ꨝꨴꨭꩀ ꨓꨝꨳꩀ ꨡꨯꨱꩀ ꨕꨫ ꨕꨯꩌ ꨚꨤꨬ ꨋꩀ ꨟꨲꩃꨆꩆ ꨕꨫ ꨂꨣꩃ ꨌꩌ ꨚꩀ ꨕꨶꨩ ꨗꨈꩉ ꨗꨫꩆ ꨔꨶꩆ ꨧꨯꨱꩃ ꨡꨫꩆ ꨔꨶꩆ ꨆꨵꩀ (ꨇꩆ ꨨꨶꨩ ꨧꨯꨱꩃ ꨤꩌ ꨙꨯꩂ)
ꨙꨯꩌ ꨓꩊ ꨕꨯꩌ ꨚꨤꨬ ꨋꩀ ꨟꨲꩃꨆꩆ ꨕꨫ ꨂꨣꩃ ꨌꩌ ꨈꩍ ꨟꨓꨲꩍ ꨟꨣꨯꨱꩃ ꨎꨳꨮꩂ ꨢꨮꨭ ꨂꨣꩃ ꨌꩌ ꨚꩀ ꨕꨶꨩ ꨗꨈꩉ ꨗꨫꩆ ꨔꨶꩆ ꨧꨯꨱꩃ ꨡꨫꩆ ꨔꨶꩆ ꨆꨵꩀ ( ꨂꨣꩀ ꨗꨫ ꨤꩄ ꨇꩆ ꨨꨶꨩ ꨧꨯꨱꩃ ꨤꩌ ꨙꨯꩂ ) ꨤꩄ ꨑꨮꨭꩀꨇꩆ ꨓꩊ ꨕꨯꩌ ꨝꨴꨭꩀ ( ꨕꨘꩀ ꨕꨗꨯꨱ) ꨢꨮꨩ : ꨤꩆ ꨀꩌ ꨟꨲꩃꨆꩆ ꨕꨫ ꨕꨶꨩ ꨚꨤꨬ ꨌꩌ ꨟꨭꨆꨴꨯꨱꩀ꩝ ꨞꨭꩌ ꨗꨫꩆꨜꨮꨲꩀ꩝ ꨗꨈꩉ ꨇꩆ ꨨꨶꨩ ꨧꨯꨱꩃ ꨚꨤꨬ ꨣꨈꨯꨱꩀ꩝ ꨞꨭꩌ ꨜꩆ ꨨꨳꨮꩇ꩝ ꨗꨈꩉ ꨤꩌ ꨙꨯꩂ; ꨕꨘꩀ ꨕꨗꨯꨱ ꨟꨐꨪꩌ ꨇꩆ ꨝꨰ ꨕꨫ ꨚꨤꨬ ꨌꩌ ꨌꨆꨵꨰꩃ; ꨕꨘꩀ ꨕꨗꨯꨱ ꨚꨤꨩ ꨧꨯꨱꩃ ꨋꩀ ꨎꨴꨭꨩ ꨉꨨꨮꨩꩀ ꨕꨫ ꨕꨶꨩ ꨚꨤꨬ ꨚꨡꨵꩇ ꨆꨵꩀ ꨧꨯꨱꩃ ꨚꨡꨵꩇ ꨝꨪꨣꨮꨭ ꨕꨫ ꨗꨈꩉ ꨇꩆ ꨨꨶꨩ꩞ ꨕꨯꩌ ꨚꨤꨬ ꨋꩀ ꨗꨫ ꨅꩍ ꨤꩄ ꨋꩀ ꨓꨝꨳꩀ ꨚꨙꩇ ꨚꨙꨩ ꨝꨵꨯꨱꩍ ꨕꨯꨱꩀ ꨇꨪꩀ ꨚꨳꩍ ꨁꨗꨲꩌ ꨗꨲꩀ ꨁꨤꨪꨠꨯ꩝ ꨀꨕꩅ ꨌꨡꩅ ꨓꨘꨣꨆꨭꩆ ꨕꨫ ꨝꩃꨧꨩ ꨌꩌ ꩞ ꨎꨲꩃ ꨤꨪꨝꨪꩀ ꨟꨰ ꨚꨌꨴꨮꩍꨓꨶꨰ ꨎꨟꨶꩈ ꨚꨧꩃ ꨀꨳꨮꩀ ꨁꨤꨪꨠꨯ ꨚꨭꩀ ꨚꨤꨬ꩝ ꨝꨵꨬ ꨚꨙꩇ ꨌꨰꩀ ꨚꨳꩍ꩞ ꨆꨖꨩ ꨥꩀ ꨀꨤꨩ ꨗꨫ ꨟꨕꨩ ꨇꩆ ꨓꩊ ꨟꨪꩀꨥꨩ ꩝ ꨓꨶꨰ ꨎꨟꨶꩈ ꨣꨘꩌ ꨆꨩ ꨝꨴꨭꩀ ꨓꨝꨳꩀ ꨡꨯꨱꩀ ꨧꨯꨱꩃ ꨚꨓꨈꨯꩀ ꨕꨫ ꨕꨯꩌ ꨚꨤꨬ ꨋꩀ ꨟꨲꩃꨆꨩꩆ ꨕꨫ ꨂꨣꩃ ꨌꩌ ꨚꩀ ꨕꨶꨩ ꨗꨈꩉ ꨇꩆ ꨨꨶꨩ ꨧꨯꨱꩃ ꨤꩌꨙꨯꩂ ꨓꨶꨰ ꨎꨗꨫꩍ ꨓꨐꨫ ꨧꨯꨱꩃ ꨌꨤꨬ ꨀꨤ ꨗꨫ :
– ꨀꩃꨆꨩ ꨧꨩ: ꨀꨢꨭꩅ ꨨꨭꨩ ꨔꨮꨭ ꨂꨣꩃ ꨌꩌ ꨚꩀ ꨗꨈꩉꨇꩆ ꨨꨶꨩ ꨨꨭꨩ ꨨꨕꨯꩌ ꨚꨤꨬ ꨋꩀ ꨟꨲꩃꨆꩆ ꨨꨤꨬ ꨅꩍ?
-ꨀꩃꨆꨩ ꨕꨶꨩ: ꨂꨣꩃ ꨌꩌ ꨨꨭꨩ ꨝꨴꨭꩀ ꨋꩀ ꨤꩆ ꨀꩌ ꨚꩀ ꨚꨤꨬ ꨨꨟꨭꨩ ꨓꨴꨯꨱꩀ꩝ ꨞꨭꩌ ꨗꨫꩆ ꨜꨮꨲꩀ꩝ ꨗꨈꩉ ꨇꩆ ꨨꨶꨩ꩞ ꨤꩄ ꨧꨩ ꨕꨤꩌ ꨕꨯꩌ ꨚꨤꨬ ꨋꩀ ꨤꩆ ꨀꩌ ꨣꨪꩀ ꨀꨝꨪꩍ ꨕꨤꩌ ꨙꨯꩃ ꨘꩌ ꨀꩀ꩝ ꨋꩆ ꨧꨯꨱꩃ ꨦꩀꨆꨣꨰ ꨤꨫꨥꨪꩀ ꨤꨝꨰꩍ ꨧꨩ ꨣꨪꨝꨮꨭ ꨔꨭꩆ꩞ ꨓꨶꨰ ꨕꨤꨪꨆꩆ ꨇꩆ ꨥꨮꩀ꩝ ꨝꨴꨭꩀ ꨓꨝꨳꩀ ꨡꨯꨱꩀ ꨚꨤꨬ ꨤꩆ ꨀꩌ ꨨꨟꨭꨩ ꨓꨴꨯꨱꩀꨨꨭꨩ ꨓꨯꩀ ꨟꨲꩀ ꨤꩄ ꨆꨢꨶꨩ ꨝꨭꩍ ꨚꨴꨲꩆ ꨕꨫꨥ ꨚꨧꩃ ꨅꩃ ꨛꨯꨮ ꨆꨵꨯꨱꩃ ꨌꨩꩆ꩞ ꨕꨶꨩ ꨂꨣꩃ ꨗꨫ ꨨꨭꨩ ꨚꨗꨲꩍ ꨓꨝꨳꩀ ꨕꨯꩌ ꨚꨙꩇ ꨟꨲꩃ ꨈꨵꨭꩍ ꨝꨯꨱꩀ ꨧꨯꨱꩃ ꨚꨓꨈꨯꩀ ꨚꨤꨬ ꨋꩀ ꨤꩆ ꨀꩌ ꨆꨩ ꨓꩊ ꨨꨣꨬ ꨗꨫ꩞
-ꨀꩃꨆꨩ ꨆꨵꨮꨭ : ꨀꨢꨭꩅ ꨔꨮꨭ ꨨꨤꨬ? ꨚꨤꨬ ꨋꩀ ꨤꩆ ꨀꩌ ꨟꨭꨓꨴꨯꨱꩀ ꨕꨯꨱꩀ ꨨꨭꨩ ꨂꨗꨮꩅꨆꨯꨩ ꨚꨯꩀ ꨝꨴꨬ ꨀꨋꩆ ꨤꩄ ꨁꨗꨲꩌ ꨆꨴꨭꩂ ꨁꨤꨪꨠꨯ ꨜꨪꨥꩀ ꨔꨮ ꨕꨫ ꨟꨗꨶꩄ ꨧꨳꨩ ꨔꨭꩆ ꨕꨶ ꨣꨪꨝꨮꨭ ꨤꩍ ꨕꨶ ꨚꨵꨭꩍ ꨕꨶ ( ꩒꩐꩒꩒)꩞ ꨤꨪꨝꨪꩀ ꨗꨫ ꨅꩍ ꨤꩄ ꨇꨪꩀ ꨣꨟꨪꩀ ꨧꨩ ꨚꨤꨬ ꨋꩀ ꨟꨲꩃꨆꩆ ꨤꨫꨥꨪꩀ ꨣꨰ ꨕꨫ ꨝꨰꨮꩅ ꨘꩌ꩝ ꨝꨵꨯꨱꩍ ꨕꨯꨱꩀ ꨤꩄ ꨤꨪꨝꨪꩀ ꨟꨰ ꨣꨥꩃ ꨟꨁꩆ ꨚꨌꨴꨮꩍ ꨆꨩ ꨕꨯꩌ ꨂꨣꩃ ꨓꨆꨴꨲ ꨁꨤꨪꨠꨯ ꨧꨯꨱꩃ ꨣꨕꩅ꩞
-ꨀꩃꨆꨩ ꨚꩀ: ꨝꨴꨭꩀ ꨋꩀ ꨤꩆ ꨀꩌ ꨟꨲꩃꨆꩆ ꨗꨫ꩝ ꨤꨫꨊꨫꨥ ꨚꨤꨬ ꨌꩌ ꨨꨟꨭꨩ ꨆꨴꨯꨱꩀ ꨤꩄ ꨕꨯꨱꩀ ꨚꨤꨬ ꨨꨤꨬ ꨋꩀ ꨥꨮꩀ ꨤꨬ?
