꨴꨭꩀ ꨚꨤꨩ ꨕꨴꩀ ꨨꨟꨭꨩ꩝ ꨣꨶꩍ ꨝꨴꨭꩀ ꨝꨴꨬ ꨚꨚꩍ ꨀꨓꨮꨭ ꨚꨝꨵꨬ ꨓꨗꨲꩍ ꨨꨟꨭꨩ ꨕꨫ ꨧꩃ ꨕꨴꨬ ꨨꨕꨯꩌ ꨔꨭꩆ ꨆꩀ ꨆꨎꩇ ꨚꨳꩍ ꨗꨯꨱ ꨕꨶꩍ ꨝꨴꨭꩀ ꨋꩀ ꨕꨫ ꨤꨪꨝꨪꩀ ꨆꨣꨬ꩝ ꨣꨪꨤꨯꨩ ꨂꨣꩀ ꨗꨫ ꨤꩄ ꨋꩀ ꨣꨈꨬ ꨆꨩ ꨆꨯꨱꩃ ꨓꨫꨏꨪꩀ꩝ ꨟꨗꨲꩃ ꨂꨣꩃ ꨓꨈꨯꩀ ꨓꨬ ꨊꨶꨮꩆ ꨋꩀ ꨚꩍ ꨋꩀ ꨚꨎꨯꨱ꩝ ꨚꨰꩀ ꨆꨜꨰ ꨚꩍ꩞ ꨢꨮꨭ ꨘꩆ ꨢꨮꨩ꩞ ꨝꨪꨤꩆ ꨢꨶꩀ ꨔꨭꩆ ꨗꨫ ꨅꩍ ꨨꨭꨩ ꨡꨯꩍ ꨚꨌꨴꨮꩍ꩝ ꨅꩍ ꨨꨭꨩ ꨕꨯꨱꩀ ꨚꩃ ꨣꨪꨤꨯꨩ ꨧꩇ ꨓꨐꨫ ꨆꨵꨪꩆ ꨆꨵꨯꨱꩆ ꨟꨲꩃꨧꨴꨭꩍ ꨣꨕꨰꩍ ꨚꨎꨲꩃ ꨚꨕꨰ ꨚꨯꨱꩀ꩝ ꨅꩍ ꨨꨭꨩ ꨕꨯꨱꩀ ꨡꨯꩍ ꨔꨯꨱꩅ ꨝꨪꨊꨭꩀ ꨕꨯꩌ ꨂꨣꩃ ꨆꨭꨟꨬ ꨚꨴꨯꨱꩃ ꨔꨭꩆ ꨙꨶꨩ ꨚꨯꩅ ꨆꨳꨯꨮꩈ ꨣꨪꨓꩀ ꨤꨯꨱꩈ ꨗꨯꨱ ꨧꨤꨪꩍ ꨚꨕꨰ ꨢꨮꨩ ꨟꨲꩃꨆꩆ ꨥꨮꩀ꩞ ꨤꨶꩄ ꨆꨖꨩ: ꨢꨯꨱꩌ ꨤꩄ ꨨꨣꨬ ꨗꨫ ꨣꨰ ꨕꨳꨯꨮꩀꨨꨭꨩ ꨧꨤꨪꩍ ꨝꨪꨣꨮꨭ ꨢꨮꨭ ꨨꨤꨬ꩝ ꨀꨢꨭꩅ ꨨꨭꨩ ꨚꨴꨯꨱꩃ ꨎꩀꨎꨲꩃ ꨨꨝꩊ? ꨠꩄ ꨟꨗꨲꩃ ꨆꨴꩍ ꨨꨭꨩ ꨝꨣꨮꨭꩈ ꨢꨮꨭ ꨨꨤꨬ? ꨤꩄ ꨕꨯꩌ ꨗꨲꩌ ꨆꨴꨭꩃꨕꨯꨱꩀ ꨧꨪꩅ ꨎꨲꩃ ꨤꩄ ꨕꨯꩌ ꨗꨲꩌꨆꨴꨭꩂ ꨇꨮꩍ ꨕꨫ ꨢꨯꨱꩀ ꨂꨣꩃ꩞ ꨧꨯꨱꩃ ꨕꨤꩌ ꨨꨓꨰ ꨢꨯꨱꩀ ꨂꨣꩃ ꨓꨭꩀ ꨨꨕꩉ ꨥꨮꩀ꩝ ꨎꨲꩃ ꨅꩍ ꨨꨭꨩ ꨥꩉꨕꨯꩌ ꨔꨭꩆ ꨝꨪꨤꩆ ꨈꨵꨰꩍ ꨈꨵꩆ꩝ ꨥꩉꨣꨭꩇ ꨕꨴꨬ ꨕꨫ ꨀꨟꨰꩀ ꨀꨟꨲꨩ ꨚꨳꩍ ꨆꨩ ꨕꨴꨬ ꨨꨭꨩ ꨣꨰ ꨕꨳꨯꨮꩀꨓꨴꨬ ꨧꨫꩂ ꨨꨣꨬ ꨗꨫ꩞ ꨝꨴꨭꩀ ꨓꨝꨳꩀ ꨡꨯꨱꩀ ꨕꨫ ꨆꨖꨩ ꨕꨯꨱꩍ “ ꨆꩀ ꨕꨫ ꨓꨳꩆ ꨣꨯꨱꩃ ꨀꨗꨲꩀ ꨗꨯꨱ ꨝꩄ” ꨣꨚꨗꨲꩍ ꨓꩆ ꨓꨭ ꨎꨲꩃ ꨙꨯꩌ ꨆꨩ ꨝꨴꨭꩀ ꨗꨫ꩞ ꨤꨪꨆꨮꨭꨥ ꨨꨭꨩ ꨗꨲꩍꨣꨞꨩ ꨆꨖꨩ ꨕꨯꨱꩍ ꨢꨮꨭꨥ ꨀꨤꨩ ꨗꨫ: “ ꨝꨪꨤꩆ ꨢꨶꩀ ꨀꨟꨰꩀ ꨗꨯꨱ ꨟꨯꨱꩅ ꨀꨯꨱ ꨇꩆ ꨅꩍ ꨊꨶꩈ ꨔꨪꩂ꩝ ꨡꩃ ꨆꨳꨯꨮꩌ ꨡꩃ ꨀꨲꩆ ꨀꨟꨰꩀ ꨀꨟꨲꨩ ꨨꨤꩆ ꨨꨓꨳꩆ ꨥꩉ ꨣꨭꩇ ꨕꨴꨬ ꨆꨩ ꨀꨗꨲꩀ ꨨꨕꩍ ꨡꨯꨱꩀ…”