-ꨀꩃꨆꨩ ꨤꨫꨟꨲꨩ: ꨨꨭꨩ ꨐꨲꩍ ꨀꨢꨭꩅ꩞ ꨤꨫꨊꨫꨥ ꨨꨟꨭꨩ ꨆꨴꨯꨱꩀ꩝ ꨞꨭꩌ ꨗꨫꩆ ꨜꨮꨲꩀ꩝ ꨗꨈꩉ ꨇꩆ ꨨꨶꨩ ꨤꩄ ꨚꨤꨬ ꨌꩌ ꨣꨈꨯꨱꩀ꩝ ꨞꨭꩌ ꨜꩆ ꨨꨳꨮꩇ꩝ ꨗꨈꩉ ꨡꨫꩆ ꨔꨶꩆ ꨆꨵꩀ ꨂꨣꩀ ꨗꨫ ꨤꩄ ꨤꩌ ꨙꨯꩂ꩞ ꨓꨶꨰ ꨕꨯꩌ ꨂꨣꩃ ꨋꩀ ꨝꨴꨬ ꨔꨮꨭ꩝ ꨝꨴꨭꩀ ꨋꩀ ꨤꩆ ꨀꩌ ꨚꩀ ꨗꨫ ꨊꩀ ꨟꨲꩃ ꨤꨫꨥꨪꩀ ꨣꨰ꩝ ꨨꨭꨩ ꨕꨯꩌ ꨧꩃ ꨂꨣꩃ ꨌꩌ ꨇꨪꩀ ꨋꩀ ꨓꨚꨩ ꨣꨪꨤꨯ ꨣꨰ꩞
-ꨀꩃꨆꨩ ꨘꩌ: ꨂꨣꩃ ꨋꩀ ꨤꩆ ꨀꩌ ꨤꩄ ꨕꨯꩌ ꨂꨣꩃ ꨆꨭꨟꨬ ꨌꩌ꩝ ꨕꨯꩌ ꨂꨣꩃ ꨘꩆ ꨡꨮꩀ ꨔꨰꩀ ꨤꩆ ꨀꩌ ꨅꩍ ꨨꨭꨩ ꨀꨋꨶꨰ ꨞꩆ ꨚꨢꨮꩂꨓꨯꨱꩌꨕꩊ꩝ ꨓꨯꩀ ꨀꨋꨶꨰ ꨕꨯꩌ ꨚꨙꩇ ꨡꨶꩆ ꨧꨪ ꨋꩀ ꨟꨲꩃ ꨓꨊꨪꩆ꩞ ꨚꨙꩇ ꨋꩀ ꨓꨝꨳꩀ ꨔꨰꩀ ꨤꩆ ꨀꩌ ꨝꨳꩀ ꨡꨶꩆ ꨢꨮꨩ: ꨆꨔꨭꩆ꩝ ꨌꨙꩍ ꨈꨯꨱꩀ ꨧꨯꨱꩃ ꨧꨩ ꨝꨵꩍ ꨇꩆ ꨝꨰ ꨧꨪꩅ꩞ ꨕꨯꨱꩀ ꨕꨯꩌ ꨚꨙꩇ ꨚꨴꨯꨱꩃ ꨧꨯꨱꩃ ꨆꩆ ꨆꨙꩍ ꨑꨮꨭꩀ ꨋꩀ ꨤꨪꨊꨪꨥ ꨡꨵꩃ ꨚꨴꨯꨱꩃ ꨧꨯꨱꩃ ꨑꨮꨭꩀ ꨂꨣꩃ ꨚꨴꨯꨱꩃ ꨔꨭꩆ꩝ ꨋꩀ ꨤꨫꨥꨪꩀ ꨔꨭꩆ ꨟꨲꩃ ꨋꩀ ꨨꨭꨩ꩞
– ꨀꩃꨆꨩ ꨓꨎꨭꩍ : ꨚꨙꩇ ꨤꩆ ꨀꩌ ꨝꨳꩀ ꨣꨪꨤꨯꨩ ꨧꨯꨱꩃ ꨨꨤꨮꨭ ꨟꨕꨩ꩝ ꨟꨕꨩ ꨗꨲꩍ ꨣꨞꨩ ꨎꨲꩃ ꨕꨶꨩ ꨐꨯꨱꩌ: ꨚꨙꩇ ꨣꩀ ꨚꨙꨳꩀ ꨢꨮꨩ: ꨈꨵꩍ꩝ ꨈꨯꨱꩀ ꨈꨵꩍ꩝ (ꨈꨯꨱꩀ ꨀꨯꨱꩌ) ꨚꨖꨪ꩝ ꨇꩃ꩝ ꨝꨭꩀ꩝ ꨈꨫꨑꨫꩍ꩝ ꨨꨥꨤꨯꨱꨥ꩝ ꨇꨭꩂ ꨚꨬꨧꨰꨮꩈ꩝ ꨇꨭꩂ ꨚꨬ ꨆꩆ; ꨚꨙꩇ ꨚꨕꩃ ꨢꨮꨩ: ꨇꩃ ꨝꨴꩍ꩝ ꨝꨭꩀ ꨚꨴꨯꨱꩃ꩝ ꨝꨭꩀ ꨧꨪꩅ꩝ ꨇꩃ꩝ ꨆꨩ ꨌꨶꩄ ꨨꨤꨩ…
-ꨀꩃꨆꨩ ꨕꨤꨪꨚꩉ: ꨕꨯꨱꩀ ꨚꩀ ꨚꨤꨬ ꨌꩌ ꨌꨆꨵꨰꩂ꩝ ꨕꨫ ꨞꨭꩌ ꨗꨫꩆ ꨜꨮꨲꩀ꩝ ꨗꨈꩉ ꨇꩆ ꨨꨶꨩ ꨤꩄ ꨨꨭꨩ ꨝꨴꨭꩀ ꨟꨐꨪꩌ ꨎꨪꩍ ꨕꨤꩍ ꨌꨣꨰ ꨝꨳꩀ ꨆꨣꨬ ꨧꨯꨱꩃ ꨇꨮꩍ ꨟꨓꨩ꩞
-ꨀꩃꨆꨩ ꨧꨤꨪꨚꩉ : ꨨꨭꨩ ꨔꨮꨭ꩝ ꨝꨴꨭꩀ ꨟꨐꨪꩌ ꨎꨪꩍ ꨕꨨꨵꩍ ꨨꨭꨩ ꨚꨮꩍ ꨡꨯꨱꩀ ꨟꨲꩃ ꨀꨝꩇ ꨢꨆꨩ ꩑꩐꩝ ꨋꩆ ꨧꨯꨱꩃ ꨅꩃ ꨟꨭꩀꨆꨬ ꨤꩄ ꨟꨭꩀ ꨍꨩ ꨟꨭꩀ ꨌꨤꨮꩃ ꨧꨯꨱꩃ ꨀꨟꨭꩀ ꨦꨩ꩞ ꨕꨯꩌ ꨈꩍ ꨆꨣꨬ ꨈꨪꨤꩄ ꨇꩆ ꨝꨴꨬ ꨔꨮꨭ ꨤꩄ: ꨝꨴꨭꩀ ꨟꨐꨪꩌ ꨨꨭꨩ ꨟꨲꩃ ꨀꨝꩇ ꩑꩗꩝ ꨓꨭꩀ ꨀꨟꨭꩀ ꨛꨯꨮ ꨗꨈꩉ ꨌꨰꩀ ꨥꨮꩀ ꨝꨴꨭꩀ ꨋꩀ ꨆꨩ ꨅꩃ ꨧꨩ ꨧꨯꨱꩃ ꨀꨟꨭꩀ ꨌꨩ ꨤꨮꩃ꩝ ꨚꨮꩍ ꨀꨆꨯꨱꩀ ꨆꨩ ꨥꩀꨓꨭꨩ ꨚꨓꨈꨯꩀ ꨕꨘꩀ ꨕꨗꨯꨱ ꨗꨫ ꨢꨮꨩ ꨧꨩ ꨝꨴꨭꩀ ꨋꩀ ꨌꨣꨪꩅ꩞
-ꨀꩃꨆꨩ ꨚꨵꨭꩍ: ꨇꩆ ꨝꨰ ꨎꨪꩍ ꨕꨨꨵꩍ ꨟꨲꩃ ꨀꨆꨯꨱꩀ ꨣꨮꩇ ꨓꨯꩀ ꨟꨐꨪꩌ ꨟꨲꩃ ꨝꨪꨊꨭꨩ ꨤꨩ ꨡꨶꩆ ꨚꨳꩍ ꨕꨭꩍ ꨆꨩ ꨝꨴꨭꩀ ꨡꩃ ꨊꨶꩈ ꨢꨯꨱꩀ ꨨꨣꨬ꩝ ꨤꨪꨊꨪꨥ ꨕꨯꩌ ꨚꨙꩇ ꨚꨳꩍ ꨆꨩ ꨚꨓꨯꨱ꩝ ꨣꨩ ꨈꨫꨗꨭꩇ ꨨꨭꨩ ꨋꩀ ꨓꨗꨫ ꨓꨘꩅ ꨣꨪꨤꨯ꩞ ꨎꨪꩍ ꨕꨨꨵꩍ ꨅꩍ ꨤꩄ ꨀꨊꨭꩈ ꨌꨭꩀ ꨝꨵꨯꨱꩍ ꨕꨯꨱꩀ ꨤꩄ ꨔꨰꩀ ꨝꨪꨊꨭꩀ ꨆꨩ ꨝꨴꨭꩀ ꨉꨮꩍ ꨧꨳꩌ꩝ ꨝꨴꨬ ꨔꨮꨭ ꨤꨪꨝꨪꩀ ꨕꩃ ꨕꨫ ꨞꩇꨝꨫꨗꨫ ꨧꨯꨱꩃ ꨨꨓꨰ ꨎꨳꨩ ꨓꨟꨲꨩ ꨕꨫ ꨀꨈꨠꨩ ꨕꨫ ꨂꨣꩃ ꨌꩌ꩞
-ꨀꩃꨆꨩ ꨚꨵꨭꩍ ꨧꨩ: ꨤꨪꨊꨪꨥ ꨕꨫ ꨘꩆ꩝ ꨚꩀ ꨕꨶꨩ ꨚꨤꨬ ꨌꩌ ꨚꨚꨵꩇ ꨝꨪꨣꨮꨭ ꨧꨯꨱꩃ ꨚꨚꨵꩇ ꨆꨵꩀ ꨕꨫ ꨞꨭꩌ ꨧꨶꩆ ꨨꨰ ꨕꨯꨱꩀ ꨇꨪꩀ ꨣꨟꨪꩀ ꨧꨯꨱꩃ ꨚꨓꨈꨯꩀ ꨝꨴꨭꩀ ꨋꩀ ꨎꨴꨭ ꨉꨩ ꨨꨣꨮꩀ ꨌꨣꨪꩅ ꨕꨫ ꨝꨯꨱꩊ ꨞꩇ ꨕꨴꨬ ꨥꨮꩀ ꨘꩆ꩞
-ꨀꩃꨆꨩ ꨚꨵꨭꩍ ꨕꨶꨩ : ꨕꨯꨱꩀ ꨎꨰꩀ ꨓꨜꨳꨩ ꨧꨯꨱꩃ ꨤꨪꨊꨪꩀ ꨓꨧꨪꩀ꩝ ꨓꨗꨮꩍ ꨣꨪꨢꨩ꩝ ꨂꨣꩃ ꨌꩌ ꨔꨮꨭ ꨀꨊꨶꩈ ꨕꨯꩌ ꨎꨗꨫꩍ ꨜꨭꩆ꩝ ꨉꨩ ꨨꨣꨮꩀ ꨚꨳꩍ ꨀꨳꨮꩀ ꨣꨶꩀ ꨧꨯꨱꩃ ꨨꨭꨩ ꨕꨯꩌ ꨎꨗꨫꩍ ꨎꨴꨭ ꨧꨳꩌ꩞ ꨓꨶꨰ ꨚꨧꩃ ꨀꨳꨮꩀ ꨕꨫ ꨆꨚꨭꩊ ꨐꨯꨱꩌ ꨎꨴꨭ ꨉꨩ ꨨꨣꨮꩀ ꨗꨈꩉ ꨗꨫꩆ ꨔꨶꩆ ꨆꨵꩀ꩝ ꨂꨣꩀ ꨗꨫ ꨨꨭꨩ ꨆꨵꨮꨭ ꨣꨓꨭꩍ ꨎꨗꨫꩍ ꨙꨯꨱꩌ ꨧꨤꨪꨚꩉ ꨚꨵꨭꩍ ꨓꨎꨭꩍ ꨐꨯꨱꩌ ꨜꨭꩆ ꨚꨤꨩ ꨨꨭꨩ ꨂꨣꩃ ꨌꩌ ꨋꩀ ꨎꨲꩃ ꨎꨴꨭ ꨋꩆ ꨧꨯꨱꩃ ꨘꩌ ꨣꨓꨭꩍ ꨎꨗꨫꩍ꩞ ꨋꩆ ꨧꨯꨱꩃ ꨚꩀ ꨣꨓꨭꩍ ꨎꨗꨫꩍ ꨎꨴꨭ ꨝꨪꩆꨣꨫꩀ꩝ ꨕꨤꩌ ꨘꩆ ꨨꨭꨩ ꨤꨝꨰꩍ ꨧꨩ ꨣꨓꨭꩍ ꨎꨗꨫꩍ ꨨꨭꨩ ꨈꩍ ꨀꨳꨮꩀ ꨣꨶꩀ ꨚꨌꩃ ꨀꨳꨮꩀ꩝ ꨝꨴꨬ ꨨꨣꩀ ꨝꨴꨬ ꨔꨮꨭ ꨤꩄ ꨎꨗꨫꩍ ꨎꨴꨭ ꨟꨲꩃꨆꩆ ꨨꨭꨩ ꨀꨳꨮꩀ ꨣꨶꩀ ꨧꨳꩌ ꨀꨝꨪꩍ꩞ ꨨꨭꨩ ꨔꨮꨭ꩝ ꨟꨲꩃ ꨝꨴꨭꩀ ꨋꩀ ꨗꨫ꩝ ꨟꨫꩀꨥꨩ ꨨꨭꨩ ꨣꨯꨱꩃ ꨀꨗꨲꩀ ꨗꨯꨱ ꨝꩄ ꨎꩀ ꨎꨲꩃ ꨓꩊ ꨨꨣꨬ ꨗꨫ꩞
-ꨀꩃꨆꨩ ꨚꨵꨭꩍ ꨆꨵꨮꨭ: ꨕꨯꨱꩀ ꨚꨤꨬ ꨀꨢꨭꩅ ꨕꨯꨱꩀ ꨨꨭꨩ ꨝꨴꨭꩀ ꨋꩀ ꨟꨲꩃꨆꩆ ꨨꨤꨬ ꨅꩍ?
-ꨀꩃꨆꨩ ꨚꨵꨭꩍ ꨚꩀ: ꨕꨤꩌ ꨕꨯꩌ ꨚꨤꨬ ꨋꩀ ꨟꨲꩃꨆꩆ ꨕꨫ ꨂꨣꩃ ꨌꩌ꩝ ꨀꨢꨭꩅ ꨨꨭꨩ ꨗꨯꨱ ꨓꩊ ꨚꨤꨬ ꨨꨤꨬ ꨚꨎꨮꨩ ?
-ꨀꩃꨆꨩ ꨚꨵꨭꩍ ꨤꨫꨟꨲꨩ: ꨌꨰꩀ ꨕꨤꩌ ꨨꨓꨰ ꨀꨢꨭꩅ ꨀꨝꨪꩍ ꨕꨫ ꨕꨯꩌ ꨚꨤꨬ ꨋꩀ ꨂꨣꩃ ꨌꩌ ꨇꩆ ꨨꨶꨩ ꨤꩄ ꨨꨈꨰꩅ?
Leave a Reply